សឿន សំណាង - La Reine Media

អ្នកជំងឺCovid-19 ថ្មី រហូតដល់ 576នាក់ នៅកម្ពុជា ត្រូវបានរកឃើញកាលពីម្សិលមិញ

នាព្រឹកថ្ងៃទី 9មេសា ឆ្នាំ2021 ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 576នាក់ទៀត ក្នុងអំឡុង 24ម៉ោងនៃថ្ងៃទី 8មេសា ឆ្នាំ2021។

ក្នុងចំណោមអ្នកវិជ្ជមានថ្មីទាំង 576នាក់ខាងលើ សុទ្ធតែជាករណីពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី 8មេសាដដែល កម្ពុជាក៏មានអ្នកជំងឺCovid-19 ចំនួន 70នាក់ បានជាសះស្បើយ និងមិនមានអ្នកស្លាប់នោះទេ។

គិតមកដល់ព្រឹកនេះ (9មេសា) ទូទាំងប្រទេសកម្ពុជា មានអ្នកឆ្លងCovid-19 សរុបចំនួន 3,604នាក់ ក្នុងនោះមានអ្នកជាសះស្បើយសរុប 1,984នាក់, អ្នកស្លាប់ 24នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 1,591នាក់។

April 9, 2021

រដ្ឋបាលភ្នំពេញដាក់ឱ្យដំណើរការស្រឡាង ភ្ជាប់ពីកោះពេជ្រទៅកាន់ក្បាលកោះនរា ចាប់ពីព្រឹកនេះតទៅ

ស្រឡាងធំ-តូចជាច្រើនគ្រឿង ត្រូវបានដាក់ឱ្យដំណើរការសម្រាប់ដឹកយានយន្តឆ្លងកាត់ទន្លេបាសាក់ដែលភ្ជាប់ពីកោះពេជ្រ ទៅកោះនរា ចាប់ពីម៉ោង 5កន្លះព្រឹក ដល់ម៉ោង 20យប់ ដើម្បីជួយកាត់បន្ថយការកកស្ទះចរាចរណ៍លើស្ពានព្រះមុនីវង្ស។

ការរៀបចំដាក់ឱ្យប្រើប្រាស់ស្រឡាងបណ្ដោះអាសន្នខាងលើនេះ ត្រូវបានធ្វើឡើងដោយ លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូននៃរាជធានីភ្នំពេញ និងអភិបាលខណ្ឌចំការមន ខណ្ឌច្បារអំពៅ និងតំណាងក្រុមហ៊ុនអភិវឌ្ឍន៏ទីក្រុងកោះពេជ្រ បន្ទាប់ពីមានការចាត់តាំងពីឯកឧត្តម ឃួង ស្រេង អភិបាលរាជធានីភ្នំពេញ។

មូលហេតុនៃការដាក់ឱ្យដំណើរជាស្រឡាងឆ្លងកាត់ទន្លេបាសក់នេះ ត្រូវបានមន្ត្រីរដ្ឋបាលភ្នំពេញលើកឡើងថា គឺដើម្បីជួយកាត់បន្ថយការកកស្ទះចរាចរណ៍នៅចំណុចស្ពានព្រះមនីវង្សចាស់ ស្ថិតក្នុងខណ្ឌច្បារអំពៅ ដែលកំពុងត្រូវបានបិទចរាចរណ៍បណ្ដោះអាសន្នរយៈពេល 3ថ្ងៃ ចាប់ពីថ្ងៃទី 08មេសា ដល់ 10មេសា។ បន្ទាប់ពីថ្ងៃទី 10មេសា ស្ពាននេះនឹងត្រូវបើកដំណើរការឡើងវិញ។

អាជ្ញាធរបានឱ្យដឹងថា អ្នកដំណើរដែលមានបំណងចូលមកភ្នំពេញពីផ្លូវជាតិលេខមួយ អាចធ្វើដំណើរតាមស្រឡាងពីក្បាលកោះនរា មកកាន់កោះពេជ្យបាន ព្រោះថា បច្ចុប្បន្ន មានការកកស្ទះចរាចរណ៍យ៉ាងធ្ងន់ធ្ងរ ត្រង់ចំណុចចាប់ពីម្ដុំវត្តនិរោធនៅផ្លូវជាតិលេខមួយ រហូតដល់តំបន់ក្បាលថ្នល់នៃខណ្ឌមានជ័យ បន្ទាប់ពីអាជ្ញាធរបិទស្ពានមនីវង្សចាស់ ដើម្បីសម្រួលដល់ការងារជួសជុលស្ពាននេះ៕

ប្រភព៖ AKP
ដកស្រង់៖ បុត្រា

April 9, 2021

ពលរដ្ឋអាមេរិក ជិត20% បានចាក់វ៉ាក់សាំងបង្ការ Covid-19 រួចរាល់ហើយ

យោងតាមសារព័ត៌មានក្នុងស្រុក សហរដ្ឋអាមេរិក បច្ចុប្បន្ន បានចាក់វ៉ាក់សាំងបង្ការវីរុសCovid-19 ជូនដល់ពលរដ្ឋរបស់ខ្លួនប្រមាណ 66លាននាក់រួចហើយ ខណៈដែលអ្នកជំងឺចំនួន 573,849នាក់បានស្លាប់ដោយសារវីរុសនេះ។

គិតមកដល់ថ្ងៃទី8មេសា ពលរដ្ឋជិត20% នៅសហរដ្ឋអាមេរិក បានទទួលការចាក់វ៉ាក់សាំងបង្ការ Covid-19 រួចរាល់ ដែលនេះបាននាំមកនូវ «ខែលការពារ» ដល់មនុស្សប្រមាណ 66លាននាក់ ក្នុងចំណោមប្រជាជនសរុបជាង 331,002,600នាក់។

កម្មវិធីចាក់វ៉ាក់សាំងបង្ការ Covid-19 របស់សហរដ្ឋអាមេរិក ត្រូវបានជំរុញយ៉ាងខ្លាំងក្លា ដោយនៅក្នុងនោះ មានវ៉ាក់សាំងជិត 175លានដូស ត្រូវបានប្រើប្រាស់ចាប់តាំងពីខែធ្នូ ឆ្នាំមុន។ ពលរដ្ឋអាមេរិកាំងជាង 112លាននាក់ ពោលគឺជាង 1/3 នៃប្រជាជនសរុប បានចាក់វ៉ាក់សាំងបង្ការ Covid-19 យ៉ាងតិចចំនួន 1ដូសរួចរាល់ហើយ។ នេះបើតាមមជ្ឈមណ្ឌលគ្រប់គ្រង និងទប់ស្កាត់រោគឆ្លង (CDC) របស់សហរដ្ឋអាមេរិក។

ដោយឡែក ក្រុមមន្ត្រីនៅ New York បានឱ្យដឹងថា អាជ្ញាធរនៃរដ្ឋនេះនឹងផ្ដល់ជំនួយជាទឹកប្រាក់រហូតដល់ 15,600ដុល្លារ ដល់ពលករគ្មានលិខិតស្នាមទាំងឡាយដែលរងផលប៉ះពាល់ដោយសារ Covid-19។ កាយវិការនេះអាចនាំមកនូវផលប្រយោជន៍ដល់មនុស្សជិត 300,000នាក់ នៅក្នុងរដ្ឋ New York។

គិតមកដល់បច្ចុប្បន្ន សហរដ្ឋអាមេរិកបានរកឃើញអ្នកឆ្លងCovid-19 សរុបចំនួន 31,716,672នាក់ ក្នុងនោះមាន 573,849នាក់បានស្លាប់ និង 24,271,887នាក់បានជាសះស្បើយ ខណៈអ្នកជំងឺ 6,870,936នាក់កំពុងព្យាបាល។ ក្នុងអំឡុង24ម៉ោងកន្លងទៅ សហរដ្ឋអាមេរិក ក៏បានរកឃើញអ្នកវិជ្ជមានថ្មីចំនួន 79,429នាក់ និងអ្នកស្លាប់ថ្មីចំនួន 1,002នាក់ផងដែរ៕

ប្រភព៖ CNN, Washington Post, Worldometers
ប្រែសម្រួល៖ បុត្រា

April 9, 2021

ម្ចាស់ឯតទគ្គកម្មក្រចកដៃប្រវែងជាង 7ម៉ែត្រ សម្រេចចិត្តកាត់ឱ្យសារមន្ទីរ

Ayanna Williams អាយុ 57ឆ្នាំ នៅក្នុងរដ្ឋ Texas សហរដ្ឋអាមេរិក បានសម្រេចចិត្តកាត់ក្រចកដៃដែលមានប្រវែងជាង 7.3ម៉ែត្រ ដែលខ្លួនបានទុកតាំងពី30ឆ្នាំមុន បន្ទាប់ពីដណ្ដើមបានឯតទគ្គកម្ម Guinness កាលពីឆ្នាំ2017។

អ្នកស្រី Ayanna Williams បច្ចុប្បន្នរស់នៅក្នុងទីក្រុង Houston ដណ្ដើមបានពានរង្វាន់ Guinness ស្ដីអំពីក្រចកដៃវែងជាងគេបង្អស់ក្នុងពិភពលោក កាលពី4ឆ្នាំមុន។ កាលនោះ ក្រចកដៃទាំងអស់របស់អ្នកស្រី មានប្រវែងជិត5.8ម៉ែត្រ ដែលប្រការនេះធ្វើឱ្យអ្នកស្រីត្រូវប្រើប្រាស់ទឹកថ្នាំលាបក្រចកអស់ពីរដប និងចំណាយពេលអស់20ម៉ោង សម្រាប់ការធ្វើក្រចក និងលាបក្រចកម្ដង។

មុនពេលសម្រេចចិត្តកាត់ កាលពីចុងសប្ដាហ៍មុន អ្នកស្រីបានវាស់ក្រចកដៃទាំងនោះ និងបានដឹងថា វាមានប្រវែងជាង7.3ម៉ែត្រ ហើយការធ្វើ និងលាបក្រចកម្ដងៗ ត្រូវចំណាយពេលអស់ជាច្រើនថ្ងៃ និងត្រូវប្រើប្រាស់ទឹកថ្នាំលាបចាប់ពី 3-4ដប។

អ្នកស្រី Ayanna Williams បានទៅកាន់បន្ទប់ពិគ្រោះជំងឺស្បែក នៅទីក្រុង Fort Worth ជាកន្លែងដែលបុគ្គលិកត្រូវប្រើប្រាស់ម៉ាស៊ីនអគ្គិសនីដើម្បីកាត់ក្រចករបស់អ្នកស្រី។ នេះក៏ជាលើកទីមួយហើយដែលអ្នកស្រី Ayanna Williams កាត់ក្រចកដៃ រាប់ចាប់ពីដើមទសវត្សរ៍ឆ្នាំ1990។

«បើទោះជាមិនមានក្រចកទាំងនេះ ក៏ខ្ញុំនៅតែជាក្សត្រី» អ្នកស្រី Williams និយាយដូច្នេះ ដោយរំលឹកដល់កំណត់ត្រា Guinness ដែលអ្នកស្រីធ្លាប់ទទួលបាន។ «ក្រចកទាំងនេះមិនអាចបង្កើតខ្ញុំបាន តែខ្ញុំជាអ្នកបង្កើតវាបាន»។

នាពេលខាងមុខ អ្នកស្រីមានគម្រោងទុកក្រចកប្រវែងត្រឹម 15សង់ទីម៉ែត្រប៉ុណ្ណោះ។ ក្រចកចាស់ទាំងអស់របស់អ្នកស្រី នឹងត្រូវបានដាក់តាំងបង្ហាញនៅក្នុងសារមន្ទីរមួយនៅទីក្រុង Orlando រដ្ឋ Florida។

ក្រចកវែងរបស់អ្នកស្រី កន្លងមក បានបង្កការលំបាកក្នុងការធ្វើកិច្ចការជាច្រើន ដូចជា ការលាងចាន ឬក្រាលកម្រាលពូក។ល។ គោលដៅថ្មីរបស់អ្នកស្រីគឺការលើកទឹកចិត្តដល់អ្នកដែលចូលចិត្តទុកក្រចក ដើម្បីដណ្ដើមពានរង្វាន់ឯតទគ្គកម្មពិភពលោកថ្មីមួយទៀត។

កំណត់ត្រាស្ដីអំពីក្រចកដៃវែងជាងគេបង្អស់របស់ស្ត្រី ធ្លាប់បានទៅលើ Lee Redmond ដែលបានចាប់ផ្ដើមទុកក្រចកតាំងតែពីឆ្នាំ1979 ដោយទុកបានប្រវែងជាង8.5ម៉ែត្រ។ ប៉ុន្តែ Redmond បានបាត់បង់ក្រចករបស់ខ្លួននៅក្នុងករណីគ្រោះថ្នាក់ចរាចរណ៍កាលពីឆ្នាំ2009 ពោលគឺ8ឆ្នាំ មុនពេល Williams បង្កើតឯតទគ្គកម្មថ្មី៕

ប្រភព៖ CNN
ប្រែសម្រួល៖ បុត្រា

April 8, 2021

កំពូលអ្នកមានមួយរូបនៅកម្ពុជា មានឈ្មោះក្នុងតារាងចំណាត់ថ្នាក់មហាសេដ្ឋីពិភពលោក ឆ្នាំ2021 របស់ Forbes

កាលពីថ្ងៃទី6 ខែមេសា ឆ្នាំ2021 ទស្សនាវដ្ដីហិរញ្ញវត្ថុ Forbes របស់សហរដ្ឋអាមេរិក បានចុះផ្សាយបញ្ជីឈ្មោះក្រុមមហាសេដ្ឋីពិភពលោក សម្រាប់ឆ្នាំ2021 ក្នុងនោះក៏មានមហាសេដ្ឋីនៅកម្ពុជាមួយរូបផងដែរ។

ឧកញ៉ា តាន់ ស៊ី (Tan Sri Dr. Chen Lip Keong) ដែលជាស្ថាបនិក និងជាអគ្គនាយកក្រុមហ៊ុន NagaWorld គឺជាមហាសេដ្ឋីមួយរូបដែលត្រូវបានទស្សនាវដ្ដី Forbes បញ្ចូលឈ្មោះទៅក្នុងតារាងចំណាត់ថ្នាក់មហាសេដ្ឋីពិភពលោកប្រចាំឆ្នាំ2021របស់ខ្លួនថា ជាមហាសេដ្ឋីរបស់កម្ពុជា។ មហាសេដ្ឋី តាន់ ស៊ី ជាប់ចំណាត់ថ្នាក់លេខ622 នៅក្នុងចំណោមមហាសេដ្ឋីទាំង2,674រូប ដែលមានឈ្មោះនៅក្នុងបញ្ជីរបស់ Forbes ដោយមានទ្រព្យសរុបចំនួន4.6ពាន់លានដុល្លារអាមេរិក។

លោកឧកញ៉ា តាន់ ស៊ី (កណ្ដាល) កាលពីឆ្នាំ2017

ទស្សនាវដ្ដី Forbes បានឱ្យដឹងថា ប្រភពចំណូលរបស់មហាសេដ្ឋី តាន់ ស៊ី ភាគច្រើនបានមកពីកាស៊ីណូ និងអចលនទ្រព្យ ហើយថា លោកគឺជាមហាសេដ្ឋីដែលរកស៊ីមានបានដោយខ្លួនឯង ពោលគឺទ្រព្យយ៉ាងស្ដុកស្ដម្ភរបស់លោក មិនមែនបានមកពីកេរមរតកដូនតានោះទេ។

មហាសេដ្ឋីវ័យ73ឆ្នាំរូបនេះគឺជាបុរសជនជាតិម៉ាឡេស៊ីដើមកំណើតចិន។ ដើមឡើយ លោក តាន ស៊ី មានអាជីពជាគ្រូពេទ្យ បន្ទាប់មកក៏បានក្លាយជាមហាសេដ្ឋីជាលើកដំបូងនៅក្នុងវិស័យកាស៊ីណូ ជាមួយនឹង NagaCorp ជាក្រុមហ៊ុនកាស៊ីណូកម្ពុជាដំបូងគេដែលត្រូវបានចុះបញ្ជីឈ្មោះនៅផ្សារហ៊ុនកុងកុង និងជាក្រុមហ៊ុនដំបូងដែលរកស៊ីនៅកម្ពុជា ជាចម្បង។ នៅភ្នំពេញ ក្រុមហ៊ុនបុត្រសម្ព័ន្ធរបស់ NagaCorp គឺ NagaWorld ត្រូវបានគេស្គាល់ច្រើនជាងគេ។ NagaWorld ត្រូវបានបង្កើតឡើងកាលពីឆ្នាំ1995 នៅភ្នំពេញ ហើយអាជ្ញាប័ណ្ណកាស៊ីណូរបស់ក្រុមហ៊ុននេះ មានសុពលភាពរហូតដល់ឆ្នាំ2065 និងទទួលបានសិទ្ធិផ្ដាច់មុខក្នុងការរកស៊ីក្នុងវិស័យកាស៊ីណូនៅភ្នំពេញរហូតដល់ឆ្នាំ2035។

នៅក្នុងគ្រាកម្ពុជាកំពុងប្រឈមនឹងបញ្ហា Covid-19 ឧកញ៉ា តាន់ ស៊ី ថ្មីៗនេះក៏បានចូលរួមបរិច្ចាគថវិកាចំនួន5លានដុល្លារអាមេរិកផងដែរ សម្រាប់កិច្ចការប្រយុទ្ធប្រឆាំងនឹងវីរុសនេះ៕

ប្រភព៖ Forbes
ដកស្រង់ និងប្រែសម្រួល៖ បុត្រា

April 8, 2021

ដោយសារដាំស្មៅស្លឹកបួន កសិករម្នាក់រកបានប្រាក់ចំណេញខ្ទង់សែនដុល្លារ/ខែ

ជាក់ស្ដែង ស្មៅប្រភេទស្លឹកបួននេះ បាននាំមកនូវប្រាក់ចំណេញរហូតដល់ខ្ទង់ 100,000ដុល្លារក្នុងមួយខែៗ ដល់លោក Hong In Heon ដែលបច្ចុប្បន្នរស់នៅក្នុងប្រទេសកូរ៉េខាងខាងត្បូង។

ធ្លាប់ជាអ្នកមានបទពិសោធន៍ក្នុងការដាំដើមផ្កាអស់រយៈពេល20ឆ្នាំមកនេះ លោក Hong In Heon ដែលបច្ចុប្បន្នរស់នៅក្នុងប្រទេសកូរ៉េខាងត្បូង បានងាកទៅដាំស្មៅស្លឹកបួន (Four-leaf clover) វិញម្ដង ព្រោះតែប្រាក់ចំណូលដែលបានមកពីការដាំដើមផ្កា មិនបានច្រើនប៉ុន្មាន។ ស្មៅស្លឹកបួននេះ មានមនុស្សតិចតួចណាស់ដែលបានដាំសម្រាប់លក់ ហើយវាក៏មានអតិថិជនច្រើនត្រូវការ ដូច្នេះ លោក Hong ក៏រកបានប្រាក់ចំណូលច្រើនជាងមុន និងទៀងទាត់ជាងមុន។

ក៏ប៉ុន្តែ ដើម្បីអាចដាំស្មៅប្រភេទនេះបាន លោក Hong ត្រូវចំណាយពេលរហូតដល់9ឆ្នាំ ក្នុងការសិក្សាស្រាវជ្រាវ និងសាកល្បង។ ស្មៅស្លឹកបួននេះ ត្រូវបានដាំទៅតាមលក្ខណៈធម្មជាតិ និងមិនបង្កឱ្យមានការប្រែប្រួលរូបរាង ហើយវាក៏អាចឱ្យគេទទួលទានបាន។ លោក Hong បានបង្កើតកសិដ្ឋានកញ្ចក់មួយកន្លែង ដើម្បីដាំស្មៅនេះ។

ស្មៅស្លឹកបួនប្រភេទមានរង្វង់មួយពណ៌សនៅកណ្ដាល

ស្មៅស្លឹកបួននេះ បើសិនអ្នកដាំអាចរក្សាសំណើម និងសីតុណ្ហភាពសមស្រប នោះវានឹងរីកលូតលាស់បានល្អ។ លោក Hong រកបានប្រាក់ចំណេញពីស្មៅនេះ រហូតដល់ 100,000ដុល្លារ/ខែឯណោះ។ ជារៀងរាល់ថ្ងៃ ស្មៅស្លឹកបួនចំនួន10,000ដើម ត្រូវបានផ្គត់ផ្គង់ដល់ទីផ្សារ។ ស្មៅនេះត្រូវបានវេចជាកញ្ចប់ ហើយក្នុងមួយកញ្ចប់មាន500ដើម និងត្រូវបានលក់ក្នុងតម្លៃ150ដុល្លារអាមេរិកក្នុងមួយកញ្ចប់។

កសិករខាងលើបានឱ្យដឹងថា អតិថិជនរបស់ខ្លួនគឺសុទ្ធតែមកពីភោជនីយដ្ឋានធំៗ និងហាងកាហ្វេផងដែរ។ ពួកគេយកស្មៅស្លឹកបួននេះទៅតុបតែងលម្អនៅលើកែវភេសជ្ជៈ និងចានអាហារ ដើម្បីបង្កើនភាពទាក់ទាញ។

ការងាររបស់លោក Hong ត្រូវបានគេចាត់ទុកថាជាការច្នៃប្រឌិតនៅក្នុងរបរកសិកម្ម។ រឿងរ៉ាវជំនួញរបស់លោក Hong ក្រោយមកក៏ត្រូវបានទូរទស្សន៍នៅកូរ៉េខាងត្បូងចាក់ផ្សាយ ដើម្បីជួយឱ្យកសិករ និងអ្នកចាប់អារម្មណ៍លើដំណាំនេះ មានឱកាសរៀនសូត្រតាម៕

ប្រភព៖ Koreaboo
ប្រែសម្រួល៖ បុត្រា

April 8, 2021

ចិនមានមហាសេដ្ឋី2រូប ស្ថិតក្នុង Top 20 នៃបញ្ជីចំណាក់ថ្នាក់អ្នកមានជាងគេក្នុងពិភពលោក របស់ Forbes នាឆ្នាំ2021

ថ្មីៗនេះ ទស្សនាវដ្ដីហិរញ្ញវត្ថុ Forbes របស់អាមេរិក បានចេញផ្សាយបញ្ជីចំណាត់ថ្នាក់ប្រចាំឆ្នាំរបស់ខ្លួនស្ដីអំពីមហាសេដ្ឋីពិភពលោក ដែលកំពុងរកស៊ីក្នុងវិស័យផ្សេងៗ តាំងពីបច្ចេកវិទ្យា ហិរញ្ញវត្ថុ វិនិយោគ រហូតដល់វិស័យសម្លៀកបំពាក់ និងលក់រាយ។ល។

នៅក្នុងបញ្ជីចំណាត់ថ្នាក់ស្ដីអំពីមហាសេដ្ឋីពិភពលោកនាឆ្នាំ2021 ដែលទើបត្រូវបានទស្សនាវដ្ដី Forbes ប្រកាសកាលពីថ្ងៃទី6មេសានេះ បង្ហាញថា ពិភពលោកបច្ចុប្បន្នមានមហាសេដ្ឋីសរុបចំនួន2,755នាក់ ក្នុងនោះមានមហាសេដ្ឋីថ្មីចំនួនជាង660នាក់។

នៅក្នុង Top 20 នៃបញ្ជីចំណាត់ថ្នាក់ថ្មីនេះ គេឃើញមានមហាសេដ្ឋីចិនចំនួនតែ2រូបគត់ នោះគឺមហាសេដ្ឋី Zhong Shanshan (ចំណាក់ថ្នាក់ទី13) មានទ្រព្យចំនួន68.9ពាន់លានដុល្លារអាមេរិក និងមហាសេដ្ឋី Ma Huateng (ចំណាត់ថ្នាក់ទី15) មានទ្រព្យចំនួន65.8ពាន់លានដុល្លារ។ ចំណែកមហាសេដ្ឋី Jack Ma វិញ បានធ្លាក់ទៅកាន់ចំណាត់ថ្នាក់ទី26 ដោយមានទ្រព្យ48.4ពាន់លានដុល្លារអាមេរិក។

ប្រទេសដែលមានមហាសេដ្ឋីស្ថិតនៅក្នុង Top 20 នៃតារាងចំណាត់ថ្នាក់របស់ទស្សនាវដ្ដី Forbes នាឆ្នាំ2021នេះ រួមមាន សហរដ្ឋអាមេរិក (មាន13នាក់), ចិន (មាន2នាក់), បារាំង (មាន2នាក់), ឥណ្ឌា (មាន1នាក់), ម៉ិកស៊ិក (មាន1នាក់) និងអេស្ប៉ាញ (មានមហាសេដ្ឋី1នាក់)៕

ប្រភព៖ Forbes
ប្រែសម្រួល៖ បុត្រា

April 8, 2021

កងទ័ពមីយ៉ានម៉ា ចេញបញ្ជាឱ្យចាប់ខ្លួនបវរកញ្ញា Han Lay

របបសឹកភូមា បានចេញបញ្ជាឱ្យតាមចាប់ខ្លួន Han Lay ព្រោះតែបានអំពាវនាវឱ្យពិភពលោក ជួយដល់ប្រទេសរបស់នាង នៅក្នុងព្រឹត្តិការណ៍ប្រលងបវរកញ្ញាសន្តិភាពអន្តរជាតិ កាលពីពេលថ្មីៗកន្លងទៅនេះ។

សារព័ត៌មាន Global New Light ដែលគ្រប់គ្រងដោយកងទ័ពភូមា កាលពីយប់ថ្ងៃទី6មេសា បានចុះផ្សាយបញ្ជីឈ្មោះរបស់ក្រុមមនុស្សដែលកងប្រទេសនេះកំពុងតាមចាប់ខ្លួន ក្នុងនោះក៏មាន Han Lay ដែលជាបវរកញ្ញាសន្តិភាពមីយ៉ានម៉ា2020 ផងដែរ។ រាប់ចាប់ពីថ្ងៃទី4មេសា សារព័ត៌មាននេះ បានចុះផ្សាយព័ត៌មានស្ដីអំពីការតាមចាប់ខ្លួនអ្នកល្បីឈ្មោះចំនួន100នាក់ហើយ ដែលអ្នកទាំងនេះបានគាំទ្រដល់បាតុកម្មប្រឆាំងនឹងរដ្ឋប្រហារយោធានៅមីយ៉ានម៉ា។

ប្រភពព័ត៌មានពីប្រទេសថៃ និងមីយ៉ានម៉ា ឱ្យដឹងថា បទបញ្ជាតាមចាប់ខ្លួននាង Han Lay នេះ ត្រូវបានរបបសឹកមីយ៉ានម៉ា ធ្វើឡើងបន្ទាប់ពីបវរកញ្ញារូបនេះ សំដែងការប្រឆាំងនឹងរដ្ឋប្រហារយោធា នៅក្នុងព្រឹត្តិការណ៍ប្រលងបវរកញ្ញាសន្តិភាពអន្តរជាតិកាលពីសប្ដាហ៍មុន។ កងទ័ពភូមា ក៏កំពុងតាមចាប់ខ្លួនក្រុមមនុស្សដែលបានជួយ Han Lay ចូលទៅកាន់ប្រទេសថៃផងដែរ។

របបសឹកភូមា មិនទាន់បានអធិប្បាយអ្វីអំពីព័ត៌មាននេះនៅឡើយ ប៉ុន្តែ ប្រភពព័ត៌មាននានាបានឱ្យដឹងថា ការអំពាវនាវឱ្យសហគមន៍អន្តរជាតិជួយដល់មីយ៉ានម៉ា របស់ Han Lay គឺជាដើមហេតុនៃការតាមចាប់ខ្លួននេះ។

Han Lay អាយុ22ឆ្នាំ មិនធ្លាប់ជាប់ពាក់ព័ន្ធនឹងរឿងនយោបាយអ្វីឡើយ រហូតដល់ពេលដែលកងទ័ពមីយ៉ានម៉ា បានធ្វើរដ្ឋប្រហារកាលពីថ្ងៃទី1កុម្ភៈ។ បវរកញ្ញាមីយ៉ានម៉ារូបនេះ ក្រោយមកក៏បានឆ្លៀតយកឱកាសក្នុងព្រឹត្តិការណ៍ប្រលងបវរកញ្ញាសន្តិភាពអន្តរជាតិនៅប្រទេសថៃ កាលពីចុងខែមីនា ដើម្បីអំពាវនាវឱ្យសហគមន៍អន្តរជាតិជួយដល់ប្រទេសខ្លួន។

កាលពីចុងខែមីនា ពីកោះ Phuket ប្រទេសថៃ Han Lay ឱ្យដឹងថា នាងនឹងស្នាក់នៅក្នុងប្រទេសថៃជាបណ្ដោះអាសន្ន ដោយសារស្ថានភាពនៅមីយ៉ានម៉ា កំពុងវឹកវរ៕

ប្រភព៖ Philstar
ប្រែសម្រួល៖ បុត្រា

April 8, 2021

អាមេរិកសម្រេចដកកងទ័ពទាំងអស់ចេញពីប្រទេសអ៊ីរ៉ាក់

សហរដ្ឋអាមេរិកបានយល់ព្រមដកក្រុមទាហានដែលនៅសល់ក្នុងប្រទេសអ៊ីរ៉ាក់ ត្រលប់មកស្រុកវិញ នៅក្នុងពេលវេលាជាក់លាក់មួយបន្ទាប់ពីកិច្ចចរចាជាមួយរដ្ឋធានីបាកដាត។

សហរដ្ឋអាមេរិកនឹងរក្សាបុគ្គលិកមួយចំនួនដែលបំពេញភារកិច្ចជាទីប្រឹក្សាប៉ុណ្ណោះ សម្រាប់ជួយដល់ការប្រយុទ្ធប្រឆាំងនឹងក្រុមភេរវកម្ម។ នេះគឺជាចំណុចគោលដែលត្រូវបានលើកឡើងនៅក្នុងសេចក្ដីប្រកាសរួមដែលធ្វើឡើងក្រោយកិច្ចចរចារវាងរដ្ឋមន្ត្រីការបរទេសអាមេរិក Antony Blinken និងសមភាគី Fuad Hussein នៃប្រទេសអ៊ីរ៉ាក់ កាលពីថ្ងៃទី7មេសា 2021។

ភាគីទាំងពីរបញ្ជាក់យ៉ាងច្បាស់ថា វត្តមាននៃកងទ័ពអាមេរិកនៅប្រទេសអ៊ីរ៉ាក់ គឺធ្វើឡើងទៅតាមការស្នើរបស់អ៊ីរ៉ាក់ ក្នុងបំណងជួយគាំទ្រកងកម្លាំងសន្តិសុខអ៊ីរ៉ាក់ (ISF) ក្នុងការប្រយុទ្ធប្រឆាំងនឹងក្រុមភេរវកម្មរដ្ឋអ៊ីស្លាម (IS)។ ភាគីទាំងពីរបញ្ជាក់ថា ភារកិច្ចបច្ចុប្បន្នរបស់សហរដ្ឋអាមេរិក និងកងកម្លាំងសម្ព័ន្ធមិត្ត គឺផ្ដោតទៅលើតែការបណ្ដុះបណ្ដាល និងប្រឹក្សាយោបល់ប៉ុណ្ណោះ។

ទាហានអាមេរិកាំងនៅមូលដ្ឋានទ័ពអាកាស K1 ក្នុងតំបន់ Kirkuk កាលពីឆ្នាំ2020

ប្រការខាងលើនេះនឹងអនុញ្ញាតឱ្យអាមេរិក ដកទាហានដែលនៅសល់ក្នុងប្រទេសអ៊ីរ៉ាក់ ត្រលប់ទៅមាតុភូមិវិញ នៅក្នុងពេលវេលាសមស្របណាមួយ ក្រោយកិច្ចពិភាក្សាលម្អិត រវាងប្រទេសទាំងពីរនាពេលខាងមុខ។

ការសម្រេចខាងលើនេះ ត្រូវបានធ្វើឡើងក្នុងគ្រាដែលកងទ័ពអាមេរិកនៅអ៊ីរ៉ាក់ ថ្មីៗនេះត្រូវរងការវាយប្រហារជាបន្តបន្ទាប់។ កាលពីថ្ងៃទី4មេសា មូលដ្ឋានទ័ពអាកាស Balad នៅក្បែររដ្ឋធានីបាកដាត បានរងការវាយប្រហារដោយរ៉ុកកែតចំនួនពីរគ្រាប់។ មូលដ្ឋាននេះគឺជាកន្លែងស្នាក់នៅសំខាន់របស់បុគ្គលិកសន្តិសុខ និងអ្នកវិនិយោគអាមេរិក។ ប៉ុន្តែ ករណីវាយប្រហារនេះមិនបានបង្កឱ្យមានអ្នកស្លាប់ ឬរងរបួសនោះទេ ដោយសារគ្រាប់រ៉ុកកែតបានហោះខុសគោលដៅ៕

ប្រភព៖ RT
ប្រែសម្រួល៖ បុត្រា

April 8, 2021

លោក Trump ធ្លាក់300ថ្នាក់ នៅក្នុងបញ្ជីចំណាត់ថ្នាក់មហាសេដ្ឋីរបស់ Forbes ខណៈពិភពលោកមានមហាសេដ្ឋីថ្មីជាង600នាក់ក្នុងឆ្នាំ2021

ក្រោយការឡើងដឹកនាំប្រទេសអាមេរិក ទ្រព្យសម្បត្តិរបស់អតីតប្រធានាធិបតី Donald Trump បានថយចុះពី 3.5ពាន់លានដុល្លារ មកនៅត្រឹម 2.4ពាន់លានដុល្លារ ហើយបច្ចុប្បន្ន លោក Trump ស្ថិតនៅលេខរៀងទី 1,299 នៅក្នុងបញ្ជីចំណាត់ថ្នាក់មហាសេដ្ឋីរបស់ Forbes ដូច្នេះ លោកបានធ្លាក់ចុះអស់ 300ថ្នាក់ បើធៀបនឹងឆ្នាំមុន។

ថ្មីៗនេះ ទស្សនាវដ្ដីហិរញ្ញវត្ថុ Forbes របស់អាមេរិក បានប្រកាសបញ្ជីចំណាត់ថ្នាក់ប្រចាំឆ្នាំរបស់ខ្លួនស្ដីអំពីមហាសេដ្ឋីពិភពលោក ដែលកំពុងរកស៊ីក្នុងវិស័យផ្សេងៗ តាំងពីបច្ចេកវិទ្យា ហិរញ្ញវត្ថុ វិនិយោគ រហូតដល់វិស័យសម្លៀកបំពាក់ និងលក់រាយ។ល។

នៅក្នុងបញ្ជីចំណាត់ថ្នាក់របស់ឆ្នាំនេះ មានមហាសេដ្ឋីសរុបចំនួន2,755នាក់ ច្រើនជាង660នាក់ បើធៀបនឹងឆ្នាំមុន។ ក្នុងបញ្ជីចំណាត់ថ្នាក់ថ្មីនេះ មានមហាសេដ្ឋីថ្មីចំនួន493នាក់។ នៅក្នុងអំឡុងមួយឆ្នាំកន្លងទៅនេះ គិតជាមធ្យម រៀងរាល់17ម៉ោងគឺមានវត្តមានមហាសេដ្ឋីថ្មីម្នាក់។

យោងតាមតារាងចំណាត់ថ្នាក់របស់ Forbes លោក Trump ជាប់ចំណាត់ថ្នាក់ទី1,299 ដោយមានទ្រព្យ 2.4ពាន់លានដុល្លារ។ កាលពីឆ្នាំ2020 លោក Trump ស្ថិតក្នុងចំណាត់ថ្នាក់ទី1,001 នៅក្នុងបញ្ជីប្រចាំឆ្នាំមួយនេះ។

នៅក្នុងគ្រាស្បថចូលកាន់តំណែងប្រធានាធិបតីកាលពីខែមករា2017 ទ្រព្យសម្បត្តិរបស់លោក Trump បានឡើងដល់ 3.5ពាន់លានដុល្លារ។ ដូច្នេះ នៅពេលចាកចេញពីសេតវិមាន ទ្រព្យរបស់លោកបានថយចុះអស់ជិត1/3 នៃទ្រព្យសរុប។ យោងតាម Forbes ការដែលលោក Trump ត្រូវទម្លាក់ចំណាត់ថ្នាក់គឺដោយសារការតាមមិនទាន់ល្បឿននៃកំណើនរបស់ទ្រព្យរបស់មហាសេដ្ឋីផ្សេងៗ ក្នុងនោះ មូលហេតុចម្បាំងដែលនាំឱ្យមានបញ្ហានេះ នោះគឺការថយចុះនៃចំណូលដែលបានមកពីវិស័យទេសចរណ៍ ព្រោះថា ចំណូលមួយចំនួនធំរបស់លោក Trump គឺបានមកពីសណ្ឋាគារ។

យោងតាម Bloomberg ប្រាក់ចំណូលដែលបានមកពីសណ្ឋាគារនានានៅ Washington DC និង Las Vegas របស់ក្រុមហ៊ុន Trump Organization ក្នុងឆ្នាំ2020 បានថយចុះជាងពាក់កណ្ដាល បើធៀបនឹងឆ្នាំ2019។ ចំណូលផ្សេងក្រៅពីនេះ ក៏មានការថយចុះច្រើន។

យោងតាមទស្សនាវដ្ដី Forbes តម្លៃសរុបនៃទ្រព្យសុទ្ធរបស់ក្រុមមហាសេដ្ឋីពិភពលោកនាឆ្នាំ2021នេះគឺ 13.1លានលាន (13,100,000,000,000) ដុល្លារអាមេរិក កើន 5.1លានលាន (5,100,000,000,000) ដុល្លារបើធៀបនឹងឆ្នាំ2020។ សហរដ្ឋអាមេរិកនៅតែជាប្រទេសដែលមានមហាសេដ្ឋីច្រើនជាងគេបង្អស់ (724នាក់) ខណៈដែលចិនមាន 698នាក់ ឈរលំដាប់ទីពីរ។

ស្ថាបនិករបស់ Amazon លោក Jeff Bezos បន្តជាអ្នកមានជាងគេបង្អស់ក្នុងពិភពលោក នៅក្នុងរយៈពេល4ឆ្នាំជាប់ៗគ្នានេះ។ លោក Bezos មានទ្រព្យសរុបចំនួន 177ពាន់លានដុល្លារ។ ឈរលើចំណាត់ថ្នាក់លេខពីរគឺ CEO របស់ Tesla លោក Elon Musk ដោយមានទ្រព្យ 151ពាន់លានដុល្លារអាមេរិក។ នៅក្នុងចំណោមមហាសេដ្ឋីទាំង10រូបដែលមានទ្រព្យច្រើនជាងគេក្នុងពិភពលោកគឺមាន8នាក់ជាជនជាតិអាមេរិកាំង៕

ប្រភព៖ Forbes, Bloomberg
ប្រែសម្រួល៖ បុត្រា

April 7, 2021

Author: សឿន សំណាង