សឿន សំណាង - La Reine Media

(វីដេអូ)-ន័រវែសសាងសង់ផ្លូវរូងក្រោមដីសម្រាប់កប៉ាល់ដំបូងគេបង្អស់ក្នុងពិភពលោក

ផ្លូវទឹករូងក្រោមដីឈ្មោះ Stad ដែលគ្រោងនឹងត្រូវចំណាយប្រាក់ប្រមាណ 350លានដុល្លារអាមេរិកសម្រាប់ការសាងសង់របស់ប្រទេសន័រវែស នឹងជួយឱ្យកប៉ាល់ធំៗទទួលបានសុវត្ថិភាពនៅពេលឆ្លងកាត់តំបន់សមុទ្រដែលគ្រោះថ្នាក់បំផុតប្រចាំប្រទេសនេះ។

ការសាងសង់ផ្លូវទឹករូងក្រោមដីនេះនឹងត្រូវបានចាប់ផ្ដើមនាពេលដ៏ខ្លីខាងមុខ បន្ទាប់ពីរដ្ឋាភិបាលន័រវែស បានអនុម័តលើថវិកាជាទុនសម្រាប់គម្រោងបច្ចេកទេសដ៏មហិមានេះ។

គម្រោងដែលមានឈ្មោះថា Stad Ship Tunnel (ផ្លូវរូងក្រោមដីសម្រាប់នាវា ស្តាដ) នេះ ទទួលបានទុនវិនិយោគប្រមាណ 350លានដុល្លារអាមេរិក។ Stad Ship Tunnel អនុញ្ញាតឱ្យកប៉ាល់ទម្ងន់ដល់ 16,000តោន ផ្លាស់ទីឆ្លងកាត់ដោយសុវត្ថិភាព ត្រង់សមុទ្រ Stadhavet ដែលល្បីឈ្មោះថា សម្បូរដោយព្យុះកំណាច។

ផ្លូវរូងនេះមានកម្ពស់ 33ម៉ែត្រ និងទទឹង 36ម៉ែត្រ។ Stad Ship Tunnel មានប្រវែង 1.7គីឡូម៉ែត្រ លាតសន្ធឹងឆ្លងកាត់ទីតាំងដែលមានទីតាំងស្រស់ស្អាតបំផុតរបស់ឧបទ្វីប Stad ចាប់ពីតំបន់ Bergen ដល់តំបន់ Alesund។ នេះបើតាមអង្គភាពគ្រប់គ្រងឆ្នេរសមុទ្ររបស់ន័រវែង។

ស្ថាប័នគ្រប់គ្រងឆ្នេរសមុទ្ររបស់ន័រវែស ទទួលបានលិខិតប្រគល់ភារកិច្ចពីក្រសួងគមនាគមន៍ ដែលអនុញ្ញាតឱ្យចាប់ផ្ដើមត្រៀមសម្រាប់ការសាងសង់ផ្លូវរូងនេះ។

បើសិនគ្រប់យ៉ាងដំណើរការដោយរលូនទៅតាមផែនការ ផ្លូវរូងក្រោមដីសម្រាប់នាវានេះនឹងត្រូវស្ថាបនារួចរាល់នៅក្នុងឆ្នាំ 2025 ឬ 2026៕

ប្រភព៖ Next Media
ប្រែសម្រួល៖ បុត្រា

March 26, 2021

មិនចប់ងាយៗទេ! ឥណ្ឌារកឃើញកូវីដប្រភេទថ្មី ក្លាយពូជ 2ជាន់ ខណៈចំនួនអ្នកស្លាប់ និងឆ្លងមេរោគប្រចាំថ្ងៃ នៅតែខ្ពស់ក្នុងឆ្នាំនេះ

ប្រទេសឥណ្ឌា បានរាយការណ៍អំពីការរកឃើញ មេរោគក្លាយពូជថ្មី 1ទៀតរបស់វីរុសកូរ៉ូណាប្រភេទថ្មី ដែលក្លាយពូជ 2ជាន់(Double mutant) កាលពីថ្ងៃពុធ ទី24 មីនា ក្នុងខណៈដែលប្រទេសមួយនេះ ត្រូវប្រឈមនឹងចំនួនអ្នកឆ្លងមេរោគ និងស្លាប់ប្រចាំថ្ងៃ ច្រើនបំផុត ចាប់តាំងពីឈានចូលឆ្នាំ2021 មក។

មេរោគក្លាយពូជ ដែលក្រុមអ្នកជំនាញហៅថា “ក្លាយពូជ 2ជាន់ ឬ Double mutant” នេះ ត្រូវបានរកឃើញនៅក្នុងសំណាក ច្រើនជាង 200សំណាកនៅក្នុងរដ្ឋមហារាស្ត្រៈ រដ្ឋភាគខាងលិច ដែលបានរងផលប៉ះពាល់ដោយសារវិបត្តិកូវីដ-19 យ៉ាងធ្ងន់ធ្ងរ និងជាទីតាំងរបស់មុមបៃ ទីក្រុងចម្បងខាងហិរញ្ញវត្ថុ របស់ប្រទេសឥណ្ឌា។

យ៉ាងណាក្ដី បណ្ដាក្រុមមន្ត្រីសុខភាពសាធារណៈ បានបញ្ជាក់ថា មេរោគក្លាយពូជថ្មីនេះ នៅមិនទាន់ត្រូវបានពិនិត្យរកឃើញក្នុងចំនួនច្រើនគ្រប់គ្រាន់ ដែលអាចថា ជាប់ទាក់ទិននឹងចំនួនអ្នកឆ្លងមេរោគ ដែលកើនឡើងយ៉ាងច្រើននៅក្នុងរដ្ឋមហារាស្ត្រៈ និងរដ្ឋផ្សេងៗ ដែលក្នុងនោះរួមទាំងរដ្ឋក្រេឡាក់ និងរដ្ឋប៉ាន់ចាបនោះនៅឡើយ។

លោក រ៉ាម៉ាណាន់ ល័កស្ម៊ីណារ៉ាយ៉ាន់ ស្ថាបនិកមជ្ឈមណ្ឌលថាមពលរបស់ជំងឺ សេដ្ឋកិច្ច និងនយោបាយ ក្នុងទីក្រុងនីវដេលី បានថ្លែងថា “ការក្លាយពូជ 2ជាន់ មិនមែនជាវាក្យស័ព្ទខាងវិទ្យាសាស្ត្រទេ វាគ្រាន់តែជាមេរោគក្លាយពូជមួយទៀត ដែលមើលទៅហាក់ដូចជាមានតែនៅក្នុងប្រទេសឥណ្ឌាប៉ុណ្ណោះ”

លោកបានថ្លែងទៀតថា “សួរថា តើមានហេតុផល ដែលត្រូវកង្វល់ពាក់ព័ន្ធនឹងមេរោគក្លាយពូជមួយនេះ ជាពិសេសដែរឬទេ? វាមិនទាន់ប្រាកដដែរ ព្រោះយើងរកមិនឃើញភ័ស្តុតាងថា មេរោគក្លាយពូជមួយនេះ វាចម្លងសាយភាយបានងាយជាង ឬធ្ងន់ធ្ងរជាងវីរុសដែលយើងកំពុងប្រឈមនោះឬយ៉ាងណានៅឡើយ”

បណ្ដាសំណាក ដែលពិនិត្យរកឃើញមេរោគក្លាយពូជកូវីដ-19ថ្មី នៅក្នុងរដ្ឋមហារាស្ត្រៈ ក្នុងនោះប្រមាណជា 20% ជាសំណាកមកពីទីក្រុងណាកពុរៈ មជ្ឈមណ្ឌលកណ្ដាលខាងពាណិជ្ជកម្ម និងឡូជិស្ទិក។ នេះបើតាមការឱ្យដឹងពីលោក ស៊ុជីត គូម៉ារ ស៊ីងហ៍ អគ្គនាយកមជ្ឈមណ្ឌលគ្រប់គ្រងជំងឺនៃប្រទេសឥណ្ឌា។

“មេរោគក្លាយពូជ កំពុងបង្ហាញខ្លួនឡើង សន្សឹម” លោកស៊ីងហ៍ បានថ្លែង ព្រមទាំងបញ្ជាក់ថា សំណាក9 របស់មេរោគក្លាយពូជប្រភេទថ្មី ត្រូវបានរកឃើញនៅក្នុងទីក្រុងនីវដេលីដូចគ្នា ខណៈដែលទីក្រុងចម្បងមួយនេះ បានរកឃើញចំនួនអ្នកឆ្លងមេរោគកូវីដ-19 កើនឡើងជាបន្តបន្ទាប់ ក្នុងអំឡុងច្រើនសប្ដាហ៍កន្លងមកនេះ។

សូមជម្រាបដែរថា ប្រទេសឥណ្ឌា បានអនុម័តវ៉ាក់សាំងរួចហើយ 2ប្រភេទ មានវ៉ាក់សាំងដែលអភិវឌ្ឍដោយអ៊ែស្ត្រាហ្សេនេកា និងមហាវិទ្យាល័យអុកស្វដ និង 1ប្រភេទទៀត ដែលអភិវឌ្ឍនៅក្នុងប្រទេសដោយក្រុមហ៊ុន ភារ៉ាត់ បៃអូថេក ដែលមានប្រសិទ្ធភាពប្រឆាំងមេរោគក្លាយពូជកូវីដ-19 ដែលរកឃើញដំបូងនៅក្នុងចក្រភពអង់គ្លេស និងប្រេស៊ីល។

កាលពីថ្ងៃពុធ ទី24 មីនា ឥណ្ឌាបានរាយការណ៍ពីការរកឃើញអ្នកឆ្លងមេរោគថ្មី 47,262នាក់ ក្នុងអំឡុង 24ម៉ោង ជាចំនួនខ្ពស់បំផុត គិតចាប់តាំងពីខែវិច្ឆិកា ឆ្នាំកន្លងទៅ បណ្ដាលឱ្យចំនួនអ្នកឆ្លងមេរោគសរុបមាន 11.7លាននាក់ ខ្ពស់បំផុត ជាប់លំដាប់លេខ3 ក្នុងពិភពលោក ក្រោមតែសហរដ្ឋអាមេរិក និងប្រេស៊ីលប៉ុណ្ណោះ។

ចំនួនអ្នកស្លាប់ដោយសារកូវីដ-19 ក្នុងជុំ 24ម៉ោងកន្លងទៅ ស្ថិតក្នុងចំនួន 275នាក់ ខ្ពស់បំផុតក្នុងជុំ 1ឆ្នាំនេះ បណ្ដាលឱ្យចំនួនអ្នកស្លាប់សរុប ស្ថិតក្នុងចំនួន 160,441នាក់។

រដ្ឋជាច្រើន បានចេញបទបញ្ជាហាមប្រមូលផ្ដុំជួបជុំគ្នា មុនរដូវកាល ហូលី របស់ជនជាតិហ៊ិណ្ឌូ ក្នុងអំឡុងចុងសប្ដាហ៍នេះ ខណៈពេលជាមួយគ្នា ខាងរដ្ឋបាលកណ្ដាល បានប្រកាសពង្រីកគ្រោងការចាក់វ៉ាក់សាំងទូទាំងប្រទេស រួមទាំងមនុស្សគ្រប់រូប ដែលមានអាយុ 45ឆ្នាំឡើងទៅ ចាប់តាំងពីខែមេសាទៅ៕

ប្រភព៖ ទីភ្នាក់ងារព័ត៌មាន Reuters
ប្រែ និងសម្រួលដោយ ទិទីតំតាតូ

March 26, 2021

របៀបលាយតែទឹកដោះគោ ក្លាយជាមុខរបរថ្មីនៅក្នុងវចនានុក្រម៖ ទំហំទីផ្សារតម្លៃរាប់សែនលានដុល្លារអាមេរិក

ជាមួយនឹងទីផ្សារតែទឹកដោះគោដែលមានទំហំរាប់សែនលានដុល្លារអាមេរិក របៀបលាយតែទឹកដោះគោបានក្លាយជាមុខរបរថ្មីមួយនៅក្នុងវចនានុក្រមដែលនិយាយអំពីប្រភេទការងារក្នុងសង្គម។

មុខរបរលាយតែទឹកដោះគោ រួមនឹងមុខរបរចំនួន 17 ផ្សេងទៀត ដែលមានដូចជា ភ្នាក់ងារលក់រថយន្តមួយទឹក, អ្នកជំនាញខាងលេងហ្គេម និង live streamer (ពិធីករដឹកនាំការផ្សាយផ្ទាល់លើអ៊ីនធើណិត) ជាដើម គឺជាមុខរបរថ្មីដែលទើបត្រូវបានបញ្ចូលឈ្មោះទៅក្នុង «វចនានុក្រមបែងចែកប្រភេទមុខរបរចិន» នេះបើតាមលទ្ធផលស្រាវជ្រាវដែលត្រូវបានប្រកាសកាលពីថ្ងៃទី 23មីនា ដោយក្រសួងធនធានមនុស្សនិងសន្តិសុខសង្គមចិន (MOHRSS) រួមនឹងនាយកដ្ឋានគ្រប់គ្រងទីផ្សារ និងនាយកដ្ឋានស្ថិតិជាតិ។

ទូរទស្សន៍ជាតិចិន (CCTV) ដកស្រង់សំដីរបស់អ្នកជំនាញខាងលាយតែទឹកដោះគោម្នាក់ ឈ្មោះ Huang Peng ឱ្យដឹងថា៖ «បច្ចេកទេសលាយតែទឹកដោះគោ មានការលំបាកនៅត្រង់ថា អ្នកលាយត្រូវលៃលកបរិមាណរបស់គ្រឿងផ្សំផ្សេងៗគ្នា ដើម្បីឆ្លើយតបនឹងចំណូលចិត្តរបស់អតិថិជន»។

អតិថិជនកំពុងរីករាយជាមួយភេសជ្ជតែទឹកដោះគោដែលពួកគេបានទិញកាលពីឆ្នាំ2017 នៅប្រទេសចិន

អ្នកជំនាញខាងលាយតែទឹកដោះគោគឺជាអ្នកបង្កើតភេសជ្ជជាតែទឹកដោះគោដោយការលាយបញ្ចូលគ្នារវាងតែ ផ្លែឈើ និងផលិតផលដែលធ្វើពីទឹកដោះគោ ទៅតាមបរិមាណកំណត់ជាក់លាក់ណាមួយ។ មុខរបរថ្មីនេះ មិនត្រឹមតែបង្កើតឱ្យមានភាពងាយស្រួលក្នុងការជ្រើសរើសបុគ្គលិកពីសំណាក់ក្រុមហ៊ុនប៉ុណ្ណោះទេ តែក៏ជួយជំរុញកំណើតសេដ្ឋកិច្ចដែលទាក់ទងនឹងវិស័យតែ ទឹកដោះគោ និងផ្លែឈើ ឱ្យរីកចម្រើនឆាប់រហ័សផងដែរ។ នេះបើតាម MOHRSS។

បច្ចុប្បន្ន ប្រទេសចិនមានមនុស្សជាង 340លាននាក់ ជាអតិថិជនរបស់តែទឹកដោះគោ។ តាមការរំពឹងទុក ទំហំទីផ្សារការងារក្នុងវិស័យតែទឹកដោះគោនៅប្រទេសចិន នឹងកើនឡើងលើស 110ពាន់លានយុន (16.86ពាន់លានដុល្លារអាមេរិក) នៅក្នុងឆ្នាំ 2021៕

ប្រភព៖ Global Times
ប្រែសម្រួល៖ បុត្រា

March 26, 2021

ក្រសួងព័ត៌មានប្រាប់ឱ្យអ្នកធ្វើការក្នុងប្រព័ន្ធផ្សព្វផ្សាយទាំងអស់ ចុះឈ្មោះចាក់វ៉ាក់សាំងបង្ការ Covid-19

អគ្គនាយកដ្ឋានព័ត៌មាន និងសោតទស្សន៍ បានប្រកាសឱ្យម្ចាស់ប្រព័ន្ធផ្សព្វផ្សាយទាំងអស់ រៀបចំធ្វើបញ្ជីឈ្មោះថ្នាក់ដឹកនាំ បុគ្គលិក និងអ្នកសារព័ត៌មានរបស់ខ្លួន រួចបញ្ជូនទៅកាន់អគ្គនាយកដ្ឋានព័ត៌មាន។

បញ្ជីឈ្មោះខាងលើ ត្រូវផ្ញើទៅកាន់អគ្គនាយកដ្ឋានត្រឹមថ្ងៃទី 26មីនា 2021 ដើម្បីអគ្គនាយកដ្ឋានបូកសរុប និងបញ្ជូនទៅកាន់ក្រសួងសុខាភិបាល។ ការស្រង់ឈ្មោះនេះ ត្រូវធ្វើឡើងក្នុងលក្ខខណ្ឌស្ម័គ្រចិត្ត។ នេះបើតាមសេចក្ដីជូនដំណឹងរបស់អគ្គនាយកដ្ឋានព័ត៌មាន និងសោតទស្សន៍ ចុះថ្ងៃទី 25មីនា 2021។

ព័ត៌មានបន្ថែម សូមអានសេចក្ដីប្រកាសខាងក្រោម៖

March 26, 2021

វីរុសផ្ដាសាយអាចទប់ស្កាត់ការ «copy-past» របស់វីរុស Covid-19

ក្រុមអ្នកវិទ្យាសាស្ត្រអង់គ្លេសបានរកឃើញថា ប្រព័ន្ធភាពស៊ាំដែលកើតឡើងបន្ទាប់ពីបានឆ្លង rhinovirus ដែលជាវីរុសបង្កជំងឺផ្ដាសាយធម្មតា អាចបង្កើតបានជាការការពារមួយចំនួន ជួយឱ្យរាងកាយប្រឆាំងនឹងវីរុស Covid-19។

ក្រុមអ្នកវិទ្យាសាស្ត្រនៅមជ្ឈមណ្ឌលស្រាវជ្រាវវីរុស (CVR) នៃសាកលវិទ្យាល័យ Glasgow (អង់គ្លេស) បានរកឃើញថា វីរុស rhinovirus ដែលបង្កជំងឺផ្ដាសាយធម្មតា មានលទ្ធភាពដាស់ប្រព័ន្ធការពាររាងកាយពីកំណើត ឱ្យមានសកម្មភាព ដើម្បីទប់ស្កាត់ដំណើរការនៃការ «ថតចម្លង» (បង្កើតកូនចៅ) របស់ Covid-19 នៅក្នុងកោសិកានៃប្រព័ន្ធដង្ហើម។ លទ្ធផលនៃការសិក្សាស្រាវជ្រាវខាងលើត្រូវបានចុះផ្សាយលើទស្សនាវដ្ដី Journal of Infectious Diseases កាលពីថ្ងៃទី 23មីនា 2021។

ក្នុងការស្រាវជ្រាវនេះ អ្នកវិទ្យាសាស្ត្របានចម្លងវីរុស Covid-19 ទៅកាន់កោសិកានៃប្រព័ន្ធដង្ហើមរបស់មនុស្សនៅក្នុងបន្ទប់ពិសោធន៍ និងបង្កើតបរិស្ថានដូចទៅនឹងកោសិកាដែលជំងឺឆ្លងធម្មតាបានកើតមាន។ ក្រោយមក ពួកគេវិភាគទៅលើការកកើតកូនចៅរបស់ Covid-19 នៅក្នុងបរិស្ថាននេះ ហើយវាត្រូវបានចែកជាពីរករណីគឺ «មាន» និង «មិនមានវីរុសផ្ដាសាយ»។

សាស្ត្រាចារ្យ Pablo Murcia ដែលជាសមាជិកម្នាក់របស់ក្រុមស្រាវជ្រាវខាងលើ បានឱ្យដឹងថា ការពិសោធន៍បានបង្ហាញថា វីរុស rhinovirus នៅក្នុងរាងកាយមនុស្ស ធ្វើឱ្យសកម្មលើប្រព័ន្ធភាពស៊ាំពីកំណើតនៅក្នុងកោសិកាផ្លូវដង្ហើមរបស់មនុស្ស ហើយតាមរយៈនេះ ក៏ទប់ស្កាត់ការកកើតកូនចៅរបស់ Covid-19។

លោក Pablo Murcia ថ្លែងថា៖ «ប្រការនេះមានន័យថា ការឆ្លើយតបរបស់ប្រព័ន្ធការពាររាងកាយដែលបង្កើតឡើងដោយដំណើរការនៃការឆ្លងវីរុសផ្ដាសាយ អាចផ្ដល់នូវការការពារច្រើនកម្រិតដើម្បីប្រឆាំងនឹង Covid-19 ដោយវាមានសក្ដានុពលក្នុងការទប់ស្កាត់ការឆ្លងរាលដាលរបស់វីរុសនេះ និងកាត់បន្ថយកម្រិតនៃភាពធ្ងន់ធ្ងរដែល Covid-19 អាចបង្កឡើង»។

ការវិភាគនៅលើកុំព្យូទ័ររបស់ក្រុមអ្នកស្រាវជ្រាវបានបង្ហាញថា អន្តរកម្មរវាងវីរុសនានា អាចមានឥទ្ធិពលទៅលើបរិមាណនៃបណ្ដុំរបស់វីរុស ពោលគឺការឆ្លងវីរុសផ្ដាសាយមានអត្រាខ្ពស់កម្រិតណា តួលេខនៃការឆ្លង Covid-9 ក៏អាចថយចុះកម្រិតនោះ។

របកគំហើញនេះ ជួយឱ្យក្រុមស្រាវជ្រាវ ស្វែងយល់អំពីយន្តការ និងកម្រិតនៃអន្តរកម្មរបស់វីរុសផ្ដាសាយ ជាមួយនឹង Covid-19 ដែលនាំឱ្យមានការអភិវឌ្ឍវិធីសាស្ត្រព្យាបាលជំងឺCovid-19 នៅក្នុងកម្រិតម៉ូលិគុល។ «ប៉ុន្តែ ការចាក់វ៉ាក់សាំង អាចនៅតែជាវិធីសាស្ត្រល្អបំផុតដើម្បីការពាររាងកាយពីវីរុស» អ្នកវិទ្យាសាស្ត្រ Pablo Murcia បញ្ជាក់បន្ថែម៕

ប្រភព៖ Oxford Academic
ប្រែសម្រួល៖ បុត្រា

March 26, 2021

ពលរដ្ឋមីយ៉ានម៉ារាប់ពាន់នាក់បន្តចេញធ្វើបាតុកម្ម ក្រោយ «នៅស្ងៀម» បានមួយថ្ងៃ

មនុស្សរាប់ពាន់នាក់បាននាំគ្នាចេញដង្ហែក្បួនជាបាតុកម្មនៅតាមដងផ្លូវក្នុងទីក្រុងនានានៃប្រទេសភូមានាថ្ងៃនេះ បន្ទាប់ពីបានធ្វើ «កូដកម្មស្ងាត់ស្ងៀម» រយៈពេលមួយថ្ងៃ ដើម្បីប្រឆាំងនឹងរដ្ឋប្រហារយោធា។

បាតុកម្មនាថ្ងៃនេះ ត្រូវបានធ្វើឡើងនៅទីក្រុង Yangon និង Monywa រួមនឹងនៅទីក្រុងមួយចំនួនទៀតនៃប្រទេសមីយ៉ានម៉ា។ នេះបើតាមក្រុមសាក្សី និងអត្ថបទបង្ហោះតាមបណ្ដាញសង្គម។

«តើយើងមានសាមគ្គីភាពដែរ ឬទេ? មាន! យើងត្រូវតែមានសាមគ្គីភាព» ក្រុមបាតុករនាំគ្នាស្រែកហ៊ោនៅទីក្រុង Monywa និងបានប្រកាសថា ការតស៊ូរបស់ពួកគេ «ត្រូវតែឈ្នះ»។

នារីជាបាតុករម្នាក់ ឈ្មោះ Nant Khi Phyu Aye ឱ្យដឹងថា អ្នកដែលចូលរួមចលនាបាតុកម្ម ភាគច្រើនគឺជាយុវវ័យ។ «ពួកគេចង់ចូលរួមគ្រប់ពេល មិនបោះបង់មួយថ្ងៃឡើយ»។

យោងតាមសារព័ត៌មាន Hinthar Media ក្រុមប៉ូលិសបានបង្ក្រាបបាតុកម្មមួយនៅ Mawlamyine និងបានចាប់ខ្លួនបាតុករចំនួន 20នាក់។ មនុស្សយ៉ាងតិចពីរនាក់បានរងរបួង ប៉ុន្តែមិនទាន់មានព័ត៌មានទាក់ទិននឹងករណីស្លាប់ ឬរបួសនៅតំបន់ផ្សេងៗនៅឡើយ។

បាតុកម្មនៅទីក្រុង Yangon ក្នុងថ្ងៃទី 25 មីនា

បាតុកម្មខាងលើត្រូវបានធ្វើឡើងក្រោយពីការធ្វើ «កូដកម្មស្ងៀមស្ងាត់» កាលពីថ្ងៃទី 24មីនា នៅពេលពលរដ្ឋបានអំពាវនាវឱ្យបិទទ្វារនៅក្នុងផ្ទះ នាំឱ្យតំបន់ដែលធ្លាប់មានមនុស្សអ៊ូអរ ប្រែជាស្ងប់ស្ងាត់ខុសធម្មតា។

ទំហំនៃបាតុកម្មនានានៅតាមដងផ្លូវក្នុងទីក្រុង បានថយចុះនៅក្នុងអំឡុងប៉ុន្មានថ្ងៃកន្លងទៅនេះ បន្ទាប់ពីមានអំពើបង្ក្រាបយ៉ាងចាស់ដៃពីសំណាក់របបយោធាមីយ៉ានម៉ា។ ក៏ប៉ុន្តែ ក្រុមសកម្មជនប្រជាធិបតេយ្យបានអំពាវនាវឱ្យគ្រប់គ្នាបន្តចេញធ្វើបាតុកម្ម ចាប់ពីថ្ងៃនេះតទៅ។

កងទ័ពភូមា បានធ្វើរដ្ឋប្រហារយោធាកាលពីថ្ងៃទី 1កុម្ភៈ និងបានចាប់ខ្លួនក្រុមមន្ត្រីជាន់ខ្ពស់ជាច្រើនរូបនៃបក្សកាន់អំណាចរបស់លោកស្រី Aung San Suu Kyi ក្រោមលេសថា មានការលួចបន្លំសន្លឹកឆ្នោតនៅក្នុងការបោះឆ្នោតកាលពីខែវិច្ឆិកា ឆ្នាំ2020។ ទង្វើនេះបាននាំឱ្យមានបាតុកម្មកើតឡើងជាបន្តបន្ទាប់ ក្នុងនោះ មានមនុស្សយ៉ាងតិច 286នាក់បានស្លាប់ដោយសារគ្រាប់កាំភ្លើងរបស់ប៉ូលិស។ នេះបើតាមសមាគមសង្គ្រោះអ្នកទោសនយោបាយ (AAPP)៕

ប្រភព៖ Reuters
ប្រែសម្រួល៖ បុត្រា

March 25, 2021

ការជួយសង្គ្រោះកប៉ាល់ «យក្ស» Ever Given ដែលជាប់គាំងទទឹងព្រែកជីក Suez កំពុងដំណើរការ

ករណីកប៉ាល់ដឹកទំនិញជាង 200,000តោន ឈ្មោះ Ever Given ដែលកំពុងជាប់គាំង និងរាំងស្ទះនៅលើព្រែកជីក Suez កំពុងទទួលបានការយកចិត្តទុកដាក់ពី SMIT Salvage ដែលជាក្រុមហ៊ុនសង្គ្រោះកប៉ាល់ដ៏ល្បីឈ្មោះរបស់ប្រទេសហូឡង់។

យោងតាមស្ថាប័នគ្រប់គ្រងព្រែក Suez កប៉ាក់ដឹកទំនិញដ៏ធំ ឈ្មោះ Ever Given ដែលដំណើរការដោយក្រុមហ៊ុនតៃវ៉ាន់ Evergreen Marine និងដោតទង់ជាតិរបស់ប៉ាណាម៉ា កាលពីថ្ងៃទី 23មីនា បានជួបប្រទះនឹងខ្យល់ព្យុះធូលីមួយនៅពេលកំពុងដឹកទំនិញរាប់ពាន់តោនឆ្ពោះទៅកាន់ Rotterdam នៃប្រទេសហូឡង់ បណ្ដាលឱ្យក្រុមនាវិកពិបាកក្នុងការបញ្ជាកប៉ាល់ក្រោមខ្យល់បោកបក់យ៉ាងខ្លាំង និងមានបញ្ហាដាច់ភ្លើង។

ជាលទ្ធផល Ever Given ដែលជាកប៉ាល់ធំជាងគេមួយក្នុងពិភពលោក ជាមួយនឹងចំណុះជិត 220,000តោន ប្រវែង 400ម៉ែត្រ បានជាប់គាំងទទឹងព្រែកជីកដែលត្រូវបានគេចាត់ទុកថា ជាផ្លូវទឹកសំខាន់បំផុតក្នុងពិភពលោក តភ្ជាប់រវាងសមុទ្រក្រហម និងមជ្ឈមបូព៌ា។

ពណ៌លឿងគឺជាកប៉ាល់ Ever Given ចំណែកនៅជុំវិញគឺជាកប៉ាល់អូស

កប៉ាល់ជាង 100គ្រឿងផ្សេងទៀត កំពុងស្ទះនៅពីក្រោយ Ever Given។ តម្លៃប្រេងកាលពីថ្ងៃទី 24មីនា ក៏បានកើនឡើងនៅពេលមានការព្រួយបារម្ភលើបញ្ហានៃការប្រើប្រាស់ព្រែកជីក Suez ជាកន្លែងដែលចរន្តទឹកប្រាក់ទំហំប្រមាណ 12% របស់ពិភពលោក ត្រូវឆ្លងកាត់ទីនេះ។

ការជួយសង្គ្រោះ Ever Give គឺជាភារកិច្ចយ៉ាងលំបាក។ រូបភាពដែលបានមកពីផ្កាយរណប បានបង្ហាញថា ច្រមុះរបស់កប៉ាល់ស្ថិតនៅជាប់ជញ្ជាំងភាគខាងកើតរបស់ព្រែក ចំណែកកន្ទុយរបស់វា ទំនងជាកំពុងប៉ះនឹងជញ្ជាំងផ្នែកខាងលិច។

«មើលពីក្រៅ កប៉ាល់នេះកំពុងជាប់គាំងយ៉ាងណែន។ កប៉ាល់ទាញជាច្រើនគ្រឿងត្រូវបានបញ្ជូនទៅកាន់កន្លែងកើតហេតុ ប៉ុន្តែគ្មានប្រយោជនសោះ» Julianne Cona វិស្វកររបស់កប៉ាល់ Maersk Denver ដែលកំពុងស្ទះផ្លូវនៅខាងក្រោយ Ever Given បានសរសេរនៅលើទំព័រ Instagram។

SMIT Salvage ក្រុមហ៊ុនបុត្រសម្ព័ន្ធរបស់ Royal Boskalis Westminster NV នៃប្រទេសហូឡង់ គឺជាក្រុមហ៊ុនមួយក្នុងចំណោមក្រុមហ៊ុនដែលត្រូវបានម្ចាស់កប៉ាល់ Ever Given ជ្រើសរើសដើម្បីសង្គ្រោះកប៉ាល់កំពុងជាប់គាំងនេះ។ SMIT Salvage ធ្លាប់បានជួយសង្គ្រោះកប៉ាល់ជាច្រើនដែលមានបញ្ហានៅលើសមុទ្រ ក្នុងនោះមានដូចជា ករណីសង្គ្រោះនាវាមុជទឹករុស្ស៊ីដែលបានលិចកាលពីឆ្នាំ 2001 ឬករណីបូមប្រេងចេញពីក្នុងនាវាទេសចរណ៍ Costa Concordia ដែលជាប់គាំងនៅអ៊ីតាលីកាលពីឆ្នាំ 2012។ល។

Martijn Schuttevaer អ្នកនាំពាក្យរបស់ក្រុមហ៊ុន Boskalis បានឱ្យដឹងថា៖ «ប្រការសំខាន់គឺត្រូវដឹងអំពីកម្រិតនៃការប៉ះទៅលើជញ្ជាំងរបស់ព្រែក។ សំណួរត្រូវបានដាក់ចេញនោះគឺថា តើការផ្លាស់ទីរបស់កប៉ាល់នេះ មានការលំបាកកម្រិតណា?»។

ចម្លើយសម្រាប់សំណួរខាងលើនឹងកំណត់បាននូវអ្វីដែលនឹងត្រូវធ្វើបន្ទាប់។ ក្រុមអ្នកជួយសង្គ្រោះនឹងត្រូវរកវិធីធ្វើឱ្យកប៉ាល់នេះស្រាលជាងមុន ដើម្បីអាចអូសវាទៅកាន់ទីតាំងដែលមិនសូវមានឧបសគ្គ ក្នុងបំណងបើកផ្លូវឱ្យកប៉ាល់ផ្សេងៗអាចឆ្លងកាត់បាន។ ក្រុមអ្នកជួយសង្គ្រោះ អាចបូមទឹក និងឥន្ធនៈចេញពីកប៉ាល់ នេះបើតាម Schuttavaer។

ក្នុងករណីអាក្រក់បំផុត គេអាចត្រូវយកកុងតឺន័រចេញពីកប៉ាល់។ ដំណើរការនេះនឹងស៊ីពេលយូរប៉ុន្មានគឺអាស្រ័យលើឧបករណ៍ដែលត្រូវបានប្រើប្រាស់នៅជុំវិញកប៉ាល់ ក្នុងនោះ ការប្រើប្រាស់ឧទ្ធម្ភាគចក្រគឺជាជម្រើសល្អមួយ។

គម្រោងរបស់ SMIT គឺបញ្ជូនមនុស្សមួយក្រុម រួមមាន 8នាក់ ទៅកាន់ទីតាំងរបស់ Ever Given នៅព្រឹកថ្ងៃទី 25មីនា (ម៉ោងក្នុងស្រុក) ដើម្បីត្រួតពិនិត្យកប៉ាល់។ Joseph Farrell III ជានាយកផ្នែកអភិវឌ្ឍពាណិជ្ជកម្មប្រចាំ Resolve Marine ដែលជាក្រុមហ៊ុនសេវាកម្មជួយសង្គ្រោះមួយផ្សេងទៀត ឱ្យដឹងថា ក្រុមដូច្នេះតែងត្រូវបានដឹកនាំដោយអ្នកជំនាញក្នុងការជួយសង្គ្រោះ មានដូចជាអតីតប្រធានក្រុមនាវិកជាដើម ប៉ុន្តែក៏ត្រូវមានទាំងអ្នកមុជទឹក ជាងផ្សារដែក និងអ្នកបញ្ជាដងស្ទូចជាដើម។

បច្ចុប្បន្ន ភារកិច្ចដំបូងគឺត្រូវស្ដារបាតដីនៅជុំវិញកប៉ាល់។ គណៈគ្រប់គ្រងរបស់ព្រែក Suez បានបញ្ជូនកប៉ាល់ស្ដារទៅកាន់ទីតាំងកើតហេតុ ដើម្បីយកខ្សាច់នៅក្រោមទឹក មុនពេលកម្លាំងជួយសង្គ្រោះ អូសកប៉ាល់នោះចេញ៕

ប្រភព៖ Washington Post, Bloomberg
ប្រែសម្រួល៖ បុត្រា

March 25, 2021

អ្នកជំងឺCovid-19 ចំនួន 2នាក់ទៀត បានស្លាប់កាលពីព្រឹកថ្ងៃទី 25មីនា នៅមន្ទីរពេទ្យរុស្ស៊ី

ក្រសួងសុខាភិបាល តាមរយៈទំព័របណ្ដាញសង្គម បានឱ្យដឹងថា នាព្រឹកថ្ងៃទី 25 ខែមីនា ឆ្នាំ2021 នេះ មានករណីអ្នកជំងឺCovid-19 ចំនួន 2នាក់ទៀត បានស្លាប់នៅឯមន្ទីរពេទ្យមិត្តភាពខ្មែរ-សូវៀត (មន្ទីរពេទ្យរុស្ស៊ី) នាទីក្រុងភ្នំពេញ។

អ្នកជំងឺដែលបានស្លាប់ខាងលើ រួមមាន៖ ម្នាក់ជាបុរសជនជាតិខ្មែរ អាយុ 38ឆ្នាំ មានទីលំនៅនៅក្នុងភូមិសាមគ្គី សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ្ និងម្នាក់ទៀតជាបុរសជនជាតិចិន អាយុ 43ឆ្នាំ ស្នាក់នៅក្នុងសណ្ឋាគារយ៉ុងយ័ន ឃុំសំពៅពូន ស្រុកកោះធំ ខេត្តកណ្ដាល។

ដូច្នេះ គិតមកដល់បច្ចុប្បន្ន (25មីនា 2021) តួលេខអ្នកជំងឺCovid-19 ដែលបានបាត់បង់ជីវិតនៅកម្ពុជា បានកើនឡើងដល់ 7នាក់ហើយ។ ព័ត៌មានបន្ថែម សូមបន្តអានសេចក្ដីប្រកាសរបស់ក្រសួងសុខាភិបាល ដែលមានដូចខាងក្រោម៖

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 25, 2021

មហាសេដ្ឋី និងជាស្ថាបនិករបស់ផ្សារអនឡាញ Pinduoduo លាលែងពីតំណែង

មហាសេដ្ឋី Colin Huang លាលែងពីតំណែងប្រធានក្រុមប្រឹក្សាភិបាលរបស់ Pinduoduo បន្ទាប់ពីផ្សារអនឡាញនេះបានយកឈ្នះលើក្រុមហ៊ុនយក្ស Alibaba និង JD.com បើគិតទៅលើតួលេខអ្នកប្រើប្រាស់សរុប។

Chen Lei ដែលជាមិត្តរួមថ្នាក់កាលពីនៅរៀន និងជាអ្នកធ្លាប់ទទួលតំណែង CEO ជំនួស Colin Huang ចាប់ពីខែកក្កដា ឆ្នាំ2020 នឹងឡើងកាន់តំណែងប្រធានរបស់ក្រុមហ៊ុន Pinduoduo។ នៅក្នុងលិខិតមួយដែលបានផ្ញើទៅកាន់ម្ចាស់ហ៊ុនទាំងអស់កាលពីពេលថ្មីៗនេះ លោក Huang យល់ថា លោកមានភាពសមស្របដើម្បីចាកចេញពីតំបន់សុវត្ថិភាព និងចាប់ផ្ដើមដំណើរផ្សងព្រេងថ្មី។ ទន្ទឹមនឹងនេះ មហាសេដ្ឋីចិនរូបនេះក៏បានឱ្យដឹងថា Pinduoduo កំពុងឈានចូលដល់ដំណាក់កាលពេញវ័យ ដូច្នេះ ការដែលលោកចាកចេញនឹងជួយឱ្យក្រុមហ៊ុនរីកចម្រើនដោយឯករាជ្យជាងមុន។

សេចក្ដីប្រកាសថ្មីដែលទើបត្រូវបានក្រុមហ៊ុន Pinduoduo លើកឡើងនាពេលថ្មីៗនេះ បានបញ្ជាក់ថា លោក Huang នឹងផ្ដោតការយកចិត្តទុកដាក់ និងស្រាវជ្រាវលើផ្នែកវិទ្យាសាស្ត្រទាក់ទិននឹងការរស់នៅ ជាវិស័យដែលអាចបង្កើតបានប្រការថ្មីៗដែលជួយជំរុញវិស័យកសិកម្មនៅប្រទេសចិន ឱ្យបានរីកចម្រើនជាងបច្ចុប្បន្ន។ យោងតាម Wall Street Journal លោក Huang បានទាក់ទងទៅកាន់សាកលវិទ្យាល័យជាច្រើនដើម្បីបង្កើតបន្ទប់ពិសោធន៍ សិក្សាស្រាវជ្រាវបច្ចេកវិទ្យាជីវសាស្ត្រ។

មហាសេដ្ឋីវ័យ 41ឆ្នាំ លោកColin Huang កាន់កាប់ភាគហ៊ុន 29% នៅក្នុងក្រុមហ៊ុន Pinduoduo

តម្លៃមូលធនទីផ្សាររបស់ Pinduoduo បានធ្លាក់ចុះជិត 8% បន្ទាប់ពីព័ត៌មានស្ដីអំពីការលាលែងរបស់លោក Huang ត្រូវបានប្រកាស។ ទ្រព្យរបស់មហាសេដ្ឋីវ័យ 41ឆ្នាំរូបនេះក៏ត្រូវបាត់បង់ប្រមាណ 4ពាន់លានដុល្លារ ព្រោះតែការសម្រេចចិត្តរបស់លោក។ ថ្វីបើបាត់បង់សិទ្ធិក្នុងការបោះឆ្នោត និងអំណាចក្នុងការសម្រេចចិត្តចុងក្រោយនៅក្នុងក្រុមប្រឹក្សាភិបាល បន្ទាប់ពីចាកចេញពីតំណែងចំនួនពីរ (នាយកប្រតិបត្តិ និងប្រធានក្រុមប្រឹក្សាភិបាល) លោក Huang នៅតែជាម្ចាស់ភាគហ៊ុនធំជាងគេរបស់ Pinduoduo ដោយកាន់កាប់ភាគហ៊ុនចំនួន 29%។

ជាមួយនឹងអ្នកប្រើប្រាស់ចំនួន 788លាននាក់ Pinduoduo បច្ចុប្បន្នគឺជាគូប្រជែងធំរបស់ផ្សារអនឡាញ Alibaba និង JD.com។ ជោគជ័យរបស់ Pinduoduo មួយភាគធំគឺបានមកពីរូបមន្ត «ទិញជាក្រុម» នៅពេលក្រុមហ៊ុននេះលើកទឹកចិត្តឱ្យអ្នកប្រើប្រាស់ចែករំលែកតំណភ្ជាប់អំពីផលិតផលមួយមុខ ដើម្បីអញ្ជើញមិត្តភក្ដិចូលរួមទិញជាក្រុម ក្នុងបំណងទទួលបានតម្លៃទាបបំផុត។

ក្នុងរយៈពេលជាច្រើនឆ្នាំមកនេះ Pinduoduo បានចាប់ផ្ដើមវិនិយោគច្រើនទៅលើវិស័យដែលទាក់ទងនឹងកសិកម្ម ការសិក្សាស្រាវជ្រាវលើបច្ចេកវិទ្យាថ្មី ដើម្បីអាចក្លាយជាបណ្ដាញផ្សារចាបហួយធំជាងគេបង្អស់ក្នុងពិភពលោក។ ផ្សារលក់ទំនិញចាបហួយអនឡាញ Duo Duo Grocery របស់ក្រុមហ៊ុននេះក៏ទទួលបានការគាំទ្រយ៉ាងច្រើនពីសំណាក់អតិថិជនជាមេផ្ទះ ដោយសារមានលក់ និងដឹកជញ្ជូនដល់ដៃអ្នកប្រើប្រាស់នូវផលិតផលជាគ្រឿងទេស។ ក្នុងឆ្នាំ2020 តម្លៃសរុបនៃផលិតផលកសិកម្មដែលត្រូវបានលក់នៅលើផ្សារ Pinduoduo បានកើនដល់ 270ពាន់លានយុន (41,338,755,000ដុល្លារអាមេរិក) កើនទ្វេដងបើធៀបនឹងឆ្នាំ2019 នាំឱ្យ Pinduoduo ក្លាយជាផ្សារលក់ផលិតផលកសិកម្មធំជាងគេនៅប្រទេសចិន៕

ប្រភព៖ CNBC, SCMP
ប្រែសម្រួល៖ បុត្រា

March 25, 2021

កម្ពុជារកឃើញអ្នកឆ្លងCovid-19 ថ្មី 55នាក់ទៀត ខណៈពិភពលោករកឃើញ 8,593ករណី

ក្រសួងសុខាភិបាលកម្ពុជា នាព្រឹកថ្ងៃទី 25មីនានេះ បានឱ្យដឹងថា មនុស្សចំនួន 55នាក់ទៀត ត្រូវបានរកឃើញកាលពីថ្ងៃទី 24មីនាថា មានផ្ទុកវីរុសCovid-19។

អ្នកជំងឺថ្មីទាំង 55នាក់ខាងលើ សុទ្ធតែជាករណីពាក់ព័ន្ធនឹង «ព្រឹត្តិការណ៍20កុម្ភៈ»។ ក្នុងថ្ងៃទី 24មីនា 2021 កន្លងទៅ ក៏មានអ្នកជំងឺCovid-19 ចំនួន 25នាក់ បានជាសះស្បើយ។

គិតមកដល់បច្ចុប្បន្ន កម្ពុជមានអ្នកវិជ្ជមាននឹង Covid-19 សរុបចំនួន 1,872នាក់ ក្នុងនោះមានអ្នកស្លាប់ចំនួន 5នាក់, ជាសះស្បើយ 1,056នាក់ និងកំពុងព្យាបាលចំនួន 809នាក់។

នៅទូទាំងពិភពលោក តួលេខអ្នកវិជ្ជមាននឹងCovid-19 សរុបបានកើនដល់ 125,424,480នាក់ ក្នុងនោះមាន 101,288,273នាក់បានជាសះស្បើយ, 2,756,662នាក់បានស្លាប់ និង21,379,545នាក់កំពុងព្យាបាល។ ក្នុងអំឡុង 24ម៉ោងនៃថ្ងៃទី 24មីនា ពិភពលោកទាំងមូលក៏បានរកឃើញអ្នកជំងឺថ្មីចំនួន 8,593នាក់ និងអ្នកស្លាប់ថ្មីចំនួន 595នាក់ផងដែរ៕

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 25, 2021

Author: សឿន សំណាង