សឿន សំណាង - La Reine Media

ស្ថានីយអវកាសចិន ធៀបនឹងស្ថានីយអវកាសអន្តរជាតិ មួយណាគ្រាន់បើជាង?

ស្ថានីយអវកាសចិន Tiangong ដែលមានទំហំតូចជាង មានបន្ទាប់ម៉ូឌុល (module) ចំនួន 3 និងកែវយឹតអវកាស ខណៈដែលស្ថានីយអវកាសអន្តរជាតិ មានទំហំធំជាង ដោយមាន បន្ទប់ម៉ូឌុល ចំនួន 16។

ប្រការដំបូងដែលអ្នកត្រូវដឹងអំពីស្ថានីយអវកាស Tiangong របស់ ប្រទេសចិន នោះគឺវាត្រូវបានផលិតឡើងទាំងស្រុងដោយប្រទេសចិនផ្ទាល់។ ចាប់តាំងពីឆ្នាំ 2011 ទីភ្នាក់ងារអវកាស NASA របស់ អាម៉េរិក ត្រូវបានហាមសហការជាមួយ ប្រទេសចិន ទៅតាមច្បាប់របស់ សហរដ្ឋអាម៉េរិក (លើកលែងតែសភាអនុញ្ញាត)។ ជាលទ្ធផល ក្រុមអវកាសចរចិន មិនបានឡើងទៅកាន់ស្ថានីយអវកាសអន្តរជាតិ (ISS) ដែលជាផលិតផលនៃកិច្ចសហការរវាងទីភ្នាក់ងារអវកាសចំនួន 5 គឺ NASA (សហរដ្ឋអាម៉េរិក), Roscosmos (រុស្ស៊ី), JAXA (ជប៉ុន), ESA (សហភាពអឺរ៉ុប) និង CSA (កាណាដា)។

ISS បច្ចុប្បន្ន មានបន្ទប់ម៉ូឌុល ចំនួន 16 ខណៈដែលដើមឡើយ ស្ថានីយអវកាសចិន Tiangong មានតែ 1 ម៉ូឌុល ប៉ុណ្ណោះ ដែលកំពុងគោចរនៅលើគន្លងតារាវិថី ប៉ុន្តែ ចុងក្រោយ Tiangong នឹងរួមមាន 3 ម៉ូឌុល។

បច្ចុប្បន្ន អ្នកអវកាសចិន ចំនួន 3 នាក់ អាចរស់នៅលើស្ថានីយអវកាស Tiangong។ ចំណែកស្ថានីយអវកាសអន្តរជាតិវិញ តែងតែមានអវកាសចរ 6 នាក់ ធ្វើការរួមគ្នា។ កាលពីឆ្នាំ 2009 នៅលើស្ថានីយអវកាសអន្តរជាតិ មានអ្នកអវកាសរហូតដល់ 13 នាក់ឯណោះ។ ប្រទេសចិន ក៏អាចឈានដល់ដំណាក់កាលដូចគ្នានេះដែរ ដោយការបន្ថែម បន្ទប់ម៉ូឌុល។

ដោយសារតែរចនារូបរាងទម្រង់ជាបន្ទប់ម៉ូឌុល ស្ថានីយអវកាសអន្តរជាតិ អាចបន្តពង្រីកមាឌ ចាប់ពីក្រោយឆ្នាំ 1998។ បើសិនជា ម៉ូឌុល មួយខូច ឬដំណើរការមិនល្អដូចមុនទៀត អ្នកអាចដោះវាចេញ នឹងដាក់ ម៉ូឌុល ថ្មី។ នេះបើតាម Quentin Parker ប្រធានវិទ្យាស្ថានស្រាវជ្រាវអវកាសនៃសាកលវិទ្យាល័យហុងកុង។

បើទោះជាស្ថានីយអវកាស Tiangong តូចជាង ប៉ុន្តែ ប្រទេសចិន បានឱ្យដឹងថា វាត្រូវបានបំពាក់បច្ចេកវិទ្យាទាន់សម័យជាង ធៀបនឹង ISS ក្នុងនោះមានប្រព័ន្ធផ្ទាំងសូឡា ដែលផ្គត់ផ្គង់ថាមពលដល់ Tiangong។ «ប្រព័ន្ធថាមពលរបស់យើង អាចស្រូបយកកម្ដៅព្រះអាទិត្យជាង 30% ខ្ពស់ជាងច្រើន បើធៀបនឹងអ្វីដែលយើងបានឃើញនៅលើស្ថានីយអវកាសដទៃ» Zhou Jianping ប្រធានក្រុមអ្នករចនានៃគម្រោងបច្ចេកទេសអវកាសមានមនុស្សបើកបររបស់ ចិន អះអាងដូច្នេះ។

ជាមូលដ្ឋាន អគ្គិសនីពីបន្ទះសូឡា ជួយរក្សាអំពូលភ្លើងឱ្យភ្លឺ។ ចំនុចពិសេសមួយនៅក្នុងរចនារបស់ Tiangong នោះគឺអគ្គិសនីទាំងនេះក៏ផ្គត់ផ្គង់ថាមពលដល់បច្ចេកវិទ្យារុញច្រានរបស់ស្ថានីយអវកាស។ ដូច្នេះ បើទោះជា Tiangong នៅតែប្រើប្រាស់ឥន្ធនៈសម្រាប់រុញច្រានធម្មតាដូចទៅនឹង ISS ក៏ពិតមែន ប៉ុន្តែ ប្រទេសចិន បានឱ្យដឹងថា ស្ថានីយរបស់ពួកគេមិនចាំបាច់ចំណាយឥន្ធនៈច្រើនសម្រាប់ការហោះហើរលើគន្លងគោចរ។

បើសិនជាមិនប្រើប្រាស់ឥន្ធនៈរាវ ឬរឹង ដើម្បីបង្កើតជាកម្លាំងរុញច្រាន អ្នកនឹងមិនបាច់យកទម្ងន់នោះទៅជាមួយ។ នោះគឺជាការសន្សំសំច័យមួយដែរ។

ទីភ្នាក់ងារអវកាសចិន បានឱ្យដឹងថា ប្រព័ន្ធរុញច្រានរបស់ Tiangong មានប្រសិទ្ធភាព និងខ្លាំងជាងប្រហែល 5 ដប ធៀបនឹង ISS ដែលជាស្ថាបត្យកម្មមួយដែលប្រើប្រាស់ឥន្ធនៈច្រើន ពោលគឺប្រហែល 9 តោន/ឆ្នាំ ដើម្បីហោះលើគន្លងគោចរ។

ឧបករណ៍មួយទៀត ដែល ISS មិនមាន នោះគឺកែវយឹតអវកាស (តេឡេស្កុប) Xuntian ដែលភ្ជាប់ជាមួយស្ថានីយ។ Xuntian ដែលមានរូបរាងស្រដៀងនឹងកែវយឹតអវកាស Hubble នឹងហោះទន្ទឹមគ្នានឹង Tiangong។ Xuntian នឹងមានកាមេរ៉ាខ្នាតយក្ស 1 គ្រាប់ ដែលអាចមើលទីអវកាសទំហំធំជាង 300 ដង ធៀបនឹងកែវយឹតអវកាស Hubble ដោយចំណាយពេលមើលតែម្ដង។ កែវយឹតអវកាសរបស់ ចិន អាចចាក់ប្រេងជាថ្មី និងត្រូវបានថែទាំដោយវិធីតភ្ជាប់ផ្ទាល់ជាមួយនឹង Tiangong។ ចំណែក Hubble វិញ ដោយសារតែវាគោចរតែឯង ដូច្នេះនៅពេលវាមានបញ្ហា គេត្រូវបញ្ជូនមនុស្សពីផែនដីទៅជួសជុល។

ថ្ងៃណាមួយ កែវយឹតអវកាស ក៏ដូចជាស្ថានីយអវកាសរបស់ ចិន អាចត្រូវបានបណ្ដាប្រទេសប្រើប្រាស់ ព្រោះថា ប្រទេសនេះធ្លាប់បានបញ្ជាក់ថា ស្ថានីអវកាសថ្មីត្រូវបានរចនាឡើងដើម្បីសហការ។

យ៉ាងនេះក្ដី Tiangong នឹងមិនមែនជាស្ថានីយអវកាសតែមួយគត់ដែលនឹងដើរតួឯកជំនួសនោះទេ នៅពេល ISS ចូលនិវត្តន៍។ បច្ចុប្បន្ន NASA កំពុងតែចាត់ចែងគម្រោងបាញ់បង្ហោះមូលដ្ឋានមួយដែលដូចទៅនឹង ISS ប៉ុន្តែ គោចរជុំវិញឋានព្រះចន្ទ ខណៈ ប្រទេសរុស្ស៊ី ក៏អាចនឹងបាញ់បង្ហោះស្ថានីយអវកាសរបស់ខ្លួននៅឆ្នាំ 2030៕

September 25, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 25 ខែកញ្ញា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 24 កញ្ញា 2021 រួមមាន៖

– ឆ្លងថ្មី = 816 នាក់

– ជាសះស្បើយថ្មី = 554 នាក់

– ស្លាប់ថ្មី = 21 នាក់។

ក្នុងចំណោមអ្នកឆ្លងថ្មីទាំង 816 នាក់ មាន៖

– ករណីឆ្លងសហគមន៍ 702 នាក់

– អ្នកដំណើរពីបរទេស 114 នាក់

គិតត្រឹមព្រឹកថ្ងៃទី 25 ខែកញ្ញា ឆ្នាំ 2021 តួលេខ COVID-19 សរុប នៅ កម្ពុជា រួមមាន៖

– អ្នកឆ្លងសរុប=108,257 នាក់

– អ្នកជាសះស្បើយ=100,182 នាក់

– អ្នកស្លាប់=2,218 នាក់

តួលេខ COVID-19 នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុប = 231,904,005 នាក់

– អ្នកជាសះស្បើយ = 208,519,968 នាក់

– អ្នកស្លាប់ = 4,751,405 នាក់

– អ្នកកំពុងព្យាបាល = 18,632,632 នាក់

September 25, 2021

(វីដេអូ)-បន្លំខ្លួនជាមេធាវី ចូលទៅបាញ់សម្លាប់មេបងធំល្បីឈ្មោះជាងគេ ដល់ក្នុងតុលាការ

(ឥណ្ឌា)- Jitendra Gogi មេបងធំដ៏ល្បីឈ្មោះ ត្រូវបានខ្មាន់កាំភ្លើងពីរនាក់បាញ់សម្លាប់នៅក្នុងបន្ទប់កាត់ក្ដីរបស់តុលាការ នា ទីក្រុងដែលី (Delhi)។

មេបងធំខាងលើដែលធ្លាប់ត្រូវបានអាជ្ញាធរតាមចាប់ខ្លួនបំផុតនៅប្រទេសឥណ្ឌា កាលពីម្សិលមិញត្រូវបញ្ជូនឡើងតុលាការមួយនៅក្នុងខណ្ឌ Rohini ដែលស្ថិតក្នុងរដ្ឋធានីញូវដែលី។ ប៉ុន្តែ នៅពេលចៅក្រមកំពុងកាត់ក្ដី ក៏ស្រាប់តែមានបុរសពីរនាក់ដែលបន្លំខ្លួនជាមេធាវី ដកកាំភ្លើងបាញ់ប្រហារ។

សាក្សីបានឱ្យដឹងថា ស្នូរគ្រាប់កាំភ្លើងប្រហែល 10 គ្រាប់ បានផ្ទុះឡើងនៅក្នុងបន្ទប់កាត់ក្ដី។ ខ្មាន់កាំភ្លើងពីរនាក់ បាញ់ប្រហារជាច្រើនគ្រាប់ទៅលើ Gogi មុនពេលត្រូវប៉ូលិសការពារតុលាការ បាញ់សម្លាប់។

ប៉ូលិសឱ្យដឹងថា ខ្មាន់កាំភ្លើងដែលបានបាញ់សម្លាប់ Gogi គឺជាសមាជិករបស់ក្រុមដែលជាគូប្រជែង។ វីដេអូដែលបានបង្ហោះលើបណ្ដាញសង្គមបង្ហាញថា ក្រុមមេធាវី និងសាក្សី រត់យករួចខ្លួនចេញមកខាងក្រៅបន្ទប់តុលាការ នៅពេលស្នូរគ្រាប់កាំភ្លើងផ្ទុះឡើង។

Gogi អាយុប្រហែល 30 ឆ្នាំ ជាប់ទាក់ទិននឹងករណីជម្លោះបងធំ បងតូចដ៏សាហាវ រួមនឹងករណីសម្លាប់មនុស្ស ប្លន់ទ្រព្យសម្បត្តិ និងចាប់ជំរិតនៅ ទីក្រុងដែលី និងរដ្ឋជាច្រើននៅភាគខាងជើងនៃ ប្រទេសឥណ្ឌា។ Gogi ត្រូវបានចាប់ខ្លួនកាលពីឆ្នាំ 2016 ប៉ុន្តែ ក្រោយមកក៏បាន «ហែកគុក» រត់បាត់ស្រមោល។

ជននេះបានក្លាយជាគោលដៅនៃការតាមប្រមាញ់ពីក្រុមជាគូសត្រូវ និងក្រុមប៉ូលិស។ សារព័ត៌មាន ឥណ្ឌា បានឱ្យដឹងថា ក្រុមបងធំផ្សេងៗ បានយកក្រុមរបស់ Gogi ជាសត្រូវ បន្ទាប់ពីត្រូវដណ្ដើមទឹកដី។

ប៉ូលិស ឥណ្ឌា បាននិយាយថា Gogi ត្រូវបានចាប់ខ្លួនត្រលប់មកវិញកាលពីខែមីនា ឆ្នាំ 2020 នៅពេលចូលរួមប្រយុទ្ធតតាំងនឹងក្រុមបងធំ Tillu ដើម្បីដណ្ដើមកាន់កាប់ទឹកដីនៅភាគខាងជើងប្រទេស។

ករណីខ្មាន់កាំភ្លើងសម្លាប់ Gogi ធ្វើឱ្យមនុស្សមិនតិចនោះទេដែលសង្ស័យទៅលើប្រព័ន្ធសន្តិសុខនៅតុលាការរបស់ ឥណ្ឌា។ តុលាការខណ្ឌ Rohini ជាកន្លែងដែលទទួលពាក្យបណ្ដឹងច្រើនករណីដែលទាក់ទងនឹងបទល្មើសធំៗនៅប្រទេសនេះ៕

September 25, 2021

ក្រុមហ៊ុនវីង (Wing) ត្រូវផ្អាកដំណើរការបណ្ដោះអាសន្ន ព្រោះតែសត្វក្អែក (វីដេអូ)

(អូស្ត្រាលី)-ក្រុមហ៊ុនដឹកជញ្ជូនទំនិញដោយយន្តហោះដ្រូនមួយ ត្រូវផ្អាកដំណើរការរបស់ខ្លួននៅតំបន់ជាយក្រុងកង់បេរ៉ា (Canberra) ដោយសារតែការគំរាមកំហែងនៅលើអាកាស ពីសត្វក្អែកដែលចង់ការពារដែនដីរបស់ពួកវា។

បញ្ហាសត្វស្លាបហោះច្រាសពីអាកាស សំដៅអ្នកដំណើរនៅលើដីគឺជារឿងដែលកើតឡើងញឹកញាប់នៅប្រទេសអូស្ត្រាលី។ នៅក្នុងរដូវបន្តពូជ សត្វស្លាបជាច្រើនប្រភេទដូចជា សារិកាអាស៊ី-អឺរ៉ុប (Eurasian magpie) ជាដើម អាចវាយប្រហារអ្នកទាំងឡាយណាដែលចូលទៅក្បែរសម្បុករបស់ពួកវា។ សត្វក្អែកក៏មានទម្លាប់ការពារសម្បុក និងដែនដីរបស់ពួកវាដែរ។ ពេលខ្លះ សត្វក្អែក ថែមទាំងវាយប្រហារទៅលើយន្តហោះដ្រូនដឹកជញ្ជូនទំនិញទៀតផង។

នៅក្នុងវីដេអូ ដែលថតបានដោយ បែន រ៉ូបឺត (Ben Robert) ជាពលរដ្ឋរស់នៅក្នុងតំបន់ ហារីសុន (Harrison) ជាយក្រុងកង់បេរ៉ា បង្ហាញឱ្យឃើញថា សត្វក្អែកហោះទៅរកយន្តហោះដ្រូនដែលកំពុងត្រៀមចុះចតដើម្បីប្រគល់កាហ្វេឱ្យអតិថិជន។ ដ្រូនបន្ទាបខ្លួនបន្តិចម្ដងៗ និងត្រៀមទម្លាក់ថង់កាហ្វេ ប៉ុន្តែ ភ្លាមនោះ ក្អែកបានហោះមកចាប់ដ្រូន និងច្រាសប្រហារនៅកណ្ដាលអាកាស។

ការច្រាសប្រហារនេះកើតឡើងជាច្រើនវិនាទី។ ស្លាបកង្ហាររបស់ដ្រូនបន្លឺសំឡេងខ្លាំងជាងមុន នៅពេលវាព្យាយាមរក្សាលំនឹង។ បន្ទាប់មក សត្វក្អែកនេះក៏បានហោះចេញទៅ ហើយដ្រូនក៏អាចបន្ទាបថង់ទំនិញដោយខ្សែពួរ ដើម្បីប្រគល់ជូនអតិថិជន។

នេះមិនមែនជាករណីទីមួយនោះទេ ដែលថង់កាហ្វេរបស់ រ៉ូបឺត បានក្លាយជាគោលដៅវាយប្រហារពីសត្វស្លាប។ កន្លងមក ហ្វូងសត្វស្លាបក៏ធ្លាប់ព្យាយាមចូលទៅចាប់យន្តហោះដ្រូនដែលដឹកជញ្ជូនទំនិញឱ្យបុរសនេះ ហើយពួកវាទំនងជាចេះគេចពីស្លាបកង្ហារទៀតផង។

រដ្ឋធានីកង់បេរ៉ា កំពុងស្ថិតក្នុងអំឡុងពេលនៃការអនុវត្តបម្រាមគោចរដោយសារ COVID-19 នាំឱ្យតួលេខអ្នកបញ្ជាទិញទំនិញដែលដឹកជញ្ជូនដោយយន្តហោះដ្រូន មានការកើនឡើងខ្ពស់។ វីង (Wing) ដែលជាក្រុមហ៊ុនគ្រប់គ្រងយន្តហោះដ្រូន សម្រេចចិត្តផ្អាកដំណើរការនៅតំបន់ ហារីសុន នៅពេលរង់ចាំក្រុមអ្នកគ្រប់គ្រងសត្វស្លាប ពិនិត្យសកម្មភាពរបស់ហ្វូងសត្វដែលដូចទៅនឹងករណីរបស់ រ៉ូបឺត។ ក្រុមហ៊ុន វីង បានបង្ហាញអត្តសញ្ញាណរបស់សត្វក្អែកមួយចំនួនដែលធ្វើសកម្មភាពការពារដែនដីរបស់ពួកវា ហើយក្រុមហ៊ុននេះមានបំណងធ្វើឱ្យប៉ះពាល់តិចតួចបំផុតទៅលើការរស់នៅរបស់ពួកវា។

នីល ហឺមេស (Neil Hermes) ជាប្រធានអង្គការគ្រប់គ្រងសត្វស្លាប Canberra Ornithologists Group បានឱ្យដឹងថា សត្វក្អែកតែងតែវាយប្រហារវត្ថុ ឬមនុស្សដែលទៅជិតសម្បុករបស់វា។ ដូច្នេះ លោកយល់ថា ការសម្រេចចិត្តរបស់ក្រុមហ៊ុន វីង គឺជារឿងត្រឹមត្រូវ ខណៈរង់ចាំសមត្ថកិច្ចពិចារណា និងដោះស្រាយ៕

September 23, 2021

អង់គ្លេស ឱ្យ កូរ៉េខាងត្បូង ខ្ចីវ៉ាក់សាំង COVID-19 មួយលានដូស

ប្រទេសអង់គ្លេស បានសម្រេចចិត្តឱ្យ កូរ៉េខាងត្បូង ខ្ចីវ៉ាក់សាំង Pfizer ចំនួន 1 លានដូស ទៅតាមកិច្ចព្រមព្រៀងដោះដូរ ហើយ ទីក្រុងសេអ៊ូល នឹងសងវិញនៅចុងឆ្នាំ។

«ដោយវិធីសាស្ត្រសហការយ៉ាងជិតស្និទ្ធជាមួយនឹងមិត្ត កូរ៉េខាងត្បូង ការសម្រេចចិត្តដោះដូរវ៉ាក់សាំងនឹងគ្នានេះ នឹងជួយបង្កើនល្បឿននៃយុទ្ធនាការចាក់វ៉ាក់សាំងរបស់ ប្រទេសកូរ៉េខាងត្បូង ព្រមទាំងមិនប៉ះពាល់ដល់យុទ្ធនាការចាក់វ៉ាក់សាំងរបស់ អង់គ្លេស ផងដែរ» រដ្ឋមន្ត្រីក្រសួងសុខាភិបាល អង់គ្លេស Sajid Javid ប្រកាសដូច្នេះកាលពីថ្ងៃទី 22 កញ្ញា។

រដ្ឋាភិបាលអង់គ្លេស បានឱ្យដឹងថា នេះគឺជាវ៉ាក់សាំង Pfizer ចំនួន 1 លានដូស ដែលប្រទេសនេះមិនទាន់ត្រូវការប្រើប្រាស់ភ្លាមៗ ហើយអាចត្រូវបានប្រើប្រាស់លឿនជាងនៅ កូរ៉េខាងត្បូង។

នាយកដ្ឋានសុខាភិបាលនិងថែទាំសង្គម (DHSC) របស់ ប្រទេសអង់គ្លេស បានឱ្យដឹងថា កូរ៉េខាងត្បូង នឹងសងមកវិញទាំងអស់នៅចុងឆ្នាំ 2021។

DHSC បន្ថែមថា ការព្រមព្រៀងនេះនឹងជួយឱ្យ កូរ៉េខាងត្បូង សម្រេចបានគោលដៅ 70% នៃការចាក់វ៉ាក់សាំងជូនពលរដ្ឋសរុប នៅចុងខែតុលា។ ឈុតវ៉ាក់សាំងដំបូងនឹងត្រូវបាន អង់គ្លេស ដឹកទៅដល់ កូរ៉េខាងត្បូង នៅប៉ុន្មានសប្ដាហ៍ខាងមុខ។

នៅក្នុងខែនេះដែរ អង់គ្លេស និងអូស្ត្រាលី ក៏បានព្រមព្រៀងដោះដូរវ៉ាក់សាំង COVID-19 ដូចគ្នានេះដែរ។ អង់គ្លេស បានដឹកវ៉ាក់សាំង Pfizer ចំនួន 4 លានដូស ទៅឱ្យ អូស្ត្រាលី រួចហើយ។

កាលពីខែកក្កដា កូរ៉េខាងត្បូង ក៏ទទួលបានវ៉ាក់សាំង Pfizer ចំនួន 700,000 ដូស ជិតផុតកាលកំណត់ ដែល អ៊ីស្រាអែល មិនទាន់ត្រូវការប្រើ។ អ៊ីស្រាអែល នឹងទទួលបានវ៉ាក់សាំង Pfizer ដែល កូរ៉េខាងត្បូង នឹងសងនៅខែកញ្ញា និងតុលា៕

September 23, 2021

វ៉ាក់សាំងប្រភេទ «ខ្យល់» របស់ក្រុមហ៊ុនចិន អាចនឹងត្រូវបានអនុម័តឱ្យប្រើប្រាស់ឆាប់ៗនេះ

ក្រុមហ៊ុនអភិវឌ្ឍវ៉ាក់សាំងបង្ការ COVID-19 «ប្រភេទខ្យល់សម្រាប់ស្រូបតាមផ្លូវដង្ហើម» ដំបូងគេក្នុងពិភពលោក បានឱ្យដឹងថា Ad5-nCoV មានសុវត្ថិភាព និងអាចត្រូវបានអាជ្ញាធរចិនអនុម័តឱ្យប្រើប្រាស់បន្ទាន់នាពេលដ៏ខ្លីខាងមុខ។

ក្រុមហ៊ុន CanSinoBIO របស់ចិន កាលពីថ្ងៃទី 22 កញ្ញា បានឱ្យដឹងថា វ៉ាក់សាំង Ad5-nCoV ប្រភេទខ្យល់សម្រាប់ហិត ឬស្រូប កំពុងមានភាពជឿនលឿន ឆ្ពោះទៅកាន់គោលដៅទទួលបានការអនុញ្ញាតិឱ្យប្រើប្រាស់បន្ទាន់ និងឆាប់ត្រូវបានដាក់ឱ្យប្រើប្រាស់ ដោយសារតែសុវត្ថិភាព ឆ្លើយតបនឹងប្រព័ន្ធភាពស៊ាំបានខ្លាំងក្លា និងប្រសិទ្ធភាពខ្ពស់ដូចទៅនឹងដូសជំរុញ។

Ad5-nCoV អាចបង្កើតប្រតិកម្មសម្រាប់ប្រព័ន្ធភាពស៊ាំខ្លាំងក្លា ប្រហាក់ប្រហែលនឹងការចាក់នៅលើសាច់ដុំដៃ។ នៅពេលប្រើប្រាស់ Ad5-nCoV ធ្វើជាដូសជំរុញ ឬដូសបន្ថែម អង្គបដិប្រាណ IgG កើនឡើងច្រើនជាង ពី 7-8 ដង ធៀបនឹងប្រភេទវ៉ាក់សាំងវីរុសអសកម្មធម្មតា។

Ad5-nCoV ឬហៅថា វ៉ាក់សាំង Adenovirus គឺជាបេក្ខភាពវ៉ាក់សាំងបង្ការ COVID-19 ដំបូងរបស់ប្រទេសចិន ដែលត្រូវបានពិសោធលើមនុស្សកាលពីខែមីនា ឆ្នាំ 2020។ វ៉ាក់សាំងនេះ ត្រូវបានអភិវឌ្ឍដោយក្រុមហ៊ុន CanSinoBIO សហការជាមួយបណ្ឌិត្យសភាវិទ្យាសាស្ត្រវេជ្ជសាស្ត្រយោធាចិន។ ក្រុមអ្នកជំនាញផ្ដល់អនុសាសន៍ថា វ៉ាក់សាំងប្រភេទសម្រាប់ស្រូបតាមផ្លូវដង្ហើមនេះគឺជាបេក្ខភាពដែលមានសក្ដានុពល សម្រាប់ប្រើជាដូសជំរុញ ក្រោយការចាក់វ៉ាក់សាំងប្រភេទវីរុសអសកម្មរួចហើយ។

ការពិសោធលើមនុស្សដំណាក់កាលដំបូងបានបង្ហាញថា ការប្រើប្រាស់វ៉ាក់សាំង Ad5-nCoV ធ្វើជាដូសជំរុញ ក្រោយពេលចាក់វ៉ាក់សាំងត្រង់សាច់ដុំដៃបាន 28 ថ្ងៃ «បង្កើតបានអង្គបដិប្រាណ NAbs (Neutralizing Antibodies) និង IgG (Immunoglobulin G) កម្រិតខ្ពស់» នេះបើតាមរបាយការណ៍ដែលបានចុះផ្សាយនៅលើទស្សនាវដ្ដី Lancet កាលពីថ្ងៃទី 20 កញ្ញា។

អ្នកស្ម័គ្រចិត្ត កំពុងស្រូបវ៉ាក់សាំងប្រភេទខ្យល់ Ad5-nCoV

ការពិសោធក៏បានបង្ហាញថា វ៉ាក់សាំង Ad5-nCoV ប្រភេទខ្យល់ ដំណើរការល្អនៅក្នុងរាងកាយ ដោយមិនបង្កផលប៉ះពាល់ធ្ងន់ធ្ងរណាមួយឡើយ។ ក្រុមអ្នកអភិវឌ្ឍបានអះអាងថា ការប្រើប្រាស់វ៉ាក់សាំងប្រភេទវីរុសអសកម្ម (ដូចជា Sinopharm) រួមផ្សំជាមួយនឹង Ad5-nCoV នាំមកនូវអង្គប្រដិប្រាណ NAbs កម្រិតខ្ពស់សម្រាប់ទប់ទល់នឹង COVID-19 ទម្រង់ដើម ក៏ដូចជាវ៉ារ្យ៉ង់ Alpha, Beta, Gamma និង Delta។

ការពិសោធលើសត្វបង្ហាញថា ការប្រើប្រាស់ Ad5-nCoV ធ្វើជាដូសជំរុញ បន្ទាប់ពីបានចាក់វ៉ាក់សាំងប្រភេទវីរុសអសកម្ម (inactivated vaccine) បាន 2 ដូស ផ្ដល់ផលល្អជាង បើធៀបនឹងការចាក់វ៉ាក់សាំងបច្ចេកវិទ្យា mRNA (ដូចជា Pfizer) ធ្វើជាដូសជំរុញ។ ប្រភេទវ៉ាក់សាំងវីរុសអសកម្ម និងវ៉ាក់សាំងប្រភេទ Subunit vaccine មានប្រសិទ្ធភាពទាបជាង នៅពេលប្រើជាដូសរំលឹក បើធៀបនឹង Ad5-nCoV និង mRNA ដោយបរិមាណអង្គបដិប្រាណខុសគ្នាជិត 10 ដង។

លទ្ធផលនៃការពិសោធថ្មីបំផុតបង្ហាញថា ក្មេងចាប់ពីអាយុ 6-17 ឆ្នាំ ប្រើប្រាស់ Ad5-nCoV ក្នុងបរិមាណទាប មានសុវត្ថិភាពខ្ពស់ អត្រាបង្កផលប៉ះពាល់ទាបជាង ធៀបនឹងមនុស្សពេញវ័យ។

បើសិនវ៉ាក់សាំងប្រភេទខ្យល់ Ad5-nCoV ទទួលបានការអនុម័តឱ្យប្រើប្រាស់បន្ទាន់ នោះវានឹងក្លាយជាវ៉ាក់សាំងដំបូងគេលើពិភពលោក ដែលមានប្រសិទ្ធភាពបង្ការវីរុស COVID-19 ក្នុងទម្រង់ចំនួន 3 នៅលើរាងកាយមនុស្ស គឺ ទម្រង់រាវ ទម្រង់កោសិកា និងទម្រង់ភ្នាស។ នេះបើតាម Tao Lina អ្នកឯកទេសក្នុងវិស័យវ៉ាក់សាំង នៅទីក្រុងសៀងហៃ ប្រទេសចិន។

វ៉ាក់សាំងប្រភេទសម្រាប់ស្រូបតាមផ្លូវដង្ហើមនេះ អាចជំរុញប្រព័ន្ធភាពស៊ាំនៅក្នុងស្រទាប់ភ្នាសទឹករំអិលនៃប្រព័ន្ធផ្លូវដង្ហើមធ្វើការប្រតិកម្មបញ្ចេញអង្គបដិប្រាណ ជួយបន្ថយការឈឺចាប់ និងងាយប្រើប្រាស់ ពិសេសចំពោះកុមារ និងមនុស្សដែលងាយរងរបួស ព្រោះវាមិនបង្កឱ្យហើម និងឈឺចាប់ដូចការចាក់ដោយម្ជុលនោះទេ។ ក្រៅពីនេះ បរិមាណនៃវ៉ាក់សាំងប្រភេទខ្យល់របស់ CanSinoBIO ស្មើនឹង 1/5 ប៉ុណ្ណោះ ធៀបនឹងប្រភេទចាក់ ដែលនេះនឹងជួយសន្សំសំច័យវ៉ាក់សាំង ក៏ដូចជាកាត់បន្ថយសម្ពាធ និងការចំណាយសម្រាប់ការផលិតផងដែរ៕

September 23, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 23 ខែកញ្ញា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 22 កញ្ញា 2021 រួមមាន៖

– ឆ្លងថ្មី = 638 នាក់

– ជាសះស្បើយថ្មី = 479 នាក់

– ស្លាប់ថ្មី = 22 នាក់។

ក្នុងចំណោមអ្នកឆ្លងថ្មីទាំង 638 នាក់ មាន៖

– ករណីឆ្លងសហគមន៍ 525 នាក់

– អ្នកដំណើរពីបរទេស 113 នាក់

គិតត្រឹមព្រឹកថ្ងៃទី 23 ខែកញ្ញា ឆ្នាំ 2021 តួលេខ COVID-19 សរុប នៅ កម្ពុជា រួមមាន៖

– អ្នកឆ្លងសរុប=106,619 នាក់

– អ្នកជាសះស្បើយ=99,134 នាក់

– អ្នកស្លាប់=2,176 នាក់

តួលេខ COVID-19 នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុប = 230,882,741 នាក់

– អ្នកជាសះស្បើយ = 207,590,922 នាក់

– អ្នកស្លាប់ = 4,732,838 នាក់

– អ្នកកំពុងព្យាបាល = 18,558,981 នាក់

September 23, 2021

អាជ្ញាធរថៃ ចាប់ខ្លួនមន្ត្រីប៉ូលិសថ្នាក់វរសេនីយ៍ឯកម្នាក់ ដែលមានរថយន្តទំនើបជាង 40 គ្រឿង

ក្រោយពីបានចាប់ខ្លួនវរសេនីយ៍ឯក Thitisan Utthanaphon ដោយជាប់ទាក់ទិននឹងការធ្វើទារុណកម្មលើជនសង្ស័យ ក្រុមមន្ត្រីថៃ ក៏បានរកឃើញថា មន្ត្រីប៉ូលិសរូបនេះ មានរថយន្តទំនើបរហូតដល់ 42 គ្រឿង។

Thitisan Utthanaphon អាយុ 41 ឆ្នាំ ជាអតីតស្នងការប៉ូលិស នៅទីក្រុង Nakhon Sawan ដែលស្ថិតនៅភាគកណ្ដាលប្រទេសថៃ កាលពីថ្ងៃទី 11 កញ្ញា ត្រូវបានចោទប្រកាន់ពីបទសម្លាប់មនុស្ស រំលោភអំណាច រួមនឹងបទចោទប្រកាន់ជាច្រើនផ្សេងទៀត។ Thitisan Utthanaphon ត្រូវបានគេជឿថា បានធ្វើទារុណកម្ម បណ្ដាលឱ្យជនសង្ស័យទាក់ទងនឹងគ្រឿងញៀនម្នាក់ស្លាប់ដោយសារថប់ដង្ហើម ព្រោះតែត្រូវបានគេរុំក្បាលនឹងថង់ប្លាស្ទិក 6 ជាន់ កាលពីខែសីហា។ នេះបើតាមសារព័ត៌មាន AFP។

ករណីស្លាប់ខាងលើត្រូវបានការិយាល័យស្នងការប៉ូលិសរបស់ Thitisan Utthanaphon បិទបាំង និងកត់ត្រាចូលកំណត់ហេតុថា ស្លាប់ដោយសារប្រតិកម្មថ្នាំ។ ក៏ប៉ុន្តែ មេធាវីម្នាក់បានបង្ហើបឱ្យដឹងពីមូលហេតុនៃការស្លាប់របស់ជនសង្ស័យនៅលើបណ្ដាញសង្គម។ បន្ទាប់មក Thitisan ក៏ត្រូវបានផ្ទេរទៅខេត្តក្បែរខាង ដោយសារតែអន្តរាគមន៍ពីឪពុកមិត្តស្រី។

មេធាវីមួយរូបទៀតក៏បានបន្តបញ្ចេញវីដេអូដែលថ្នាក់ក្រោមម្នាក់របស់ Thitisan ថតបាន ដែលបង្ហាញថា Thitisan ច្របាច់កជនសង្ស័យដែលកំពុងជាប់ខ្លោះ ខណៈអ្នកផ្សេងចាប់ដៃជើង។ វីដេអូនេះត្រូវបានគេចែករំលែកពេញបណ្ដាញសង្គម ធ្វើឱ្យប៉ូលិសត្រូវចាប់ Thitisan រួមនឹងមន្ត្រីមួយចំនួន។ Thitisan បានបដិសេធរាល់ការចោទប្រកាន់។

មេធាវី Sittra Biabungkerd ដែលជាអ្នកបង្ហោះវីដេអូខាងលើ បានឱ្យដឹងថា ធ្វើដូច្នេះគឺដើម្បីទាប់ស្កាត់ប៉ូលិស «ជួយគ្នាឯងឱ្យរួចពីទោសមនុស្សឃាត»។

«មនុស្សជាច្រើនអាចយល់ឃើញថា ការប្រើប្រាស់ថង់ប្លាស្ទិកដើម្បីសួរចម្លើយជនសង្ស័យ លែងមានទៀតហើយ ព្រោះតែសម័យកាលបានប្ដូរផ្លាស់។ ប៉ុន្តែ តាមពិត វានៅតែកើតមានឡើងដោយសម្ងាត់» មេធាវីខាងលើបន្ថែម។

ក្រោយពី Thitisan ត្រូវបានចាប់ខ្លួន សារព័ត៌មាននានានាំគ្នាបើកកកាយអំពីការរស់នៅប្រកបដោយភាពហ៊ឺហា និងមានទំនាក់ទំនងជាមួយក្រុមមនុស្សល្បីឈ្មោះរបស់ជងនេះ។ ក្រុមអ្នកស៊ើបអង្កេតក៏បានរកឃើញថា Thitisan មានភូមិគ្រឹះប្រណិតមួយនៅ បាងកក, រថយន្តទំនើប 42 គ្រឿង ក្នុងនោះក៏មាន Lamborghini Aventador 1 គ្រឿង តម្លៃ 1.5 លានដុល្លារ និងទ្រព្យសម្បត្តិប្រមាណ 18 លានដុល្លារ បើទោះប្រាក់ខែរបស់ជននេះត្រឹមប្រហែល 40,000 បាត/ខែ (ជិត 1,200 ដុល្លារ)។

Thitisan Utthanaphon ត្រូវបានគេជឿថា បានធ្វើទារុណកម្ម បណ្ដាលឱ្យជនសង្ស័យទាក់ទងនឹងគ្រឿងញៀនម្នាក់ស្លាប់

«មនុស្សម្នាក់ដែលមានប្រាក់ខែកម្រិតនេះ បែរជាអាចទិញរថយន្តបានជាង 40 គ្រឿង បូករួមទាំងរថយន្តធុនថ្លៃ» Srisuwan Janya ដែលជាសកម្មជនប្រឆាំងអំពើពុករលួយ បញ្ចេញមតិដូច្នេះ និងបានឱ្យដឹងថា អង្គភាពប្រឆាំងអំពើលាងលុយកខ្វក់ត្រូវបានស្នើឱ្យស្រាវជ្រាវលើទ្រព្យសម្បត្តិរបស់ Thitisan។

មួយផ្នែកនៃទ្រព្យរបស់ Thitisan គឺបានមកពីការដេញថ្លៃរថយន្តទំនើបនាំចូលរាប់រយគ្រឿងដែលត្រូវបានស្ថាប័នគយរបស់ប្រទេសថៃ រឹបអូស។ ក្រុមមន្ត្រីស៊ើបអង្កេតគ្រោងនឹងបញ្ជូនសំណុំរឿងទៅកាន់អង្គភាពប្រឆាំងអំពើពុករលួយថ្នាក់ជាតិ នៅថ្ងៃទី 24 កញ្ញា មុនពេលសម្រេចស្នើតុលាការកាត់ទោស៕

September 23, 2021

តួលេខវិជ្ជមាននឹង COVID-19 ថយចុះទាបខ្លាំងនៅទូទាំងពិភពលោក កាលពីសប្ដាហ៍មុន

WHO បានឱ្យដឹងថា តួលេខនៃករណីឆ្លង COVID-19 ទូទាំងសកលលោកកាលពីសប្ដាហ៍មុន បានថយចុះប្រហែល 400,000 នាក់ ធៀបនឹងមួយសប្ដាហ៍មុននោះ ដែលនេះគឺជាការថយចុះដំបូងនៅក្នុងរយៈពេល 2 ខែ។

អង្គការសុខភាពិភពលោក (WHO) បានឱ្យដឹងថា ពិភពលោកបានរកឃើញអ្នកវិជ្ជមានថ្មីចំនួន 3.6 លាននាក់ នៅក្នុង 1 សប្ដាហ៍កន្លងទៅ ពោលគឺថយចុះ 400,000 នាក់ ធៀបនឹងតួលេខអ្នកវិជ្ជមាន 4 លាននាក់ កាលពី 1 សប្ដាហ៍មុននោះ។ តំបន់ចំនួន 2 ដែលត្រូវបានរាយការណ៍ថា ថយចុះច្រើនជាងគេគឺ មជ្ឈិមបូព៌ា (22%) និង អាស៊ីអាគ្នេយ៍ (16%)។ ករណីវិជ្ជមានថ្មីស្ទើរតែទាំងអស់ស្ថិតនៅ សហរដ្ឋអាម៉េរិក, ឥណ្ឌា, អង់គ្លេស, តួកគី និង ហ្វីលីពីន។ វីរុស COVID-19 ប្រភេទ ឌែលតា (Delta) បានបង្ហាញវត្តមាននៅក្នុងប្រទេសចំនួន 185 និងក្លាយជាវ៉ារ្យ៉ង់ដែលលេចធ្លោជាងគេនៅទូទាំងពិភពលោក។

ចំណែកតួលេខអ្នកស្លាប់ដោយសារ COVID-19 នៅទូទាំងពិភពលោក ក៏ថយចុះ 7% នៅក្នុងសប្ដាហ៍កន្លង ដោយមានអ្នកជំងឺ 60,000 នាក់បានស្លាប់។ អាស៊ីអាគ្នេយ៍ គឺជាតំបន់ដែលមានករណីស្លាប់ថយចុះច្រើនជាងគេ (30%)។

ពិភពលោកបានរកឃើញអ្នកវិជ្ជមាននឹង COVID-19 សរុបចំនួន 230,868,745 នាក់ ក្នុងនោះមានអ្នកស្លាប់ 4,732,669 នាក់, ជាសះស្បើយ 207,561,828 នាក់ និង កំពុងព្យាបាលចំនួន 18,574,248 នាក់។

គិតមកដល់បច្ចុប្បន្ន វ៉ាក់សាំង COVID-19 ជាង 6 ពាន់លានដូស ត្រូវបានប្រើប្រាស់នៅទូទាំងសកលលោក ក្នុងនោះ ពលរដ្ឋចំនួន 43.7% បានចាក់យ៉ាងតិច 1 ដូស ប៉ុន្តែ នៅក្នុងបណ្ដាប្រទេសដែលមានប្រាក់ចំណូលទាប អត្រានេះមានត្រឹមតែ 2% ប៉ុណ្ណោះ៕

September 23, 2021

ប្រែក្លាយស្ពៃសាឡាត់ ទៅជា «រោងចក្រ» ផលិតវ៉ាក់សាំងដែលគេអាចហូបបាន

ក្រុមអ្នកវិទ្យាសាស្ត្រកំពុងស្រាវជ្រាវរកវិធីដើម្បីបញ្ចូល DNA ដែលមានផ្ទុកវ៉ាក់សាំងប្រភេទ mARN ទៅក្នុងកោសិការុក្ខជាតិ ដូច្នេះគេអាចបញ្ចូលវ៉ាក់សាំងទៅក្នុងរាងកាយមនុស្សដោយមិនបាច់ប្រើប្រាស់ម្ជុល។

ក្រុមអ្នកវិទ្យាសាស្ត្រប្រចាំសាកលវិទ្យាល័យ California Riverside (UCR) ស្រាវជ្រាវរកវិធីប្រែក្លាយរុក្ខជាតិដែលអាចហូបបានដូចជា ស្ពៃសាឡាត់ជាដើម ឱ្យទៅជា «រោងចក្រ» វ៉ាក់សាំងប្រភេទ mARN និងបង្កើតវ៉ាក់សាំងដែលមនុស្សអាចហូបបាន។ នេះបើតាម Jerusalem Post ចុះផ្សាយកាលពីថ្ងៃទី 18 កញ្ញា។

ជាមួយនឹងប្រាក់ជំនួយ 500,000 ដុល្លារ ពីមូលនិធិវិទ្យាសាស្ត្រជាតិ (NSF) របស់ សហរដ្ឋអាម៉េរិក គម្រោងវិទ្យាសាស្ត្រនេះមានគោលដៅបញ្ចូល DNA ដែលមានផ្ទុកវ៉ាក់សាំង mARN ទៅក្នុងកោសិការុក្ខជាតិ និងទុកឱ្យពួកវាកកើតកូនចៅ ដែលអាចបញ្ជាក់ថា រុក្ខជាតិអាចផលិតវ៉ាក់សាំងគ្រប់គ្រាន់ដើម្បីប្រកួតប្រជែងនឹងការចាក់វ៉ាក់សាំងដោយប្រើម្ជុលបែបបុរាណ ក្រោយមក ពួកគេនឹងកំណត់បរិមាណសមស្រាប។

«លទ្ធផលដ៏អស្ចារ្យគឺថា រុក្ខជាតិមួយដើមនឹងបង្កើតវ៉ាក់សាំង mARN គ្រប់គ្រាន់សម្រាប់មនុស្សម្នាក់។ យើងកំពុងពិសោធវិធីនេះនៅលើស្ពៃស្ពីណាច (spinach) និងស្ពៃសាឡាត់ ជាមួយនឹងគោលដៅរយៈពេលយូរគឺថា គ្រប់គ្នាអាចដាំវានៅក្នុងចំការ។ ក្នុងអនាគត កសិករអាចដាំវាមួយវាលក៏បាន» ជួន ប៉ាប្លូ គីរ៉ាលដូ (Juan Pablo Giraldo) ប្រធានក្រុមស្រាវជ្រាវ និងជាសាស្ត្រាចារ្យផ្នែកវិទ្យាសាស្ត្ររុក្ខជាតិប្រចាំ UCR និយាយដូច្នេះ។

កត្តាសំខាន់នៃវិធីសាស្ត្រនេះគឺ ក្លរ៉ូប្លាស (chloroplasts) ដែលជាអវយវៈតូចនៅក្នុងកោសិការុក្ខជាតិ ជួយបំប្លែងពន្លឺព្រះអាទិត្យទៅជាថាមពល ហៅថា រស្មីសំយោគ ដែលរុក្ខជាតិអាចប្រើប្រាស់បាន។ «ពួកវាគឺជារោងចក្រថាមពលព្រះអាទិត្យដ៏តូចដែលផលិតជាតិស្ករ និងម៉ូលិគុលផ្សេងៗ អនុញ្ញាតឱ្យរុក្ខជាតិលូតលាស់។ ពួកវាក៏ជាប្រភពមិនទាន់ត្រូវបានទាញយកប្រយោជន៍ ដែលអាចជួយបង្កើតម៉ូលិគុលទៅតាមបំណង» គីរ៉ាលដូ ថ្លែងដូច្នេះ។

នៅក្នុងគម្រោងថ្មីនេះ គីរ៉ាលដូ សហការជាមួយ នីកុល ស្ទីនមេត (Nicole Steinmetz) សាស្ត្រាចារ្យផ្នែកបច្ចេកទេសណាណូ នៅសាកលវិទញយាល័យ California San Diego ដើម្បីអាចប្រើប្រាស់បច្ចេកវិទ្យាណាណូដែលក្រុមរបស់លោកស្រីបានបង្កើតឡើង សម្រាប់ការដឹកជញ្ជូនវត្ថុធាតុហ្សែនទៅឱ្យក្លរ៉ូប្លាសក្នុងកោសិការុក្ខជាតិ។ «គំនិតរបស់យើងគឺប្រើប្រាស់គ្រាប់ណាណូធម្មជាតិ ពិសេសគឺវីរុសរុក្ខជាតិ ដើម្បីបញ្ជូនហ្សែនទៅក្នុងរុក្ខជាតិ» ស្ទីនមេត បកស្រាយដូច្នេះ។

បើសិនជាជោគជ័យ ការស្រាវជ្រាវថ្មីនេះអាចប្ដូរផ្លាស់វិធីបញ្ចូលវ៉ាក់សាំងទៅក្នុងរាងកាយមនុស្ស។ ប្រការនេះពិតជាមានសារប្រយោជន៍ខ្លាំង ក្នុងគ្រាដែលមនុស្សជាច្រើននៅតែមានការរារែកក្នុងការចាក់វ៉ាក់សាំង៕

September 22, 2021

Author: សឿន សំណាង