សឿន សំណាង - La Reine Media

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 28 កក្កដា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 766 នាក់, អ្នកជាចំនួន 967 នាក់ និងអ្នកស្លាប់ចំនួន 15 នាក់បន្ថែមទៀត នៅក្នុងថ្ងៃទី 27 ខែកក្កដា ឆ្នាំ 2021។

គិតត្រឹមព្រឹកថ្ងៃទី 28 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 75,152 នាក់ ក្នុងនោះមានអ្នកជាសះស្បើយជាង 67,692 នាក់ និង អ្នកស្លាប់ 1,339 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 195,992,087 នាក់ ត្រូវបានរកឃើញ ក្នុងនោះមានជាង 177,679,271 នាក់បានជា, 4,193,169 នាក់បានស្លាប់ និងជាង 14,119,647 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 28, 2021

ប្រទះឃើញត្បូងខ្នាតយក្ស មានតម្លៃ 100 លានដុល្លារ ពេលជីកអណ្ដូងក្នុងផ្ទះ

ស្រីលង្កា៖ ក្រុមកម្មករដែលជីកអណ្ដូងក្នុងផ្ទះរបស់អ្នកជំនួញម្នាក់នៅតំបន់ Ratnapura បានប្រទះឃើញត្បូងកណ្ដៀង (sapphire) មួយដុំធំដែលមានទម្ងន់ជាង 500 គីឡូក្រាម និងមានតម្លៃប្រហែល 100 លានដុល្លារអាមេរិក។

បណ្ដាញសារព័ត៌មាន ស្រីលង្កា កាលពីថ្ងៃទី 27 កក្កដា បានចេញផ្សាយថា ត្បូងកណ្ដៀង (sapphire) ទម្ងន់ជាង 2.5 លានការ៉ាត ត្រូវបានក្រុមអ្នកជីកអណ្ដូង ប្រទះឃើញនៅក្នុងបរិវេណផ្ទះរបស់អ្នកជំនួញ Gamage នៅក្នុងក្រុង Ratnapura ខេត្ត Sabaragamuwa ដែលជាតំបន់មួយ សម្បូរធនធានធម្មជាតិ ពិសេសគឺត្បូងដែលមានតម្លៃខ្ពស់ របស់ ស្រីលង្កា។

«កម្មករជីកអណ្ដូង បានប្រាប់ថា ពួកគេប្រទះឃើញត្បូងតូចមួយចំនួន។ ក្រោយមក យើងក៏បានបន្តរកឃើញត្បូងដ៏ធំនេះ» លោក Gamege ប្រាប់ដូច្នេះ។

ក្រុមអ្នកជំនាញបានឱ្យដឹងថា ត្បូងកណ្ដៀងទម្ងន់សរុប 510 គីឡូក្រាម ដែលត្រូវបានដាក់ឈ្មោះឱ្យថា «Serendipity Sapphire» នេះ មានតម្លៃឡើងដល់ 100 លានដុល្លារអាមេរិក នៅលើទីផ្សារត្បូងអន្តរជាតិ។

អ្នកជំនួញ Gamage ជាសមាជិកនៃគ្រួសារដែលធ្វើជំនួញខាងត្បូង អស់ 3 ជំនាន់មកហើយ ក្រោយមកក៏បានរាយការណ៍ព័ត៌មាននេះជូនអាជ្ញាធរ។ ប៉ុន្តែ ក្រុមមន្ត្រីត្រូវការពេលជាង 1 ឆ្នាំ ក្នុងការសម្អាត ទើបអាចវាយតម្លៃជាផ្លូវការបាន។

Gamage ថ្លែងថា ក្នុងអំឡុងសម្អាតដំបូង ត្បូងតូចៗមួយចំនួនបានរបេះចេញពី Serendipity Sapphire ហើយវាត្រូវបានបញ្ជាក់ថា ជា ត្បូងកណ្ដៀងរូបផ្កាយ (Star Sapphire) ដែលមានគុណភាពខ្ពស់។

Gamini Zoysa ដែលជាបណ្ឌិតផ្នែកត្បូងពេជ្យ បានអធិប្បាយអំពី Serendipity Sapphire ថា៖ «ខ្ញុំមិនធ្លាប់បានឃើញវត្ថុធំយ៉ាងដូច្នេះទេ។ ត្បូងនេះ ទំនងជាបានកកើតតាំងពី 400 លានឆ្នាំមុន»។

យ៉ាងណាក៏ដោយ អ្នកជំនាញមួយចំនួននិយាយថា បើជាត្បូងនេះមានទម្ងន់ធ្ងន់ ប៉ុន្តែ មិនប្រាកដថា គ្រប់ផ្នែករបស់វា សុទ្ធតែជាត្បូងដែលមានគុណភាពខ្ពស់នោះដែរ។ Thilak Weerasinghe មេដឹកនាំស្ថាប័នត្បូងមានតម្លៃរបស់ ស្រីលង្កា សង្ឃឹមថា ត្បូង Serendipity Sapphire នេះ នឹងទទួលបានចំណាប់អារម្មណ៍ច្រើនពីក្រុមហ៊ុន ឬសារមន្ទីរអន្តរជាតិ៕

ប្រភព៖ BBC
ប្រែសម្រួល៖ បុត្រា

July 28, 2021

ប៉ូលិស ឥណ្ឌា បាញ់ប្រហារគ្នា! អ្នកស្លាប់ និងរបួស កើនដល់ជាង 60 នាក់

ប៉ូលិសក្នុងរដ្ឋចំនួន 2 គឺរដ្ឋ Assam និងរដ្ឋ Mizoram របស់ប្រទេស ឥណ្ឌា បានបាញ់ប្រហារគ្នា ដោយសារតែការដណ្ដើមទឹកដី បណ្ដាលឱ្យមានអ្នកស្លាប់ 6 នាក់ និងរបួសជាង 60 នាក់។

មេដឹកនាំរដ្ឋ Assam លោក Himanta Biswa Sarma កាលពីថ្ងៃទី 27 កក្កដា បានឱ្យដឹងថា បុគ្គលិកពិសេសចំនួន 4,000 នាក់ នឹងត្រូវបានបញ្ជូនទៅកាន់តំបន់ព្រំប្រទល់នឹងរដ្ឋ Mizoram បន្ទាប់ពីមានករណីប្រយុទ្ធគ្នាមួយថ្ងៃមុននោះ។

ចំណែក មេដឹកនាំរដ្ឋ Mizoram លោក Zoramthanga បានចោទថា ប៉ូលិសរបស់រដ្ឋ Assam បានផ្ទុះអាវុធមុន ហើយគំរាមសម្លុតបុគ្គលិកនៅបន្ទាយការពារដែន និងបានវាយប្រហារពលរដ្ឋស៊ីវិលដែលមិនមានអាវុធ។

រដ្ឋទាំងពីរមានការប្រទាញប្រទង់គ្នាអស់ជាច្រើនទសវត្សរ៍មកហើយ ទាក់ទងនឹងបញ្ហាព្រំប្រទល់។ ភាពតានតឹងបានកើនឡើងតាំងពីខែមុន នៅពេលរដ្ឋ Mizoram បានចោទកងកម្លាំងរបស់រដ្ឋ Assam ថា បានរំលោភទឹកដី។ ជាការឆ្លើយតប រដ្ឋ Assam ក៏បានចោទវិញថា ពលរដ្ឋរបស់រដ្ឋ Mizoram បានរំលោភយកដីព្រៃបម្រុងរបស់រដ្ឋនេះ។

រដ្ឋមន្ត្រីក្រសួងមហាផ្ទៃ ឥណ្ឌា លោក Amit Shah បានជួយបន្ធូរបន្ថយភាពតានតឹងនេះ ប៉ុន្តែ មិនទាន់មានដំណោះស្រាយសមស្របដើម្បីសម្របសម្រួលបញ្ហាដណ្ដើមទឹកដីគ្នានេះនៅឡើយ។ Sarma សមាជិកម្នាក់នៃបក្សកាន់អំណាច Bharatiya Janata (BJP) របស់នាយករដ្ឋមន្ត្រី Narendra Modi ឱ្យដឹងថា អាជ្ញាធររបស់លោកនឹងដាក់សំណើឡើងតុលាការកំពូល ដើម្បីធានាឱ្យបានប្រាកដថា «ពុំមានដីព្រៃបម្រុងមួយតឹកណា ត្រូវបានគេរំលោភបំពាន»។

Mizoram ធ្លាប់ជាផ្នែកមួយនៃទឹកដីរបស់រដ្ឋ Assam គិតត្រឹមឆ្នាំ 1972 បន្ទាប់ពីត្រូវបានបំបែកចេញពីគ្នា ហើយក្រោយមកក៏ក្លាយជារដ្ឋដាច់ដោយឡែកនៅឆ្នាំ 1986។ អាជ្ញាធររដ្ឋ Mizoram ឱ្យដឹងថា តំបន់ដែលរដ្ឋ Assam ប្រកាសថាជាកម្មសិទ្ធិរបស់ខ្លួនដែរនោះ ត្រូវបានពលរដ្ឋរបស់ពួកគេ ប្រើប្រាស់ជាង 100 ឆ្នាំមកហើយ។ ប៉ុន្តែ ភាគីខាង Assam អះអាងថា ដែនដីមួយផ្នែកធំរបស់ខ្លួន ត្រូវបានគេរំលោភកាន់កាប់។

តំបន់ភាគឦសានដែលនៅដាច់ស្រយាល និងសម្បូរធនធានធម្មជាតិ របស់ប្រទេស ឥណ្ឌា គឺជាទីដែលមានបញ្ហាពូជសាសន៍កើតឡើងជាញឹកញាប់ ចាប់តាំងពីប្រទេសនេះ ដណ្ដើមបានឯករាជ្យ កាលពីឆ្នាំ 1947។ បន្ទាត់ព្រំប្រទល់រវាងរដ្ឋចំនួន 7 នៅតំបន់នេះ មិនត្រូវបានខណ្ឌចែកច្បាស់លាស់ ធ្វើឱ្យជម្លោះដណ្ដើមទឹកដី និងទ្រព្យសម្បត្តិ កើតមានជាបន្តបន្ទាប់ ប៉ុន្តែ កម្រកើតមានការប្រយុទ្ធគ្នារហូតដល់ថ្នាក់មានមនុស្សស្លាប់ច្រើនដូច្នេះ៕

ប្រភព៖ AFP
ប្រែសម្រួល៖ បុត្រា

July 28, 2021

តារាសំដែង Song Hye Kyo ឡង់សេ ម៉ូដសក់ក្រង ទម្លាក់ចំហៀង នៅក្នុងព្រឹត្តិការណ៍ Fendi Photos

តារាសំដែងស្រី កូរ៉េខាងត្បូង វ័យ 40 ឆ្នាំ នាង Song Hye Hyo បង្អួតម៉ូដសក់ក្រងទម្លាក់ចំហៀង និងបង្ហាញរាងក្នុងឈុតសម្លៀកបំពាក់ ពណ៌ pastel យ៉ាងស្រទន់។

ក្នុងព្រឹត្តិការណ៍នៅទីក្រុង សេអ៊ូល កាលពីថ្ងៃទី 26 កក្កដា តារាសំដែង Song Hye Hyo ប្រើប្រាស់សម្លៀកបំពាក់របស់ក្រុមហ៊ុន Fendi។

Hye Hyo ឡង់សេ កម្រងតង្កៀបសក់ O’Lock របស់ Fendi។

នៅលើទំព័រ វេទីកា (forum) ជាច្រើន នៅ អាស៊ី អ្នកគាំទ្ររបស់តារារូបនេះ ចាប់អារម្មណ៍ខ្លាំងទៅលើរបៀបក្រងសក់ទម្លាក់ចំហៀង ដែលបង្កើតជាបែបបទថ្មីសន្លាង សម្រាប់ Hye Hyo។

កន្លងមក គេកម្រឃើញតារាសំដែងដែលកើតឆ្នាំ 1981 រូបនេះ ធ្វើម៉ូដសក់ប្លែកៗណាស់ នាងតែងតែទម្លាក់ប៉ប្រះស្មា អ៊ុតរួញ ឬចងបួងឡើងលើ។

Hye Hyo ឡង់សេ ម៉ូដសម្លៀកបំពាក់សម្រាប់រដូវស្លឹកឈើជ្រុះ របស់ក្រុមហ៊ុន Michaa។

ស្រីស្អាតនេះ រកបានប្រាក់ចំណូលច្រើន ពីការផ្សាយពាណិជ្ជកម្មរបស់ក្រុមហ៊ុនឆ្នៃម៉ូដសម្លៀកបំពាក់ និងក្រុមហ៊ុនថែទាំសម្រស់។

បច្ចុប្បន្ន Song Hye Kyo កំពុងថតភាពយន្តទូរទស្សន៍ រឿង «Now, We Are Breaking Up»។ «Now, We Are Breaking Up» គឺជាស្នាដៃនិពន្ធរបស់ Je In និងដឹកនាំសំដែងដោយ Lee Gil-bok ហើយផលិតដោយក្រុមហ៊ុន Samhwa Networks រួមសហការដោយ United Artists Agency សម្រាប់ទូរទស្សន៍ SBS នៃប្រទេសកូរ៉េខាងត្បូង។ ក្រៅពីខ្សែភាពយន្តទូរទស្សន៍នេះ នៅមានគម្រោងចំនួន 2 ទៀត កំពុងរង់ចាំនាង៕

ប្រភព៖ Fendi
ប្រែសម្រួល៖ បុត្រា

July 27, 2021

ក្រសួងសុខាភិបាល អនុញ្ញាតឱ្យវិស័យឯកជន នាំចូលវ៉ាក់សាំង COVID-19 សម្រាប់ចែកចាយនៅ កម្ពុជា

(ភ្នំពេញ)៖ ក្រសួងសុខាភិបាល បានបើកផ្លូវឱ្យក្រុមហ៊ុនរកស៊ីផ្នែកឱសថ អាចនាំចូលវ៉ាក់សាំងបង្ការវីរុស COVID-19 ដែលទទួលស្គាល់ដោយអង្គការសុខភាពពិភពលោក (WHO) មកចែកចាយនៅ កម្ពុជា។

ក្នុងលិខិតជម្រាបទៅម្ចាស់គ្រឹះស្ថានអាហរ័ណ នីហរ័ណឱសថ នាថ្ងៃទី 27 ខែកក្កដា ឆ្នាំ 2021 លោកសាស្ត្រចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានបញ្ជាក់ថា គ្រឹះស្ថាន អាហរ័ណ នីហរ័ណឱសថ ដែលទទួលបានការអនុញ្ញាតពីក្រសួងសុខាភិបាល អាចធ្វើការស្នើសុំនាំចូលវ៉ាក់សាំង COVID-19 ទាំងឡាយណា ដែលត្រូវបានទទួលស្គាល់ដោយអង្គការសុខភាពពិភពលោក ដើម្បីចែកចាយ និងចាក់តាមទីតាំងផ្តល់សេវាសុខាភិបាលឯកជន ស្របច្បាប់ ក្នុងក្របខណ្ឌទូទាំងប្រទេស។

ក្នុងលិខិតនេះ លោករដ្ឋមន្ត្រីបានបញ្ជាក់ថា គ្រឹះស្ថាន អាហរ័ណ នីហរ័ណឱសថ ត្រូវប្រតិបត្តិឱ្យបានត្រឹមត្រូវតាមស្តង់ដារបច្ចេកទេសក្នុងការដឹកជញ្ជូន ការថែរក្សា និងការស្តុកវ៉ាក់សាំង នៅក្នុងឃ្លាំង ដើម្បីធានាឱ្យបានសុវត្ថិភាព និងប្រសិទ្ធភាពខ្ពស់៕

July 27, 2021

iPhone 14 Pro ប្រើប្រាស់វត្ថុធាតុ «ប្រណិត និងថ្នៃថ្នូរ» ជាងឆ្ងាយ ធៀបនឹងបច្ចុប្បន្ន

iPhone 14 កំណែលំដាប់ខ្ពស់ឆ្នាំ 2022 តាមគម្រោងនឹងត្រូវងាកទៅប្រើប្រាស់លោហធាតុ ទីតានីញ៉ូម។ នេះគឺជារបាយការណ៍របស់ធនាគារ JPMorgan Chase។

យោងតាមរបាយការណ៍ លោហធាតុ ទីតានីញ៉ូម នេះ គឺជាការផ្លាស់ប្ដូរដ៏ធំមួយ ចំពោះ ទូរស័ព្ទ Apple iPhone 2022។ ក្រុមហ៊ុន Foxconn នឹងផលិតផ្ដាច់មុខ ស៊ុមដែលធ្វើអំពីទីតានីញ៉ូម សម្រាប់ iPhone 14 Pro។ បើសិនជាព័ត៌មាននេះ ពិតជាត្រឹមត្រូវមែន នោះនឹងជាលើកដំបូងដែល Apple ប្រើប្រាស់ ទីតានីញ៉ូម សម្រាប់ផលិតផលជាទូរស័ព្ទរបស់ខ្លួន។

ធៀបនឹងដែកមិនច្រែះ (អ៊ីណុក) លោហធាតុ ទីតានីញ៉ូម រឹងជាងឆ្ងាយ និងអាចទប់ទល់នឹងបញ្ហាឆ្កូតបានយ៉ាងល្អ។ វាក៏មានលទ្ធភាពប្រឆាំងនឹងការសឹករិចរឹល ជាងលោហធាតុដទៃ។ ប៉ុន្តែ ទីតានីញ៉ូម ក៏មានចំណុចខ្សោយមួយចំនួន មានដូចជា ស្នាមក្រយៅដៃច្បាស់ជាង ចំណែកភាពរឹងមាំរបស់វា ក៏បង្កការលំបាកដល់សកម្មភាពឆ្លាក់ផងដែរ។

Apple កំពុងសិក្សាស្រាវជ្រាវដើម្បីដោះស្រាយបញ្ហាខាងលើ។ ប័ណ្ណប៉ាតង់ថ្មីៗនេះ បង្ហាញថា Apple អាចនឹងប្រើប្រាស់ស្រទាប់ស្ដើងនៃ ធាតុ oxide ដើម្បីស្រោបពីលើលោហធាតុទីតានីញ៉ូម បំណងកាត់បន្ថយស្នាមក្រយៅដៃនៅលើស្មាតហ្វូន។ ក្រុមហ៊ុនក៏បង្កើតគំនូរព្រាងថ្មី ដើម្បីនាំមកនូវភាពរលោងដល់ទីតានីញ៉ូម។

របាយការណ៍របស់ JPMorgan Chase ធ្វើឱ្យព័ត៌មានចចាមអារ៉ាម ដែលថា «iPhone 2022 នឹងមានការប្ដូរផ្លាស់ច្រើនធៀបនឹង iPhone 13» កាន់តែមានភាពច្បាស់លាស់ ស្របពេលដែល Apple ចាត់ទុកឆ្នាំ 2022 ជាឆ្នាំ «មហាវដ្ដ» របស់ iPhone។ នៅក្នុងវដ្ដបែបនេះ អ្នកប្រើប្រាស់នឹងទិញច្រើនជាងធម្មតា។ iPhone 2022 នឹងមិនមានកំណែ mini នោះឡើយ។ មុននេះ អ្នកវិភាគ Ming Chi Kuo បានព្យាករថា Apple នឹងដាក់លក់ iPhone 2022 កំណែ 6.1 អ៊ិញ ចំនួន 2 ម៉ូដែល និងកំណែ 6.7 អ៊ិញ ចំនួន 2 ម៉ូដែល។

របាយការណ៍ខាងលើ ក៏បានរំលឹកឡើងវិញអំពីដំណឹងចចាមអារ៉ាម ដែលថា Touch ID នឹងត្រលប់មកកាន់ iPhone 2022 ក្រោមរូបភាពផ្សេង ដោយវាត្រូវបានបំពាក់នៅលើគ្រាប់ចុចចំហៀង ឬលាក់ក្រោមអេក្រង់។ ព័ត៌មានចចាមអារ៉ាម មួយចំនួនទៀត បាននិយាយថា iPhone ឆ្នាំក្រោយ នឹងលែងមានកន្លែងឆកទៀតហើយ ពោលគឺ វានឹងដូចទៅនឹងស្មាតហ្វូន Android មួយចំនួននាបច្ចុប្បន្ន៕

ប្រភព៖ Mashable
ប្រែសម្រួល៖ បុត្រា

July 27, 2021

តួលេខ COVID-19 និងការចាក់វ៉ាក់សាំងនៅ កម្ពុជា និងពិភពលោក គិតត្រឹមថ្ងៃទី 27 កក្កដា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 685 នាក់, អ្នកជាចំនួន 775 នាក់ និងអ្នកស្លាប់ចំនួន 19 នាក់បន្ថែមទៀត នៅក្នុងថ្ងៃទី 26 ខែកក្កដា ឆ្នាំ 2021។

គិតត្រឹមព្រឹកថ្ងៃទី 27 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 74,386 នាក់ ក្នុងនោះមានអ្នកជាសះស្បើយ 66,725 នាក់ និង អ្នកស្លាប់ 1,324 នាក់។

នៅព្រឹកនេះ ក្រសួងសុខាភិបាល ក៏បានចេញសេចក្តីជូនព័ត៌មាន ឱ្យដឹងថា កម្ពុជា បានរកឃើញអ្នកវិជ្ជមាននឹងវីរុស COVID-19 ប្រភេទបំប្លែងថ្មី B.1.617.2 (Delta) ចំនួន 39 ករណីផងដែរ កាលពីថ្ងៃទី 22 និងថ្ងៃទី 25 ខែកក្កដា ឆ្នាំ 2021។

ចំណែកយុទ្ធនាការចាក់វ៉ាក់សាំងវិញ រហូតមកដល់ថ្ងៃទី 26 ខែកក្កដា ការចាក់វ៉ាក់សាំងបង្ការ COVID-19 នៅកម្ពុជា សម្រេចបាន 68.39% ក្នុងនោះមាន អ្នកបានចាក់លើកទីមួយជាង 6,552,000 នាក់ និងអ្នកបានចាក់លើកទីពីរជាង 4,363,000 នាក់។ តាមផែនការ កម្ពុជា ត្រូវចាក់វ៉ាក់សាំងឱ្យបានចំនួនពី 10 លាន ទៅ 13 លាននាក់នៅក្នុងចំណោមប្រជាជនសរុបចំនួនជិត 17 លាននាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 195,384,882 នាក់ ត្រូវបានរកឃើញ ក្នុងនោះមានជាង 177,223,145 នាក់បានជា, 4,183,291 នាក់បានស្លាប់ និងជាង 13,978,446 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 27, 2021

តំណាងរាស្ត្រ អាមេរិក វាយប្រហារ Jeff Bezos ៖ មានប្រាក់ហោះទៅកាន់អវកាស ម៉េចក៏មិនបង់ពន្ធបន្ថែម!

ស្ថាបនិករបស់ Amazon បន្តក្លាយជាគោលដៅនៃការវាយប្រហាររបស់ក្រុមអ្នកនយោបាយ អាមេរិក បន្ទាប់ពីជើងហោះហើរឡើងទៅកាន់ទីអវកាសដោយជោគជ័យ។

យោងតាមទំព័រ Business Insider តំណាងរាស្ត្រ Elizabeth Warren ថ្មីៗនេះ បានបង្ហោះសារមួយនៅលើបណ្ដាញសង្គម Twitter អំពីជើងហោះហើររបស់កំពូលមហាសេដ្ឋី Jeff Bezos ដោយយល់ថា ស្ថាបនិក Amazon រូបនេះ បើសិននៅសល់លុយហោះទៅកាន់ទីអវកាស នោះក៏មានលុយគ្រប់គ្រាន់ដើម្បីពន្ធបន្ថែម។

«បុរសជាអ្នកមានជាងគេបំផុតក្នុងពិភពលោក អាចបាញ់បង្ហោះយានដើម្បីនាំខ្លួនឯងឡើងទៅកាន់អវកាស ខណៈដែលជាងពាក់កណ្ដាលនៃប្រជាជនអាមេរិក ត្រូវរស់នៅក្នុងស្ថានភាពលំបាកពីមួយថ្ងៃ ទៅមួយថ្ងៃ។ បច្ចុប្បន្ន មនុស្សជាង 43 លាននាក់ កំពុងជួបការលំបាក ដោយសារបំណុលលើការសិស្ស និងថ្លៃសម្រាប់សុខាភិបាលជាដើម ហើយថែមទាំងមិនមានការងារធ្វើទៀតផង។ ជាក់ស្ដែង គាត់អាចបង់ពន្ធបន្ថែម ដើម្បីឱ្យគ្រប់គ្នាមានឱកាសរស់ក្នុងជីវភាពល្អជាងនេះ» តំណាងរាស្ត្រ Warren សរសេរដូច្នេះ។

របាយការណ៍របស់ ProPublica បានបង្ហាញថា ស្ថាបនិករបស់ Amazon មិនត្រូវបង់ពន្ធលើប្រាក់ចំណូលអ្វីទាំងអស់ ក្នុងអំឡុងពេលយ៉ាងតិច 2 ឆ្នាំ (2006 និង 2018)។ ពួកគេសង្ស័យថា Bezos ថែមទាំងបានគេចវេះមិនបង់ពន្ធជាច្រើនឆ្នាំផ្សេងទៀត ប៉ុន្តែ មិនទាន់ប្រមូលបានទិន្នន័យគ្រប់គ្រាន់។

Jeff Bezos (ទីពីរ រាប់ពីស្ដាំ) និងអ្នកដែលបានឡើងទៅទីអវកាស តាមរយៈយានរបស់ Blue Origin កាលពីសប្ដាហ៍មុន

ទាក់ទងនឹងបញ្ហានេះ របាយការណ៍របស់ Lynnley Browning មកពីក្រុមហ៊ុន Insider ក៏បានបង្ហាញថា Amazon មានសកម្មភាពគេចពន្ធក្នុងឆ្នាំ 2017 និង 2018។

បច្ចុប្បន្ន មហាសេដ្ឋី អាមេរិក លោក Jeff Bezos កំពុងស្ថិតនៅលើកំពូលនៃតារាងចំណាត់ថ្នាក់ស្ដីពីកក្រុមអ្នកមានជាងគេនៅលើពិភពលោក របស់ទស្សនាវដ្ដី Forbes ដោយមានទ្រព្យរហូតដល់ 209.2 ពាន់លានដុល្លារអាមេរិក។ Blue Origin ដែលជាក្រុមហ៊ុនអវកាសរបស់លោក បានទទួលជោគជ័យក្នុងការនាំយកស្ថាបនិករូបនេះ ឡើងទៅកាន់ជាយអវកាស។

បន្ទាប់ពីករណីបាញ់បង្ហោះដោយជោគជ័យកាលពីសប្ដាហ៍មុន របស់ក្រុមហ៊ុន Blue Origin តំណាងរាស្ត្រ Warren បានចំអកនៅលើ Twitter ថា មហាសេដ្ឋី Bezos ភ្លេចអរគុណកម្មករ អាមេរិក ដែលកំពុងបង់ពន្ធជូនរដ្ឋ ខណៈដែលខ្លួនលោក និងក្រុមហ៊ុន Amazon បែរជាគេចពន្ធទៅវិញ៕

ប្រភព៖ BI
ប្រែសម្រួល៖ បុត្រា

July 27, 2021

Joe Biden ប្រកាសបញ្ចប់បេសកកម្មសង្គ្រាមរបស់ អាមេរិក នៅ អ៊ីរ៉ាក់

ប្រធានាធិបតី សហរដ្ឋអាមេរិក និងនាយករដ្ឋមន្ត្រី អ៊ីរ៉ាក់ បានចុះកិច្ចព្រមព្រៀងបញ្ចប់សកម្មភាពប្រយុទ្ធរបស់ទាហានអាមេរិក នៅប្រទេសមជ្ឈិមបូព៌ាមួយនេះ ក្រោយការចូលធ្វើអត្តរាគមន៍ជាង 18 ឆ្នាំ។

«តួនាទីរបស់យើងនៅប្រទេស អ៊ីរ៉ាក់ នឹងជាការបង្វឹក គាំទ្រ និងជួយឧបត្ថម្ភ ក៏ដូចជាត្រៀមខ្លួនជាស្រេចក្នុងការធ្វើសកម្មភាព បើសិនជាក្រុមរដ្ឋអ៊ីស្លាម (IS / Islamic State) បង្ហាញខ្លួនជាថ្មី។ ប៉ុន្តែ យើងនឹងមិនចូលរួមការប្រយុទ្ធ ចាប់ពីចុងឆ្នាំនេះ» ប្រធានាធិបតី Joe Biden ថ្លែងក្រោយជំនួបជាមួយនឹងនាយករដ្ឋមន្ត្រី អ៊ីរ៉ាក់ Mustafa al-Kadhimi នៅសេតវិមាន កាលពីថ្ងៃទី 26 កក្កដា។

ការសម្រេចចិត្តនេះ ត្រូវបានធ្វើឡើងតែប៉ុន្មានខែប៉ុណ្ណោះ បន្ទាប់ពីលោក Biden បានប្រកាសដកទ័ព អាមេរិក ភាគច្រើនចេញពី អាហ្វហ្គានីស្ថាន បញ្ចប់សង្គ្រាមពីរលើកដែលចាប់ផ្ដើមតាំងពីជំនាន់អតីតប្រធានាធិបតី George W. Bush។

លោក Joe Biden (ស្ដាំ) និងនាយករដ្ឋមន្ត្រី អ៊ីរ៉ាក់ Mustafa al-Kadhimi

សហរដ្ឋអាមេរិក កំពុងដាក់ទាហាន 2,500 នាក់ នៅក្នុងប្រទេស អ៊ីរ៉ាក់ ដោយមានភារកិច្ចប្រយុទ្ធប្រឆាំងនឹងកងទ័ព IS ។ តួនាទីរបស់ទាហាន អាមេរិក នឹងងាកទៅធ្វើជាគ្រូបង្វឹក និងប្រឹក្សាយោបល់ឱ្យកងទ័ព អ៊ីរ៉ាក់ ក្នុងបេសកកម្មប្រយុទ្ធ។ ប៉ុន្តែ មិនទាន់ដឹងច្បាស់ថា សហរដ្ឋអាមេរិក នឹងទុកទាហានចំនួនប៉ុន្មាននាក់ ឱ្យនៅក្នុងប្រទេស អ៊ីរ៉ាក់ នោះទេ បន្ទាប់ពីបានបញ្ចប់បេសកកម្មប្រយុទ្ធ។

សហរដ្ឋអាមេរិក បានបញ្ជូនកងទ័ពរបស់ខ្លួនចូលប្រទេស អ៊ីរ៉ាក់ កាលពីឆ្នាំ 2003 ដើម្បីផ្ដួលរំលំរបបប្រធានាធិបតី Saddam Hussein ហើយក្រោយមកក៏បានដកទ័ពទាំងអស់ចេញពីប្រទេសនេះ នៅខែធ្នូ ឆ្នាំ 2011 ទៅតាមបញ្ជារបស់ប្រធានាធិបតី Barack Obama ប៉ុន្តែ ត្រូវបានបញ្ជូនត្រលប់ទៅកាន់ អ៊ីរ៉ាក់ ជាថ្មី ដើម្បីប្រយុទ្ធប្រឆាំងនឹងកងទ័ព IS តាមការស្នើរបស់ប្រទេសនេះ។

«នឹងមិនមានអ្នកណាម្នាក់ ប្រកាសបញ្ចប់ភារកិច្ចនោះទេ។ គោលដៅគឺការធានាឱ្យបាននូវបរាជ័យរបស់ IS » នេះបើតាមមន្ត្រីជាន់ខ្ពស់ម្នាក់របស់ សហរដ្ឋអាមេរិក ដែលទំនងជាចង់បញ្ជាក់ថា សហរដ្ឋអាមេរិក នឹងមិនបោះបង់ អ៊ីរ៉ាក់ នោះឡើយ៕

ប្រភព៖ Reuters
ប្រែសម្រួល៖ បុត្រា

July 27, 2021

ហិង្ហបុរី គ្រោងអនុញ្ញាតឱ្យដើរទេសចរណ៍ ដោយមិនបាច់ធ្វើចត្តាឡីស័ក

ប្រទេសសិង្ហបុរី កំពុងឆ្ពោះទៅរកគោលដៅបន្ធូរបន្ថយវិធានការទប់ស្កាត់វីរុស ក្នុងនោះរួមមានទាំងការអនុញ្ញាតឱ្យពលរដ្ឋដើរទេសចរណ៍ដោយមិនបាច់ធ្វើចត្តាឡីស័កផងដែរ ចាប់ពីខែកញ្ញាតទៅ។

ថ្លែងនៅក្នុងសភា នាថ្ងៃទី 27 កក្កដា រដ្ឋមន្ត្រីក្រសួងហិរញ្ញវត្ថុ Lawrence Wong បានឱ្យដឹងថា នៅខែកញ្ញា តាមផែនការ សិង្ហបុរី នឹងចាក់វ៉ាក់សាំងរួចរាល់បាន 80% ធៀបនឹងចំនួនប្រជាជនសរុប ដែលនេះនឹងជួយឱ្យសិង្ហបុរី មានមូលដ្ឋានជាក់លាក់ដើម្បីបើកដំណើរការសេដ្ឋកិច្ចឡើងវិញ។

ការសម្រេចគោលដៅនៃការចាក់វ៉ាក់សាំង នឹងអនុញ្ញាតឱ្យសិង្ហបុរី បើកទ្វារព្រំដែនឡើងវិញ សម្រាប់ការធ្វើដំណើរទៅ-មក ជាមួយនឹងបណ្ដាប្រទេស ឬតំបន់ដែលគ្រប់គ្រងវីរុសបានល្អ។

យោងតាមរដ្ឋមន្ត្រី Lawrence Wong នៅពេល សិង្ហបុរី សម្រេចបានគោលដៅក្នុងការចាក់វ៉ាក់សាំង ពលរដ្ឋដែលបានទទួលការចាក់វ៉ាក់សាំងរួចរាល់ អាចដើរទេសចរណ៍បាន ដោយមិនបាច់ធ្វើចត្តាឡីស័ក 14 ថ្ងៃ ពេលត្រលប់ចូលប្រទេស។

យោងទៅតាមកម្រិតនៃហានិភ័យរបស់បណ្ដាប្រទេសដែលពលរដ្ឋបានទៅទេសចរណ៍ វិធានការចត្តាឡីស័កអាចត្រូវបានជំនួសដោយយន្តការធ្វើតេស្តម៉ត់ចត់ ឬពេលវេលាដែលត្រូវធ្វើចត្តាឡីស័ក ត្រូវបានកាត់បន្ថយមកនៅត្រឹម 7 ថ្ងៃ និងត្រូវធ្វើនៅក្នុងផ្ទះ ជំនួសឱ្យសណ្ឋាគារដែលត្រូវបានកំណត់។ ពលរដ្ឋដែលមិនទាន់បានទទួលការចាក់វ៉ាក់សាំង ក៏មានសិទ្ធិទៅទេសចរណ៍ ប៉ុន្តែ ត្រូវធ្វើចត្តាឡីស័កឱ្យបានពេញលេញ។

សិង្ហបុរី មានផែនការចាក់វ៉ាក់សាំងឱ្យបាន 2/3 នៃចំនួនប្រជាជនសរុប នៅក្នុងថ្ងៃបុណ្យឯករាជ្យ (9 សីហា) ហើយក្រោយមក នឹងកាត់បន្ថយវិធានការទប់ស្កាត់បន្តិចម្ដង៕

ប្រភព៖ Bloomberg News
ប្រែសម្រួល៖ បុត្រា

July 27, 2021

Author: សឿន សំណាង