សឿន សំណាង - La Reine Media

ទ័ពថ្មើរជើង ឥណ្ឌូនេស៊ី លុបចោលការធ្វើតេស្តព្រហ្មចារី

មេបញ្ជាការកងទ័ព ឥណ្ឌូនេស៊ី បានប្រកាសថា ការពិនិត្យព្រហ្មចារីចំពោះនារីជាទាហានថ្មី នឹងត្រូវបានលុបចោល បន្ទាប់ពីវាបានបង្កឱ្យមានភាពចម្រូងចម្រាស ទាក់ទិននឹងសិទ្ធិមនុស្ស។

ការធ្វើតេស្តព្រហ្មចារី នៅប្រទេស ឥណ្ឌូនេស៊ី តែងត្រូវបានគេហៅថា «ការពិនិត្យដោយម្រាមដៃពីរ» ដោយសារថា នៅក្នុងការធ្វើតេស្តនោះ ក្រុមវេជ្ជបណ្ឌិត នឹងប្រើម្រាមដៃចំនួនពីរ លូកចូលក្នុងប្រដាប់បន្តពូជរបស់នារីជាបេក្ខភាពទាហានថ្មី ដើម្បីពិនិត្យមើលឱ្យដឹងថា តើនៅមានព្រហ្មចារី ឬអត់។ បេក្ខនារីដែលត្រូវបានគេយល់ថា «អស់ព្រហ្មចារី» នឹងត្រូវបានគេឱ្យធ្លាក់ពីការប្រលង។ គូដណ្ដឹងស្រីរបស់ទាហាននៃប្រទេសនេះ ជួនកាលក៏ត្រូវឆ្លងកាត់ការធ្វើតេស្តនេះដែរ។

មេបញ្ជាការកងទ័ពជើងគោក ឥណ្ឌូនេស៊ី ឧត្ដមសេនីយ៍ Andika Perkasa កាលពីម្សិលមិញ បានប្រកាសថា ការធ្វើតេស្តបែបនេះនឹងលែងត្រូវបានអនុវត្តទៀតហើយ នៅក្នុងជួរកងទ័ពជើងគោក។ កាលពីខែមុន លោក Andika Perkasa ក៏ធ្លាប់បានសង្កត់ធ្ងន់ថា ដំណើរការនៃការជ្រើសរើសទាហានថ្មីទាំងពីរភេទ ត្រូវតែមានភាពស្មើគ្នា។ ចំណែកអ្នកនាំពាក្យរបស់កងទ័ពជើងទឹក និងកងទ័ពអាកាស របស់ ឥណ្ឌូនេស៊ី ក៏បាននិយាយថា ស្ថាប័នរបស់ពួកគេ ពុំមានការធ្វើតេស្តព្រហ្មចារីនោះទេ។

កន្លងមក ការធ្វើតេស្តនេះ បានបណ្ដាលឱ្យមានបញ្ហាជជែកវែកញែកជាច្រើន។ WHO ធ្លាប់បាននិយាយថា វា «ពុំមានតម្លៃផ្នែកវិទ្យាសាស្ត្រ» និងវាជារឿង «រំលោភសិទ្ធិមនុស្ស»។ អង្គការតាមដានសិទ្ធិមនុស្ស (Human Right Watch / HRW) បានឱ្យដឹងថា សកម្មភាពនេះគឺ ប្រហាក់ប្រហែលនឹង «អំពើហិង្សាលើមូលដ្ឋានភេទ»។ ក្រុមការពារសិទ្ធិមនុស្ស បានអបអរចំពោះការប្រកាសរបស់កងទ័ពជើងគោក។ Andreas Harsono មកពី HRW បានហៅការសម្រេចខាងលើនេះថាជា «ប្រការត្រឹមត្រូវដែលត្រូវធ្វើ»៕

August 12, 2021

កម្ពុជា រកបានវ៉ាក់សាំង 20 លានដូសរួចហើយ ខណៈ 3 លានដូស នឹងដឹកមកដល់ កម្ពុជា នៅព្រឹកនេះ

(ភ្នំពេញ)៖ វ៉ាក់សាំងបង្ការ COVID-19 របស់ក្រុមហ៊ុន Sinovac ចំនួន 3 លានដូសបន្ថែមទៀត ដែល កម្ពុជា បានបញ្ជាទិញពីប្រទេសចិន នឹងដឹកមកដល់ កម្ពុជា នៅព្រឹកថ្ងៃទី 12 សីហា 2021។ នេះបើតាម លោកស្រី យក់ សម្បត្តិ រដ្ឋលេខាធិការក្រសួងសុខាភិបាល។

បច្ចុប្បន្ន កម្ពុជា បាន និងកំពុងប្រើប្រាស់វ៉ាក់សាំងបង្ការ COVID-19 4 ប្រភេទ និងមានចំនួនប្រមាណ 20 លានដូស ក្នុងនោះរួមមាន វ៉ាក់សាំង Sinopharm (ចិន), Sinovac (ចិន), AstraZeneca (អង់គ្លេស) និងវ៉ាក់សាំង Johnson & Johnson (សហរដ្ឋអាមេរិក)។ វ៉ាក់សាំងទាំងនេះ មួយចំនួនជាជំនួយទ្វេភាគី មួយចំនួនជាជំនួយតាមរយៈយន្តការ COVAX និងមួយផ្នែកទៀតគឺជាការបញ្ជាទិញរបស់ កម្ពុជា។

ការចាក់វ៉ាក់សាំងនៅកម្ពុជា គិតត្រឹមព្រឹកព្រលឹមថ្ងៃទី 12 ខែសីហា ឆ្នាំ 2021 នេះ រួមមាន៖ អាយុ 18 ឆ្នាំឡើងទៅ (ពលរដ្ឋគោលដៅ 10 លាននាក់) ចាក់បាន 81.16% ចំណែកពលរដ្ឋ អាយុ 12-17 ឆ្នាំ (ពលរដ្ឋគោលដៅ ជិត 2 លាននាក់) ចាក់បាន 20.52%។ ជាសរុប ការចាក់វ៉ាក់សាំងជូនពលរដ្ឋគោលដៅ 16 លាននាក់ នៅទូទាំងប្រទេស សម្រេចបាន 53.25%។

ជាងនេះ បច្ចុប្បន្ន កម្ពុជា ក៏បានចាប់ផ្ដើមយុទ្ធនាការចាក់វ៉ាក់សាំងដូសជំរុញ ឬដូសទី 3 ជូនក្រុមការងារនៅជួរមុខ និងក្រុមពលរដ្ឋអាទិភាពតាមក្រសួងស្ថាប័ននានាផងដែរ៕

August 12, 2021

COVID-19 ប្រភេទ Delta ឆ្លងលឿន និងសាហាវកម្រិតណា បានជាគ្រប់គ្នាភ័យខ្លាច?

វ៉ារ្យ៉ង់ Delta នៃវីរុស COVID-19 ឆ្លងរាលដាលលឿនជាង ហើយកំហាប់ ឬបរិមាណរបស់វីរុសនៅក្នុងបំពង់ក និងមាត់របស់អ្នកជំងឺ មានកម្រិតខ្ពស់ជាង បើធៀបនឹង COVID-19 ប្រភេទដំបូង ដូច្នេះ មានន័យថា គោលការណ៍សុវត្ថិភាពមុននេះ លែងសមស្របទៀតហើយ។

យោងតាមការសិក្សាស្រាវជ្រាវនានា កាលពីដំបូង វីរុស COVID-19 ត្រូវការប្រហែល 15 នាទី ដើម្បីឆ្លងពីមនុស្សម្នាក់ ទៅមនុស្សម្នាក់ នៅពេលមនុស្សនៅក្បែរគ្នា។ បច្ចុប្បន្ន រយៈពេលនេះត្រូវបានកាត់បន្ថយយ៉ាងច្រើន ធ្វើឱ្យមនុស្សមានការភ័យខ្លាច។

វ៉ារ្យ៉ង់ Delta កំពុងតែនាំឱ្យក្រុមមន្ត្រីសុខាភិបាលសាធារណៈ ត្រូវធ្វើការប្ដូរផ្លាស់លើការណែនាំស្ដីពីសុវត្ថិភាព។ មជ្ឈមណ្ឌលគ្រប់គ្រង និងទប់ស្កាត់ជំងឺឆ្លងរបស់ សហរដ្ឋអាមេរិក (CDC) កាលពីចុងខែកក្កដា បានឱ្យដឹងថា អ្នកដែលបានចាក់វ៉ាក់សាំងរួចរាល់ គួរតែបន្តពាក់ម៉ាស នៅទីដែលបិទជិត ក្នុងតំបន់ដែលមានអត្រានៃការឆ្លងរាលដាលខ្ពស់។

ប្រធាន CDC អាមេរិក លោកស្រី Rochelle Walensky និយាយថា Delta អាចឆ្លងទៅអ្នកដែលបានចាក់វ៉ាក់សាំងរួចរាល់ ហើយវាមិនមានរោគសញ្ញានោះទេ បើទោះវីរុសមានបរិមាណច្រើន ប្រហាក់ប្រហែលនឹងអ្នកមិនទាន់បានចាក់វ៉ាក់សាំង។

ក្រុមអ្នកជំនាញបានគណនាឃើញថា Delta មានលទ្ធភាពឆ្លងរាលដាលខ្ពស់ជាងប្រហែល 50% ធៀបនឹង Alpha។ ចំណែក Alpha ក៏មានសមត្ថភាពឆ្លងខ្ពស់ជាង COVID-19 ដែលរកឃើញដំបូងនៅ Wuhan ប្រហែល 50%។

Delta ធ្វើឱ្យមនុស្សកាន់តែភ័យខ្លាចអំពីការស្លាប់

ក្នុងការស្រាវជ្រាវកាលពីដើមខែកក្កដា ក្រុមអ្នកវិទ្យាសាស្ត្រចិន បានរកឃើញថា អ្នកដែលវិជ្ជមាននឹង Delta មានផ្ទុកវីរុសក្នុងផ្លូវដង្ហើមច្រើនជាង 1,000 ដង ធៀបនឹង COVID-19 ដំបូង។ សាស្ត្រាចារ្យនៅមហាវិទ្យាល័យរដ្ឋ Colorado ក្នុងក្រុង Fort Collins សហរដ្ឋអាមេរិក បានអះអាងថា៖ «Delta ជ្រែកចូលកោសិកានៃរាងកាយមនុស្សបានងាយជាង» វីរុសដំបូង។

បច្ចុប្បន្ន អ្នកវិទ្យាសាស្ត្រមិនទាន់គណនាដឹងបានអំពីបរិមាណជាក់លាក់នៃវីរុស Delta ដែលបញ្ចេញពីបំពង់ករបស់អ្នកជំងឺនៅឡើយ។ ប៉ុន្តែ កំហាប់វីរុស Delta ដែលមានកម្រិតខ្ពស់បែបនេះ មានន័យថា អ្នកជំងឺក៏បញ្ចេញវីរុសមកក្រៅបានច្រើនជាង COVID-19 ដំបូងផងដែរ។ នេះបើតាមសាស្ត្រាចារ្យ Linsey Marr នៃសាលា Virginia Tech។

យោងតាមសហគមន៍អ្នកវេជ្ជសាស្ត្រ ការចាក់វ៉ាក់សាំងគឺជាវីធីល្អបំផុតដើម្បីកាត់បន្ថយការឆ្លងរាលដាលនៃវីរុស។ ប៉ុន្តែ វ៉ាក់សាំងនឹងមានប្រសិទ្ធភាពទាប នៅពេលប្រឈមនឹងវ៉ារ្យ៉ង់ Delta។ យ៉ាងនេះក្ដី វ៉ាក់សាំងនៅតែអាចការពារមិនឱ្យជំងឺវីវឌ្ឍទៅជាធ្ងន់ធ្ងរ រហូតដល់ស្លាប់។

វេជ្ជបណ្ឌិត Marr និយាយថា Delta មានលទ្ធភាពគ្រប់គ្រាន់ក្នុងការឆ្លងទៅកាន់មនុស្សដែលមិនទាន់បានចាក់វ៉ាក់សាំង នៅពេលនៅក្បែរអ្នកវិជ្ជមានក្នុងរយៈពេលខ្លី ដូចជា 1 នាទីនៅក្នុងជណ្ដើរប្រអប់ជាដើម។

«ដើមឡើយ អ្នកត្រូវនៅក្នុងបន្ទប់បិទជិតជាមួយអ្នកជំងឺរហូតដល់ 15 នាទី ទើបអាចឆ្លងវីរុស។ ប៉ុន្តេ បច្ចុប្បន្ន ល្បឿននេះលឿនជាងមុន 1,000 ដង។ 15 នាទី មកនៅត្រឹមប៉ុន្មានវិនាទីប៉ុណ្ណោះ» នេះបើតាមវេជ្ជបណ្ឌិត Marr៕

August 11, 2021

អាជ្ញាធរចិន ចាប់ខ្លួនប្រធានទំនាក់ទំនងសាធារណៈរបស់បណ្ដាញសង្គម Weibo

ប្រធានទំនាក់ទំនងសាធារណៈរបស់ Weibo ដែលជាបណ្ដាញសង្គមធំជាងគេនៅប្រទេសចិន ត្រូវបានចាប់ខ្លួន ព្រោះតែជាប់សង្ស័យថា បានប្រព្រឹត្តអំពើពុករលួយ។

Weibo ដែលជាបណ្ដាញសង្គមមានអ្នកប្រើប្រាស់ច្រើនជាងគេបង្អស់នៅប្រទេសចិន គឺជាកម្មសិទ្ធិរបស់ក្រុមហ៊ុន Sina Corporation។ កាលពីថ្ងៃទី 10 សីហា បណ្ដាញសង្គមនេះបានប្រកាសថា លោក Mao Taotao ដែលជាប្រធានផ្នែកទំនាក់ទំនងសាធារណៈរបស់ Weibo ត្រូវបានអាជ្ញាធរចាប់ខ្លួន ព្រោះតែជាប់សង្ស័យថា បានប្រព្រឹត្តអំពើសូកប៉ាន់ បង្ក «ផលប៉ះពាល់ធ្ងន់ធ្ងរដល់កេរ្តិ៍ឈ្មោះរបស់ក្រុមហ៊ុន»។

ប្រកាសរបស់ Weibo មានឃ្លាសរសេរថា៖ «យោងតាមគោលការណ៍របស់ក្រុមហ៊ុន និងច្បាប់រដ្ឋ យើងសម្រេចដកតំណែង Mao ហើយនឹងមិនរើសយកគាត់មកធ្វើការទៀតទេ»។

លោក Mao បានចូលធ្វើការនៅក្នុងក្រុមហ៊ុន Weibo កាលពីឆ្នាំ 2010 ហើយក៏ទទួលបានជោគជ័យយ៉ាងឆាប់រហ័សនៅក្នុងគណៈកម្មការទីផ្សារ និងផ្សព្វផ្សាយ។ Weibo មិនបានឆ្លើយតបនឹងសំណួររបស់ក្រុមអ្នកយកព័ត៌មាន ខណៈ Mao ក៏ទាក់ទងមិនទាន់បាន។

ចំនួនក្រុមហ៊ុនបច្ចេកវិទ្យាចិន ដែលបានជាប់ក្នុងការស៊ើបអង្កេតទាក់ទិននឹងបញ្ហាពុករលួយ បានកើនឡើងទ្វេដងក្នុងរយៈពេលច្រើនឆ្នាំចុងក្រោយនេះ ក្នុងគ្រាយុទ្ធនាការប្រឆាំងអំពើពុករលួយដែលត្រូវបានផ្ដួចផ្ដើមដោយប្រធានាធិបតី ស៊ី ជីនពីង ត្រូវបានជំរុញយ៉ាងខ្លាំងក្លា។

កាលពីដើមឆ្នាំ 2020 អតីតអនុប្រធានក្រុមហ៊ុន Kuaishou ក៏ត្រូវបានចាប់ខ្លួនពីបទពុករលួយ ខណៈដែល Tencent Holdings បានឱ្យដឹងដែរថា ម្នាក់ក្នុងចំណោមនាយកប្រតិបត្តិរបស់ខ្លួន ក៏កំពុងត្រូវបានអាជ្ញាធរស៊ើបអង្កេត ដោយត្រូវសង្ស័យថា ជាប់ទាក់ទងនឹង «អំពើពុករលួយលក្ខណៈឯកជន»៕

August 11, 2021

ជូនសែកដល់ពិធីការិនីម្នាក់ តែត្រូវនាងបដិសេធ៖ មហាសេដ្ឋី Bill Gates ក៏ផ្ដល់មេរៀនយ៉ាងធំមួយដល់នាង

មហាសេដ្ឋីជនជាតិអាមេរិក លោក Bill Gates បានជូនមេរៀនមួយដែលមិនអាចបំភ្លេចបាន ដល់ពិធីការិនីស្រស់ស្អាតមួយរូប ដែលបានបដិសេធមូលប្បទានប័ត្ររបស់លោក។

នៅពេលអ្នកជោគជ័យ អ្នកតែងស្ថិតនៅក្នុងចំណោមមហាសេដ្ឋីដែលត្រូវបានគេរំលឹក និងសួរនាំអំពីវិធីសាស្ត្រដើម្បីឆ្ពោះទៅរកភាពជោគជ័យ ហើយ មហាសេដ្ឋី Bill Gates ក៏ដូច្នេះដែរ។ មួយក្នុងចំណោមរឿងរ៉ាវរបស់លោក Bill Gates ដែលត្រូវបានគេយកមកនិយាយច្រើនជាងគេបំផុតក្នុងរយៈពេលច្រើនឆ្នាំមកនេះ នោះគឺរឿងទាក់ទងនឹងពិធីការិនីទូរទស្សន៍ដ៏ស្រស់ស្អាតមួយរូប និងមូលប្បទានប័ត្រមួយសន្លឹក។

រឿងរ៉ាវនេះបានកើតឡើងនៅក្នុងកិច្ចសម្ភាសមួយ របស់ពិធីការិនី (MC) មួយរូប ជាមួយនឹងមហាសេដ្ឋី Bill Gates។ ស្រីស្អាតជា MC នេះ បានសួរទៅលោក Gates ថា៖ «អ្វីទៅជាគន្លឹះសំខាន់ដែលនាំឱ្យលោកជោគជ័យ?»។

ជំនួសឱ្យការឆ្លើយត្រង់ទៅនឹងសំនួរ ម្ចាស់ក្រុមហ៊ុន Microsoft ក៏បានហូតមូលប្បទានប័ត្រមួយសន្លឹកចេញ រួចចុះហត្ថលេខា ហើយហុចឱ្យស្រីស្អាតរូបនេះ ដោយប្រាប់ឱ្យនាងបន្ថែមចំនួនទឹកប្រាក់ទៅតាមចិត្តរបស់នាង។ នៅចំពោះមុខសកម្មភាពបែបនេះរបស់មហាសេដ្ឋី Bill Gates នាង MC ក៏បានបដិសេធ រួចក៏សួរសំនួរនេះជាថ្មី។

មហាសេដ្ឋី Bill Gates នៅក្នុងកិច្ចសម្ភាសមួយជាមួយពិធីការិនីដ៏ស្រស់ស្អាត

មហាសេដ្ឋីកើតឆ្នាំ 1955 រូបនេះ នៅតែធ្វើដូចអំបាញ់មិញ ដោយហុចសន្លឹកសែកនោះឱ្យទៅនាងម្ដងទៀត តែនាងនៅតែបដិសេធដដែល។ ចុងក្រោយ លោក Gates ក៏បានហែកសែកមួយសន្លឹកនោះចោល ហើយឆ្លើយថា៖ «គន្លឹះជោគជ័យរបស់ខ្ញុំគឺ មិនបោះបង់ចោលឱកាសដែលខ្ញុំមាន មិនដូចអ្វីដែលនាងទើបតែបានធ្វើសោះឡើយ។ នាងគួរណាស់តែបានក្លាយជាពិធីការិនីដែលមានប្រាក់ច្រើនជាងគេក្នុងពិភពលោក»។

តាមរយៈរឿងនេះ យើងដឹងច្បាស់ថា ឱកាសមិនចេះតែកើតឡើងគ្រប់ពេលនោះទេ ដូច្នេះ ត្រូវតែចាប់យកវាឱ្យបានលឿនបំផុត នៅពេលវាបានមកក្បែរយើង៕

August 11, 2021

គណៈកម្មការចំពោះកិច្ចចាក់វ៉ាក់សាំង COVID-19 (គ.វ.ក-១៩) ប្រកាសអំពីកម្មវិធីបន្ថែម ទាក់ទងនឹងការចាក់វ៉ាក់សាំង «ដូសជំរុញ ឬ ដូសទី 3»

គណៈកម្មការចំពោះកិច្ចចាក់វ៉ាក់សាំង COVID-19 ក្នុងក្របខណ្ឌទូទាំងប្រទេស (គ.វ.ក-១៩) ឱ្យដឹងថា ការចាក់វ៉ាក់សាំងបង្ការ COVID-19 ដូសទី 3 ឬ ដូសជំរុញ បន្តធ្វើឡើង ជូនដល់មន្ត្រី និងបុគ្គលិកជួរមុខ នៅក្នុងខេត្តដែលជាប់នឹងប្រទេសថៃ រួមនឹងនៅរាជធានីភ្នំពេញ។

ក្នុងសេចក្ដីជូនដំណឹងថ្មីនេះ គ.វ.ក-១៩ បញ្ជាក់ថា ក្រុមអាទិភាពដែលនឹងទទួលបានការចាក់វ៉ាក់សាំង AstraZeneca ដូសជំរុញ/ទី3 នេះ រួមមាន មន្ត្រីរាជការស៊ីវិល និងនគរបាលថ្នាក់ជាតិ, មន្ត្រីរាជការថ្នាក់ក្រោមជាតិនៃខេត្តចំនួន 17 និងអ្នកសារព័ត៌មាននៅភ្នំពេញផងដែរ។

ចំពោះលក្ខខណ្ឌក្នុងការចាក់វ៉ាក់សាំងដូសជំរុញ ឬ ដូសទី 3 នេះ សូមអានសេចក្ដីជូនដំណឹងខាងក្រោម៖
ការចាក់វ៉ាក់សាំងនៅកម្ពុជា គិតត្រឹមព្រឹកព្រលឹមថ្ងៃទី 11 ខែសីហា ឆ្នាំ 2021 នេះ រួមមាន៖ អាយុ 18 ឆ្នាំឡើងទៅ (ពលរដ្ឋគោលដៅ 10 លាននាក់) ចាក់បាន 80.38% ចំណែកពលរដ្ឋ អាយុ 12-17 ឆ្នាំ (ពលរដ្ឋគោលដៅ ជិត 2 លាននាក់) ចាក់បាន 18.26%។ ជាសរុប ការចាក់វ៉ាក់សាំងជូនពលរដ្ឋគោលដៅ 16 លាននាក់ នៅទូទាំងប្រទេស សម្រេចបាន 52.48%៕

August 11, 2021

តួលេខសង្ខេបនៃ COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 11 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 486 នាក់, អ្នកជាចំនួន 717 នាក់ និងអ្នកស្លាប់ចំនួន 12 នាក់បន្ថែមទៀត នៅក្នុងថ្ងៃទី 10 ខែសីហា ឆ្នាំ 2021។

គិតត្រឹមព្រឹកថ្ងៃទី 11 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 83,384 នាក់ ក្នុងនោះមានអ្នកជាសះស្បើយជាង 77,750 នាក់ និងអ្នកស្លាប់ 1,614 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 204,795,680 នាក់ ត្រូវបានរកឃើញ ក្នុងនោះមានជាង 183,926,530 នាក់បានជា, 4,327,096 នាក់បានស្លាប់ និងជាង 16,542,050 នាក់ កំពុងព្យាបាល៕

August 11, 2021

អ្នកវិទ្យាសាស្ត្ររកឃើញសារធាតុស្អិតដូចលៀសសមុទ្រ ឃាត់ឈាមបានភ្លាមៗ និងអាចប្រើក្នុងការវះកាត់

កាវដែលក្រុមអ្នកវិទ្យាសាស្ត្រទើបតែបានអភិវឌ្ឍរួចរាល់ ដែលមានសមត្ថភាពជួយសង្គ្រោះជីវិតទាហាន ជនដែលត្រូវគេចាក់នឹងកាំបិត ឬត្រូវរងរបួសក្នុងគ្រោះថ្នាក់ផ្សេងៗ នេះ ត្រូវបានយោងទៅតាមសារជាតិស្អិតរបស់សត្វលៀសសមុទ្រមួយប្រភេទ។

ក្រុមអ្នកស្រាវជ្រាវនៅបន្ទប់ពិគ្រោះជំងឺ Mayo និងវិទ្យាស្ថានបច្ចេកវិទ្យា Massachusetts (MIT) របស់សហរដ្ឋអាមេរិក បង្កើតបានសារធាតុឃាត់ឈាមរហ័ស ដោយយោងទៅតាមជាតិស្អិតមានប្រេងដែលសត្វលៀសសមុទ្រ goose barnacle បញ្ចេញមក ដើម្បីសម្អាតផ្ទៃលើ ទប់ស្កាត់សំណើម មុនពេលតោងជាប់នឹងថ្ម ឬកំណាត់ឈើ។ សមាសធាតុដែលដូចទៅនឹងជ័រកាវនេះ តោងជាប់នឹងគ្នា ដូចឈាមកករបស់មនុស្ស។ លទ្ធផលនៃការស្រាវជ្រាវខាងលើ ត្រូវបានប្រកាសកាលពីថ្ងៃទី 09 សីហា លើទស្សនាវដ្ដី Nature Biomedical Engineering។

វេជ្ជបណ្ឌិតផ្នែកវះកាត់ តែងតែប្រើប្រាស់ធាតុសិប្បនិម្មិតដើម្បីឃាត់ឈាមអ្នកជំងឺ ប៉ុន្តែ ក្នុងករណីលឿនបំផុត ពួកគេក៏នៅតែត្រូវចំណាយពេលរាប់នាទី ដើម្បីឃាត់ឈាមបានសម្រេច។ ក្នុងការពិសោធលើសត្វ ក្រុមអ្នកវិទ្យាសាស្ត្របានរកឃើញសមាសធាតុថ្មីដែលឃាត់ឈាមបានសម្រេច ដោយប្រើពេលតែ 15 វិនាទីប៉ុណ្ណោះ មុនពេលដំណាក់កាលនៃការកកឈាមកើតឡើង។

សត្វលៀសសមុទ្រប្រភេទ pelagic gooseneck barnacle តោងយ៉ាងស្អិតទៅលើវត្ថុដែលពួកវាស្ថិតនៅ

អំពីសត្វលៀសសមុទ្រ goose barnacle ៖ ក្រោយពីបញ្ចេញសារជាតិស្អិត ពួកវាបន្តបង្កើតប្រូតេអ៊ីន ជួយឱ្យរាងកាយបន្តតោងជាប់ទៅនឹងផ្ទៃរបស់វត្ថុ។ ដំណើរការនេះគឺ ដូចទៅនឹងដំណាក់កាលដែលបានកើតឡើងនៅពេលគេប្រើប្រាស់កាវក្នុងការវះកាត់សរីរាង្គខាងក្នុងរបស់មនុស្ស។

ជាតិស្អិតថ្មីនេះ មានផ្ទុកសារជាតិប្រេងមិនជ្រាបទឹក និងសារជាតិស្អិតជីវសាស្ត្រ។ នេះគឺជាប្រភេទភាគល្អិតនៃជាតិស្អិតដែលតភ្ជាប់នឹងគ្នា និងតោងជាប់លើផ្ទៃរបស់វត្ថុ បន្ទាប់ពីជាតិប្រេងបានសម្អាតកន្លែងដែលវាស្ថិតនៅ។ សារធាតុជីវសាស្ត្រថ្មីនេះ មានសមត្ថភាពរំលាយខ្លួនឯងបន្តិចម្ដងៗ ក្នុងរយៈពេលតែប៉ុន្មានសប្ដាហ៍ប៉ុណ្ណោះ៕

August 11, 2021

គណៈកម្មការ គ.អ.ក ពិន័យជាប្រាក់បានជាង 46 លានរៀល ចំពោះបុគ្គលល្មើសនឹងវិធានប្រឆាំង COVID-19 ក្នុងថ្ងៃទី 10 សីហា

ក្នុងអំឡុង 24 ម៉ោង កាលពីម្សិលមិញ គណៈកម្មការ គ.អ.ក បានឃាត់ខ្លួនមនុស្ស ចំនួន 1,682 នាក់ ក្នុងនោះមាន ករណីត្រូវអប់រំ និងករណីពិន័យជាប្រាក់ផងដែរ។

គណៈកម្មការអន្តរក្រសួង ដើម្បីប្រយុទ្ធនឹងជំងឺ COVID-19 (គ.អ.ក) នាព្រឹកថ្ងៃទី 11 ខែសីហា ឆ្នាំ 2021 នេះ បានឱ្យដឹងថា គ.អ.ក បានពិន័យចំពោះបុគ្គលដែលល្មើសនឹងវិធានការសុខាភិបាល និងវិធានការរដ្ឋបាល ជាទឹកប្រាក់ ចំនួន 46,100,000 រៀល (ប្រហែល 11,299 ដុល្លារអាមេរិក) នៅក្នុងអំឡុងពេល 24 ម៉ោង នៃថ្ងៃទី 10 ខែសីហា ឆ្នាំ 2021។

លទ្ធផលនៃការអនុវត្តវិធានការច្បាប់ចំពោះបុគ្គលដែលល្មើសនឹងវិធានការសុខាភិបាល និងវិធានការរដ្ឋបាល នៅថ្ងៃទី 10 ខែសីហា ឆ្នាំ 2021 មានដូចតទៅ៖

– វិធានការអប់រំផ្សព្វផ្សាយច្បាប់ ៖ 1,320 ទីតាំង

– អនុវត្តវិធានការច្បាប់ ៖ 941 ករណី

– ឃាត់ខ្លួនមនុស្ស (អប់រំ និង ពិន័យ) ៖ 1,682 ករណី

– ឃាត់យានយន្ត ៖ 811 ករណី

– ពិន័យជាប្រាក់ ៖ 46,100,000 រៀល

August 11, 2021

គិលានុបដ្ឋាក នៅ អាល្លឺម៉ង់ បន្លំចាក់ទឹកអំបិល ជំនួសវ៉ាក់សាំង COVID-19! ពលរដ្ឋជិតម៉ឺននាក់អាចរងផលប៉ះពាល់

គិលានុបដ្ឋាកម្នាក់នៅប្រទេស អាល្លឺម៉ង់ ត្រូវបានគេសង្ស័យថាជាអ្នកបានបន្លំវ៉ាក់សាំង COVID-19 រាប់ពាន់ដប ដោយដាក់ទឹកអំបិល ជំនួស។

បុគ្គលិកសុខាភិបាលម្នាក់ ដែលធ្វើការឱ្យកាកបាទក្រហម របស់ អាល្លឺម៉ង់ ត្រូវបានគេសង្ស័យថា បានចាក់ទឹកអំបិល saline (Sodium Chloride) ឱ្យប្រជាជន ជំនួសឱ្យការចាក់វ៉ាក់សាំងបង្ការ COVID-19 នៅក្នុងមជ្ឈមណ្ឌលចាក់វ៉ាក់សាំងមួយ ក្នុងខេត្ត Friesland កាលពីដើមឆ្នាំ 2021។

Sven Ambrosy ដែលជាសមាជិកក្រុមប្រឹក្សាមូលដ្ឋាន កាលពីថ្ងៃទី 10 សីហា បានឱ្យដឹងថា មនុស្សប្រហែល 8,600 នាក់ ទំនងជាបានរងផលប៉ះពាល់ដោយសារអំពើបន្លំនេះ។ ក្រុមមន្ត្រីសុខាភិបាល កំពុងតែអំពាវនាវឱ្យពលរដ្ឋដែលរងផលប៉ះពាល់ទាំងនេះ ទៅចាក់វ៉ាក់សាំងជាថ្មី។ Sven Ambrosy និយាយថា៖ «ខ្ញុំពិតជាភ្ញាក់ផ្អើលណាស់ នៅពេលបានដឹងហេតុការណ៍នេះ»។

ធាតុរាវជាទឹកអំបិល saline (Sodium Chloride) ថ្វីបើមិនបង្កគ្រោះថ្នាក់ដល់សុខភាព ប៉ុន្តែ អ្នកដែលបានចាក់វ៉ាក់សាំងកាលពីខែមីនា និងខែមេសា ជាពេលដែលវ៉ាក់សាំងត្រូវគេបន្លំ ភាគច្រើនជាពលរដ្ឋវ័យចំណាស់ ជាក្រុមមនុស្សដែលងាយឆ្លងជំងឺ និងងាយបាត់បង់ជីវិតដោយសារ COVID-19។

មកដល់ពេលនេះ អាជ្ញាធរមិនទាន់ប្រកាសឱ្យដឹងអំពីអត្តសញ្ញាណរបស់ជនសង្ស័យដែលជាគិលានុបដ្ឋាយិកា ខាងលើនេះនៅឡើយ។ មន្ត្រីពាក់ព័ន្ធក៏មិនបានបង្ហើបឱ្យដឹងអំពីចេតនារបស់ជនសង្ស័យ ប៉ុន្តែ បុគ្គលិកពេទ្យរូបនេះ ធ្លាប់បានលើកឡើងនៅលើបណ្ដាញសង្គមអំពីការសង្ស័យ ឬការមិនទុកចិត្តរបស់ខ្លួន ចំពោះវ៉ាក់សាំងបង្ការ COVID-19។

បច្ចុប្បន្ន មិនទាន់ច្បាស់ថា ស្ត្រីជាប់សង្ស័យនេះ ត្រូវបានចាប់ខ្លួន ឬត្រូវបានចោទប្រកាន់ហើយ ឬនៅ។ ករណីនេះ ត្រូវបានប្រគល់ឱ្យអង្គភាពពិសេស ដែលជំនាញខាងស៊ើបអង្កេតករណីពាក់ព័ន្ធនឹងចេតនានយោបាយ។ ប៉ូលិសក្នុងតំបន់ ក៏មិនទាន់មានការអធិប្បាយអ្វីចំពោះព័ត៌មាននេះនៅឡើយនោះដែរ៕

August 11, 2021

Author: សឿន សំណាង