សឿន សំណាង - La Reine Media

ជប៉ុន ពាក់ម៉ាស់ ថ្វាយរូបសំណាកព្រះពោធិសត្វ កម្ពស់ជិត 60ម៉ែត្រ

ក្រុមកម្មករនៅប្រទេស ជប៉ុន ត្រូវបានគេបង្គាប់ឱ្យពាក់ម៉ាស ថ្វាយដល់រូបសំណាកព្រះពោធិសត្វ (bodhisattva) ដ៏ធំមួយអង្គ នៅក្នុងខេត្ត Fukushima ក្នុងបំណងបួងសួងសូមឱ្យមហាជំងឺរាតត្បាត Covid-19 ឆាប់ត្រូវបានបញ្ចប់។

កាលពីថ្ងៃទី15 ខែមិថុនា កម្មករចំនួន 4នាក់ បានចំណាយពេល 3ម៉ោង ដើម្បីយកខ្សែពួរ ទាញម៉ាស់ដ៏ធំមួយ ឡើងទៅកាន់ផ្នែកខាងលើនៃរូបសំណាកព្រះពោធិសត្វ កម្ពស់ 57ម៉ែត្រ ដែលស្ថិតនៅបរិវេណវិហារ Houkokuji Aizu Betsuin នៃខេត្ត Fukushima ប្រទេស ជប៉ុន។

ម៉ាស់ដ៏ធំ ដែលត្រូវបានធ្វើឡើងអំពីក្រណាត់សំណាញ់ពណ៌ផ្កាឈូកនេះ មានបណ្ដោយ 5.3ម៉ែត្រ, ទទឹង 4.1ម៉ែត្រ និងទម្ងន់ 35គីឡូក្រាម។ ក្រុមកម្មករ បានអូសម៉ាស់នេះឡើង និងបានពាក់ជិតច្រមុះ និងមាត់របស់រូបសំណាក។

Takaomi Horigane ដែលជាអ្នកគ្រប់គ្រងវិហារ Houkokuji Aizu Betsuin ឱ្យដឹងថា រូបសំណាកព្រះពោធិសត្វនេះ នឹងពាក់ម៉ាស់ រហូតដល់ស្ថានភាព Covid-19 នៅប្រទេស ជប៉ុន ត្រូវបានគ្រប់គ្រងទាំងស្រុង។

រូបសំណាកនេះ ត្រូវបានកសាងកាលពី 33ឆ្នាំមុន ជាមួយនឹងផ្នែកដងព្រះកាយត្រូវបានធ្វើឡើងអំពីឈើ និងមានជណ្ដើររាងគូទខ្យង ដែលអនុញ្ញាតឱ្យគ្រប់គ្នា អាចឡើងទៅដល់ផ្នែកស្មារបស់រូបសំណាក។ ពលរដ្ឋដែលបានមកកាន់វិហារខាងលើនេះ ភាគច្រើនបួងសួងសុំសំណាងល្អ និងសេចក្ដីសុខដល់ទារកក្នុងផ្ទៃ ក៏ដូចជាការឆ្លងទន្លេប្រកបដោយសុវត្ថិភាព៕

ប្រភព៖ Reuters
ប្រែសម្រួល៖ បុត្រា

June 17, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី17 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី17 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 625នាក់, អ្នកជាចំនួន 705នាក់ និងអ្នកស្លាប់ថ្មីចំនួន 12នាក់បន្ថែមទៀត នៅក្នុងថ្ងៃទី16 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 40.782នាក់ ក្នុងនោះមាន 380នាក់បានបាត់បង់ជីវិត, 35.030នាក់បានជា និងប្រមាណជា 5,460នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 177,815,072នាក់ត្រូវបានរកឃើញ ក្នុងនោះមាន 162,322,203នាក់បានជា, 3,848,922នាក់បានស្លាប់ និង 11,643,947នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 17, 2021

ប៉ាលេស្ទីន បន្តបង្ហោះប៉ោងប៉ោងបង្កអគ្គិភ័យ ចូលទឹកដី អ៊ីស្រាអែល! ស្ថានការណ៍ចាប់ផ្ដើមឡើងកម្ដៅវិញហើយ

ខ្មាន់កាំភ្លើង ប៉ាលេស្ទីន បន្តបង្ហោះប៉ោងប៉ោងមានភ្ជាប់ជាតិផ្ទុះឆេះ ចេញពីតំបន់ ហ្គាហ្សា ចូលមកទឹកដី អ៊ីស្រាអែល ក្រោយពី អ៊ីស្រាអែល វាយប្រហារតាមអាកាស ដើម្បីឆ្លើយតបនឹងទង្វើបង្ហោះប៉ោងប៉ោងកាលពីប៉ុន្មានថ្ងៃមុន។

អ្នកនាំពាក្យរបស់កម្លាំងពន្លត់អគ្គិភ័យ អ៊ីស្រាអែល បានប្រាប់សារព័ត៌មាន AFP ថា ពួកគេកំពុងដោះស្រាយ «អគ្គិភ័យចំនួន4 កន្លែង ដែលកើតឡើងដោយសារប៉ោងប៉ោងហោះ ដែលត្រូវបានខ្មាន់កាំភ្លើង ប៉ាលេស្ទីន បង្ហោះពីតំបន់ ហ្គាហ្សា កាលពីថ្ងៃទី16 ខែមិថុនា»។ នេះគឺថ្ងៃទី2 ហើយ ដែលករណីអគ្គិភ័យបានកើតឡើងនៅលើទឹកដី អ៊ីស្រាអែល ដែលបង្កដោយប៉ោងប៉ោង បង្ហោះចេញពីតំបន់ ហ្គាហ្សា។

មុននេះ កងទ័ព អ៊ីស្រាអែល ឱ្យដឹងថា ដើម្បីសងសឹកនឹងប៉ោងប៉ោងបង្កអគ្គិភ័យកាលពីថ្ងៃទី15 ខែមិថុនា យន្តហោះចម្បាំងរបស់ពួកគេបានវាយប្រហារមូលដ្ឋានទ័ពនានារបស់ កងជីវពល ហាម៉ាស កាលពីថ្ងៃទី16 មិថុនា។ នេះគឺជាការវាយប្រហារតាមអាកាសដំបូងរបស់ អ៊ីស្រាអែល ក្រោមការដឹកនាំរបស់នាយករដ្ឋមន្ត្រីថ្មី លោក Naftali Bennett និងជាការវាយប្រហារដំបូង រាប់ចាប់ពីមានបទឈប់បាញ់កាលពីថ្ងៃទី20 ខែឧសភា។ ពុំទាន់មានរបាយការណ៍អំពីការស្លាប់នោះទេ នៅក្នុងករណីនេះ។

នៅតំបន់ West Bank ស្ថានការណ៍ក៏ចាប់ផ្ដើមតានតឹងឡើងវិញ។ កងទ័ព អ៊ីស្រាអែល ក៏បានឱ្យដឹងថា ពួកគេបានបាញ់សម្លាប់ស្ត្រីជនជាតិ ប៉ាលេស្ទីន ម្នាក់ នៅពេលស្ត្រីនេះព្យាយាមបើករថយន្តបុកទាហាន និងក្រោយមក បានយកកាំបិត វាយប្រហារលើពួកគេ។

ភាពតានតឹងនៅតំបន់ យេរូសាឡឹមខាងកើត បានឡើងដល់ចំណុចកំពូលកាលពីខែមុន ក្រោយពីប៉ូលិស អ៊ីស្រាអែល ប៉ះទង្គិចជាមួយជនជាតិ ប៉ាលេស្ទីន នៅបរិវេណនៃវិហារអ៊ីស្លាម Al-Aqsa។ ការប៉ះទង្គិច បានក្លាយជាសង្គ្រាមដែលអូសបន្លាយពេល 11ថ្ងៃ រវាង កងជីវពល ហាម៉ាស និងកងទ័ព អ៊ីស្រាអែល បណ្ដាលឱ្យជនជាតិ ប៉ាលេស្ទីន ចំនួន 260នាក់ និងជនជាតិ អ៊ីស្រាអែល 13នាក់ បានស្លាប់។ សង្គ្រាម 11ថ្ងៃនោះ ក្រោយមកត្រូវបានបញ្ចប់កាលពីថ្ងៃទី21 ខែឧសភា ដោយមាន អេហ្សីប ជាអ្នកសម្របសម្រួល៕

ប្រភព៖ AFP
ប្រែសម្រួល៖ បុត្រា

June 17, 2021

ជំនួបកំពូលជាប្រវត្តិសាស្ត្រ រវាង រុស្ស៊-អាមេរិក

ប្រធានាធិបតី សហរដ្ឋអាមេរិក លោក Joe Biden និងសមភាគី រុស្ស៊ី លោក Vladimir Putin កាលពីម្សិលមិញ បាន «ប្រឈមមុខដាក់គ្នាផ្ទាល់» ក្នុងគ្រាទំនាក់ទំនងទ្វេភាគី ស្ថិតក្នុងស្ថានភាពអាក្រក់បំផុត រាប់ចាប់ពីសម័យសង្គ្រាមត្រជាក់។

ភូមិគ្រឹះ La Grange ស្ថិតនៅក្បែរបឹង Geneva នៃប្រទេស ស្វីស ជាកន្លែងដែលមេដឹកនាំទាំងពីររូបខាងលើ ជួបពិភាក្សាគ្នា កាលពីថ្ងៃទី16 ខែមិថុនា។ ជំនួបកំពូលនេះ គឺជាព្រឹត្តិការណ៍ដំបូង បន្ទាប់ពីសេតវិមានបានប្ដូរម្ចាស់។

ជំនួបកំពូលរបស់ប្រធានាធិបតីទាំងពីររូប ដែលមានវត្តមានអមដោយ រដ្ឋមន្ត្រីការបរទេស អាមេរិក Antony Blinken និងសមភាគីរុស្ស៊ី Sergey Lavrov រួមនឹងអ្នកបកប្រែពីររូបខាងលើ ត្រូវបានធ្វើឡើងបន្តបន្ទាប់ ដោយមិនមានពេលសម្រាក។ ក្រោយបញ្ចប់កិច្ចពិភាក្សា មេដឹកនាំទាំងពីរ បានធ្វើសន្និសីទសារព័ត៌មានដាច់ដោយឡែក។

ដើម្បីការពារសន្តិសុខ ក្រុមមន្ត្រីនៃប្រទេស ស្វីស បានហាមការហោះហើរនៅលើដែនអាកាស ក្បែរតំបន់ដែលមានជំនួបកំពូលនេះ និងដាក់ពង្រាយទាហាន និងប៉ូលិសចំនួន 3,000នាក់។ ឧទ្យាន La Grange និង Haut Vives ដែលនៅក្បែរនោះ ក៏ត្រូវបានរាំងខ្ទប់ដោយសំណាញ់ដែកបន្លាលួស ខណៈរថយន្តក៏ត្រូវបានហាមចតនៅជិតតំបន់នេះផងដែរ។

ក្រោយជំនួបនេះ ក្រុមអ្នកវិភាគយល់ថា លោក Biden បាន «ភ្ជង់មើមការ៉ុត» ដាក់លោក Putin នៅពេលជំនួបកំពូលនេះ ប្រព្រឹត្តទៅដោយការគោរពគ្នា។ ខណៈដែលភាគី រុស្ស៊ី បានប្រើប្រាស់ឱកាសនេះដើម្បីចៀសវាងធ្វើឱ្យទំនាក់ទំនងទ្វេភាគីកាន់តែអាក្រក់ជាងមុន ភាគី អាមេរិក ក៏បានឆ្លៀតយកឱកាសនេះដើម្បីដោះស្រាយបញ្ហាធំៗមួយចំនួនរបស់ពិភពលោក ហើយយ៉ាងហោចណាស់ក៏សម្រេចបានផលប្រយោជន៍រយៈពេលខ្លី។ នេះបើតាមសារព័ត៌មាន CNN ដកស្រង់មតិរបស់លោកស្រី Evelyn Farkas អតីតជំនួយការរង របស់រដ្ឋមន្ត្រីការបរទេស សហរដ្ឋអាមេរិក ទទួលបន្ទុកបញ្ហា រុស្ស៊ី, អ៊ុយក្រែន និងតំបន់អាស៊ី អឺរ៉ុប។

លោក Sean O’Keefe អតីតមន្ត្រីមួយរូប នៅក្នុងរដ្ឋការប្រធានាធិបតីអាមេរិក George H.W.Bush និង George W.Bush យល់ថា អ្វីដែលសំខាន់នៅក្នុងជំនួបនេះ នោះគឺ ភាគីទាំងពីរ ឆ្លៀតយកឱកាសនេះដើម្បីកាត់បន្ថយភាគតានតឹង។ «ប្រការនេះ បើកផ្លូវឱ្យមានការស្វែងរកចំណុចរួម និងប្រការដែលជួយឱ្យភាគីទាំងពីរ មានក្ដីសង្ឃឹម» លោក Sean O’Keefe បញ្ជាក់។

ទាំងលោក Putin ទាំងលោក Biden សុទ្ធតែមិនបានកំណត់គោលដៅធំដុំសម្រាប់ជំនួបកំពូលនេះ ប៉ុន្តែ មេដឹកនាំទាំងពីរ សុទ្ធតែសង្ឃឹមថា អាចបង្កើតបានឈ្នាន់ដើម្បីអភិវឌ្ឍទំនាក់ទំនងប្រកបដោយស្ថិរភាព៕

ប្រភព៖ CNN, Guardian
ប្រែសម្រួល៖ បុត្រា

June 17, 2021

រាប់ពាន់នាក់ សម្រុកមករកត្បូងពេជ្រនៅក្នុងភូមិមួយ នៃប្រទេស អាហ្វ្រិកខាងត្បូង បន្ទាប់ពីមានគេរកឃើញត្បូងមានតម្លៃ

កាលពីថ្ងៃទី14 មិថុនា មនុស្សប្រមាណជាង 1,000នាក់ បាននាំគ្នាសម្រុកទៅកាន់ភូមិ KwaHlathi ខេត្ត KwaZulu-Natal នៃប្រទេស អាហ្វ្រិកខាងត្បូង ដើម្បីរុករកថ្មមានតម្លៃ ក្រោយពីមានមុស្សបានរកឃើញដុំថ្មចម្លែក នៅក្នុងតំបន់នេះ។

សារព័ត៌មានអង់គ្លេស Reuters បានឱ្យដឹងថា ពលរដ្ឋស្ទើរគ្រប់តំបន់ នៃប្រទេសនេះ បានសម្រុកមកកាន់ភូមិខាងលើ ដោយសង្ឃឹមថា អាចជីក គាស់ រកឃើញពេជ្រ បន្ទាប់ពីមានបុរសម្នាក់បានរកឃើញត្បូងមានតម្លៃនៅលើដីវាលមួយកន្លែងរបស់ភូមិ។ មនុស្សជាច្រើនជឿថា នោះគឺជាត្បូង quartz។

បុរសវ័យ 27ឆ្នាំ ម្នាក់ ឈ្មោះ Mendo Sabelo ដែលគាស់បានត្បូងជាច្រើនគ្រាប់ បាននិយាយថា នេះគឺជាកត្តាដែលនឹងប្ដូរផ្លាស់ជីវិតរបស់គាត់។ «ពេលទៅដល់ផ្ទះ គ្រួសារខ្ញុំប្រាកដជាសប្បាយចិត្តខ្លាំងណាស់»។

Skhumbuzo Mbhele ជាពលរដ្ឋម្នាក់ ដែលកំពុងគ្មានការងារធ្វើ ក៏យល់ស្របជាមួយនឹង Sabelo ៖ «ខ្ញុំមិនដែលបានឃើញ ឬប៉ះពាល់ត្បូងពេជ្រទាល់តែសោះ ក្នុងជីវិត។ នេះជាលើកទីមួយហើយ ដែលខ្ញុំបានប៉ះវា»។

ក្រសួងគ្រប់គ្រងរ៉ែ របស់ ប្រទេស អាហ្វ្រិកខាងត្បូង កាលពីថ្ងៃទី14 មិថុនា ឱ្យដឹងថា ក្រសួងបានបញ្ជូនអ្នកជំនាញមួយក្រុម ទៅកាន់តែតាំងកើតហេតុ ដើម្បីយកសំណាកថ្ម មកធ្វើការពិសោធ។ ក្រសួងនេះបានបញ្ជាក់ថា នឹងចេញរបាយការណ៍ផ្លូវការអំពីត្បូងចម្លែកទាំងនេះ នាពេលដ៏ខ្លីខាងមុខ។

បើទោះជាមិនទាន់មានរបាយការណ៍ច្បាស់លាស់អំពីដុំថ្មទាំងនេះថាជា ត្បូងមានតម្លៃ ឬអត់ ប៉ុន្តែ មនុស្សរាប់ពាន់នាក់ បាន និងកំពុងនាំគ្នាមកស្វែងរកថ្មចម្លែកនេះ។ ម្នាក់ៗ សុទ្ធតែសង្ឃឹមថា នឹងមានសំណាងរកឃើញត្បូងមួយគ្រាប់នឹងគេ។

មនុស្សមួយចំនួន បានដាក់លក់ត្បូងចម្លែក ក្នុងតម្លៃចាប់ពី 7ដុល្លារអាមេរិក រហូតដល់ជាង 20ដុល្លារ ក្នុង1គ្រាប់តូច។

Fortune seekers are seen flocking to the village after pictures and videos were shared on social media showing people celebrating after finding what they believe to be diamonds, in the village of KwaHlathi outside Ladysmith, in KwaZulu-Natal province, South Africa, June 14, 2021. REUTERS/Siphiwe Sibeko

អាជ្ញាធរបានស្នើឱ្យគ្រប់គ្នា ចាកចេញពីទីតាំងនេះ ដើម្បីទុកឱ្យសមត្ថកិច្ចធ្វើការពិនិត្យ និងវិភាគ ខណៈដែលមានការព្រួយបារម្ភថា ការឆ្លងរាលដាលនៃវីរុសCovid-19 អាចកើនឡើងនៅពេលដែលមនុស្សម្នាប្រមូលផ្ដុំគ្នាច្រើនដូច្នេះ៕

June 16, 2021

ចិនបញ្ជូនក្រុមអវកាសចរដំបូង ឡើងទៅកាន់ស្ថានីយអវកាសថ្មី នៅក្នុងសប្ដាហ៍នេះ

ទីភ្នាក់ងារអវកាស ចិន បានឱ្យដឹងថា ប្រទេសនេះនឹងនាំអ្នកអវកាសដំបូងចំនួន 3នាក់ ឡើងទៅកាន់បន្ទប់ស្នូលរបស់ស្ថានីយអវកាសថ្មី នៅថ្ងៃទី17 ខែមិថុនា ឆ្នាំ2021។

លោក Ji Qiming ជំនួយការប្រធាននៃទីភ្នាក់ងារអវកាសចិន និយាយកាលពីថ្ងៃទី15 មិថុនាថា 2នាក់ ក្នុងចំណោមអវកាសចរចំនួន 3នាក់ខាងលើ ធ្លាប់បានចូលរួមក្នុងបេសកកម្មអវកាសមុនៗមកហើយ។ នេះបើតាមសារព័ត៌មានអាមេរិក AP។

អវកាសចរទាំង 3រូបនេះ នឹងត្រូវបានបញ្ជូនឡើងទៅកាន់គន្លងគោចរ ដោយយានអវកាស Shenzhou 12 ដែលរុញច្រានដោយរ៉ុក្កែត Long March-2F Y12។

អវកាសចរចិន ដែលនឹងត្រូវឡើងទៅកាន់ស្ថានីយអវកាសថ្មី

តាមគម្រោង អ្នកអវកាសទាំង 3រូបនេះ នឹងត្រូវស្នាក់នៅរយៈពេល 3ខែ នៅក្នុងបន្ទប់ស្នូលរបស់ស្ថានីយអវកាសចិន Tianhe ដែលត្រូវបានបាញ់បង្ហោះឡើងទៅកាន់គន្លងគោចរ កាលពីថ្ងៃទី29 ខែមេសា ឆ្នាំ2021។ ពួកគេនឹងមានបេសកកម្ម ដើរនៅក្នុងទីអវកាស និងចូលរួមធ្វើការពិសោធវិទ្យាសាស្ត្រនានាផងដែរ។

នេះគឺជាបេសកកម្មទី3 ក្នុងចំណោម 11 ដែលទីភ្នាក់ងារអវកាសចិន ត្រូវសម្រេចឱ្យបានមុនចុងឆ្នាំនេះ ដើម្បីសាងសង់ស្ថានីយអវកាសថ្មីរបស់ខ្លួន។ បន្ទប់ស្នូលចំនួន2 ទៀត នៃស្ថានីយអវកាសនេះ នឹងត្រូវបាញ់ឡើងជាបន្តបន្ទាប់នៅឆ្នាំក្រោយ។ ជាសរុប ប្រទេសចិន បានបញ្ជូនអវកាសចរចំនួន 11នាក់ ឡើងទៅកាន់ទីអវកាស រាប់ចាប់ពីឆ្នាំ2003។

យានអវកាស Shenzhou 12 នឹងត្រូវរុញច្រានដោយរ៉ុក្កែត Long March-2F Y12

ក្រុមអវកាសចរ និងក្រុមអ្នកវិទ្យាសាស្ត្របរទេស គ្រោងនឹងទៅធ្វើទស្សនកិច្ចស្ថានីយអវកាសរបស់ចិននេះ នៅក្នុងពេលអនាគត។ យោងតាមរបាយការណ៍នានា ស្ថានីយអវកាសរបស់ចិន នឹងមានអាយុកាលឡើងដល់ 15ឆ្នាំ៕

ប្រភព៖ Guardian, Globeandmail
ប្រែសម្រួល៖ បុត្រា

June 16, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី16 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី16 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 693នាក់, អ្នកជាចំនួន 754នាក់ និងអ្នកស្លាប់ថ្មីចំនួន 7នាក់បន្ថែមទៀត នៅក្នុងថ្ងៃទី15 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 40,157នាក់ ក្នុងនោះមាន 368នាក់បានបាត់បង់ជីវិត,

34,325នាក់បានជា និងប្រមាណជា 5,500នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 177,414,471នាក់ត្រូវបានរកឃើញ ក្នុងនោះមាន 161,859,168នាក់បានជា, 3,838,506នាក់បានស្លាប់ និង 11,716,797នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 16, 2021

អតីតភរិយារបស់មហាសេដ្ឋី Jeff Bezos បរិច្ចាគប្រាក់ 2.7ពាន់លានដុល្លារ សម្រាប់សកម្មភាពមនុស្សធម៌

អ្នកស្រី MacKenzie Scott អតីតភរិយារបស់ស្ថាបនិកក្រុមហ៊ុន Amazon លោក Jeff Bezos ប្រកាសថា បរិច្ចាគប្រាក់ជាង 2.7ពាន់លានដុល្លារអាមេរិក ជូនដល់អង្គការមនុស្សធម៌ចំនួន 286 នៅទូទាំងពិភពលោក។

អ្នកនិពន្ធ និងជាសប្បុរសជន ជនជាតិអាមេរិក អ្នកស្រី MacKenzie Scott កាលពីថ្ងៃទី15 ខែមិថុនា បានប្រកាសអំពីរដូវកាលបែងចែកប្រាក់សម្រាប់សកម្មភាពមនុស្សធម៌ថ្មីបំផុត នៅក្នុងចំណោមទ្រព្យសរុប 57ពាន់លានដុល្លាររបស់ខ្លួន។

«ខ្ញុំចង់បន្ទាបសំឡេងផ្ដាច់មុខ ដោយទុកចំណាប់អារម្មណ៍សម្រាប់បុគ្គលដទៃ ប៉ុន្តែ ខ្ញុំដឹងថា សារព័ត៌មាននានា នឹងផ្ដោតទៅលើភាពមានបាន។ ប្រធានបទដែលខ្ញុំដាក់ឈ្មោះឱ្យអត្ថបទបង្ហោះនាពេលនេះ នោះគឺ “អង្គការមនុស្សធម៌ចំនួន 286ក្រុម ជាអ្នកបញ្ជូនថាមពល ដែលពិភពលោក ត្រូវការស្ដាប់”»។

អ្នកស្រី MacKenzie Scott វ័យ 51ឆ្នាំ បានឱ្យដឹងថា «អង្គការមួយចំនួន មានឥទ្ធិពលខ្លាំងនៅក្នុងបញ្ជីឈ្មោះ រួមនឹងសហគមន៍ដែលខ្វះថវិកា និងក្រុមអង្គការដែលត្រូវបានរំលងចោលកន្លងមក» គឺស្ថិតក្នុងចំណោមអង្គការដែលទទួលបានប្រាក់ជំនួយ 2,729លានដុល្លារអាមេរិក នៅក្នុងលើកនេះ។

អ្នកស្រី MacKenzie Scott និងស្វាមីក្រោយ លោក Dan Jewett

ក្រុមអង្គការដែលទទួលបានប្រាក់ជំនួយខាងលើ រួមមាន ក្រុម និងអង្គការសិល្បៈមូលដ្ឋាន និងបណ្ដាក្រុមសកម្មជនក្នុងវិស័យអប់រំផងដែរ។

នេះគឺជាលើកទីបីហើយដែលអ្នកស្រី Scott លើកឡើងអំពីសកម្មភាពមនុស្សធម៌របស់ខ្លួន។ ឆ្នាំ2020 អ្នកស្រី Scott បានធ្វើឱ្យមានការភ្ញាក់ផ្អើលជាខ្លាំង នៅពេលប្រកាសអំពីគម្រោងមនុស្សធម៌ចំនួន 2លើក ដែលអ្នកស្រីបានបរិច្ចាគប្រាក់សុបចំនួន 6ពាន់លានដុល្លារ ដល់សកម្មភាពមនុស្សនានា រួមមានដូចជា ជំនួយសម្រាប់ដោះស្រាយបញ្ហា Covid-19 បញ្ហាសមភាពយេនឌ័រ និងបញ្ហាអប់រំ សម្រាប់ជនជាតិស្បែកខ្មៅជាដើម។

សូមរំលឹកថា អ្នកស្រី Scott និងមហាសេដ្ឋី Bezos បានលែងលះគ្នាកាលពីឆ្នាំ2019។ ក្រោយពីបានលែងលះ អ្នកស្រីទទួលបានទ្រព្យសរុប 57ពាន់លានដុល្លារ និងបានក្លាយជាអ្នកមានជាងគេលំដាប់ទី21 ក្នុងពិភពលោក។ អ្នកស្រីបានរៀបការជាមួយគ្រូបង្រៀនម្នាក់ ឈ្មោះ Dan Jewett កាលពីខែមីនា ឆ្នាំ2021៕

ប្រភព៖ Guardian
ប្រែសម្រួល៖ បុត្រា

June 16, 2021

អ៊ីស្រាអែល វាយប្រហារតំបន់ ហ្គាហ្សា ទៀតហើយ ដើម្បីសងសឹកចំពោះក្រុម ហាម៉ាស

កងទ័ព អ៊ីស្រាអែល បានវាយប្រហារលើទីតាំងកងទ័ពរបស់ ហាម៉ាស នៅតំបន់ ហ្គាហ្សា ក្រោយពីកងជីវពលនេះ បង្ហោះប៉ោងប៉ោងដែលភ្ជាប់ជាតិផ្ទុះ ចូលទឹកដីភាគខាងត្បូងរបស់ អ៊ីស្រាអែល។

នៅក្នុងសេចក្ដីប្រកាសនាថ្ងៃនេះ កងទ័ព អ៊ីស្រាអែល ឱ្យដឹងថា យន្តហោះរបស់ពួកគេ បានវាយប្រហារលើមូលដ្ឋានរបស់កងកម្លាំង ហាម៉ាស នៅទីក្រុង ហ្គាហ្សា និងទីរួមស្រុក Khan Younis នៅភាគខាងត្បូង។ ទន្ទឹមនឹងនេះ អ៊ីស្រាអែល ក៏បានប្រកាសថា បាន «ត្រៀមខ្លួនជាស្រេចសម្រាប់រាល់សេណារីយោ រួមទាំងកាលៈទេសៈនៃការប្រយុទ្ធគ្នាជាថ្មី ដើម្បីឆ្លើយតបនឹងអំពើភេរវកម្មពី ហ្គាហ្សា»។

កងទ័ព អ៊ីស្រាអែល បានបកស្រាយថា ការវាយប្រហារតាមអាកាសរបស់ខ្លួននេះគឺ ដើម្បីសងសឹកនឹងក្រុម ហាម៉ាស ដែលបានបង្ហោះប៉ោងប៉ោងដែលមានភ្ជាប់ជាតិផ្ទុះ ងាយឆេះ ចូលមកកាន់ទឹកដីភាគខាងត្បូងប្រទេសនេះ បង្កឱ្យកើតមានអគ្គិភ័យចំនួន 20ករណី នៅក្បែរបន្ទាត់ព្រំដែនជាមួយ ហ្គាហ្សា។

អ្នកនាំពាក្យម្នាក់របស់ ហាម៉ាស ជាក្រុមដែលកំពុងកាន់កាប់តំបន់ ហ្គាហ្សា បានទទួលស្គាល់ថា មានការវាយប្រហារតាមអាកាស ពីសំណាក់ អ៊ីស្រាអែល និងបានបន្ថែមថា ជនជាតិ ប៉ាលេស្ទីន នឹងបន្ត «ការប្រឆាំងប្រកបដោយភាពក្លាហាន និងការពារសិទ្ធិ ក៏ដូចជាទីតាំងពិសិដ្ឋ» នៅតំបន់ យេរូសាឡឹម។

ប៉ុន្មានម៉ោងមុនការវាយប្រហារតាមអាកាស ជនជាតិ អ៊ីស្រាអែល ដែលនាំគ្នាកាន់ទង់ជាតិ បានប្រមូលផ្ដុំគ្នានៅជុំវិញខ្លោងទ្វារ Damascus នាទីក្រុង យេរូសាឡឹម ដើម្បីហែក្បួនទៅកាន់ជញ្ជាំង Western Wall (Wailing Wall) ដែលជាទីសក្ការរបស់ជនជាតិជ្វីហ្វ នាំឱ្យជនជាតិ ប៉ាលេស្ទីន ខឹងខ្លាំង ហើយ ហាម៉ាស ក៏បានគំរាមសងសឹក។

សូមរំលឹកថា អ៊ីស្រាអែល ដណ្ដើមបានសិទ្ធិគ្រប់គ្រងតំបន់ យេរូសាឡឹមខាងកើត នៅក្នុងសង្គ្រាមឆ្នាំ 1967 ហើយក្រោយមកក៏បានប្រកាសបញ្ចូលតំបន់ដែលនៅសល់របស់ទីក្រុងនេះ និងចាត់ទុក យេរូសាឡឹម ជារដ្ឋធានី ប៉ុន្តែ មិនទាន់មានការទទួលស្គាល់ពីអន្តរជាតិនៅឡើយ។ ចំណែកជនជាតិ ប៉ាលេស្ទីន វិញ ចង់ឱ្យ យេរូសាឡឹមខាងកើត ក្លាយជារដ្ឋធានី នៃអនាគតប្រទេសរបស់ពួកគេ ជាទឹកដីដែលរួមមានទាំងតំបន់ វេសបែង និង ហ្គាហ្សា។

នេះគឺជាលើកដំបូង ដែល អ៊ីស្រាអែល បានវាយប្រហារតាមអាកាសលើតំបន់ ហ្គាហ្សា ចាប់តាំងពីសង្គ្រាម 11ថ្ងៃ រវាង អ៊ីស្រាអែល និង ហាម៉ាស កាលពីខែមុន ដែលបណ្ដាលឱ្យជនជាតិ ប៉ាលេស្ទីន ចំនួន 260នាក់ និងជនជាតិ អ៊ីស្រាអែល 13នាក់ បានស្លាប់។ សង្គ្រាម 11ថ្ងៃនោះ ក្រោយមកត្រូវបានបញ្ចប់កាលពីថ្ងៃទី21 ខែឧសភា ដោយមាន អេហ្សីប ជាអ្នកសម្របសម្រួល៕

ប្រភព៖ Reuters
ប្រែសម្រួល៖ បុត្រា

June 16, 2021

មហាសេដ្ឋី Elon Musk ជិតក្លាយជា «ជនគ្មានផ្ទះសំបែងផ្ទាល់ខ្លួន» ខណៈសម្រេចចិត្តដាក់លក់ផ្ទះចុងក្រោយ

រយៈពេលមួយសប្ដាហ៍ ក្រោយពីត្រូវបានចោទប្រកាន់ថា បង់ពន្ធតិចតួចអំឡុងប៉ុន្មានឆ្នាំកន្លង លោក Elon Musk បាននិយាយថា ខ្លួនកំពុងប្រកាសលក់ផ្ទះមួយខ្នងដែលនៅសល់ចុងក្រោយរបស់ខ្លួន ដែលប្រការនេះ នឹងធ្វើឱ្យលោក ក្លាយជាមហាសេដ្ឋីពិភពលោក ដែលមិនមានផ្ទះផ្ទាល់ខ្លួន សម្បីតែមួយខ្នង។

នាយកប្រតិបត្តិនៃក្រុមហ៊ុនផលិតរថយន្តអគ្គិសនី Tesla លោក Elon Musk បានហៅផ្ទះចុងក្រោយដែលលោកកំពុងកាន់កាប់ នៅ San Francisco ក្នុងរដ្ឋ California ថាជា «ទីលំនៅពិសេស»។ កាលពីដើមខែនេះ លោក Musk បានឱ្យដឹងថា ផ្ទះមួយខ្នងនោះ ត្រូវបានដាក់ឱ្យជួលដើម្បីប្រារព្ធពិធីផ្សេង។ ដូច្នេះ បើសិនជាត្រូវបានលក់ ផ្ទះនោះនឹងមិនសូវបានប្រើប្រាស់។ យ៉ាងនេះហើយ ទើបលោកសង្ឃឹមថា នឹងមានគ្រួសារធំណាមួយមកទិញ។

យោងតាមសារព័ត៌មាន Bloomberg មហាសេដ្ឋី វ័យ 49ឆ្នាំរូបនេះ បានប្រកាសអំពីគម្រោងលក់ផ្ទះ និងទ្រព្យសម្បត្តិស្ទើរតែទាំងអស់របស់ខ្លួន កាលពីជាងមួយឆ្នាំមុន ដើម្បីជាការច្រានចោលការរិះគន់អំពីភាពមានបានរបស់លោក។ ឆ្នាំ2020 គ្រាន់តែក្នុងរយៈពេលប៉ុន្មានថ្ងៃប៉ុណ្ណោះ លោក Musk បានប្រកាសលក់អចលនទ្រព្យចំនួន 2 កន្លែងរបស់ខ្លួន នៅ California។

កាលពីសប្ដាហ៍មុន ProPublica បានរាយការណ៍ថា កំពូលមហាសេដ្ឋីជាច្រើនរូប នៅ សហរដ្ឋអាមេរិក បង់ពន្ធលើប្រាក់ចំណូល តិចតួចណាស់ ក្នុងអំឡុងចាប់ពីឆ្នាំ2014-2018។ ក្នុងនោះ នាយកប្រតិបត្តិរបស់ Tesla និង SpaceX លោក Elon Musk ត្រូវបានគេរិះគន់ថា មិនបានបង់ពន្ធលើប្រាក់ចំណូល នៅក្នុងឆ្នាំ2018 និងបានបង់តិចជាង 70,000ដុល្លារ នៅក្នុងឆ្នាំ2015 និង 2017។

លោក Elon Musk លក់ផ្ទះចុងក្រោយរបស់ខ្លួន ដែលស្ថិតនៅក្នុងទីក្រុង San Francisco ក្នុងតម្លៃ 37.5 លានដុល្លារអាមេរិក (nypost)

លោក Musk ក៏មិនបានប្រតិកម្មអ្វីចំពោះបញ្ហាចោទប្រកាន់ដែលត្រូវបាន ProPublica លើកឡើង ប៉ុន្តែ គ្រាន់តែដាក់ជាសញ្ញាសួរ។ យ៉ាងនេះក្ដី ក្រោយពីមានសេចក្ដីរាយការណ៍ខាងលើ មហាសេដ្ឋីអាមេរិកាំង ដើមកំណើតអាហ្វ្រិកខាងត្បូង រូបនេះ បានឱ្យដឹងថា នឹងបន្តបង់ពន្ធលើប្រាក់ចំណូល នៅ California ទៅតាមពេលវេលាដែលលោកស្ថិតនៅក្នុងរដ្ឋនេះ។

កន្លងមក លោក Elon Musk ធ្លាប់បាននិយាយច្រើនដងហើយថា លោកមានគម្រោងលក់ទ្រព្យសម្បត្តិភាគច្រើនរបស់ខ្លួន ក្នុងនោះ មានទាំងគេហដ្ឋានទាំងឡាយរបស់លោក ដើម្បីយកប្រាក់មកផ្គត់ផ្គង់គម្រោងនាំមនុស្សទៅរស់នៅលើពិភពព្រះអង្គារ។ លោក Musk មានបំណងបញ្ជូនមនុស្ស 1លាននាក់ ឡើងទៅកាន់ផ្កាយអង្គារ នៅឆ្នាំ2050។

ស្ថាបនិកនៃក្រុមហ៊ុនអវកាស SpaceX រូបនេះ បានរើទៅរស់នៅក្នុងរដ្ឋ Texas កាលពីឆ្នាំមុន និងកំពុងជួលផ្ទះមួយខ្នងដែលមានតម្លៃត្រឹម 50,000ដុល្លារ ស្ថិតនៅក្នុងតំបន់ Boca Chica ពី Space Exploration Technologies ជាក្រុមហ៊ុនដែលមានវាលបាញ់បង្ហោះរ៉ុក្កែតអវកាស នៅក្នុងរដ្ឋនេះ៕

ប្រភព៖ Bloomberg, Insider
ប្រែសម្រួល៖ បុត្រា

June 15, 2021

Author: សឿន សំណាង