សឿន សំណាង - La Reine Media

នាវាចម្បាំងអាមេរិកបីគ្រឿង តាមពីក្រោយនាវាផ្ទុកយន្តហោះចម្បាំងចិន នៅលើសមុទ្រចិនខាងត្បូង

នាវិកអាមេរិកបានបង្ហោះវីដេអូមួយបង្ហាញអំពីយន្តហោះចម្បាំងកំពុងចុះចតលើនាវាផ្ទុកយន្តហោះចម្បាំង Liaoning របស់ចិន ខណៈដែលរូបភាពពីផ្កាយរណបបង្ហាញថា នាវាចម្បាំងអាមេរិកចំនួនបីគ្រឿង ដេញតាមពីក្រោយនាវាផ្ទុកយន្តហោះចិន។

យោងតាមវីដេអូដែលត្រូវបានចែករំលែកនៅលើបណ្ដាញសង្គម Twitter កាលពីថ្ងៃទី17មេសា ក្រុមប្រយុទ្ធនាវាចម្បាំងចិន Liaoning ធ្វើដំណើរនៅលើសមុទ្រចិនខាងត្បូង ដែលវីដេអូនេះទំនងជាត្រូវបានថតពីលើនាវាចម្បាំងរបស់សហរដ្ឋអាមេរិក។

នៅក្នុងវីដេអូ គេឃើញមានយន្តហោះចម្បាំង J-15 ចុះចតលើនាវាផ្ទុកយន្តហោះ Liaoning ធ្វើឱ្យក្រុមនាវិកមានការភ្ជាក់ផ្អើល។ នៅជុំវិញនាវាផ្ទុកយន្តហោះចិន គឺជាក្រុមនាវាអមដំណើរដែលមាននាវាចម្បាំងការពារដែនអាកាស Type-052D យ៉ាងតិចមួយគ្រឿង និងនាវាចម្បាំងធុនធ្ងន់ Type-055 មួយគ្រឿង។

រូបភាពដែលត្រូវបានថតដោយផ្កាយរណបកាលពីថ្ងៃទី16មេសា បង្ហាញថា ក្រុមប្រយុទ្ធនាវាចម្បាំង Liaoning របស់ចិន ធ្វើដំណើរនៅលើសមុទ្រចិនខាងត្បូង ចម្ងាយជិត500គីឡូម៉ែត្រទៅទិសអាគ្នេយ៍នៃមូលដ្ឋានទ័ព Yulin Naval នៅលើកោះហៃណាននៃប្រទេសចិន។

ក្រុមប្រយុទ្ធនាវាផ្ទុកយន្តហោះចិន រួមមាន នាវាផ្ទុកយន្តហោះ Liaoning, នាវាចម្បាំង Type-055 មួយគ្រឿង, នាវាចម្បាំងការពារដែនអាកាស Type-052D មួយគ្រឿង, នាវាចម្បាំង Type-054A មួយគ្រឿង និងនាវា Type-901 មួយគ្រឿង។ ក្រុមនាវាចម្បាំងដែលផ្លាស់ទីក្បែរក្រុមប្រយុទ្ធរបស់ចិនទាំងបីទិសគឺក្រុមនាវាចម្បាំង Arleigh Burke របស់សហរដ្ឋអាមេរិក។

ក្រសួងការពារជាតិសហរដ្ឋអាមេរិក និងចិន មិនទាន់មានការអធិប្បាយអ្វីអំពីព័ត៌មាននេះនៅឡើយ។

នាវាចម្បាំងចិន (លេខ 1-5) និងនាវាសហរដ្ឋអាមេរិក នៅលើសមុទ្រចិនខាងត្បូងកាលពីថ្ងៃទី16មេសា 2021។ រូបភាព៖ Twitter/OSINT-1

ព្រឹត្តិការណ៍ខាងលើនេះ បានកើតឡើងបន្ទាប់ពីក្រុមចម្បាំងនាវាផ្ទុកយន្តហោះអាមេរិក USS Theodore Roosevelt និងក្រុមនាវាវាយឡើងច្រាំង USS Makin Island បានចាកចេញពីសមុទ្រចិនខាងត្បូង។ ក្នុងព្រឹត្តិការណ៍នេះ គេមិនបានដឹងច្បាស់ថា មាននាវាចម្បាំងអាមេរិកតាមពីក្រោយក្រុមនាវាផ្ទុកយន្តហោះចម្បាំងចិនដែរ ឬអត់នោះទេ។ កងទ័ពជើងទឹកសហរដ្ឋអាមេរិក ធ្លាប់បានបញ្ជាឱ្យនាវា USS Mustin ដេញតាមពីក្រោយនាវាផ្ទុកយន្តហោះចម្បាំងចិន Liaoning កាលពីថ្ងៃទី10មេសា នៅពេលវាចូលទៅកាន់សមុទ្រចិនខាងត្បូង។

ភាពតានតឹងខាងលើបានកើតឡើងចាប់តាំងពីថ្ងៃទី7មីនា នៅពេលដែលកប៉ាល់នេសាទចិនរាប់រយគ្រឿងនាំគ្នាចតនៅក្បែរថ្មប៉ប្រះទឹក Whitsun ដែលប្រទេសចិន ហ្វីលីពីន និងវៀតណាម អះអាងថាជារបស់ខ្លួន៕

ប្រភព៖ Express, SCMP
ប្រែសម្រួល៖ បុត្រា

April 18, 2021

សេចក្តីណែនាំអំពីការចាក់វ៉ាក់សាំងបង្ការ Covid-19 ក្នុងបរិបទនៃការអនុវត្តន៍វិធានការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល នាថ្ងៃទី17មេសា 2021

នាព្រឹកថ្ងៃទី17 ខែមេសា ឆ្នាំ2021នេះ គណៈកម្មការចំពោះកិច្ចចាក់វ៉ាក់សាំងបង្ការCovid-19 បានចេញសេចក្ដីណែនាំមួយជូនដល់សាធារណជន ពិសេសគឺពលរដ្ឋដែលស្ថិតនៅក្នុងរាជធានីភ្នំពេញ និងក្រុងតាខ្មៅនៃខេត្តកណ្ដាល ដែលកំពុងជាប់ក្នុងការបិទខ្ទប់ដើម្បីបង្ការការឆ្លងរាលដាលនៃវីរុសCovid-19។

សេចក្ដីណែនាំនេះគឺទាក់ទងនឹងការចាក់វ៉ាក់សាំងបង្ការវីរុសCovid-19 លើកទីពីររបស់ពលរដ្ឋដែលបានចាក់លើកទីមួយរួចហើយ។ ខ្លឹមសារនៃសេចក្ដីណែនាំមានដូចខាងក្រោម៖

ប្រភព៖ ក្រសួងសុខាភិបាល
ដកស្រង់៖ បុត្រា

April 17, 2021

អ្នកស្លាប់ដោយសារCovid-19 នៅកម្ពុជា កើនដល់39នាក់ ខណៈអ្នកវិជ្ជមានសរុបឡើងដល់5,771នាក់

នាព្រឹកថ្ងៃទី 17មេសា ឆ្នាំ2021 ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 291នាក់ទៀត ក្នុងអំឡុង 24ម៉ោងនៃថ្ងៃទី 16មេសា ឆ្នាំ2021។

ក្នុងចំណោមអ្នកវិជ្ជមានថ្មីទាំង 291នាក់ខាងលើ មាន1នាក់ជាករណីនាំចូលដែលមិនមែនជាពលករខ្មែរមកពីថៃ និង 290នាក់ទៀតជាករណីពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី 16មេសាដដែល កម្ពុជាក៏មានអ្នកជំងឺCovid-19 ចំនួន 23នាក់បានជាសះស្បើយ និងមានអ្នកស្លាប់ថ្មីចំនួន 1។

គិតមកដល់ព្រឹកនេះ (17មេសា) ទូទាំងប្រទេសកម្ពុជា មានអ្នកឆ្លងCovid-19 សរុបចំនួន 5,771នាក់ ក្នុងនោះមានអ្នកជាសះស្បើយសរុប 2,416នាក់, អ្នកស្លាប់ 39នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 3,311នាក់។

ប្រភព៖ ក្រសួងសុខាភិបាល
ដកស្រង់៖ បុត្រា

April 17, 2021

Pfizer ៖ អ្នកដែលបានទទួលវ៉ាក់សាំងគ្រប់ហើយ អាចត្រូវចាក់ “ដូសទី3” ទៀតក្នុងរយៈពេល 6-12ខែ

គណៈគ្រប់គ្រងក្រុមហ៊ុនផលិតឱសថ Pfizer បានឱ្យដឹងថា អ្នកដែលបានទទួលវ៉ាក់សាំងការពារកូវីដ-19 គ្រប់ទាំង 2ដូសហើយ អាចមានភាពចាំបាច់ ត្រូវចាក់ដូសទី3 បន្ថែមទៀត ដើម្បីជំរុញប្រព័ន្ធប្រឆាំងជំងឺ ក្នុងរយៈពេល 6-12ខែទៀត។

នៅថ្ងៃទី15 ខែមេសា វេបសាយព័ត៌មាន CNBC បានផ្សព្វផ្សាយបទសម្ភាសរបស់លោក អាល់ប៊ើត បួឡា នាយកប្រតិបត្តិរបស់ ហ្វ៉ៃហ្ស៊ើរ ដែលបានបញ្ជាក់ផងដែរថា មានភាពអាចទៅរួចខ្លាំង ដែលមនុស្សទាំងអស់ អាចនឹងត្រូវចាក់វ៉ាក់សាំងការពារវីរុសកូរ៉ូណា ជាប្រចាំរៀងរាល់ឆ្នាំ។

“យើងនៅត្រូវរង់ចាំមើលទាំងអស់គ្នាថា តើវាមានភាពចាំបាច់ ក្នុងការត្រូវតែចាក់ដដែលៗឡើងវិញញឹកញាប់ប៉ុនណា?…តែ វាអាចទៅរួច ក្នុងការត្រូវតែចាក់ដូសទី3 ក្នុងអំឡុងពេល 6-12ខែ និងបន្ទាប់ពីនោះ ក៏អាចនឹងត្រូវចាក់ឡើងវិញរៀងរាល់ឆ្នាំទៀតផង ប៉ុន្តែទិន្នន័យទាំងអស់នេះ នៅត្រូវការរង់ចាំការអះអាងពីអ្នកជំនាញការជាមុនសិន” លោកបួឡា បានថ្លែងបែបនេះ ព្រមទាំងបន្ថែមថា ការក្លាយពូជរបស់មេរោគវីរុស ក៏ជា “កត្តាប្រែប្រួលសំខាន់” មួយទៀតដែរ។

អ្នកស្រាវជ្រាវទូទាំងពិភពលោក មិនទាន់អាចប្រកាសបាននៅឡើយថា តើវ៉ាក់សាំងប្រភេទផ្សេងៗ ដែលកំពុងមាននាពេលបច្ចុប្បន្ននេះ នឹងអាចការពារការឆ្លងមេរោគវីរុសកូរ៉ូណា បានយូរប៉ុនណាឡើយ។

លទ្ធផលការសិក្សាស្រាវជ្រាវថ្មីបំផុតរបស់ហ្វ៉ៃហ្ស៊ើរ បានអះអាងថា វ៉ាក់វ៉ាក់សាំងរបស់ខ្លួន មានប្រសិទ្ធភាពក្នុងការការពារវីរុសកូរ៉ូណាបាន 91% និងទប់ស្កាត់ការធ្លាក់ខ្លួនឈឺដោយកូវីដ-19 កម្រិតធ្ងន់ធ្ងរ បានច្រើនជាង 95% រយៈពេលយូរបំផុត 6ខែ បន្ទាប់ពីចាក់ដូសទី2 រួច។

តែយ៉ាងណាក្ដី អ្នកវិទ្យាសាស្ត្រ បានបញ្ជាក់ថា នៅត្រូវសិក្សាពីទិន្នន័យបន្ថែមទៀតថា តើវ៉ាក់សាំងនឹងហុចលទ្ធផលក្នុងការការពារ ក្រោយពេល 6ខែកន្លងផុតទៅ ដែរឬទេ?៕

ប្រភព៖ ទីភ្នាក់ងារព័ត៌មាន AFP
ប្រែសម្រួលដោយ តាវ៉ែនតា

April 17, 2021

កម្ពុជាសម្រេចបិទរាជធានី និងក្រុងតាខ្មៅជាបណ្ដោះអាសន្ន រយៈពេល14ថ្ងៃ ដើម្បីទប់ស្កាត់Covid-19

រាជរដ្ឋាភិបាលកម្ពុជាបានសម្រេចធ្វើការបិទខ្ទប់ភូមិសាស្ត្ររាជធានីភ្នំពេញ និងទីក្រុងតាខ្មៅនៃខេត្តកណ្ដាលជាបណ្ដោះអាសន្នរយៈពេល14ថ្ងៃ រាប់ចាប់ម៉ោងសូន្យនៃថ្ងៃទី15 ខែមេសា ឆ្នាំ2021 ដល់ថ្ងៃទី28មេសា ឆ្នាំ2021 ដើម្បីទប់ស្កាត់ការឆ្លងរាលដាលនៃវីរុសCovid-19។

សេចក្ដីសម្រេចរបស់រាជរដ្ឋាភិបាល ក៏បានបញ្ជាក់ថា រាជធានីភ្នំពេញ និងទីក្រុងតាខ្មៅ ត្រូវចាត់ទុកជាភូមិសាស្ត្រតែមួយដែលត្រូវបានបិទខ្ទប់។

យោងតាមសេចក្ដីសម្រេចខាងលើ បុគ្គលគ្រប់រូបត្រូវបានហាមមិនឱ្យចេញពីផ្ទះ ឬពីលំនៅឋានបច្ចុប្បន្ន បើសិនជាមិនមានកិច្ចការចាំបាច់។

ព័ត៌មានលម្អិត សូមបន្តអានសេចក្ដីសម្រេចខាងក្រោម៖

ប្រភព៖ ក្រសួងព័ត៌មាន
ដកស្រង់ដោយ៖ បុត្រា

April 14, 2021

អ្នកវិជ្ជមាននឹងCovid-19 ធ្លាប់ទៅធនាគារ ABA សាខាជិតស្ថានីយរថភ្លើង និងសាខាស្ដាតចាស់! អ្នកសង្ស័យសូមទៅពិនិត្យសំណាកជាបន្ទាន់

“អនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុក Covid-19” នាព្រឹកនេះ បានជូនដំណឹងថា មានអ្នកឆ្លងវីរុសCovid-19 ធ្លាប់បានទៅកាន់ធនាគារ ABA សាខាជិតស្ថានីយរថភ្លើង ក្បែរវិមានសន្តិភាព និងសាខាស្ដាតចាស់ នៅថ្ងៃទី31 ខែមីនា ឆ្នាំ2021។

អនុគណៈកម្មការខាងលើ បានអំពាវនាវឱ្យដល់ពលរដ្ឋដែលធ្លាប់បានទៅកាន់ធនាគារ ABA ដែលបានរៀបរាប់ខាងលើ នៅវេលាម៉ោង 3និង21នាទី ដល់ម៉ោង3និង37នាទី នៅថ្ងៃទី31មីនា 2021 ប្រញាប់ទៅធ្វើតេស្តរកវីរុសជាបន្ទាប់ បើសិនមានអាការមិនស្រួលខ្លួន ដូចជា ក្ដៅខ្លួន ក្អក កណ្ដាស់ ឈឺបំពង់ក ហៀរសម្បោរ ពិបាកដកដង្ហើមជាដើម។

ទន្ទឹមនឹងនេះ ធនាគារ ABA សាខាស្ដាតចាស់ក៏មានករណីដូចគ្នានេះនៅថ្ងៃទី31មីនា 2021 ប៉ុន្តែ នៅវេលាម៉ោង11និង39នាទី ដល់ម៉ោង12និង11នាទី។

អនុគណៈកម្មការនេះក៏បានបញ្ជាក់ថា បុគ្គលសង្ស័យថាមានផ្ទុក Covid-19 អាចទៅធ្វើតេស្តនៅមណ្ឌលមួយចំនួន រួមមាន វិទ្យាល័យបាក់ទូក វិទ្យាល័យបឹងត្របែក មណ្ឌលសុខភាពចាក់អង្រែក្រោម មន្ទីរពេទ្យមិត្តភាពខ្មែរ-សូវៀត សាលាបឋមសិក្សាសុភមង្គល និងមន្ទីរពេទ្យបង្អែកនៅតាមបណ្ដាខេត្ត។

ប្រភព៖ ក្រសួងព័ត៌មាន, អនុគណៈកម្មការស្រាវជ្រាវCovid-19
ដកស្រង់៖ បុត្រា

April 13, 2021

ទ្រព្យសម្បត្តិរបស់សហស្ថាបនិកពីររូបនៃក្រុមហ៊ុន Google កើនឡើងលើស 100ពាន់លានដុល្លារ

«មូលបត្របច្ចេកវិទ្យាបានឡើងថ្លៃ ជួយឱ្យ Larry Page និង Sergey Brin មានឈ្មោះនៅក្នុងក្រុមមហាសេដ្ឋីដែលមានទ្រព្យលើសពី 100ពាន់លានដុល្លារអាមេរិក» នេះបើតាម Bloomberg Billionaires Index។

Larry Page បច្ចុប្បន្នមានទ្រព្យចំនួន 104ពាន់លានដុល្លារ ខណៈដែល Sergey Brin មាន 100ពាន់លានដុល្លារ។ ចាប់ពីដើមឆ្នាំមកនេះ ពួកគេម្នាក់ៗរកបានជាង 20ពាន់លានដុល្លារឯណោះ។

មូលបត្រអាមេរិក នៅក្នុងការជួញដូរកាលពីថ្ងៃសុក្រសប្ដាហ៍មុន បានបង្កើតកំណត់ត្រាថ្មី ដោយសារតែក្រុមអ្នកវិនិយោគជឿជាក់លើល្បឿននៃការងើបឡើងរបស់សេដ្ឋកិច្ច។ សន្ទស្សន៍ Nasdaq 100 បានកើនជាង 7% ក្នុងឆ្នាំនេះ។ មូលបត្រ Alphabet ដែលជាក្រុមហ៊ុនមេរបស់ Google ក៏បានកើនឡើងពេញពីរសប្ដាហ៍កន្លងទៅ បន្ទាប់ពីដណ្ដើមបានជ័យជំនះក្នុងរឿងក្ដីនៅតុលាការ ទាក់ទងនឹងបញ្ហាកម្មសិទ្ធិបញ្ហា។

សមាជិកនៃក្លឹបមហាសេដ្ឋីដែលមានទ្រព្យសែនលានដុល្លារអាមេរិករបស់ពិភពលោក បច្ចុប្បន្នមានចំនួន 8រូប ដែលស្ទើរតែទាំងអស់សុទ្ធតែជាមហាសេដ្ឋីបច្ចេកវិទ្យាអាមេរិក។ ក្រុមនេះកាន់កាប់ទ្រព្យជាង 1លានលាន (1,000,000,000,000) ដុល្លារអាមេរិក និងរកបាន 110ពាន់លានដុល្លារបន្ថែមទៀតនៅក្នុងឆ្នាំនេះ។

ឆ្នាំ2017 Jeff Bezos ដែលជាស្ថាបនិករបស់ Amazon គឺជាបុគ្គលដំបូងគេដែលមានទ្រព្យចំនួន 100ពាន់លានដុល្លារ រាប់ចាប់ពីពេលដែលទ្រព្យរបស់ Bill Gates បានឡើងដល់ចំណុចកំពូលនេះកាលពីឆ្នាំ1999។ ទ្រព្យសម្បត្តិរបស់ហសស្ថាបនិកនៃក្រុមហ៊ុន Microsoft នេះ បានធ្លាក់ចុះបន្ទាប់ពីយុគសម័យ dotcom ប៉ុន្តែក៏បានងើបឡើងដល់ចំណុច 100ពាន់លានដុល្លារកាលពីឆ្នាំ2019។ លោក Elon Musk ដែលជា CEO របស់ Tesla និងលោក Mark Zuckerberg ជាសហស្ថាបនិករបស់ Facebook បានក្លាយជាសមាជិកនៃក្លឹបមហាសេដ្ឋីសែនលានដុល្លារនេះជាបន្តបន្ទាប់កាលពីឆ្នាំ2020 នៅពេលវិស័យបច្ចេកវិទ្យារីកចម្រើនខ្លាំងក្នុងសម័យCovid-19។

កំពូលអ្នកវិនិយោគ Warren Buffett បច្ចុប្បន្នក៏មានទ្រព្យចំនួន 101ពាន់លានដុល្លារអាមេរិក។ អ្នកជំនួញក្នុងវិស័យសម្លៀកបំពាក់ លោក Bernard Arnault ដែលជានាយកប្រតិបត្តិរបស់ក្រុមហ៊ុន LVMH ក៏មានឈ្មោះនៅក្នុងក្លឹបខាងលើ ដោយមានទ្រព្យសរុប 132ពាន់លានដុល្លារអាមេរិក៕

ប្រភព៖ Bloomberg
ប្រែសម្រួល៖ បុត្រា

April 13, 2021

អ្នកស្លាប់ដោយសារCovid-19 នៅកម្ពុជា កើនដល់33នាក់ ខណៈអ្នកវិជ្ជមានសរុបឡើងដល់ជាង4,690នាក់

នាព្រឹកថ្ងៃទី 13មេសា ឆ្នាំ2021 ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 181នាក់ទៀត ក្នុងអំឡុង 24ម៉ោងនៃថ្ងៃទី 12មេសា ឆ្នាំ2021។

ក្នុងចំណោមអ្នកវិជ្ជមានថ្មីទាំង 181នាក់ខាងលើ មាន2នាក់ជាករណីនាំចូលដែលមិនមែនជាពលករខ្មែរមកពីថៃ, 1នាក់ជាពលករខ្មែរត្រលប់ពីប្រទេសថៃ និង178នាក់ទៀតជាករណីពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី 12មេសាដដែល កម្ពុជាក៏មានអ្នកជំងឺCovid-19 ចំនួន40នាក់បានជាសះស្បើយ និងមានអ្នកស្លាប់ថ្មីចំនួន3នាក់។

ករណីស្លាប់ថ្មីចំនួន3នាក់កាលពីថ្ងៃទី12មេសាកន្លងទៅ កើតឡើងចំពោះ ស្ត្រីជនជាតិខ្មែរអាយុ79ឆ្នាំ, ស្ត្រីជនជាតិខ្មែរអាយុ59ឆ្នាំ និងបុរសជនជាតិខ្មែរអាយុ57ឆ្នាំ។

គិតមកដល់ព្រឹកនេះ (13មេសា) ទូទាំងប្រទេសកម្ពុជា មានអ្នកឆ្លងCovid-19 សរុបចំនួន 4,696នាក់ ក្នុងនោះមានអ្នកជាសះស្បើយសរុប 2,252នាក់, អ្នកស្លាប់សរុប 33នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 2,406នាក់។

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

April 13, 2021

អេស្ប៉ាញ៖ ថ្នាក់រៀនពិសេសនៅលើឆ្នេរសមុទ្រ ជួយឱ្យសិស្សានុសិស្សមានអារម្មណ៍ល្អ និងសប្បាយរីករាយក្នុងសម័យCovid-19

បើសិនជាការសិក្សានៅលើឆ្នេរសមុទ្រគឺជាក្ដីស្រមៃ នោះក្ដីស្រមៃនេះបានក្លាយជាការពិតហើយសម្រាប់សិស្សជាច្រើនរូបនៅតំបន់ Murcia នៃប្រទេសអេស្ប៉ាញ។

ក្រោយរយៈពេលមួយឆ្នាំដែលត្រូវរៀនពីចម្ងាយ ដោយសារបំរាមគោចរ និងគម្លាតសង្គមដើម្បីបង្ការCovid-19 សាលា Felix Rodriguez de la Fuente នៅតំបន់ Murcia បានបង្កើតថ្នាក់រៀននៅលើឆ្នេរសមុទ្រដើម្បីប្រើប្រាស់បរិយាកាសប្រកបដោយខ្យល់បរិសុទ្ធដែលត្រូវគេជឿថា កម្រមានហានិភ័យនៃការឆ្លងវីរុសCovid-19។

ប៉ុន្តែ សិស្សដែលមកកាន់ «សាលារៀន» នៅលើឆ្នេរសមុទ្រ Playa de los Nietos នេះ នៅតែត្រូវពាក់ម៉ាស់ និងអង្គុយលើកៅអីដែលត្រូវបានគេរៀបចំទៅតាមការកំណត់ដើម្បីរក្សាគម្លាតសុវត្ថិភាព។ គ្រូបង្រៀនម្នាក់ ឈ្មោះ Juan Francisco Martinez បានឱ្យដឹងថា សិស្សទាំងអស់ សុទ្ធតែមានអារម្មណ៍សប្បាយរីករាយ ហើយនឹងមានអនុស្សាវរីយ៍ពិបាកបំភ្លេចបាន។

សាលារៀននេះគឺជាផ្នែកមួយនៃគម្រោងមួយដែលមានឈ្មោះថា «Fresh Air» (ខ្យល់បរិសុទ្ធ) ក្នុងបំណងនាំមកនូវខ្យល់ល្អបរិសុទ្ធសម្រាប់ក្មេងៗនៅក្នុងសម័យCovid-19។ ក្រុមគ្រូបង្រៀននឹងត្រូវបង្រៀនសិស្សនៅលើឆ្នេរខ្សាច់សមុទ្រ ចាប់ពីម៉ោង8ព្រឹកជារៀងរាល់ថ្ងៃ។

គម្រោងខាងលើនេះ មានថ្នាក់រៀនចំនួន8 ហើយសិស្សមានអាយុចាប់ពី3-12ឆ្នាំ។ ថ្នាក់រៀនទាំងនេះ នៅតែសិក្សាទៅតាមថ្នាក់ដែលពួកគេធ្លាប់បានរៀនកន្លងមក។ មកដល់បច្ចុប្បន្ន ពុំមានករណីឆ្លង Covid-19 ណាមួយដែលត្រូវបានរកឃើញនៅក្នុងថ្នាក់រៀនទាំងនេះទេ។ សិស្សទាំងឡាយ សុទ្ធតែពេញចិត្តនឹងរបៀបសិក្សានេះ ព្រោះពួកគេបាននៅខាងក្រៅ បានជួបមិត្តភ័ក្ដិ មានអារម្មណ៍ស្រស់ស្រាយជាងការរៀនតាមកុំព្យូទ័រនៅឯផ្ទះ។

ដើម្បីរួមចំណែកជួយឱ្យសកម្មភាពសិក្សាកាន់តែរស់រវើក និងកាន់តែអស្ចារ្យ ពលរដ្ឋក្នុងតំបន់ថែមទាំងបានតុបតែងខ្លួនជាទាហាន ឬជាអ្នកនេសាទ ដើម្បីណែនាំប្អូនៗអំពីប្រវត្តិសាស្ត្រ, របរនេសាទ និងមុខរបរចិញ្ចឹមជីវិតផ្សេងទៀតរបស់ប្រជាជនក្នុងតំបន់។ គ្រូបង្រៀនឈ្មោះ Alfonso Vera ឱ្យដឹងថា អ្នកស្រុកក្នុងភូមិបានបង្រៀនក្មេងៗអំពីវិធីស្ទូចត្រី និងចែករំលែកអំពីរបៀបដែលពួកគេស្វែងរកអាហារនៅក្នុងគ្រាលំបាកបំផុត ដូចជាសម័យCovid-19 នេះជាដើម៕

ប្រភព៖ Reuters
ប្រែសម្រួល៖ បុត្រា

April 13, 2021

ធ្វើជំនួញក្នុងវិស័យណាខ្លះដែលងាយឱ្យយើងក្លាយជាមហាសេដ្ឋីបំផុតក្នុងពិភពលោក?

វិស័យហិរញ្ញវត្ថុ-វិនិយោគ បច្ចុប្បន្នកាន់កាប់មូលធនដល់ទៅ 371ពាន់លានដុល្លារអាមេរិកនៅទូទាំងពិភពលោក ហើយបុគ្គលដែលលេចធ្លោជាងគេ នោះគឺ កំពូលមហាសេដ្ឋី Warren Buffett។

ក្នុងសប្ដាហ៍កន្លង ទស្សនាវដ្ដីហិរញ្ញវត្ថុ Forbes របស់សហរដ្ឋអាមេរិក បានចេញផ្សាយបញ្ជីចំណាត់ថ្នាក់មហាសេដ្ឋីពិភពលោកសម្រាប់ឆ្នាំ2021។ ឆ្នាំនេះ ពិភពលោកទាំងមូលមានមហាសេដ្ឋីសរុបចំនួន 2,755រូប ដែលមានទ្រព្យចាប់ពី 1ពាន់ដុល្លារអាមេរិកឡើងទៅ។ អ្នកមានទាំងនេះ រកស៊ីក្នុងវិស័យផ្សេងៗគ្នា ក៏ប៉ុន្តែ បើយោងតាម Forbes មហាសេដ្ឋីភាគច្រើនធ្វើជំនួញក្នុងវិស័យចំនួន10 ដែលមានដូចខាងក្រោម៖

1.វិស័យ៖ ហិរញ្ញវត្ថុ-វិនិយោគ

-ចំនួនមហាសេដ្ឋី៖ 371នាក់
-ភាគរយនៃមហាសេដ្ឋីក្នុងបញ្ជីរបស់ Forbes៖ 13%
-អ្នកមានជាងគេ៖ Warren Buffett (96ពាន់លានដុល្លារ) គឺជាប្រធានប្រតិបត្តិរបស់ Berkshire Hathaway។ ក្រុមហ៊ុននេះ មានភាគហ៊ុននៅក្នុងក្រុមហ៊ុនជាង60 ក្នុងនោះក៏មាន Duracell និង Dairy Queen ផងដែរ។

2.វិស័យ៖ បច្ចេកវិទ្យា

-ចំនួនមហាសេដ្ឋី៖ 365នាក់
-ភាគរយនៃមហាសេដ្ឋីក្នុងបញ្ជីរបស់ Forbes៖ 13%
-អ្នកមានជាងគេ៖ Jeff Bezos (177ពាន់លានដុល្លារ) គឺជាស្ថាបនិក និងជានាយកប្រតិបត្តិរបស់ក្រុមហ៊ុន Amazon។ ក្រុមហ៊ុននេះក៏គ្រប់គ្រងកាសែត Washington Post និងក្រុមហ៊ុនបច្ចេកវិទ្យាអវកាស Blue Origin ផងដែរ។

3.វិស័យ៖ ផលិតកម្ម

-ចំនួនមហាសេដ្ឋី៖ 331នាក់
-ភាគរយនៃមហាសេដ្ឋីក្នុងបញ្ជីរបស់ Forbes៖ 12%
-អ្នកមានជាងគេ៖ He Xiangjian (35ពាន់លានដុល្លារ) គឺជាស្ថាបនិករបស់ Midea Group។ ក្រុមហ៊ុននេះមានសាខាជាង200 ឯណោះ។

4.វិស័យ៖ សម្លៀកបំពាក់ និងលក់រាយ

-ចំនួនមហាសេដ្ឋី៖ 273នាក់
-ភាគរយនៃមហាសេដ្ឋីក្នុងបញ្ជីរបស់ Forbes៖ 10%
-អ្នកមានជាងគេ៖ Bernard Arnault (150ពាន់លានដុល្លារ) គឺជាប្រធាន និងជានាយកប្រតិបត្តិរបស់ LVMH។ បច្ចុប្បន្ន លោក Bernard គ្រប់គ្រងពាណិជ្ជសញ្ញាជាង70 ក្នុងនោះមាន Louis Vuitton, Tiffany & Co និង Sephora ជាដើម។

5.វិស័យ៖ ថែទាំសុខភាព

-ចំនួនមហាសេដ្ឋី៖ 221នាក់
-ភាគរយនៃមហាសេដ្ឋីក្នុងបញ្ជីរបស់ Forbes៖ 8%
-អ្នកមានជាងគេ៖ Jiang Rensheng (24.4ពាន់លានដុល្លារ) ជាប្រធានក្រុមហ៊ុនផលិតវ៉ាក់សាំង Chogqing ZFSW Biological Products។ ក្រុមហ៊ុននេះកំពុងអភិវឌ្ឍវ៉ាក់សាំងសម្រាប់ទប់ស្កាត់ជំងឺរបេង។

6.វិស័យ៖ អាហារ & ភេសជ្ជៈ

-ចំនួនមហាសេដ្ឋី៖ 219នាក់
-ភាគរយនៃមហាសេដ្ឋីក្នុងបញ្ជីរបស់ Forbes៖ 8%
-អ្នកមានជាងគេ៖ Zhong Shanshan (68.9 ពាន់លានដុល្លារ) ជាប្រធានក្រុមហ៊ុនផលិតទឹកសុទ្ធ Nongfu Spring។ បច្ចុប្បន្ន លោក Nongfu ក៏កាន់កាប់ក្រុមហ៊ុនផលិតឱសថ Beijing Wantai Biological Pharmacy។

7.វិស័យ៖ អចលនទ្រព្យ

-ចំនួនមហាសេដ្ឋី៖ 215នាក់
-ភាគរយនៃមហាសេដ្ឋីក្នុងបញ្ជីរបស់ Forbes៖ 8%
-អ្នកមានជាងគេ៖ Lee Shau Kee (31.7ពាន់លានដុល្លារ) គឺជាសហស្ថាបនិកនៃក្រុមហ៊ុនអចលនទ្រព្យ Sun Hung Kai។ ឆ្នាំ1976 លោក Lee ក៏បានបង្កើតក្រុមហ៊ុន Henderson Land Development ដែលនាំមកនូវប្រាក់ចំណូលខ្ពស់ផងដែរ។

8.វិស័យ៖ ពហុវិស័យ

-ចំនួនមហាសេដ្ឋី៖ 188នាក់
-ភាគរយនៃមហាសេដ្ឋីក្នុងបញ្ជីរបស់ Forbes៖ 7%
-អ្នកមានជាងគេ៖ Mukesh Ambani (84.5ពាន់លានដុល្លារ) ជាប្រធានក្រុមហ៊ុន Reliance Industries ដែលរកស៊ីក្នុងវិស័យគីមីប្រេង, ឧស្ម័ន, លក់រាយ និងទូរគមនាគមន៍។

9.វិស័យ៖ ថាមពល

-ចំនួនមហាសេដ្ឋី៖ 100នាក់
-ភាគរយនៃមហាសេដ្ឋីក្នុងបញ្ជីរបស់ Forbes៖ 4%
-អ្នកមានជាងគេ៖ Zeng Yuqun ឬហៅថា Robin Zeng (28.4ពាន់លានដុល្លារ) គឺជាស្ថាបនិក និងប្រធានរបស់ក្រុមហ៊ុន Contemporary Amperex Technology (CATL) ដែលផលិតអាគុយសម្រាប់រថយន្តអគ្គិសនី។ អតិថិជនរបស់ក្រុមហ៊ុននេះគឺ BMW, Volkswagen និង Geely។

10.វិស័យ៖ ប្រព័ន្ធផ្សព្វផ្សាយ-កំសាន្ត

-ចំនួនមហាសេដ្ឋី៖ 95នាក់
-ភាគរយនៃមហាសេដ្ឋីក្នុងបញ្ជីរបស់ Forbes៖ 3%
-អ្នកមានជាងគេ៖ Michael Bloomberg (59ពាន់លានដុល្លារ) គឺជាសហស្ថាបនិករបស់ក្រុមហ៊ុន Bloomberg។ កាលពីឆ្នាំទៅ លោក Michael ធ្លាប់បានចំណាយប្រាក់ជិត1ពាន់លានដុល្លារសម្រាប់យុទ្ធនាការឃោសនារកសំឡេងឆ្នោតដើម្បីតំណែងប្រធានាធិបតីសហរដ្ឋអាមេរិក៕

ប្រភព៖ Forbes
ប្រែសម្រួល៖ បុត្រា

April 12, 2021

Author: សឿន សំណាង