សឿន សំណាង - La Reine Media

លោក Trump ឧទ្ទេសនាមបណ្ដាញសង្គមថ្មី និងផ្ទាល់ខ្លួន

លោក Donald Trump មានគម្រោងបង្ហាញវត្តមានបណ្ដាញសង្គមផ្ទាល់ខ្លួននៅក្នុងអំឡុងពីពីរទៅបីខែខាងមុខ ដែលនេះគឺជាការអះអាងរបស់ទីប្រឹក្សានៃអតីតប្រធានាធិបតីសហរដ្ឋអាមេរិក។

Jason Miller ដែលជាអ្នកនាំពាក្យសម្រាប់យុទ្ធនាការឃោសនារកសំឡេងឆ្នោតរបស់លោក Trump កាលពីឆ្នាំ 2020 បានប្រាប់សារព័ត៌មាន Fox News កាលពីថ្ងៃទី 21មីនាថា អតីតប្រធានាធិបតីអាមេរិក លោក Donald Trump នឹងបង្ហាញវត្តមាននៅលើបណ្ដាញសង្គមជាថ្មីជាមួយនឹងថ្នាលដោយឡែករបស់ខ្លួនដែលអាច «កំណត់ឡើងវិញទាំងអស់នូវអត្ថន័យនៃការប្រកួតប្រជែង»។

ចាប់តាំងពីបានចាកចេញពីរដ្ឋធានីវ៉ាស៊ីងតោន និងត្រលប់ទៅរស់នៅក្នុងតំបន់លម្ហែកាយ Mar-a-Lago ក្នុងរដ្ឋ Florida លោក Trump មិនបានបង្ហាញខ្លួនញឹកញាប់នៅមុខសាធារណជនដូចមុនៗទៀតទេ ហើយលោកតែងចេញសេចក្ដីប្រកាសព័ត៌មានជំនួសវិញ។ ក៏ប៉ុន្តែ បើតាម លោក Miller លោក Trump បានធ្វើកិច្ចការយ៉ាងយកចិត្តទុកដាក់។

«គាត់មានកិច្ចប្រជុំសំខាន់ៗជាច្រើននៅ Mar-a-Lago។ មានក្រុមហ៊ុនជាច្រើនបានមកជួបប្រជុំជាមួយលោក» ទីប្រឹក្សារបស់លោក Trump បានឱ្យដឹងដូច្នេះ។

«ថ្នាលថ្មីនេះនឹងធំ ហើយខ្លាំង។ល។ គាត់នឹងនាំមនុស្សរាប់លាន រាប់លាននាក់ ឬរាប់សិបលាននាក់មកកាន់ថ្នាលថ្មីនេះ» Miller បានបន្ថែមបែបនេះ ប៉ុន្តែ មិនបានផ្ដល់ព័ត៌មានលម្អិតអ្វីដែលទាក់ទងនឹងគម្រោងខាងលើនេះទេ។

សូមរំលឹកថា Facebook, Twitter រួមនឹងបណ្ដាញសង្គមជាច្រើនផ្សេងទៀត បានរាំងខ្ទប់គណនីរបស់លោក Trump ក្រោយពីមានអំពើហិង្សានៅភ្នំ Capitol កាលពីថ្ងៃទី6 មករា នៅពេលដែលលោកត្រូវបានគេចោទថា បានញុះញង់ឱ្យក្រុមបាតុករសម្រុកចូលអគារសភាអាមេរិក។

មុនពេលត្រូវបានរាំងខ្ទប់ លោក Trump តែងតែប្រើប្រាស់បណ្ដាញសង្គមដើម្បីរិះគន់ដល់ក្រុមមនុស្សដែលបានថ្កោលទោសលោក ឬដើម្បីប្រកាសអំពីការផ្លាស់ប្ដូរបុគ្គលិក ឬមួយការកែប្រែគោលនយោបាយសំខាន់៕

ប្រភព៖ CNA
ប្រែសម្រួល៖ បុត្រា

March 22, 2021

ស្ថានភាព Covid-19 នៅទូទាំងពិភពលោក គិតត្រឹមព្រឹកថ្ងៃទី22 មីនា 2021

យោងតាមសារព័ត៌មាន Worldometers ក្នុងអំឡុង 24ម៉ោងកន្លងទៅ ពិភពលោកបានរកឃើញអ្នកវិជ្ជមាននឹង Covid-19 ថ្មីជាង 409,000នាក់ និងជាង 5,600នាក់បានស្លាប់ នាំឱ្យតួលេខវិជ្ជមានសរុបកើនដល់ 123.8លាននាក់ ក្នុងនោះមានជាង 2.72លាននាក់បានបាត់បង់ជីវិត។

ប្រទេសចំនួន3 ដែលមានករណីឆ្លង Covid-19 ច្រើនជាងគេក្នុងអំឡុង24ម៉ោងកន្លងទៅ រួមមានប្រទេសប្រេស៊ីល (47,774នាក់), ឥណ្ឌា (47,009នាក់) និងសហរដ្ឋអាមេរិក (ជាង 37,000នាក់)។

ប្រទេសចំនួន3 ដែលមានករណីស្លាប់ដោយសារ Covid-19 ច្រើនជាងគេក្នុងរយៈពេល24ម៉ោងកន្លងទៅគឺមាន ប្រេស៊ីល (1,186នាក់), ម៉ិកស៊ិក (608នាក់) និងសហរដ្ឋអាមេរិក (437នាក់)។

បច្ចុប្បន្ន ស្ថានភាព Covid-19 នៅប្រេស៊ីល មានភាពធ្ងន់ធ្ងរជាងគេបង្អស់ នៅពេលតួលេខអ្នកវិជ្ជមាន និងអ្នកស្លាប់ប្រចាំថ្ងៃស្ថិតក្នុងកម្រិតខ្ពស់បំផុតក្នុងពិភពលោក។ ប្រទេសនេះក៏តែងតែឈរលំដាប់ទីពីរក្នុងពិភពលោកបន្ទាប់ពីសហរដ្ឋអាមេរិក បើនិយាយអំពីតួលេខសរុបនៃករណីឆ្លង និងករណីស្លាប់ដោយសារ Covid-19 រាប់ចាប់តាំងពី Covid-19 បានបង្ហាញខ្លួន៕

ប្រភព៖ Worldometers
ប្រែសម្រួល៖ បុត្រា

March 22, 2021

Cucci លក់ស្បែកជើងស្រមោលតម្លៃចាប់ពី 9ដុល្លារអាមេរិក ដែលស្រដៀងនឹង Bitcoin

ស្បែកជើងឌីជីថល ឬហៅថាស្បែកជើងស្រមោលរបស់ក្រុមហ៊ុន Gucci មានតម្លៃទាបជាងឆ្ងាយបើធៀបនឹងស្បែកជើងពិត ក៏ប៉ុន្តែអ្វីដែលជារឿងគួរឱ្យយកចិត្តទុកដាក់ នោះគឺថា ម្ចាស់ស្បែកនេះនឹងមិនអាចយកវាមកពាក់បាននោះទេ។

Gucci ដែលជាយីហោសម្លៀកបំពាក់ដ៏ល្បីល្បាញមួយក្នុងពិភពលោក ទើបតែបានដាក់លក់ផលិតផលមួយដែលស្ថិតក្នុងប្រភេទ NFT (Non-fungible token) នោះគឺស្បែកជើងស្រមោល ពោលគឺស្បែកជើងដែលមិនមានរូបរាងអាចប៉ះពាល់បាន។

NFT គឺជាកូដតំណាងឱ្យវត្ថុជាផលិតផលដែលប្រើប្រាស់បច្ចេកវិទ្យា blockchain ដូចទៅនឹងរូបិយវត្ថុឌីជីថល Bitcoin។ ការកាន់កាប់ NFT ត្រូវបានប្រៀបប្រដូចទៅនឹងការទិញទំនិញកម្រមួយប្រភេទដែលមានតែមួយគត់នៅក្នុងលោក។ អ្នកវិនិយោគទិញ NFT ដែលភ្ជាប់ជាមួយនឹងផលិតផលអ្វីមួយគឺមានបំណងក្លាយជាម្ចាស់តែម្នាក់គត់ ឬរំពឹងថា ផលិតផលដែលខ្លួនបានទិញនោះនឹងឡើងថ្លៃ ហើយលក់វាចេញដើម្បីបានចំណេញ។ ទន្ទឹមនឹងការលេចធ្លោរបស់ប្រាក់អេឡិចត្រូនិកដូចជា Bitcoin ជាដើម NFT ក៏កំពុងក្លាយជាទំនិញថ្មីដែលត្រូវបានក្រុមអ្នកវិនិយោគយកចិត្តទុកដាក់ខ្ពស់នាពេលថ្មីៗនេះដែរ។

ដើម្បីបង្កើតបានផលិតផលស្រមោលនេះ Gucci បានសហការជាមួយក្រុមហ៊ុនបច្ចេកវិទ្យាផ្នែកសម្លៀកបំពាក់ឈ្មោះ Wanna ដែលមានទីស្នាក់ការកណ្ដាលនៅប្រទេសបេឡារុស។ ក្រុមហ៊ុន Wanna មានឈ្មោះល្បីល្បាញជាមួយនឹងការប្រើប្រាស់បច្ចេកវិទ្យា AR (Augmented reality) ដើម្បីបង្កើតបានជាម៉ូដែលផលិតផលឌីជីថល 3D ដូចជាស្បែកជើងកីឡា និងនាឡិកា។ល។

Wanna ធ្លាប់សហការជាមួយ Reebok, Puma និង Snapchat ដើម្បីពិនិត្យទៅលើររៀបដែលអតិថិជនទទួលយកបទពិសោធន៍ក្នុងការលសម្លៀកបំពាក់ស្រមោលនៅលើកម្មវិធី (App) របស់ពួកគេ។ ក្រុមហ៊ុននេះក៏ធ្លាប់សហការជាមួយ Gucci ដើម្បីជួយឱ្យអតិថិជនលសក្បែកជើងនៅលើ App ផងដែរ។

ស្បែកជើងស្រមោលរបស់ Gucci នេះនឹងមានតម្លៃ 8.99ដុល្លារនៅលើ App របស់ក្រុមហ៊ុន Wanna និង 11.99ដុល្លារនៅលើ App របស់ Gucci។ ជាមួយនឹងផលិតផលស្រមោលខាងលើ Gucci កំពុងតម្រង់ទិសដៅទៅរកអតិថិជនជំនាន់ Z (យុវវ័យ) ដែលមានការយល់ដឹងច្រើនអំពីបច្ចេកវិទ្យា ជាក្រុមមនុស្សដែលអាចមិនទាន់មានលទ្ធភាពទិញផលិតផលពិតរបស់យីហោនេះ៕

ប្រភព៖ Hypebeast
ប្រែសម្រួល៖ បុត្រា

March 20, 2021

តួលេខអ្នកវិជ្ជមាននឹង Covid-19 នៅកម្ពុជា គិតត្រឹម 24ម៉ោងនៃថ្ងៃទី 19មីនា 2021

កម្ពុជារកឃើញអ្នកវិជ្ជមាននឹង Covid-19 ថ្មី ចំនួន 54នាក់ និងជាសះស្បើយចំនួន 18នាក់ នៅក្នុងថ្ងៃទី19 ខែមីនា 2021 ទន្ទឹមនឹងអ្នកបានជាសះស្បើយចំនួន 18នាក់។

ក្នុងចំណោមអ្នកវិជ្ជមានថ្មីខាងលើ មាន 1ករណីជាអ្នកដំណើរពីបរទេសដែលមិនមែនជាពលករខ្មែរត្រលប់មកពីប្រទេសថៃ។ ក្រៅពីនេះគឺសុទ្ធតែជាករណីពាក់ព័ន្ធនឹងព្រឹត្តិការណ៍20កុម្ភៈ។

គិតមកដល់បច្ចុប្បន្ន កម្ពុជាមានអ្នកឆ្លងវីរុស Covid-19 សរុបចំនួន 1,632នាក់ ក្នុងនោះមានអ្នកជាសះស្បើយចំនួន 935នាក់, ស្លាប់ 3នាក់ និងកំពុងព្យាបាលចំនួន 692នាក់៕

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 20, 2021

ស្ថិតិសង្ខេបនៃ Covid-19 នៅទូទាំងពិភពលោក គិតត្រឹមព្រឹកថ្ងៃទី 20មីនា 2021

ពិភពលោកទាំងមូលបានរកឃើញអ្នកឆ្លងវីរុស Covid-19 សរុបចំនួន 122,868,566នាក់ ក្នុងនោះមានអ្នកជាសះស្បើយចំនួន 99,027,110នាក់, ស្លាប់ 2,712,570នាក់ និងកំពុងព្យាបាលចំនួន 21,128,869នាក់។

ប្រទេសដែលមានអ្នកស្លាប់ដោយសារ Covid-19 ច្រើនជាង 100,000នាក់ មាន 6ប្រទេស រួមមាន សហរដ្ឋអាមេរិក (554,040នាក់), ប្រេស៊ីល (290,525នាក់), ម៉ិកស៊ិក (196,606នាក់), ឥណ្ឌា (159,594នាក់), អង់គ្លេស (123,026នាក់) និងអ៊ីតាលី (104,241នាក់)។ ក្រៅពីនេះ តួលេខអ្នកស្លាប់នៅប្រទេសបារាំងក៏កើនជិតដល់ខ្ទង់សែនផងដែរ។

នៅទូទាំងពិភពលោក ទ្វីបអាស៊ីទាំងមូលមានអ្នកឆ្លងវីរុស Covid-19 សរុបចំនួន 26,720,499នាក់ ក្នុងនោះមាន 414,618នាក់បានបាត់បង់ជីវិត ខណៈ 1,407,000នាក់កំពុងព្យាបាល៕

ប្រភព៖ Worldometers
ប្រែសម្រួល៖ បុត្រា

March 20, 2021

រាប់រយនាក់ត្រូវបានសម្លាប់ដោយសារអំពើហិង្សានៅភាគខាងត្បូងប្រទេសកុងហ្គោ

ពលរដ្ឋជិត 200នាក់បានបាត់បង់ជីវិត និង 40,000នាក់ត្រូវចាកចេញពីផ្ទះរាប់ចាប់ពីខែមករា ក្រោយពីការវាយប្រហាររបស់កងកម្លាំងប្រដាប់អាវុធប្រជាធិបតេយ្យសម្ព័ន្ធមិត្ត (Allied Democratic Forces/ADF) នៅភាគឦសាននៃសាធារណរដ្ឋប្រជាធិបតេយ្យកុងហ្គោ។ នេះបើតាមប្រកាសកាលពីថ្ងៃទី 19 មីនា 2021 របស់ឧត្តមស្នងការនៃអង្គការសហប្រជាជាតិទទួលបន្ទុកជនភៀសខ្លួន (UNHCR)។

ក្នុងរបាយការណ៍ខាងលើ UNHCR បានសំដែងការព្រួយបារម្ភខ្លាំងអំពីការកើនឡើងនៃករណីវាយប្រហាររបស់ ADF ដែលជាកងកម្លាំងប្រដាប់អាវុធអ៊ីស្លាម Uganda មានវត្តមាននៅភាគខាងកើតនៃប្រទេសកុងហ្គោចាប់តាំងពីឆ្នាំ 1995។

ចាប់តាំងពីដើមឆ្នាំ 2021 មកដល់បច្ចុប្បន្ន ការវាយប្រហារប្រកបដោយហិង្សានៅក្នុងទីក្រុង Beni នៃខេត្ត Kivu ខាងជើង និងខេត្ត Ituri បានសម្លាប់មនុស្សជិត 200នាក់ និងជាច្រើននាក់ត្រូវរងរបួស ខណៈដែលមនុស្សជាង 40,000នាក់ត្រូវជម្លៀសខ្លួនចេញពីផ្ទះ។ ក្នុងអំឡុងជិត 3ខែមកនេះ ADF ត្រូវបានចោទប្រកាន់ថា បានវាយប្រហារទៅលើភូមិឋានចំនួន 25 និងដុតផ្ទះសម្បែងរបស់ប្រជាជន ព្រមទាំងបានចាប់ជំរិតមនុស្សជាង 70នាក់។

ADF គឺជាឧទ្ទាមដែលប្រើអំពើហិង្សាជាងគេក្នុងចំណោមឧទ្ទាមចំនួន 122ក្រុម ដែលកំពុងធ្វើសកម្មភាពនៅភាគខាងកើតកុងហ្គោ។ កាលពីឆ្នាំ 2020 ក្រុមនេះបានសម្លាប់មនុស្សប្រមាណ 460នាក់។

យោងតាមអង្គការតាមដានសន្តិសុខ Kuvu (KST/Kivu Security Tracker) ចាប់ពីឆ្នាំ 2017 ដល់បច្ចុប្បន្ន ADF បានសម្លាប់ជនស៊ីវិលជាង 1,200នាក់នៅទីក្រុង Beni។

បច្ចុប្បន្ន UNHCR ត្រូវការប្រាក់ 2លានដុល្លារជាបន្ទាន់ដើម្បីជួយដល់ពលរដ្ឋនៅតំបន់ Beni និងតំបន់ Irumu ក្នុងខេត្ត Ituri។ មកដល់ពេលនេះ UNHCR ទើបតែទទួលបាន 5.5% ប៉ុណ្ណោះ ក្នុងចំណោម 33លានដុល្លារដើម្បីជួយដល់ខេត្តនានានៅភាគខាងកើតប្រទេសកុងហ្គោសម្រាប់ឆ្នាំ 2021៕

ប្រភព៖ AFP
ប្រែសម្រួល៖ បុត្រា

March 20, 2021

ក្រសួងសុខាភិបាល៖ មានករណីស្លាប់ដោយសារ Covid-19 ម្នាក់ទៀតហើយ នៅថ្ងៃទី19 មីនា 2021

ក្រសួងសុខាភិបាលកម្ពុជា នាថ្ងៃទី19 ខែមីនា ឆ្នាំ 2021 នេះ បានចេញសេចក្តីប្រកាសព័ត៌មានមួយ ឱ្យដឹងថា មានករណីអ្នកជំងឺ Covid-19 ម្នាក់បានបាត់បង់ជីវិត។

ករណីស្លាប់នេះកើតឡើងចំពោះស្ត្រីជនជាតិខ្មែរអាយុ 62ឆ្នាំ មានទីលំនៅក្នុងសង្កាត់ស្នោ ខណ្ឌកំបូល រាជធានីភ្នំពេញ។ អ្នកជំងឺនេះបានស្លាប់នៅក្នុងមន្ទីរពេទ្យមិត្តភាពខ្មែរ-សូវៀត នៅវេលាម៉ោង 11និង45នាទីព្រឹកថ្ងៃទី 19មីនា 2021។

មូលហេតុដែលនាំឱ្យមានករណីស្លាប់នេះគឺដោយសារសួតរបស់អ្នកជំងឺត្រូវខូចខាតធ្ងន់ធ្ងរ និងស្ទះសរសៃឈាមបេះដូង ព្រោះតែវីរុស Covid-19 បានវាយលុកខ្លាំង។ ព័ត៌មានលម្អិត សូមអានខ្លឹមសារទាំងស្រុងដូចខាងក្រោម៖

អ្នកជំងឺដែលបានបាត់បង់ជីវិតដោយសារ Covid-19។ រូបថត៖ ក្រសួងព័ត៌មាន

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 19, 2021

រន្ទះបាញ់អាចជាអ្នកដែលបានបង្កើតជីវិតនៅលើផែនដី

ការសិក្សាស្រាវជ្រាវថ្មីមួយបានបង្ហាញថា រន្ទះបាញ់ដែលបាញ់ចុះមកកាន់ផ្ទៃដីរបស់ភពផែនដីកាលពីយុគសម័យដំបូងៗ ទំនងជាបានផ្ដល់សារធាតុផូស្វ័រ ( phosphorus) ចាំបាច់ដើម្បីបង្កបង្កើតជីវិត។

ផូស្វ័រគឺជាសមាសធាតុដ៏សំខាន់មួយនៅក្នុងម៉ូលេគុលដែលបង្កបង្កើតរចនាសម្ព័ន្ធរបស់កោសិការាងកាយ និងម្នាសរបស់កោសិកា ហើយជាងនេះ វាក៏បង្កបង្កើតបានជាគ្រោងសម្រាប់ DNA និង ARN ផងដែរ។ ប៉ុន្តែ ផូស្វ័រពិតជាពិបាកត្រូវបានចាប់យកនៅលើផែនដីកាលពីយុគសម័យជាង 4ពាន់លានឆ្នាំមុន។

«ផូស្វ័រស្ទើរតែទាំងអស់នៅលើផែនដីកាលពីយុគសម័យដំបូង ត្រូវជាប់គាំងនៅក្នុងរ៉ែមិនរលាយ និងមិនដំណើរការ មានន័យថា វាមិនអាចត្រូវបានប្រើប្រាស់ដើម្បីបង្កើតជាម៉ូលីគុលជីវសាស្ត្រចាំបាច់សម្រាប់ជីវិត» នេះបើតាមការឱ្យដឹងពីអ្នកវិទ្យាសាស្ត្រ Benjamin Hess មកពីសាកលវិទ្យាល័យ Yale នៃសហរដ្ឋអាមេរិក។

កន្លងមក ក្រុមអ្នកវិទ្យាសាស្ត្រយល់ថា អាចម៍ផ្កាយដែលធ្លាក់មកលើផែនដី បាននាំមកនូវកត្តាចាំបាច់សម្រាប់ជីវិតលើពិភពមួយនេះ។ ដុំថ្មអវកាសត្រូវបានគេដឹងថា មានផ្ទុក schreibersite ជាសារធាតុផូស្វ័រដែលអាចរលាយក្នុងទឹក។ បើសិនជាមានអាចម៍ផ្កាយច្រើនធ្លាក់មកលើផែនដី នោះវាគឺជាប្រភពរបស់ផូស្វ័រដ៏សមស្របសម្រាប់ការកកើតជីវិត។

ក៏ប៉ុន្តែ ការសិក្សាស្រាវជ្រាវថ្មីៗនេះ បានបង្ហាញថា ជីវិតចាប់ផ្ដើមកកើតលើផែនដីរបស់យើងតាំងពី 3.5 ដល់ 4.5ពាន់លានឆ្នាំមុន ហើយក្នុងយុគសម័យនោះ ផែនដីមិនសូវទទួលឥទ្ធិពលពីអាចម៍ផ្កាយ។ ដូច្នេះ បរិមាណផូស្វ័យដែលគាំទ្រដល់ជីវិត អាចមានប្រភពពីយន្តការដទៃ។

រូបភាពឧទ្ទាហរណ៍នៃរន្ទះបាញ់កាលពីយុគសម័យដំបូងៗរបស់ផែនដី

នៅក្នុងរបាយការណ៍ថ្មីមួយនៅលើទស្សនាវដ្ដី Nature Communication ដែលបានចុះផ្សាយកាលពីថ្ងៃទី 16 មីនា 2021 អ្នកវិទ្យាសាស្ត្រ Hess រួមនឹងសហការីរបស់ខ្លួនបានរកឃើញភ័ស្ដុតាងដែលអាចអះអាងបានថា រន្ទះដែលបាញ់ចុះមកផែនដីកាលពីអតីតកាល ទំនងជាបាន «បើកសោ» ឱ្យផូស្វ័រដែលកំពុងជាប់នៅក្នុងរ៉ែផ្សេងៗអាចចេញមកក្រៅ។

កាលពីផែនដីនៅក្មេង រន្ទះបាញ់កើតមានច្រើនជាងសព្វថ្ងៃ ព្រោះថា កាលណោះបរិយាកាសមានផ្ទុកសារធាតុ carbon dioxide យ៉ាងច្រើន។ សព្វថ្ងៃ ផែនដីមានរន្ទះបាញ់ប្រមាណ 560លានដងក្នុងមួយឆ្នាំ។ ក្នុងយុគសម័យដំបូង តួលេខនេះគឺ ចាប់ពី 1 ដល់ 5ពាន់លានដង ក្នុងនោះមានចាប់ពី 100 ទៅ 1ពាន់លានដង បានបាញ់មកលើដី។ ប្រការនេះមានន័យថា រន្ទះបាញ់អាចផ្គត់ផ្គងសារធាតុផូស្វ័រដល់ផែនដីបានយ៉ាងច្រើន។

«ការយល់ដឹងអំពីតួនាទីរបស់រន្ទះបាញ់ដែលដូចទៅនឹងយន្តការបង្កបង្កើតផូស្វ័រដែល «អាចប្រតិកម្ម» គឺជារឿងសំខាន់ក្នុងការសិក្សាស្រាវជ្រាវរកប្រភពនៃជីវិតនៅលើផែនដី ក៏ដូចជាប្រភពនៃជីវិតនៅក្រៅផែនដី។ ការរកឃើញរបស់យើង អាចអនុវត្តនៅលើគ្រប់ពិភពទាំងអស់ដែលមានបរិយាកាសអាចបង្កើតរន្ទះបាញ់» អ្នកវិទ្យាសាស្ត្រ Hess អះអាងដូច្នេះ៕

ប្រភព៖ CNN
ប្រែសម្រួល៖ បុត្រា

March 19, 2021

គម្រោងកសាងរដ្ឋធានីថ្មីរបស់ឥណ្ឌូនេស៊ី នឹងបញ្ចប់នៅក្នុងឆ្នាំ 2024

រដ្ឋមន្ត្រីក្រសួងផែនការអភិវឌ្ឍជាតិឥណ្ឌូនេស៊ី លោក Suharso Monoarfa កាលពីថ្ងៃទី 17 មីនា បានឱ្យដឹងថា គម្រោងកសាងរដ្ឋធានីថ្មីរបស់ប្រទេសនេះនឹងត្រូវបន្តនៅក្នុងឆ្នាំ 2021 ជាមួយនឹងគោលដៅសម្រេចជាស្ថាពរនៅក្នុងឆ្នាំ 2024។

នៅក្នុងសន្និសីទសារព័ត៌មានមួយ កាលពីពេលថ្មីៗនេះ លោក Suharso Monoarfa ដែលជារដ្ឋមន្ត្រី និងជាអ្នកទទួលខុសត្រូវលើការគ្រប់គ្រងគម្រោងកសាងរដ្ឋធានីថ្មី បានឱ្យដឹងថា ថវិកាដែលបានប៉ាន់ប្រមាណដំបូងសម្រាប់ការកសាងរដ្ឋធានីថ្មីនេះ មានចំនួន 466 លានលានរូពី (32.3ពាន់លានដុល្លារអាមេរិក)។ ប៉ុន្តែ តួលេខនេះកំពុងត្រូវបានកែប្រែទៅតាមយុទ្ធសាស្ត្រ និងដំណាក់កាលរបស់គម្រោង។

កាលពីខែសីហា ឆ្នាំ 2020 ឥណ្ឌូនេស៊ី បានសម្រេចផ្អាកបណ្ដោះអាសន្ននូវគម្រោងរើរដ្ឋធានីទៅកាន់កោះ Borneo ដោយសារតែប្រទេសនេះកំពុងប្រឈមនឹងបញ្ហា Covid-19។

លោករដ្ឋមន្ត្រី Monoarfa ថ្លែងថា គម្រោងសាងសង់អគារនានារបស់រដ្ឋាភិបាលនៅក្នុងរដ្ឋធានីថ្មីនឹងត្រូវពន្យារពេលរហូតដល់ឥណ្ឌូនេស៊ីមានលទ្ធផលល្អក្នុងការទប់ស្កាត់ Covid-19។ លោក Monoarfa បញ្ជាក់ថា ការចាប់ផ្ដើមអនុវត្តគម្រោងនេះអាចត្រូវបានពន្យារពេលដល់ឆ្នាំ 2022 ឬ 2023 ព្រោះថា រដ្ឋាភិបាលកំពុងផ្ដោតលើការស្រាវជ្រាវ ដើម្បីអាចផ្គត់ផ្គង់វ៉ាក់សាំងបង្ការ Covid-19 ដល់ពលរដ្ឋជិត 270 លាននាក់។

យោងតាមផែនការដំបូង គម្រោងនេះនឹងត្រូវបានចាប់ផ្ដើមនៅដើមឆ្នាំ 2021 ជាមួយនឹងសកម្មភាពសាងសង់អគាររដ្ឋាភិបាល កែលម្អព្រលានយន្តហោះ កំពង់ផែសមុទ្រ និងផ្លូវថ្នល់នៅក្នុងតំបន់ព្រៃដែលត្រូវបានប្រើប្រាស់សម្រាប់តាំងរដ្ឋធានីឆ្លាតវៃថ្មី។ មកដល់ឆ្នាំ 2024 ដែលជាឆ្នាំចុងក្រោយនៃអាណត្តិទីពីររបស់ប្រធានាធិបតី Joko Widodo ក្រុមមន្ត្រីរដ្ឋាភិបាលនឹងចាប់ផ្ដើមរើទៅធ្វើការនៅរដ្ឋធានីថ្មី។

កាលពីឆ្នាំ 2019 ប្រធានាធិបតី Joko Widodo បានប្រកាសអំពីគម្រោងរើរដ្ឋធានីនេះ ដើម្បីជួយកាត់បន្ថយទម្ងន់របស់ Jakarta ជារដ្ឋធានីដែលស្ថិតនៅលើកោះ Java និងមានប្រជាជន 10លាននាក់កំពុងរស់នៅ។ លោក Masayoshi Son នាយកប្រតិបត្តិរបស់ធនាគារ SoftBank, អតីតនាយករដ្ឋមន្ត្រីអង់គ្លេស Tony Blair និងព្រះអង្គម្ចាស់ត្រៀមស្នងរាជ Sheikh Mohammed Bin Zayed al Nahyan របស់រដ្ឋធានី Abu Dhabi នៃប្រទេសអារ៉ាប់រួម ត្រូវបានអញ្ជើញ និងយាងឱ្យធ្វើជាទីប្រឹក្សាសម្រាប់គម្រោងខាងលើនេះ៕

ប្រភព៖ AA
ប្រែសម្រួល៖ បុត្រា

March 19, 2021

ចានបុរាណចិនដែលទិញពីកន្លែងលក់ទំនិញមួយទឹក ពេលនេះលក់បានជាង 700,000ដុល្លារអាមេរិក

ចានធ្វើអំពីប៉សឺឡែនពណ៌សជំនាន់រាជវង្សមីងនៃប្រទេសចិន ដែលត្រូវបានរកឃើញនៅក្នុងកន្លែងលក់វត្ថុមួយទឹក ដែលមានទីតាំងនៅសហរដ្ឋអាមេរិក ត្រូវបានលក់ក្នុងតម្លៃជាង 722,000ដុល្លារអាមេរិក ខ្ពស់ជាងការព្យាករទៅទៀត។

ចានពណ៌សមួយដែលមានរចនារូបភាពស្លឹកឈើពណ៌ទឹកសមុទ្រដ៏ស្រស់ស្អាត ស្ថិតក្នុងចំណោមស្នាដៃសិល្បៈចិន ត្រូវបាន Sotheby’s ដាក់លក់ដេញថ្លៃកាលពីថ្ងៃទី 17 មីនា 2021 នៅក្នុងព្រឹត្តិការណ៍ Asia Week។ Sotheby’s គឺជាក្រុមហ៊ុនឈ្មួញជើងសាធំជាងគេមួយនៅលើពិភពលោក ទាក់ទងនឹងសិល្បៈលម្អ គ្រឿងអលង្ការ អចលនទ្រព្យ និងវត្ថុបុរាណ។ អត្តសញ្ញាណរបស់អ្នកលក់ និងអ្នកទិញចានបុរាណខាងលើ មិនត្រូវបានគេបង្ហើបឱ្យដឹងនោះទេ។

ក្រុមអ្នកជំនាញបានឱ្យដឹងថា ចានបុរាណនេះត្រូវបានផលិតឡើងសម្រាប់តែរាជវាំងរបស់មហាក្សត្រ Yongle (ព្រះនាមផ្ទាល់ខ្លួនគឺ Zhu Di) ដែលជាស្ដេចទីបីរបស់រាជវង្សមីង សោយរាជចាប់ពីឆ្នាំ 1402 ដល់ 1424។ នេះគឺជាចានបុរាណ 1 ក្នុងចំណោម 7 ដែលនៅមាននៅលើពិភពលោក។ កាលពីខែមុន ចានបុរាណនេះ ត្រូវបានអ្នកស្រលាញ់វត្ថុបុរាណម្នាក់ទិញពីកន្លែងលក់ទំនិញចាស់ៗមួយកន្លែងដែលស្ថិតនៅក្នុងរដ្ឋ Connecticut ភាគឦសាននៃសហរដ្ឋអាមេរិក ក្នុងតម្លៃ 35ដុល្លារ។

អ្នកទិញខាងលើ ក្រោយមកក៏បានផ្ញើព័ត៌មាន និងរូបថតតាមអ៊ីមេលទៅកាន់ Sotheby’s ដើម្បីស្នើឱ្យជួយវាយតម្លៃ។ Sotheby’s បានបញ្ជាក់ថា ចាននេះមានតាំងពីអំឡុងឆ្នាំ 1400 នៃគ្រិស្តសករាជមកម្ល៉េះ។

បច្ចុប្បន្ន មិនទាន់ដឹងច្បាស់ថា ហេតុអ្វីបានជាចានបុរាណនេះអាចមានវត្តមាននៅក្នុងតំបន់លក់ទំនិញមួយទឹកនៅក្នុងរដ្ឋ Connecticut នៅឡើយ។ Angela McAteer ដែលជាអ្នកគ្រប់គ្រងផ្នែកស្នាដៃសិល្បៈចិនរបស់ក្រុមហ៊ុន Sotheby’s បានឱ្យដឹងថា ចាននេះប្រហែលជាត្រូវបានគ្រួសារមួយរក្សាទុកពីជំនាន់មួយ ទៅជំនាន់មួយ ហើយពួកគេមិនបានដឹងអំពីតម្លៃពិតរបស់វា។

កន្លងមក មុនពេលដាក់លក់ដេញថ្លៃ Sotheby’s ព្យាករថា ចាននេះមានតម្លៃចាប់ពី 300,000 ដល់ 500,000ដុល្លារអាមេរិក។ ប៉ុន្តែ ជាក់ស្ដែងពេលនេះ វាត្រូវបានគេទិញក្នុងតម្លៃជាង 722,000ដុល្លារអាមេរិក។

ចានចំនួន 5 ក្នុងចំណោមចានដែលត្រូវបានគេស្គាល់ កំពុងស្ថិតក្នុងសារមន្ទីរ រួមមាន៖ 2 នៅកោះតៃវ៉ាន់, 2 នៅក្រុងឡុងដ៍នៃប្រទេសអង់គ្លេស និង 1 នៅទីក្រុងតេហេរ៉ង់ ប្រទេសអ៊ីរ៉ង់៕

ព័ត៌មានទាក់ទង> ចានបុរាណចិននៅអាមេរិក ត្រូវគេទិញក្នុងតម្លៃ 35ដុល្លារ តែលក់វិញតម្លៃ 500,000ដុល្លារ

ប្រភព៖ AP, CNN
ប្រែសម្រួល៖ បុត្រា

March 19, 2021

Author: សឿន សំណាង