សឿន សំណាង - La Reine Media

អារ៉ាប៊ីសាអូឌីត បើកការសាងសង់ «ទីក្រុងបណ្ដោយត្រង់» ប្រវែងរាប់រយគីឡូម៉ែត្រ

ទីក្រុងអនាគតនៅលើសមុទ្រខ្សាច់ ដែលត្រូវចំណាយទឹកប្រាក់រហូតដល់ មួយសែនលានដុល្លារ (100,000,000,000) មិនប្រើប្រាស់រថយន្ត ហើយដំណើរការទាំងស្រុងដោយថាមពលស្អាត។

ព្រះអង្គម្ចាស់ Mohammed bin Salman របស់ ប្រទេសអារ៉ាប៊ីសាអូឌីត កាលពីខែមករា ឆ្នាំ 2021 បានប្រកាសជាលើកដំបូងនូវគម្រោងសាងសង់ «ទីក្រុងបណ្ដោយត្រង់» (The Line) ដែលមានប្រវែង 170 គីឡូម៉ែត្រ។ បច្ចុប្បន្ន គ្រឿងចក្រនានាកំពុងតែដឹកជញ្ជូនដី និងជីកផ្លូវក្រោមដី ទម្លុះភ្នំ ដើម្បីសាងសង់ទីក្រុងបណ្ដោយត្រង់បីជាន់ រួមមាន តំបន់លើដីសម្រាប់មនុស្សដើរ និងពីរជាន់នៅក្រោមដីសម្រាប់មធ្យោបាយធ្វើដំណើរ និងហេដ្ឋាចរនាសម្ព័ន្ធ។ Nadhmi Al-Nasr ដែលជាអ្នកគ្រប់គ្រងគម្រោង បានឱ្យដឹងថា នេះគឺជាសំណង់ដ៏មហិមា។

ជំនួសឱ្យការសាងសង់ពីចំនុចចាប់ផ្ដើម និងពង្រីកទៅទីជុំវិញ ក្រុមអ្នកអភិវឌ្ឍគម្រោង កំពុងពិចារណាលើការសាងសង់ពីចំនុចចាប់ផ្ដើមចំនួនពីរ ហើយសាងសង់ឆ្ពោះទៅកាន់តំបន់កណ្ដាល។

ដោយលាតសន្ធឹងពីជួរភ្នំនៅភាគពាយព្យនៃ ប្រទេសអារ៉ាប៊ីសាអូឌីត ដល់សមុទ្រក្រហម ទីក្រុងបណ្ដោយត្រង់ នេះ អាចឱ្យមនុស្សមួយលាននាក់រស់នៅបាន ជាមួយនឹងការតភ្ជាប់ដោយផ្លូវល្បឿនលឿន និងមធ្យោបាយធ្វើដំណើរស្វ័យប្រវត្តជាច្រើនប្រភេទ។ សាលារៀន ភោជនីយដ្ឋាន ហាង និងទីតាំងផ្សេងៗ សុទ្ធតែស្ថិតនៅលើរង្វង់ដែលមនុស្សអាចដើរដល់ក្នុងរយៈពេល 5 នាទី និងពុំមានទីតាំងណាមួយដែលត្រូវធ្វើដំណើរលើសពី 20 នាទីនោះឡើយ។

ដោយសារតែមានរូបរាងបណ្ដោយត្រង់ ហើយហេដ្ឋារចនាសម្ព័ន្ធសុទ្ធតែនៅក្រោមដី ដូច្នេះ ទីក្រុងនេះក៏ជួយការពារធម្មជាតិនៅលើដីបាន 95% ផងដែរ។ ប្រជាជនអាចចូលមករស់នៅក្នុងទីក្រុងថ្មីនេះចាប់ពីឆ្នាំ 2024។

ប្រទេសអារ៉ាប៊ីសាអូឌីត វិនិយោគប្រមាណពី មួយសែនលាន ទៅពីរសែនលានដុល្លារ សម្រាប់ការសាងសង់ទីក្រុងបណ្ដោយត្រង់នេះ។ តាមផែនការ គម្រោងនេះនឹងបង្កើតការងារថ្មីដល់មនុស្សចំនួន 380,000 នាក់ និងជួយឱ្យ GDP របស់ប្រទេសនេះកើនបន្ថែមប្រមាណ 48 ពាន់លានដុល្លារ នៅឆ្នាំ 2030។

ទីក្រុងបណ្ដោយត្រង់នេះគឺជាគម្រោងដំបូងមួយដែលស្ថិតក្នុងគម្រោងមេ Neom ដែលជាមហាទីក្រុងស្វយ័តមួយមានតម្លៃ 5 សែនលានដុល្លារ គ្របដណ្ដប់លើផ្ទៃដី 25,900 គីឡូម៉ែត្រក្រឡា នៅក្នុងខេត្ត Tabuk របស់ អារ៉ាប៊ីសាអូឌីត ជិតព្រំដែននៃ ប្រទេសហ្ស៊កដានី និង ប្រទេសអេហ្ស៊ីប។ Neom គឺជាមហាគម្រោងប្រកបដោយមហិច្ឆតាដែលអាចជួយ អារ៉ាប៊ីសាអូឌីត បញ្ចប់ការពឹងផ្អែកលើរ៉ែប្រេង និងប្រែក្លាយប្រទេសនេះទៅជាមជ្ឈមណ្ឌលបច្ចេកវិទ្យាដូចទៅនឹងជ្រលងភ្នំ Silicon នៅ សហរដ្ឋអាម៉េរិក។

ទីក្រុងនេះនឹងប្រើប្រាស់តាក់ស៊ីហោះ រ៉ូបូតដាយណូស័រ និងភោជនីយដ្ឋានកម្រិតផ្កាយ Michelin ខ្ពស់បំផុតក្នុងពិភពលោក។ តំបន់នេះនឹងត្រូវបានប្ដូរផ្លាស់ដោយការប្រើប្រាស់ម៉ាស៊ីនបង្កើតភ្លៀង។ Neom ក៏នឹងមានឧទ្យានផ្កាថ្មធំបំផុតក្នុងលោក ខ្សាច់បញ្ចេញពន្លឺ និងព្រះចន្ទសិប្បនិម្មិតដ៏ធំដែលភ្លឺនៅពេលយប់។ មហាទីក្រុងនេះនឹងប្រើថាមពលដែលបានពីខ្យល់ ពីព្រះអាទិត្យ និងបច្ចេកវិទ្យាទំនើបប្រែក្លាយទឹកឱ្យទៅជាអុកស៊ីសែន និងអ៊ីដ្រូសែន ដើម្បីប្រើប្រាស់ជំនួសប្រេងឥន្ធនៈ៕

November 2, 2021

បុគ្គលិករបស់សម្ព័ន្ធក្រុមហ៊ុន ព្រីនស៍ គ្រុប ទទួលបានជ័យលាភីចំណាត់ថ្នាក់លេខ១ ក្នុងការប្រកួតរចនានិមិត្តសញ្ញាអាស៊ាន ខណៈកម្ពុជាធ្វើជាប្រធានអាស៊ាន នៅឆ្នាំ ២០២២

[រាជធានីភ្នំពេញ, ថ្ងៃទី២ ខែវិច្ឆិកា ឆ្នាំ២០២១] – ព្រីនស៍ ហូលឌីង គ្រុប (ហៅកាត់ថា“ព្រីនស៍ គ្រុប”) ជាពហុក្រុមហ៊ុនមួយក្នុងចំណោមពហុក្រុមហ៊ុនដែលធំជាងគេនិងរីកចម្រើនបំផុតនៅក្នុងប្រទេសកម្ពុជាពិតជាមានមោទកភាពដែល កញ្ញា ឈុត ចិន្តា ជាបុគ្គលិកសញ្ជាតិខ្មែរនៃក្រុមហ៊ុនព្រីនស៍ រៀល អ៊ីស្ទេត (Prince Real Estate ) បានទទួលនូវជ័យលាភីចំណាត់ថ្នាក់លេខ១ ក្នុងការប្រកួតរចនានិមិត្តសញ្ញានៃការធ្វើជាប្រធានអាស៊ានរបស់កម្ពុជា ដែលការប្រកួតប្រជែងនេះមានការរៀបចំដោយក្រសួងការបរទេស និងសហប្រតិបត្តិការអន្តរជាតិរបស់ព្រះរាជាណាចក្រកម្ពុជា (ហៅកាត់ថា “MFAIC”)។ កញ្ញាចិន្តាគឺជាបុគ្គលិកមួយរូប ក្នុងចំណោមបុគ្គលិកដែលបានចូលរួមចំនួន៤រូបរបស់ក្រុមហ៊ុនព្រីនស៍។

សម្រាប់ជ័យលាភីនេះ កញ្ញាចិន្តាបានទទួលនូវរង្វាន់ជាសាច់ប្រាក់ចំនួន១ពាន់ដុល្លារសហរដ្ឋអាមេរិក ពីក្រសួងការបរទេស និងសហប្រតិបត្តិការអន្តរជាតិ (“MFAIC”)។ ដើម្បីទទួលស្គាល់ពីការខិតខំប្រឹងប្រែងនិងស្នាដៃរបស់គាត់ ថ្នាក់គ្រប់គ្រងនៃ សម្ព័ន្ធក្រុមហ៊ុន ព្រីនស៍ គ្រុប បានសម្រេចផ្តល់ប្រាក់រង្វាន់បន្ថែមជូនដល់កញ្ញាចិន្តា នូវចំនួនដូចគ្នាទៅនឹងប្រាក់រង្វាន់ដែលក្រសួងបានផ្តល់ជូនគាត់ផងដែរ។ ចំណែកឯ អ្នកដែលបានចូលរួមចំនួនបីរូបផ្សេងទៀត ក៏បានទទួលបានរង្វាន់ជាការកោតសរសើរលើកទឹកចិត្តផងដែរ។ ចំពោះនិមិត្តសញ្ញាដែលទទួលជ័យលាភីត្រូវបានក្រសួងការបរទេស និងសហប្រតិបត្តិការអន្តរជាតិ (“MFAIC”) បានប្រកាសជាផ្លូវការនៅថ្ងៃទី ២៨ ខែតុលានេះ នៅពេលដែលកម្ពុជាធ្វើជានិមិត្តរូបនៃការកាន់តំណែងជាប្រធានអាស៊ានបន្តពីប្រទេសប្រ៊ុយណេជាផ្លូវការ។

អាស៊ាន ដែលមានឈ្មោះជាផ្លូវការហៅថា សមាគមប្រជាជាតិអាស៊ីអាគ្នេយ៍ (ASEAN) គឺជាសហគមន៍សេដ្ឋកិច្ចដ៏លេចធ្លោ ដែលផ្តល់នូវអត្ថប្រយោជន៍ជូនដល់ប្រទេសដែលជាសមាជិកទាំងឡាយ។ កិច្ចប្រជុំកំពូលអាស៊ានប្រចាំឆ្នាំដែលនឹងប្រព្រឹត្តិទៅនៅក្នុងប្រទេសកម្ពុជាក្នុងឆ្នាំក្រោយនេះ នឹងបង្ហាញពីចំណុចសំខាន់មួយក្នុងការស្តារឡើងវិញក្រោយពីវិបត្តិនៃជម្ងឺរាតត្បាត ខណៈកិច្ចប្រជុំនេះនឹងត្រូវបានសង្កេតមើលយ៉ាងយកចិត្តទុកដាក់ពីអន្តរជាតិ និងមានការចូលរួមពីថ្នាក់ដឹកនាំមន្ត្រីជាន់ខ្ពស់ និងថ្នាក់ដឹកនាំសំខាន់ៗមកពីប្រទេសនានាជុំវិញពិភពលោក។ និមិត្តសញ្ញនេះនឹងក្លាយជារូបភាពតំណាងតែមួយគត់ក្នុងនាមកម្ពុជាធ្វើជាប្រធានអាស៊ាននៅឆ្នាំ២០២២ ហើយក៏នឹងក្លាយជាកេរ្តិ៍ដំណែលដ៏យូរអង្វែងក្នុងប្រវត្តិសាស្ត្រនៃព្រះរាជាណាចក្រកម្ពុជា និងក្នុងកំណត់ត្រាឯកសាររបស់អាស៊ានផងដែរ។

ការរចនានិមិត្តសញ្ញាដែលបានទទួលជ័យលាភីនេះបង្ហាញពី «ផ្កាឈូកចំនួន១០ស្រទាប់ដែលហ៊ុមព័ទ្ធទៅដោយរង្វង់ពណ៌មាសដែលមាននិមិត្តសញ្ញាអាស៊ាននៅចំកណ្តាល»។ កញ្ញាចិន្តាបានធ្វើការពន្យល់ថាគឺតំណាងឱ្យកិច្ចខិតខំប្រឹងប្រែងរួមគ្នានៃប្រទេសជាសមាជិកអាស៊ានទាំង១០ ដែលធ្វើការឆ្ពោះទៅរកគោលដៅរួមគ្នា ក្នុងដំណើរស្វែងរកនូវសុខសន្តិភាពរបស់ពួកគេដើម្បីភាពរុងរឿង និងភាពសុខដុមរមនា។ ពណ៌នៃស្រទាប់ផ្កាឈូកទាំង១០គឺជាដកស្រង់ចេញពីពណ៌ទង់ជាតិរបស់ប្រទេសកម្ពុជា ដែលតំណាងឱ្យប្រទេសកម្ពុជា នឹងក្លាយជាប្រធានហើយក៏ជាប្រទេសម្ចាស់ផ្ទះអាស៊ាននាឆ្នាំ២០២២ផងដែរ។

សិ្ថតក្នុងវ័យ ២៩ ឆ្នាំ កញ្ញាចិន្តាបានចូលបម្រើការងារក្នុងក្រុមហ៊ុន ព្រីនស៍ រៀល អ៊ីស្ទេត(Prince Real Estate ) តាំងពីដើមឆ្នាំ២០២០ បានឱ្យដឹងថានៅពេលទំនេរគាត់ចូលចិត្តគូររូបលេង ហើយក្រោយមកក៏មានការជម្រុញឲ្យចូលរួមប្រកួតប្រជែងជាមួយមិត្តរួមការងារ ទើបក៏ដាក់ពាក្យចូលរួម។ ពេលនោះគាត់ពិតជាមានការភ្ញាក់ផ្អើលជាខ្លាំងដោយនិមិត្តសញ្ញារបស់គាត់ទទួលបានជ័យជម្នះ ប៉ុន្តែគាត់ក៏បានរំពឹងថានិមិត្តសញ្ញានេះវាបង្ហាញពីក្តីសង្ឃឹមរបស់គាត់ថាប្រទេសអាស៊ានទាំង១០នឹងបន្តធ្វើការរួមគ្នាដើម្បីជម្នះបញ្ហាប្រឈម ដែលប្រជាជាតិនីមួយៗកំពុងជួបប្រទះ ហើយអាចសម្រេចបាននូវការអភិវឌ្ឍប្រកបដោយចីរភាពនៅក្នុងអាស៊ានទាំងមូលផងដែរ។

លោក Gabriel Tan នាយកជាន់ខ្ពស់ផ្នែកទំនាក់ទំនងរបស់ ព្រីនស៍ ហូលឌីង គ្រុប បានមានប្រសាសន៍ថា៖ «នៅក្រុមហ៊ុនព្រីនស៍គ្រុប យើងតែងតែរីករាយនៅពេលដែលឃើញបុគ្គលិករបស់យើងបានចូលរួមក្នុងការបង្កើតស្នាដៃថ្មីៗឱ្យកាន់តែទូលំទូលាយនៅក្នុងសហគមន៍ ហើយការរួមចំណែករបស់កញ្ញាចិន្តាគឺជាគំរូដ៏ល្អ សម្រាប់ផ្នត់គំនិតក្នុងនាមជាបុគ្គលិក ដែលអាចស្វះស្វែងរកភាពរកពានរង្វាន់សម្រាប់ស្ថាប័នខ្លួនបាន»។ លោកក៏បានបន្តទៀតថា៖ «ពួកយើងសង្ឃឹមយ៉ាងមុតមាំថានិមិត្តសញ្ញាដែលទទួលបានជ័យលាភីនេះ នឹងក្លាយជាមោទកភាពសម្រាប់ប្រជាជនកម្ពុជាទាំងអស់ ហើយក្នុងនាមជាក្រុមហ៊ុនក្នុងស្រុក យើងនឹងបន្តទៀតជួយគាំទ្រដល់គំនិតផ្តួចផ្តើមក្នុងការធ្វើជាប្រធានអាស៊ានរបស់កម្ពុជានៅឆ្នាំ២០២២នេះ»។

គួរបញ្ញាក់ផងដែរថា ការធ្វើជាប្រធានអាស៊ាននេះត្រូវបានផ្លាស់ប្តូរគ្នាជារៀងរាល់ឆ្នាំដោយផ្អែកទៅលើលំដាប់អក្ខររបស់ប្រទេសដែលជាសមាជិកអាស៊ាននីមួយ។ កម្ពុជាបានចូលរួមក្នុងវេទិកាថ្នាក់តំបន់ក្នុងខែមេសាឆ្នាំ១៩៩៩ ហើយកម្ពុជាបានធ្វើជាប្រធានអាស៊ានលើកចុងក្រោយក្នុងឆ្នាំ២០១។

សម្ព័ន្ធក្រុមហ៊ុន ព្រីនស៍ គ្រុប បានធ្វើសកម្មភាពជាច្រើននៅក្នុងប្រទេសកម្ពុជា ប៉ុន្តែកាលពីពេលថ្មីៗកន្លងទៅនេះ អ្នកឧកញ៉ា ចេន ហ្ស៊ី ( Chen Zhi) ដែលជាប្រធាននៃសម្ព័ន្ធក្រុមហ៊ុន ព្រីនស៍ គ្រុប បានបរិច្ចាគថវិការចំនួន១លានដុល្លារសហរដ្ឋអាមេរិក ជូនដល់រដ្ឋាភិបាលប្រទេសឡាវ ដើម្បីឆ្លើយតបនឹងការអំពាវនាវរបស់អាជ្ញាធរមូលដ្ឋានក្នុងការពង្រឹងកិច្ចសហប្រតិបត្តិការទ្វេភាគីក្នុងការប្រយុទ្ធប្រឆាំងនឹងជំងឺរាតត្បាត។ ថ្មីៗនេះសម្ព័ន្ធក្រុមហ៊ុន ព្រីនស៍ គ្រុប ក៏ត្រូវបានទទួលស្គាល់ដោយសហគ្រាសអាស៊ី (Enterprise Asia) ចំពោះភាពជាសហគ្រិនដែលមានទំនួលខុសត្រូវនៅក្នុងកម្មវិធីពានរង្វាន់សហគ្រាស ដែលមានទំនួលខុសត្រូវប្រចាំនៅតំបន់អាស៊ីឆ្នាំ២០២១ (“AREA”)ផងដែរ។ នេះជាពានរង្វាន់ទីប្រាំមួយហើយ ដែលសម្ព័ន្ធក្រុមហ៊ុន ព្រីនស៍ គ្រុបទទួលបាននៅក្នុងឆ្នាំនេះ ដោយសារតែក្រុមអ្នកវិនិច្ឆ័យថ្នាក់តំបន់ និងអន្តរជាតិបានទទួលស្គាល់ថា សម្ព័ន្ធនេះពិតជាក្រុមហ៊ុនឈានមុខគេក្នុងវិស័យធុរកិច្ចក្នុងតំបន់អាស៊ីក្នុងការជំរុញការអភិវឌ្ឍប្រកបដោយចីរភាពនៅកម្ពុជា និងទូទាំងតំបន់អាស៊ានពិតប្រាកដមែន៕

អំពីក្រុមហ៊ុន ព្រីនស៍ ហូល ឌីង គ្រុប (Prince Holding Group)

ព្រីនស៍ ហូលឌីង គ្រុប (Prince Holding Group) គឺជាសម្ព័ន្ធក្រុមហ៊ុនពហុផលិតផលដ៏ធំមួយនៅកម្ពុជាដែលមានអង្គភាពជាច្រើនធ្វើការផ្តោតលើ វិស័យស្នូលចំនួន ៣ គឺការអភិវឌ្ឍវិស័យអចលនទ្រព្យ សេវាហិរញ្ញវត្ថុ និងសេវាអតិថិជន។

អង្គភាពអាជីវកម្មសំខាន់ៗរបស់ក្រុមហ៊ុន Prince Holding Group នៅកម្ពុជារួមមានក្រុមហ៊ុន Prince Real Estate Group ក្រុមហ៊ុន Prince Huan Yu Real Estate Group ធនាគារ Prince Bank ក្រុមហ៊ុនអាកាសចរណ៍ Cambodia Airways ក្រុមហ៊ុន Belt Road Capital Management ព្រមទាំងក្រុមហ៊ុន Awesome Global Investment Group ។ តាមរយៈក្រុមហ៊ុនបុត្រសម្ព័ន្ធរបស់ខ្លួន ក្រុមហ៊ុន Prince Holding Group មានអាជីវកម្មច្រើនជាង ៨០ នៅក្នុងប្រទេសកម្ពុជាដែលកំពុងប្រតិបត្តិការលើការអភិវឌ្ឍវិស័យអចលនទ្រព្យ ធនាគារ ហិរញ្ញវត្ថុ អាកាសចរណ៍ ទេសចរណ៍ ភស្តុភារ បច្ចេកវិទ្យា ម្ហូបអាហារ និងភេសជ្ជៈ និងវិស័យជីវិតរស់នៅ ។ល។

ការកើនឡើងនូវការវិនិយោគផ្ទាល់ពីបរទេស កិច្ចព្រមព្រៀងពាណិជ្ជកម្មសេរីជាមួយបណ្តាប្រទេសឈានមុខ និងការចូលរួមនាពេលអនាគតនៅក្នុងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ត្រូវបានរំពឹងថានឹង ដើរតួនាទីជាកត្តាលីករដ៏សំខាន់មួយក្នុងការជំរុញសេដ្ឋកិច្ចកម្ពុជា ក្រោមការគាំទ្រពីគំនិតផ្តួចផ្តើមគោលនយោបាយទ្រទ្រង់វិស័យឧស្សាហកម្មរបស់រាជរដ្ឋាភិបាល។

ដោយប្រើបណ្តាញអ្នកជំនាញផ្នែកឧស្សាហកម្ម ពាណិជ្ជកម្ម និងហិរញ្ញវត្ថុនៅទូទាំងទ្វីបអាស៊ី ក្រុមហ៊ុន Prince Holding Group បានកសាងមូលដ្ឋានគ្រឹះជាស្ពានចម្លងដ៏សំខាន់សម្រាប់មូលធនក្នុងស្រុក និងអន្តរជាតិ។ សម្ព័ន្ធនេះប្តេជ្ញាយ៉ាងមុតមាំចំពោះការអភិវឌ្ឍរយៈពេលវែងរបស់ប្រទេសកម្ពុជា។ ជាតួយ៉ាង ក្រុមហ៊ុន Prince Holding Group កំពុងតែអភិវឌ្ឍន៍គម្រោងទេសចរណ៍ និងលំនៅដ្ឋាន ទីក្រុងរាម នាពេលខាងមុខដែលនឹងក្លាយជាគម្រោងអចលនទ្រព្យប្រកបដោយនិរន្តរភាពដំបូងគេបង្អស់នៅកម្ពុជា ក្នុងគោលបំណងធានាបាននូវការវិនិយោគសរុបចំនួន ១៦ ពាន់លានដុល្លារសហរដ្ឋអាមេរិកនៅក្នុងតំបន់។ គម្រោងនេះស្ថិតនៅទីតាំងយ៉ាងងាយស្រួលដោយគ្រាន់តែធ្វើដំណើររយៈពេល ១០ នាទីពីអាកាសយានដ្ឋានអន្តរជាតិខេត្តព្រះសីហនុប៉ុណ្ណោះ ដែលមានគោលបំណងរួមចំណែកដល់ការស្តារសេដ្ឋកិច្ចរបស់ខេត្តព្រះសីហនុ។

សម្រាប់ព័ត៌មានបន្ថែម សូមទាក់ទង៖

កញ្ញាចាន់ សុម៉ាល្លីស
Two Way Public Relations
ទូរសព្ទលេខ៖ +៨៥៥ ៦៩៥៣៣ ៣៣២
អ៊ីម៉ែល៖ [email protected]

November 2, 2021

ស្ថិតិស្ដីពី COVID-19 នៅ កម្ពុជា និងទូទាំងពិភពលោក គិតមកដល់ព្រឹកថ្ងៃទី 2 ខែវិច្ឆិកា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 1 តុលា 2021 រួមមាន៖

– ឆ្លងថ្មី = 89 នាក់
– ជាសះស្បើយថ្មី = 115 នាក់
– ស្លាប់ថ្មី = 6 នាក់។

ក្នុងចំណោមអ្នកឆ្លងថ្មីទាំង 89 នាក់ មាន៖

– ករណីឆ្លងសហគមន៍ 85 នាក់
– អ្នកដំណើរពីបរទេស 4 នាក់

គិតមកដល់ព្រឹកថ្ងៃទី 2 ខែវិច្ឆិកា ឆ្នាំ 2021 តួលេខ COVID-19 សរុបនៅ កម្ពុជា រួមមាន៖

– អ្នកឆ្លងសរុប= 118,702 នាក់
– អ្នកជាសះស្បើយ= 115,017 នាក់
– អ្នកស្លាប់= 2,800 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 247,867,920 នាក់
– អ្នកជាសះស្បើយសរុបជាង = 224,573,930 នាក់
– អ្នកស្លាប់សរុបជាង = 5,020,690 នាក់
– អ្នកកំពុងព្យាបាលសរុបជាង = 18,273,280 នាក់

November 2, 2021

ពលរដ្ឋអាម៉េរិក តុបតែងខ្លួនជាវីរុស COVID-19 និងវ៉ាក់សាំងជាដើម ក្នុងរាត្រីនៃពិធីបុណ្យហាឡូវីន

ប្រជាជនជាច្រើនក្រុម នៅ សហរដ្ឋអាម៉េរិក នាំគ្នាតុបតែងខ្លួនទៅតាមប្រធានបទដែលទាក់ទងនឹង COVID-19 ក្នុងការហែក្បួន នារាត្រីបុណ្យហាឡូវីន លើកដំបូង ក្នុងអំឡុងពីរឆ្នាំកន្លង។

កាលពីយប់ថ្ងៃទី 31 តុលា ទីក្រុងនីវយ៉ក របស់ សហរដ្ឋអាម៉េរិក មានព្រឹត្តិការណ៍ហែក្បួននៅក្នុងពិធីបុណ្យហាឡូវីនដំបូង ក្នុងរយៈពេលជិតពីរឆ្នាំមកនេះ ក្រោយពីព្រឹត្តិការណ៍កាលពីឆ្នាំមុនត្រូវបានលុបចោលដោយសារបម្រាមគោចរប្រឆាំង COVID-19។

ក្នុងព្រឹត្តិការណ៍នេះ មានអ្នកខ្លះពាក់ឈុតដែលបង្ហាញអំពីប័ណ្ណចាក់វ៉ាក់សាំង អ្នកខ្លះជ្រើសរើសឈុតម្ជុលចាក់វ៉ាក់សាំង Pfizer និងអ្នកខ្លះក៏ពាក់ឈុតជារូបរាងរបស់វីរុស COVID-19 ខណៈអ្នកផ្សេងទៀតក៏កាន់រូបគ្រោងឆ្អឹងមនុស្ស។ ទាំងនេះគឺដើម្បីរំលឹកគ្រប់គ្នាឱ្យចងចាំរោគរាតត្បាតនេះ ក៏ដូចជាអំពាវនាវដល់អ្នកដទៃ ឱ្យទៅទទួលការចាក់វ៉ាក់សាំងភ្លាម បើសិនជាអាច។

ហាឡូវីន (Halloween) គឺជាពិធីបុណ្យប្រពៃណីរបស់បណ្ដាប្រទេសលោកខាងលិច ដែលត្រូវបានធ្វើឡើងនៅថ្ងៃទី 31 តុលា រៀងរាល់ឆ្នាំ។

ពិធីបុណ្យហាឡូវីន នេះ ជាចំនុចសម្គាល់នៃការបញ្ចប់រដូវប្រមូលផល និងចាប់ផ្ដើមរដូវរងា។ ទន្ទឹមនឹងនេះ វាក៏ជាពិធីបុណ្យដែលរំលឹកដល់វិញ្ញាណក្ខន្ធរបស់បុព្វបុរសដែលបានលាចាកលោកផងដែរ៕

November 2, 2021

កោះរ៉ុង ជាសួគា៌ និងជាគោលដៅដែលមិនគួរមើលរំលង នៅពេលសម្រេចចិត្តដើរទេសចរណ៍

កោះរង់ដែលមានសម្រស់ដ៏ស្រស់ត្រកាលស្ថិតនៅលំហសមុទ្រនៃខេត្ត ព្រះសីហនុ គឺជាទីតាំងមួយក្នុងចំណោមទីតាំងទាំងបីរបស់ កម្ពុជា ដែលត្រូវបើកទ្វារទទួលភ្ញៀវទេសចរណ៍ ចាប់ពីថ្ងៃទី 30 ខែវិច្ឆិកា ឆ្នាំ 2021។

ការងើបឡើងវិញយ៉ាងលឿននៃវិស័យទេសចរណ៍នឹងស្ដែងឱ្យឃើញកាន់តែច្បាស់ នៅពេល កម្ពុជា សម្រេចបើកដំណើរការសង្គម និងសេដ្ឋកិច្ចឡើងវិញ ពិសេសគឺការបើកទ្វារទទួលទេសចរមកកាន់ទីក្រុង ព្រះសីហនុ និង កោះរ៉ុង នៃខេត្ត ព្រះសីហនុ រួមនឹង តារាសាគរ នៃខេត្ត កោះកុង ចាប់ពីថ្ងៃទី 30 វិច្ឆិកា ហើយបន្ទាប់មកទៀតគឺខេត្ត សៀមរាប ចាប់ពីឆ្នាំ 2022។

ក្រោយជោគជ័យរបស់កម្មវិធី «ប្រអប់ខ្សាច់» Phuket នៅ ប្រទេសថៃ មានប្រទេសជាច្រើនក្នុងតំបន់ ក៏កំពុងជំរុញការអនុវត្តគម្រោងប្រហាក់ប្រហែលនេះ ដើម្បីស្ដារវិស័យទេសចរណ៍ឡើងវិញ។

នៅ កម្ពុជា យុទ្ធនាការចាក់វ៉ាក់សាំងបង្ការ COVID-19 ទទួលបានជោគជ័យយ៉ាងធំធេង ដោយបាននាំមុខគេ ធៀបនឹងប្រទេសភាគច្រើនក្នុងតំបន់។ ជោគជ័យនៃការចាក់វ៉ាក់សាំង រួមនឹងអត្រាអ្នកឆ្លង COVID-19 ថ្មី ត្រឹមក្រោម 100 នាក់/ថ្ងៃ គឺជាកម្លាំងដែលរុញច្រាន កម្ពុជា ដល់ដំណាក់កាលបើកទ្វារសេដ្ឋកិច្ច សង្គម ឡើងវិញ ក្នុងនោះ ទេសចរណ៍គឺជាវិស័យដ៏សំខាន់។

យោងតាមកម្មវិធីទេសចរណ៍នៃខេត្ត ព្រះសីហនុ អ្នកទេសចរណ៍គ្រាន់តែបង្ហាញលិខិតបញ្ជាក់ការចាក់វ៉ាក់សាំង COVID-19, ធានារ៉ាប់រងសុខភាព និងលទ្ធផលតេស្តអវិជ្ជមាន 72 ម៉ោង មុនពេលចេញដំណើរ។ ពួកគេនឹងត្រូវបានអនុញ្ញាតឱ្យដើរកំសាន្តគ្រប់កន្លែងក្នុងរយៈពេល 5 ថ្ងៃ ដោយមិនបាច់ធ្វើចត្តាឡីស័ក។

អ្នកទេសចរណ៍ក៏អាចមុជទឹក គយគន់ផ្កាថ្មផងដែរ

ឋានសួគ៌ធម្មជាតិ ដែលអ្នកទេសចរណ៍មិនគួរមើលរំលង

ជាយូរមកហើយ កម្ពុជា មានឈ្មោះល្បីល្បាញក្នុងពិភពលោក ទាក់ទងនឹងវប្បធម៌ ប្រាសាទបុរាណដ៏ច្រើន និងសម្បូរបែប។ ក៏ប៉ុន្តែ នេះមិនមែនជាទីតាំងទេសចរណ៍តែមួយដែលភ្ញៀវអាចទទួលបានបទពិសោធន៍នោះទេ។ កម្ពុជា នៅមានកោះតូចធំ និងឆ្នេរខ្សាច់ដ៏ស្រស់ស្អាត មិនចាញ់តំបន់ដទៃឡើយ។ ក្នុងនោះ គេក៏មិនត្រូវមើលរំលង កោះរ៉ុង និង កោះរ៉ុងសន្លឹម។

កោះរ៉ុង គឺជាកោះដែលមានផ្ទៃដីធំលំដាប់កំពូលមួយនៅ កម្ពុជា ដោយមានផ្ទៃដី 78 គីឡូម៉ែត្រក្រឡា និងមានឆ្នេរខ្សាច់ប្រកបដោយភាពទាក់ទាញរហូតដល់ 23 កន្លែង។ ទីនេះ ល្បីឈ្មោះថាមានសម្រស់ធម្មជាតិដ៏អស្ចារ្យ ដែលត្រូវបានទេសចរប្រសិទ្ធនាមថា «ឋានសួគ៌» ពេលវេលាល្អបំផុតសម្រាប់ដំណើរកំសាន្តមកកាន់ កោះរ៉ុង គឺក្នុងខែឧសភា និងខែវិច្ឆិកា។ សីតុណ្ហភាពក្នុងអំឡុងពេលនេះ ប្រហែលពី 25 ទៅ 40 អង្សាសេ។

ចាប់ពីខែធ្នូ រហូតដល់ខែមេសា ទឹកសមុទ្រនឹងប្រែជាពណ៌ខៀវស្រងាត់ ឆ្នេរខ្សាច់សក្បុស ស្រស់ស្អាត ជំនោរសមុទ្រដ៏បរិសុទ្ធជាមួយនិងសម្រស់ធម្មជាតិដែលមិនអាចកាត់ថ្លៃបាន ហើយទេសភាពដែលស្រស់ស្អាតបំផុត គឺនៅក្នុងខែកុម្ភៈ។ ឆ្នេរខ្សាច់ល្បីជាងគេរបស់ កោះរ៉ុង មានដូចជា ឆ្នេរឡុងសិត (Long Set), ឆ្នេរខាងនិរតីនៃកោះរុង (Southwestern beach, Kohrong), ឆ្នេរសុខសាន្ត រីសត ឬក៏គេច្រើនហៅថា ឆ្នេរសុខសាន្ត កោះរ៉ុង, ឆ្នេរខ្សាច់ វ៉ៃត៍ (White)។ល។

ភ្ញៀវទេសចរណ៍ដែលបានទៅកំសាន្តនៅតាមឆ្នេរខ្សាច់របស់ កោះរ៉ុង ក៏អាចគយគន់ទេសភាពដ៏ស្រស់អស្ចារ្យនៅពេលព្រះអាទិត្យជិតអស្ដង្គតផងដែរ។

ភ្ញៀវទេសចរមិនបាច់បារម្ភពីការអត់កន្លែងស្នាក់នៅ ហូបចុកនោះទេ ពីព្រោះថានៅទីនេះមានទាំងភោជនីយដ្ឋាន អាហារដ្ឋាន បារ ផ្ទះស្នាក់ ផ្ទះសំណាក់ សណ្ដាគារ បឹងហ្កាឡូ និងរីសតជាដើមបើកបម្រើដល់ភ្ញៀវទេសចរជារៀងរាល់ថ្ងៃ ប៉ុន្តែសូមកក់ទុកមុន ដើម្បីមានភាពងាយស្រួលជាង៕

November 2, 2021

ក្រសួងសុខាភិបាល អំពាវនាវដល់ពលរដ្ឋមិនទាន់បានចាក់វ៉ាក់សាំង រួសរាន់ស្ម័គ្រចិត្តទៅទទួលសេវាកម្ម ដើម្បីការពារសុខភាព

គណៈកម្មការចំពោះកិច្ចចាក់វ៉ាក់សាំង COVID-19 ក្នុងក្របខណ្ឌទូទាំងប្រទេស (គ.វ.ក.១៩) ជូនសេចក្ដីណែនាំស្ដីពីការចាក់វ៉ាក់សាំងដល់កុមារ និងប្រជាពលរដ្ឋអាយុចាប់ពី 6 ឆ្នាំឡើងដែលមិនទាន់បានចាក់វ៉ាក់សាំង ក្រោយពីការប្រកាសបិទយុទ្ធនាការចាក់វ៉ាក់សាំងបង្ការ COVID-19 ជុំទីមួយ។

គ.វ.ក.១៩ បានអំពាវនាវដល់ពលរដ្ឋគោលដៅខាងលើ ប្រញាប់ទៅទទួលការចាក់វ៉ាក់សាំងបង្ការ COVID-19 នៅតាមមន្ទីរពេទ្យបង្អែកនានា។ ការទៅទទួលការចាក់វ៉ាក់សាំងលើកនេះ ក្រសួងសុខាភិបាល មិនតម្រូវឱ្យពលរដ្ឋមានឯកសារបញ្ជាក់ច្រើននោះទេ ដោយគ្រាន់តែយកទៅតាមខ្លួននូវ អត្តសញ្ញាណប័ណ្ណ ឬលិខិតឆ្លងដែន ឬសៀវភៅគ្រួសារ ឬសៀវភៅស្នាក់នៅ ឬសំបុត្រកំណើត ឬសំបុត្របញ្ជាក់កំណើត តែមួយប៉ុណ្ណោះ។

ការអំពាវនាវរបស់ គ.វ.ក.១៩ នេះត្រូវបានធ្វើឡើងបន្ទាប់ពីនៅមានប្រជាពលរដ្ឋមួយចំនួនមិនទាន់ទទួលបានការចាក់វ៉ាក់សាំង ដោយសារមូលហេតុផ្សេងៗ ក្រោយការប្រកាសបិទយុទ្ធនាការចាក់វ៉ាក់សាំង COVID-19 ជុំទីមួយ។

November 2, 2021

(វីដេអូ)-ព្យុះព្រះអាទិត្យ ល្បឿន 4 លានគីឡូម៉ែត្រ/ម៉ោង នឹងវាយលុកពិភពផែនដីនៅចុងសប្ដាហ៍នេះ

ផ្កាយរណបរបស់ NASA ថតបានទិដ្ឋភាពព្យុះព្រះអាទិត្យកំពុងផ្ទុះកញ្ជ្រោលខ្លាំង ធ្វើឱ្យរស្មីអូរ៉ូរ៉ា (aurora) នៅលើផែនដី ប្រែជាបង្ហាញខ្លួនយ៉ាងច្បាស់នៅក្នុងថ្ងៃបុណ្យហាឡូវីន (Halloween)។

វីដេអូពីផ្កាយរណប Solar Dynamics Orbiter របស់ NASA បង្ហាញថា ការកញ្ជ្រោលនៃផ្ទៃខាងលើរបស់ព្រះអាទិត្យកើតឡើងពីថ្ងៃទី 25 ដល់ថ្ងៃទី 28 តុលា និងបញ្ចប់ដោយការផ្ទុះមួយដ៏ធំដែលអាចបង្កើនរស្មីអូរ៉ូរ៉ា នៅលើផែនដីចំថ្ងៃបុណ្យហាឡូវីន។

ព្យុះព្រះអាទិត្យកើតឡើងជាច្រើនបែប ក្នុងនោះមានការផ្ទុះភ្លើងព្រះអាទិត្យ (Solar flare) និងការផ្ទុះកាំរស្មីអូរ៉ូរ៉ា (CME/Coronal Mass Ejections)។ Solar flare គឺជាការផ្ទុះវិទ្យុសកម្មខ្លាំងក្លា បញ្ចេញរលកពន្លឺផូតុង (photon) សំដៅមកកាន់ផែនដី។ កម្លាំងរបស់ការផ្ទុះភ្លើងព្រះអាទិត្យមាន 3 កម្រិតគឺ C, M និង កម្រិត X ក្នុងនេះ X គឺជាកម្រិតខ្លាំងបំផុត។ CME រួមមាន ពពកប្លាស្មា និង ម៉ាញ៉េទិក ដែលបាញ់ចេញពីផ្ទៃខាងលើរបស់ព្រះអាទិត្យ នាំមកជាមួយនូវភាគល្អិតជាច្រើន។ ការផ្ទុះភ្លើងព្រះអាទិត្យ និង ការផ្ទុះកាំរស្មីអូរ៉ូរ៉ា មានប្រភពតែមួយ ដោយកើតឡើងពីការរអាក់រអួលនៃម៉ាញ៉េទិក (disruption of the magnetic) នៅក្នុងតំបន់បរិយាកាសខាងក្រៅរបស់ព្រះអាទិត្យ។

NASA ឱ្យដឹងថា ថ្វីបើការផ្ទុះភ្លើងព្រះអាទិត្យដែលមានផ្ទុកវិទ្យុសកម្មគ្រោះថ្នាក់នេះមិនអាចឆ្លងកាត់បរិយាកាសផែនដីបាន តែវាខ្លាំងគ្រប់គ្រាន់ដែលអាចបង្កការរំខានដល់បណ្ដាញទាក់ទង និង GPS។

ការផ្ទុះភ្លើងព្រះអាទិត្យកាលពីថ្ងៃទី 28 តុលា និងអមដោយ CME បានបញ្ចេញភាគល្អិតដែលផ្ទុកអគ្គិសនី ធ្វើដំណើរក្នុងល្បឿន 4 លានគីឡូម៉ែត្រ/ម៉ោង។ ភាគល្អិតទាំងនេះនឹងមកដល់ពិភពផែនដីនៅចុងសប្ដាហ៍ ហើយអាចធ្វើឱ្យបាតុភូតរស្មីអូរ៉ូរ៉ា កាន់តែខ្លាំងក្លាជាងមុន។

បាតុភូតអូរ៉ូរ៉ា នៅលើផែនដី កើតឡើងនៅពេលភាគល្អិតផ្ទុកអគ្គិសនីពីព្រះអាទិត្យ ប៉ះជាមួយនឹងបរិយាកាសខាងលើរបស់ផែនដី បង្កើតបានជារលកពន្លឺយ៉ាងរស់រវើក។ ដែនម៉ាញ៉េទិករបស់ផែនដី នាំភាគល្អិតផ្ទុកអគ្គិសនី ទៅកាន់តំបន់ប៉ូល ទើបរស្មីអូរ៉ូរ៉ា តែងតែបង្ហាញខ្លួននៅភាគខាងជើង៕

November 1, 2021

ពលរដ្ឋខ្មែរ ដែលកំពុងរស់នៅ និងធ្វើការក្នុង ប្រទេសថៃ អាចទទួលបានវ៉ាក់សាំង COVID-19 ពី កម្ពុជា នាពេលឆាប់ៗខាងមុខ

ដើម្បីជាផ្នែកមួយជួយការពារសុខភាពប្រជាពលរដ្ឋនៅក្រៅប្រទេស ប្រមុខរដ្ឋាភិបាលកម្ពុជា បានបញ្ជាឱ្យមន្ដ្រីជំនាញ សហការជាមួយភាគីថៃ បញ្ជូនវ៉ាក់សាំង COVID-19 ទៅចាក់ជូនប្រជាពលរដ្ឋខ្មែរ ដែលកំពុងរស់នៅ និងធ្វើការនៅក្នុងប្រទេសនេះ។

ក្នុងពិធីបិទយុទ្ធនាការចាក់វ៉ាក់សាំងបង្ការជំងឺ COVID-19 សម្រាប់ពលរដ្ឋដែលមានអាយុ 6 ឆ្នាំឡើង និងបើកយុទ្ធនាការចាក់សម្រាប់ក្មេងអាយុ 5 ឆ្នាំ នាព្រឹកថ្ងៃទី 1 ខែវិច្ឆិកា ឆ្នាំ 2021 នេះ សម្ដេចតេជោ ហ៊ុន សែន បានថ្លែងថា កម្ពុជាសម្រេចបាននូវការចាក់វ៉ាក់សាំងលឿនជាងការកំណត់ ក្នុងរង្វង់ 8 ខែ បន្ទាប់ពីការបើកយុទ្ធនាការដំបូង។

ដើមឡើយ យុទ្ធនាការនៃការចាក់វ៉ាក់សាំងជុំទីមួយ គ្រោងនឹងបញ្ចប់នៅពាក់កណ្តាលឆ្នាំ 2022 ប៉ុន្តែបច្ចុប្បន្ន ការចាក់វ៉ាក់សាំងសម្រេចបានក្នុងអត្រាមួយដ៏ខ្ពស់។

ស្ថានទូតកម្ពុជា សហការជាមួយអាជ្ញាធរថៃ ចុះចែកអំណោយដល់ ពលរដ្ឋខ្មែរដែលរងគ្រោះដោយសារ COVID-19 ស្ថិតនៅឃុំបាងផ្លា ស្រុកបាងភ្លី ខេត្តសមុទ្រប្រាកាន

យ៉ាងនេះក្ដី សម្តេចតេជោ បន្ថែមថា នៅមានប្រជាពលរដ្ឋកម្ពុជា មួយចំនួនទៀតដែលកំពុងរស់នៅក្រៅប្រទេស មិនទាន់បានទទួលការចាក់វ៉ាក់សាំង។ ប្រមុខរដ្ឋាភិបាល ជឿថា ពលរដ្ឋកម្ពុជា នៅ ប្រទេសកូរ៉េខាងត្បូង បានចាក់ 100% នៃចំនួនពលរដ្ឋរបស់កម្ពុជា ខណៈ ជប៉ុន ក៏ចាក់បាន 100% ប៉ុន្តែ នៅ ប្រទេសថៃ និង ម៉ាឡេស៊ី ប្រហែលជាអាចចាក់បានមួយចំនួនប៉ុណ្ណោះ។

ដោយសារតែប្រទេសថៃ មិនទាន់មានវ៉ាក់សាំងគ្រប់គ្រាន់ ដូច្នេះ កម្ពុជា មានបំណងបញ្ជូនវ៉ាក់សាំងទៅកាន់ ប្រទេសថៃ ដោយស្នើឱ្យអាជ្ញាធរថៃ ជួយយកវ៉ាក់សាំងទៅចាក់ជូនពលរដ្ឋកម្ពុជា ដែលកំពុងរស់នៅ និងធ្វើការនៅទីនោះ។

យោងតាមគេហទំព័រ Ourworldindata គិតមកដល់ថ្ងៃទី 30 ខែតុលា ឆ្នាំ 2021 ការចាក់វ៉ាក់សាំង COVID-19 ប្រទេសថៃ រួមមាន៖ ពលរដ្ឋប្រមាណជាង 42% បានចាក់រួចរាល់ ខណៈជាង 17% បានចាក់យ៉ាងតិច 1 ដូស។ ដូច្នេះ ប្រទេសថៃ ទើបតែចាក់វ៉ាក់សាំងបានប្រមាណ 59% ប៉ុណ្ណោះ ធៀបនឹងគោលដៅសរុប៕

November 1, 2021

កម្ពុជា ប្រកាសបើកប្រទេសលើគ្រប់វិស័យឡើងវិញជាបណ្តើរៗ

សម្តេចតេជោ ហ៊ុនសែន ប្រកាសបើកសកម្មភាពសង្គមសេដ្ឋកិច្ចឡើងវិញលើគ្រប់វិស័យជាបណ្តើរៗ ចាប់ពីថ្ងៃទី 1 ខែវិច្ឆិកា ឆ្នាំ 2021 នេះតទៅ ដោយការរស់នៅតាមប្រក្រតីភាពថ្មី ដើម្បីជំរុញកំណើនសេដ្ឋកិច្ចជាតិ។

នាវិមានសន្តិភាព ក្នុងពិធីបិទយុទ្ធនាការចាក់វ៉ាក់សាំងបង្ការជំងឺ COVID-19 សម្រាប់ពលរដ្ឋដែលមានអាយុ 6 ឆ្នាំឡើង និងបើកយុទ្ធនាការចាក់សម្រាប់ក្មេងអាយុ 5 ឆ្នាំ នាព្រឹកថ្ងៃទី 1 ខែវិច្ឆិកា ឆ្នាំ 2021 នេះ ប្រមុខរដ្ឋាភិបាលកម្ពុជា បានមានប្រសាសន៍ថា៖ «ថ្ងៃនេះជាមួយនឹងការប្រកាសបិទបញ្ចប់ជាផ្លូវការនូវយុទ្ធនាការជាតិចាក់វ៉ាក់សាំងជុំទីមួយក្នុងក្របខ័ណ្ឌទូទាំងប្រទេស យើងក៏ប្រកាសបើកទំព័រថ្មីមួយទៀត គឺការរស់នៅជាមួយ COVID-19 ក្នុងក្របខ័ណ្ឌនៃប្រក្រតីភាពថ្មី តាមរយៈការបើកឡើងវិញជាបណ្តើរៗនូវសកម្មភាពសង្គម-សេដ្ឋកិច្ច និងជីវភាពប្រចាំថ្ងៃរបស់ប្រជាជនគ្រប់ផ្នែក និងគ្រប់វិស័យ ប្រសិនបើមិនមានប្រភេទវីរុស COVID-19 បំប្លែងខ្លួនថ្មីដែលអាចបង្កជាហានិភ័យដ៏ធ្ងន់ធ្ងរឡើងវិញដល់សុខភាពសាធារណៈនោះទេ យើងអាចវាយតម្លៃបានថា ប្រទេសជាតិយើងទាំងមូលកំពុងចាប់ផ្ដើមចាកចេញពីវិបត្តិនៃ COVID-19 នេះ ក្នុងភាពរឹងមាំ ត្រឡប់ទៅរកមាគ៌ា នៃកំណើន និងការអភិវឌ្ឍ»។

គិតត្រឹមថ្ងៃទី 31 ខែតុលា ឆ្នាំ 2021 ការចាក់វ៉ាក់សាំងនៅ កម្ពុជា រួមមាន ទីមួយ៖ អាយុ 18 ឆ្នាំ ឡើងទៅ ចាក់បាន 100%, ទីពីរ៖ អាយុ 12 ឆ្នាំ ដល់ 17 ឆ្នាំ ចាក់បាន 97.89% និងទីបី៖ អាយុចាប់ពី 6 ឆ្នាំ ដល់ 11 ឆ្នាំ ចាក់បាន 101.22%។

November 1, 2021

Elon Musk ថា បរិច្ចាគប្រាក់ 6 ពាន់លានដុល្លារដើម្បីដោះស្រាយគ្រោះទុរភិក្សក៏បាន តែអង្គការស្បៀងអាហារពិភពលោក ត្រូវធ្វើរឿងម្យ៉ាង

ទាក់ទងនឹងបញ្ហាខ្វះថវិកាទិញស្បៀងអាហារជួយដល់ប្រជាជនកំពុងជួបគ្រោះអត់ឃ្លា មហាសេដ្ឋីជនជាតិអាម៉េរិក ដើម្បីកំណើតអាហ្វ្រិកខាងត្បូង និយាយថា «បរិច្ចាគ 6 ពាន់លានដុល្លារដើម្បីសង្គ្រោះពិភពលោកក៏បាន» ប៉ុន្តែ លោក Elon Musk ចង់ឱ្យប្រធានស្ថាប័នមួយរបស់អង្គការសហប្រជាជាតិ «បង្ហាញតម្លៃភាពថវិកា» ឱ្យបានច្បាស់លាស់។

លោក Elon Musk ទើបតែបានលើកឡើងនូវប្រតិកម្មចំពោះមតិរបស់ប្រធានអង្គការមួយរូបរបស់អង្គការសហប្រជាជាតិ ដែលនិយាយថា គ្រាន់តែមួយចំណែកដ៏តូចនៃទ្រព្យសម្បត្តិរបស់ក្រុមអ្នកមានបំផុតក្នុងពិភពលោកក៏អាចដោះស្រាយបាននូវគ្រោះទុរភិក្សនៅលើសកលលោក។

មហាសេដ្ឋី Elon Musk បានប្រតិកម្មទៅនឹងមតិមួយរបស់លោក David Beasley ប្រធានកម្មវិធីស្បៀងអាហារពិភពលោករបស់អង្គការសហប្រជាជាតិ តាមរយៈការបង្ហោះសារមួយឃ្លានៅលើបណ្ដាញសង្គម Twitter។

មុននោះ លោក David Beasley ថ្លែងថា៖ «ត្រូវការ 6 ពាន់លានដុល្លារ ដើម្បីសង្គ្រោះមនុស្ស 42 លាននាក់ដែលជិតនឹងអត់បាយស្លាប់។ ប្រការនេះពិតជាពិបាក។ ក្រុមមហាសេដ្ឋី គួរតែធ្វើភ្លាមនៅពេលនេះ»។ ក្រុមមហាសេដ្ឋីដែលលោក Beasley កំពុងនិយាយដល់នៅទីនេះគឺ Elon Musk និង Jeff Bezos ជាដើម ដែលជាអ្នកមានជាងគេក្នុងពិភពលោក។

CEO របស់ក្រុមហ៊ុន Tesla លោក Elon Musk មានទ្រព្យជិត 289 ពាន់លានដុល្លារ នេះបើតាមស្ថិតិរបស់សារព័ត៌មាន Bloomberg។ ប្រការនេះមានន័យថា លោក Beasley កំពុងតែលើកឡើងនូវគំនិតមួយដែលថា លោក Elon Musk គ្រាន់តែបរិច្ចាគប្រហែល 2% នៃទ្រព្យសរុបរបស់ខ្លួនគឺអាចជួយឱ្យមនុស្ស 42 លាននាក់នៅទូទាំងសកលលោក រួចផុតពីគ្រោះទុរភិក្ស។

ឆ្លើយតបនឹងបញ្ហាខាងលើ កំពូលអ្នកមាន Elon Musk និយាយថា បើសិនជាកម្មវិធីស្បៀងអាហារពិភពលោក អាចបង្ហាញតម្លៃភាពថវិកា និងអនុញ្ញាតឱ្យគ្រប់គ្នាបានដឹងអំពីខ្ទង់ថវិកានោះត្រូវបានចំណាយដោយរបៀបណា ហើយ «អាចអធិប្បាយនៅខាងក្រោមសារ Twitter នេះ នូវវិធីជាក់លាក់ដែលថា 6 ពាន់លានដុល្លារ អាចដោះស្រាយគ្រោះទុរភិក្ស ខ្ញុំនឹងលក់ភាគហ៊ុននៅក្រុមហ៊ុន Tesla ភ្លាម ដើម្បីបរិច្ចាគ»។

បច្ចុប្បន្ន សារខាងលើរបស់លោក Elon Musk ទទួលបានការចែករំលែកតៗគ្នាជាង 3 ម៉ឺនលើក និងការចុចចូលចិត្តជាង 2 សែនលើក រួមនឹងការបញ្ចេញមតិជាច្រើនទៀត។

ក្រៅពីការបញ្ចេញមតិផ្ទុយ និងស្រប ការចុចចូលចិត្ត និងការចែករំលែកតគ្នារបស់អ្នកលេងបណ្ដាញសង្គម គេក៏ឃើញគណនី Twitter របស់លោក David Beasley ចូលមកបកស្រាយ៖ «ខ្ញុំអាចធានាបានថា ប្រព័ន្ធគណនីរបស់យើងពិតជាមានតម្លាភាព និងជាសាធារណៈទាំងស្រុង។ ភាគីខាងលោក អាចធ្វើការជាមួយកម្មវិធីស្បៀងអាហារពិភពលោក ដើម្បីធានាចំពោះបញ្ហានេះ»។

ប៉ុន្តែ នៅខាងក្រោមការបកស្រាយរបស់លោក David Beasley មានគណនីមួយដែលមានឈ្មោះថា @CG បានបញ្ចេញមតិថា៖ «ខ្ញុំជឿជាក់ថា គាត់នេះមិនមែនរស់នៅក្នុងផ្ទះដ៏តូចដែលមានតម្លៃតែ 35,000 ដុល្លារ ដូច Elon Musk នោះទេ»៕

November 1, 2021

Author: សឿន សំណាង