សឿន សំណាង - La Reine Media

(វីដេអូ)-អគារកម្ពស់ 355ម៉ែត្រ នៅប្រទេសចិន រង្គើញាប់ញ័រ បើទោះមិនមានការរញ្ជួយដី និងមូលហេតុដែលអាចកើតមាន

អ្នកថ្មើរជើងនៅតាមដងផ្លូវក្នុងទីក្រុង Shenzhen ប្រទេសចិន នាំគ្នារត់រកកន្លែងសុវត្ថិភាព នៅពេលអគារកម្ពស់ 355ម៉ែត្រ កំពុងញាប់ញ័រ បើទោះបីជាមិនមានហេតុការណ៍រញ្ជួយដីក៏ដោយ។

អគារ SEG Plaza ដែលជានិមិត្តរូបរបស់ទីក្រុង Shenzhen នៃខេត្ត Guangdong បានចាប់ផ្ដើមញាប់ញ័រនៅវេលាម៉ោងប្រហែល 13 ថ្ងៃ18 ខែឧសភា (ម៉ោងនៅកម្ពុជា) បណ្ដាលឱ្យមនុស្សរាប់ពាន់នាក់ ត្រូវជម្លៀសខ្លួនចេញទៅរកកន្លែងសុវត្ថិភាព។

ទាក់ទិននឹងបញ្ហានេះ វិស្វករ Lu Jianxin យល់ថា ឥទ្ធិពលរ៉េសូណង់ (resonance effect) ទំនងជាបានបណ្ដាលឱ្យអគារ SEG Plaza នៅទីក្រុង Shenzhen ត្រូវរង្គើញាប់ញ័រ ទោះជាមិនមានករណីរញ្ជួយដី។

«បើសិនជាមិនមានការរញ្ជួយដី ការញាប់ញ័ររបស់អគារ SEG Plaza គឺមិនមែនជាបញ្ហាធម្មតានោះទេ។ យោងតាមការវាយតម្លៃលើព័ត៌មានបច្ចុប្បន្ន នេះអាចជាការចៃដន្យនៃប្រេកង់ ពោលគឺ ឥទ្ធិពលរបស់រ៉េសូណង់» នេះបើតាមការយល់ឃើញរបស់ Lu Jianxin ប្រធានវិស្វករនៃក្រុមហ៊ុនវិទ្យាសាស្ត្រ និងបច្ចេកវិទ្យាសំណង់របស់ចិន។

អង្គភាពគ្រប់គ្រងស្ថានការណ៍អាសន្ននៃទីក្រុង Shenzhen ឱ្យដឹងថា ពុំមានការរញ្ជួយដីកើតឡើងនៅក្នុងទីក្រុងនេះ ក្នុងគ្រាដែលមានបាតុភូតខាងលើនោះទេ។ ចំណែកកម្លាំងខ្យល់វិញ ក៏ត្រូវបានរាយការណ៍ថា មានល្បឿនប្រហែល 27គម/ម៉ោង ដែលនេះមិនអាចធ្វើឱ្យអគារខ្ពស់ៗ ត្រូវញាប់ញ័រឡើយ។

វិស្វករ Lu Jianxin បន្ថែមថា គេត្រូវធ្វើការស៊ើបអង្កេតជាផ្លូវការ ទើបអាចរកឃើញមូលហេតុនៃបាតុភូតនេះ។ រីឯក្រុមអ្នកជំនាញវិញ បានឱ្យដឹងថា កម្រនឹងមានបញ្ហាអគារញាប់ញ័ររហូតដល់អាចឱ្យគេដឹងបានយ៉ាងដូច្នេះ។

Chen Wei អ្នកផ្គត់ផ្គង់ផ្នែករឹង (hardware) ដែលធ្វើការនៅ SEG Plaza ប្រាប់ថា គាត់មិនបានដឹងអំពីបញ្ហាអគារញាប់ញ័រនេះ ប៉ុន្តែ ត្រូវបានគេស្នើឱ្យចាកចេញពីអគារ ដើម្បីសុវត្ថិភាព។ ក៏ប៉ុន្តែ «មិត្តម្នាក់របស់ខ្ញុំដែលស្ថិតនៅក្នុងអគារ បានឃើញដបទឹកញាប់ញ័រ»។

SEG Plaza ដែលជាទីស្នាក់ការធំរបស់ក្រុមហ៊ុនអេឡិចត្រូនិក Shenzhen (SEG) មានកម្ពស់ 355ម៉ែត្រ និងមាន 79ជាន់ ត្រូវបានសាងសង់រួចរាល់កាលពីឆ្នាំ2020។ នៅក្នុងបញ្ជីចំណាត់ថ្នាក់ស្ដីពីកម្ពស់នៃអគារនៅទូទាំងពិភពលោក របស់ skyscrapercenter.com អគារ SEG Plaza ខ្ពស់ជាងគេលំដាប់ទី104 នៅប្រទេសចិន និងលំដាប់ទី212 នៅលើពិភពលោក។

«បាតុភូតញាប់ញ័រនេះ កំពុងត្រូវបានស្រាវជ្រាវដោយស្ថាប័នរដ្ឋមួយចំនួន ដើម្បីស្វែងរកមូលហេតុឱ្យបានច្បាស់លាស់» នេះបើតាមអង្គភាពគ្រប់គ្រងស្ថានការណ៍អាសន្ន៕

ប្រភព៖ SCMP
ប្រែសម្រួល៖ បុត្រា

May 19, 2021

ស្ថានភាព COVID-19 នៅកម្ពុជា និងពិភពលោក គិតមកដល់ថ្ងៃទី19 ខែឧសភា ឆ្នាំ2021

ក្រសួងសុខាភិបាលកម្ពុជា ឱ្យដឹងថា អ្នកជំងឺCovid-19 ថ្មី ចំនួន 393នាក់ ត្រូវបានរកឃើញកាលពីថ្ងៃទី18 ខែឧសភា នាំឱ្យតួលេខអ្នកឆ្លងសរុបនៅកម្ពុជា កើនដល់ 23,282នាក់។

ចំណែកនៅទូទាំងពិភពលោកវិញ អ្នកវិជ្ជមាននឹង Covid-19 សរុប កើនដល់ 164,901,667នាក់ ក្នុងនោះមានអ្នកស្លាប់ 3,418,730នាក់, ជាសះស្បើយ 143,862,822នាក់ និងកំពុងព្យាបាលចំនួន 17,620,115នាក់។

May 19, 2021

ក្រុមអ្នកវិទ្យាសាស្ត្រ រកឃើញ “វិធីកម្ចាត់វីរុសCOVID-19” ក្នុងសួត បានរហូតដល់ 99.9%

ក្រុមអ្នកវិទ្យាសាស្ត្ររបស់អូស្ត្រាលី និងសហរដ្ឋអាមេរិក អភិវឌ្ឍវិធីសាស្ត្រថ្មី ប្រឆាំងនឹងវីរុស ដែលជួយកម្ចាត់ Covid-19 នៅក្នុងសត្វកណ្ដុរ បានរហូតដល់ 99.9% ដែលនេះជាការបើកផ្លូវសម្រាប់ការព្យាបាលជំងឺCovid-19 នៅលើមនុស្ស ប្រកបដោយប្រសិទ្ធភាព។

ក្រុមអ្នកវិទ្យាសាស្ត្រនៃវិទ្យាស្ថានសុខាភិបាល Menzies ក្នុងរដ្ឋ Queensland នៃប្រទេសអូស្ត្រាលី និងវិទ្យាស្ថានស្រាវជ្រាវ City of Hope របស់សហរដ្ឋអាមេរិក បានសហការគ្នា ស្រាវជ្រាវ និងអភិវឌ្ឍវិធីសាស្ត្រព្យាបាលនេះ ចាប់ពីខែមេសា ឆ្នាំ2020។

Nigel McMillan សាស្ត្រាចារ្យប្រចាំសាកលវិទ្យាល័យ Griffith របស់អូស្ត្រាលី និងជាប្រធានក្រុមស្រាវជ្រាវ បានហៅវិធីសាស្ត្រដែលពួកគេកំពុងអភិវឌ្ឍនេះថាជា «ភារកិច្ចស្វែងរក និងកម្ចាត់» ពោលគឺ វាយប្រហារផ្ទាល់ទៅលើ Covid-19។ នេះបើតាមសារព័ត៌មានអូស្ត្រាលី ដែលបានចុះផ្សាយកាលពីដើមសប្ដាហ៍នេះ។

ក្រុមអ្នកវិទ្យាសាស្ត្រ ប្រើប្រាស់វិធីសាស្ត្រ វីរុស «ជំនាន់បន្ទាប់» ជាមួយនឹងបច្ចេកវិទ្យាអសកម្មហ្សែន RNA (Ribonucleic acid) ដើម្បីវាយប្រហារផ្ទាល់ទៅលើប្រព័ន្ធហ្សែនរបស់វីរុស ធ្វើឱ្យពួកវាមិនអាចឆ្លងរាលដាលបាន។ «វាបំផ្លាញប្រព័ន្ធហ្សែន និងធ្វើឱ្យវីរុស មិនអាចរីកចម្រើនបាន» McMillan អធិប្បាយដូច្នេះ និងបន្ថែមថា នេះគឺជាលើកទីមួយហើយ ដែលពួកគេបានអភិវឌ្ឍដោយជោគជ័យនូវគ្រាប់ nano និងបញ្ចូលទៅក្នុងរាងកាយតាមរយៈសរសៃឈាម ដើម្បីឱ្យពួកវា វាយប្រហារវីរុស។

លោក McMillan និយាយថា៖ «ពួកវា (គ្រាប់ nano) ស្វែងរក និងកម្ចាត់វីរុស ដូចទៅនឹងយន្តការនៃមីស៊ីលស្វែងរកកម្ដៅ (heat-seeking missile/Infrared homing)»។

«គ្រាប់ nano ធ្វើដំណើរទៅកាន់សួត ហើយចូលទៅកាន់កោសិកាទាំងអស់របស់សួត ប៉ុន្តែ ពួកវាកម្ចាត់តែវីរុសដែលមាននៅក្នុងកោសិកាប៉ុណ្ណោះ។ ចំណែកកោសិកាដែលធម្មតា (មិនមានវីរុស) នឹងមិនរងផលប៉ះពាល់ពីវិធីព្យាបាលនេះឡើយ» លោក McMillan បញ្ជាក់។

សាស្ត្រាចារ្យ McMillan បន្តថា៖ «បើទោះមិនមែនជាវិធីព្យាបាល ប៉ុន្តែវិធីសាស្ត្រនេះ អាចជួយកម្ចាត់វីរុសក្នុងសួតបានរហូតដល់ 99.9% ឯណោះ។ ដូច្នេះ វាមានប្រសិទ្ធភាពស្ទើរដូចទៅនឹងវិធីព្យាបាល និងសម្រាប់អ្នកជំងឺដែលកំពុងស្ថិតក្នុងបន្ទាប់សង្គ្រោះបន្ទាន់ (ICU) ក្នុងករណីហួសពេលក្នុងការចាក់វ៉ាក់សាំង»។

«នេះពិតជាវិធីសាស្ត្រាដំបូងបង្អស់មួយ ទាក់ទងនឹងការព្យាបាលផ្ទាល់ ដូច្នេះហើយ យើងពិតជាមានការត្រេកអរណាស់» លោកសាស្ត្រាចារ្យថ្លែងដូច្នេះ។

យោងតាមវិធីសាស្ត្រថ្មីនេះ អ្នកជំងឺCovid-19 ដែលកំពុងស្ថិតក្នុងបន្ទាប់ ICU នឹងត្រូវបានចាក់ 1ម្ជុលជារៀងរាល់ថ្ងៃ ក្នុងរង្វង់ពី 4-5ថ្ងៃ ឬតែ 1ម្ជុលគត់ សម្រាប់អ្នកដែលទើបតែឆ្លង Covid-19។ លោក McMillan ឱ្យដឹងថា វិធីសាស្ត្រនេះ អាចបង្ហាញខ្លួនជាផ្លូវការយ៉ាងឆាប់បំផុតត្រឹមឆ្នាំ2023 អាស្រ័យទៅលើលទ្ធផលនៃដំណាក់កាលពិសោធលើមនុស្ស។

«សូមចងចាំថា វីរុសនេះ (Covid-19) នឹងមិនបាត់ទៅណាឡើយ។ យើងនឹងត្រូវរស់នៅជាមួយពួកវា ជារៀងរហូត» នេះបើតាមការបញ្ជាក់បន្ថែមពីសាស្ត្រាចារ្យ McMillan៕

ប្រភព៖ ABC
ប្រែសម្រួល៖ បុត្រា

May 19, 2021

កំពូលអ្នកបោកប្រាស់ក្នុងវិស័យប្រាក់អេឡិចត្រូនិក៖ កាន់កាប់ Bitcoin តម្លៃ 1ម៉ឺនលានដុល្លារ ដោយសារបោកអ្នកវិនិយោគនៅ OneCoin រួចគេចខ្លួនបាត់ស្រមោល ជាមួយនឹងខ្ទង់ប្រាក់ដ៏ធំសម្បើម!

ដំបូងឡើយ Ruja Ignatova បានអះអាងថា OneCoin នឹងក្លាយជារូបិយវត្ថុអេឡិចត្រូនិកដែលមានឥទ្ធិពលបំផុតក្នុងពិភពលោក ប៉ុន្តែ ក្រោយរយៈពេលតែមួយឆ្នាំសោះ អ្នកស្រីបានបាត់ខ្លួនសូន្យឈឹង ជាមួយនឹងខ្ទង់ប្រាក់ដ៏ច្រើនសម្បើម ដែលបោកបានពីក្រុមអ្នកវិនិយោគ។

នៅក្នុងពាក្យបណ្ដឹង នាពេលថ្មីៗនេះ របស់ក្រុមអ្នកវិនិយោគ OneCoin (គម្រោងប្រាក់អេឡិចត្រូនិក ដែលដំណើរការតាមទម្រង់ «បណ្ដាញទីផ្សារ» (Multi-level marketing (MLM)/ Network marketing / Pyramid selling) បានឱ្យដឹងថា ស្ថាបនិករបស់ OneCoin គឺអ្នកស្រី Ruja Ignatova កំពុងកាន់កាប់រូបិយវត្ថុអេឡិចត្រូនិក Bitcoin ចំនួន 230,000 bitcoin ដែលបច្ចុប្បន្ន មានតម្លៃជាង 1ម៉ឺនលានដុល្លារអាមេរិក។

ជាក់ស្ដែង កាលពីឆ្នាំ2015 Ruja Ignatova គឺជាតួអង្គសំខាន់ជាងគេនៃការជួញដូរ Bitcoin ធំបំផុតក្នុងប្រវត្តិសាស្ត្រ។ នៅក្នុងការជួញដូរមួយ អ្នកស្រី Ruja Ignatova ត្រូវបាន Sheikh Al Qassimi (សមាជិកម្នាក់របស់រាជវង្ស Dubai) ប្រគល់ Bitcoin ចំនួន 230,000 ដែលមានតម្លៃប្រហែល 50លានដុល្លារអាមេរិក។ បច្ចុប្បន្ន (18 ខែឧសភា ឆ្នាំ2021) Bitcoin នេះ មានតម្លៃសរុបជាង 1ម៉ឺនលានដុល្លារ។

Sheikh Al Qassimi ប្រគល់ Bitcoin ទាំងនេះទៅឱ្យ Ignatova គឺដើម្បីទទួលបានគណនីធនាគារ OneCoin (បច្ចុប្បន្ន ត្រូវបានបង្កក), អចលនទ្រព្យនៅ UAE និងទ្រព្យមួយចំនួនទៀត។ នេះបើតាម Finance Feeds។

ក្នុងពាក្យបណ្ដឹងប្រឆាំងនឹង OneCoin ជនរងគ្រោះបានបង្ហើបឱ្យដឹងថា ក្រៅពីចំនួន Bitcoin ដ៏ច្រើនខាងលើ Ignatova ក៏កំពុងកាន់កាប់ប្រាក់ប្រហែល 500លានដុល្លារ នៅក្នុងគណនីធនាគារមួយនៅ Dubai រួមជាមួយនឹងទ្រព្យជាច្រើនផ្សេងទៀតដែលមានតម្លៃ 1ពាន់លានដុល្លារអាមេរិក។ ទ្រព្យទាំងនោះ ត្រូវបាន Sebastian Greenwood និងសហការីមួយចំនួនផ្សេងទៀតរបស់ Ignatova នៅក្នុងក្រុមហ៊ុន OneCoin ឈរឈ្មោះ។

OneCoin គឺជាកម្មវិធីទីផ្សារបណ្ដាញ (Network Marketing) ដែលត្រូវបានគេឃោសនាក្រោមរូបភាពរូបិយវត្ថុអេឡិចត្រូនិក ដោយក្រុមហ៊ុន OneCoin (ចុះឈ្មោះនៅ Dubai) និង OneLife Network (ចុះឈ្មោះនៅ Belize)។ ក្រុមហ៊ុនទាំងពីរនេះ សុទ្ធតែត្រូវបានបង្កើត និងអភិវឌ្ឍឡើងដោយ Ruja Ignatova និង Sebastian Greenwood។

នៅពេល OneCoin បង្ហាញខ្លួន អ្នកស្រី Ignatova បានអះអាងថា នេះនឹងក្លាយជារូបិយវត្ថុដែលមានឥទ្ធិពលបំផុតក្នុងពិភពលោក និងថែមទាំងអាចដណ្ដើមបានតំណែងលេខមួយពី Bitcoin។ ក៏ប៉ុន្តែ មួយឆ្នាំក្រោយមក (2017) Ignatova ក៏បានបាត់ខ្លួនសូន្យឈឹង ជាមួយនឹងខ្ទង់ដ៏ច្រើនសម្បើមដែលបានមកពីក្រុមអ្នកវិនិយោគ។ មកដល់ពេលនេះ សមត្ថកិច្ចមិនទាន់រកឃើញដំណឹងអំពីកំពូលអ្នកបោកប្រាស់នេះនៅឡើយ។

ក្រុមរដ្ឋអាជ្ញាសហរដ្ឋអាមេរិក បានគណនាឃើញថា ខ្ទង់ប្រាក់វិនិយោគសរុប ទៅលើ OneCoin គឺប្រហែល 4ពាន់លានដុល្លារអាមេរិក។ គម្រោង OneCoin រកបានប្រាក់រាប់ពាន់លានដុល្លារទៅឱ្យធនាគារនានា និងក្រុមហ៊ុនអចលនទ្រព្យជាច្រើននៅ Dubai ជាកន្លែងដែលត្រូវបានគេជឿថា មានការគាំទ្រដោយ Sheikh Al Qassimi ដែលជាកូនប្រុសរបស់បុរសអ្នកមានជាងគេមួយរូបនៅ អារ៉ាប់រួម (UAE) និងអតីតបុគ្គលិកផ្នែកអចលនទ្រព្យម្នាក់។

ជនសង្ស័យឈ្មោះ Ignatova ត្រូវបានគេចាត់ទុកថាជាកំពូលអ្នកបោកប្រាស់ធំជាងគេមួយរូបក្នុងពិភពលោក នៅក្នុងវិស័យរូបិយវត្ថុអេឡិចត្រូនិក។ ក្រៅពីនេះ អ្នកស្រី Ignatova ក៏ជាប់ទាក់ទិននឹងករណីបោកប្រាស់ BigCoin និងត្រូវទទួលទោសរយៈពេល 14ខែ ដោយនៅក្រៅឃុំ ក្នុងប្រទេសអាល្លឺម៉ង់ផងដែរ។

មកដល់បច្ចុប្បន្ន គេនៅមិនទាន់ដឹងច្បាស់ថា Ignatova បានលក់ Bitcoin ចំនួន 230,000 នេះហើយ ឬនៅ ដោយសារតែគោលការណ៍មិនបញ្ចេញអត្តសញ្ញាណក្នុងពេលជួញដូរ របស់រូបិយវត្ថុអេឡិចត្រូនិកមួយនេះ៕

ប្រភព៖ Finance Feeds
ប្រែសម្រួល៖ បុត្រា

May 18, 2021

ហុងស៊ុយបន្ទប់ផ្សេងៗក្នុងផ្ទះ បើរៀបចំត្រូវ នឹងមានហេង!

មនុស្សជាច្រើនគិតថា ការរៀបចំផ្ទះឱ្យមានហុងស៊ុយ គឺជារឿងមួយ ដែលហាក់ដូចជាស្មុគស្មាញ និងច្របូកច្របល់ណាស់ ទើបបានត្រឹមតែស្តាប់ ហើយក៏បណ្តោយឱ្យរំលងចោលទៅ ទាំងនៅក្នុងចិត្តវិញ ក៏នឹកចង់សាកល្បងផ្លាស់ប្តូរស្ទីលការរៀបចំផ្ទះ ឱ្យត្រូវតាមក្បួនហុងស៊ុយនឹងគេដូចគ្នាដែរ ។ ការពិតការរៀបចំហុងស៊ុយផ្ទះ មិនមែនសុទ្ធតែពិបាកទាំងអស់នោះទេ ថ្ងៃនេះយើងមានវិធីងាយៗក្នុងការរៀបចំបន្ទប់ផ្សេងៗនៅក្នុងផ្ទះ ឱ្យត្រឹមត្រូវតាមក្បួនហុងស៊ុយ មកជម្រាបជូនមិត្តអ្នកអានដូចតទៅ៖

ហុងស៊ុយបន្ទប់គេង

ក្នុងបន្ទប់គេង គួររៀបចំដាក់គ្រែឱ្យឆ្ងាយពីជញ្ជាំងទាំងសងខាង និងមិនគួរដាក់គ្រែនៅកន្លែងដែលជិតមាត់បង្អួច និងថែមទាំងមិនគួរដាក់គ្រែឱ្យចំទ្វារចូលដែរ មិនគួរព្យួររូបភាពធំៗ ឬរបស់ធ្ងន់ៗនៅលើក្បាលដំណេកឡើយ។ រៀងរាល់លើក មុនពេលគេង ត្រូវបិទទ្វារទូដាក់សម្លៀកបំពាក់ និងទ្វារបន្ទប់ទឹកឱ្យជិត និងដែលសំខាន់នោះ គួររកដើមឈើផ្សេងៗ ដូចជាដើមប្រទាលសេដ្ឋី ដើមអណ្តាតនាគ ឬកូនដើមដូងលឿង មកដាក់ក្នុងបន្ទប់គេងផង ដើម្បីឱ្យបន្ទប់គេងមើលទៅមានជីវិតជីវ៉ា ហើយដើមឈើទាំងនេះ ថែមទាំងជួយបឺតយកសារធាតុពុល និងសម្រួលធាតុអាកាសក្នុងបន្ទប់គេង ឱ្យបានកាន់តែស្អាតបរិសុទ្ធឡើងទៀតផង។

ហុងស៊ុយបន្ទប់ធ្វើការក្នុងផ្ទះ

បើនៅក្នុងផ្ទះ មានបន្ទប់ធ្វើការ ហើយអ្នកក៏មានឱកាសបានប្រើប្រាស់វាញឹកញាប់ផងដែរនោះ ក៏គួរតែរៀបចំបន្ទប់ធ្វើការ តាមក្បួនហុងស៊ុយផង ដោយព្យាយាមកុំដាក់តុធ្វើការឱ្យចំទ្វារ ផ្លូវចេញចូលចំៗពេក។ រៀបចំសណ្តាប់ធ្នាប់តុធ្វើការឱ្យបានស្អាតជានិច្ច និងតុបតែងតុធ្វើការ ដោយពណ៌ស្វាយ ឬខ្មៅ ដើម្បីឱ្យជួយជំរុញកម្លាំងចិត្ត និងភាពស្វាហាប់ និងដែលសំខាន់នោះ សូមកុំភ្លេចរកថូផ្កាមកដាក់លម្អផង ដើម្បីសម្រួលតុល្យភាពថាមពលការងារ មិនឱ្យតានតឹង ធុញថប់ជ្រុលពេក និងជួយឱ្យលោកអ្នកមានថាមពលក្នុងការធ្វើការ បានច្រើនឡើងទៀតផង។

ហុងស៊ុយបន្ទប់ទទួលភ្ញៀវ

បន្ទប់ទទួលភ្ញៀវ គួររៀបចំតុបតែងឱ្យមានបរិយាកាសកក់ក្តៅ លោកអ្នកអាចតុបតែងតាមស្ទីលរបស់ខ្លួនអ្នកក៏បាន តែគួរយកផ្ទាំងរូបថតក្រុមគ្រួសារ រូបថតពេលរៀបការ ឬរូបណាដែលមើលឃើញហើយ ផ្តល់នូវអារម្មណ៍កក់ក្តៅ មកតុបតែងលម្អផង។ ក្រៅពីនេះ គួរបើកវាំងននឱ្យពន្លឺពីធម្មជាតិបានចាំងចូលមកក្នុងបន្ទប់ទទួលភ្ញៀវឱ្យបានច្រើនបំផុត ចៀសវាងការបើកភ្លើងអគ្គិសនីគ្រប់ពេលរហូត ព្រោះវានឹងរឹតតែធ្វើឱ្យថាមពល “ស៊ី” មានភាពស្មុគស្មាញ អាចនឹងនាំជីវិតឱ្យរញ៉េរញ៉ៃទៅដែរ។

ហុងស៊ុយបន្ទប់ចង្ក្រានបាយ

គ្រប់ចំណែកនៅក្នុងផ្ទះ គួរតែស្អាតបាតរៀបរយជានិច្ច សូម្បីតែចង្ក្រានបាយក៏ដោយ ជាពិសេសថតតុ ថតទូដែលទុកដាក់អីវ៉ាន់ និងរបស់ប្រើប្រាស់ក្នុងចង្ក្រានគ្រប់ប្រភេទ ចំណែកតុត្រៀមរៀបចំអាហារ ក៏ត្រូវតែស្អាតរៀបរយដូចគ្នាដែរ។ ក្រៅពីនេះ គួរតុបតែងបន្ទប់ចង្ក្រានបាយដោយពណ៌បៃតង ជាពណ៌គោល ឬក៏ចង់យកដើមឈើពណ៌បៃតងខ្ចីមកដាក់លម្អក្នុងបន្ទប់ចង្ក្រានបាយ ក៏រឹតតែល្អដែរ។ តុរៀបចំធ្វើម្ហូប គួរបែរមុខទៅរកមាត់ទ្វារ ដើម្បីទទួលយកថាមពល “ស៊ី” បានយ៉ាងពេញទំហឹង តែបើសិនជាមិនអាចបែរមុខ ទៅរកមាត់ទ្វារបានទេនោះ ក៏គួររកកញ្ចក់មកដាក់ជាប់ជញ្ជាំងមួយផ្ទាំង ឱ្យឆ្លុះទៅមើលឃើញមាត់ទ្វារចេញចូលបន្ទប់ចង្ក្រានបាយបាន ក៏បានដែរ។

ហុងស៊ុយបន្ទប់ទឹក

យើងប្រើប្រាស់បន្ទប់ទឹកក្នុងការសម្អាតខ្លួនប្រាណ និងបន្ធូរអារម្មណ៍ក្នុងពេលជាមួយគ្នា ដូច្នេះនៅក្នុងចំណែកនេះ គួរតែត្រូវបានសម្អាតឱ្យបានស្អាតរៀបរយជានិច្ច និងគួរតុបតែងដោយពណ៌ផ្ទៃមេឃជាពណ៌គោល ដើម្បីឱ្យពេលយើងចូលទៅប្រើការ ឬនៅក្នុងបន្ទប់ទឹក នឹងមានអារម្មណ៍ធូរស្រាល និងត្រជាក់ស្រួលទាំងកាយ និងចិត្ត។

ហុងស៊ុយទូដាក់សម្លៀកបំពាក់

បើលោកអ្នកមានអារម្មណ៍ថា សម្រាន្តមិនសូវលក់ ឬដូចជាមិនចង់នៅក្នុងបន្ទប់គេងប៉ុន្មាននោះ ចូរសាកល្បងបើកទូដាក់ខោអាវ ហើយរកពេលវេលារៀបចំសម្អាតទូសម្លៀកបំពាក់ ឱ្យមានរបៀបរៀបរយម្តងមើល៍ ដូចជា សម្លៀកបំពាក់ណាលែងពាក់ហើយ ក៏គួរតែយកចេញពីក្នុងទូ ទុកយកទៅបរិច្ចាគក៏បាន និងព្យាយាមរៀបចំឱ្យក្នុងទូដាក់សម្លៀកបំពាក់ មានទីកន្លែងទំនេរខ្លះផង ដើម្បីឱ្យថាមពល “ស៊ី” ហូរវិលចូលមកបានស្រួលឡើង។

ឃើញទេ ថា ការរៀបចំផ្ទះ តាមក្បួនហុងស៊ុយ មិនមានលំបាកលំបិនត្រង់ណាឡើយ គ្រាន់តែរំកិលឧបករណ៍ប្រើប្រាស់ ទៅដាក់ឱ្យចំកន្លែងដែលត្រឹមត្រូវ និងតុបតែងលម្អដោយពណ៌ដែលសក្តិសម រួមទាំងបន្ថែមរបស់លម្អផ្សេងៗបន្តិចបន្តួចប៉ុណ្ណោះឯង និងដែលសំខាន់នោះ គឺគួរមើលថែទាំផ្ទះសំបែងឱ្យបានស្អាតជាប់ជានិច្ច ព្រោះភាពស្អាត មានអនាម័យ គឺជាសិរីមង្គលខ្លាំងណាស់ សម្រាប់ផ្ទះរបស់យើង៕

May 18, 2021

លោកតាអូស្ត្រាលី អាយុ 111ឆ្នាំ ប្រាប់គន្លឹះអាយុវែង ថែមទាំងខួរក្បាលល្អ នៅចាំគ្មានភ្លេចទៀតផង

កាលពីថ្ងៃទី17 ឧសភា ទីភ្នាក់ងារព័ត៌មាន AP បានរាយការណ៍ថា លោកតា ដេកស្ទ័រ ឃ្រូគើរ ជនជាតិអូស្ត្រាលី អ្នកដែលមានអាយុ 111ឆ្នាំ ច្រើនជាងគេបំផុតក្នុងប្រទេសអូស្ត្រាលី បានបង្ហើបឱ្យដឹងពីការរស់នៅ ដែលធ្វើឱ្យលោកតាមានអាយុវែង និងការចងចាំនៅល្អ គ្មានភ្លេចអ្វីទាំងអស់ទៀតផង។

លោកតា ឃ្រូគើរ ជាពេទ្យសត្វ ដែលចូលនិវត្តន៍យូរហើយ បច្ចុប្បន្នអាយុ 111ឆ្នាំ និង 124ថ្ងៃ គឺជាបុគ្គលដែលមានអាយុច្រើន ជាងលោកតា ជែក ឡុកកេតត៍ ទាហានចូលនិវត្តន៍ ក្នុងសម័យសង្គ្រាមលោកលើកទី1 ចំនួន 1ថ្ងៃ ដែលបានទទួលអនិច្ចកម្ម កាលពីឆ្នាំ2012។

លោកតា ឃ្រូគើរ បានផ្ដល់បទសម្ភាសពិសេស ជាមួយទីភ្នាក់ងារព័ត៌មាន ABC News របស់អូស្ត្រាលី នៅឯមណ្ឌលថែទាំមនុស្សចាស់ជរា ក្នុងរដ្ឋឃ្វីនស្លែនដ៍ ដោយបានបង្ហើបឱ្យដឹងអំពី គន្លឹះសម្ងាត់ ដែលធ្វើឱ្យលោកតា មានអាយុវែង និងខួរក្បាលនៅតែរហ័សរហួនភ្លឺថ្លានោះថា មកពីការទទួលទានអាហារបំប៉នរាងកាយរៀងរាល់សប្ដាហ៍។

លោកតាឃ្រូគើរ ថ្លែងថា “ខួរមាន់ហ្នឹងឯង គឺមាន់វាមានក្បាល ហើយនៅក្នុងក្បាលពួកវា មានខួរ ដុំតូចៗ រសជាតិឆ្ងាញ់ខ្លាំងណាស់ ល្មមៗ 1ម៉ាត់តែម្ដង”

ចំណែកលោកតា ក្រេក ឃ្រូគើរ កូនប្រុស អាយុ 74ឆ្នាំ បានរៀបរាប់ពីឪពុក ដែលមានអាយុវែងនេះថា អាចនឹងមកពីអាជីពជាគ្រូពេទ្យបសុសត្វ ព្រោះត្រូវបញ្ចេញកម្លាំងកាយ ធ្វើការងារជាប់រហូត ទើបធ្វើឱ្យរាងកាយរឹងមាំហ្នឹងឯង។

លោកស្រី មេឡានី ខាល់វើត ជំនួយការវេជ្ជបណ្ឌិតអាជីព និងជាអ្នកចាត់ការទូទៅមណ្ឌលថែទាំជនចាស់ជរា បានថ្លែងថា លោកតា ឃ្រូគើរ ជាសមាជិកម្នាក់របស់មណ្ឌលថែទាំជនចាស់ជរា ដែលឆ្លាតវាងវៃបំផុត ព្រោះមានការចងចាំដ៏ល្អអស្ចារ្យ សម្រាប់មនុស្សដែលមានអាយុដល់ 111ឆ្នាំហើយនោះ។

ទាំងអស់នេះ លោក ចន ថេលើរ ស្ថាបនិកកំណត់ត្រាស្ថិតិនៃប្រទេសអូស្ត្រាលី បានអះអាងថា លោកតាឃ្រូគើរ ជាពលរដ្ឋម្នាក់ ដែលមានអាយុច្រើនបំផុត និងនៅមានជីវិតរបស់ប្រទេសអូស្ត្រាលីនាពេលបច្ចុប្បន្ន ចំណែកស្ថិតិខ្ពស់បំផុតវិញនោះ នៅតែជារបស់លោកយាយ គ្រិស្ទីណា ឃុក ដែលបានទទួលអនិច្ចកម្ម កាលពីឆ្នាំ2012 ក្នុងអាយុ 114ឆ្នាំ និង 148ថ្ងៃ៕

ប្រភព៖ សារព័ត៌មានបរទេស
ប្រែសម្រួលដោយ ទិទីតំតាតូ

May 18, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី18 ខែឧសភា ឆ្នាំ2021

នាព្រឹកនេះ (18 ឧសភា) ក្រសួងសុខាភិបាលកម្ពុជា បានឱ្យដឹងថា អ្នកវិជ្ជមាននឹង Covid-19 នៅកម្ពុជា ចំនួន 345នាក់បន្ថែមទៀត ត្រូវបានរកឃើញនៅក្នុងអំឡុងថ្ងៃទី17 ខែឧសភា ឆ្នាំ2021។

ក្នុងថ្ងៃទី17 ឧសភា កម្ពុជា ក៏មានអ្នកស្លាប់ដោយសារវីរុសCovid-19 ថ្មី ចំនួន 2នាក់ទៀត នាំឱ្យតួលេខអ្នកស្លាប់សរុបកើនដល់ជាង 150នាក់។

គិតមកដល់បច្ចុប្បន្ន កម្ពុជា មានអ្នកឆ្លងវីរុសCovid-19 សរុបចំនួន 22,889នាក់ ក្នុងនោះមានអ្នកស្លាប់សរុប 156នាក់នាក់, ជាសះស្បើយ 14,343នាក់ និងកំពុងព្យាបាល ប្រមាណជាជាង 8,000នាក់។

នៅទូទាំងពិភពលោក បច្ចុប្បន្ន មានអ្នកឆ្លងវីរុសCovid-19 សរុបចំនួន 164,279,345នាក់ ក្នុងនោះមានអ្នកស្លាប់សរុបចំនួន 3,404,457នាក់, ជាសះស្បើយ 143,004,248នាក់ និងកំពុងព្យាបាលចំនួន 17,870,640នាក់៕

ប្រភព៖ ក្រសួងសុខាភិបាល, worldometers
ដកស្រង់៖ បុត្រា

May 18, 2021

កម្ពុជា ចាប់ផ្ដើមរឹតបន្តឹងលើការគ្រប់គ្រងក្រុមឧកញ៉ា

រាជរដ្ឋាភិបាល កម្ពុជា បានចេញសេចក្តីសម្រេច ស្តីពីការបង្កើតក្រុមការងារអន្តរក្រសួង ដើម្បីសិក្សា រៀបចំលិខិតបទដ្ឋានគតិយុត្ត សម្រាប់ការគ្រប់គ្រងក្រុមឧកញ៉ា ឱ្យមានប្រសិទ្ធភាពជាងបច្ចុប្បន្ន។

ក្រុមការងារអន្តរក្រសួងនេះ មានសមាសភាពចំនួន 12រូប ដែលមាន ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃជាប្រធាន និងមានអនុប្រធាន និងសមាជិក 11រូបផ្សេងទៀត មកពីបណ្តាក្រសួងស្ថាប័នពាក់ព័ន្ធផ្សេង។ នេះបើតាមសេចក្ដីសម្រេចរបស់ សម្ដេចតេជោ ហ៊ុន សែន ប្រមុខរដ្ឋាភិបាលកម្ពុជា។

ក្រុមការងារខាងលើនេះ មានភារកិច្ច សិក្សាស្រាវជ្រាវ ផ្តួចផ្តើមក្នុងការបង្កើតលិខិតបទដ្ឋានគតិយុត្តសម្រាប់បម្រើដល់ការផ្តល់គោរមងារឧកញ៉ា និងការដកហូតគោរមងារឧកញ៉ា។ ក្រុមការងារអន្តរក្រសួងនេះ ក៏ត្រូវសិក្សាអំពីសិទ្ធិ និងកាតព្វកិច្ចរបស់ឧកញ៉ា ក្នុងការចូលរួមកិច្ចការសង្គម ធ្វើការពិគ្រោះយោបល់ ជាមួយបណ្តាក្រសួង ស្ថាប័ន អាជ្ញាធរ រដ្ឋបាលថ្នាក់ក្រោមជាតិ និងវិស័យឯកជនពាក់ព័ន្ធ ដើម្បីប្រមូលព័ត៌មានបម្រើឱ្យការរៀបចំ។

ក្រុមការងារថ្មីនេះ ក៏នឹងត្រូវធ្វើរបាយការណ៍អំពីវឌ្ឍនភាព នៃការងារជូន សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីពិនិត្យ សម្រេច និងផ្តល់យោបល់ដឹកនាំ រួមនឹងការរៀបចំឯកសារពាក់ព័ន្ធ ជូនរាជរដ្ឋាភិបាល ដើម្បីពិនិត្យ សម្រេច និង បំពេញភារកិច្ចផ្សេងៗទៀត តាមការចាំបាច់។

អនុប្រធាន និងសមាជិកក្រុមការងារអន្តរក្រសួងនេះ ត្រូវចូលរួមប្រជុំតាម ការកោះអញ្ជើញ និងទទួលភារកិច្ចតាមការចាត់ចែង របស់ប្រធានក្រុមការងារ។ ក្រុមការងារនេះ មានសិទ្ធិ ប្រើប្រាស់មន្ត្រីក្រោមឱវាទរបស់ខ្លួន ដើម្បីជួយការងារតាមតម្រូវការចាំបាច់ និងអាចប្រើប្រាស់ត្រា របស់ក្រសួងមហាផ្ទៃ ដើម្បីចាត់ចែងការងាររបស់ខ្លួន។ នេះបើតាមសេចក្តីសម្រេចរបស់ ប្រមុខរដ្ឋាភិបាលកម្ពុជា៕

ប្រភព៖ ក្រសួងព័ត៌មាន
ដកស្រង់៖ បុត្រា

May 18, 2021

ក្រសួងប្រៃសណីយ៍ ជូនដំណឹងពីមូលហេតុដែល Youtube ផ្អាកមិនឱ្យមានការផ្សាយពាណិជ្ជកម្ម នៅកម្ពុជា

នាព្រឹកថ្ងៃទី18 ខែឧសភា ឆ្នាំ2021 នេះ ក្រសួងប្រៃសណីយ៍កម្ពុជា បានចេញសេចក្ដីប្រកាសព័ត៌មានមួយ ទាក់ទងនឹងបញ្ហាដែល Youtube ផ្អាកមិនឱ្យមានការផ្សាយពាណិជ្ជកម្ម នៅកម្ពុជា ។

នៅក្នុងសេចក្ដីប្រកាសព័ត៌មាននេះ ក្រសួងបានបញ្ជាក់ថា Youtube កំពុងតែកែសម្រួលគោលការណ៍ផ្សាយពាណិជ្ជកម្ម សម្រាប់ដៃគូសហការ (អ្នកផលិតវីដេអូ) របស់ខ្លួន។

ទន្ទឹមនឹងនេះ ក្រសួងប្រៃសណីយ៍ កម្ពុជា ក៏បានលើកទឹកចិត្តដល់ក្រុមអ្នកផលិតវីដេអូ ឱ្យបន្តផលិតមាតិការល្អ ប្រកបដោយវិជ្ជាជីវៈ ច្នៃប្រឌិត និងគោរពទៅតាមគោលការណ៍កម្មសិទ្ធិបញ្ហា។

ក្រសួងប្រៃសណីយ៍ក៏បានឱ្យដឹងថា ក្រសួងកំពុងដោះស្រាយបញ្ហានៃការផ្អាកមិនឱ្យមានការផ្សាយពាណិជ្ជកម្ម នៅកម្ពុជា នេះផងដែរ។ ព័ត៌មានបន្ថែម សូមអានសេចក្ដីប្រកាសខាងក្រោម។

ប្រភព៖ ក្រសួងប្រៃសណីយ៍
ដកស្រង់៖ បុត្រា

May 18, 2021

ហ្គាហ្សា នឹងគ្មានអគ្គិសនីប្រើប្រាស់ ចាប់ពីចុងសប្ដាហ៍នេះ បន្ទាប់ពីបំពង់បង្ហូរប្រេង ត្រូវ អ៊ីស្រាអែល កម្ទេច!

កងទ័ព អ៊ីស្រាអែល បានបើកការវាយប្រហារយ៉ាងសន្ធាប់ ទៅលើតំបន់ ហ្គាហ្សា និងបានកម្ទេចបណ្ដាញផ្លូវរូងក្រោមដី រួមនឹងផ្ទះរបស់ក្រុមមេបញ្ជាការនៃកងជីវពល ហាម៉ាស បណ្ដាលឱ្យតំបន់នេះ ប្រឈមនឹងបញ្ហាគ្មានអគ្គិសនីប្រើប្រាស់។

កងទ័ព អ៊ីស្រាអែល កាលពីម្សិលមិញ (17 ខែឧសភា) បានប្រកាសថា ខ្លួនបានបាញ់កម្ទេចផ្លូវក្រោមដីប្រវែង 15គីឡូម៉ែត្រ របស់កងជីវពលរបស់ ប៉ាលេស្ទីន រួមទាំងផ្ទះផ្ទាល់ខ្លួនរបស់មេបញ្ជាការជាន់ខ្ពស់ចំនួន 9នាក់ នៃចលនា ហាម៉ាស។ អគារកម្ពស់ 3ជាន់មួយកន្លែងក្នុងទីក្រុង ហ្គាហ្សា ត្រូវរងការខូចខាតធ្ងន់ធ្ងរ ប៉ុន្តែ មិនមានករណីស្លាប់នោះទេ ដោយសារកងទ័ព អ៊ីស្រាអែល បានផ្ដល់ដំណឹង 10នាទី មុនការវាយប្រហាររបស់ខ្លួន ដែលនេះបានជួយឱ្យប្រជាជនចាកចេញទាន់ពេល។

អ៊ីស្រាអែល ថ្មីៗនេះ បានចាប់ផ្ដើមតម្រង់គោលដៅលើផ្ទះផ្ទាល់ខ្លួនរបស់ក្រុមមេដឹកនាំជាន់ខ្ពស់នៃកងជីវពល ហាម៉ាស ក្នុងនោះក៏មានទាំងមេបញ្ជាការនៅតំបន់ ហ្គាហ្សា Yehiyel Sinwar ផងដែរ។ ប៉ុន្តែ ក្រុមមេដឹកនាំទាំងនេះ ទំនងជាបានចាកចេញពីផ្ទះរបស់ពួកគេរួចហើយ នៅមុនការវាយប្រហារដោយយន្តហោះចម្បាំងរបស់ អ៊ីស្រាអែល។

អភិបាលក្រុង ហ្គាហ្សា Yahya Sarraj បានឱ្យដឹងថា ផ្លូវថ្នល់់ និងហេដ្ឋារចនាសម្ព័ន្ធនានាក្នុងតំបន់ ត្រូវរងការខូចខាតធ្ងន់ធ្ងរ។ «ស្ថានភាពនឹងអាក្រក់ជាងនេះ បើសិនជាការប្រយុទ្ធគ្នានៅតែបន្តកើតឡើង»។

អង្គការសហប្រជាជាតិ បានព្រមានថា រោងចក្រអគ្គិសនីតែមួយគត់នៅតំបន់ ហ្គាហ្សា កំពុងប្រឈមនឹងហានិភ័យអស់ឥទ្ធនៈដើម្បីដំណើរការ។ តំបន់នេះ បានស្គាល់បញ្ហាដាច់ភ្លើងទ្រង់ទ្រាយធំ និងអូសបន្លាយចាប់ពី 8-12ម៉ោង ជារៀងរាល់ថ្ងៃ ខណៈដែលប្រភពទឹក មិនអាចឱ្យគេផឹកបាន។ តំណាងក្រុមហ៊ុនផ្គត់ផ្គង់អគ្គិសនីប្រចាំតំបន់ ហ្គាហ្សា និយាយថា ពួកគេអាចដំណើរការបានប្រហែលពី 2-3ថ្ងៃទៀតប៉ុណ្ណោះ ព្រោះតែការវាយប្រហារតាមផ្លូវអាកាស បានបំផ្លាញបំពង់បង្ហូរប្រេង ហើយក្រុមបច្ចេកទេស ក៏មិនអាចទៅកាន់ទីតាំងនោះ ដោយសារការវាយប្រហារពីកងទ័ព អ៊ីស្រាអែល។

នាយករដ្ឋមន្ត្រី អ៊ីស្រាអែល លោក Benjamin Netanyahu ព្រមានថា ការវាយប្រហារនៅតំបន់ ហ្គាហ្សា នឹងត្រូវ «ប្រើពេលយូរ» ព្រោះប្រទេសនេះ ចង់ធ្វើឱ្យកងជីវពល ហាម៉ាស ចុះខ្សោយ។ ចំណែក មេបញ្ជាការក្រុម ហាម៉ាស Ismail Haniyeh ក៏បានប្រកាសថា សហរដ្ឋអាមេរិក រុស្ស៊ី អេហ្ស៊ីប និងកាតា បានទាក់ទងមកកាន់ចលនានេះ ដើម្បីស្នើឱ្យមានការឈប់បាញ់ ប៉ុន្តែ បញ្ជាការរូបនេះ អះអាងថា នឹង «មិនទទួលយកដំណោះស្រាយដែលបោះបង់ចោលការពលីជីវិតរបស់ប្រជាជន ប៉ាលេស្ទីន ជាដាច់ខាង»។

មូលហេតុដែលនាំឱ្យផ្ទុះការប្រយុទ្ធគ្នារវាង អ៊ីស្រាអែល និង ប៉ាលេស្ទីន នេះ បណ្ដាលមកពីភាពតានតឹងក្នុងរដូវបុណ្យ Ramadan របស់សាសនិកអ៊ីស្លាម បន្ទាប់ពី អ៊ីស្រាអែល កាត់បន្ថយការប្រមូលផ្ដុំគ្នានៅតំបន់ក្រុងចាស់ យេរូសាឡឹម និងគំរាមបណ្ដេញគ្រួសារជនជាតិ ប៉ាលេស្ទីន មួយចំនួន ចេញពីតំបន់ យេរូសាឡឹមខាងកើត ដើម្បីទុកកន្លែងសម្រាប់ជនជាតិជ្វីហ្វ។

ភាគីខាង អ៊ីស្រាអែល ឱ្យដឹងថា ក្រុម ហាម៉ាស បានបាញ់រ៉ុក្កែត ជាង 3,100គ្រាប់ ចូលទឹកដីប្រទេសនេះ ក្នុងសប្ដាហ៍កន្លង ដែលនេះគឺជាចំនួនដ៏ច្រើនមិនធ្លាប់មានពីមុនមក៕

ប្រភព៖ AP
ប្រែសម្រួល៖ បុត្រា

May 18, 2021

Author: សឿន សំណាង