សឿន សំណាង - La Reine Media

រមណីយដ្ឋានអង្គរ ជាប់ចំណាត់ថ្នាក់លេខមួយ ជាទីកន្លែងដែលល្អបំផុត សម្រាប់ដំណើរទេសចរណ៍ នៅក្នុងតំបន់អាស៊ីអាគ្នេយ៍

ដំណឹងខាងលើនេះគឺយោងតាមការស្ទង់មតិរបស់ក្រុមហ៊ុនមគ្គុទេសទេសចរណ៍ Touropia ដែលចេញផ្សាយកាលពីពេលថ្មីៗនេះ។

«នៅពេលនិយាយដល់ទីតាំងបុរាណ អ្នកទេសចរណ៍នឹងមិនចង់រំលងចោលរមណីយដ្ឋានអង្គរ នៅខេត្តសៀមរាប ដែលស្ថិតនៅភាគខាងជើង នៃ ប្រទេសកម្ពុជា សោះឡើយ។ រមណីយដ្ឋានអង្គរ បង្កប់ទៅដោយវប្បធម៌ដ៏សំខាន់ៗបំផុតរបស់ពិភពលោក រួមនឹងប្រាសាទអង្គរវត្តដ៏ធំសម្បើម ប្រាសាទបាយ័ន ដែលមានរូបព្រហ្មមុខ 4 ធំៗ និងប្រាសាទតាព្រហ្ម ជាប្រាសាទបែបព្រះពុទ្ធសាសនា ដែលគ្របដណ្តប់ដោយរុក្ខជាតិធំៗ និងខ្ពស់» Touropia រៀបរាប់ដូច្នេះ។

ក្រៅពីរមណីយដ្ឋានអង្គរ កម្ពុជា ក៏នៅមានខេត្ត ព្រះសីហនុ ផងដែរ ដែលបានជាប់ចំណាត់ថ្នាក់លេខ 28 ខណៈ រាជធានីភ្នំពេញ ជាប់ចំណាត់ថ្នាក់លេខ 20។

ចំណាត់ថ្នាក់លេខពីរ ក្នុងចំណោមទីកន្លែងល្អបំផុត សម្រាប់ដំណើរទេសចរណ៍ នៅក្នុងតំបន់អាស៊ីអាគ្នេយ៍ បានទៅលើ កោះបាលី នៃប្រទេសឥណ្ឌូនេស៊ី។ ចំណែកឆ្នេរសមុទ្រហាឡុង នៃប្រទេសវៀតណាម បានជាប់លេខបី៕

November 3, 2021

ស្ថិតិស្ដីពី COVID-19 នៅ កម្ពុជា និងទូទាំងពិភពលោក គិតមកដល់ព្រឹកថ្ងៃទី 3 ខែវិច្ឆិកា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 1 តុលា 2021 រួមមាន៖

– ឆ្លងថ្មី = 85 នាក់
– ជាសះស្បើយថ្មី = 94 នាក់
– ស្លាប់ថ្មី = 7 នាក់។

ក្នុងចំណោមអ្នកឆ្លងថ្មីទាំង 85 នាក់ មាន៖

– ករណីឆ្លងសហគមន៍ 76 នាក់
– អ្នកដំណើរពីបរទេស 09 នាក់

គិតមកដល់ព្រឹកថ្ងៃទី 2 ខែវិច្ឆិកា ឆ្នាំ 2021 តួលេខ COVID-19 សរុបនៅ កម្ពុជា រួមមាន៖

– អ្នកឆ្លងសរុប= 118,787 នាក់
– អ្នកជាសះស្បើយ= 115,111 នាក់
– អ្នកស្លាប់= 2,807 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 248,283,340 នាក់
– អ្នកជាសះស្បើយសរុបជាង = 224,990,300 នាក់
– អ្នកស្លាប់សរុបជាង = 5,028,600 នាក់
– អ្នកកំពុងព្យាបាលសរុបជាង = 18,264,400 នាក់

November 3, 2021

រាជធានីភ្នំពេញ ហាមមិនឱ្យបើកក្លឹបកម្សាន្ត និងខារ៉ាអូខេ ខណៈដែលរាជរដ្ឋាភិបាលបានបើកប្រទេសឱ្យដំណើរការឡើងវិញលើគ្រប់វិស័យ

អភិបាលរាជធានីភ្នំពេញ ឯកឧត្តម ឃួង ស្រេង បានដាក់បទបញ្ជាយ៉ាងម៉ឺងម៉ាត់បំផុត ដោយជំរុញឱ្យអាជ្ញាធរ និងកងកម្លាំងប្រដាប់អាវុធទាំងអស់របស់រាជធានី អនុវត្តវិធានការនៃការហាមមិនឱ្យបើកអាជីវកម្ម ខារ៉ាអូខេ និងក្លឹបកម្សាន្តដែលស្ថិតនៅក្នុងភូមិសាស្ត្ររាជធានីភ្នំពេញ។

បទបញ្ជានេះ ត្រូវបានធ្វើឡើងនៅក្នុងកិច្ចប្រជុំស្ដីពី ការជំរុញការងារចាក់វ៉ាក់សាំងបង្ការជំងឺ COVID-19 នៅ ភ្នំពេញ នារសៀលថ្ងៃទី 2 ខែវិច្ឆិកា ឆ្នាំ 2021 នៅសាលារាជធានីភ្នំពេញ។

ឯកឧត្តម ឃួង ស្រេង បានថ្លែងថា រាជរដ្ឋាភិបាលបានបើកប្រទេសឱ្យដំណើរការឡើងវិញលើគ្រប់វិស័យហើយ ប៉ុន្តែចំពោះក្លឹបកម្សាន្ត និងខារ៉ាអូខេ គឺមិនអនុញ្ញាតឱ្យបើកដំណើរការនោះទេ ខណៈភោជនីយដ្ឋាន និងបៀរហ្គាឌិន ត្រូវបានអនុញ្ញាត។ ការដាក់បម្រាមនេះ ត្រូវបានអភិបាលរាជធានី ពន្យល់ថា ក្លឹបកម្សាន្ត និងខារ៉ាអូខេ គឺជាទីតាំងដែលមានហានិភ័យខ្ពស់បំផុតនៃការឆ្លងរីករាលដាលជំងឺ COVID-19។

ឯកឧត្តម អភិបាល ក៏បានជំរុញឱ្យអាជ្ញាធរ រៀបចំ អនុវត្តការចាក់វ៉ាក់សាំងជូនប្រជាពលរដ្ឋទាំងឡាយដែលមិនទាន់ទទួលបានការចាក់វ៉ាក់សាំងដូសមូលដ្ឋាន ឱ្យបានល្អ នៅពេលពួកគាត់ទៅទទួលការចាក់វ៉ាក់សាំង៕

November 3, 2021

ការពង្រឹងតំណែងប្រទេសម៉ាឡេស៊ី ជាទិសដៅថែទាំសុខភាពឈានមុខគេលើពិភពលោក

ពីឈ្មោះដែលត្រូវបានគេស្គាល់ថាជា គ្រាប់ពេជ្រដែលលាក់ខ្លួននៅអាស៊ី កំពុងវិវត្តខ្លួនទៅជា The World’s Healthcare Marvel ។ ក្នុងរយៈពេលដប់ឆ្នាំចុងក្រោយនេះ ប្រទេសម៉ាឡេស៊ីបានកសាងកេរ្តិ៍ឈ្មោះដ៏រឹងមាំ ដើម្បីក្លាយជាទិសដៅរបស់ភ្ញៀវធ្វើដំណើរទទួលយកការថែទាំសុខភាព ដែលជាទីទុកចិត្ត និងមានសុវត្ថិភាពបំផុត ឈានមុខគេទូទាំងពិភពលោក។

ក្រុមប្រឹក្សាទេសចរណ៍សុខភាពម៉ាឡេស៊ី (MHTC) គឺជាភ្នាក់ងារមួយរបស់រដ្ឋាភិបាល នៅក្រោមក្រសួងសុខាភិបាលម៉ាឡេស៊ី (MOH) ផ្តល់ការទុកចិត្តដើម្បីជួយសម្រួល និងពង្រីកវិស័យ ថែទាំសុខភាពរបស់ប្រទេសម៉ាឡេស៊ី ក្រោមឈ្មោះ ‘Malaysia Healthcare’។

ចាប់តាំងពីការបង្កើតឡើងនៅក្នុងឆ្នាំ 2009 មក ក្រុមប្រឹក្សាទេសចរណ៍សុខភាពម៉ាឡេស៊ី MHTC បានផ្សព្វផ្សាយកេរ្តិ៍ឈ្មោះរបស់ខ្លួនយ៉ាងទូលំទូលាយ ទូទាំងពិភពលោក រហូតធ្វើឱ្យប្រទេសម៉ាឡេស៊ីមានឈ្មោះជា គ្រាប់ពេជ្រដែលលាក់ខ្លួននៅអាស៊ី (Hidden Jewel of Asia) ក្នុងការថែទាំសុខភាព។ កេរ្តិ៍ឈ្មោះនេះបន្តអភិវឌ្ឈន៍ ចាប់ពីឆ្នាំ 2011 ដល់ឆ្នាំ 2019 អ្នកទេសចរណ៍ដែលបានមកដល់ប្រទេសម៉ាឡេស៊ីដើម្បីទទួលយកការថែទាំសុខភាព បានកើនឡើងដល់ 90% ហើយនៅក្នុងឆ្នាំ 2019 ប្រាក់ចំណូលពីវិស័យថែទាំសុខភាពនៅប្រទេសម៉ាឡេស៊ីមានចំនួន 1.7 ពាន់លានរីងហ្គីត ជាមួយនឹងការកើនឡើងក្នុងតំបន់ 17% នៅចន្លោះឆ្នាំ 2015-2019។ នេះបានបង្ហាញពីវិសាលភាព និងសក្តានុពលរបស់ប្រទេសម៉ាឡេស៊ី អាចឈរឈោះ្មជាទិសដៅថែទាំសុខភាពទូទាំងពិភពលោក The World’s Healthcare Marvel ។

MHTC បានធ្វើការយ៉ាងជិតស្និទ្ធជាមួយគ្រប់ស្ថាប័នពាក់ព័ន្ធដែលជាដៃគូសហការណ៍ និងអ្នកផ្តល់សេវាកម្ម ដោយផ្ដោតកាន់តែខ្លាំងទៅលើយុទ្ធសាស្ត្រអភិវឌ្ឍន៍ ដើម្បីលើកកំពស់ផ្នែក ថែទាំសុខភាពនៅប្រទេសម៉ាឡេស៊ី ឆាកអន្តរជាតិ។ មូលដ្ឋានគ្រឹះរបស់ Malaysia Healthcare ត្រូវបានបង្កើតឡើងយ៉ាងរឹងមាំលើសហប្រត្តិបត្តិការរវាង រដ្ឋ និងឯកជន ពោលគឺរវាងគ្រប់ស្ថាប័នពាក់ព័ន្ធនានា រួមមានកន្លែងថែទាំសុខភាពឯកជន ភ្នាក់ងារធានារ៉ាប់រង ក្រុមហ៊ុនអាកាសចរណ៍ ភ្នាក់ងារទេសចរណ៍ ភ្នាក់ងារប្រឹក្សានិងសម្របសម្រួលផ្នែកសុខភាពជាដើម។

ចក្ខុវិស័យ៖ ធ្វើឲ្យប្រទេសម៉ាឡេស៊ីក្លាយជាទិសដៅធ្វើដំណើរដើម្បីទទួលយកការថែទាំសុខភាព ឈានមុខគេទូទាំងពិភពលោក។

បេសកកម្ម៖ លើកកំពស់និងនិរន្តរភាពវិស័យថែទាំសុខភាពប្រទេសម៉ាឡេស៊ីទូទាំងពិភពលោក។

បទពិសោធន៍នៃការធ្វើដំណើរដើម្បីទទួលយកការថែទាំសុខភាពនៅប្រទេសម៉ាឡេស៊ី

ការធ្វើដំណើរដើម្បីទទួលយកការថែទាំសុខភាពនៅប្រទេសម៉ាឡេស៊ីត្រូវបានត្រួតពិនិត្យយ៉ាងហ្មត់ចត់ និងគ្រប់គ្រងយ៉ាងតឹងរ៉ឹងដោយ Ministry of Health ។

ភាពរីកចំរើនជាបន្តបន្តាប់លើវិស័យនេះ ធ្វើឲ្យប្រព័ន្ធថែទាំសុខភាពរបស់ប្រទេសម៉ាឡេស៊ីអាចឈរឈ្មោះលើឆាកអន្តរជាតិ ទាំងគុណភាព និងស្តង់ដាលំដាប់ពិភពលោក ដែលផ្តល់ភាពងាយស្រួល និង ផ្តល់នូវតំលៃសមរម្យ។ ប្រទេសម៉ាឡេស៊ី ជាទិសដៅដែលពេញនិយមបំផុតក្នុងការធ្វើដំណើរ ដើម្បីទទួលយកការថែទាំសុខភាពដ៏ល្អឥតខ្ចោះ ដោយឈរលើគោលការណ៏សុវត្ថិភាពក៏ដូចជាសុខភាពផ្លូវចិត្តរបស់អ្នកជំងឺជាចំបង។ ប្រទេសម៉ាឡេស៊ី ឈរលើយុទ្ធសាស្ត្រប្រទេសកាន់សាសនាឥស្លាម ដែលផ្តល់នូវបដិសណ្ឋារកិច្ចជូនភ្ញៀវទេសចរណ៍យ៉ាងកក់ក្តៅ នេះក៏ជាផ្នែកទាក់ទាញមួយដែលជួយជំរុញភាពលេចធ្លោលើវិស័យថែទាំសុខភាពផងដែរ។

ការទទួលស្គាល់ជាសកលលោក

នេះជាមោទនភាពជាតិ និងជាសក្ខីភាពឆ្លុះបញ្ចាំងពីការដាក់ប្រទេសម៉ាឡេស៊ីឈរឈ្មោះជាគោលដៅទេសចរណ៍ផ្នែកថែទាំសុខភាពឈានមុខគេនៅលើឆាកអន្តរជាតិ

International Medical Travel Journal Awards (2015-2020)
- Health and Medical Tourism: Destination of the year – Malaysia
- Health and Medical Tourism: Cluster of the year – Malaysia Healthcare Travel Council
Best country in the World for Healthcare (2015-2019) by International Living
Top Asian Country for Retirement (2018-2021) by International Living

សេវាកម្មដ៏ល្អឥតខ្ចោះ

សេវាកម្មមើលថែអ្នកជំងឺដ៏ល្អឥតខ្ចោះគឺជាផ្នែកមួយដែលឆ្លុះបញ្ចាំងពី សហប្រត្តិបត្តិការដ៏ជោគជយ័ រវាងដៃគូសហការនានាទាំងរដ្ឋ និងឯកជន។ ការសហការណ៍គ្នាជាមួយដៃគូនៅគ្រប់ផ្នែក ដើម្បីផ្តល់ភាពងាយស្រួល ដល់ភ្ញៀវនិងអ្នកជំងឺ រួមមានការធ្វើដំណើរមកព្យាបាល ពេលមកដល់ និងសូម្បីតែពេលធ្វើដំណើរត្រឡប់ទៅផ្ទះវិញ ។ Malaysia Healthcare ធ្វើការយ៉ាងជិតស្និទ្ធជាមួយអ្នកសម្របសម្រួលផ្នែកថែទាំសុខភាព ក៏ដូចជាភ្នាក់ងារ និងអ្នកតំណាងទីផ្សារប្រចាំតំបន់របស់យើង រួមទាំងប្រទេសចិន ឥណ្ឌូនេស៊ី និងវៀតណាមផងដែរ។ ទាំងនេះគឺដើម្បីធានាបានថា តម្រូវការរបស់អ្នកជំងឺ ត្រូវបានថែទាំយ៉ាងល្អបំផុត។

បង្កើនភាពរឹងមាំ សម្រាប់ទេសចរណ៍ថែទាំសុខភាព

ជំងឺកូវីដ១៩ ប៉ះពាល់យ៉ាងធ្ងន់ធ្ងរស្ទើរគ្រប់វិស័យ រួមទាំងវិស័យថែទាំសុខភាពផងដែរ។ ក្រុមប្រឹក្សាទេសចរណ៍សុខភាពម៉ាឡេស៊ី MHTC កំពុងធ្វើការយ៉ាងសកម្មលើផែនការស្តារឡើងវិញលើវិស័យនេះ ដើម្បីបង្ហាញពីសក្តានុពលនៃវិស័យទេសចរណ៍ថែទាំសុខភាពរបស់ម៉ាឡេស៊ី។ ទាំងនេះរួមបញ្ចូល ទាំងការប្រើប្រាស់ប្រព័ន្ធឌីជីថលក្នុងការផ្សព្វផ្សាយ ដើម្បីប្រាកដថា MHTC ត្រូវបានស្គាល់កាន់តែច្រើនឡើង។

ការងើបឡើងវិញនៃវិស័យទេសចរណ៍ថែទាំសុខភាព គឺពឹងផ្អែកលើកត្តាផ្សេងៗមានដូចជា សន្ទុះយុទ្ធនាការចាក់វ៉ាក់សាំងក្នុងប្រទេស និងជាសកល ក៏ដូចជាការបើកព្រំដែនឡើងវិញ និងទំនុកចិត្តរបស់ភ្ញៀវទេសចរណ៍ក្នុងការធ្វើដំណើរ។ យើងផ្ដល់អទិភាពទៅលើការពង្រីកវិសាលភាពលើវិស័យទេសចរណ៍ថែទាំសុខភាពអោយកាន់តែល្បី និងជាទីពេញនិយម តាមរយៈការខិតខំប្រឹងប្រែងធ្វើឲ្យប្រសើរឡើង និងការអភិវឌ្ឍដើម្បីត្រួសត្រាយផ្លូវរបស់យើងក្នុងការផ្ដល់បទពិសោធន៍ដ៏ល្អឥតខ្ចោះ និងឈានមុខគេលើវិស័យទេសចរណ៍ថែទាំសុខភាពឱ្យបានក្នុងឆ្នាំ២០២។ មធ្យោបាយមួយក្នុងចំនោមផែនការណ៍គោលរបស់យើង គឺការអភិវឌ្ឃន៍លើការផ្តល់ជូនដែលយើងកំពុងមាន និងប្រើផែនការយុទ្ធសាស្ត្រថ្មីដូចជា៖

ធ្វើឲ្យប្រទេសម៉ាឡេស៊ីក្លាយជាទិសដៅទេសចរណ៍ថែទាំនិងព្យាបាលជំងឺបេះដូង និងការគ្មានបុត្រ ប្រចាំតំបន់អាស៊ី៖

មជ្ឈមណ្ឌលព្យាបាលការគ្មានបុត្រ អាស៊ី

មជ្ឈមណ្ឌលព្យាបាលការគ្មានបុត្រធីតារបស់យើង ត្រូវបានបំពាក់ដោយបច្ចេកវិទ្យាទំនើបបំផុត និងអ្នកជំនាញពោរពេញដោយបទពិសោធន៍ ផ្នែកអំប្រ៊ីយ៉ុង ដែលនឹងផ្តល់ជូនការព្យាបាលក្នុងតម្លៃសមរម្យ។ ការគ្រប់គ្រងដ៏ល្អនៃប្រព័ន្ធថែទាំសុខភាពរបស់ប្រទេសម៉ាឡេស៊ី ក៏បានផ្តល់នូវគោលនយោបាយមួយចំនួន ដែលជួយសម្រួលដល់អ្នកធ្វើដំណើរផ្នែកថែទាំសុខភាពដើម្បីទទួលយកការព្យាបាលបញ្ហាការគ្មានគភ៌។

មជ្ឈមណ្ឌលព្យាបាលជំងឺបេះដូង អាស៊ី

ប្រវត្តិដ៏ល្បីល្បាញរបស់ប្រទេសម៉ាឡេស៊ីក្នុងការព្យាបាលជំងឺបេះដូង គឺបានដោយសារតែការខិតខំប្រឹងប្រែងរួមគ្នារវាងសមាគមន៍បេះដូងជាតិម៉ាឡេស៊ី និងក្រសួងសុខាភិបាល។ ភាពជាដៃគូនេះបាននាំមកនូវការអភិវឌ្ឍន៍ ស្រាវជ្រាវ លើការថែទាំនិងព្យាបាលជំងឺទាក់ទងនឹងបេះដូង ព្រមទាំងអភិវឌ្ឍន៍គុណភាពសេវាកម្មផ្នែកវេជ្ជសាស្ត្រ ដើម្បីពង្រឹងជំនាញរបស់យើងក្នុងវិស័យនេះ។

ធ្វើឲ្យប្រទេសម៉ាឡេស៊ីក្លាយជាមជ្ឈមណ្ឌលឯកទេសថែទាំនិងព្យាបាលជំងឺមហារីក

អ្នកធ្វើដំណើរស្វែងរកការព្យាបាលជំងឺមហារីកជាច្រើននាក់ បានទទួលយកការព្យាបាលនៅប្រទេសម៉ាឡេស៊ី ដោយសារមន្ទីរពេទ្យនៅទីនេះ ផ្តល់សេវាកម្មយ៉ាងទូលំទូលាយផ្នែកមហារីក រាប់ចាប់តាំងពីការផ្ដិតយករូបភាពជាក់ស្តែងយ៉ាងលម្អិត រហូតដល់បច្ចេកវិទ្យាស្វែងរកដុំសាច់មហារីក ទាំងនេះគឺដើម្បីសម្រួលដល់ដំណើរការនៃការព្យាបាលរបស់អ្នកជំងឺ។

កម្មវិធីវេជ្ជសាស្ត្រទេសចរណ៍សហប្រជាជាតិ

កម្មវិធីនេះធ្វើឡើងដើម្បីជួយជំរុញ និងលើកកម្ពស់ទម្រង់មន្ទីរពេទ្យដែលជាសមាជិករបស់យើង តាមរយៈការផ្តល់ជូននូវបទពិសោធន៍ដ៏ល្អបំផុតដល់អ្នកជំងឺ និងបង្កើតទីតាំងរួមមួយដើម្បីជាចំណុចសម្គាល់ទៅកាន់អន្តរជាតិ ក្នុងការទទួលយកសេវាកម្មថែទាំសុខភាពលំដាប់ពិភពលោក ដោយឈរលើមូលដ្ឋានឧត្តមភាពនៃសេវាវេជ្ជសាស្ត្រ ការអនុវត្តល្អបំផុត និងឈរឈ្មោះជាអន្តរជាតិ។

ការដាក់ប្រទេសម៉ាឡេស៊ីជាគោលដៅក្នុងការថែទាំមនុស្សចាស់

ប្រទេសម៉ាឡេស៊ីជាប្រទេសមួយដែលឈរលើតារាងកំពូលដែលមានអត្រាប្រជាជនចូលនិវត្តន៍ ច្រើនជាងគេក្នុងតំបន់អាស៊ីអាគ្នេយ៍។ នេះជាកត្តាមួយទាក់ទាញភ្ញៀវទេសចរណ៍ដែលមានបំណងស្វែងរកការថែរទាំសុខភាពដ៏ល្អឥតខ្ចោះប្រកបដោយការយកចិត្តទុកដាក់ និងបានបំពាក់នូវសម្ភារៈ បរិក្ខារពេទ្យទំនើបៗ ស្តង់ដាអន្តរជាតិ។

តាមរយៈអត្តសញ្ញាណពិសេសទាំងអស់នេះ រួមទាំងចំណុចសំខាន់ក្នុងចំណោមចំណុចផ្សេងៗជាច្រើនទៀត យើងជឿជាក់ថា ប្រទេសម៉ាឡេស៊ីនឹងត្រូវបានដាក់បញ្ចូលក្នុងចំណោមទីតាំងផ្សេងទៀតលើសកលលោក ដែលជាទិសដៅឈានមុខគេក្នុងពិភពលោកក្នុងផ្នែកថែទាំសុខភាព ដោយពង្រឹងតួនាទីរបស់យើងជា The World’s Healthcare Marvel ។

November 3, 2021

វ៉ាក់សាំងបង្ការ COVID-19 នាពេលអនាគត អាចគ្រាន់តែជា «បង់បិទលើស្បែក»

វ៉ាក់សាំងមួយប្រភេទដែលដូចទៅនឹងឧបករណ៍បិទលើស្បែក អាចឱ្យជួយមនុស្សក្នុងពិភពលោក ទទួលបានវ៉ាក់សាំងបង្ការ COVID-19 ដោយងាយស្រួល។

ក្រុមអ្នកវិទ្យាសាស្ត្រអូស្ត្រាលី កំពុងស្រាវជ្រាវវ៉ាក់សាំងបង្ការជំងឺ COVID-19 មួយប្រភេទ ដែលអាចរក្សាទុកក្នុងសីតុណ្ហភាពបន្ទប់ និងអាចប្រើប្រាស់ដោយមិនចាំបាច់ប្រើម្ជុលចាក់ដូចសព្វថ្ងៃ។ ព័ត៌មាននៃការស្រាវជ្រាវនេះត្រូវបានចុះផ្សាយនៅលើទស្សនាវដ្ដី Scientific Advances។

ប្រភពព័ត៌មានឱ្យដឹងថា អ្នកវិទ្យាសាស្ត្រមួយក្រុមរបស់សាកលវិទ្យាល័យ Queensland (អូស្ត្រាលី) បានអភិវឌ្ឍវ៉ាក់សាំងបង្ការ COVID-19 ប្រភេទសម្រាប់បិទលើស្បែក។ វាជាឧបករណ៍តូចមួយ មានរាងជារង្វង់មូលសំប៉ែត បិទភ្ជាប់លើកំភួនដៃផ្នែកខាងលើ។ បន្ទះបិទនេះមានទំហំ 7×7 ម.ម។ នៅលើវាមានក្បាលម្ជុលចំនួន 5,000 ដែលមានតួនាទីបញ្ជ្រាបវ៉ាក់សាំងចូលទៅក្នុងស្រទាប់ស្បែក។

មិនដូចទៅនឹងម្ជុលចាក់ថ្នាំបច្ចុប្បន្ន ក្បាលម្ជុលចំនួន 5,000 នេះ មានរូបរាងល្អិតខ្លាំង ដូច្នេះ វាមិនបឺតឈាម ឬប៉ះពាល់ដល់ក្បាលសរសៃវិញ្ញាណដែលនាំឱ្យមានអារម្មណ៍ឈឺនោះឡើយ។

បច្ចេកវិទ្យានេះ ត្រូវបានគេហៅថា បង់ម្ជុលល្អិត (microneedle) ដែលធ្លាប់ត្រូវបានប្រើប្រាស់សម្រាប់បញ្ចូលថ្នាំ អាំងសូលីន ឱ្យអ្នកជំងឺទឹកនោមផ្អែក និងថ្នាំដទៃទៀត។ វ៉ាក់សាំងបង់ម្ជុលល្អិតនេះ ត្រូវបានក្រុមអ្នកវិទ្យាសាស្ត្រនៃសាកលវិទ្យាល័យ Queensland រចនាឡើងដើម្បីការពារមនុស្សពីជំងឺ COVID-19 ប៉ុន្តែ មកដល់បច្ចុប្បន្ន វាទើបតែត្រូវបានពិសោធនៅលើកណ្ដុរប៉ុណ្ណោះ។

ក្រុមអ្នកវិទ្យាសាស្ត្របានអភិវឌ្ឍវ៉ាក់សាំងខាងលើនេះ ដោយវិធីសម្ងួតពិសេស ដើម្បីកែប្រែប្រូតេអ៊ីនបន្លានៅលើ COVID-19 ឱ្យទៅជាទម្រង់ម្សៅ។ ក្រោយមក ពួកគេយកម្សៅនេះទៅលាបលើក្បាលម្ជុលល្អិត។

ក្នុងការពិសោធ ក្រុមស្រាវជ្រាវរកឃើញថា បង់បិទវ៉ាក់សាំងនេះនៅតែមានគុណភាពល្អដដែលក្នុងរយៈពេលមួយខែ នៅក្នុងសីតុណ្ហភាពក្នុងបន្ទប់ និងឡើងដល់មួយសប្ដាហ៍ពេលដាក់ក្នុងសីតុណ្ហភាព 40 អង្សាសេ។ ការពិសោធលើកណ្ដុរបង្ហាញថា បង់បិទវ៉ាក់សាំងនេះបង្កើតបានអង្គបដិប្រាណប្រឆាំង COVID-19 ខ្ពស់ជាង ធៀបនឹងវ៉ាក់សាំងដែលចាក់ដោយម្ជុលធម្មតា។

David Muller ដែលជាអ្នកស្រាវជ្រាវមួយរូបនៅក្នុងក្រុមខាងលើ និងជាអ្នកឯកទេសជាន់ខ្ពស់មួយរូបនៅសាកលវិទ្យាល័យ Queensland ឱ្យដឹងថា៖ «យើងបានទទួលនូវការឆ្លើយតបដ៏អស្ចារ្យ»៕

November 3, 2021

រដ្ឋាភិបាលចិន ណែនាំឱ្យពលរដ្ឋទិញទំនិញចាំបាច់ទុកប្រើប្រាស់ បំណងបង្ការការផ្ទុះឆ្លងរាលដាលថ្មីនៃវីរុស COVID-19

រដ្ឋាភិបាលចិន បានលើកទឹកចិត្តឱ្យប្រជាជនរបស់ខ្លួន ទិញ និងរក្សាទុករបស់របរប្រើប្រាស់ចាំបាច់ នៅក្នុងគ្រាដែលប្រទេសនេះបង្កើនវិធានការទប់ស្កាត់រលកនៃការផ្ទុះឆ្លងវីរុស COVID-19 ជាថ្មី។

សារព័ត៌មាន AFP កាលពីយប់ថ្ងៃទី 1 វិច្ឆិកា បានចេញផ្សាយថា ក្រសួងពាណិជ្ជកម្មរបស់ប្រទេសចិន បង្ហោះសេចក្ដីប្រកាសនៅលើគេហទំព័រផ្លូវការ ស្នើឱ្យ «គ្រួសារទាំងឡាយ រក្សាទុកទំនិញចាំបាច់មួយចំនួនដើម្បីឆ្លើយតបនឹងតម្រូវការប្រចាំថ្ងៃ និងបន្ទាន់»។ ការណែនាំនេះ មិនបាននិយាយអំពីមុខទំនិញណាមួយជាក់លាក់នោះទេ។

ប្រកាសខាងលើក៏បានស្នើឱ្យស្ថាប័នមានសមត្ថកិច្ច បង្កលក្ខណៈងាយស្រួលដល់ការផលិតកសិកផល ការរក្សាប្រភពផ្គត់ផ្គង់ឱ្យបានល្អ ការធានាលើការរក្សាទុកស្បៀងក្នុងតំបន់ និងរក្សាតម្លៃឱ្យមានលំនឹង។ សារព័ត៌មានរដ្ឋចិន កាលពីថ្ងៃទី 1 វិច្ឆិកា បានផ្សាយថា បន្លែចំនួន 28 ប្រភេទ បានឡើងថ្លៃ 16% ធៀបនឹងខែមុន។

ប្រទេសចិន គ្រប់គ្រងវិបត្តិ COVID-19 ក្នុងស្រុកបានល្អ ដោយប្រើយុទ្ធសាស្ត្រជាច្រើន ដូចជា ការបិទទ្វារព្រំដែន ការបិទខ្ទប់គោលដៅ និងការធ្វើចត្តាឡីស័ករយៈពេលយូរ។ ប្រទេសនេះកំពុងបង្កើនការអនុវត្តវិធានការតឹងរ៉ឹង ដើម្បីទប់ស្កាត់ការឆ្លងរាលដាលថ្មី ពិសេស នៅមុនព្រឹត្តិការណ៍កីឡាអូឡាំពិករដូវរងា 2022 (2022 Winter Olympics) ដែលគ្រោងនឹងបើកការប្រកួតនៅថ្ងៃទី 4 ខែកុម្ភៈ ឆ្នាំ 2022។

វិធានការតឹងរ៉ឹង បានជួយឱ្យតួលេខនៃករណីឆ្លងថ្មីនៅប្រទេសនេះ មានត្រឹមតែខ្ទង់រាប់សិបប៉ុណ្ណោះក្នុងមួយថ្ងៃ។ គិតមកដល់បច្ចុប្បន្ន ប្រទេសចិន មានអ្នកឆ្លង COVID-19 សរុបចំនួន 97,314 នាក់ ក្នុងនោះមានអ្នកស្លាប់សរុប 4,636 នាក់ និងកំពុងព្យាបាលចំនួន 912៕

November 3, 2021

CDC របស់ អាម៉េរិក យល់ព្រមឱ្យចាក់វ៉ាក់សាំង COVID-19 របស់ Pfizer ដល់កុមារអាយុពី 5-11 ឆ្នាំ

ក្រុមមន្ត្រីសុខាភិបាលរបស់ សហរដ្ឋអាម៉េរិក កាលពីថ្ងៃទី 2 វិច្ឆិកា បានឱ្យដឹងថា ប្រទេសនេះអាចចាប់ផ្ដើមយុទ្ធនាការចាក់វ៉ាក់សាំងបង្ការជំងឺ COVID-19 ដោយប្រើប្រាស់ផលិតផលរបស់ក្រុមហ៊ុន Pfizer/BioNTech សម្រាប់កុមារដែលមានអាយុចាប់ពី 5 ឆ្នាំ ដល់ 11 ឆ្នាំ ចាប់ពីថ្ងៃទី 8 វិច្ឆិកា បន្ទាប់ពីត្រូវបានអនុម័តជាចុងក្រោយរួចមក។

មជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) របស់ សហរដ្ឋអាម៉េរិក បានយល់ព្រមតាមសំណើរបស់ក្រុមប្រឹក្សាវិទ្យាសាស្ត្រស្ដីពីការចាក់វ៉ាក់សាំង COVID-19 របស់ Pfizer សម្រាប់កុមារអាយុពី 5 ដល់ 11 ឆ្នាំ បន្ទាប់ពីបានរកឃើញថា ផលប្រយោជន៍មានច្រើនលើសលុបបើធៀបនឹងហានិភ័យ។

មុននោះ ស្ថាប័នគ្រប់គ្រងអាហារ និងឱសថ (FDA) របស់ អាម៉េរិក បានអនុម័តឱ្យចាក់វ៉ាក់សាំង COVID-19 របស់ Pfizer/BioNTech សម្រាប់កុមារអាយុពី 5 ដល់ 11 ឆ្នាំ។ ដូច្នេះ ពេលនេះ សហរដ្ឋអាម៉េរិក អាចបើកយុទ្ធនាការចាក់វ៉ាក់សាំងដល់កុមារចំនួន 28 លាននាក់នៅប្រទេសនេះ។ រដ្ឋាភិបាលអាម៉េរិក បានឱ្យដឹងថា បានទិញវ៉ាក់សាំងគ្រប់ចំនួនរួចហើយ និងកំពុងបែងចែកទៅតាមតំបន់នានានៅទូទាំងប្រទេស៕

November 3, 2021

មូលនិធិមហាសេដ្ឋី Jeff Bezos និង Rockefeller រួមនឹងក្រុមកំពូលអ្នកមាន ប្រកាសបរិច្ចាគរាប់សែនលានដុល្លារ ដើម្បី «សង្គ្រោះពិភពលោក»

មូលនិធិរបស់ត្រកូល Rockefeller, មហាសេដ្ឋី Jeff Bezos និង Ikea បានប្រកាសគម្រោងបង្កើតសម្ព័ន្ធថាមពលសកលសម្រាប់មនុស្សជាតិ និងពិភពផែនដី ក្នុងបំណងជួយដល់រដ្ឋាភិបាលនានា និងក្រុមអ្នកមាន អាចរួមចំណែក ជំរុញដំណើរការនៃការប្ដូរផ្លាស់ថាមពលនៅក្នុងបណ្ដាប្រទេសក្រីក្រ។

នៅក្នុងថ្ងៃដំបូងនៃសន្និសីទស្ដីពីអាកាសធាតុរបស់ អង្គការសហប្រជាជាតិ (COP26) ក្រុមសប្បុរសជន បានសន្យាថានឹងបរិច្ចាគថវិកា ដើម្បីគោលដៅទប់ទល់នឹងការប្រែប្រួលអាកាសធាតុ ក្នុងនោះ មូលនិធិរបស់ត្រកូល Rockefeller និង Ikea បានប្រកាសគម្រោងបង្កើតសម្ព័ន្ធភាពថាមពលសកលសម្រាប់មនុស្សជាតិ និងផែនដី។

អង្គការខាងលើ រួមនឹងស្ថាប័នហិរញ្ញវត្ថុ ស្ថាប័នអភិវឌ្ឍពហុគោលដៅ ចំនួន 8 ផ្សេងទៀត នឹងចាប់ផ្ដើមប្រើប្រាស់ថវិកា 10 ពាន់លានដុល្លារដំបូង ដើម្បីធ្វើការសាកល្បងនូវយុទ្ធសាស្ត្រ និងបច្ចេកវិទ្យាថ្មី ក្នុងទិសដៅជួយដល់ការអភិវឌ្ឍថាមពលប្រើប្រាស់ឡើងវិញនៅលើពិភពលោក។ បណ្ដាតំបន់ដែលនៅមានការរារែកក្នុងការប្ដូរផ្លាស់មកប្រើប្រាស់ថាមពលស្អាត នឹងទទួលបានការជំរុញខ្លាំងក្លា។ នៅពេលដំណាក់កាលដំបូងមានប្រសិទ្ធភាព ពួកគេគ្រោងនឹងទូទាត់ខ្ទង់វិនិយោគ មួយសែនលានដុល្លារបន្ថែមទៀតដើម្បីពង្រីកផែនការ។

ក្នុងគ្រានោះដែរ មូលនិធិ Bezos Earth Fund បានឱ្យដឹងថា នឹងផ្ដល់ជំនួយ 500 លានដុល្លារសម្រាប់គំនិតផ្ដួចផ្ដើមខាងលើ។ ក្រៅពីនេះ មូលនិធិនេះក៏សន្យាបរិច្ចាគបន្ថែម 1 ពាន់លានដុល្លារទៀត ដើម្បីជួយឱ្យធម្មជាតិរស់ឡើងវិញ មានដូចជាការដាំដើមឈើ និងការពង្រស់ស្មៅនៅតាមទីវាល។ល។ រួមនឹងខ្ទង់ថវិកាប្រហាក់ប្រហែលដើម្បីផ្លាស់ប្ដូរប្រព័ន្ធស្បៀងអាហារ ដោយការបង្កើនផលិតភាពកសិផល ប៉ុន្តែនៅតែធានាឱ្យបានថា ការបំភាយឧស្ម័នផ្ទះកញ្ចក់ត្រូវបានកាត់បន្ថយ។

កម្មវិធីខាងលើត្រូវប្រកាសនៅក្នុងថ្ងៃដំបូងនៃព្រឹត្តិការណ៍ COP26 ដែលត្រូវបានធ្វើឡើងនៅ Glasgow ប្រទេសស្កុតឡេន។ គោលដៅរបស់ COP26 គឺបង្កើនការសន្យាកាលពីឆ្នាំ 2009 របស់បណ្ដាប្រទេសអ្នកមាន ក្នុងការផ្ដល់ជំនួយសម្រាប់ដំណើរការនៃការប្ដូរផ្លាស់ថាមពលនៅក្នុងបណ្ដាប្រទេសក្រីក្រ ជាមួយនឹងខ្ទង់ចំណាយ មួយសែនលានដុល្លារ/ឆ្នាំ៕

November 2, 2021

ប្រធានម្នាក់របស់អង្គការសហប្រជាជាតិ សុំជួប Elon Musk ដោយផ្ទាល់ សម្បីតែនៅទីអវកាស ដើម្បីរៀបរាប់អំពី ប្រាក់ 6 ពាន់លានដុល្លារនឹងដោះស្រាយគ្រោះទុរភិក្សដោយវិធីណា

ក្រោយការឆ្លើយឆ្លងគ្នានៅលើបណ្ដាញសង្គមនាពេលកន្លង ថ្មីៗនេះ ប្រធានមួយរូបរបស់អង្គការសហប្រជាជាតិ បានស្នើសុំជួបមុខមហាសេដ្ឋី Elon Musk ដោយផ្ទាល់ ដើម្បីអធិប្បាយអំពីរបៀបនៃការប្រើប្រាស់ថវិកា 6 ពាន់លានដុល្លារ ក្នុងការសង្គ្រោះប្រជាជនរាប់លាននាក់ដែលកំពុងរងគ្រោះទុរភិក្ស។

ការឆ្លងឆ្លើយគ្នារវាងលោក David Beasley ប្រធានកម្មវិធីស្បៀងអាហារពិភពលោក របស់ អង្គការសហប្រជាជាតិ ជាមួយនឹងមហាសេដ្ឋី Elon Musk បានចាប់ផ្ដើមដោយកិច្ចសម្ភាសរបស់លោក Beasley ជាមួយនឹង CNN ដែលកាលណោះលោកបាននិយាយថា៖ ក្រុមមហាសេដ្ឋីគួរតែបរិច្ចាគនៅពេលនេះ និងតែម្ដងគត់។ 42 ពាន់លានដុល្លារ ដើម្បីជួយដល់ប្រជាជនចំនួន 42 លាននាក់ ដែលជាអ្នកនឹងត្រូវស្លាប់ បើសិនយើងមិនបានជួយពួកគេ។ រឿងនេះមិនស្មុគស្មាញឡើយ។

ក្រោយមក មហាសេដ្ឋី Elon Musk ដែលមានទ្រព្យប្រមាណជិត 289 ពាន់លានដុល្លារ បានបង្ហោះសារនៅលើ Twitter ថា៖ បើសិនជាកម្មវិធីស្បៀងអាហារពិភពលោក អាចបង្ហាញតម្លៃភាពថវិកា និងអនុញ្ញាតឱ្យគ្រប់គ្នាបានដឹងអំពីខ្ទង់ថវិកានោះត្រូវបានចំណាយដោយរបៀបណា ហើយ «អាចអធិប្បាយនៅខាងក្រោមសារ Twitter នេះ នូវវិធីជាក់លាក់ដែលថា 6 ពាន់លានដុល្លារ អាចដោះស្រាយគ្រោះទុរភិក្ស ខ្ញុំនឹងលក់ភាគហ៊ុននៅក្រុមហ៊ុន Tesla ភ្លាម ដើម្បីបរិច្ចាគ»។

ភ្លាមនោះ លោក David Beasley ក៏ចូលមកឆ្លើយឆ្លង ដោយអះអាងថា លោកអាចធានាបានថា ប្រព័ន្ធគណនីរបស់ស្ថាប័ននេះ មានតម្លាភាព ហើយថា ក្រុមរបស់លោក Musk អាចពិនិត្យ និងធ្វើការជាមួយក្រុមរបស់លោកបាន។

មកដល់ថ្ងៃនេះ លោក Beasley បន្តឆ្លើយឆ្លងជាមួយលោក Elon Musk។ លើកនេះ លោកបាន tag គណនី Twitter របស់លោក Elon Musk ចូលក្នុងសាររបស់លោក ហើយប្រាប់ថា៖ «ជំនួសឱ្យការបង្ហោះសារឆ្លើយឆ្លង សូមអនុញ្ញាតឱ្យខ្ញុំអធិប្បាយឱ្យលោកបានជ្រាប។ ខ្ញុំត្រៀមខ្លួនសម្រាប់ជួបលោកនៅគ្រប់កន្លែងក្នុងពិភពលោក សូម្បីតែនៅទីអវកាស។ ប៉ុន្តែ ខ្ញុំយល់ថា ល្អបំផុតគឺនៅកន្លែងដែលលោកអាចមើលឃើញបុគ្គលិក សកម្មភាព ដំណើរការ និងបច្ចេកវិទ្យារបស់ WFP ប្រព្រឹត្តទៅដោយរបៀបណា។ ខ្ញុំនឹងនាំយកគម្រោងនោះទៅជំរាបជូនលោក»។

នៅខាងក្រោមអត្ថបទរបស់លោក David Beasley ដែលបង្ហោះនៅលើបណ្ដាញសង្គម Twitter បច្ចុប្បន្ន មានមតិស្រប និងផ្ទុយជាច្រើន៕

November 2, 2021

សិស្សានុសិស្ស អាចប្រើប្រាស់ប័ណ្ណចាក់វ៉ាក់សាំងថតចម្លង ចៀសវាងការបាត់បង់ច្បាប់ដើម

សារសំឡេងពិសេសរបស់ សម្ដេចតេជោ ហ៊ុន សែន ទាក់ទងនឹងការប្រើប័ណ្ណចាក់វ៉ាក់សាំងថតចម្លងសម្រាប់សិស្សានុសិស្សនេះ ត្រូវបានធ្វើឡើងនៅថ្ងៃទី 2 ខែវិច្ឆិកា ឆ្នាំ 2021 បន្ទាប់ពីមានការអនុញ្ញាតឱ្យបើកដំណើរការសាលារៀនឡើងវិញក្រោយពីយុទ្ធនាការចាក់វ៉ាក់សាំង COVID-19 ជុំទីមួយទទួលបានជោគជ័យ។

នៅក្នុងសារជាសំឡេងនេះ ប្រមុខរដ្ឋាភិបាល បានស្នើឱ្យរដ្ឋមន្ត្រីក្រសួងអប់រំ រៀបចំអនុញ្ញាតឱ្យប្រើប័ណ្ណចាក់វ៉ាក់សាំងថតចម្លងសម្រាប់សិស្សានុសិស្សយកទៅសាលារៀនដើម្បីការពារការបាត់បង់ ឬខូចខាតច្បាប់ដើមនៃប័ណ្ណចាក់វ៉ាក់សាំង។

https://www.youtube.com/watch?v=n-bb3TsfjiU

ការចាក់វ៉ាក់សាំងនៅកម្ពុជា គិតត្រឹមថ្ងៃទី 1 ខែវិចិ្ឆកា ឆ្នាំ 2021 រួមមាន៖

– អាយុ 6 ឆ្នាំ – 11 ឆ្នាំ = 101.46%
– អាយុ 12 – 17 ឆ្នាំ = 97.93%
– អាយុ 18 ឆ្នាំ ឡើងទៅ = 100.05%

November 2, 2021

Author: សឿន សំណាង