សឿន សំណាង - La Reine Media

កវីនិពន្ធប្រឆាំងកងទ័ពភូមា ត្រូវគេសម្លាប់ និងយកគ្រឿងក្នុងទៅបាត់!

ភរិយារបស់លោក Khet Thi ដែលជាអ្នកនិពន្ធប្រឆាំងនឹងរបបយោធាភូមា បានអះអាងថា សាកសពស្វាមីរបស់អ្នកស្រី ត្រូវគេយកគ្រឿងក្នុង នៅពេលត្រូវកងទ័ពចាប់ឃុំខ្លួន។

ភរិយារបស់ Khet Thi បានឱ្យដឹងថា ស្វាមីរបស់អ្នកស្រី ត្រូវក្រុមទាហាន និងប៉ូលិស ចាប់ខ្លួនទៅសួរនាំកាលពីថ្ងៃទី8 ខែឧសភា 2021។ Khet Thi អាយុ 45ឆ្នាំ គឺជាម្ចាស់កំណាព្យមួយដែលមានចំណងជើងថា «ពួកគេបាញ់តម្រង់ក្បាល ប៉ុន្តែមិនបានដឹងថា បដិវត្តស្ថិតនៅក្នុងបេះដូង»។

«ខ្ញុំត្រូវគេសួរនាំ។ គាត់ (ស្វាមី) ក៏ដូច្នេះ។ ពួកគេបានប្រាប់ថា គាត់កំពុងនៅក្នុងអង្គភាពសួរចម្លើយ ប៉ុន្តែ គាត់មិនបានវិលត្រលប់ជារៀងរហូត គឺនៅសល់តែសាកសពប៉ុណ្ណោះ» អ្នកស្រី Chaw Su ភរិយារបស់លោក Khet Thi បានឱ្យដឹងកាលពីម្សិលមិញ (09 ឧសភា)។

គ្រួសាររបស់ជនរងគ្រោះ រស់នៅក្នុងទីរួមស្រុកមួយនៃតំបន់ Sagaing ភាគកណ្ដាលប្រទេស ដែលជាតំបន់ប្រឆាំងយ៉ាងខ្លាំងក្លាយទៅនឹងរដ្ឋប្រហាររបស់កងទ័ពភូមា។

«ពួកគេបានហៅទូរស័ព្ទមកខ្ញុំនៅពេលព្រឹក ប្រាប់ថាឱ្យទៅកាន់មន្ទីរពេទ្យនៅ Monywa ដើម្បីជួបគាត់។ ខ្ញុំគិតថា គាត់គ្រាន់តែត្រូវបាក់ដៃ ឬប្រហាក់ប្រហែលនេះ។ ប៉ុន្តែ នៅពេលទៅដល់ រាងកាយរបស់គាត់បានស្ថិតនៅក្នុងសាលដាក់សាកសព ហើយគ្រឿងក្នុងរបស់គាត់ក៏ត្រូវគេយកទៅបាត់» អ្នកស្រី Chaw Su បាននិយាយទាំងទឹកភ្នែក នៅទីកន្លែងដែលមានចម្ងាយប្រហែល 100គម ពីផ្ទះ។

ខាងមន្ទីរពេទ្យ បានប្រាប់អ្នកស្រី Chaw Su ថា Khet Thi មានជំងឺបេះដូង ប៉ុន្តែ អ្នកស្រី មិនខ្ចីអានលិខិតបញ្ជាក់មរណភាពនេះទេ ព្រោះយល់ថា នេះមិនមែនជាការពិត។ អ្នកស្រី ឱ្យដឹងថា កងទ័ពប្រុងយកសាកសព Khet Thi ទៅកប់ ប៉ុន្តែ អ្នកស្រីបានសុំយកសពត្រលប់មកផ្ទះ។ អ្នកស្រីមិនបាននិយាយអំពីវិធីដែលស្វាមីរបស់ខ្លួនត្រូវគេយកគ្រឿងក្នុងនោះទេ។

អ្នកនាំពាក្យរបស់កងទ័ពមីយ៉ានម៉ា មិនបានឆ្លើយតបនឹងការស្នើឱ្យបកស្រាយអំពីការស្លាប់របស់លោក Khet Thi ជាកវីទីបី ដែលបានស្លាប់នៅក្នុងបាតុកម្មដែលអូសបន្លាយពេលជាងបីខែកន្លងមកនេះ។

Khet Thi គឺជាមិត្តរបស់ K Za Win អាយុ 39ឆ្នាំ ជាអ្នកនិពន្ធមួយរូប ដែលត្រូវបានបាញ់សម្លាប់ក្នុងបាតុកម្មនៅ Monywa កាលពីដើមខែមីនា។ សកម្មជនសង្គម វប្បធម៌ សិល្បៈ ជាច្រើនរូប ត្រូវបានចាប់ខ្លួនដោយសារតែមានមតិប្រឆាំងនឹងកងទ័ពភូមា។

Khet Thi ធ្លាប់ជាវិស្វករម្នាក់ មុនពេលបានឈប់ធ្វើការកាលពីឆ្នាំ2012 ដើម្បីផ្ដោតលើការសរសេរកំណាព្យ និងរកស៊ីចិញ្ចឹមជីវិតដោយរបរធ្វើការ៉ែម និងនំផ្អែម។

«ខ្ញុំមិនចង់ធ្វើជាអ្នកក្លាហាន មិនចង់ក្លាយជាអ្នកស្លាប់ដោយសារជំនឿ មិនចង់ក្លាយជាមនុស្សកំសាក មិនចង់ក្លាយជាមនុស្សឆោតល្ងង់» លោក Khet Thi សរសេរក្រោយរដ្ឋប្រហារបានពីរសប្ដាហ៍។ «ខ្ញុំមិនចង់គាំទ្រអយុត្តិធម៌។ បើសិនជានៅសល់មួយនាទីដើម្បីរស់ ខ្ញុំចង់រក្សាមនសិការឱ្យនៅស្អាតស្អំរហូតដល់ទីបំផុត»។

ក្រុមអ្នកតាមដានក្នុងស្រុក បានឱ្យដឹងថា ជនស៊ីវិលប្រមាណ 776នាក់ ត្រូវបានសម្លាប់នៅក្នុងបាតុកម្មប្រឆាំងកងទ័ពភូមា និង 3,778នាក់ផ្សេងទៀត កំពុងជាប់ឃុំ។ ភាគីកងទ័ព បានច្រានចោលរបាយការណ៍នេះ និងថា បុគ្គលិកសន្តិសុខយ៉ាងតិច 20នាក់របស់ខ្លួន បានស្លាប់នៅក្នុងករណីប៉ះទង្គិចជាមួយក្រុមបាតុករ៕

ប្រភព៖ Reuters
ប្រែសម្រួល៖ បុត្រា

May 10, 2021

Covid-19 នៅតំបន់អាស៊ីអាគ្នេយ៍ គិតត្រឹមព្រឹកថ្ងៃទី10 ខែឧសភា 2021៖ អ្នកស្លាប់សរុប ជិត 71,000នាក់

នៅក្នុងតំបន់អាស៊ីអាគ្នេយ៍ទាំងមូល តួលេខអ្នកឆ្លងវីរុសCovid-19 ថ្មី ក្នុងថ្ងៃទី09 ខែឧសភា ឆ្នាំ2021 មានចំនួន 17,778នាក់ ក្នុងនោះ កម្ពុជា មានចំនួន 520នាក់។

អ្នកស្លាប់សរុប ដោយសារ Covid-19 ក្នុងតំបន់នេះ កើនដល់ ចំនួន 70,971នាក់ នៅក្នុងថ្ងៃដដៃនេះ ខណៈអ្នកឆ្លង Covid-19 សរុបចំនួន 3,571,360នាក់៕

ប្រភព៖ Worldometers
ប្រែសម្រួល និងរៀបរៀងដោយ៖ បុត្រា

May 10, 2021

គ្រួសារប្រេះឆាតាំងតែពីយូរ ប៉ុន្តែ ហេតុអ្វីមកដល់ពេលនេះ ទើបប្ដី-ប្រពន្ធ Bill Gates ប្រកាសពីការលែងលះ?

ដើមសប្ដាហ៍នេះ លោក Bill Gates និងអ្នកស្រី Melinda Gates បានប្រកាសអំពីការលែងលះ ដោយសារវិបត្តិគ្រួសារកើតឡើងតាំងពីយូរមកហើយ ប៉ុន្តែ សំណួរ សួរថា «ហេតុអ្វី មកដល់ពេលនេះ ទើបពួកគេធ្វើការសម្រេចចិត្ត?»។

ទស្សនាវដ្ដី People ដកស្រង់ព័ត៌មានពីប្រភពមួយដែលសុំមិនបញ្ចេញឈ្មោះ បានឱ្យដឹងថា ការសម្រេចចិត្តនេះមិនមែនជារឿងចម្លែកនោះទេ សម្រាប់លោក Bill Gates និងភរិយា ដោយសារថា ពួកគេបានឆ្លងកាត់បញ្ហាជីវិតប្ដី-ប្រពន្ធ ជាយូរមកហើយ ធ្វើឱ្យអាពាហ៍ពិពាហ៍នេះ ពិបាក «ស្រោចស្រង់»។ មូលហេតុដែលពេលនេះ ទើបពួកគេធ្វើការសម្រេចចិត្តគឺ មកពីកូនៗទាំងបី សុទ្ធតែពេញវ័យ នៅពេលដែលកូនស្រីពៅ Phoebe នឹងមានអាយុពេញ 18ឆ្នាំ នៅខែកញ្ញាខាងមុខ។

ប្រភពព័ត៌មាន បានឱ្យដឹងថា៖ «មូលហេតុពិតគឺដោយសារកូនស្រីពៅ នៅរៀនមធ្យមសិក្សានៅឡើយ។ លោក Bill Gates និងភរិយា បានមូលមតិគ្នាក្នុងការរស់នៅជាមួយគ្នារហូតដល់កូនៗទាំងអស់ បានឆ្លងផុតវ័យ 18ឆ្នាំ។ ពួកគេយល់ព្រមទទួលយកជីវភាពរស់នៅយ៉ាងធ្ងន់ធ្ងរ រហូតដល់ដល់កូនៗពេញវ័យ ដូចទៅនឹងមនុស្សជាច្រើនផ្សេងទៀតបានធ្វើ»។

នៅក្នុងលិខិតលែងលះ ត្រូវបានដាក់ឡើងទៅកាន់តុលាការ កាលពីថ្ងៃទី3 ខែឧសភា ដែលទស្សនាវដ្ដី People បានដឹង បង្ហាញថា អ្នកស្រី Melinda និយាយថា ចំណងអាពាហ៍ពិពាហ៍របស់អ្នកស្រី និងសហស្ថាបនិករបស់ Microsoft បាន «ប្រេះស្រាំ រហូតដល់ថ្នាក់មិនអាចសង្គ្រោះបាន»។ ពួកគេបានបកស្រាយនៅក្នុងលិខិតរួមថា៖ «យើងលែងជឿជាក់ថា នឹងអាចបន្តរស់នៅជាមួយគ្នាជាប្ដី-ប្រពន្ធទៀតហើយ នៅក្នុងដំណាក់កាលបន្ទាប់របស់ជីវិត»។

ចំណែក ប្រភពព័ត៌មានរបស់ TMZ (អាមេរិក) បានឱ្យដឹងថា សមាជិកស្ទើរតែទាំងអស់របស់គ្រួសារនេះ ខឹងនឹងលោក Bill Gates។ អ្នកស្រី Melinda មានផែនការប្រកាសអំពីការលែងលះនេះកាលពីខែមីនាមកម្ល៉េះ និងមានគម្រោងទៅរស់នៅលើកោះឯកជនមួយ នៅ Grenada ជាមួយនឹងកូនៗ ដើម្បីគេចពីក្រុមអ្នកយកព័ត៌មាន នៅពេលសម្រេចចិត្តប្រកាសពីការលែងលះ។

ប៉ុន្តែ ពេលនោះ មេធាវីមិនទាន់រៀបចំកិច្ចព្រមព្រៀងរួចរាល់ ទើបធ្វើឱ្យការប្រកាសលែងលះ ត្រូវពន្យារពេលរហូតដល់ដើមខែឧសភា។ អ្នកស្រី Melinda និងកូនៗ មានបំណងសង្គ្រោះគ្រួសារនេះ ប៉ុន្តែ លោក Bill Gates បានបង្ហាញការមិនយល់ស្រប ដែលនេះគឺជាមូលហេតុបណ្ដាលឱ្យអ្នកស្រី Melinda និងកូនៗ មិនពេញចិត្ត៕

ប្រភព៖ Sputnik
ប្រែសម្រួល៖ បុត្រា

May 9, 2021

តើផ្ទះដែលនៅហើយមានបាន នៅហើយមានសេចក្ដីសុខនោះ មានរូបរាងលក្ខណ:បែបណាទៅ?

ការរៀបចំតុបតែងផ្ទះតាមគោលការណ៍ហុងស៊ុយ ជួយបង្កើនលាភសំណាង និងបង្កើនរាសី សិរីមង្គលដល់អ្នកដែលរស់នៅក្នុងផ្ទះ ជួយឱ្យរស់នៅហើយមានបាន និងចម្រុងចម្រើនរុងរឿងឡើង ថ្ងៃនេះយើងសូមនាំយករូបរាងលក្ខណៈរបស់ផ្ទះ ដែលចូលនៅហើយចម្រើនរុងរឿងមានបាននោះ មកជម្រាបជូនដូចតទៅ ៖

លក្ខណៈទី1. នៅហើយរុងរឿង

ផ្ទះដែលមានរូបរាងលក្ខណៈជារាងមូល វែងជ្រៅទៅក្នុង ឬមានរូបរាង 4ជ្រុង គឺជាផ្ទះដែលមានហុងស៊ុយល្អណាស់។ ជាផ្ទះនៃភាពជាសិរីមង្គល លើកតម្កើងឱ្យអ្នកស្នាក់អាស្រ័យនៅ គិតចង់ធ្វើអ្វី ក៏រីកចម្រើនទៅមុខ រីកធំឡើង មានតែសេចក្តីសុខ និងភាពកក់ក្តៅ។

លក្ខណៈទី2. ទ្វារផ្ទះ បង្កើនជោគសំណាង

ផ្ទះដែលមានទ្វារចូលនៅខាងឆ្វេងនៃតួផ្ទះ តាមគោលការណ៍ហុងស៊ុយ គេហៅថា ជាទីតាំងសត្វនាគបៃតង ជាលក្ខណៈដែលល្អខ្លាំងណាស់សម្រាប់កន្លែងមាត់ទ្វារ ដែលបើកចូល-ចេញជាប់រហូត ព្រោះទីតាំងដែលថានេះបើបានកម្រើកហើយ នឹងលើកតម្កើងឱ្យផ្ទះមានលាភសំណាងហូរចូលមកជាប់ជានិច្ច។

លក្ខណៈទី3. ជណ្តើរផ្ទះដែលល្អ

ជណ្តើរផ្ទះដែលល្អ ត្រូវមានចំនួនកាំជាលេខសេស ទើបជាលេខមង្គល ទីតាំងរបស់ជណ្តើរផ្ទះដែលល្អ គួរស្ថិតនៅជាប់នឹងជញ្ជាំងខាងណាមួយរបស់ផ្ទះ ព្រោះជណ្តើរផ្ទះដែលមានលក្ខណៈបែបនេះ នឹងធ្វើឱ្យមានជោគសំណាងល្អ ហុចផលឱ្យអ្នករស់នៅក្នុងផ្ទះ មានភាពមានបាន និងចម្រុងចម្រើនល្អទៅមុខជានិច្ច។

លក្ខណៈទី4. ទិសដែលជាមង្គលរបស់ផ្ទះ

ផ្ទះដែលចូលនៅហើយ មានសិរីមង្គលតាមក្បួនហុងស៊ុយនោះ គឺផ្ទះដែលមានទីតាំង បែរមុខទៅរកទិសខាងត្បូង ដែលជាទីទំនេរ ព្រោះនឹងមានក្រសែខ្យល់ដែលល្អ បក់នាំតែថាមពលដែលជាសិរីមង្គលចូលមកក្នុងផ្ទះ ហុចផលឱ្យអ្នកដែលស្នាក់អាស្រ័យនៅ បានទទួលតែលាភសំណាង និងរស់នៅប្រកបដោយសេចក្តីសុខ។

លក្ខណៈទី5. ផ្ទះដែលចូលនៅហើយ មានតែភាពសម្បូរសប្បាយ

រូបរាងលក្ខណៈរបស់ទីស្នាក់អាស្រ័យ ដែលមានរូបទម្រង់ផ្នែកខាងក្រោយ ធំទូលាយ ជាងផ្នែកខាងមុខ តាមក្បួនហុងស៊ុយ គេហៅលក្ខណៈនេះថា ជារូបទម្រង់ថង់មាស ដែលជាលក្ខណៈដ៏ល្អមួយ អ្នករស់នៅក្នុងផ្ទះដែលមានលក្ខណៈបែបនេះ នឹងបានទទួលតែលាភសំណាង និងថាមពលដែលល្អ នៅចាំលើកតម្កើងឱ្យមានតែសេចក្តីសុខ ក្តីសម្បូរសប្បាយជាប់ជានិច្ច៕

May 9, 2021

អាសន្ន! អង់គ្លេស ណែនាំឱ្យមនុស្សក្រោមវ័យ 40ឆ្នាំ «កុំចាក់វ៉ាក់សាំង AstraZeneca»

គណៈកម្មការចំពោះកិច្ចចាក់វ៉ាក់សាំងរបស់ប្រទេសអង់គ្លេស (JCVI) កាលពីថ្ងៃទី7 ខែឧសភា បានឱ្យដឹងថា ពលរដ្ឋក្រោមវ័យ 40ឆ្នាំ នឹងត្រូវបានចាក់វ៉ាក់សាំងបង្ការវីរុសCovid-19 ផ្សេង ជំនួសឱ្យវ៉ាក់សាំងរបស់ក្រុមហ៊ុន AstraZeneca។

ក្រុមអ្នកជំនាញបានឱ្យដឹងថា អត្រានៃការឆ្លង Covid-19 នៅអង់គ្លេស បានថយចុះ ដែលនេះគឺមានន័យថា ហានិភ័យនៃការប្រឈមនឹងបញ្ហាដែលកើតឡើងដោយសារការចាក់វ៉ាក់សាំង អាចធំជាងហានិភ័យនៃការឆ្លងវីរុស។ យោងតាមការវិភាគរបស់ស្ថាប័នគ្រប់គ្រង បានបង្ហាញថា អត្រាកកឈាមដ៏កម្រ (និយាយរួម) បន្ទាប់ពីចាក់វ៉ាក់សាំង AstraZeneca គឺប្រមាណ 1/100,000នាក់, អត្រានេះកើនឡើងប្រហែល 1/60,000នាក់ ចំពោះមនុស្សវ័យ 30ឆ្នាំ។ អត្រាស្លាប់ក្រោយការចាក់វ៉ាក់សាំងនេះ និយាយរួមគឺ ប្រហែល 2/1000,000នាក់ ខណៈវ័យចាប់ពី 30 ដល់ 39 គឺ 4.5/1,000,000នាក់។

ទិន្នន័យរបស់រដ្ឋាភិបាល ដែលបានប្រកាសកាលពីថ្ងៃទី6 ខែឧសភា បានឱ្យដឹងថា គិតមកដល់អំឡុងពេលនេះ ប្រទេសអង់គ្លេស រកឃើញករណីកកឈាមដ៏កម្រ ចំនួន 242នាក់ ក្រោយពីបានចាក់វ៉ាក់សាំងយ៉ាងតិច 1ដូស ដែលនេះគឺ កើន 33ករណី បើធៀបនឹងសប្ដាហ៍មុន ក្នុងនោះ មាន 49នាក់បានស្លាប់។ 2/3 នៃអ្នកស្ថិតក្រោមវ័យ 60ឆ្នាំ បានជួបផលវិបាក បន្ទាប់ពីបានចាកក់វ៉ាក់សាំង។

ការណែនាំថ្មីរបស់ប្រទេសអង់គ្លេស ដែលថា ក្រុមមនុស្សក្រោមវ័យ 40ឆ្នាំ «កុំចាក់វ៉ាក់សាំង AstraZeneca» គឺជាសម្ពាធមួយយ៉ាងធ្ងន់ធ្ងរសម្រាប់សាកលវិទ្យាល័យ Oxford និងដៃគូសហការរបស់ខ្លួន គឺក្រុមហ៊ុន AstraZeneca។ ប្រទេសដាណឺម៉ាក កាលពីខែមេសា ឆ្នាំ2021 បានបញ្ឈប់ការប្រើប្រាស់វ៉ាក់សាំង AstraZeneca។ ចំណែកប្រទេសជាច្រើនផ្សេងទៀតនៅអឺរ៉ុប ក៏បានកាត់បន្ថយការចាក់វ៉ាក់សាំង AstraZeneca សម្រាប់យុវវ័យ ដោយសារភ័ស្ដុតាងនានា បង្ហាញថា បញ្ហាកកឈាម ភាគច្រើនកើតឡើងនៅលើអ្នកដែលមានវ័យនៅក្មេង។

ការស្រាវជ្រាវរបស់សាកលវិទ្យាល័យ Cambridge បានអះអាងថា ចំពោះមនុស្សក្រោមវ័យ 30ឆ្នាំ ហានិភ័យនៃការឆ្លងវីរុសCovid-19 និងហានិភ័យដែលកើតឡើងដោយសារការចាក់វ៉ាក់សាំងគឺប្រហាក់ប្រហែលគ្នា អាស្រ័យលើអត្រានៃការឆ្លងនៅក្នុងសហគមន៍ ក្នុងអំឡុងពេលនីមួយ។

អង់គ្លេសគឺជាប្រទេសមួយក្នុងចំណោមប្រទេសដែលបានធ្វើយុទ្ធនាការចាក់វ៉ាក់សាំង ប្រកបដោយប្រសិទ្ធភាពជាងគេក្នុងពិភពលោក ដោយសារវ៉ាក់សាំង AstraZeneca។ បច្ចុប្បន្ន យុវវ័យប្រឈមនឹងហានិភ័យនៃការឆ្លងវីរុសCovid-19 មានកម្រិតទាបជាងឆ្ងាយ បើធៀបនឹងមួយរយៈពេលកន្លងទៅ៕

ប្រភព៖ Financial Times
ប្រែសម្រួល៖ បុត្រា

May 8, 2021

វ៉ាក់សាំង Covid-19! វៀតណាម៖ បុគ្គលិកសុខាភិបាលម្នាក់ បានស្លាប់ ក្រោយការចាក់វ៉ាក់សាំង Covid-19

ក្រសួងសុខាភិបាលវៀតណាម កាលពីយប់ថ្ងៃទី7 ខែឧសភា បានប្រកាសថា បុគ្គលិកសុខាភិបាលភេទស្រីម្នាក់ អាយុ 35ឆ្នាំ ធ្វើការនៅមន្ទីរពេទ្យខេត្ត An Giang ភាគខាងត្បូងប្រទេសនេះ បានបាត់បង់ជីវិត បន្ទាប់ពីបានទទួលការចាក់វ៉ាក់សាំងបង្ការវីរុសCovid-19។

មូលហេតុនៃការស្លាប់នេះ ត្រូវបានក្រុមប្រឹក្សាជំនាញនៃនាយកដ្ឋានសុខាភិបាលរបស់ខេត្ត An Giang បញ្ជាក់ថា ដោយសារ «ប្រតិកម្មនឹងប្រភេទថ្នាំ non steroid (បន្ថយការឈឺចាប់ និងប្រឆាំងរលាក) ដែលជាករណីកម្រជួប នៅពេលចាក់វ៉ាក់សាំងបង្ការ Covid-19»។

នេះគឺជាករណីស្លាប់ដំបូងក្រោយការចាក់វ៉ាក់សាំង Covid-19 នៅប្រទេសវៀតណាម។ ជនរងគ្រោះខាងលើ ត្រូវបានចាក់វ៉ាក់សាំង Covid-19 កាលពីព្រឹកថ្ងៃទី6 ខែឧសភា ឆ្នាំ2021។

វៀតណាម បានចាប់ផ្ដើមយុទ្ធនាការចាក់វ៉ាក់សាំងបង្ការ Covid-19 របស់ក្រុមហ៊ុន AstraZeneca តាំងពីថ្ងៃទី8 ខែមីនា ឆ្នាំ2021។ បច្ចុប្បន្ន ប្រទេសនេះ បានចាក់ជូនពលរដ្ឋចំនួន 747,827នាក់រួចហើយ។ អ្នកដែលទទួលបានអាទិភាពក្នុងការចាក់វ៉ាក់សាំង រួមមានមន្ត្រី និងបុគ្គលិកពេទ្យជួរមុខ, សមាជិកនៃសហគមន៍ Covid-19, គណៈកម្មការគ្រប់គ្រងវីរុស, ប៉ូលិស និងទាហាន។

គិតមកដល់បច្ចុប្បន្ន វៀតណាម បានទទួលវ៉ាក់សាំង AstraZeneca ពីរលើកមកហើយ ក្នុងនោះ លើកទីមួយ មាន 117,600ដូស នាំចូលដោយក្រុមហ៊ុន VNVC និងលើកទីពីរ ជាង 800,000ដូស ដែលផ្ដល់ដោយយន្តការ Covax ដែលដឹកនាំដោយអង្គការសហប្រជាជាតិ។

យោងតាមការវិភាគរបស់ស្ថាប័នគ្រប់គ្រង បានបង្ហាញថា អត្រាកកឈាមដ៏កម្រ (និយាយរួម) បន្ទាប់ពីចាក់វ៉ាក់សាំង AstraZeneca គឺប្រមាណ 1/100,000នាក់, អត្រានេះកើនឡើងប្រហែល 1/60,000នាក់ ចំពោះមនុស្សវ័យ 30ឆ្នាំ។ អត្រាស្លាប់ក្រោយការចាក់វ៉ាក់សាំងនេះ និយាយរួមគឺ ប្រហែល 2/1000,000នាក់ ខណៈវ័យចាប់ពី 30 ដល់ 39 គឺ 4.5/1,000,000នាក់។

ហ្វីលីពីន ផ្អាកការប្រើប្រាស់វ៉ាក់សាំង AstraZeneca សម្រាប់មនុស្សក្រោមអាយុ 60ឆ្នាំ។ ចំណែកអូស្ត្រាលីវិញ បានលើកទឹកចិត្តឱ្យពលរដ្ឋក្រោមវ័យ 50ឆ្នាំ ប្រើប្រាស់វ៉ាក់សាំងរបស់ Pfizer ខណៈដែលអ៊ីតាលី, បារាំង, ហូឡង់, អាល្លឺម៉ង់ និងប្រទេសជាច្រើនផ្សេងទៀតក្នុងសហភាពអឺរ៉ុប បានស្នើឱ្យចាក់វ៉ាក់សាំងនេះ សម្រាប់មនុស្សដែលមានវ័យនៅក្មេង៕

ប្រភព៖ VNE, Reuters
ប្រែសម្រួល៖ បុត្រា

May 8, 2021

ដំណឹងល្អ! វ៉ាក់សាំង Sinopharm របស់ចិន ទទួលបានការអនុម័តពី WHO រួចហើយ!

អង្គការសុខភាពពិភពលោក (WHO) បានអនុម័តលើវ៉ាក់សាំងបង្ការ Covid-19 របស់ក្រុមហ៊ុនចិន Sinopharm ដើម្បីប្រើប្រាស់ក្នុងករណីចាំបាច់បន្ទាន់។

«WHO ដាក់បញ្ចូលវ៉ាក់សាំងបង្ការវីរុសCovid-19 របស់ Sinopharm ដែលផលិតនៅរដ្ឋធានី ប៉េកាំង នៃប្រទេសចិន ទៅក្នុងបញ្ជីប្រើប្រាស់បន្ទាន់របស់ខ្លួនរួចហើយ។ នេះគឺជាវ៉ាក់សាំង Covid-19 ទី6 ក្នុងពិភពលោក ដែលត្រូវបាន WHO ទទួលស្គាល់ផ្នែកសុវត្ថិភាព ប្រសិទ្ធភាព និងគុណភាព» ប្រធាន WHO លោក Tedros Adhanom Ghebreyesu ថ្លែងនៅក្នុងសន្និសីទសារព័ត៌មាន កាលពីថ្ងៃទី7 ខែឧសភា។

លោក Tedros បានបន្តថា៖ «ក្រុមប្រឹក្សាយុទ្ធសាស្ត្រ រួមមានក្រុមអ្នកជំនាញផ្នែកចាក់វ៉ាក់សាំង (SASGE) បានពិនិត្យលើទិន្នន័យ និងស្នើឱ្យប្រើប្រាស់វ៉ាក់សាំងប្រភេទពីរដូសនេះ សម្រាប់មនុស្សដែលមានវ័យចាប់ពី 18ឆ្នាំឡើងទៅ»។

ដូច្នេះ នៅក្នុងបញ្ជីឈ្មោះវ៉ាក់សាំង Covid-19 ដែលត្រូវប្រើប្រាស់បន្ទាន់ របស់ WHO រួមមាន វ៉ាក់សាំងរបស់ក្រុមហ៊ុន Pfizer-BioNTech, Moderna, Johnson & Johnson, AstraZeneca និងក្រុមហ៊ុន Sinopharm។ ចំពោះវ៉ាក់សាំង AstraZeneca ដែលត្រូវបាន WHO អនុម័តឱ្យប្រើប្រាស់ នោះគឺប្រភេទដែលផលិតនៅប្រទេសឥណ្ឌា និងកូរ៉េខាងត្បូង។

ការបន្ថែមវ៉ាក់សាំង Sinopharm ទៅក្នុងបញ្ជីឈ្មោះខាងលើ របស់ WHO នឹងជួយឱ្យបណ្ដាប្រទេស មានមូលដ្ឋានគ្រប់គ្រាន់ដើម្បីអនុម័តក្នុងការបញ្ជាទិញ យកទៅប្រើប្រាស់ ពិសេសគឺបណ្ដាប្រទេសដែលមិនទាន់មានស្ថាប័នគ្រប់គ្រងស្ដង់ដាអន្តរជាតិដោយឡែករបស់ខ្លួន។

វ៉ាក់សាំងបង្ការ Covid-19 របស់ក្រុមហ៊ុនចិន Sinopharm បច្ចុប្បន្ន ត្រូវបានប្រើប្រាស់នៅក្នុងប្រទេស និងដែនដីចំនួន 42 ក្នុងពិភពលោក ឈរបន្ទាប់ពី AstraZeneca (166 ប្រទេស), Pfizer-BioNTech (94 ប្រទេស) និង Moderna (46 ប្រទេស)៕

ប្រភព៖ AFP
ប្រែសម្រួល៖ បុត្រា

May 8, 2021

Covid-19! ប្រជាពលរដ្ឋទាំងអស់នៅរាជធានីភ្នំពេញ នឹងទទួលបានការចាក់វ៉ាក់សាំង យ៉ាងយូរបំផុតក្នុងអំឡុងខែមិថុនា ឆ្នាំ2021

ដើម្បីប្រយុទ្ធប្រឆាំង និងឈានដល់ការបិទបញ្ចប់ការរាតត្បាតរបស់វីរុសCovid-19 នៅកម្ពុជា រាជរដ្ឋាភិបាល បានដាក់ចេញនូវ «យុទ្ធនាការជាតិចាក់វ៉ាក់សាំង» បង្ការវីរុសCovid-19 ដោយប្រើប្រាស់កម្លាំងសរុបរបស់ជាតិ។

ខាងលើនេះគឺជាខ្លឹមសារខ្លះនៃសេចក្ដីជូនដំណឹងស្ដីពី ការរក្សាសណ្ដាប់ធ្នាប់ របៀបរៀបរយ និងការអនុវត្តវិធានការសុខាភិបាល ក្នុង «យុទ្ធនាការជាតិចាក់វ៉ាក់សាំង» ជូនប្រជាពលរដ្ឋ នៅរាជធានីភ្នំពេញ ដែលត្រូវបានចុះនៅថ្ងៃទី7 ខែឧសភា ឆ្នាំ2021 ដោយអភិបាលរាជធានីភ្នំពេញ ឯកឧត្តម ឃួង ស្រេង។

នៅក្នុងសេចក្ដីជូនដំណឹងនេះ រដ្ឋបាលរាជធានី បានបញ្ជាក់ថា ពលរដ្ឋនៅក្នុងភូមិសាស្ត្ររាជធានីភ្នំពេញ នឹងទទួលបានការចាក់វ៉ាក់សាំងបង្ការ Covid-19 គ្រប់ៗគ្នា ទៅតាមជំហាននីមួយៗ និងយ៉ាងយូរត្រឹមខែមិថុនា ឆ្នាំ2021។

រដ្ឋបាលរាជធានី ក៏បានស្នើឱ្យពលរដ្ឋ មានការអត់ធ្មត់ក្នុងការរង់ចាំ និងចៀសវាងការចំណាយប្រាក់ទិញលិខិតអញ្ជើញទៅចាក់វ៉ាក់សាំង តាមកលល្បិចរបស់ជនឱកាសនិយមផងដែរ។

ព័ត៌មានបន្ថែម សូមអានសេចក្ដីជូនដំណឹងដែលមាននៅខាងក្រោម៖
ប្រភព៖ ក្រសួងព័ត៌មាន
ដកស្រង់៖ បុត្រា

May 7, 2021

Covid-19! កម្ពុជា ដាក់ផែនការស្វែងរកវ៉ាក់សាំងចាក់ជូនពលរដ្ឋ ឱ្យរួចរាល់នៅឆ្នាំ2022 ខណៈអ្នកឆ្លងវីរុសនេះ បច្ចុប្បន្ន កើនដល់ជាង 18,170នាក់

រាជរដ្ឋាភិបាលកម្ពុជា ដាក់ផែនការស្វែងរកវ៉ាក់សាំងចាក់ជូនពលរដ្ឋ ឱ្យបានរួចរាល់នៅឆ្នាំ2022 នេះបើយោងតាមផែនការយុទ្ធសាស្ត្រ យុទ្ធនាការជាតិចាក់វ៉ាក់សាំងបង្ការវីរុសCovid-19 សំដៅបង្កើតឱ្យបាននូវភាពស៊ាំនៃសង្គម សេដ្ឋកិច្ចនៅទូទាំងប្រទេស នាឆ្នាំ2021។

កម្ពុជាបាន និងកំពុងស្វែងជំនួយ ក៏ដូចជាទិញវ៉ាក់សាំងCovid-19 ពីបណ្ដាប្រទេសអ្នកផលិត និងស្ថាប័ន អង្គការអន្តរជាតិនានា។ ជាលទ្ធផល កម្ពុជា បានក្លាយជាប្រទេសទីមួយក្នុងតំបន់អាស៊ីអាគ្នេយ៍ ដែលទទួលបានជំនួយជាវ៉ាក់សាំងពីកម្មវិធី COVAX ដែលដឹកនាំដោយអង្គការសហប្រជាជាតិ និងវ៉ាក់សាំង Sinopharm ពីប្រទេសចិន។

យោងតាមផែនការរៀបចំសម្រាប់ការទិញវ៉ាក់សាំងរបស់រាជរដ្ឋាភិបាល នៅក្នុងខែឧសភា ឆ្នាំ2021 នេះ កម្ពុជា គ្រោងនឹងទទួលបានវ៉ាក់សាំងចំនួន 3លានដូស, ខែមិថុនា 3លានដូស, ខែកក្កដា 1លានដូស, ខែសីហា 1លានដូស និងខែកញ្ញា ឆ្នាំ2021 នឹងទទួលបាន 1.5លានដូស។ សម្រាប់ឆ្នាំ2022 កម្ពុជា គ្រោងនឹងទទួលបានវ៉ាក់សាំងបង្ការវីរុសCovid-19 សរុបចំនួន 10,430,600ដូស។
ទាក់ទងនឹងការបញ្ជាទិញ ក៏ដូចជាជំនួយជាវ៉ាក់សាំងនេះដែរ គិតមកដល់បច្ចុប្បន្ន (ថ្ងៃទី7 ខែឧសភា ឆ្នាំ2021) កម្ពុជា បានទទួលវ៉ាក់សាំងសរុបចំនួន 4,024,000ដូសរួចហើយ។

សូមរំលឹកថា ប្រមុខរដ្ឋាភិបាលកម្ពុជា ធ្លាប់បានមានប្រសាសន៍ថា វ៉ាក់សាំងបង្ការ Covid-19 ចំនួន 0.5លានដូស នឹងមកដល់កម្ពុជា នៅថ្ងៃទី11 ខែឧសភាខាងមុខនេះ ខណៈ 0.5លានដូសទៀតក៏នឹងមកដល់កម្ពុជា នៅថ្ងៃទី15 ខែឧសភា ឆ្នាំ2021នេះផងដែរ។

គិតមកដល់បច្ចុប្បន្ន កម្ពុជាមានអ្នកឆ្លងវីរុសCovid-19 សរុបចំនួន 18,179នាក់ ក្នុងនោះមានអ្នកស្លាប់ 114នាក់, អ្នកជាសះស្បើយ 6,884នាក់។ ក្នុងអំឡុងថ្ងៃទី6 ខែឧសភា ឆ្នាំ2021 កម្ពុជា បានរកឃើញអ្នកវិជ្ជមានថ្មីចំនួន 558នាក់ ប៉ុន្តែ ពុំមានករណីស្លាប់ដោយសារ Covid-19 នោះទេ៕

ប្រភព៖ ក្រសួងសុខាភិបាល/ក្រសួងព័ត៌មាន
ដកស្រង់៖ បុត្រា

May 7, 2021

អតីតប្រធានាធិបតី និងជាប្រធានសភា នៃប្រទេស ម៉ាល់ឌីវ ត្រូវគេលួចធ្វើឃាត

អតីតប្រធានាធិបតី នៃប្រទេសម៉ាល់ឌីវ (Maldives) ដែលបច្ចុប្បន្នជា ប្រធានសភា ត្រូវរងរបួសធ្ងន់ និងត្រូវបញ្ជូនទៅកាន់មន្ទីរពេទ្យ បន្ទាប់ពីអ្វីដែលក្រុមមន្ត្រីនិយាយថាជា ការលួចធ្វើឃាត នៅក្នុងរដ្ឋធានី។

ក្រុមមន្ត្រីឱ្យដឹងថា អតីតប្រធានាធិបតី Mohamed Nasheed អាយុ 53ឆ្នាំ កំពុងត្រៀមឈានជើងឡើងរថយន្តរបស់ខ្លួន នៅឯរដ្ឋធានី Male កាលពីថ្ងៃទី06 ឧសភា ក៏ស្រាប់តែគ្រាប់បែកមួយគ្រាប់ដែលត្រូវបង្កៃនៅលើម៉ូតូក្បែរនោះ បានផ្ទុះ។

«Mohamed Nasheed បានរួចផុតពីអំពើឃាតកម្មមួយ។ គាត់ត្រូវរបួស ប៉ុន្តែ សុខភាពបានប្រសើរឡើងវិញហើយ» នេះបើតាមការឱ្យដឹងពីមន្ត្រីរដ្ឋាភិបាលម៉ាល់ឌីវ។

អង្គភាពប៉ូលិសប្រដាប់អាវុធ និងកម្លាំងសន្តិសុខ បានឡោមព័ទ្ធ និងដាក់បំរាមគោចរនៅតំបន់ជុំវិញកន្លែងកើតហេតុ។ ប៉ូលិសបានបញ្ជាក់ថា Mohamed Nasheed រងរបួស និងកំពុងទទួលការព្យាបាលនៅមន្ទីរពេទ្យ ADK ប៉ុន្តែ មិនបាននិយាយលម្អិតនោះទេ។

ហេតុការណ៍នេះ បានកើតឡើងនៅមុនពេលបំរាមគោចរពេលយប់នៅរដ្ឋធានី ដើម្បីទប់ស្កាត់ Covid-19 ចាប់ផ្ដើមមានសុពលភាព។ ប្រទេសដែលមានប្រជុំកោះចំនួន 26 នេះ កំពុងរងការវាយលុកខ្លាំងពី Covid-19 ពិសេសគឺនៅរដ្ឋធានី Male។

លោក Nasheed គឺជាអតីតអ្នកទោសនយោបាយម្នាក់ ដែលបានក្លាយជាប្រធានាធិបតីដែលកើតឡើងដោយការបោះឆ្នោតតាមបែបប្រជាធិបតេយ្យដំបូងគេនៅប្រទេសម៉ាល់ឌីវ កាលពីដើមឆ្នាំ2008។ លោកត្រូវបានទម្លាក់ពីតំណែងដោយរដ្ឋប្រហារកាលពីឆ្នាំ2012 និងត្រូវបានកាត់ទោសឱ្យជាប់ពន្ធនាគារ 13ឆ្នាំ កាលពីឆ្នាំ2015 ក្រោមបទចោទ ភេរវកម្ម ដែលនេះ ត្រូវបានក្រុមការពារសិទ្ធិមនុស្សចាត់ទុកថាជា រឿងនយោបាយ។

ប្រធានាធិបតី Abdulla Yameen បានអនុញ្ញាតឱ្យលោក Nasheed ធ្វើដំណើរទៅព្យាបាលជំងឺ និងរស់នៅនិរទេសខ្លួននៅប្រទេសអង់គ្លេស ប៉ុន្តែ បានត្រលប់មកប្រទេសវិញកាលពីឆ្នាំ2018។ Nasheed បានក្លាយជាប្រធានសភា ជាតំណែងដែលមានអំណាចធំជាងគេទីពីររបស់ប្រទេសនេះ ក្រោយការបោះឆ្នោតកាលពីឆ្នាំ2019។

Mohamed Nasheed ប្រឆាំងនឹងការដែលរដ្ឋាភិបាលរបស់លោក Abdulla Yameen ទទួលបានប្រាក់កម្ចីដែលមានការខ្ពស់យ៉ាងច្រើនសន្ធឹកពីប្រទេសចិន និងបានចោទប្រកាន់ថា ប្រធានាធិបតីបច្ចុប្បន្ន យកកោះទាំងនេះដាក់បញ្ចាំឱ្យប្រទេសចិន ដើម្បីយកប្រាក់មកអនុវត្តគម្រោងសាងសង់ហេដ្ឋារចនាសម្ព័ន្ធ៕

ប្រភព៖ AFP
ប្រែសម្រួល៖ បុត្រា

May 7, 2021

Author: សឿន សំណាង