សឿន សំណាង - La Reine Media

ភាពយន្តស្ដីពីការប្រយុទ្ធនឹង COVID-19 នៅ Wuhan រកបានចំណូលបាន 154 លានដុល្លារអាមេរិក

(ប្រទេសចិន)៖ «Chinese Doctors» ដែលជាខ្សែភាពយន្តចិន និយាយអំពីការប្រយុទ្ធប្រឆាំងនឹងរោគរាតត្បាត COVID-19 នៅទីក្រុង Wuhan រកបានប្រាក់ចំណូល 1 ពាន់លានយុន (ជាង 154 លានដុល្លារអាមេរិក)។

យោងតាមសារព័ត៌មាន Sina ខ្សែភាពយន្តដែលបានធ្វើឱ្យកក្រើកបន្ទប់លក់សំបុត្រក្នុងរដូវក្ដៅឆ្នាំនេះ កំពុងតែនាំមុខគេលើប្រាក់ចំណូល បើធៀបនឹងខ្សែភាពយន្តដែលចេញដំណាលគ្នា មានដូចជា រឿង 1921 ឬ Realm of Terracotta ជាដើម។ ក្រុមអ្នកជំនាញ បានព្យាករថា Chinese Doctors នឹងរកបានចំណូលប្រហែល 1.6 ពាន់លានយុន ដែលស្មើនឹង 247 លានដុល្លារអាមេរិក។

Chinese Doctors ដែលបានថតកាលពីចុងឆ្នាំ 2020 គឺជាភាពយន្តមួយ យោងទៅតាមទិដ្ឋភាពនៅឯមន្ទីរពេទ្យនានាក្នុងទីក្រុង Wuhan ចាប់តាំងពី COVID-19 បានបង្ហាញខ្លួន រហូតដល់ត្រូវបានគ្រប់គ្រង។ ស្នាដៃនិពន្ធនេះ បង្ហាញឡើងវិញនូវទិដ្ឋភាពនៃប្រការប្រយុទ្ធប្រឆាំងនឹង COVID-19 រួមនឹងការតស៊ូដើម្បីរស់របស់ក្រុមវេជ្ជបណ្ឌិត និងបុគ្គលិកសុខាភិបាល។ Chinese Doctors មានការចូលរួមសំដែងពីតារាល្បីៗមួយចំនួន ដូចជា Zhang Hanyu (ដើរតួជា Zhang Jingyu), Yuan Quan (Wen Ting), Zhu Yawen (Tao Jun), Li Chen (Wu Chenguang), Jackson Yee (Yang Xiaoyang), Oho Ou (Jin Zai) និង Zhou Ye (Xiao Wen)។ល។

ទោះជាជោគជ័យក៏ដោយ ប៉ុន្តែ Chinese Doctors ក៏ទទួលបានការរិះគន់មួយចំនួន ដូចជាថា ភាពយន្តនេះ មានកន្លែងខ្លះខ្វះភាពត្រឹមត្រូវ មិនដូចជាក់ស្ដែង។ អ្នកខ្លះថា «រោគរាតត្បាតមិនទាន់បានបញ្ចប់ផង ប៉ុន្តែ សាច់រឿងនេះ មើលទៅដូចបានកើតឡើងតាំងពីសតវត្សរ៍មុន»។

Chinese Doctors គឺជាខ្សែភាពយន្តដ៏កម្រ ដែលរកបានចំណូលច្រើនគួរសមនៅក្នុងរដូវក្ដៅឆ្នាំនេះ។ យោងតាម Mtime គិតមកដល់ថ្ងៃទី 21 កក្កដា ចំណូលសរុបនៅក្នុងរដូវក្ដៅឆ្នាំនេះ មានចំនូនជាង 4.2 ពាន់លានយុន ស្មើនឹង 648.6 លានដុល្លារអាមេរិក ថយចុះពាក់កណ្ដាល បើធៀបនឹងអំឡុងពេលដូចគ្នា ក្នុងឆ្នាំ 2018 និង 2019៕

ប្រភព៖ Xinhuanet
ប្រែសម្រួល៖ បុត្រា

July 22, 2021

អ្នករាំរបាំ វ័យ 26 ឆ្នាំ គ្រងមកុដបវរកញ្ញាឯកភពផែនដី Miss Earth Japan របស់ ជប៉ុន ឆ្នាំ 2021

បេក្ខនារី Konatsu Yoshida តំណាងឱ្យខេត្ត Hokkaido បានគ្រងមកុដបវរកញ្ញាឯកផែនដីជប៉ុន ឆ្នាំ 2021 បន្ទាប់ពីបានយកឈ្នះលើបេក្ខនារីចំនួន 26 នាក់ មកពីតំបន់នានា ក្នុងប្រទេសនេះ។

នៅក្នុងរាត្រីផ្ដាច់ព្រ័ត្រ កាលពីថ្ងៃទី 20 ខែកក្កដា នៅរាជធានី តូខ្យូ នាង Konatsu Yoshida ត្រូវបានប្រគល់មកុដពី Anna Tode ដែលជាបវរកញ្ញាឯកផែនដីជប៉ុន ឆ្នាំ 2020 (Miss Earth Japan 2020)។ បវរកញ្ញាឯកថ្មីនេះ មានកម្ពស់ 1.7 ម៉ែត្រ គឺជាអ្នករាំរបាំបាឡេ និងជាអ្នកលេងព្យ៉ាណូផងដែរ។ នាងធ្លាប់បានរៀននៅវិទ្យាស្ថានរបាំអន្តរជាតិក្នុងទីក្រុង ប៊ែកឡាំង និងបានរស់នៅក្នុងប្រទេស អាល្លឺម៉ង់ អស់មួយរយៈពេលផងដែរ។ នេះបើតាមសារព័ត៌មាន Missosology។

បវរកញ្ញាឯកភពផែនដីរបស់ជប៉ុន ឆ្នាំ 2021 (Miss Earth Japan 2021)

បវរកញ្ញាភពផែនដី Konatsu Yoshida នឹងធ្វើជាតំណាងរបស់ ជប៉ុន ទៅចូលរួមប្រលងបវរកញ្ញាភពផែនដីឆ្នាំ 2021 ដែលគ្រោងនឹងប្រារព្ធឡើងនៅប្រទេស ហ្វីលីពីន នៅចុងឆ្នាំនេះ។

គណៈកម្មការក៏បានផ្ដល់រង្វាន់ បវរកញ្ញាឯករង ក្នុងនាមជា Miss Air ដល់ Haruka Miura (តំណាងឱ្យ Aomori), Miss Water ដល់ Mari Fujita (Osaka) និង Miss Fire ដល់ Rina Takehara (តំណាងឱ្យរាជធានី)។

Miss Earth Japan គឺជាព្រឹត្តិការណ៍ប្រលងបវរកញ្ញាប្រចាំឆ្នាំរបស់ប្រទេស ជប៉ុន ដើម្បីជ្រើសរើសបេក្ខភាពទៅចូលរួមប្រកួតប្រជែងនៅ Miss Earth អន្តរជាតិ៕

ប្រភព៖ Missosology
ប្រែសម្រួល៖ បុត្រា

July 22, 2021

តារាចម្រៀង Britney Spears មានសុភមង្គលយ៉ាងខ្លាំង ពេលបានបើកបររថយន្ត

តារាចម្រៀងអាមេរិកាំង នាង Britney Spears បានបើកបររថយន្តជាលើកដំបូង បន្ទាប់ពីត្រូវតុលាកហាមឃាត់អស់រយៈពេល 13 ឆ្នាំ ដោយឱ្យរស់នៅក្រោមការគ្រប់គ្រងទាំងស្រុងដូចកូនតូច ពីសំណាក់ឪពុក។

យោងតាមសារព័ត៌មាន People កាលពីថ្ងៃទី 21 កក្កដា ប្រភពព័ត៌មានដែលស្និទ្ធនឹង Britney Spears បានឱ្យដឹងថា «តារាចម្រៀងរូបនេះ រីករាយខ្លាំងណាស់ នៅពេលមានសិទ្ធិបើកបររថយន្តឡើងវិញ។ នាងសប្បាយចិត្តខ្លាំង និងដឹងគុណចំពោះអ្នកដែលបានជួយដល់នាងនាពេលថ្មីៗនេះ។ Britney Spears ក៏ពេញចិត្តនឹងសវនាការរបស់តុលាការនាពេលកន្លងផងដែរ។ នាងសង្ឃឹមថា មេធាវីថ្មី អាចជួយនាងឱ្យរួចផុតពីការគ្រប់គ្រង (ដែលជាបញ្ជារបស់តុលាការ)»។

Britney Spears ធ្លាប់ត្រូវបានរិះគន់ នៅពេលបណ្ដោយឱ្យកូនតូចអង្គុយលើភ្លៅ ដោយមិនពាក់ខ្សែក្រវាត់សុវត្ថិភាពឱ្យកូន ក្នុងពេលបើកបររថយន្ត កាលពីឆ្នាំ 2006។ ក្រោយពីត្រូវបានតុលាការចេញសាលក្រមឆ្នាំ 2008 តារាចម្រៀងរូបនេះ ក៏ត្រូវស្ថិតក្រោមការគ្រប់គ្រងរបស់ឪពុក ហើយមិនមានសិទ្ធិបើកបរនោះទេ បើសិនមិនមានការអនុញ្ញាតពីឪពុក។ បងប្រុសរបស់នាង ធ្លាប់បាននិយាយថា Britney Spears គឺជាអ្នកបើកបរមិនល្អ ហើយថា ការហាមមិនឱ្យនាងបើកបររថយន្ត គឺជា រឿងត្រឹមត្រូវ។

នៅក្នុងសវនាការកាលពីថ្ងៃទី 14 កក្កដា ចៅក្រមបានយល់ព្រមតាមការស្នើរបស់ Britney Spears ដោយតែងតាំងមេធាវីថ្មី ឈ្មោះ Mathew Rosengart បន្ទាប់ពីលោក Samuel Ingham II បានសុំឈប់ពីការងារ។ នេះជាលើកដំបូងហើយដែលនាងមានសិទ្ធិជ្រើសរើសមេធាវីផ្ទាល់ខ្លួន ក្រោយរយៈពេល 13 ឆ្នាំដែលត្រូវតុលាការហាមឃាត់។

នៅក្នុងសវនាការខាងលើនេះដែរ Britney Spears ក៏បានចោទឪពុករបស់ខ្លួនអំពីបទរំលោភលើសិទ្ធិជាអាណាព្យាបាល។ នាងឱ្យដឹងថា ខ្លួនត្រូវបានគ្រប់គ្រងយ៉ាងឃោរឃៅ។ តារាចម្រៀងរូបនេះ ចង់ឱ្យតុលាការបើកការស៊ើបអង្កេតលើឪពុកទៀតផង។

លោក Jamie Spears ដែលជាឪពុករបស់ Britney Spears ត្រូវបានតុលាការសម្រេចឱ្យធ្វើជាអ្នកគ្រប់គ្រងលើ Britney Spears ចាប់ពីឆ្នាំ 2018 ក្រោយពីនាងបានឃុំខ្លួនឯង និងកូនៗនៅក្នុងបន្ទប់ បន្ទាប់ពីចាញ់ក្ដីនៅតុលាការ ទាក់ទិននឹងសិទ្ធិចិញ្ចឹមកូនក្រោយការលែងលះស្វាមី។ លោក Jamie Spears ទទួលបានប្រាក់បៀវត្សប្រចាំឆ្នាំប្រហែល 130,000 ដុល្លារ សម្រាប់តួនាទីនេះ។ ប៉ុន្មានឆ្នាំកន្លងទៅថ្មីៗនេះ Britney Spears បានស្នើតុលាការ ដកបទបញ្ជាទាក់ទងនឹងសិទ្ធិជាអាណាព្យាបាលលើរូបនាងពីសំណាក់ឪពុក ប៉ុន្តែមិនបានសម្រេច។ នៅក្នុងវ័យ 40 ឆ្នាំ Britney Spears ពុំមានសិទ្ធិបោះឆ្នោត និងជួបកូនៗដោយសេរីនោះឡើយ ហើយនាងថែមទាំងត្រូវគ្រប់គ្រងលើបញ្ហាហិរញ្ញវត្ថុ ការឆ្លើយនឹងកិច្ចសម្ភាស។ល។

ប្រភព៖ People
ប្រែសម្រួល៖ បុត្រា

July 22, 2021

ក្រុមហ៊ុនស៊ុយអែត អភិវឌ្ឍយន្តហោះ ប្រើម៉ាស៊ីនអគ្គិសនីតម្លៃទាបជាង 20 ដង ធៀបនឹងម៉ាស៊ីនទួរប៊ីនកង្ហារធម្មតា

(ស៊ុយអែត)-យន្តហោះអគ្គិសនី ES-19 ដែលនឹងផ្ដល់សេវាកម្មដឹកអ្នកដំណើរផ្លូវជិត អាចដឹកភ្ញៀវបាន 19 នាក់ និងអាចធ្វើដំណើរបានរយៈចម្ងាយ 400 គីឡូម៉ែត្រ។

ក្រុមហ៊ុនបច្ចេកវិទ្យាថ្មី Heart Aerospace របស់ប្រទេស ស៊ុយអែត កំពុងអភិវឌ្ឍយន្តហោះ ES-19 ដំណើរការទាំងស្រុងដោយអគ្គិសនី និងសម្រាប់ដឹកអ្នកដំណើរក្នុងរយៈចម្ងាយផ្លូវជិត ដែលបច្ចុប្បន្នមិនមានសក្ដានុពលផ្នែកសេដ្ឋកិច្ចសម្រាប់ប្រភេទយន្តហោះធម្មតា។ នេះបើតាមសារព័ត៌មាន New Atlas ចេញផ្សាយកាលពីថ្ងៃទី 19 កក្កដា។ Heart Aerospace ទើបតែរកបានអ្នកវិនិយោគថ្មីជាច្រើន ក្នុងនោះមាន United Airlines ផងដែរ។ ក្រុមហ៊ុន United Airlines គ្រោងនឹងបញ្ជាទិញ ES-19 ចំនួន 100 គ្រឿង ដើម្បីប្រើប្រាស់ក្នុងពេលអនាគត។

យន្តហោះអគ្គិសនី ត្រូវការពេលវេលាយូរទៀត ទើបអាចផ្ដល់សេវាកម្មដឹកជញ្ជូនផ្លូវឆ្ងាយ ឬដំណើរហោះហើរជាអន្តរជាតិ ដូចទៅនឹងយន្តហោះពាណិជ្ជកម្មនាបច្ចុប្បន្ន ដោយសារតែបច្ចេកវិទ្យាថាមពលអាគុយមានកំណត់។ ប៉ុន្តែ ពួកវាមានសក្ដានុពលខ្លាំងក្លា នៅពេលដឹកជញ្ជូនផ្លូវជិត។ ES-19 ត្រូវបានអភិវឌ្ឍឡើង ដើម្បីឆ្លើយតបនឹងគោលដៅនេះ។

ក្រុមហ៊ុន Heart Aerospace បានឱ្យដឹងថា ម៉ាស៊ីនប្រើអគ្គិសនីរបស់ ES-19 មានតម្លៃទាបជាង 20 ដង បើធៀបនឹងម៉ាស៊ីនទួរប៊ីនកង្ហារធម្មតា ហើយការចំណាយលើការថែទាំក៏ទាបជាង 100 ដងផងដែរ។

ES-19 អាចដឹកភ្ញៀវបាន 19 នាក់ ដោយហោះហើរក្នុងរយៈចម្ងាយផ្លូវ 400 គីឡូម៉ែត្រ។ រយៈចម្ងាយនេះនឹងត្រូវកើនឡើង នៅពេលបច្ចេកវិទ្យាអាគុយនាពេលអនាគត រីកចម្រើនជាងនេះ។ ES-19 អាចហោះឡើងពីផ្លូវរត់ប្រវែងត្រឹម 750 ម៉ែត្រ។ វាក៏អាចដឹកអ្នកដំណើរឆ្លងកាត់ភ្នំ ឬពីកោះមួយទៅកោះមួយ ជាតំបន់ដែលពិបាកធ្វើដំណើរដោយផ្លូវគោក។ នេះបើតាម Heart Aerospace។

តាមផែនការ Heart Aerospace នឹងបង្ហើយកិច្ចការរចនារូបរាងសម្រាប់ ES-19 នៅក្នុងឆ្នាំ 2023 និងធ្វើការហោះហើរដំបូងនៅក្នុងត្រីមាសទីមួយ ឆ្នាំ 2024។ ក្រុមហ៊ុននេះ ក៏សង្ឃឹមថា ម៉ូដែលយន្តហោះថ្មីរបស់ខ្លួន នឹងទទួលបានលិខិតអនុញ្ញាតពីអាជ្ញាធរ នៅក្នុងឆ្នាំ 2026 ហើយដំណើរការជាផ្លូវការចាប់ពីត្រីមាសទី 4 ក្នុងឆ្នាំដដែល៕

ប្រភព៖ New Atlas
ប្រែសម្រួល៖ បុត្រា

July 22, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 22 កក្កដា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 811 នាក់, អ្នកជាចំនួន 798 នាក់ និងអ្នកស្លាប់ចំនួន 20 នាក់បន្ថែមទៀត នៅក្នុងថ្ងៃទី 21 ខែកក្កដា ឆ្នាំ 2021។

គិតត្រឹមព្រឹកថ្ងៃទី 22 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 70,419 នាក់ ក្នុងនោះមានអ្នកជាសះស្បើយជាង 62,570 នាក់ និង អ្នកស្លាប់ 1,188 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 192,840,800 នាក់ ត្រូវបានរកឃើញ ក្នុងនោះមាន 175,357,704 នាក់បានជា, 4,142,679 នាក់បានស្លាប់ និងជាង 13,340,400 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 22, 2021

Xiaomi យកឈ្នះលើ Apple ក្នុងទីផ្សារស្មាតហ្វូន ដោយយុទ្ធសាស្ត្រចំនួន 4

Xiaomi បានយោងទៅលើយុទ្ធសាស្ត្រសំខាន់ចំនួន 4 ដើម្បីរីកចម្រើនយ៉ាងឆាប់រហ័ស ហើយដណ្ដើមបានតំណែងលេខ 2 ពីដៃរបស់ Apple នៅលើទីផ្សារទូរស័ព្ទឆ្លាតវៃរបស់ពិភពលោក ក្នុងត្រីមាសទីពីរ ឆ្នាំ 2021។

Xiaomi បានឡើងមកជំនួស Apple ដោយក្លាយជាយីហោទូរស័ព្ទឆ្លាតវៃដែលលក់ដាច់ជាងគេលំដាប់ទីពីរលើពិភពលោក នៅក្នុងត្រីមាសទីពីរ ឆ្នាំ 2021។ គេហទំព័រ Canalys បានវាយតម្លៃថា ក្រុមហ៊ុនមួយនេះ បានប្រើប្រាស់យុទ្ធសាស្ត្រសំខាន់ចំនួន 4 ដើម្បីយកឈ្នះលើ Apple។

Canalys បញ្ជាក់ថា តួលេខផលិតផលជាស្មាតហ្វូនដែលបានលក់ចេញរបស់ Xiaomi បានកើន 83% ធៀបនឹងដំណាក់កាលដូចគ្នាកាលពីឆ្នាំ2020 ខណៈដែល Apple វិញ កើនត្រឹមតែ 1% ប៉ុណ្ណោះ។ ជាលទ្ធផល ចំណែកទីផ្សាររបស់ Xiaomi បានកើនដល់ 17% នៅទូទាំងសកលលោក ច្រើនជាង 14% របស់ Apple។ ចំណែក Samsung វិញ នៅតែក្ដោបក្ដាប់តំណែងលេខ 1 ដោយកាន់កាប់ចំណែកទីផ្សាររហូតដល់ 19%។

យោងតាម Canalys ក្រុមហ៊ុនចិន Xiaomi បានប្រើយុទ្ធសាស្ត្រចំនួន 4 ដើម្បីដណ្ដើមចំណែកទីផ្សារ រួមមាន ៖

ទីមួយ ៖ ការបង្កើនល្បឿនក្នុងការពង្រីកទីផ្សារនៅបរទេស

ទីពីរ ៖ ជំរុញការផលិត និងបញ្ចេញផលិតផលថ្មីៗជាច្រើន និងជាបន្តបន្ទាប់ទៅក្នុងទីផ្សារ

ទីបី ៖ រក្សាយុទ្ធសាស្ត្រ «ទូរស័ព្ទឆ្លាតវៃ តម្លៃទាប»

ទីបួន ៖ Xiaomi ដោះស្រាយបានល្អ ចំពោះបញ្ហាខ្វះប្រភពផ្គត់ផ្គង់គ្រឿងបន្លាស់

Xiaomi ជំរុញការផលិត និងបញ្ចេញផលិតផលថ្មីៗជាច្រើន និងជាបន្តបន្ទាប់ទៅក្នុងទីផ្សារទន្ទឹមនឹងយុទ្ធសាស្ត្រខាងលើ Xiaomi ក៏ទទួលបានផលប្រយោជន៍ច្រើនផងដែរ បន្ទាប់ពី Huawei ដកថយពីទីផ្សារទូរស័ព្ទឆ្លាតវៃ។ Xiaomi បានឆ្លៀតយកឱកាសនេះ ដើម្បីវាយលុកទីផ្សារស្មាតហ្វូន ពិសេសគឺនៅតំបន់អឺរ៉ុប។

Canalys ព្យាករថា នៅក្នុងឆ្នាំ 2021 នេះ 32% នៃឧបករណ៍ 5G សរុបដែលត្រូវបានដាក់លក់ក្នុងទីផ្សារ នឹងមានតម្លៃក្រោម 300 ដុល្លារអាមេរិក។ ដូច្នេះ វាក៏ដល់ពេលដែល Xiaomi ត្រូវបង្ហាញវត្តមានស្មាតហ្វូន 5G តម្លៃទាបរបស់ខ្លួន នៅក្នុងទីផ្សារផងដែរ៕

ប្រភព៖ CNET, Canalys
ប្រែសម្រួល៖ បុត្រា

July 22, 2021

ដោយទុកចិត្តវេជ្ជបណ្ឌិត ពលរដ្ឋ អ៊ូហ្គង់ដា 800 នាក់ ត្រូវគេចាក់វ៉ាក់សាំង COVID-19 ក្លែងក្លាយ

យ៉ាងហោចណាស់ មានពលរដ្ឋចំនួន 800 នាក់ នៅប្រទេស អ៊ូហ្គង់ដា ត្រូវបានចាក់វ៉ាក់សាំង COVID-19 ក្លែងក្លាយ ក្នុងនោះមានអ្នកខ្លះត្រូវចាក់ទឹកទៀតផង។

មន្ត្រីរដ្ឋាភិបាល អ៊ូហ្គង់ដា កាលពីថ្ងៃទី 21 កក្កដា បានឱ្យដឹងថា នេះគឺជាល្បិចកលទាក់ទិននឹងក្រុមវេជ្ជបណ្ឌិត និងបុគ្គលិកសុខាភិបាល មួយក្ដាប់តូច ដែលមានចិត្តលោភលន់ និងអមនុស្សធម៌។

យោងតាមសារព័ត៌មាន SCMP ការចាក់វ៉ាក់សាំង COVID-19 ក្លែងក្លាយទាំងនេះ ត្រូវបានធ្វើឡើងនៅក្នុងខែឧសភា និងខែមិថុនា ក្នុងគ្រាដែល COVID-19 ឆ្លងរាលដាលខ្លាំងនៅ អ៊ូហ្គង់ដា ដោយមានពេលខ្លះ មានអ្នកវិជ្ជមានរហូតដល់ 1,700 ករណី/ថ្ងៃ។

ក្រុមជនខិលខួច បានបោកប្រាស់ពលរដ្ឋទាំងឡាយណាដែលចង់បង់ប្រាក់ដើម្បីបានចាក់វ៉ាក់សាំងមុនគេ នៅក្នុងអំឡុងពេលប្រទេស អ៊ូហ្គង់ដា កំពុងខ្វះខាតវ៉ាក់សាំង។

បណ្ឌិត Warren Naaamara ប្រធានអង្គភាពតាមដានសេវាសុខាភិបាល របស់ប្រធានាធិបតី បានទទួលស្គាល់ព័ត៌មានខាងលើ និងឱ្យដឹងបន្ថែមថា «យើងបានចាប់ខ្លួនបុគ្គលិកសុខាភិបាលចំនួន 2 នាក់ ទាក់ទងនឹងបញ្ហាបោកប្រាស់នេះ ចំណែកវេជ្ជបណ្ឌិតម្នាក់ទៀត កំពុងលាក់ខ្លួន»។

លោក Warren Naaamara បញ្ជាក់ថា អ្នកដែលត្រូវបានចាក់វ៉ាក់សាំងក្លែងក្លាយ មិនចាំបាច់ព្រួយបារម្ភឡើយ ព្រោះការពិសោធបង្ហាញថា វ៉ាក់សាំងក្លែងក្លាយនេះ មិនមានផ្ទុកសារធាតុដែលបង្កគ្រោះថ្នាក់ដល់សុខភាពឡើយ។

រដ្ឋាភិបាល អ៊ូហ្គង់ដា ចាក់វ៉ាក់សាំងជូនពលរដ្ឋដោយមិនគិតថ្លៃ ខណៈក្រុមឆបោក យកប្រាក់ចាប់ពី 25-120 ដុល្លារ ចំពោះពលរដ្ឋម្នាក់។

ប្រទេស អ៊ូហ្គង់ដា កាលពីថ្ងៃទី 21 កក្កដា បានរកឃើញអ្នកវិជ្ជមានថ្មីត្រឹមតែ 252 នាក់ប៉ុណ្ណោះ ក្រោយការឆ្លងដល់កម្រិតកំពូលកាលពីខែមិថុនា។ មកដល់បច្ចុប្បន្ន ប្រទេសនេះបានរកឃើញអ្នកវិជ្ជមាននឹង COVID-19 សរុបចំនួន 91,162 នាក់ ក្នុងនោះមាន 2,425 នាក់ បានបាត់បង់ជីវិត៕

ប្រភព៖ Bloomberg
ប្រែសម្រួល៖ បុត្រា

July 22, 2021

ជំនឿ 5យ៉ាងក្នុងរឿងអាហារការហូបចុក របស់ស្ត្រីមានគភ៌

មានជំនឿជាច្រើន ពាក់ព័ន្ធនឹងរឿងអាហារការហូបចុក ក្នុងអំឡុងពេលមានគភ៌ថា ញ៉ាំអានេះទៅ វានឹងល្អ ឬញ៉ាំអានោះទៅ នឹងធ្វើឱ្យកូនខ្ពស់ កូនឆ្លាត កូនងាយកើត ឬស្រួលកើត ជាដើម-ល- តែជំនឿខ្លះ មិនមែនចេះតែត្រូវទាំងអស់នោះទេ ដូច្នេះថ្ងៃនេះ យើងនាំគ្នាមកពិនិត្យមើលថា តើរឿងដែលយើងជឿទាំងអស់នោះ វាជាការពិត ឬយ៉ាងណា?

ជំនឿថា ញ៉ាំហឹរពេក នឹងធ្វើឱ្យកូន មិនសូវមានសក់…

ការពិត៖ សក់របស់កូនតិច ឬច្រើននោះ វាស្ថិតនៅលើពូជ ឬហ្ស៊ែន របស់មនុស្សម្នាក់ៗ ចំណែកឯជំនឿ រឿងហាមញ៉ាំហឹរនេះ ប្រហែលជាមកពីខ្លាចស្ត្រីមានគភ៌ឈឺពោះ ពិបាកបន្ទោបង់ ឬមិនទេ ក៏ខ្លាចរាករូស ដែលនាំឱ្យមានផលប៉ះពាល់ដល់សុខភាពរបស់ស្ត្រីមានគភ៌ទៅវិញទេ ព្រោះនៅក្នុងអំឡុងពេលមានគភ៌ ប្រព័ន្ធរំលាយអាហារ នឹងខុសពីពេលមុនមានគភ៌ ដោយសារតែអ័រម៉ូនប្រែប្រួល ដែលអាចនឹងធ្វើឱ្យមានបញ្ហាក្នុងការបន្ទោបង់ ឬអាចធ្វើឱ្យកើតអាការឆ្អល់ពោះ និងរាករូសបានហ្នឹងឯង។

ជំនឿថា ញ៉ាំទឹកដូងច្រើន នឹងជួយឱ្យកូនមានសាច់ស្អាត និងលាងជម្រះជាតិខ្លាញ់តាមដងខ្លួន…

ការពិត៖ ការពិតទៅ ការដែលមានខ្លាញ់ជាប់នៅតាមដងខ្លួនទារកនោះ នឹងធ្វើឱ្យងាយស្រួលប្រសូត ព្រោះវាប្រៀបដូចជា ជាតិខ្លាញ់រំអិលស្រោបពីលើខ្លួនទារក ខណៈពេលប្រសូតចេញមកដូច្នោះដែរ។ ជាតិខ្លាញ់មួយនេះ ផលិតឡើងដោយកោសិកាស្បែករបស់ទារក និងក្រពេញជាតិខ្លាញ់នៅខាងក្រោមស្បែក ពេលអាយុគភ៌ រឹតតែច្រើនឡើង ជាតិខ្លាញ់នោះក៏នឹងកើតឡើងច្រើនតាមនោះដែរ។ ក្រៅពីនេះ ក្រោយពេលប្រសូតហើយថ្មីៗ ជាតិខ្លាញ់ដែលស្រោបខ្លួនប្រាណទារកនោះ នឹងជួយគ្រប់គ្រងសីតុណ្ហភាពរបស់កូនតូច មិនឱ្យធ្លាក់ចុះទាបជ្រុលពេកបានទៀតផង។ ដូច្នេះហើយទើបគ្រូពេទ្យបណ្តោយឱ្យជាតិខ្លាញ់ទាំងនោះ នៅជាប់នឹងខ្លួនទារកមួយរយៈសិន មុននឹងលាងចេញ នៅពេលប្រាកដក្នុងចិត្តហើយថា ទារកចាប់ផ្តើមគ្រប់គ្រងសីតុណ្ហភាពដោយខ្លួនឯងបានហើយ។ ការប្រញាប់លាងជាតិខ្លាញ់នោះចេញពេក អាចនឹងធ្វើឱ្យខ្លួនប្រាណកូនតូច ត្រជាក់ខុសធម្មតា និងអាចបង្កឱ្យមានបញ្ហាបាន។

ចំណែកឯទឹកដូងវិញ មានជាតិស្ករ និងសារធាតុអាស៊ីតខ្លាញ់កកច្រើន ពេលស្ត្រីមានគភ៌ញ៉ាំច្រើន អាចធ្វើឱ្យកូនមានមាឌធំ តែមិនសូវរឹងមាំ ហើយអ្នកម្តាយខ្លួនឯង ក៏កាន់តែមានភាពប្រឈមនឹងការកើតមានខ្លាញ់ញ៉ុកណែនក្នុងសរសៃឈាមខ្លាំងដែរ ដូច្នេះបើទម្ងន់ខ្លួន កើនឡើងច្រើនហើយ គួរតែផ្អាកញ៉ាំទឹកដូងមួយរយៈ។

ជំនឿថា ហាមញ៉ាំបន្លែពពួកវល្លិ៍ៗ ឬបន្លែឡើងទ្រើង ព្រោះនឹងធ្វើឱ្យពិបាកប្រសូត…

ការពិតវិញ៖ វាជាជំនឿកាលពីបុរាណ ដែលថា បន្លែទាំងនោះមានលក្ខណៈជាខ្សែសរសៃ រឹតចងតោង ធ្វើឱ្យទារកពិបាកកើតចេញមក។ តែការពិតទៅ ស្ត្រីមានគភ៌ អាចទទួលទានបានទាំងអស់ មិនកំណត់ប្រភេទបន្លែឡើយ ជាពិសេសពពួកបន្លែស្លឹកបៃតងផ្សេងៗ ដូចជាត្រកួន ស្លឹកបាស សណ្តែកកួរ ល្ពៅ ប៉េងប៉ោះ ខាត់ណា ជាដើម។ បើបានទទួលទានបន្លែទាំងអស់នោះហើយ នឹងមានប្រយោជន៍ខ្លាំងណាស់ ព្រោះនឹងធ្វើឱ្យស្ត្រីមានគភ៌ខ្លួនឯង ទទួលបានវិតាមីនដែលចាំបាច់ និងសំខាន់ដល់ការរីកធំធាត់របស់ភ្នាសស្តើងៗ នៃកែវភ្នែក និងក្រពេញការធ្វើការងាររបស់គ្រាប់ភ្នែក។

ជំនឿដែលថា ហាមញ៉ាំទឹកតែ កាហ្វេ ព្រោះអាចធ្វើឱ្យរលូតបុត្រ…

តែការពិតវិញ…មានការសិក្សាវិភាគពីការញ៉ាំកាហ្វេ ឬភេសជ្ជៈដែលមានជាតិកាហ្វេអ៊ីនរបស់ស្ត្រីមានគភ៌ ចំនួន 1,063នាក់ បានរកឃើញថា ស្ត្រីមានផ្ទៃពោះ ដែលទទួលទានបរិមាណកាហ្វេអ៊ីន លើសពី 200មីល្លីក្រាមក្នុង 1ថ្ងៃ (ប្រមាណ 2ពែង ក្នុង 1ថ្ងៃ) អាចនឹងបណ្ដាលឱ្យកើតការរលូតបុត្របានដល់ទៅ 25ភាគរយ តែក៏មិនមែនមានន័យថា ហាមមិនឱ្យញ៉ាំនោះដែរ គ្រាន់តែត្រូវកំណត់ មិនឱ្យលើសពី 1កែវ ក្នុងរយៈពេល 2-3ថ្ងៃឡើយ អាចគ្រាន់តែក្រេបចឹបៗ ឱ្យបាត់ចង់ទៅបានហើយ។ ការញ៉ាំទឹកតែ ឬកាហ្វេ ច្រើនជ្រុលពេក នឹងធ្វើឱ្យគេងមិនលក់ សម្រាកមិនបានគ្រប់គ្រាន់ ឬអ្នកខ្លះអាចធ្វើឱ្យឆ្អល់ពោះ ដែលនឹងមានផលប៉ះពាល់ដល់សុខភាពរបស់ស្ត្រីមានគភ៌ខ្លួនឯង និងប៉ះពាល់ដល់ការរីកចម្រើនធំធាត់ និងការវិវឌ្ឍរបស់ទារកនៅក្នុងផ្ទៃបានទៀតផង។

ជំនឿថា ញ៉ាំថ្នាំខ្លាញ់ត្រី ប្រភេទគ្រាប់ នឹងធ្វើឱ្យឈាមបង្កកខ្លួនយឺត…

ការពិតវិញ៖ ខ្លាញ់ត្រី ឬ Fish Oil នេះ មិនដូចខ្លាញ់ថ្លើមត្រីទេ តែជាខ្លាញ់របស់ត្រី ដែលមានអាស៊ីតជាតិខ្លាញ់មិនកកដែលចាំបាច់ចំពោះរាងកាយ គឺអាស៊ីតខ្លាញ់នៅក្នុងក្រុមអូមេហ្កា3 ដែលជាចំណែកសំខាន់មួយរបស់កោសិកា ឬសាច់ភ្នាសរបស់រាងកាយ រួមទាំងខួរក្បាល គ្រាប់ឈាមប្រភេទផ្សេងៗ និងការបង្កើតភាពស៊ាំ ប្រឆាំងនឹងជំងឺរបស់រាងកាយ និងថែមទាំងជួយកាត់បន្ថយអាការរលាករបស់សន្លាក់ឆ្អឹង ដែលស្ត្រីមានគភ៌ច្រើនតែជួបប្រទះទៀតផង តែស្ត្រីមានផ្ទៃពោះ ក៏មិនគួរទទួលទានថ្នាំខ្លាញ់ត្រីប្រភេទគ្រាប់នេះច្រើនពេកដែរ តែគួរទទួលទានខ្លាញ់ត្រី ដែលមាននៅក្នុងសាច់ត្រីផ្សេងៗ ដូចជា សាច់ត្រីសាល់ម៉ុន ត្រីធូណា ត្រីឆ្ពុងក្រហម ជាដើមជំនួសវិញ ទើបជាការល្អ។

ក្រៅពីនេះ ស្ត្រីមានគភ៌គួរឈប់ទទួលទានអាហារបំប៉ន ប្រភេទថ្នាំខ្លាញ់ត្រីបែបគ្រាប់ ពេលមានផ្ទៃពោះបាន 6-7ខែ ព្រោះទោះជាវាជួយមិនឱ្យកើតមានភាពញ៉ុកណែនក្នុងសរសៃឈាមមែន តែវាអាចធ្វើឱ្យឈាម ក្របង្កកខ្លួននៅពេលកើតមានរបួសស្នាម ឬពេលវះកាត់ជាដើម។

បន្ទាប់ពីបានដឹងការពិតរបស់ជំនឿក្នុងរឿងអាហារការហូបចុក ដែលយើងបាននាំយកមកជម្រាបជូនហើយនោះ ស្ត្រីមានគភ៌ទាំងឡាយប្រហែលជាបានយល់ និងអាចជ្រើសរើសទទួលទានអាហារ បានយ៉ាងសប្បាយចិត្ត ដើម្បីសុវត្ថិភាពទាំងខ្លួនអ្នក និងកូននៅក្នុងផ្ទៃជាមិនខាន៕

រៀបរៀងដោយអ្នកគ្រូ ឆវី

July 21, 2021

រលកការឆ្លងលើកទី2 របស់កូវីដ-19 ធ្វើឱ្យលីគកំពូលវៀតណាម ពន្យារពេលរយៈពេលយូរ

លីគកំពូលវៀតណាម ត្រូវបានផ្អាកជាបណ្តោះអាសន្ន ក្រោយពីលេងបានត្រឹមពាក់កណ្តាលទី បន្ទាប់ពីរលកទី2 នៃការរាលដាលរបស់ជំងឺកូវីដ-19 បានវាយប្រហារប្រទេសក្បែរខាងកម្ពុជាមួយនេះយ៉ាងខ្លាំងក្លា ធ្វើឱ្យមានអ្នកឆ្លងរាប់ពាន់នាក់ជារៀងរាល់ថ្ងៃ។

ជុំវិញលទ្ធភាពនៃវិលត្រឡប់មកវិញ លីគកំពូលវៀតណាម ឬ V-League បានប្រកាសអំពីកាលបរិច្ឆេទហើយ គឺនឹងបន្តធ្វើការប្រកួតជាថ្មីឡើងវិញ នៅខែកុម្ភៈ ឆ្នាំ2022ឯណោះ។ ការពន្យារពេលយូរបែបនេះ គឺដើម្បីឱ្យរលកនៃការឆ្លងរាលដាលជំងឺដ៏កាចសាហាវនេះ បានធូរស្បើយបន្តិច និងណាមួយ គឺដើម្បីឱ្យសហព័ន្ធយកពេលនេះ ប្រមូលផ្តុំផ្តោតទៅលើក្រុមជម្រើសជាតិ និងឈុតស៊ីហ្គេមផង។

គួរឱ្យដឹងដែរថា លីគកំពូលវៀតណាម មានក្រុមចូលរួមទាំងអស់ 14ក្រុម ដោយ 2ក្រុមកំពូលតារាង នឹងទទួលបានកៅអីទៅ AFC Champions League និង AFC CUP តែយ៉ាងណាក្ដី រូបមន្តប្រកួត រដូវកាលនេះ វៀតណាមបានបែងចែកតារាងចំណាត់ថ្នាក់ជា2 ដូចរដូវកាលមុនដែរ ដើម្បីចំណេញពេលវេលា ដោយប្រកួតចប់ជើងទី1 ក្រុមកំពូលទាំង6 នឹងប្រកួតដណ្តើមចំណាត់កំពូល ចំណែកឯ 8ក្រុម ក្រោមៗមកទៀត នឹងត្រូវប្រជែងឱ្យផុតពីតំបន់កាត់ចេញ៕

July 21, 2021

វៀតណាម ផលិតបានវ៉ាក់សាំង COVID-19 គំរូ Sputnik-V ដំបូងរួចហើយ សម្រាប់ការពិសោធន៍

ថ្ងៃទី 21 កក្កដា នេះ សារព័ត៌មានរដ្ឋ រុស្ស៊ី ដកស្រង់សេចក្ដីប្រកាសមួយរបស់មូលនិធិវិនិយោគផ្ទាល់របស់ រុស្ស៊ី (Russian Direct Investment Fund / RDIF) ឱ្យដឹងថា វៀតណាម បានផលិតវ៉ាក់សាំងប្រឆាំង COVID-19 ប្រភេទ Sputnik-V គំរូសម្រាប់ពិសោធន៍ដំបូង ដែលអភិវឌ្ឍដោយ រុស្ស៊ី។ ក្រុមហ៊ុនជាដៃគូ VABIOTECH របស់ភាគី វៀតណាម ក៏បានទទួលស្គាល់ព័ត៌មាននេះ។

ស្ថានីយវិទ្យុ Sputnik និងទីភ្នាក់ងារសារព័ត៌មាន Reuters បានរាយការណ៍ថា គំរូរបស់វ៉ាក់សាំងពិសោធន៍នេះ នឹងត្រូវបានដឹកជញ្ជូនទៅកាន់មជ្ឈមណ្ឌល Gamaleya នៅប្រទេស រុស្ស៊ី ដើម្បីធ្វើការវាយតម្លៃគុណភាព។

នាយកមូលនិធិ RDIF លោក Kirill Dmitriev បាននិយាយថា «RDIF និង VABIOTECH កំពុងសហការគ្នាក្នុងការផ្ទេរបច្ចេកវិទ្យា។ RDIF កំពុងបង្កើនកម្លាំងផលិតវ៉ាក់សាំង Sputnik V ដើម្បីបង្កើនល្បឿនក្នុងការចាក់វ៉ាក់សាំង ដែលល្អបំផុតមួយក្នុងពិភពលោក»។

ប្រធានក្រុមហ៊ុន VABIOTECH នៃប្រទេស វៀតណាម លោក Do Tuan Dat ត្រូវបានដកស្រង់សំដីដែលថ្លែងនៅលើស្ថានីយវិទ្យុ Sputnik ឱ្យដឹងដែរថា «យើងសង្ឃឹមថា កិច្ចសហការរវាង RDIF និង VABIOTECH នឹងជួយផ្គត់ផ្គង់វ៉ាក់សាំងប្រឆាំង COVID-19 ប្រកបដោយគុណភាព និងតម្លៃសមរម្យ ដល់ ប្រទេស វៀតណាម និងបណ្ដាប្រទេស នៅតំបន់អាស៊ីអាគ្នេយ៍ទាំងមូល»។

Sputnik-V គឺជាវ៉ាក់សាំងបង្ការវីរុស COVID-19 ដែលត្រូវបានអនុម័តឱ្យប្រើប្រាស់ដំបូងគេក្នុងពិភពលោក។ យោងតាម RDIF មកដល់បច្ចុប្បន្ន ប្រទេស និងដែនដីជាង 60 ដែលមានប្រជាជនសរុប ជាង 3.7 ពាន់លាននាក់ បានចុះឈ្មោះប្រើប្រាស់វ៉ាក់សាំង Sputnik-V ។

តារាងវាយតម្លៃរបស់ក្រុមអ្នកវិទ្យាសាស្ត្ររុស្ស៊ី ដែលជាអ្នកបានអភិវឌ្ឍវ៉ាក់សាំង Sputnik-V បញ្ជាក់ថា វ៉ាក់សាំងនេះមានប្រសិទ្ធភាព 97.6% ក្នុងការទប់ស្កាត់ COVID-19។ វិទ្យាស្ថាន Gamaleya កាលពីថ្ងៃទី 29 មិថុនា បានឱ្យដឹងថា វ៉ាក់សាំងរបស់ រុស្ស៊ី នេះ ក៏មានប្រសិទ្ធភាពប្រហែល 90% ក្នុងការទប់ស្កាត់ COVID-19 ប្រភេទ Delta ផងដែរ។

បច្ចុប្បន្ន ឥណ្ឌា គឺជាប្រទេសមួយក្នុងចំណោមប្រទេសដែលផលិតវ៉ាក់សាំង Sputnik-V ច្រើនជាងគេក្នុងពិភពលោក ដោយផលិត 300 លានដូសជារៀងរាល់ឆ្នាំ ទៅតាមកិច្ចព្រមព្រៀង។ RDIF ក៏បានបន្ថែមថា ឈុតវ៉ាក់សាំង Sputnik-V ដំបូងដែលផលិតនៅ ឥណ្ឌា តាមគម្រោងនឹងត្រូវរួចរាល់នៅក្នុងខែកញ្ញា ឆ្នាំ 2021៕

ប្រភព៖ Reuters
ប្រែសម្រួល៖ បុត្រា

July 21, 2021

Author: សឿន សំណាង