សឿន សំណាង - La Reine Media

សហរដ្ឋអាមេរិក ដាស់តឿនតួរគី មិនគួរទិញអាវុធពីរុស្ស៊ី ថែមទៀតទេ!

មន្ត្រីលំដាប់ខ្ពស់ ផ្នែកការទូតរបស់សហរដ្ឋអាមេរិក បានថ្លែងថា តួរគី និងសម្ព័ន្ធមិត្តទាំងអស់ របស់រដ្ឋាភិបាលក្រុងវ៉ាស៊ីនតោន” មិនគួរទិញអាវុធរបស់ប្រទេសរុស្ស៊ីបន្ថែមទៀតឡើយ ព្រោះមានភាពប្រឈមខ្ពស់ក្នុងការត្រូវរងទណ្ឌកម្មសេដ្ឋកិច្ច ក្រោយពីរដ្ឋបាលក្រុងអង់ការ៉ា ត្រៀមទិញប្រព័ន្ធ S-400 ឈុតទី2។

ទីភ្នាក់ងារព័ត៌មានអន្តរជាតិ បានរាយការណ៍ពីទីក្រុងវ៉ាស៊ីនតោន ប្រទេសអាមេរិក កាលពីថ្ងៃទី29 មេសាថា លោក អ៊ែនថូនី ប្ល៊ីងខេន រដ្ឋមន្ត្រីក្រសួងការបរទេសសហរដ្ឋអាមេរិក បានថ្លែងកាលពីថ្ងៃពុធកន្លងមក ពាក់ព័ន្ធនឹងសម្ព័ន្ធភាពរវាងរដ្ឋបាលក្រុងវ៉ាស៊ីនតោន ជាមួយប្រទេសតួរគី ដែលតានតឹងឡើងជាបន្តបន្ទាប់ តាំងពីសម័យរដ្ឋបាលរបស់លោកប្រធានាធិបតី ដូណាល់ ត្រាំ ថា រដ្ឋបាលក្រុងអង់ការ៉ា គឺជាសមាជិក 1រូប ក្នុងចំណោមសមាជិកដែលអាចហៅបានថា ជាកម្លាំងចម្បងរបស់ អង្គការ NATO ហើយសហរដ្ឋអាមេរិក សង្ឃឹមយ៉ាងខ្លាំងបំផុតថា នឹងអាចរិះរកវិធីដោះស្រាយបញ្ហាទំនាស់ជាច្រើនរឿងជាមួយប្រទេសតួរគីបាន។

ម្យ៉ាងទៀត សម្ព័ន្ធភាពរវាងសហរដ្ឋអាមេរិក ជាមួយប្រទេសតួរគី កំពុងប្រឈមនឹងបទសាកល្បងមួយថ្មីបំផុត នៅពេលដែលលោកប្រធានាធិបតី ចូ បៃដិន បានប្រកាសកាលពីពេលថ្មីៗនេះថា ហេតុការណ៍ក្នុងប្រវត្តិសាស្ត្រសង្គ្រាមលោកលោកលើកទី1 ដែលមានការសម្លាប់ជនជាតិអាមេនី 1.5លាននាក់ ដោយកងទ័ពចក្រពត្តិ Ottoman ក្នុងឆ្នាំ1915 ដល់ឆ្នាំ1923 “គឺជាការសម្លាប់ប្រល័យពូជសាសន៍” ដោយមេដឹកនាំសហរដ្ឋអាមេរិក បានបញ្ជាក់ក្នុងរឿងនេះថា “ជាការទទួលស្គាល់ការពិតខាងប្រវត្តិសាស្ត្រ” និង “មិនមែនជាការថ្កោលទោសនរណាម្នាក់ឡើយ” តែជា “ការសាងភាពជឿជាក់” ដល់គ្រប់ភាគីដែលពាក់ព័ន្ធផងដែរថា នឹងមិនកើតមានហេតុការណ៍បែបនោះទៀត។

យ៉ាងណាក៏ដោយ លោកប្ល៊ីងខេន បានថ្លែងថា ប្រទេសតួរគី នៅតែ “ប្រឈមនឹងភាពប្រថុយប្រថាន” ក្នុងការត្រូវរងទណ្ឌកម្មសេដ្ឋកិច្ចបន្ថែមទៀតពីសហរដ្ឋអាមេរិក ប្រសិនបើរដ្ឋបាលក្រុងអង់ការ៉ា នៅតែដំណើរការកិច្ចសហការខាងអាវុធជាមួយរុស្ស៊ី ក្រោយពីទាំង 2ភាគី បានអះអាងពីការចរចាពាក់ព័ន្ធនឹងការទិញប្រព័ន្ធការពារខាងអាកាស S-400 ឈុតទី2 ដែលលោកប្ល៊ីងខេនថ្លែងថា ប្រទេសតួរគី និង “សម្ព័ន្ធមិត្តទាំងអស់របស់សហរដ្ឋអាមេរិក” មិនគួរពាក់ព័ន្ធជាមួយអាវុធប្រភេទនេះទេ។

ទាំងអស់នេះ រដ្ឋបាលសហរដ្ឋអាមេរិក ក្នុងយុគសម័យលោក ត្រាំ បានប្រើអំណាចតាមច្បាប់ស្ដីពី “ការតបតសត្រូវរបស់អាមេរិក តាមរយៈវិធានការទណ្ឌកម្មសេដ្ឋកិច្ច” (CAATSA) ឱ្យមានសុពលភាពលើរដ្ឋបាលតួរគី របស់លោកប្រធានាធិបតី រេសិប តៃយិប អេរដូហ្គែន កាលពីខែធ្នូ ឆ្នាំទៅ ដោយសារករណីដែលរដ្ឋបាលក្រុងអង់ការ៉ា បានកុម្ម៉ង់ទិញប្រព័ន្ធ S-400 ឈុតដំបូង កាលពីឆ្នាំ2019 ដោយហេតុផលថា អាវុធប្រភេទនេះ “មិនស៊ីចង្វាក់គ្នា” ជាមួយតិចណូឡូជី ដែលប្រើនៅក្នុងចំណោមសមាជិកណាតូ ហើយប្រព័ន្ធ S-400 “គឺជាគ្រោះភ័យរុករាន” ដល់ស្ថិរភាពការធ្វើជាសម្ព័ន្ធមិត្តខាងយោធា ឆ្លងមហាសមុទ្រអាត្លង់ទិក រវាងទ្វីបអឺរ៉ុប ជាមួយអាមេរិក៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 30, 2021

ធ្លាក់យន្តហោះនៅប្រទេសម៉ិកស៊ិក! មនុស្សជាច្រើននាក់បានបាត់បង់ជីវិត

អាជ្ញាធររដ្ឋ Nuevo Leon ភាគខាងជើងនៃប្រទេសម៉ិកស៊ិក ថ្មីៗនេះ បានប្រកាសថា មានករណីធ្លាក់យន្តហោះធុនស្រាលមួយគ្រឿង កាលពីព្រឹកថ្ងៃទី29 ខែមេសា ឆ្នាំ2021 នៅក្នុងតំបន់របស់ខ្លួន បណ្ដាលឱ្យមនុស្សចំនួន 6នាក់ បាត់បង់ជីវិត។

យន្តហោះស៊េរី Piper PA32 Cherokee មួយគ្រឿងនេះ បានធ្លាក់លើផ្លូវជាតិ Laredo ស្ថិតក្នុងតំបន់ Cienega de Flores ក្បែរព្រលានយន្តហោះអន្តរជាតិ Del Norte និងបុកទៅលើការិយាល័យនៃក្រុមហ៊ុនដឹកជញ្ជូនមួយនៅតំបន់នេះ។

ជនរងគ្រោះដែលបានស្លាប់នៅក្នុងហេតុការណ៍ខាងលើ រួមមាន បុរសចំនួន 3នាក់ និងស្ត្រីចំនួន 3នាក់។ ក្រៅពីនេះ ឧបទ្ទវហេតុនេះក៏បានបណ្ដាលឱ្យមនុស្សម្នាក់កំពុងបើកបរយានជំនិះនៅលើផ្លូវជាតិ ត្រូវរងរបួសធ្ងន់ផងដែរ។

ក្រុមមន្ត្រីមានសមត្ថកិច្ច នៃតំបន់ Cienega de Flores បានមកដល់កន្លែងកើតហេតុ ដើម្បីស្រាវជ្រាវរកមូលហេតុដែលនាំឱ្យមានគ្រោះថ្នាក់ ដ៏គួរឱ្យរន្ធត់នេះ៕

ប្រភព៖ UNI
ប្រែសម្រួល៖ បុត្រា

April 30, 2021

ប្លែក! នារីគ្រប់រូបនៅតំបន់នេះ ត្រូវតែមានដៃគូស្នេហា គ្រប់20នាក់ ទើបមានសិទ្ធិយកប្ដី

យោងតាមទំនៀមទម្លាប់បុរាណរបស់ជនជាតិនេះ គ្រួសារខាងប្ដី នឹងត្រូវជួបឧបទ្រពចង្រៃ បើសិនជាបានរៀបការនឹងនារីដែលនៅមានព្រហ្មចារី។

ខាងលើនេះគឺជាទំនៀមទម្លាប់របស់កុលសម្ព័ន្ធមួយនៅតំបន់ខ្ពង់រាបទីបេ (Tibetan Plateau) ជាតំបន់ខ្ពស់បំផុតរបស់ពិភពលោក ភូមិភាគដែលស្ថិតនៅក្នុងទឹកដីរបស់ប្រទេសនេប៉ាល់។

នារីទាំងឡាយណា ដែលរៀបការមុនពេលបាត់បង់ព្រហ្មចារី ត្រូវបានគេចាត់ទុកថាជារឿងឧបទ្រពចង្រៃ សម្រាប់គ្រួសារខាងស្វាមី។ ដូច្នេះ ប្រការនេះត្រូវបានគេតមគ្រប់ៗគ្នា។

នារីដែលចង់មានស្វាមី ត្រូវតែមានសម្ព័ន្ធភាពស្នេហាជាមួយបុរស ឱ្យបានគ្រប់ 20នាក់ ទើបត្រូវបានគេផ្ដល់លិខិតបញ្ជាក់ថា មានសុខភាពល្អគ្រប់គ្រាន់ ដែលអាចយកប្ដីបាន។

យោងតាមការយល់ឃើញរបស់កុលសម្ព័ន្ធនេះ ទម្លាប់នេះរបស់ពួកគេគឺ ដើម្បីហ្វឹកហាត់កម្លាំងស៊ូទ្រាំរបស់ស្ត្រី នៅពេលទៅតាមស្វាមី និងរស់នៅក្នុងគ្រួសារខាងម្ដាយក្មេក។

តាមជាក់ស្ដែង ជំនឿខាងលើនេះ បាន និងកំពុងតែធ្វើឱ្យពួកគេ ពិសេសគឺស្ត្រី ត្រូវក្លាយជាទាសករផ្លូវភេទគួរឱ្យអាម៉ាស់។ ក្រៅពីនេះ កុលសម្ព័ន្ធនៅតំបន់ខ្ពង់រាបទីបេនេះ ក៏នៅមានទំនៀមទម្លាប់ «នំមិនធំជាងនាលិ» នៅក្នុងរឿងអាពាហ៍ពិពាហ៍របស់កូនចៅផងដែរ៕

ប្រភព៖ Jimmynelson
ប្រែសម្រួល៖ បុត្រា

April 30, 2021

លែងនៅហើយ!! ស.រ.អា ជូនដំណឹងបន្ទាន់ ឱ្យពលរដ្ឋរបស់ខ្លួន ចេញពីឥណ្ឌាភ្លាមៗ ខណៈវិបត្តិជំងឺឆ្លងនេះ កាន់តែធ្ងន់ធ្ងរឡើងៗ

សហរដ្ឋអាមេរិក កាលពីថ្ងៃព្រហស្បតិ៍ ទី29 មេសា បានប្រកាសប្រាប់ពលរដ្ឋរបស់ខ្លួន ឱ្យធ្វើដំណើរចាកចេញពីប្រទេសឥណ្ឌាឱ្យបានលឿនបំផុត តាមដែលអាចធ្វើទៅបាន ក្នុងខណៈដែលប្រទេសមួយនេះ កំពុងប្រឈមនឹងស្ថានការណ៍ ដ៏កាន់តែអាក្រក់ឡើងៗជាបណ្ដើរៗ ដោយសារការឆ្លងរាលដាលរបស់វីរុសកូរ៉ូណាប្រភេទថ្មី។

ប្រទេសឥណ្ឌា បានរាយការណ៍ពីការរកឃើញអ្នកឆ្លងមេរោគកូវីដ-19ថ្មីប្រចាំថ្ងៃ ចំនួន 379,257នាក់ នៅថ្ងៃព្រហស្បតិ៍ ទី29មេសា ជាស្ថិតិអ្នកឆ្លងមេរោគថ្មីក្នុង 1ថ្ងៃ ខ្ពស់ជាងគេបំផុតក្នុងពិភពលោក ក្រោយពីពេលមុនហ្នឹង ចំនួនអ្នកស្លាប់សរុបជាផ្លូវការរបស់ប្រទេសឥណ្ឌា ទើបតែកើនឡើងលើស 200,000នាក់ កាលពីថ្ងៃពុធ មុនហ្នឹង 1ថ្ងៃ ក្រោមការប្រកាសអាសន្នរបស់អ្នកជំនាញការ ដែលជឿថា តួលេខពិតប្រាកដ អាចនឹងច្រើនជាងនេះខ្លាំង។

ស្ថានទូតសហរដ្ឋអាមេរិក ប្រចាំប្រទេសឥណ្ឌា បានប្រកាសថា “ការចូលដល់ការព្យាបាលខាងវេជ្ជសាស្ត្រគ្រប់រូបបែប កំពុងឈានចូលដល់កម្រិតមានកំណត់យ៉ាងធ្ងន់ធ្ងរ” ខណៈដែលក្រសួងការបរទេសបានលើកកម្ពស់ការណែនាំផ្នែកការធ្វើដំណើរនៅក្នុងប្រទេសឥណ្ឌា ឆ្ពោះទៅរកកម្រិត4 ដែលជាកម្រិតខ្ពស់បំផុត ប្រកាសឱ្យពលរដ្ឋអាមេរិកាំង ផ្អាកការធ្វើដំណើរនៅក្នុងប្រទេសឥណ្ឌា ឬចាកចេញពីប្រទេសឥណ្ឌា ឱ្យបានលឿនបំផុត តាមដែលអាចធ្វើទៅបានយ៉ាងមានសុវត្ថិភាព។

“ពលរដ្ឋសហរដ្ឋអាមេរិក ដែលមានបំណងធ្វើដំណើរចេញពីប្រទេសឥណ្ឌា គួរតែប្រើប្រាស់ប្រយោជន៍ពីជម្រើសខាងការដឹកជញ្ជូនខាងពាណិជ្ជកម្ម ដែលនៅតែអាចធ្វើបាននៅពេលនេះ” សេចក្ដីប្រកាសដំណឹង បានបញ្ជាក់បែបនេះ ព្រមទាំងបង្ហើបឱ្យដឹងថា មានរបាយការណ៍ថា ពលរដ្ឋអាមេរិកមួយចំនួន ត្រូវបានបដិសេធ មិនឱ្យចូលព្យាបាលនៅក្នុងមន្ទីរពេទ្យ ដោយសារតែមន្ទីរពេទ្យទាំងនោះ លែងមានកន្លែងទំនេរហើយ។

សេចក្ដីប្រកាសនេះ កើតឡើងក្នុងខណៈដែលមន្ទីរសេតវិមាន បានប្រាប់ឱ្យដឹងថា សហរដ្ឋអាមេរិក កំពុងសម្រេចចិត្តប្រគល់វត្ថុធាតុដើម ក្នុងការផលិតវ៉ាក់សាំងអ៊ែស្ត្រាហ្សេនេកា ដែលអាមេរិក បានបញ្ជាទិញនោះ ឱ្យទៅប្រទេសឥណ្ឌា ដែលវានឹងជួយឱ្យប្រទេសឥណ្ឌា អាចផលិតវ៉ាក់សាំងបានកាន់តែច្រើនឡើងថែមទៀត 20លានដូស។

ក្រៅពីនេះ សហរដ្ឋអាមេរិក នៅបានរៀបចំបញ្ជូនស្បៀងផ្សេងៗ ដែលមានតម្លៃច្រើនជាង 100លានដុល្លារ ទៅកាន់ប្រទេសឥណ្ឌា ក្នុងនោះមាន អុកស៊ីហ្ស៊ែន 1,000ធុង, ម៉ាស់អនាម័យការពារ N95 ចំនួន 15លានបន្ទះ និងឈុតពិនិត្យរកកូវីដ Rapid test 1លានឈុតទៀត ដែលបានបញ្ជូនជាបណ្ដើរៗ ទៅដល់ប្រទេសឥណ្ឌា រួចខ្លះហើយ តាំងពីថ្ងៃព្រហស្បតិ៍ ទី29 មេសា រហូតដល់សប្ដាហ៍ក្រោយ។

រដ្ឋបាលឥណ្ឌា បានសម្ដែងក្ដីរំភើបសោមនស្ស ចំពោះអ្វីដែលពួកគេហៅថា ជាក្រសែនៃភាពជាធ្លុងមួយ ដែលហូរមកពីទូទាំងពិភពលោក ដោយរហូតមកដល់ពេលនេះ មានប្រទេសផ្សេងៗ ច្រើនជាង 40ប្រទេសហើយ ដែលសន្យាថា នឹងប្រគល់ឧបករណ៍ផ្សេងៗ ដែលចាំបាច់បន្ទាន់បំផុត ឱ្យប្រទេសឥណ្ឌា ក្រោមស្ថានការណ៍ដ៏តានតឹង នៅក្នុងដែនដីមួយនេះ ដែលមានទាំងអ្នកជំងឺហូរហៀរមន្ទីរពេទ្យ ខ្វះខាតខ្យល់អុកស៊ីហ្ស៊ែន និងឈាបនដ្ឋាន ត្រូវធ្វើការដុតបូជាសាកសពទាំងថ្ងៃទាំងយប់៕

ប្រភព៖ ទីភ្នាក់ងារព័ត៌មាន CNN
ប្រែសម្រួលដោយ តាវ៉ែនតា

April 30, 2021

Covid-19 នៅឥណ្ឌា! ខំរង់ចាំ និងលុតជង្គង់សុំអុកស៊ីសែន ដើម្បីយកទៅជួយម្ដាយ ប៉ុន្តែចុងក្រោយ ត្រូវចាកចេញដោយក្ដីអស់សង្ឃឹម!

ស្ត្រីជនជាតិឥណ្ឌាម្នាក់ លុតជង្គង់នៅខាងក្រៅរោងចក្រផលិតអុកស៊ីសែនមួយកន្លែង នារដ្ឋធានី New Delhi ក្នុងបំណងជួយសង្គ្រោះជីវិតម្ដាយ ក៏ប៉ុន្តែ ប៉ុន្មានម៉ោងក្រោយមក គាត់បានទទួលដំណឹងថា ម្ដាយបានលាចាកលោកទៅហើយ!

រដ្ឋធានីនៃប្រទេសឥណ្ឌា កំពុងតែខ្វះអុកស៊ីសែនយ៉ាងធ្ងន់ធ្ងរ ដោយសារតែតួលេខអ្នកឆ្លងវីរុសនេះ បាន និងកំពុងកើនឡើងយ៉ាងឆាប់រហ័ស។ បញ្ហានេះ កំពុងប៉ះពាល់ដល់អ្នកជំងឺ និងគ្រួសារអ្នកជំងឺជាច្រើននៅប្រទេសឥណ្ឌា។ ស្ត្រីម្នាក់ឈ្មោះ Shruti Saha កាលពីថ្ងៃទី27 ខែមេសា ឆ្នាំ2021 បានចំណាយពេលអស់ជាច្រើនម៉ោង ក្នុងការស្វះស្វែងរកកន្លែងបញ្ចូលអុកស៊ីសែន នៅ New Delhi ដើម្បីយកមកជូនម្ដាយដែលកំពុងផ្ទុកវីរុសCovid-19។

ក្រោយពីរកឃើញទីតាំងបញ្ចូលអុកស៊ីសែនមួយដែលស្ថិតនៅក្នុងតំបន់ឧស្សាហកម្មនៃរដ្ឋធានី អ្នកស្រី Shruti Saha ក៏ត្រូវរង់ចាំ ចាប់ពីថ្ងៃទី27 រហូតដល់ថ្ងៃទី28 ខែមេសា ទើបដល់វេនខ្លួន។

ក្នុងពេលឈររង់ចាំយូរពេក Shruti Saha កាន់តែព្រួយបារម្ភចំពោះស្ថានភាពជំងឺរបស់ម្ដាយ ហើយគាត់ក៏សម្រេចចិត្តលុតជង្គង់ អង្វរសុំឱ្យទីតាំងនេះបើកទ្វារ។ ក៏ប៉ុន្តែ ក្រុមប៉ូលិស និងក្រុមសន្តិសុខ បានប្រាប់ឱ្យគាត់បន្តរង់ចាំ។

មនុស្សម្នាកំពុងរង់ចាំវេន ដើម្បីបានអុកស៊ីសែនសម្រាប់យកទៅជួយអ្នកផ្ទះដែលកំពុងផ្ទុក Covid-19

ក្រោយការរង់ចាំអស់ជាច្រើនម៉ោង Shruti Saha ក៏ត្រូវបានអ្នកផ្ទះទូរស័ព្ទមកប្រាប់ថា ម្ដាយគាត់បានបាត់បង់ជីវិតទៅហើយ។ អ្នកស្រីក៏ដួលទៅលើដី ខណៈដែលមនុស្សនៅជុំវិញ ព្យាយាមជួយលើកទឹកចិត្ត។ បំពង់អុកស៊ីសែនទទេរបស់គាត់ ត្រូវបានទុកចោលនៅកន្លែងដែលគាត់បានឈររង់ចាំវេន។

«ខ្ញុំបានចេញដំណើរពីផ្ទះ នៅវេលាម៉ោង2 រំលងអធ្រាត្រ។ នៅរដ្ឋ Delhi មិនមានអុកស៊ីសែន។ ចុងក្រោយ ខ្ញុំក៏បានមកដល់ទីនេះ។ ខ្ញុំបាននិយាយប្រាក់ពួកគេជាបន្តបន្ទាប់ថា ស្ថានភាពជំងឺរបស់ម្ដាយខ្ញុំ ពិតជាធ្ងន់ធ្ងរណាស់» Shruti Saha និយាយបណ្ដើរ យំបណ្ដើរ។

ទី Delhi ស្ថាប័នសុខាភិបាលបានរកឃើញថា រៀងរាល់ 4នាទី គឺមានអ្នកជំងឺCovid-19 ម្នាក់បានស្លាប់ ដែលស្ថានភាពនេះបានអូសបន្លាយពេលអស់ជាច្រើនថ្ងៃមកហើយ។ ដោយសារតែមន្ទីរពេទ្យនានា អស់កន្លែងសម្រាប់ដាក់អ្នកជំងឺ គ្រួសារអ្នកជំងឺក៏ត្រូវព្យាបាលនៅឯផ្ទះ ដោយការដាក់អុកស៊ីសែនឱ្យអ្នកជំងឺដកដង្ហើមជាបន្តបន្ទាប់។

នៅមុខរោងចក្រអុកស៊ីសែន អ្នកស្រី Shruti Saha បានរៀបរាប់ថា៖ «ពួកខ្ញុំ ខំស្វែងរកមន្ទីរពេទ្យអស់ជាច្រើនថ្ងៃមកហើយ។ សូមនាំខ្ញុំត្រលប់ទៅផ្ទះវិញ ឥឡូវនេះ»។ ពេលនោះ គេឃើញមានបុរសម្នាក់ ចាប់កាន់ដៃអ្នកស្រី ហើយនាំគាត់ចាកចេញទៅ ដោយក្ដីអស់សង្ឃឹម៕

ប្រភព៖ Reuters
ប្រែសម្រួល៖ បុត្រា

April 30, 2021

Covid-19! ភូមិសាស្ត្រមួយចំនួនទៀត នៃខណ្ឌទួលគោក ត្រូវបានកំណត់ជា «តំបន់ក្រហម» និង «តំបន់លឿនទុំ»

រដ្ឋបាលរាជធានីភ្នំពេញ ចេញសេចក្តីសម្រេចស្តីពីការកំណត់ភូមិ17 និងភូមិ22 នៃសង្កាត់បឹងកក់ទី2 ជា «តំបន់លឿងទុំ» និង ភូមិ23 នៃសង្កាត់បឹងកក់ទី2 រួមនឹងភូមិ10 នៃសង្កាត់បឹងសាឡាង ក្នុងខណ្ឌទួលគោក ជា «តំបន់ក្រហម»។

ភូមិសាស្ត្រមួយចំនួនរបស់ខណ្ឌទួលគោក កន្លងទៅថ្មីៗនេះ ក៏ត្រូវបានកំណត់ជាតំបន់ដែលមានហានិភ័យឆ្លងវីរុសCovid-19 ខ្ពស់ ក្នុងនោះ «តំបន់ក្រហម» ត្រូវបានកំណត់លើ សង្កាត់បឹងសាឡាង (ភូមិ14 ភូមិ16 និងភូមិ17), «តំបន់លឿងទុំ» មាន សង្កាត់ផ្សារដើមគរ , បឹងសាឡាង (លើកលែងភូមិ14, 16 និង17) និង «តំបន់លឿង» មាន សង្កាត់ផ្សារដេប៉ូ1, 2 និង3, ទឹកល្អក់1,2 និង3, បឹងកក់1 និង2។

ការសម្រេចខាងលើ ត្រូវបានធ្វើឡើងដើម្បីធានាប្រសិទ្ធភាពនៃការអនុវត្តសេចក្ដីសម្រេចមុននេះរបស់រាជរដ្ឋាភិបាល ស្ដីពីការបន្តបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្ដាល ក្នុងបំណងទប់ស្កាត់ Covid-19។

សេចក្ដីសម្រេចដែលត្រូវបានធ្វើឡើងដោយអភិបាលរាជធានីភ្នំពេញ ឯកឧត្តម ឃួង ស្រេង ចុះថ្ងៃទី29 ខែមេសា ឆ្នាំ2021នេះ មានសុពលភាពរហូតដល់ថ្ងៃទី5 ខែឧសភា ឆ្នាំ2021 ដោយរាប់ចាប់ពីម៉ោងសូន្យនៃថ្ងៃទី30 ខែមេសា ឆ្នាំ2021។

ព័ត៌មានលម្អិត សូមបន្តអានសេចក្ដីសម្រេចរបស់រដ្ឋបាលរាជធានីភ្នំពេញ ដែលមាននៅខាងក្រោម៖
ប្រភព៖ រដ្ឋបាលរាជធានីភ្នំពេញ
ដកស្រង់៖ បុត្រា

April 30, 2021

Elon Musk ត្រូវ tag ចូលអត្ថបទដែលចោទថា លោក «បញ្ជាលើតម្លៃ» Bitcoin និងសំងំ «ទិញថោក-លក់ថ្លៃ» ដោយប្រើ «ឧបាយកលទីផ្សារ» តែ CEO របស់ Tesla តបវិញមួយឃ្លា ទាក់ទាញបានការចូលចិត្តជិត 100,000លើក

នៅពេលត្រូវបានគេចោទថាជា អ្នក «បញ្ជាលើតម្លៃ» របស់រូបិយវត្ថុអេឡិចត្រូនិក Bitcoin និងបាន «ច្រកហោប៉ៅ» រាប់រយលានដុល្លារ មហាសេដ្ឋី Elon Musk បានចេញមុខ ឆ្លើយតបដោយផ្ទាល់ និងទទួលបានការបន្ទរ និងគាំទ្រដោយអ្នកសារព័ត៌មានរបស់ Bloomberg។

អ្នកយកព័ត៌មាន មកពីអង្គភាព Bloomberg ឈ្មោះ Matt Levine ថ្មីៗនេះ បានសរសេរអត្ថបទមួយដែលនិយាយអំពីទំនាក់ទំនងរវាងក្រុមហ៊ុន Tesla, Elon Musk និង Bitcoin។ លោក Matt Levine បានដកស្រង់ចំណុចសំខាន់ៗដែលគួរឱ្យចាប់អារម្មណ៍ ដូចខាងក្រោម៖

Tesla សំងំទិញរូបិយវត្ថុអេឡិចត្រូនិក Bitcoin មួយចំនួន (ពេលវានៅមានតម្លៃទាប)។
Tesla ប្រកាសថា Bitcoin គឺជាខ្ទង់វិនិយោគល្អ ហើយថា ពួកគេបានទិញរូបិយវត្ថុនេះ។
តម្លៃ Bitcoin ចាប់ផ្ដើមឡើងថ្លៃ ព្រោះតែមានក្រុមហ៊ុនធំៗជាច្រើន ទទួលយកការទូទាត់ដោយប្រើប្រាក់នេះ។ ប៉ុន្តែ មូលហេតុចម្បងនោះគឺ «ទ្រឹស្ដីទីផ្សារ Elon Musk» ព្រោះថា អ្វីដែលលោក Musk បានទិញ គឺវាសុទ្ធតែឡើងថ្លៃ។
Tesla សំងំលក់ចេញ Bitcoin មួយចំនួន និងរកបានប្រាក់ចំណេញរាប់រយលានដុល្លារ។
Musk បង្ហោះសារថា តម្លៃ Bitcoin ខ្ពស់ពេកហើយ។
តម្លៃ Bitcoin ចាប់ផ្ដើមធ្លាក់ ក៏ព្រោះតែ «ទ្រឹស្ដីទីផ្សារ Elon Musk»។
វិលត្រលប់ទៅរកជំហានទី1 (Tesla សំងំទិញ Bitcoin មួយចំនួន នៅពេលវាចុះថោក)។

កាលពីថ្ងៃចន្ទ ក្រុមហ៊ុន Tesla បានប្រកាសរបាយការណ៍ហិរញ្ញវត្ថុប្រចាំត្រីមាសរបស់ខ្លួន រួមនឹងអ្វីដែលបានកើតឡើងដូចទៅនឹងការព្យាករ៖

Tesla រកបានប្រាក់ចំណេញខ្ពស់ជាងមុន ដោយសារបានលក់ Bitcoin ចំនួន 10% ស្មើនឹង 101លានដុល្លារ ក្នុងចំណោម Bitcoin សរុប ដែលក្រុមហ៊ុននេះកំពុងកាន់កាប់។

អ្នកយកព័ត៌មាន Matt Levine បានផ្ញើសារអបអរជាលក្ខណៈឯកជន ជូនដល់ Tesla និង Elon Musk។ ប្រការនេះ គ្រប់គ្នាយល់យ៉ាងណា? មានពាក្យចចាមអារ៉ាមមួយចំនួន ដែលត្រូវបានលើកឡើង ដោយសង្ស័យថា មានអំពើបោកបញ្ឆោតណាមួយ នៅពេល Tesla ទិញ Bitcoin ខណៈ Elon Musk និយាយថា ចូលចិត្ត ហើយក្រោយមកក៏លក់វាចេញ។

តួយ៉ាងដូចជា ករណីអ្នកលេង Twitter ម្នាក់ដែលមានឈ្មោះថា Dave Portnoy បានបង្ហោះអត្ថបទមួយដែល tag លោក Elon Musk ចូល និយាយអំពីបញ្ហានេះ។ Dave ប្រើពាក្យ «pump» (សប់បំប៉ោង) ដើម្បីអធិប្បាយអំពីសកម្មភាពរបស់ Tesla នៅលើ Twitter។ Dave សរសេរថា៖ «តាមខ្ញុំយល់គឺយ៉ាងនេះ៖ Elon Musk ទិញ Bitcoin ហើយក្រោយមក គាត់បំប៉ោង ដោយការលើកសរសើរចំពោះ Bitcoin។ តម្លៃ របស់ Bitcoin ក៏បានកើនឡើង។ ហើយក្រោយមក Elon Musk លក់ចេញ និងរកបានប្រាក់ចំណេញយ៉ាងក្រាស់ក្រែល»។

មិនយូរប៉ុន្មាន មហាសេដ្ឋី Elon Musk បានឆ្លើយតបវិញ នៅខាងក្រោមអត្ថបទនេះថា៖ «អូ អត់ទេ ខ្ញុំមិនបានធ្វើដូច្នេះទេ។ Tesla លក់ 10% នៃ Bitcoin ដែលកំពុងកាន់កាប់គឺជា រឿងចាំបាច់ ដើម្បីបង្ហាញអំពីភាពងាយស្រួលក្នុងការដកប្រាក់របស់ Bitcoin ដែលដូចទៅនឹងស្ថាប័នជំនួស សម្រាប់ការផ្ញើប្រាក់»។

ចម្លើយរបស់លោក Musk ទទួលបានការចុចចូលចិត្តជិត 100,000លើក, ការចែករំលែកបន្តចំនួន 16.4k និងការបញ្ចេញមតិ ជិត 5k។

នៅក្នុងថ្ងៃចេញរបាយការណ៍ហិរញ្ញវត្ថុ កាលពីថ្ងៃចន្ទដើមសប្ដាហ៍នេះ CFO របស់ Tesla គឺលោក Zachary Kirkhorn បាននិយាយថា Tesla ចាត់ទុក Bitcoin ជាកន្លែងសម្រាប់រក្សាទុកសាច់ប្រាក់ ក្នុងពេលដែលវានៅតែអាចរក្សាបាននូវភាពងាយស្រួលក្នុងការដកប្រាក់ ពិសេសគឺនៅក្នុងស្ថានភាពដែលវិស័យវិនិយោគបុរាណ កំពុងប្រែជាអន់ថយ និងមិនទាក់ទាញ។

«យើងជឿជាក់ក្នុងរយៈពេលវែងចំពោះតម្លៃរបស់ Bitcoin។ គោលដៅរបស់យើងគឺបន្តរក្សានូវអ្វីដែលកំពុងមាន ក្នុងរយៈពេលវែង និងបន្តសន្សំ Bitcoin តាមរយៈការទូទាត់របស់អតិថិជនដែលទិញរថយន្តដោយប្រាក់អេឡិចត្រូនិកនេះ»។

ទាក់ទងនឹងបញ្ហានេះ ក្នុងអត្ថបទរបស់ខ្លួន អ្នកយកព័ត៌មាន Levine មកពីអង្គភាព Bloomberg ក៏បំភ្លឺលើចំណុចមួយចំនួន៖

ខ្ញុំមិនយល់ថា មានបញ្ហាអ្វីមួយដែលកើតឡើងពីការដែល Tesla ទិញ Bitcoin។ ពួកគេទិញ Bitcoin ហើយ ក្រោយមកលក់វាក្នុងតម្លៃខ្ពស់។ មិនមានសេចក្ដីលម្អិតណាបញ្ជាក់ថា Tesla និង Musk និយាយកុហក ឬមានចេតនាប្រើល្បិចក្នុងទីផ្សារ។
ខ្ញុំយល់ថា សកម្មភាពរបស់ Tesla គឺពិតជាអស្ចារ្យ ហើយខ្ញុំអបអរចំពោះពួកគេ និងសង្ឃឹមថា ពួកគេនឹងធ្វើដូច្នេះទៀត។
ខ្ញុំគិតថា ប្រសិនបើ ជា Elon Musk និងមានសមត្ថភាពធ្វើឱ្យតម្លៃ Bitcoin ឡើងថ្លៃ តាមរយៈការបង្ហោះសារមួយឃ្លា តើអ្នកនឹងធ្វើដូច្នេះដែរ ឬទេ?

ប្រភព៖ Bloomberg
ប្រែសម្រួល៖ បុត្រា

April 29, 2021

Covid-19! កម្ពុជា រកឃើញអ្នកវិជ្ជមាន 880នាក់ និងស្លាប់ 3នាក់ ក្នុងថ្ងៃទី28 ខែមេសា

នាថ្ងៃទី 29មេសា ឆ្នាំ2021នេះ ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 880នាក់ និងអ្នកជាសះស្បើយចំនួន 288នាក់ទៀត ក្នុងអំឡុង 24ម៉ោងនៃថ្ងៃទី 28 ខែមេសា ឆ្នាំ2021។

អ្នកវិជ្ជមានថ្មីចំនួន 880នាក់ខាងលើនេះ សុទ្ធតែជាករណីពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី 28 ខែមេសាដដែល កម្ពុជាក៏មានអ្នកជំងឺCovid-19 ចំនួន 3នាក់បានស្លាប់។

គិតមកដល់បច្ចុប្បន្ន (29 ខែមេសា) ទូទាំងប្រទេសកម្ពុជា អ្នកឆ្លងCovid-19 សរុបបានកើនដល់ 12,641នាក់ ក្នុងនោះមានអ្នកជាសះស្បើយសរុប 4,986នាក់, អ្នកស្លាប់ 91នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 8,119នាក់។

នៅទូទាំងពិភពលោក គិតមកដល់ម៉ោង 5ល្ងាចនេះ អ្នកវិជ្ជមាននឹង Covid-19 បានកើនឡើងដល់ 150,329,088នាក់ ក្នុងនោះមានអ្នកស្លាប់សរុប 3,166,765នាក់, អ្នកជាសះស្បើយ 127,869,123នាក់ និងកំពុងព្យាបាល 19,293,200នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

April 29, 2021

កូរ៉េខាងជើង ប្រហារជីវិត មន្ត្រីនាំចូលឧបករណ៍ពេទ្យ ទាស់ចិត្តលោកគីម ដែលចង់បានរបស់អឺរ៉ុប

ទីភ្នាក់ងារព័ត៌មាន ដេលី មែល បានរាយការណ៍កាលពីថ្ងៃទី28 ម្សិលមិញថា ប្រទេសកូរ៉េខាងជើងបានប្រហារជីវិតមន្ត្រីបក្សពលករកូរ៉េ ដែលជំទាស់នឹងបញ្ជារបស់លោក គីម ជុងអ៊ុន មេដឹកនាំខ្ពស់បំផុតរបស់ប្រទេសកូរ៉េខាងជើង ក្នុងគ្រោងការកសាងមន្ទីរពេទ្យក្នុងទីក្រុងព្យុងយ៉ាង ដោយបាននាំចូលឧបករណ៍ពេទ្យតម្លៃថោកៗពីប្រទេសចិន ជំនួសឧបករណ៍ពេទ្យគុណភាពល្អ មកពីអឺរ៉ុប។

វេបសាយសារព័ត៌មាន Daily NK របស់កូរ៉េខាងត្បូង បានរាយការណ៍ថា លោកគីម ត្រូវការមន្ទីរពេទ្យដែលមានឧបករណ៍ប្រើប្រាស់របស់អឺរ៉ុប តែមន្ត្រីរូបនោះ បានជ្រើសរើសនាំចូលឧបករណ៍ពេទ្យពីប្រទេសចិន ធ្វើឱ្យមេដឹកនាំកំពូលកូរ៉េខាងជើង មិនពេញចិត្តយ៉ាងខ្លាំង។

មន្ត្រីរូបនោះ មានអាយុ ប្រមាណជា 50ឆ្នាំ ជាអគ្គនាយករងក្រសួងការបរទេស និងជាអ្នកទទួលខុសត្រូវលើការនាំចូល និងនាំចេញ បានទទួលរងទណ្ឌកម្មធ្ងន់ធ្ងរបំផុត (ប្រហារជីវិត)។ ក្រៅពីនេះ នៅមានអគ្គនាយកក្រសួងសុខាភិបាលម្នាក់ ក៏ត្រូវបានបណ្ដេញចេញពីតំណែងផងដែរ។

របាយការណ៍ បានបញ្ជាក់ថា លោកគីម ជុងអ៊ុន ដែលកាលពីវ័យកុមារ ធ្លាប់រស់នៅឯប្រទេសស្វ៊ីសនោះ ជឿថា ឧបករណ៍ដែលផលិតនៅអឺរ៉ុប មានគុណភាពល្អបំផុត ទើបបក្សពលករកូរ៉េ បែងចែកថវិកាមួយចំនួនធំ សម្រាប់ការតុបតែងមន្ទីរពេទ្យ តាមបញ្ជារបស់មេដឹកនាំកំពូលកូរ៉េខាងជើង។

យ៉ាងណាក៏ដោយ បណ្ដាមន្ត្រីទទួលបន្ទុកនាំចូលទំនិញទាំងអស់ ត្រូវតែពុះពារឆ្លងកាត់ឧសគ្គ ដោយសារតែវិធានការទណ្ឌកម្មសេដ្ឋកិច្ចរបស់អឺរ៉ុប ដែលបានដាក់ទៅលើប្រទេសកូរ៉េខាងជើង និងក្រៅពីនោះ ការឆ្លងរាលដាលរបស់កូវីដ-19 បានបន្ថែមក្ដីលំបាកលំបិនយ៉ាងខ្លាំង ក្នុងការនាំចូលទំនិញអឺរ៉ុបទៅប្រទេសទី3 ដែលជាប្រទេសអព្យាក្រឹតចំពោះកូរ៉េខាងជើង មុននឹងនាំចូលទំនិញទាំងនោះមកប្រទេសកូរ៉េខាងជើងជាបន្ត។

ដូច្នេះហើយ ទើបពួកគេមានផែនការក្នុងការប្រើប្រាស់ឧបករណ៍របស់ប្រទេសចិន ដែលមានតម្លៃថោកជាង និងងាយស្រួលនាំចូលជាង និងបានចុះហត្ថលេខាលើកិច្ចសន្យាទិញ-លក់ ដោយមិនបានឆ្លងកាត់ការឯកភាពពីលោកគីម ជាមុន។

ទាំងអស់នេះ លោកគីម មានការយល់ឃើញផ្ទាល់ខ្លួន ដោយផ្ដើមកសាងមន្ទីរពេទ្យកណ្ដាល (General Hospital) នៅក្នុងទីក្រុងធំ តាំងពីខែមីនា ឆ្នាំ2020 ដោយកំណត់ឱសានវាទ រយៈពេល 6ខែ ដើម្បីឱ្យបានធ្វើពិធីសម្ពោធនៅថ្ងៃទី10 តុលា ឆ្នាំ2020 ចំថ្ងៃគម្រប់ខួប 75ឆ្នាំ នៃថ្ងៃបង្កើតគណបក្សពលករកូរ៉េ។

ប្រព័ន្ធផ្សព្វផ្សាយផ្លូវការកូរ៉េខាងជើង បានចេញផ្សាយព័ត៌មានលើកចុងក្រោយកាលពីខែកញ្ញា ឆ្នាំ2020 ថា ការសាងសង់ផ្នែកខាងក្រៅអគារ ស្ថិតក្នុងដំណាក់កាលចុងក្រោយ និងកំពុងដំណើរការបន្តទៀតយ៉ាងឆាប់រហ័ស ព្រមទាំងបង្ហាញរូបភាពខាងក្រៅអគារទាំងមូល មុននឹងបញ្ចប់សេចក្ដីរាយការណ៍នោះ។

ទីបំផុត គ្រោងការសាងសង់មន្ទីរពេទ្យដ៏ធំនោះ មិនបានរួចរាល់ពេញលេញ និងមិនបានបើកសម្ពោធយ៉ាងអស្ចារ្យ ទាន់ពេលវេលាឡើយ ក្រោយមានក្រសែដំណឹងចចាមអារ៉ាមថា មន្ទីរពេទ្យនោះមានតែតួអគារទទេស្អាត និងខ្វះឧបករណ៍ពេទ្យសំខាន់។

ស្ថានីយទូរទស្សន៍មជ្ឈិមកូរ៉េ ប្រព័ន្ធផ្សព្វផ្សាយរបស់បក្សពលករ បានដករូបភាពមន្ទីរពេទ្យមួយនោះចេញពីខ្សែភាពយន្តផ្សព្វផ្សាយនយោបាយ ហើយក្រៅពីនោះ ឯកសាររដ្ឋបាលដែលបង្ហាញពីបញ្ជីគ្រោងការកសាងសំខាន់ៗលំដាប់ថ្នាក់ជាតិប្រចាំឆ្នាំ2021 ក៏មិនបាននិយាយអំពីគ្រោងការសាងសង់មន្ទីរពេទ្យនោះដែរ៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 29, 2021

ប្រាក់ចំណូលរបស់ក្រុមហ៊ុន Apple និង Facebook កើនឡើងខ្ពស់ ទោះបីពិភពលោកកំពុងជាប់ដៃប្រយុទ្ធប្រឆាំង Covid-19

ប្រាក់ចំណូលនៅក្នុងត្រីមាសទីមួយរបស់ក្រុមហ៊ុន Apple និង Facebook សុទ្ធតែកើនប្រហែល 50% បើធៀបនឹងអំឡុងពេលដូចគ្នា កាលពីឆ្នាំមុន។

កាលពីថ្ងៃទី 28 ខែមេសា ឆ្នាំ2021 ក្រុមហ៊ុន Apple និង Facebook បានបញ្ចេញរបាយការណ៍ហិរញ្ញវត្ថុប្រចាំត្រីមាសទីមួយរបស់ពួកគេ។ របាយការណ៍បង្ហាញថា Apple រកបានចំណូល 89.6ពាន់លានដុល្លារ កើន 54% បើធៀបនឹងត្រីមាសទីមួយនៃឆ្នាំ2020 ដែលតួលេខនេះគឺ លើសពីការព្យាកររបស់ក្រុមអ្នកវិភាគនាពេលកន្លង។ មូលបត្រ Apple ក៏បានកើនឡើងជាង 4% នៅក្នុងការជួញដូរក្រៅម៉ោង។

នេះក៏ជាត្រីមាសទីពីរ ដែល Apple រកបានចំណូលច្រើនជាងមុនពីរខ្ទង់ ជាមួយនឹងផលិតផល និងសេវាកម្មគ្រប់ប្រភេទរបស់ក្រុមហ៊ុននេះ។ ចំពោះផ្នែកដែលសំខាន់បំផុត (iPhone) គឺមានកំណើន 65.5% បើធៀបនឹងឆ្នាំទៅ។ ជាងនេះ ចំណូលបានមកពី Mac និង iPad ក៏កើន 70% និង 79%។

Apple Store នៅទីក្រុង Charleston នៃរដ្ឋ Carolina ខាងត្បូង របស់សហរដ្ឋអាមេរិក កាលពីឆ្នាំ2020

Luca Maestri ប្រធានផ្នែកហិរញ្ញវត្ថុរបស់ Apple បានឱ្យដឹងថា ក្រុមហ៊ុននេះព្យាករថា ប្រាក់ចំណូលនៅក្នុងត្រីមាសទីពីរ នឹងកើនបន្ថែមពីរខ្ទង់ ធៀបនឹងអំឡុងពេលដូចគ្នាកាលពីឆ្នាំ2020។ Apple ក៏នឹងបង្កើនភាគលាភថែម 7% ទៀត ដល់ភាគហ៊ុនិក និងចំណាយ 90ពាន់លានដុល្លារ ដើម្បីទិញមូលបត្ររបស់ខ្លួន ដែលតួលេខនេះ ខ្ពស់ជាងពីរឆ្នាំមុននេះ។

កាលពីប៉ុន្មានខែមុន Apple បានឱ្យដឹងថា ការរកស៊ីរបស់ក្រុមហ៊ុនមានការកើនឡើងនៅក្នុងអំឡុងវិបត្តិ Covid-19 គ្រាដែលអ្នកប្រើប្រាស់ និងក្រុមហ៊ុននានា នាំគ្នាទិញកុំព្យូទ័រដើម្បីធ្វើការ និងកំសាន្តនៅផ្ទះ ក្នុងពេលសង្គមត្រូវបានបិទខ្ទប់។

ដោយឡែក Facebook វិញ ក៏រកបានចំណូលខ្ពស់ជាងត្រីមាសទីមួយនៃឆ្នាំ2020 ដល់ទៅជិត 50% នៅក្នុងត្រីមាសទីមួយនៃឆ្នាំ2021នេះ ពោលគឺឡើងដល់ 26.17ពាន់លានដុល្លារ។ ប្រាក់ចំណេញសុទ្ធ កើនដល់ 94% ស្មើនឹង 9.5ពាន់លានដុល្លារ។

តំបន់ទីស្នាក់ការកណ្តាលនៃក្រុមហ៊ុនសាជីវកម្ម Facebook នៅតំបន់ Menlo Park រដ្ឋ California សហរដ្ឋអាមេរិក កាលពីឆ្នាំ2019

ក្រុមហ៊ុន Facebook បានបង្ហើបឱ្យដឹងថា មូលហេតុនៃកំណើនខាងលើគឺដោយសារតម្លៃមធ្យមសម្រាប់ការផ្សារពាណិជ្ជកម្មមួយ កើន 30% រីឯតួលេខនៃការផ្សាយពាណិជ្ជកម្ម ក៏កើនបន្ថែម 12%។ Facebook ព្យាករថា កំណើននៃប្រាក់ចំណូល នឹងបន្តមានស្ថិរភាព ឬកើនឡើងថែមទៀតនៅក្នុងត្រីមាសទីពីរនៃឆ្នាំ2021នេះ។

នាយកប្រតិបត្តិរបស់ Facebook លោក Mark Zuckerberg បានឱ្យដឹងថា ក្រុមហ៊ុនកំពុងតែផ្ដោតលើការបន្ថែមមុខងារមួយចំនួនសម្រាប់ផ្នែកពាណិជ្ជកម្មអេឡិចត្រូនិកនៅលើ Facebook។ សេវាកម្ម Marketplace របស់ Facebook បច្ចុប្បន្ន មានអ្នកប្រើប្រាស់ជាង 1ពាន់លាននាក់ ជារៀងរាល់ខែ៕

ប្រភព៖ CNBC
ប្រែសម្រួល៖ បុត្រា

April 29, 2021

Author: សឿន សំណាង