សឿន សំណាង - La Reine Media

Kwon Mina (អតីតសមាជិករបស់ AOA) ធ្វើអត្តឃាតជាលើកទីបួន

អតីតសមាជិកក្រុមចម្រៀងស្រី កូរ៉េខាងត្បូង AOA បានសម្រេចចិត្តបញ្ចប់ជីវិតរបស់ខ្លួន បន្ទាប់ពីបានបង្ហោះសារនៅលើបណ្ដាញសង្គមកាលពីព្រឹកមិញ ហើយនេះគឺជាលើកទីបួន ដែល Mina ធ្វើអត្តឃាត នៅក្នុងអំឡុង 1 ឆ្នាំ។

សារព័ត៌មាន កូរ៉េខាងត្បូង នាព្រឹកថ្ងៃទី 29 កក្កដា នេះ អតីតសមាជិកនៃក្រុមចម្រៀង AOA នាង Kwon Mina ត្រូវបានបញ្ជូនទៅកាន់មន្ទីរពេទ្យ ក្រោយពីបានព្យាយាមបញ្ចប់ជីវិតរបស់ខ្លួន។ មិត្តម្នាក់បានហៅទូរស័ព្ទទៅកាន់ Mina ប៉ុន្តែ នាងមិនលើកទូរស័ព្ទ។ ពួកគេក៏បានហៅឡានពេទ្យភ្លាមៗ បន្ទាប់ពីបានរកឃើញ Mina នៅក្នុងផ្ទះដោយឡែករបស់នាង កាលពីព្រឹកនេះ។

ពេលត្រូវបានរកឃើញ Mina កំពុងស្ថិតក្នុងសភាពហូរឈាមច្រើន។ នាងបានទទួលការវះកាត់ និងព្យាបាលរបួស និងបានរួចពីការស្លាប់ ។ ប៉ុន្តែ នាងកំពុងស្ថិតក្នុងភាពរវើរវាយនៅឡើយ។ នេះគឺជាលើកទីបួនហើយ ដែល Mina ធ្វើអត្តឃាត នៅក្នុងអំឡុង 1 ឆ្នាំ ចាប់តាំងពីមានរឿងជាមួយប្រធានក្រុម AOA នាង Shin Ji-min។

មុនហេតុការណ៍សម្លាប់ខ្លួន កាលពីព្រឹកថ្ងៃទី 29 កក្កដា Mina បានបង្ហោះលិខិតមួយដ៏វែង រៀបរាប់អំពីរឿងអាស្រូវជាមួយ Shin Ji-min និងបញ្ហាជាមួយនឹងអតីតមិត្តប្រុសរបស់ខ្លួន។ Mina និយាយថា ខ្លួនពិតជាជនរងគ្រោះ ដែលត្រូវ Ji Min សម្លុត គំរាម។ Mina ទទួលស្គាល់ថា ខ្លួន «បានប្រតិកម្មជ្រុល» ប៉ុន្តែ មូលហេតុគឺខ្លួនយល់ថា «អយុត្តិធម៌ ឈឺចាប់ ខឹង តូចចិត្ត និងចង់សងសឹក»។ នាងបន្ថែមថា៖ «ខ្ញុំចង់បញ្ជាក់ថា ខ្ញុំមិនឆ្កួត មិននិយាយកុហក មិនមែនជាអ្នកសម្លុត គំរាមគេ។ ខ្ញុំបានបង្កបញ្ហាច្រើន ប៉ុន្តែ ខ្ញុំចង់បានភាពស្មោះត្រង់ និងកែប្រែកំហុសដែលខ្លួនបានធ្វើ»។

ចំណែកបញ្ហាជាមួយអតីតមិត្តប្រុស Mina ឱ្យដឹងថា នាងមិនច្បាស់ថា ខ្លួនធ្វើត្រូវ ឬខុសនោះទេ តែមួយក្នុងចំណោមកំហុសនោះគឺជារបស់នាង។

Mina ត្រូវបានគេរិះគន់ថា ជា «ចោរ» ប្លន់សង្សារអ្នកដទៃ។

កាលពីខែសីហា ឆ្នាំ 2020 Mina ធ្លាប់បានធ្វើអត្តឃាតម្ដងហើយ ដោយការអារដៃ ប៉ុន្តែ ត្រូវបាននាំទៅសង្គ្រោះបន្ទាន់ទាន់ពេល៕

July 29, 2021

តម្លៃមូលធនរបស់ Facebook បាត់អស់ 40 ពាន់លានដុល្លារ ក្រោយ Zuckerberg ថា «ពេលខាងមុខ Facebook ពិបាករស់» ប៉ុន្តែ Zuckerberg នៅមាន «អាវុធ» ពិសេសមួយទៀត

Facebook កំពុងក្ដោបក្ដាប់អ្នកប្រើប្រាស់ 2.9 ពាន់លាននាក់ក្នុងដៃ នៅក្នុង 1 ត្រីមាស។ ហេតុអ្វីបានជា មហាសេដ្ឋី Mark Zuckerberg និយាយថា «ពេលខាងមុខ Facebook នឹងពិបាករស់» ទៅវិញ?

សារព័ត៌មាន CNN អះអាងថា សកម្មភាពអាជីវកម្មរបស់ Facebook កំពុងតែហោះឡើងខ្ពស់បំផុត ប៉ុន្តែ ស្ថានភាពល្អប្រសើរនេះ ទំនងជាស្ថិតនៅមិនបានយូរអង្វែងឡើយ។

Facebook ទើបតែបានប្រកាសថា រកបានចំណូលជិត 29.1 ពាន់លានដុល្លារ នៅក្នុងអំឡុង 3 ខែ ដែលបានបញ្ចប់កាលពីថ្ងៃទី 30 មិថុនា កើន 56% ធៀបនឹងដំណាក់កាលដូចគ្នា កាលពីឆ្នាំ 2020។ ប្រាក់ចំណេញរបស់ Facebook ក៏កើនឡើងទ្វេដង (10.4 ពាន់លានដុល្លារ) ខ្ពស់ជាងឆ្ងាយ បើធៀបនឹង 8.7 ពាន់លានដុល្លារ ដែលក្រុមអ្នកជំនាញបានព្យាករ។

ក៏ប៉ុន្តែ ចក្ខុវិស័យសម្រាប់ពាក់កណ្ដាលចុងឆ្នាំ 2021 នេះ ហាក់មិនល្អប្រសើរ។ នេះបើតាមការអះអាង នៃ CFO របស់ Facebook លោក David Wehner។

https://www.youtube.com/watch?v=w6j4-Ijx73c

ល្បឿននៃកំណើនប្រាក់ចំណូល កំពុងថយចុះ ដោយសារតែ «ការផ្លាស់ប្ដូរគោលការណ៍ និងថ្នាលបច្ចេកវិទ្យា» (ដែលនេះចង់សំដៅលើការកំណត់ថ្មីនៅលើប្រព័ន្ធប្រតិបត្តិ iOS របស់ Apple។ ការប្ដូរផ្លាស់ដែលបានអនុវត្តចាប់ពីខែមេសា នេះ ទំនងជានឹងប៉ះពាល់ធ្ងន់ធ្ងរដល់អាជីវកម្មរបស់ Facebook នៅក្នុងត្រីមាសទី 3 ។

ជាក់ស្ដែង Apple បានប្រកាសការកែលំអមួយចំនួនសម្រាប់ iOS 15។ ក្នុងនោះ អ្នកប្រើប្រាស់ឧបករណ៍ iOS អាចប្រើ Facetime ដែលជាកម្មវិធីហៅទូរស័ព្ទជាវីដេអូ ដោយការប្រើប្រាស់អ៊ីនធើណិត រវាងឧបករណ៍ iOS មុនៗ ជាមួយនឹងឧបករណ៍ Android និង Window។

ក្រៅពីនេះ អ្នកប្រើប្រាស់ក៏អាចប្រើកម្មវិធីថ្មី SharePlay ដែលមានមុខងារចែករំលែកចម្រៀង រូបថត ឬមើល livestream ក្នុងពេលកំពុងរង់ចាំការហៅទូរស័ព្ទដោយកម្មវិធី Facetime។ កម្មវិធីផ្ញើសារតាមអ៊ីនធើណិត iMessage រវាងឧបករណ៍ iOS មុននោះ ក៏ត្រូវបានកែលំអ ឱ្យមានភាពងាយស្រួលជាងមុន ក្នុងការចែករំលែកតំណភ្ជាប់ រូបថត ចម្រៀង ឬអាសយដ្ឋានទំនាក់ទំនងផងដែរ។

ការកែលំអទាំងឡាយខាងលើរបស់ Apple បានវាយប្រហារខ្លាំងក្លាទៅលើវិស័យដែល Facebook កំពុងរកស៊ី ដោយសារតែអ្នកប្រើប្រាស់ឧបករណ៍ Android ពេលនេះ អាចប្រើ Facetime បាន។

https://www.youtube.com/watch?v=hpeZmfq1TRM

ក្រោយពេលចេញរបាយការណ៍ស្ដីពីលទ្ធផលអាជីវកម្ម តម្លៃមូលបត្ររបស់ Facebook បានធ្លាក់ចុះជិត 4% ដែលប្រហាក់ប្រហែលនឹង 40 ពាន់លានដុល្លារ។

ប៉ុន្តែ យ៉ាងណាក៏ដោយ Facebook នៅតែរីកចម្រើន។ Facebook មានអ្នកប្រើប្រាស់ជាង 2.9 ពាន់លាននាក់ នៅក្នុងត្រីមាសកន្លង កើន 7% ធៀបនឹងឆ្នាំមុន។

ក្នុងអនាគត Zuckerberg មានបំណងកសាងកំណែ Facebook ធំជាងនេះ ដោយពង្រីកវិសាលភាពឱ្យកាន់តែធំ ទៅក្នុងវិស័យកំសាន្ត ការបំពេញការងារ បណ្ដាញសង្គម។ល។

ម្ចាស់ Facebook និយាយថា៖ «ប្រការដែលខ្ញុំយល់ថា អស្ចារ្យបំផុត នោះគឺ ធ្វើយ៉ាងណាដើម្បីនាំយកវិស័យទាំងឡាយ (ដែល Facebook កំពុងធ្វើ) គួបផ្សំជាមួយគ្នា ជាគំនិតដ៏ធំមួយ។ គោលដៅជារួម នោះគឺ នាំយក Metaverse ចូលទៅក្នុងការរស់នៅប្រចាំថ្ងៃ»។

Metaverse នឹងនាំមកនូវឱកាសដ៏ធំ សម្រាប់អ្នកផលិតខ្លឹមសារ សិល្បករឯករាជ្យ អ្នកដែលចង់ធ្វើការពីចម្ងាយ ក៏ដូចជាក្រុមមនុស្សដែលរស់នៅក្នុងតំបន់ដែលការអប់រំ ការកំសាន្ត មានកំណត់។ នេះបើតាមមហាសេដ្ឋី Mark Zuckerberg៕

ប្រភព៖ CNN
ប្រែសម្រួល៖ បុត្រា

July 29, 2021

សាលាក្រុងភ្នំពេញ ជាផ្អាកបណ្ដោះអាសន្ន សកម្មភាពអាជីវកម្ម និងការងារមួយចំនួន ដើម្បីទប់ស្កាត់ COVID-19

សាលាក្រុងភ្នំពេញ បានសម្រេចផ្អាកបណ្ដោះអាសន្នចំពោះសកម្មភាពការងារ មុខរបរ ឬអាជីវកម្ម រមណីយដ្ឋានទាំងឡាយ ដែលមានហានិភ័យខ្ពស់នៃការឆ្លង COVID-19។ វិធានការនេះនឹងត្រូវបានអនុវត្តចាប់ពីម៉ោង 23:59 នាទី ថ្ងៃទី 29 ខែកក្កដា ឆ្នាំ 2021 ដល់ថ្ងៃទី 12 សីហា 2021។

វិធានការនេះ ក៏ហាមឃាត់ការជួបជុំមនុស្សដែលលើសពី 10 នាក់ផងដែរ។ ក្រៅពីនេះ សាលាក្រុងភ្នំពេញ ក៏សម្រេចផ្អាកការធ្វើចរាចរណ៍បណ្តោះអាសន្ន ចាប់ពីម៉ោង 21 ដល់ ម៉ោង 03 ភ្លឺ ដើម្បីទប់ស្កាត់ COVID-19។ ប៉ុន្តែ ត្រូវលើកលែងករណីមួយចំនួន។ ព័ត៌មានលំអិត សូមអានសេចក្ដីសម្រេចខាងក្រោម៖

July 29, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 29 កក្កដា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 765 នាក់, អ្នកជាចំនួន 694 នាក់ និងអ្នកស្លាប់ចំនួន 11 នាក់បន្ថែមទៀត នៅក្នុងថ្ងៃទី 28 ខែកក្កដា ឆ្នាំ 2021។

គិតត្រឹមព្រឹកថ្ងៃទី 29 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 75,917 នាក់ ក្នុងនោះមានអ្នកជាសះស្បើយជាង 68,380 នាក់ និង អ្នកស្លាប់ 1,350 នាក់។

កម្ពុជា សម្រេច បិទខ្ទប់ភូមិសាស្ត្រខេត្តកោះកុង, ខេត្តពោធិ៍សាត់, ខេត្តបាត់ដំបង, ខេត្តប៉ៃលិន, ខេត្តបន្ទាយមានជ័យ, ខេត្តឧត្តរមានជ័យ, ខេត្តព្រះវិហារ និងខេត្តសៀមរាប ជាបណ្តោះអាសន្នសម្រាប់រយៈពេល 14 ថ្ងៃ គិតចាប់ពីវេលាម៉ោង 23:59 នាទី នាថ្ងៃទី29 ខែកក្កដា ឆ្នាំ 2021 រហូតដល់ថ្ងៃទី12 ខែសីហា ឆ្នាំ 2021។ យោងតាមសេចក្តីសម្រេច ការបិទនេះសំដៅទប់ស្កាត់ការឆ្លងរាលដាលក្នុងសហគមន៍ដែលបណ្តាលមកពី COVID-19 ប្រភេទ Delta។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 196,710,180 នាក់ ត្រូវបានរកឃើញ ក្នុងនោះមានជាង 178,122,860 នាក់បានជា, 4,203,695 នាក់បានស្លាប់ និងជាង 14,119,640 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 29, 2021

វ៉ាក់សាំង COVID-19 ជាង 1.4 លានដូស ជាជំនួយរបស់ អាមេរិក និង អង់គ្លេស នឹងមកដល់ កម្ពុជា ក្នុងសប្ដាហ៍នេះ

វ៉ាក់សាំងបង្ការវីរុស COVID-19 ចំនួនពាក់កណ្ដាល ក្នុងចំណោមជាង 1 លានដូស ដែលជាជំនួយរបស់ សហរដ្ឋអាមេរិក តាមរយៈយន្តការ COVAX នឹងមកដល់ កម្ពុជា នៅថ្ងៃស្អែក ខណៈជំនួយជា វ៉ាក់សាំង ចំនួន 415,000 របស់ ចក្រភពអង់គ្លេស ក៏នឹងមកដល់ កម្ពុជា ក្នុងសប្ដាហ៍នេះដែរ។

នៅក្នុងសេចក្ដីប្រកាសព័ត៌មានមួយរបស់ ស្ថានទូត សហរដ្ឋអាមេរិក ប្រចាំ កម្ពុជា ដែលបានចេញផ្សាយកាលពីថ្ងៃទី 28 កក្កដា បានបញ្ជាក់ថា វ៉ាក់សាំងដែលជាជំនួយរបស់ប្រទេសនេះ គឺប្រភេទ Johnson & Johnson។ វ៉ាក់សាំងទាំងនេះ នឹងមកដល់ កម្ពុជា នៅថ្ងៃទី 30 ខែកក្កដា ឆ្នាំ 2021 វេលាម៉ោង 07:15 នាទីព្រឹក នៅព្រលានយន្តហោះអន្តរជាតិភ្នំពេញ។ ស្ថានទូតក៏បានឱ្យដឹងថា វ៉ាក់សាំងដែលនៅសល់ពីនេះ នឹងមកដល់នៅថ្ងៃទី 02 ខែសីហា ឆ្នាំ 2021។

ដោយឡែក ស្ថានទូតអង់គ្លេស ប្រចាំ កម្ពុជា ក៏បានឱ្យដឹងថា វ៉ាក់សាំង AstraZeneca ចំនួន 415,000 ដូស ដែលប្រទេសនេះ បានសន្យាផ្ដល់ជាជំនួយដល់ កម្ពុជា ត្រូវបានរៀបចំរួចរាល់ ហើយនឹងមកដល់ កម្ពុជា ក្នុងសប្ដាហ៍នេះដែរ។

គិតត្រឹមព្រឹកថ្ងៃទី 29 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 75,917 នាក់ ក្នុងនោះមានអ្នកជាសះស្បើយជាង 68,380 នាក់ និង អ្នកស្លាប់ 1,350 នាក់៕

ដោយ៖ បុត្រា

July 29, 2021

វ៉ាក់សាំង Pfizer 3 ដូស គ្រប់គ្រាន់សម្រាប់ការទប់ទល់នឹង វ៉ារ្យ៉ង់ Delta របស់ COVID-19

ទិន្នន័យថ្មីបានបង្ហាញថា ដូស (ម្ជុល) ទីបី នៃ វ៉ាក់សាំង Pfizer អាចបង្កើនបរិមាណនៃអង្គបដិប្រាណប្រឆាំងវីរុស COVID-19 ប្រភេទ Delta ចាប់ពី 5-11 ដង បើធៀបនឹងការចាក់ម្ជុលទីពីរ។

ទិន្នន័យដែលត្រូវក្រុមហ៊ុន Pfizer បង្ហោះនៅលើអ៊ីនធើណិត កាលពីថ្ងៃទី 28 កក្កដា បង្ហាញថា បរិមាណនៃអង្គបដិប្រាណប្រឆាំងនឹង វីរុស COVID-19 ប្រភេទ Delta នៅលើមនុស្សដែលមានវ័យចាប់ពី 18-55 ឆ្នាំ កើនឡើង 5 ដង ក្រោយពីបានចាក់ដូសទីបី។ ចំណែកនៅលើអ្នកដែលមានវ័យចាប់ពី 65-85 ឆ្នាំ កំណើននៃអង្គបដិប្រាណនេះ ស្មើនឹង 11 ដង។

ក្រុមអ្នកស្រាវជ្រាវរបស់ Pfizer/BioNTech អះអាងថា ការចាក់វ៉ាក់សាំង Pfizer ដូសទីបី ជួយបង្កើនភាពរឹងមាំនៃរបងការពារមនុស្សពី Delta ដែលជាវ៉ារ្យ៉ង់ (វីរូសបំប្លែងខ្លួនថ្មី) របស់ COVID-19 ដែលកំពុងរាតត្បាតតំបន់ជាច្រើនក្នុងពិភពលោក។ ក្រុមស្រាវជ្រាវបន្ថែមថា វ៉ាក់សាំង Pfizer ចំនួន 3 ដូស អាចជួយ «បង្កើនលទ្ធភាពនៃការបង្ក្រាបលើ វ៉ារ្យ៉ង់ Delta បានរហូតដល់ 100 ដង» ធៀបនឹងកាលមិនទាន់បានចាក់វ៉ាក់សាំង។

ក្រៅពីនេះ ទិន្នន័យនៃការពិសោធស្រាវជ្រាវខាងលើ ក៏បានបញ្ជាក់ថា អ្នកដែលបានចាក់វ៉ាក់សាំង Pfizer ចំនួន 3 ដូស មានប្រសិទ្ធភាពក្នុងការទប់ស្កាត់វីរុសប្រភេទដំបូងរបស់ COVID-19 និង វ៉ារ្យ៉ង់ Beta ដែលបង្ហាញខ្លួនដំបូងនៅប្រទេស អាហ្វ្រិកខាងត្បូង ខ្ពស់ជាងច្រើន បើធៀបនឹងអ្នកដែលបានចាក់ពីរដូស។ បច្ចុប្បន្ន ទិន្នន័យនៃការពិសោធនេះ មិនទាន់ត្រូវបានផ្ទៀងផ្ទាត់ជាផ្លូវការនៅឡើយ។

នៅក្នុងបញ្ជីស្ដីពីវ៉ាក់សាំងប្រឆាំង COVID-19 ដែលត្រូវបាន WHO អនុម័ត គេឃើញថា វ៉ាក់សាំងដែលប្រើប្រាស់បច្ចេកវិទ្យា mRNA មានប្រសិទ្ធភាពខ្ពស់ជាងគេ នៅក្នុងការពិសោធលើមនុស្ស ក្នុងនោះ វ៉ាក់សាំង Moderna មានប្រសិទ្ធភាព 94% និង Pfizer 95%។ បើទោះជាមានការលំបាកក្នុងការរក្សាទុក និងការដឹកជញ្ជូន ប៉ុន្តែ វ៉ាក់សាំងទាំង 2 ប្រភេទនេះ ហាក់មានប្រសិទ្ធភាពក្នុងការប្រើប្រាស់ជាក់ស្ដែង ប្រហាក់ប្រហែលនឹងលទ្ធផលនៃការពិសោធ។ ការស្រាវជ្រាវមួយរបស់រដ្ឋាភិបាលអង់គ្លេស កាលពីខែមុន បានបង្ហាញដែរថា វ៉ាក់សាំង Pfizer ចំនួន 2 ដូស អាចកាត់បន្ថយហានិភ័យនៃការចូលពេទ្យរបស់អ្នកវិជ្ជមាននឹង វ៉ារ្យ៉ង់ Delta បានរហូតដល់ 96% ឯណោះ៕

ប្រភព៖ CNN
ប្រែសម្រួល៖ បុត្រា

July 29, 2021

ក្រោយចាក់វ៉ាក់សាំង AstraZeneca ម្ជុលទីពីរ ហានិភ័យកកឈាម បានថយចុះទាបបំផុត

ហានិភ័យនៃបញ្ហាកកឈាមបន្ទាប់ពីត្រូវបានចាក់វ៉ាក់សាំង AstraZeneca ដូសទីពីរ មានការថយចុះច្រើន បើធៀបនឹងក្រោយការចាក់ដូសទីមួយ។

លទ្ធផលនៃការសិក្សាស្រាវជ្រាវ ដែលត្រូវបានចុះផ្សាយនៅលើទស្សនាវដ្ដីវេជ្ជសាស្ត្រ Lancet កាលពីថ្ងៃទី 28 កក្កដា ក្រោមការដឹកនាំ និងឧបត្ថម្ភដោយ AstraZeneca បានបង្ហាញថា អត្រានៃការកកើតដុំឈាមកក ដោយបរិមាណប្លាកែតថយចុះ (TTS/ Thrombosis with Thrombocytopenia Syndrome) ក្រោយពីបានចាក់ម្ជុលទីមួយ ស្មើនឹង 8.1 នាក់/1 លាននាក់។

ការស្រាវជ្រាវ ផ្អែកទៅលើទិន្នន័យសុវត្ថិភាពសកលរបស់ AstraZeneca ដែលបានវាយតម្លៃលើករណីត្រូវបានរាយការណ៍គិតត្រឹមថ្ងៃទី 30 មេសា ក៏បង្ហាញថា បញ្ហាកកឈាម កើតឡើងក្នុងរង្វង់ 14 ថ្ងៃ បន្ទាប់ពីបានចាក់ម្ជូលទីមួយ ឬម្ជុលទីពីរ។

ជាក់ស្ដែង មានបញ្ហា TTS ចំនួន 13 ករណីត្រូវបានរាយការណ៍នៅទូទាំងពិភពលោក បន្ទាប់ពីបានចាក់ដូសទីពីរ នៅលើមនុស្សចាប់ពីវ័យ 45-85 ឆ្នាំ ខណៈ 399 ករណី ត្រូវបានរកឃើញ ក្រោយពីបានចាក់ម្ជុលដំបូង។

ស្ថាប័នគ្រប់គ្រងឱសថរបស់សហភាពអឺរ៉ុប (EU) បានពិនិត្យទៅលើករណី TTS ចាប់តាំងពីខែមីនា និងបានរកឃើញទំនាក់ទំនងរវាងបញ្ហាកកឈាមនេះ ជាមួយនឹងវ៉ាក់សាំង AstraZeneca និង Johnson & Johnson។ ក៏ប៉ុន្តែ ពួកគេសង្កត់ធ្ងន់ថា ផលប្រយោជន៍ជារួមរបស់វ៉ាក់សាំងទាំង 2 ប្រភេទនេះ នៅតែធំធេងជាងហានិភ័យណាៗទាំងអស់៕

ប្រភព៖ Reuters
ប្រែសម្រួល៖ បុត្រា

July 29, 2021

Jennie (Blackpink) ធ្វើឱ្យខ្ញុំក្ដៅភ្នែក ពេលបង្អួតចង្កេះ «អង្ក្រង» អមនឹងខ្សែ belly chain

ដើម្បីបានខ្សែចង្កេះតូចស្ដើងនេះមកពាក់បង្អួតសម្រស់ក្បាលពោះ Jennie Kim ត្រូវចំណាយប្រាក់អស់រាប់ពាន់ដុល្លារឯណោះ។

ចាប់តាំងពីបានទៅបំពេញការងារនៅ សហរដ្ឋអាមេរិក ការលេងស្ទីលរបស់ Jennie បានប្រែប្រួលគួរឱ្យចាប់អារម្មណ៍។ ដោយចេះប្រើស្ទីលប្លែកភ្នែក និងទាក់ទាញស្រាប់ ថ្មីៗនេះ ស្រីស្អាតរបស់ក្រុម Blackpink ក៏បានបង្ហាញគ្រឿងអលង្ការកាន់តែដូចទៅនឹងពួកលោកខាងលិច។

ខ្សែចង្កេះរបស់ម្ចាស់បទ How You Like That ដែលជាផលិតផលរបស់យីហោ Jacquie Aiche នេះ មានដាំផ្កាជាត្បូងពេជ្រចំនួន 5 គ្រាប់។ ម៉ូដែលរបស់ belly chain ថ្វីបើមានរូបរាងសាមញ្ញ ប៉ុន្តែ វាជួយឱ្យស្រីស្អាតវ័យ 25 ឆ្នាំរូបនេះ អាចបង្អួតចង្កេះទាំងមូលរបស់នាងបាន។ ដើម្បីបានពាក់ខ្សែចង្កេះនេះ Jennie ត្រូវចំណាយប្រាក់អស់ជាង 13,000,000 រៀល (3,375 ដុល្លារអាមេរិក)។

Jennie បង្ហោះរូបថតជាបន្តបន្ទាប់នៅលើបណ្ដាញសង្គម Instagram ជាមួយនឹងស្ទីលពាក់គ្រឿងអលង្ការប្លែកភ្នែក ដើម្បីបង្អួតរាងរៅនៃចង្កេះរបស់ខ្លួន។ ចង្កេះ «អង្ក្រង» របស់ Jennie មានភាពទាក់ទាញ ដោយសារខ្សែចង្កេះ belly chain ដ៏ឆ្មារមួយខ្សែ។

ដោយការស្លៀកពាក់ស៊ិចស៊ី តារាចម្រៀង កូរ៉េខាងត្បូង ម្នាក់នេះ ត្រូវបានគេមើលឃើញថា មានរូបរាងមាំមួន ទាក់ទាញចំណាប់អារម្មណ៍ មិនចាញ់តារា អាមេរិកាំង ប៉ុន្មានឡើយ។

ជាក់ស្ដែង ខ្សែចង្កេះ ត្រូវបាននារីៗនៅ កម្ពុជា នាំគ្នាពាក់តាំងពីយូរយារមកហើយ ពិសេសគឺខ្សែចង្កេះប្រភេទកថា (គាថា) ដែលបញ្ចុះយ័ន្តអាគម។ ខ្សែចង្កេះ មានការពេញនិយមនៅ អឺរ៉ុប ក្នុងអំឡុងទសវត្សរ៍ឆ្នាំ 2000 ហើយថ្មីៗនេះ ត្រូវបានតារាអន្តរជាតិល្បីៗ យកមកឡង់សេ ក្នុងនោះមាន Jennie Kim ផងដែរ៕

ដោយ ៖ បុត្រា

July 28, 2021

Apple ឈរស្ងៀម នៅតែត្រូវ Elon Musk ដៀមដាមរហូតដល់ពីរលើក នៅក្នុងថ្ងៃប្រកាសលទ្ធផលអាជីវកម្មរបស់ Tesla

មហាសេដ្ឋីដើមកំណើតអាហ្វ្រិកខាងត្បូង លោក Elon Musk ទើបតែបានឌឺដង ដៀមដាមជាសាធារណៈ ឱ្យ Apple នៅក្នុងថ្ងៃប្រកាសលទ្ធផលអាជីវកម្មរបស់ Tesla។

សារព័ត៌មាន CNBC បានរាយការណ៍ថា CEO របស់ក្រុមហ៊ុន Tesla គឺលោក Elon Musk បាននិយាយចំអកឱ្យ «អ្នកជិតខាង» នៅក្នុងជ្រលង Silicon (Apple) រហូតដល់ 2 លើក នៅក្នុងកិច្ចប្រជុំប្រកាសលទ្ធផលអាជីវកម្មរបស់ក្រុមហ៊ុនផលិតរថយន្តអគ្គិសនី Tesla កាលពីម្សិលមិញ។

ក្រុមហ៊ុន Tesla និង Apple មិនទាន់មានការប្រកួតប្រជែងផ្ទាល់ជាមួយគ្នានៅឡើយ។ ប៉ុន្តែ ថ្មីៗនេះ Apple បានបង្ហើបឱ្យដឹងថា ខ្លួនកំពុងអភិវឌ្ឍរថយន្តអគ្គិសនីបើកបរស្វ័យប្រវត្ត។ Apple ក៏បានទាក់ទាញវិស្វករ និងមេដឹកនាំជាន់ខ្ពស់ជាច្រើននាក់ ពី Tesla ធ្វើឱ្យទំនាក់ទំនងរបស់ក្រុមហ៊ុនទាំងពីរ មានភាពតានតឹង។ គម្រោងផលិតរថយន្តអគ្គិសនី បើកបរស្វ័យប្រវត្តដែលមានឈ្មោះថា Titan របស់ Apple ក៏កំពុងត្រូវបានដឹកនាំដោយ Doug Field ដែលបានមកធ្វើការឱ្យ Apple តាំងពីឆ្នាំ 2018 បន្ទាប់ពីនៅជាមួយ Tesla បាន 5 ឆ្នាំ។

«ខ្ញុំគិតថា Apple ប្រើប្រាស់ធាតុគីមី cobalt 100% សម្រាប់ថ្មទូរស័ព្ទ និងកុំព្យូទ័រយួរដៃរបស់ពួកគេ ប៉ុន្តែ Tesla វិញ មិនដូច្នោះទេ។ តាមគណនា យើងប្រើប្រាស់តែ 2% ប៉ុណ្ណោះ ធៀបនឹង Apple។ ដូច្នេះ យើងមិនរងផលប៉ះពាល់ច្រើនឡើយ នៅពេលបណ្ដាញផ្គត់ផ្គង់ (cobalt) ត្រូវច្របូកច្របល់» នៅក្នុងកិច្ចប្រជុំ ប្រកាសលទ្ធផលអាជីវកម្ម មហាសេដ្ឋី Elon Musk បានឆ្លើយតបនឹងសំណួរ ស្ដីពីបណ្ដាញផ្គត់ផ្គង់របស់ Tesla។

មួយភាគនៃបរិមាណ cobalt ត្រូវបានជីករុករកនៅក្នុងប្រទេសជាច្រើន មានដូចជា កុងហ្គោ ជាដើម ទទួលរងការរិះគន់ច្រើន ទាក់ទិននឹងបញ្ហាបំពានកម្លាំងពលកម្មកុមារ និងរំលោភសិទ្ធិមនុស្ស។ ឆ្នាំ 2019 Apple និង Tesla រួមនឹងក្រុមហ៊ុនបច្ចេកវិទ្យាធំៗជាច្រើនផ្សេងទៀត ត្រូវបានគេហៅថា ជនជាប់ចោទ នៅក្នុងបណ្ដឹងមួយ ទាក់ទងនឹងសិទ្ធិមនុស្ស។

ចំពោះខ្លួនឯងវិញ នៅក្នុងរបាយការណ៍មួយដែលត្រូវបានប្រកាសកាលពីដើមឆ្នាំនេះ Apple បានឱ្យដឹងថា ខ្លួនបានប្រកាសបញ្ជីឈ្មោះប្រភេទរ៉ែ និងរោងចក្ររំលាយ ចម្រាញ់ cobalt ទាំងអស់ដែលខ្លួនបានសហការ។ ជាងនេះ គ្រប់រោងចក្រផ្គត់ផ្គង់ cobalt របស់ Apple សុទ្ធតែបានចូលរួមការធ្វើសវនកម្មកាលពីឆ្នាំ 2020 ។ តំណាងរបស់ Apple មិនបានបញ្ចេញយោបល់ ទាក់ទងនឹងការឡកឡាយរបស់ Elon Musk នោះទេ។

Elon Musk បន្តវាយប្រហារ Apple ជាលើកទីពីរ នៅក្នុងពេលដំណាលគ្នានោះ។ Musk និយាយអំពី «Walled Garden» (សួនដែលត្រូវបានការពារដោយជញ្ជាំង ឬ ជញ្ជាំងសុវត្ថិភាព) របស់ Apple។ (Apple ប្រើប្រាស់បច្ចេកវិទ្យាផ្ទាល់ខ្លួន ជំនួសឱ្យបច្ចេកវិទ្យាយកមកពីខាងក្រៅ)។

លោក Musk យល់ថា «walled garden» ដែលត្រូវបានដាក់ឈ្មោះដូច្នេះ ក៏ព្រោះតែ Apple គ្រប់គ្រងយ៉ាងម៉ត់ចត់ ចំពោះផ្នែកទន់ទាំងឡាយណាដែលត្រូវដំឡើងនៅលើ iPhone តាមរយៈ App Store របស់ពួកគេ។ បច្ចុប្បន្ន Walled Garden របស់ Apple កំពុងប្រឈមនឹងការត្រួតពិនិត្យ តាមដាន ពីសំណាក់ក្រុមអ្នកតាក់តែងច្បាប់ និងក្រុមហ៊ុនផ្សេងៗ រួមទាំងសវនាការប្រឆាំងនឹងសិទ្ធិផ្ដាច់មុខមួយផងដែរ បន្ទាប់ពី Epic Games បានប្ដឹងជំទាស់នឹងគោលការណ៍ និងការយកថ្លៃរបស់ App Store។

ពេលត្រូវបានសួរអំពីការដែល Tesla អនុញ្ញាតឱ្យគូប្រជែងនានា ប្រើប្រាស់ប្រព័ន្ធបញ្ចូលថាមពលរបស់ពួកគេ លោក Musk និយាយថា៖ «យើងចង់សង្កត់ធ្ងន់ថា គោលដៅរបស់ក្រុមហ៊ុនគឺ គាំទ្រដល់វត្តមានរបស់ថាមពលឋិតថេរ (ថាមពលស្អាត) ពោលគឺមិនបង្កើត Walled Garden និងប្រើប្រាស់វាដើម្បីផាត់ចោលគូប្រជែង ដូចក្រុមហ៊ុនមួយចំនួនកំពុងធ្វើនោះឡើយ»។

ឆ្លើយរួច លោក Elon Musk ក៏គ្រហែម និងបន្តនិយាយថា៖ «Apple»៕

ប្រភព៖ CNBC
ប្រែសម្រួល៖ បុត្រា

July 28, 2021

ក្រុមហ៊ុនបច្ចេកវិទ្យាហិរញ្ញវត្ថុមួយ នៅ អាស៊ីអាគ្នេយ៍ ទើបតែបានក្លាយជា Startup ថ្មី តម្លៃពាន់លានដុល្លារ

ក្រុមហ៊ុន Fintech Nium របស់ប្រទេស សិង្ហបុរី ទើបតែត្រូវបានកំណត់តម្លៃឡើងដល់ ខ្ទង់ពាន់លានដុល្លារអាមេរិក នៅក្នុងការប្រមូលទុនលើកចុងក្រោយបំផុត។

ក្រុមហ៊ុនថ្មី Nium ដែលឯកទេសផ្នែកទូទាត់ប្រាក់ បម្រើសេវាកម្មសម្រាប់បណ្ដាក្រុមហ៊ុននៅ សិង្ហបុរី ទើបតែបានក្លាយជាក្រុមហ៊ុន startup តម្លៃខ្ទង់ពាន់លានដុល្លារ បន្ទាប់ពីប្រមូលទុនបានជាង 200 លានដុល្លារអាមេរិក។

ក្រុមហ៊ុនឱ្យដឹងថា តម្លៃមូលធនរបស់ Nium បានកើនដល់ 1 ពាន់លានដុល្លារ ក្រោយការប្រមូលទុន Series D ដែលនាំមុខគេដោយក្រុមហ៊ុន Riverwood Capital LLC មានមូលដ្ឋាននៅ Menlo Park ក្នុងរដ្ឋ California សហរដ្ឋអាមេរិក។ ក្រៅពី Riverwood Capital LLC ក៏នៅមានក្រុមហ៊ុន Temasek Holdings Pte, Visa Inc., Vertex Ventures, Beacon Venture Capital និង Rocket Capital ផងដែរ ដែលបានចូលរួមវិនិយោគទៅក្នុងក្រុមហ៊ុន Nium។ មូលនិធីទ្រព្យសម្បត្តិ GIC Pte របស់ សិង្ហបុរី ក៏បានចូលរួមក្នុងការប្រមូលទុនរបស់ Nium នេះដែរ។

CEO វ័យ 39 ឆ្នាំ លោក Prajit Nanu បានឱ្យដឹងថា Nium មានផែនការប្រើប្រាស់ប្រាក់វិនិយោគនេះដើម្បីពង្រីកសកម្មភាពជំនួញ នៅ សហរដ្ឋអាមេរិក និង អាមេរិកឡាទីន មុននឹងធ្វើ IPO (Initial Public Offering / បោះផ្សាយលក់មូលបត្រកម្មសិទ្ធិជាសាធារណៈលើកដំបូង) នៅ សហរដ្ឋអាមេរិក ក្នុងអំឡុង 1.5 ឆ្នាំ ទៅ 2 ឆ្នាំខាងមុខ។

សិង្ហបុរី កំពុងតែប្រែក្លាយខ្លួនឱ្យទៅជាមជ្ឈមណ្ឌុលហិរញ្ញវត្ថុឌីជីថល ដ៏មមាញឹក។ Nium ដែលជាក្រុមហ៊ុន startup មួយ ក្នុងចំណោមក្រុមហ៊ុន fintech ជាង 1,000 ក្នុងប្រទេសនេះ កំពុងផ្ដោតទៅលើផ្នែកទូទាត់ ឥណទាន វិនិយោគ និងហិរញ្ញវត្ថុផ្ទាល់ខ្លួន។ Pine Labs Pvt ដែលជាថ្នាលទូទាត់ប្រាក់សម្រាប់បណ្ដាក្រុមហ៊ុនដែលមានតម្រូវការ នៅ ឥណ្ឌា និង អាស៊ីអាគ្នេយ៍ គឺជាក្រុមហ៊ុនមួយក្នុងចំណោមក្រុមហ៊ុន startup វិស័យ fintech ដែលមានតម្លៃមូលធនខ្ពស់បំផុតនៅ សិង្ហបុរី ដោយត្រូវបានកំណត់តម្លៃឡើងដល់ 3 ពាន់លានដុល្លារអាមេរិក។

គំនិតចេញរកស៊ី របស់សហស្ថាបនិកនៃក្រុមហ៊ុន Nium កើតឡើងពី «បញ្ហា» ផ្ទាល់ខ្លួន

ក្រុមហ៊ុន Nium ត្រូវបានសហស្ថាបនិក Nanu បង្កើតឡើងក្នុងនាមជាសេវាកម្មផ្ទេរប្រាក់ឆ្លងប្រទេស នៅឆ្នាំ 2014។ Nanu ពុំមែនជាវិស្វករ ហើយក៏ពុំមែនជាអ្នកធ្វើការក្នុងវិស័យហិរញ្ញវត្ថុ។ ក្រោយពីបានធំឡើងនៅទីក្រុង ម៉ុមបៃ នៃប្រទេស ឥណ្ឌា Nanu ក៏បានយល់ច្បាស់អំពីវិធីដឹកនាំក្រុមហ៊ុនឱ្យបានរីកចម្រើនលឿន បន្ទាប់ពីបានធ្វើការរយៈពេល 12 ឆ្នាំ នៅក្នុងក្រុមហ៊ុនមួយចំនួន រួមទាំង Adventity Inc. និង WNS Global Services ផងដែរ។

Nanu មានគំនិតចេញរកស៊ី ក្រោយពីមានបញ្ហាផ្ទេរប្រាក់ពី ឥណ្ឌា ទៅប្រទេស ថៃ ដើម្បីធ្វើពិធីជប់លៀងភាពនៅលីវឱ្យមិត្តម្នាក់កាលពីឆ្នាំ 2013។ Nanu ជួបបញ្ហានៅពេលទីតាំងលំហែកាយមួយកន្លែងនៅប្រទេស ថៃ បដិសេធប័ណ្ណឥណទានរបស់លោក និងស្នើឱ្យផ្ទេរប្រាក់ពីធនាគារ ខណៈធនាគារដែល Nanu ប្រើប្រាស់នៅ ឥណ្ឌា ទាមទារលិខិតស្នាមជាច្រើន គ្រាន់តែដើម្បីអាចផ្ទេរប្រាក់ 640 ដុល្លារ។

បច្ចុប្បន្ន Kasikornbank របស់ ថៃ និងក្រុមហ៊ុនទូរគមនាគមន៍ សិង្ហបុរី គឺជាអតិថិជនសំខាន់ ក្នុងចំណោមអតិថិជនជាង 200 របស់ Nium។ ដូចទៅនឹង Stripe កម្មវិធីរបស់ Nium ក៏ជួយឱ្យក្រុមហ៊ុននានា ទទួលយកការទូទាត់ប្រាក់តាមអនឡាញ និងផ្ញើប្រាក់ ក៏ដូចជាចេញប័ណ្ណឥណទានធម្មតា និងប័ណ្ណនិម្មិត៕

ប្រភព៖ Bloomberg
ប្រែសម្រួល៖ បុត្រា

July 28, 2021

Author: សឿន សំណាង