សឿន សំណាង - La Reine Media

វិធីសាងភាពជឿជាក់លើខ្លួនឯង ដើម្បីភាពជោគជ័យ

ពេលដែលយើងមានគោលដៅ ឬប្រាថ្នាចង់ធ្វើរឿងអ្វីមួយក៏ដោយ រឿងសំខាន់មួយ ដែលនឹងជួយឱ្យយើងទទួលបានជោគជ័យនោះ គឺភាពជឿជាក់លើខ្លួនឯង ព្រោះភាពជឿជាក់លើខ្លួនឯង ប្រៀបដូចជាកម្លាំងជំរុញមួយ ធ្វើឱ្យយើងមានទឹកចិត្តក្លៀវក្លា ធ្វើឱ្យមានកម្លាំងថាមពល ធ្វើនូវរឿងទាំងអស់នោះ ឱ្យបានសម្រេចដូចចិត្តប្រាថ្នា។ ក្រៅពីនោះ ថែមជាការបង្កើនគុណតម្លៃរបស់ខ្លួនឯង និងធ្វើឱ្យយើងមានកម្លាំងចិត្ត និងក្លៀវក្លាស្វាហាប់ទៀតផង។

វិធី 5យ៉ាង ក្នុងការបង្កើនភាពជឿជាក់លើខ្លួនឯង មានដូចតទៅ៖

សាងភាពជឿជាក់ដល់ខ្លួនឯង ដោយការសម្លឹងឃើញពីចំណុចលេចធ្លោ ខ្លាំងជាងចំណុចខ្សោយ

ចូរសម្លឹងរកមើលចំណុចល្អ លេចធ្លោរបស់ខ្លួនឯងឱ្យឃើញ ព្រមទាំងហ្វឹកហាត់ ឬធ្វើការងារណា ដែលជួយបង្កើនដល់ចំណុចល្អនោះ ចៀសវាងការប្រៀបធៀបចំណុចអន់របស់ខ្លួនឯងជាមួយអ្នកដទៃ។ គួរនឹកនៅក្នុងចិត្តជានិច្ចថា “មិនចាំបាច់ត្រូវដឹងគ្រប់តែរឿងនោះទេ តែត្រូវដឹងឱ្យច្បាស់ប្រាកដ តែ 1រឿង ក៏អាចទទួលបានជោគជ័យដែរ”

ធ្វើការងារណា ដែលសាងមោទនភាព ដល់ខ្លួនឯង

ដូចជា ការងារជួយសង្គមសាធារណ: ឬធ្វើការងារក្រៅម៉ោងណាដែលខ្លួនចូលចិត្ត ដែលទាំងអស់ហ្នឹង សុទ្ធតែសាងនូវភាពសប្បាយចិត្ត និងធ្វើឱ្យមានអារម្មណ៏ថា ខ្លួនឯងមានតម្លៃ ព្រោះបានបំពេញប្រយោជន៍ដល់អ្នកដទៃ ឬមានឱកាសបានបញ្ចេញសមត្ថភាព ឱ្យគេទទួលស្គាល់ ជាដើម។

ប្រាប់ខ្លួនឯងជានិច្ចថា អាចធ្វើបាន!!

គួរនិយាយលើកទឹកចិត្តខ្លួនឯង ឱ្យបានជាប់ជានិច្ចថា “ខ្ញុំធ្វើបាន!” និងហាត់នឹកស្រមៃ ឱ្យឃើញពីភាពជោគជ័យ។

កុំខ្វល់ខ្វាយនឹងសម្ដីរបស់អ្នកដទៃ

ភាពមានកង្វល់ខ្វល់ខ្វាយ ដែលកើតពីពាក្យរិះគន់ទិតៀនរបស់អ្នកដទៃ អាចធ្វើឱ្យយើងកើតក្តីអស់សង្ឃឹម និងបាក់ទឹកចិត្តបាន ដូច្នេះគួរពិចារណាពីគោលបំណងរបស់សម្ដីទាំងអស់នោះផង បើសិនដោយសារការបារម្ភ យើងគួរតែទទួលស្តាប់ និងកែសម្រួលខ្លួនឯង តែបើសិនដោយសារភាពអគតិវិញនោះ ក៏មិនបាច់ទៅយកចិត្តទុកដាក់ស្តាប់ឡើយ។

សុំការលើកទឹកចិត្ត ពីអ្នកដែលនៅក្បែរខ្លួនយើង

ព្រោះកម្លាំងចិត្ត ពីក្រុមគ្រួសារ ពីមិត្តសម្លាញ់ និងពីគូស្នេហ៍ អាចជួយសាងនូវភាពជឿជាក់ដល់ខ្លួនឯងបាន ធ្វើឱ្យយើងហ៊ានសម្រេចចិត្ត និងគិតចាប់ផ្តើមនូវគំនិតថ្មីៗ ដូច្នេះបើសិននៅពេលណា មានអារម្មណ៍អស់សង្ឃឹម ឬមានបញ្ហាអ្វីមួយ ចូរកុំស្ទាក់ស្ទើរ ក្នុងការសុំការប្រឹក្សាយោបល់ និងការគាំទ្រពីពួកគេ។

នៅពេលមានភាពជឿជាក់លើខ្លួនឯងយ៉ាងពេញទំហឹងហើយនោះ ភាពជោគជ័យនឹងនៅក្បែរយើងបង្កើយ…៕

May 31, 2021

ការស្ថាបនាផ្លូវជាតិលេខ3 ពីភ្នំពេញទៅក្រុងកំពត គ្រោងនឹងបញ្ចប់នៅចុងឆ្នាំនេះ

គម្រោងកែលម្អផ្លូវជាតិលេខ3 ពីភ្នំពេញទៅក្រុងកំពត សម្រេចបានជាង 98% ហើយគ្រោងនឹងរួចរាល់ជាស្ថាពរនៅចុងឆ្នាំ2021។ នេះបើតាម ក្រសួងសាធារណការ និងដឹកជញ្ជូន។

ក្រសួងសាធារណការ បានឱ្យដឹងថា គិតរហូតមកដល់បច្ចុប្បន្ន ក្រសួង បាន និងកំពុងពន្លឿនការងារចុងក្រោយមួយចំនួន ដូចជា ការបំពាក់កាមេរ៉ាចាប់ល្បឿនយានយន្ត កាមេរ៉ាសុវត្ថិភាព ជញ្ជីងថ្លឹងទម្ងន់ក្រោមដី និងជញ្ជីងថ្លឹងទម្ងន់នៅក្នុងស្ថានីយ។ល។ ខណៈដែលស្ពានអាកាសថ្មើរជើងដែលមានទីតាំងនៅត្រាំខ្នារ ក៏នឹងសាងសង់រួចរាល់នៅចុងខែមិថុនាខាងមុខ។

ជារួម គម្រោងធ្វើឱ្យប្រសើរឡើងផ្លូវជាតិលេខ3 ពីភ្នំពេញទៅក្រុងកំពត បច្ចុប្បន្ន សម្រេចបាន 98.04% រួចហើយ។ នេះបើតាម ឯកឧត្តម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួង សាធារណការ និងដឹកជញ្ជូន។

គម្រោងស្ថាបនាផ្លូវប្រភេទ បេតុងកៅស៊ូ (AC) ប្រវែង 134គីឡូម៉ែត្រនេះ ត្រូវបានចាប់ផ្ដើមសាងសង់ និងស្ដារឡើងវិញ កាលពីខែឧសភា ឆ្នាំ2018។ ការចំណាយទៅលើការស្ថាបនា និងស្ដារផ្លូវនេះ គ្រោងនឹងប្រើប្រាស់ទឹកប្រាក់ជាង 200លានដុល្លារអាមេរិក ដែលនេះគឺជាហិរញ្ញប្បទានសម្បទាន ពីប្រទេសចិន រួមនឹងថវិកាបដិភាគមួយចំនួនរបស់ កម្ពុជា៕

ប្រភព៖ ក្រសួងសាធារណការ
ដកស្រង់៖ បុត្រា

May 31, 2021

ចិន អនុញ្ញាតឱ្យប្ដី-ប្រពន្ធគ្រប់គូ អាចយកកូនបាន 3នាក់

រដ្ឋាភិបាលចិន អនុញ្ញាតឱ្យគូស្វាមី-ភរិយាគ្រប់គូ អាចបង្កើតកូនបាន 3នាក់ ក្រោយពីការសិក្សាស្រាវជ្រាវលើចំនួនប្រជាជន បានបង្ហាញថា ពលរដ្ឋប្រទេសនេះ ចាស់យ៉ាងឆាប់រហ័ស។

«ដើម្បីទប់ទល់នឹងស្ថានភាពប្រជាជនមានវ័យចំណាស់កាន់តែច្រើន ប្ដី-ប្រពន្ធមួយគូ អាចមានកូនចំនួន 3នាក់» នេះបើតាមសេចក្ដីប្រកាសនៅក្នុងកិច្ចប្រជុំនាថ្ងៃនេះ របស់ក្រសួងនយោបាយ ដែលដឹកនាំដោយប្រធានាធិបតីចិន ស៊ី ជីនពីង និងត្រូវបានចុះផ្សាយដោយសារព័ត៌មាន Xinhua។

សេចក្ដីប្រកាស មានឃ្លាសរសេរថា៖ «គោលនយោបាយស្ដីពីការបន្តពូជ នឹងត្រូវបានកែលម្អជាងបច្ចុប្បន្ន។ គោលនយោបាយដែលអនុញ្ញាតឱ្យប្ដី-ប្រពន្ធ 1គូ មានកូន 3នាក់ នឹងត្រូវដាក់ឱ្យប្រើប្រាស់រួមជាមួយនឹងវិធានការគាំពារនានា។ ប្រការនេះនឹងកែលម្អរចនាសម្ព័ន្ធប្រជាជនរបស់ប្រទេសចិន»។

វិធានការផ្សេងៗដែលត្រូវបានស្នើឡើង មានដូចជា ពន្យារពេលលើអាយុចូលនិវត្តន៍ ផ្ដោតទៅលើយុទ្ធនាការអប់រំលើតម្លៃអាពាហ៍ពិពាហ៍ និងគ្រួសារ សម្រាប់យុវវ័យ។ សេវាកម្មថែទាំកុមារ ការឈប់សម្រាកពីការងារពេលឆ្លងទន្លេ និងធានារ៉ាប់រងលើមាតុភាព ក៏នឹងត្រូវបានកែលម្អ។

ការសិក្សាស្រាវជ្រាវដែលត្រូវបានប្រកាសកាលពីដើមខែនេះ បានបង្ហាញថា តួលេខនៃការឆ្លងទន្លេប្រចាំឆ្នាំរបស់ប្រទេសចិន បន្តថយចុះដល់កម្រិតទាបបំផុត បើទោះជាមានការលើកទឹកចិត្តឱ្យបង្កើតកូនចៅ ពីរដ្ឋាភិបាលក៏ដោយ។ វិទ្យាស្ថានជាតិស្ថិតិរបស់ចិន (NBS) បានឱ្យដឹងថា អ្នកម្ដាយនានានៅប្រទេសចិន កាលពីឆ្នាំមុន បង្កើតកូនបាន 12លាននាក់ ថយចុះ 18% បើធៀបនឹងឆ្នាំ2020 និងបន្តថយចុះទាបបំផុតក្នុងអំឡុងជិត 6ទសវត្សរ៍មកនេះ។

អត្រាចាប់កំណើតរបស់ទារកនៅប្រទេសចិន គឺស្មើនឹង 1.3នាក់/ស្ត្រីម្នាក់ ទាបជាងអត្រា 2.1 ដែលចិនត្រូវការចាំបាច់ ដើម្បីធានាឱ្យកំណើនប្រជាពលរដ្ឋ មានស្ថិរភាព។

ជិត 40ឆ្នាំមកនេះ ប្រទេសចិន បានអនុវត្ត «គោលនយោបាយកូនមួយ» ដែលនាំឱ្យមានការរិះគន់ច្រើន ព្រោះវាជាការកំណត់ដ៏តឹងរ៉ឹងបំផុតក្នុងពិភពលោក ស្ដីពីផែនការគ្រួសារ។ ប្រទេសនេះ បានលុបចោលគោលនយោបាយកូនមួយ ចាប់ពីឆ្នាំ2016 ដោយសារមានការព្រួយបារម្ភ ខ្លាចកម្លាំងពលកម្មត្រូវប្រឈមនឹងភាពចាស់ជរាច្រើន ដែលនាំឱ្យសេដ្ឋកិច្ចជួបបញ្ហា៕

ប្រភព៖ AFP, SCMP
ប្រែសម្រួល៖ បុត្រា

May 31, 2021

សំណួរ – ចម្លើយ ដែលយើងគួរដឹងអំពីសុខភាពមាត់ – ធ្មេញ

មិនថាថ្ងៃណាៗឡើយ រៀងរាល់ព្រឹកនៃការចាប់ផ្តើមភារកិច្ច រហូតដល់អំឡុងពេលចុងក្រោយ មុនពេលចូលគេងសម្រាករឿងសុខភាពក្នុងប្រអប់មាត់ អញ្ចាញ និងធ្មេញ នៅតែជារឿងសំខាន់ ដែលយើងត្រូវតែយកចិត្តទុកដាក់ មើលថែទាំយ៉ាងជាប់ជានិច្ច ដើម្បីការពារទុកជាមុន មុននឹងកើតរោគភ័យផ្សេង។ ខាងក្រោមនេះ គឺជាសំណួរ-ចម្លើយ ដែលយើងគួរតែដឹង អំពីសុខភាពមាត់-ធ្មេញ ដែលមានចំណុចខ្លះ យើងអាចនៅមិនទាន់ដឹងនៅឡើយ…។

-ធ្មេញពីធម្មជាតិរបស់មនុស្ស មានប៉ុន្មានឈុត?

*ឆ្លើយ៖ មាន 2ឈុត គឺធ្មេញទឹកដោះ និងធ្មេញពិតប្រាកដ

-ធ្មេញទឹកដោះ ចាប់ផ្តើមដុះឡើង ពេលអាយុប៉ុន្មាន?

*ឆ្លើយ៖ ពេលអាយុបាន 2ខួប ឬ 2ខួបកន្លះ

-ធ្មេញទឹកដោះ មានប៉ុន្មានគ្រាប់?

*ឆ្លើយ៖ 20គ្រាប់

-ហេតុអី ទើបត្រូវមើលថែទាំធ្មេញទឹកដោះ ឱ្យល្អ?

*ឆ្លើយ៖ ព្រោះវាប្រៀបដូចជាធ្មេញនាំមុខអ៊ីចឹង បើមើលថែទាំបានល្អ ធ្មេញពិតប្រាកដ ដែលដុះឡើងមកជំនួសនោះ នឹងមានភាពល្អឥតខ្ចោះ និងស្ថិតក្នុងសភាពល្អដូចគ្នា

-ធ្មេញពិតប្រាកដមានប៉ុន្មានគ្រាប់?

*ឆ្លើយ៖ 32គ្រាប់

-ធ្មេញថ្គាម 4គ្រាប់ចុងក្រោយ នឹងចាប់ផ្តើមដុះឡើងពេលណា?

*ឆ្លើយ៖ ពេលអាយុបានប្រមាណ 18ឆ្នាំឡើងទៅ

-ធ្មេញពិតប្រាកដ នឹងនៅបានយូរប៉ុនណា?

*ឆ្លើយ៖ បើមើលថែទាំបានល្អ ធ្មេញពិតប្រាកដ អាចនៅជាមួយយើង អស់មួយជីវិត

-អ្វីគឺមូលហេតុរបស់ជំងឺធ្មេញ និងអញ្ចាញ?

*ឆ្លើយ៖ កំណកអតិសុខុមប្រាណ

-កំណកអតិសុខុមប្រាណ គឺអ្វី?

*ឆ្លើយ៖ កំណកអតិសុខុមប្រាណ កើតពីមេរោគ រួមជាមួយស្ករ និងប្រូតេអ៊ីន នៅក្នុងស្ករ ច្រើនតែតោងជាប់ស្អិតនៅលើស្រទាប់ធ្មេញ

-វិធីកម្ចាត់កំណកអតិសុខុមប្រាណដែលល្អបំផុតគឺ…

*ឆ្លើយ៖ ការដុសសម្អាតធ្មេញ គួបផ្សំជាមួយការប្រើខ្សែអំបោះខាត់ធ្មេញ

-បើកម្ចាត់កំណកអតិសុខុមប្រាណមិនអស់ តើនឹងមានលទ្ធផលយ៉ាងណា?

*ឆ្លើយ៖ នឹងកើតការប្រមូលសន្សំ និងក្លាយជាកំណកកំបោរ នៅជាប់ណែននឹងធ្មេញ

-វិធីកម្ចាត់កំណកកំបោរ ដែលល្អបំផុត គឺធ្វើយ៉ាងណា?

*ឆ្លើយ៖ ទៅជួបគ្រូពេទ្យធ្មេញ (ទន្តពេទ្យ) ដើម្បីកោសកំណកកំបោរទាំងនោះចេញ

-តើត្រូវទទួលទានយ៉ាងណា ដើម្បីឱ្យសុខភាពធ្មេញល្អ?

*ឆ្លើយ៖

1.កាត់បន្ថយចំណីកំប៉ិកកំប៉ុក

2.ជ្រើសរើសទទួលទានសណ្តែក និងផ្លែឈើជំនួសម្សៅ និងស្ករ ក្នុងអាហារពេលទំនេរ

3.កាត់បន្ថយបរិមាណ និងភាពញឹកញាប់ក្នុងការទទួលទានអាហារ ដែលមានស្ករ ទឹកតែ និងកាហ្វេ។

4.ដុសសម្អាតធ្មេញ គ្រប់ពេលញ៉ាំអាហាររួច

-សារធាតុរ៉ែ ដែលជួយបង្កើនឆ្អឹង និងធ្មេញមានអ្វីខ្លះ?

*ឆ្លើយ៖ កាល់ស្យូម និងផូស្វ័រ

-អាហារដែលមានកាល់ស្យូមខ្ពស់ មានអ្វីខ្លះ?

*ឆ្លើយ៖ ទឹកដោះ ប៊័រ ស៊ុតក្រហម ត្រីតូចៗ បង្គាក្រៀម គ្រាប់ល្ងខ្មៅ បន្លែស្លឹកបៃតង ជាដើម-ល-

-ការញ៉ាំទឹកផ្លែឈើមានផលប៉ះពាល់ដល់ធ្មេញដែរឬទេ?

*ឆ្លើយ៖ ទឹកផ្លែឈើ ធ្វើឱ្យធ្មេញសឹករឹលបាន ព្រោះក្នុងទឹកផ្លែឈើមានអាស៊ីត ស៊ីទ្រិក អាចរំលាយកាល់ស្យូមក្នុងស្រទាប់ស្រោបធ្មេញបាន ដូច្នេះពេលញ៉ាំទឹកផ្លែឈើហើយ គួរញ៉ាំទឹកតាមក្រោយ ឬខ្ពុរមាត់គ្រប់ពេល។

(នៅមានត)

May 31, 2021

បរិភោគផ្លែឈើនៅពេលណាទើបល្អ?

នៅក្នុងផ្លែឈើ មានទាំងសារធាតុ Fiber(កាកសរសៃ) ប៉ូតាស្យូម វីតាមីនC និងហ្វូលេត ជាច្រើន តែការបរិភោគ ដែលមិនត្រូវក្បួន ក៏អាចធ្វើឱ្យប្រព័ន្ធការរំលាយអាហារ មានបញ្ហាដែរ ដូច្នេះដើម្បីឱ្យទទួលបានប្រយោជន៏ ពីផ្លែឈើយ៉ាងពេញទំហឹងនោះ យើងគួរដឹងពីការបរិភោគផ្លែឈើយ៉ាងត្រូវតាមក្បួន ទើបជាការប្រសើរ។

ទោះជាការញ៉ាំផ្លែឈើតែ 1ប្រភេទ ឬញ៉ាំបែបរួមគ្នាច្រើនយ៉ាង គួរញ៉ាំនៅពេលពោះទំនេរ៖

ព្រោះពេលបរិភោគចូលទៅហើយ កម្មវិធីរំលាយអាហារ នឹងធ្វើការយ៉ាងឆាប់រហ័ស ដោយរាងកាយនឹងផលិតអេនហ្សៃម៍ពិសេសម៉្យាង ចេញមកសម្រាប់ការកិនរំលាយផ្លែឈើ ធ្វើឱ្យរាងកាយអាចបឺតជ្រាបយកជាតិស្ករ និងសារធាតុអាហារបានយ៉ាងពេញទំហឹង។

បរិភោគនៅចន្លោះពេលបាយចម្បងៗ៖

ជាប្រក្រតីមនុស្សយើងតែងបរិភោគអាហារ 3ពេលក្នុង 1ថ្ងៃ ឯអំឡុងពេលចន្លោះពេលបាយនីមួយៗវិញ គឺជាពេលរបស់ផ្លែឈើ ដោយជាប្រក្រតី គឺបន្ទាប់ពីពេលបាយ ប្រមាណជា 1–2ម៉ោង តែបើសិនជាអាហារ ដែលត្រូវការប្រើពេលរំលាយយូរ ដូចជា នំបឺហ្គ៊ើរ ឬដុំសាច់ ជាដើម គួរទុកចន្លោះពេលប្រមាណ 3–4ម៉ោង សឹមបរិភោគផ្លែឈើ។

ល្អបំផុត គឺការបរិភោគផ្លែឈើ ជាអាហារដំបូងនៃថ្ងៃនីមួយៗ(ពេលព្រឹក) ពេលពោះនៅទំនេរ ឬចន្លោះរវាងពេលបាយព្រឹក និងពេលបាយថ្ងៃ៖

បើអាចជ្រើសរើសអាហារពេលព្រឹកបាន អ្នកគួរជ្រើសរើសបរិភោគមុខម្ហូប ធ្វើពីផ្លែឈើ រួមជាមួយគ្នាតែម្តង ដូចជា ហ្វ្រ៊ុតសាលាដ ផ្លែប៉ោម ឬក៏ទឹកផ្លែឈើកិន ហើយគួរចៀសវាងការញ៉ាំផ្លែឈើមុនពេលចូលគេង ព្រោះជាតិស្ករដែលបានពីផ្លែឈើ មានថាមពលខ្លាំង ធ្វើឱ្យរាងកាយស្វាហាប់រហូតអាចធ្វើឱ្យអ្នកគេងមិនលក់។

បរិភោគក្នុងរូបភាពជាទឹកផ្លែឈើកិន៖

ទឹកសណ្តែកលឿង ណាត់មៀលគ៍ ទឹកដូង ឬយ៉ាអួ គឺជាជម្រើសដ៏ល្អ សម្រាប់កិនលាយជាមួយផ្លែឈើ ព្រោះមិនធ្វើឱ្យលំបាកដល់ប្រព័ន្ធកិនរំលាយអាហារ ក្រៅពីនោះ អ្នកគួរជ្រើសរើសទទួលទានផ្លែឈើ ដែលមានជាតិស្ករតិច ដូចជាផ្លែប៉ោមពណ៌បៃតង ជាដើម វានឹងល្អចំពោះសុខភាពយើងខ្លាំងជាង។

ឬបរិភោគក្នុងរូបភាពជាផ្លែឈើក្រៀម៖

តែមិនគួរបរិភោគផ្លែឈើក្រៀមណា ដែលមានជាតិផ្អែមខ្លាំង និងក្នុងបរិមាណច្រើនជ្រុលពេកឡើយ គួរកំណត់បរិមាណក្នុងការបរិភោគ ឬជ្រើសរើសទទួលទានតែក្នុងឱកាសណាពិសេសៗបានហើយ៕

May 31, 2021

Suarez គិតយ៉ាងណាពេល Barcelona នាំយកកីឡាករវ័យជ្រេចូលក្រុម?

Sergio Aguero ខ្សែប្រយុទ្ធ ManCity នឹងផុតកុងត្រាជាមួយក្លិបអង់គ្លេសមួយនេះ នៅដំណាច់ខែមិថុនា ខាងមុខនេះហើយ ដោយភាគីទាំងសងខាង បានព្រមព្រៀងគ្នា មិនបន្តកុងត្រាថ្មីទៀតឡើយ។ ក្រោយពីចាកចេញពី ManCity កីឡាករ Aguero ត្រូវបាន Barcelona កក់ទុករួចជាស្រេចហើយ ដោយត្រៀមនឹងប្រកាសកុងត្រា នៅឯក្លិបដ៏ល្បីល្បាញរបស់អេស្ប៉ាញមួយនេះ នៅពេលឆាប់ៗខាងមុខនេះ។

ក្នុងព្រឹត្តិការណ៍នេះដែរ Luiz Suarez អតីតខ្សែប្រយុទ្ធ Barcelona បានបង្ហាញចំណាប់អារម្មណ៍ពេញចិត្តយ៉ាងខ្លាំងចំពោះអតីតក្លិបរបស់ខ្លួន ដែលបានផ្តល់ឱកាសដល់កីឡាករវ័យជ្រេដូច Sergio Aguero បើទោះបីជាគេ មានវ័យ 32ឆ្នាំហើយក្តី។

គួររំឭកដែរថា គ្រាដែល Luiz Suarez ចាកចេញពី Barcelona កាលពីដើមរដូវកាលនេះ គឺដោយសារលោក Koeman លើកពីហេតុផលថា រូបគេមានវ័យច្រើនហើយ (33ឆ្នាំ) ដែលធ្វើឱ្យប៉ះពាល់ដល់ទម្រង់ការប្រយុទ្ធរបស់ក្រុម តែក្រោយពីទៅដល់ AT Madrid ភ្លាម គេបានធ្វើឱ្យក្រុមថ្មីរបស់គេមួយនេះលើកពាន La Liga ភ្លែតតែម្ដង៕

May 31, 2021

ក្លិប3 ដែលអាចនឹងក្លាយជាផ្ទះថ្មី របស់ Ronaldo

កីឡាករខ្សែប្រយុទ្ធ Christiano Ronaldo ត្រូវបានគេដឹងថា អាចនឹងចាកចេញពីក្លិប Juventus ក្រោយបញ្ចប់រដូវកាលនេះ ដោយសារតែគេឃើញកីឡាកររូបនេះ បានរើឥវ៉ាន់ចេញពីផ្ទះ។ ក្នុងនោះដែរ ប្រភពជីតស្និទ្ធបានប្រកាសថា កីឡាកររូបនេះ បានប្រាប់មិត្តរួមក្រុម រួចរាល់ហើយថា គេនឹងចាកចេញ នៅចុងឆ្នាំនេះ។

យ៉ាងណាមិញ អ្វីដែលអ្នកតាមដានគ្រប់គ្នា ចង់ដឹងខ្លាំងនោះគឺ ថាតើកីឡាកររូបនេះ នឹងផ្លាស់ទៅលេងនៅទីណាវិញ ក្រោយចាកចេញពី Juventus។ មកទល់នឹងពេលនេះ មានក្លិប 3ធំៗ ដែលអាចនឹងក្លាយទៅជាផ្ទះថ្មីរបស់ Ronaldo គឺ PSG, ManU និង Sporting។

គួរឱ្យដឹងដែរថា កុងត្រារបស់ Ronaldo នៅ Juventus នៅមានសុពលភាពដល់ឆ្នាំ2022 ដូចនេះប្រសិនបើក្លិបណាចង់បាន ប្រហែលជាត្រូវចំណាយលុយខ្លះ នៅក្នុងការទិញផ្តាច់កុងត្រាកីឡាកររូបនេះ ពី Juventus៕

ប្រភព ៖ dailymail

May 31, 2021

អ្នកវិទ្យាសាស្ត្រ បាញ់អគ្គិសនីចូលពពក ដើម្បីបង្កើតទឹកភ្លៀងសិប្បនិម្មិត

អារ៉ាប់រួម៖ ក្រុមអ្នកវិទ្យាសាស្ត្រ កំពុងត្រៀមសាកល្បងបាញ់អគ្គិសនីចូលទៅកាន់ពពក ដើម្បីធ្វើឱ្យគ្រាប់ទឹកក្នុងពពកមានទំហំធំជាងមុន និងងាយស្រួលធ្លាក់ជាភ្លៀងជាងបច្ចុប្បន្ន។

ដោយសារតែអាកាសធាតុក្ដៅហែង និងកម្រិតទឹកភ្លៀងជាមធ្យមត្រឹមតែ 10សង់ទីម៉ែត្រ ប្រទេសអារ៉ាប់រួម (UAE) ត្រូវការទឹកសាបបន្ថែមទៀត។ ដើម្បីដោះស្រាយបញ្ហានេះ រដ្ឋាភិបាល បានវិនិយោគទៅលើគម្រោងវិទ្យាសាស្ត្រជាច្រើននៅជុំវិញពិភពលោក ទាក់ទងនឹងការបង្កើតទឹកភ្លៀងសិប្បនិម្មិត ក្នុងនោះក៏មានគម្រោងប្រើប្រាស់យន្តហោះគ្មានមនុស្សបើក (drone) ខ្នាតតូច បាញ់អគ្គិសនីទៅក្នុងពពកផងដែរ។

អ្នកវិទ្យាសាស្ត្រមួយក្រុម មកពីសាកលវិទ្យាល័យ Reading នៃចក្រភពអង់គ្លេស ដំបូងឡើយបានស្នើគម្រោងខាងលើ ហើយបច្ចុប្បន្ន យន្តហោះគ្មានមនុស្សបើកទាំងនេះ កំពុងត្រៀមខ្លួនសម្រាប់ធ្វើការសាកល្បងនៅក្បែរទីក្រុង ឌូបៃ នាពេលដ៏ខ្លីខាងមុខ។ គម្រោងរបស់អ្នកវិទ្យាសាស្ត្រនេះគឺ ការបាញ់អគ្គិសនីចូលទៅក្នុងគ្រាប់ទឹកនៅក្នុងពពក បំណងធ្វើឱ្យវាងាយស្រួលធ្លាក់មកលើដីជាងមុន និងបង្កើតបានជាទឹកភ្លៀង។

«មានការគិតជាច្រើនទាក់ទងនឹងអគ្គិសនីមានឥទ្ធិពលលើតំណក់ទឹកក្នុងពពកនៅលើមេឃ ប៉ុន្តែ ហាក់មិនទាន់មានការសិក្សាស្រាវជ្រាវណាមួយត្រូវបានធ្វើឡើងជាក់ស្ដែង និងលម្អិតនៅឡើយ» Keri Nicoll អ្នកវិទ្យាសាស្ត្រសំខាន់មួយរូប នៃគម្រោងខាងលើ បានឱ្យដឹងដូច្នេះ និងបន្ថែមទៀត គោលដៅរបស់ពួកគេគឺ ចង់បញ្ជាក់់ថា បច្ចេកវិទ្យាអាចបង្កើនបរិមាណទឹកភ្លៀងនៅក្នុងតំបន់ខ្វះប្រភពទឹក។

ក្រុមរបស់ Nicoll បានបង្កើតទ្រង់ទ្រាយរបស់ពពក ដើម្បីធ្វើការពិសោធ។ ពួកគេបានឃើញថា នៅពេលតំណក់ទឹកក្នុងពពក ទទួលបានបន្ទុកអគ្គិសនីវិជ្ជមាន ឬអវិជ្ជមាន ពួកវាមានលទ្ធភាពប្រមូលផ្ដុំគ្នា និងបង្កើតជាគ្រាប់ទឹកធំជាងមុន។ ដោយសារតែតំបន់ក្ដៅហែងដូចនៅអារ៉ាប់រួម ពពកតែងតែស្ថិតនៅខ្ពស់ជាងតំបន់ដែលមានអាកាសធាតុមិនក្ដៅពេក ដូច្នេះ គ្រាប់ភ្លៀងក៏តែងហួតទៅវិញ នៅពេលកំពុងធ្លាក់ចុះ។ អ្នកវិទ្យាសាស្ត្រ Nicoll បាននិយាយថា៖ «យើងកំពុងព្យាយាមធ្វើឱ្យគ្រាប់ទឹកនៅក្នុងពពក មានទំហំធំគ្រប់គ្រាន់ ដើម្បីធានាថា នៅពេលធ្លាក់ពីពពក ពួកវានឹងនៅតែរក្សារូបរាងដើមបានល្អ មុនពេលធ្លាក់ដល់ដី»។

គម្រោងខាងលើនេះ ទទួលបានថវិកាគាំទ្រចំនួន 1.5លានដុល្លារអាមេរិក សម្រាប់រយៈពេល 3ឆ្នាំ។ ដើម្បីពិសោធលើគម្រោងនេះ អ្នកស្រី Nicoll និងសហការី បានបង្កើតយន្តហោះដែលមានស្លាបប្រវែង 2ម៉ែត្រ ចំនួន 4គ្រឿង។ យន្តហោះទាំងនេះ ត្រូវបានបាញ់ចេញពីម៉ាស៊ីនបាញ់ថ្ម និងបំពាក់ប្រព័ន្ធបើកបរស្វ័យប្រវត្ត ហើយអាចហោះហើរបានប្រហែល 40នាទី។ គ្រាប់យន្តហោះ ក៏មានអង្គញាណដែលអាចវាស់កំដៅ ទំហំ និងសំណើម ក៏ដូចជាឧបករណ៍បាញ់អគ្គិសនីដែលអភិវឌ្ឍដោយសាកលវិទ្យាល័យ Bath របស់អង់គ្លេស។

បច្ចុប្បន្ន ក្រុមអ្នកជំនាញ ដែលតំណាងឱ្យក្រុមវិទ្យាសាស្ត្ររបស់អ្នកស្រី Nicoll កំពុងរង់ចាំអាកាសធាតុអំណោយផល ដើម្បីបង្ហើយការពិសោធខាងលើនេះ។

នាយកដ្ឋានឧតុនិយមរបស់ អារ៉ាប់រួម បានឱ្យដឹងថា ក្នុងឆ្នាំ2017 ប្រទេសនេះ បានធ្វើការបង្កើតភ្លៀងសិប្បនិម្មិតចំនួន 242លើករួចមកហើយ។ អារ៉ាប់រួម ក៏មានរោងចក្រចម្រាញ់ទឹកប្រៃដ៏ធំមួយក្នុងពិភពលោកផងដែរ ប៉ុន្តែ អនុផលនៃការចម្រញ់ទឹកនេះ មានផលប៉ះពាល់ខ្លាំងដល់ជីវចម្រុះក្នុងសមុទ្រ៕

ប្រភព៖ CNN
ប្រែសម្រួល៖ បុត្រា

May 31, 2021

វីដេអូថ្មីស្ដីពី UFO បង្កឱ្យមានចំណាប់អារម្មណ៍ខ្លាំង មុនថ្ងៃក្រសួងការពារជាតិអាមេរិក ប្រកាសឯកសារសម្ងាត់ជាផ្លូវការ

មន្ទីរបញ្ចកោណ (Pentagon) ធ្វើការបញ្ជាក់អំពីខ្លឹមសារវីដេអូ ដែលត្រូវបានថតពីនាវាចម្បាំង USS Omaha កាលពីឆ្នាំ2019 ក្នុងនោះបង្ហាញថា UFO (Unidentified flying object / វត្ថុហោះ មិនស្គាល់អត្តសញ្ញាណ) ចំនួន 14គ្រឿង បានឡោមព័ទ្ធនាវាចម្បាំងរបស់សហរដ្ឋអាមេរិក។

«ខ្ញុំអាចបញ្ជាក់បានថា វីដេអូនេះ ត្រូវបានថតដោយទាហានជើងទឹក។ ក្រុមការងារពិសេសទទួលបន្ទុកស្រាវជ្រាវបាតុភូតអាកាស (Unknown Airborne Phenomena Task Force/UAPTF) បានបញ្ចូលរូបភាពទាំងនេះទៅក្នុងបញ្ជីស៊ើបអង្កេត។ យើងមិនមានព័ត៌មានបន្ថែមអ្វីផ្សេងក្រៅពីនេះ» អ្នកនាំពាក្យរបស់មន្ទីរបញ្ចកោណ និយាយកាលពីថ្ងៃទី29 ខែឧសភា ឆ្នាំ2021។

ការលើកឡើងខាងលើ ត្រូវបានធ្វើឡើង បន្ទាប់ពី Jeremy Corbell ផលិតករភាពយន្តស៊ើបអង្កេត បានប្រកាសបង្ហាញរូបភាពដែលត្រូវបានថតពីនាវាចម្បាំង USS Omaha ពេលវាកំពុងផ្លាស់ទីនៅលើលម្ហសមុទ្រ California សហរដ្ឋអាមេរិក កាលពីថ្ងៃទី15 ខែកក្កដា ឆ្នាំ2019។ «វីដេអូ ដែលត្រូវបានថតពីមជ្ឈមណ្ឌលព័ត៌មានប្រយុទ្ធរបស់ USS Omaha បង្ហាញថា រ៉ាដា រកឃើញការប្រឈមមុខដ៏ធំមួយ ជាមួយនឹង UFO» Corbell និយាយដូច្នេះ កាលពីថ្ងៃទី28 ខែឧសភា។

នៅក្នុងវីដេអូនោះ យ៉ាងហោចណាស់ មាន UFO ចំនួន 14គ្រឿង ផ្លាស់ទីក្នុងល្បឿនយ៉ាងលឿន និងឡោមព័ទ្ធនាវាចម្បាំងសហរដ្ឋអាមេរិក។ ក្រុមនាវិកមានការភ្ញាក់ផ្អើលខ្លាំងនៅពេលរកវិធីកំណត់ល្បឿន និងទិសដៅហោះរបស់ពួកវា។ Corbell បានឱ្យដឹងថា UFO 1គ្រឿង ក្នុងចំណោម 14គ្រឿង បានហោះចូលក្នុងទឹកសមុទ្រ ហើយនាវាមុជទឹកក៏ត្រូវបានបញ្ជាឱ្យតាមរកដានរបស់វា ប៉ុន្តែមិនអាចរកឃើញ។

នេះគឺជាវីដេអូទីពីរដែលត្រូវបាន Corbell ប្រកាសបង្ហាញ នៅក្នុងប៉ុន្មានសប្ដាហ៍ចុងក្រោយនេះ។ ផលិតករភាពយន្តនេះ បានឱ្យដឹងថា កងទ័ពជើងទឹកសហរដ្ឋអាមេរិក បានប្រឈមមុខនឹង UFO ជាង 100គ្រឿង នៅក្នុងអំឡុងឆ្នាំ2019 ដោយយោងតាមទិន្នន័យដែលលោកប្រមូលបាន។

សភាអាមេរិក កាលពីខែមករា បានកំណត់យកថ្ងៃទី1 ខែមិថុនា ជាថ្ងៃដែលអង្គភាពស៊ើបការណ៍សម្ងាត់ និងក្រសួងការពារជាតិ ត្រូវប្រកាសឯកសារទាក់ទងនឹង UFO និងបាតុភូតដែលមិនអាចកំណត់អត្តសញ្ញាណបាន។ ដូច្នេះ សូមរង់ចាំតាមដានទាំងអស់គ្នា។

ប្រភព RT
ប្រែសម្រួល៖ បុត្រា

May 31, 2021

លទ្ធផលនៃការចាក់វ៉ាក់សាំងបង្ការ COVID-19 នៅកម្ពុជា គិតត្រឹមថ្ងៃទី30 ខែឧសភា ឆ្នាំ2021

ក្រសួងសុខាភិបាលកម្ពុជា នាយប់ថ្ងៃទី30 ខែឧសភា បានឱ្យដឹងថា អត្រានៃពលរដ្ឋដែលបានទទួលការចាក់វ៉ាក់សាំងបង្ការវីរុសCovid-19 បានកើនដល់ 25.67% បើធៀបនឹងពលរដ្ឋគោលដៅចំនួន 10លាននាក់ ដែលរាជរដ្ឋាភិបាលបានកំណត់។

ក្នុងចំណោមពលរដ្ឋដែលបានទទួលការចាក់វ៉ាក់សាំង Covid-19 មាន 2,567,493នាក់ បានចាក់ម្ជុល (ដូស) ទីមួយ និង 1,961,346 បានចាក់ម្ជុលទីពីរ (រួចរាល់)។

កម្ពុជា បានផ្ដើមយុទ្ធនាការចាក់វ៉ាក់សាំងបង្ការវីរុសCovid-19 ចាប់ពីថ្ងៃទី10 ខែកុម្ភៈ ឆ្នាំ2021 ដោយប្រើប្រាស់វ៉ាក់សាំងចំនួន 3ប្រភេទ រួមមាន វ៉ាក់សាំង Sinopharm របស់ក្រុមហ៊ុនរដ្ឋចិន China National Pharmaceutical Group Corporation (ហៅកាត់ថា Sinopharm) ផលិតនៅប្រទេសចិន, វ៉ាក់សាំងឥណ្ឌា Covishield ប្រើរូបមន្តរបស់ក្រុមហ៊ុនអង់គ្លេស AstraZeneca និងវ៉ាក់សាំង Sinovac (CoronaVac) របស់ក្រុមហ៊ុនចិន Sinovac Biotech ផលិតនៅប្រទេសចិន។

ព័ត៌មានលម្អិត សូមអានរបាយការណ៍របស់ អនុគណៈកម្មការតាមដាននិងវាយតម្លៃ នៃគណៈកម្មការចំពោះកិច្ចចាក់វ៉ាក់សាំង Covid-19 ក្របខណ្ឌទូទាំងប្រទេស (គ.វ.ក-១៩) ដែលមានដូចខាងក្រោម៖
ប្រភព៖ ក្រសួងសុខាភិបាល
ដកស្រង់៖ បុត្រា

May 31, 2021

Author: សឿន សំណាង