សឿន សំណាង - La Reine Media

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 24 កក្កដា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 860 នាក់, អ្នកជាចំនួន 1,074 នាក់ និងអ្នកស្លាប់ចំនួន 32 នាក់បន្ថែមទៀត នៅក្នុងថ្ងៃទី 23 ខែកក្កដា ឆ្នាំ 2021។

គិតត្រឹមព្រឹកថ្ងៃទី 24 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 72,104 នាក់ ក្នុងនោះមានអ្នកជាសះស្បើយជាង 64,548 នាក់ និងអ្នកស្លាប់ 1,254 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 194,066,268 នាក់ ត្រូវបានរកឃើញ ក្នុងនោះមានជាង 176,154,166 នាក់បានជា, 4,160,263 នាក់បានស្លាប់ និងជាង 13,751,839 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 24, 2021

ជាប់ក្នុងរថភ្លើងក្រោមដីកំពុងលិចទឹក 3 ម៉ោង នៅ Zhengzhou ខ្ញុំគិតថា ខ្ញុំស្លាប់មិនខានឡើយ!

(ប្រទេសចិន)-នៅពេលទឹកជំនន់បានកើនឡើងដល់ដើមទ្រូង ស្ត្រីម្នាក់ក្នុងចំណោមអ្នកដំណើរជាង 500 នាក់ ដែលជាប់ក្នុងរថភ្លើងក្រោមដី ដែលកំពុងលិចទឹក បានទូរស័ព្ទទៅកាន់ញាតិរបស់ខ្លួន ដើម្បីឱ្យជួយរៀបចំកិច្ចការផ្សេងៗ បន្ទាប់ពីនាងបានស្លាប់ ព្រោះថា នាងជឿថា ខ្លួនមិនអាចនៅមានជីវិតទៀតឡើយ។

នៅព្រលប់ ថ្ងៃទី 20 កក្កដា ទីក្រុង Zhengzhou ដែលមានប្រជាជនចំនួន 12 លាននាក់ របស់ខេត្ត Henan ភាគកណ្ដាលប្រទេសចិន បានរងគ្រោះទឹកជំនន់យ៉ាងធ្ងន់ធ្ងរ ដោយសារភ្លៀងធ្លាក់ដូចគេហែកមេឃ។ ជំនន់ទឹកភ្លៀង បានធ្វើឱ្យខ្សែទឹកដែលប្រៀបដូចជាទឹកជ្រោះ ហូរចូលផ្លូវក្រោមដីនៃប្រព័ន្ធរថភ្លើងអគ្គិសនីក្រោមដី Zhengzhou និងបានហូរចាក់ចូលទៅក្នុងទូរថភ្លើង។

រៀបរាប់នៅលើបណ្ដាញសង្គម Weibo ស្ត្រីដែលជាអ្នកដំណើរម្នាក់ បានឱ្យដឹងថា ទឹកចាប់ផ្ដើមជ្រាបចូលក្នុងទូរថភ្លើង នៅពេលរថយន្តបានឈប់នៅកណ្ដាលផ្លូវចន្លោះចំណត់រថភ្លើងទាំងពីរ។ បុគ្គលិករបស់រថភ្លើង ដំបូងឡើយ បានណែនាំឱ្យអ្នកដំណើរជម្លៀសខ្លួនតាមផ្លូវក្រោមដី ប៉ុន្តែ ក្រោយមក ពួកគេក៏ត្រូវស្នើឱ្យនាំអ្នកដំណើរត្រលប់ក្រោយ ព្រោះនៅខាងមុខ ទឹកជំនន់កំពុងកើនឡើងខ្ពស់។

ពេលអ្នកដំណើរត្រលប់មកដល់ទូរថភ្លើង ទឹកបានឡើងដល់ត្រឹមចង្កេះទៅហើយ។ ទឹកនៅក្នុងទូរថភ្លើងចេះតែឡើងខ្ពស់ នៅពេលជំនន់ទឹកភ្លើងហូរចូលផ្លូវក្រោមដីកាន់តែខ្លាំង។

«យើងបានព្យាយាមតោងឡើងឈរលើកៅអី ប៉ុន្តែ ទឹកនៅតែឡើងដល់ដើមទ្រូង» ស្ត្រីអ្នកដំណើរខាងលើឱ្យដឹងដូច្នេះ។ «ខ្ញុំពិតជាភ័យខ្លាចខ្លាំងណាស់ តែអ្វីដែលត្រូវខ្លាចជាងគេ នោះគឺបរិមាណអុកស៊ីសែនក្នុងទូរថភ្លើងដែលបិទជិត កំពុងតែថយចុះ។ ខ្ញុំឃើញមនុស្សច្រើននាក់ ហាក់ពិបាកដកដង្ហើម»។

នាង និងអ្នកដំណើររាប់រយនាក់ នៅលើកំណត់ផ្លូវលេខ 5 នៃប្រព័ន្ធរថភ្លើងក្រោមដីក្នុងក្រុង Zhengzhou កំពុងឆ្លងកាត់គ្រោះថ្នាក់ដ៏សែនរន្ធត់ ដែលកើតមាននៅក្រោមដី ក្នុងគ្រាដែលទីក្រុងទាំងមូល កំពុងរងគ្រោះដោយជំនន់ទឹកភ្លើង «មួយពាន់ឆ្នាំមានម្ដង»។

ជាប់ក្នុងទូរថភ្លើងដែលកំពុងលិចបន្តិចម្ដងៗ អ្នកដំណើរត្រូវតោងបង្កាន់ដៃដែលភ្ជាប់នឹងផ្នែកខាងក្រោមនៃដំបូងរថភ្លើង ដើម្បីអាចដកដង្ហើមបាន។

ស្ត្រីខាងលើ បានឮសំឡេងនារីម្នាក់ កំពុងនិយាយទូរស័ព្ទ និងអានទិន្នន័យលម្អិតអំពីគណនីធនាគាររបស់ខ្លួន ទៅឱ្យគ្រួសារ ហើយក៏បានសួរខ្លួនឯងថា គួរធ្វើដូចនាងម្នាក់នោះដែរ ឬអត់។ នាងក៏បានសម្រេចចិត្ត ផ្ញើសារទៅកាន់ម្ដាយ ដោយប្រាប់ថា នាង «ប្រហែលជាមិនរួចផុតពីការស្លាប់ឡើយ»។

ពេលម្ដាយស្ត្រីនេះហៅទូរស័ព្ទមកវិញ នាងមិនអាចរៀបរាប់បាន ដោយគ្រាន់តែប្រាប់ថា ខ្លួនកំពុងរង់ចាំការជួយសង្គ្រោះ ហើយក៏បានផ្ដាច់ទូរស័ព្ទ។ ក្នុងរយៈពេលជិត 3 ម៉ោង នាង និងអ្នកដំណើរផ្សេងទៀត ត្រូវរង់ចាំការជួយសង្គ្រោះ នៅក្នុងស្ថានភាពដូចកំពុងស្ថិតកៀកនឹងមាត់ជ្រោះ។

មិនយូរប៉ុន្មាន នាងក៏សន្លាប់ដោយសារខ្វះអុកស៊ីសែន ប៉ុន្តែ ក្រោយមកក៏បានដឹងខ្លួន ព្រោះតែសំឡេងរោទ៍របស់ទូរស័ព្ទ។ ម្ដាយរបស់នាង បានទូរស័ព្ទមកប្រាប់ថា កម្លាំងជួយសង្គ្រោះ កំពុងធ្វើដំណើរមកហើយ។

ក្រោយមកបន្តិច នាងក៏បានឮសំឡេងជើងរត់នៅលើដំបូលរថភ្លើង ហើយក្រុមពន្លត់អគ្គិភ័យក៏ចាប់ផ្ដើមវាយបំបែកបង្អួច ដើម្បីឱ្យខ្យល់ចេញចូល។ អ្នកដំណើរក៏ត្រូវបាននាំចេញជាបន្តបន្ទាប់។ អ្នកសន្លប់ ត្រូវនាំចេញទៅមុន បន្ទាប់មកគឺដល់វេនស្ត្រី។

ក៏ប៉ុន្តែ ក្រោយមកមិនយូរប៉ុន្មាន អត្ថបទរបស់នាង ដែលបានបង្ហោះលើបណ្ដាញសង្គម Weibo ក៏ត្រូវបានគេលុបចោល ដោយមិនដឹងមូលហេតុ។

ស្ត្រីម្នាក់ផ្សេងទៀត បានរៀបរាប់ប្រាប់សារព័ត៌មាន China Youth Daily ថា នាងបានយំយ៉ាងអណ្ដឺតអណ្ដក នៅពេលឃើញទឹកជំនន់ហូរចូលទូរថភ្លើង។ ជុំវិញនាង មនុស្សជាច្រើនក៏កំពុងយំខ្សឹកខ្សួល ភ័យរន្ធត់។ ប៉ុន្តែ ក្រោយមក គ្រប់គ្នាបានលើកទឹកចិត្តគ្នាទៅវិញ ទៅមក ហើយបន្តិចម្ដងៗ គ្រប់គ្នាក៏សម្រេចនៅស្ងៀមស្ងាត់ដើម្បីរក្សាកម្លាំង។

ស្ត្រីខាងលើរៀបរាប់ថា ការហៅទូរស័ព្ទទៅសុំជំនួយសង្គ្រោះបន្ទាន់ សុទ្ធតែឥតប្រយោជន៍។ ប្រហែលម៉ោង 21 ទឹកនៅក្នុងទូរថភ្លើង បានឡើងដល់ត្រឹមបំពង់ក។ ក្នុងចំណោមអ្នកដំណើរដែលនៅក្បែរនាង ក៏មានស្ត្រីមានផ្ទៃពោះ ក្មេង និងមនុស្សចាស់។ ដៃជើងរបស់ពួកគេចាប់ផ្ដើមញ័រ ក្អួត និងដកដង្ហើមញាប់។

«ខ្ញុំតក់ស្លុតណាស់ នៅពេលឃើញទឹកនៅខាងក្រៅរថភ្លើង បានឡើងខ្ពស់ជាងក្បាល។ ខ្ញុំក៏បានត្រៀមខ្លួនដើម្បីទទួលយកការពិតនេះ។ ខ្ញុំពិតជាមិនអាចនៅមានជីវិតទៀតទេ» នាងរៀបរាប់បន្ថែម។

ទូរស័ព្ទនៅសល់ថ្មប្រហែល 30% នាងក៏បិទកម្មវិធីទាំងអស់ ហើយផ្ញើសារទៅកាន់ញាតិ មិត្ត នៅលើ WeChat ប៉ុន្តែ មិនហ៊ានប្រាប់ឪពុក-ម្ដាយ។ មុនម៉ោង 21 នាងផ្ញើសារប្រាប់មិត្តភ័ក្ដិ ដើម្បីឱ្យពួកគេសុំជំនួយសង្គ្រោះបន្ទាន់។ ប៉ុន្តែ ចាប់ពីម៉ោង 21 តទៅ នាងផ្ដោតលើការស្នើឱ្យគ្រប់គ្នាជួយរៀបចំកិច្ចការផ្សេងៗ បើសិនជាខ្លួនត្រូវបាត់បង់ជីវិតក្នុងហេតុការណ៍នេះ។

សំណាងល្អណាស់ ក្រុមអ្នកសង្គ្រោះក៏បានមកជួយទាន់ពេល មុននឹងយមរាជមកដល់។ ក្រុមមន្ត្រីឱ្យដឹងថា អ្នកដំណើរជាង 500 នាក់ ត្រូវបានជួយនាំចេញពីទូរថភ្លើងដែលកំពុងលិចក្នុងទឹក ប៉ុន្តែ នៅតែមានជនរងគ្រោះ 12 នាក់បានស្លាប់ និង 5 នាក់រងរបួស៕

ប្រភព៖ SCMP
ប្រែសម្រួល៖ បុត្រា

July 24, 2021

សហភាពអឺរ៉ុប អនុម័តឱ្យប្រើវ៉ាក់សាំង Moderna សម្រាប់ក្មេងជំទង់ចាប់ពីអាយុ 12 ឆ្នាំ

ស្ថាប័នគ្រប់គ្រងឱសថអឺរ៉ុប បានអនុញ្ញាតឱ្យប្រើប្រាស់វ៉ាក់សាំងបង្ការ COVID-19 Moderna សម្រាប់ក្មេងជំទង់ចាប់ពីអាយុ 12-17 ឆ្នាំ ដូច្នេះ វាបានក្លាយជាវ៉ាក់សាំងទីពីរដែលត្រូវបានអនុញ្ញាតឱ្យប្រើប្រាស់សម្រាប់ក្មេងជំទង់នៅលើទ្វីបនេះ។

«ការប្រើប្រាស់វ៉ាក់សាំង Moderna សម្រាប់ក្មេងចាប់ពីអាយុ 12-17 ឆ្នាំ គឺដូចទៅនឹងមនុស្សចាប់ពីអាយុ 18 ឆ្នាំឡើងទៅ» ស្ថាប័នគ្រប់គ្រងឱសថអឺរ៉ុប (EMA) បានឱ្យដឹងដូច្នេះកាលពីថ្ងៃទី 23 កក្កដា។ វ៉ាក់សាំងនេះនឹងត្រូវបានចាក់ពីរលើក ហើយក្នុងមួយលើកៗ មានគម្លាតពីគ្នា 4 សប្ដាហ៍។

EMA បានឱ្យដឹងថា ពួកគេបានស្រាវជ្រាវលើផលប៉ះពាល់របស់វ៉ាក់សាំង Moderna ចំពោះក្មេងចាប់ពីអាយុ 12-17 ឆ្នាំ។ ការស្រាវជ្រាវបង្ហាញថា ការបង្កើតអង្គបដិប្រាណ Moderna នៅលើក្មេងចាប់ពី 12-17 ឆ្នាំ គឺ ប្រហាក់ប្រហែលនឹងមនុស្សពេញវ័យដែលមានអាយុចាប់ពី 18-25 ឆ្នាំ។

កាលពីខែឧសភា Pfizer/BioNTech បានក្លាយជាវ៉ាក់សាំងបង្ការ COVID-19 ដំបូងគេបង្អស់ ដែលត្រូវបានអនុម័តឱ្យប្រើប្រាស់ចំពោះក្មេងជំទង់នៅអឺរ៉ុប។

EMA ឱ្យដឹងថា ផលប៉ះពាល់របស់វ៉ាក់សាំងនៅលើក្មេង ប្រហាក់ប្រហែលនឹងផលប៉ះពាល់នៅលើមនុស្សពេញវ័យ រួមមានដូចជា ឈឺ និងហើមត្រង់កន្លែងចាក់ អស់កម្លាំង ឈឺក្បាល ឈឺសាច់ដុំ និងសន្លាក់ ហើមកូនកណ្ដុរ (កូនកណ្ដុរឈាមស) ព្រឺរងា រកកលក្អួត ក្អួតចង្អោរ និងក្ដៅខ្លួន។ «អាការទាំងនេះ តែងកើតឡើងក្នុងសភាពស្រាល ឬមធ្យម ហើយបាត់ទៅវិញបន្តិចម្ដង» នេះបើតាម EMA៕

ប្រភព៖ Reuters
ប្រែសម្រួល៖ បុត្រា

July 24, 2021

កំពូលតារាសំដែង Angelina Jolie ដើរទេសចរណ៍ជាមួយកូនៗ ក្រោយជាប់ក្នុងផ្ទះដោយសារ COVID-19

កំពូលតារាសំដែងជនជាតិអាមេរិកាំង នាង Angelina Jolie នាំកូនៗទៅកាន់ទីក្រុងប៉ារីស ប្រទេសបារាំង ដើម្បីលម្ហែកាយ បន្ទាប់ពីត្រូវនៅផ្ទះជាងមួយឆ្នាំ ដោយសារខ្លាច COVID-19 និងដោះស្រាយបញ្ហានៅតុលាការ ទាក់ទិននឹងសិទ្ធិចិញ្ចឹមកូនៗ ជាមួយនឹង Brad Pitt។

យោងតាម Daily Mail កាលពីថ្ងៃទី 22 កក្កដា Jolie បាននាំកូនៗ រួមមាន Pax Thien, Zahara, Shiloh និង Knox ដើរកំសាន្ត និងទិញទំនិញ។ កូនប្រុសច្បង Maddox និងកូនស្រីពៅ Vivienne មិនបានបង្ហាញខ្លួនជាមួយម្ដាយនោះទេ។ ពួកគេទាំង 5 នាក់ ស្លៀកពាក់យ៉ាងសាមញ្ញ និងពាក់ម៉ាស់ផងដែរ។ ពួកគេក៏បានចូលភោជនីយដ្ឋានមួយនៅក្បែរតួ Eiffel ដើម្បីទទួលទានអាហារ។

ក្នុងខែមិថុនា កំពូលតារាសំដែងរូបនេះ បាននាំកូនៗទៅកាន់ទីក្រុងនីវយ៉ក លេងប្រហែលមួយសប្ដាហ៍ ក្នុងឱកាសខួបអាយុ 46 ឆ្នាំ។ នៅទីនេះ នាងក៏បានទៅសួរសុខទុក្ខអតីតស្វាមី Jonny Lee Miller ផងដែរ។ មុននោះ Angelina Jolie កម្រនឹងចេញទៅបរទេសណាស់ ក្នុងអំឡុងពេញមួយឆ្នាំ។ ភាគច្រើន នាងនៅ California ដើម្បីមើលថែកូនៗ ថតកុន និងចូលរួមសវនាការដណ្ដើមសិទ្ធិចិញ្ចឹមកូនជាមួយនឹង Brad Pitt។

កាលពីចុងខែឧសភា តុលាការបានអនុញ្ញាតឱ្យ Brad Pitt មានសិទ្ធិចិញ្ចឹមកូន ស្មើនឹង Angelina Jolie។ នាងមិនសុខចិត្ត ដោយយល់ថា ចៅក្រមបានរំលោភលើច្បាប់របស់រដ្ឋ California ព្រោះថា Brad Pitt ធ្លាប់ប្រើអំពើហិង្សាក្នុងគ្រួសារ ផ្ទុយពីផលប្រយោជន៍របស់ក្មេង។ នាងនឹងបន្តធ្វើការតវ៉ា ដើម្បីទាមទារសិទ្ធិចិញ្ចឹមកូនទាំងស្រុងឡើងវិញ។

Brad Pitt និង Angelina Jolie បានស្គាល់គ្នា នៅពេលថតកុន រឿង Mr. & Mrs. Smith (2005)។ ក្រោយមក Pitt បានលែងលះជាមួយភរិយាឈ្មោះ Jennifer Aniston ដើម្បីមករក Jolie។ អ្នកទាំងពីរក៏បានរៀបការកាលពីឆ្នាំ 2014 និងមានកូនជាមួយគ្នាចំនួន 6 នាក់។ ឆ្នាំ 2016 Jolie បានប្ដឹងលែងលះ ដោយមូលហេតុថា មានការយល់ឃើញខុសគ្នាជាច្រើនចំនុច ដែលមិនអាចផ្សះផ្សានឹងគ្នាបាន៕

ប្រភព៖ Daily Mail
ប្រែសម្រួល៖ បុត្រា

July 23, 2021

ពាណិជ្ជកម្ម អាមេរិក-ចិន ល្អដូចមិនធ្លាប់មានភាពតានតឹង និង COVID-19

យោងតាមសារព័ត៌មាន Bloomberg សហរដ្ឋអាមេរិក និងចិន កំពុងដោះដូរទំនិញក្នុងល្បឿនលឿនបំផុត ធៀបនឹងប៉ុន្មានឆ្នាំកន្លងមកនេះ ហើយប្រៀបដូចជាពុំធ្លាប់មានសង្គ្រាមពាណិជ្ជកម្ម ឬវីរុស COVID-19 ដូច្នោះដែរ។

រយៈពេល 18 ខែ បន្ទាប់ពីអាជ្ញាធររបស់លោក Trump បានចុះកិច្ចព្រមព្រៀងផ្អាកសង្គ្រាមពាណិជ្ជកម្ម កង្វះផ្នែកពាណិជ្ជកម្មរបស់ សហរដ្ឋអាមេរិក នៅតែមិនទាន់បានកាត់បន្ថយ ក្នុងនោះ ការយកពន្ធនានា នៅតែត្រូវបានអនុវត្ត ហើយក៏មិនទាន់មានកិច្ចចរចាណាមួយស្ដីពីបញ្ហាសេដ្ឋកិច្ចផ្សេងៗនៅឡើយ។ ប៉ុន្តែ ពាណិជ្ជកម្មទ្វេភាគី គឺជាវិស័យដែលមានស្ថិរភាព នៅក្នុងស្ថានការណ៍ដែលទំនាក់ទំនងរបស់ប្រទេសទាំង 2 បន្តអាក្រក់ឡើងៗ ទាក់ទិននឹងបញ្ហាប្រភពរបស់វីរុស COVID-19 បញ្ហាហុងកុង និង តៃវ៉ាន់ ។ល។

កាលពីខែកុម្ភ ឆ្នាំ 2020 ចំណូលបានមកពីវិស័យពាណិជ្ជកម្ម រវាង អាមេរិក-ចិន បានថយចុះ 19 ពាន់លានដុល្លារ ដោយសារតែចិនបានបិទរោងចក្រជាច្រើន ព្រោះតែរោគរាតត្បាត។ ប៉ុន្តែ យោងតាមទិន្នន័យផ្លូវការរបស់ចិន តួលេខនេះបានងើបឡើងដល់កំណត់ត្រាថ្មីក្នុងឆ្នាំ 2020។ ការងើបឡើងនេះ ទំនងជានឹងនៅតែបន្ត គ្រាដែលចិន ទិញកសិផលរាប់លានតោនពី សហរដ្ឋអាមេរិក នៅក្នុងឆ្នាំនេះ និងឆ្នាំក្រោយ ទន្ទឹមនឹងការដែលពលរដ្ឋអាមេរិកដែលនៅជាប់ក្នុងផ្ទះ នៅតែបន្តទិញទំនិញយ៉ាងច្រើនមិនធ្លាប់មានពីមុនមក។

សកម្មភាពពាណិជ្ជកម្មមមាញឹកឡើងវិញ បើទោះជាមានការព្យាករទាក់ទងនឹងបញ្ហាពន្ធដា ក្នុងនោះ តម្លៃខ្ទង់សែនលានដុល្លារនៃទំនិញរបស់ចិន នឹងត្រូវចែករំលែកដល់បណ្ដាខ្សែច្រវាក់ផ្គត់ផ្គង់។ ប៉ុន្តែ ភាគីទាំងពីរ បានរៀនរស់ជាមួយនឹងប្រភេទពន្ធផ្សេង។ បណ្ដាក្រុមហ៊ុនចិន បញ្ជាទិញទំនិញច្រើនជាងមុន ដើម្បីឆ្លើយតបនឹងលក្ខខណ្ឌនៃកិច្ចព្រមព្រៀងស្ដីពីពាណិជ្ជកម្ម ឆ្នាំ 2020។ ចំណែក សហរដ្ឋអាមេរិក វិញ ទិញទំនិញទាំងឡាយណាដែលខ្លួនមិនអាចទិញពីកន្លែងផ្សេង ដើម្បីផ្គត់ផ្គង់តម្រូវការរបស់គ្រួសារនានា ដោយប្រើប្រាស់កញ្ចប់ជំនួយសេដ្ឋកិច្ចរាប់លានលានដុល្លាររបស់រដ្ឋាភិបាល។

ទំនិញចិន ដែលបាននាំចូល សហរដ្ឋអាមេរិក កើនឡើងខ្ពស់ជាងទំនិញដែលបាននាំពី សហរដ្ឋអាមេរិក មកប្រទេស ចិន

«យើងឃើញថា តម្រូវការប្រើប្រាស់យ៉ាងខ្លាំងក្លា កំពុងតែកើតមានឡើងនៅក្នុងរដូវ COVID-19 ហើយផលិតផលនាំចូល ក៏កំពុងកើនឡើងខ្ពស់។ នោះជាសញ្ញាបង្ហាញថា សេដ្ឋកិច្ចនៅតែបន្តងើបឡើង» លោក Jonathan Gold អនុប្រធានផ្នែកផ្គត់ផ្គង់ និងគោលនយោបាយពន្ធដា នៃក្រុមហ៊ុន National Retail Federation ឱ្យដឹងដូច្នេះ។

ក្នុងដំណាក់កាលដូចគ្នា ទំនិញដែលនាំចូលពីកូរ៉េខាងត្បូង និងតៃវ៉ាន់ ទៅកាន់ សហរដ្ឋអាមេរិក ក៏បានកើនឡើងខ្ពស់ផងដែរ។ ប៉ុន្តែ ជិតពាក់កណ្ដាលក្នុងចំណោមទំនិញតម្លៃ 259 ពាន់លានដុល្លារ ដែលចេញចូលតាមកំពង់ផែ Los Angeles (កំពង់ផែធំបំផុតរបស់អាមេរិក) មានជាប់ទាក់ទងនឹងប្រទេសចិន និង ហុងកុង។

Jonathan Gold និយាយថា «ពន្ធដា និងថ្លៃដឹកជញ្ជូនកើនឡើង សុទ្ធតែប៉ះពាល់ដល់ផលប្រយោជន៍របស់ក្រុមហ៊ុននានា។ រដ្ឋាភិបាលរបស់លោក Biden បច្ចុប្បន្នមិនទាន់ឱ្យដឹងថា តើនឹងអនុវត្តកិច្ចព្រមព្រៀងបន្តទៀត ឬយ៉ាងណានៅឡើយ ប៉ុន្តែ កំពុងតែពិចារណាអំពីគោលនយោបាយរបស់ សហរដ្ឋអាមេរិក ចំពោះ ចិន ទាក់ទងនឹងបញ្ហាពាណិជ្ជកម្មនេះ៕

ប្រភព៖ Bloomberg
ប្រែសម្រួល៖ បុត្រា

July 23, 2021

ក្រុមហ៊ុនចិន បង្ហាញឡានហោះកំណែថ្មី អាចដឹកមនុស្សបាន 2 នាក់

ក្រុមហ៊ុន XPeng របស់ប្រទេសចិន កាលពីថ្ងៃទី 18 កក្កដា បានបង្ហាញកំណែរថយន្តហោះថ្មីបំផុត អាចដឹកមនុស្សបាន 2 នាក់ និងសម្រាប់ធ្វើចរាចរណ៍ក្នុងទីក្រុង។

ក្រុមហ៊ុនផលិតរថយន្តអគ្គិសនី XPeng របស់ចិន បានតាំងបង្ហាញ X2 ដែលជាឡានហោះកំណែថ្មីបំផុតរបស់ខ្លួន នៅក្នុងពិព័រណ៍ សៀងហៃ។

XPeng X2 ធ្វើអំពីសរសៃកាបោន និងប្រើប្រាស់ស្លាបកង្ហារចំនួន 8 ដែលបំពាក់លើដងចំនួន 4 ព្រមទាំងមានអាគុយចំនួន 8 ក្រុមដាច់ដោយឡែកពីគ្នា។ នេះគឺជាយានជំនិះដែលផ្ទុកមនុស្សបាន 2 នាក់ ហើយហោះឡើង និងចុះចតដោយបញ្ឈរត្រង់ដំបូងគេ ដែលមានលក្ខណៈជាបន្ទប់បិទជិត និងអាចផ្ទុកទម្ងន់ 200 គីឡូក្រាម។

X2 ដំណើរការដោយថាមពលអគ្គិសនីទាំងស្រុង ហើយអាចហោះហើរក្នុងរយៈពេល 35 នាទីជាប់ៗគ្នា បន្ទាប់ពីបញ្ចូលថាមពលពេញ។ វាត្រូវបានរចនាឡើងដើម្បីអាចហោះឡើងដល់កម្ពស់ចាប់ពី 300 ដល់ 500 ម៉ែត្រ ធៀបនឹងផ្ទៃដី ជាមួយនឹងល្បឿនអតិបរមា 130 គីឡូម៉ែត្រ/ម៉ោង។

https://www.youtube.com/watch?v=VjsDtOLJvms

មុខងារបើកបរស្វ័យប្រវត្ត រួមផ្សំនឹងការបើកបរដោយមនុស្ស របស់យាននេះ គឺអាចឆ្លើយតបទៅតាមតម្រូវការធ្វើដំណើររយៈចម្ងាយជិតនៅក្នុងទីក្រុង។ ទន្ទឹមនឹងនេះ វាក៏អាចប្រើប្រាស់សម្រាប់ការល្បាតពីលើអាកាស ការជួយសង្គ្រោះ ឬដឹកជញ្ជូនផ្នែកសុខាភិបាល។ល។

ប្រភព៖ Planetcar
ប្រែសម្រួល៖ បុត្រា

July 23, 2021

Olympic Tokyo 2020 បើកជាផ្លូវការនៅថ្ងៃនេះ (23/7)

ម៉ោង 18 ព្រលប់ នៃ ថ្ងៃទី 23 កក្កដា ឆ្នាំ 2021 (ម៉ោងនៅកម្ពុជា) ពិធីបើកការប្រកួតកីឡា Olympic Tokyo 2020 នឹងត្រូវធ្វើឡើងជាផ្លូវការនៅកីឡដ្ឋានជាតិតូខ្យូ ដែលស្ថិតក្នុងរាជធានីតូខ្យូ នៃប្រទេស ជប៉ុន។

ក្រោយរយៈពេលជាច្រើនថ្ងៃដែលបានរង់ចាំ ចុងក្រោយ Olympic Tokyo 2020 ក៏នឹងត្រូវបើកជាផ្លូវការនៅម៉ោង 18 នៃថ្ងៃទី 23 ខែកក្កដា ម៉ោងនៅភ្នំពេញ។ មុនពេលពិធីបើកការប្រកួតជាផ្លូវការនេះ កីឡាចំនួន 4 ប្រភេទ ត្រូវបានបើកការប្រកួត ក្នុងនោះមាន កីឡាបាល់ទាត់ បាល់ទន់ (Softball) បាញ់ធ្នូ និង ចែវទូក (rowing)។

ដំបូងឡើយ Olympic Tokyo 2020 គ្រោងបើកនៅក្នុងឆ្នាំ 2020 ប៉ុន្តែ ត្រូវពន្យារពេល 1 ឆ្នាំ ដោយសារ COVID-19។ បច្ចុប្បន្ន រោគរាតត្បាតនេះ ក៏កំពុងតែបង្កភាពស្មុគស្មាញនៅប្រទេស ជប៉ុន ប៉ុន្តែ គណៈកម្មការ Olympic Tokyo 2020 នៅតែសម្រេចឱ្យប្រារព្ធព្រឹត្តិការណ៍អូឡាំពិកលើកទី 32 នេះ ក្នុងលក្ខខណ្ឌទប់ស្កាត់ និងប្រយុទ្ធប្រឆាំងយ៉ាងតឹងរ៉ឹង។

ព្រោះតែ COVID-19 កម្មវិធីមួយចំនួននៃគម្រោងបើកព្រឹត្តិការណ៍កីឡា Olympic Tokyo 2020 ក៏ត្រូវបានកាត់ចោល ធៀបនឹងគម្រោងដំបូង។ ប៉ុន្តែ ការហែក្បួនរបស់ក្រុមកីឡាករនានា និងការអុជភ្លើងគប់ នៅតែត្រូវធ្វើឡើងដូចធម្មតា។

តាមផែនការ មហាក្សត្រជប៉ុន Naruhito នឹងជាអ្នកប្រកាសបើកព្រឹត្តិការណ៍កីឡាអូឡាំពិក (Olympic Tokyo 2020) លើកនេះ។ ពិធីបើកការប្រកួតកីឡាអូឡាំពិក ឆ្នាំនេះ នឹងមានវត្តមានរបស់មេដឹកនាំប្រទេស និងដែនដីចំនួន 15 ក្នុងនោះក៏មានប្រធានាធិបតីបារាំង Emmanuel Macron និងភរិយារបស់ប្រធានាធិបតីសហរដ្ឋអាមេរិក Joe Biden លោកស្រី Jill Biden ។ល។

ប្រភព៖ CNN
ប្រែសម្រួល៖ បុត្រា

July 23, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 23 កក្កដា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 825 នាក់, អ្នកជាចំនួន 791 នាក់ និងអ្នកស្លាប់ចំនួន 34 នាក់បន្ថែមទៀត នៅក្នុងថ្ងៃទី 22 ខែកក្កដា ឆ្នាំ 2021។

គិតត្រឹមព្រឹកថ្ងៃទី 23 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 71,244 នាក់ ក្នុងនោះមានអ្នកជាសះស្បើយជាង 63,474 នាក់ និង អ្នកស្លាប់ 1,222 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 193,422,020 នាក់ ត្រូវបានរកឃើញ ក្នុងនោះមានជាង 175,737,680 នាក់បានជា, 4,151,655 នាក់បានស្លាប់ និងជាង 13,532,680 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 23, 2021

អតីតមន្ត្រីយោធាជើងទឹក SEAL បង្ហាញពីភាពអស្ចារ្យ ពេលក្រោកពីដេក ម៉ោង 4 និង 30 នាទី៖ «ឆាប់ក្រោក ជីវិតនឹងប្ដូរផ្លាស់!»

Willink ជាមនុស្សម្នាក់ដែលមានទម្លាប់ក្រោកពីដំណេកនៅវេលាម៉ោង 4 និង 30 នាទីព្រឹក ហើយគាត់បញ្ជាក់ថា គ្រប់គ្នាអាចធ្វើបាន។ ការមានវិន័យក្នុងការក្រោកពីព្រលឹម «មិនមែនកើតមក យកមកតាមនោះឡើយ» គ្រូបង្វឹក និងជាម្ចាស់សៀវភៅជាច្រើនក្បាលរូបនេះ បានប្រាប់ទំព័រ Make It របស់ CNBC ដូច្នេះ។

លោក Jocko Willink អតីតមន្ត្រីមួយរូបនៃអង្គភាពពិសេសរបស់កងទ័ពជើងទឹក សហរដ្ឋអាមេរិក និយាយថា «ពុំមានអ្វីលំបាកសម្រាប់ការឆាប់ក្រោកពីគេងនៅពេលព្រលឹម។ ប្រការដែលអ្នកត្រូវធ្វើ នោះគឺ នៅពេលនាឡិការោទ៍ អ្នកត្រូវតែក្រោក។ ការដាក់វិន័យសម្រាប់ជីវិតគឺ សាមញ្ញដូច្នេះ»។ Willink បញ្ជាក់ថា គ្រប់គ្នាអាចធ្វើបាន ដោយគ្រាន់តែកំណត់ឱ្យបានច្បាស់ថា នោះគឺជាអ្វីដែលអ្នកនឹងធ្វើ។

«ពិតណាស់ អ្នកក៏អាចជ្រើសរើសជីវភាពតាមរបៀបផ្សេងពីនេះ។ អ្នកអាចសម្រេចថា នឹងនៅលើគ្រែ និងមិនគ្រប់គ្រងពេលវេលានៅក្នុងថ្ងៃនេះ ហើយទុកឱ្យវាធ្វើជាម្ចាស់ជីវិតរបស់អ្នក ប៉ុន្តែ ខ្ញុំចង់ប្រាប់អ្នកថា ជីវភាពប្រចាំថ្ងៃដែលអ្នកធ្វើជាម្ចាស់ នោះនឹងល្អប្រសើរជាងឆ្ងាយ បើធៀបនឹងការបណ្ដោយឱ្យជីវភាពគ្រប់គ្រងលើអ្នក។ ចូរកុំទុកឱ្យបញ្ហានេះកើតឡើង។ ចូរតតាំងប្រឆាំងនឹងវា!» លោក Jocko Willink បន្ថែម។

យោងតាមការស្រាវជ្រាវដែលអូសបន្លាយពេល 5 ឆ្នាំ អំពីសេដ្ឋីដែលរកស៊ីតាំងពីបាតដៃទទេ អ្នកនិពន្ធ Thomas C. Corley បានរកឃើញថា ជិត 50% ក្នុងចំណោមសេដ្ឋីទាំងនោះ តែងតែក្រោកយ៉ាងតិច 3 ម៉ោង មុនពេលថ្ងៃធ្វើការថ្មីមកដល់។

«ការក្រោកពីព្រលឹមដើម្បីបង្ហើយការងារ នឹងជួយឱ្យអ្នកគ្រប់គ្រងបានច្រើនលើជីវិតរបស់ខ្លួន» Corley បានសរសេរដូច្នេះ នៅក្នុងសៀវភៅ “Change Your Habits, Change Your Life”។ «វានាំមកនូវអារម្មណ៍ជឿជាក់ថា អ្នកពិតជាកំពុងកំណត់ទិសដៅនៃជីវិត។ វានាំមកនូវថាមពលសម្រាប់ជីវិត»។

ពេលព្រឹក អាចជាវេលាដែលមានប្រសិទ្ធភាពបំផុតនៅក្នុងមួយថ្ងៃៗ ព្រោះវាអនុញ្ញាតឱ្យអ្នកបំពេញការងារដោយជោគជ័យ មុនពេលមានការរំខានអារម្មណ៍ពីបរិយាកាសនៅជុំវិញ នេះបើតាមសារព័ត៌មាន The Wall Street Journal ដែលបានចេញផ្សាយកាលពីឆ្នាំ 2016។ អ្នកឯកទេសផ្លូវចិត្ត Josh Davis និងអ្នកនិពន្ធរបស់សៀវភៅ “Two Awesome Hours” បានប្រាប់ទស្សនាវដ្ដីថា «នៅពេលអ្នកស្ថិតក្នុងបរិយាកាសស្ងប់ស្ងាត់ ហើយអ្នកក៏មិនបានបែកអារម្មណ៍ដោយសារការរំខានពីអ្នកដទៃ នោះប្រសិទ្ធភាពនៃការបំពេញការងាររបស់អ្នក នឹងកើនឡើងខ្ពស់ជាងធម្មតា។ អ្នកអាចបំពេញកិច្ចការសំខាន់ៗបានយ៉ាងលឿន ដោយជោគជ័យ និងដោយពេញចិត្ត»។

ជាមូលដ្ឋាន ការឆាប់ក្រោកពីព្រឹកគឺ មានន័យថា អ្នកកំពុងបំបាត់កត្តារំខានជាច្រើន មានដូចជា ការរំខានពីសារ ឬអ៊ីមេល និងការជូនដំណឹងនៅលើបណ្ដាញសង្គម។ល។ Davis និយាយថា «ពុំមានអ្នកណាម្នាក់ចង់ឱ្យអ្នកផ្ញើអ៊ីមេល ឬលើកទូរស័ព្ទនៅវេលាម៉ោង 4 ព្រឹកនោះឡើយ ហើយក៏ពុំមានអ្នកណាគេបង្ហោះអ្វីមួយនៅលើ Facebook នោះដែរ។ ដូច្នេះ អ្នកបានលុបបំបាត់កត្តាអូសទាញពីខាងក្នុង និងពីខាងក្រៅ»។

លើកក្រោយ នៅពេលអ្នកឃើញថា ខ្លួនត្រូវបានអូសទាញ និងចង់ដេកបន្តទៀត សូមនឹកដល់ឃ្លាដែល Willink ធ្លាប់បាននិយាយថា «បើសិនជាខ្ញុំកំពុងដេកលើគ្រែ ហើយថ្ងៃនោះបានអូសទាញខ្ញុំ ដោយវាប្រាប់ឱ្យខ្ញុំបន្តទាញផួយដណ្ដប់ដល់ក និងដេកអង្កួញជើងជាថ្មី នោះគឺជាប្រការដែលរំលោភលើខ្ញុំ ហើយខ្ញុំនឹងមិនទទួលយកវាឡើយ។ អ្វីដែលខ្ញុំនឹងធ្វើ នោះគឺត្រូវហែក បំបែកការអូសទាញនោះ ខ្ញុំនឹងក្រោកចេញពីគ្រែ ហើយខ្ញុំនឹងដោះស្រាយនូវអ្វីដែលខ្ញុំត្រូវធ្វើ។ ខ្ញុំនឹងធ្វើឱ្យបានសម្រេច»។ ចូរកុំបណ្ដោយឱ្យថ្ងៃនោះ ធ្វើឱ្យអ្នកបរាជ័យ។ ចូរយកឈ្នះលើថ្ងៃដូច្នោះ!»។

ពេលបានអានមកដល់នេះ អ្នកឃើញហើយថា ពុំមានអាថ៌កំបាំងកម្រិតកំពូលណាមួយសម្រាប់ការបង្កើតទម្លាប់ឆាប់ក្រោកពីព្រលឹមសោះឡើយ។ វាគ្រាន់តែជារឿងសាមញ្ញៗប៉ុណ្ណោះ នោះគឺការប្ដេជ្ញាចិត្ត ការហាត់ពត់ លត់ដំខ្លួនឱ្យមានវិន័យ ការភ្ញាក់រលឹក ដើម្បីបង្កើតទម្លាប់ឆាប់ក្រោកពីព្រលឹម! តែប៉ុណ្ណឹងគឺគ្រប់គ្រាន់ហើយ៕

ប្រភព៖ CNBC Make It
ប្រែសម្រួល៖ បុត្រា

July 23, 2021

ចិន បំផ្ទុះទំនប់ទឹក ដើម្បីបង្វែរទិសមហាទឹកជំនន់

កងទ័ពចិន បានបំផ្ទុះទំនប់ទឹកមួយនៅ Luoyang នៃខេត្ត Henan ដើម្បីបង្វែរទិសរបស់ទឹកជំនន់ នៅចំពោះមុខការគំរាមកំហែងដ៏គ្រោះថ្នាក់ ក្រោយបាតុភូតភ្លៀងធ្លាក់ខ្លាំងមិនធ្លាប់មានក្នុងអំឡុងច្រើនសតវត្សរ៍កន្លង។

ទំនុបទឹកដែលត្រូវបានបំផ្ទុះកាលពីយប់ថ្ងៃទី 20 កក្កដា នេះ ស្ថិតនៅក្នុងទីក្រុង Luoyang នៃខេត្ត Henan ក្នុងគ្រាដែលជំនន់ទឹកភ្លៀង កំពុងវាយប្រហារទីក្រុងរដ្ឋបាលនៃខេត្ត Henan។

យ៉ាងហោចណាស់មានមនុស្សចំនួន 33 នាក់ បានស្លាប់នៅក្នុងគ្រោះជំនន់ទឹកភ្លៀងនៅខេត្ត Henan ក្នុងនោះក៏មានមនុស្សចំនួន 12 នាក់ ដែលជាប់នៅក្នុងរថភ្លើងក្រោមដី ក្នុងក្រុង Zhengzhou។ បេសកកម្មជួយសង្គ្រោះ នៅតែបន្តធ្វើឡើង ខណៈមនុស្សរាប់រយនាក់ដែលបាត់ខ្លួន មិនទាន់រកឃើញនៅឡើយ។

រដ្ឋបាលទីក្រុង Zhengzhou កំពុងប្រឹងប្រែងដើម្បីរក្សាប្រភពទឹក និងអគ្គិសនី ស្របពេលដែលខេត្ត Henan កំពុងត្រៀមខ្លួនដើម្បីប្រឈមនឹងគ្រោះជំនន់ទឹកភ្លៀងមួយផ្សេងទៀត។ ទាហានជាង 3,000 នាក់ កំពុងធ្វើការនៅតាមតំបន់គ្រោះថ្នាក់នានា នៅជុំវិញទីក្រុង។ ការខាតបង់ផ្នែកសេដ្ឋកិច្ច ត្រូវបានគេគណនាឃើញថា ប្រហែល 1.22 ពាន់លានយុន ស្មើនឹង 189 លានដុល្លារអាមេរិក។

ឥទ្ធិពលនៃទឹកជំនន់នេះ ក៏បានបណ្ដាលឱ្យពលរដ្ឋចំនួន 3 លាននាក់ នៅក្នុងស្រុក/ខណ្ឌចំនួន 877 របស់ខេត្ត Henan ត្រូវឈ្លៀសទៅកាន់ទីសុវត្ថិភាព។

ខេត្ត Henan ស្ថិតនៅក្នុងតំបន់វាលរាបភាគកណ្ដាលប្រទេសចិន លាតសន្ធឹងលើអាងទន្លេសំខាន់ៗចំនួន 4 គឺ ទន្លេ Hai River (Peiho), ទន្លេលឿង (Yellow River), ទន្លេ Hwai (Huai River) និងទន្លេ Yangtze (Yangzi river)។ ភូមិសាស្ត្រនៅតំបន់នេះ ទាបជាងតំបន់ក្បែរខាង ដូច្នេះ ងាយនឹងរងគ្រោះទឹកជំនន់ ខណៈប្រព័ន្ធបង្ហូរទឹកក៏មិនអាចដោះស្រាយបញ្ហាជំនន់ទឹកភ្លៀងដ៏ធំនេះបាន៕

ប្រភព៖ AP
ប្រែសម្រួល៖ បុត្រា

July 23, 2021

Author: សឿន សំណាង