សឿន សំណាង - La Reine Media

COVID-19 ប្រភេទ Delta កំពុងរាតត្បាត៖ WHO ចេញសេចក្តីអំពាវនាវឱ្យ កម្ពុជា បង្កើនការប្រយុទ្ធ

(ភ្នំពេញ)៖ អង្គការសុខភាពពិភពលោក (WHO) អំពាវនាវដល់រាជរដ្ឋបាភិបាល និងប្រជាជនកម្ពុជា ពង្រឹងស្មារតីចូលរួមធ្វើសកម្មភាពប្រយុទ្ធប្រឆាំងនឹងវីរុស COVID-19 ប្រភេទបំប្លែងខ្លួនថ្មី (វ៉ារ្យ៉ង់) Delta ឱ្យបានសកម្មខ្លាំងក្លាបំផុត។ នេះបើតាមសេចក្ដីប្រកាសព័ត៌មានបន្ទាន់មួយរបស់អង្គការនេះ ចុះថ្ងៃទី 30 ខែកក្កដា ឆ្នាំ 2021។

នៅក្នុងសេចក្ដីប្រកាសព័ត៌មាននេះ តំណាង WHO ប្រចាំ កម្ពុជា លោកស្រី Li Ailan បានបញ្ជាក់ថា «យើងកំពុងប្រណាំងប្រជែងជាមួយនឹងវីរុស COVID-19 បំប្លែងខ្លួនថ្មី (រួមមាន Delta, Alpha, Beta និង Gamma)៖ សូមធ្វើសកម្មភាពនៅថ្ងៃនេះ ដើម្បីកុំឱ្យមានការស្ដាយក្រោយនៅថ្ងៃស្អែក»។

អត្ថន័យលម្អិត សូមបន្តអានសេចក្ដីប្រកាសព័ត៌មានរបស់តំណាងអង្គការ WHO ប្រចាំ កម្ពុជា ដែលមានដូចខាងក្រោម៖
ដកស្រង់៖ បុត្រា

July 31, 2021

បញ្ជីនៃបណ្ដាប្រទេសដណ្ដើមបានមេដាយ នៅ Olympic Games Tokyo 2020 សម្រាប់ថ្ងៃទី 30 កក្កដា

នាំមុខគេក្នុងបញ្ជីនេះគឺ ប្រទេស ចិន ដោយដណ្ដើមបានមេដាយសរុបចំនួន 38 ក្នុងនោះមាន មេដាយមាសចំនួន 18, មេដាយប្រាក់ចំនួន 9 និងមេដាយសំរិទ្ធចំនួន 11។

ប្រទេសដែលដណ្ដើមបានមេដាយមាសចាប់ពី 3 ដល់ 18 រួមមានចំនួន 12 ប្រទេស គិតត្រឹមថ្ងៃទី 30 ខែកក្កដា ឆ្នាំ 2021។

ប្រភព៖ AS.COM
ដកស្រង់៖ បុត្រា

July 30, 2021

អគ្គិភ័យកំពុងឆាបឆេះចំណតរថយន្តក្រុង វិរៈ ប៊ុនថាំ

ចំណតរថយន្តក្រុងរបស់ក្រុមហ៊ុន វិរៈ ប៊ុនថាំ ដែលមានទីតាំងនៅគល់ស្ពានជ្រោយចង្វា ត្រូវអគ្គិភ័យឆាបឆេះយ៉ាងសន្ធោសន្ធៅ នៅម៉ោងប្រមាណជិត 16 រសៀល ថ្ងៃទី 30 កក្កដានេះ។

ទំហំខូចខាតសរុប មិនទាន់ត្រូវបានគេដឹងនៅឡើយ ប៉ុន្តែ រថយន្តក្រុងចំនួនជាង 20 គ្រឿងបានស្ថិតក្នុងអណ្ដាតភ្លើង ខណៈដែលអង្គភាពពន្លត់អគ្គិភ័យ កំពុងធ្វើអន្តរាគមន៍បាញ់ទឹកពន្លត់។

ចំពោះមូលហេតុដែលនាំឱ្យកើតមានគ្រោះអគ្គិភ័យនេះ មិនទាន់ត្រូវបានគេដឹងច្បាស់នៅឡើយ។

July 30, 2021

(វីដេអូ)-តាក់ស៊ីហោះ ប្រើស្លាបកង្ហារចំនួន 18 ហោះហើរដឹកមនុស្សដោយជោគជ័យ នៅ អាមេរិក

តាក់ស៊ីហោះរបស់ startup អាល្លឺម៉ង់ ឈ្មោះ Volocopter អាចហោះហើរឡើងដល់កម្ពស់ 50 ម៉ែត្រ និងហោះបានរយៈពេល 4 នាទី ក្នុងល្បឿន 29 គីឡូម៉ែត្រ ក្នុង 1 ម៉ោង។

Volocopter 2X ដែលជាតាក់ស៊ីហោះ ដំណើរការទាំងស្រុងដោយអគ្គិសនី របស់ក្រុមហ៊ុន អាល្លឺម៉ង់ Volocopter បានឈានដល់របត់ថ្មី នៅក្នុងព្រឹត្តិការណ៍តាំងពិព័រណ៍អាកាសចរណ៍ Oshkosh ដែលត្រូវបានធ្វើឡើងនៅក្នុងរដ្ឋ Wisconsin សហរដ្ឋអាមេរិក កាលពីថ្ងៃទី 27 កក្កដា។ នេះគឺជាយានជំនិះហោះឡើង និងចុះចតដោយត្រង់ និងដំណើរការដោយអគ្គិសនីដំបូងគេ ដែលទទួលបានជោគជ័យក្នុងការសាកល្បងហោះហើរដឹកមនុស្សនៅទីសាធារណៈ នៅ សហរដ្ឋអាមេរិក។

តាក់ស៊ីហោះរបស់ក្រុមហ៊ុន Volocopter បានហោះហើរសាកល្បងដោយមិនមានដឹកមនុស្ស ជាង 100 លើកមកហើយ ក្នុងអំឡុងច្រើនឆ្នាំកន្លង។ ការហោះហើរដែលមានដឹកមនុស្សដំបូង ត្រូវបានធ្វើឡើងនៅប្រទេស អាល្លឺម៉ង់ កាលពីឆ្នាំ 2016។ តាំងពីនោះមក Volocopter បានហោះហើរដឹកមនុស្ស និងមិនដឹកមនុស្សជាបន្តបន្ទាប់ នៅ សិង្ហបុរី អារ៉ាប់រួម ព្រមទាំងធ្លាប់បានហោះសំដែងនៅលើឆាកនៃពិធីតាំងពិព័រណ៍អេឡិចត្រូនិក CES នៅ Las Vegas កាលពីឆ្នាំ 2018 ផងដែរ។

Volocopter 2X បំពាក់ប្រព័ន្ធស្លាប ដែលមានកង្ហារចំនួន 18 គ្រឿង។ កាលពីថ្ងៃទី 27 កក្កដា តាក់ស៊ីនេះ បានហោះហើរនៅឯព្រលានយន្តហោះតំបន់ Wittman (Wittman Regional Airport)។

តាក់ស៊ីហោះរបស់ startup អាល្លឺម៉ង់ Volocopter អាចហោះហើរឡើងដល់កម្ពស់ 50 ម៉ែត្រ និងហោះបានរយៈពេល 4 នាទី ក្នុងល្បឿន 29 គីឡូម៉ែត្រ/ម៉ោង។ កំណែមួយផ្សេងទៀតរបស់ Volocopter 2X ត្រូវបានដាក់តាំងនៅលើដី ដើម្បីឱ្យអ្នកចូលរួម អាចពិនិត្យមើលបានដោយគ្រប់ជ្រុងជ្រោយ។

«តាក់ស៊ីហោះ ជិតត្រូវបានបង្ហាញខ្លួន ហើយយើងកំពុងប្រឹងប្រែងដើម្បីធ្វើការហោះហើរដោយប្រើថាមពលអគ្គិសនី នៅឯទីក្រុងនានាក្នុងពិភពលោក ក្នុងរយៈពេល ពី 2 ទៅ 3 ឆ្នាំ» CEO របស់ Volocopter លោក Florian Reuter បានប្រាប់ដូច្នេះ៕

ប្រភព៖ New Atlas
ប្រែសម្រួល៖ បុត្រា

July 30, 2021

SpaceX ទទួលបានប្រាក់ 178 លានដុល្លារ ដើម្បីនាំយានរបស់ NASA ទៅរកជីវិតលើព្រះចន្ទនៃភពព្រហស្បតិ៍

ក្រុមហ៊ុន SpaceX របស់មហាសេដ្ឋី Elon Musk បានចុះកិច្ចព្រមព្រៀងដែលមានតម្លៃ 178 លានដុល្លារជាមួយទីភ្នាក់ងារអវកាស អាមេរិក NASA ដើម្បីបាញ់បង្ហោះយានស្រាវជ្រាវមួយគ្រឿង ទៅស្វែងរកជីវិតនៅលើឋានព្រះចន្ទរបស់ភពព្រហស្បតិ៍ នៅឆ្នាំ 2024។

រ៉ុក្កែត Falcon Heavy របស់ SpaceX ត្រូវបានជ្រើសរើស ដើម្បីនាំយកយានអវកាស Europa Clipper របស់ NASA ឡើងទៅកាន់ឋានព្រះចន្ទ Europa ដែលនឹងត្រូវធ្វើឡើងនៅក្នុងខែតុលា ឆ្នាំ 2024 ដោយបាញ់បង្ហោះចេញពីមជ្ឈមណ្ឌលអវកាស Kennedy នៅក្នុងរដ្ឋ Florida សហរដ្ឋអាមេរិក។ កិច្ចព្រមព្រៀងសម្រាប់ការផ្ដល់ និងទទួលសេវាកម្មខាងលើ មានតម្លៃប្រហែល 178 លានដុល្លារអាមេរិក។

កាលពីដំបូងឡើយ NASA មានបំណងប្រើប្រាស់ប្រព័ន្ធបាញ់បង្ហោះផ្ទាល់ខ្លួន ដើម្បីបំពេញបេសកកម្មនេះ ប៉ុន្តែ ការអភិវឌ្ឍមានការយឺតយ៉ាវ។

យានអវកាស Europa Clipper ត្រូវបានរចនាឡើងដើម្បីធ្វើការសិក្សាស្រាវជ្រាវលម្អិតអំពីព្រះចន្ទ Europa របស់ភពព្រហស្បតិ៍ ក្នុងបំណងឱ្យដឹងច្បាស់ថា ឋានដែលមហាសែនត្រជាក់នេះ អាចទ្រទ្រង់ភាវរស់បានដែរ ឬអត់។

ភារកិច្ចរបស់យានអវកាសនេះគឺ ថតរូបភាពរបស់ព្រះចន្ទ Europa ឱ្យបានច្បាស់បំផុត និងស្វែងយល់អំពីសមាធាតុរបស់វា និងស្វែងរកសញ្ញានៃបាតុភូតរញ្ជួយដីកំពុងកើតឡើង ឬបានកើតឡើងកាលពីអតីតកាលថ្មីៗនេះ។

យានអវកាសរបស់ NASA នេះ ក៏នឹងត្រូវបានបំពាក់ឧបករណ៍វាស់កម្រាស់នៃស្រទាប់ទឹកកកខាងលើរបស់ Europa ស្វែងរកបឹងក្រោមដី និងវាស់ជម្រៅ រួមទាំងកម្រិតនៃជាតិប្រៃរបស់មហាសមុទ្រក្រោមផ្ទាំងទឹកកកផងដែរ។

ជាព្រះចន្ទមួយ ក្នុងចំណោមព្រះចន្ទធំជាងគេទាំង 4 របស់ភពព្រហស្បតិ៍ Europa បានក្លាយជាប្រធានបទសំខាន់នៃការសិក្សាស្រាវជ្រាវជាច្រើនកាលពីពេលកន្លង។ កាលពីឆ្នាំ 2020 ក្រុមអ្នកវិទ្យាសាស្ត្របានបញ្ជាក់ឱ្យឃើញថា វិទ្យុសកម្មមានជាប្រចាំ ដែល Europa ទទួលបានពីភពព្រហស្បតិ៍ បណ្ដាលឱ្យព្រះចន្ទមួយនេះ បញ្ចេញពន្លឺនៅក្នុងទីងងឹត៕

ប្រភព៖ Reuters

July 30, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 30 ខែកក្កដា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 668 នាក់, អ្នកជាចំនួន 812 នាក់ និងអ្នកស្លាប់ចំនួន 25 នាក់បន្ថែមទៀត នៅក្នុងថ្ងៃទី 29 ខែកក្កដា ឆ្នាំ 2021។

គិតត្រឹមព្រឹកថ្ងៃទី 30 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 76,585 នាក់ ក្នុងនោះមានអ្នកជាសះស្បើយជាង 69,198 នាក់ និង អ្នកស្លាប់ 1,375 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 197,381,920 នាក់ ត្រូវបានរកឃើញ ក្នុងនោះមានជាង 178,533,740 នាក់បានជា, 4,214,877 នាក់បានស្លាប់ និងជាង 14,633,300 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 30, 2021

កម្ពុជា អនុញ្ញាតឱ្យខេត្តចំនួន 22 ទៀត អនុវត្តការព្យាបាលអ្នកជំងឺ COVID-19 កម្រិតស្រាល នៅតាមផ្ទះ

នាព្រឹកថ្ងៃទី 30 ខែកក្កដា ឆ្នាំ 2021 នេះ ក្រសួងសុខាភិបាល កម្ពុជា បានសម្រេចអនុញ្ញាតឱ្យខេត្តចំនួន 22 ទៀត រៀបចំការអនុវត្តការព្យាបាលអ្នកជំងឺ COVID-19 កម្រិតស្រាល នៅតាមផ្ទះ។

ខេត្តទាំង 22 នេះ រួមមាន បាត់ដំបង ប៉ៃលិន ពោធិសាត់ កំពង់ឆ្នាំង កោះកុង ព្រះស៊ីហនុ កំពត កែប តាកែវ កំពង់ស្ពឺ សៀមរាប ឧត្តរមានជ័យ ព្រះវិហារ កំពង់ធំ កំពង់ចាម ត្បូងឃ្មុំ ក្រចេះ ស្ទឹងត្រែង រតនគីរី មណ្ឌលគីរី ព្រៃវែង និងខេត្តស្វាយរៀង។

អ្នកជំងឺ COVID-19 ដែលនឹងត្រូវបានដាក់ឱ្យព្យាបាលនៅតាមផ្ទះ គឺជា អ្នកជំងឺកម្រិតស្រាល និងគ្មានរោគសញ្ញា។ ព័ត៌មានលម្អិត សូមអានសេចក្ដីសម្រេចខាងក្រោម៖

ប្រភព៖ ក្រសួងសុខាភិបាល
ដកស្រង់៖ បុត្រា

July 30, 2021

ក្រុមហ៊ុនរបស់មហាសេដ្ឋីទីមួយនៅ វៀតណាម កំពុងសាងសង់រោងចក្រផលិតវ៉ាក់សាំង COVID-19

គម្រោងសាងសង់រោងចក្រផលិតវ៉ាក់សាំង របស់ក្រុមហ៊ុន Vingroup នៅតំបន់បច្ចេកវិទ្យាជាន់ខ្ពស់ Hoa Lac (Hoa Lac Hi-Tech Park) នេះ ត្រូវបានវិនិយោគដោយក្រុមហ៊ុនបុត្រសម្ព័ន្ធ VinSmart។

Vingroup ត្រូវបានគេដឹងថា បានចរចាជាមួយនឹងក្រុមហ៊ុន Acturus របស់ សហរដ្ឋអាមេរិក ទាក់ទងនឹងការផ្ទេរបច្ចេកវិទ្យាផលិតវ៉ាក់សាំងប្រឆាំង COVID-19 រួចហើយ។ ក្រសួងសុខាភិបាល វៀតណាម ឱ្យដឹងថា តាមផែនការ នៅខែសីហា ឆ្នាំ 2021 វ៉ាក់សាំងរបស់ក្រុមហ៊ុន អាមេរិក នេះ អាចចាប់ផ្ដើមសាកល្បងនៅលើមនុស្ស នៅប្រទេស វៀតណាម។ រោងចក្រនេះនឹងអាចផលិតវ៉ាក់សាំងបានចាប់ពី 100 លាន ទៅ 200 លានដូស/ឆ្នាំ។

កាលពីខែមិថុនា ឆ្នាំ 2021 ក្រុមហ៊ុន Vingroup បានសហការជាមួយ Viet A Corp បង្កើតក្រុមហ៊ុនបច្ចេកវិទ្យាជីវសាស្ត្រ Vinbiocare ដោយមានទុន ប្រមាណ 8,700,000 ដុល្លារអាមេរិក ក្នុងនោះ Vingroup កាន់កាប់ 69% នៃដើមទុនសរុប។

Vinbiocare រកស៊ីក្នុងវិស័យផលិតឱសថ គីមីសម្រាប់ផលិតឱសថ និងវត្ថុធាតុដើមសម្រាប់ផលិតថ្នាំពេទ្យ ក្នុងនោះមានដូចជា ការផលិតវ៉ាក់សាំង ការស្រាវជ្រាវផ្នែកវិទ្យាសាស្ត្រ និងការអភិវឌ្ឍបច្ចេកវិទ្យាក្នុងវិស័យឱសថជាដើម។

ប្រធានក្រុមហ៊ុន Vingroup មហាសេដ្ឋី Pham Nhat Vuong ដែលមានទ្រព្យ 8 ពាន់លានដុល្លារអាមេរិក បានឱ្យដឹងថា Vinbiocare គឺជាក្រុមហ៊ុនដែលធ្វើសកម្មភាពដោយមិនស្វែងរកកម្រៃ ហើយអាចបរិច្ចាគទាំងថ្លៃដើម បើសិនជាចាំបាច់។

Vingroup បាន និងកំពុងផលិតម៉ាស៊ីនជំនួយដង្ហើមច្រើនប្រភេទ និងម៉ាស៊ីនវាស់កំដៅ ដើម្បីផ្គត់ផ្គង់ទីផ្សារក្នុងស្រុក។ ក្នុងឆ្នាំ 2020 ក្រុមហ៊ុននេះ បានផ្ដល់ជំនួយជាម៉ាស៊ីនជំនួយដង្ហើមរាប់ពាន់គ្រឿង ដល់ក្រសួងសុខាភិបាល វៀតណាម ផងដែរ។

សាងសង់រោងចក្រផលិតវ៉ាក់សាំង របស់ក្រុមហ៊ុន Vingroup នៅតំបន់បច្ចេកវិទ្យាជាន់ខ្ពស់ Hoa Lac (Hoa Lac Hi-Tech Park) ក្នុងរដ្ឋធានី ហាណូយ៕

ប្រភព៖ Forbes, Viettimes
ប្រែសម្រួល៖ បុត្រា

July 30, 2021

AstraZeneca រកបាន 1.2 ពាន់លានដុល្លារ ពីវ៉ាក់សាំងបង្ការ COVID-19 ក្នុងឆមាសដំបូង

ក្រុមហ៊ុនផលិតឱសថ AstraZeneca របស់ អង់គ្លេស បានឱ្យដឹងថា វ៉ាក់សាំង COVID-19 របស់ពួកគេ រកចំណូលបាន 1.2 ពាន់លានដុល្លារអាមេរិក នៅក្នុងឆមាសដំបូងនៃឆ្នាំ 2021។

ក្រុមហ៊ុនបានចែកចាយវ៉ាក់សាំង AstraZeneca ប្រមាណ 319 លានដូស នៅជុំវិញពិភពលោក ក្នុងពាក់កណ្ដាលដើមឆ្នាំនេះ ក្នុងនោះ ចំណូលចំនួន 572 លានដុល្លារបានមកពីអឺរ៉ុប និង 455 លានដុល្លារ បានមកពីទីផ្សារទើបលេចធ្លោ។

«យើងសម្រេចបានជោគជ័យគួរសម ជាមួយនឹងវ៉ាក់សាំង COVID-19 Vaxzevria (ឈ្មោះថ្មីរបស់វ៉ាក់សាំងបង្ការ COVID-19 ដែលផលិតដោយ AstraZeneca)។ គិតមកដល់ថ្ងៃនេះ AstraZeneca និងដៃគូសហការរបស់យើង បានលក់វ៉ាក់សាំងចំនួន 1 ពាន់លានដូសទៅឱ្យប្រទេសជាង 170» នាយកប្រតិបត្តិរបស់ AstraZeneca លោក Pascal ថ្លែងដូច្នេះ កាលពីថ្ងៃទី 29 កក្កដា។

ស្ថាប័នផលិតឱសថនេះ ក៏បានឱ្យដឹងថា នៅក្នុងឆមាសដំបូងនៃឆ្នាំ 2021 នេះ ក្រុមហ៊ុន AstraZeneca រកបានប្រាក់ចំណេញចំនួន 2.1 ពាន់លានដុល្លារ ស្មើនឹង 40% ធៀបនឹងឆ្នាំមុន។ ប្រាក់ចំណូលសរុបនៅក្នុងអំឡុងជិត 1 ត្រីមាសកន្លងទៅ ស្មើនឹង 15.5 ពាន់លានដុល្លារ។ ដោយមិនរាប់បញ្ចូលទាំងវ៉ាក់សាំង COVID-19 ប្រាក់ចំណូលសរុបរបស់ក្រុមហ៊ុន បានកើន 14% ស្មើនឹង 14.4 ពាន់លានដុល្លារ។

វ៉ាក់សាំង COVID-19 របស់ AstraZeneca គឺជាវ៉ាក់សាំងលំដាប់ពិភពលោក និងមានតួនាទីសំខាន់នៅក្នុងយុទ្ធនាការចាក់វ៉ាក់សាំងនៅ អង់គ្លេស ជួយឱ្យ អង់គ្លេស អាចបើកទ្វារសេដ្ឋកិច្ចទាំងស្រុកក្នុងខែនេះ៕

ប្រភព៖ AFP
ប្រែសម្រួល៖ បុត្រា

July 30, 2021

វ៉ាក់សាំង COVID-19 ចំនួនជិត 500,000 ដូស ដែលជាជំនួយរបស់ សហរដ្ឋអាមេរិក បានមកដល់ កម្ពុជា ហើយ

(ភ្នំពេញ)៖ Johnson & Johnson ដែលជាវ៉ាក់សាំងបង្ការវីរុស COVID-19 ជាជំនួយរបស់ សហរដ្ឋអាមេរិក តាមរយៈយន្តការ COVAX បានដឹកមកដល់ កម្ពុជា ហើយ នៅព្រឹកថ្ងៃទី 30 កក្កដា ឆ្នាំ 2021។

វ៉ាក់សាំង Johnson & Johnson ចំនួនជិត 500,000 ដូស ដែលបានដឹកជញ្ជូនមកដល់ កម្ពុជា ព្រឹកនេះ គឺស្ថិតក្នុងចំណោមវ៉ាក់សាំងចំនួន ប្រមាណជាង 1 លានដូស ដែល សហរដ្ឋអាមេរិក បានប្រកាសផ្ដល់ជំនួយដល់ កម្ពុជា។ ចំណែកជាង 500,000 ដូស ផ្សេងទៀត នឹងត្រូវបានដឹកមកដល់ កម្ពុជា នៅថ្ងៃទី 02 សីហាខាងមុខ។

នៅក្នុងពិធីប្រគល់ និងទទួលវ៉ាក់សាំង Johnson & Johnson នាព្រឹកនេះ ក៏មានវត្តមានរបស់ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល របស់ កម្ពុជា រួមនឹង ភារធារីស្ថានទូតអាមេរិក លោក Ben wohlauer តំណាងអង្គការសុខភាពពិភពលោក និងអង្គការ UNICEF ។

សូមបញ្ជាក់ថា វ៉ាក់សាំង Johnson & Johnson ដែលផលិតនៅ សហរដ្ឋអាមេរិក នេះ គឺជាវ៉ាក់សាំងដែលចាក់តែ 1 ដូស គត់ គឺគ្រប់គ្រាន់។

គិតមកដល់បច្ចុប្បន្ន កម្ពុជា ទទួលបានជំនួយពី សហរដ្ឋអាមេរិក ប្រមាណ 11 លានដុល្លារ រាប់ចាប់ពី COVID-19 បានបង្ហាញខ្លួន។

ប្រភព៖ RGSUCAMBODIA
ដកស្រង់៖ បុត្រា

July 30, 2021

Author: សឿន សំណាង