សឿន សំណាង - La Reine Media

ក្នុងគ្រាបិទខ្ទប់ការធ្វើដំណើរដោយសារ Covid-19 អ្នកដឹកជញ្ជូនអាហារ ត្រូវបានអនុញ្ញាតឱ្យបំពេញការងារធម្មតា បើទោះមិនមានអាហារក្នុងធុង

អាជ្ញាធរដែលកំពុងអនុវត្តវិធានការបិទខ្ទប់ មិនត្រូវរារាំងដំណើរមន្ត្រីសុខាភិបាល អ្នកលក់ឱសថ និងម៉ូតូដឹកជញ្ជូនអាហារនោះឡើយ ដើម្បីចៀសវាងបញ្ហាប៉ះពាល់ដល់ការរស់នៅប្រចាំថ្ងៃរបស់ប្រជាពលរដ្ឋក្នុងតំបន់ដែលកំពុងត្រូវបានបិទខ្ទប់ដោយសារ Covid-19។

ការលើកឡើងដូចខាងលើនេះ ក៏ព្រោះតែពួកគេគឺជាអ្នកសម្រួលដល់ជីវភាពប្រចាំថ្ងៃរបស់ពលរដ្ឋ។ នេះបើតាមលោក លោក កើត ឆែ អភិបាលរងរាជធានីភ្នំពេញ។ ទាក់ទងនឹងការផ្គត់ផ្គង់អាហារ លោកអភិបាលរង បានបញ្ជាក់ថា កន្លងមក លោកបានទទួលព័ត៌មានថា ក្រុមម៉ូតូដែលដឹកជញ្ជូនអាហារត្រូវបានសមត្ថកិច្ចមួយចំនួនរារាំង ព្រោះតែមិនឃើញមានអាហារនៅក្នុងធុងអាហារ។ អភិបាលរងរាជធានីភ្នំពេញរូបនេះ បញ្ជាក់ថា កាលណាពួកគេទម្លាក់អាហារទៅឱ្យអ្នកទិញរួចហើយ នោះពួកគេនឹងជិះម៉ូតូទទេត្រលប់មកវិញ ដូច្នេះ «សូមមេត្តាលើកលែង និងចៀសវាងការខុសឆ្គងដែលនាំឱ្យប៉ះពាល់ដល់ជីវភាពរស់នៅប្រចាំថ្ងៃរបស់ប្រជាពលរដ្ឋ»ដែលមានតម្រូវការអាហារហូបចុក។

រាជរដ្ឋាភិបាលកម្ពុជា កាលពីសប្ដាហ៍មុន បានចាប់ផ្ដើមអនុវត្តការបិទខ្ទប់រាជធានីភ្នំពេញ និងទីក្រុងតាខ្មៅនៃខេត្តកណ្ដាលក្នុងរយៈពេល14ថ្ងៃ ដើម្បីទប់ស្កាត់ការឆ្លងរាលដាលនៃវីរុសCovid-19។ បទបញ្ជាដែលមានសុពលភាពចាប់ពីថ្ងៃទី15 ដល់ថ្ងៃទី28 ខែមេសា ឆ្នាំ2021នេះ ក៏មានករណីលើកលែងមួយចំនួនផងដែរ ពិសេសគឺពាក់ព័ន្ធនឹងអាហារហូបចុក សុខភាព រួមនឹងករណីចាំបាច់បន្ទាន់ជាច្រើនផ្សេងទៀត៕

ប្រភព៖ វិទ្យុជាតិកម្ពុជា
ដកស្រង់៖ បុត្រា

April 19, 2021

ធនាគារជាតិចិន លើកទឹកចិត្តពលរដ្ឋក្នុងការបង្កើតកូនចៅ ដើម្បីប្រជែងផ្នែកសេដ្ឋកិច្ចជាមួយសហរដ្ឋអាមេរិក និងឥណ្ឌា

ធនាគារប្រជាជនចិន (PBOC/People’s Bank of China) យល់ថា ប្រទេសនេះគួរតែ «ផ្ដល់សេរីភាពទាំងស្រុង និងលើកទឹកចិត្តឱ្យពលរដ្ឋបង្កើតកូនចៅ» ដើម្បីបង្កើនកម្លាំងពលកម្ម ដែលនឹងជួយទីក្រុងប៉េកាំង ក្នុងការប្រកូតប្រជែងបានជោគជ័យជាមួយនឹងបណ្ដាប្រទេស ក្នុងនោះរួមមានទាំងសហរដ្ឋអាមេរិក និងឥណ្ឌា នៅក្នុងវិស័យសេដ្ឋកិច្ច។

យោងតាមលទ្ធផលនៃការស្ទង់មតិដែលត្រូវបានប្រកាសកាលពីដើមសប្ដាហ៍កន្លង ទីភ្នាក់ងារសារព័ត៌មាន Sputnik បានរាយការណ៍ថា PBOC ព្យាករថា នៅក្នុងរយៈពេល 30ឆ្នាំខាងមុខ ចំនួនប្រជាជនចិនអាចថយចុះប្រមាណ 32លាននាក់ ខណៈដែលតួលេខពលរដ្ឋនៅសហរដ្ឋអាមេរិក អាចកើនបន្ថែម 50លាននាក់ នៅមុនដំណាច់ឆ្នាំ2049 ក្នុងនោះក៏មានពលរដ្ឋអន្តោប្រវេសន៍ដ៏ច្រើនសន្ធឹកសន្ធាប់។

ក្រុមអ្នកស្រាវជ្រាវក៏បានព្រមានថា កម្លាំងពលកម្មនៅប្រទេសចិននឹងត្រូវថយចុះក្នុងអំឡុងប៉ុន្មានទសវត្សរ៍ខាងមុខ ក្នុងគ្រាដែលសហរដ្ឋអាមេរិក នឹងបានឃើញការកើនឡើងនៃកម្លាំងពលកម្មនេះ។

នៅក្នុងលទ្ធផលនៃការស្រាវជ្រាវ ក្រុមអ្នកជំនាញបានបញ្ជាក់ថា៖ «ដើម្បីកាត់បន្ថយគម្លាតជាមួយនឹងសហរដ្ឋអាមេរិក នៅក្នុងអំឡុងបួនទសវត្សរ៍កន្លងទៅ ប្រទេសចិនពឹងផ្អែកទៅលើកម្លាំងពលកម្មដែលមានតម្លៃទាប និងចំនួនប្រជាជនដ៏ច្រើនសម្បើម។ យើងនឹងត្រូវផ្អែកទៅលើអ្វីខ្លះក្នុងរយៈពេល 30ឆ្នាំខាងមុខ? ប្រការនេះគួរឱ្យយើងយកមកពិចារណា»។

ពួកគេបានព្យាករថា នៅឆ្នាំ2030 ចំនួនប្រជាជនចិន អាចកើនដល់ចំណុចកំពូលបំផុត ប្រមាណ 1.46ពាន់លាននាក់ ហើយក្រោយមកនឹងថយចុះនៅត្រឹម 1.40ពាន់លាននាក់នៅឆ្នាំ2050។

PBOC ព្យាករថា នៅក្នុងរយៈពេល 30ឆ្នាំខាងមុខ ចំនួនប្រជាជនចិនអាចថយចុះប្រមាណ 32លាននាក់

ក្នុងគ្រានោះដែរ ប្រទេសឥណ្ឌា នឹងមានការកើនឡើងទាំងចំនួនប្រជាជន ទាំងកម្លាំងពលកម្ម។ ការស្រាវជ្រាវបានបង្ហាញថា មហាយក្សនៅអាស៊ីខាងត្បូងនេះអាចក្លាយជាប្រទេសដែលមានប្រជាជនច្រើនជាងគេបង្អស់ក្នុងពិភពលោកនៅឆ្នាំ2027។

ក្រុមអ្នកស្រាវជ្រាវបានជំរុញឱ្យរដ្ឋាភិបាលចិន «ស្វែងយល់អំពីការប្ដូរផ្លាស់ច្បាស់ក្រឡែតនៅចំពោះមុខស្ថានការណ៍» និងប្រញាប់កែប្រែគោលនយោបាយទាំងឡាយដែលទាក់ទងនឹងផែនការគ្រួសារ ដោយការអនុញ្ញាតឱ្យគ្រួសារនីមួយៗ អាច «បង្កើតកូនចាប់ពីបីនាក់ឡើងទៅ» រួមនឹងគំនិតផ្ដួចផ្ដើមដទៃទៀត។

ចិន បច្ចុប្បន្ននៅតែជាប្រទេសដែលមានប្រជាជនច្រើនជាងគេបង្អស់ក្នុងពិភពលោក ដោយមាន 1.43ពាន់លាននាក់។ ក្នុងអំឡុងច្រើនទសវត្សរ៍មកនេះ រដ្ឋាភិបាលបានអនុវត្តគោលនយោបាយគ្រប់គ្រងការបង្កើតកូនចៅយ៉ាងតឹងរ៉ឹង។ កាលពីឆ្នាំ2013 គោលនយោបាយខាងលើ ត្រូវបានបន្ធូរបន្ថយ ដោយរដ្ឋាភិបាលអនុញ្ញាតឱ្យគ្រួសារនីមួយៗ អាចយកកូនច្រើនបំផុតត្រឹមពីរនាក់។

កាលពីខែកុម្ភៈកន្លងទៅ ក្រសួងសន្តិសុខសាធារណៈនៃប្រទេសចិន (Ministry of Public Security of China) បានរាយការណ៍ថា តួលេខនៃទារកដែលកើតនៅប្រទេសនេះ បានថយចុះយ៉ាងតិច15% នៅក្នុងឆ្នាំ2020 ក្នុងគ្រាដែលវិបត្តិ Covid-19 និងឱនភាពសេដ្ឋកិច្ចកំពុងកើតឡើង៕

ប្រភព៖ SCMP
ប្រែសម្រួល៖ បុត្រា

April 19, 2021

រាជធានីភ្នំពេញ មានអ្នកស្លាប់ដោយសារ Covid-19 ចំនួន 2នាក់ នាថ្ងៃទី18មេសា

អ្នកជំងឺCovid-19 ទាំង 2នាក់ ដែលបានស្លាប់នេះ គឺជាបុរសជនជាតិខ្មែរ ក្នុងនោះមានម្នាក់នៅមណ្ឌលសុខភាពចាក់អង្រែ និងម្នាក់ស្លាប់នៅក្នុងមន្ទីរពេទ្យហ្លូងម៉ែ នាទីក្រុងភ្នំពេញ។

អ្នកជំងឺដែលបានស្លាប់នៅមណ្ឌលសុខភាពចាក់អង្រែ គឺជាបុរសអាយុ 49ឆ្នាំ ចំណែកករណីស្លាប់នៅមន្ទីរពេទ្យហ្លូងម៉ែ ជាបុរសវ័យ 55ឆ្នាំ។ ព័ត៌មានលម្អិត សូមបន្តអានរបាយការណ៍ខាងក្រោម៖

ប្រភព៖ ក្រសួងសុខាភិបាល
ដកស្រង់៖ បុត្រា

April 18, 2021

សហព័ន្ធស្រូវអង្ករ កម្ពុជា បន្តបញ្ចុះតម្លៃអង្ករ ដើម្បីចូលរួមប្រយុទ្ធប្រឆាំងនឹងCovid-19

សហព័ន្ធស្រូវ អង្ករ កម្ពុជា ដែលមានឈ្មោះជាភាសាអង់គ្លេសថា Cambodian Rice Federation បានចេញសេចក្តីប្រកាសព័ត៌មានស្តីពីការបញ្ចុះតម្លៃអង្ករ នៅក្នុងអំឡុងពេលនៃការបិទខ្ទប់ដើម្បីទប់ស្កាត់ការឆ្លងវាលដាលនៃវីរុសCovid-19។

សេចក្ដីប្រកាសព័ត៌មានបានឱ្យដឹងថា អង្ករក្នុង1បេដែលមានទម្ងន់ 50គីឡូក្រាម នឹងត្រូវបញ្ចុះតម្លៃចាប់ពី 10,000រៀល រហូតដល់ 20,000រៀល ដោយយោងទៅតាមប្រភេទ និងស្ដង់ដាបទដ្ឋានគុណភាពរបស់អង្ករដែលមាននៅក្នុងស្តុក។

សហព័ន្ធ Cambodian Rice Federation បានបញ្ជាក់ថា ការបញ្ចុះតម្លៃខាងលើនេះនឹងផ្ដើមអនុវត្តចាប់ពីពេលនេះ រហូតដល់ស្ថានការណ៍ Covid-19 បានធូរស្បើយឡើងវិញ។

ប្រភព៖ CRF
ដកស្រង់៖ បុត្រា

April 18, 2021

ពលរដ្ឋកម្ពុជានឹងត្រូវបានធ្វើតេស្តរហ័សដើម្បីរក Covid-19 ដោយប្រើឧបករណ៍ RapidTest ដែលស៊ីពេលតែ15នាទីដឹងលទ្ធផល

ក្រសួងសុខាភិបាលកម្ពុជា នឹងអនុវត្ដយុទ្ធនាការធ្វើតេស្ដរហ័សរកវីរុសCovid-19 ដោយប្រើប្រាស់ឧបករណ៍តេស្តរហ័ស RapidTest ដែលត្រូវបានក្រសួងអះអាងថា ប្រើពេលត្រឹមតែ15នាទីប៉ុណ្ណោះ នឹងដឹងលទ្ធផលភ្លាម។

នៅគ្រប់ទីតាំងដែលមានការសង្ស័យ ទាំងនៅរាជធានីភ្នំពេញ និងនៅតាមបណ្ដាលខេត្ត ក្រុង ដែលមានហានិភ័យខ្ពស់នៃការឆ្លងវីរុស Covid-19 នឹងត្រូវប្រើឧបករណ៍ធ្វើតេស្ដរហ័សរកវីរុស Covid-19 ដែលមានឈ្មោះថា « COVID-19 Ag RAPID TEST DEVICE » នេះបើតាមប្រសាសន៍របស់ លោកជំទាវ យក់ សម្បត្ដិ រដ្ឋលេខាធិការក្រសួងសុខាភិបាល។

លោកជំទាវ យក់ សម្បត្ដិ រដ្ឋលេខាធិការក្រសួងសុខាភិបាល

ការសម្រេចចិត្តខាងលើរបស់ក្រសួងសុខាភិបាល ក៏ព្រោះតែឧបករណ៍តេស្តរហ័ស RapidTest នេះ បង្ហាញលទ្ធផលបានលឿន ដោយប្រើពេលត្រឹមតែ15នាទី ព្រមទាំងមានគុណភាព និងប្រសិទ្ធភាពក្នុងការធ្វើតេស្តរកវីរុស Covid-19។ ការលើកឡើងនេះត្រូវបានលោកជំទាវ យក់ សម្បត្ដិ បញ្ជាក់ថា គឺធ្វើឡើងបន្ទាប់ពីបានឃើញប្រសិទ្ធិភាពនៃឧបករណ៍តេស្ដរហ័សនេះ កាលពីថ្ងៃទី17មេសា នៅពេលដែលក្រសួងបានយកឧបករណ៍នេះទៅធ្វើតេស្ដលើអ្នកសង្ស័យថាមានផ្ទុក Covid-19 នៅផ្សារដើមគរ។

រដ្ឋលេខាធិការក្រសួងសុខាភិបាលបានអះអាងដែរថា ឧបករណ៍ RapidTest និងម៉ាស៊ីនធំប្រចាំវិទ្យាស្ថានប៉ាស្ទ័រ បានបង្ហាញលទ្ធផលដូចគ្នា ពោលគឺបានរកឃើញ 91នាក់មានផ្ទុក Covid-19 នៅក្នុងចំណោមអ្នកជាប់សង្ស័យជាង 940នាក់ដែលបានធ្វើតេស្ត៕

ប្រភព៖ ក្រសួងព័ត៌មាន
ដកស្រង់៖ បុត្រា

April 18, 2021

អ្នកជួបបញ្ហាខ្វះខាតស្បៀងអាហារបន្ទាន់ក្នុងអំឡុងជាប់ក្នុងការបិទខ្ទប់ អាចស្នើសុំជំនួយទៅកាន់ “គ.ប.ខ.” តាមបណ្ដាញសង្គម Telegram

គណៈកម្មការជាតិគ្រប់គ្រង និងដឹកនាំការអនុវត្តវិធានការបិទខ្ទប់ “គ.ប.ខ.” បានចេញសេចក្ដីជូនដំណឹងថ្មីមួយដល់សាធារណជន ទាក់ទងនឹងការផ្ដល់ជំនួយជាស្បៀងអាហារដល់ពលរដ្ឋដែលមានតម្រូវការបន្ទាន់។

ការជូនដំណឹងនេះ បានបញ្ជាក់ថា ប្រសិន ប្រសិនបងប្អូនប្រជាពលរដ្ឋកំពុងជួបប្រទះបញ្ហាខ្វះខាតស្បៀងអាហារប្រចាំថ្ងៃចាំបាច់ជាបន្ទាន់ នៅក្នុងអំឡុងពេលនៃការបិទខ្ទប់ដោយសារ Covid-19 សូមបងប្អូនជូនដំណឹងមកគណៈកម្មការជាតិគ្រប់គ្រង និងដឹកនាំការអនុវត្តវិធានការបិទខ្ទប់ “គ.ប.ខ.” តាមរយៈក្រុមតេឡេក្រាម (Telegram) ដែលមានឈ្មោះថា “តម្រូវការបន្ទាន់នូវជំនួយស្បៀងចាំបាច់(គ.ប.ខ.)” ដោយបញ្ជាក់អោយបានច្បាស់លាស់អំពី៖

1.ចំនួនគ្រួសារ និងសមាជិកគ្រួសារ (សូមភ្ជាប់ទាំងរូបថតផងដែរ)

2.ទីតាំងស្នាក់នៅ៖ ផ្ទះ….. ផ្លូវ…. សង្កាត់…. ខ័ណ្ឌ…..

3.លេខទូរស័ព្ទទំនាក់ទំនង………………. ។

សូមចុចចូលក្នុង link Group Telegram “តម្រូវការបន្ទាន់នូវជំនួយស្បៀងចាំបាច់(គ.ប.ខ.)” ខាងក្រោម៖

គណៈកម្មការជាតិគ្រប់គ្រង និងដឹកនាំការអនុវត្តវិធានការបិទខ្ទប់ “គ.ប.ខ.”

ប្រភព៖ ក្រសួងព័ត៌មាន
ដកស្រង់៖ បុត្រា

April 18, 2021

រដ្ឋបាលរាជធានីភ្នំពេញ រៀបចំ Group លើបណ្ដាញសង្គម Telegram ដើម្បីទទួលពាក្យស្នើសុំលិខិតធ្វើដំណើររបស់ប្រជាពលរដ្ឋដែលមានតម្រូវការចាំបាច់បំផុត

Group នៅលើបណ្ដាញសង្គម Telegram (Group Telegram) ដែលរដ្ឋបាលរាជធានីភ្នំពេញ បានរៀបចំនេះ មានឈ្មោះថា “ក្រុមការងារចេញលិខិតអនុញ្ញាតធ្វើដំណើរ”។ ក្រុមនេះបម្រើដល់គោលបំណងផ្តល់សិទ្ធិក្នុងការធ្វើដំណើរជូនដល់អ្នកដែលមានភារកិច្ចចំបាច់បំផុត ដូចចែងក្នុងករណីលើកលែងនៃប្រកា2ថ្មី និងប្រកា3ថ្មី នៃសេចក្តីសម្រេចលេខ 50 ចុះថ្ងៃទី17 ខែមេសា ឆ្នាំ2021 ស្តីពីការអនុវត្តវិធានការក្នុងអំឡុងពេលបិទខ្ទប់ក្នុងភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល។

អ្នកដែលមានភារកិច្ចចាំបាច់បំផុត និងមានចែងក្នុងករណីលើកលែង ដែលមានបំណងស្នើសុំលិខិតអនុញ្ញាតធ្វើដំណើរ អាចសាកសួរព័ត៌មានបន្ថែម និងបំពេញពាក្យស្នើសុំតាមក្រុម Telegram ប្រចាំខណ្ឌទាំង14 ដែលមានតំណភ្ជាប់ដូចខាងក្រោម៖

-រដ្ឋបាលរាជធានីភ្នំពេញ៖ https://t.me/ppenhcityhall

-រដ្ឋបាលខណ្ឌចំការមន https://t.me/ppchamkarmon

-រដ្ឋបាលខណ្ឌដូនពេញ https://t.me/ppdaunpenh

-រដ្ឋបាលខណ្ឌ៧មករា https://t.me/pp7makara

-រដ្ឋបាលខណ្ឌទួលគោក https://t.me/pptoulkork

-រដ្ឋបាលខណ្ឌដង្កោ https://t.me/ppdangkour

-រដ្ឋបាលខណ្ឌមានជ័យ https://t.me/ppmeanchey

-រដ្ឋបាលខណ្ឌឫស្សីកែវ https://t.me/pprussiekeo

-រដ្ឋបាលខណ្ឌសែនសុខ https://t.me/ppsensok

-រដ្ឋបាលខណ្ឌពោធិ៍សែនជ័យ https://t.me/ppsenchey

-រដ្ឋបាលខណ្ឌជ្រោយចង្វារ https://t.me/ppchroychongva

-រដ្ឋបាលខណ្ឌព្រែកព្នៅ https://t.me/ppprekpnov

-រដ្ឋបាលខណ្ឌច្បារអំពៅ https://t.me/ppchbarompov

-ខណ្ឌបឹងកេងកង https://t.me/ppbkk1

-ខណ្ឌកំបូល https://t.me/ppkamboul

April 18, 2021

បើកអាថ៌កំបាំង បាល់ទាត់ពិភពលោកកាតារ៍ សម្លាប់ជីវិត “ពលករ” អស់ 6,500នាក់ហើយ

សារព័ត៌មាននៃប្រទេសអង់គ្លេស បានបើកកកាយអាថ៌កំបាំង ស្ដីពីជីវិតពលករចំណាកស្រុកនៅក្នុងប្រទេសកាតារ៍ ដែលធ្វើការងារ ពាក់ព័ន្ធនឹងភាពត្រៀមរួចជាស្រេច ក្នុងការរៀបចំព្រឹត្តិការណ៍បាល់ទាត់ពិភពលោក2022 ឬ World Cup 2022 ដែលបានយកជីវិតទៅចោល នៅក្នុងដែនដីមជ្ឈិមបូព៌ា អស់រួចហើយជាង 6,500នាក់ ជាពិសេសពលករដែលទៅពីប្រទេសក្នុងតំបន់អាស៊ីខាងត្បូង ដោយឯកសារផ្លូវការ បានបញ្ជាក់ថា ភាគច្រើនបណ្ដាលមកពីមូលហេតុខាងធម្មជាតិ។

សារព័ត៌មាន “ដឹ ហ្គាដៀន” ប្រព័ន្ធផ្សព្វផ្សាយដ៏ល្បីល្បាញរបស់ប្រទេសអង់គ្លេស បានបង្ហាញពីលទ្ធផលនៃការស្រាវជ្រាវ ដែលបានរកឃើញថា គិតចាប់តាំងពី ប្រទេសកាតារ៍ បានទទួលសិទ្ធិធ្វើជាម្ចាស់ផ្ទះរៀបចំព្រឹត្តិការណ៍បាល់ទាត់ពិភពលោក2022 កាលពីឆ្នាំ2011 រហូតមកដល់អំឡុងចុងឆ្នាំ2020 កន្លងមក មានពលករចំណាកស្រុក ដែលធ្វើការពាក់ព័ន្ធនឹងការត្រៀមខ្លួនធ្វើជាម្ចាស់ផ្ទះនេះ មិនថាតែការកសាងកីឡដ្ឋាន, ទីលានបាល់ទាត់ ឬហេដ្ឋារចនាសម្ព័ន្ធផ្សេងៗនោះទេ បានសម្លាប់ជីវិតមនុស្សរួចហើយ អស់ជាង 6,500នាក់ នេះរាប់ចំពោះតែពលករ ដែលទៅពីប្រទេសក្នុងតំបន់អាស៊ីខាងត្បូងប៉ុណ្ណោះ ឬគិតជាមធ្យម គឺស្លាប់ក្នុង 1សប្ដាហ៍ដល់ទៅ 12នាក់ឯណោះ។

របាយការណ៍របស់ដឹ ហ្គាដៀន បានយោងតាមតួលេខផ្លូវការរបស់ប្រទេសកាតារ៍ ដែលបានបញ្ជាក់ថា ក្នុងចំនួនពលករមកពីអាស៊ីខាងត្បូងជាង 6,500នាក់ដែលបានស្លាប់ ក្នុងអំឡុងជិត 1ទសវត្សរ៍កន្លងទៅនោះ ចែកចេញជា ពលករទៅពីប្រទេសឥណ្ឌា 2,711នាក់ ពីនេប៉ាល់ 1,461នាក់ ពីបង់ក្លាដែស 1,018នាក់ ពីប៉ាគីស្ថាន 824នាក់ និងទៅពីស្រីលង្កា 557នាក់ ដោយការរកឃើញនេះ នៅមិនទាន់រួមជាមួយពលករ ទៅពីភូមិភាគផ្សេងទៀត ដូចជាពលករទៅពីទ្វីបអាហ្វ្រិក ជាពិសេសប្រទេសឃេនយ៉ា រួមទាំងភូមិភាគផ្សេងៗរបស់ទ្វីបអាស៊ី ដូចជាពលករហ្វ៊ីលីពីន ដែលមានចំនួនដ៏ច្រើនមហាសាលដូចគ្នា។ តែយ៉ាងណាក៏ដោយ រដ្ឋបាលនៃប្រទេសកាតារ៍ បានបញ្ជាក់ថា ចំនួនពលករដែលស្លាប់នេះ ត្រូវបានចាត់ទុកថា ជាចំណែកមួយដែលប្រក្រតី បើប្រៀបធៀបនឹងអំឡុងពេល 1ឆ្នាំៗនៃចំនួនពលករបរទេសដែលចូលមកធ្វើការនៅក្នុងប្រទេសមួយនេះ។

ក្រៅពីនេះ សារព័ត៌មានល្បីរបស់ប្រទេសអង់គ្លេសមួយនេះ ថែមទាំងបានបញ្ជាក់ទៀតផងថា តាមដែលអាចស្រាវជ្រាវរកឃើញនោះ មាន 37នាក់ បានស្លាប់ក្នុងខណៈប្រតិបត្តិការងារ ក្នុងការកសាងទីលានបាល់ទាត់ថ្មីទាំង 7កន្លែង ដែលម្ចាស់ផ្ទះ ត្រៀមទុកសម្រាប់រៀបចំការប្រកួត World Cup 2022 ផ្ទាល់តែម្ដង ខណៈដែលអ្នកស្លាប់ភាគច្រើន គឺជាពលករដែលធ្វើការក្នុងគ្រោងការដែលពាក់ព័ន្ធនឹងព្រឹត្តិការណ៍បាល់ទាត់ពិភពលោក ខណៈដែលមូលហេតុនៃការស្លាប់ទាំងអស់នោះ មានតាំងពី ការត្រូវវត្ថុរឹងបុកប៉ះ ការខ្វះខ្យល់ដកដង្ហើម រហូតដល់ការចងកសម្លាប់ខ្លួន តែមូលហេតុភាគច្រើន ដែលបានបញ្ជាក់នៅក្នុងឯកសារផ្លូវការនោះគឺ ការស្លាប់ដោយសារមូលហេតុធម្មជាតិភាគច្រើន មិនថាតែគាំងបេះដូង ឬមូលហេតុបណ្ដាលមកពី សភាពធាតុអាកាស ដែលក្ដៅខ្លាំងរបស់ប្រទេសកាតារ។

ទាំងអស់នេះ ប្រទេសកាតារ៍ រួមទាំងប្រទេសជាច្រើនទៀតនៅក្នុងភូមិភាគមជ្ឈិមបូព៌ា ត្រូវបានចាត់ទុកថា ជាប្រទេសដែលពឹងពាក់លើពលករបរទេសជាចម្បង ក្នុងចំនួនប្រជាជន 2.6លាននាក់នោះ មានអ្នកដែលមានសញ្ជាតិកាតារ៍ តែប្រមាណជា 313,000នាក់ប៉ុណ្ណោះ ចំណែក 2.3លាននាក់ទៀត ជាពលករចំណាកស្រុកបរទេស ដោយកាលពីពេលមុននេះ ប្រទេសនៅពីដែនដីមជ្ឈិមបូព៌ាមួយនេះ តែងតែត្រូវបានគេសង្ស័យ ពីរឿងការប្រតិបត្តិចំពោះពលករចំណាកស្រុកបរទេស រួមទាំងរឿងសិទ្ធិមនុស្សជាបន្តបន្ទាប់ផងដែរ៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 18, 2021

អ្នកស្លាប់ដោយសារCovid-19 នៅកម្ពុជា កើនដល់43នាក់ ខណៈអ្នកវិជ្ជមានសរុបឡើងដល់6,389នាក់

នាព្រឹកថ្ងៃទី 18មេសា ឆ្នាំ2021 ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 618នាក់ទៀត ក្នុងអំឡុង 24ម៉ោងនៃថ្ងៃទី 17មេសា ឆ្នាំ2021។

អ្នកវិជ្ជមានថ្មីទាំង 618នាក់ខាងលើនេះ សុទ្ធតែជាករណីពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី 17មេសាដដែល កម្ពុជាក៏មានអ្នកជំងឺCovid-19 ចំនួន 60នាក់បានជាសះស្បើយ និងមានអ្នកស្លាប់ថ្មីចំនួន 4នាក់។

គិតមកដល់ព្រឹកនេះ (18មេសា) ទូទាំងប្រទេសកម្ពុជា អ្នកឆ្លងCovid-19 សរុបឡើងដល់ 6,389នាក់ ក្នុងនោះមានអ្នកជាសះស្បើយសរុប 2,476នាក់, អ្នកស្លាប់ 43នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 3,865នាក់៕

April 18, 2021

WHO ៖ កូវីដឥណ្ឌា ក្លាយពូជ 2ជាន់ អាចចម្លងរាលដាលលឿន…

នៅថ្ងៃទី17 មេសា ម្សិលមិញ ទីភ្នាក់ងារព័ត៌មាន Reuters បានរាយការណ៍ថា លោកនាយករដ្ឋមន្ត្រី ណារិនដ្រា ម៉ូឌី មេដឹកនាំនៃប្រទេសឥណ្ឌា បានសំណូមពរដល់អ្នកបួស និងប្រជាជនហិណ្ឌូជាច្រើនសែននាក់ ដែលមកជួបជុំប្រមូលផ្ដុំគ្នា ងូតទឹកនៅឯដងទន្លេគង្គា ភាគខាងជើងនៃប្រទេស ដើម្បីលាងជម្រះបាប នៅក្នុងពិធីមហាគុម្ភៈមេឡា តាមជំនឿសាសនាព្រាហ្ម-ហិណ្ឌូ សូមឱ្យផ្អាកធ្វើពិធីនេះសិន។

ក្រោមស្ថានការណ៍មានអ្នកឆ្លងមេរោគប្រចាំថ្ងៃ លើស 200,000នាក់ ជាប់ៗគ្នា រយៈពេល 3ថ្ងៃមកហើយនោះ មានអ្នកឆ្លងមេរោគថ្មីក្នុងជុំ 24ម៉ោងចុងក្រោយ ស្ថិតក្នុងចំនួន 234,692នាក់ ធ្វើឱ្យចំនួនសរុប កើនឡើងដល់ជិត 14.5លាននាក់ តាមក្រោយតែសហរដ្ឋអាមេរិកមួយប៉ុណ្ណោះ ចំណែកចំនួនអ្នកស្លាប់វិញ កើនឡើងដល់ 175,649នាក់។

លោកនាយករដ្ឋមន្ត្រី ម៉ូឌី បានធ្វីតធើរសំណេរថា ពិធីនេះ ពេលនេះ គួរធ្វើជាលក្ខណៈនិមិត្តរូបវិញប្រសើរជាង ខណៈមេដឹកនាំសាសនា បានឯកភាពចំពោះសំណើនេះ និងអំពាវនាវឱ្យប្រជាជន កុំមកប្រមូលផ្ដុំគ្នា។

ទាំងអស់នេះ រដ្ឋបាលឥណ្ឌា ធ្លាប់ត្រូវរងការរិះគន់ ពាក់ព័ន្ធនឹងការចាត់ការលើវិបត្តិសុខភាពសាធារណៈ ដោយសារតែរដូវកាលសាសនា និងយុទ្ធនាការឃោសនាបោះឆ្នោត ដែលនៅតែបន្តដំណើរការ បើទោះជាមានរបាយការណ៍ អំពីការខ្វះខាតគ្រែអ្នកជំងឺ ធុងខ្យល់អុកស៊ីហ្ស៊ែន និងវ៉ាក់សាំងការពារកូវីដ-19ក៏ដោយ។

ជាពិសេស ការឃោសនារកសំឡេងឆ្នោត របស់លោកនាយករដ្ឋមន្ត្រី ម៉ូឌីខ្លួនឯង 2លើក នៅក្នុងរដ្ឋបេងហ្គាលខាងលិច ដែលនឹងមានការបោះឆ្នោតថ្នាក់រដ្ឋ ដែលមានអ្នកគាំទ្រចូលរួមជាច្រើនពាន់នាក់ តែមានមនុស្សចំនួនតិចតួចបំផុត ដែលប្រតិបត្តិតាមវិធានការសុវត្ថិភាពពីកូវីដ-19។

នៅថ្ងៃជាមួយគ្នា ទីភ្នាក់ងារព័ត៌មាន ប្ល៊ូមប៊ើក បានរាយការណ៍ថា អង្គការសុខភាពពិភពលោក ឬ WHO បានបញ្ជាក់ថា វីរុសកូរ៉ូណាប្រភេទដែលបង្កឱ្យកើតជំងឺកូវីដ-19 ប្រភេទក្លាយពូជ B.1.617 ដែលចាប់កំណើតឡើងនៅក្នុងប្រទេសឥណ្ឌា អាចមានសមត្ថភាពក្នុងការចម្លងរាលដាលបានយ៉ាងលឿន និងឆាប់រហ័ស។

លោកស្រី ម៉ារៀ វែន ឃើខូហ្វ ប្រធានផ្នែកតិចនិកកូវីដ-19 របស់ WHO បានថ្លែងថា ក្រុមអ្នកស្រាវជ្រាវ ជីណូមកូវីដ-19 នៃប្រទេសឥណ្ឌា (INSACOG) បានបង្ហើបឱ្យដឹងថា B.1.617 បានបង្ហាញខ្លួនលើកដំបូងក្នុងប្រទេសឥណ្ឌា កាលពីថ្ងៃទី7 ធ្នូ ឆ្នាំ2020 មានការក្លាយពូជលក្ខណៈពិសេសដោយឡែក 2ជាន់ មាន E484Q និង L452R ជារូបបែប ដែលរកឃើញនៅក្នុងប្រភេទវីរុស ដែលកំពុងឆ្លងរាលដាលដ៏ធំ និងបានដាក់ការសង្កេតឃើញថា B.1.617 កំពុងសាយភាយទៅក្នុងប្រទេសជាច្រើន និងមានរបាយការណ៍ អំពីការពិនិត្យរកឃើញនៅទូទាំងទ្វីបអាស៊ី និងអាមេរិកខាងជើងទៀតផង។

យ៉ាងណាក្ដី WHO បានចាត់ទុកវីរុសក្លាយពូជ 2ជាន់នេះ ជាមេរោគដែលត្រូវតែតាមស៊ើបអង្កេត ឬជាមេរោគដែលមិនទាន់អាចពិសោធបានយ៉ាងច្បាស់លាស់នៅឡើយ តែត្រូវចាប់ផ្ដើមប្រុងប្រយ័ត្នយ៉ាងដិតដល់ និងមិនទាន់អាចបញ្ជាក់អំពីភាពចាំបាច់ ត្រូវលើកកម្ពស់កម្រិតការដំណើរការ ខាងសុខភាពសាធារណៈ ដែរឬទេនៅឡើយ។

ខណៈដែលក្រសួងសុខាភិបាលនៃប្រទេសឥណ្ឌា ចេញសេចក្ដីថ្លែងការណ៍ជាផ្លូវការថា B.1.617 អាចបង្កើនអត្រាការឆ្លងមេរោគ និងអាចបែកធ្លាយចេញពីប្រព័ន្ធប្រឆាំងជំងឺរបស់រាងកាយបាននោះ ក្រសួងសុខាភិបាលរបស់ប្រទេសអ៊ីស្រាអែល ក៏បានថ្លែងពីការរកឃើញ B.1.617 លើកដំបូងក្នុងប្រទេសដែរ ដោយមានអ្នកឆ្លងមេរោគថ្មីនេះ ជាជនជាតិអ៊ីស្រាអែល ចំនួន 7នាក់ ធ្វើដំណើរមកពីក្រៅប្រទេស ហើយទាំងអស់នោះ សុទ្ធតែមិនទាន់បានចាក់វ៉ាក់សាំងទាំងអស់៕

ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា

April 18, 2021

Author: សឿន សំណាង