សឿន សំណាង - La Reine Media

Selena Gomez មានទ្រព្យរាប់សិបលានដុល្លារ និងចូលចិត្តស្លៀករ៉ូបបង្ហាញសម្រស់រាងកាយ

រ៉ូបប្រភេទ Versace និង Armani ជាដើម ជួយឱ្យកំពូលតារាចម្រៀងជនជាតិអាមេរិកាំង នាង Selena Gomez បង្ហាញសម្រស់នៃរាងកាយបានយ៉ាងល្អ។

Selena Gomez ទទួលអំណរអាយុថ្មីរបស់នាងកាលពីថ្ងៃទី 22 ខែកក្កដា នៅភូមិគ្រឹះនាទីក្រុង Los Angeles សហរដ្ឋអាមេរិក។ ក្នុងឱកាសខួបកំណើត តារាចម្រៀង និងជាអ្នកជំនួញរូបនេះ បានអំពាវនាវឱ្យបង្កើតមូលនិធីមួយ ដើម្បីរៃអង្គាសប្រាក់សម្រាប់ជួយដល់អ្នកជំងឺផ្លូវចិត្ត។

យោងតាម Forbes ក្នុងវ័យ 29 ឆ្នាំ Selena មានទ្រព្យសម្បត្តិតម្លៃ 75 លានដុល្លារអាមេរិក។ ក្រៅពីអាជីពជាអ្នកចម្រៀង និងសំដែង ស្រីស្អាតកើតឆ្នាំ 1992 នេះ ក៏រកចំណូលបានពីការធ្វើជំនួញក្នុងវិស័យអចលនទ្រព្យ តាំងពីអាយុ 19 និងជោគជ័យ ពេលគ្រប់គ្រងក្រុមហ៊ុនលក់គ្រឿងសំអាង Rare Beauty ចាប់ពីឆ្នាំ 2020 ផងដែរ។

ទំព័រ Tribedynamics បានរកឃើញថា ប្រាក់ចំណូលរបស់ Rare ខ្ពស់ជាងប្រភេទផលិតផលថែសម្រស់របស់ Victoria Beckham ទៅទៀត។

Vogue បានអធិប្បាយថា Selena Gomez ចូលចិត្តឈុតសម្លៀកបំពាក់ទាក់ទាញចំណាប់អារម្មណ៍។ ស្រីស្អាតនេះ ចូលចិត្តរ៉ូបឆែក រឹបចង្កេះ រឹបដើមទ្រូង ឬទាក់ទាញភ្នែក ត្រង់ត្រគាក៕

ប្រភព៖ Forbes, REX
ប្រែសម្រួល៖ បុត្រា

July 26, 2021

(វីដេអូ)-រថភ្លើងហោះ ល្បឿន 600 ម៉ែត្រ ក្នុង 1 ម៉ោង ៖ លឿនជាងយន្តហោះទៅទៀត

ជាមួយនឹងល្បឿនអតិបរមា 600 គីឡូម៉ែត្រ ក្នុង 1 ម៉ោង រថភ្លើងដែលប្រើប្រាស់បច្ចេកវិទ្យាអេឡិចត្រូម៉ាញេទិក ដែលត្រូវបាន ចិន ឧទ្ទេសនាមកាលពីថ្ងៃទី 21 កក្កដា គឺជាមធ្យោបាយដឹកជញ្ជូនផ្លូវគោក ដែលមានល្បឿនលឿនជាងគេបង្អស់ក្នុងពិភពលោក។

ប្រទេស ចិន កាលពីថ្ងៃទី 21 ខែកក្កដា ឆ្នាំ 2021 បានបង្ហាញរថភ្លើងអណ្ដែតថ្មីសន្លាងមួយគ្រឿង ដែលប្រើកម្លាំងមេដែក (maglev (magnetic levitation train) និងអាចរត់ក្នុងល្បឿន 600 គីឡូម៉ែត្រ/ម៉ោង។ ល្បឿននេះអាចជួយឱ្យគំរូរថភ្លើងដែលអភិវឌ្ឍ និងផលិតដោយប្រទេស ចិន នៅទីក្រុងឆ្នេរសមុទ្រ Qingdao នៃខេត្ត Shandong ក្លាយជាយានដែលមានល្បឿនលឿនជាងគេបំផុតក្នុងពិភពលោក បើធៀបនឹងប្រភេទយានទាំងឡាយដែលធ្វើដំនើរលើដីគោក។

ដោយកម្លាំងដ៏មហិមារបស់ថាមពលនៃ អេឡិចត្រូម៉ាញេទិក (electromagnetic force) រថភ្លើងនេះ អណ្ដែតក្នុងបរិយាកាស ដោយមិនប៉ះពាល់ដល់ផ្លូវដែកដែលនៅខាងក្រោម។ ប្រការនេះមានន័យថា រថភ្លើងអណ្ដែតដោយសារកម្លាំងរបស់ដែនម៉ាញេទិក បង្កើតឡើងដោយអគ្គិសនី «ខ្នាតយក្ស»។

បច្ចេកវិទ្យានេះ ត្រូវបានប្រទេស ចិន ប្រើប្រាស់ជិតពីរទសវត្សរ៍មកហើយ ប៉ុន្តែ ប្រើក្នុងទ្រង់ទ្រាយមានកំណត់។ នៅទីក្រុង សៀងហៃ មានផ្លូវរថភ្លើងប្រភេទ maglev មួយខ្សែ ដែលធ្វើដំណើរពីព្រលានយន្តហោះមួយ ចូលមកកាន់ទីក្រុង។

បច្ចុប្បន្ន បើទោះជាមិនទាន់មានផ្លូវដែកសម្រាប់រថភ្លើងហោះឆ្លងខេត្តនៅប្រទេស ចិន ដែលអាចធ្វើដំណើរក្នុងល្បឿនលឿនដូច្នេះក៏ពិតមែន ប៉ុន្តែ បណ្ដាទីក្រុងដូចជា សៀងហៃ និង ចេងឌូ (Chengdu) បានចាប់ផ្ដើមធ្វើការសិក្សាស្រាវជ្រាវទៅហើយ។

ដោយមានល្បឿន 600 គីឡូម៉ែត្រក្នុង 1 ម៉ោង គេគ្រាន់តែចំណាយពេលត្រឹមតែ 2.5 ម៉ោងប៉ុណ្ណោះ ដើម្បីធ្វើដំណើរឆ្លងកាត់ចម្ងាយផ្លូវជាង 1,000 គីឡូម៉ែត្រ ពីទីក្រុងប៉េកាំង ទៅកាន់ទីក្រុងសៀងហៃ។ ចម្ងាយផ្លូវឆ្ងាយបែបនេះ បច្ចុប្បន្ន បើជិតរថភ្លើងល្បឿនលឿន គេត្រូវចំណាយពេលអស់ 5.5 ម៉ោង ហើយបើជិតយន្តហោះវិញ ក៏ស៊ីពេលអស់ 3 ម៉ោងឯណោះ៕

ប្រភព៖ Next Media
ប្រែសម្រួល៖ បុត្រា

July 26, 2021

(វីដេអូ)-ព្យុះខ្សាច់កម្ពស់ជាង 100 ម៉ែត្រ គ្របដណ្ដប់ទីក្រុងរបស់ប្រទេសចិន

ព្យុះខ្សាច់នេះ បានវាយប្រហារមកលើទីក្រុង Dunhuang នាំឱ្យផ្ទៃមេឃប្រែជាពណ៌លឿង ងងឹត ហើយអាចមើលឃើញក្នុងរយៈចម្ងាយតែ 5 ម៉ែត្រ ខណៈចរាចរណ៍ក៏ត្រូវស្ទះ។

ព្យុះខ្សាច់មួយដ៏ធំ បានបោកបក់មកដល់ទីក្រុង Dunhuang នៅវេលាម៉ោងប្រហែល 15 នៃថ្ងៃទី 25 ខែកក្កដា (ម៉ោងក្នុងស្រុក)។ ទ្រង់ទ្រាយរបស់ព្យុះនេះ ដូចទៅនឹងជញ្ជាំងខ្សាច់ដែលមានកម្ពស់ជាង 100 ម៉ែត្រ និងធ្វើដំណើរពីទិសខាងជើងមកខាងត្បូង ហើយក៏បានគ្របដណ្ដប់ផ្លូវល្បឿនលឿនអស់ជាច្រើននាទី បណ្ដាលឱ្យផ្ទៃមេឃប្រែទៅជាពណ៌លឿន ចំណែករយៈចម្ងាយមើលឃើញក៏ត្រូវធ្លាក់ចុះក្រោម 5 ម៉ែត្រ។

ប៉ូលិសក្នុងតំបន់ ដែលមកបំពេញការងារ ណែនាំឱ្យរថយន្តដែលត្រូវស្ទះ ប្រញាប់ចាកចេញពីផ្លូវល្បឿនលឿន ទៅកាន់ទីតាំងសុវត្ថិភាព រង់ចាំព្យុះទៅផុត។

ទីក្រុង Duhuang ដែលស្ថិតនៅលើសមុទ្រខ្សាច់ Gobi មានឈ្មោះល្បីខ្លាំង ដោយសារតែអាកាសធាតុ និងបាតុភូតធម្មជាតិអាក្រក់ៗ ធ្វើឱ្យប្រជាជនក្នុងតំបន់ ពិបាករស់នៅ៕

ប្រភព៖ SCMP
ប្រែសម្រួល៖ បុត្រា

July 26, 2021

គូស្នេហ៍ក្លាយជាសេដ្ឋីមុនវ័យ 20 ឆ្នាំ ៖ Startup តាំងពីរៀននៅវិទ្យាល័យ និងតែងគោរពតាមគោលការណ៍ «ចាយកម្រិតណា វិនិយោគកម្រិតនោះ» ដើម្បីក្លាយជាអ្នកមាន

Dalton Ng និង Joella Lum បច្ចុប្បន្ន រស់នៅជាមួយគ្នាក្នុងខុនដូមួយដ៏សុខសាន្ត ដោយសារពួកគេសុទ្ធតែជាសេដ្ឋីដែលរកស៊ីមានបានពីបាត់ដៃទទេ ហើយបច្ចុប្បន្ន ពួកគេម្នាក់ៗ មានទ្រព្យចាប់ពី 2 ដល់ 3 លានដុល្លារអាមេរិក។

សេដ្ឋី Dalton Ng (វ័យ 20 ឆ្នាំ) និងសេដ្ឋិនី Joella Lum (វ័យ 19 ឆ្នាំ) ពុំមែនជាគូស្នេហ៍ដែលស្រលាញ់គ្នាធម្មតានោះទេ។ Joella បានឱ្យដឹងថា អ្នកទាំងពីរសុទ្ធតែជាមនុស្សដែលចូលចិត្តភាពឯករាជ្យ និងមាន «ឈាម» ជាអ្នកជំនួញតាំងតែពីក្មេង។ «អ្នកដឹងថា មានក្មេងៗដែលរៀននៅបឋមសិក្សា ទិញប្រដាប់លុប 1 កញ្ចប់ ហើយលក់រាយទៅវិញដើម្បីរកប្រាក់ចំណេញដែរទេ? ពួកយើងគឺជាមនុស្សប្រភេទនោះ»។

គ្រាដែលមនុស្សជាច្រើនក្នុងវ័យប្រហាក់ប្រហែលនឹង Dalton Ng និង Joella Lum សុទ្ធតែកំពុងធ្វើការរកប្រាក់ទៅតាមម៉ោង Dalton Ng និង Joella Lum បែរជារកបានប្រាក់ពី 70,000 ដល់ 150,000 ក្នុងមួយខែៗ ពីសកម្មភាពជំនួញមួយចំនួន និងការវិនិយោគផ្សេង។

ចំពោះ Joella Lum វិញ នាងកំពុងគ្រប់គ្រងហាងមួយចំនួននៅលើផ្សារអនឡាញ Shopify។ នាងក៏ទទួលបន្ទុកក្នុងការវិនិយោគលើមូលបត្រ និងរូបិយវត្ថុឌីជីថល របស់អ្នកទាំងពីរផងដែរ។

ដោយសារតែការប្រឹងប្រែង និងព្យាយាម ពេលដែល Joella ទើបតែមានវ័យ 18 ឆ្នាំ ហើយ Dalton វ័យ 19 ឆ្នាំ ពួកគេក៏មានលទ្ធភាពចេញរស់នៅខាងក្រៅ និងមានប្រាក់សល់សម្រាប់ទិញផ្ទះ ក៏ដូចជាមធ្យោបាយធ្វើដំណើរមួយចំនួន បម្រើដល់កិច្ចការជំនួញ។

ខាងក្រោមនេះគឺជាការណែនាំមួយចំនួនរបស់ Dalton Ng និង Joella Lum ជូនចំពោះយុវជន យុវនារី ដែលទើបតែពេញវ័យ និងចង់ក្លាយជាអ្នកមាន៖

1-ឆាប់ចាប់ផ្ដើម

Dalton Ng និង Joella Lum មិនមែនក្លាយជាអ្នកមានក្រោយរយៈពេលតែមួយយប់នៅទេ ប៉ុន្តែ ពួកគេបានចាប់ផ្ដើមមុខជំនួញតាំងតែពីនៅរៀនវិទ្យាល័យ រួមផ្សំនឹងទម្លាប់សន្សំសំច័យ និងការវិនិយោគបន្ថែមដើម្បីទទួលបានប្រាក់ចំណូលខ្ពស់។

Joella ចាប់ផ្ដើមធ្វើជំនួញដោយការលក់សម្លៀកបំពាក់ដែលបានទិញពីហាង H&M និង Cotton On នៅលើគេហទំព័រ Carousell និងរកបានប្រាក់រាប់ពាន់ដុល្លារតាំងតែពីនៅរៀនវិទ្យាល័យ។ ចំណែក Dalton វិញ បានធ្វើជាអ្នកសរសេរកូដ ក៏ដូចជាអភិវឌ្ឍកម្មវិធី (App) តាំងពីនៅរៀនអនុវិទ្យាល័យ ហើយរកបានប្រហែល 10,000 ដុល្លារពីគម្រោងនីមួយ។

2-ចាយវាយដោយការទទួលខុសត្រូវ

ការចាយវាយសម្រាប់ជីវិតលំដាប់ខ្ពស់ គឺជា ការទាក់ទាញចំពោះមនុស្សគ្រប់រូបដែលរកបានប្រាក់ច្រើនដូចជា Dalton និង Joella។ ប៉ុន្តែ គូស្នេហ៍នេះ ឆាប់ចាប់ផ្ដើមចេះចាយវាយដោយមានការទទួលខុសត្រូវ និងតែងគោរពទៅតាមគោលការណ៍ «ចាយកម្រិតណា វិនិយោគកម្រិតនោះ។

3-ស្រាវជ្រាវទីផ្សារឱ្យបានច្បាស់លាស់ និងមិនវិនិយោគច្រើនជាងប្រាក់ដែលអ្នកអាចបាត់បង់

បច្ចុប្បន្ន មានយុវវ័យជាច្រើន បានលោតទៅវិនិយោគភ្លាមៗ បន្ទាប់ពីបានមើលវីដេអូមួយចំនួននៅលើ Youtube ពិសេសគឺទាក់ទងនឹងផ្សារមូលបត្រ។ ប៉ុន្តែ Dalton និង Joella សង្កត់ធ្ងន់ថា ប្រការនេះនាំឱ្យយើងប្រឈមនឹងហានិភ័យខ្ពស់។ ផ្ទុយទៅវិញ អ្នកត្រូវតែស្វែងយល់ឱ្យបានច្បាស់លាស់ មុននឹងធ្វើការវិនិយោគ។

Dalton និយាយថា៖ «អ្នកមិនគួរវិនិយោគទៅលើអ្វីដែលខ្លួនមិនយល់ច្បាស់ សូម្បីតែរូបិយវត្ថុឌីជីថល។ មុនពេលទិញរូបិយវត្ថុឌីជីថល ខ្ញុំបានស្វែងយល់អំពីវា តាំងពីនៅរៀនអនុវិទ្យាល័យ»៕

ប្រភព៖ Asia One
ប្រែសម្រួល៖ បុត្រា

July 26, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 23 កក្កដា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 778 នាក់, អ្នកជាចំនួន 686 នាក់ និងអ្នកស្លាប់ចំនួន 22 នាក់បន្ថែមទៀត នៅក្នុងថ្ងៃទី 25 ខែកក្កដា ឆ្នាំ 2021។

គិតត្រឹមព្រឹកថ្ងៃទី 26 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 73,701 នាក់ ក្នុងនោះមានអ្នកជាសះស្បើយជាង 65,950 នាក់ និង អ្នកស្លាប់ 1,305 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 194,835,310 នាក់ ត្រូវបានរកឃើញ ក្នុងនោះមានជាង 176,779,220 នាក់បានជា, 4,175,129 នាក់បានស្លាប់ និងជាង 13,880,950 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 26, 2021

កំណើនសេដ្ឋកិច្ចពិភពលោក អាចឡើងដល់កំពូល នៅក្នុងត្រីមាសទីបី

សេដ្ឋកិច្ចនៅទូទាំងសកលលោកសម្រាប់ត្រីមាសទីបី នឹងមានកំណើនខ្ពស់បំផុតនៅក្នុងឆ្នាំ 2021 ប៉ុន្តែ វីរុសបំប្លែងខ្លួន Delta របស់ COVID-19 ត្រូវបានគេចាត់ទុកជាហានិភ័យគួរឱ្យបារម្ភ។

តំបន់សេដ្ឋកិច្ចនានានៃពិភពលោក ត្រូវបានព្យាករថា នឹងមានកំណើនខ្ពស់ក្នុងប៉ុន្មានខែខាងមុខ ដែលនេះជួយឱ្យបណ្ដាប្រទេស តាមជិតទាន់ សហរដ្ឋអាមេរិក និងចិន។ នេះបើតាម ការសិក្សាស្រាវជ្រាវមួយចំនួន ទៅលើ សន្ទស្សន៍អ្នកគ្រប់គ្រងការទិញ (Purchasing Managers Index / PMI)។

ទិន្នន័យដែលត្រូវបាន IHS Markit ប្រកាសកាលពីថ្ងៃទី 23 កក្កដា បានបង្ហាញថា សហរដ្ឋអាមេរិក ដែលមានកំណើនសេដ្ឋកិច្ចខ្ពស់ក្នុងត្រីមាសទីពីរ នឹងថយចុះបន្តិចក្នុងត្រីមាសទីបី ដោយសារតែប្រភពផ្គត់ផ្គង់បន្តមានកំណត់ កង្វះពលករ និងការរីករាលដាលនៃវ៉ារ្យ៉ង Delta របស់ COVID-19។

PMI សរុបរបស់ សហរដ្ឋអាមេរិក បានថយចុះមកនៅត្រឹម 59.7 ពិន្ទុ ក្នុងខែកក្កដា ទាបជាងបន្តិចធៀបនឹង 63.7 ពិន្ទុ ក្នុងខែមិថុនា។ អត្រាលើ 50 ពិន្ទុ បញ្ជាក់ថា សកម្មភាពផលិត នៅតែបន្តកើនឡើង។

ផ្ទុយមកវិញ PMI នៃតំបន់ដែលប្រើប្រាស់រូបិយវត្ថុ Euro បានកើនឡើងដល់ 60.6 ពិន្ទុ ក្នុងខែនេះ ខ្ពស់ជាង បើធៀបនឹងពិន្ទុ 59.5 ក្នុងខែមិថុនា។ សញ្ញានេះបង្ហាញថា សេដ្ឋកិច្ចអឺរ៉ុប កំពុងតែងើបឡើងយ៉ាងឆាប់រហ័ស។

ខណៈដែលក្រុមសេដ្ឋវិទូ ព្យាករថា កំណើនសេដ្ឋកិច្ចរបស់ សហរដ្ឋអាមេរិក បានឡើងដល់ចំណុចកំពូលកាលពីត្រីមាសកន្លង កំណើនរបស់ពិភពលោក ក៏ត្រូវគេព្យាករថា នឹងឡើងដល់ចំណុចខ្ពស់បំផុតក្នុងត្រីមាសបច្ចុប្បន្ន។ JPMorgan ព្យាករថា GDP របស់ អាមេរិក និង ចិន នឹងបន្ថយល្បឿនក្នុងត្រីមាសទីបី ប៉ុន្តែ ជំនួសមកវិញ កំណើនសេដ្ឋកិច្ចរបស់ អឺរ៉ុប អាចមានល្បឿនលឿនជាងកំណើនសេដ្ឋកិច្ចរបស់ អាមេរិក កាលពីត្រីមាសទីពីរទៅទៀត។ បូករួមជាមួយនឹងការងើបឡើងវិញយ៉ាងឆាប់របស់ ប្រទេស ឥណ្ឌា កំណើនសេដ្ឋកិច្ចរបស់ពិភពលោកទាំងមូល អាចឡើងដល់កំពូលបំផុតក្នុងឆ្នាំ 2021 នៅត្រីមាសទីបី។

យ៉ាងនេះក្ដី វីរុសបំប្លែងខ្លួនប្រភេទ Delta របស់ COVID-19 នៅតេជាឧបសគ្គធំសម្រាប់កំណើនសេដ្ឋកិច្ចពិភពលោក។ «Delta អាចរារាំងការងើបឡើងវិញរបស់វិស័យមួយចំនួន ពិសេសគឺ ទេសចរណ៍ និងសណ្ឋាគារ» នេះបើតាម Christine Lagarde ប្រធានធនាគារកណ្ដាលអឺរ៉ុប។

Chris Williamson ប្រធានក្រុមអ្នកសេដ្ឋកិច្ចប្រចាំ IHS Markit ក៏បានទទួលស្គាល់ថា Delta បង្កហានិភ័យធំធេងដល់ដំណើរងើបឡើងវិញនៃសេដ្ឋកិច្ច សហរដ្ឋអាមេរិក៕

ប្រភព៖ WSJ
ប្រែសម្រួល៖ បុត្រា

July 26, 2021

ក្រុមហ៊ុន ជប៉ុន ពិសោធថ្នាំព្យាបាល COVID-19! ព្យាបាល 5 ថ្ងៃ ជា ៖ អ្នកមិនអាចចាក់វ៉ាក់សាំងបាន មានសង្ឃឹមហើយ!

ក្រុមហ៊ុន Shionogi នៅ Osaka ប្រទេស ជប៉ុន បានចាប់ផ្ដើមពិសោធលើមនុស្ស ចំពោះថ្នាំព្យាបាលជំងឺ COVID-19 របស់ពួកគេ ដោយឱ្យលេប 1 ថ្ងៃ 1 ដង ហើយលទ្ធផលដែលទទួលបាន នោះគឺការកម្ចាត់វីរុសក្នុងរយៈពេល មិនដល់ 1 សប្ដាហ៍។

ទីភ្នាក់ងារសារព័ត៌មាន Wall Street Journal បានចេញផ្សាយថា Shionogi ដែលជាក្រុមហ៊ុនអភិវឌ្ឍឱសថសម្រាប់បញ្ចុះខ្លាញអាក្រក់ Crestor បានប្រកាសថា ផលិតបានថ្នាំកម្ចាត់វីរុស COVID-19។ ដោយត្រូវលេប 1 ដង ក្នុង 1 ថ្ងៃ ថ្នាំប្រភេទនេះ នឹងមានភាពងាយស្រួលក្នុងការព្យាបាល។ ក្រុមហ៊ុន Shionogi បានឱ្យដឹងថា ពួកគេកំពុងពិសោធលើការប្រើប្រាស់ថ្នាំ រួមនឹងផលប៉ះពាល់របស់វា នៅលើក្រុមអ្នកស្ម័គ្រចិត្ត។ ការពិសោធនេះទើបតែបានចាប់ផ្ដើមក្នុងខែកក្កដា ហើយវាអាចអូសបន្លាយដល់ឆ្នាំ 2022។

វិធីព្យាបាល COVID-19 ដែលមានក្នុងបច្ចុប្បន្ន មានដូចជា ថ្នាំប្រឆាំងវីរុសប្រភេទបញ្ចូលក្នុងសរសៃឈាម remdesivir របស់ Gilead Sciences ប្រើនៅក្នុងមន្ទីរពេទ្យ និងមានប្រសិទ្ធភាពដោយករណី។ ថ្នាំមួយចំនួនទៀតដែលត្រូវបានប្រើនាបច្ចុប្បន្ន មានដូចជា ថ្នាំអង្គបដិប្រាណប្រភេទ monoclonal (mAb ឬ moAb) ថ្នាំដែលផលិតដោយក្រុមហ៊ុន Regeneron និងថ្នាំប្រភេទ steroid dexamethasone។

«គោលដៅរបស់យើង នោះគឺការបង្កើតថ្នាំប្រភេទលេប ប្រកបដោយសុវត្ថិភាព ដូចទៅនឹង Tamiflu និង Xofluza» លោក Isao Teshi នាយកប្រតិបត្តិរបស់ Shionogi បញ្ជាក់ដូច្នេះ។ លោកថ្លែងថា ថ្នាំគ្រាប់ព្យាបាល COVID-19 របស់ក្រុមហ៊ុននេះ ត្រូវបានបង្កើតឡើងដើម្បីកម្ចាត់វីរុស ក្នុងរយៈពេល 5 ថ្ងៃ រាប់ចាប់ពីថ្ងៃបានលេបគ្រាប់ដំបូង។

វេជ្ជបណ្ឌិត Teshirogi បានបញ្ជាក់ថា ក្រុមហ៊ុននឹងស្វែងរកអ្នកស្ម័គ្រចិត្ត ចាប់ពី 50-100 នាក់ ដើម្បីចូលរួមការពិសោធនៅ ជប៉ុន។ ក្រោយមក ការពិសោធធំជាងនេះមួយផ្សេងទៀត ក៏នឹងត្រូវបានធ្វើឡើងក្នុងឆ្នាំ 2020។

ក្រុមហ៊ុន ជប៉ុន នេះ បានចូលរួមប្រជែងក្នុងការអភិវឌ្ឍថ្នាំព្យាបាល COVID-19 យឺតជាង បើធៀបនឹងក្រុមហ៊ុន Pfizer និង Merck ដែលសុទ្ធតែជាក្រុមហ៊ុនរបស់ សហរដ្ឋអាមេរិក។ Pfizer បានប្រកាសថា ថ្នាំប្រភេទលេប 2 ដង/ថ្ងៃ របស់ពួកគេ នឹងត្រៀមខ្លួនជាស្រេចសម្រាប់ដាក់លក់ក្នុងទីផ្សារ លឿនបំផុតនៅឆ្នាំនេះ។ Pfizer កំពុងត្រៀមស្វែងរកអ្នកជំងឺ COVID-19 ចំនួន 2,000 នាក់ ដើម្បីចូលរួមការពិសោធថ្នាំនេះ។

ការសិក្សាស្រាវជ្រាវនានាបានបង្ហាញថា ការចាក់វ៉ាក់សាំង មានប្រសិទ្ធភាពក្នុងការទប់ស្កាត់ជំងឺដែលបង្កឡើងដោយវ៉ារ្យ៉ងមួយចំនួនរបស់ COVID-19 ប៉ុន្តែ ជាក់ស្ដែង នៅមានមនុស្សជាច្រើនមិនចង់ចាក់វ៉ាក់សាំង ឬមានជំងឺប្រចាំកាយ មិនអាចចាក់វ៉ាក់សាំងបាន ខណៈដែលអ្នកបានចាក់វ៉ាក់សាំងរួចរាល់ ក៏នៅមានហានិភ័យវិជ្ជមាននឹងវីរុសនេះ។ ដូច្នេះ ការអភិវឌ្ឍថ្នាំព្យាបាល COVID-19 របស់ក្រុមហ៊ុនទាំងនេះ គឺសំដៅលើក្រុមមនុស្សខាងលើ។

ក្រៅពីក្រុមហ៊ុនខាងលើ នៅមានក្រុមហ៊ុនជាច្រើនផ្សេងទៀត កំពុងយកចិត្តទុកដាក់លើថ្នាំព្យាបាលជំងឺ COVID-19 ក្នុងនោះ នៅប្រទេស អ៊ីស្រាអែល ក្រុមអ្នកវិទ្យាសាស្ត្រ បានប្រកាសថា បានរកឃើញថ្នាំចំនួន 3 ប្រភេទដែលមានស្រាប់ មានប្រសិទ្ធភាពក្នុងការព្យាបាលអ្នកជំងឺ COVID-19 រួមមាន ថ្នាំព្យាបាលបញ្ហាស្ទះសរសៃឈាម darapladib, ថ្នាំព្យាបាលមហារីក flumatinib និងថ្នាំព្យាបាលជំងឺ HIV៕

ប្រភព៖ WSJ
ប្រែសម្រួល៖ បុត្រា

July 26, 2021

«កំពូលបុរស» មកពី Tonga បង្ហាញសាច់ដុំ ក្នុងពិធីបើកព្រឹត្តិការណ៍កីឡាអូឡាំពិក នៅ ជប៉ុន

អត្តពលិក Pita Taukatofua ដែលកាន់ទង់ឱ្យក្រុមកីឡាករ Tongo នៅក្នុងពិធីបើកព្រឹត្តិការណ៍កីឡាអូឡាំពិកតូខ្យូ 2020 (Olympic Tokyo 2020) បានធ្វើឱ្យមានចំណាប់អារម្មណ៍យ៉ាងខ្លាំង ដោយសារការដោះអាវ បង្ហាញសាច់ដុំដ៏រឹងមាំ។

Pita Taufatofua ធ្លាប់បានលេចធ្លោនៅក្នុងរាត្រីមួយកាលពី 5 ឆ្នាំមុន ពេលគាត់ដោះអាវជាលើកដំបូង នៅក្នុងពិធីហែក្បួនក្នុងឈុតសម្លៀកបំពាក់ប្រពៃណីរបស់ជនជាតិ តុងហ្គា (Tongan) ក្នុងពិធីបើកព្រឹត្តិការណ៍កីឡាអូឡាំពិក ឆ្នាំ 2016 នៅ ប្រេស៊ីល និង ឆ្នាំ 2018 នៅ កូរ៉េខាងត្បូង។ ជាថ្មីម្ដងទៀត Taufatofua ក៏បានបង្កការចាប់អារម្មណ៍នៅក្នុងរាត្រីថ្ងៃទី 23 កក្កដា ឆ្នាំ 2021 ពេលបង្ហាញខ្លួននៅក្នុងពិធីបើកព្រឹត្តិការណ៍កីឡាអូឡាំពិកតូខ្យូ ឆ្នាំ 2020 នៅជប៉ុន។

នៅក្នុងព្រឹត្តិការណ៍កីឡាអូឡាំពិកលើកនេះ អត្តពលិក Taufatofua នឹងចូលរួមប្រកួតក្បាច់គុន តៃខ្វាន់ដូ (Taekwondo)។

Taufatofua បានប្រាប់ New York Time ថា គាត់មានការភ្ញាក់ផ្អើលនៅពេលអ្នកលេងបណ្ដាញសង្គម បានចាប់អារម្មណ៍ខ្លាំងលើគាត់ នាពេលថ្មីៗនេះ។ តួលេខអ្នកចុចតាមដានរូបគាត់នៅលើបណ្ដាញសង្គម បានកើនឡើងយ៉ាងឆាប់រហ័ស។

បច្ចុប្បន្ន Taufatofua មិនត្រឹមតែមានអាជីពជាអត្តពលិកនោះទេ តែគាត់ក៏ជាវាគ្មិនដ៏មានប្រជាប្រិយភាព និងមានតួនាទីជាទូតសុច្ឆន្ទៈ តំណាងឱ្យ UNICEF ផងដែរ។

ប្រភព៖ Olympics
ប្រែសម្រួល៖ បុត្រា

July 24, 2021

មន្ត្រីហិរញ្ញវត្ថុ ព្រមានអំពីហានិភ័យដែល អាមេរិក ត្រូវក្ស័យធន នៅថ្ងៃទី 1 សីហា

រដ្ឋាភិបាល សហរដ្ឋអាមេរិក នឹងធ្លាក់ទៅក្នុងស្ថានភាពក្ស័យធន នៅថ្ងៃទី 1 ខែសីហា ឆ្នាំ 2021 ហើយបង្ខំឱ្យក្រសួងហិរញ្ញវត្ថុប្រទេសនេះ ដាក់ចេញនូវ «វិធានការពិសេសនានា» រហូតដល់សភាដំឡើងពិដាននៃសូចនាករបំណុលសាធារណៈ។

ខាងលើនេះគឺជាការព្រមានរបស់រដ្ឋមន្ត្រីក្រសួងហិរញ្ញវត្ថុ សហរដ្ឋអាមេរិក លោកស្រី Janet Yellen ដែលបានលើកឡើងកាលពីថ្ងៃទី 23 កក្កដា នៅក្នុងលិខិតផ្ញើទៅកាន់ក្រុមតំណាងរាស្ត្រ សហរដ្ឋអាមេរិក។

ក្នុងលិខិតនោះ រដ្ឋមន្ត្រីហិរញ្ញវត្ថុ បានលើកឡើងច្បាស់ថា៖ «បើសិនជាសភា មិនផ្អាក ឬដំឡើងពិដាននៃសូចនាករបំណុលសាធារណៈ ឱ្យបានមុនថ្ងៃទី 2 ខែសីហា នោះក្រសួងហិរញ្ញវត្ថុនឹងត្រូវអនុវត្តវិធានការបន្ថែមពិសេស ដើម្បីទប់ស្កាត់មិនឱ្យ សហរដ្ឋអាមេរិក ធ្លាក់ទៅក្នុងស្ថានភាពក្ស័យធន»។

លោកស្រី Yellen បញ្ជាក់ថា ការដំឡើងពិដាននៃសូចនាករបំណុលសាធារណៈ មិនធ្វើឱ្យការចំណាយរបស់រដ្ឋាភិបាលឡើងខ្ពស់នោះទេ ប៉ុន្តែ នឹងអនុញ្ញាតឱ្យក្រសួងហិរញ្ញវត្ថុ ផ្ដល់ការគាំទ្រដល់សកម្មភាពនានាដែលត្រូវបានសភាអនុម័ត។

យោងតាមរដ្ឋមន្ត្រីខាងលើ បើសិនជា សហរដ្ឋអាមេរិក មិនធានាបាននូវកាតព្វកិច្ចក្នុងការទូទាត់បំណុល នោះ អាមេរិក នឹងធ្លាក់ទៅក្នុងវិបត្តិហិរញ្ញវត្ថុ ដែលគំរាមកំហែងដល់សេដ្ឋកិច្ចរបស់ពលរដ្ឋ។ ក្រសួងនឹងផ្អាកលក់មូលបត្របំណុលរដ្ឋាភិបាល នៅថ្ងៃទី 30 កក្កដា ហើយក៏នឹងមិនភ្ជាប់សកម្មភាពនេះឡើងវិញនោះដែរ រហូតដល់សភាដំឡើងពិដាននៃសូចនាករបំណុលសាធារណៈ។

បំណុលសាធារណៈរបស់ សហរដ្ឋអាមេរិក កើនឡើងនៅក្នុងសម័យ COVID-19 បន្ទាប់ពីសេតវិមាន បានអនុម័តលើគម្រោងចំណាយធំៗចំនួន 3 ដើម្បីកាត់បន្ថយការខូចខាតនានា ដែលកើតឡើងដោយសារវិបត្តិសុខភាព។

យោងតាមការិយាល័យថវិកាសភា របស់ សហរដ្ឋអាមេរិក (Congressional Budget Office) គិតត្រឹមចុងខែមិថុនា បំណុលសាធារណៈរបស់ប្រទេសនេះ បានឡើងដល់ 28,500,000,000,000 ដុល្លារ (28.5 លានលាន ឬ 28.5 ទ្រីលាន ដុល្លារ) និង ឱនភាពថវិកាជាតិ ឆ្នាំនេះ ត្រូវបានព្យាករថា នឹងឡើងដល់ 3,000,000,000,000 ដុល្លារ (3 លានលាន ឬ 3 ទ្រីលាន ដុល្លារ) ខ្ពស់ជាងគេលំដាប់ទីពីរ បន្ទាប់ពី ឱនភាពថវិកា ឆ្នាំ 2020។

ការដំឡើងពិតាននៃសូចនាករបំណុលសាធារណៈ ធ្លាប់ជាបញ្ហាដែលបង្កឱ្យមានភាពចម្រូងចម្រាសនៅសភា អាមេរិក ក្នុងរយៈពេលប៉ុន្មានឆ្នាំចុងក្រោយនេះ ហើយភាពទាល់ច្រកនៃបញ្ហានេះក្នុងឆ្នាំ 2011 ក៏បានធ្វើឱ្យរដ្ឋាភិបាល ត្រូវគេទម្លាក់ចំណាត់ថ្នាក់ទំនុកចិត្តផងដែរ៕

ប្រភព៖ CNBC
ប្រែសម្រួល៖ បុត្រា

July 24, 2021

Zhao Wei ចូលរួមព្រឹត្តិការណ៍ជាមួយតួឯកស្រី ក្នុងរឿង The Dance of the Storm

(ប្រទេសចិន)៖ Zhao Wei តួឯកស្រីក្នុងរឿង ព្រះនាងយេយេ (My Fair Princess) បានចូលរួមព្រឹត្តិការណ៍បង្ហាញម៉ូដសម្លៀកបំពាក់ ជាមួយនឹងក្រុមតារាសំដែងជំនាន់ក្រោយ មានដូចជា នាង Gulinazha ដែលជាតួឯកក្នុងខ្សែភាពយន្តទូរទស្សន៍រឿង The Dance of the Storm រួមជាមួយនឹង Zhang Ruoyun និង Xu Kai ជាដើម ។ល។

តារាសំដែងវ័យ 45 ឆ្នាំ Zhao Wei បានចូលរួមព្រឹត្តិការណ៍បង្ហាញម៉ូដ របស់ក្រុមហ៊ុនម៉ូដសម្លៀកបំពាក់ Fendi នៅឯ សៀងហៃ កាលពីយប់ថ្ងៃទី 23 កក្កដា ឆ្នាំ 2021។

Zhao Wei ស្លៀកឈុតរ៉ូបសូត្រ និងប្រើប្រាស់កាបូបយួរដៃដែលមានពណ៌ប្រហាក់ប្រហែលនឹងរ៉ូប។

ទំព័រ Sina បានអធិប្បាយថា Zhao Wei បង្ហាញស្ទីលថតរូបប្រកបដោយភាពទាក់ទាញ ទាន់សម័យ និងគួរឱ្យស្រលាញ់។

ចំណែកស្រីស្អាតជនជាតិ អ៊ុយហ្គួ មកពីតំបន់ Xinjiang នាង Gulinazha វិញ ជ្រើសរើសអាវបង្ហាញក្បាលពោះ (crop-top) និងខោខ្លី។

នាង Gulinazha ទទួលបានការសរសើរច្រើនពីសំណាក់ទស្សនិកជន ទាក់ទងនឹងការលេងស្ទីល និងសម្រស់ក្នុងវ័យ 29 ឆ្នាំ។

តារាសិល្បៈពហុជំនាញ (សំដែង, ច្រៀង និងអ្នករាំ) នាង Kong Xueer បង្ហាញខ្លួនយ៉ាងទាក់ទាញ ជាមួយនឹងអាវបង្ហាញទាំងស្មា បង្ហាញទាំងក្បាលពោះ។

រីឯ តារាសំដែងប្រុសក្នុងរឿង ជម្លោះដំណាក់យ៉ានស៊ី (Story of Yanxi Palace) ក៏មិនអន់ដែរ ដោយប្រើប្រាស់កាបូបពណ៌លឿង ដើម្បីទាក់ទាញចំណាប់អារម្មណ៍។

តារាសំដែង Zhang Ruoyun ស្លៀកពាក់ឈុតពណ៌ខ្មៅ រំលេចដោយកាបូបយួរដៃបែបយុវវ័យទាន់សម័យ។

ប្រភព៖ Sina
ប្រែសម្រួល៖ បុត្រា

July 24, 2021

Author: សឿន សំណាង