សឿន សំណាង - La Reine Media

ករណីស្លាប់ដោយសារ Covid-19 នៅកម្ពុជា កើនឡើងដល់ 5នាក់ហើយ!

ស្ត្រីអ្នកជំងឺ Covid-19 ម្នាក់ដែលជាជនជាតិខ្មែរ មានអាយុ 62ឆ្នាំ រស់នៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានស្លាប់នៅមន្ទីរពេទ្យរុស្ស៊ី នេះបើតាមសេចក្ដីប្រកាសរបស់ក្រសួងសុខាភិបាល។

ករណីស្លាប់បានខាងលើនេះ បានកើតឡើងនៅព្រឹកថ្ងៃទី23 ខែមីនា ឆ្នាំ2021 នៅពេលកំពុងអ្នកជំងឺកំពុងសម្រាកព្យាបាល។ នេះគឺជាករណីស្លាប់ដោយសារវីរុស Covid-19 ទី5ហើយ ដែលបានកើតឡើងនៅក្នុងប្រទេសកម្ពុជា។

គិតមកដល់ព្រឹកថ្ងៃទី 23មីនា 2021 កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 1,788នាក់ ក្នុងនោះមានអ្នកជាសះស្បើយចំនួន 999នាក់ ខណៈអ្នកស្លាប់មានចំនួន4នាក់ និងកំពុងព្យាបាលចំនួន 783នាក់៕

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 23, 2021

ស្អាតដូចតួកុន! ស្ត្រីចិនអ្នកបកប្រែ ដណ្ដើមបានចំណាប់អារម្មណ៍អ្នកតាមដាន កិច្ចប្រជុំមន្ត្រីជាន់ខ្ពស់ “ចិន-អាមេរិក”

កាលពី 8ឆ្នាំមុន កិច្ចប្រជុំក្នុងប្រធានបទដ៏វែងអន្លាយមួយស្ដីពី “ខ្លឹមសារដែលពាក់ព័ន្ធ និងចំណុចពិចារណា នៃផែនការកែសម្រួលស្ថាប័ន និងការធ្វើការងាររបស់សភានៃរដ្ឋ” របស់សភាប្រជាជននៃប្រជាជាតិចិន ដែលជាកិច្ចប្រជុំសម័យទី12 បានក្លាយជាព័ត៌មាន និងទទួលបានការចាប់អារម្មណ៍ពីសាធារណជនយ៉ាងច្រើនលើសលប់ និងមិនគួរឱ្យជឿ។

ប្រាកដណាស់! មិនមែនមកពីខ្លឹមសាររបស់កិច្ចប្រជុំនោះទេ តែដោយសារតែអ្នកបកប្រែស្រីស្អាតម្នាក់ ដែលមានឈ្មោះថា ចាងជីង ហ្នឹងឯង ដែលមកដល់ថ្ងៃនេះ នាងបានវិលមកល្បីល្បាញជាថ្មីម្ដងទៀតហើយ…។

ចាងជីង ជាអ្នកស្រុកហាំងចូ ចាប់ផ្ដើមចេញពន្លឺលេចធ្លោឡើង ដោយសារការរៀនផ្នែកភាសាបរទេស នៅមហាវិទ្យាល័យ ក្នុងស្រុកកំណើត រហូតត្រូវបានជ្រើសរើស ឱ្យទៅសិក្សាបន្តនៅឯស្ថាប័នការសិក្សាដ៏ល្បីល្បាញមួយ ជាមហាវិទ្យាល័យទំនាក់ទំនងអន្តរជាតិ ស្ថិតនៅក្នុងទីក្រុងប៉េកាំង ដែលតែងតែជ្រើសរើសចម្រាញ់យកតែនិស្សិតណា ដែលមានភាពលេចធ្លោជាពិសេសផ្នែកភាសា ចំនួន 200នាក់ ពីទូទាំងប្រទេស ឱ្យមកសិក្សាបន្ត ដើម្បីបំពេញតួនាទីលើផ្នែកការបរទេសរបស់រដ្ឋបាលចិន ហើយចាងជីង ក៏ជាមនុស្សម្នាក់ក្នុងចំណោមនោះដែរ។

លក្ខណសម្បត្តិផ្ទាល់ខ្លួន របស់ចាងជីង អាចនិយាយបានថា មានភាពលេចធ្លោ មកតាំងពីសម័យជានិស្សិតស្រាប់ទៅហើយ និងក្លាយជាទីគោរពរាប់អានរបស់សិស្សជំនាន់ប្អូនជាច្រើន ហើយថែមទាំងធ្លាប់បានចូលរួមប្រកួតប្រជែងជំនាញផ្នែកភាសា រហូតទទួលបានរង្វាន់លំដាប់ថ្នាក់ជាតិរួចមកហើយជាច្រើនដង រួមទាំងការដណ្ដើមបានរង្វាន់ ការថ្លែងសុន្ទរកថា ជាភាសាអង់គ្លេស កាលពីសម័យនៅជានិស្សិតទៀតផង។

រហូតនៅពេលបានទទួលការដាក់បញ្ចូលឈ្មោះជាមន្ត្រីរបស់រដ្ឋបាលចិន ចាងជីង ក៏បានបង្ហាញនូវភាពលេចធ្លោ ក្នុងការបំពេញតួនាទី នៅក្នុងកិច្ចប្រជុំក្នុងកម្រិតអន្តរជាតិ រហូតលេចចេញជាព័ត៌មាន ទាំងលើប្រព័ន្ធផ្សព្វផ្សាយរបស់ចិនខ្លួនឯង និងក្នុងសារព័ត៌មានអន្តរជាតិទៀតផង។

រហូតមកដល់ថ្ងៃនេះ ឈ្មោះចាងជីង បានវិលត្រឡប់មកក្លាយជាព័ត៌មានល្បីល្បាញជាថ្មីម្ដងទៀត ជាមួយការបំពេញតួនាទី ជាអ្នកបកប្រែនៅក្នុងកិច្ចប្រជុំពាណិជ្ជកម្មកំពូល រវាងចិន និងសហរដ្ឋអាមេរិក កាលពីពេលថ្មីៗនេះ។ ឃ្លីប ដែលចាងជីងបំពេញតួនាទី ដែលមានអ្នកទស្សនានៅក្នុងប្រទេសចិនដីគោករាប់សិបលានដង និងរឿងរ៉ាវ ជាមួយរូបភាពរបស់នាង ថែមទាំងត្រូវបានបង្ហាញឡើងនៅក្នុងប្រព្ធ័ន្ធផ្សព្វផ្សាយបរទេសជាច្រើនផងដែរ។

នៅក្នុងបទសម្ភាសមួយ ជាមួយប្រព័ន្ធផ្សព្វផ្សាយចិន ចាងជីង បានប្រាប់ថា នាងគ្រាន់តែជាជនជាតិចិនធម្មតាៗម្នាក់ ដែលចូលចិត្តអានវណ្ណកម្មរបស់ចិន និងតាំងចិត្តរៀនសូត្រតាមប្រក្រតីតែប៉ុណ្ណោះ។

អ្នកយកព័ត៌មាន បានសួរថា តើហេតុអីបានអ្នកនាង មើលទៅមានទឹកមុខ ហាក់ដូចជាមាំម៉ឺងម៉ាត់ ពេលបំពេញការងារ? ចាងជីងប្រាប់ថា ទឹកមុខដែលនាងធ្វើ គឺត្រូវការបង្ហាញភាពគួរឱ្យគោរពជឿជាក់ ដូច្នេះហើយទើបនាងមិនអាចញញឹមញញែម ឬសើចលេងអ្វីបានច្រើននោះទេ។

កំលោះៗជនជាតិចិនជាច្រើន សុទ្ធតែប្រាប់ថា ចាងជីង គឺជាស្ត្រីក្នុងក្ដីសុបិនរបស់ពួកគេយ៉ាងពិតប្រាកដ ចំណែកនារីៗជាច្រើននាក់វិញ ប្រាប់ថា នេះគឺជាកម្លាំងជំរុញចិត្តរបស់ពួកគេដូចគ្នា និងថែមទាំងមានអ្នកប្រាប់ថា រូបសម្ផស្សរបស់នាង មើលទៅហាក់ស្រដៀងនឹងតារាស៊ូភើរស្តាររបស់ចិនដីគោកម្នាក់ ឈ្មោះ ចៅវើយ មែនទែន៕

ប្រភព៖ សាព័ត៌មានបរទេស
ប្រែសម្រួលដោយ ទិទីតំតាតូ

March 23, 2021

អ្នកវិជ្ជមាននឹង Covid-19 ចំនួន 35នាក់ទៀតហើយ ត្រូវបានរកឃើញក្នុងថ្ងៃទី22មីនា

កម្ពុជាបានរកឃើញអ្នកវិជ្ជមាននឹងវីរុស Covid-19 ថ្មី ចំនួន 35នាក់ទៀត នៅក្នុងអំឡុង24ម៉ោងនៃថ្ងៃទី22 ខែមីនា 2021។

ក្នុងចំណោមអ្នកវិជ្ជមានខាងលើ មាន 2នាក់គឺជាករណីនាំចូល ដែលមិនមែនជាពលករខ្មែរត្រលប់ពីប្រទេសថៃ។ ចំណែក 23នាក់ទៀត ពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃដដែលនោះដែរ កម្ពុជាក៏មានអ្នកជាសះស្បើយចំនួន 32នាក់។

គិតមកដល់ព្រឹកថ្ងៃទី 23មីនា 2021 កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 1,788នាក់ ក្នុងនោះមានអ្នកជាសះស្បើយចំនួន 999នាក់ ខណៈអ្នកស្លាប់មានចំនួន4នាក់ និងកំពុងព្យាបាលចំនួន 783នាក់៕

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 23, 2021

ថ្មី! វ៉ាក់សាំងCovid-19 ប្រភេទគ្រាប់សម្រាប់លេប ត្រៀមធ្វើការពិសោធលើមនុស្សហើយ!

វ៉ាក់សាំងបង្ការ Covid-19 ដែលត្រូវបានផ្សំឡើងជាប្រភេទគ្រាប់សម្រាប់លេបដែលអាចប្រើប្រាស់នៅតាមផ្ទះ នឹងអាចត្រូវបានធ្វើការពិសោធលើមនុស្សនាពេលដ៏ខ្លីខាងមុខ។

យោងតាមសារព័ត៌មាន RT វ៉ាក់សាំងប្រភេទថ្មីដំបូងគេដែលមានឈ្មោះថា Oravax នេះ ត្រូវបានសហការអភិវឌ្ឍដោយក្រុមហ៊ុន Oramed របស់អាមេរិក-អ៊ីស្រាអែល និងក្រុមហ៊ុនជីវសាស្ត្រ Premas របស់ឥណ្ឌា។ ក្រុមហ៊ុនទាំងពីរនេះបានចាប់ដៃគ្នាបង្កើតក្រុមហ៊ុន Oravax Medical ដើម្បីអភិវឌ្ឍ និងផលិតវ៉ាក់សាំងបង្ការវីរុស Covid-19 ប្រភេទគ្រាប់សម្រាប់លេប ដែលផ្ដល់ភាពងាយស្រួលដល់អ្នកប្រើប្រាស់។

ក្រោយពីបានធ្វើការពិសោធនៅលើសត្វ ក្រុមអ្នកវិទ្យាសាស្ត្ររកឃើញថា វ៉ាក់សាំងប្រភេទគ្រាប់នេះអាចជួយបង្កើតអង្គបដិប្រាណដែលមានប្រសិទ្ធភាពទប់ស្កាត់វីរុស Covid-19។ ចំណុចពិសេស នោះគឺវ៉ាក់សាំង Oravax តែមួយគ្រាប់គត់ សត្វដែលត្រូវធ្វើការពិសោធអាចការពារខ្លួនពីការឆ្លងវីរុស Covid-19។ នេះគឺជាចំណុចខុសប្លែក និងត្រូវបានគេចាត់ទុកថាលេចធ្លោជាងបើធៀបជាមួយនឹងវ៉ាក់សាំងបច្ចុប្បន្នដែលត្រូវការចាក់រហូតដល់ពីរម្ជុល។

លោក Prabuddha Kundu ដែលជាសហស្ថាបនិករបស់ Premas បានថ្លែងនៅចំពោះមុខអ្នកសារព័ត៌មានឥណ្ឌាថា ការលេបវ៉ាក់សាំងនេះនឹង «ដូចទៅនឹងការលេបថ្នាំវីតាមីន» ហើយ «យើងជឿជាក់100% ថា បច្ចេកវិទ្យានេះមានប្រសិទ្ធភាព និងប្រកបដោយក្ដីសង្ឃឹម»។ លោកបន្ថែមថា លទ្ធផលដែលបានមកពីការពិសោធបឋមលើសត្វនឹងត្រូវបានប្រកាសឱ្យដឹងនៅលើទស្សនាវដ្ដីវិទ្យាសាស្ត្រមួយនាពេលឆាប់ៗនេះ។

Oravax ត្រូវបានសហការអភិវឌ្ឍដោយក្រុមហ៊ុន Oramed របស់អាមេរិក-អ៊ីស្រាអែល និងក្រុមហ៊ុនជីវសាស្ត្រ Premas របស់ឥណ្ឌា

ចំណែក Nadav Kidron នាយកប្រតិបត្តិរបស់ Oramed និយាយថា វ៉ាក់សាំងប្រភេទគ្រាប់នេះនឹងបំបាត់បញ្ហានានាដែលកើតឡើងពីរដូវចាក់វ៉ាក់សាំងនៅទូទាំងពិភពលោក។ ជាងនេះ វាក៏នឹងអាចត្រូវបានប្រើប្រាស់នៅតាមផ្ទះយ៉ាងងាយស្រួលផងដែរ។

គេអាចរក្សាទុកវ៉ាក់សាំង Oravax នេះនៅក្នុងសីតុណ្ហភាពរបស់បន្ទប់ក្នុងផ្ទះ និងជួយកាត់បន្ថយបញ្ហារក្សាទុកក្នុងស្ថានភាពត្រជាក់ដែលវ៉ាក់សាំង «បុរាណ» នានាកំពុងជួបប្រទះ។ នាយក Kedron ប្រកាសថា ការប្រើប្រាស់វ៉ាក់សាំងប្រភេទគ្រាប់នេះអាចជួយកាត់បន្ថយផលប៉ះពាល់ក្រោយពីបានលេប ហើយវាក៏នឹងមានប្រយោជន៍ច្រើន បើសិនក្លាយជាវ៉ាក់សាំងដែលត្រូវលេបប្រចាំឆ្នាំដូចទៅនឹងវ៉ាក់សាំងបង្ការវីរុសផ្ដាសាយ។

Oravax Medical នឹងធ្វើការពិសោធលើមនុស្សក្នុងដំណាក់កាលដំបូងនៅក្នុងប្រទេសមួយចំនួន ក្នុងនោះមាន សហរដ្ឋអាមេរិក, អ៊ីស្រាអែល, ម៉ិកស៊ិក និងនៅបណ្ដាប្រទេសក្នុងតំបន់អឺរ៉ុបផងដែរ។ ការពិសោធដំបូងអាចត្រូវបានធ្វើឡើងនៅក្នុងខែកក្កដាឆ្នាំ2021៕

ប្រភព៖ BI
ប្រែសម្រួល៖ បុត្រា

March 23, 2021

កម្ពុជានឹងចាក់វ៉ាក់សាំងបង្ការ Covid-19 ជូនមនុស្សចាស់ចាប់ពីថ្ងៃទី23 ខែមីនា ឆ្នាំ2021

ក្រសួងសុខាភិបាលកម្ពុជានឹងប្រើប្រាស់វ៉ាក់សាំង AstraZeneca ដើម្បីចាក់ជូនពលរដ្ឋដែលមានវ័យចាប់ពី 60ឆ្នាំឡើងទៅ ចាប់ពីថ្ងៃទី23 ខែមីនា ឆ្នាំ2021 នៅមណ្ឌលសុខភាព និងមន្ទីរពេទ្យចំនួន 14ទីតាំង នៅទីក្រុងភ្នំពេញ។

យុទ្ធនាការចាក់វ៉ាក់សាំងខាងលើនេះនឹងចាក់ជូនមនុស្សចំនួន 55,700នាក់ នៅក្នុងខណ្ឌចំនួន14 របស់រាជធានីភ្នំពេញ នេះបើតាមគណៈកម្មការគ្រប់គ្រងកិច្ចការចាក់វ៉ាក់សាំងបង្ការ Covid-19 របស់ក្រសួងសុខាភិបាល ដែលបានប្រកាសឱ្យដឹងនាថ្ងៃទី22មីនានេះ។

សេចក្ដីប្រកាសព័ត៌មានរបស់គណៈកម្មការខាងលើក៏បានបញ្ជាក់ថា ក្រុមមនុស្សដែលមានវ័យចំណាស់ មានហានិភ័យខ្ពស់ ប្រឈមនឹងបញ្ហាសុខភាពធ្ងន់ធ្ងរ ឬបាត់បង់ជីវិតក្នុងអត្រាខ្ពស់ បើសិនបានឆ្លងវីរុស Covid-19។ ដូច្នេះ ការចាក់វ៉ាក់សាំងនេះគឺជារឿងសំខាន់ខ្លាំងណាស់។

គណៈកម្មការគ្រប់គ្រងកិច្ចការចាក់វ៉ាក់សាំងបង្ការ Covid-19 ក៏បានសង្កត់ធ្ងន់ថា ពលរដ្ឋគ្រប់រូប បើទោះជាបានទទួលការចាក់វ៉ាក់សាំងហើយក៏ដោយ ក៏ត្រូវតែបន្តអនុវត្តតាមការណែនាំទាំងឡាយរបស់ក្រសួងសុខាភិបាល ដើម្បីការពារការឆ្លងរាលដាលនៃវីរុសបង្កជំងឺរលាកសួតប្រភេទថ្មីនេះ ក្នុងនោះ វិធានការ «3ការពារ» (ពាក់ម៉ាក់ លាងដៃញឹកញាប់ និងរក្សាគម្លាតសុវត្ថិភាព) និង «3កុំ» (កុំទៅកន្លែងមានមនុស្សច្រើន កុំទៅកន្លែងបិទជិតគ្មានខ្យល់ចេញចូល កុំប៉ះពាល់គ្នា) គួរតែអនុវត្តកុំបីខាន៕

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 22, 2021

Saudi Aramco បាត់បង់តំណែង «ក្រុមហ៊ុនរកបានប្រាក់ចំណេញច្រើនជាងគេក្នុងពិភពលោក» ទៅលើដៃ Apple

Saudi Aramco ដែលជាក្រុមហ៊ុនប្រេងជាតិដ៏ធំរបស់ប្រទេសអារ៉ាប៊ីសាអូឌីត លែងជាក្រុមហ៊ុនដែលរកបានប្រាក់ចំណេញច្រើនជាងគេបង្អស់ក្នុងពិភពលោកទៀតហើយ ដោយតំណែងនេះបានធ្លាក់ទៅលើដៃក្រុមហ៊ុន Apple។

ក្រុមហ៊ុន Saudi Aramco បានជួបបញ្ហានេះ បន្ទាប់ពី Covid-19 បានធ្វើឱ្យតម្រូវការប្រើប្រាស់ប្រេងបានធ្លាក់ចុះខ្លាំងក្នុងឆ្នាំ2020។ យោងតាម CNN Business កាលពីថ្ងៃទី21 មីនា 2021 ក្រុមហ៊ុន Aramco បានប្រកាសលទ្ធផលនៃការរកស៊ីក្នុងឆ្នាំ2020 ឱ្យដឹងថា ប្រាក់ចំណេញបានធ្លាក់ចុះ44% ពោលគឺចំណេញបានតែ49ពាន់លានដុល្លារអាមេរិក។

តម្រូវការលើការប្រើប្រាស់ប្រេងរបស់ពិភពលោក ទទួលរងឥទ្ធិពលយ៉ាងធ្ងន់ធ្ងរក្នុងឆ្នាំ2020 នៅពេលដែលប្រទេសនានាបានដាក់បំរាមគោចរដើម្បីទប់ស្កាត់ Covid-19 បណ្ដាលឱ្យសកម្មភាពចរាចរណ៍ទូទាំងពិភពលោកត្រូវផ្អាកបណ្ដោះអាសន្ន។ កាលពីឆ្នាំ2020 មានពេលខ្លះតម្លៃប្រេងបានធ្លាក់ដល់ក្រោមសូន្យជាលើកដំបូងក្នុងប្រវត្តិសាស្ត្រ ដោយសារតែមិនមានតុល្យភាពរវាងតម្រូវការជាមួយនឹងការផ្គត់ផ្គង់ នាំឱ្យឃ្លាំងដាក់ប្រេងសល់ ស្ទើរតែអស់ពីទីផ្សារ។

Aramco ឱ្យដឹងថា លទ្ធផលជំនួញដែលបានធ្លាក់ចុះគឺកើតឡើងដោយសារកត្តាជាច្រើន រួមមាន តម្លៃប្រេងធ្លាក់ថ្លៃ បរិមាណប្រេងដែលបានលក់ចេញថយចុះ ក៏ដូចជាអត្រាចំណេញថយចុះនៅតាមផ្នែកចម្រាញ់គីមីប្រេងផងដែរ។

បញ្ហាខាងលើនេះមានន័យថា ក្រុមហ៊ុនបច្ចេកវិទ្យាអាមេរិក Apple ដណ្ដើមបានតំណែងជាក្រុមហ៊ុនរកបានប្រាក់ចំណេញច្រើនជាងគេបង្អស់ក្នុងពិភពលោក ពីក្រុមហ៊ុនប្រេង Aramco។ ពេញមួយឆ្នាំ2020 Apple រកបានប្រាក់ចំណេញចំនួន59ពាន់លានដុល្លារ។ ក៏ប៉ុន្តែ តំណែងនេះទំនងជាមិនអាចនៅជាមួយ Apple បានយូរឡើយ ព្រោះថា តម្លៃប្រេងពិភពលោកបានចាប់ផ្ដើមងើបឡើងវិញនៅក្នុងរយៈពេលប៉ុន្មានខែចុងក្រោយនេះ។ ឆ្នាំ2019 មុនពេល Covid-19 ក្លាយជាមហារោគរាតត្បាត ក្រុមហ៊ុនប្រេង Aramco រកបានប្រាក់ចំណេញ 88ពាន់លានដុល្លារអាមេរិកឯណោះ៕

ប្រភព៖ CNN Business
ប្រែសម្រួល៖ បុត្រា

March 22, 2021

Xiaomi ចាប់ផ្ដើមអភិវឌ្ឍរថយន្តអគ្គិសនីផ្ទាល់ខ្លួន

ប្រភពព័ត៌មានពីប្រទេសចិនដែលដកស្រង់សំដីរបស់ក្រុមអ្នកវិនិយោគដែលស្និទ្ធនឹង CEO Lei Jun បានឱ្យដឹងថា ក្រុមហ៊ុន Xiaomi កំពុងចាប់ផ្ដើមដំណើរការយ៉ាងលឿននូវគម្រោងអភិវឌ្ឍរថយន្តអគ្គិសនីរបស់ខ្លួន។ គម្រោងនេះនឹងត្រូវចាប់ផ្ដើមដំណើរការជាផ្លូវការនៅក្នុងរយៈពេលពីមួយទៅពីរខែខាងមុខ។

រថយន្តរបស់ Xiaomi នឹងមានរូបរាងដូចទៅនឹងរថយន្តយីហោ Xiaopeng (Xiaopeng P7) របស់ចិន និងត្រូវបានផ្ដោតសំខាន់ទៅលើបច្ចេកវិទ្យាចុងក្រោយបំផុត។ សហស្ថាបនិក និងជាអនុប្រធានក្រុមហ៊ុន លោក Wang Chuan នឹងទទួលខុសត្រូវលើកិច្ចការអភិវឌ្ឍគម្រោងនេះ។

កាលពីចុងខែកុម្ភៈ CEO Lei Jun បានជួបប្រជុំជាមួយនឹងលោក Li Bin ដែលជាស្ថាបនិករបស់ Weilai Automobile ពិភាក្សាគ្នាអំពីបញ្ហាផលិតរថយន្ត។ ក្រៅពីនេះ អនុប្រធាន Wang Chuan ក៏កំពុងតែស្វែងរកកម្លាំងសម្រាប់វិស័យនេះដែរ រួមមានទាំងការសិក្សាស្រាវជ្រាវ និងដំណើរការនៃការផលិត។

ក៏ប៉ុន្តែ មុននេះមិនយូរប៉ុន្មាន Xiaomi បានប្រកាសជាផ្លូវការ បដិសេធរាល់ដំណឹងចចាមអារ៉ាមមុននោះស្ដីអំពីការអភិវឌ្ឍរថយន្តរបស់ក្រុមហ៊ុននេះ។ នៅក្នុងសេចក្ដីប្រកាសនោះ Xiaomi បញ្ជាក់ថា៖ «Xiaomi តែងយកចិត្តទុកដាក់លើការរីកចម្រើននៃវិស័យរថយន្តអគ្គិសនី ដោយវាតម្លៃ និងស្រាវជ្រាវលើនិន្នាការថ្មីៗទាក់ទងនឹងការរីកចម្រើន។ ប៉ុន្តែ ដំណាក់កាលនៃការសិក្សាស្រាវជ្រាវរបស់ Xiaomi ក្នុងវិស័យរថយន្តអគ្គិសនី នៅតែមិនទាន់ដើរដល់ដំណាក់កាលផ្លូវការនៅឡើយ»។

Xiaomi ទំនងជាមិនចង់បង្ហើបឱ្យដឹងអំពីព័ត៌មានណាមួយរបស់ខ្លួនទាក់ទិននឹងការអភិវឌ្ឍរថយន្តអគ្គិសនី នៅមុនពេលដើរដល់ដំណាក់កាលផលិត ឬទទួលបានជោគជ័យជាក់លាក់ណាមួយ ដែលនេះគឺប្រហាក់ប្រហែលទៅនឹងគម្រោងអភិវឌ្ឍរថយន្តរបស់ក្រុមហ៊ុន Apple ដូច្នោះដែរ៕

ប្រភព៖ Gizchina
ប្រែសម្រួល៖ បុត្រា

March 22, 2021

ត្រូវតំណាងរាស្ត្ររិះគន់ថា «មានហូសហេតុ» Elon Musk ថា «ខ្ញុំកំពុងសន្សំប្រាក់ដើម្បីជួយដល់មនុស្សជាតិ»

ដោយមានទ្រព្យសរុបចំនួន 170ពាន់លានដុល្លារអាមេរិក មហាសេដ្ឋីអាមេរិកាំងដើមកំណើតអាហ្វ្រិក លោក Elon Musk បានអះអាងថា ទ្រព្យដែលលោកមានគឺទុកសម្រាប់ «ជួយដល់មនុស្សជាតិ» ដើម្បីបានរស់នៅលើ «ពហុភព»។

ថ្មីៗនេះ CEO របស់ Tesla លោក Elon Musk បានឆ្លើយតបនឹងការរិះគន់របស់តំណាងរាស្ត្រអាមេរិក Bernie Sanders ទាក់ទិននឹងទ្រព្យសម្បត្តិរបស់លោក។ លោក Musk ប្រាប់ថា លោកនឹងប្រើប្រាស់ប្រាក់ទាំងនេះដើម្បីជួយដល់មនុស្សជាតិ។ «ខ្ញុំកំពុងសន្សំប្រាក់ពីប្រភពមួយចំនួនដើម្បីជួយបង្កើតជីវភាពរស់នៅនៅលើអន្តរភព និងពង្រីកការយល់ដឹងអំពីតារា» លោក Musk បានសរសេរឆ្លើយតបដូច្នេះនៅលើ Twitter។ យោងតាមស្ថិតិរបស់ Bloomberg បច្ចុប្បន្នលោក Elon Musk កំពុងកាន់កាប់ទ្រព្យក្នុងដៃចំនួន 170ពាន់លានដុល្លារ និងជាអ្នកមានជាងគេលំដាប់ទីពីរក្នុងពិភពលោក បន្ទាប់ពីមហាសេដ្ឋី Jeff Bezos។

តំណាងរាស្ត្រមួយចំនួននៅសភាអាមេរិកតែងតែស្នើឱ្យមានការយកពន្ធច្រើនពីក្រុមមហាសេដ្ឋី។ «យើងកំពុងស្ថិតក្នុងយុគសម័យជាប្រវត្តិសាស្ត្ររបស់សហរដ្ឋអាមេរិក ជាកន្លែងដែលមនុស្សពីរនាក់ រួមមាន Elon Musk និង Jeff Bezos មានទ្រព្យច្រើនជាងអ្នកក្របំផុតចំនួនជាង40% នៅសហរដ្ឋអាមេរិកទៅទៀត» Bernie Sanders ដែលជាតំណាងរាស្ត្រនៅព្រឹទ្ធសភា បាននិយាយដូច្នេះ។

លោក Bernie Sanders បន្ថែមថា៖ «កម្រិតនៃការលោភលន់ និងមិនស្មើភាពគ្នា មិនត្រឹមតែមិនប្រកបដោយសីលធម៌ប៉ុណ្ណោះទេ តែវាថែមទាំងមិនអាចព្យាបាលបានទៀតផង»។

ឆ្លើយតបនឹងបញ្ហានេះ លោក Musk បានឱ្យដឹងថា លោកមានគម្រោងប្រើប្រាស់ខ្ទង់ប្រាក់របស់ខ្លួនដើម្បីបង្កបង្កើតជីវភាពរស់នៅលើពហុភព។ កាលពីឆ្នាំមុន លោក Musk បានរៀបគម្រោងនាំមនុស្សចំនួន1លាននាក់ឡើងទៅរស់នៅលើភពព្រះអង្គារនាឆ្នាំ2050 និងបង្កើតការងារនៅលើភពក្រហមនេះ។ លោក Musk និយាយថា «មានជំនឿយ៉ាងមុតមាំ» ថា យានអវកាស Starship ដំបូងរបស់ SpaceX អាចចុះចតនៅលើភពអង្គារក្នុងឆ្នាំ2026។ ប៉ុន្តែ ក្រុមអ្នកជំនាញខាងអវកាសបានសំដែងការសង្ស័យទៅលើពេលវេលាដែលលោក Musk បានលើកឡើង។

លោក Musk និយាយថា «មានជំនឿយ៉ាងមុតមាំ» ថា យានអវកាស Starship ដំបូងរបស់ SpaceX អាចចុះចតនៅលើភពអង្គារក្នុងឆ្នាំ2026

មហាសេដ្ឋី Elon Musk បានបញ្ជាក់យ៉ាងច្បាស់ៗថា លោកកំពុងប្រឹងប្រែងសន្សំទ្រព្យសម្រាប់សម្រេចគោលដៅចុងក្រោយ នោះគឺទៅរស់នៅលើភពព្រះអង្គារ។

លោក Elon Musk និយាយថា «ខ្ញុំគិតថា ប្រការដែលសំខាន់គឺមនុស្សជាតិត្រូវតែក្លាយជាអរិយធម៌ដែលមានសមត្ថភាពដើរទេសចរណ៍នៅទីអវកាស ឬជាសត្វលោកដែលរស់នៅលើពហុភព។ ដើម្បីកសាងទីក្រុងមួយនៅលើពិភពអង្គារគឺត្រូវការប្រភពធនធានច្រើន ហើយខ្ញុំមានបំណងចូលរួមចំណែកច្រើនបំផុតតាមដែលអាចធ្វើទៅបាន»។

មហាសេដ្ឋី Elon Musk និង Jeff Bezos កំពុងតែប្ដូរវេនគ្នាកាន់កាប់តំណែងជាអ្នកមានជាងគេក្នុងពិភពលោក។ លោក Musk ធ្លាប់ដណ្ដើមបានតំណែងនេះពី Bezos កាលពីខែមករា នៅពេលទ្រព្យរបស់លោកបានឡើងដល់188ពាន់លានដុល្លារអាមេរិក។

កាលពីសប្ដាហ៍មុន តំណាងរាស្ត្រ Sanders បានដាក់សំណួរជាច្រើនអំពីទ្រព្យសម្បត្តិរបស់ Bezos តាមរយៈ Twitter ហើយក្រោយមក លោកក៏បាននិយាយដល់ទ្រព្យរបស់មហាសេដ្ឋីទាំងពីរគឺ Musk និង Bezos នៅក្នុងសវនាការមួយរបស់សភាកាលពីថ្ងៃពុធកន្លងទៅ។

តំណាងរាស្ត្រ Sanders និយាយថា៖ «Bezos និង Musk បច្ចុប្បន្នមានទ្រព្យច្រើនជាងទ្រព្យរបស់អ្នកក្របំផុតដែលមានចំនួន40% នៅសហរដ្ឋអាមេរិក ក្នុងគ្រាដែលយើងមើលឃើញថា មនុស្សម្នាកំពុងអត់ឃ្លាននៅសហរដ្ឋអាមេរិកច្រើនជាងពេលណាៗទាំងអស់»៕

ប្រភព៖ BI
ប្រែសម្រួល៖ បុត្រា

March 22, 2021

ចេះតែមានហ្មង?! បព្វជិតម្នាក់ ផោមដាក់មុខអ្នកមកទទួលពរ នឹងនាំឱ្យមានសិរីសួស្ដី និងសំណាងល្អ

ជំនឿដ៏មហាសែនប្លែក…ឱ្យបព្វជិត(អ្នកបួស) ផោមដាក់មុខ គឺជាការឱ្យពរដ៏សែនស័ក្តិសិទ្ធិ អ្នកណាបានទទួល(ក្លិនផោម)ហើយ នឹងមានលាភសំណាងល្អៗ និងទ្រព្យសម្បត្តិ លុយកាក់ ហូរចូលមកមិនដាច់រយៈ…មានមនុស្សម្នានាំគ្នាមកឈរតម្រង់ជួរ ចាំទទួលក្លិនផោម យ៉ាងច្រើនកុះករ។

តើអ្នកណាទៅនឹកស្មានដល់ថា ការដែលយើងបញ្ចេញខ្យល់ផោមចេញមក នឹងធ្វើឱ្យយើងបានទទួលនូវការគោរពជឿជាក់ ពីអ្នកឯទៀតបានដល់ថ្នាក់នេះសោះ? ឧទាហរណ៍ បព្វជិត ជនជាតិអាហ្វ្រិកម្នាក់ ដែលអះអាងថា ខ្លួនមានថាមពលវិសេស អាចជួយសង្គ្រោះអ្នកដទៃបាន ដោយការផោម!។

លោក គ្រីស ផេណូឡូផេ បុព្វជិតរបស់លទ្ធិ SevenFold Holy Spirit មកពីទីក្រុងលីមប៉ូប៉ូ អាហ្វ្រិកខាងត្បូង កំពុងក្លាយជាបុគ្គលម្នាក់ ដែលត្រូវបានគេគោរពជឿជាក់យ៉ាងខ្លាំង ព្រោះមនុស្សទាំងអស់នោះ សុទ្ធតែជឿថា ខ្យល់ និងក្លិនផោមរបស់គាត់ មានថាមពលវិសេស អាចបង្ហាញមហិឫទ្ធិ អភិនិហារ នាំលាភសំណាង និងភាពចម្រុងចម្រើនមកឱ្យពួកគេ។

វិធីទទួលយកខ្យល់ និងក្លិនផោមមហាស័ក្តិសិទ្ធិនោះគឺ អ្នកមកទទួល ត្រូវដេកផ្ងារនៅលើកម្រាលឥដ្ឋ ចំណែកលោកគ្រីស នឹងអង្គុយដាក់គូទ ចំពីលើផ្ទៃមុខអ្នកមកទទួលពរនោះ បន្ទាប់មក ទើបបញ្ចេញខ្យល់ផោមដាក់មុខអ្នកមកទទួលពរនោះ ដោយត្រូវផោមឱ្យចំរន្ធច្រមុះ ដែលលោកគ្រីស បានអះអាងថា វាជាការជួយរំដោះវិញ្ញាណស័ក្តិសិទ្ធិ ដើម្បីឱ្យមនុស្សទាំងឡាយបានទទួលពរពេញៗតែម្ដង។

មនុស្សជាច្រើនយល់ឃើញថា វាជារឿងមួយប្លែកខ្លាំងណាស់ តែ លោកអ្នកជឿដែរឬទេ? មានមនុស្សមកឈរតម្រង់ជួរគ្នា រង់ចាំទទួលយកក្លិនផោមស័ក្តិសិទ្ធិនោះ យ៉ាងជ្រើនកុះករ។ គេល្បីថា មានការកក់ទុកមុនជារៀងរាល់ថ្ងៃ ព្រោះមនុស្សម្នាទាំងអស់ សុទ្ធតែជឿថា ខ្យល់ និងក្លិនផោម របស់លោកគ្រីស នឹងនាំមកនូវសិរីសួស្ដី ភាពមានបានធូរធារ ជាពិសេសខាងមុខរបររកស៊ីផ្សេង…អ្នកខ្លះត្រូវរង់ចាំវេនរបស់ខ្លួនយូរ រហូតដល់ទៅ 2ខែឯណោះ។ អតីតសមាជិករបស់លទ្ធិនេះ បាននិយាយថា អ្នកខ្លះជឿលើផោមស័ក្តិសិទ្ធិនេះខ្លាំងណាស់ ដល់ថ្នាក់យកដប មកច្រកក្លិនផោមនោះទុក ដើម្បីហិត មុនពេលចរចារឿងមុខជំនួញ ឬមុនពេលពិភាក្សារឿងការងាររកស៊ីផ្សេងៗទៀតផង។

ក្រៅពីផោមដាក់មុខ ផ្ដល់លាភសំណាងហើយនោះ លោកគ្រីស ថែមទាំងបានអះអាងទៀតផងថា លោកអាចព្យាបាលជំងឺបាន ដោយការជាន់លើខ្លួនអ្នកជំងឺ ដែលលោកមិនបានអធិប្បាយលម្អិតឱ្យបានច្បាស់លាស់ឡើយថា តើហេតុអីត្រូវធ្វើបែបនោះឡើយ តែលោកអះអាងថា វាពិតជាអាចព្យាបាលជំងឺបានប្រាកដមែន។ វាមិនមែនជាការប្រើអំពើហិង្សា ឬការធ្វើបាបលើរូបរាងកាយនោះឡើយ ព្រោះពេលដែលលោកជាន់ទៅនោះ ព្រះជាម្ចាស់ ទ្រង់បានបណ្ដាលឱ្យរូបលោកគ្មានទម្ងន់ខ្លួនឡើយ ទើបមិនធ្វើឱ្យអ្នកណាមានក្ដីឈឺចាប់ យ៉ាងពិតប្រាកដ។

ប្រភព៖ វេបសាយ ebaumsworld
ប្រែសម្រួលដោយ ទិទីតំតាតូ

March 22, 2021

កម្ពុជារកឃើញអ្នកវិជ្ជមាននឹង Covid-19 ជាង70នាក់ទៀត ក្នុងអំឡុង24ម៉ោងនៃថ្ងៃទី21មីនា

តួលេខសរុបនៃអ្នកវិជ្ជមាននឹង Covid-19 នៅទូទាំងប្រទេសបានកើនដល់ 1,753នាក់ ក្រោយពីរកឃើញអ្នកវិជ្ជមានថ្មីចំនួន73នាក់ទៀតនៅក្នុងថ្ងៃទី21មីនា 2021។

អ្នកវិជ្ជមានទាំង73នាក់ខាងលើនេះ រួមមានអ្នកមកពីបរទេសដែលមិនមែនជាពលករខ្មែរត្រលប់ពីប្រទសថៃ ចំនួន2ករណី និងអ្នកជំងឺដែលពាក់ព័ន្ធនឹងព្រឹត្តិការណ៍20កុម្ភៈ ចំនួន71នាក់។ ក្រៅពីអ្នកវិជ្ជមានថ្មី ថ្ងៃទី21 កម្ពុជាក៏មានអ្នកជាសះស្បើយថ្មីចំនួន17នាក់ផងដែរ។

គិតមកដល់ថ្ងៃទី22មីនា 2021 កម្ពុជាបានរកឃើញអ្នកវិជ្ជមាននឹង Covid-19 សរុបចំនួន1,753នាក់ ក្នុងនោះមានអ្នកជាសះស្បើយចំនួន967នាក់, ស្លាប់1នាក់ និងកំពុងព្យាបាលចំនួន781នាក់៕

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 22, 2021

Author: សឿន សំណាង