សឿន សំណាង - La Reine Media

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 05 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 591 នាក់, អ្នកជាចំនួន 618 នាក់ និងអ្នកស្លាប់ចំនួន 19 នាក់បន្ថែមទៀត នៅក្នុងថ្ងៃទី 04 ខែសីហា ឆ្នាំ 2021។

គិតត្រឹមព្រឹកថ្ងៃទី 05 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 80,225 នាក់ ក្នុងនោះមានអ្នកជាសះស្បើយជាង 73,421 នាក់ និង អ្នកស្លាប់ 1,507 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 0201,008,820 នាក់ ត្រូវបានរកឃើញ ក្នុងនោះមានជាង 181,015,550 នាក់បានជា, 4,270,245 នាក់បានស្លាប់ និងជាង 15,723,030 នាក់ កំពុងព្យាបាល៕

August 5, 2021

BREAKING៖ សម្រេចបិទខ្ទប់ (Lockdown) កំណាត់ផ្លូវមួយ នៅសង្កាត់បឹងព្រលឹត ខណ្ឌ៧មករា ដោយសារ Delta

កំណាត់ផ្លូវលេខ 113 ចន្លោះផ្លូវលេខ 232 និងផ្លូវលេខ 242 ដែលស្ថិតនៅភូមិ២ សង្កាត់បឹងព្រលឹត ខណ្ឌ៧មករា រាជធានីភ្នំពេញ ត្រូវបានបិទខ្ទប់មិនឱ្យមានការចេញ-ចូល ដោយសារតែមានការឆ្លងរាលដាលនៃវីរុស COVID-19 ប្រភេទ Delta។

រដ្ឋបាលរាជធានីភ្នំពេញ បានបញ្ជាក់ថា ការបិទខ្ទប់នេះ ត្រូវធ្វើឡើងរយៈពេល 14 ថ្ងៃ ចាប់ពីថ្ងៃទី 05 ខែសីហា ដល់ថ្ងៃទី 18 ខែសីហា ឆ្នាំ 2021។ ព័ត៌មានបន្ថែម សូមអានសេចក្ដីសម្រេចខាងក្រោម៖

August 5, 2021

ការស្រាវជ្រាវ៖ អ្នកបានចាក់វ៉ាក់សាំង មានហានិភ័យឆ្លង COVID-19 ទាបជាងច្រើនដង ធៀបនឹងអ្នកមិនទាន់ចាក់

ការសិក្សាស្រាវជ្រាវថ្មីរបស់ប្រទេស អង់គ្លេស បានបង្ហាញថា អ្នកដែលបានទទួលការចាក់វ៉ាក់សាំងគ្រប់ចំនួនពីរដូស មានហានិភ័យឆ្លងវីរុស COVID-19 ទាបជាង 3 ដងឯណោះ បើធៀបជាមួយនឹងក្រុមមនុស្សដែលមិនទាន់បានចាក់។

ការសិក្សាស្រាវជ្រាវរបស់កម្មវិធីតាមដាន COVID-19 ដែលមានឈ្មោះថា REACT-1 ដឹកនាំដោយមហាវិទ្យាល័យអធិរាជទីក្រុងឡុងដ៍ (Imperial College London) និងក្រុមហ៊ុន Ipsos MORI នេះ គឺយោងទៅតាមលទ្ធផលនៃការធ្វើតេស្តរបស់មនុស្សជាង 98,000 នាក់ ចាប់ពីថ្ងៃទី 24 មិថុនា ដល់ 12 កក្កដា។ លទ្ធផលបានបង្ហាញថា អ្នកដែលមិនទាន់បានចាក់វ៉ាក់សាំង COVID-19 មានហានិភ័យឆ្លងវីរុស ក្នុងអត្រា 1.21% គឺខ្ពស់ជាង 3 ដង ធៀបនឹងអ្នកបានចាក់រួចរាល់ ដែលមានអត្រាឆ្លងត្រឹមតែ 0.4%។

ការស្រាវជ្រាវក៏បានឱ្យដឹងថា បើសិនអ្នកបានចាក់វ៉ាក់សាំងរួចរាល់ ឆ្លង COVID-19 ពួកគេក៏មានហានិភ័យចម្លងវីរុសទៅអ្នកដទៃ ទាបជាងផងដែរ ដោយសារតែបរិមាណវីរុសក្នុងរាងកាយមានចំនួនតិច។

សាស្ត្រាចារ្យ Paul Elliott មកពីសាលាសុខាភិបាលសាធារណៈ របស់មហាវិទ្យាល័យ Imperial College London និយាយថា៖ «ការរកឃើញបង្ហាញថា វ៉ាក់សាំងចំនួន 2 ដូស បានផ្ដល់ស្រទាប់ការពារបានល្អ នៅចំពោះមុខហានិភ័យនៃការឆ្លងវីរុស»។

នៅក្នុងចំណោមសំណាកជាង 98,000 ករណី ក្រុមអ្នកវិទ្យាសាស្ត្របានរកឃើញ 527 សំណាក មានផ្ទុកវីរុស ដែលនេះគឺប្រហាក់ប្រហែលនឹងអត្រា 0.63%។ តួលេខនេះ កើន 4 ដង បើធៀបនឹងអត្រា 0.15% នៅក្នុងរបាយការណ៍ដែលបានប្រកាសកាលពីថ្ងៃទី 17 មិថុនា ស្រាវជ្រាវចាប់ពីថ្ងៃទី 20 ឧសភា ដល់ថ្ងៃទី 07 មិថុនា។ ចំណែកអត្រាឆ្លងខ្ពស់បំផុតដែលត្រូវបានកត់ត្រានៅទីក្រុងឡុងដ៍ គឺ 0.94%៕

August 5, 2021

វិធីសាស្ត្រដែល តៃវ៉ាន់ ប្រើ និងទទួលបានជោគជ័យ នៅក្នុងការប្រែត្រលប់ស្ថានការណ៍ COVID-19

នៅក្នុងពាក់កណ្ដាលខែឧសភា ជីវភាពសុខសាន្តរបស់ប្រជាជននៅកោះ តៃវ៉ាន់ ស្រាប់តែត្រូវក្រឡាប់ចក្រ ដោយសារតែរលកនៃការឆ្លងរាលដាល COVID-19 ដ៏ធ្ងន់ធ្ងរ ប៉ុន្តែ បច្ចុប្បន្ន កោះនេះបែរជាគ្រប់គ្រងស្ថានការណ៍បានទាំងស្រុង។

កោះតៃវ៉ាន់ ធ្លាប់ត្រូវបានគេចាត់ទុកថាជា ដែនដីគំរូក្នុងការប្រយុទ្ធប្រឆាំងនឹង COVID-19 របស់ពិភពលោក។ ក្នុងគ្រាដែលតំបន់ផ្សេងៗ ជួបនឹងបញ្ហា COVID-19 សកម្មភាពសេដ្ឋកិច្ចរបស់កោះនេះ នៅតែដំណើរការក្នុងរយៈពេលភាគច្រើននៃវិបត្តិសុខភាព។ សាលារៀន នៅតែបើកទ្វារ រោងភាពយន្ត ភោជនីយដ្ឋានពេញដោយមនុស្ស សេដ្ឋកិច្ចរីកចម្រើនខ្លាំង។

ភាពសុខសាន្តខាងលើក៏ត្រូវបានបញ្ចប់កាលពីពាក់កណ្ដាលខែឧសភា ព្រោះតែការរាតត្បាតយ៉ាងធ្ងន់ធ្ងរពីវីរុស COVID-19។ ក្នុងរយៈពេលតែកន្លះខែ តួលេខអ្នកឆ្លងវីរុសនៅ តៃវ៉ាន់ បានកើនពីជាង 1,500 ឡើងដល់ជិត 9,000 នាក់។ តួលេខអ្នកឆ្លងសរុប និងអ្នកស្លាប់សរុប កើនជាបន្តបន្ទាប់គឺ ជាង 15,700 នាក់ និងជាង 790 នាក់ ច្រើនជាងឆ្ងាយធៀបនឹងតួលេខនៃការស្លាប់ 12 នាក់ ក្នុងអំឡុងមុនពេលការឆ្លងរាលដាលផ្ទុះឡើង។

ប៉ុន្តែ ស្ថានភាពនោះ ត្រូវបានកែលម្អឡើងវិញហើយ នាប៉ុន្មានថ្ងៃចុងក្រោយនេះ។ កាលពីថ្ងៃទី 17 ឧសភា ចំនួនអ្នកឆ្លងថ្មីនៅ តៃវ៉ាន់ គឺ 535 នាក់ ខណៈដែលមធ្យមភាគក្នុងអំឡុង 7 ថ្ងៃ នៃសប្ដាហ៍មុន មានមិនដល់ 20 ករណី។ ថ្ងៃទី 26 កក្កដា តៃវ៉ាន់ បានរាយការណ៍ថា អ្នកឆ្លងក្នុងសហគមន៍ មានតែ 10 នាក់ប៉ុណ្ណោះ។

យោងតាមការអធិប្បាយរបស់ Wayne Soon មកពីសារព័ត៌មាន Diplomat វីធីសាស្ត្រសំខាន់ដំបូងដែលជួយឱ្យ តៃវ៉ាន់ គ្រប់គ្រងបាននូវការឆ្លងរាលដាល នោះគឺ ការបង្កើនការអនុវត្តយុទ្ធសាស្ត្រដែលកោះនេះ បានធ្វើតាំងពីមុនមក រួមមាន ការពាក់ម៉ាស ការធ្វើចត្តាឡីស័ក និងការតាមរកអ្នកពាក់ព័ន្ធ។ តាំងពីខែមេសា ឆ្នាំ 2020 តៃវ៉ាន់ បានចាប់ផ្ដើមបង្គាប់ឱ្យពាក់ម៉ាសនៅលើមធ្យោបាយធ្វើដំណើរសាធារណៈ។ ក្រោយមក អាជ្ញាធរក៏ពង្រីកវិសាលភាពនៃការកំណត់ និងចេញបទបញ្ជាឱ្យពាក់ម៉ាស នៅពេលចេញពីផ្ទះ។

តៃវ៉ាន់ ក៏បន្ថែមមជ្ឈមណ្ឌលចត្តាឡីស័ក សម្រាប់អ្នកជំងឺ COVID-19 ក្នុងនោះមានទាំងសណ្ឋាគារ និងទីតាំងដែលគ្រប់គ្រងដោយរដ្ឋ។ ប្រការនេះ បានជួយកាត់បន្ថយការឆ្លងរាលដាលក្នុងគ្រួសារ និងសហគមន៍។

Wayne Soon វាយតម្លៃថា កត្តាសំខាន់ទីពីរ ដែលនាំមកនូវជោគជ័យឱ្យ តៃវ៉ាន់ នោះគឺ អាជ្ញាធរចេះស្ដាប់យោបល់ និងការប្ដូរផ្លាស់គោលនយោបាយ។ ដំបូងឡើយ ពួកគេរារែកក្នុងការហាមបរិយោគអាហារក្នុងភោជនីយដ្ឋាន ព្រោះតែវិធីសាស្ត្ររក្សាគម្លាតសង្គម និងការដំឡើងកញ្ចក់ការពារ ត្រូវបានគេវាយតម្លៃថាអាចទប់ស្កាត់ការឆ្លងរាលដាល។ ប៉ុន្តែ នៅចំពោះមុខការអំពាវនាវឱ្យមានការហាមធ្វើសកម្មភាពក្នុងផ្ទះ ក្នុងបន្ទប់បិទជិត អាជ្ញាធរមូលដ្ឋានជាច្រើន ក៏យល់ព្រមធ្វើតាម។

បច្ចុប្បន្ន អាជ្ញាធរតំបន់មួយចំនួន នៅតែរក្សាបម្រាមខាងលើ ព្រោះតែខ្លាចរងការរិះគន់ និងខ្លាចការផ្ទុះឆ្លងរាលដាលជាថ្មី បើទោះជាថ្មីៗនេះ តៃវ៉ាន់ បានដកវិធានការនេះរួចហើយ នៅពេលតួលេខនៃការឆ្លង បានថយចុះ។

កាលពីដើមខែមិថុនា ចំនួនពលរដ្ឋដែលបានទទួលការចាក់វ៉ាក់សាំង COVID-19 មានមិនដល់ 2% ផង នៅក្នុងចំណោមពលរដ្ឋសរុបជាង 23 លាននាក់ ដោយសារតែប្រភពផ្គត់ផ្គង់មានកំណត់ ហើយអាជ្ញាធរ តៃវ៉ាន់ នៅតែបែរខ្នងដាក់វ៉ាក់សាំងរបស់ ចិនដីគោក ដែលបានស្នើផ្ដល់ជំនួយ។

ប៉ុន្តែ ចុងក្រោយ បក្សប្រជាធិបតេយ្យជឿនលឿន ដែលកំពុងកាន់អំណាច ក៏បានគាំទ្រឱ្យទិញវ៉ាក់សាំងរបស់ Pfizer-BioNTech ពីប្រទេស អាល្លឺម៉ង់ តាមរយៈក្រុមហ៊ុនមួយនៅ ចិនដីគោក។

បណ្ដាញសារព័ត៌មាន ក៏ត្រូវបានគេមើលឃើញថា បានចូលរួមចំណែកក្នុងការទប់ស្កាត់ COVID-19 ដោយពួកគេប្រណាំងប្រជែងក្នុងការផ្ដល់ព័ត៌មានថ្មីៗបំផុតទាក់ទងនឹងបញ្ហា COVID-19 បើទោះជាវិធីផ្ដល់ព័តមានរបស់សារព័ត៌មានមួយចំនួនតូច បាននាំឱ្យប្រជាជនមានការព្រួយបារម្ភចំពោះការចាក់វ៉ាក់សាំង។

Wayne Soon បន្ថែមថា តៃវ៉ាន់ ក៏ទទួលបានផលប្រយោជន៍ពីទង្វើល្អរបស់ខ្លួន ដែលបានធ្វើកាលពីដំណាក់កាលដំបូងនៃវិបត្តិ COVID-19។ កាលពីឆ្នាំទៅ តៃវ៉ាន់ បានផ្ដល់ជំនួយជាម៉ាស ជាង 51 លានបន្ទះ ដល់ដៃគូជាច្រើនក្នុងពិភពលោក។

ជាលទ្ធផល បណ្ដាប្រទេសដែលទទួលបានជំនួយពី តៃវ៉ាន់ ក៏បានជួយជាវ៉ាក់សាំងដល់កោះនេះ។ ក្នុងរយៈពេល 2 ខែកន្លងទៅ ជប៉ុន បានផ្ដល់ជំនួយជាវ៉ាក់សាំង AstraZeneca ជាង 3.3 លានដូស ខណៈដែល សហរដ្ឋអាមេរិក ក៏បានផ្ដល់វ៉ាក់សាំង Moderna ចំនួន 2.5 លានដូស ដល់កោះនេះ។ ប្រទេស លីទុយអានី ស្លូវ៉ាគី និងសាធារណរដ្ឋឆែក ក៏បានសន្យាផ្ដល់វ៉ាក់សាំងរាប់ម៉ឺនដូស ដល់ តៃវ៉ាន់ផងដែរ។

ក្រោយទទួលបានជំនួយជាវ៉ាក់សាំង ពីកម្មវិធី COVAX របស់អង្គការសុខភាពពិភពលោក និង សហរដ្ឋអាមេរិក បច្ចុប្បន្ន តៃវ៉ាន់ បានចាក់យ៉ាងតិច 1 ដូស ដល់ប្រជាជនចំនួន 28% ច្រើនជាងឆ្ងាយ ធៀបនឹង 1% កាលពីមុនការផ្ទះឆ្លង។

ជោគជ័យរបស់ តៃវ៉ាន់ ទំនងជាមិនអាចគង់នៅបានយូរអង្វែងនោះទេ ដោយសារតែ COVID-19 ប្រភេទ Delta។ ក៏ប៉ុន្តែ បទពិសោធន៍របស់កោះនេះ ត្រូវបានគេវាយតម្លៃថា នឹងមានសមត្ថភាពគ្រប់គ្រាន់ អាចជួយឱ្យពួកគេគ្រប់គ្រងស្ថានការណ៍បានល្អ ទៅលើរលកនៃការឆ្លងរាលដាលនាពេលខាងមុខ៕

August 5, 2021

កម្ពុជា៖ ក្រុមហ៊ុនចំនួន 10 បានចុះបញ្ជីនាំចូលវ៉ាក់សាំង ខណៈអត្រាឆ្លង COVID-19 ជិត 4,700 នាក់/1 លាននាក់

ការចាក់វ៉ាក់សាំងសរុបទូទាំងប្រទេស ធៀបនឹងប្រជាជនសរុប 16 លាននាក់ បច្ចុប្បន្ន សម្រេចបាន 48.16% ហើយ ខណៈដែលក្រុមហ៊ុនជាច្រើន បាន និងកំពុងចុះបញ្ជិកា ដើម្បីនាំចូលវ៉ាក់សាំងបង្ការវីរុស COVID-19។

កំណើនអត្រានៃការចាក់វ៉ាក់សាំងបង្ការវីរុស COVID-19 នៅ កម្ពុជា គិតត្រឹមព្រឹកព្រលឹមថ្ងៃទី 05 ខែសីហា ឆ្នាំ 2021 រួមមាន៖ ពលរដ្ឋពេញវ័យជាគោលដៅ 10 លាននាក់ សម្រេចបាន 75.42% , កុមារ និងក្មេងជំទង់ វ័យចាប់ពី 12 ដល់ 17 ឆ្នាំ ជាគោលដៅជិត 2 លាននាក់ សម្រេចបាន 8.29%។ ចំណែកការចាក់វ៉ាក់សាំងសរុបទូទាំងប្រទេស ធៀបនឹងប្រជាជនសរុប 16 លាននាក់ បច្ចុប្បន្ន សម្រេចបាន 48.16%។

យោងតាមទំព័រ Worldometers អត្រានៃការឆ្លង COVID-19 នៅ កម្ពុជា បច្ចុប្បន្នស្មើនឹង 4,692 នាក់/1 លាននាក់។ រីឯអត្រានៃការស្លាប់ដោយសារ COVID-19 វិញ ស្មើនឹង 88 នាក់/1 លាននាក់។ អត្រានៃការធ្វើតេស្តរកវីរុស COVID-19 សម្រេចបាន 107,431លើក/1 លាននាក់។

ទាក់ទងនឹងបញ្ហាវ៉ាក់សាំងបង្ការ COVID-19 នេះដែរ លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់សារព័ត៌មានអន្តរជាតិ កាលពីថ្ងៃពុធកន្លងទៅនេះថា ក្រុមហ៊ុនប្រមាណជា 10 បានចុះបញ្ជី ដើម្បីនាំចូលវ៉ាក់សាំង COVID-19 មក កម្ពុជា។ លោកឧកញ៉ា រូបនេះ បន្ថែមថា បណ្ដាក្រុមហ៊ុនឯកជននៅ កម្ពុជា នឹងនាំចូលវ៉ាក់សាំងច្រើនប្រភេទ ក្នុងពេលឆាប់ៗនេះ ហើយវ៉ាក់សាំងទាំងនោះ នឹងអាចចាក់បានទៅលើកុមារចាប់ពីអាយុ 12 ឆ្នាំ ឡើងទៅ។

ការចុះបញ្ជិកាដើម្បីនាំចូលវ៉ាក់សាំងពីសំណាក់ក្រុមហ៊ុនឯកជនខាងលើនេះ ត្រូវបានធ្វើឡើងបន្ទាប់ពីក្រសួងសុខាភិបាល កាលពីថ្ងៃទី 27 ខែកក្កដា កន្លងទៅ បានអនុញ្ញាតឱ្យគ្រឹះស្ថានអាហរ័ណ នីហរ័ណឱសថ ដែលទទួលបានការអនុញ្ញាតពីក្រសួងសុខាភិបាល ធ្វើការស្នើសុំនាំចូលវ៉ាក់សាំង COVID-19 ទាំងឡាយណា ដែលបានទទួលស្គាល់ដោយអង្គការសុខភាពពិភពលោក (WHO)។

វ៉ាក់សាំងដែលនាំចូលដោយក្រុមហ៊ុនឯកជន អាចចែកចាយ និងចាក់តាមទីតាំងផ្ដល់សេវាសុខាភិបាលឯកជនស្របច្បាប់ក្នុងក្របខណ្ឌទូទាំងប្រទេស។ ប៉ុន្តែ ដំណើរការខាងលើនេះ ត្រូវតែធានាឱ្យបាននូវសុវត្ថិភាព និងប្រសិទ្ធភាពខ្ពស់៕

August 5, 2021

អត្តពលិកនៅអាស៊ីអាគ្នេយ៍ ទទួលបាន 1 លានដុល្លារអាមេរិក ក្រោយដណ្ដើមបានមេដាយមាសជាប្រវត្តិសាស្ត្រ

Hidilyn Diaz ត្រូវបានកត់ត្រាក្នុងប្រវត្តិសាស្ត្រនៃវិស័យកីឡារបស់ប្រទេស ហ្វីលីពីន ក្រោយពីបានជួយឱ្យប្រទេសនៅអាស៊ីអាគ្នេយ៍មួយនេះ ដណ្ដើមបានមេដាយមាសជាលើកដំបូង នៅក្នុងការប្រកួតកីឡាអូឡាំពិក។

Hidilyn Diaz បានក្លាយជានារីអត្តពលិកផ្នែកលើកទម្ងន់ក្នុងប្រវត្តិសាស្ត្ររបស់ ហ្វីលីពីន នៅពេលនាងដណ្ដើមបានមេដាយមាសក្នុងការប្រកួតលើកទម្ងន់ ប្រភេទ 55 គីឡូក្រាម។ នេះគឺជាមេដាយមាសដំបូងរបស់ក្រុមអត្តពលិក ហ្វីលីពីន នៅក្នុងការប្រកួតកីឡាអូឡាំពិកលើកនេះ។

បន្ទាប់ពីដណ្ដើមបានជ័យជំនះជូនប្រទេសជាតិ Hidilyn Diaz ទទួលបានការផ្ដល់រង្វាន់ដ៏ធំ នាំឱ្យនាងក្លាយជាសេដ្ឋិនីមួយរំពេច។ ជាក់ស្ដែង ក្រៅពីប្រាក់រង្វាន់គោលចំនួន 10 លានប៉េសូ (ស្មើនឹង 200,900 ដុល្លារអាមេរិក) សម្រាប់មេដាយមាសមួយគ្រឿង Hidilyn Diaz ក៏ទទួលបានប្រាក់រង្វាន់ចំនួនជាង 40 លានប៉េសូ (ស្មើនឹង 803,700 ដុល្លារអាមេរិក) ពីបណ្ដាក្រុមហ៊ុន និងក្រុមមន្ត្រី ហ្វីលីពីន ផងដែរ។ ទឹកប្រាក់សរុប ដែលនារីអត្តពលិករូបនេះទទួលបាន ស្មើនឹង 1,004,000 ដុល្លារអាមេរិក។

ក្រៅពីទឹកប្រាក់សុទ្ធ Diaz ក៏ទទួលបានផ្ទះល្វែងមួយខ្នងស្ថិតនៅក្នុងតំបន់លំដាប់ប្រណិតមួយកន្លែង ផ្ទះសម្រាប់លំហែកាយមួយខ្នងនៅភាគខាងត្បូងរដ្ឋធានី ម៉ានីល រថយន្តថ្មីមួយគ្រឿង រួមនឹងការចាក់សាំងដោយមិនគិតថ្លៃ ការធ្វើដំណើរតាមយន្តហោះពាណិជ្ជកម្មដោយមិនគិតថ្លៃពេញមួយជីវិតទៀតផង។

ទោះបីផ្ដល់រង្វាន់យ៉ាងច្រើនសន្ធឹកដល់អត្តពលិកដែលដណ្ដើមបានមេដាយមាស ប៉ុន្តែ ហ្វីលីពីន មិនមែនជាប្រទេសដែលផ្ដល់រង្វាន់ច្រើនជាងគេនោះទេ។ យោងតាម Forbes សិង្ហបុរី ទើបជាប្រទេសដែលផ្ដល់រង្វាន់គោលច្រើនជាងគេ ក្នុងនោះ រង្វាន់ 738,000 ដុល្លារអាមេរិក សម្រាប់អត្តពលិកដណ្ដើមបានមេដាយមាស, 370,500 ដុល្លារ សម្រាប់មេដាយប្រាក់ និង 185,300 ដុល្លារ សម្រាប់មេដាយសំរឹទ្ធ។

ឈរបន្ទាប់ពី សិង្ហបុរី គឺ តៃវ៉ាន់ ដោយផ្ដល់រង្វាន់សម្រាប់មេដាយមាស ចំនួន 716,000 ដុល្លារអាមេរិក រីឯលំដាប់ទីបីគឺ ប្រទេស ឥណ្ឌូនេស៊ីដោយផ្ដល់ 346,000 ដុល្លារអាមេរិក សម្រាប់មេដាយមាស៕

August 4, 2021

យានលក្ខណៈបុគ្គល ហោះហើរសំដែងដឹកមនុស្សលើកដំបូង នៅក្នុងពិព័រណ៍អាកាសចរណ៍ AirVenture

មធ្យោបាយហោះហើរដែលមានឈ្មោះថា BlackFly ធ្វើការហោះហើររយៈពេលខ្លី ទៅកាន់កម្ពស់ 21 ម៉ែត្រ និងក្នុងល្បឿន 56 គីឡូម៉ែត្រ/ម៉ោង នៅក្នុងព្រឹត្តិការណ៍ពិព័រណ៍អាកាសចរណ៍ នៅទីក្រុង Oshkosh សហរដ្ឋអាមេរិក។

Opener ដែលជាក្រុមហ៊ុនអភិវឌ្ឍមធ្យោបាយហោះហើរដំណើរការដោយថាមពលអគ្គិសនី មានទីស្នាក់ការកណ្ដាលនៅ សហរដ្ឋអាមេរិក សម្រេចបានគោលដៅថ្មី នៅក្នុងការហោះហើរសាកល្បងចុងក្រោយ។

Opener បានធ្វើការហោះហើរសំដែងដោយមានមនុស្សបើកជាសាធារណៈលើកដំបូង ជាមួយនឹងយានដែលអាចហោះឡើង និងចុះចតត្រង់ និងដំណើរការដោយថាមពលអគ្គិសនី ដែលមានឈ្មោះថា BlackFly។

ការហោះហើរខាងលើនេះ ត្រូវបានធ្វើឡើងនៅក្នុងព្រឹត្តិការណ៍ពិព័រណ៍ផ្នែកអាកាសចរណ៍ AirVenture របស់សមាគមយន្តហោះសាកល្បង ដែលមានឈ្មោះថា Experimental Aircraft Association (EAA) នៅទីក្រុង Oshkosh ក្នុងរដ្ឋ Wisconsin សហរដ្ឋអាមេរិក កាលពីថ្ងៃទី 26 ខែកក្កដា ដល់ថ្ងៃទី 01 ខែសីហា ឆ្នាំ 2021។

ក្នុងការសំដែងនេះ BlackFly ហោះហើរបានច្រើននារី ក្នុងល្បឿន 56 គីឡូម៉ែត្រ/ម៉ោង និងហោះឡើងដល់កម្ពស់ប្រមាណ 21 ម៉ែត្រ។

BlackFly គឺជាយានជំនិះលក្ខណៈបុគ្គលដែលមានទម្ងន់មហាស្រាល មានកៅអីតែមួយ មានស្លាបកង្ហារ 8 និងមិនតម្រូវឱ្យមានប័ណ្ណបើកបរនោះឡើយ។ វាអាចហោះហើរក្នុងរយៈចម្ងាយ 56 គីឡូម៉ែត្រ ជាមួយនឹងល្បឿនជាង 120 គីឡូម៉ែត្រ/ម៉ោង។

បណ្ដាកំណែរបស់ BlackFly ធ្លាប់បានហោះហើរក្នុងចម្ងាយផ្លូវសរុប ជាង 37,000 គីឡូម៉ែត្រ ដោយហោះហើរជាង 2,300 លើក៕

August 4, 2021

កម្ពុជា ប្រកាសមិនគិតថ្លៃលើការធ្វើតេស្តរហ័ស រក COVID-19 នៅតាមមន្ទីរពេទ្យរដ្ឋ

(ភ្នំពេញ)៖ «ប្រជាពលរដ្ឋដែលមកទទួលសេវាធ្វើតេស្ដរហ័ស រកវីរុស COVID-19 (Rapid Test) នៅតាមមូលដ្ឋានសុខាភិបាលសាធារណៈ នឹងមិនត្រូវបានគិតថ្លៃនោះឡើយ» នេះបើតាមលិខិតណែនាំរបស់ក្រសួងសុខាភិបាល ជូនដល់បណ្ដាអង្គភាព និងបុគ្គលិកសុខាភិបាលក្រោមឱវាទ។

លិខិតរបស់ក្រសួងសុខាភិបាល ដែលត្រូវបានប្រកាសនៅព្រឹកថ្ងៃទី 04 ខែសីហា ឆ្នាំ 2021 នេះ បានឱ្យដឹងទៀតថា ការសម្រេចខាងលើគឺ យោងទៅតាមអនុសាសន៍ដ៏ខ្ពង់ខ្ពស់បំផុតរបស់ ប្រមុខរដ្ឋាភិបាល កម្ពុជា នាឱកាសអញ្ជើញបើកយុទ្ធនាការចាក់វ៉ាក់សាំងបង្ការ COVID-19 ដល់កុមារ និងយុវវ័យដែលមានអាយុចាប់ពី 12 ដល់ 17 ឆ្នាំ កាលពីថ្ងៃទី 01 ខែសីហា ឆ្នាំ 2021។

ព័ត៌មានបន្ថែម សូមអានលិខិតណែនាំរបស់លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺ COVID-19៖

August 4, 2021

Bernard Arnault អ្នកមានជាងគេបំផុតក្នុងលោក៖ ក្ដោបក្ដាប់យីហោល្បីៗរាប់សិប ខណៈទ្រព្យច្រើនជាងជិតទ្វេដង ធៀបនឹង Warren Buffett

ក្រុមហ៊ុន LVMH របស់កំពូលមហាសេដ្ឋី Bernard Arnault កំពុងគ្រប់គ្រងយីហោចំនួន 75 ក្នុងនោះមាន Louis Vuitton, Christian Dior, TAG Heuer, Hublot, Bvlgari និង Tiffany ។ល។

រំលឹកដល់ Bernard Arnault ដែលជាប្រធាន និងជា CEO របស់ក្រុមហ៊ុន LVMH មនុស្សជាច្រើននឹងគិតដល់ភ្លាម អំពីរូបភាពអ្នកជំនួញដែលមានមហិច្ឆតាខ្ពស់ និងខ្លាំងក្លារបស់ប្រទេសបារាំង។ Bernard Arnault តែងតែស្វែងរកស្ទើរគ្រប់មធ្យោបាយដើម្បីសម្រេចបានគោលដៅ និងមិនខ្លាចក្នុងការបញ្ឈប់បុគ្គលិកជាន់ខ្ពស់របស់ខ្លួន។ លោក Bernard Arnault ក៏ល្បីឈ្មោះថាជា កំពូលអ្នកដើរទិញក្រុមហ៊ុនម៉ូដែលល្បីៗផងដែរ។

Bernard Arnault កើតឆ្នាំ 1949 នៅទីក្រុង Roubaix ប្រទេសបារាំង។ ឪពុករបស់លោកគឺជាអ្នកជំនួញ ហើយតាំងពីតូច Bernard Arnault ចូលចិត្តកិច្ចការធ្វើជំនួញខ្លាំងណាស់។

ក្រោយពីបានបញ្ចប់ការសិក្សានៅសាលា Ecole Polytechnique នៃប្រទេសបារាំង កាលពីឆ្នាំ 1971 លោក Bernard បានទៅតាមឪពុកដើម្បីគ្រប់គ្រងក្រុមហ៊ុនសំណង់ស៊ីវិលរបស់គ្រួសារ នៅក្នុងវ័យ 25 ឆ្នាំ។ ក្នុងរយៈពេលខ្លី Bernard បានជួយធ្វើឱ្យក្រុមហ៊ុនរីកចម្រើនយ៉ាងខ្លាំង។ ប៉ុន្តែក្រោយមក លោកក៏បានបញ្ចុះបញ្ចូលឪពុក ក្នុងការលក់ក្រុមហ៊ុននេះ ហើយផ្ដោតទៅលើតែអចលនទ្រព្យ។

ឆ្នាំ 1984 នៅពេលរដ្ឋាភិបាលបារាំង ស្វែងរកអ្នកទិញក្រុមហ៊ុន Boussac (ក្រុមហ៊ុនផលិតខោទឹកនោមក្រដាស និងតម្បាញដែលក្ស័យធន) លោក Bernard ក៏សម្រេចចិត្តទិញភ្លាម ដោយមើលឃើញថា វាជាឱកាសមាស។ Boussac មិនមានតម្លៃប៉ុន្មាននោះទេ ប៉ុន្តែ ប្រការដែលលោក Bernard ចង់បាន នោះគឺក្រុមហ៊ុនច្នៃម៉ូដសម្លៀកបំពាក់ និងគ្រឿងអលង្ការ Christian Dior ដែល Boussac មានភាគហ៊ុននៅក្នុងនោះ។

Bernard ចំណាយប្រាក់ 15 លានដុល្លារអាមេរិក ដើម្បីទិញយកក្រុមហ៊ុនខាងលើ ហើយក៏បញ្ចុះបញ្ចូលក្រុមហ៊ុនហិរញ្ញវត្ថុរបស់ បារាំង Lazard Freres ដើម្បីបានខ្ចីប្រាក់បន្ថែម 80 លានដុល្លារទៀត សម្រាប់ទិញ Boussac និងបង្វែរក្រុមហ៊ុននេះទៅរកមុខជំនួញលំដាប់ប្រណិត។

ក្រោយមក លោកក៏បានប្រើប្រាស់លុយ 400 លានដុល្លារ ដែលបានមកពីការលក់ទ្រព្យរបស់ Boussac រួមនឹងទុនដែលបានមកពី Lazard ដើម្បីអនុវត្តជំហានបន្ទាប់ នោះគឺ ការច្បាមយកមូលបត្ររបស់ LVMH។ Bernard ទិញក្រុមហ៊ុននេះបានដោយជោគជ័យកាលពីឆ្នាំ 1990 ក្នុងគ្រាដែលផ្ទៃក្នុងរបស់ក្រុមហ៊ុននេះ កំពុងបែកបាក់។

ម្ចាស់ក្រុមហ៊ុន LVMH លោក Bernard Arnault និងភរិយា Helene (ស្ដាំ) កាលពីដើមឆ្នាំ 2021

ក្រោយទិញបាន លោក Bernard ក៏បានប្រែក្លាយ LVMH ទៅជាយីហោប្រណិត ដោយផលិតផលរបស់ក្រុមហ៊ុន ប្រកប់ដោយភាពច្នៃប្រឌិតខ្ពស់ជាងមុន និងខុសពីរូបភាព «ចាស់ជរា» កាលពី 20 ឆ្នាំមុន។

ក្នុងអំឡុងទសវត្សរ៍ឆ្នាំ 1990 លោក Bernard បានចំណាយប្រាក់រាប់ពាន់លានដុល្លារ ដើម្បីប្រមូលទិញយីហោសម្លៀកបំពាក់លំដាប់ប្រណិតៗ ដូចជា Fendi, Kenzo និង Thomas Pink, បណ្ដាក្រុមហ៊ុនផលិតនាឡិកា និងគ្រឿងអលង្ការ Chaumet, Zenith និង TAG Heuer រួមនឹងបណ្ដាញលក់រាយ ដូចជា DFS និង Sephora ។ល។

មកដល់បច្ចុប្បន្ន LVMH របស់កំពូលមហាសេដ្ឋី Bernard Arnault បានក្លាយជាក្រុមហ៊ុនលេខ 1 ក្នុងពិភពលោក ដែលផ្គត់ផ្គង់ទំនិញប្រណិត តម្លៃថ្លៃ ដោយមានយីហោចំនួន 75 ដែលប្រតិបត្តិការនៅក្នុងវិស័យភេសជ្ជៈមានអាល់កុល គ្រឿងសម្អាង គ្រឿងក្រអូប សម្លៀកបំពាក់ នាឡិកា គ្រឿងអលង្ការ រួមនឹងវិស័យលក់រាយមួយចំនួន។ល។

ទ្រព្យសម្បត្តិរបស់លោក Bernard Arnault កើនឡើងយ៉ាងឆាប់រហ័ស បើទោះ COVID-19 រាតត្បាតពេញពិភពលោក

យោងតាមស្ថិតិរបស់ Forbes ម្ចាស់ក្រុមហ៊ុន LVMH កំពុងក្ដោបក្ដាប់ទ្រព្យសម្បត្តិចំនួន 199.1 ពាន់លានដុល្លារ និងជាអ្នកមានជាងគេបង្អស់ក្នុងពិភពលោក។ ចំណែកមហាសេដ្ឋី Jeff Bezos ដែលជាស្ថាបនិករបស់ក្រុមហ៊ុន Amazon បានធ្លាក់មកនៅលេខ 2 ជាមួយនឹងទ្រព្យ 194.6 ពាន់លានដុល្លារ។

ក្នុងបញ្ជីចំណាត់ថ្នាក់មហាសេដ្ឋីពិភពលោក ដែលត្រូវបាន Forbes ចេញផ្សាយកាលពីខែមេសា ឆ្នាំ 2020 ទ្រព្យរបស់លោក Bernard មានត្រឹមតែ 76 ពាន់លានដុល្លារអាមេរិកប៉ុណ្ណោះ។ ដូច្នេះ ក្រោយរយៈពេលជាងមួយឆ្នាំ ទ្រព្យរបស់មហាសេដ្ឋីជនជាតិបារាំងរូបនេះ បានកើនបន្ថែម 123 ពាន់លានដុល្លារ។ ទ្រព្យសម្បត្តិរបស់លោក Bernard ច្រើនជាងជិតទ្វេដង បើធៀបនឹងទ្រព្យរបស់មហាសេដ្ឋីអាមេរិក Warren Buffett ដែលមាន 101.8 ពាន់លានដុល្លារ។ ទ្រព្យរបស់លោក Bernard និងគ្រួសារ គឺបានមកពីភាគហ៊ុននៅក្នុងក្រុមហ៊ុន LVMH។

ក្នុងពាក់កណ្ដាលដើមឆ្នាំ 2021 LVMH រកបានចំណូល 33.9 ពាន់លានដុល្លារ កើន 56% ធៀបនឹងដំណាក់កាលដូចគ្នាកាលពីឆ្នាំ 2020។ កំណើននៃប្រាក់ចំណូលនេះ ភាគច្រើនបានមកពីផលិតផលសម្លៀកបំពាក់ និងផលិតផលធ្វើអំពីស្បែកសត្វ។

ថ្មីៗនេះ LVMH ក៏បានប្រកាសអំពីការទិញភាគហ៊ុនចំនួន 60% របស់ Off-White ដែលត្រូវបានបង្កើតឡើងដោយ Virgil Abloh។ Virgil Abloh គឺជាអ្នកទទួលខុសត្រូវក្នុងការរចនាម៉ូដសម្លៀកបំពាក់បុរសប្រចាំក្រុមហ៊ុន Louis Vuitton៕

August 4, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 04 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 583 នាក់, អ្នកជាចំនួន 658 នាក់ និងអ្នកស្លាប់ចំនួន 17 នាក់បន្ថែមទៀត នៅក្នុងថ្ងៃទី 03 ខែសីហា ឆ្នាំ 2021។

គិតត្រឹមព្រឹកថ្ងៃទី 04 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 79,634 នាក់ ក្នុងនោះមានអ្នកជាសះស្បើយជាង 72,803 នាក់ និង អ្នកស្លាប់ 1,488 នាក់។ ក្នុងចំណោមអ្នកវិជ្ជមាននឹង COVID-19 សរុប ក៏មាន 260 នាក់ វិជ្ជមាននឹងវ៉ារ្យ៉ង់ Delta ផងដែរ ក្នុងនោះមាន 36 ករណី ត្រូវបានរកឃើញក្នុងថ្ងៃទី 03 សីហា។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 200,280,632 នាក់ ត្រូវបានរកឃើញ ក្នុងនោះមានជាង 180,544,399 នាក់បានជា, 4,258,927 នាក់បានស្លាប់ និងជាង 15,477,306 នាក់ កំពុងព្យាបាល៕

August 4, 2021

Author: សឿន សំណាង