សឿន សំណាង - La Reine Media

ចិន បាញ់បង្ហោះយានដឹកទំនិញ Tianzhou-2 ឡើងទៅកាន់ទីអវកាស ដោយជោគជ័យ

នៅវេលាម៉ោង 20និង55នាទី នៃថ្ងៃទី29 ខែឧសភា (ម៉ោង 19និង55នាទី នៅកម្ពុជា) ប្រទេសចិន បានបាញ់បង្ហោះយានអវកាសដឹកទំនិញ Tianzhou-2 ឡើងទៅកាន់គន្លងតារាវិថីផែនដី ដោយជោគជ័យ។

យោងតាមទីភ្នាក់ងារអវកាសមានមនុស្សបើករបស់ប្រទេសចិន (China Manned Space Agency/CMSA) រ៉ុក្កែត Long March-7 ដែលដឹកយានអវកាស Tianzhou-2 ត្រូវបានបាញ់ចេញពីមូលដ្ឋានបាញ់បង្ហោះយានអវកាស Wenchang ស្ថិតនៅតំបន់ឆ្នេរសមុទ្រភាគខាងកើតនៃខេត្ត Hainan។

Tianhe គឺជាម៉ូឌុលកាប៊ីនស្នូល របស់ស្ថានីយអវកាសដែលមានទម្រង់ជាអក្សរ T និងមានឈ្មោះថា Tiangong ដែលប្រទេសចិន បានកំណត់គោលដៅសាងសង់ឱ្យបានសម្រេចជាស្ថាពរ នៅចុងឆ្នាំ2022។ ការបាញ់បង្ហោះយានអវកាស Tianzhou-2 គឺជាលើកទីពីរ ក្នុងចំណោម 11លើក ដែលចិនបានបាញ់បង្ហោះរ៉ុក្កែតនាំយកម៉ូឌុលស្នូលរបស់ស្ថានីយអវកាស យានអវកាសមានមនុស្សបើក និងយានអវកាសដឹកទំនិញ ឡើងទៅកាន់ទីអវកាស។

តាមគម្រោង ដល់ឆ្នាំ2022 ចិននឹងអាចចាប់ផ្ដើមដំណើរការស្ថានីយអវកាស Tiangong នេះ។ ស្ថានីយនេះមានទម្ងន់ 100តោន និងមានទំហំគ្រប់គ្រាន់សម្រាប់ឱ្យអ្នកអវកាស 3នាក់ ធ្វើការក្នុងរយៈពេលយូរ។ Tiangong នឹងគោចរក្នុងគន្លងតារាវិថីកម្រិតទាបរបស់ផែនដី ដែលស្ថិតលើកម្ពស់ចាប់ពី 340-450គីឡូម៉ែត្រ ពីផ្ទៃផែនដី។ នេះគឺជាស្ថានីយអវកាសដំបូងរបស់ប្រទេសចិន ដែលធ្វើសកម្មភាពយូរអង្វែងលើគន្លងគោចរភូមិសាស្ត្រ (Geostationary orbit)៕

ប្រភព៖ Reuters
ប្រែសម្រួល៖ បុត្រា

May 30, 2021

វ៉ាក់សាំង COVID-19 របស់ចិន មានផលប៉ះពាល់តិច និងមិនទាន់មានករណីស្លាប់

ក្រុមហ៊ុន Sinopharm ប្រកាសលទ្ធផលនៃការសាកល្បងប្រើប្រាស់ដំណាក់កាលទីបី ក្រោយពីវ៉ាក់សាំង Covid-19 ចំនួន 200លានដូស របស់ក្រុមហ៊ុនចិនមួយនេះ ត្រូវបានចាក់នៅជុំវិញពិភពលោក។

យោងតាមលទ្ធផលនៃការស្រាវជ្រាវដែលត្រូវបានចុះផ្សាយកាលពីថ្ងៃទី26 ខែឧសភា នៅលើទស្សនាវដ្ដីសមាគមវេជ្ជសាស្ត្រអាមេរិក វ៉ាក់សាំង Covid-19 របស់ក្រុមហ៊ុន Sinopharm ដែលផលិតនៅទីក្រុងប៉េកាំង មានប្រសិទ្ធភាព 78.1%។ វ៉ាក់សាំង Covid-19 របស់ Sinopharm មុននោះ ក៏ត្រូវបានអង្គការសុខភាពពិភពលោក (WHO) អនុម័តឱ្យប្រើប្រាស់បន្ទាន់រួចហើយដែរ។

ចំណែកវ៉ាក់សាំងមួយប្រភេទទៀតរបស់ Sinopharm ផលិតដោយក្រុមហ៊ុនបុត្រសម្ព័ន្ធនៅទីក្រុង Wuhan ប្រទេសចិន មានប្រសិទ្ធភាព 72.8%។ វ៉ាក់សាំងនេះ កំពុងស្ថិតក្នុងដំណាក់កាលស្នើ WHO ផ្ដល់សិទ្ធឱ្យធ្វើចរាចរណ៍បន្ទាន់ និងត្រូវបានអនុម័តដោយមានលក្ខខណ្ឌអមនៅប្រទេសចិន។

លទ្ធផលដែលទទួលបានពីការសាកល្បងប្រើប្រាស់លើកទីបីរបស់ Sinopharm ត្រូវបានធ្វើឡើងដោយយោងទៅលើទិន្នន័យដែលប្រមូលបានពីអ្នកស្ម័គ្រចិត្តចំនួន 40,411នាក់ នៅ UAE និងបារ៉ែន ដែលបានទទួលការចាក់វ៉ាក់សាំងនេះ កាលពីឆ្នាំ2020។ អ្នកស្ម័គ្រចិត្ត ភាគច្រើនមានសុខភាពល្អ និងមានវ័យចាប់ពី 18-59ឆ្នាំ ប៉ុន្តែក៏មានប្រហែល 600នាក់ មានអាយុលើសពី 60ឆ្នាំផងដែរ។

លទ្ធផលខាងលើ បានបង្ហាញថា អ្នកដែលបានជួបផលប៉ះពាល់មានចំនួន 201ករណី ក្នុងនោះមាន 2ករណីមានសភាពធ្ងន់ធ្ងរបំផុត ទាក់ទិននឹងវ៉ាក់សាំងរបស់ Sinopharm ដែលផលិតនៅទីក្រុងប៉េកាំង។ នោះគឺបុរសវ័យ 30ឆ្នាំ ដែលត្រូវបានពិនិត្យឃើញថា អាចប៉ះពាល់ដល់សរសៃវិញ្ញាណ និងស្ត្រីវ័យ 35ឆ្នាំ មានអាការក្អួតចង្អោរខ្លាំង និងត្រូវបញ្ជូនទៅកាន់មន្ទីរពេទ្យ។

ទស្សនាវដ្ដី សមាគមវេជ្ជសាស្ត្រអាមេរិក ក៏បានបញ្ជាក់ថា ការពិសោធដំណាក់កាលទីបីរបស់ Sinopharm ត្រូវបានធ្វើឡើងភាគច្រើនទៅលើក្រុមមនុស្សដែលមានវ័យនៅក្មេង មិនអាចបញ្ជាក់អំពីប្រសិទ្ធភាពចំពោះអ្នកដែលមានជំងឺប្រចាំកាយ ស្ត្រី និងមនុស្សវ័យចំណាស់។

យោងតាមទិន្នន័យកាលពីដើមខែនេះ វ៉ាក់សាំង Sinopharm ប្រមាណ 200លានដូស ត្រូវបានប្រើប្រាស់នៅក្នុងប្រទេស និងដែនដីចំនួន 42 លើពិភពលោក ឈរពីក្រោយ AstraZeneca, Pfizer-BioNTech និង Moderna។

វ៉ាក់សាំង Sinopharm កន្លងមក ធ្លាប់ធ្វើឱ្យមានការសង្ស័យច្រើនពីសំណាក់ក្រុមអ្នកវិទ្យាសាស្ត្រ ដោយសារតែមានទិន្នន័យតិចតួចស្ដីពីការពិសោធន៍លើមនុស្សដំណាក់កាលចុងក្រោយ ដែលត្រូវបានប្រកាសដោយរដ្ឋាភិបាលចិន ក៏ដូចជាការបង្ហើបពីក្រុមហ៊ុននេះ៕

ប្រភព៖ SCMP
ប្រែសម្រួល៖ បុត្រា

May 29, 2021

ពលរដ្ឋឥណ្ឌា គោរពបូជា អាទិទេព CORONA ដើម្បីការពារមនុស្សពី COVID-19

ឥណ្ឌា៖ សាសនិកហិណ្ឌូជាច្រើន បាននាំគ្នាមកបួងសួងជារៀងរាល់ថ្ងៃ នៅវិហារមួយដែលស្ថិតក្នុងរដ្ឋ Tamil Nadu ជាកន្លែងដែលមានរូបសំណាកអាទិទេពថ្មីមួយទៀតរបស់ពួកគេ នោះគឺ Corona។

ទីភ្នាក់ងារសារព័ត៌មានបារាំង AFP បានឱ្យដឹងថា រូបសំណាកអាទិទេព Corona មួយអង្គ បានបង្ហាញខ្លួននៅក្នុងទីក្រុង Coimbatore ក្នុងគ្រាប្រទេសឥណ្ឌាជួបបញ្ហាលំបាកខ្លាំង ដោយសារតែរលកនៃការវាយប្រហារលើកទីពីររបស់វីរុសCovid-19។

វិហារ Kamatchipuri Adhinam ត្រូវបានបិទទ្វារក្នុងពេល Covid-19 ឆ្លងរាលដាលខ្លាំងនៅទីក្រុង Coimbatore ប៉ុន្តែ អ្នកកាន់សាសនាហិណ្ឌូជាច្រើន នៅតែមកកាន់ទីនេះដើម្បីបួងសួងនៅចំពោះមុខរូបសំណាកអាទិទេព Corona។ នៅខាងមុខរូបសំណាកអាទិទេព Corona ក៏មានរូបសំណាកវីរុសCorona ចំនួនពីរផងដែរ ក្នុងនោះមាន មួយធ្វើអំពីថ្ម និងមួយទៀតធ្វើអំពីឈើក្រអូប។

មូលហេតុដែលនាំឱ្យសាសនិកហិណ្ឌូ គោរពអាទិទេព Corona នេះ ត្រូវបានគេជឿថា ដើម្បីបួងសួងសុំបញ្ចប់មហារោគរាតត្បាត Covid-19 ឱ្យបានឆាប់រហ័ស។

គិតមកដល់ព្រឹកថ្ងៃទី29 ខែឧសភា ឥណ្ឌា បានរកឃើញអ្នកឆ្លងវីរូសCovid-19 សរុបចំនួន 27,719,431នាក់ ក្នុងនោះមាន 322,384នាក់បានស្លាប់, 25,170,952នាក់ បានជា និង 2,226,095នាក់ កំពុងទទួលការព្យាបាល៕

ប្រភព៖ AFP,
ប្រែសម្រួល៖ បុត្រា

May 29, 2021

ភ្នាក់ងារស៊ើបការណ៍សម្ងាត់អាមេរិក និយាយថា “មានភ័ស្ដុតាងស្ដីពីប្រភពរបស់ COVID-19”

មន្ត្រីស៊ើបការណ៍សម្ងាត់របស់ សហរដ្ឋអាមេរិក បានរាយការណ៍ប្រាប់ សេតវិមាន ថា ពួកគេមានភ័ស្ដុតាងជាច្រើនដែលមិនទាន់ត្រូវបានត្រួតពិនិត្យ ទាក់ទិននឹងប្រភពរបស់វីរុសCovid-19 ហើយថា នឹងវិភាគឱ្យបានច្បាស់លាស់។

សារព័ត៌មាន New York Times កាលពីថ្ងៃទី27 ខែឧសភា បានរាយការណ៍ថា ភ្នាក់ងារស៊ើបការណ៍សម្ងាត់របស់សហរដ្ឋអាមេរិក គ្រោងនឹងធ្វើការវិភាគលើកុំព្យូទ័រ ដើម្បីស្វែងយល់ឱ្យដឹងថា តើវីរុសCovid-19 ពិតជាត្រូវបានគេធ្វើឱ្យលេចធ្លាយចេញពីបន្ទប់ពិសោធន៍នៅ Wuhan ដោយអចេតនា ឬយ៉ាងណា និងដើម្បីតាមដានសកម្មភាពរបស់ក្រុមអ្នកវិទ្យាសាស្ត្រនៅមន្ទីរពិសោធន៍ រួមនឹងការពិនិត្យលើរបៀបដែលវីរុសនេះ ផ្ទុះឆ្លងរាលដាល។ យ៉ាងនេះក្ដី ក្រុមភ្នាក់ងារស៊ើបការណ៍សម្ងាត់អាមេរិក មិនបានបញ្ជាក់សម្អិតពីភ័ស្ដុតាង ឬប្រភេទនៃការវិភាគលើកុំព្យូទ័រដែលពួកគេនឹងប្រើប្រាស់។

មន្ត្រីជាន់ខ្ពស់ម្នាក់ បាននិយាយថា រដ្ឋាភិបាលសហរដ្ឋអាមេរិក នឹងពិនិត្យលើបន្ទប់ពិសោធន៍នានានៅថ្នាក់ជាតិ និងប្រភពធនធានវិទ្យាសាស្ត្រដែលមុននេះមិនទាន់បានចូលរួមស្វែងរកប្រភពរបស់វីរុសCovid-19។

សេតវិមាន និងការិយាល័យប្រធានស្ថាប័នស៊ើបការណ៍ជាតិ (ODNI) មិនទាន់មានអធិប្បាយអ្វីទាក់ទិននឹងព័ត៌មានខាងលើនៅឡើយ។

មន្ទីរពិសោធន៍វីរុសសាស្ត្រ Whuan នៃប្រទេសចិន

ODNI កាលពីថ្ងៃទី27 ខែឧសភា បានឱ្យដឹងថា ក្រុមភ្នាក់ងារស៊ើបការណ៍សម្ងាត់របស់ សហរដ្ឋអាមេរិក បាននិយាយថា មានសម្មតិកម្មចំនួនពីរ ស្ដីពីប្រភពរបស់វីរុសCovid-19 រួមមាន ទីមួយទាក់ទិននឹងការប៉ះពាល់រវាងមនុស្សនិងសត្វដែលមានផ្ទុកវីរុស និងទីពីរគឺ គ្រោះថ្នាក់នៅក្នុងបន្ទប់ពិសោធន៍។

ប៉ុន្តែ ODNI បានបញ្ជាក់ថា «ក្រុមភ្នាក់ងារសម្ងាត់អាមេរិក មិនបានដឹងច្បាស់ថា ទីណា ពេលណា ឬតាមរបៀបណា ទើបវីរុសCovid-19 ចាប់ផ្ដើមឆ្លងរាលដាលនោះទេ ប៉ុន្តែ ពួកគេបានប្រមូលផ្ដុំជាសេណារីយោចំនួនពីរ ដែលអាចកើតឡើង»។

សេណារីយោ «វីរុសរួចចេញពីបន្ទប់ពិសោធន៍» បានធ្វើឱ្យមានចំណាប់អារម្មណ៍ឡើងវិញ ក្រោយពីសារព័ត៌មាន Wall Street Journal កាលពីថ្ងៃទី23 ខែឧសភា បានដកស្រង់របាយការណ៍មិនទាន់ត្រូវបានប្រកាស របស់ភ្នាក់ងារស៊ើបការណ៍សម្ងាត់អាមេរិក និយាយថា «អ្នកជំនាញចំនួន 3រូប នៃមន្ទីរពិសោធន៍វីរុសសាស្ត្រ Wuhan បានចូលទទួលការព្យាបាលនៅមន្ទីរពេទ្យ កាលពីខែវិច្ឆិកា ឆ្នាំ2019 ដោយមានជំងឺដែលមានរោគសញ្ញាដូច Covid-19 និងជំងឺផ្ដាសាយតាមរដូវ នៅមុនពេល Covid-19 ផ្ទុះឆ្លងរាលដាលនៅទីក្រុង Wuhan។ ក៏ប៉ុន្តែ រដ្ឋាភិបាលចិន បានច្រានចោលព័ត៌មាននេះ ដោយអះអាងថា «ពុំមានអ្នកជំនាញណាម្នាក់ ត្រូវចូលពេទ្យសោះឡើយ»៕

ប្រភព៖ NY Times
ប្រែសម្រួល៖ បុត្រា

May 28, 2021

អាថ៌កំបាំងនៃសម្ផស្ស 20យ៉ាង ដែលនារីៗមិនចង់ឱ្យបុរសៗដឹង…

កើតជាមនុស្សស្រី ពិតជាសែនលំបាកមែន ព្រោះត្រូវមើលថែទាំខ្លួន ដុសខាត់ ថែមថយរាងកាយ ឱ្យមើលឃើញស្អាត តាំងពីក្បាលដល់ចុងជើង មិនថាតែកោររោមមេជើង ដករោមច្រមុះ លួចថែមអេប៉ុង ឱ្យដើមទ្រូងមើលទៅធំ ស្លៀកឈុតក្នុងបន្ថែមត្រគាក

ជាដើម និងទោះជាធ្វើរឿងទាំងអស់រួចហើយ ស្រស់ស្អាតខ្ញង់ក៏ពិតមែន តែស្លាប់រស់យ៉ាងណា ក៏នារីៗយើង មិនឱ្យមនុស្សប្រុសដឹងជាដាច់ខាត!។

តាមរយ:ការស្ទង់មតិ ពីនារីៗចំនួន 2,000នាក់ ដែលបានបង្ហើបឱ្យដឹងដោយវេបសាយ ឌេលី មេល កាលពីចុងឆ្នាំ2019 កន្លងមក ខាងក្រោមនេះ គឺជាអាថ៌កំបាំងនៃសម្រស់ 20យ៉ាងរបស់ក្រមុំៗជនជាតិអង់គ្លេស ដែលពួកនាងមិនចង់ឱ្យបុរសជាគូស្នេហ៍បានដឹងឡើយ។ តើមានអ្វីខ្លះនោះ យើងមកតាមដានទាំងអស់គ្នា…៖

កោរ / បក រោមនៅលើមេជើង
កោរ / បក រោមនៅលើចង្កា និងផ្ទៃមុខ
ដករោមប្លែកៗចេញពីរាងកាយ ដូចជា រោមរឹងវែងៗ ដែលដុះតែមួយសរសៃនៅលើមុខ ឬរោមដែលដុះលើប្រជ្រុយជាដើម។
បករោម និងបកពុកមាត់
កម្ចាត់ស្បែកក្រឹន រឹងៗ ស្ងួតប្រេះនៅលើបាតជើង
ពាក់អាវពង្រឹបខ្លួនឱ្យចេញរាង ដើម្បីស្លៀកពាក់ខោអាវឱ្យស្អាត មានរាង មានរៅស្វែល
ដករោមចិញ្ចើម
បក / កោរ រោមកន្លែងសម្ងាត់ចេញខ្លះ
ដករោមច្រមុះ(!!)
មើលថែស្បែកមុខ ទាំងលាងសម្កាត ជូតដោយថូនើរ៍ បំប៉នដោយឡេ គ្រប់គ្រឿងតែម្តង
កាត់ក្រចកជើង
កោសធ្មេញឱ្យស ព្រោះធ្មេញចាស់ វាលឿង
លាបគ្រីម លុបបំបាត់ស្លាកស្នាម ពន្យឺតអាយុ ចង់តែនៅក្មេងរហូត មិនចង់ឱ្យអ្នកណា ដឹងថាខ្លួនចាស់ឡើយ
លាបក្បាលមុន ដោយថ្នាំដុសធ្មេញ
ម៉ាស់ក៍បកមុខ
បក / កោររោមជើង និងក្លៀក
ញាត់អេប៉ុងរុញដើមទ្រូងឡើង ឱ្យពើង
ខាត់ស្បែករាល់ថ្ងៃ
លាបពណ៌ចិញ្ចើម និងរោមភ្នែក
ប្រើគ្រីមកម្ចាត់ សេលលូឡៃត៍(ដុំខ្លាញ់ក្រោមស្បែក) មិនចង់ឱ្យអ្នកណាឃើញ ខ្លាចគេដឹងថា ស្បែកគ្រើម ដូចសម្បកក្រូច។

ពេលនេះយើងជឿហើយថា ទម្រាំតែបានស្អាត នារីៗត្រូវប្រើក្តីព្យាយាមខ្លាំងមែនទែន ថែមទាំងចង់ឱ្យមនុស្សប្រុស(គូស្នេហ៍)គិតថា ខ្លួនស្អាតស្រស់ថ្លាយ៉ាងធម្មជាតិ អត់មានទៅកែកុនអីទាំងអស់ អ្វីៗ គឺអ្នកម៉ាក់ឱ្យមកទាំងអស់។

ហ៊ឺ…កើតមកជាមនុស្សស្រី ចំជាលំបាកមែន…៕

ដោយអ្នកគ្រូ ឆវី

May 28, 2021

ត្រូវរង្វាន់ 1លានដុល្លារ ដោយសារបានចាក់វ៉ាក់សាំង COVID-19

សហរដ្ឋអាមេរិក៖ នារីជាវិស្វករម្នាក់ នៅក្នុងរដ្ឋ Ohio បានត្រូវរង្វាន់ 1លានដុល្លារ នៅក្នុងកម្មវិធីចេញឆ្នោតសម្រាប់ពលរដ្ឋដែលបានទទួលការចាក់វ៉ាក់សាំងបង្ការវីរុសCovid-19 ខណៈដែលសិស្សសាលាមួយរូប ក៏ទទួលបានអាហារូបករណ៍សម្រាប់រៀននៅសាកលវិទ្យាល័យ។

នាង Abbigail Bugenske ត្រូវបានរង្វាន់ 1លានដុល្លារអាមេរិក នេះបើតាមការប្រកាសកាលពីថ្ងៃទី26 ខែឧសភា ឆ្នាំ2021 របស់រដ្ឋ Ohio។ Abbigail Bugenske មានការភ្ញាក់ផ្អើលយ៉ាងខ្លាំង នៅចំពោះមុខរង្វាន់ដ៏ធំនេះ ហើយបានលើកទឹកចិត្តឱ្យអ្នកដទៃ ទៅទទួលការចាក់វ៉ាក់សាំង ដើម្បីមានឱកាសឈ្នះរង្វាន់ដូចនាង។

ចំណែក សិស្សសាលាម្នាក់ ឈ្មោះ Joseph Costello អាយុ 14ឆ្នាំ ក៏បានត្រូវរង្វាន់ជាអាហារូបករណ៍សម្រាប់រៀននៅមហាវិទ្យាល័យពេញ 4ឆ្នាំ។ Joseph Costello អាចរៀននៅសាកលវិទ្យាល័យណាក៏បាន។

«បើសិនអ្នកកំពុងស្ថិតក្នុងវ័យចាប់ពី 12 ដល់ 17ឆ្នាំ និងបានទទួលការចាក់វ៉ាក់សាំងយ៉ាងតិច 1ដូស នោះអ្នកអាចមានសំណាងឈ្នះរង្វាន់បន្ទាប់!» អភិបាលរដ្ឋ Ohio លោក Mike DeWine បានបង្ហោះសារនៅលើ Twitter ដូច្នេះ។

អភិបាលរដ្ឋ លោក Mike DeWine ថតរូបជាមួយនឹង Joseph Costello (14ឆ្នាំ, រូបកណ្ដាល)

រដ្ឋ Ohio នៅតែតម្កល់រង្វាន់ 4លានដុល្លារ ហើយថា នឹងប្រកាសឈ្មោះអ្នកត្រូវរង្វាន់បន្ទាប់ នៅក្នុងព្រឹត្តិការណ៍ទិវានៃការចងចាំ 31ឧសភាខាងមុខ។

ក្រុមមន្ត្រីសុខាភិបាល បានឱ្យដឹងថា ពលរដ្ឋជិត 2.8លាននាក់ បានចូលរួមចាប់រង្វាន់ បន្ទាប់ពីបានទទួលការចាក់វ៉ាក់សាំងបង្ការវីរុសCovid-19។

សហរដ្ឋអាមេរិក ដំបូងឡើយ មានពលរដ្ឋជាច្រើននាំគ្នាទៅចាក់វ៉ាក់សាំង។ ក៏ប៉ុន្តែ ក្រោយមក ចំនួននេះចេះតែថយចុះពីមួយថ្ងៃ ទៅមួយថ្ងៃ ដោយសារតែមានព័ត៌មានទាក់ទិននឹងករណីប្រតិកម្ម និងបញ្ហាសុខភាព ក្រោយពីបានទទួលការចាក់វ៉ាក់សាំង។ មូលហេតុនេះ ធ្វើឱ្យរដ្ឋជាច្រើនរបស់អាមេរិក ធ្វើសកម្មភាពជាច្រើនដើម្បីទាក់ទាញពលរដ្ឋមកទទួលការចាក់វ៉ាក់សាំងបង្ការ Covid-19៕

ប្រភព៖ NY Post
ប្រែសម្រួល៖ បុត្រា

May 28, 2021

តួលេខអ្នកឆ្លង COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី28 ខែឧសភា ឆ្នាំ2021

ក្រសួងសុខាភិបាលកម្ពុជា ព្រឹកនេះ (28 ឧសភា) បានប្រកាសឱ្យដឹងថា បានរកឃើញអ្នកវិជ្ជមាននឹង Covid-19 ថ្មី ចំនួន 559នាក់បន្ថែមទៀត ក្នុងអំឡុង 24ម៉ោងនៃថ្ងៃទី27 ខែឧសភា ឆ្នាំ2021។

គិតមកដល់បច្ចុប្បន្ន កម្ពុជា មានអ្នកឆ្លងវីរុសCovid-19 សរុប ចំនួន 28,237នាក់។ ព័ត៌មានបន្ថែម សូមអានរវាយការណ៍សង្ខេបខាងក្រោម។

នៅទូទាំងពិភពលោក គិតមកដល់ពេលនេះ មានអ្នកឆ្លង Covid-19 សរុបចំនួ 169,643,590 នាក់ ក្នុងនោះមាន 3,525,259នាក់បានស្លាប់, 151,343,702នាក់បានជាសះស្បើយ និង 14,774,629នាក់ កំពុងទទួលការព្យាបាល៕

May 28, 2021

កូនកំលោះ មហាសាមញ្ញ ពាក់អាវយឺត-ខោខ្លី-ស្បែកជើងផ្ទាត់ ចូលពិធីមង្គលការ

ងាយៗ មិនចាំបាច់អីច្រើន!! កូនកំលោះ មហាសាមញ្ញ តែងខ្លួនងាយៗ ពាក់អាវយឺតដៃខ្លី ជំនួសអាវធំ ឈុតសកល ថែមទាំងពាក់ស្បែកជើងផ្ទាត់ទៀត ខណៈដែលកូនក្រមុំវិញ តែងខ្លួនគ្រប់គ្រឿង…។

ប្រហែលជាពិធីមង្គលការមួយ ដែលកូនកំលោះធ្វើខ្លួនសែនមហាងាយៗបំផុត ព្រោះបើសិនជាកូនកំលោះដទៃវិញ ប្រហែលជាដើរចូលពិធីមួយនេះ ដោយឈុតសកល បែបគ្រប់គ្រឿង យ៉ាងសង្ហាមិនខាន តែសម្រាប់ “Nfasis” ដែលជាអ្នកចម្រៀង រ៉េបភើរ ជនជាតិដូមីនីកាំង វ័យ 33ឆ្នាំម្នាក់នេះវិញ វាខុសប្លែកពីអ្នកដទៃ ព្រោះនៅថ្ងៃអាពាហ៍ពិពាហ៍របស់គេ គេពាក់តែអាវយឺតដៃខ្លី ពណ៌ស ដែលស្ដើង រហូតមើលឃើញអាវយឺតវៀលក្លៀកខាងក្នុង ស្លៀកខោខូវប៊យពណ៌ស្លេកជើងខ្លី និងពាក់ស្បែកជើងផ្ទាត់ទៀតផង!។

អ្វីដែលចាប់អារម្មណ៍បំផុតនោះគឺ បើសិនទាំងកូនកំលោះ និងកូនក្រមុំតែងខ្លួនរបៀបដូចគ្នានោះ អ្នកបានឃើញទាំងប៉ុន្មានប្រហែលជាមិនសូវអីប៉ុន្មានទេ តែនេះ វាមិនមែនអ៊ីចឹងទេ ព្រោះខណៈដែលកូនកំលោះតែងខ្លួនបែបសប្បាយៗ ងាយៗនោះ កូនក្រមុំ បែរជាតុបតែងខ្លួន បែបគ្រប់គ្រឿង ស្រស់ស្អាត និងល្អឥតខ្ចោះ ហើយកូនស្រីទាំង2 របស់ពួកគេទាំង2 ក៏ដូចគ្នាដែរ ស្លៀកឈុតពណ៌ស គួរឱ្យស្រឡាញ់ ហាក់ដូចជាម្ចាស់ក្សត្រី ត្រៀមជាស្រេច សម្រាប់ការបំពេញតួនាទី ជាអ្នកកំដរកូនក្រមុំ។ ពោលគឺ អ្នកចូលរួមក្នុងពិធីនេះទាំងអស់ សុទ្ធតែតែងខ្លួន បែបគ្រប់គ្រឿងយ៉ាងស្អាតសង្ហាគ្រប់គ្នា លើកលែងតែកូនកំលោះម្នាក់គត់។

ក្រៅពីការតែងខ្លួនរបស់កូនកំលោះ Nfasis ដែលធ្វើឱ្យជំពប់ភ្នែកអ្នកដែលបានឃើញហើយនោះ ការបង្ហាញទឹកមុខដ៏សែនរាបស្មើធម្មតារបស់គេ វាធ្វើឱ្យអ្នកដែលបានឃើញទាំងប៉ុន្មាននោះ អត់មិនគិតមិនបានឡើយថា តើគេពេញចិត្ត ឬមានសេចក្ដីសុខចំពោះពិធីមង្គលការក្នុងគ្រា ដែរឬទេហ្ន៎?…

ចំណែកបណ្ដាអ្នកគាំទ្ររបស់កូនកំលោះ Nfasis វិញ មិនបានមានអារម្មណ៍ ចម្លែកចិត្តចំពោះរឿងនេះប៉ុន្មានឡើយ ព្រោះបើសិន បានតាមដានអ៊ីនស្តាក្រាម ឬបណ្ដាញសង្គមផ្សេងៗទៀតរបស់ Nfasis ហើយនោះ នឹងបានដឹងថា ស្ទីលការតុបតែងខ្លួនរបស់គេ វាតែងតែបែបហ្នឹងស្រាប់ទៅហើយ ទាំងក្នុងជីវិតប្រចាំថ្ងៃ និងក្នុង MV របស់គេ។

យ៉ាងណាក្ដី អ្នកលេងអ៊ីនធើណិតជាច្រើន នៅតែរិះគន់ពីការតុបតែងខ្លួនរបស់កូនកំលោះ Nfasis ដែរ ដោយភាគច្រើនយល់ឃើញថា ថ្ងៃមង្គលការ គឺជាថ្ងៃដ៏សំខាន់មួយ របស់ទាំងកូនកំលោះ និងកូនក្រមុំ ដូច្នេះ គេគួរតែតែងខ្លួន ផ្ដល់កិត្តិយសដល់អ្នកឯទៀតខ្លាំងជាងនេះ…តែអ្នកខ្លះ យល់ថា ចង់តែងខ្លួនរបៀបណា ក៏តែងទៅ រឿងសំខាន់បំផុត គឺសេចក្ដីស្រឡាញ់ ដែលទាំង 2នាក់ មានឱ្យគ្នាទៅវិញទៅមក មិនមែនវត្ថុខាងក្រៅ ឬគ្រឿងតុបតែងកាយ ដែលពួកគេស្លៀកនោះទេ។

ការពិតទៅ ពិធីមង្គលការរបស់គេទាំង2 ត្រូវបានរៀបចំឡើង កាលពីអំឡុងចុងឆ្នាំកន្លងទៅ តែទើបនឹងមកល្បីល្បាញ ឱ្យអ្នកលេងអ៊ីនធើណិតទាំងឡាយរិះគន់ ដោយសារតែកំលោះ Nfasis យើង បានផូស្តរូបថតទាំងនោះនៅក្នុងផេចហ្វេសប៊ុក កាលពីថ្ងៃសៅរ៍កន្លងទៅ ទើបធ្វើឱ្យអ្នកបានឃើញទាំងឡាយ នាំគ្នាស៊ែរ ចែករំលែកតគ្នាយ៉ាងច្រើន ដែលពេលនេះ ជីវិតអាពាហ៍ពិពាហ៍របស់ Nfasis និងភរិយា កំពុងតែផ្អែមល្ហែមជាទីបំផុត និងកំពុងមានទារកតូចមួយទៀត ជាខ្សែចំណងមាស ចងបេះដូងអ្នកទាំង២ ទៀតផង។

ប្រភព៖ Facebook
ប្រែសម្រួលដោយ ទិទីតំតាតូ

May 28, 2021

អង្គភាពស៊ើបការណ៍សម្ងាត់អាមេរិក៖ COVID-19 អាចបណ្ដាលមកពីគ្រោះថ្នាក់ក្នុងបន្ទប់ពិសោធន៍

ក្រុមភ្នាក់ងារស៊ើបការណ៍សម្ងាត់របស់ សហរដ្ឋអាមេរិក បានឱ្យដឹងថា មានសម្មតិកម្មចំនួនពីរ ស្ដីពីប្រភពរបស់វីរុសCovid-19 រួមមាន ទីមួយទាក់ទិននឹងការប៉ះពាល់រវាងមនុស្សនិងសត្វដែលមានផ្ទុកវីរុស និងទីពីរគឺ គ្រោះថ្នាក់នៅក្នុងបន្ទប់ពិសោធន៍។

«ក្រុមភ្នាក់ងារសម្ងាត់អាមេរិក មិនបានដឹងច្បាស់ថា ទីណា ពេលណា ឬតាមរបៀបណា ទើបវីរុសCovid-19 ចាប់ផ្ដើមឆ្លងរាលដាលនោះទេ ប៉ុន្តែ ពួកគេបានប្រមូលផ្ដុំជាសេណារីយោចំនួនពីរ ដែលអាចកើតឡើង» នេះបើតាមការិយាល័យនៃប្រធានអង្គភាពស៊ើបការណ៍សម្ងាត់ជាតិ (ODNI) របស់សហរដ្ឋអាមេរិកបានឱ្យដឹងកាលពីថ្ងៃទី27 ខែឧសភា។

ODNI បានប្រាប់ថា ចំពោះសម្មតិកម្មទាំងពីរខាងលើ ក្រុមអ្នកជំនាញបានយោងទៅលើការបកស្រាយមួយចំនួន ជាមួយនឹង «ភាពជឿជាក់ក្នុងកម្រិតទាប ឬមធ្យម» ដែលនេះ បើតាមពាក្យបច្ចេកទេសផ្នែកស៊ើបការណ៍សម្ងាត់គឺ មានន័យថា ពួកគេជឿថា ភ័ស្ដុតាងដែលគាំទ្រដល់ការយល់ឃើញខាងលើ នឹងស៊ីពេលវេលាជាច្រើនទៀត ទើបអាចបញ្ជាក់បាន។

ប្រភពព័ត៌មានពីក្រុមជំនាញផ្នែកវិភាគនៅក្នុងស្ថាប័នស៊ើបការណ៍សម្ងាត់ ឱ្យដឹងថា ទីភ្នាក់ងារស៊ើបការណ៍សម្ងាត់របស់សហរដ្ឋអាមេរិក (CIA) និងអង្គភាពស៊ើបការណ៍សម្ងាត់របស់ស្ថាប័នការពារជាតិ បច្ចុប្បន្ន សុទ្ធតែមិនគាំទ្រដល់ការបកស្រាយចំពោះសម្មតិកម្មទាំងពីរខាងលើនោះទេ និងបានបង្ហើបឱ្យដឹងថា ព្រោះថាពួកគេស្ថិតក្នុងចំណោមអង្គភាពភាគច្រើនរបស់អាមេរិក ដែលមិនទាន់មានភ័ស្ដុតាងគ្រប់គ្រាន់ដើម្បីកំណត់ឱ្យបានច្បាស់ថា តើសេណារីយោមួយណាដែលគួរជឿជាក់ជាងនៅឡើយ។

ប្រធានាធិបតី Joe Biden បានថ្លែងថា លោកនឹងអាចប្រកាសរបាយការណ៍លម្អិតមួយ ស្ដីពីការរកឃើញរបស់ក្រុមភ្នាក់ងារស៊ើបការណ៍សម្ងាត់អាមេរិក អំពីប្រភពរបស់វីរុសCovid-19 បន្ទាប់ពីលោកបានចេញបញ្ជាឱ្យស្ថាប័នស៊ើបការណ៍សម្ងាត់ «ប្រឹងប្រែងជាមុនទ្វេដង» ដើម្បី ស្រាវជ្រាវរកប្រភពនៃមហារោគរាតត្បាតនេះ និងបន្តជំរុញឱ្យរដ្ឋាភិបាលចិន ចូលរួមការស្រាវជ្រាវដ៏ពេញលេញ។

ប្រភព៖ AFP, Reuters
ប្រែសម្រួល៖ បុត្រា

May 28, 2021

ប្រធានាធិបតី ស៊ីរី Bashar al-Assad ជាប់ឆ្នោតអាណត្តិទីបួន

ថ្លែងនៅក្នុងកិច្ចប្រជុំតាមអនឡាញ កាលពីថ្ងៃទី27 ខែឧសភា ប្រធានរដ្ឋសភា ស៊ីរី លោក Hammouda Sabbagh ប្រកាសថា ប្រធានាធិបតី Bashar al-Assad បានជាប់ឆ្នោតអាណត្តិទី4 ដោយមានសំឡេងឆ្នោតគាំទ្រ 94.1% នៅក្នុងការបោះឆ្នោតកាលពីថ្ងៃទី26 ខែឧសភា ឆ្នាំ2021។

យោងតាមប្រធានសភា Sabbagh ម្ចាស់ឆ្នោតចំនួន 14.2លាននាក់ ដែលស្មើនឹង 76.64% នៃប្រជាជនពេញវ័យសរុបរបស់ប្រទេសនេះ បានទៅបោះឆ្នោត។ លទ្ធផលផ្លូវការនៃការបោះឆ្នោតនេះក៏បានឱ្យដឹងថា បេក្ខភាពប្រធានាធិបតី 2រូបទៀត គឺ អតីតអនុប្រធានខុទ្ទកាល័យ Abdallah Saloum Abdallah ទទួលបានសំឡេងឆ្នោតគាំទ្រចំនួន 1.5% និងលោក Mahmoud Ahmed Marei មេដឹកនាំបក្សប្រឆាំងតូចមួយរបស់ ស៊ីរី ទទួលបាន 3.3%។

នេះគឺជាការបោះឆ្នោតលើកទីពីរនៅ ស៊ីរី រាប់ចាប់តាំងពីប្រទេសនេះបានធ្លាក់ទៅក្នុងសង្គ្រាមកាលពីឆ្នាំ2011។ នៅក្នុងការបោះឆ្នោតលើកទីមួយ ដែលធ្វើឡើងកាលពីឆ្នាំ2014 លោក al-Assad ទទួលបានសំឡេងឆ្នោតគាំទ្រ 88%។

នៅក្នុងការបោះឆ្នោតលើកនេះ ពាក្យស្លោកសម្រាប់ការឃោសនារកសំឡេងឆ្នោតរបស់លោក al-Assad គឺ «ក្ដីសង្ឃឹមតាមរយៈការងារ»។ គោលដៅរបស់មេដឹកនាំវ័យ 55ឆ្នាំរូបនេះ នោះគឺតាមរយៈការងារដើម្បីស្ដារប្រទេសជាតិឡើងវិញ ក្នុងគ្រាកំពុងឈរនៅចំពោះមុខឧបសគ្គជាច្រើន បន្ទាប់ពីរងគ្រោះដោយសារសង្គ្រាម។ នៅចំពោះមុខ ការដោះស្រាយបញ្ហា Covid-19 គឺជារឿងអាទិភាព៕

ប្រភព៖ Rueters
ប្រែសម្រួល៖ បុត្រា

May 28, 2021

Author: សឿន សំណាង