Author: សឿន សំណាង

ប្រធានាធិបតី ហៃទី ត្រូវគេធ្វើឃាត! អ្នកត្រូវស្នងតំណែង ក៏បានស្លាប់ដោយសារ Covid-19
ប្រធានតុលាការកំពូលរបស់ប្រទេស ហៃទី នឹងត្រូវឡើងកាន់តំណែងជាប្រធានាធិបតី ជំនួសលោក Moise ដែលទើបត្រូវបានគេធ្វើឃាត ប៉ុន្តែមន្ត្រីរូបនេះ បានទទួលមរណភាពរួចហើយ ដោយសារតែឆ្លង Covid-19។
ប្រធានតុលាការកំពូលរបស់ប្រទេស ហៃទី លោក Haiti René Sylvestre បានស្លាប់ដោយសារ Covid-19 កាលពីថ្ងៃទី 23 ខែឧសភា ឆ្នាំ 2021។
យោងតាមរដ្ឋធម្មនុញរបស់ ហៃទី ប្រធានតុលាការកំពូល នឹងឡើងកាន់តំណែងប្រធានាធិបតី នៅក្នុងករណីចាំបាច់បន្ទាន់។ Jean Wilner Morin ប្រធានសមាគមជាតិចៅក្រមរបស់ ហៃទី បានឱ្យដឹងថា បច្ចុប្បន្ន មិនទាន់ដឹងច្បាស់ថា អ្នកណានឹងត្រូវឡើងកាន់តំណែងជំនួសប្រធានាធិបតី Jovenel Moise ដែលទើបត្រូវបានគេធ្វើឃាតកាលពីព្រឹក ថ្ងៃទី 7 ខែកក្កដា នៅឡើយ។
លោក Morin និយាយថា នាយករដ្ឋមន្ត្រីបណ្ដោះអាសន្ន Claude Joseph ត្រូវការសភាអនុម័ត ទើបអាចឡើងកាន់តំណែងប្រធានាធិបតីបាន។ ប៉ុន្តែដោយសារតែមិនមានការបោះឆ្នោតនាពេលកន្លង សភាប្រទេសនេះ លែងនៅជាធរមានទៀតហើយ «ដូច្នេះ បើផ្អែកតាមរដ្ឋធម្មនុញ គាត់មិនអាចជំនួសប្រធានាធិបតី» បានឡើយ។
Morin បានឱ្យដឹងថា មានករណីផ្សេងមួយ កាលពីឆ្នាំ 2015 នៅពេលប្រធានសភា ក្លាយជាប្រធានាធិបតី។ ប៉ុន្តែ បច្ចុប្បន្ន ពុំមានអ្នកណាកាន់កាប់តួនាទីនេះ។ Morin មានយោបល់ថា 1/3 នៃសមាជិកសភាជាន់ខ្ពស់ នៅតែមានសុពលភាព ដូច្នេះ ប្រធានសភាពជាន់ខ្ពស់ Joseph Lambert អាចជាជម្រើសមួយ។
សូមរំលឹកថា ប្រធានាធិបតី ហៃទី លោក Jovenel Moise អាយុ 53 ឆ្នាំ ត្រូវបានខ្មាន់កាំភ្លើងមួយក្រុម លួចធ្វើឃាតនៅឯផ្ទះរបស់លោក ស្ថិតក្នុងរដ្ឋធានីPort-au-Prince។ ភរិយារបស់លោក គឺ លោកស្រី Martine Moise កំពុងស្ថិតក្នុងស្ថានភាពគ្រោះថ្នាក់ដល់ជីវិត និងត្រូវបានបញ្ជូនទៅកាន់ សហរដ្ឋអាមេរិក ដើម្បីព្យបាលរបួស។
អនុរដ្ឋមន្ត្រីសារព័ត៌មាន Frantz Exantus បានប្រកាសថា ក្រុមឃាតករដែលបានបាញ់សម្លាប់ប្រធានាធិបតី ត្រូវបានចាប់ខ្លួនរួចហើយ។ ឯកអគ្គរដ្ឋទូត ហៃទី ប្រចាំ សហរដ្ឋអាមេរិក Bocchit Edmond បានឱ្យដឹងថា ឃាតករទាំងនេះ គឺជា ទាហានស៊ីឈ្នួល ដែលបន្លំខ្លួនជាកងកម្លាំងពិសេសរបស់អាមេរិក៕
ប្រភព៖ CNN
ប្រែសម្រួល៖ បុត្រា
July 8, 2021
នាវាផ្ទុកយន្តហោះចម្បាំងទីបីរបស់ ចិន ស្ថិតក្នុងដំណាក់កាលដំឡើងបញ្ជាការដ្ឋាន
នាវាផ្ទុកយន្តហោះ Type-003 កំពុងត្រូវបានដំឡើងទីបញ្ជាការ ហើយវាមានទំហំតូចជាងបន្តិច បើធៀបនឹងនាវាផ្ទុកយន្តហោះចម្បាំងថ្នាក់ Ford របស់ សហរដ្ឋអាមេរិក។
រូបថតស្ដីអំពី Type-003 របស់ប្រទេសចិន នៅក្នុងរោងចក្រ Jiangnan Shipyard ដែលត្រូវបានបង្ហោះលើបណ្ដាញសង្គមកាលពីថ្ងៃទី 6 កក្កដា បង្ហាញថា នាវាផ្ទុកយន្តហោះចម្បាំងនេះ កំពុងត្រូវបានដំឡើងបញ្ជាការដ្ឋាន។ Type-003 គឺជានាវាផ្ទុកយន្តហោះចម្បាំងធំជាងគេលំដាប់ទីពីរក្នុងពិភពលោក បន្ទាប់ពី Ford របស់កងទ័ពជើងទឹក សហរដ្ឋអាមេរិក។
រូបភាពដែលថតបានដោយផ្កាយរណប Kompsat កាលពីថ្ងៃទី 22 ខែមិថុនា បង្ហាញថា Type-003 មានបណ្ដោយប្រវែងប្រហែល 320 ម៉ែត្រ ខ្លីជាង 13 ម៉ែត្រ ធៀបនឹងនាវាថ្នាក់ Ford របស់ អាមេរិក។
ទីលានសម្រាប់យន្តហោះចុះចតនៅលើ Type-003 មានទទឹងប្រហែល 73 ម៉ែត្រ ខ្លីជាងនាវាថ្នាក់ Ford និងប្រហាក់ប្រហែលនឹងនាវា Liaoning និង Shandong របស់ចិន។
តាមផែនការ Type-003 នឹងត្រូវបានបំពាក់ប្រព័ន្ធម៉ាស៊ីនបាញ់បង្ហោះ (EMALS) ដែលអនុញ្ញាតឱ្យយន្តហោះចម្បាំងដែលហោះចេញពីនាវានេះ នាំយកអាវុធ និងឥន្ធនៈច្រើនជាងការប្រើប្រាស់ស្ពានសម្រាប់ហោះឡើងដូចនៅលើនាវា Liaoning និង Shandong។ Type-003 នឹងមានប្រព័ន្ធ EMALS ចំនួនពីរនៅផ្នែកខាងមុខ និងមួយទៀតនៅកណ្ដាលនាវា ដែលចំនួននេះ តិចជាងមួយប្រព័ន្ធ បើធៀបនឹងនាវាថ្នាក់ Ford និង Nimitz។
ផ្ទៃក្រឡានៃទីលានចុះចតរបស់នាវាផ្ទុកយន្តហោះ Type-003 ប្រហាក់ប្រហែលនឹង 19,500 ម៉ែត្រការ៉េ ធំជាងបន្តិច ធៀបនឹងប្រព័ន្ធរបស់ Ford នៃសហរដ្ឋអាមេរិក។
បញ្ជាការដ្ឋានរបស់ Type-003 ទំនងជាទាបជាងបន្តិច បើធៀបនឹងនាវា Liaoning និង Shandong។ ទីបញ្ជាការរបស់ Type-003 ត្រូវបានដាក់នៅកណ្ដាលនាវា ខុសពីនាវាផ្ទុកយន្តហោះថ្នាក់ Ford ដែលត្រូវបានដាក់នៅផ្នែកខាងក្រោយបន្តិច៕
ប្រភព៖ Naval News
ប្រែសម្រួល៖ បុត្រា
July 7, 2021
ម៉ាស៊ីនបង្កើតចង្វាក់បេះដូងដំបូងគេ ដែលអាចរំលាយខ្លួនឯងក្នុងរាងកាយមនុស្ស ដោយប្រើពេលខ្លីបំផុត
ក្រុមអ្នកវិទ្យាសាស្ត្រ អភិវឌ្ឍម៉ាស៊ីនបង្កើតចង្វាក់បេះដូងមួយប្រភេទ សម្រាប់ប្រើប្រាស់ក្នុងរយៈពេលខ្លី ដោយវាអាចរំលាយខ្លួនឯង ក្រោយរយៈពេលចាប់ពី 5 ដល់ 7 សប្ដាហ៍។
ម៉ាស៊ីនខាងលើនេះ ត្រូវបានអភិវឌ្ឍដោយក្រុមអ្នកឯកទេស ប្រចាំសាកលវិទ្យាល័យ Northwestern និង សាកលវិទ្យាល័យ George Washington នៃ សហរដ្ឋអាមេរិក។
ការសិក្សាស្រាវជ្រាវថ្មីនេះ ត្រូវបានចុះផ្សាយនៅលើទស្សនាវដ្ដី Nature Biotechnology កាលពីថ្ងៃទី 28 ខែមិថុនា ឆ្នាំ 2021។
ក្រុមអ្នកស្រាវជ្រាវ ឱ្យដឹងថា នេះគឺជាម៉ាស៊ីនបង្កើតចង្វាក់បេះដូងប្រើប្រាស់បណ្ដោះអាសន្នរយៈពេលខ្លី និងរលាយដោយឯកឯងដំបូងគេក្នុងពិភពលោក។ ម៉ាស៊ីននេះ ប្រើសម្រាប់អ្នកជំងឺដែលត្រូវការចង្វាក់បេះដូងសិប្បនិម្មិត ក្នុងរយៈពេលខ្លី។
ឧបករណ៍នេះ មានរូបរាងស្ដើងខ្លាំង ស្រាលខ្លាំង និងមិនមានខ្សែតភ្ជាប់ ឬថ្ម។ គ្រឿងម៉ាស៊ីនរបស់វា អាចរលាយដោយឯកឯង ក្នុងរយៈពេលពី 5-7 សប្ដាហ៍។
ម៉ាស៊ីននេះ ដំណើរការដោយថាមពលដែលបញ្ជូនពីអង់តែនមួយដែលនៅឆ្ងាយ និងប្រើបច្ចេកវិទ្យាដូចទៅនឹងការទូទាត់ប្រាក់ តាមរយៈទូរស័ព្ទឆ្លាតវៃ។ ប្រការនេះមានន័យថា ម៉ាស៊ីននេះមិនត្រូវការថ្ម និងផ្នែករឹង ដូចជាខ្សែកាប ឬសំណជាដើម។ ដូច្នេះ វាមិនបង្កហានិភ័យដល់រាងកាយ ឬសុខភាពរបស់អ្នកជំងឺ៕
ប្រភព៖ Mashable
ប្រែសម្រួល៖ បុត្រា
July 7, 2021
Barcelona ប្រកាសថា Messi នឹងនៅបន្តជាមួយខ្លួន
ក្លិបបាល់ទាត់ Barcelona បានផុតកុងត្រាជាមួយនឹងកីឡាករខ្សែប្រយុទ្ធជួរមុខរបស់ខ្លួន Lionel Messi ហើយ កាលពីថ្ងៃទី ០១ ខែកក្កដា ឆ្នាំ ២០២១ កន្លងទៅនេះ ។ ថ្វីបើកុងត្រាចាស់ផុតក៏ពិតមែន ក៏ប៉ុន្តែកីឡាកររូបនេះ មិនទាន់ចុះហត្ថលេខាលើកុងត្រាថ្មីរបស់គេនៅឡើយទេ ។
ទាក់ទងនឹងបញ្ហានេះ ប្រធានក្លិប FC Barcelona បានចេញមុខបកស្រាយ ថាក្លិប និង Messi កំពុងដំណើរការរឿងនេះហើយ គ្រាន់តែមិនទាន់សម្រេចជាផ្លូវការ ។ លោកបានបន្តថា Messi នឹងមិនទៅណាឡើយ តែគ្រាន់តែវាមិនទាន់អាចប្រកាសជាផ្លូវការបាន ។ លោកក៏បានអំពាវនាវទៅដល់អ្នកគាំទ្រក្លិប និង កីឡាកររូបនេះថា សូមកុំភ័យថាក្លិបនឹងបាត់បង់ Messi ។
Lionel Messi គឺជាកីឡាករលេងបានយូរបំផុតរបស់ក្លិប Barcelona ដែលកំពុងតែលេងឱ្យក្លិបមួយនេះ ដោយគេបានចូលមកលេងនៅទីនេះតាំងពីឆ្នាំ ២០០០ ដែលគិតមកដល់ពេលនេះ គឺមានរយៈពេល ២១ ឆ្នាំពេញហើយ ៕
ប្រភព ៖ dailymail
July 7, 2021
ស្ថានភាព Covid-19 នៅ កម្ពុជា និងពិភពលោក គិតត្រឹមល្ងាចថ្ងៃទី 7 កក្កដា 2021
ក្រសួងសុខាភិបាល នាថ្ងៃទី 7 កក្កដា ឆ្នាំ 2021 នេះ បានឱ្យដឹងថា «អ្នកបានឆ្លងវីរុសCovid-19 សរុប នៅ កម្ពុជា បានកើនដល់ជាង 57,000 នាក់» ក្នុងពេលដែលតួលេខនេះ បានកើនដល់ជាង 185,393,000 នាក់ នៅទូទាំងសកលលោក។
មកដល់បច្ចុប្បន្ន កម្ពុជា បានរកឃើញអ្នកឆ្លងវីរុសសរុបចំនួន 57,103 នាក់ ក្នុងនោះមានអ្នកស្លាប់សរុប 798 នាក់, អ្នកជាសះស្បើយសរុប 48,974 នាក់។ ក្នុងថ្ងៃទី 6 កក្កដា មានអ្នកជំងឺថ្មីចំនួន 981 នាក់ និង អ្នកស្លាប់ថ្មីចំនួន 19 នាក់។ ក្នុងចំណោមអ្នកវិជ្ជមានសរុប មានអ្នកជំងឺជិត 4,000 នាក់ ជាករណីនាំចូលពីបរទេស។
ដោយឡែក នៅទូទាំងសកលលោក បច្ចុប្បន្នបានរកឃើញអ្នកជំងឺCovid-19 សរុបចំនួន ជាង 185,393,000 នាក់, អ្នកស្លាប់ជាង 4,009,000 នាក់, អ្នកជាជិត 169,737,000 នាក់។ ក្នុងចំណោមអ្នកជំងឺសរុប មាន 11,647,503 នាក់ កំពុងប្រឈមនឹងគ្រោះថ្នាក់ដល់ជីវិត ព្រោះតែអាការធ្ងន់ធ្ងរ៕
ប្រភព៖ ក្រសួងសុខាភិបាល, Worldometers
ដកស្រង់ និងប្រែសម្រួល៖ បុត្រា
July 7, 2021
“អាណាចក្រពាណិជ្ជកម្ម” របស់មហាសេដ្ឋី Jeff Bezos
នៅពេល Jeff Bezos ចាកចេញពីតំណែង CEO កាលពីថ្ងៃទី 5 ខែកក្កដា ឆ្នាំ 2021 ក្រុមហ៊ុនយក្ស Amazon ដែលលោកបានកសាងឡើង កំពុងតែរីកមាឌលឿនជាងពេលណាៗទាំងអស់។
ក្នុងអំឡុង 27 ឆ្នាំ លោក Jeff Bezos បានប្រែក្លាយ Amazon ទៅជាក្រុមហ៊ុនដ៏ធំមួយក្នុងពិភពលោក ដែលមានអំណាច និងឥទ្ធិពលយ៉ាងសម្បើម នៅក្នុងវិស័យជាច្រើន។ ទ្រព្យសម្បត្តិរបស់ Jeff Bezos និងក្រុមហ៊ុន Amazon ក៏បានកើនឡើងយ៉ាងឆាប់រហ័សក្នុងរយៈពេលប៉ុន្មានឆ្នាំកន្លងទៅថ្មីៗនេះ។
ក្រៅពីការដណ្ដើមបានជោគជ័យក្នុងវិស័យពាណិជ្ជកម្មអនឡាយ ក្រុមហ៊ុន Amazon ក៏ទទួលបានជោគជ័យយ៉ាងត្រចះត្រចង់ក្នុងវិស័យជាច្រើនទៀត ក្នុងនោះមានដូចជាសេវាកម្ម កុំព្យូទ័រពពក (cloud computing) កម្សាន្ត និងសេវាផ្សាយពាណិជ្ជកម្ម។
ចាប់ពីថ្ងៃទី 5 ខែកក្កដា ឆ្នាំ 2021 ក្រោយពីបានប្រគល់តំណាង CEO ឱ្យ Andy Jassy ដើម្បីក្លាយជាប្រធានក្រុមហ៊ុន មហាសេដ្ឋី Jeff Bezos នឹងឈានចូលដល់ជីវភាពថ្មី ហើយលោកនឹងចំណាយពេលវេលាច្រើនជាងមុន ទៅលើកិច្ចការស្រាវជ្រាវអវកាស កិច្ចការមនុស្សធម៌ ទិញអចលនទ្រព្យ និងនាវាទេសចរណ៍។
ធ្វើជំនួញក្នុងវិស័យជាច្រើន
ក្រុមហ៊ុនស្រាវជ្រាវ eMarketer បានឱ្យដឹងថា Amazon គ្រប់គ្រងផ្នែកលក់រាយអនឡាញ ប្រមាណ 41% ក្នុងចំណោមផលិតផលលក់រាយតាមអនឡាញសរុបរបស់ សហរដ្ឋអាមេរិក។ ប៉ុន្តែ Amazon ក៏បាននាំមុខគេក្នុងវិស័យសេវាកម្មកុំព្យូទ័រពពក និងជា «មហាអំណាច» មួយក្នុងវិស័យផ្សាយពាណិជ្ជកម្ម ដែលប្រកួតប្រជែងនឹង Google និង Facebook ផងដែរ។ Amazon ក៏វាយលុកទៅក្នុងវិស័យផ្ដល់សេវាកម្មអនឡាញ និងផលិតផលឆ្លាតវៃ។
ការជ្រើសរើសបុគ្គលិក
Amazon បានជ្រើសរើសបុគ្គលិកបន្ថែម ជាង 500,000 នាក់ នៅជុំវិញពិភពលោក នាឆ្នាំ 2020 ហើយក្នុងឆ្នាំបន្តបន្ទាប់ទៀត ក្រុមហ៊ុននេះ អាចយកឈ្នះ Walmart ដើម្បីក្លាយជាអ្នកជ្រើសរើសបុគ្គលិកច្រើនជាងគេបង្អស់នៅ សហរដ្ឋអាមេរិក។
ដើមឆ្នាំ 2021 នេះ Amazon បានជ្រើសរើសបុគ្គលិកបន្ថែមជិត 4,000 នាក់ទៀត។ បច្ចុប្បន្ន ក្រុមហ៊ុននេះ មានបុគ្គលិកការិយាល័យចំនួនជាង 130,000នាក់ ក្នុងចំណោម 950,000 នាក់ របស់ខ្លួន ដែលកំពុងធ្វើការនៅ សហរដ្ឋអាមេរិក។
ជោគជ័យនៅ Hollywood
Amazon បានចាប់ផ្ដើមចូលប្រលូកក្នុងវិស័យឧស្សាហកម្មភាពយន្តកាលពីឆ្នាំ 2010 តាមរយៈ Amazon Studios។ បច្ចុប្បន្ន ពួកគេគឺជាផលិតកម្ម និងជាអ្នកផ្គត់ផ្គង់ភាពយន្តដែលមានឈ្មោះល្បីល្បាញ។ ខ្សែភាពយន្តរបស់ Amazon ដែលទទួលបានជោគជ័យច្រើនជាងគេ មានដូចជា រឿង “The Marvelous Mrs. Maisel”, “Manchester by the Sea” និង “Sound of Metal” ជាដើម។
គម្រោងវិនិយោគដទៃ
មហាសេដ្ឋី Bezos មានគម្រោងហោះទៅកាន់ទីអវកាស នៅថ្ងៃទី 20 ខែកក្កដា ខាងមុខ។ លោក ក៏នឹងផ្ដោតទៅលើកិច្ចការមនុស្សធម៌ អាកាសធាតុច្រើនជាងមុនផងដែរ។ លោក Bezos គឺជាមហាសេដ្ឋីលំដាប់ទីមួយក្នុងពិភពលោក ដោយមានទ្រព្យប្រមាណ 200 ពាន់លានដុល្លារអាមេរិក នេះបើតាម Bloomberg Billionaires Index៕
ប្រភព ៖ WSJ
ប្រែសម្រួល ៖ បុត្រា
July 7, 2021
Kylian Mbappe ប្រកាសដើរចេញពី PSG ហើយ
មកទល់ពេលនេះ ខ្សែប្រយុទ្ធ Kylian Mbappe បានប្រកាសថា គេលែងចង់លេងឱ្យក្លិបនៅក្នុងប្រទេសបារាំងទៀតហើយ។ កីឡាករដ៏ល្អ ដែលបានជួយឱ្យបារាំងឈ្នះពាន World Cup កាលពីឆ្នាំ2018 នេះ ថែមទាំងបាននិយាយផងដែរថា រូបគេមិនចង់បន្តកុងត្រាថ្មី ជាមួយ PSG ទៀតឡើយ។
ប៉ុន្តែ មកដល់ពេលនេះ PSG មិនទាន់សម្រេចចិត្តលក់ Mbappe នៅឡើយ ដោយសារតែក្លិបនេះ នឹងប្រថុយ ចំណាយពេល 6ខែ ទៅមុខទៀត ដើម្បីបន្តបញ្ចុះបញ្ចូល ឱ្យកីឡាកររូបនេះ ចុះកុងត្រាថ្មីបន្តទៀត។
កីឡាករ Kylian Mbappe បានរងសម្ពាធជាច្រើន ក្រោយពីមិនអាចជួយ ឱ្យក្រុមជម្រើសជាតិបារាំងឡើងទៅកាន់វគ្គ 8ក្រុមចុងក្រោយនៃពានរង្វាន់ Euro 2020 ក្រោយចាញ់បាល់ប៉េណាល់ទី ក្រុមស្វ៊ីស ខណៈដែល Mbappe គឺជាអ្នកដែលស៊ុតបាល់ចុងក្រោយ មិនចូល៕
July 7, 2021
ManU នាំយកខ្សែបម្រើចាស់វស្សាមកវិញ ក្រោយពីចាកចេញទៅ បានតែប៉ុន្មានថ្ងៃ
Juan Manuel Mata García កីឡាករខ្សែបម្រើប្រយុទ្ធរបស់ក្លិបបាល់ទាត់បិសាចក្រហម Manchester United ត្រូវបានក្លិបប្រកាសចុះកុងត្រាទទួលមកវិញ រយៈពេល 1រដូវកាល ពោលគឺនឹងគិតគូរកុងត្រាឡើងវិញ នៅខែមិថុនា ឆ្នាំ2022ខាងមុខ។
កីឡាកររូបនេះ ធ្លាប់ត្រូវបានក្លិប ManU ប្រកាសថា នឹងមិនបន្តកុងត្រាថ្មីទេ ក្រោយពីកុងត្រាចាស់ បានផុតកាលពីចុងខែមិថុនា ឆ្នាំ2021 ក្រោយពីលេងឱ្យក្លិបខ្លាំងរបស់អង់គ្លេសមួយនេះបាន 8រដូវកាល ដោយបានចូលលេង 189ប្រកួត នឹងរកបាន 34គ្រាប់។
អតីតកីឡាករជម្រើសជាតិអេស្ប៉ាញ Juan Mata រូបនេះ ធ្លាប់មានប្រវត្តិល្អមិនណយឡើយ ដោយធ្លាប់លេងឱ្យក្លិបខ្លាំងៗ នៅអេស្ប៉ាញដល់ទៅ 2ក្លិប គឺ Real Madrid Castilla និង Valencia មុននឹងត្រូវបាន Chelsea នាំមកអង់គ្លេសកាលពីឆ្នាំ2011 ហើយបន្តមក ManU នៅឆ្នាំ2014៕
July 7, 2021
ការសាកល្បងធ្វើការ តែ 4 ថ្ងៃ ក្នុង 1 សប្ដាហ៍ នៅ អ៊ីស្លង់ ទទួលបានជោគជ័យ!
ក្រុមអ្នកស្រាវជ្រាវបានបញ្ជាក់ថា «រូបមន្តធ្វើការ 4 ថ្ងៃ ក្នុង 1 សប្ដាហ៍ នៅប្រទេស អ៊ីស្លង់ ទទួលបាន «ជោគជ័យយ៉ាងត្រចះត្រចង់» ក្រោយការសាកល្បងរយៈពេល 4 ឆ្នាំ។
ការសិក្សាស្រាវជ្រាវរបស់ក្រុមអ្នកវិទ្យាសាស្ត្រនៃសមាគមដើម្បីប្រជាធិបតេយ្យប្រកបដោយនិរន្តរភាព (Association for Sustainability and Democracy / Alda) ប្រចាំប្រទេស អ៊ីស្លង់ និងអង្គការប្រឹក្សាគោលនយោបាយ Autonomy របស់ អង់គ្លេស នេះ ត្រូវបានធ្វើឡើងចាប់ពីឆ្នាំ 2015 ដល់ឆ្នាំ 2019។
កម្មវិធីសាកល្បងខាងលើ ត្រូវបានធ្វើឡើងចំពោះពលករ / កម្មករ ចំនួន 2.500 នាក់ ដែលប្រហាក់ប្រហែលនឹង 1% បើធៀបនឹងចំនួនប្រជាជនពេញវ័យសរុបនៅប្រទេស អ៊ីស្លង់។ ក្នុងកម្មវិធីនេះ ពលករត្រូវបានអនុញ្ញាតឱ្យធ្វើការតែ 4 ថ្ងៃប៉ុណ្ណោះ ក្នុង 1 សប្ដាហ៍ តែទទួលបានប្រាក់ខែពេញលេញដដែល។
នៅក្នុងសេចក្ដីប្រកាសកាលពីថ្ងៃទី 4 ខែកក្កដា Will Strong ដែលជានាយកផ្នែកស្រាវជ្រាវ របស់ Autonomy បានឱ្យដឹងថា ៖ «ការសិក្សាបានបង្ហាញថា វិស័យការងារសាធារណៈ (ការងាររដ្ឋ) មានលក្ខណៈសម្បត្តិគ្រប់គ្រាន់ ដែលអាចនាំមុខគេ នៅក្នុងការធ្វើការ 4 ថ្ងៃ ក្នុង 1 សប្ដាហ៍»។
ប្រទេស អ៊ីស្លង់
កម្លាំងពលកម្មដែលបានចូលរួមក្នុងការសាកល្បងខាងលើ ធ្វើការចាប់ពី 35 ដល់ 36 ម៉ោង ក្នុង 1 សប្ដាហ៍។ Alda បានអះអាងថា ជីវភាពរស់នៅរបស់ពលករ ត្រូវបានកែលម្អមួយភាគធំ នៅគ្រប់ស្ថានភាព រាប់ចាប់ពីការប្រឈមនឹងសម្ពាធនានា រហូតដល់សុខភាព ការហត់នឿយ និងតុល្យភាពរវាងការងារ និងជីវិតប្រចាំថ្ងៃ ខណៈដែលការងារដែលជាតួនាទីរបស់ពួកគេ នៅតែត្រូវបានធានាដដែល ហើយក៏មានការរីកចម្រើនខ្លាំងនៅក្នុងបរិស្ថាននៃការងារមួយចំនួនផងដែរ។
កម្មវិធីសាកល្បងដែលមានរយៈពេល 5 ឆ្នាំនេះ ត្រូវបានផ្ដួចផ្ដើមដោយក្រុមប្រឹក្សាភិបាលនៃទីក្រុង Reykjavik និងរដ្ឋាភិបាល អ៊ីស្លង់ បន្ទាប់ពីមានការអំពាវនាវពីសំណាក់ក្រុមសហជីព និងបណ្ដាអង្គការសង្គមស៊ីវិល។
របាយការណ៍របស់ Alda និង Autonomy បានរៀបរាប់ថា លទ្ធផលនៃការសិក្សាស្រាវជ្រាវរយៈពេលច្រើនឆ្នាំកន្លងទៅនេះ គឺជា «គំរូ» សម្រាប់ការសាកល្បងផ្សេងៗទៀតនាពេលខាងមុខ៕
ប្រភព ៖ CBS
ប្រែសម្រួល ៖ បុត្រា
July 7, 2021
បុគ្គល 10 រូប ដែលរកបានប្រាក់ច្រើនជាងគេបង្អស់ ពីការបង្ហោះសារនីមួយៗ នៅលើ Instagram
កំពូលកីឡាករបាល់ទាត់ Cristiano Ronaldo នាំមុខគេ ក្នុងបញ្ជីចំណាត់ថ្នាក់នេះ ដោយរកបាន 1.6 លាន ដុល្លារអាមេរិក សម្រាប់ការបង្ហោះសារ 1 អត្ថបទ លើទំព័រ Instagram របស់ខ្លួន។
1. Kendall Jenner
-ចំនួនអ្នកតាមដាន ៖ 172 លាននាក់
-តម្លៃសម្រាប់ 1 អត្ថបទ ៖ 1.05 លានដុល្លារអាមេរិក
Kendall Jenner ត្រូវបានគេចាត់ទុកថាជា តារាបង្ហាញម៉ូដ ដែលទទួលបានប្រាក់ឈ្នួលខ្ពស់ជាងគេបង្អស់ក្នុងពិភពលោក និងមានទ្រព្យប្រមាណ 45 លានដុល្លារអាមេរិក នាឆ្នាំ 2021។
1. Justin Bieber
-ចំនួនអ្នកតាមដាន ៖ 180 លាននាក់
-តម្លៃសម្រាប់ 1 អត្ថបទ ៖ 1.1 លានដុល្លារអាមេរិក
គិតត្រឹមឆ្នាំ 2021 តម្លៃទ្រព្យសុទ្ធរបស់តារាចម្រៀងរូបនេះ គឺប្រហែល 280 លានដុល្លារអាមេរិក។ Justin Bieber រកចំណូលបានពីតន្ត្រី ជំនួញ សកម្មភាពច្រៀងតាមកម្មវិធីតន្ត្រីទេសចរណ៍ និងអចលនទ្រព្យ។ Justin Bieber ទទួលបានការគាំទ្រច្រើនពី Walmart, Adidas និង Calvin Klein។
1. Beyoncé Knowles
-ចំនួនអ្នកតាមដាន ៖ 189 លាននាក់
-តម្លៃសម្រាប់ 1 អត្ថបទ ៖ 1.14 លានដុល្លារអាមេរិក
Beyoncé Knowles បានចុះកិច្ចព្រមព្រៀងជាមួយ Netflix សម្រាប់គម្រោងចំនួន 3 ដែលមានតម្លៃសរុប ប្រមាណ 60 លានដុល្លារ ក្នុងនោះក៏មានទាំង “Homecoming” ជាខ្សែភាពយន្តមួយដែលមានវត្តមានរបស់ Coachella ផងដែរ។
1. Lionel Messi
-ចំនួនអ្នកតាមដាន ៖ 224 លាននាក់
-តម្លៃសម្រាប់ 1 អត្ថបទ ៖ 1.16 លានដុល្លារអាមេរិក
ប្រាក់ចំណូលរបស់ Messi នៅលើបណ្ដាញសង្គម Instagram ភាគច្រើនបានមកពីការបង្ហោះអត្ថបទពាណិជ្ជកម្ម ឱ្យ Pepsi, Gillette និង Turkish Airlines។ គិតត្រឹមឆ្នាំ 2021 នេះ តម្លៃនៃទ្រព្យសុទ្ធរបស់កីឡាករបាល់ទាត់ Lionel Messi បានឡើងដល់ប្រហែល 400 លានដុល្លារអាមេរិក។
1. Kim Kardashian
-ចំនួនអ្នកតាមដាន ៖ 232 លាននាក់
-តម្លៃសម្រាប់ 1 អត្ថបទ ៖ 1.41 លានដុល្លារអាមេរិក
តារាសំដែង និងបង្ហាញម៉ូដ ជនជាតិអាមេរិកាំង នាង Kim Kardashian បច្ចុប្បន្ន មានទ្រព្យចំនួន 1 ពាន់លានដុល្លារអាមេរិក។ ការរកប្រាក់ពីបណ្ដាញសង្គម Instagram របស់នាង ភាគច្រើនបានមកពីការផ្សាយអត្ថបទពាណិជ្ជកម្មឱ្យក្រុមហ៊ុន KKW Beauty និង Skims។
1. Selena Gomez
-ចំនួនអ្នកតាមដាន ៖ 240 លាននាក់
-តម្លៃសម្រាប់ 1 អត្ថបទ ៖ 1.46 លានដុល្លារអាមេរិក
តារាចម្រៀងរូបនេះ បានចាប់ផ្ដើមអាជីពរបស់ខ្លួន ដោយការសំដែងនៅក្នុងខ្សែភាពយន្តទូរទស្សន៍សម្រាប់កុមារ “Barney & Friends”។ Selena Gomez ធ្លាប់មានវត្តមាននៅក្នុងតារាងចំណាត់ថ្នាក់ “30 Under 30” របស់ Forbes ផងដែរ កាលពីឆ្នាំ 2016។
1. Kylie Jenner
-ចំនួនអ្នកតាមដាន ៖ 244 លាននាក់
-តម្លៃសម្រាប់ 1 អត្ថបទ ៖ 1.49 លានដុល្លារអាមេរិក
Kylie Jenner ទំនងជាបានបាត់បង់តំណែងជា «មហាសេដ្ឋីវ័យក្មេងបំផុត» របស់ពិភពលោក ប៉ុន្តែ នាងនៅតែជាកំពូលអ្នករកលុយ នៅក្នុងវិស័យគ្រឿងសំអាង។
1. Ariana Grande
-ចំនួនអ្នកតាមដាន ៖ 247 លាននាក់
-តម្លៃសម្រាប់ 1 អត្ថបទ ៖ 1.51 លានដុល្លារអាមេរិក
ក្រៅពី Instagram នាង Ariana Grande ក៏មានអ្នកតាមដានប្រហែល 25 លាននាក់ នៅលើ TikTok, 80 លាននាក់នៅលើ Twitter និង 48 លាននាក់នៅលើ Youtube។ ចាប់ពីខែមិថុនា ឆ្នាំ 2019 ដល់ខែមិថុនា ឆ្នាំ 2020 នាង Ariana Grande រកបាន 70 លានដុល្លារ ពីសកម្មភាពផ្សេងៗរបស់ខ្លួន។
1. Dwayne Johnson
-ចំនួនអ្នកតាមដាន ៖ 250 លាននាក់
-តម្លៃសម្រាប់ 1 អត្ថបទ ៖ 1.52 លានដុល្លារអាមេរិក
Dwayne Johnson គឺជាសេដ្ឋីម្នាក់ដែលមានទ្រព្យប្រមាណ 400 លានដុល្លារអាមេរិក។ លោកគឺជាតារាសម្ដែងប្រុស ដែលទទួលបានប្រាក់ឈ្នួលខ្ពស់ជាងគេបំផុតក្នុងពិភពលោក និងរកបានជាង 100 លានដុល្លារ ជារៀងរាល់ឆ្នាំ ក្នុងអំឡុងប៉ុន្មានឆ្នាំចុងក្រោយនេះ។
1. Cristiano Ronaldo
-ចំនួនអ្នកតាមដាន ៖ 307លាននាក់
-តម្លៃសម្រាប់ 1 អត្ថបទ ៖ 1.6 លានដុល្លារអាមេរិក
កំពូលតារាបាល់ទាត់ Cristiano Ronaldo របស់ក្លឹប Juventus គឺជាអ្នកនាំមុខគេ នៅក្នុងបញ្ជីចំណាត់ថ្នាក់ “Instagram Rich List 2021” ដែលទើបត្រូវបាន Hopperhq ចេញផ្សាយកាលពីពេលថ្មីៗនេះ។ ដោយមានអ្នកតាមដានចំនួន 307 លាននាក់ នៅលើ Instagram លោក Cristiano Ronaldo រកបាន 1.6 លានដុល្លារអាមេរិក ពីការបង្ហោះសារពាណិជ្ជកម្ម 1 អត្ថបទ។ Cristiano Ronaldo គឺជាអ្នកដែលត្រូវបានតាមដានច្រើនជាងគេបង្អស់ នៅលើបណ្ដាញសង្គម Instagram និងជាកីឡាករបាល់ទាត់ដំបូងគេ ដែលឈរលើកំពូលតារាងចំណាត់ថ្នាក់ប្រចាំឆ្នាំរបស់ Instagram Rich List។ ជាសរុប នៅគ្រប់បណ្ដាញសង្គម លោក Cristiano Ronaldo មានអ្នកតាមដានជាង 550 លាននាក់៕
ប្រភព ៖ SCMP
ប្រែសម្រួល ៖ បុត្រា
July 6, 2021