សឿន សំណាង - La Reine Media

Vinícius Júnior ត្រូវ Real Madrid ដាក់ឱ្យគេខ្ចីជើង រដូវកាលថ្មី

ក្លិបបាល់ទាត់ Real Madrid បានប្រកាសដាក់កីឡាករខ្សែប្រយុទ្ធ សញ្ជាតិប្រេស៊ីល របស់ខ្លួន Vinícius Júnior ឱ្យក្លិបផ្សេងខ្ចីជើង សម្រាប់រដូវកាលថ្មី ២០២២ ខាងមុខនេះ ។ ដោយសារតែខ្សែប្រយុទ្ធរូបនេះ មិនទាន់ដល់កម្រិតដែលក្លិបយកមកប្រើការបាន ។

ក្រោយការប្រកាសនេះ ក្លិបបាល់ទាត់ Manchester United ដាក់ចំណាប់អារម្មណ៍ ដោយគ្រោងនឹងចរចារយកមក ហើយក៏ប្រកាសដែរថា អាចនឹងទិញផ្តាច់ក្រោយបញ្ចប់ការខ្ចីជើងនាចុងរដូវកាល ២០២០ ខាងមុខនេះទៀតផង ។

គួរឱ្យដឹងដែរថា Vinícius Júnior ជាខ្សែប្រយុទ្ធជម្រើសជាតិប្រេស៊ីល ដោយបានបង្ហាញខ្លួន បាន ៥ ប្រកួត ។ រូបគេនេះហើយ គឺជាខ្សែប្រយុទ្ធជម្រើសជាតិយុវជនប្រេស៊ីល ដោយធ្លាប់លើកពាន យុវជនលំដាប់ពិភពលោកជាច្រើនជាមួយនឹងជម្រើសជាតិប្រេស៊ីល ៕

July 20, 2021

Jeong Yeon (Twice) មិនទាន់មានរូបរាងដូចដើម ប៉ុន្តែ ទម្រង់មុខ នៅតែស្រស់ស្អាតលំដាប់កំពូល

សម្រស់ពោរពេញដោយភាពជាអ្នកសំដែងរបស់ Jeong Yeon នៅក្នុងវីដេអូ behind the scenes នៃសកម្មភាពថតរូបដាក់ទស្សនាវដ្ដី កាលពីពេលថ្មីៗនេះ បានទទួលការលើកសរសើរច្រើនពីសំណាក់អ្នកគាំទ្រ។

កាលពីថ្ងៃទី 19 កក្កដា Twice បានបង្ហោះវីដេអូ behind the scenes នៃការថតរូបដាក់ទស្សនាវដ្ដី Esquire Korea របស់ Jeong Yeon។ នេះគឺជាកម្រងរូបថតទស្សនាវដ្ដី ដែលបញ្ជាក់អំពីការវិលត្រលប់របស់ Jeong Yeon បន្ទាប់ពីបានសម្រាកព្យាបាលផ្លូវចិត្តមួយរយៈពេល។ ដូច្នេះ វាមានន័យខ្លាំងណាស់សម្រាប់តារាសិល្បៈរូបនេះ ក៏ដូចជាសម្រាប់អ្នកគាំទ្ររបស់នាង។

នៅក្នុងកម្រងរូបថតនេះ Jeong Yeon ទុកសក់ខ្លីប៉ប្រះស្មា លាបពណ៌យ៉ាងភ្លឺចាំងភ្នែក ស្លៀកពាក់ឈុតខោអាវប្រកបដោយភាពថ្នៃថ្នូរ និងទាន់សម័យ បង្អួតសម្រស់បែបនារីពេញវ័យ ដែលបញ្ជាក់បានអំពីសុខភាពមាំមួនឡើងវិញ ក្រោយបានផ្អាកសកម្មភាពសិល្បៈអស់មួយរយៈពេល ដើម្បីព្យាបាលជំងឺ។

បើទោះជាទម្រង់រាងកាយមិនទាន់ត្រលប់មកជាស្ដើងដូចមុនក៏ដោយ ប៉ុន្តែ Jeong Yeon នៅតែអាចធ្វើឱ្យសាធារណជនចាប់អារម្មណ៍ ខ្លាំង ព្រោះតែកាយវិការដូចទៅនឹងកំពូលតារាសំដែង ចំណែកផ្ទៃមុខក៏ស្រស់ត្រកាល មានមន្តស្នេហ៍។

Jeong Yeon ត្រូវបានវាយតម្លៃថា ជា តារាចម្រៀងមួយរូបនៅក្នុងចំណោមសមាជិកនៃក្រុមចម្រៀងស្រី Twice ដែលស័ក្ដិសមនឹងការថតរូបដាក់ទស្សនាវដ្ដីបំផុត។

កាលពីដើមឆ្នាំ 2021 Jeong Yeon បានចាប់ផ្ដើមបង្ហាញវត្តមានឡើងវិញជាមួយនឹងក្រុម Twice បន្ទាប់ពីបានព្យាបាលជំងឺអស់មួយរយៈទាក់ទងនឹងបញ្ហាផ្លូវចិត្ត។ រូបរាងរបស់នាងពេលនោះ «នៅមានសាច់ច្រើន» នៅឡើយ។

July 20, 2021

ចិន ទទួលជោគជ័យ ក្នុងការធ្វើតេស្តយន្តហោះអវកាស

ប្រទេសចិន បានបាញ់បង្ហោះសាកល្បង យានដែលហោះឡើង និងចុះចតត្រង់ និងអាចប្រើប្រាស់ឡើងវិញច្រើនដង កាលពីថ្ងៃទី 16 កក្កដា នៅឯសមុទ្រខ្សាច់ Gobi។

យន្តហោះសម្រាប់ហោះទៅក្បែរគន្លងគោចររបស់ផែនដី និងអាចប្រើប្រាស់ឡើងវិញបានច្រើនដង ត្រូវបានបាញ់បង្ហោះឡើង និងចុះចតត្រង់ ប្រកបដោយស្ថិរភាព នៅលើព្រលានយន្តហោះនៅឯទីរួមស្រុក Alashan Meng នៃតំបន់ស្វយ័តម៉ុងហ្គោលីក្នុង (Inner Mongolia Autonomous Region) នៅភាគខាងជើងប្រទេសចិន។ ការធ្វើតេស្តនេះ ស្ថិតក្នុងគម្រោងត្រួតពិនិត្យ និងទទួលស្គាល់បច្ចេកវិទ្យា និងជាការហោះហើរសាកល្បងដំបូងដែលទទួលបានជោគជ័យគ្រប់ជ្រុងជ្រោយ។ យន្តហោះនេះ ត្រូវបានបញ្ជាឱ្យហោះឡើងពីមជ្ឈមណ្ឌលបាញ់បង្ហោះផ្កាយរណប Jiuquan នៅលើសមុទ្រខ្សាច់ Gobi ភាគពាយព្យនៃប្រទេសចិន។

យានខាងលើត្រូវបានអភិវឌ្ឍដោយក្រុមហ៊ុនវិទ្យាសាស្ត្រនិងបច្ចេកវិទ្យាអាកាសចរណ៍អវកាសចិន (CASC)។ នេះគឺជាជោគជ័យដ៏សំខាន់នៅក្នុងការអភិវឌ្ឍយន្តហោះអវកាសល្បឿនលឿន ដែលអាចប្រើឡើងវិញច្រើនដង របស់ ចិន។

CASC បានប្រកាសគម្រោងអភិវឌ្ឍប្រព័ន្ធដឹកជញ្ជូនអវកាស ដែលអាចប្រើប្រាស់ឡើងវិញ កាលពីឆ្នាំមុន។ គម្រោងនេះ រួមមានទាំងការអភិវឌ្ឍយានដែលអាចហោះឡើង និងចុះចតដោយត្រង់ ដូចទៅនឹងយន្តហោះធម្មតា ប៉ុន្តែ អាចហោះទៅដល់គ្រប់ទីកន្លែងនៅលើផែនដី ដោយចំណាយពេលត្រឹមតែមួយម៉ោង ពោលគឺលឿនជាងល្បឿនសំឡេងរហូតដល់ 5 ដងឯណោះ។ បណ្ដាញយន្តហោះប្រភេទនេះ នឹងជួយកាត់បន្ថយការចំណាយបានយ៉ាងច្រើន បើធៀបនឹងរ៉ុក្កែតធម្មតា ព្រោះវាងាយស្រួលសម្រាប់ការថែទាំ និងចំណាយពេលតិចក្នុងការរៀបចំសម្រាប់ជើងហោះហើរនីមួយ។

កម្មវិធីរបស់ចិនខាងលើនេះ កំពុងឈានទៅរកការអភិវឌ្ឍដោយជោគជ័យ នូវយន្តហោះអវកាស នាឆ្នាំ 2045 ប៉ុន្តែ ដំណាក់កាលដំបូងនៃគម្រោងនេះគឺការអភិវឌ្ឍយានដែលអាចហោះឡើង និងចុះចតដោយត្រង់ ដំណើរការដោយពឹងលើរ៉ុក្កែត។

នៅក្នុងឆ្នាំ 2020 កន្លងទៅ ប្រទេសចិន ក៏បានប្រកាសថា បានទទួលជោគជ័យក្នុងការសាកល្បងយន្តហោះអវកាសមួយផ្សេងទៀត ដែលរុញច្រានដោយរ៉ុក្កែត និងបានហោះទៅក្នុងគន្លងតារាវិថីរយៈពេល 2 ថ្ងៃ ហើយក្រោយមកក៏បានត្រលប់មកកាន់ផែនដី។ យន្តហោះអវកាសនេះ ត្រូវបានគេយល់ឃើញថា មានចំណុចច្រើនដែលដូចទៅនឹង X-37B ជាយន្តហោះស្វ័យប្រវត្តិដែលហោះជុំវិញគន្លងគោចរផែនដី របស់ទ័ពអាកាស សហរដ្ឋអាមេរិក៕

ប្រភព៖ SCMP
ប្រែសម្រួល៖ បុត្រា

July 20, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 20 កក្កដា ឆ្នាំ 2021

ក្រសួងសុខាភិបាល បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 825 នាក់, អ្នកជាចំនួន 1,022 នាក់ និងអ្នកស្លាប់ចំនួន 21 នាក់បន្ថែមទៀត នៅក្នុងថ្ងៃទី 19 ខែកក្កដា ឆ្នាំ 2021។

គិតត្រឹមព្រឹក ថ្ងៃទី 20 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុបជិត 69,000 នាក់ ក្នុងនោះមាន អ្នកជាសះស្បើយជាង 61,000 នាក់ និង អ្នកស្លាប់ 1,149 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជិត 192 លាននាក់ ត្រូវបានរកឃើញ ក្នុងនោះមានជិត 175 លាននាក់បានជា, ជិត 4,113,000 នាក់បានស្លាប់ និងជាង 13,032,000 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 20, 2021

ខ្សែការពារជម្រើសជាតិអង់គ្លេស 1រូប ត្រូវ ManU ទាក់ទង ក្រោយធ្វើបានល្អនៅ Euro

មកទល់នឹងពេលនេះ ក្លិប Manchester United ត្រូវបានគេដឹងថា កំពុងតែស្វះស្វែងរកខ្សែការពារល្អៗ មកបន្ថែមកម្លាំងក្នុងក្រុមសម្រាប់រដូវកាលថ្មី។ ដោយក្លិបល្បីបំផុតរបស់អង់គ្លេសមួយនេះ កំពុងតែទាក់ទងយក Varane ពី Real Madrid ក្នុងតម្លៃ 50លានដុល្លារ។

មិនទាន់ទាក់ទងយក Varane មកបានសម្រេចផង ក្លិបបិសាចក្រហមនេះ បានបន្តផែនការយកខ្សែការពារម្នាក់ទៀត គឺ Kieran Trippier ពីក្លិបមកពីអេស្ប៉ាញ AT Madrid ដែលតម្លៃត្រូវប៉ាន់ គឺប្រមាណជាង 40លានដុល្លារផងដែរ។

Kieran Trippier គឺជាខ្សែការពារជម្រើសជាតិអង់គ្លេស 1រូប ដែលធ្វើបានល្អមែនទែន នៅ Euro ដោយបានជួយឱ្យអង់គ្លេស បានជើងឯករង។ ក្នុងនោះគេបានបង្ហាញខ្លួនឱ្យជម្រើសជាតិអង់គ្លេសបាន 33ប្រកួត និង ធ្លាប់រកបាន 1គ្រាប់៕

July 20, 2021

យាន Blue Origin របស់មហាសេដ្ឋី Jeff Bezos នឹងដឹកមនុស្សទៅកាន់ទីអវកាស នាថ្ងៃនេះ

សហរដ្ឋអាមេរិក៖ Blue Origin ដែលជាក្រុមហ៊ុនអវកាសរបស់មហាសេដ្ឋី Jeff Bezos បានត្រៀមខ្លួនរួចរាល់ សម្រាប់ដំណើរហោះហើរដឹកមនុស្សដំបូងរបស់ខ្លួន ទៅកាន់ទីអវកាស បន្ទាប់ពីបានវាយតម្លៃលើកចុងក្រោយ។

Jeff Bezos និងអតិថិជនចំនួន 3 នាក់ផ្សេងទៀត នឹងហោះទៅកាន់ទីអវកាសក្បែរគន្លងតារាវិថីផែនដី តាមរយៈយាន New Shepard របស់ក្រុមហ៊ុន Blue Origin។ បេសកកម្មនេះ នឹងត្រូវធ្វើឡើងនៅវេលាម៉ោង 20 នៃថ្ងៃទី 20 កក្កដា ឆ្នាំ 2021 (ម៉ោងនៅភ្នំពេញ) ដែលត្រូវនឹងខួបទី 52 ឆ្នាំ ដែលយានអវកាស Apollo 11 បានចុះចតលើឋានព្រះចន្ទ។ លទ្ធផលនៃការវាយតម្លៃថ្មីៗនេះ បានបង្ហាញថា ពុំមានបញ្ហាអ្វីដែលអាចប្ដូរផ្លាស់កាលបរិច្ឆេទនៃការហោះហើរនេះនោះទេ រួមទាំងកត្តាអាកាសធាតុ។

New Shepard ជាយានអាចប្រើប្រាស់ឡើងវិញ ដែលមានការរួមផ្សំរវាងរ៉ុក្កែត និងបន្ទប់សម្រាប់អ្នកអវកាស ត្រូវបានរចនាឡើងដើម្បីដឹកមនុស្ស និងទំនិញ ទៅកាន់ទីអវកាសក្បែរគន្លងតារាវិថិផែនដី។ កន្លងមក យាន New Shepard ផ្សេងគ្នាចំនួន 4 បានហោះហើរសាកល្បងចំនួន 15 ជើងរួចមកហើយ ប៉ុន្តែថ្ងៃនេះគឺជាលើកដំបូងដែលយានត្រូវដឹកមនុស្ស។

ក្រុមអវកាសចរដែលហោះហើរទៅកាន់ទីអវកាសនាថ្ងៃនេះ រួមមាន មហាសេដ្ឋី Jeff Bezos ដែលជាស្ថាបនិករបស់ Blue Origin, ប្អូនប្រុសរបស់លោក Jeff Bezos គឺលោក Mark Bezos, អ្នកបើកបរវ័យ 82 ឆ្នាំ អ្នកស្រី Wally Funk និងនិស្សិតវ័យ 18 ឆ្នាំ Oliver Daemen ជាភ្ញៀវដែលបានទិញសំបុត្រដំបូងគេរបស់ក្រុមហ៊ុន។

«យើងបានត្រួតពិនិត្យរាល់ប្រព័ន្ធរបស់យាន រួមមានផ្នែកទន់ ផ្នែករឹង ពេលវេលា និងកម្រិតនៃការត្រៀមខ្លួនរបស់ក្រុមអ្នកអវកាស» Steve Lanius នាយកផ្នែកហោះហើររបស់ Blue Origin បាននិយាយកាលពីថ្ងៃទី 18 កក្កដា។

លោក Jeff Bezos នឹងក្លាយជាមហាសេដ្ឋីទីពីរ ដែលហោះទៅកាន់ទីអវកាស នៅក្នុងអំឡុងពេលមិនដល់ 2 សប្ដាហ៍ចុងក្រោយនេះ។ កាលពីថ្ងៃទី 11 កក្កដា ស្ថាបនិកក្រុមហ៊ុន Virgin Group គឺមហាសេដ្ឋី Richard Branson បានហោះទៅកាន់ព្រំដែនរវាងបរិយាកាសផែនដី និងអវកាស នៅក្នុងជើងហោះហើរដឹកភ្ញៀវដំបូងរបស់យន្តហោះ VSS Unity ដែលអភិវឌ្ឍដោយក្រុមហ៊ុន Virgin Galactic។ Virgin Galactic និង Blue Origin គឺជាគូប្រជែងសំខាន់នៅក្នុងវិស័យទេសចរណ៍អវកាសក្បែរគន្លងគោចរផែនដី។

យន្តហោះ VSS Unity អាចចាប់ផ្ដើមដំណើរការសកម្មភាពពាណិជ្ជកម្មរបស់ខ្លួន នៅដើមឆ្នាំក្រោយ បើសិនជាការហោះហើរសាកល្បងមួយចំនួននាពេលខាងមុខ ដំណើរការដោយរលូន។ ចំណែក Blue Origin ក៏កំពុងតែមានគម្រោងដឹកអ្នកដំណើរច្រើនរូបទៅកាន់ទីអវកាស នៅក្នុងអំឡុងពេល ចាប់ពីខែកញ្ញា ដល់ខែតុលា ឆ្នាំ 2021៕

ប្រភព៖ Space
ប្រែសម្រួល៖ បុត្រា

July 20, 2021

AC Milan ទិញបានខ្សែប្រយុទ្ធជួរមុខជម្រើសជាតិបារាំង ក្នុងតម្លៃត្រឹមតែ 1 លានផោន

កីឡាករក្រុមជម្រើសជាតិបារាំង ខ្សែប្រយុទ្ធ Oliver Giroud វ័យ 34 ឆ្នាំ បានផ្ទេរពី Chelsea ទៅកាន់ក្លិប AC Milan ក្នុងតម្លៃត្រឹម 1 លានផោនប៉ុណ្ណោះ ក្រោយពីចំណាយពេលចំនួន 3 រដូវជាមួយក្រុមតោខៀវ និងឈ្នះពានមួយចំនួនដូចជា Europa League និង Champions League ជាដើម ។ ដោយពេលនេះ គេបានមកដល់ទីក្រុង Milan ប្រទេសអ៊ីតាលីហើយ ដើម្បីពិនិត្យសុខភាព និងត្រៀមចុះកុងត្រាជាផ្លូវការ ។

ចំពោះរយៈពេលនៃកុងត្រាថ្មីនេះ គឺមានសុពលភាព 2 ឆ្នាំ រហូតដល់ ខែមិថុនា ឆ្នាំ 2023 តែតម្លៃពលកម្មត្រូវក្លិបបិទជិត មិនបង្ហាញជាផ្លូរការឡើយ ។ ជាទូទៅ កីឡាករដែលមានតម្លៃខ្លួនផ្ទេរទាប ហើយល្អខ្លាំងបែបនេះ ត្រូវបានគេដឹងថា នឹងទទួលបានតម្លៃពលកម្មកប់ពពក ។

គួរឱ្យដឹងដែរថា Oliver Giroud ជាកីឡាករជម្រើសជាតិបារាំង ដ៏ល្បីមួយរូប ដែលធ្លាប់បង្ហាញខ្លួនឱ្យជម្រើសជាតិដល់ទៅ 110 ប្រកួត រកបាន 46 គ្រាប់ ។ ទោះបីជាបច្ចុប្បន្នមានវ័យដល់ទៅ 34 ឆ្នាំក្តី តែគេនៅតែជាជម្រើសដំបូង ក្នុងជម្រើសជាតិបារាំង ៕

July 20, 2021

សូមបង្កើនការប្រុងប្រយ័ត្ន! កម្ពុជា អាចនឹងមានភ្លៀង ផ្គររន្ទះ និងខ្យល់កន្ត្រាក់ខ្លាំង ចាប់ពីថ្ងៃទី 21-27 កក្កដា

(ភ្នំពេញ)៖ ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មានបញ្ជាក់ពីស្ថានភាពអាកាសធាតុនៅ កម្ពុជា ចាប់ពីថ្ងៃទី 21 ដល់ 27 ខែកក្កដា ឆ្នាំ 2021។

ក្រសួងបញ្ជាក់ថា នៅសប្តាហ៍ខាងមុខនេះ ព្រះរាជាណាចក្រកម្ពុជានឹងទទួលរងឥទ្ធិពល៖

* ពីថ្ងៃទី 21-22 ខែកក្កដា ទទួលឥទ្ធិពលពីមូសុងនិរតីខ្លាំង, ប្រព័ន្ធសម្ពាធទាបភ្ជាប់ និងព្យុះលើកទី7 សេម៉ាកា (CEMPAKA)
* ពីថ្ងៃទី 23-27 ខែកក្កដា ទទួលឥទ្ធិពលពីមូសុងនិរតីកម្រិតខ្លាំង, ជ្រលងសម្ពាធទាបពីប្រទេសចិន និងប្រព័ន្ធសម្ពាធទាប។

ស្ថានភាពបែបនេះនឹងធ្វើឱ្យ៖

1៖ បណ្តាខេត្តនៅតំបន់វាលទំនាបកណ្ដាល

* សីតុណ្ហភាពអប្បបរមា មានពី 22-25 °C
* សីតុណ្ហភាពអតិបរមា មានពី 28-31 °C
* នឹងអាចមានភ្លៀងមធ្យមទៅបង្គរ លាយឡំខ្យល់កន្ត្រាក់បក់ខ្លាំង ។ លើកលែងតែបណ្តាខេត្តនៅភាគខាងក្រោមនឹងអាចមានភ្លៀងធ្លាក់តិចទៅមធ្យម លាយឡំខ្យល់កន្ត្រាក់បក់ខ្លាំង ។

2៖ បណ្តាខេត្តដាប់ជួរភ្នំដងរែក និងខ្ពង់រាបឦសាន

* សីតុណ្ហភាពអប្បបរមាមានពី 22-25 °c
* សីតុណ្ហភាពអតិបរមា មានពី 27-30 °C
* អាចមានភ្លៀងពីកម្រិតបង្ហូរទៅច្រើន ផ្គរ រន្ទះតិចតួច លាយឡំនឹងខ្យល់កន្ត្រាក់ក្នុងល្បឿនខ្លាំងពិសេស នៅតាមតំបន់ជួរភ្នំក្រវាញ់ ជួរភ្នំដងរែក និងបណ្តាខេត្ត ដែលស្ថិតនៅតាមដងទន្លេមេគង្គ។

3៖ តំបន់មាត់សមុទ្រ

* សីតុណ្ហភាពអប្បបរមា មានពី 21-24°C
* សីតុណ្ហភាពអតិបរមា មានពី 25-28 °C
* អាចមានភ្លៀងពីកម្រិតបង្គរទៅច្រើន ផ្គរ រន្ទះបង្គរ លាយឡំនឹងខ្យល់កន្ត្រាក់ក្នុងលឿនខ្លាំង និងរលកសមុទ្រមានកម្ពស់ខ្ពស់។ ទន្ទឹមនោះលទ្ធភាពនៃជំនន់ទឹកភ្លៀង (Flash Flood) ក៏មានភាគរយខ្ពស់ផងដែរ។

ក្រសួងបន្តថា អាស្រ័យស្ថានភាពធាតុអាកាស ដូចបានជម្រាបជូនខាងលើ សូមសាធារណជន និងបងប្អូនប្រជានេសាទបង្កើនការប្រុងប្រយ័ត្នខ្ពស់៕

July 20, 2021

Karina (Aespa) បន្តយកឈ្នះលើ Jennie (Black Pink) ដោយដណ្ដើមបាន No.1 នៃតារាងចំណាត់ថ្នាក់លើភាពល្បីឈ្មោះ សម្រាប់ខែកក្កដា

Karina ទទួលបានចំណាត់ថ្នាក់ No.1 ពីរលើកបន្តបន្ទាប់ នៅលើតារាងចំណាត់ថ្នាក់លើភាពល្បីល្បាញផ្ទាល់ខ្លួននៃសមាជិកទាំងឡាយរបស់បណ្ដាក្រុមចម្រៀងស្រីកូរ៉េខាងត្បូង។ Karina (카리나) គឺជាតារាចម្រៀងនៅ កូរ៉េខាងត្បូង របស់ផលិតកម្ម SM Entertainment។ នាងគឺជាប្រធានក្រុម និងជាអ្នករាំសំខាន់របស់ក្រុមចម្រៀងស្រី Aespa។

កាលពីថ្ងៃទី 18 ខែកក្កដា វិទ្យាស្ថានស្រាវជ្រាវពាណិជ្ជកម្ម កូរ៉េខាងត្បូង បានបញ្ចេញតារាងចំណាត់ថ្នាក់ភាពល្បីល្បាញនៃខែនេះ សម្រាប់សមាជិកក្រុមចម្រៀងស្រីនានា ដែលកំពុងធ្វើសកម្មភាព។ ទិន្នន័យរបស់តារាងចំណាត់ថ្នាក់ ត្រូវបានកំណត់ដោយយោងទៅតាមស្ដង់ដាមួយចំនួន ដូចជា កម្រិតនៃការចូលរួមរបស់អ្នកប្រើប្រាស់ កម្រិតនៃការគ្របដណ្ដប់លើបណ្ដាញផ្សព្វផ្សាយ សន្ទស្សន៍នៃបណ្ដាញផ្សព្វផ្សាយ និងការយល់ឃើញរបស់សាធារណជន។ ទិន្នន័យខាងលើ ត្រូវបានប្រមូលចាប់តាំងពីថ្ងៃទី 18 មីថុនា ដល់ថ្ងៃទី 1 កក្កដា។

តារាចម្រៀង Karina របស់ក្រុម Aespa រក្សាបានចំណាត់ថ្នាក់លេខមួយ នៅក្នុងតារាងចំណាត់ថ្នាក់ ដោយសន្ទស្សន៍នៃភាពល្បីល្បាញស្មើនឹង 3,648,118 ពិន្ទុ (ថយចុះ 0.56% ធៀបនឹងខែមុន)។ ឃ្លាដែលមានចំណាត់ថ្នាក់ខ្ពស់ នៅក្នុងការវិភាគពាក្យគន្លឹះ រួមមាន «Next Level», «concert», «ទាក់ទាញ» និង «ដូចឆ្មា» ។ល។ ការវិភាគលើអត្រាវិជ្ជមាន-អវិជ្ជមាន ទៅលើ Karina បង្ហាញថា អត្រាប្រតិកម្មវិជ្ជមាន ស្មើនឹង 64.02%។

ចំណែក Jennie (Black Pink) តាមពីក្រោយ ដោយជាប់ចំណាត់ថ្នាក់លេខពីរ ជាមួយនឹងពិន្ទុ 3,613,982 (ថយចុះ 0.19% ធៀបនឹងខែមិថុនា)។ Jennie គឺជា idol ស្រីតែម្នាក់គត់ ដែលមិនទាន់ធ្លាក់ចេញពី top 10 នៃតារាងចំណាត់ថ្នាក់នេះ នៅក្នុងរយៈពេល 18 ខែបន្តបន្ទាប់។

រីឯ Yu Jeong (Brave Girls) បានឡើងដល់ចំណាត់ថ្នាក់លេខបី ជាមួយនឹងសន្ទស្សន៍នៃភាពល្បីឈ្មោះស្មើនឹង 3,354,420 ពិន្ទុ កើន 44.13% ធៀបនឹងខែមិថុនា។

ចំណាត់ថ្នាក់ចំនួនពីរចុងក្រោយនៅក្នុង top 5 គឺបានទៅលើ Joy នៃក្រុម Red Velvet (3.279.802 ពិន្ទុ) និង Yuna នៃក្រុម Brave Girls (3,161,880 ពិន្ទុ)៕

July 19, 2021

ឧបករណ៍ខ្នាតតូច បំពាក់លើជញ្ជាំង អាចរកឃើញ COVID-19 ដល់ 8 ប្រភេទ ក្នុងពេលតែមួយ

ឧបករណ៍នេះ មានផ្ទុកអង្គញាណជីវសាស្ត្រ (Biological Sensors) អាចរកឃើញ COVID-19 តាមរយៈខ្យល់ដង្ហើមរបស់អ្នកវិជ្ជមាននឹងវីរូស នៅក្នុងកន្លែងធ្វើការ និងអាចរកឃើញវ៉ារ្យ៉ង់ (វីរូសបំប្លែងខ្លួនថ្មី) របស់ COVID-19 ចំនួន 8 ប្រភេទ។

ក្រុមអ្នកវិទ្យាសាស្ត្រនៃវិទ្យាស្ថានបច្ចេកវិទ្យារ៉ូយ៉ាល់មែលប៊ន (RMIT) និងវិទ្យាស្ថានបឺរណែត របស់ អូស្ដ្រាលី គឺជាអ្នកបានអភិវឌ្ឍឧបករណ៍បច្ចេកវិទ្យានេះ។

ឧបករណ៍ទំនើប ដែលរួមមាន អង្គញាណជីវសាស្ត្រនេះ មានរូបរាងតូច ប្រើប្រាស់បច្ចេកទេសមីក្រូអេឡិចត្រូនិកប្រកបដោយភាពបត់បែន និងបច្ចេកវិទ្យា nano សិប្បនិម្មិត ដែលមានសមត្ថភាពវិភាគដឹងច្បាស់អំពីប្រភេទវីរុស តាមរយៈដង្ហើមរបស់មនុស្សនៅតាមទីតាំងជាក់លាក់។ អ្នកប្រើប្រាស់ នឹងទទួលបានឈីបមួយបន្ថែមទៀត សម្រាប់ផ្ទុកទិន្នន័យឯកជន។

TS Alasdair Wood សមាជិកម្នាក់របស់ក្រុមស្រាវជ្រាវ ឱ្យដឹងថា អង្គញាណស្វែងរកវីរុសក្នុងបរិស្ថាន ដែលពិភពលោកកំពុងអភិវឌ្ឍ នាបច្ចុប្បន្ន មានទំហំធំ ស៊ីថាមពលច្រើន និងអាចរកឃើញតែវីរុសមួយប្រភេទ។ អង្គញាណរបស់ក្រុមខាងលើ មានរូបរាងតូច អាចពាក់នៅលើដៃ ឬដាក់ភ្ជាក់នឹងជញ្ជាំងនៃបន្ទប់ធ្វើការ ឬមន្ទីរពេទ្យ និងអាចរកឃើញវីរុសបំប្លែងខ្លួនថ្មីរហូតដល់ 8 ប្រភេទឯណោះ។

ក្រុមអ្នកវិទ្យាសាស្ត្រខាងលើ បន្ថែមថា ឧបករណ៍របស់ពួកគេ មានសមត្ថភាពរកឃើញវីរុស COVID-19 សូម្បីតែនៅលើអ្នកវិជ្ជមានដែលមិនទាន់មានរោគសញ្ញាទៀតផង។

តាមគម្រោង ឧបករណ៍នេះនឹងត្រូវបានផលិតទ្រង់ទ្រាយធំជាបន្តបន្ទាប់ និងដាក់លក់ក្នុងទីផ្សារ ចាប់ពីដើមឆ្នាំ 2022៕

ប្រភព៖ 9news
ប្រែសម្រួល៖ បុត្រា

July 19, 2021

Author: សឿន សំណាង