សឿន សំណាង - La Reine Media

ទូរស័ព្ទស៊េរីថ្មី Redmi 10 បានបង្ហាញខ្លួនជាផ្លូវការណ៍នៅក្នុងប្រទេសកម្ពុជាយើងហើយ!

នៅថ្ងៃទី 16 ខែកញ្ញា ឆ្នាំ 2021 នេះក្រុមហ៊ុនបច្ចេកវិទ្យាឈានមុខគេ Xiaomi បានប្រារព្ធកម្មវិធីសម្ពោធជាផ្លូវការណ៍ដើម្បីស្វាគមន៍វត្តមានរបស់ស្មាតហ្វូនជំនាន់ថ្មី Redmi 10 នៅក្នុងប្រទេសកម្ពុជា។

ព្រឹត្តិការណ៍ដ៏អស្ចារ្យនេះមានការចូលរួមយ៉ាងពិសេសពី អ្នកដែលមានឥទ្ធិពលខាងផ្នែកបច្ចេកវិទ្យានៅលើបណ្តាញសង្គម ក្នុងនោះក៏មានកម្មវិធីចែករង្វាន់ជាច្រើនសន្ធឹកសន្ធាប់ទៀតផង។

លោក រ៉ៃយ៉ា ប្រធានគ្រប់គ្រងផ្នែកទីផ្សាលក់រាយរបស់ Xiaomi ប្រចាំ កម្ពុជា ក៏បានធ្វើការបង្ហាញពីឆន្ទៈរបស់ Xiaomi ដែលនាំយកបច្ចេកវិទ្យាឆ្លាតវៃ និងច្នៃប្រឌិតថ្មី ដើម្បីឲ្យគ្រប់គ្នានៅប្រទេសកម្ពុជា អាចរីករាយជាមួយបច្ចេកវិទ្យាដ៏ល្អបំផុតជាមួយនឹងតម្លៃសមរម្យផងដែរ។

ខាងក្រោមនេះគឺជាហេតុផលទាំង 10 ដែលនាំឱ្យ Redmi 10 ក្លាយជាជម្រើសដ៏ល្អសម្រាប់អ្នកប្រើប្រាស់ទាំងអស់គ្នា៖

ការរចនាម៉ូតទាន់សម័យ

Redmi 10 ត្រូវបានរចនាម៉ូតឡើងយ៉ាងប្រណិត តួខ្លួនស្រោបដោយកញ្ចក់ Glossy Glass រលោង ជាមួយស៊ុមផ្លាស្ទីកជុំវិញ កម្រាស់ស្តើង 8.9mm និងទំងន់ត្រឹម 181 ក្រាមតែប៉ុណ្ណោះ។ Redmi 10 ក៏បានផ្តល់នូវជម្រើសពណ៌ដល់ទៅ 3 ពណ៌គឺ ប្រផេះ ស និងទឹកសមុទ្រ ស័ក្ដិសមនឹងយកទៅតាមខ្លួនគ្រប់កាលៈទេសៈ។

ថាមពលថ្មធំ សាកលឿន កាន់បានយូរ

សម្រាប់ថាមពលថ្មគឺមានទំហំ 5,000mAh ទ្រទ្រង់ការសាកលឿន 18W តាមរយៈរន្ធចម្លង USB-C និងមានមុខងារ reverser charge កម្លាំង 9W សម្រាប់សាកថ្មទៅឱ្យទូរស័ព្ទផ្សេងបានតាមខ្សែ USB-C ថែមទៀតផង។ ហើយអ្វីដែលពិសេសគឺ Redmi 10 មានភ្ជាប់មកជាមួយ ឆ្នាំងសាកល្បឿនលឿនកម្លាំង 22.5W នៅក្នុងប្រអប់ស្រាប់តែម្ដង។

កាមេរ៉ាថតបានច្បាស់

កាមេរ៉ាក្រោយរបស់ Redmi 10 មានចំនួន 4 គ្រាប់ ភ្ជាប់ដោយសែនស័រគោលទំហំ 50MP aperture f/1.8 ស្ថិតនៅខាងលើគេ រំលេចដោយផ្ទៃស៊ុមពណ៌ទឹកប្រាក់ រួមជាមួយសែនស័រ Ultra-wide angle ទំហំ 8MP ហើយនិងសែនស័រ Macro និង Depth Sensor មានទំហំ 2MP ដូចគ្នា។ សម្រាប់កាមេរ៉ាសែលហ្វីក្នុងលែនទំលុះអេក្រង់ មានទំហំ 8MP។

កម្លាំងម៉ាស៊ីនខ្លាំង

Redmi 10 គឺជាស្មាតហ្វូនកម្រិតមធ្យមដែលបំពាក់បន្ទះឈីបខ្លាំង MediaTek Helio G88។ បន្ទះឈីបជំនាន់ថ្មីនេះ ភ្ជាប់ដោយអង្គ CPU កម្រិត Octa-core ដំណើរការលើប្រព័ន្ធ Cortex-A75 ល្បឿន 2.0GHz ភ្ជាប់ជាមួយរ៉េម ទំហំ 4GB និង 6GB រួមជាមួយនឹងម៉េមូរីក្នុងម៉ាស៊ីនទំហំចាប់ពី 64GB ដល់ 128GB។ ស្មាតហ្វូនស៊េរី ថ្មីមួយនេះប្រតិបត្តិការណ៍ដោយ Android 11 និងស្រោបដោយ MIUI12.5។

ប្រព័ន្ធសំឡេងលឺច្បាស់ល្អ

Redmi 10 បំពាក់នូវប្រព័ន្ធ Speaker ដល់ទៅពីរគ្រាប់ និងមានរន្ធដោតកាស 3.5mm មួយផងដែរ ដែលអាចផ្តល់ជូននូវសំឡេងពីរោះរណ្ដំ។

ផ្តល់ការភ្ជាប់ទំនាក់ទំនងដ៏ងាយស្រួល

ស្មាតហ្វូននេះអាចប្រើស៊ីមបានពីរ ប្រព័ន្ធសេវាខ្លាំង និងមានមុខងារពិសេស IR Blaster ដែលអាចបញ្ជាទូរទស្សន៍ ម៉ាស៊ីនត្រជាក់ជំនួសតេឡេបាន។

ប្រព័ន្ធសុវត្ថិភាព

Redmi 10 ភ្ជាប់មកនូវប្រព័ន្ធស្កេនក្រយៅដៃដោះសោសុវត្ថិភាពដែលស្ថិតនៅលើប៊ូតុងបិទបើកនៅគែមខាងស្តាំនៃទូរស័ព្ទ ព្រមទាំងអាចដោះសោដោយស្កែនមុខផងដែរ។

គុណភាពអេក្រង់

Redmi 10 បំពាក់អេក្រង់ IPS LCD កម្រិត 90Hz ទំហំ 6.5 អ៊ីញ កម្រិតបង្ហាញ Full HD+ លើខ្នាត Aspect ratio 20:9 និងមានដង់ស៊ីតេនៃកម្រិតភាពច្បាស់ 405ppi។

តម្លៃសមរម្យ

បើទោះបីជាស្មាតហ្វូនមួយនេះបំពាក់នូវបច្ចេកវិទ្យាទំនើបៗជាច្រើនក៏ពិតមែន ប៉ុន្តែសម្រាប់តម្លៃវិញគឺត្រឹមតែ $159 ប៉ុណ្ណោះ ចំពោះទំហំ RAM 4GB និងមេម៉ូរី 64GB ព្រមទាំងមានជម្រើសមួយទៀត នោះគឺ RAM 6GB ជាមួយមេម៉ូរីរហូតដល់ 128GB ដែលមានតម្លៃត្រឹមតែ $189 ប៉ុណ្ណោះ។

ផ្ដល់ជូនប័ណ្ណធានារហូតដល់ 18 ខែ រឺ 1 ឆ្នាំកន្លះ

នេះក៏ជាភាពទាក់ទាញមួយដែលមិនអាចប្រកែកបាន។ រាល់ការជាវទូរស័ព្ទឆ្លាតវៃស៊េរីថ្មី Redmi 10 នឹងទទួលបានប័ណ្ណធានារហូតដល់18 ខែ ឬ 1 ឆ្នាំកន្លះ ពីក្រុមហ៊ុន Xiaomi ផ្ទាល់តែម្ដង។

ឥឡូវនេះ Redmi 10 មានលក់នៅលើទីផ្សារប្រទេសកម្ពុជាយើងហើយ! លោកអ្នកអាចស្វែងរកទិញបាននៅតាមបណ្តាហាង Xiaomi Store ដៃគូសហការអនឡាញ និងហាងលក់ទូរស័ព្ទនានានៅក្នុងប្រទេសកម្ពុជា! ជាមួយនឹងប័ណ្ណធានា 18 ខែ ក៏មានការថែមជូនស៊ីមកាតស្មាតលេខពិសេស និងគម្រោងស្មាតធំហ្មង 12 សប្តាហ៍! នៅចាំអីទៀត! ទៅហាងលក់ទូរស័ព្ទដែលនៅជិតលោកអ្នកឥឡូវនេះដើម្បីធ្វើជាម្ចាស់របស់ Redmi 10!

បន្ថែមពីនេះទៅទៀត Xiaomi ក៏បានដាក់សម្ពោធឧបករណ៍ឆ្លាតវៃស៊េរីថ្មីបីប្រភេទគឺកាសឥតខ្សែ Redmi Buds 3 Pro តម្លៃ $65 , កាមេរ៉ាសុវត្ថិភាពឆ្លាតវៃឥតខ្សែ Mi Wireless Outdoor Security Camera 1080p តម្លៃ $85 និង Mi Router AX9000 តម្លៃ $239 ជា Tri-Band Wifi 6 Router ដ៏ល្អបំផុតសម្រាប់អ្នកទាំងអស់គ្នា ជាពិសេស Gamers។

សម្រាប់ព័ត៌មានបន្ថែម សូមតាមដានគេហទំព័រហ្វេសប៊ុកផ្លូវការ Xiaomi Cambodia។

September 21, 2021

តួលេខនៃការស្លាប់ដោយសារវីរុស COVID-19 នាបច្ចុប្បន្ន និង H1N1 កាលពីឆ្នាំ 1918 នៅ សហរដ្ឋអាម៉េរិក

ចំនួនមនុស្សដែលបានស្លាប់ដោយសារវីរុស COVID-19 នៅ សហរដ្ឋអាម៉េរិក បានកើនលើសពី 675,000 នាក់ ដែលជាតួលេខអ្នកស្លាប់ដោយសារវីរុស H1N1 នៅប្រទេសនេះ ក្នុងសោកនាដកម្មដែលបង្កឡើងដោយរោគរាតត្បាតសកល កាលពីឆ្នាំ 1918។

ទិន្នន័យរបស់សាកលវិទ្យាល័យ Johns Hopkins បានឱ្យដឹងថា គិតត្រឹមថ្ងៃទី 17 កញ្ញា សហរដ្ឋអាម៉េរិក មានអ្នកស្លាប់ចំនួន 675,722 នាក់ដោយសារឆ្លង COVID-19។ ក្រោយពីបានសម្លាប់មនុស្សជាង 675,000 នាក់នៅ សហរដ្ឋអាម៉េរិក កាលពីឆ្នាំ 1918 វីរុស H1N1 ក៏បានបំប្លែងខ្លួនទៅជាវីរុសផ្ដាសាយតាមរដូវ ដែលបច្ចុប្បន្នគេហៅថា A H1N1 និងបង្កផលប៉ះពាល់តិចតួច។

តួលេខនៃការស្លាប់ខាងលើបានកើតឡើងនៅពេល សហរដ្ឋអាម៉េរិក កំពុងប្រឈមនឹងរលកនៃការរាតត្បាតថ្មីដែលទាក់ទិននឹងវ៉ារ្យ៉ង់ Delta ក្នុងនោះ អត្រានៃការចាក់វ៉ាក់សាំងបានតិចគឺជាមូលហេតុចម្បងដែលនាំឱ្យមានករណីស្លាប់ច្រើន។

រោគរាតត្បាតសកលកាលពីឆ្នាំ 1918 បានបណ្ដាលឱ្យមនុស្សប្រហែល 50 លាននាក់នៅទូទាំងពិភពលោក បានស្លាប់ ចន្លោះឆ្នាំ 1918-1920 ច្រើនជាងឆ្ងាយបើធៀបនឹងចំនួនអ្នកស្លាប់ដោយសារ COVID-19 នាបច្ចុប្បន្ន ដែលមានត្រឹមជាង 4.7 លាននាក់។

តួលេខអ្នកស្លាប់ដោយសារ COVID-19 នៅ សហរដ្ឋអាម៉េរិក មានប្រហែល 14% ធៀបនឹងតួលេខសរុបរបស់ពិភពលោក ខណៈដែលចំនួនប្រជាជនរបស់ប្រទេសនេះមានត្រឹមតែ 5%។ ចំនួនប្រជាជនរបស់ អាម៉េរិក កាលពីឆ្នាំ 1918 មានមិនដល់ 1/3 ធៀបនឹងបច្ចុប្បន្ន ដូច្នេះ ចំនួនអ្នកស្លាប់នៅក្នុងវិបត្តិរោគរាតត្បាតសកលនៅដើមសតវត្សរ៍ទី 20 គឺ ប្រហាក់ប្រហែលនឹងអ្នកស្លាប់ 2.2 លាននាក់នាបច្ចុប្បន្ន។

មិនដូចទៅនឹង COVID-19 ដែលបង្កផលប៉ះពាល់ធ្ងន់ធ្ងរទៅលើក្មេងតូច និងមនុស្សចាស់ H1N1 ឆ្នាំ 1918 បានសម្លាប់មនុស្សវ័យក្មេងក្នុងអត្រាខ្ពស់។ មជ្ឈមណ្ឌលគ្រប់គ្រងនិងទប់ស្កាត់រោគឆ្លង (CDC) របស់ អាម៉េរិក ឱ្យដឹងថា ការដែលមិនមានថ្នាំ និងវ៉ាក់សាំង បានធ្វើឱ្យការប្រឹងប្រែងក្នុងការគ្រប់គ្រងជំងឺរាតត្បាតកាលពីឆ្នាំ 1918 ត្រូវជួបបញ្ហាធំ។

បច្ចុប្បន្ន វ៉ាក់សាំង COVID-19 ជាច្រើនប្រភេទដែលមានសុវត្ថិភាព និងប្រសិទ្ធភាពខ្ពស់ ត្រូវបានគេអភិវឌ្ឍ និងពិសោធដោយប្រើពេលខ្លីបំផុត។ ប៉ុន្តែ មនុស្សពេញវ័យប្រហែល 24% នៅ សហរដ្ឋអាម៉េរិក ដែលជិតស្មើនឹង 60 លាននាក់ នៅតែមិនទាន់បានចាក់វ៉ាក់សាំងណាមួយនៅឡើយ។ ក្រុមអ្នកជំនាញយល់ថា មូលហេតុដែលនាំឱ្យមានការរារែកក្នុងការទទួលការចាក់វ៉ាក់សាំងគឺមកពីវិបត្តិនៃការយល់ដឹង និងព័ត៌មានមិនពិត។

ក្រៅពីវ៉ាក់សាំង បណ្ដាវិធីសាស្ត្រព្យាបាល COVID-19 ផ្សេងទៀត ត្រូវបានអភិវឌ្ឍ ក្នុងនោះមានដូចជា ការប្រើអង្គបដិបក្ខ Monoclonal, ម៉ាស៊ីនជំនួយដង្ហើមទាន់សម័យ និងក្រុមថ្នាំប្រឆាំងបញ្ហារលាក corticoid ដើម្បីកាត់បន្ថយការប្រតិកម្មខ្លាំងក្លានៃប្រព័ន្ធភាពស៊ាំ ចំពោះអ្នកជំងឺដែលមានអាការធ្ងន់ធ្ងរ៕

September 21, 2021

Pfizer អះអាងថា «វ៉ាក់សាំងបង្កើតអង្គបដិប្រាណខ្លាំងនៅលើកុមារអាយុពី 5 ឆ្នាំ ទៅ 11 ឆ្នាំ»

(សហរដ្ឋអាម៉េរិក)-ក្រុមហ៊ុនផលិតវ៉ាក់សាំង Pfizer និង BioNTech ឱ្យដឹងថា វ៉ាក់សាំង COVID-19 មានសុវត្ថិភាព បង្កើតអង្គបដិប្រាណខ្លាំង នៅក្នុងការពិសោធលើកុមារដែលមានអាយុចាប់ពី 5 ឆ្នាំ ដល់ 11 ឆ្នាំ។

Pfizer និង BioNTech កាលពីម្សិលមិញ (20 កញ្ញា) បានប្រកាសលទ្ធផលនៃការពិសោធវ៉ាក់សាំង COVID-19 នៅលើកុមារអាយុពី 5 ឆ្នាំ ដល់ 11 ឆ្នាំ។ ពួកគេបានចាក់ 2 ដូស 10 មីលីក្រាម ស្មើនឹង 1/3 នៃបរិមាណដែលប្រើសម្រាប់ក្មេងជំទង់ និងមនុស្សពេញវ័យ ហើយការចាក់នេះមានគម្លាតពីគ្នា 3 សប្ដាហ៍។ លទ្ធផលបានបង្ហាញថា វ៉ាក់សាំងត្រូវបានរាងកាយប្រើប្រាស់បានយ៉ាងល្អ ប្រព័ន្ធភាពស៊ាំដំណើរការល្អ និងមានផលវិបាកប្រហាក់ប្រហែលនឹងលទ្ធផលនៅក្នុងការពិសោធលើមនុស្សដែលមានវ័យចាប់ពី 16 ឆ្នាំ ដល់ 25 ឆ្នាំ។

អាការនៃផលវិបាកដែលកើតឡើងដោយសារការចាក់វ៉ាក់សាំង Pfizer នៅលើក្មេងជំទង់ និងមនុស្សពេញវ័យ រួមមាន អស់កម្លាំង, ឈឺក្បាល, ឈឺសាច់ដុំ, ព្រឺរងា, ក្ដៅខ្លួន និងរកកលក្អួត នេះបើតាមនាយកដ្ឋានគ្រប់គ្រងនិងទប់ស្កាត់រោគឆ្លងរបស់ សហរដ្ឋអាម៉េរិក (CDC)។ Pfizer បានឱ្យដឹងថា ទិន្នន័យនៃការពិសោធលើកុមារចំនួន 2,200 នាក់ នឹងត្រូវបានដាក់ជូននាយកដ្ឋានគ្រប់គ្រងអាហារនិងឱសថ អាម៉េរិក (FDA) ក៏ដូចជាស្ថាប័នពាក់ព័ន្ធ នាពេលដ៏ខ្លីខាងមុខ។

Albert Bourla នាយកប្រតិបត្តិរបស់ក្រុមហ៊ុន Pfizer និយាយថា៖ «យើងរំពឹងថានឹងពង្រីកលទ្ធភាពនៃការការពាររបស់វ៉ាក់សាំងទៅដល់ពលរដ្ឋវ័យក្មេងនេះ អាស្រ័យទៅលើស្ថាប័នគ្រប់គ្រង នៅក្នុងស្ថានការណ៍ដែលវ៉ារ្យ៉ង់ Delta កំពុងរាតត្បាតខ្លាំង និងគំរាមកំហែងដល់កុមារ»។

ទិន្នន័យថ្មីត្រូវបានបញ្ចេញ នៅក្នុងគ្រាដែលអាណាព្យាបាលព្រួយបារម្ភចំពោះការចាក់វ៉ាក់សាំងឱ្យកូនៗ ក្នុងពេលដែលសាលារៀនបើកដំណើរការឡើងវិញ ចំណែកវីរុសបំប្លែងខ្លួន Delta នៅតែបន្តរាតត្បាត។ តួលេខនៃការចូលព្យាបាលក្នុងមន្ទីរពេទ្យនៅ សហរដ្ឋអាម៉េរិក កំពុងកើនឡើង ក្នុងនោះក៏មានទាំងកុមារតូចៗដែលមិនមានលក្ខខណ្ឌគ្រប់គ្រាន់សម្រាប់ទទួលការចាក់វ៉ាក់សាំងផងដែរ។

FDA បានអនុញ្ញាតឱ្យប្រើប្រាស់វ៉ាក់សាំងបង្ការ COVID-19 របស់ Pfizer/BioNTech សម្រាប់កុមារចាប់ពីអាយុ 12 ឆ្នាំឡើងទៅ រីឯវ៉ាក់សាំង Moderna និង Johnson & Johnson សម្រាប់ចាក់ឱ្យមនុស្សពេញវ័យ។ FDA គ្រោងនឹងប្រកាសលក្ខខណ្ឌសម្រាប់ការចាក់វ៉ាក់សាំង Pfizer ដូសបន្ថែមនៅក្នុងសប្ដាហ៍នេះ បន្ទាប់ពីបានផ្ដល់អនុសាសន៍ឱ្យចាក់ Pfizer ដូសបន្ថែមសម្រាប់មនុស្សដែលមានវ័យចាប់ពី 65 ឆ្នាំឡើងទៅ និងក្រុមមនុស្សដែលងាយរងគ្រោះ។ នេះបើតាមសារព័ត៌មាន CNBC។

Bourla កាលពីសប្ដាហ៍មុនបានឱ្យដឹងថា Pfizer អាចបញ្ជូនទិន្នន័យស្ដីពីកុមារអាយុចាប់ពី 5 ឆ្នាំ ដល់ 11 ឆ្នាំ ឡើងទៅកាន់ស្ថាប័នពាក់ព័ន្ធ នៅចុងខែនេះ។ ទន្ទឹមនឹងនេះ Pfizer ក៏មានគម្រោងប្រកាសលទ្ធផលនៃការចាក់វ៉ាក់សាំងពិសោធលើកុមារដែលមានអាយុចាប់ពី 6 ខែ ដល់ 5 ឆ្នាំផងដែរ នៅចុងខែតុលាខាងមុខ៕

September 21, 2021

បុរស និងស្ត្រីជាង 800 នាក់ អាក្រាតកាយទាំងស្រុង ដើម្បីអបអររដូវស្លឹកឈើជ្រុះ

(អង់គ្លេស)-បុរស និងស្ត្រីជាង 800 នាក់ នាំគ្នាអាក្រាតកាយ នៅឈូងសមុទ្រ Druridge ដើម្បីទទួលអំណរថ្ងៃនៃរដូវស្លឹកឈើជ្រុះ «Autumnal Equinox» ខាងមុខ។

មនុស្សរាប់រយនាក់ ប្រមូលផ្ដុំគ្នាទស្សនាការរាំរែកនៅជុំវិញភ្លក់ភ្លើងមុនពេលដោះសម្លៀកបំពាក់ទាំងអស់ និងត្រាំខ្លួនក្នុងទឹកនៅឈូងសមុទ្រ Druridge ក្នុងតំបន់ Northumberland ភាគឦសាននៃប្រទេសអង់គ្លេស កាលពីថ្ងៃទី 19 កញ្ញ។ សកម្មភាពនេះត្រូវបានធ្វើឡើងក្នុងបំណងអបអរថ្ងៃ Autumnal Equinox ជាថ្ងៃដំបូងនៃរដូវស្លឹកឈើជ្រុះដែលនឹងកើតឡើងនៅថ្ងៃទី 22 កញ្ញា។ យោងតាមវិទ្យាសាស្ត្រអឺរ៉ុប Autumnal equinox ឬ September Equinox ឬក៏ Fall Equinox គឺជាថ្ងៃដំបូងនៃរដូវស្លឹកឈើជ្រុះនៅអឌ្ឍគោលខាងជើង។

ក្រុមសង្គ្រោះបន្ទាន់ត្រូវបានដាក់ពង្រាយនៅលើឆ្នេរសមុទ្រ ដើម្បីត្រៀមបង្ការ និងសង្គ្រោះនៅពេលមានហេតុការណ៍គ្រោះថ្នាក់កើតឡើង ប៉ុន្តែ ពុំមានបញ្ហាណាមួយនោះទេនៅក្នុងព្រឹត្តិការណ៍នេះ។

ពិធីបុណ្យអាក្រាតកាយដ៏ធំដែលត្រូវបានធ្វើឡើងដើម្បីអបអររដូវស្លឹកឈើជ្រុះនៅឈូងសមុទ្រ Druridge បានក្លាយជាព្រឹត្តិការណ៍ប្រចាំឆ្នាំ បន្ទាប់ពីត្រូវបានធ្វើឡើងជាលើកដំបូងកាលពីឆ្នាំ 2012 ដើម្បីរៃអង្គាសប្រាក់ជូនដល់អង្គការមនុស្សធម៌ដែលធ្វើការខាងសុខភាពផ្លូវចិត្ត MIND។

កាលពីឆ្នាំ 2020 ព្រឹត្តិការណ៍នេះត្រូវបានគេលុបចោលបណ្ដោះអាសន្ន ដោយសារតែបម្រាមគោចរ។ ឆ្នាំ 2019 ព្រឹត្តិការណ៍នេះទាក់ទាញបានអ្នកចូលរួមជាង 700 នាក់។

«គ្រប់យ៉ាងពិតជាអស្ចារ្យ និងប្រព្រឹត្តទៅយ៉ាងរលូន។ យើងមានគ្នាចូលរួមយ៉ាងតិច 820 នាក់ បើទោះតួលេខចុងក្រោយមិនទាន់ប្រកាស» Jax Higginson អ្នកគ្រប់គ្រងព្រឹត្តិការណ៍ និយាយដូច្នេះ និងបន្ថែមថា ឆ្នាំនេះអាចរៃអង្គាសបានប្រាក់ប្រហែល 20,000 ផោន ស្មើនឹងជាង 27,000 ដុល្លារអាម៉េរិក សម្រាប់ជួយដល់មូលនិធិ MIND៕

September 20, 2021

ត្រកូលអ្នកមានទ្រព្យច្រើនជាងគេបង្អស់ទាំង 5 របស់ពិភពលោក នាឆ្នាំ 2021

យោងតាមការស្រាវជ្រាវរបស់ Bloomberg បច្ចុប្បន្ន ត្រកូលអ្នកមានបំផុតចំនួន 25 របស់ពិភពលោក កាន់កាប់ទ្រព្យសរុបចំនួន 1,700,000,000,000 ដុល្លារអាម៉េរិក កើត 312,000,000,000 ដុល្លារ ស្មើនឹង 22% ធៀបនឹង 1 ឆ្នាំមុន។

ក្រុមត្រកូលអ្នកមាននៅលើពិភពលោក រកបានប្រាក់យ៉ាងច្រើនក្នុងអំឡុង 1 ឆ្នាំកន្លងទៅនេះ។ ភាពសម្បូរទ្រព្យដែលងាយស្រួលលក់ដូរ និងទីផ្សារមូលបត្រឡើងដល់កំពូលជាបន្តបន្ទាប់ បូករួមនឹងគោលនយោបាយពន្ធដារប្រកបដោយអត្ថប្រយោជន៍គឺជាកត្តាដែលជួយឱ្យទ្រព្យដែលពួកគេរកបាន កាន់តែរីកមាឌ។ យោងតាមការស្រាវជ្រាវរបស់ Bloomberg បច្ចុប្បន្ន ត្រកូលអ្នកមានបំផុតចំនួន 25 របស់ពិភពលោក កាន់កាប់ទ្រព្យសរុបចំនួន 1,700,000,000,000 (1.7 សែនកោដិ ឬ 1.7 ទ្រីលាន) ដុល្លារអាម៉េរិក កើត 312,000,000,000 (3.12 សែនកោដិ ឬ 312 ពាន់លានដុល្លារ) ដុល្លារ ស្មើនឹង 22% ធៀបនឹង 1 ឆ្នាំមុន។

ឈរលំដាប់ទីមួយដែលជាត្រកូលអ្នកមានទ្រព្យច្រើនជាងគេក្នុងសកលលោករយៈពេល 4 ឆ្នាំបន្តបន្ទាប់គឺ Waltons មកពី Arkansas សហរដ្ឋអាម៉េរិក។ ត្រកូលនេះកំពុងកាន់កាប់ទ្រព្យចំនួនពាក់កណ្ដាលនៅក្នុងបណ្ដាញផ្សារលក់រាយ Walmart។ ធៀបនឹងឆ្នាំ 2020 ទ្រព្យរបស់ត្រកូលនេះបានកើនថែម 23 ពាន់លានដុល្លារ មានន័យថា ត្រកូល Waltons រកបាន 63 លានដុល្លារ/ ថ្ងៃ ឬ 2.6 លានដុល្លារ/ម៉ោង ឬក៏ 44,000 ដុល្លារ/វិនាទី។

ថ្ងៃណាក៏គេឃើញធនាគារ Goldman Sachs តំណាងឱ្យត្រកូល Waltons លក់ភាគហ៊ុន។ ក្នុងសប្ដាហ៍កន្លងទៅ ត្រកូលនេះបានលក់ភាគហ៊ុនតម្លៃ 294 លានដុល្លារ។ ជាសរុប ក្នុងរយៈពេល 7 ខែចុងក្រោយនេះ ត្រកូល Waltons លក់ភាគហ៊ុន Walmart បានរហូតដល់ជាង 6 ពាន់លានដុល្លារ។

ប៉ុន្តែ បណ្ដាកូនចៅជំនាន់ក្រោយរបស់ Sam Walton បច្ចុប្បន្ននៅតែកាន់កាប់មូលបត្រចំនួន 1,334,480,250 ហ៊ុន នៅក្នុងក្រុមហ៊ុន Walmart។ ដោយសារតម្លៃភាគហ៊ុន Walmart កើនឡើងខ្ពស់ក្នុង 1 ឆ្នាំកន្លង ទ្រព្យរបស់គ្រួសារ Walton ក៏កើនឡើងគួរឱ្យកត់សម្គាល់។

ជោគជ័យរបស់ Walmart ជួយឱ្យត្រកូល Waltons ដែលមកពី Arkansas (បច្ចុប្បន្នបានឈានចូលដល់ជំនាន់ទីបី រាប់ចាប់តាំងពី Walmart បានបង្ហាញខ្លួន) មានទ្រព្យច្រើនជាងមហាសេដ្ឋី Jeff Bezos និង Elon Musk ទៅទៀត។ ត្រកូល Waltons ក៏មានប្រាក់ច្រើនជាងជិត 100 ពាន់លានដុល្លារ ធៀបនឹងត្រកូលអ្នកមានលំដាប់ទីពីរគឺ Mars។

Mars និង Waltons គឺជាត្រកូលដែលរកប្រាក់បានច្រើនជាងគេបំផុតនៅក្នុងឆ្នាំកន្លង ដោយសារតែផលិតផលរបស់ពួកគេទទួលបានការគាំទ្រច្រើននៅក្នុងអំឡុង COVID-19 កំពុងរាតត្បាត ក្នុងនោះក៏មានផលិតផលដែលទាក់ទងនឹងផ្សារអនឡាញផងដែរ។

នៅមានត្រកូលជាច្រើនផ្សេងទៀតដែលទទួលបានផលប្រយោជន៍ពីនិន្នាការប្ដូរផ្លាស់ថ្មីនៅក្នុងវិស័យផ្សេង។ ត្រកូល Johnsons ដែលនៅពីក្រោយមូលនិធិវិនិយោគ Fidelity Investments រកបានប្រាក់ច្រើនពីការពេញនិយមនៃការជួញដូរមូលបត្រអនឡាញ។ ចំណែកត្រកូលអ្នកមានបំផុតនៅទ្វីបអាស៊ី គឺ Ambanis ក៏ទទួលបានផលប្រយោជន៍ពីទិន្នការថាមពលបៃតង និងនិន្នាការនៃបរិវត្តកម្មឌីជីថល (Digital Transformation)។

នៅពេល COVID-19 រាតត្បាតខ្លាំងបំផុត បណ្ដាយីហោប្រណិតទទួលរងផលប៉ះពាល់ធ្ងន់ធ្ងរ និងត្រូវគេព្យាករថានឹងជួបវិបត្តិធំ។ ប៉ុន្តែ ត្រកូលនានាដែលនៅពីក្រោយយីហោលំដាប់ខ្ពស់ទាំងនោះ បែរជារកបានប្រាក់ច្រើនទៅវិញ។ ត្រកូល Lauders ដែលនៅពីក្រោយយីហោផលិតផលគ្រឿងសម្អាង Estee Lauder ជាលើកដំបូងមានឈ្មោះនៅក្នុងតារាងចំណាត់ថ្នាក់ ខណៈដែលទ្រព្យរបស់ត្រកូល Hermes កើន 75% ពោលគឺឡើងដល់ 112 ពាន់លានដុល្លារ។

ត្រកូលមួយចំនួនរងផលប៉ះពាល់ដោយសារជាប់ពន្ធស្នងមរតក ក្នុងនោះ ត្រកូល Lee ដែលគ្រប់គ្រង Samsung គឺជាឧទាហរណ៍មួយ។ ត្រកូលនៅ កូរ៉េខាងត្បូងមួយនេះបានបាត់ឈ្មោះពីបញ្ជីចំណាត់ថ្នាក់ ដោយសារតែត្រូវបង់ពន្ធចំនួន 11 ពាន់លានដុល្លារ លើការស្នងមរតកក្រោយពីលោក Lee Kun-hee បានស្លាប់។

ខាងក្រោមនេះគឺជាត្រកូលអ្នកមានជាងគេទាំង 5 របស់ពិភពលោក ដែលយោងតាមតារាងចំណាត់ថ្នាក់របស់ Bloomberg ៖

1-ត្រកូល Walton

ក្រុមហ៊ុន៖ Walmart

ទ្រព្យសរុប៖ 238.2 ពាន់លានដុល្លារ

អាសយដ្ឋាន៖ Bentonville, Arkansas, សហរដ្ឋអាម៉េរិក

2-ត្រកូល Mars

ក្រុមហ៊ុន៖ Mars

ទ្រព្យសរុប៖ 141.9 ពាន់លានដុល្លារ

អាសយដ្ឋាន៖ McLean, Virginia, សហរដ្ឋអាម៉េរិក

3-ត្រកូល Kochs

ក្រុមហ៊ុន៖ Koch Industries

ទ្រព្យសរុប៖ 124.4 ពាន់លានដុល្លារ

អាសយដ្ឋាន៖ Wichita, Kansas, សហរដ្ឋអាម៉េរិក

4- ត្រកូល Hermes

ក្រុមហ៊ុន៖ Hermes

ទ្រព្យសរុប៖ 111.6 ពាន់លានដុល្លារ

អាសយដ្ឋាន៖ Paris, ប្រទេសបារាំង

5-រាជវង្ស Al Saud

ទ្រព្យសរុប៖ 100 ពាន់លានដុល្លារ

អាសយដ្ឋាន៖ Riyadh, រាជាណាចក្រអារ៉ាប៊ីសាអូឌីត

September 20, 2021

អាម៉េរិក ទិញវ៉ាក់សាំង 500 លានដូសបន្ថែមទៀត សម្រាប់ផ្ដល់ជាជំនួយដល់ពិភពលោក ដើម្បីប្រយុទ្ធប្រឆាំងនឹង COVID-19

អាជ្ញាធររបស់ប្រធានាធិបតី Biden កំពុងចរចាជាមួយក្រុមហ៊ុន Pfizer ដើម្បីទិញវ៉ាក់សាំង 500 លានដូសទៀត ក្នុងបំណងជួយដល់យុទ្ធនាការប្រយុទ្ធប្រឆាំងនឹង COVID-19 ដែលកំពុងបន្តរាតត្បាតទូទាំងសកលលោក។

ប្រភពព័ត៌មានបានឱ្យដឹងថា កិច្ចព្រមព្រៀងរវាងរដ្ឋាភិបាល សហរដ្ឋអាម៉េរិក និងក្រុមហ៊ុន Pfizer នឹងត្រូវបានប្រកាសនៅប៉ុន្មានថ្ងៃខាងមុខ មុនពេលកិច្ចប្រជុំកំពូលអន្តរជាតិស្ដីពី COVID-19 ដែលប្រធានាធិបតី Joe Biden ស្នើឱ្យធ្វើឡើងដំណាលគ្នានឹងមហាសន្និបាតអង្គការសហប្រជាជាតិ។

រដ្ឋាភិបាលរបស់លោក Biden សម្រេចបានកិច្ចព្រមព្រៀងមួយដែលស្ទើរតែដូចគ្នានេះកាលពីខែសីហា ហើយ Pfizer កំពុងដឹកជញ្ជូនវ៉ាក់សាំងទាំងនេះទៅឱ្យ COVAX ដែលជាយន្តការផ្គត់ផ្គង់វ៉ាក់សាំង COVID-19 ដោយមិនគិតថ្លៃសម្រាប់បណ្ដាប្រទេសក្រីក្រ។

អ្នកសម្របសម្រួលចំពោះកិច្ចការប្រឆាំង COVID-19 របស់សេតវិមាន លោក Jeffrey Zients

«ប្រធានាធិបតីបានអះអាងច្បាស់ថា យើងនឹងប្រឹងប្រែងបន្ថែមទៀតដើម្បីជួយដល់ការខិតខំក្នុងការចាក់វ៉ាក់សាំងរបស់ពិភពលោក» អ្នកសម្របសម្រួលចំពោះកិច្ចការប្រឆាំង COVID-19 របស់សេតវិមាន Jeffrey Zients បានបញ្ជាក់កាលពីថ្ងៃទី 17 កញ្ញា។

សហរដ្ឋអាម៉េរិក បច្ចុប្បន្នគឺជាប្រទេសម្ចាស់ជំនួយផ្នែកវ៉ាក់សាំងបង្ការវីរុស COVID-19 ធំជាងគេបង្អស់ក្នុងពិភពលោក ខណៈដែលប្រទេសចិន ឈរលំដាប់លេខ 2 ចំណែក ជប៉ុន និង អង់គ្លេស ឈរលេខរៀងបន្ទាប់ គិតត្រឹមថ្ងៃទី 9 កញ្ញា។ នេះបើតាមទិន្នន័យរបស់មូលនិធិកុមាររបស់អង្គការសហប្រជាជាតិ (UNICEF)៕

September 20, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 20 ខែកញ្ញា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 19 កញ្ញា 2021 រួមមាន៖

– ឆ្លងថ្មី = 622 នាក់

– ជាសះស្បើយថ្មី = 473 នាក់

– ស្លាប់ថ្មី = 14 នាក់។

ក្នុងចំណោមអ្នកឆ្លងថ្មីទាំង 622 នាក់ មាន៖

– ករណីឆ្លងសហគមន៍ 444 នាក់

– អ្នកដំណើរពីបរទេស 178 នាក់

គិតត្រឹមព្រឹកថ្ងៃទី 20 ខែកញ្ញា ឆ្នាំ 2021 តួលេខ COVID-19 សរុប នៅ កម្ពុជា រួមមាន៖

– អ្នកឆ្លងសរុប=104,716 នាក់

– អ្នកជាសះស្បើយ=97,700 នាក់

– អ្នកស្លាប់=2,123 នាក់

តួលេខ COVID-19 នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុប = 229,292,520 នាក់

– អ្នកជាសះស្បើយ = 205,922,518 នាក់

– អ្នកស្លាប់ = 4,705,482 នាក់

– អ្នកកំពុងព្យាបាល = 18,664,520 នាក់

September 20, 2021

បណ្ដាញសង្គម TikTok ចិន រឹតត្បិតលើការប្រើប្រាស់របស់ក្មេងអាយុក្រោម 14 ឆ្នាំ

Douyin ដែលជាកំណែសម្រាប់អ្នកប្រើប្រាស់នៅប្រទេសចិន របស់ TikTok បានប្រកាសថានឹងកាត់បន្ថយពេលវេលានៃការប្រើប្រាស់របស់ក្មេងដែលមានអាយុក្រោម 14 ឆ្នាំ ដោយអនុញ្ញាតឱ្យពួកគេលេងត្រឹមតែ 40 នាទីប៉ុណ្ណោះ ក្នុង 1 ថ្ងៃ។

ByteDance ជាក្រុមហ៊ុនមេរបស់បណ្ដាញសង្គម Douyin កាលពីថ្ងៃទី 18 កញ្ញា បានប្រកាសអនុវត្តគោលការណ៍សម្រាប់ក្មេងជំទង់ ក្នុងនោះ អ្នកប្រើប្រាស់បណ្ដាញសង្គម TikTok កំណែសម្រាប់ប្រទេសចិន ដែលមានអាយុក្រោម 14 ឆ្នាំ អាចលេង Douyin បានតែ 40 នាទីប៉ុណ្ណោះក្នុង 1 ថ្ងៃ ក្នុងអំឡុងពេលពីម៉ោង 6 ព្រឹក ដល់ម៉ោង 22 យប់។

Douyin បានដាក់មុខងារមួយចំនួនដូចគ្នានេះដែរ តាំងពីឆ្នាំ 2018 ប៉ុន្តែ ជាមុខងារដែលអាចជ្រើសរើសបាន។ ការកំណត់ខាងលើដែលនឹងអនុវត្តចំពោះអ្នកប្រើប្រាស់ចុះឈ្មោះពិត និងមានអាយុក្រោម 14 ឆ្នាំនេះ ត្រូវបានធ្វើឡើងដើម្បីការពារក្មេងៗពីខ្លឹមសារអាក្រក់។

ក្នុងរយៈពេល 40 នាទីរៀងរាល់ថ្ងៃ Douyin នឹងណែនាំដល់អ្នកប្រើប្រាស់នូវខ្លឹមសារដែលសម្បូរចំណេះដឹង ដូចជា ការពិសោធផ្នែកវិទ្យាសាស្ត្រ ឬពិព័រណ៍សារមន្ទីរ និងមេរៀនប្រវត្តិសាស្ត្រជាដើម។ Douyin អំពាវនាវឱ្យអាណាព្យាបាលគ្រប់រូប ចុះឈ្មោះ និងអាយុពិតរបស់កូន ដើម្បីជួយគាំទ្រដល់គោលការណ៍ថ្មីរបស់បណ្ដាញសង្គមមួយនេះ។

ការកំណត់ខាងលើរបស់ Douyin ត្រូវបានធ្វើឡើងនៅពេលរដ្ឋាភិបាលចិន ស្វែងរកវិធីគ្រប់គ្រងបណ្ដាក្រុមហ៊ុនបណ្ដាញសង្គមដែលផ្ដល់ខ្លឹមសារលើអ៊ីនធើណិតនៅប្រទេសចិន ដោយចោទពួកគេថា រំលោភច្បាប់ប្រឆាំងការរកស៊ីផ្ដាច់មុខ បញ្ហាការពារទិន្នន័យ និងកម្លាំងពលកម្ម។

ប្រទេសចិន កាលពីខែមិថុនា បានធ្វើវិសោធនកម្មច្បាប់ការពារអនីតិជន ដោយស្នើដល់ក្រុមអ្នកផ្គត់ផ្គង់ខ្លឹមសារឌីជីថល បំពាក់ឧបករណ៍គ្រប់គ្រងពេលវេលានៃការប្រើប្រាស់របស់អតិថិជន កាត់បន្ថយមុខងារមួយចំនួន និងកាត់បន្ថយការលក់ផលិតផលចំពោះអ្នកប្រើប្រាស់ដែលមានអាយុក្រោម 18 ឆ្នាំ។

កម្មវិធី (App) ចែករំលែកវីដេអូ Kuaishou របស់ក្រុមហ៊ុន Kuaishou Technology ដែលជាគូប្រជែងធំនៅប្រទេសចិន របស់ Douyin បានកំណត់របបសម្រាប់ក្មេងមិនទាន់គ្រប់អាយុ ដូចទៅនឹង Douyin តាំងពីឆ្នាំ 2019 ក្រោមរូបភាពអាចជ្រើសរើសបាន។ ចំណែក WeChat ដែលជាកម្មវិធីទាក់ទងគ្នាដ៏ល្បីល្បាញនៅប្រទេសចិន របស់ក្រុមហ៊ុន Tencent, TokTik ដែលជាកំណែអន្តរជាតិរបស់ Douyin ជាដើម ក៏បាន និងកំពុងអនុវត្តគោលការណ៍នានាដើម្បីជួយការពារអនីតិជនផងដែរ៕

September 20, 2021

កំពូលកីឡាករប្រដាល់របស់ ហ្វីលីពីន ក្លាយជាបេក្ខភាពប្រធានាធិបតី

ជើងឯកប្រដាល់របស់ប្រទេសហ្វីលីពីន លោក Manny Pacquiao កាលពីម្សិលមិញ បានប្រកាសចូលរួមប្រជែងដណ្ដើមតំណែងប្រធានាធិបតី នៅក្នុងការបោះឆ្នោតឆ្នាំ 2022។

«បច្ចុប្បន្នគឺជាពេលវេលាសមស្រប។ យើងបានត្រៀមខ្លួនរួចរាល់ហើយសម្រាប់ប្រឈមនឹងឧបសគ្គនៃការដឹកនាំ» Manny Pacquiao វ័យ 42 ឆ្នាំ បាននិយាយដូច្នេះបន្ទាប់ពីយល់ព្រមតាមសំណើពីក្រុមដែលលោកដឹកនាំនៅក្នុងបក្សកាន់អំណាច PDP-Laban។

មុននេះមិនយូរប៉ុន្មាន ក្រុមគូប្រជែងរបស់ Pacquiao បានជ្រើសតាំងជំនួយការផ្ទាល់របស់ប្រធានាធិបតី Rodrigo Duterte គឺតំណាងរាស្ត្រ Christopher “Bong” Go ជាបេក្ខភាពប្រធានាធិបតី។ ក្រុមនេះក៏បានជ្រើសតាំង Duterte សម្រាប់តំណែងអនុប្រធានាធិបតីផងដែរ ដើម្បីជួយឱ្យប្រធានាធិបតី ហ្វីលីពីន រូបនេះ អាចបន្តកាន់អំណាច។

Go បានបដិសេធការជ្រើសតាំងខាងលើ ប៉ុន្តែ បញ្ហាខ្វែងគំនិតគ្នារវាងក្រុម Pacquiao និងក្រុម Duterte នៅក្នុងបក្ស នៅតែបន្តកើនឡើង។

«ខ្ញុំគឺជាអ្នកប្រយុទ្ធ ហើយខ្ញុំនឹងបន្តធ្វើជាអ្នកប្រយុទ្ធ មិនថានៅខាងក្នុង ឬខាងក្រៅ» កំពូលអ្នកប្រដាល់របស់ ហ្វីលីពីន លោក Pacquiao ប្រកាសដូច្នេះ។ លោកបានបញ្ជាក់ថា «ខ្ញុំយល់ព្រមទទួលយកការជ្រើសតាំងជាបេក្ខភាពប្រធានាធិបតីរបស់ សាធារណរដ្ឋហ្វីលីពីន»។

កំពូលអ្នកប្រដាល់របស់ ហ្វីលីពីន លោក Pacquiao (ស្ដាំ)

Pacquiao គឺជាអ្នកប្រដាល់ដ៏អស្ចារ្យបំផុត និងជាមនុស្សតែម្នាក់គត់ដែលដណ្ដើមបានខ្សែក្រវាត់ពិភពលោកចំនួន 8 ក្នុងប្រភេទទម្ងន់ផ្សេងៗគ្នា។

ទោះជាល្បីឈ្មោះ ប៉ុន្តែ Pacquiao នៅតែមិនអាចឈរលើកំពូលតារាងក្នុងការស្ទង់មតិនាពេលកន្លង។ Sara Duterte-Carpio កូនស្រីរបស់ប្រធានាធិបតី Duterte គឺជាអ្នកស្ថិតនៅលើកំពូលតារាងនេះ។

កាលពីខែកក្កដា គណបក្ស PDP-Laban បានបោះឆ្នោតទម្លាក់ Pacquiao ពីតំណែងប្រធានបក្ស ក្រោយពីលោកបានរិះគន់ប្រធានាធិបតី Duterte ទាក់ទិននឹងបញ្ហាជាមួយប្រទេសចិន និងសង្គ្រាមប្រឆាំងអំពើពុករលួយ។ ប៉ុន្តែ ការសម្រេចនេះត្រូវបានក្រុមអ្នកនយោបាយដែលដឹកនាំដោយ Pacquiao នៅក្នុងបក្ស ច្រានចោល។

កំពូលអ្នកប្រដាប់រូបនេះ បានចូលប្រលូកក្នុងវិស័យនយោបាយចាប់ពីឆ្នាំ 2010 ក្នុងនាមជាតំណាងរាស្ត្រម្នាក់ មុននឹងត្រូវបានបោះឆ្នោតជាសមាជិកសភាជាន់ខ្ពស់។ លោកទទួលបានការចូលចិត្តខ្លាំងនៅ ហ្វីលីពីន ដោយសារតែចិត្តទូលាយ និងការប្រឹងប្រែរើខ្លួនចេញពីភាពក្រីក្រ ដើម្បីក្លាយជាអ្នកប្រដាល់ម្នាក់ក្នុងចំណោមអ្នកប្រកដាល់ដែលមានទ្រព្យច្រើនជាងគេ។

ក្រុមអ្នកវិភាគអះអាងថា ជោគជ័យក្នុងវិស័យប្រដាល់ រួមនឹងគោលដៅប្រឆាំងភាពក្រីក្រ និងអំពើពុករលួយ អាចជាប្រធានបទសំខាន់នៅក្នុង «យុទ្ធនាការដណ្ដើមសំឡេងឆ្នោត» របស់ Manny Pacquiao៕

September 20, 2021

ធ្លាក់យន្តហោះយោធារបស់ អាម៉េរិក 1 គ្រឿង! អ្នកបើកបរត្រូវជាប់លើខ្សែភ្លើង

អ្នកបើកបរយន្តហោះចំនួន 2 នាក់ត្រូវបញ្ជូនទៅកាន់មន្ទីរពេទ្យ ខណៈមនុស្ស 3 នាក់ទៀតរងរបួសស្រាល នៅពេលយន្តហោះសម្រាប់ហ្វឹកហាត់ 1 គ្រឿងរបស់កងទ័ព សហរដ្ឋអាម៉េរិក បានធ្លាក់នៅឯទីក្រុង Lake Worth រដ្ឋ Texas កាលពីថ្ងៃទី 19 កញ្ញា។

អ្នកបើកបរទាំង 2 នាក់ សុទ្ធតែបានរំដោះខ្លួនដោយការបាញ់បង្ហោះឆត្រយោងចេញពីបន្ទប់បើកបរ មុនពេលយន្តហោះប្រតិកម្មសម្រាប់ហ្វឹកហាត់ T-45C របស់កងទ័ពជើងទឹក បានធ្លាក់ដល់ដី។ ក្នុងចំណោមអ្នកបើកបរ មានម្នាក់ជាប់លើខ្សែភ្លើង ចំណែកម្នាក់ទៀតរងរបួសនៅពេលធ្លាក់ដល់ដី។ ពួកគេគឺជាគ្រូបង្វឹក និងសិក្ខាកាម។

បច្ចុប្បន្ន សុខភាពរបស់គ្រូបង្វឹកបានត្រលប់មករកសភាពដើម ប៉ុន្តែ កូនសិស្សរបស់គាត់កំពុងទទួលការព្យាបាលនៅឡើយ។

យន្តហោះដែលធ្លាក់នោះ ស្ថិតក្នុងអង្គភាពហ្វឹកហ្វឺនទ័ពអាកាសលេខ 2 នៅឯមូលដ្ឋានទ័ពជើងទឹក និងអាកាស Kingsville។ ពួកគេកំពុង ហ្វឹកហាត់ដោយហោះពីព្រលានយន្តហោះអន្តរជាតិ Corpus Christi។

មូលហេតុនៃគ្រោះថ្នាក់ធ្លាក់យន្តហោះនេះមិនទាន់ត្រូវបានរកឃើញនៅឡើយ ប៉ុន្តែអ្នកជំនាញមួយក្រុមកំពុងតែវាយតម្លៃការខូចខាតនៅកន្លែងកើតហេតុ។ យន្តហោះនេះបានធ្លាក់នៅតំបន់មួយដែលមានចម្ងាយពីបន្ទាយ Fort Worth ប្រហែល 1.6 គីឡូម៉ែត្រទៅទិសខាងជើង។

យន្តហោះ T-45C បានធ្លាក់ចំទីលានខាងក្រោយរបស់ផ្ទះ 3 ខ្នង បណ្ដាលឱ្យពលរដ្ឋ 3 នាក់រងរបួសស្រាល។ នេះបើតាមនាយករដ្ឋពន្លត់អគ្គិភ័យ Fort Worth៕

September 20, 2021

Author: សឿន សំណាង