សឿន សំណាង - La Reine Media

ហុងស៊ុយ ចង្ក្រានបាយផ្ទះល្វែង ដើម្បីសុខភាព និងទ្រព្យសម្បត្តិ

ក្រៅពីបន្ទប់ចង្ក្រានបាយ ជាចំណែកមួយដែលមានភាពសំខាន់បំផុតនៅក្នុងផ្ទះហើយ ក្នុងក្បួនសាស្ត្រារបស់ហុងស៊ុយ ផ្ទះបាយថែមទាំងជាបន្ទប់មួយ ដែលឆ្លុះបញ្ចាំងពីភាពមានទ្រព្យសម្បត្តិ និងជាចំណែកសំខាន់មួយ ក្នុងចំណែកសំខាន់ទាំង3 របស់ផ្ទះ ដែលនឹងជួយបង្កើនក្នុងរឿងសុខភាព ដល់អ្នកស្នាក់អាស្រ័យទៀតផង។ តែសម្រាប់ផ្ទះល្វែង ដែលមានទីកន្លែងតូច មានកំណត់ និងមិនដឹងជារៀបចំបន្ទប់ផ្ទះបាយដ៏តូចរបស់ខ្លួន ឱ្យត្រឹមត្រូវតាមក្បួនសាស្ត្រារបស់ហុងស៊ុយយ៉ាងដូចម្តេចបាននោះ ពេលនេះសូមសាកល្បងតាមដានអត្ថបទវិធីរៀបចំហុងស៊ុយ សម្រាប់បន្ទប់ចង្ក្រានបាយតូចៗដូចខាងក្រោម៖

រៀបចំរបស់របរឱ្យមានរបៀប

ហុងស៊ុយដែលល្អ ត្រូវតែមានប្រឡោះទុកឱ្យថាមពល «ស៊ី» ហូរវិលចូល និងចេញបានងាយស្រួល ដែលមានន័យថា បន្ទប់ចង្ក្រានបាយរបស់អ្នក ត្រូវតែមានរបៀបរៀបរយ គ្មានរបស់របរទុកចោលរកេករកាក រញ៉េរញ៉ៃ សូម្បីតែក្នុងថតទូដាក់ឥវ៉ាន់ ក៏ត្រូវតែរៀបចំទុកដាក់ឱ្យមានរបៀបដែរ ដើម្បីងាយស្រួលក្នុងការចាប់យករបស់របរមកប្រើប្រាស់ និងបើអាចទៅរួច គួរយកវត្ថុដែលមិនចាំបាច់ក្នុងកិច្ចការងារចង្ក្រានជើងឆ្នាំងចេញឱ្យអស់ ដើម្បីអំណោយផលដល់ថាមពលល្អៗ ឲ្យវិលចូលមកក្នុងបន្ទប់ចង្ក្រានបាយបានយ៉ាងពេញទំហឹង និងជួយបង្កើនឱ្យមានមាសប្រាក់ លុយកាក់ហូរចូលផ្ទះមិនជំពប់អាក់ទៀតផង។

បន្ថែមពន្លឺ

បន្ទប់ចង្ក្រានបាយតូចៗ មិនសូវមានភាពល្អិតល្អន់ក្នុងការរៀបចំហុងស៊ុយប៉ុន្មានទេ តែអាចប្រើវិធីតុបតែងលម្អបាន ដោយការលាបពណ៌លម្អ នៅតាមទ្វារបន្ទប់បាយ ទូថតដាក់ឥវ៉ាន់ផ្ទះបាយ និងទូទុកដាក់របស់ប្រើប្រាស់ ឱ្យមើលទៅឃើញរាងភ្លឺឡើង ដូចជាបើពេលនេះ ទ្វារបន្ទប់បាយ ទ្វារទូថតរបស់អ្នកមានពណ៌ស្ករ ក៏រកពណ៌ស ឬពណ៌ពងមាន់មកលាបជាន់ពីលើ ចង់ថែមក្បូរក្បាច់រូបផ្កាតូចស្អាតៗក៏បានដែរ ដើម្បីឱ្យបន្ទប់ចង្ក្រានបាយ មើលទៅឃើញភ្លឺស្វាង បើកទទួលថាមពលវិជ្ជមានឱ្យបានកាន់តែច្រើនឡើង។

ពណ៌ពិតានបន្ទប់

ក្នុងបន្ទប់ចង្ក្រានបាយ គួរមានពន្លឺដែលគ្រប់គ្រាន់ ព្រោះក្រៅពីជួយបង្កើនឱ្យថាមពល «ស៊ី» ហូរវិលចូលបានងាយស្រួលហើយ នៅមានពាក់ព័ន្ធនឹងសុវត្ថិភាពរបស់មនុស្សនៅក្នុងផ្ទះទៀតផង ដូច្នេះត្រូវយកចិត្តទុកដាក់នឹងការបន្ថែមពន្លឺនៅក្នុងចង្ក្រានបាយឱ្យបានច្រើន ដូចជានៅលើពិតានដែលមានពណ៌សតែមួយគត់នោះ បើអាចទៅរួច គួរតែលេងលំដាប់ពណ៌ឱ្យមើលទៅឃើញប្លែក និងគួរឱ្យចាប់អារម្មណ៍បន្តិច ដើម្បីឱ្យបន្ទប់ចង្ក្រានបាយ មើលទៅមានពណ៌ស្អាតៗច្រើនឡើងបន្តិចហ្នឹងឯង។

តុបតែងបន្ថែម

រៀបចំសម្រួលចំណុចធំៗរបស់បន្ទប់់ចង្ក្រានបាយរួចរាល់ហើយ ឥលូវនេះដល់ពេលត្រូវបន្ថែមក្បាច់ក្បូរបន្តិចបន្តួច ដើម្បីឱ្យបន្ទប់ចង្ក្រានបាយ កាន់តែសម្បូរបែបឡើង ដោយចាត់ចែងរកថូផ្កាស្អាតៗមកដាក់ក្នុងបន្ទប់ខ្លះ ឬក៏រករូបភាពបន្លែ ផ្លែឈើណា ដែលមើលទៅស្រស់ស្អាតមកព្យួរជញ្ជាំងក៏បាន ហើយនិង ដែលខ្វះមិនបានសោះនោះ គឺកញ្ចក់…នៅក្នុងបន្ទប់ផ្ទះបាយ គួរមានកញ្ចក់តូច1ផ្ទាំង ដើម្បីឱ្យជួយនាំចំណាំងពន្លឺ ចូលមកក្នុងចង្ក្រាន និងដែលសំខាន់ គឺជួយបញ្ចាំងថាមពលមិនល្អ និងកម្ដៅពេលចម្អិនអាហារចេញពីចង្ក្រានផងដែរ។

ពេលរៀបចំបន្ទប់ចង្ក្រានបាយ តាមគោលការណ៍ហុងស៊ុយរួចហើយ ចូរកុំភ្លេចបោសជូតសម្អាតវា ឱ្យនៅស្អាត មើលទៅឃើញនៅថ្មីសន្លាងជានិច្ចផង ដើម្បីឱ្យមានអនាម័យល្អ និងជាសិរីមង្គលដល់ផ្ទះសំបែងផង៕

May 7, 2021

បន្តផ្អាកដំណើរការជាបណ្តោះអាសន្នផ្សាររដ្ឋ និងផ្សារមិនរៀបរយទាំងអស់នៅក្នុងរាជធានីភ្នំពេញ

រដ្ឋបាលរាជធានីភ្នំពេញ សម្រេចបន្តផ្អាកដំណើរការជាបណ្តោះអាសន្នផ្សាររដ្ឋ និងផ្សារមិនរៀបរយទាំងអស់នៅក្នុងរាជធានីភ្នំពេញ រយៈពេល 7ថ្ងៃ គិតចាប់ពីម៉ោងសូន្យ នៃថ្ងៃទី8 ខែឧសភា ឆ្នាំ2021 ដល់ថ្ងៃទី14 ខែឧសភា ឆ្នាំ2021។

សេចក្ដីសម្រេច ចុះនៅថ្ងៃទី6 ខែឧសភា ឆ្នាំ2021 ដោយអភិបាលរាជធានីភ្នំពេញ ឯកឧត្តម ឃួង ស្រេង នេះ គឺដើម្បីទប់ស្កាត់ការឆ្លងរាលដាលនៃវីរុសCovid-19 នៅក្នុងសហគមន៍។

ព័ត៌មានលម្អិតបន្ថែម សូមអានសេចក្ដីសម្រេចខាងក្រោម៖
ប្រភព៖ រដ្ឋបានរាជធានីភ្នំពេញ
ដកស្រង់៖ បុត្រា

May 7, 2021

ក្រសួងសុខាភិបាល ចេញរបាយការណ៍ស្ដីពីតួលេខនៃការចាក់វ៉ាក់សាំងបង្ការវីរុសCOVID-19

កាលពីយប់ថ្ងៃទី06 ខែឧសភា ឆ្នាំ2021 ក្រសួងសុខាភិបាលកម្ពុជា បានឱ្យដឹងថា យុទ្ធនាការចាក់វ៉ាក់សាំងបង្ការវីរុសCovid-19 ជូនប្រជាពលរដ្ឋ របស់រដ្ឋាភិបាលកម្ពុជា សម្រេចបានចំនួន 1,606,007នាក់។

លទ្ធផលនៃការចាក់វ៉ាក់សាំងខាងលើនេះ ត្រូវបានរាប់ចាប់ពីថ្ងៃទី10 ខែកុម្ភៈ ឆ្នាំ2021 មកដល់ថ្ងៃទី06 ខែឧសភា ឆ្នាំ2021។

របាយការណ៍របស់ក្រសួងសុខាភិបាល ស្ដីពីលទ្ធផលនៃការចាក់វ៉ាក់សាំង មានដូចខាងក្រោម៖

ប្រភព៖ AKP
ដកស្រង់៖ បុត្រា

May 7, 2021

(វីដេអូ)-ជនជាតិឥណ្ឌារាប់ពាន់នាក់ ចូលរួមធម្មយាត្រា នាំទឹកពិសិដ្ឋទៅថ្វាយអាទិទេព ដើម្បីទប់ស្កាត់ Covid-19

ស្ត្រីជនជាតិឥណ្ឌា រាប់ពាន់នាក់ នៅក្នុងរដ្ឋ Gufarat មិនខ្ចីអើពើចំពោះបំរាមគោចរទប់ស្កាត់ Covid-19 ដោយពួកគេប្រមូលផ្ដុំគ្នា បួងសួង ក្រោយពីអ្នកបួសមួយរូប បានប្រកាសថា Covid-19 កើតឡើងដោយសារការក្រោធខឹងរបស់អាទិទេព។

ហ្វូងមនុស្សដែលស្ទើរតែទាំងអស់ជាស្ត្រី បានហែក្បួនតាមដងផ្លូវ ពីភូមិ Navapara ទៅកាន់ប្រាសាទ Baliyadev នៅក្នុងភូមិ Nidradh ស្រុក Ahmedabad កាលពីថ្ងៃទី4 ខែឧសភា ដោយនៅលើក្បាលរបស់ពួកគេ មានក្អមទឹកពិសិដ្ឋ សម្រាប់ថ្វាយចំពោះអាទិទេព។ ក្នុងចំណោមមនុស្សរាប់ពាន់នាក់នេះ គេហាក់មិនបានឃើញអ្នកណាម្នាក់ពាក់ម៉ាស ហើយក៏មិនមានការរក្សាគម្លាតសុវត្ថិភាព បើទោះ រដ្ឋ Gujarat កំពុងមានករណីឆ្លង Covid-19 យ៉ាងច្រើនក៏ដោយ។

ធម្មយាត្រានេះ បានកើតឡើង បន្ទាប់ពីអ្នកបួសម្នាក់បានប្រកាសថា ការផ្ទុះឡើងរបស់ Covid-19 គឺ ដោយសារ «ការក្រោធខឹងរបស់ពួកអាទិទេព»។ អ្នកបួសនោះក៏បានស្នើឱ្យមានធម្មយាត្រាមួយដើម្បីនាំយកទឹកពិសិដ្ឋទៅថ្វាយអាទិទេព ដើម្បី «ទប់ស្កាត់ Covid-19»។

ប៉ូលិសជាន់ខ្ពស់មួយរូប ឈ្មោះ Kamaria បានឱ្យដឹងថា មនុស្សចំនួន 23នាក់ ត្រូវបានចាប់ខ្លួនដោយសារបានចូលរួមក្នុងព្រឹត្តិការណ៍នេះ ក្នុងនោះក៏មានមេភូមិផងដែរ។

ប៉ូលិសនិយាយថា ក្រុមអ្នកភូមិប្រារព្ធពិធីនេះគឺដោយសារមានជំនឿថា នឹងគេចផុតពីរោគរាតត្បាត។ សមត្ថកិច្ច និងក្រុមអ្នកជំនាញ កំពុងចុះទៅកាន់កន្លែងកើតហេតុ ដើម្បីពន្យល់អ្នកភូមិអំពីហានិភ័យទាក់ទងនឹងការប្រមូលផ្ដុំគ្នានេះ។

រដ្ឋ Gujarat កំពុងអនុវត្តវិធានការទប់ស្កាត់ Covid-19 ក្នុងនោះ ក៏មានការហាមទីតាំងសាសនា ធ្វើសកម្មភាព ខណៈដែលបំរាមគោចរនៅពេលយប់ក៏ត្រូវបានដាក់ចេញនៅតំបន់មួយចំនួនផងដែរ។

យ៉ាងនេះក្ដី ពលរដ្ឋឥណ្ឌាភាគច្រើន ហាក់មិនទាន់យល់ដឹងអំពីហានិភ័យនៃការប្រមូលផ្ដុំគ្នា នៅចំពោះមុខវិបត្តិ Covid-19។ មនុស្សរាប់លាននាក់ នៅតែចូលរួមធ្វើធម្មយាត្រា យុទ្ធនាការឃោសនារកសំឡេងឆ្នោត ឬទៅបោះឆ្នោត ដោយវិធានការទប់ស្កាត់ការឆ្លងវីរុសជាច្រើនមិនត្រូវបានអើពើ។

ប្រទេសឥណ្ឌា បច្ចុប្បន្ន គឺជាសម្បុកវីរុសCovid-19 ធំជាងគេលំដាប់ទីពីរក្នុងពិភពលោក បន្ទាប់ពីសហរដ្ឋអាមេរិក ដោយមានអ្នកវិជ្ជមានសរុប 21,077,410នាក់ ក្នុងនោះមាន 230,168នាក់បានស្លាប់, 17,280,844នាក់បានជាសះស្បើយ និង 3,566,398នាក់កំពុងព្យាបាល៕

ប្រភព៖ ANI, Global Times, Indian Express
ប្រែសម្រួល៖ បុត្រា

May 6, 2021

ហុងស៊ុយជណ្តើរផ្ទះ

នៅក្នុងការសាងសង់ ឬតុបតែងផ្ទះ រឿងហុងស៊ុយ គឺជារឿងមួយ ដែលម្ចាស់ផ្ទះ ត្រូវតែយកចិត្តទុកដាក់ ដើម្បីជួយបង្កើន ឱ្យម្ចាស់ផ្ទះ និងអ្នកស្នាក់នៅទាំងអស់ មានអារម្មណ៍សប្បាយកាយ សប្បាយចិត្ត ដែលបានរស់នៅក្នុងផ្ទះដែលត្រឹមត្រូវតាមគាលការណ៏របស់ហុងស៊ុយ និងបង្កើនថាមពលបូក ឱ្យមានជោគសំណាង មានលាភសក្ការៈ និងមានភាពគង់វង្ស មានសេចក្តីសុខក្នុងការស្នាក់អាស្រ័យនៅក្នុងផ្ទះរបស់ខ្លួនឯង។ ខាងក្រោមនេះ គឺជារឿងរបស់ហុងស៊ុយជណ្តើរផ្ទះ ដែលមានសេចក្ដីលម្អិតដូចតទៅ៖

1.ជណ្តើរផ្ទះមិនគួរនៅចំនឹងទ្វាចូលផ្ទះឡើយ ព្រោះនឹងធ្វើឱ្យក្រសែថាមពល «ឈី» ហូរចូលផ្ទះមិនបានស្រួល ធ្វើឱ្យទុកដាក់លុយកាក់មិនគង់។ ក្រៅពីនេះ ថែមទាំងជាការបើកទទួលថាមពលមិនល្អ ឱ្យហូរឡើងទៅដល់ជាន់លើរបស់ផ្ទះ ដែលជាបន្ទប់គេង ធ្វើឱ្យរសាប់រសល់ សម្រាន្តលក់មិនស្រួល នាំឱ្យប៉ះពាល់ដល់សុខភាពទៀតផង ។

2.ហាមធ្វើជណ្តើរផ្ទះឱ្យមានផ្លូវឡើង 2ខាង ព្រោះវានឹងមានលក្ខណៈដូចបច្ឆាសម្រាប់ដុតខ្មោច ដែលមានផ្លូវឡើង និងចុះទល់មុខគ្នា គឺជាលក្ខណៈរបស់ជណ្តើរ ដែលអពមង្គលខ្លាំងណាស់។

3.កុំឱ្យជណ្តើរស្ថិតនៅចំកណ្តាលផ្ទះ ព្រោះចំណុចកណ្តាលផ្ទះ គឺជាបេះដូងរបស់ផ្ទះ…ការសាងជណ្តើរនៅត្រង់ចំណុចនេះ នឹងធ្វើឱ្យម្ចាស់ផ្ទះ នៅផ្ទះមិនបានយូរ និងអាចធ្វើឱ្យមានជំងឺពាក់ព័ន្ធនឹងបេះដូងទៀតផង។

4.ការបែរទីតាំងផ្លូវឡើងជណ្តើរ សូមណែនាំឱ្យបែរទៅទិសបញ្ឆិត មិនគួរបែរទៅចំទិសគោលៗ ដូចជា លិច កើត ជើង ត្បូងឡើយ ព្រោះអាចនឹងសង្កត់ពីលើដួងរាសីស្នេហារបស់សមាជិកនៅក្នុងផ្ទះ បិទបាំងថាមពលបូកផ្សេងៗ តែបើបែរទៅទិសបញ្ឆិតៗ ដូចជា ខាងកើតឆៀងខាងជើង ជាដើម នឹងជួយបើកផ្លូវកាន់តែខ្លាំងឡើង។

5.ចំណោតរបស់ជណ្តើរ ត្រូវស្ថិតនៅក្នុងកម្រិតប្រមាណជា 45អង្សា មិនចោតពេក ឬចង្អៀតជ្រុលពេក ទាំងអស់នេះ ក្រៅពីជួយបង្កើន ឱ្យថាមពល «ឈី» ហូរចូលបានសព្វទីកន្លែងហើយ នៅអាចដើរឡើងបានស្រួល មិនប្រថុយនឹងឧប្បត្តិហេតុទៀតផង។

6.ចំនួនកាំរបស់ជណ្តើរ ដែលត្រឹមត្រូវគួរតែជាចំនួនសេស ព្រោះគេមានជំនឿថា លេខសេស គឺជាលេខរបស់មនុស្សរស់ ឯលេខគូ មានន័យថា មនុស្សស្លាប់។

7.ទីតាំងដ៏ត្រឹមត្រូវរបស់ជណ្តើរ គួរនៅផ្ទុយនឹងមាត់ទ្វារចូលផ្ទះ ដូចជា បើទ្វារផ្ទះនៅខាងឆ្វេង ជណ្តើរគួរនៅខាងស្តាំ ដោយមិនគួរបែរផ្លូវឡើងជណ្តើរ ទៅទល់មុខនឹងទ្វារផ្ទះចំៗឡើយ។

8.ជណ្តើរផ្ទះ មិនគួរនៅខាងក្រៅផ្ទះឡើយ ទោះជាមើលទៅឃើញស្អាតយ៉ាងណាក៏ដោយ ព្រោះ គឺជាជណ្តើរចោរ ដែលក្រៅពីធ្វើឱ្យអ្នកស្នាក់អាស្រ័យ បាត់បង់លុយកាក់ហើយ ថែមទាំងជាការបើកផ្លូវឱ្យជនពាល ចូលក្នុងផ្ទះបានកាន់តែងាយស្រួលទៀតផង។

9.សម្រាប់ផ្ទះម៉ូដបុរាណ ឬផ្ទះលើកខ្ពស់ពីដី បើមានជណ្តើរចេញមកខាងក្រៅផ្ទះ សូមណែនាំឱ្យធ្វើជណ្តើរនៅខាងឆ្វេង ឬខាងស្តាំរបស់ផ្ទះ នឹងធ្វើឱ្យសន្សំលុយ បានគង់វង្សល្អ។

នៅពេលបានដឹងពីហុងស៊ុយជណ្តើរផ្ទះហើយ សូមកុំភ្លេចយកទៅធ្វើការពិចារណាក្នុងការតុបតែងផ្ទះរបស់លោកអ្នកឱ្យបានត្រឹមត្រូវតាមគោលការណ៍ហុងស៊ុយ ដើម្បីបង្កើនយីអ៊ុន និងបង្កើនថាមពលបូកឱ្យរឹតតែល្អឡើង។

May 6, 2021

ក្រសួងអប់រំ ដាក់ឱ្យប្រើប្រាស់កម្មវិធីសិក្សាតាមអនឡាញ សម្រាប់សិក្សចាប់ថ្នាក់ទី1 ដល់ទី12

កម្មវិធីទូរសព្ទដៃឆ្លាតវៃ ដែលមានឈ្មោះថា «កម្មវិធីស្វ័យសិក្សា MoEYS E-Leaming» នឹងត្រូវបាន ក្រសួងអប់រំ យុវជន និងកីឡា ដាក់ឱ្យដំណើរការចាប់ពីថ្ងៃស្អែកនេះតទៅ សម្រាប់ឱ្យសិស្សានុសិស្ស សិក្សាតាមប្រពន្ធអ៊ីនធើណិត។

ក្រសួងអប់រំ សហការជាមួយ សហភាពសហព័ន្ធយុវជនកម្ពុជា ផលិតកម្មវិធីទូរសព្ទដៃឆ្លាតវៃមួយដែលមានឈ្មោះថា «កម្មវិធីស្វ័យសិក្សា MoEYS E-Leaming» ដែលបង្កើតឡើងដោយយោងទៅតាមចក្ខុវិស័យរបស់ក្រសួងអប់រំ និងបរិបទឧស្សាហកម្ម 4.0 ព្រមទាំងជា ការឆ្លើយតបទៅនឹងបញ្ហាCovid-19ផងដែរ។ នេះបើតាមសេចក្ដីជំរាបជូន ប្រធានមន្ទីរអប់រំ យុវជន និងកីឡា រាជធានី-ខេត្ត របស់រដ្ឋមន្ត្រីនៃក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន ចុះថ្ងៃទី5 ខែឧសភា ឆ្នាំ2021។

ក្រសួងអប់រំ បានឱ្យដឹងថា «កម្មវិធីស្វ័យសិក្សា MoEYS E-Leaming» សម្រាប់សិស្សានុសិស្ស ចាប់ពីថ្នាក់ទី1 ដល់ទី12 នេះ មានសៀវភៅសិក្សាអេឡិចត្រូនិក សៀវភៅសិក្សាគោល សៀវភៅកំណែអំណានទូទៅ ចំណេះដឹងសកល រឿងនិទាន កម្មវិធីតេស្តសមត្ថភាពសិស្ស និងមានទំព័រព័ត៌មានអប់រំផងដែរ។

«កម្មវិធីស្វ័យសិក្សា MoEYS E-Leaming» នឹងត្រូវបានដាក់ឱ្យប្រើប្រាស់ចាប់ពីថ្ងៃទី7 ខែឧសភា ឆ្នាំ2021។ អាណាព្យាបាល សិស្សានុសិស្ស និងសាធារណជន អាចទាញយកកម្មវិធី MoEYS E-Leaming ដោយគ្រាន់តែចូលទៅកាន់គេហទំព័រ http://onelink.to/moeysapp , កម្មវិធី PlayStore, AppStore និង App Gallery នៅលើទូរស័ព្ទដៃ៕

ប្រភព៖ ក្រសួងអប់រំ
ដកស្រង់៖ បុត្រា

May 6, 2021

អាមេរិកគាំទ្រដល់ការលុបបំបាត់ «កម្មសិទ្ធិបញ្ញាសម្រាប់វ៉ាក់សាំង COVID-19»

រដ្ឋបាលរបស់លោក Joe Biden គាំទ្រដល់ការដកការគាំពារចំពោះកម្មសិទ្ធិបញ្ញាទាក់ទិននឹងវ៉ាក់សាំងបង្ការវីរុសCovid-19 ដែលនេះនាំមកនូវក្ដីសង្ឃឹមថ្មីដល់បណ្ដាប្រទេសក្រីក្រដែលកំពុងមានការលំបាកក្នុងការបញ្ជាទិញវ៉ាក់សាំងនេះ។

ប្រទេសឥណ្ឌា ជាទីដែល Covid-19 កំពុងរាតត្បាតខ្លាំង បាននាំមុខក្នុងការតស៊ូមតិនៅឯអង្គការពាណិជ្ជកម្មពិភពលោក (WTO) ដើម្បីអនុញ្ញាតឱ្យក្រុមហ៊ុនផលិតឱសថជាច្រើនផ្សេងទៀត អាចផលិតវ៉ាក់សាំងបង្ការវីរុសCovid-19 បានច្រើនជាងមុន ប៉ុន្តែមតិនេះត្រូវបានជំទាស់ដោយបណ្ដាក្រុមហ៊ុនផលិតឱសថធំ។

លោកស្រី Katherine Tai អ្នកតំណាងពាណិជ្ជកម្មរបស់សហរដ្ឋអាមេរិក កាលពីថ្ងៃទី5 ខែឧសភា ឆ្នាំ2021 បានប្រកាសថា បើទោះជាសិទ្ធិគ្រប់គ្រងកម្មសិទ្ធិបញ្ញាគឺជារឿងសំខាន់សម្រាប់ក្រុមហ៊ុននានា ប៉ុន្តែ ទីក្រុងវ៉ាស៊ីងតោន «គាំទ្រដល់ការដកវិធានការការពារកម្មសិទ្ធិបញ្ញា សម្រាប់វ៉ាក់សាំងCovid-19» ដើម្បីលុបបំបាត់មហារោគរាតត្បាតនេះ។

លោកស្រី Katherine Tai ថ្លែងថា៖ «នេះគឺជាវិបត្តិសុខាភិបាលសកល ហើយភាពមិនធម្មតារបស់ Covid-19 ទាមទារឱ្យមានវិធានការពិសេស»។ ការលើកឡើងនេះ កើតមានបន្ទាប់ពីលោកស្រី Katherine Tai បានជួបពិភាក្សាលើបញ្ហានេះជាមួយមេដឹកនាំរបស់ក្រុមហ៊ុនផលិតវ៉ាក់សាំងធំៗទាំងអស់របស់សហរដ្ឋអាមេរិក រួមមាន ក្រុមហ៊ុន Pfizer, Moderna និង Johnson & Johnson។

ប្រធានាធិបតី Joe Biden កំពុងទទួលរងសម្ពាធយ៉ាងធ្ងន់ នៅពេលភាគីជាច្រើន បាន និងកំពុងជំរុញឱ្យបោះបង់វិធានការការពារចំពោះក្រុមហ៊ុនផលិតវ៉ាក់សាំង ពិសេសគឺនៅក្នុងគ្រាដែលសហរដ្ឋអាមេរិក ត្រូវបានគេរិះគន់ថា រក្សាទុកវ៉ាក់សាំងCovid-19 ច្រើនហួសហេតុ ខណៈដែលបណ្ដាប្រទេសក្រីក្រ កំពុងជួបបញ្ហាអាសន្នធំ។

លោក Tedros Adhanom Ghebreyesus ប្រធានអង្គការសុខភាពពិភពលោក (WHO) បានហៅការសម្រេចរបស់សហរដ្ឋអាមេរិកថាជា «ប្រវត្តិសាស្ត្រ» និងជារបត់ថ្មីដ៏ធំសម្បើម នៅក្នុងការប្រយុទ្ធប្រឆាំងវីរុសCovid-19»។ ប៉ុន្តែ លោកស្រី Katherine Tai បានព្រមានថា ការចរចា «នឹងត្រូវចំណាយពេលយូរ ដោយសារតែ WTO ចេញសេចក្ដីសម្រេចដោយយោងទៅតាមការព្រមព្រៀង»។

ពិភពលោក បច្ចុប្បន្ន មានអ្នកជំងឺCovid-19 ជាង 3.2លាននាក់បានស្លាប់ ប៉ុន្តែ ប្រទេសអ្នកមានជាច្រើន បានទទួលជោគជ័យមួយចំនួនធំនៅក្នុងការទប់ស្កាត់វីរុសCovid-19 ដោយសារយុទ្ធនាការចាក់វ៉ាក់សាំង។ គិតមកដល់បច្ចុប្បន្ន ពិភពលោកបានចាក់វ៉ាក់សាំងជាង 1.2ពាន់លានដូស ប៉ុន្តែ ការចាក់វ៉ាក់សាំងនៅក្នុងបណ្ដាប្រទេសក្រីក្របំផុត មានមិនដល់ 1% នៅឡើយ។

សហរដ្ឋអាមេរិក មិនខ្វះវ៉ាក់សាំងដូចឥណ្ឌា និងបណ្ដាប្រទេសដទៃទៀតនោះទេ។ ពួកគេនឹងទទួលបានវ៉ាក់សាំងចំនួន 300លានដូសបន្ថែមទៀតនាពេលដ៏ខ្លីខាងមុខ ដែលតួលេខនៃវ៉ាក់សាំងនេះ ប្រហាក់ប្រហែលនឹងចំនួនប្រជាជនសរុបរបស់ប្រទេសនេះ។

ចំណែកនៅប្រទេសឥណ្ឌាវិញ បញ្ហាខ្វះវ៉ាក់សាំង កំពុងតែរារាំងកិច្ចប្រឹងប្រែងក្នុងការចាក់វ៉ាក់សាំងរបស់ប្រទេសនេះ។ កាលពីសប្ដាហ៍មុន រដ្ឋាភិបាលឥណ្ឌា បានប្រកាសអនុញ្ញាតឱ្យចាក់វ៉ាក់សាំងដល់ពលរដ្ឋដែលមានអាយុចាប់ពី 18ឆ្នាំឡើងទៅ ប៉ុន្តែ មានរដ្ឋចំនួន12 ប៉ុណ្ណោះ នៅក្នុងចំណោមរដ្ឋ និងដែនដីទាំង 36របស់ឥណ្ឌា មានវ៉ាក់សាំងគ្រប់គ្រាន់ដើម្បីចាក់៕

ប្រភព៖ AFP
ប្រែសម្រួល៖ បុត្រា

May 6, 2021

រដ្ឋបាលរាជធានីភ្នំពេញ ជូនដំណឹងស្ដីពី «លិខិតអនុញ្ញាតធ្វើដំណើរឆ្លងកាត់ «តំបន់ក្រហម» និង «តំបន់លឿងទុំ»

«លិខិតអនុញ្ញាតធ្វើដំណើរឆ្លងកាត់តំបន់ក្រហម និងលឿងទុំ បានអស់សុពលភាពចាប់ពីថ្ងៃទី6 ខែឧសភា ឆ្នាំ2021» នេះបើតាមសេចក្ដីជូនដំណឹងរបស់រដ្ឋបាលរាជធានីភ្នំពេញ ចុះថ្ងៃទី5 ខែឧសភា ឆ្នាំ2021។

រដ្ឋបាលរាជធានីភ្នំពេញ បានបញ្ជាក់ថា ម្ចាស់ក្រុមហ៊ុនដែលត្រូវការចាំបាច់នូវលិខិតធ្វើដំណើរឆ្លងកាត់ «តំបន់ក្រហម» និង «តំបន់លឿងទុំ» អាចដាក់ពាក្យស្នើសុំ នៅរដ្ឋបាលរាជធានី និងរដ្ឋបាលខណ្ឌទាំង14 ចាប់ពីថ្ងសទី6 ខែឧសភា ឆ្នាំ2021 តទៅ។

ព័ត៌មានលម្អិត សូមអានសេចក្ដីជូនដំណឹងរបស់រដ្ឋបាលរាជធានីភ្នំពេញ ដែលមាននៅខាងក្រោម៖
ប្រភព៖ រដ្ឋបាលរាជធានីភ្នំពេញ
ដកស្រង់៖ បុត្រា

May 6, 2021

វ៉ាក់សាំងCovid-19 នៅកម្ពុជា! តួលេខពលរដ្ឋដែលបានចាក់រួចរាល់ នឹងកើនដល់ជាង2លាននាក់ បន្ទាប់ពីបញ្ចប់ការចាក់នៅតំបន់ក្រហម

នៅពេលដែលយុទ្ធនាការចាក់វ៉ាក់សាំងបង្ការ Covid-19 នៅតំបន់ក្រហមត្រូវបានបញ្ចប់ នោះតួលេខនៃពលរដ្ឋដែលបានចាក់វ៉ាក់សាំងរួចរាល់ នឹងកើនដល់ជាង 2លាននាក់ ស្មើនឹងជាង 20% នៃពលរដ្ឋចំនួន 10លាននាក់ដែលគ្រោងនឹងទទួលបានការចាក់វ៉ាក់សាំង។

នៅព្រឹកថ្ងៃទី05 ខែឧសភា ឆ្នាំ2021 សម្ដេច ហ៊ុន សែន ប្រមុខរដ្ឋាភិបាលកម្ពុជា បានមានប្រសាសន៍ថា យុទ្ធនាការចាក់វ៉ាក់សាំងនៅក្នុងតំបន់ក្រហម ប្រព្រឹត្តិទៅបានយ៉ាងល្អប្រសើរ និងនាំឱ្យតួលេខអ្នកបានទទួលការចាក់វ៉ាក់សាំងសរុបទូទាំងប្រទេស កើនឡើងដល់ជាង 1.5លាននាក់ ស្មើនឹងជាង 15% នៃចំនួនប្រជាជនដែលត្រូវចាក់។

កន្លងមក វ៉ាក់សាំងចំនួន 9សែនដូសហើយដែលត្រូវបានគណៈកម្មការចំពោះកិច្ច បញ្ជូនទៅឱ្យកងទ័ព ដើម្បីចូលរួមជួយចាក់វ៉ាក់សាំងដល់ពលរដ្ឋនៅក្នុងតំបន់ក្រហម។ ក៏ប៉ុន្តែ ពលរដ្ឋដែលត្រូវការចាក់វ៉ាក់សាំងគឺមានរហូតទៅដល់ជាង 5.2សែននាក់ ខណៈរដ្ឋាភិបាលមានតែ 9សែនដូសប៉ុណ្ណោះ ក្នុងនោះពលរដ្ឋម្នាក់ត្រូវចាក់ពីរដូស។

យ៉ាងនេះក្ដី ប្រមុខរដ្ឋាភិបាល បានថ្លែងបញ្ជាក់ថា នៅក្នុងតំបន់ក្រហមនេះ ដរាបណាការចាក់វ៉ាក់សាំងជូនពលរដ្ឋមិនទាន់គ្រប់គ្រាន់ រដ្ឋាភិបាលនឹងមិនដើរចេញចោលប្រជាជនណាម្នាក់នោះទេ។ នេះបើតាមប្រសាសន៍របស់ សម្ដេចតេជោ ហ៊ុន សែន៕

ប្រភព៖ AKP
ដកស្រង់៖ បុត្រា

May 5, 2021

វ៉ាក់សាំងបង្ការ Covid-19 ចំនួន 1លានដូសទៀត នឹងមកដល់កម្ពុជា នៅសប្ដាហ៍ក្រោយ

យុទ្ធការចាក់វ៉ាក់សាំងទូទាំងរាជធានីភ្នំពេញ និងខេត្តកណ្តាល នឹងត្រូវបានដំណើរការ បន្ទាប់ពីយុទ្ធនាការចាក់វ៉ាក់សាំងនៅក្នុងតំបន់ក្រហម ដើម្បីកាត់ផ្ដាច់ជំងឺCovid-19 នៅពេលវ៉ាក់សាំង 1លានដូសមកដល់កម្ពុជានៅសប្ដាហ៍ក្រោយ។

នៅព្រឹកថ្ងៃទី5 ខែឧសភានេះ ប្រមុខរដ្ឋាភិបាលកម្ពុជា សម្ដេចតេជោ ហ៊ុន សែន មានប្រសាសន៍ថា បន្ទាប់ពីការចាក់វ៉ាក់សាំងក្នុងតំបន់ក្រហមរួចហើយ រាជរដ្ឋាភិបាលនឹងបន្តចាក់វ៉ាក់សាំង នៅទូទាំងរាជធានីភ្នំពេញ និងខេត្តកណ្ដាល ក្នុងបំណងឱ្យពលរដ្ឋក្នុងតំបន់នេះ បានចាក់វ៉ាក់សាំងគ្រប់គ្នា។

វ៉ាក់សាំងបង្ការ Covid-19 ចំនួន 1លានដូសទៀតនឹងមកដល់កម្ពុជា នាពេលដ៏ខ្លីខាងមុខ ក្នុងនោះមាន 5សែនដូស នឹងមកដល់នៅថ្ងៃទី11 ខែឧសភា និង 5សែនដូសទៀត មកដល់នៅថ្ងៃទី15 ខែឧសភា ដូច្នេះ កម្ពុជា នឹងមិនខ្វះវ៉ាក់សាំងនោះទេ។ នេះបើតាមការឱ្យដឹងពីប្រមុខរដ្ឋាភិបាល។

សម្ដេច ហ៊ុន សែន តាមរយៈសារជាសំឡេង បានមានប្រសាសន៍ថា៖ «យើងនឹងស្រោចទីក្រុងភ្នំពេញនិងខេត្តកណ្តាលឱ្យជន់លិចទៅដោយវ៉ាក់សាំង ប៉ុន្តែដំបូងនេះ យើងធ្វើនៅក្នុងក្របខណ្ឌតំបន់ក្រហម ហើយគ្រាន់តែតំបន់ក្រហមនេះ ប្រជាជនមានទៅដល់ជាង 50ម៉ឺននាក់រួចទៅហើយ ដូច្នេះវាមិនយូរប៉ុន្មាន ទីក្រុងភ្នំពេញ និងខេត្តកណ្តាល នឹងជោគជាំទៅដោយវ៉ាក់សាំង ដែលយើងខិតខំរក ហើយដែលមានការជួយផ្គត់ផ្គង់ពីសាធារណៈរដ្ឋប្រជាមានិតចិន ដែលជាប្រភពផ្តល់ជំនួយមិនចេះរីងស្ងួតសម្រាប់យើង ទាំងជំនួយក៏ដូចជាការផ្គត់ផ្គង់តាមរយៈការទិញរបស់យើងផងដែរ»៕

ប្រភព៖ ទទក
ដកស្រង់៖ បុត្រា

May 5, 2021

Author: សឿន សំណាង