សឿន សំណាង - La Reine Media

កំលោះជនជាតិអាល្លឺម៉ង់ វ័យ18ឆ្នាំ ក្លាយជាមហាសេដ្ឋីដែលមានវ័យនៅក្មេងជាងគេបំផុតក្នុងពិភពលោក

កំលោះជនជាតិអាល្លឺម៉ង់ វ័យ18ឆ្នាំ ឈ្មោះ Kevin David Lehmann គឺជាមហាសេដ្ឋីវ័យក្មេងជាងគេបំផុតនៅក្នុងបញ្ជីចំណាត់ថ្នាក់មហាសេដ្ឋីវ័យក្មេងជាងគេក្នុងពិភពលោក ដែលទើបត្រូវបានទស្សនាវដ្ដីហិរញ្ញវត្ថុ Forbes ប្រកាសកាលពីថ្ងៃទី 6មេសា។

នៅក្នុងបញ្ជីចំណាត់ថ្នាក់ខាងលើ Kevin David Lehmann គឺជាមហាសេដ្ឋីដែលមានវ័យនៅក្មេងជាងគេបំផុត និងមានទ្រព្យ 3.3ពាន់លានដុល្លារអាមេរិក។ Kevin David Lehmann ទទួលបានមរតកជាភាគហ៊ុនចំនួន 50% ពីឪពុកខ្លួន នៅក្នុងក្រុមហ៊ុនគ្រប់គ្រងបណ្ដាញឱសថស្ថាន drogerie markt របស់អាល្លឺម៉ង់។ ជាក់ស្ដែង Kevin David Lehmann បានទទួលភាគហ៊ុននេះតាំងតែពីទើបមានអាយុ14ឆ្នាំ ពីឪពុក ឈ្មោះ Guenther ប៉ុន្តែក្នុងទម្រង់ផ្ដល់សិទ្ធិបែបផ្សេង។ នៅខែកញ្ញា 2020 ពេលមានអាយុពេញ 18ឆ្នាំ Kevin ក៏កាន់កាប់ពេញសិទ្ធិលើភាគហ៊ុនទាំងនេះ ហើយក៏មានឈ្មោះនៅក្នុងបញ្ជីចំណាត់ថ្នាក់មហាសេដ្ឋីពិភពលោក។

ក៏ប៉ុន្តែ អ្វីដែលគួរឱ្យស្ដាយនោះគឺថា មកដល់ពេលនេះ គេមិនទាន់បានស្គាល់មុខមាត់របស់កំលោះ Kevin David Lehmann នៅឡើយ ដោយសារថា សូម្បីតែ Forbes ក៏មិនបានបង្ហាញរូបថតរបស់មហាសេដ្ឋីរូបនេះដែរ។

ក្រុមហ៊ុន drogerie markt ត្រូវបានបង្កើតឡើងដោយមហាសេដ្ឋី Goetz Werner កាលពីឆ្នាំ 1973 និងមានឱសថស្ថានដំបូងនៅតំបន់ Karlsruhe ប្រទេសអាល្លឺម៉ង់។ ក្រោយដំណើរការបានមួយឆ្នាំ លោក Guenther Lehmann ដែលកាលណោះកំពុងគ្រប់គ្រងបណ្ដាញហាងលក់គ្រឿងទេស Pfannkuch របស់គ្រួសារ ក៏បានវិនិយោគទៅលើ drogerie markt ហើយក៏មានភាគហ៊ុន 50% នៅក្នុងបណ្ដាញឱសថស្ថាននេះ។

បច្ចុប្បន្ន drogerie markt គឺជាឱសថស្ថានដែលមានកេរ្ដិ៍ឈ្មោះល្អ និងលេចធ្លោជាងគេមួយនៅប្រទេសអាល្លឺម៉ង់។ ដោយមានបុគ្គលិក 50,000នាក់ និងហាងចំនួន 2,900កន្លែង នៅក្នុងប្រទេសចំនួន12 drogerie markt ត្រូវបានកំណត់តម្លៃប្រមាណ 6.5ពាន់លានដុល្លារអាមេរិក និងរកបានចំណូលរហូតដល់ 12ពាន់លានដុល្លារជារៀងរាល់ឆ្នាំ៕

April 7, 2021

មហាសេដ្ឋី 10រូប ដែលមានវ័យនៅក្មេងជាងគេបំផុតក្នុងពិភពលោក

កាលពីដើមសប្ដាហ៍នេះ ទស្សនាវដ្ដី Forbes បានបញ្ចេញតារាងចំណាត់ថ្នាក់ស្ដីអំពីមហាសេដ្ឋីពិភពលោកចំនួន 2,674នាក់ ក្នុងនោះ គេឃើញមានមហាសេដ្ឋី10រូប ដែលមានវ័យនៅក្មេងជាងគេបំផុតក្នុងពិភពលោក ដោយរាប់ចាប់ពីអាយុ 18 ដល់ 29ឆ្នាំ។

Kevin David Lehmann

អាយុ៖ 18ឆ្នាំ
ទ្រព្យ៖ 3.3ពាន់លានដុល្លារ
ប្រភពទ្រព្យ៖ ជំនួញផ្នែកឱសថ
សញ្ជាតិ៖ អាល្លឺម៉ង់

Wang Zelong

អាយុ៖ 24ឆ្នាំ
ទ្រព្យ៖ 1.5ពាន់លានដុល្លារ
ប្រភពទ្រព្យ៖ ផលិតធាតុគីមី
សញ្ជាតិ៖ ចិន

3. Alexandra Andresen

Alexandra Andresen (ឆ្វេង) និង Katharina Andresen

អាយុ៖ 24ឆ្នាំ
ទ្រព្យ៖ 1.4ពាន់លានដុល្លារ
ប្រភពទ្រព្យ៖ ក្រុមហ៊ុនវិនិយោគ
សញ្ជាតិ៖ ន័រវែស

4. Katharina Andresen

អាយុ៖ 25ឆ្នាំ
ទ្រព្យ៖ 1.4ពាន់លានដុល្លារ
ប្រភពទ្រព្យ៖ ក្រុមហ៊ុនវិនិយោគ
សញ្ជាតិ៖ ន័រវែស

5. Austin Russell

អាយុ៖ 25ឆ្នាំ
ទ្រព្យ៖ 2.4ពាន់លានដុល្លារ
ប្រភពទ្រព្យ៖ បច្ចេកវិទ្យារថយន្ត
សញ្ញាតិ៖ អាមេរិកាំង

6. Gustav Magnar Witzoe

អាយុ៖ 27ឆ្នាំ
ទ្រព្យ៖ 4.4ពាន់លានដុល្លារ
ប្រភពទ្រព្យ៖ ជលផល
សញ្ជាតិ៖ ន័រវែស

7. Andy Fang

អាយុ៖ 28ឆ្នាំ
ទ្រព្យ៖ 2ពាន់លានដុល្លារ
ប្រភពទ្រព្យ៖ សេវាប្រគល់អាហារ
សញ្ជាតិ៖ អាមេរិកាំង

8. Stanley Tang

អាយុ៖ 28ឆ្នាំ
ទ្រព្យ៖ 2ពាន់លានដុល្លារ
ប្រភពទ្រព្យ៖ ជំនួញផ្នែកឱសថ
សញ្ជាតិ៖ អាមេរិកាំង

9. Sam Bankman-Fried

អាយុ៖ 29ឆ្នាំ
ទ្រព្យ៖ 8.7ពាន់លានដុល្លារ
ប្រភពទ្រព្យ៖ ជួញដូររូបិយវត្ថុឌីជីថល
សញ្ជាតិ៖ អាមេរិកាំង

10. Jonathan Kwok

អាយុ៖ 29ឆ្នាំ
ទ្រព្យ៖ 2.4ពាន់លានដុល្លារ
ប្រភពទ្រព្យ៖ អចលនទ្រព្យ
សញ្ជាតិ៖ ចិន

ប្រភព៖ Forbes
ប្រែសម្រួល៖ បុត្រា

April 7, 2021

កម្ពុជារកឃើញករណីឆ្លងCovid-19 ថ្មី 91នាក់បន្ថែមទៀត នាំឱ្យតួលេខសរុបកើនដល់ជាង 2,900នាក់

នាព្រឹកថ្ងៃទី 7មេសា ឆ្នាំ2021 ក្រសួងសុខាភិបាលកម្ពុជាបានឱ្យដឹងថា អ្នកជំងឺCovid-19 ថ្មី ចំនួន 91នាក់ទៀត ត្រូវបានរកឃើញក្នុងអំឡុង 24ម៉ោងនៃថ្ងៃទី 6មេសា ឆ្នាំ2021 ទន្ទឹមនឹងមានអ្នកជំងឺ 30នាក់បានជាសះស្បើយ។

ក្នុងចំណោមអ្នកវិជ្ជមានថ្មីទាំង 91នាក់ខាងលើ មាន 1នាក់ជាករណីនាំចូល និង90នាក់ជាករណីពាក់ព័ន្ធនឹងព្រឹត្តិការណ៍20កុម្ភៈ ដែលភាគច្រើនគឺជាជនជាតិខ្មែរ។ ក្នុងថ្ងៃទី 6មេសា កម្ពុជាមិនមានអ្នកជំងឺស្លាប់ដោយសារ Covid-19 នោះទេ។

គិតមកដល់ព្រឹកនេះ (7មេសា) កម្ពុជាមានអ្នកឆ្លងCovid-19 សរុបចំនួន 2,915នាក់ ក្នុងនោះមានអ្នកជាសះស្បើយសរុប 1,824នាក់, អ្នកស្លាប់ 22នាក់, អ្នកកំពុងព្យាបាលចំនួន 1,064នាក់។

April 7, 2021

WHO មិនទាន់យល់ស្របនឹងលិខិតឆ្លងដែនCovid-19 ខណៈជាង133លាននាក់បានឆ្លងCovid-19 នៅទូទាំងពិភពលោក

អង្គការសុខភាពពិភពលោក (WHO) មិនទាន់គាំទ្រការធ្វើដំណើរដោយប្រើប្រាស់លិខិតឆ្លងដែនCovid-19 ឬលិខិតឆ្លងដែនវ៉ាក់សាំងនៅឡើយ ដោយសារតែនៅមានមូលហេតុច្រើនយ៉ាង ខណៈពិភពលោករកឃើញមនុស្សជិត 133លាននាក់បានឆ្លងវីរុសCovid-19 ក្នុងនោះមានអ្នកជំងឺជិត 2.9លាននាក់បានស្លាប់។

Margaret Harris អ្នកនាំពាក្យរបស់អង្គការសុខភាពពិភពលោក (WHO) កាលពីថ្ងៃទី 6មេសា បានឱ្យដឹងថា នៅក្នុងកាលៈទេសៈបច្ចុប្បន្ន WHO «មិនចង់ឃើញលិខិតឆ្លងដែនវ៉ាក់សាំង ក្លាយជាតម្រូវការចាំបាច់សម្រាប់ការធ្វើដំណើរចេញ-ចូលប្រទេសនោះទេ ព្រោះថា បច្ចុប្បន្នមិនទាន់ប្រាកដថា វ៉ាក់សាំងនឹងអាចទប់ស្កាត់ការឆ្លងរាលដាលបាននៅឡើយ»។ លោកស្រី Margaret Harris បន្ថែមថា ទន្ទឹមនឹងនោះគឺជា «ការព្រួយបារម្ភអំពីបញ្ហាសមាសភាព»។

មតិរបស់ WHO ត្រូវបានលើកឡើងក្នុងគ្រាដែល សិង្ហបុរី ក្លាយជាប្រទេសដំបូងគេដែលទទួលយកលិខិតឆ្លងដែនអេឡិចត្រូនិករបស់សមាគមដឹកជញ្ជូនតាមផ្លូវអាកាសអន្តរជាតិ (International Air Transport Association) រួមមានការទទួលស្គាល់ចំពោះការធ្វើតេស្ត និងការចាក់វ៉ាក់សាំងបង្ការCovid-19។ អ្នកដំណើរអាចចូលទឹកដីសិង្ហបុរីបាន ដោយគ្រាន់តែរាយការណ៍អំពីកម្មវិធីទូរស័ព្ទដែលមានផ្ទុកទិន្នន័យទាក់ទងនឹងCovid-19 របស់ខ្លួន ដែលមានការបញ្ជាក់ពីមន្ទីរពិសោធន៍នានាដែលគួរជាទីទុកចិត្ត។

ក្រុមហ៊ុនអាកាសចរណ៍នានាកំពុងតែសង្ឃឹមថា ប្រទេសជាច្រើននឹងទទួលស្គាល់លិខិតឆ្លងដែនអេឡិចត្រូនិកនៅលើទូរស័ព្ទឆ្លាតវៃ ដើម្បីអនុញ្ញាតឱ្យការធ្វើដំណើរត្រូវបានស្ដារឡើងវិញឆាប់រហ័ស និងចៀសវាងការបំពេញ និងត្រួតពិនិត្យបែបបទដ៏ស្មុគស្មាញ និងយឺតយ៉ាវនៅឯព្រលានយន្តហោះ។

គិតមកដល់បច្ចុប្បន្ន ពិភពលោកទាំងមូលបានរកឃើញអ្នកវិជ្ជមាននឹងCovid-19 សរុបចំនួន 133,009,551នាក់ ក្នុងនោះមាន 2,885,279នាក់បានស្លាប់, 107,255,216នាក់ជាសះស្បើយ និង 22,869,852នាក់កំពុងព្យាបាល។ ក្នុងអំឡុង 24ម៉ោងនៃថ្ងៃទី 6មេសា ពិភពលោកក៏បានរកឃើញអ្នកជំងឺCovid-19 ថ្មី ចំនួន 574,753នាក់ និងអ្នកស្លាប់ថ្មីដោយសារវីរុសនេះ ចំនួន 11,779នាក់ផងដែរ៕

ប្រភព៖ Reuters, AFP, Worldometers
ប្រែសម្រួល៖ បុត្រា

April 7, 2021

ការចាក់វ៉ាក់សាំងបង្ការCovid-19 នឹងអាចក្លាយជាកាតព្វកិច្ចរបស់ពលរដ្ឋនាពេលខាងមុខ

វ៉ាក់សាំងបង្ការវីរុសCovid-19 ដែលនឹងមកដល់ កម្ពុជា ជាបន្តទៀត នឹងត្រូវផ្ដល់អាទិភាព ចាក់ជូនប្រជាពលរដ្ឋនៅក្នុងរាជធានីភ្នំពេញ និងតំបន់ជុំវិញរាជធានីភ្នំពេញ។ នេះបើតាមប្រសាសន៍របស់សម្តេចតេជោ ហ៊ុន សែន ដែលបាន។

ប្រមុខរដ្ឋាភិបាលកម្ពុជា សម្តេចតេជោ ហ៊ុន សែន កាលពីម្សិលមិញ បានស្នើឱ្យគណៈកម្មការគ្រប់គ្រងកិច្ចការចាក់វ៉ាក់សាំងបង្ការវីរុសCovid-19 រៀបចំដំណើរការចាក់វ៉ាក់សាំងជាបន្តទៀត ដោយផ្តោតទៅលើប្រជាពលរដ្ឋទាំងអស់ ដែលរស់នៅក្នុងរាជធានីភ្នំពេញ និងខេត្តកណ្តាលឱ្យខាងតែបាន ដើម្បីបង្កើនភាពស៊ាំឱ្យបាន ពេញលេញ ខណៈដែល Covid-19 កំពុងរាតត្បាតខ្លាំង។

មូលហេតុចម្បងនៃការផ្ដល់អាទិភាពនេះ ត្រូវបានសម្ដេច អះអាងថា ដោយសាររាជធានីភ្នំពេញ គឺជាទីប្រជុំជនធំ និងជាកន្លែងដែលមនុស្សម្នាចេញ-ចូល ច្រើនជាងគេ ខណៈខេត្តកណ្ដាលគឺជាតំបន់ដែលព័ទ្ធជុំវិញ និងជាប់ជាមួយនឹងរាជធានីភ្នំពេញ។ យោងតាមក្រសួងសុខាភិបាល បច្ចុប្បន្ន រាជធានីភ្នំពេញគឺជាកន្លែងដែល Covid-19 រាតត្បាតខ្លាំងជាងគេ ដោយមានអ្នកឆ្លងសរុបចំនួន 1,490នាក់ ក្នុងនោះមាន 22នាក់បានស្លាប់ និង 459នាក់កំពុងព្យាបាល ស្របពេលដែលខេត្តកណ្ដាលមានអ្នកវិជ្ជមានសរុប 356នាក់ ឈរលំដាប់ទីបី បន្ទាប់ពីខេត្តព្រះសីហនុ (544នាក់)។

ភូមិសាស្ត្រខេត្តកណ្ដាល និងរាជធានីភ្នំពេញ

ទន្ទឹមនឹងការផ្ដល់អាទិភាពមុនគេដល់រាជធានីភ្នំពេញ និងខេត្តកណ្ដាល ប្រមុខរដ្ឋាភិបាលកម្ពុជា ក៏បានមានប្រសាសន៍ ការចាក់វ៉ាក់សាំងបង្ការCovid-19 នាបច្ចុប្បន្នគឺជារឿងស្ម័គ្រចិត្ត ប៉ុន្តែអនាគត វានឹងអាចក្លាយជាកាតព្វកិច្ចរបស់ពលរដ្ឋម្នាក់។ ក៏ប៉ុន្តែ ប្រការនេះនឹងអាស្រ័យទៅលើស្ថានការណ៍ជាក់ស្ដែងរបស់ពិភពលោក៕

ប្រភព៖ AKP
ដងស្រង់ដោយ៖ បុត្រា

April 7, 2021

តម្លៃមូលធនទីផ្សារនៃរូបិយវត្ថុអេឡិចត្រូនិក នៅទូទាំងពិភពលោក កើនឡើងដល់ 2,000,000,000,000ដុល្លារអាមេរិក

ការឡើងថ្លៃនៃប្រាក់អេឡិចត្រូនិក/ឌីជីថល (cryptocurrency) ដែលនាំមុខដោយ Bitcoin បានអូសបន្លាយជាច្រើនខែកន្លងមក ហើយពួកវាក៏បានទាក់ទាញចំណាប់អារម្មណ៍របស់អ្នកវិនិយោគឯកជន និងក្រុមហ៊ុនធំៗជាច្រើនផងដែរ។

លទ្ធផលនៃការសិក្សាស្រាវជ្រាវរបស់ក្រុមហ៊ុន CoinGecko និង Blockfolio បានបង្ហាញថា បច្ចុប្បន្ន មូលធនទីផ្សារនៃរូបិយវត្ថុអេឡិចត្រូនិកទូទាំងពិភពលោក បានកើនឡើងដល់ 2លានលាន (2,000,000,000,000) ដុល្លារអាមេរិក (ស្មើនឹង 8,086,905,117,150,951រៀល) ដែលជាតម្លៃខ្ពស់បំផុតក្នុងប្រវត្តិសាស្ត្រ។

ក្នុងចំណោមរូបិយវត្ថុអេឡិចត្រូនិកទាំងអស់ គេឃើញថា Bitcoin កំពុងតែនាំមុខគេ និងត្រូវបានប្រើប្រាស់ច្រើនបំផុត។ តម្លៃមូលធនទីផ្សាររបស់ Bitcoin ក៏បង្កើតបានកំណត់ត្រាថ្មី ដោយបានរក្សាត្រឹម 1លានលានដុល្លារអាមេរិកពេញមួយសប្ដាហ៍កន្លងទៅ។ បច្ចុប្បន្ន ប្រាក់នេះត្រូវបានជួញដូរក្នុងរង្វង់តម្លៃ 59,000ដុល្លារអាមេរិក/bitcoin។

ចាប់ពីពេលតម្លៃកើនដល់ 61,000ដុល្លារ Bitcoin ក៏ត្រូវជួញដូរក្នុងកម្រិតតូចចង្អៀត។ ក្រុមអ្នកវិភាគនិយាយថា ឱ្យតែ Bitcoin រក្សាបានតម្លៃលើ 53,000ដុល្លារ/bitcoin នោះប្រាក់នេះនឹងរក្សាបានមូលធនទីផ្សាររបស់ខ្លួន ត្រឹម 1លានលានដុល្លារអេមេរិក។

អំពី Ethereum ដែលជារូបិយវត្ថុអេឡិចត្រូនិកមានមូលធនទីផ្សារធំជាងគេលំដាប់ទីពីរ បច្ចុប្បន្នត្រូវបានជួញដូរក្នុងរង្វង់ 2,100ដុល្លារ/ethereum។ មូលធនទីផ្សាររបស់ប្រាក់នេះ បច្ចុប្បន្នកើនដល់ 244ពាន់លានដុល្លារអាមេរិក។

នៅក្នុងឆ្នាំនេះ Bitcoin បានឡើងថ្លៃជាង 100% ចំណែក Ethereum វិញ ឡើងថ្លៃជិត 190%។ មូលហេតុចម្បងដែលនាំឱ្យតម្លៃរបស់រូបិយវត្ថុទាំងនេះឡើងថ្លៃខ្ពស់គឺដោយសារក្រុមហ៊ុនធំៗ មានដូចជា Tesla និង BNY Mellon ជាដើម បានបង្កើនការវិនិយោគទៅក្នុងវិស័យប្រាក់អេឡិចត្រូនិកទាំងនេះ៕

ប្រភព៖ Reuters
ប្រែសម្រួល៖ បុត្រា

April 6, 2021

រាជរដ្ឋាភិបាលសម្រេចបិទការធ្វើដំណើរឆ្លងកាត់ពីខេត្តមួយទៅខេត្តមួយនៅទូទាំងប្រទេសជាបណ្តោះអាសន្ន

ដើម្បីទប់ស្កាត់ការឆ្លងរាលដាលវីរុសCovid-19 ទៅក្នុងខេត្តផ្សេងៗ រាជរដ្ឋាភិបាលកម្ពុជា បានសម្រេចបិទជាបណ្ដោះអាសន្នរយៈពេល14ថ្ងៃ ចំពោះការធ្វើដំណើរពីខេត្តមួយទៅខេត្តមួយ ដោយរាប់ចាប់ពីម៉ោងសូន្យនៃថ្ងៃទី7មេសា ឆ្នាំ2021 រហូតដល់ថ្ងៃទី20មេសា ឆ្នាំ2021។

បំរាមគោចរខាងលើនេះត្រូវបានអនុវត្តទូទាំងប្រទេស ដោយលើកលែងតែរាជធានីភ្នំពេញ និងខេត្តកណ្ដាល។ នេះបើតាមសេចក្ដីសម្រេចរបស់ប្រមុខរដ្ឋាភិបាលកម្ពុជា ដែលត្រូវបានធ្វើឡើងនៅយប់ថ្ងៃទី6មេសា ឆ្នាំ2021។

ក្រៅពីប្រការខាងលើ បទបញ្ជានេះក៏មានការលើកលែងចំពោះការដឹកជញ្ជូនមួយចំនួនផងដែរ ដែលមានដូចជា រថយន្តសង្គ្រោះបន្ទាន់របស់មន្ទីរពេទ្យរដ្ឋ និងឯកជន, រថយន្តពន្លត់អគ្គិភ័យ, រថយន្តដឹកជញ្ជូនសំរាម និងកាកសំណល់។ល។

ចំពោះរមណីយដ្ឋានទេសចរណ៍នៅទូទាំងប្រទេស ក៏នឹងត្រូវបានបិទជាបណ្តោះអាសន្នរយៈពេល14ថ្ងៃផងដែរ ដោយរាប់ចាប់ពីថ្ងៃទី7 ខែមេសា។ ព័ត៌មានលម្អិត សូមអានសេចក្ដីប្រកាសខាងក្រោម៖

April 6, 2021

(វីដេអូ)-បុរសម្នាក់បានស្លាប់ដោយសារការដាក់ពិន័យពីសមត្ថកិច្ច ព្រោះតែល្មើសនឹងបំរាមគោចរប្រឆាំងCovid-19 នៅហ្វីលីពីន

ដោយសារតែចេញទៅក្រៅផ្ទះបន្ទាប់ពីមានបំរាមគោចរ កំលោះវ័យ28ឆ្នាំម្នាក់នៅប្រទេសហ្វីលីពីន ត្រូវកងសន្តិសុខក្នុងតំបន់ចាប់ខ្លួន និងដាក់ពិន័យឱ្យអង្គុយចុះ-ក្រោកឈរ ចំនួន 300ដង។

សារព័ត៌មាន Rappler បានរាយការណ៍ថា កំលោះ Darren Manaog Peñaredondo បានចេញពីផ្ទះទៅទិញទឹកផឹកនៅវេលាក្រោយម៉ោង18យប់ ដូច្នេះក៏បានរំលោភលើបំរាមគោចររបស់ទីក្រុង General Trias នៃខេត្ត Cavite ដែលបំរាមនេះត្រូវអនុវត្តចាប់ពីម៉ោង 18យប់ ដល់ម៉ោង 5ព្រឹកនៃថ្ងៃបន្ទាប់ ដើម្បីទប់ស្កាត់វីរុសCovid-19។

មិត្តម្នាក់របស់ Peñaredondo ឈ្មោះ Reichelyn Balce បាននិយាយកាលពីថ្ងៃទី1មេសាថា គាត់រួមនឹងបុរសម្នាក់ផ្សេងទៀតបានល្មើសនឹងបំរាមគោចរ ទើបត្រូវចាប់ខ្លួនបញ្ជូនទៅកាន់មជ្ឈមណ្ឌលពាណិជ្ជកម្ម Malabon ដែលស្ថិតនៅទល់មុខសាលាក្រុង។ ក្រោយមក ពួកគេក៏ត្រូវបានបង្គាប់ឱ្យធ្វើកាយវិការអង្គុយចុះ-ក្រោកឈរចំនួន 100ដង។

យោងតាមការឱ្យដឹងពីសាច់ញាតិរបស់កំលោះខាងលើ សមត្ថកិច្ចបាននិយាយថា អ្នកទាំងពីរត្រូវតែធ្វើកាយវិការនេះសាជាថ្មី បើសិនពួកគេធ្វើមិនបានស្របគ្នា ឬឈប់កណ្ដាលទី។ ជាលទ្ធផល អ្នកទាំងពីរត្រូវធ្វើកាយវិការនេះរហូតដល់ប្រហែល 300ដង។

Peñaredondo ត្រលប់មកផ្ទះនៅវេលាម៉ោង 8ព្រឹក ថ្ងៃទី4 ខែមេសា ហើយគាត់ស្ទើរតែកម្រើកដៃជើងលែងរួច ព្រោះតែបាក់កម្លាំងជ្រុល។ Peñaredondo បានប្រាប់ Balce ថា ខ្លួនបានដួលជាច្រើនលើកនៅក្នុងពេលទទួលពិន័យ។ «ពេញមួយថ្ងៃនោះ គាត់ពិបាកដើរខ្លាំងណាស់ ដោយគ្រាន់តែអាចវារនៅលើដីប៉ុណ្ណោះ» Balce បានបង្ហោះនៅលើ Facebook ដូច្នេះ។

ចូលដល់ថ្ងៃទី 3មេសា Peñaredondo ចាប់ផ្ដើមប្រកាច់ និងគាំងបេះដូង។ កំលោះវ័យ 28ឆ្នាំរូបនេះបានដឹងខ្លួនឡើងវិញក្នុងរយៈពេលខ្លី ហើយក៏បានបាត់បង់ជីវិតនៅវេលាម៉ោង10ព្រឹក ក្នុងថ្ងៃដដែល។

ក៏ប៉ុន្តែ ស្នងការប៉ូលិសក្រុង General Trias លោក Marlo Nillo Solero បានឱ្យដឹងថា ពួកគេមិនដាក់ពិន័យបែបនេះចំពោះជនដែលល្មើសនឹងបំរាមគោចរទាក់ទងនឹង Covid-19 នោះទេ។ ផ្ទុយទៅវិញ អ្នកល្មើសគ្រាន់តែត្រូវស្ដាប់ការអប់រំពីសមត្ថកិច្ច។ ចំណែកអភិបាលក្រុង គឺលោក Antonio Ferrer បានបញ្ជាក់ថា សមត្ថកិច្ចបានចាប់ផ្ដើមបើកការស៊ើបអង្កេតលើបញ្ហាខាងលើនេះហើយ។

រដ្ឋាភិបាលហ្វីលីពីន បានពន្យារសុពលភាពនៃបំរាមគោចរទូទាំងប្រទេសក្នុងរយៈពេលមួយសប្ដាហ៍បន្ថែមទៀត ដោយរាប់ចាប់ពីថ្ងៃទី 5មេសា បន្ទាប់ពីករណីឆ្លង Covid-19 បានកើនឡើងជាថ្មី។ គិតមកដល់បច្ចុប្បន្ន ស្ថានភាពCovid-19 នៅប្រទេសនេះ មានភាពធ្ងន់ធ្ងរជាងគេលំដាប់ទីពីរនៅក្នុងតំបន់អាស៊ីអាគ្នេយ៍ បន្ទាប់ឥណ្ឌូនេស៊ី ដោយបានរកឃើញអ្នកវិជ្ជមាននឹងCovid-19 សរុបជាង 795,000នាក់ ក្នុងនោះមាន 13,425នាក់បានស្លាប់៕

ប្រភព៖ Guardian
ប្រែសម្រួល៖ បុត្រា

April 6, 2021

ជាង150នាក់បានស្លាប់ដោយសារទឹកជំនន់នៅឥណ្ឌូនេស៊ី និងទីម័រខាងកើត

តួលេខអ្នកស្លាប់ដោយសារទឹកជំនន់ និងបាក់ដីនៅប្រទេសឥណ្ឌូនេស៊ី និងទីម័រខាងកើត កាលពីសប្ដាហ៍មុន បានកើនឡើងដល់ 157នាក់ ខណៈដែលមនុស្សរាប់សិបនាក់ផ្សេងទៀតកំពុងបាត់ខ្លួន។

ស្ថាប័នគ្រប់គ្រងគ្រោះធម្មជាតិឥណ្ឌូនេស៊ី នាថ្ងៃនេះបានប្រកាសឱ្យដឹងថា បានរកឃើញមនុស្សចំនួន 130នាក់បានស្លាប់នៅក្នុងតំបន់ប្រជុំកោះនៅក្បែរប្រទេសទីម័រខាងកើត ជាប្រទេសដែលបានរកឃើញអ្នកស្លាប់ចំនួន 27នាក់ ដោយសារទឹកជំនន់ និងបាក់ដីកាលពីចុងសប្ដាហ៍មុននេះដែរ។ កងកម្លាំងជួយសង្គ្រោះនៅឥណ្ឌូនេស៊ី កំពុងតែរត់ប្រណាំងជាមួយនឹងពេលវវេលា នៅក្នុងការស្វែងរកជនរងគ្រោះជាង 70នាក់ ដែលកំពុងបាត់ខ្លួន។

ភ្លៀងធ្លាក់ខ្លាំងដោយសារតែព្យុះ Seroja បង្កឱ្យមានទឹកជំនន់ និងបាក់ដី ចាប់ពីថ្ងៃទី 3មេសា បានបំផ្លិចបំផ្លាញតំបន់ជាច្រើនរបស់ឥណ្ឌូនេស៊ី នាំឱ្យមនុស្សរាប់ពាន់នាក់ត្រូវជម្លៀសទៅកាន់ទីសុវត្ថិភាព។

មន្ត្រីឥណ្ឌូនេស៊ីបានឱ្យដឹងថា ផ្ទះសម្បែករាប់ពាន់ខ្នង មន្ទីរពេទ្យជាច្រើនកន្លែង រួមនឹងសាលារៀន ហេដ្ឋារចនាសម្ព័ន្ធជាច្រើន ត្រូវរងការបំផ្លិចបំផ្លាញ ព្រោះតែទឹកជំនន់ និងការបាក់ដី។ អ្នកនាំពាក្យរបស់ស្ថាប័នគ្រប់គ្រងគ្រោះធម្មជាតិឥណ្ឌូនសេស៊ី Raditya Djati បានបញ្ជាក់ថា ស្ថានភាពអាកាសធាតុអាក្រក់នឹងនៅតែបន្តកើតមានក្នុងរយៈពេលជាច្រើនថ្ងៃតទៅមុខទៀត។

នៅឯទីម័រខាងកើតវិញ រដ្ឋធានី Dili ក៏ទទួលរងគ្រោះទឹកជំនន់យ៉ាងធ្ងន់ធ្ងរ បង្កការខូចខាតដល់ផ្លូវថ្នល់ និងលិចទាំងវិមានប្រធានាធិបតីផងដែរ។ ឧបនាយករដ្ឋមន្ត្រីទីម័រខាងកើត Jose Reis បានឱ្យដឹងថា នេះគឺជាគ្រោះធម្មជាតិអាក្រក់បំផុតដែលមិនធ្លាប់មាននៅតំបន់នេះក្នុងអំឡុង40ឆ្នាំកន្លងមក៕

ប្រភព៖ AFP/Reuters
ប្រៃសម្រួល៖ បុត្រា

April 6, 2021

ស្ថិតិCovid-19 គិតត្រឹមម៉ោង12 នៃថ្ងៃទី6មេសា៖ ពិភពលោករកឃើញអ្នកជំងឺថ្មី11,671នាក់ ខណៈកម្ពុជារកឃើញ72នាក់

ព្រឹកថ្ងៃទី6 ខែមេសា ឆ្នាំ2021នេះ ក្រសួងសុខាភិបាលកម្ពុជាបានឱ្យដឹងថា បានរកឃើញករណីវិជ្ជមាននឹងCovid-19 ថ្មីចំនួន 72នាក់ នាំឱ្យតួលេខអ្នកបានឆ្លងវីរុសនេះសរុបកើនដល់ 2,824នាក់។

ក្នុងចំណោមអ្នកឆ្លងថ្មីទាំង 72នាក់ខាងលើ មាន1នាក់គឺជាករណីនាំចូល និង 71នាក់ជាករណីពាក់ពាន់នឹងព្រឹត្តិការណ៍20កុម្ភៈ។ ក្នុងរយៈពេល24ម៉ោងកន្លងទៅ កម្ពុជាក៏មានអ្នកជាសះស្បើយចំនួន 47នាក់ និងអ្នកស្លាប់ថ្មីចំនួន1នាក់ផងដែរ។

គិតមកដល់បច្ចុប្បន្ន កម្ពុជា មានអ្នកស្លាប់ចំនួន 22នាក់, អ្នកជាសះស្បើយចំនួន 1,794នាក់ និងអ្នកកំពុងព្យាបាលចំនួន 1,003នាក់ ក្នុងចំណោមអ្នកវិជ្ជមាននឹង Covid-19 សរុបចំនួន 2,824នាក់ ដែលក្រសួងសុខាភិបាលបានរកឃើញកន្លងមក។

នៅទូទាំងពិភពលោក បច្ចុប្បន្នមានមនុស្ស 132,415,764នាក់បានឆ្លងវីរុសCovid-19 ក្នុងនោះមាន 2,873,715នាក់បានស្លាប់, 106,712,864នាក់បានជាសះស្បើយ, 22,829,185នាក់កំពុងទទួលការព្យាបាល និង11,671នាក់ទើបតែបានរកឃើញថាវិជ្ជមាននឹងCovid-19 ក្នុងអំឡុង24ម៉ោងនៃថ្ងៃទី5មេសា៕

April 6, 2021

Author: សឿន សំណាង