សឿន សំណាង - La Reine Media

ប្រទេសចិនចែកប័ណ្ណទិញទំនិញដល់អ្នកបានចាក់វ៉ាក់សាំង Covid-19

ខណ្ឌ Daxing នៃរដ្ឋធានីប៉េកាំង ប្រទេសចិន ដែលមានប្រជាជនសរុបចំនួន 1.8លាននាក់ បានផ្ដល់ប័ណ្ណទិញទំនិញដល់ពលរដ្ឋដែលបានចាក់វ៉ាក់សាំងបង្ការ Covid-19 ចាប់ពីថ្ងៃទី 24មីនា 2021។

«ប័ណ្ណទិញទំនិញដែលមានតម្លៃចាប់ពី 8 ដល់ 30យុន (1.23-4.6ដុល្លារអាមេរិក) ក្នុងមួយសន្លឹក ត្រូវបានបែងចែកទៅតាមលក្ខខណ្ឌមួយចំនួន និងអាចប្រើប្រាស់នៅក្នុងផ្សារទំនើបនានាក្នុងខណ្ឌ» នេះបើតាមក្រុមមន្ត្រីនៅខណ្ឌ Daxing។ សារព័ត៌មាន Beijing Daily បានរាយការណ៍ថា ប័ណ្ណទិញទំនិញទាំងនេះមានតម្លៃសរុបជាង 200លានយុន (30.7លានដុល្លារអាមេរិក)។

ក៏ប៉ុន្តែ មនុស្សមួយចំនួនបានសំដែងការព្រួយបារម្ភអំពីកម្មវិធីផ្ដល់ប័ណ្ណទិញទំនិញខាងលើ។ អ្នកលេងបណ្ដាញសង្គមម្នាក់បានសរសេរនៅលើបណ្ដាញសង្គម Weibo ថា៖ «ការលើកទឹកចិត្តតាមវិធីនេះដើម្បីឱ្យពលរដ្ឋចាក់វ៉ាក់សាំង នឹងធ្វើឱ្យការជឿជាក់ទៅលើវ៉ាក់សាំងមានការថយចុះ»។

ពលរដ្ឋជាង 73% ដែលមានអាយុចាប់ពី 18ឆ្នាំឡើងទៅ នៅក្នុងខណ្ឌ Daxing បានចាក់វ៉ាក់សាំងបង្ការ Covid-19 យ៉ាងតិចមួយម្ជុល នេះបើតាម Beijing Daily។ វ៉ាក់សាំងដែលកំពុងត្រូវបានប្រើប្រាស់ច្រើនជាងគេនៅប្រទេសចិន នោះគឺ BBIBP-CorV របស់ Sinopharm និង CoronaVac របស់ Sinovac ដែលទាំងនេះសុទ្ធតែត្រូវបានអភិវឌ្ឍនៅក្នុងស្រុក និងត្រូវចាក់ជាពីរម្ជុល។

មជ្ឈមណ្ឌលគ្រប់គ្រងជំងឺឆ្លងរបស់ប្រទេសចិន បានកំណត់គោលដៅចាក់វ៉ាក់សាំងបង្ការ Covid-19 ឱ្យបាន 40% នៃចំនួនប្រជាជនសរុប ពោលគឺប្រហាក់ប្រហែលនឹង 560លាននាក់ នៅក្នុងខែមិថុនា។ ប៉ុន្តែ គិតមកដល់ត្រឹមថ្ងៃទី 8មីនា ប្រទេសនេះចាក់បានតែ 65លាននាក់ប៉ុណ្ណោះ។

ចិនត្រូវបានវាយតម្លៃថាជាប្រទេសមួយក្នុងចំណោមប្រទេសដែលគ្រប់គ្រង Covid-19 បានល្អ ដោយមានអត្រានៃការស្លាប់ទាប ព្រោះតែវិធានការតឹងរ៉ឹង និងការផលិតវ៉ាក់សាំងផ្ទាល់ខ្លួន។ បច្ចុប្បន្ន ប្រទេសចិនមានសមត្ថភាពផលិតវ៉ាក់សាំងបង្ការ Covid-19 បាន 5លានដូស/ថ្ងៃ កើនឡើងច្រើនជាង 3ដង បើធៀបនឹង 1.5លានដូស/ថ្ងៃ កាលពីដើមខែកុម្ភៈ៕

ប្រភព៖ Reuters
ប្រែសម្រួល៖ បុត្រា

March 25, 2021

របបសឹកនៅមីយ៉ានម៉ា ដោះលែងបាតុករជាង 600នាក់ ក្រោយពីបានឃុំខ្លួនមួយរយៈពេល

របបសឹកនៃប្រទេសមីយ៉ានម៉ា បានដោះលែងក្រុមបាតុករប្រឆាំងរដ្ឋប្រហារជាង 600នាក់នៅក្នុងថ្ងៃទី 24មីនានេះ ខណៈដែលក្រុមសកម្មជនអំពាវនាវឱ្យ «ធ្វើកូដកម្មស្ងាត់ស្ងៀម» នៅទីក្រុង Yangon។

«យើងបានដោះលែងបុរសចំនួន 360នាក់ និងស្ត្រីចំនួន 268នាក់ ពីពន្ធនាគារ Insein នៅថ្ងៃនេះ» មន្ត្រីជាន់ខ្ពស់ម្នាក់របស់ពន្ធនាគារ បានប្រាប់ដូច្នេះ។

ក្រុមសាក្សី ដែលរួមមានទាំងមេធាវីរបស់បាតុករដែលត្រូវបានចាប់ខ្លួន បានឱ្យដឹងថា រថយន្តដែលដឹកពេញដោយមនុស្សជាច្រើនគ្រឿងបានចាកចេញពីពន្ធនាគារ Insein នៅទីក្រុង Yangon ជាទីក្រុងធំលំដាប់ទីមួយនៅមីយ៉ានម៉ា នៅវេលាម៉ោងប្រហែល 10ព្រឹក។

មេធាវីបាននិយាយថា៖ «អ្នកដែលត្រូវបានដោះលែងទាំងអស់ សុទ្ធតែត្រូវបានចាប់ខ្លួននៅក្នុងបាតុកម្មមុននោះ ដែលត្រូវបានចាប់នៅពេលយប់ ឬក្រុមមនុស្សដែលចេញក្រៅផ្ទះដើម្បីទៅទិញរបស់របរ (រំលោភលើបទបញ្ជាអាជ្ញាសឹក)»។ មេធាវីបន្ថែមថា រថយន្តប្រហែល 16គ្រឿងបានចាកចេញពីពន្ធនាគារ។ «ពួកគេត្រូវបានដឹកទៅកាន់ប៉ុស្តិ៍ប៉ូលិសនានាដែលជាប់ទាក់ទង មុននឹងបានត្រលប់ទៅផ្ទះ»។

បច្ចុប្បន្ន របបសឹកភូមាមិនបានបញ្ជាក់អំពីតួលេខអ្នកទោសដែលត្រូវបានដោះលែងនៅឡើយ។ អ្នកនាំពាក្យរបស់កងទ័ព មិនបានលើកទូរស័ព្ទរបស់អ្នកយកព័ត៌មាន។

សមាគមជួយអ្នកទោសនយោបាយ (AAPP) បានឱ្យដឹងថាមនុស្សប្រមាណ 2,600នាក់ ត្រូវបានចាប់ខ្លួន និងយ៉ាងតិច 275នាក់បានស្លាប់ រាប់ចាប់ពីមានបាតុកម្មប្រឆាំងរដ្ឋប្រហារនៅមីយ៉ានម៉ា។ ក្រុមសកម្មជនយល់ថា តួលេខជាក់ស្ដែងអាចខ្ពស់ជាងនេះឆ្ងាយណាស់។

បាតុករមីយ៉ានម៉ា ដែលត្រូវបានដោះលែងនៅថ្ងៃនេះ

កូដកម្មមួយបានកើតឡើងមួយថ្ងៃក្រោយពីបុគ្គលិករបស់ក្រុមរៀបចំពិធីបុណ្យសពនៅ Mandalay ដែលជាទីក្រុងធំលំដាប់ទីពីរនៅមីយ៉ានម៉ា បានឱ្យដឹងថា ក្មេងស្រីអាយុ 7ឆ្នាំម្នាក់ ត្រូវបានកងកម្លាំងសន្តិសុខបាញ់សម្លាប់ និងបានក្លាយជាជនរងគ្រោះដែលមានអាយុទាបបំផុតនៅក្នុងវិបត្តិនយោបាយនៃប្រទេសមីយ៉ានម៉ានាបច្ចុប្បន្ន។ ភាគីខាងកងទ័ពក៏មិនទាន់មានការអធិប្បាយអ្វីមួយអំពីហេតុការណ៍នេះនៅឡើយ៕

ប្រភព៖ AFP, Reuters
ប្រែសម្រួល៖ បុត្រា

March 24, 2021

វ៉ាក់សាំងបង្ការ Covid-19 ប្រភេទហិតតាមផ្លូវដង្ហើម ត្រូវបានចិនអនុម័តឱ្យប្រើសាកល្បង

នាយកដ្ឋានគ្រប់គ្រងឱសថរបស់ចិន បានអនុញ្ញាតឱ្យក្រុមហ៊ុន CanSino Biologics ប្រើប្រាស់សាកល្បងវ៉ាក់សាំងបង្ការវីរុស Covid-19 ប្រភេទហិត ជំនួសឱ្យការចាក់ដូចធម្មតា។

នៅក្នុងឯកសារដែលត្រូវបានប្រកាសនៅលើផ្សារហ៊ុនហុងកុង កាលពីថ្ងៃទី 23មីនា ក្រុមហ៊ុន CanSino បានឱ្យដឹងថា ពួកគេបានទទួលការអនុញ្ញាតឱ្យប្រើប្រាស់សាកល្បងវ៉ាក់សាំងប្រភេទហិតដែលក្រុមហ៊ុនបានសហការអភិវឌ្ឍជាមួយនឹងវិទ្យាស្ថានបច្ចេកវិទ្យាជីវសាស្ត្រប៉េកាំង។

CanSino មិនបានបង្ហើបឱ្យដឹងអំពីព័ត៌មានបន្ថែមទាក់ទងនឹងវ៉ាក់សាំងបង្ការ Covid-19 ប្រភេទហិតនេះទេ ប៉ុន្តែ បានព្រមានថា សុវត្ថិភាព និងប្រសិទ្ធភាពរបស់វ៉ាក់សាំងនេះ នឹង «ត្រូវបានទទួលស្គាល់» ក្រោយពីការប្រើប្រាស់សាកល្បងជាផ្លូវការតែប៉ុណ្ណោះ។

វ៉ាក់សាំងបង្ការ Covid-19 មួយប្រភេទរបស់ CanSino

ដំណឹងខាងលើនេះបានលេចឡើងបន្ទាប់ពីនាយកដ្ឋានគ្រប់គ្រងផលិតផលសុខាភិបាលជាតិចិន បានអនុម័តឱ្យប្រើប្រាស់មានលក្ខខណ្ឌចំពោះវ៉ាក់សាំងមួយប្រភេទផ្សេងទៀតរបស់ CanSino កាលពីខែមុន។ ប្រទេសចិន បច្ចុប្បន្នមានវ៉ាក់សាំងបង្ការ Covid-19 ចំនួន 5ប្រភេទ ដែលត្រូវបានអនុញ្ញាតឱ្យប្រើដោយមានលក្ខខណ្ឌ ឬក្នុងស្ថានភាពបន្ទាន់ ប៉ុន្តែពុំមានប្រភេទណាមួយដែលប្រើប្រាស់តាមផ្លូវដង្ហើមនោះឡើយ។

គិតមកដល់ថ្ងៃទី 20មីនា ប្រទេសចិនបានចាក់វ៉ាក់សាំងបង្ការ Covid-19 ចំនួន 74.96លានដូសរួចហើយ នេះបើតាម Our World in Data ជាអង្គការផ្គត់ផ្គង់ទិន្នន័យសហការរវាងសាកលវិទ្យាល័យ Oxford និងអង្គការមនុស្សធម៌មួយទៀត៕

ប្រភព៖ AFP
ប្រែសម្រួល៖ បុត្រា

March 24, 2021

មហាសេដ្ឋីលេខមួយនៅប្រទេសថៃ កំពុងប្រមូលទិញសណ្ឋាគារទាំងឡាយដែលកំពុង «ត្រដរខ្យល់»

ជាមួយនឹងគម្រោងនេះ មហាសេដ្ឋីថៃ លោក Charoen Sirivadhanabhakdi សង្ឃឹមថា វិស័យទេសចរណ៍នឹងងើបឡើងខ្ពស់ជាថ្មីនៅក្នុងប្រទេសនេះនាពេលខាងមុខ។

សារព័ត៌មាន Bloomberg បានឱ្យដឹងថា Asset World Corp. ដែលជាក្រុមហ៊ុនអចលនទ្រព្យរបស់មហាសេដ្ឋីលំដាប់លេខមួយនៅប្រទេសថៃ លោក

Charoen Sirivadhanabhakdi កំពុងមានផែនការប្រមូលទិញសណ្ឋាគារជាច្រើនដែលកំពុង «ដកដង្ហើមចង្រិត» នៅប្រទេសនេះ ដោយសង្ឃឹមយ៉ាងមុតមាំថា វិស័យទេសចរណ៍របស់ប្រទេសថៃនឹងក្រោកឈរជាថ្មីនៅពេលបើកទ្វារទទួលភ្ញៀវទេសចរណ៍បរទេសឡើងវិញ។

បច្ចុប្បន្ននេះ ប្រទេសថៃមានសណ្ឋាគារជាង 100 កំពុងត្រូវបានដាក់លក់ ហើយ «តួលេខនេះកើនឡើងជារៀងរាល់ថ្ងៃ» នេះបើតាម Vanden Auweele នាយកផ្នែកសណ្ឋាគាររបស់ Asset World Corp។ ក្រុមហ៊ុន TTC Group របស់មហាសេដ្ឋីថៃ Charoen Sirivadhanabhakdi បច្ចុប្បន្នកាន់កាប់ភាគហ៊ុនភាគច្រើនរបស់ Asset World Corp។

ឆ្នេរ Patong របស់ Phuket កាលពីខែតុលា 2020

Vanden Auweele បានបង្ហើបឱ្យដឹងថា ក្នុងខែនេះ Asset World បានទិញសណ្ឋាគារមួយនៅលើកោះមួយរបស់ទីក្រុង Pattaya ព្រមទាំងមានគម្រោងទិញបន្ថែមទៀត។

សេដ្ឋកិច្ចប្រទេសថៃដែលធ្លាប់តែអាស្រ័យលើវិស័យទេសចរណ៍ ទើបតែបានឆ្លងកាត់រយៈពេលជាងមួយឆ្នាំដែលមិនមានវត្តមានរបស់ទេសចរបរទេស នាំឱ្យសណ្ឋាគារ និងក្រុមហ៊ុនទេសចរណ៍នានាត្រូវរស់យ៉ាងលំបាក។ យោងតាមសមាគមសណ្ឋាគាររបស់ប្រទេសថៃ ស្ថាប័នជាច្រើនត្រូវបិទទ្វារ ហើយពួកគេទំនងជាមិនអាចវិលត្រលប់វិញបាននៅពេលប្រទេសនេះចាប់ផ្ដើមបើកព្រំដែនក្នុងឆ្នាំ2021នេះ។

«គម្លាតរវាងអ្នកទិញ និងអ្នកលក់របស់សណ្ឋាគារដែលត្រូវបានដាក់លក់នាបច្ចុប្បន្ន កំពុងខិតចូលជិតគ្នា។ ប្រការនេះមានន័យថា សណ្ឋាគារបច្ចុប្បន្នមានតម្លៃសមស្របជាងមុន» Vanden Auweele ឱ្យដឹងដូច្នេះ។ «ជាមួយនឹងផលិតផលត្រឹមត្រូវ សណ្ឋាគារសមរម្យ និងតម្លៃសមហេតុផល យើងប្រាកដជានឹងពិចារណារាល់ឱកាសដែលមាន»។

Vanden Auweele បង្ហើបឱ្យដឹងថា Asset World មានគម្រោងកែប្រែសណ្ឋាគារដែលទើបបានទិញនៅ Pattaya ឱ្យទៅជាសណ្ឋាគារមួយដែលមានឈ្មោះល្បី។ ក្រុមហ៊ុននេះក៏អាចទិញអចលនទ្រព្យបន្ថែមទៀតតាមរយៈខ្ទង់វិនិយោគឯកជនរបស់ TCC Group ផងដែរ។

«វិស័យទេសចរណ៍របស់ថៃនឹងវិលត្រលប់មកវិញយ៉ាងលឿន នៅពេលព្រំដែនត្រូវបានបើកទាំងស្រុងក្នុងខែតុលា។ ប៉ុន្តែ ក្រុមហ៊ុនមួយចំនួនដែលត្រូវប្រឈមនឹងបញ្ហាជាច្រើននៅមុន Covid-19 នឹងមិនអាចរស់ឡើងវិញបានទេ» លោក Vanden Auweele អះអាងដូច្នេះ។ «យុទ្ធនាការចម្រាញ់មួយកំពុងកើតឡើង ហើយវានឹងបំបាត់រាល់ក្រុមហ៊ុនទាំងឡាយណាដែលរកស៊ីមិនមានប្រសិទ្ធភាពមុនវិបត្តិសុខភាព»។

Asset World បច្ចុប្បន្នកាន់កាប់គម្រោងអចលនទ្រព្យដែលមានតម្លៃជាង 50ពាន់លានបាត (ជាង 1.6ពាន់លានដុល្លារអាមេរិក)។ គម្រោងភាគច្រើនដែលត្រូវបានប្រកាសឱ្យដឹងមុននោះរបស់ Asset World គឺជាប់ទាក់ទងនឹងសណ្ឋាគារចំនួនបីដែលគ្រោងនឹងបើកដំណើរការនៅក្នុងឆ្នាំនេះ ក្នុងនោះក៏មានអគារខ្ពស់ជាងគេបង្អស់នៅប្រទេសថៃ ដែលគ្រោងនឹងបុកគ្រឹះនៅក្នុងត្រីមាសទីមួយនៃឆ្នាំ 2023៕

ប្រភព៖ Bloomberg
ប្រែសម្រួល៖ បុត្រា

March 24, 2021

សហរដ្ឋអាមេរិកមានហេតុការណ៍បាញ់ប្រហារចំនួន 7ករណី ក្នុងរយៈពេលតែ 7ថ្ងៃប៉ុណ្ណោះ

ករណីបាញ់រះចំនួន 7លើក កើតមាននៅក្នុងអំឡុងពេលតែមួយសប្ដាហ៍ បានបង្ហាញនូវទិដ្ឋភាពដែលព្រមានអំពីស្ថានភាពនៃអំពើហិង្សាប្រដាប់អាវុធនៅសហរដ្ឋអាមេរិក។

ករណីបាញ់ប្រហារនៅក្នុងផ្សារទំនើបមួយនៅ Boulder ក្នុងរដ្ឋ Colorado កាលពីព្រលប់ថ្ងៃទី 22មីនា (ម៉ោងក្នុងស្រុក) បានកើតឡើងក្រោយមិនដល់មួយសប្ដាហ៍ បន្ទាប់ពីមនុស្ស 8នាក់បានស្លាប់នៅក្នុងហេតុការណ៍បាញ់រះសំដៅទីតាំងស្ប៉ាមួយកន្លែងនៅ Atlanta។

យោងតាម CNN ករណីបាញ់រះខាងលើអាចនឹងជួយជំរុញឱ្យមានកិច្ចប្រជុំបន្ថែមអំពីច្បាប់គ្រប់គ្រងអាវុធនៅសហរដ្ឋអាមេរិក។ ហេតុការណ៍បាញ់រះនេះក៏ស្ថិតក្នុងចំណោមករណីបាញ់ប្រហារដោយកាំភ្លើងយ៉ាងតិចចំនួន 7 លើក ដែលបានកើតឡើងកាលពីសប្ដាហ៍មុននៅទូទាំងសហរដ្ឋអាមេរិក។ គ្រាន់តែនៅក្នុងថ្ងៃទី 20មីនា សហរដ្ឋអាមេរិកមានហេតុការណ៍បាញ់រះរហូតដល់ 3ករណី។

កងកម្លាំង FBI និង SWAT រាប់សិបនាក់ ត្រូវបានបញ្ជូនមកកាន់កន្លែងកើតហេតុនៅឯទីក្រុង Boulder នៃរដ្ឋ Colorado

កាលពីថ្ងៃទី 16មីនា ខ្មាន់កាំភ្លើងជាជនជាតិស្បែកសម្នាក់ បានសម្រុកចូលក្នុងហាងស្ប៉ាមួយកន្លែងនៅ Atlanta និងបានបាញ់រះសម្លាប់មនុស្សចំនួន 8នាក់ ក្នុងនោះមានជនជាតិអាស៊ី 6នាក់។ ថ្ងៃទី 17មីនា នៅ Stockton រដ្ឋ California មនុស្សចំនួន 5នាក់ដែលកំពុងរៀបចំពិធីបួងសួងក៏ត្រូវបានបាញ់រះដោយជនបើកបររថយន្តម្នាក់ ប៉ុន្តែមិនបង្កឱ្យមានអ្នកស្លាប់នោះទេ។

ថ្ងៃទី 18មីនា ជនរងគ្រោះចំនួន 4នាក់នៅក្នុងករណីបាញ់រះមួយនៅទីក្រុង Portland រដ្ឋ Oregon ត្រូវបានបញ្ជូនមកកាន់មន្ទីរពេទ្យ ដោយសារត្រូវរបួសធ្ងន់ធ្ងរ។

ថ្ងៃទី 20មីនា មនុស្សចំនួន 5នាក់ត្រូវបានបាញ់ប្រហារក្នុងហេតុការណ៍ហិង្សាក្នុងក្លឹបរាត្រីមួយ នាទីក្រុង Houston ក្នុងនោះមានម្នាក់ស្ថិតក្នុងស្ថានភាពគ្រោះថ្នាក់ដល់ជីវិត។

ប៉ូលិសក្នុងនាំមនុស្សម្នាចេញពីកន្លែងគ្រោះថ្នាក់ក្នុងហេតុការណ៍បាញ់ប្រហារ

ថ្ងៃទី 20មីនាដដែល នៅ Dallas ខ្នាន់កាំភ្លើងម្នាក់មិនស្គាល់អត្តសញ្ញាណ បានវាយប្រហារដោយកាំភ្លើង បណ្ដាលឱ្យមនុស្សចំនួន 7នាក់រងរបួស និងម្នាក់បានស្លាប់។

ក្នុងអំឡុងពេលខាងលើនោះដែរ ក៏មានមនុស្សម្នាក់បាត់បង់ជីវិត និង 5នាក់ផ្សេងទៀតបានរងរបួសនៅក្នុងហេតុការណ៍បាញ់រះក្នុងពិធីជប់លៀងខុសច្បាប់មួយនៅ Philadelphia។

មកដល់ថ្ងៃទី 22មីនា ករណីបាញ់ប្រហារមួយទៀត បានកើតឡើងនៅក្នុងផ្សារទំនើប King Soopers បណ្ដាលឱ្យមនុស្សចំនួន 10នាក់ត្រូវបាត់បង់ជីវិត ក្នុងនោះក៏មានប៉ូលិសម្នាក់ផងដែរ។

តួលេខនៃអំពើបាញ់ប្រហារខាងលើ បានធ្វើឱ្យមានការព្រួយបារម្ភកាន់តែខ្លាំងអំពីបញ្ហាសុវត្ថិភាពនៃអាយុជីវិតរបស់មនុស្សទូទៅ ព្រមទាំងកំពុងជំរុញឱ្យមានការពិភាក្សាបន្ថែមទៅលើច្បាប់គ្រប់គ្រងអាវុធជាតិផ្ទុះនៅសហរដ្ឋអាមេរិក ខណៈពលរដ្ឋនៅក្នុងរដ្ឋភាគច្រើននៃប្រទេសនេះ មានសិទ្ធិកាន់កាប់អាវុធ។

យោងតាមមជ្ឈមណ្ឌលគ្រប់គ្រង និងបង្ការជំងឺឆ្លង (CDC) របស់សហរដ្ឋអាមេរិក មនុស្សចំនួនជិត 40,000នាក់បានស្លាប់នៅក្នុងហេតុការណ៍ដែលពាក់ព័ន្ធនឹងកាំភ្លើង នៅក្នុងឆ្នាំ 2019។

កាលពីថ្ងៃទី 11មីនា សភាជាន់ទាបអាមេរិក បានអនុម័តលើសេចក្ដីព្រៀងច្បាប់មួយដើម្បីរិតបន្តឹងលើការត្រួតពិនិត្យអាវុធជាតិផ្ទុះ ក្នុងបំណងទប់ស្កាត់មិនឱ្យក្រុមមនុស្សដែលមិនមានលក្ខខណ្ឌគ្រប់គ្រាន់ មិនអាចមានឱកាសកាន់កាប់អាវុធ។

ការបាញ់ប្រហារបានកើតឡើងនៅក្នុងថ្ងៃទី 22មីនា 2021 នៅទីក្រុង Boulder នៃរដ្ឋ Colorado

មុននោះ នៅក្នុងយុទ្ធនាការឃោសនារកសំឡេងឆ្នោត លោក Biden បានប្រកាសថានឹងបង្កើតច្បាប់ហាមផលិតអាវុធ និងទិញអាវុធវាយប្រហារ ក៏ដូចជាអាវុធដែលបង្កការស្លាប់កម្រិតខ្ពស់ ទន្ទឹមនឹងការប្រមូលទិញអាវុធដែលកំពុងចរាចរណ៍នៅលើទីផ្សារ។

ក៏ប៉ុន្តែ យោងតាមការស្ទង់មតិមួយដែលត្រូវបានធ្វើឡើងកាលពីខែវិច្ឆិកា ឆ្នាំ 2020 ដោយវិទ្យាស្ថាន Gallup បានបង្ហាញថា អត្រានៃអ្នកគាំទ្រដល់ការរិតបន្តឹងច្បាប់ប្រើប្រាស់អាវុធ កំពុងស្ថិតក្នុងកម្រិតទាបបំផុតនៅសហរដ្ឋអាមេរិក រាប់ចាប់ពីឆ្នាំ 2016៕

ប្រភព៖ CNN
ប្រែសម្រួល៖ បុត្រា

March 24, 2021

កម្ពុជារកឃើញអ្នកវិជ្ជមាននឹង Covid-19 ចំនួន 29នាក់ ក្នុងថ្ងៃទី 23មីនា

មនុស្សចំនួន 29នាក់ ត្រូវបានរកឃើញថាមានផ្ទុកវីរុស Covid-19 នៅក្នុងអំឡុង 24ម៉ោងនៃថ្ងៃទី 23មីនា ឆ្នាំ2021 ទន្ទឹមនឹងអ្នកជំងឺចំនួន 34នាក់បានជាសះស្បើយ។

ក្នុងចំណោមអ្នកជំងឺ Covid-19 ថ្មីចំនួន 29នាក់ខាងលើ មាន 2នាក់ជាករណីនាំចូល ប៉ុន្តែមិនមែនជាពលករខ្មែរត្រលប់ពីប្រទេសថៃ។ ចំណែក 27នាក់ផ្សេងទៀត ពាក់ព័ន្ធនឹង «ព្រឹត្តិការណ៍សហគមន៍20កុម្ភៈ»។

គិតមកដល់ព្រឹកថ្ងៃទី 24មីនា ឆ្នាំ2021នេះ កម្ពុជាមានអ្នកឆ្លងវីរុស Covid-19 សរុបចំនួន 1,718នាក់ ក្នុងនោះមានអ្នកជំងឺ 1,033នាក់បានជាសះស្បើយ, 5នាក់បានស្លាប់ និង 777នាក់កំពុងព្យាបាលនៅមន្ទីរពេទ្យ៕
ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 24, 2021

Pfizer ចាប់ផ្ដើមសាកល្បងប្រើថ្នាំលេបសម្រាប់ព្យាបាល Covid-19

ក្រុមហ៊ុនឱសថអាមេរិក Pfizer កាលពីថ្ងៃទី 23មីនា បានប្រកាសថា បានចាប់ផ្ដើមពិសោធដំណាក់កាលដំបូងនៅសហរដ្ឋអាមេរិក ចំពោះប្រភេទថ្នាំគ្រាប់សម្រាប់ព្យាបាល Covid-19។

យោងតាមសារព័ត៌មាន Reuters ក្រុមហ៊ុន Pfizer ឱ្យដឹងថា បេក្ខភាពថ្នាំប្រឆាំងនឹងវីរុសបានបង្ហាញថា វាសកម្មយ៉ាងខ្លាំងក្លាក្នុងការប្រឆាំងនឹងវីរុស Covid-19 នៅក្នុងការស្រាវជ្រាវនៅមន្ទីរពិសោធន៍នានា។ ក្រុមហ៊ុនខាងលើបានប្រាប់ថា ថ្នាំនេះអាចយកទៅព្យាបាលអ្នកជំងឺដែលមានរោគសញ្ញាដំបូងនៃការឆ្លងវីរុស។

បេក្ខភាពថ្នាំប្រឆាំង Covid-19 របស់ Pfizer ដែលត្រូវបានដាក់ឈ្មោះបែបវិទ្យាសាស្ត្រថា PF-07321332 និងជាសារធាតុទប់ស្កាត់ protease បានបង្ហាញអំពីប្រសិទ្ធភាពក្នុងការរារាំងមិនឱ្យវីរុសបង្កើនចំនួននៅក្នុងកោសិកា។

ក្រុមហ៊ុនឱ្យដឹងថា សារធាតុទប់ស្កាត់ protease មានប្រសិទ្ធភាពក្នុងការប្រឆាំងនឹងបណ្ដាវីរុសដូចជា HIV, វីរុសបង្កជំងឺរលាកថ្លើមប្រភេទ C ជាដើម ដោយការប្រើប្រាស់ដោយឡែក ឬផ្សំជាមួយនឹងប្រភេទថ្នាំប្រឆាំងនឹងវីរុសដទៃ។

ក្រុមហ៊ុន Pfizer ក៏កំពុងតែពិសោធដំណាក់កាលដំបូងលើបេក្ខភាពថ្នាំប្រឆាំងនឹងវីរុស Covid-19 មួយផ្សេងទៀត តាមរយៈការចាក់ចូលក្នុងសរសៃឈាមរបស់អ្នកជំងឺ Covid-19 ដែលកំពុងព្យាបាលនៅមន្ទីរពេទ្យ។

«បេក្ខភាពថ្នាំគ្រាប់ និងថ្នាំចាក់ក្នុងសរសៃឈាម មានសក្ដានុពលបង្កើតបានជារូបមន្តមួយក្នុងការព្យាបាលពីដំបូងដល់ចប់ បន្ថែមពីលើការចាក់វ៉ាក់សាំង សម្រាប់ករណីដែលនៅតែកើតជំងឺ» នេះបើតាម Mikael Dolsten នាយកផ្នែកសុខាភិបាលរបស់ Pfizer បានឱ្យដឹងនៅក្នុងសេចក្ដីប្រកាសរបស់ក្រុមហ៊ុន។

បេក្ខភាពថ្នាំព្យាបាល Covid-19 ថ្មីរបស់ Pfizer នេះ ឈរពីក្រោយបេក្ខភាពថ្នាំប្រឆាំងវីរុសប្រភេទគ្រាប់សម្រាប់លេបចំនួនពីរផ្សេងទៀត ដែលកំពុងស្ថិតក្នុងដំណាក់កាលសាកល្បង ក្នុងនោះមានបេក្ខភាពមួយគឺជាថ្នាំដែលត្រូវបានសហការអភិវឌ្ឍដោយក្រុមហ៊ុន Merck & Co និងក្រុមហ៊ុន Ridgeback Bio ខណៈបេក្ខភាពថ្នាំលេបទីពីរមកពីក្រុមហ៊ុន Roche Holding និង Atea Pharmaceuticals។

បច្ចុប្បន្ន remdesivir របស់ Gilead Sciences គឺជាប្រភេទថ្នាំតែមួយគត់ដែលត្រូវបាននាយកដ្ឋានគ្រប់គ្រងចំណីអាហារ និងថ្នាំពេទ្យអាមេរិក (FDA) ទទួលស្គាល់សម្រាប់ការព្យាបាល Covid-19។

FDA បានអនុញ្ញាតបន្ទាន់ឱ្យប្រើប្រាស់ថ្នាំអង្គបដិប្រាណ Eli Lilly-bamlanivimab ដោយប្រើប្រាស់ដោយឡែក ឬផ្សំជាមួយនឹង etesevimab និងការព្យាបាលមួយផ្សេងទៀតដែលរួមផ្សំជាមួយនឹងថ្នាំពីក្រុមហ៊ុន Regeneron៕

ប្រភព៖ Reuters, CNBC
ប្រែសម្រួល៖ បុត្រា

March 24, 2021

ស្ថានភាពគ្រោះទឹកជំនន់ធំបំផុតនៅអូស្ត្រាលី៖ ប្រជាជនចំនួន 40% ទទួលបានការព្រមានអំពីអាកាសធាតុអាក្រក់

ប្រទេសអូស្ត្រាលី ក្នុងថ្ងៃទី 23មីនានេះ បានចេញសេចក្ដីប្រកាសព័ត៌មានអំពីគ្រោះជំនន់ទឹកភ្លៀង និងបទបញ្ជាជម្លៀសប្រជាជនចំនួន 40% នៃពលរដ្ឋសរុបរបស់ប្រទេសនេះ នៅពេលមានភ្លៀងធ្លាក់ខ្លាំងជាបន្តបន្ទាប់នៅក្នុងតំបន់ជាច្រើននៅទូទាំងប្រទស។

គ្រោះជំនន់ទឹកភ្លៀង បង្កឱ្យមានការជនលិច និងគួចយកផ្ទះសម្បែង និងបំផ្លិចបំផ្លាញផ្លូវថ្នល និងកសិដ្ឋានរាប់មិនអស់របស់ប្រទេសអូស្ត្រាលី។ នាយកដ្ឋានព្យាករណ៍ឧតុនិយមជាតិ បានចេញសេចក្ដីព្រមានអំពីស្ថានភាពអាកាសធាតុអាក្រក់នៅគ្រប់រដ្ឋ និងតំបន់នានារបស់ទ្វីបនេះថា ពលរដ្ឋប្រមាណ 10លាននាក់ក្នុងចំណោម 25លាននាក់របស់អូស្ត្រាលី នឹងរងផលប៉ះពាល់ពីជំនន់ទឹកភ្លៀង។ នេះបើយោងតាមសារព័ត៌មាន CNN របស់សហរដ្ឋអាមេរិក។

នៅចំពោះមុខក្រុមអ្នកយកព័ត៌មាន នាយករដ្ឋមន្ត្រីអូស្ត្រាលី Scott Morrison បានថ្លែងថា៖ «ស្ថានភាពជំនន់ទឹកភ្លៀងនៅតែបន្តប្រែប្រួលយ៉ាងស្មុគស្មាញ និងខ្លាំងក្លាបំផុត»។

គិតមកដល់បច្ចុប្បន្ន មនុស្សរាប់ពាន់នាក់ត្រូវបានជួយសង្គ្រោះចេញពីតំបន់ជនលិចធ្ងន់ធ្ងរ ប៉ុន្តែមិនមានករណីស្លាប់ណាមួយត្រូវបានរាយការណ៍នៅឡើយ។ ជាសរុប មនុស្សចំនួន 18,000នាក់ត្រូវបានជម្លៀសចេញពីតំបន់ជនលិច និង 15,000នាក់ផ្សេងទៀត ត្រូវបាននាំទៅកាន់កន្លែងសុវត្ថិភាព។

ស្ថានភាពជំនន់ទឹកភ្លៀងនៅក្នុងរដ្ឋ New South Wales ត្រូវបានគេរាយការណ៍ថា មានសភាពធ្ងន់ធ្ងរជាងគេ ក្នុងនោះក៏មានករណីទឹកគួចបាក់ស្ពាន លិចផ្ទះសំបែង និងនាំឱ្យសត្វពាហនៈត្រូវជាប់ក្នុងទឹក។ល។

ប្រភព៖ CNN, Guardian, AP
ប្រែសម្រួល៖ បុត្រា

March 23, 2021

(វីដេអូ)-កូនដង្កូវ Maggots របស់សត្វរុយខ្មៅ ប្រែក្លាយសំរាមឱ្យទៅជាប្រាក់

កូនដង្កូវដែលកើតចេញពីសត្វរុយខ្មៅម្យ៉ាងដែលមានឈ្មោះថា maggots ត្រូវគេយកមកធ្វើជាអាហារសម្រាប់សត្វចិញ្ចឹម និងជីសម្រាប់ដាក់ដំណាំ បានក្លាយជាសត្វដ៏មានតម្លៃ ដោយសារបច្ចេកទេសចម្រាញ់យកសារធាតុជីវសាស្ត្ររបស់កសិដ្ឋាន Insectta នៅប្រទេសសិង្ហបុរី។

កូនដង្កូវរបស់សត្វរុយ maggots មានសមត្ថភាពស៊ីកាកសំណល់អាហារបានយ៉ាងច្រើន ហើយធំឡើងយ៉ាងឆាប់រហ័ស ដែលកម្រមានសត្វណាមួយអាចធ្វើបានយ៉ាងដូច្នេះ។ កសិដ្ឋាន Insectta នៅប្រទេសសិង្ហបុរីគឺជាកន្លែងប្រមូលយកសាធាតុជីវសាស្ត្រពីកូនដង្កូវរបស់រុយខ្មៅ maggots ដែលផ្ដល់ប្រាក់ចំណេញឱ្យពួកគេបានយ៉ាងច្រើន។

Chua Kai-ning ប្រធានផ្នែកទីផ្សាររបស់ក្រុមហ៊ុន Insectta ឱ្យដឹងថា៖ «ការងារជំនាញរបស់យើងខ្ញុំនៅទីនេះគឺចម្រាញ់យកសារធាតុ chitosan, melanin និងប្រភេទបាក់តេរីមានប្រយោជន៍ពីកាកសំណល់របស់ដង្កូវ maggots»។

Chitosan មានប្រសិទ្ធភាពក្នុងការបង្ការជំងឺរលាក ដែលត្រូវបានគេប្រើប្រាស់ច្រើននៅក្នុងផលិតផលថែទាំសម្រស់ និងឱសថ។ ចំណែកសារធាតុ melanin អាចត្រូវបានគេបំប្លែងទៅជាធាតុចម្លងអគ្គិសនីដែលប្រើប្រាស់ក្នុងការផលិតគ្រឿងអគ្គិសនី។

ក្រុមហ៊ុន Insectta ក៏កំពុងតែចិញ្ចឹមសត្វល្អិននេះដើម្បីយកបាក់តេរីល្អ សម្រាប់ផលិតជាចំណីសត្វ។ ភាគីក្រុមហ៊ុនបានអះអាងថា ការចិញ្ចឹម និងការដោះស្រាយបញ្ហាកាកសំណល់របស់ដង្កូវ maggots គឺពិតជាល្អសម្រាប់បរិស្ថាន។

កូនដង្កូវ maggots រាប់លានក្បាលអាចស៊ីកាកសំណល់អាហាររហូតដល់ 400គីឡូក្រាមជារៀងរាល់ថ្ងៃ។ សំណល់អាហារនៅប្រទេសសិង្ហបុរី មានរហូតដល់ 10% ក្នុងចំណោមសំរាមសរុបនៅប្រទេសនេះក្នុងឆ្នាំ 2019។ ឆ្នាំ 2020 សំណល់អាហារនៅសិង្ហបុរី បានកើនឡើងដល់ 744,000តោន៕

ប្រភព៖ SCMP
ប្រែសម្រួល៖ បុត្រា

March 23, 2021

តៃវ៉ាន់ផ្អាករាល់ការហោះហើររបស់យន្តហោះយោធា ក្រោយករណីធ្លាក់យន្តហោះចម្បាំង

តៃវ៉ាន់ផ្អាករាល់សកម្មភាពហ្វឹកហាត់ និងការហោះហើររបស់ទ័ពអាកាស បន្ទាប់ពីមានគ្រោះថ្នាក់យន្តហោះចម្បាំង F-5E បណ្ដាលឱ្យអ្នកបើកបរយ៉ាងតិចមួយនាក់បានបាត់បង់ជីវិត។

«កងទ័ពការពារដែនអាកាសបានផ្អាករាល់សកម្មភាពហោះហើរ-ហ្វឹកហាត់ចំពោះយន្តហោះយោធា ដើម្បីវាយតម្លៃលើសុវត្ថិភាព ប៉ុន្តែ ភារកិច្ចត្រៀមខ្លួនជាស្រេចសម្រាប់ប្រយុទ្ធនៅតែរក្សាដូចដើម។ អង្គភាពការពារជាតិកំពុងស្វែងរកអ្នកបើកបរដែលបានបាត់ខ្លួនក្នុងអំឡុងពេល 72ម៉ោង» មេបញ្ជាការកងទ័ពការពារដែនអាកាសតៃវ៉ាន់ ឧត្តមសេនីយ៍ Huang Chih-wei បានឱ្យដឹងកាលពីម្សិលមិញ។

សេចក្ដីសម្រេចខាងលើត្រូវបានដាក់ចេញ ក្រោយពីករណីយន្តហោះចម្បាំង F-5E ចំនួនពីរគ្រឿង បានធ្លាក់ចូលសមុទ្រក្នុងពេលកំពុងហោះហើរហ្វឹកហាត់។ «ការស្រាវជ្រាវបឋមបានបង្ហាញថា នេះអាចជាករណីប៉ះទង្គិចគ្នានៅលើអាកាស ដោយមិនទទួលរងឥទ្ធិពលពីកត្តាបច្ចេកទេស និងអាកាសធាតុ» នេះបើតាមឧត្តមសេនីយ៍ Huang។

យន្តហោះចម្បាំង F-5E ពីរគ្រឿង បានធ្លាក់នៅលើលម្ហសមុទ្រភាគខាងកើតនៃស្រុក Pingtung ដែលស្ថិតនៅភាគខាងត្បូងនៃកោះតៃវ៉ាន់ ក្រោយពីបានប៉ះគ្នា។ អ្នកបើកបរម្នាក់ អាយុ 28ឆ្នាំ ត្រូវបានរកឃើញក្នុងស្ថានភាពដែលអាចនៅមានជីវិត ប៉ុន្តែ ការប្រឹងប្រែងក្នុងការជួយសង្គ្រោះជីវិតបានទទួលបរាជ័យ និងត្រូវបានគេបញ្ជាក់ថា បានស្លាប់នៅមន្ទីរពេទ្យ។

ចំណែកអ្នកបើកបរម្នាក់ទៀតដែលមានអាយុ 26ឆ្នាំ មិនទាន់ត្រូវបានរកឃើញនៅឡើយ។ ក្រុមមន្ត្រីតៃវ៉ាន់ បានបញ្ជូនឧទ្ធម្ភាគចក្រពីរគ្រឿង និងនាវាល្បាតចំនួន 6គ្រឿងដើម្បីស្វែងរកអ្នកបើកបរយន្តហោះដែលកំពុងបាត់ខ្លួន។

F-5 គឺជាយន្តហោះចម្បាំងធន់ស្រាល ត្រូវបានអភិវឌ្ឍដោយសហរដ្ឋអាមេរិកតាំងពីទសវត្សរ៍ 1972 ខណៈដែលកំណែ F-5E Tiger II បានហោះហើរដំបូងក្នុងអំឡុងទសវត្សរ៍ 1972។ តៃវ៉ាន់បានទទួល F-5E ដំបូងចាប់ពីឆ្នាំ 1975 ហើយបច្ចុប្បន្ន F-5E និងកំណែល្បាតប្រយុទ្ធ RF-5E ចំនួន 25គ្រឿងកំពុងត្រូវបានប្រើប្រាស់ ចំណែក 90-100គ្រឿងទៀត កំពុងស្ថិតក្នុងស្ថានភាពរក្សាទុកក្នុងឃ្លាំង។

កាលពីខែតុលា 2020 យន្តហោះចម្បាំង F-5E មួយគ្រឿងរបស់តៃវ៉ាន់ ក៏បានដាំក្បាលចូលសមុទ្រ ក្រោយពីមានបញ្ហាម៉ាស៊ីន បណ្ដាលឱ្យអ្នកបើកបរត្រូវបាត់បង់ជីវិត។ ខែធ្នូ ឆ្នាំដដែល អ្នកបើកបរ F-16 មួយគ្រឿងរបស់តៃវ៉ាន់ បានស្លាប់ ព្រោះតែយន្តហោះនេះបានធ្លាក់នៅពេលកំពុងធ្វើដំណើរទៅចូលរួមសកម្មភាពហ្វឹកហាត់នាពេលយប់។

ឧត្តមសេនីយ៍ Shen Yi-ming មេបញ្ជាការកងទ័ពតៃវ៉ាន់ រួមនឹងមន្ត្រីយោធា 7នាក់ផ្សេងទៀត ក៏បានបាត់បង់ជីវិតកាលពីខែមករា 2020 បន្ទាប់ពីឧទ្ធម្ភាគចក្រដែលដឹកពួកគេ បានបុកនឹងភ្នំ ក្នុងដំណើរទៅសួរសុខទុក្ខក្រុមទាហាននៅតំបន់ភ្នំ ក្បែរខាងទីក្រុងតៃប៉ិ៕

ប្រភព៖ AFP
ប្រែសម្រួល៖ បុត្រា

March 23, 2021

Author: សឿន សំណាង