សឿន សំណាង - La Reine Media

Harry Kane រកបាន 23គ្រាប់ ឈ្នះរង្វាន់ស្បែកជើងមាស នៅលីគកំពូលអង់គ្លេស

កីឡាករខ្សែប្រយុទ្ធរបស់ក្លិប Tottenham Hotspur បានឈ្នះរង្វាន់ស្បែកជើងមាស នៅលីគកំពូលអង់គ្លេស English Premier League ក្រោយរកបានសរុប 23គ្រាប់ ដែល 1គ្រាប់ចុងក្រោយ គេរកបាននៅក្នុងការប្រកួតចុងក្រោយបង្អស់ ក្នុងជ័យជម្នះលើក្រុមខ្លាំង Leicester City ដោយលទ្ធផល 3ទល់នឹង 2។

កំណត់ត្រានេះ បានធ្វើឱ្យ Harry Kane ឈ្នះពានស្បែកជើងមាស 3លើកហើយ ដែលនេះ ជាកំណត់ត្រាកីឡាករដែលជោគជ័យស្បែកជើងមាសច្រើនលើកជាងគេបំផុតទី2 បន្ទាប់ពី Thierry Henry កីឡាករសញ្ជាតិបារាំង ដែលធ្លាប់ឈ្នះបាន 4លើក។

គួរឱ្យដឹងដែរថា Harry Kane កីឡាករខ្សែប្រយុទ្ធដ៏មុតស្រួច របស់ក្រុមមាន់ខ្នាយមាស រកគ្រាប់បាល់បានលើស 20គ្រាប់ នៅ Premier League រហូតដល់ទៅ 5លើកក្នុងរយៈពេល 7ឆ្នាំចុងក្រោយនេះ ចាប់តាំងពីរដូវកាលឆ្នាំ2017-2018មក៕

May 26, 2021

រៀបចំហុងស៊ុយមុខផ្ទះ បើកទទួលសំណាង និងស្នេហា

ការរៀបចំហុងស៊ុយមុខផ្ទះ គឺជារឿងមួយ ដែលគួរធ្វើមែនទែន ព្រោះផ្លូវចូលផ្ទះ គឺជាការបើកទទួលយកថាមពល និងរឿងរ៉ាវផ្សេងៗ ចូលមកក្នុងផ្ទះរបស់យើងដោយត្រង់តែម្តង។ ក្នុងការរៀបចំហុងស៊ុយខាងមុខផ្ទះនេះ នឹងជួយលើកជោគជតារាសី ឱ្យមានឱកាសក្នុងរឿងលាភសំណាង និងស្នេហាថែមឡើងទៀត ជាពិសេសអ្នកនៅលីវទាំងឡាយ គួរតែបើកហុងស៊ុយមុខផ្ទះ ដើម្បីទទួលយករឿងរ៉ាវល្អៗ និងមនុស្សល្អៗ ឱ្យចូលមកក្នុងជីវិត។ ដូច្នេះបើអ្នកណាមិនទាន់ដឹងថា តើត្រូវរៀបចំខាងមុខផ្ទះ ឱ្យត្រូវតាមគោលការណ៍ហុងស៊ុយយ៉ាងម៉េចនោះ សូមតាមដានដូចតទៅ។

សម្អាតភាពគ្មានរបៀប

បរិវេណមុខផ្ទះ គឺជាផ្នែកដំបូង ដែលយើងមើលឃើញ និងអ្វីដែលសំខាន់នោះ គឺវាជាផ្លូវដើរចូលផ្ទះទៀតផង ដូច្នេះមិនគួរមានរបស់របររកេករកាក រាំងស្ទះផ្លូវចូលផ្ទះឡើយ ដើម្បីជាការបើកប្រឡោះឱ្យថាមពលល្អៗ ឆ្លងកាត់ចូលមកបានយ៉ាងងាយស្រួល ហើយបើតាមគោលការណ៍ហុងស៊ុយដែលល្អនោះ គួរតែរៀបចំ ឱ្យបរិវេណខាងមុខផ្ទះ មើលទៅឃើញនៅជិតដិតនឹងធម្មជាតិ ឱ្យបានច្រើនបំផុត ដោយការដាក់ដើមឈើស្លឹកបៃតងខ្ចី តុបតែងនៅមុខមាត់ទ្វារផ្ទះ ដើម្បីបង្កើនភាពសម្បូររុងរឿងក្នុងជីវិត ឬក៏លាបបន្ទះទ្វារដោយពណ៌បៃតង ដើម្បីជួយបង្កើនរឿងទ្រព្យសម្បត្តិលុយកាក់ ឱ្យកាន់តែល្អឡើងផង។

កម្ចាត់អ្វីដែលស្វិតស្រពោនគ្មានជីវិតចេញ

បើខាងមុខទ្វារផ្ទះរបស់លោកអ្នក មានផើងដែលមានដាំដើមឈើនោះ គួរឧស្សាហ៍កាត់ស្លឹកណាដែលស្វិតៗ ឬស្លឹកណាដែលស្ងួតក្រៀមងាប់ ចេញឱ្យអស់ កុំបណ្តោយឱ្យដើមឈើមានស្លឹកស្វិតក្រៀមស្រពោន ឬស្លឹកដែលងាប់ហើយនៅជាប់លើដើមឈើនោះជាដាច់ខាត ព្រោះតាមគោលការណ៍ហុងស៊ុយ គឺជារឿងមិនល្អឡើយ ព្រោះវាអាចក្លាយជាឧបសគ្គ ដែលនៅចាំរាំងស្ទះសំណាងល្អៗនៅក្នុងជីវិតបាន ដូច្នេះគួរឧស្សាហ៍មើលថែ សម្អាត ឱ្យវាមានភាពស្រស់បស់នៅបរិវេណខាងមុខផ្ទះជាប់ជានិច្ច។

ដាក់រូបចម្លាក់នៅមុខមាត់ទ្វារ

បរិវេណមុខផ្ទះ គួរមានចំណុច ដែលគួរឱ្យចាប់អារម្មណ៍ ឬចំណុចទាក់ទាញខ្សែភ្នែកខ្លះផង ដែលក្រៅពីការរៀបចំដាក់ផើងផ្កា តាមគោលការណ៍សាមញ្ញៗរបស់ហុងស៊ុយហើយនោះ គួរតែមានរូបចម្លាក់ ដាក់តាំងលម្អនៅខាងមុខទ្វារផ្ទះផង ហើយគួរតែជារូបចម្លាក់ ដែលមានលក្ខណៈជាអ្នកការពារថែរក្សាឃុំគ្រងអ្នកនៅក្នុងផ្ទះ ឱ្យរស់នៅត្រជាក់ត្រជុំ សុខដុមរមនា ដូចជារូបទេវតា រូបសត្វតោ ឬរូបចម្លាក់វត្ថុស័ក្តិសិទ្ធទាំងឡាយ ក៏បានដែរ។

ផ្លូវចូលផ្ទះត្រូវតែបត់កោង

ផ្លូវចូលផ្ទះបែបត្រង់ៗ នឹងនាំទាំងរឿងល្អ និងរឿងមិនល្អ ចូលមកក្នុងផ្ទះបានយ៉ាងងាយស្រួល តែបើយើងរៀបចំផ្លូវចូលផ្ទះ បែបកោង រាងបត់បន្តិច វានឹងជួយត្រងច្រោះ យកតែរឿងល្អៗចូលមកក្នុងផ្ទះ និងការពាររឿងដែលមិនល្អ មិនឱ្យចូលផ្ទះរបស់យើងបានទៀតផង។ គ្រាន់តែកែសម្រួលផ្លូវចូលផ្ទះ ឱ្យមានភាពកោងបន្តិច ក៏អាចជួយបញ្ចៀសភាពមិនល្អ ចេញពីផ្ទះរបស់យើងបានទៅហើយ។

បើលោកអ្នកមានអារម្មណ៍ថា ជីវិតមានឧបសគ្គ ឬមានរឿងរអាក់រអួលជាញឹកញាប់នោះ ចូរកែសម្រួលហុងស៊ុយផ្ទះ ជាមុនសិនល្អជាង ព្រោះជួនកាល ស្ថានភាពជុំវិញខ្លួន ដែលមិនត្រឹមត្រូវ មិនសមគួរ ក៏អាចជាអ្វីមួយដែលបិទបាំងសំណាង និងរឿងល្អៗ ដែលបម្រុងនឹងចូលមកក្នុងជីវិតរបស់យើងបានដែរ។ ដូច្នេះសូមសាកល្បងរៀបចំកន្លែងរស់នៅ តាមគោលការណ៍ហុងស៊ុយម្តងមើល៍ វាគ្មានអ្វីគួរឱ្យខាតបង់ទេ ដោយចាប់ផ្តើមពីការៀបចំហុងស៊ុយមុខផ្ទះ ដូចដែលបានណែនាំមកខាងលើនោះ ក៏បានដែរ៕

May 26, 2021

Barcelona ធ្វើមិនសូវបានល្អ ដោយសារតែកីឡាករ

Ronald Koeman អ្នកចាត់ការក្រុម FC Barcelona ហាក់មិនសូវពេញចិត្តទៅនឹងអ្វី ដែលក្រុម Barcelona ទទួលបានឡើយ ក្នុងពេលដែលលោកដឹកនាំ នេះ ដោយសារតែក្រុមលោក ធ្វើបានត្រឹមចំណាត់ថ្នាក់លេខ3 តែប៉ុណ្ណោះនៅ La Liga។

ពាក់ព័ន្ធនឹងការដឹកនាំមិនបានល្អនេះ លោកបានបន្ទោស និងដាក់បន្ទុក ទៅលើកីឡាកររបស់លោក ដែលថា ពួកគេលេងមិនបានល្អ មិនស័ក្តិសមនឹងអ្វីដែលលោកចង់បានឡើយ។ លោកថា ពេលដែលលោកចូលមកដឹកនាំ លោកមិនទាន់បានរុះរើក្រុមកីឡាករនៅឡើយ ដោយបានទិញចូលកីឡាករ តែម្នាក់ប៉ុណ្ណោះ។ កីឡាករចាស់ៗដែលធ្លាក់ទម្រង់លេង របស់ Barcelona នេះហើយ ដែលលោកបានចាត់ទុកថា ជាមូលហេតុដែលលោកដឹកនាំ យ៉ាងម៉េចក៏មិនឡើងនោះ៕

May 26, 2021

វ៉ាក់សាំង COVID-19! ពលរដ្ឋពេញវ័យចំនួនពាក់កណ្ដាលនៅសហរដ្ឋអាមេរិក បានចាក់វ៉ាក់សាំងរួចរាល់

សេតវិមានបានប្រកាសថា ប្រជាជនពេញវ័យនៅសហរដ្ឋអាមេរិកចំនួនពាក់កណ្ដាល បានទទួលការចាក់វ៉ាក់សាំងបង្ការវីរុសCovid-19 រួចរាល់ហើយ ដែលនេះគឺជារបត់សំខាន់ថ្មីនៅក្នុងការប្រយុទ្ធប្រឆាំង Covid-19 របស់ប្រទេសនេះ។

ព័ត៌មានខាងលើនេះ ត្រូវបានលើកឡើងកាលពីថ្ងៃទី25 ខែឧសភា ឆ្នាំ2021 នៅលើ Twitter របស់ Cyrus Shahpar នាយកផ្នែកទិន្នន័យ Covid-19 របស់សេតវិមាន។ ដូច្នេះ ពលរដ្ឋពេញវ័យចំនួន 50% នៅសហរដ្ឋ អាមេរិក បានទទួលការចាក់វ៉ាក់សាំងបង្ការ Covid-19 ដូសទីពីររបស់ Moderna និង Pfizer-BioNTech ឬ មួយដូសរបស់ Johnson & Johnson (វ៉ាក់សាំង Johnson & Johnson តម្រូវឱ្យចាក់តែមួយដូសគឺរួចរាល់)។

សហរដ្ឋអាមេរិក បច្ចុប្បន្នមានអ្នកឆ្លងវីរុសCovid-19 សរុបចំនួន 33,947,189នាក់ ក្នុងនោះមានអ្នកស្លាប់សរុបចំនួន 605,208នាក់, អ្នកជាសះស្បើយចំនួន 27,606,442នាក់ ខណៈអ្នកជំងឺកំពុងព្យាបាល មានចំនួន 5,735,539នាក់។

បើទោះបានក្លាយជាសម្បុកវីរុសCovid-19 ធំជាងគេបង្អស់ក្នុងពិភពលោក ប៉ុន្តែ បច្ចុប្បន្ន សហរដ្ឋអាមេរិក កំពុងនាំមុខគេនៅក្នុងការចាក់វ៉ាក់សាំង ជាមួយនឹងពលរដ្ឋ ចំនួន 50% ក្នុងចំណោមពលរដ្ឋសរុបជាង 332 លាននាក់ បានចាក់វ៉ាក់សាំងយ៉ាងតិចមួយដូស។

ប្រធានាធិបតី Joe Biden បានកំណត់គោលដៅ ចាក់វ៉ាក់សាំងយ៉ាងតិចមួយដូស ជូនពលរដ្ឋពេញវ័យឱ្យបាន 70% ត្រឹមថ្ងៃទី4 ខែកក្កដា ឆ្នាំ2021។ បច្ចុប្បន្ន តួលេខនេះ បានកើនដល់ជិត 62% ទៅហើយ។ ក៏ប៉ុន្តែ យុទ្ធនាការចាក់វ៉ាក់សាំង កំពុងជួបឧបសគ្គ ដោយសារតែពលរដ្ឋខ្លះ មានការរារែកក្នុងការទៅទទួលការចាក់វ៉ាក់សាំង។

«ស្ថានភាពសុខភាពរបស់សហគមន៍នានា ត្រូវបានកែលម្អ ដែលនេះ បានផ្ដល់ថាមពលដល់សេដ្ឋកិច្ចសហរដ្ឋអាមេរិក ឱ្យងើបក្បាលឡើងបាន 90% បើធៀបនឹងដំណាក់កាលមុនវិបត្តិ Covid-19» នេះបើតាមក្រុមហ៊ុន Moody’s Analytics។ ស្ថានភាពខ្វះកម្លាំងពលកម្មនៅតំបន់មួយចំនួនគឺជាភស្ដុតាងបង្ហាញពីល្បឿននៃការរីកចម្រើនរបស់សេដ្ឋកិច្ចសហរដ្ឋអាមេរិក ហើយក៏ជាសញ្ញាមួយបង្ហាញថា អត្រាខ្វះការងារធ្វើនឹងត្រូវថយចុះក្នុងពេលឆាប់ៗនេះ។

ខណៈនេះដែរ នៅទូទាំងពិភពលោក គិតមកដល់ពេលនេះ មានអ្នកឆ្លងវីរុសCovid-19 សរុបចំនួន 168,535,322នាក់ ក្នុងនោះមាន 3,500,047នាក់បានស្លាប់, 150,077,015នាក់បានជាសះស្បើយ និង 14,958,260នាក់ កំពុងទទួលការព្យាបាល៕

ប្រភព៖ Worldometers, AFP, Reuters
ប្រែសម្រួល៖ បុត្រា

May 26, 2021

ស្ថានភាពជំងឺ COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី26 ខែឧសភា ឆ្នាំ2021

អ្នកជំងឺ Covid-19 ថ្មី ចំនួន 660នាក់ ត្រូវបានរកឃើញកាលពីម្សិលមិញ (25 ឧសភា) នាំឱ្យតួលេខអ្នកឆ្លងវីរុសនេះសរុប ឡើងដល់ 26,989នាក់។

កាលពីម្សិលមិញ កម្ពុជា ក៏មានអ្នកជំងឺCovid-19 ចំនួន 7នាក់ បានបាត់បង់ជីវិត ដូច្នេះ អ្នកស្លាប់សរុបដោយសារវីរុសនេះ ក៏បានកើនដល់ 190នាក់។ ព័ត៌មានបន្ថែម សូមអានរបាយការណ៍សង្កេបរបស់ក្រសួងសុខាភិបាល ដែលមានដូចខាងក្រោម។

នៅទូទាំងពិភពលោក គិតមកដល់ពេលនេះ មានអ្នកឆ្លង Covid-19 សរុបចំនួ 168,528,040នាក់ ក្នុងនោះមាន 3,499,712នាក់បានស្លាប់, 150,052,550នាក់បានជាសះស្បើយ និង 14,975,778នាក់ កំពុងទទួលការព្យាបាល៕ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

May 26, 2021

ទេសចរណ៍អវកាស! Virgin Galactic មានអតិថិជនជាង 600នាក់ក្នុងដៃ ខណៈ Blue Origin មិនទាន់ប្រកាសពីតម្លៃសំបុត្រធម្មតានៅឡើយ

ប្រព័ន្ធយានអវកាស SpaceShipTwo របស់ Virgin Galactic កំពុងឆ្ពោះទៅជិតដល់ដំណាក់កាលធ្វើពាណិជ្ជកម្ម ដោយជើងហោះហើរសាកល្បងដឹកមនុស្សលើកទីបី ទទួលបានជោគជ័យ។

យានអវកាស SpaceShipTwo VSS Unity ដែលភ្ជាប់នៅខាងក្រោមយន្តហោះមេ VMS Eve បានហោះឡើងពីមជ្ឈមណ្ឌលពាណិជ្ជកម្ម Spaceport America របស់ក្រុមហ៊ុន Virgin Galactic កាលពីវេលាម៉ោង 8និង35នាទីព្រឹក ថ្ងៃទី22 ខែឧសភា (ម៉ោងក្នុងស្រុក) គឺជាជើងហោះហើរដែលមានក្រុមអ្នកបើកបរដំបូង នៃយានដែលត្រូវបានធ្វើឡើងនៅក្នុងរដ្ឋ New Mexico សហរដ្ឋអាមេរិក។ ជើងហោះហើរសាកល្បងពីរលើកមុននោះ សុទ្ធតែត្រូវបានធ្វើឡើងនៅឯកំពង់ផែអាកាសចរណ៍អវកាស Mojave នៅភាគអាគ្នេយ៍នៃរដ្ឋ California។

ប្រហែល 50នាទី បន្ទាប់ពីហោះឡើង យាន VSS Unity បានផ្ដាច់ខ្លួនចេញពីយានមេ VMS Eve នៅលើកម្ពស់ 13,411ម៉ែត្រ រួចបញ្ឆេះម៉ាស៊ីនរ៉ុក្កែតដែលនៅលើយាន ដើម្បីហោះចូលលម្ហអាកាសខាងក្រោមគន្លងគោចររបស់ផែនដី។ អ្នកនាំពាក្យរបស់ Virgin Galactic បានឱ្យដឹងថា យានអវកាសនេះបានហោះក្នុងល្បឿនលឿនជាងសំឡេងបីដង និងហោះដល់កម្ពស់ 89,2គីឡូម៉ែត្រ មុនពេលចុះចតលើដី។ ប្រការនេះ មានន័យថា វាហោះជិតដល់គន្លង Karman (ដែលមានកម្ពស់ 100គីឡូម៉ែត្រលើផ្ទៃទឹកសមុទ្រ) ជាគន្លងខណ្ឌចែករវាងបរិយាកាសផែនដី និងទីអវកាស។

ជើងហោះហើរសាកល្បងខាងលើ អូសបន្លាយពេលសរុប 1ម៉ោង និង10នាទី ដោយអវកាសយានិកឈ្មោះ CJ Sturckow និង Dave Mackay បញ្ជាឱ្យយានចុះចតលើផ្លូវរត់ នៅវេលាម៉ោង 9និង45នាទី (ម៉ោងក្នុងស្រុក)។ VSS Unity ត្រូវបានរចនាដើម្បីផ្ទុកមនុស្សបាន 6នាក់ ប៉ុន្តែ ការសាកល្បងលើកនេះ មានតែអ្នកបើកបរពីរនាក់ និងបន្ទុកទម្ងន់ផ្នែកវិទ្យាសាស្ត្រ (scientific payload) មួយចំនួន។

ក្រុមហ៊ុន Blue Origin បានត្រៀមខ្លួនរួចរាល់ក្នុងការផ្ទាល់សេវាកម្មទេសចរណ៍អវកាស ដែលចាប់ផ្ដើមពីខែកក្កដា ឆ្នាំ2021

យានទេសចរណ៍អវកាសរបស់ក្រុមហ៊ុន Virgin Galactic កំពុងស្ថិតក្នុងដំណាក់កាលចុងក្រោយនៃបេសកកម្មសាកល្បង ប៉ុន្តែមិនទាន់ត្រៀមខ្លួនជាស្រេចសម្រាប់ធ្វើពាណិជ្ជកម្មនៅឡើយ។ ក្រុមហ៊ុននឹងត្រូវធ្វើការហោះហើរសាកល្បងដែលមានមនុស្សបើកជាច្រើនលើកទៀត នៅក្នុងឆ្នាំនេះ មុនពេលចាប់ផ្ដើមបម្រើអតិថិជន នៅដើមឆ្នាំ2022។

កាលបរិច្ឆេទរបស់ក្រុមហ៊ុន Virgin Galactic យឺតយ៉ាវជាងគូប្រជែងផ្ទាល់របស់ពួកគេគឺ Blue Origin របស់មហាសេដ្ឋីអាមេរិក Jeff Bezos។ ក្រុមហ៊ុន Blue Origin បានត្រៀមខ្លួនរួចរាល់ក្នុងការផ្ទាល់សេវាកម្មទេសចរណ៍អវកាស ដែលចាប់ផ្ដើមពីខែកក្កដា ឆ្នាំ2021 ដោយប្រើប្រព័ន្ធស្វ័យប្រវត្ត New Shepard។ Blue Origin កំពុងលក់ដេញថ្លៃសំបុត្រសម្រាប់កៅអីមួយក្នុងចំណោមកៅអីចំនួន 6 សម្រាប់ជើងហោះហើរទេសចរណ៍ទៅកាន់ទីអវកាសរបស់ខ្លួន ដែលគិតមកដល់ថ្ងៃទី21 ខែឧសភា មានអតិថិជនមួយរូបបានឱ្យតម្លៃដល់ 2.8លានដុល្លារអាមេរិក។

ក្រុមហ៊ុន Blue Origin មិនទាន់ប្រកាសពីតម្លៃសំបុត្រធម្មតានៃជើងហោះហើរធម្មតារបស់ពួកគេនៅឡើយ ខណៈដែល Virgin Galactic បានចាប់ផ្ដើមទទួលការកក់មុន ជាមួយនឹងតម្លៃ 250,000ដុល្លារអាមេរិក/កៅអី។ Richard Branson ស្ថាបនិករបស់ក្រុមហ៊ុន Virgin Galactic បានឱ្យដឹងថា បច្ចុប្បន្ន មានអតិថិជនជាង 600នាក់ បានកក់សំបុត្រទិញសេវាកម្មទេសចរណ៍អវកាសរបស់ពួកគេរួចហើយ៕

ប្រភព៖ Space
ប្រែសម្រួល៖ បុត្រា

May 26, 2021

ការចាក់វ៉ាក់សាំង COVID-19 នៅ កម្ពុជា៖ ពលរដ្ឋជាង 1,698,500នាក់ បានចាក់រួចរាល់

យោងតាមរបាយការណ៍របស់ អនុគណៈកម្មការតាមដាននិងវាយតម្លៃ នៃគណៈកម្មការចំពោះកិច្ចចាក់វ៉ាក់សាំង Covid-19 ក្របខណ្ឌទូទាំងប្រទេស (គ.វ.ក-១៩) ចំនួនពលរដ្ឋដែលបានទទួលការចាក់វ៉ាក់សាំងបង្ការវីរុសCovid-19 បានកើនដល់ជាង 2,300,000នាក់ គិតត្រឹមថ្ងៃទី25 ខែឧសភា ឆ្នាំ2021។

ចំនួនពលរដ្ឋដែលត្រូវបានចាក់វ៉ាក់សាំងដូសទីមួយ មានចំនួន 2,306,882នាក់ ខណៈដែលចំនួនពលរដ្ឋបានចាក់វ៉ាក់សាំងដូសទីពីរ (រួចរាល់) មានចំនួន 1,698,551នាក់។ តួលេខខាងលើគឺស្មើនឹង 23.07% បើធៀបនឹងគោលដៅចាក់វ៉ាក់សាំងជូនពលរដ្ឋឱ្យបាន 10លាននាក់ របស់រាជរដ្ឋាភិបាលកម្ពុជា។ លទ្ធផលនៃការចាក់វ៉ាក់សាំងបង្ការ Covid-19 នេះ ត្រូវបានរាប់ចាប់ពីថ្ងៃទី10 ខែកុម្ភៈ ឆ្នាំ2021 ដល់ថ្ងៃទី25 ខែឧសភា ឆ្នាំ2021។

ព័ត៌មានបន្ថែម សូមអានរបាយការណ៍របស់ គ.វ.ក-១៩ ដែលមានដូចខាងក្រោម៖

ប្រភព៖ Information.gov
ដកស្រង់៖ បុត្រា

May 26, 2021

(វីដេអូ)-ទាហានសហរដ្ឋអាមេរិក មានបំពាក់កែវយឹតពិសេស «មើលពេលយប់ ឃើញដូចពេលថ្ងៃ»

ទាហានសហរដ្ឋអាមេរិក ប្រើប្រាស់កែវយឹតរាត្រី ENVG-B បង្ហាញវត្ថុនានាដែលស្ថិតក្នុងទីងងឹត ឱ្យមើលឃើញច្បាស់ ជាមួយនឹងខ្សែរស្មីព័ទ្ធជុំវិញរូបភាព យ៉ាងលម្អិត ប្រៀបដូចនៅក្នុងហ្គេមអេឡិចត្រូនិក។

សារព័ត៌អាមេរិក កាលពីថ្ងៃទី24 ខែឧសភា ឆ្នាំ 2021 បានចុះផ្សាយវីដេអូ ដែលមានប្រភពពីកងទ័ព បង្ហាញពីក្រុមទាហានប្រទេសនេះ ប្រើប្រាស់កែវយឹតសម្រាប់មើលពេលយប់ជំនាក់ថ្មី ដែលមានឈ្មោះថា ENVG-B។ តាមរយៈ ENVG-B គេអាចមើលឃើញរូបភាពក្នុងស្បៃរាត្រី បានយ៉ាងច្បាស់ ដោយមានជំនួយពីខ្សែពន្លឺដ៏ភ្លឺ ដែលជាស៊ុមព័ទ្ធជុំវិញរូបភាព នៅលើផ្ទៃទិដ្ឋភាពពណ៌ក្រហម-ប្រផេះ។

នៅក្នុងវីដេអូនេះ ក្រុមទាហានអាមេរិក និងទិដ្ឋភាពនានា ត្រូវបានបង្ហាញយ៉ាងច្បាស់ ដោយកែវយឹត ENVG-B បើទោះជាពួកគេកំពុងបញ្ចូលគ្រាប់កាំភ្លើងធំ M777 នៅក្នុងទីងងឹត។ គ្រាប់កាំភ្លើងដែលបានបាញ់ចេញ ត្រូវបានមើលឃើញច្បាស់ ដោយវាបង្ហាញពន្លឺពណ៌ខៀវ-ប្រផេះ។

ក្រុមមន្ត្រីការពារជាតិ បានឱ្យដឹងថា ENVG-B គឺជាផលិតផលនៃកម្មវិធីទំនើបកម្មសព្វាវុធ ដែលត្រូវបានអភិវឌ្ឍអស់ជាច្រើនឆ្នាំមកហើយ ដោយក្រុមហ៊ុន Elbit Systems of America។ ENVG-B អាចត្រូវបានបំពាក់លើមួកសុវត្ថិភាពរបស់ទាហាន។

ENVG-B គឺជាកំណែថ្មីនៃកែវយឹតរាត្រីជំនាក់មុនរបស់កងទ័ពអាមេរិក ដោយវាត្រូវបានបំពាក់ប្រព័ន្ធស្កេនកំដៅរូបភាព (Thermal imaging systems) និងប្រព័ន្ធបង្កើនភាពជាក់ស្ដែង (Augmented reality) ដែលច្នៃឡើងដោយប្រើប្រាស់មូលដ្ឋាននៃបច្ចេកវិទ្យានៅលើទូរស័ព្ទ និងម៉ាស៊ីនលេងហ្គេម។

កន្លងមក កែវយឹតរាត្រីបុរាណរបស់កងទ័ពអាមេរិក បង្ហាញរូបភាពនៅលើផ្ទៃពណ៌បៃតង ដែលនេះអាចធ្វើឱ្យចុករោយភ្នែក និងអស់កម្លាំង បើសិនប្រើប្រាស់យូរ។ ចំណែក ENVG-B ផ្ដល់រូបភាពច្បាស់ជាង និងជួយឱ្យទាហានមានភាពងាយស្រួលក្នុងការមើលឃើញសត្រូវនៅខាងក្រោយផ្សែង និងក្នុងស្ថានភាពអាកាសធាតុមិនល្អ។

ENVG-B ថែមទាំងមានមុខងារបង្ហាញផែនទី ប្រព័ន្ធនាំផ្លូវ និងតំណភ្ជាប់ឥតខ្សែ ជួយឱ្យក្រុមទាហាន ងាយស្រួលចែករំលែកទីតាំងរបស់សត្រូវដែលពួកគេបានឃើញ។

«ជាមួយនឹងកំណែមុនរបស់ ENVG-B អ្នកស្ទើរតែមិនអាចមើលឃើញអ្វី នៅពេលមានគ្រាប់បែកផ្ទុះ ឬមានពន្លឺដ៏ខ្លាំងអ្វីមួយបង្ហាញខ្លួន។ ចំណែក ENVG-B វិញ មានបំពាក់ប្រព័ន្ធលៃពន្លឺ ដូច្នេះ អ្នកអាចប្រើវាបានក្នុងពេលមានពន្លឺខ្លាំងកំពុងជះមក» នេះបើតាម Daniel Mathews មន្ត្រីយោធាមួយរូប ទទួលបន្ទុកផ្នែកព័ត៌មានរបស់កងពលតូចថ្មើរជើងលេខ2 នៃកងពលធំថ្មើរជើងលេខ2 របស់កងទ័ពជើងគោកសហរដ្ឋអាមេរិក។

ក្រុមហ៊ុន Elbit បានចុះកិច្ចព្រមព្រៀង ផ្គត់ផ្គង់កែវយឹតរាត្រី ENVG-B ដែលមានតម្លៃសរុប 442លានដុល្លារ ទៅឱ្យកងទ័ពសហរដ្ឋអាមេរិក និងបានផ្ដើមប្រគល់ផលិតផល ចាប់ពីឆ្នាំ2020៕

ប្រភព៖ Washington Post
ប្រែសម្រួល៖ បុត្រា

May 25, 2021

“ប្រពន្ធខ្ញុំអត់ធ្វើការអ្វីទេ នាងជាស្ត្រីមេផ្ទះ” ស្វាមីអ្នកណា ចូលចិត្តនិយាយបែបហ្នឹង សូមប្រញាប់ប្រាប់ ឱ្យគាត់អានរឿងនេះ ជាបន្ទាន់…

ស្ត្រីជាភរិយាទាំងឡាយ ដែលនៅផ្ទះ ធ្វើជាមេផ្ទះ ចិញ្ចឹមមើលថែកូន នឹងឆ្លើយថា យ៉ាងណាដែរ នៅពេលមានគេសួរអ្នកថា ធ្វើជាមេផ្ទះ តើអ្នកបានធ្វើអ្វីខ្លះ?

មនុស្សភាគច្រើន ច្រើនតែមើលឃើញថា ស្ត្រីជាមេផ្ទះ ដែលមិនបានចេញទៅធ្វើការនៅក្រៅផ្ទះនោះ ច្រើនតែរស់នៅស្រួល សប្បាយ មិនពិបាក មិនចាំបាច់គិតអ្វីច្រើន មិនចាំបាច់ត្រូវលីសែងបន្ទុក ទទួលខុសត្រូវ ឬតានតឹង ធុញថប់រឿងការងារឡើយ។

បទសន្ទនា ដែលលោកអ្នកនឹងបានអានតទៅនេះ ជារឿងរ៉ាវរបស់ស្វាមីម្នាក់ ដែលបានទៅជួបគ្រូពេទ្យចិត្តវិទ្យា ដើម្បីពិភាក្សារឿងប្រក្រតីទូទៅ ដែលវានឹងធ្វើឱ្យយើងមើលឃើញ ពីតួនាទីរបស់មនុស្ស ដែលជាភរិយា ជាស្ត្រីមេផ្ទះ បានយ៉ាងច្បាស់ថា តើក្នុង 1ថ្ងៃៗ ដែលអ្នកដទៃចូលចិត្តគិតថា ធ្វើជាស្ត្រីមេផ្ទះ នៅតែផ្ទះ ហើយស្រួលសប្បាយនោះ ការពិតវិញ 1ថ្ងៃៗ ភរិយាត្រូវធ្វើអ្វីខ្លះ?

សំណួរ ៖ តើលោកធ្វើការអ្វីដែរ នៅពេលនេះ?

ស្វាមី ៖ បាទ ខ្ញុំជាអ្នកធ្វើបញ្ជី នៅក្នុងធនាគារមួយ

សំណួរ ៖ ចុះភរិយាលោក?

ស្វាមី ៖ នាងមិនបានធ្វើការងារអ្វីទេ នាងជាស្ត្រីមេផ្ទះ

សំណួរ ៖ តើនរណាជាអ្នកធ្វើអាហារពេលព្រឹក និងការងារផ្ទះឱ្យលោក?

ស្វាមី ៖ ភរិយាខ្ញុំងើបឡើង ធ្វើអាហារពេលព្រឹក ព្រោះនាងមិនបានទៅធ្វើការ មិនចាំបាច់ប្រញាប់ចេញទៅណាទេ

សំណួរ ៖ ភរិយាលោកភ្ញាក់នៅម៉ោងប៉ុន្មានដែរ?

ស្វាមី ៖ មិនប្រាកដដែរ តែនាងងើបពីព្រឹកខ្លាំងណាស់ ព្រោះនាងត្រូវបោសជូតសម្អាតផ្ទះ ធ្វើអាហារពេលព្រឹកឱ្យខ្ញុំ និងកូនៗអាចរួមទាំងអាហារពេលថ្ងៃត្រង់ទៀតផង រួចត្រៀមសម្លៀកបំពាក់ ដុសធ្មេញ រៀបចំក្រណាត់កន្ទប របស់ប្រើប្រាស់ផ្សេងៗសម្រាប់កូនៗ និងឱ្យកូនញ៉ាំអាហារពេលព្រឹកឱ្យរួចរាល់…

សំណួរ ៖ ចុះកូនៗលោក ទៅរៀនយ៉ាងម៉េចដែរ?

ស្វាមី ៖ ភរិយារបស់ខ្ញុំ ជាអ្នកនាំកូនទៅសាលារៀន ព្រោះនាងមិនបានធ្វើការងារអីទេ

សំណួរ ៖ ក្រោយពីនាងនាំកូនទៅសាលារៀនហើយ តើនាងធ្វើអ្វីតទៀត?

ស្វាមី ៖ ជាប្រក្រតី នាងនឹងឆៀងទៅផ្សារទិញម្ហូបអាហារ និងរបស់របរប្រើប្រាស់ រួចត្រឡប់ទៅ រៀបចំសម្អាតផ្ទះម្ដងទៀត នាងប្រមូលទុកដាក់របស់របរប្រើប្រាស់របស់កូន ហើយបោកគក់សម្លៀកបំពាក់ អ៊ុតទុកដាក់ និងត្រៀមអាហារពេលល្ងាច…លោកដឹងហើយតើ ថានាងមិនបានធ្វើការងារអីទេ…

សំណួរ ៖ បន្ទាប់ពីចេញពីធ្វើការពេលល្ងាច តើលោកធ្វើអ្វី?

ស្វាមី ៖ ខ្ញុំហត់មកពេញ 1ថ្ងៃ ក្រោយពេលមកពីធ្វើការ ខ្ញុំធ្វើអ្វីទៀតក៏មិនរួចដែរ…

សំណួរ ៖ តើភរិយារបស់លោកធ្វើអ្វីនៅពេលល្ងាច និងពេលព្រលប់?

ស្វាមី ៖ នាងធ្វើអាហារពេលល្ងាចឱ្យខ្ញុំ និងកូនៗ រួចហើយរៀបចំលាងសម្អាតទុកដាក់ បង្រៀនកិច្ចការផ្ទះកូន ងូតទឹកឱ្យកូន រួចរៀបចំត្រៀមឱ្យកូនចូលគេង…ខ្ញុំ និងកូន ត្រូវការសម្រាក និងចូលគេង តែនាងមិនចាំបាច់ប្រញាប់ចូលគេងទេ ព្រោះនាងមិនមានត្រូវចេញទៅធ្វើការងារអ្វីទេ…

ក្រោយពីបញ្ចប់បទសន្ទនា យើងអាចសរុបបានថា នេះជាកិច្ចការងារប្រចាំថ្ងៃរបស់ស្ត្រីជាច្រើននាក់ ដែលមិនបានចេញទៅធ្វើការនៅក្រៅផ្ទះ តែជ្រើសរើសនៅផ្ទះ ដើម្បីចិញ្ចឹមមើលថែកូន ស្វាមី និងថែទាំផ្ទះ។ លោកអ្នកនឹងមើលឃើញថា នាងត្រូវងើបពីដំណេក តាំងពីព្រឹកព្រលឹម និងចូលគេងយប់ជ្រៅ(ក្រោយគេ) ដើម្បីឱ្យអ្វីគ្រប់យ៉ាងក្នុងផ្ទះស្អាតបាតរៀបរយ…បែបនេះឬ ដែលហៅថា មិនបានធ្វើការងារអ្វី?។

ពាក្យថា “មេផ្ទះ” ធ្ងន់ធ្ងរណាស់ សម្រាប់មនុស្សជាស្ត្រី ជាភរិយា និងជាម្ដាយ ព្រោះនាងត្រូវធ្វើការងារស្ទើរតែពេញ 24ម៉ោងក្នុង 1ថ្ងៃ ដោយមិនមានប្រាក់ខែ មិនមានសញ្ញាបត្រ មិនមានបណ្ណសរសើរ តែមានតួនាទីសំខាន់ខ្លាំងណាស់ជាមួយគ្រួសារ។ សរុបងាយៗ ភរិយា ឬម្ដាយ គឺសឹងតែជាអ្វីៗគ្រប់យ៉ាង ៈ

ត្រូវធ្វើការរាល់ថ្ងៃ(គ្មានសៅរ៍-អាទិត្យ)
ជាម្ដាយ(មើលថែទាំកូន)
ជាអ្នកបម្រើ(ក្នុងផ្ទះ)
ជាចុងភៅ(ក្នុងគ្រួសារ)
ជាអ្នកមើលថែក្មេង
ជាអ្នកគ្រូបង្រៀន
ជាអ្នកគ្រូពេទ្យ
ជាទីប្រឹក្សា
ជាសន្តិសុខ ការពារសុវត្ថិភាព
គ្មានថ្ងៃឈប់សម្រាក
និងគ្មានប្រាក់ខែ…

ជាទីបញ្ចប់ អ្នកគ្រូ ឆវី ចង់ជម្រាបថា ស្ត្រីមេផ្ទះចិញ្ចឹមមើលថែកូន និងស្វាមី ជាអាជីពដែលហត់នឿយខ្លាំង និងត្រូវលះបង់ច្រើនណាស់។ ចង់លាឈប់ ក៏មិនបាន និងច្រើនតែមិនសូវមានអ្នកយល់ចិត្ត និងដឹងពីតួនាទីរបស់មនុស្សជាម្ដាយ និងមិនសូវផ្ដល់ភាពសំខាន់ចំពោះរឿងនេះប៉ុន្មានឡើយ…តែយ៉ាងហោចណាស់ ក៏មានស្ត្រីជាម្ដាយច្រើននាក់ណាស់ ដែលចិញ្ចឹមកូនដោយខ្លួនឯងនៅផ្ទះ ដែលយល់ច្បាស់អំពីរឿងនេះ មែនទេ…ស្ត្រីមេផ្ទះទាំងឡាយ?៕

May 25, 2021

COVID-19! ជិត 200នាក់លោតចូលទន្លេដើម្បីគេចពីវ៉ាក់សាំង៖ ឥណ្ឌាពន្លឿនការយល់ដឹងពីអត្ថប្រយោជន៍នៃការចាក់វ៉ាក់សាំងបង្ការវីរុស

ពលរដ្ឋជិត 200នាក់ នៅក្នុងរដ្ឋ Uttar Pradesh នៃប្រទេស ឥណ្ឌា បាននាំគ្នារត់ពួន ក្នុងនោះមានអ្នកខ្លះលោតចូលទឹកទន្លេ នៅពេលក្រុមមន្ត្រីសុខាភិបាលមកចាក់វ៉ាក់សាំងបង្ការវីរុសCovid-19។

ដើម្បីអាចគ្រប់គ្រងបញ្ហាឆ្លង Covid-19 អាជ្ញាធររដ្ឋឥណ្ឌា បានអំពាវនាវជាបន្តបន្ទាប់ ឱ្យពលរដ្ឋដែលមានអាយុចាប់ពី 18ឆ្នាំ ទៅចាក់វ៉ាក់សាំងឱ្យបានលឿនបំផុតតាមដែលអាចធ្វើទៅបាន ចាប់ពីថ្ងៃទី1 ខែឧសភា ឆ្នាំ2021។

ប៉ុន្តែ យោងតាមសារព័ត៌មាន Sputnik កាលពីចុងសប្ដាហ៍កន្លង នៅក្នុងភូមិ Sisaunda (រដ្ឋ Uttar Pradesh) មានហេតុការណ៍ដ៏ធំមួយបានកើតឡើង នៅពេលប្រជាជនជិត 200នាក់ បានរត់ចេញពីផ្ទះសម្បែង ហើយមានអ្នកខ្លះថែមទាំងលោតចូលទឹកទន្លេទៀតផង នៅពេលក្រុមបុគ្គលិកសុខាភិបាលមកចាក់វ៉ាក់សាំង។ មូលហេតុដែលត្រូវបានពលរដ្ឋទាំងនោះលើកឡើង នោះគឺថា ពួកគេមិនចង់ត្រូវគេចាក់ «សារធាតុពុល» ចូលក្នុងខ្លួន ដែលនេះគឺសំដៅលើវ៉ាក់សាំងបង្ការ Covid-19។

ក្រុមប្រជាពលរដ្ឋនៅក្នុងភូមិ Sisaunda បានស្នើឱ្យក្រុមបុគ្គលិកសុខាភិបាល ចាកចេញពីភូមិរបស់ពួកគេ។ ក្រុមបុគ្គលិកសុខាភិបាល បាននាំគ្នាពន្យល់ ណែនាំ និងបញ្ចុះបញ្ចូល ប៉ុន្តែប្រការនេះបានធ្វើឱ្យមានបញ្ហាច្របូកច្របល់។ ពលរដ្ឋជាច្រើននាំគ្នារត់គេច និងលោតចូលទន្លេ Sarayu ដែលនៅក្បែរភូមិ ក្នុងបំណងគេចពីការចាក់វ៉ាក់សាំង។

ភូមិ Sisaunda នៃទីរួមស្រុក Ramngar ក្នុងស្រុក Sisaunda បច្ចុប្បន្នមានពលរដ្ឋរស់នៅប្រមាណ 1,700នាក់ ដែលភាគច្រើនមិនចេះអក្សរ។ ពួកគេមានការសង្ស័យលើការចាក់វ៉ាក់សាំង។ មន្ត្រីមួយរូបប្រចាំតំបន់ Ramnagar បានប្រាប់ទីភ្នាក់ងារសារព័ត៌មាន Sputnik កាលពីថ្ងៃទី24 ខែឧសភាថា៖ «យើងមិនអាចចាប់ខ្លួន ឬឃុំខ្លួនពួកគេ ព្រោះតែការខ្លាចវ៉ាក់សាំង។ យើងនឹងបង្កើនការអប់រំ ដើម្បីឱ្យមានការយល់ដឹងពីអត្ថប្រយោជន៍នៃការចាក់វ៉ាក់សាំង»។

បច្ចុប្បន្ន ឥណ្ឌា មានអ្នកស្លាប់ជាង 307,240នាក់ ដោយសារ Covid-19

Gulshan Kumar ដែលជានិស្សិតមួយរូបកំពុងសិក្សាផ្នែកចក្ខុវិញ្ញាណនៅ Ramnagar និយាយថា ក្នុងភូមិខាងលើ មិនទាន់មានករណីឆ្លង Covid-19 ណាមួយនៅឡើយ។ «ពលរដ្ឋយល់ថា មានតែអ្នកបានឆ្លងវីរុសប៉ុណ្ណោះ ទើបគួរត្រូវចាក់វ៉ាក់សាំង។ អ្នកភូមិមិនយល់សោះថា ហេតុអ្វីបុគ្គលមិនឆ្លងក៏ត្រូវចាក់វ៉ាក់សាំង»។

ទន្ទឹមនឹងនេះ ព័ត៌មានដែលនិយាយពីមាត់មួយ ទៅមាត់មួយ នៅក្នុងភូមិគឺវា «លឿនជាងល្បឿនពន្លឺទៅទៀត»។ និស្សិតវ័យ 22ឆ្នាំរូបនេះពន្យល់ថា៖ «នៅក្នុងភូមិ និងទីរួមស្រុកដែលនៅក្បែរខាង មានករណីឆ្លងវីរុសក្រោយពេលបានចាក់វ៉ាក់សាំង ហើយជាងនេះក៏មានករណីស្លាប់ជាហូរហែនៅពាសពេញផ្ទៃប្រទេស បន្ទាប់ពីបានចាក់វ៉ាក់សាំង Covid-19។ ពលរដ្ឋបានយកដំណឹងនេះ និយាយប្រាប់តៗគ្នា ធ្វើឱ្យកើតមានបញ្ហា «ក្បែកមួយជាក្អែកដប់» ដែលនេះគឺជាមូលហេតុនាំឱ្យប្រជាជនក្នុងភូមិខ្លាចវ៉ាក់សាំងដល់ថ្នាក់នេះ»។

នៅពេលឃើញប្រជាជននាំគ្នាលោតចូលទឹកទន្លេ ដោយសារតែខ្លាចវ៉ាក់សាំង Rajiv Kumar Shukla ដែលជាមន្ត្រីមួយរូបនៅតំបន់ Ramnagar ក៏បានទៅដល់មាត់ទន្លេ និងពន្យល់ លើកទឹកចិត្ត។ ក្រោយមក ក៏មានពលរដ្ឋចំនួន 18នាក់ បានស្ម័គ្រចិត្តចុះឈ្មោះទទួលយកការចាក់វ៉ាក់សាំង។

យោងតាមក្រសួងសុខាភិបាលឥណ្ឌា ក្នុងអំឡុង 24ម៉ោងនៃថ្ងៃទី24 ខែឧសភា ប្រទេសនេះបានរកឃើញអ្នកវិជ្ជមាននឹងវីរុសCovid-19 ជាង 222,000នាក់ទៀត នាំឱ្យតួលេខអ្នកឆ្លងសរុប មកដល់ថ្ងៃទី25 ខែឧសភានេះ បានកើនឡើងដល់ជាង 26.9លាននាក់ ក្នុងនោះមាន 307,249នាក់បានស្លាប់, 24,054,861 នាក់ បានជាសះស្បើយ និង 2,586,764នាក់ កំពុងទទួលការព្យាបាល៕

ប្រភព៖ Sputnik
ប្រែសម្រួល៖ បុត្រា

May 25, 2021

Author: សឿន សំណាង