នាថ្ងៃទី15 ខែមិថុនា ឆ្នាំ2021 នេះ រដ្ឋបាលរាជធានីភ្នំពេញ បានចេញសេចក្ដីសម្រេច ស្តីពី ការអនុញ្ញាតឱ្យបើកដំណើរការគ្រប់អាជីវកម្ម ការលក់ដូរ ជាប្រក្រតីឡើងវិញ ក្នុងក្របខ័ណ្ឌផ្សាររដ្ឋទាំងអស់ សម្រាប់ភូមិសាស្ត្រនៅ រាជធានីភ្នំពេញ។
ខាងក្រោមនេះគឺជា សេចក្តីសម្រេច លេខ 153/21 សសរ. ចុះថ្ងៃទី14 ខែមិថុនា ឆ្នាំ2021 របស់រដ្ឋបាលរាជធានីភ្នំពេញ៖
ប្រភព៖ រដ្ឋបាលរាជធានីភ្នំពេញ
ដកស្រង់៖ បុត្រា
ក្រសួងសុខាភិបាល នាព្រឹកថ្ងៃទី15 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន -495នាក់, អ្នកជាចំនួន 604នាក់ និងអ្នកស្លាប់ថ្មីចំនួន 13នាក់បន្ថែមទៀត នៅក្នុងថ្ងៃទី14 ខែមិថុនា ឆ្នាំ2021។
គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 39,464នាក់ ក្នុងនោះមាន 361នាក់បានបាត់បង់ជីវិត,33,571នាក់បានជា និងប្រមាណជា 5,600នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។
នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 177,033,919នាក់ត្រូវបានរកឃើញ ក្នុងនោះមាន 161,226,410នាក់បានជា, 3,827,748នាក់បានស្លាប់ និង 11,979,761នាក់កំពុងព្យាបាល៕
ប្រភព៖ ក្រសួងសុខាភិបាល, Worldometers
ដកស្រង់៖ បុត្រា
ក្រុមអ្នកស្រាវជ្រាវនៅប្រទេស អង់គ្លេស បានព្រមានថា អ្នកដែលបានឆ្លងវីរុសCovid-19 បំប្លែងខ្លួនប្រភេទ SARS-CoV-2 Delta (B.1.617) ដែលរកឃើញដំបូងនៅប្រទេស ឥណ្ឌា អាចធ្វើឱ្យគេច្រឡំនឹងរោគសញ្ញានៃជំងឺគ្រុនផ្ដាសាយ។
សារព័ត៌មានរបស់ អង់គ្លេស Guardian បានចេញផ្សាយថា ការឈឺក្បាល ក្រហាយបំពង់ក និងហៀរសម្បោរ គឺជារោគសញ្ញាដែលគេជួបប្រទះច្រើនបំផុត ទាក់ទងនឹងវីរុសក្លាយពូជថ្មីប្រភេទ Delta។
សាស្ត្រាចារ្យ Tim Spector មកពីសាកលវិទ្យាល័យ King’s College London ដែលជាប្រធានក្រុមស្រាវជ្រាវ បានឱ្យដឹងថា យោងទៅតាមទិន្នន័យប្រមូលបាន អ្នកដែលបានឆ្លង Covid-19 ប្រភេទ Delta នឹងមានអារម្មណ៍ថា ដូចកំពុងមានជំងឺផ្ដាសាយ។
«គ្រប់គ្នាគិតថា ខ្លួនគេគ្រាន់តែផ្ដាសាយតាមរដូវ ដូច្នេះ ពួកគេនៅតែទៅជប់លៀង។ ប្រការនេះនឹងនាំឱ្យមានបញ្ហាច្រើន។ អាការចម្បងជាងគេបង្អស់ នោះគឺ ឈឺក្បាល បន្ទាប់មកគឺក្រហាយបំពង់ក ក្រោយមកទៀតគឺ ហៀរសម្បោរ និងក្ដៅខ្លួន» សាស្ត្រាចារ្យ Tim Spector បន្ថែម។
សាស្ត្រាចារ្យ Tim Spector ផ្ដល់យោបល់ថា៖ «បើសិនជា អ្នកនៅក្មេង និងមានរោគសញ្ញាស្រាល ដូចជាផ្ដាសាយ ល្អបំផុតគឺគួរតែនៅផ្ទះ និងធ្វើតេស្ត Covid-19»។
យោងតាមក្រសួងសុខាភិបាល អង់គ្លេស (NHS) រោគសញ្ញាសំខាន់ៗរបស់ Covid-19 គឺ ក្ដៅខ្លួន ក្អក និងបាត់បង់រសជាតិ។ ចំណែកសាស្ត្រាចារ្យ Spector និយាយថា នៅពេលឆ្លង Delta អាការបាត់បង់រសជាតិ មិនស្ថិតក្នុងក្រុមរោគសញ្ញាចម្បងទាំង10 របស់អ្នកជំងឺនោះឡើយ។
ទិន្នន័យរបស់ អង់គ្លេស និយាយថា វីរុសបំប្លែងខ្លួន Delta (B.1.617) ដែលរកឃើញដំបូងនៅ ឥណ្ឌា ធ្វើឱ្យអ្នកជំងឺត្រូវចូលពេទ្យក្នុងអត្រាខ្ពស់ជាងច្រើន បើធៀបនឹងវីរុសបំប្លែងខ្លួន Alpha (B.1.1.7) ដែលត្រូវបានគេរកឃើញដំបូងនៅប្រទេស អង់គ្លេស។
សារព័ត៌មាន Guardian កាលពីថ្ងៃទី14 ខែមិថុនា បានរាយការណ៍ថា Covid-19 ប្រភេទ Delta បច្ចុប្បន្ន បានឆ្លងរាលដាលដល់ប្រទេសចំនួន 74 ក្នុងពិភពលោក៕
ប្រភព៖ Guardian
ប្រែសម្រួល៖ បុត្រា
កាលពីថ្ងៃទី14 ខែមិថុនា ប៉ូលិសក្នុងស្រុកបានឱ្យដឹងថា មនុស្សចំនួន 5នាក់ បានស្លាប់ នៅក្នុងករណីធ្លាក់យន្តហោះធុនតូច 1គ្រឿង និងឧបករណ៍ហោះហើរប្រភេទ glider 1គ្រឿង នៅជួរភ្នំ Alps របស់ប្រទេសស្វីស កាលពីចុងសប្ដាហ៍កន្លង។ ប៉ូលិសកំពុងស្រាវជ្រាវដើម្បីឱ្យដឹងថា តើករណីគ្រោះថ្នាក់ទាំងពីរនេះ មានជាប់ទាក់ទិននឹងគ្នាដែរ ឬអត់។
យន្តហោះធុនតូច 1គ្រឿង ដែលមានអ្នកជិះចំនួន 4នាក់ រួមមានទាំងកុមារម្នាក់ផង បានធ្លាក់នៅលើភ្នំ Piz Neir នៅភាគខាងកើតប្រទេសស្វីស កាលពីថ្ងៃទី12 ខែមិថុនា បណ្ដាលឱ្យមនុស្សទាំងអស់ ត្រូវបាត់បង់ជីវិត។ សមត្ថកិច្ចបានរកឃើញបំណែកយន្តហោះខាងលើកាលពីថ្ងៃទី13 ខែមិថុនា នៅពេលកំពុងស្វែងរកយន្តហោះប្រភេទកំសាន្ត (glider) ដែលបានធ្លាក់ក្នុងថ្ងៃជាមួយគ្នា បណ្ដាលឱ្យអ្នកបើកបរម្នាក់ បាត់បង់ជីវិត។
យន្តហោះប្រភេទកំសាន្តខាងលើ បានធ្លាក់នៅក្បែរទីតាំងដែលគេរកឃើញបំណែកយន្តហោះធុនតូច ប្រមាណ 1គីឡូម៉ែត្រ នៅលើកម្ពស់ 2,700ម៉ែត្រ ធៀបនឹងផ្ទៃទឹកសមុទ្រ។
ដោយឡែក នៅ សហរដ្ឋអាមេរិក ក៏មានករណីធ្លាក់យន្តហោះធុនតូច 1គ្រឿងដែរ នៅក្នុងរដ្ឋ Texas កាលពីវេលាទៀបភ្លឺ ថ្ងៃទី14 ខែមិថុនា (ម៉ោងក្នុងស្រុក) នាំឱ្យមនុស្សម្នាក់បានស្លាប់ និង 5នាក់ផ្សេងទៀត រងរបួស។
ក្រុមមន្ត្រីបានឱ្យដឹងថា យន្តហោះនេះបានធ្លាក់នៅពេលកំពុងព្យាបាលចុះចតនៅឯព្រលានយន្តហោះ Madisonville កាលពីវេលាម៉ោង 1 ទៀបភ្លឺ នៃថ្ងៃទី14 ខែមិថុនា។ អ្នកស្លាប់នៅក្នុងករណីនេះ គឺជា អ្នកបើកបរ ចំណែកមនុស្ស 5នាក់ទៀត ត្រូវបានបញ្ជូនទៅកាន់មន្ទីរពេទ្យ៕
ប្រភព៖ Xinhuanet, ABC13, Switzerland.in-24
ប្រែសម្រួល៖ បុត្រា
ប្រភពព័ត៌មានពី សហរដ្ឋអាមេរិក នៅវេលាទៀបភ្លឺ ថ្ងៃទី15 ខែមិថុនា (ថ្ងៃទី14 ខែមិថុនា នៅអាមេរិក) បានឱ្យដឹងថា មានករណីផ្ទុះរោងចក្រគីមីដ៏ធំមួយនៅក្នុងរដ្ឋ Illinois ដែលស្ថិតនៅក្នុងតំបន់ Midwest នៃ សហរដ្ឋអាមេរិក។
ករណីផ្ទុះ បានធ្វើឱ្យមានអគ្គិភ័យយ៉ាងធំ នៅក្នុងរោងចក្រគីមី របស់ក្រុមហ៊ុន Chemtool Incorporated ចាប់ពីម៉ោង 7ព្រឹក ថ្ងៃទី14 ខែមិថុនា (ម៉ោងក្នុងស្រុក)។
រោងចក្រនេះស្ថិតនៅក្បែរដងផ្លូវ Prairie Hill ក្នុងតំបន់ Rockton ស្រុក Winnebago នៃរដ្ឋ Illinois។ រោងចក្រនេះ មានជំនាញខាងផលិតប្រេងម៉ាស៊ីន ប្រេងម៉ាស៊ូត ដែលនាំចេញទៅកាន់ពិភពលោក។
កងកម្លាំងប្រតិកម្មរហ័ស និងក្រុមអ្នកជួយសង្គ្រោះបន្ទាន់ បានទៅដល់កន្លែងកើតហេតុ។ ក្រុមមន្ត្រីក្នុងតំបន់ កំពុងជម្លៀសដោយបង្ខំ ចំពោះពលរដ្ឋដែលមានទីលំនៅ នៅជុំវិញរោងចក្រ នៅពេលអគ្គិភ័យឆាប់ឆេះ និងមានផ្សែខ្មៅខ្មួលខ្មាញ់។
បច្ចុប្បន្ន មិនទាន់មានសេចក្ដីរាយការណ៍អំពីការខូចខាត ក៏ដូចជាការបាត់បង់ជីវិតនៅក្នុងហេតុការណ៍នេះនៅឡើយ ប៉ុន្តែ សារព័ត៌មានក្នុងស្រុក WTVO បានឱ្យដឹងថា កម្មកររោងចក្រយ៉ាងតិច 70នាក់ ត្រូវបានជម្លៀសទៅកាន់ទីសុវត្ថិភាព៕
NBC News, AP
ឥណ្ឌា៖ Ziona Chana ដែលជាស្វាមីរបស់ស្ត្រីចំនួន 38នាក់ និងជាឪពុករបស់កូនៗចំនួន 89នាក់ បានទទួលមរណភាពក្នុងវ័យ 76ឆ្នាំ នៅក្នុងរដ្ឋ Mizoram។
«ជាមួយនឹងបេះដូងដ៏ក្ដុកក្ដួលបំផុត រដ្ឋ Mizoram ត្រូវនិយាយពាក្យថា ‘លា’ ចំពោះលោក Ziona វ័យ 76ឆ្នាំ ដែលត្រូវបានគេចាត់ទុកថាជា មេគ្រួសារដែលមានសមាជិកច្រើនជាងគេបង្អស់ក្នុងពិភពលោក ព្រោះមានប្រព័ន្ធចំនួន 38នាក់ និងកូនចំនួន 89នាក់។ សូមលោកបានទៅកាន់សុគតិភព» អភិបាលរដ្ឋ Mizoram បង្ហោះសារនៅលើ Twitter កាលពីថ្ងៃទី13 ខែមិថុនា។
លោក Zoramthanga អភិបាលរដ្ឋ បានបន្ថែមថា ក្នុងរយៈពេលច្រើនឆ្នាំកន្លង ដោយមានគ្រួសាររបស់លោក Ziona Chana ភូមិ Baktawng Tlangnuam (ជាកន្លែងដែលគ្រួសារនេះកំពុងរស់នៅ) បានក្លាយជាទីតាំងទេសចរណ៍ ដែលទាក់ទាញភ្ញៀវបានយ៉ាងច្រើន សម្រាប់រដ្ឋ Mizoram នេះ។
នាយកមន្ទីរពេទ្យ Trinity វេជ្ជបណ្ឌិត Lalrintluanga Zahau បានបញ្ជាក់ថា លោក Ziona បានបាត់បង់ជីវិតបន្ទាប់ពីទទួលការព្យាបាលជំងឺទឹកនោមផ្អែម និងសម្ពាធឈាមខ្ពស់។
លោក Ziona Chana កើតឆ្នាំ1945 គឺជាមេដឹកនាំនៃនិកាយសាសនា Chana (Chana Pawl or Chhuanthar) នៅក្នុងភូមិ Baktawng Tlangnuam។ និកាយនេះរួមមានប្រហែល 400គ្រួសារ ក្នុងនោះ សមាជិកជាបុរស ត្រូវបានអនុញ្ញាតឱ្យយកប្រពន្ធច្រើន។
ថ្វីបើមានប្រព័ន្ធចំនួន 38នាក់ និងកូនចំនួន 89នាក់ ប៉ុន្តែ គ្រួសារនេះរស់នៅជុំគ្នានៅក្នុងផ្ទះមួយខ្នង មានកម្ពស់ 4ជាន់ និងមានបន្ទប់ជាង 100 ដែលមានឈ្មោះថា «ផ្ទះជំនាន់ថ្មី»៕
ប្រភព៖ BBC
ប្រែសម្រួល៖ បុត្រា
បន្ទាប់ពីធ្វើឱ្យ Bitcoin ធ្លាក់ថ្លៃខ្លាំង ដោយសារតែបាន «បែរខ្នង» ដាក់ កាលពីពាក់កណ្ដាលខែឧសភា ពេលនេះ មហាសេដ្ឋី Elon Musk ក៏បែរជាបង្ហើបឱ្យដឹងថា ក្រុមហ៊ុន Tesla អាចងាកមកទទួលយកការទូទាត់ដោយប្រើប្រាស់រូបិយវត្ថុឌីជីថល នេះ ឡើងវិញ។
នាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla លោក Elon Musk បានឱ្យដឹងថា ក្រុមហ៊ុន Tesla អាចនឹងអនុញ្ញាតឱ្យអតិថិជនរបស់ខ្លួន ប្រើប្រាស់ Bitcoin ដើម្បីទូទាត់នៅក្នុងការទិញរថយន្ត នៅពេលក្រុមអ្នករុករក Bitcoin (Bitcoin Miners) ប្រើប្រាស់ថាមពលស្អាត និងសមស្រប។ «នៅពេលមានការបញ្ជាក់អំពីការប្រើប្រាស់ថាមពលស្អាត សមស្រប (ប្រហែល 50%) Tesla នឹងទទួលយកការទូទាត់ដោយប្រើ Bitcoin» លោក Musk សរសេរនៅលើទំព័រ Twitter កាលពីថ្ងៃទី13 ខែមិថុនា។
យោងតាម Coinmarketcap តម្លៃរបស់ Bitcoin បានកើនជាង 9% នៅក្នុងថ្ងៃទី13 ខែមិថុនា ពោលគឺឡើងដល់ជិត 39,000ដុល្លារ/Bitcoin។
ការលើកឡើងរបស់មហាសេដ្ឋី Elon Musk ខាងលើនេះ គឺដើម្បីឆ្លើយតបនឹងមតិរបស់ Magda Wierzycka នាយិកាប្រតិបត្តិរបស់ក្រុមហ៊ុនគ្រប់គ្រងទ្រព្យសម្បត្តិ Sygnian។ អ្នកស្រីយល់ថា សារដែលលោក Musk បានបង្ហោះអំពីតម្លៃរបស់ Bitcoin គឺជាការ «ប្រើល្បិចកលក្នុងទីផ្សារ» ហើយថា គណៈកម្មមូលបត្រ របស់ សហរដ្ឋអាមេរិក (SEC) គួរណាស់តែធ្វើការស៊ើបអង្កេត។
នៅក្នុងឯកសារដែលបញ្ជូនទៅកាន់ SEC កាលពីខែកុម្ភៈ Tesla ឱ្យដឹងថា ខ្លួនបានទិញ Bitcoin ក្នុងតម្លៃ 1.5ពាន់លានដុល្លារ។ ក្រោយមក ក្រុមហ៊ុននេះក៏បានអនុញ្ញាតឱ្យអតិថិជន ទូទាត់ថ្លៃទិញរថយន្ត Tesla ដោយរូបិយវត្ថុ Bitcoin។
ប៉ុន្តែ មិនយូរប៉ុន្មាន Elon Musk ក៏បានបែរខ្នងដាក់ Bitcoin ដោយប្រកាសថា ផ្អាកទទួលយកការទូទាត់ដោយ Bitcoin ព្រោះថា ប្រតិបត្តិការនៅក្នុងការជួញដូរ ឬផ្ទេរ Bitcoin គឺស៊ីភ្លើងខ្លាំង ដែលនេះ ប៉ះពាល់ដល់បរិស្ថាន រួមចំណែកធ្វើឱ្យអាកាសធាតុប្រែប្រួល។
លោក Musk កាលពីម្សិលមិញ ក៏បានច្រានចោលការចោទប្រកាន់របស់ Wierzycka ទាក់ទិននឹងទីផ្សារ Bitcoin។ លោក Musk និយាយថា «Tesla បានលក់ប្រហែល 10% ប៉ុណ្ណោះ នៅក្នុងចំណោម Bitcoin ដែលក្រុមហ៊ុននេះកំពុងកាន់កាប់» ដើម្បីបញ្ជាក់អំពីភាពងាយស្រួលក្នុងការជួញដូរ នៃរូបិយវត្ថុឌីជីថលនេះ។
ថ្មីៗនេះ អ្នកលេង Bitcoin ជាច្រើន មានការព្រួយបារម្ភ ខ្លាចលោក Musk ចូលមកកកូរតម្លៃរបស់ Bitcoin ជាថ្មី ក្រោយពីការបង្ហោះសារច្រើនលើក អំពីរូបិយវត្ថុនេះ។ ចាប់ពីដើមឆ្នាំ លោក Musk បានបញ្ចេញមតិជាបន្តបន្ទាប់អំពី Bitcoin, Dogecoin ធ្វើឱ្យតម្លៃរបស់បណ្ដារូបិយវត្ថុឌីជីថលទាំងនេះ ត្រូវឡើង-ចុះ ប្រែប្រួលយ៉ាងខ្លាំងក្លា៕
ប្រភព៖ CNBC
ប្រែសម្រួល៖ បុត្រា
អភិបាលក្រុង មូស្គូ លោក Sergei Sobyanin កាលពីថ្ងៃទី13 ខែមិថុនា បានប្រកាសថា ពលរដ្ឋនៃរដ្ឋធានី ដែលបានចាក់វ៉ាក់សាំងបង្ការវីរុស Covid-19 ម្ជុលទីមួយ នឹងមានឱកាសត្រូវឆ្នោតដែលមានរង្វាន់ធំៗជាច្រើន ក្នុងនោះក៏មានរថយន្តច្រើនគ្រឿងផងដែរ។
សារព័ត៌មានបារាំង AFP បានចេញផ្សាយថា ប្រកាសខាងលើត្រូវបានលើកឡើងក្នុងគ្រាដែលអាជ្ញាធរ មានបំណងបង្កើនល្បឿននៃយុទ្ធនាការចាក់វ៉ាក់សាំង Covid-19 ខណៈដែលករណីឆ្លងវីរុសនៅរដ្ឋធានីមូស្គូ និងទូទាំងប្រទេស កំពុងកើនឡើង។
«ចាប់ពីថ្ងៃទី14 ខែមិថុនា ដល់ថ្ងៃទី11 ខែកក្កដា ពលរដ្ឋដែលបានចាក់វ៉ាក់សាំងដូសទីមួយ នឹងបានចូលរួមកម្មវិធីចាប់ឆ្នោតឈ្នះរង្វាន់រថយន្ត» លោក Sergei Sobyanin ប្រកាសនៅលើគេហទំព័ររបស់ខ្លួនដូច្នេះ។
លោក Sergei Sobyanin បញ្ជាក់ថា អ្នកទាំងឡាយដែលបានទទួលការចាក់វ៉ាក់សាំង មានឱកាសឈ្នះរង្វាន់រថយន្ត រហូតដល់ 5គ្រឿង ជារៀងរាល់សប្ដាហ៍ ហើយក្នុង 1គ្រឿងៗ មានតម្លៃ 1លានរូបរុស្ស៊ី (ស្មើនឹង 13,884 ដុល្លារអាមេរិក)។
«ក៏ប៉ុន្តែ ពិតណាស់ ផលប្រយោជន៍ចម្បងដែលពលរដ្ឋទទួលបានពីការចាក់វ៉ាក់សាំង គឺមិនអាចប្រៀបប្រដូចជាមួយនឹងរថយន្តទាំងនេះបានឡើយ នោះគឺសុខភាព និងទំនុកចិត្តរបស់ពួកគេ» អភិបាលក្រុងមូស្គូ រៀបរាប់។
លោក Sobyanin ឱ្យដឹងថា លោកបានទទួលការចាក់វ៉ាក់សាំង Sputnik V របស់ រុស្ស៊ី កាលពីឆ្នាំទៅ និងបានចាក់រំលឹកឡើងវិញ កាលពី 2ថ្ងៃមុន។ លោក Sobyanin បន្ថែមថា លោកមានមានអារម្មណ៍ថា មានសុខភាពល្អណាស់។
កាលពីថ្ងៃទី13 ខែមិថុនា អាជ្ញាធរក្រុងមូស្គូ ក៏បានប្រកាសថា នឹងចាប់ឆ្នោតដែលមានរង្វាន់ជាផ្ទះ 1ខ្នង មានបន្ទប់គេងចំនួន3 សម្រាប់ក្រុមពលរដ្ឋដែលបានចាក់វ៉ាក់សាំងម្ជុលដំបូង ចាប់ពីថ្ងៃទី15 ខែមិថុនា ដល់ថ្ងៃទី25 ខែមិថុនា។
ប្រទេសរុស្ស៊ី មកដល់បច្ចុប្បន្ន ចាក់វ៉ាក់សាំងយ៉ាងតិច 1ដូស ជូនពលរដ្ឋបានប្រមាណ 12% នៃប្រជាជនសរុប ខណៈដែលការស្ទង់មតិនានា បានបង្ហាញថា ពលរដ្ឋភាគច្រើន មិនមានបំណងចាក់វ៉ាក់សាំង។
នៅទូទាំងប្រទេសរុស្ស៊ី គិតមកដល់ព្រឹកថ្ងៃទី14 ខែមិថុនា ឆ្នាំ2021 នេះ បានរកឃើញអ្នកឆ្លងវីរុស Covid-19 សរុបចំនួន 5,208,687នាក់ ក្នុងនោះមានអ្នកស្លាប់ចំនួន 126,430នាក់, អ្នកជាចំនួន 4,801,335នាក់ និងអ្នកកំពុងព្យាបាលចំនួន 280,922នាក់៕
ប្រភព៖ Reuters
ប្រែសម្រួល៖ បុត្រា
ក្រសួងសុខាភិបាល នាព្រឹកថ្ងៃទី14 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 542នាក់, អ្នកជាចំនួន 1,109នាក់ និងអ្នកស្លាប់ថ្មីចំនួន 13នាក់បន្ថែមទៀត នៅក្នុងថ្ងៃទី13 ខែមិថុនា ឆ្នាំ2021។
គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 38,969នាក់ ក្នុងនោះមាន 348នាក់បានបាត់បង់ជីវិត,
32,967នាក់បានជា និងប្រមាណជា 6,000នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។
នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 176,722,290នាក់ត្រូវបានរកឃើញ ក្នុងនោះមាន 160,767,466នាក់បានជា, 3,819,621នាក់បានស្លាប់ និង 12,135,203នាក់កំពុងព្យាបាល៕
ប្រភព៖ ក្រសួងសុខាភិបាល, Worldometers
ដកស្រង់៖ បុត្រា
ប្រភពព័ត៌មានពីរដ្ឋធានី សេអ៊ូល បានឱ្យដឹងថា Celltrion Inc. ដែលជាក្រុមហ៊ុនផលិតឱសថធំមួយរបស់ កូរ៉េខាងត្បូង នាថ្ងៃទី14 ខែមិថុនានេះ បានប្រកាសលទ្ធផលនៃការពិសោធលើមនុស្ស ដំណាក់កាលទីបីនៅទូទាំងពិភពលោក ចំពោះ Rekirona ដែលជាថ្នាំព្យាបាលជំងឺ COVID-19 ដោយប្រើប្រាស់អង្គបដិប្រាណ ដែលអភិវឌ្ឍដោយក្រុមហ៊ុននេះផ្ទាល់។
ការពិសោធនេះ គឺជា ផ្នែកដ៏សំខាន់មួយ នៅក្នុងការស្រាវជ្រាវដើម្បីបញ្ជាក់អំពីសុវត្ថិភាព និងប្រសិទ្ធភាពទាំងស្រុងរបស់ថ្នាំ Rekirona។ លទ្ធផលនៃការពិសោធ បានបង្ហាញថា ថ្នាំ Rekirona នេះ បានកាត់បន្ថយពេលវេលានៃការព្យាបាល និងហានិភ័យនៃការធ្លាក់ខ្លួនឈឺធ្ងន់ របស់អ្នកជំងឺ Covid-19។
ជាក់ស្ដែង ថ្នាំ Rekirona កាត់បន្ថយហានិភ័យនៃការធ្លាក់ខ្លួនឈឺធ្ងន់រហូតដល់ 54% បើធៀបអ្នកជំងឺដែលមិនបានប្រើថ្នាំនេះ។ ចំណែករយៈពេលនៃការព្យាបាលជាសះស្បើយ ក៏ត្រូវបានកាត់បន្ថយជាមធ្យម 4.9ថ្ងៃ ចំពោះអ្នកជំងឺ Covid-19 ទាំងអស់ និង 4.7 ចំពោះអ្នកជំងឺ Covid-19 ធ្ងន់ធ្ងរ។
ថ្នាំ Rekirona ត្រូវបាននាយកដ្ឋានគ្រប់គ្រងឱសថរបស់ កូរ៉េខាងត្បូង ផ្ដល់ការអនុញ្ញាតឱ្យធ្វើចរាចរណ៍ កាលពីខែកុម្ភៈ ឆ្នាំ2021។ ប្រការនេះ នាំឱ្យ Rekirona ក្លាយជាថ្នាំព្យាបាលជំងឺ Covid-19 ដំបូង ដែលត្រូវបានផលិតនៅប្រទេស កូរ៉េខាងត្បូង។
Rekirona គឺជាអង្គបដិប្រាណម៉ូណូក្លូន (monoclonal antibodies) ដែលមានសារធាតុប្រឆាំងនឹងវីរុស Covid-19។ អង្គបដិប្រាណម៉ូណូក្លូន គឺជា ប្រូតេអ៊ីន មួយប្រភេទ ដែលត្រូវបានរាងកាយផលិតឡើង ដើម្បីជ្រៀតចូលកោសិកាដែលបានឆ្លងវីរុស។ ថ្នាំនេះ កន្លងមក ត្រូវបានអនុញ្ញាតឱ្យប្រើប្រាស់បន្ទាន់រួចហើយ នៅក្នុងប្រទេសជាច្រើនក្នុងពិភពលោក។
ក្រុមហ៊ុន Celltrion មានគម្រោងដាក់ពាក្យសុំច្បាប់ធ្វើចរាចរណ៍ថ្នាំនេះ ទៅកាន់ស្ថាប័នគ្រប់គ្រងអាហារ និងឱសថ សហរដ្ឋអាមេរិក (FDA) និងស្ថាប័នគ្រប់គ្រងឱសថ អឺរ៉ុប (EMA) នៅក្នុងឆ្នាំនេះ៕
ប្រភព៖ Reuters
ប្រែសម្រួល៖ បុត្រា