សឿន សំណាង - La Reine Media

អ្នកវិទ្យាសាស្ត្រ អាចធ្វើឱ្យទឹកស្អាតក្លាយជាលោហធាតុ

ក្រុមអ្នកវិទ្យាសាស្ត្របានធ្វើការពិសោធ និងបានប្រែក្លាយទឹកស្អាតឱ្យទៅជាលោហធាតុ ដោយប្រើពេលតែប៉ុន្មានវិនាទីប៉ុណ្ណោះ ហើយនេះក៏បង្កើតបានជាធាតុរាវដែលមានសមត្ថភាពបញ្ជូនអគ្គិសនី។

ទឹកដែលមិនទាន់បានច្រោះស្អាតអាចនាំអគ្គិសនី មានន័យថា អេឡិចត្រុងបន្ទុកអវិជ្ជមាន អាចត្រូវបានចម្លងរវាងម៉ូលេគុល ព្រោះនៅក្នុងទឹកមានជាតិអំបិល។ ប៉ុន្តែ ទឹកស្អាតគឺមានតែម៉ូលេគុលទឹកប៉ុណ្ណោះ ក្នុងនោះអេឡិចត្រុងនានានៅសម្បកខាងក្រៅបង្អស់ (សម្បកអេឡិចត្រុងវ៉ាឡង់/ Valence electron) នៅតែតោងជាប់នឹងអាតូម និងមិនអាចផ្លាស់ទីដោយសេរីក្នុងទឹក។

អំពីទ្រឹស្ដី បើសិនជាបង្កើតសម្ពាធឱ្យបានគ្រប់គ្រាន់ទៅលើទឹកស្អាត ម៉ូលេគុលទឹកនឹងត្រូវកៀបឱ្យជាប់គ្នា ហើយសម្បកអេឡិចត្រុងខាងក្រៅបង្អស់ដែលព័ទ្ធជុំវិញអាតូម នឹងត្រូវគរលើគ្នា។ ប្រការនេះនឹងបង្កលក្ខណៈងាយស្រួលឱ្យអេឡិចត្រុងផ្លាស់ទីដោយសេរី រវាងអាតូមនីមួយៗ ហើយប្រែក្លាយទឹកទៅជាលោហធាតុ។

បញ្ហានៅត្រង់ថា ដើម្បីកៀបទឹករហូតដល់ក្លាយជាលោហធាតុ គឺទាមទារឱ្យមានសម្ពាធប្រហែល 220 លាន psi (pound per square inch) នេះបើតាមអ្នកវិទ្យាសាស្ត្រ Pavel Jungwirth មកពីបណ្ឌិតសភាវិទ្យាសាស្ត្រ ឆែក នៅរដ្ឋធានី Prague។ ដោយមូលហេតុនេះហើយ ធ្វើឱ្យអ្នកវិទ្យាសាស្ត្រសង្ស័យថា ទឹកត្រូវប្រែទៅជាលោហធាតុ ដែលអាចមានវត្តមាននៅក្នុងស្នូលរបស់បណ្ដាភពខ្នាតយក្ស ដូចជាភពព្រហស្បតិ៍ ភពណិបទូន និងភពអ៊ុយរ៉ានុស។

Jungwirth និងក្រុមការងារ បានរកវិធីផ្សេង ដើម្បីអាចធ្វើឱ្យទឹកក្លាយជាលោហធាតុ។ ពួកគេប្រើប្រាស់លោហអាល់កាឡាំង រួមមានធាតុផ្សំដូចជា ប៉ូតាស្យូម និងសូដ្យូម ហើយមានផ្ទុកអេឡិចត្រុងតែមួយនៅសម្បកអេឡិចត្រុងវ៉ាឡង់។

លោហអាល់កាឡាំង អាចផ្ទុះ នៅពេលប៉ះនឹងទឹក ប៉ុន្តែ ពួកគេគិតថា ដោយវិធីណាមួយនោះ ដែលអាចចៀសវាងការផ្ទុះបាន ពួកគេអាចខ្ចីអេឡិចត្រុងពីលោហអាល់កាឡាំង និងប្រើប្រាស់អេឡិចត្រុងនោះដើម្បីធ្វើឱ្យទឹកក្លាយជាលោហធាតុ។

ការពិសោធថ្មីដែលត្រូវបានចុះផ្សាយកាលពីថ្ងៃទី 28 កក្កដា នៅលើទស្សនាវដ្ដី Nature ក្រុមអ្នកវិទ្យាសាស្ត្របានរកឃើញវិធីសមស្រប។ ពួកគេដាក់ស៊ីឡាំងដែលពេញដោយសូដ្យូម និងប៉ូតាស្យូមនៅក្នុងប្រអប់ទំនេរ រួចបញ្ចេញតំណក់តូចៗនៃលោហធាតុរាវក្នុងសីតុណ្ហភាពស្មើនឹងកំដៅក្នុងបន្ទប់ ក្រោយមកទុកឱ្យតំណក់លោហធាតុនេះប៉ះនឹងចំហាយទឹកដ៏ល្អិត។ ទឹកក៏បានកកើតនៅលើបន្ទះមួយដែលមានកម្រាស់ 0.1 micromet នៅខាងលើផ្ទៃនៃតំណក់លោហធាតុ ហើយភ្លាមនោះ អេឡិចត្រុងពីលោហធាតុក៏រត់ទៅរកទឹក។

នៅក្នុងរយៈពេលដ៏ខ្លី ទឹកប្រែទៅជាពណ៌លឿងបែបលោហធាតុរលើបរលោង។ ដោយការប្រើប្រាស់ឧបករណ៍វាស់ស្ទង់ spectrometer ក្រុមស្រាវជ្រាវអាចបញ្ជាក់បានថា ទឹកដែលមានពណ៌លឿងនោះ ពិតជាលោហធាតុ៕

August 2, 2021

Amazon កំពុងក្លាយជាគោលដៅក្នុងការរឹតត្បឹតពីសំណាក់រដ្ឋាភិបាលអាមេរិក

ការរីកចម្រើន ហើយពេលខ្លះក៏ត្រូវបានគេមើលឃើញថាជា ការរកស៊ីផ្ដាច់មុខកាន់តែខ្លាំងឡើងរបស់ Amazon បានធ្វើឱ្យពួកគេក្លាយជាគោលដៅដែលត្រូវចាត់វិធានការពីសំណាក់រដ្ឋ និងក្រុមអ្នកតាក់តែងច្បាប់ នៅសហរដ្ឋ អាមេរិក។

ក៏ប៉ុន្តែ ដោយសារតែទំហំដ៏មហិមា និងឥទ្ធិពលដ៏ខ្លាំងក្លារបស់ខ្លួន ក្រុមហ៊ុន Amazon ក៏ធ្វើឱ្យក្រុមអ្នកបង្កើតច្បាប់ ត្រូវថ្លឹងថ្លែងយ៉ាងយកចិត្តទុកដាក់បំផុតក្នុងការរឹតត្បឹតលើក្រុមហ៊ុននេះ ដើម្បីមិនឱ្យមានការប៉ះពាល់ដល់អតិថិជន និងបណ្ដាក្រុមហ៊ុនដែល «អាស្រ័យផល» ដោយសារ។

កាលពីចុងខែមុន តំណាងរាស្ត្រមួយក្រុម រួមមានទាំងក្រុមអ្នកតាក់តែងច្បាប់នៅសភាជាន់ទាបអាមេរិក បានបង្ហាញសេចក្ដីព្រាងច្បាប់មួយដើម្បីដោះស្រាយលើបញ្ហា «ក្ដោបក្ដាប់អំណាច» នៃបណ្ដាក្រុមហ៊ុនបច្ចេកវិទ្យាធំៗ មានដូចជា Facebook, Amazon, Apple និង Google។ សេចក្ដីព្រាងច្បាប់នេះ នឹងអាចបើកផ្លូវឱ្យមានការកាត់ផ្ដាច់ក្រុមហ៊ុនមួយ ឬច្រើនចេញពីគ្នា ទន្ទឹមនឹងការដែលត្រូវរកដំណោះស្រាយឱ្យបានសមស្រប។

ក្រុមហ៊ុន Amazon កាលពីពេលថ្មីៗនេះ បានបង្ហើបឱ្យដឹងថា ពួកគេប្រហែលជាត្រូវបានបង្ខំឱ្យឈប់ដំណើរការទីផ្សាររបស់អ្នកលក់ជាភាគីទីបី និងត្រលប់មកស្ថានភាពដើម ដែល Amazon គ្រាន់តែលក់ទំនិញផ្ទាល់ខ្លួនតែប៉ុណ្ណោះ។ សកម្មភាពនេះ នឹងធ្វើឱ្យមានផលប៉ះពាល់ធ្ងន់ធ្ងរដល់អ្នកលក់រាប់លាននាក់ ដែលកំពុងពឹងផ្អែកលើទីផ្សារជាឈ្មួញកណ្ដាលរបស់ Amazon ដើម្បីធ្វើជំនួញ និងធ្វើឱ្យបទពិសោធន៍នៃការទិញដូររបស់អតិថិជន ត្រូវក្រឡាប់ចាក់។

Joel Mitnick ដែលជាសមាជិកម្នាក់នៃក្រុមមេធាវីប្រឆាំងការរកស៊ីផ្ដាច់មុខ ប្រចាំក្រុមហ៊ុនច្បាប់ Cadwalader ឱ្យដឹងថា៖ «ការបំបែកក្រុមហ៊ុននានា ពិតជាមានការលំបាក ហើយការបំបែកក្រុមហ៊ុនដែលមានអតិថិជនស្រលាញ់ចូលចិត្តច្រើន នោះវាកាន់តែពិបាកខ្លាំងទៅទៀត»។

Amazon ធ្លាប់តែជាក្រុមហ៊ុនមួយដែលលក់តែសៀវភៅ។ ពេលនេះ យើងអាចហៅសកម្មភាពអាជីវកម្មរបស់ពួកគេដោយខ្លីថា «ពាណិជ្ជកម្មអនឡាញ»។ Amazon មានក្រុមហ៊ុនបុត្រសម្ព័ន្ធជាច្រើន ដូចជា Amazon Web Services, Whole Food, ផ្សព្វផ្សាយ, ហ្គេម, កំសាន្ត និងសេវាកម្មផ្សាយផ្ទាល់, ដឹកជញ្ជូន, ឧបករណ៍ឆ្លាតវៃ, សេវាទូទាត់ប្រាក់ និងផ្សារអនឡាញ។

ក្រុមហ៊ុនបុត្រសម្ព័ន្ធមួយចំនួនរបស់ Amazon បានក្លាយជាគោលដៅនៃការរិះគន់នាប៉ុន្មានឆ្នាំចុងក្រោយនេះ។ តំណាងរាស្ត្រ Elizabeth Warren ធ្លាប់បានដាក់សំណើបង្កើតអង្គភាពនានា ដើម្បី «ប្រែត្រលប់មកវិញ ចំពោះករណីច្របាច់បញ្ចូលគ្នារវាងបណ្ដាក្រុមហ៊ុន ដែលមានកត្តាប្រឆាំងនឹងការប្រកួតប្រជែង»។ ក្នុងនោះមានទាំងករណី Amazon ប្រើប្រាស់លុយ 13.7 ពាន់លានដុលលារ ដើម្បីទិញក្រុមហ៊ុន Whole Foods កាលពីឆ្នាំ 2017។

ថ្មីៗនេះ ការដែល Amazon លើកសំណើរទិញយកក្រុមហ៊ុនភាពយន្ត MGM ក្នុងតម្លៃ 8.45 ពាន់លានដុល្លារ ក៏ជួបនឹងប្រតិកម្មរបស់ Warren និងអ្នកតាក់តែងច្បាប់ដទៃទៀត។ គណៈកម្មការពាណិជ្ជកម្មសហរដ្ឋអាមេរិក ក្រោមការដឹកនាំរបស់ប្រធានដែលទើបតែត្រូវបានតែងតាំង Lina Khan នឹងសើរើកិច្ចព្រមព្រៀងខាងលើឡើងវិញ។

បើទោះជាមិនទាន់ទទួលបានចំណាប់អារម្មណ៍ខ្លាំង ប៉ុន្តែ Amazon Web Services នៅតែអាចទទួលរងឥទ្ធិពល ដោយសារតែច្បាប់។

អ្នកវិភាគមួយចំនួន ក្នុងនោះមានទាំងអតីតអនុប្រធានរបស់ Amazon បានផ្ដល់យោបល់ថា ក្រុមហ៊ុន Amazon គួរតែបំបែក Amazon Web Services ឱ្យដាច់ដោយឡែក ដើម្បីទប់ទល់នឹងកម្លាំងមកពីបណ្ដាអង្គភាពប្រឆាំងនឹងការរកស៊ីផ្ដាច់មុខ និងដើម្បីជំរុញកំណើនរបស់សេវាកម្មនេះ។

អំពី Amazon នៅពេលគេស្វែងរកផលិតផលមួយនៅលើគេហទំព័ររបស់ Amazon គេឃើញមានទំនិញជាច្រើនដែលមិនមែនជាផលិតផលផ្ទាល់ខ្លួនរបស់ក្រុមហ៊ុននេះ ប៉ុន្តែ ជាផលិតផលរបស់ភាគីទីបី ដែលប្រើប្រាស់ថ្នាលបច្ចេកវិទ្យារបស់ Amazon ដើម្បីលក់ផលិតផលដល់អតិថិជននៅទូទាំងពិភពលោក។ ទំនាក់ទំនងបែបនេះ រវាង Amazon និងភាគីអ្នកលក់ បានក្លាយជាចំណុចដែលត្រូវរិះគន់។

មនុស្សជាច្រើនមានការបារម្ភអំពីការដែល Amazon ចម្លងផលិតផលរបស់អ្នកលក់ ហើយលក់វាក្នុងតម្លៃទាបជាង នៅពេលពួកគេមានទំហំគ្រប់គ្រាន់ និងធនធានមនុស្សច្រើនជាងបច្ចុប្បន្ន។

សង្គ្រាមទប់ទល់នឹងការរកស៊ីផ្ដាច់មុខរបស់ក្រុមហ៊ុន Amazon ទំនងជាត្រូវចំណាយពេលច្រើនឆ្នាំទៀត ហើយក៏នឹងនៅមានការប្ដូរផ្លាស់ទៅតាមពេលវេលា។ ប៉ុន្តែ ប្រតិកម្មដំបូងរបស់ Amazon បានបង្ហាញថា ក្រុមហ៊ុនបុត្រសម្ព័ន្ធណាខ្លះដែលទទួលបានការគាំពារជាអាទិភាព នៅក្នុងពិភពប្រឆាំងនឹងការរកស៊ីផ្ដាច់មុខ៕

August 2, 2021

ក្រសួងសុខាភិបាលថា កម្ពុជា កំពុងរងការវាយប្រហារពី វ៉ារ្យ៉ង់ Delta ខណៈប្រមុខរដ្ឋាភិបាល សម្រេចឱ្យចាក់ដូសទីបី

គិតត្រឹមថ្ងៃទី 01 ខែសីហា ឆ្នាំ 2021 កម្ពុជា បានរកឃើញអ្នកផ្ទុកវីរុស COVID-19 ប្រភេទ Delta សរុបចំនួន 223 ករណី ក្នុងនោះមាន 5 ករណី នៅ ភ្នំពេញ។

ទាក់ទិននឹងរលកនៃការឆ្លងរាលដាលរបស់ COVID-19 ពិសេសគឺប្រភេទ Delta ប្រមុខរដ្ឋាភិបាល កម្ពុជា សម្ដេច ហ៊ុន សែន កាលពីថ្ងៃទី 01 ខែសីហា បានសម្រេចឱ្យចាក់វ៉ាក់សាំងបង្ការ COVID-19 ដូសទី 3 ដើម្បីបង្កើនប្រសិទ្ធភាពក្នុងការទប់ស្កាត់ការឆ្លងវីរុសនេះ។ វ៉ាក់សាំង AstraZeneca ដែលអភិវឌ្ឍដោយ អង់គ្លេស នឹងត្រូវបានប្រើប្រាស់សម្រាប់អ្នកដែលបានចាក់វ៉ាក់សាំងរបស់ ចិន ប្រភេទ Sinopharm ឬ Sinovac។

ចំណែកអ្នកដែលបានទទួលការចាក់វ៉ាក់សាំង AstraZeneca រួចហើយ នឹងអាចត្រូវបានចាក់ដូសទី 3 ដោយប្រើប្រាស់វ៉ាក់សាំង Sinopharm ឬ Sinovac វិញម្តង។

ការចាក់ដូសទី 3 នេះ គឺផ្ដល់អាទិភាពសម្រាប់បណ្ដាខេត្តជាប់ព្រំដែន ដោយសារពួកគេកំពុងប្រឈមនឹងហានិភ័យខ្ពស់ក្នុងការឆ្លង COVID-19 ប្រភេទ Delta ដែលជាវ៉ារ្យ៉ង់មួយត្រូវបានរកឃើញដំបូងនៅប្រទេស ឥណ្ឌា។ នេះបើតាម ប្រមុខរដ្ឋាភិបាល។

ប្រភពព័ត៌មានពីមន្ទីរពេទ្យហ្លួងម៉ែ ដែលគ្រប់គ្រងដោយកងទ័ព បានឱ្យដឹងថា ការចាក់វ៉ាក់សាំងដូសទី 3 នេះ ក៏នឹងផ្ដល់អាទិភាពចំពោះបុគ្គលិកសុខាភិបាល និងក្រុមមន្ត្រីប្រយុទ្ធប្រឆាំងនឹង COVID-19 នៅជួរមុខផង ដែរ៕

August 2, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 02 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 560 នាក់, អ្នកជាចំនួន 763 នាក់ និងអ្នកស្លាប់ចំនួន 22 នាក់បន្ថែមទៀត នៅក្នុងថ្ងៃទី 01 ខែសីហា ឆ្នាំ 2021។

គិតត្រឹមព្រឹកថ្ងៃទី 02 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 78,474 នាក់ ក្នុងនោះមានអ្នកជាសះស្បើយជាង 71,517 នាក់ និង អ្នកស្លាប់ 1,442 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 199,022,838 នាក់ ត្រូវបានរកឃើញ ក្នុងនោះមានជាង 179,631,883 នាក់បានជា, 4,240,374 នាក់បានស្លាប់ និងជាង 15,150,581 នាក់ កំពុងព្យាបាល៕

August 2, 2021

ព្រះសង្ឃថៃ ដែលចូលរួមធ្វើជាកម្លាំងជួរមុខ ដើម្បីទប់ទល់នឹង COVID-19៖ ដល់ពេលដែលព្រះសង្ឃត្រូវសងគុណបរិស័ទហើយ!

ព្រះសង្ឃពុទ្ធសាសនាជាច្រើនអង្គ កំពុងគ្រងឈុតការពារវីរុស ដើម្បីចូលរួមធ្វើសកម្មភាពប្រយុទ្ធប្រឆាំងនឹង COVID-19 ដែលកំពុងរាតត្បាតយ៉ាងខ្លាំងក្លានៅប្រទេសថៃ។

ប្រទេសថៃ កំពុងរងការវាយប្រហារពីវីរុស COVID-19 ប្រភេទ Delta។ តួលេខអ្នកឆ្លងវីរុស COVID-19 កំពុងកើនឡើងយ៉ាងឆាប់រហ័ស នាំឱ្យប្រព័ន្ធសុខាភិបាលប្រឈមនឹងបញ្ហាលើសចំណុះ និងបង្កការខាតបង់បន្ថែមទៀតដល់សេដ្ឋកិច្ចជាតិ។

ក្នុងស្ថានការណ៍នេះ ព្រះសង្ឃពុទ្ធសាសនាជាច្រើនអង្គនៅប្រទេសថៃ បានសម្រេចដោះឈុតចីពរទុកមួយឡែក ហើយគ្រងឈុតការពារវីរុសវិញម្ដង ដើម្បីចូលរួមធ្វើយុទ្ធនាការប្រយុទ្ធប្រឆាំងនឹង COVID-19 ក្នុងនោះមានអង្គខ្លះជួយដឹកជញ្ជូនធុងអុកស៊ីសែន អង្គខ្លះធ្វើជាជំនួយការយកសំណាក ហើយអង្គខ្លះទៀតក៏ស្ម័គ្រចិត្តធ្វើជាជំនួយការរបស់ក្រុមដឹកសាកសពអ្នកជំងឺ COVID-19 យកទៅកាន់ឡបូជាទៀតផង។

«នៅមានប្រជាជនថៃជាច្រើនទៀតដែលមិនអាចប្រើប្រាស់ប្រព័ន្ធសុខាភិបាលសាធារណៈ។ ពួកអាត្មាថែទាំគ្រប់គ្នាដែលត្រូវការជំនួយ» ព្រះអង្គ Mahapromphong ព្រះជន្ម 33 វស្សា ជាគ្រូសូត្រស្ដាំរបស់វត្ត Suthi Wararam នៅទីក្រុងបាងកក បានមានសង្ឃដីកាដូច្នេះ។

ចាប់តាំងពីថ្ងៃទី 21 កក្កដា ព្រះអង្គ Mahapromphong បាននិមន្តទៅកាន់ទីប្រជុំជនក្រីក្របំផុតនៃទីក្រុងបាងកក នាំយកធុងអុកស៊ីសែន អាហារ និងសម្ភារវេជ្ជសាស្រ ប្រគល់ដល់ដៃប្រជាជន ក៏ដូចជាយកសំណាកទៅធ្វើតេស្ត។

ព្រះអង្គ Mahapromphong រៀនយកសំណាក COVID-19 ពីក្រុមវេជ្ជបណ្ឌិត និងបុគ្គលិកសុខាភិបាលដែលធ្វើការក្នុងវត្ត Suthi Wararam ជាកន្លែងដែលត្រូវបានយកមកធ្វើជាមជ្ឈមណ្ឌលចត្តាឡីស័ក សម្រាក់អ្នកជំងឺ COVID-19។

ចៅអធិការរងវត្ត Suthi Wararam នេះ មានសង្ឃដីកាថា៖ «ព្រះសង្ឃអាចរស់បានក៏ដោយសារការដាក់បាត្រពីប្រជាជន។ ដូច្នេះ ដល់ពេលដែលពួកអាត្មាត្រូវសងគុណពួកគាត់វិញហើយ។ យ៉ាងហោចណាស់ក៏ពួកអាត្មាអាចលើកទឹកចិត្តឱ្យពួកគាត់បន្តការប្រយុទ្ធទៅទៀត»។

ចំណែកឯ ព្រះសង្ឃមួយអង្គផ្សេងទៀតដែលមានព្រះនាមថា Supornchaithammo កំពុងគង់នៅវត្ត Chin Wararam Worawiharn ក៏បានចូលជាកម្លាំងក្នុងការដឹកជញ្ជូនសាកសពអ្នកជំងឺ COVID-19 ទៅកាន់ឡបូជា។ ព្រះអង្គមានសង្ឃដីកាថា៖ «អាត្មាស្ម័គ្រចិត្តប្រឈមនឹងហានិភ័យ។ បើអាត្មាឆ្លងវីរុស អាត្មាត្រៀមខ្លួនជានិច្ចក្នុងការប្រឈមមុខនឹងវា ដោយមិនមានការស្ដាយក្រោយអ្វីឡើយ»។

ប្រទេសថៃ គិតមកដល់បច្ចុប្បន្ន បានរកឃើញអ្នកផ្ទុកវីរុស COVID-19 សរុបចំនួន 633,284 នាក់ ក្នុងនោះមានអ្នកស្លាប់ 5,168 នាក់ និងជាសះស្បើយចំនួនជាង 419,000 នាក់៕

August 2, 2021

កម្ពុជា រកឃើញ COVID-19 ប្រភេទ Delta ជាង 100 ករណី នៅចុងខែកក្កដា និងដើមខែសីហា

ក្រសូងសុខាភិបាល កម្ពុជា បានចេញសេចក្ដីជូនដំណឹង ស្ដីពីការរកឃើញវីរុស COVID-19 ប្រភេទ Delta (B.1.617.2) ចំនួន 109 ករណី នៅក្នុងថ្ងៃទី 31 ខែកក្កដា និងថ្ងៃទី 01 ខែសីហា ឆ្នាំ 2021។

ក្នុងចំណោមអ្នកជំងឺដែលវិជ្ជមាននឹងវ៉ារ្យ៉ង់ Delta របស់វីរុស COVID-19 នេះ ភាគច្រើនគឺជាពលករខ្មែរដែលបានត្រលប់មកពីប្រទេសថៃ។

គិតមកដល់ថ្ងៃទី 01 ខែសីហា ឆ្នាំ 2021 កម្ពុជា បានរកឃើញអ្នកវិជ្ជមាននឹង COVID-19 សរុបចំនួនជាង 77,900 នាក់ ក្នុងនោះមានអ្នកស្លាប់ជាង 1,400 នាក់ និងជាសះស្បើយជាង 70,000 នាក់។

ការចាក់វ៉ាក់សាំងបង្ការ COVID-19 នៅ កម្ពុជា រាប់ចាប់ពីថ្ងៃទី 10 កុម្ភៈ ដល់ថ្ងៃទី 01 សីហា ឆ្នាំ 2021 សម្រេចបានជាង 46% បើធៀបនឹងចំនួនប្រជាជនសរុប 16 លាននាក់។

គិតត្រឹមថ្ងៃទី 01 ខែសីហា ឆ្នាំ 2021 កម្ពុជា បានរកឃើញអ្នកផ្ទុកវីរុស COVID-19 ប្រភេទ Delta សរុបចំនួន 223 ករណី ក្នុងនោះមាន 5 ករណី នៅ ភ្នំពេញ៕

ព័ត៌មានលម្អិត ស្ដីពីការរកឃើញអ្នកវិជ្ជមាននឹង COVID-19 ប្រភេទ Delta សូមអានសេចក្ដីជូនដំណឹងខាងក្រោម៖

August 2, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 31 ខែកក្កដា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 658 នាក់, អ្នកជាចំនួន 798 នាក់ និងអ្នកស្លាប់ចំនួន 22 នាក់បន្ថែមទៀត នៅក្នុងថ្ងៃទី 30 ខែកក្កដា ឆ្នាំ 2021។

គិតត្រឹមព្រឹកថ្ងៃទី 31 ខែកក្កដា ឆ្នាំ 2021 កម្ពុជា មានអ្នកឆ្លង COVID-19 សរុប 77,243 នាក់ ក្នុងនោះមានអ្នកជាសះស្បើយជាង 69,990 នាក់ និង អ្នកស្លាប់ 1,397 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកវិជ្ជមាននឹង Covid-19 សរុបចំនួនជាង 198,031,330 នាក់ ត្រូវបានរកឃើញ ក្នុងនោះមានជាង 178,925,460 នាក់បានជា, 4,224,346 នាក់បានស្លាប់ និងជាង 14,881,520 នាក់ កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 31, 2021

កម្ពុជា មានវ៉ាក់សាំង COVID-19 ជិត 19,000,000 ដូស បន្ទាប់ពីទំនិញ 1 លានដូស បានមកដល់នាព្រឹកនេះ

(ភ្នំពេញ)៖ វ៉ាក់សាំង COVID-19 របស់ក្រុមហ៊ុន Sinovac នៃប្រទេសចិនចំនួន 1 លានដូស និងឧបករណ៍តេស្តរហ័សចំនួន 30 ម៉ឺន ទើបត្រូវបានដឹកមកដល់ កម្ពុជា នៅព្រឹកថ្ងៃទី 31 ខែកក្កដា។

វ៉ាក់សាំង Sinovac ដែលទើបតែបានដឹកមកដល់នេះ គឺជាការបញ្ជាទិញរបស់ កម្ពុជា រីឯឧបករណ៍តេស្តរហ័សចំនួន 30 ម៉ឺនឈុត ដែលដឹកមកជាមួយវ៉ាក់សាំងនេះដែរ គឺជាជំនួយរបស់ ចិន។ នេះបើតាម លោកស្រី យក់ សម្បត្តិ រដ្ឋលេខាធិការក្រសួងសុខាភិបាល ដែលបានចុះទៅទទួលទំនិញ និងជំនួយនេះ។

គិតត្រឹមថ្ងៃទី 31 កក្កដា ឆ្នាំ 2021 នេះ កម្ពុជា មានវ៉ាក់សាំងក្នុងដៃសរុបចំនួន 18,856,000 ដូស ក្នុងនោះមាន វ៉ាក់សាំងជំនួយពីបរទេស ចំនួន 3,356,000 ដូស និងវ៉ាក់សាំងទិញពីបរទេសចំនួន 15,500,000 ដូស។

ប្រទេសដែលបានផ្ដល់ជំនួយជាវ៉ាក់សាំងច្រើនជាងគេដល់ កម្ពុជា គឺប្រទេសចិន ដោយបានផ្ដល់ជំនួយចំនួន 2,200,000 ដូស ខណៈ សហរដ្ឋអាមេរិក បានផ្ដល់ចំនួន 500,000 ដូស និង ជប៉ុន ចំនួន 332,000 ដូស។

ក្រៅពីប្រទេសខាងលើ កម្ពុជា ក៏បានទទួលជំនួយជាវ៉ាក់សាំងចំនួន 324,000 ដូស ពី COVAX ដែលជាយន្តការចែករំលែកវ៉ាក់សាំង COVID-19 ដឹកនាំដោយអង្គការសុខភាពពិភពលោក។

ជាមួយនឹងវ៉ាក់សាំងក្នុងដៃចំនួនជិត 19 លានដូសនេះ បច្ចុប្បន្ន កម្ពុជា ចាក់ជូនប្រជាពលរដ្ឋបានជាង 7 លាននាក់រួចរាល់ហើយ៕

July 31, 2021

អគ្គនាយកដ្ឋានពន្ធដារ ណែនាំរបៀបប្រើប្រាស់ «ប្រព័ន្ធគ្រង់គ្រងការស្នើសុំវិញ្ញាបនបត្រពន្ធដារ»

ថ្មីៗនេះ ទន្ទឹមនឹងការណែនាំក្នុងការប្រើប្រាស់កម្មវិធីបង់ពន្ធតាមទូរស័ព្ទដៃ GDT Taxpayer ថ្មីៗនេះ អគ្គនាយកដ្ឋានពន្ធដារ ក៏បានចេញវីដេអូ ណែនាំអំពីរបៀបប្រើប្រាស់ «ប្រព័ន្ធគ្រង់គ្រងការស្នើសុំវិញ្ញាបនបត្រពន្ធដារ» ផងដែរ។

ដើម្បីជួយសម្រួលដល់អ្នកជាប់ពន្ធទាំងអស់ ដែលមានបំណងស្នើសុំវិញ្ញាបនបត្រពន្ធដារ អគ្គនាយកដ្ឋានពន្ធដារ នៃក្រសួងសេដ្ឋកិច្ច និង ហិរញ្ញវត្ថុ បានធ្វើការណែនាំកម្មវិធីមួយដែលមានឈ្មោះថា «ប្រព័ន្ធគ្រង់គ្រងការស្នើសុំវិញ្ញាបនបត្រពន្ធដារ»។ ម្ចាស់អាជីវកម្ម និងអ្នកជាប់ពន្ធទាំងអស់ អាចប្រើប្រាស់កម្មវិធីនេះដើម្បីបង្កើតសំណើ និងបោះពុម្ភវិញ្ញាបនបត្ររបស់ខ្លួន សម្រាប់ប្រើប្រាស់ផ្លូវការបាន។

ប្រភេទវិញ្ញបនបត្រដែលអ្នកជាប់ពន្ធអាចស្នើសុំតាមរយៈ «ប្រព័ន្ធគ្រង់គ្រងការស្នើសុំវិញ្ញាបនបត្រពន្ធដារ» នេះ មានដូចជា «វិញ្ញាបនបត្រអនុលោមភាពសារពើពន្ធ», «វិញ្ញាបនបត្របញ្ជិកាគណនេយ្យត្រឹមត្រូវ», «វិញ្ញាបនបត្រអត្រាសូន្យនូវអាករលើតម្លៃបន្ថែម» និង «វិញ្ញបនបត្រលើកលែងពន្ធលើប្រាក់ចំណូល» ជាដើម។

ដើម្បីប្រើប្រាស់ «ប្រព័ន្ធគ្រង់គ្រងការស្នើសុំវិញ្ញាបនបត្រពន្ធដារ» នេះ សូមចូលទៅកាន់គេហទំព័ររបស់អគ្គនាយកដ្ឋានពន្ធដារ www.tax.gov.kh និងធ្វើតាមការណែនាំនៅក្នុងវីដេអូខាងក្រោម៖

ប្រភព៖ អគ្គនាយកដ្ឋានពន្ធដារ
ដកស្រង់៖ បុត្រា

July 31, 2021

អគ្គនាយកដ្ឋានពន្ធដារ ណែនាំឱ្យប្រើកម្មវិធីទូរស័ព្ទ ដើម្បី «បង់ពន្ធយានយន្តគ្រប់ប្រភេទ»

«អគ្គនាយកដ្ឋាពន្ធដារ បង្កើតកម្មវិធីទូរស័ព្ទដៃអ្នកជាប់ពន្ធនេះឡើង ក្នុងគោលបំណងបង្កើនប្រសិទ្ធិភាពក្នុងការផ្តល់សេវា និងជួយសម្រួលដល់លោក-លោកស្រីដែលជាម្ចាស់-តំណាងសហគ្រាសប្រកបអាជីវកម្ម ភ្នាក់ងារសេវាកម្មពន្ធដារ ប្រជាពលរដ្ឋ និងសាធារណៈជនមានចលនទ្រព្យ និងអចលនទ្រព្យនៅក្នុងព្រះរាជាណាចក្រកម្ពុជា អាចបង់ប្រាក់ពន្ធតាមទូរស័ព្ទដៃបាន» នេះបើតាមអគ្គនាយកដ្ឋាពន្ធដារ នៃក្រសួងសេដ្ឋកិច្ច និង ហិរញ្ញវត្ថុ កម្ពុជា។

នៅក្នុងកម្មវិធីទូរស័ព្ទដៃដែលមានឈ្មោះថា GDT Taxpayer នេះ ក៏អនុញ្ញាតឱ្យអ្នកប្រើប្រាស់ដែលជាម្ចាស់សហគ្រាស ប្រជាពលរដ្ឋ និងសាធារណៈជនមានចលនទ្រព្យ និងអចលនទ្រព្យតាមដាន និងមើលប្រវត្តិបង់ប្រាក់ពន្ធបានផងដែរ។

ដើម្បីប្រើប្រាស់កម្មវិធីនេះបាន សូមចូលទៅកាន់ Google Play (Google Play Store / សម្រាប់ទូរស័ព្ទ Android) ទាញយក និងដំឡើងលើទូរស័ព្ទដៃ។ សូមធ្វើតាមការណែនាំនៅក្នុងវីដេអូខាងក្រោម៖

https://www.youtube.com/watch?v=INEV2Fp2E3U

ប្រភព៖ អគ្គនាយកដ្ឋានពន្ធដា
ដកស្រង់៖ បុត្រា

July 31, 2021

Author: សឿន សំណាង