សឿន សំណាង - La Reine Media

សប្ដាហ៍កន្លង ករណីវិជ្ជមាននឹងវីរុស Covid-19 ទូទាំងពិភពលោកកើន 11%

ពិភពលោករកឃើញជិត 131លាននាក់ឆ្លងវីរុស, ជាង 2.8លាននាក់បានស្លាប់ដោយសារ Covid-19 ក្នុងនោះ ករណីឆ្លងថ្មីក្នុងសប្ដាហ៍កន្លងបានកើននៅគ្រប់ទីកន្លែង ប៉ុន្តែ នៅទាបជាងបើធៀបនឹងខែមករា។

ពិភពលោកទាំងមូល មានអ្នកឆ្លងCovid-19 សរុបចំនួន 130,791,702នាក់ និងអ្នកស្លាប់ចំនួន 2,849,976នាក់ ក្នុងនោះមានអ្នកឆ្លងថ្មី 626,703នាក់

និងស្លាប់ថ្មី 10,191នាក់ ខណៈ 105,288,757នាក់ជាសះស្បើយ និង 22,652,969នាក់កំពុងទទួលការព្យាបាល។

ជាមធ្យម ករណីឆ្លងថ្មីប្រចាំថ្ងៃ កើន 582,000នាក់ ស្មើនឹង 11% ក្នុងសប្ដាហ៍កន្លង នេះបើតាមស្ថិតិរបស់ AFP។ ការកើនឡើងនេះបានចាប់ផ្ដើមតាំងពីមួយខែមុន ប៉ុន្តែ តួលេខអ្នកឆ្លងថ្មីបច្ចុប្បន្ន នៅតែទាបជាងតួលេខ 743.600នាក់នៃករណីឆ្លងថ្មីប្រចាំថ្ងៃក្នុងសប្ដាហ៍មួយដែលរាប់ពីថ្ងៃទី 5-11 ខែមករា។

ករណីវិជ្ជមានថ្មីកើន 32% នៅទ្វីបអាស៊ី, 15% នៅសហរដ្ឋអាមេរិក និងកាណាដា, 9% នៅអឺរ៉ុប, 6% នៅអាហ្វ្រិក អាមេរិកខាងត្បូង និងតំបន់ ការីប៊ីន, 2% នៅតំបន់មជ្ឈិមបូព៌ា។

នៅទ្វីបអូសេអានី ករណីឆ្លងថ្មីថយចុះ 31% ក្រោយពីការកើនឡើងយ៉ាងខ្ពស់កាលពីសប្ដាហ៍មុននៅប្រទេសប៉ាពួនូវហ្គីណេ។ ប្រទេសផ្សេងៗក្នុងតំបន់នេះ ស្ទើរតែលែងមានវត្តមាន Covid-19 ទៅហើយ។

ទុយនេស៊ីគឺជាប្រទេសដែលមានករណីឆ្លងថ្មីច្រើនជាងគេបង្អស់ក្នុងសប្ដាហ៍កន្លង ដោយមានជាង 1,000ករណី ស្មើនឹងកំណើន 77% ត្រូវបានរាយការណ៍ជារៀងរាល់ថ្ងៃកាលពីសប្ដាហ៍មុន។ ប្រទេសអាស៊ែបៃហ្សង់, បង់ក្លាដែស, អាហ្សង់ទីន និង ក្រូអាស៊ី តាមពីក្រោយទុយនេស៊ី។

តំបន់វ៉ែសបែងគឺជាទីដែលមានករណីវិជ្ជមានថ្មីថយចុះជាងគេ (40%) ប៉ុន្តែ នៅតែស្ថិតក្នុងមធ្យមភាគ 1,000ករណី/ថ្ងៃ។

ប្រេស៊ីលគឺជាប្រទេសដែលមានករណីស្លាប់ និងវិជ្ជមានថ្មីច្រើនជាងគេក្នុងសប្ដាហ៍កន្លង ដោយមធ្យមភាគនៃករណីស្លាប់ថ្មីជារៀងរាល់ថ្ងៃមានចំនួន 3,117នាក់។ ឈរលេខពីរគឺសហរដ្ឋអាមេរិក ដោយមានអ្នកស្លាប់ជាមធ្យម 962នាក់ក្នុងមួយថ្ងៃ៕

ប្រភព៖AFP
ប្រែសម្រួល៖ បុត្រា

April 3, 2021

អង់គ្លេសបានរកឃើញថា «ករណីកកឈាមក្រោយការចាក់វ៉ាក់សាំងបង្ការCovid-19 របស់ AstraZeneca កើនឡើងច្រើនជាងមុន 6ដង»

ក្រុមមន្ត្រីសុខាភិបាលនៃចក្រភពអង់គ្លេស បានរកឃើញមនុស្សចំនួន 30នាក់ ដែលមានបញ្ហាកកឈាម បន្ទាប់ពីបានទទួលការចាក់វ៉ាក់សាំងបង្ការ Covid-19 របស់ក្រុមហ៊ុន AstraZeneca។

នាយកដ្ឋានគ្រប់គ្រងឱសថ និងផលិតផលថែទាំសុខភាពអង់គ្លេស (MHRA) កាលពីថ្ងៃទី 1មេសា បានឱ្យដឹងថា ពួកគេបានរកឃើញមនុស្សចំនួន 22នាក់ ដែលមានបញ្ហាឈាមកកនៅក្នុងសរសៃឈាមខួរក្បាល ជាជំងឺកកឈាមមួយប្រភេទដែលកម្រកើតមាន រួមនឹងករណីកកឈាមចំនួន 8នាក់ផ្សេងទៀតដែលទាក់ទិននឹងបញ្ហាប្លាកែត (platelets or thrombocytes) នៅក្នុងចំណោមវ៉ាក់សាំង AstraZeneca ចំនួន 18.1លានម្ចុល ដែលត្រូវបានចាក់។ ពុំមានរបាយការណ៍ណាមួយ ស្ដីអំពីបញ្ហាកកឈាម បន្ទាប់ពីបានចាក់វ៉ាក់សាំងរបស់ BioNTech និង Pfizer នោះទេ។

តួលេខាខាងលើនេះ ខ្ពស់ជាងច្រើនដង បើធៀបនឹងតួលេខដែលត្រូវបាន MHRA ប្រកាសកាលពីថ្ងៃទី 18មីនា ដែលថា ខ្លួនបានរកឃើញបញ្ហកកឈាមចំនួន 5ករណី នៅក្នុងចំណោមវ៉ាក់សាំង 11លានម្ជុលដែលត្រូវបានចាក់ ពោលគឺប្រហាក់ប្រហែលនឹងអត្រា 1/1000,000នាក់។

វ៉ាក់សាំងបង្ការ Covid-19 ដែលត្រូវបានអភិវឌ្ឍដោយក្រុមហ៊ុន AstraZeneca សហការជាមួយសាកលវិទ្យាល័យ Oxford នៃប្រទេសអង់គ្លេសនេះ ត្រូវបានអនុម័តឱ្យប្រើប្រាស់បន្ទាន់ ឬដាក់ឱ្យចរាចរនៅលើទីផ្សារនៃប្រទេសជាង 50 ក្នុងពិភពលោក ក្នុងនោះមានទាំងអង់គ្លេស និងសហភាពអឺរ៉ុប (EU) ផងដែរ៕

ប្រភព៖ Reuters
ប្រែសម្រួល៖ បុត្រា

April 2, 2021

យ៉ាងតិច 36នាក់បានស្លាប់ ដោយសាររថភ្លើងធ្លាក់ចេញពីផ្លូវដែកនៅតៃវ៉ាន់

រថភ្លើងមួយខ្សែបានធ្លាក់ចេញពីផ្លូវដែកនៅឯផ្លូវរូងក្រោមដីមួយកន្លែង នៅភាគខាងកើតកោះតៃវ៉ាន់ បណ្ដាលឱ្យមនុស្សយ៉ាងហោច 36នាក់ ត្រូវបាត់បង់ជីវិត និង 72នាក់រងរបួស។

ហេតុការណ៍ខាងលើ បានកើតឡើងនៅវេលាម៉ោង 9និង24នាទី ព្រឹកថ្ងៃទី 2មេសានេះ ក្នុងពេលរថភ្លើងដឹកអ្នកដំណើរចាកចេញពីទីក្រុង Taichung កំពុងសំដៅផ្លូវរូងក្រោមដីដែលស្ថិតនៅក្បែរស្រុក Hualien ភាគខាងកើតកោះតៃវ៉ាន់។ សមត្ថកិច្ចតៃវ៉ាន់ឱ្យដឹងថា អ្នកដំណើរយ៉ាងតិច 36នាក់ «លែងមានសញ្ញានៃការរស់រាន» និង 72នាក់ទៀតត្រូវរងរបួស។

រថភ្លើងដែលជួបគ្រោះថ្នាក់នេះ កំពុងដឹកមនុស្សប្រមាណ 350នាក់។ ក្រុមមន្ត្រីតៃវ៉ាន់ឱ្យដឹងថា នេះគឺជាហេតុការណ៍គ្រោះថ្នាក់ផ្លូវដែកអាក្រក់បំផុតនៅតៃវ៉ាន់ ក្នុងរង្វង់ 30កន្លងមកនេះ។

សារព័ត៌មាន CNA របស់សិង្ហបុរី ឱ្យដឹងថា មូលហេតុនៃគ្រោះថ្នាក់នេះអាចបណ្ដាលមកពីរថយន្តដឹកទំនិញមួយគ្រឿងដែលចតមិនបានត្រឹមត្រូវ នាំឱ្យរអិលចូលទៅលើកាន់ផ្លូវដែក។ រូបភាពនៅកន្លែងកើតហេតុបង្ហាញថា សាកសពរថយន្តដឹកទំនិញមួយគ្រឿងត្រូវក្រឡាប់នៅក្បែរផ្លូវដែក ចំណែកទូរថ្លើងមួយចំនួនត្រូវធ្លាក់ចេញពីផ្លូវ។

សមត្ថកិច្ចតៃវ៉ាន់ បានបញ្ជូនគ្រឿងចក្រចំនួន 12គ្រឿង និងក្រុមអ្នកសង្គ្រោះចំនួន 35នាក់ ទៅកាន់កន្លែងកើតហេតុ៕

ប្រភព៖ Reuters
ប្រែសម្រួល៖ បុត្រា

April 2, 2021

ម្ចាស់កប៉ាល់ Ever Given ប្ដឹងក្រុមហ៊ុនគ្រប់គ្រងកប៉ាល់នេះ ក្រោយមានករណីជាប់គាំងនៅលើព្រែកជីក Suez

ម្ចាស់កម្មសិទ្ធិនៃកប៉ាល់ដឹកកុងតឺន័រ Ever Given បានដាក់ពាក្យប្ដឹងក្រុមហ៊ុនដឹកជញ្ជូនផ្លូវសមុត្រដែលជាភាគីគ្រប់គ្រងកប៉ាល់ ក្រោយពីហេតុការណ៍កប៉ាល់ Ever Given ជាប់គាំង បណ្ដាលឱ្យមានបញ្ហាកកស្ទះផ្លូវទឹកនៅឯព្រែកជីក Suez។

ពាក្យបណ្ដឹងនេះត្រូវបានដាក់ទៅកាន់តុលាការជាន់ខ្ពស់នៅទីក្រុងឡុងដ៍ ប្រទេសអង់គ្លេស កាលពីម្សិលមិញ (1មេសា)។ ភាគីចុងចោទ រួមមាន ក្រុមហ៊ុន Evergreen Marine Corp ដែលជាអ្នកគ្រប់គ្រងកប៉ាល់ Ever Given និងក្រុមមនុស្សដែលកំពុងទាមទារសំណង ឬមានសិទ្ធិទាមទារសំណងលើការខាតបង់នានា។

កប៉ាល់ Ever Given ជាកម្មសិទ្ធិរបស់ក្រុមហ៊ុន Luster Maritime និងក្រុមហ៊ុន Higaki Sangyo Kaisha ដែលមានទីស្នាក់ការកណ្ដាលនៅប្រទេសជប៉ុន។ កប៉ាល់នេះកំពុងត្រូវបានជួលទៅឱ្យ Evergreen Marine Corp ជាក្រុមហ៊ុនដឹកជញ្ជូនកុងតឺន័រតាមផ្លូវសមុទ្ររបស់តៃវ៉ាន់។

កប៉ាល់ Even Given កាលពីថ្ងៃទី 23មីនា បានជួបនឹងព្យុះខ្សាច់មួយនៅពេលធ្វើដំណើរតាមព្រែកជីក Suez ហើយក៏បានបុកចូលច្រាំង និងត្រូវជាប់គាំងអស់រយៈពេល 6ថ្ងៃ។ ហេតុការណ៍នេះ បានធ្វើឱ្យទំនិញដែលមានតម្លៃសរុបប្រមាណ 9.6ពាន់លានដុល្លារ ត្រូវជាប់គាំងនៅឯព្រែកជីក Suez ខណៈវិស័យពាណិជ្ជកម្មទូទាំងពិភពលោក ត្រូវខាតបង់អស់ប្រមាណពី 6-10ពាន់លានដុល្លារ។ នេះបើតាមក្រុមអ្នកជំនាញ និងក្រុមហ៊ុនធានារ៉ាប់រងអាល្លឺម៉ង់ Allianz។

កាលពីថ្ងៃទី 31មីនា ក្រុមមន្ត្រីអេហ្ស៊ីប ដែលជាភាគីគ្រប់គ្រងព្រែក Suez ក៏បានព្រមានថានឹងទាមទារសំណងលើការខាតបង់នានា។ «យើងនឹងទាមទារសំណងជាងមួយពាន់លានដុល្លារអាមេរិក។ យើងនឹងដាក់សំណើឱ្យបង់ថ្លៃខូចខាតក្នុងទំហំទឹកប្រាក់សមស្រប» នេះបើតាម Osama Rabie ប្រធាន និងជានាយកប្រតិបត្តិរបស់ស្ថាប័នគ្រប់គ្រងព្រែកជីក Suez (SCA) ដែលបានឱ្យដឹងកាលពីថ្ងៃទី 31មីនា៕

ប្រភព៖ BI
ប្រែសម្រួល៖ បុត្រា

April 2, 2021

ស្ថិតិ Covid-19 នៅកម្ពុជា ក្នុងអំឡុងថ្ងៃទី 1មេសា ឆ្នាំ2021

ករណីឆ្លងវីរុសCovid-19 ថ្មីចំនួន 69នាក់ ត្រូវបានរកឃើញក្នុងអំឡុង 24ម៉ោងនៃថ្ងៃទី 1មេសា ឆ្នាំ2021 ទន្ទឹមនឹងអ្នកជំងឺចំនួន 16នាក់ បានជាសះស្បើយ។

ក្នុងចំណោមអ្នកវិជ្ជមានថ្មីទាំង 69នាក់ខាងលើ មាន 1នាក់ជាករណីនាំចូល (មិនមែនជាពលករខ្មែរមកពីថៃ) និង 68នាក់ទៀតជាករណីពាក់ព័ន្ធនឹងព្រឹត្តិការណ៍20កុម្ភៈ។

គិតមកដល់បច្ចុប្បន្ន (2មេសា) កម្ពុជាមានអ្នកឆ្លង Covid-19 សរុបចំនួន 2,546នាក់ ក្នុងនោះមានអ្នកស្លាប់ចំនួន 16នាក់, អ្នកជាសះស្បើយចំនួន 1,256នាក់ និងអ្នកកំពុងព្យាបាលចំនួន 1,270នាក់។

April 2, 2021

តម្លៃ Bitcoin ត្រលប់មករកចំណុច 60,000ដុល្លារ/bitcoin ធ្វើឱ្យអ្នកវិនិយោគ មាន «ទឹកមាត់» លេបបន្តទៀត

ដោយសារតែមានដំណឹងវិជ្ជមានច្រើននាពេលថ្មីៗនេះ តម្លៃរបស់ Bitcoin កំពុងតែត្រូវបានអូសឡើងដល់ចំណុចដែលវាធ្លាប់បានឡើងដល់កាលពីពាក់កណ្ដាលខែមីនា នោះគឺតម្លៃ 60,000ដុល្លារអាមេរិកក្នុង 1 Bitcoin។

នៅក្នុងការជួញដូរដំបូងនៃខែមេសានេះ Bitcoin បានឡើងថ្លៃដល់ 60,000ដុល្លារ/bitcoin ដូចកាលពីពាក់កណ្ដាលខែមីនាកន្លងទៅ ដែលលទ្ធផលនេះត្រូវបានគេមើលឃើញថា ដោយសារព័ត៌មានល្អៗជាច្រើននៅសហរដ្ឋអាមេរិក ដែលបានជះឥទ្ធិពលរបស់ការជួញដូរ Bitcoin របស់ក្រុមអ្នកវិនិយោគក្នុងទ្វីបអាស៊ី។

ថ្មីៗនេះ មានព័ត៌មានថា Goldman Sachs នឹងបង្ហាញបណ្ដាញវិនិយោគលើប្រាក់ឌីជីថលសម្រាប់អតិថិជន នៅក្នុងរង្វង់ 3ខែទៀត ខណៈដែល BlackRock ក៏បានបោះទុន 6.5លានដុល្លារដើម្បីទិញកិច្ចសន្យាអនាគតរបស់ Bitcoin កាលពីដើមឆ្នាំ។ តម្លៃនៃកិច្ចសន្យានេះបានកើនបន្ថែម 360,000ដុល្លារអាមេរិក គិតត្រឹមពេលមានរបាយការណ៍។

ការឡើងថ្លៃរបស់ Bitcoin នៅដើមខែមេសានេះ បាននាំមកនូវ «ការសប្បាយរីករាយ» នៅក្នុងទីផ្សាររូបិយវត្ថុអេឡិចត្រូនិក។ ភ្លាមៗក្រោយការឡើងថ្លៃនេះ មហាសេដ្ឋី Elon Musk ក៏បានបង្ហោះសារមួយឃ្លានៅលើ Twitter ជំរុញឱ្យតម្លៃរបស់ប្រាក់ឌីជីថល Dogecoin ឡើងថ្លៃយ៉ាងខ្ពស់ ដោយមានអ្នកទិញច្រើន។

មុននេះ Bitcoin បានបង្កើតកំណត់ត្រាថ្មីជាមួយនឹងតម្លៃ 60,000ដុល្លារ/bitcoin កាលពីថ្ងៃទី14មីនា ប៉ុន្តែ ក្រោយមកវាក៏បានដាំក្បាលចុះ។

បច្ចុប្បន្ន Bitcoin កំពុងបន្តឡើងថ្លៃ ដែលរុញច្រានតម្លៃឱ្យត្រលប់ទៅរកចំណុច 60,000ដុល្លារ។ ក៏ប៉ុន្តែ មិនមានអ្វីមកធានាបានថា រូបិយវត្ថុអេឡិចត្រូនិកនេះនឹងបំបែកកំណត់ត្រាចាស់ ឬដាំក្បាលចុះនោះឡើយ៕

ប្រភព៖ Coinmarketcap
ប្រែសម្រួល៖ បុត្រា

April 2, 2021

អស្ចារ្យ!! រកឃើញវ៉ាក់សាំងកូវីដ-19 របស់ Pfizer មានប្រសិទ្ធភាព 100% លើកុមារអាយុ12 ដល់ 15ឆ្នាំ

BioNtech និង Pfizer បានបង្ហើបឱ្យដឹងកាលពីថ្ងៃពុធ ទី31 មីនាម្សិលមិញថា វ៉ាក់សាំងរបស់ពួកគេ មានប្រសិទ្ធភាពប្រឆាំងវីរុសកូរ៉ូណាប្រភេទថ្មី 100% ចំពោះកុមារអាយុ 12ដល់15ឆ្នាំ ព្រមទាំងសង្ឃឹមបានទទួលការអនុម័តឱ្យប្រើទៅលើមនុស្សវ័យជំទង់ មុនការបើកឆ្នាំសិក្សាបន្ទាប់ទៀត។

ទាំង 2ក្រុមហ៊ុន បានបញ្ជាក់នៅក្នុងសេចក្ដីថ្លែងការណ៍ថា ការសាកល្បងដំណាក់កាលទី3 ជាមួយក្រុមយុវវ័យចំនួន 1,260នាក់នៅក្នុងសហរដ្ឋអាមេរិក បាន “ពិសោធឃើញប្រសិទ្ធភាព 100% និងការតបស្នងរបស់អង្គបដិបក្ខប្រាណដ៏រឹងមាំ”

ចំណែកលោក អាល់ប៊ើត បួឡា ប្រធានក្រុមភ្នាក់ងារប្រតិបត្តិរបស់ហ្វ៉ៃហ្ស៊ើរ បានបញ្ជាក់ថា “យើងមានផែនការដាក់បង្ហាញទិន្នន័យនេះទៅ FDA (គណៈកម្មការគ្រប់គ្រងរបៀបច្បាប់សហរដ្ឋអាមេរិក) ស្នើសុំកែសម្រួលការអនុញ្ញាត ឱ្យប្រើក្នុងករណីអាសន្នរបស់យើង ក្នុងប៉ុន្មានសប្ដាហ៍ខាងមុខទៀត និងដាក់បង្ហាញទិន្នន័យទៅគណៈអ្នកគ្រប់គ្រងរបៀបច្បាប់ផ្សេងៗទៀត ទូទាំងពិភពលោក ដោយក្ដីសង្ឃឹមថា នឹងចាប់ផ្ដើមចាក់វ៉ាក់សាំង ឱ្យក្រុមមនុស្សអាយុនេះ មុនចាប់ផ្ដើមឆ្នាំការសិក្សាខាងមុខ”

ចំណែកប្រធានប្រតិបត្តិរបស់ បៃអូអេនថេក ក្រុមហ៊ុនសញ្ជាតិអាល្លឺម៉ង់ បានបន្ថែមថា លទ្ធផលការសាកល្បងដែលបង្ហាញឱ្យឃើញអំពីប្រសិទ្ធភាពក្នុងការការពារកម្រិតខ្ពស់ សម្រាប់មនុស្សវ័យជំទង់នេះ “គឺជារឿងមួយ ដែលសាងកម្លាំងចិត្ត និងកម្លាំងស្មារតីយ៉ាងខ្លាំង ជាពិសេសក្នុងសញ្ញាដែលយើងបានប្រទះឃើញក្នុងច្រើនសប្ដាហ៍កន្លងមកនេះ ពាក់ព័ន្ធនឹងការឆ្លងរាលដាលរបស់មេរោគក្លាយពូជចក្រភពអង់គ្លេស B.1.1.7”

វ៉ាក់សាំងរបស់ បៃអូអេនថេក និងហ្វ៉ៃហ្ស៊ើរ ផលិតពីការប្រើរូបមន្តមូលដ្ឋានរបស់តិចណូឡូជី mRNA និងជាវ៉ាក់សាំងកូវីដ-19 ដំបូងគេដែលបានទទួលការអនុម័តនៅក្នុងប្រទេសលោកខាងលិច កាលពីអំឡុងចុងឆ្នាំកន្លងទៅ។

ទាំងសហរដ្ឋអាមេរិក និងសហភាពអឺរ៉ុប សុទ្ធតែឯកភាពយល់ព្រមអនុម័តឱ្យប្រើក្នុងករណីអាសន្ន ជាមួយបុគ្គលដែលមានអាយុ 16ឆ្នាំឡើងទៅ ដែលចាប់តាំងពីពេលនោះមក វាត្រូវបានគេប្រើទៅលើមនុស្សជាច្រើនលាននាក់ នៅក្នុងប្រទេសផ្សេងៗ ច្រើនជាង 65ប្រទេសទូទាំងពិភពលោក។

លទ្ធផលការសិក្សាស្រាវជ្រាវ នៅក្នុងពិភពលោក ដែលពាក់ព័ន្ធនឹងប្រជាជន 1.2លាននាក់ នៅក្នុងប្រទេសអ៊ីស្រាអែល បានរកឃើញថា វ៉ាក់សាំងរបស់ បៃអូអេនថេក និងហ្វ៉ៃហ្ស៊ើរ មានប្រសិទ្ធភាពខ្ពស់ ដល់ទៅ 94%។

ក្នុងខណៈដែលពិភពលោកកំពុងស្ទុះស្ទាចាក់វ៉ាក់សាំង ក្រុមហ៊ុនបៃអូអេនថេក បានបង្ហើបឱ្យដឹងកាលពីថ្ងៃអង្គារ ទី30 មីនាថា ពួកគេកំពុងស្ថិតលើដំណើរផ្លូវនៃការផលិតវ៉ាក់សាំងឱ្យបាន 2,500លានដូសក្នុងឆ្នាំនេះ។

កម្លាំងផលិតដែលខ្ពស់ឡើងនេះ បានកើតឡើងពីការទើបនឹងបើកប្រភពផលិតថ្មីកាលពីពេលថ្មីៗនេះ នៅក្នុងទីក្រុងម៉ាបួក របស់ប្រទេសអាល្លឺម៉ង់ ដែលពេលនេះបានក្លាយជារោងចក្រមួយក្នុងចំណោមរោងចក្រផលិតវ៉ាក់សាំងរូបមន្ត mRNA ដែលធំបំផុតក្នុងពិភពលោក។ នេះបើតាមការបញ្ជាក់របស់ក្រមហ៊ុនខាងលើ។

ក្រៅពីនេះ នៅមានការផលិតវ៉ាក់សាំងប្រភេទខាងលើ នៅឯរោកចក្រមួយរបស់ក្រុមហ៊ុនហ្វ៉ៃហ្ស៊ើរ នៅក្នុងប្រទេសបែលហ្ស៊ិក និងរោងចក្រ 3ទៀតនៅក្នុងសហរដ្ឋអាមេរិក។

បៃអូអេនថេក បានបញ្ជាក់ថា ប្រសិទ្ធភាពដែលល្អប្រសើរឡើងនេះ និងកិច្ចព្រមព្រៀងសហការថ្មី ជាមួយបណ្ដាសម្ព័ន្ធមិត្តខាងក្រៅ នឹងជួយលើកកម្ពស់គោលដៅការផលិតវ៉ាក់សាំងរបស់ពួកគេដូចគ្នា។

កាលពីសប្ដាហ៍កន្លងទៅ បៃអូអេនថេក និងហ្វ៉ៃហ្ស៊ើរ បានចាប់ផ្ដើមធ្វើការសិក្សាប្រសិទ្ធភាពវ៉ាក់សាំងជាមួយកុមារអាយុតិច ដោយបានចាក់វ៉ាក់សាំងឱ្យកុមារអាយុចន្លោះពី 5ដល់11ឆ្នាំ 1ក្រុមដំបូងគេ រួចរាល់ហើយ។

ទាំងអស់នេះ គេរំពឹងថា នឹងបានចាប់ផ្ដើមផ្ដល់វ៉ាក់សាំង ដូសដំបូងទៅឱ្យកុមារក្នុងក្រុមអាយុ 2ដល់5ឆ្នាំ ក្នុងសប្ដាហ៍ខាងមុខ ដែលនឹងគ្របដណ្ដប់ទៅដល់ទារកវ័យតេះតះ អាយុទាបបំផុត 6ខែផងដែរ៕

ប្រភព៖ ទីភ្នាក់ងារព័ត៌មាន AFP
ប្រែ និងសម្រួលដោយ ទិទីតំតាតូ

April 2, 2021

មនុស្សវ័យកំលោះ-ក្រមុំ ប្រឈមខ្លាំង! អាល្លឺម៉ង់ កំណត់ការចាក់វ៉ាក់សាំង “អ៊ែស្ត្រាហ្សេនេកា” ចំពោះតែមនុស្សចាស់ អាយុ 60ឡើងប៉ុណ្ណោះ

ប្រទេសអាល្លឺម៉ង់ ចាប់ពីថ្ងៃពុធ ទី31 មីនាម្សិលមិញ បានកំណត់ការប្រើវ៉ាក់សាំងការពារកូវីដ-19 របស់អ៊ែស្ត្រាហ្សេនេកា ចំពោះតែបុគ្គលដែលមានអាយុ 60ឆ្នាំឡើង ដូចគ្នានឹងក្រុមគោលដៅចម្បងៗដទៃទៀត បន្ទាប់ពីមានរបាយការណ៍ពាក់ព័ន្ធនឹងភាពប្រឈមនឹងសភាវដុំឈាមញ៉ុកណែន។

លោកស្រី អ៊ែនជេឡា មើរកែល នាយករដ្ឋមន្ត្រីនៃប្រទេសអាល្លឺម៉ង់បានថ្លែងព័ត៌មានកាលពីថ្ងៃអង្គារម្សិលមិញថា “យើងចាំបាច់ត្រូវតែអាចជឿទុកចិត្តលើវ៉ាក់សាំងបាន ហើយភាពគ្មានការលាក់លៀម គឺជាវិធីដែលល្អបំផុត ក្នុងការទប់ទល់នឹងស្ថានការណ៍បែបនេះ”

ក្នុងសកម្មភាពដែលដំណើរការ ទៅតាមការណែនាំរបស់គណៈកម្មការផ្នែកវ៉ាក់សាំងរបស់អាល្លឺម៉ង់ ឬដែលហៅថា STIKO ខាងរដ្ឋមន្ត្រីក្រសួងសុខាភិបាលរបស់រដ្ឋបាលកណ្ដាល និងប្រចាំរដ្ឋផ្សេងៗ យល់ឃើញដូចគ្នាថា គួរតែឱ្យវ៉ាក់សាំងកូវីដ-19 របស់អ៊ែស្ត្រាហ្សេនេកា ចំពោះបុគ្គលដែលមានអាយុតិចជាង 60ឆ្នាំ នៅពេលដែលបុគ្គលទាំងនោះ ស្ថិតក្នុងក្រុមគោលដៅលំដាប់ដំបូងៗគេ ដែលក្នុងនោះរួមទាំងអ្នកជំងឺដែលមានភាពប្រឈមខ្ពស់ និងបុគ្គលិកសុខាភិបាល ក្រោមការណែនាំប្រឹក្សារបស់ពេទ្យ។

សម្រាប់បុគ្គលដែលមានអាយុទាបជាង 60ឆ្នាំ ដែលបានទទួលវ៉ាក់សាំងអ៊ែស្ត្រាហ្សេនេកា ដូសដំបូងរួចទៅហើយ មានជម្រើសគឺ ចាក់វ៉ាក់សាំងអ៊ែស្ត្រាហ្សេនេកា ដូសទី2 តាមផែនការចាស់ បើសិនជាពួកគេស្ថិតក្នុងក្រុមមនុស្សគោលដៅលំដាប់ដំបូងៗ ឬមិនទេ ក៏រង់ចាំឱ្យខាង STIKO ចេញការណែនាំម្ដងទៀតជាមុនសិន ដែលគេរំពឹងថា នឹងធ្វើឡើងក្នុងអំឡុងចុងខែមេសា។

ទាំងអស់នេះ STIKO កំពុងសម្លឹងមើលទៅដល់ភាពអាចទៅរួច របស់ការចាក់វ៉ាក់សាំង ដូសទី2 ដោយវ៉ាក់សាំងរបស់ក្រុមហ៊ុនផ្សេងជំនួសវិញ។

ការកំណត់ថ្មី ពាក់ព័ន្ធនឹងការប្រើវ៉ាក់សាំងរបស់អ៊ែស្ត្រាហ្សេនេកានេះ បានបង្កភាពខាតបង់ដល់គ្រោងការចាក់វ៉ាក់សាំងរបស់ប្រទេសអាល្លឺម៉ង់ ដោយសារតែកាលពីពេលមុននេះ បានដំណើរការយ៉ាងយឺតយ៉ាវស្រាប់រួចទៅហើយ។

យ៉ាងណាក៏ដោយ អាល្លឺម៉ង់ នឹងអនុញ្ញាតឱ្យបុគ្គលអាយុ 60ឆ្នាំឡើងទៅ ចាក់វ៉ាក់សាំងអ៊ែស្ត្រាហ្សេនេកា ក្នុងការព្យាយាមពន្លឿនគ្រោងការចាក់វ៉ាក់សាំងឱ្យប្រជាជនទូទៅ ដែលរហូតមកដល់ពេលនេះ ទើបតែស្ថិតក្នុងដំណាក់កាល ចាក់វ៉ាក់សាំងឱ្យមនុស្សចាស់ វ័យ 70ឆ្នាំឡើង និងបុគ្គលផ្សេងៗ ដែលស្ថិតក្នុងក្រុមគោលដៅលំដាប់ដំបូងៗគេប៉ុណ្ណោះ។

ការសម្រេចចិត្ត (ផ្អាកចាក់វ៉ាក់សាំងអ៊ែស្ត្រាហ្សេនេកា ឱ្យក្រុមមនុស្សវ័យកំលោះ-ក្រមុំ) នេះ ចាប់ផ្ដើមមានឡើង ក្រោយពីស្ថាប័ន Paul Ehrlich Institute ឬ PEI) ដែលជាអង្គភាពផ្នែកវ៉ាក់សាំង របស់ប្រទេស បានរាយការណ៍បន្ថែមពាក់ព័ន្ធនឹងករណីកំណកឈាមញ៉ុកណែន ដែលហៅថា សភាវសរសៃឈាមខ្មៅក្នុងខួរក្បាលញ៉ុកណែន(Cerebral Sinus Vein Thrombosis ឬ CSVT)។

ស្ថាប័ន PEI បានទទួលរបាយការណ៍ករណី CSVT ចំនួន 31ករណី ដែលលទ្ធផលក៏គឺ មានអ្នកស្លាប់ 9នាក់ ពីចំណោមប្រជាជនប្រមាណ 2.7លាននាក់ ដែលបានចាក់វ៉ាក់សាងអ៊ែស្ត្រាហ្សេនេកា ដោយទាំងអស់នេះ លើកលែង 2ករណី ពាក់ព័ន្ធនឹងស្ត្រី អាយុចន្លោះ20 ដល់ 63ឆ្នាំ។

គួរបញ្ជាក់ដែរថា ដោយសារតែការចាក់វ៉ាក់សាំងនៅក្នុងប្រទេសអាល្លឺម៉ង់ ក្នុងរយៈពេលដំបូងៗ បានកំណត់ការប្រើចំពោះតែបុគ្គលអាយុទាបជាង 65ឆ្នាំ ដូច្នេះទើបក្នុងបណ្ដាអ្នកដែលបានទទួលវ៉ាក់សាំងរួចហើយ សុទ្ធតែជាមនុស្សវ័យកំលោះ-ក្រមុំ ជាពិសេសបុគ្គលិកសុខាភិបាល និងក្រុមគ្រូបង្រៀន៕

ប្រភព៖ ទីភ្នាក់ងារព័ត៌មាន Reuters
ប្រែ និងសម្រួលដោយ តាវ៉ែនតា

April 2, 2021

ករណីជាប់គាំងកប៉ាល់ Ever Given នៅព្រែកជីក Suez៖ អេហ្ស៊ីបទាមទារសំណងជាងមួយពាន់លានដុល្លារ

ក្រុមមន្ត្រីនៃប្រទេសអេហ្ស៊ីប អាចទាមទារសំណងជាងមួយពាន់លានដុល្លារអាមេរិក បន្ទាប់ពីបានជួយសង្គ្រោះកប៉ាល់ «យក្ស» Even Given ជាកម្មសិទ្ធិរបស់ជប៉ុន ដំណើរការដោយតៃវ៉ាន់ និងដោតទង់ជាតិប៉ាណាម៉ា ដែលបានជាប់នៅក្នុងព្រែកជីក Suez អស់រយៈពេល 6ថ្ងៃកាលពីចុងខែមិនា។

«យើងនឹងទាមទារសំណងជាងមួយពាន់លានដុល្លារអាមេរិក។ យើងនឹងដាក់សំណើឱ្យបង់ថ្លៃខូចខាតក្នុងទំហំទឹកប្រាក់សមស្រប» នេះបើតាម Osama Rabie ប្រធាន និងជានាយកប្រតិបត្តិរបស់ស្ថាប័នគ្រប់គ្រងព្រែកជីក Suez (SCA) ដែលបានឱ្យដឹងកាលពីថ្ងៃទី 31មីនា។

លោក Rabie និយាយថា លោកសង្ឃឹមថា ការព្រមព្រៀងលើសំណងខាងលើអាចសម្រេចបាន «ក្នុងអំឡុងពីរ ឬបីថ្ងៃទៀត» ហើយបើមិនដូច្នេះទេ អេហ្ស៊ីបនឹងអាចរក្សាកប៉ាល់នេះទុកនៅលើបឹង Great Bitter នៅភាគខាងជើងនៃព្រែកជីក Suez។

«យើងអាចព្រមព្រៀងគ្នាលើសំណងជាក់លាក់ណាមួយ ឬនាំយកបញ្ហានេះឡើងតុលាការ។ បើសិនពួកគេសម្រេចឡើងតុលាការ នោះកប៉ាល់គួរតែត្រូវបានឃាត់ទុក» លោក Rabie ព្រមានដូច្នេះ។ លោកបន្តថា ខ្ទង់សំណងនេះគឺយោងទៅតាមការខាតបង់នានា ដូចជាការបាត់បង់ប្រាក់ចំណូលបានមកពីព្រែកជីក ថ្លៃសម្ភារ ម៉ាស៊ីន ក៏ដូចជាប្រាក់ចំណាយទៅលើថ្លៃជួលបុគ្គលិកចំនួន 800នាក់ដែលបានចូលរួមជួយសង្គ្រោះកប៉ាល់ Ever Given។

ព័ត៌មានបន្ថែម សូមចូលអានអត្ថបទ «បេសកកម្មសង្គ្រោះកប៉ាល់ Ever Given ដែលជាប់គាំងនៅឯព្រែកជីក Suez ត្រូវចំណាយប្រាក់អស់មិនតិចឡើយ»៕

ប្រភព៖ CNBC
ប្រែសម្រួល៖ បុត្រា

April 2, 2021

រុស្ស៊ីចុះឈ្មោះថ្នាំព្យាបាលជំងឺCovid-19 ដោយប្រើប្រាស់ប្លាស្មាក្នុងឈាមអ្នកជំងឺ

ក្រសួងសុខាភិបាលរុស្ស៊ីបានអនុញ្ញាតឱ្យប្រើប្រាស់ប្រភេទថ្នាំព្យាបាលជំងឺCovid-19 ដែលត្រូវបានផលិតឡើងដោយយោងទៅតាមប្លាស្មា (plasma) ក្នុងឈាមរបស់អ្នកជំងឺCovid-19 ដែលបានជាសះស្បើយ។

ប្រភពព័ត៌មានពីទីក្រុងម៉ូស្គូ បានឱ្យដឹងថា ក្រសួងសុខាភិបាលរុស្ស៊ី បានអនុម័តឱ្យប្រើប្រាស់ globulin ការពារការឆ្លងជំងឺពិសេសដើម្បីព្យាបាលអ្នកជំងឺដែលមានផ្ទុកវីរុសCovid-19។ COVID-globulin នេះក្លាយជាថ្នាំព្យាបាលជំងឺCovid-19 ដែលត្រូវបានចុះឈ្មោះដំបូងគេក្នុងពិភពលោក។ ថ្នាំនេះត្រូវបានអភិវឌ្ឍ និងផលិតឡើងដោយក្រុមហ៊ុន Natsimbio ជាបុត្រសម្ព័ន្ធរបស់ក្រុមហ៊ុន Rostec និងដោយយោងទៅតាមប្លាស្មាក្នុងឈាមរបស់ពលរដ្ឋដែលបានឆ្លងវីរុសCovid-19។ ដើម្បីបង្កើតបានផលិតផលជាឱសថនេះ ក្រុមហ៊ុនត្រូវការវត្ថុធាតុជីវសាស្ត្រចំនួន 2.5តោន។

លទ្ធផលក្នុងដំណាក់កាលពិសោធន៍ ស្រាវជ្រាវលើថ្នាំនេះ បានបង្ហាញថា មានសុវត្ថិភាព មិនមានផលប៉ះពាល់ និងមានប្រសិទ្ធភាពរាំងខ្ទប់សកម្មភាពរបស់វីរុស។ ថ្នាំនេះនឹងត្រូវបានប្រើសម្រាប់អ្នកជំងឺដែលមានអាការពីមធ្យមដល់ធ្ងន់ បន្ទាប់ពីបានបញ្ចប់ការពិសោធន៍លើមនុស្សដំណាក់ទីមួយ និងទីពីរ ដែលតាមគម្រោងនឹងត្រូវចំណាយពេលប្រហែល6ខែ។

ធាតុផ្សំនានានៅក្នុងឈាម ក្នុងនោះមានប្លាស្មាផងដែរ

លោក Sergei Chemezov អគ្គនាយកប្រតិបត្តិរបស់ Rostec បានសង្កត់ធ្ងន់ថា ប្រភេទថ្នាំនេះ មិនមែនក្នុងបំណងបង្ការនោះទេ តែគឺដើម្បីព្យាបាលជំងឺCovid-19 តែម្ដង។ លោកបន្តថា ថ្នាំថ្មីនេះនឹងជួយជាកម្លាំងយ៉ាងខ្លាំងក្លាដល់ក្រុមគ្រូពេទ្យ នៅក្នុង «សមរភូមិ» ប្រយុទ្ធប្រឆាំង Covid-19។

“COVID-globulin” ទទួលបានការអនុញ្ញាតឱ្យប្រើប្រាស់ចំពោះអ្នកជំងឺដែលមានអាយុចាប់ពី 18 ដល់ 60ឆ្នាំ។ បច្ចុប្បន្ន ថ្នាំនេះកំពុងត្រូវបានប្រើប្រាស់នៅក្នុងរង្វង់នៃការពិសោធនៅតាមមន្ទីរពេទ្យក្នុងរដ្ឋធានីម៉ូស្គូ ដើម្បីព្យាបាលអ្នកជំងឺដែលមានអាការមធ្យម និងធ្ងន់ធ្ងរ។

ក្រៅពី Sputnik ប្រទេសរុស្ស៊ីក៏នៅមានវ៉ាក់សាំងមួយប្រភេទទៀត នោះគឺ EpiVacCorona ដែលត្រូវបានអភិវឌ្ឍដោយមជ្ឈមណ្ឌល Vector នៅ Novosibirsk។ វ៉ាក់សាំងនេះត្រូវបានចាប់ផ្ដើមផ្គត់ផ្គង់ដល់មន្ទីរពេទ្យនានានៅក្នុងសប្ដាហ៍នេះ ខណៈដែលវ៉ាក់សាំង KoviVac ដែលអភិវឌ្ឍដោយមជ្ឈមណ្ឌល Chumakov ក៏នឹងត្រូវដាក់ឱ្យប្រើប្រាស់នៅដើមខែមេសានេះដែរ។ នេះបើតាម Mikhail Murashko រដ្ឋមន្ត្រីក្រសួងសុខាភិបាលរុស្ស៊ី៕

ប្រភព៖ Tass
ប្រែសម្រួល៖ បុត្រា

April 2, 2021

Author: សឿន សំណាង