សឿន សំណាង - La Reine Media

មួយថ្ងៃចាយអស់ 10,000 ដុល្លារ! តើអ្នកនឹងត្រូវចំណាយពេលប៉ុន្មានឆ្នាំទើបចាយអស់ប្រាក់របស់មហាសេដ្ឋី Elon Musk?

បើនិយាយឱ្យលើសបន្តិច ប្រាក់ទាំងអស់របស់មហាសេដ្ឋីអាម៉េរិក ដើមកំណើតអាហ្វ្រិក លោក Elon Musk បើទោះយកទៅដុតក៏មិនងាយនឹងអស់ដែរ។

ក្នុងពេលបច្ចុប្បន្ន លោក Elon Musk គឺជាអ្នកមានជាងគេបង្អស់ក្នុងពិភពលោក។ ជាមួយនឹងទ្រព្យជាង 300 ពាន់លានដុល្លារអាម៉េរិក (ជាក់ស្ដែងគឺ 315.6 ពាន់លានដុល្លារ) លោក Musk មានជាងមហាសេដ្ឋី Jeff Bezos រហូតដល់ 100 លានដុល្លារអាម៉េរិក។

ប៉ុន្តែ តើប្រាក់ចំនួន 315 ពាន់លានដុល្លារ ច្រើនដល់កម្រិតណា? បើសិនជាប្រាក់ចំនួន 315 ពាន់លានដុល្លារខាងលើជារបស់អ្នក ហើយក្នុងមួយថ្ងៃ អ្នកចាយអស់ 10,000 ដុល្លារ តើអ្នកនឹងត្រូវប្រើពេលប៉ុន្មានឆ្នាំ ដើម្បីចាយឱ្យអស់ប្រាក់នេះ?

តាមការគណនា អ្នកនឹងត្រូវប្រើពេលប្រមាណរហូតដល់ជាង 315,00,000 ថ្ងៃ ដែលស្មើនឹង 86,300 ឆ្នាំ ទើបអាចចាយអស់ប្រាក់ចំនួន 315 ពាន់លានដុល្លារនេះ។ សូមបញ្ជាក់ថា តួលេខនេះ គ្រាន់តែជាការគណនាក្រៅផ្លូវការប៉ុណ្ណោះ ហើយវាអាស្រ័យទៅលើតម្លៃពិតនៃទ្រព្យរបស់មហាសេដ្ឋី Elon Musk។

មហាសេដ្ឋី Elon Musk (Elon Reeve Musk FRS) មានសញ្ជាតិចំនួន 3 គឺ អាម៉េរិក កាណាដា និងអាហ្វ្រិកខាងត្បូង។ បច្ចុប្បន្ន លោកមានអាយុ 50 ឆ្នាំ។ លោក Musk តែងតែជាទីចាប់អារម្មណ៍របស់សាធារណជន មិនថានៅលើបណ្ដាញសង្គម មិនថានៅលើទំព័រសារព័ត៌មាន។ លោកគឺជានាយកប្រតិបត្តិរបស់ក្រុមហ៊ុនអវកាស SpaceX និងក្រុមហ៊ុនផលិតរថយន្តអគ្គិសនី Tesla៕

November 4, 2021

ស្ត្រីដើមកំណើតអាស៊ី វ័យ 35 ឆ្នាំ ក្លាយជាអភិបាលក្រុង នៅ សហរដ្ឋអាម៉េរិក

លោកស្រី Michelle Wu អាយុ 35 ឆ្នាំ ដែលជាពលរដ្ឋអាម៉េរិក ដើមកំណើតអាស៊ី ត្រូវបានបោះឆ្នោតជ្រើសរើសជាអភិបាលក្រុងភេទស្រីដំបូងបង្អស់របស់ Boston ក្រោយពីជិត 200 ឆ្នាំ ដែលទីក្រុងនេះជ្រើសរើសមេដឹកនាំជាបុរសស្បែកស។

លោកស្រី Michelle Wu សមាជិកបក្សប្រជាធិបតេយ្យ ដែលបានយកឈ្នះលើគូប្រជែង Annissa Essaibi George មកពីបក្សជាមួយគ្នា កាលពីថ្ងៃទី 2 វិច្ឆិកា ក្លាយជាអភិបាលក្រុងភេទស្រីដំបូងបង្អស់របស់ Boston ដែលជាក្រុងរដ្ឋបាលរបស់រដ្ឋ Massachusetts។ លោកស្រី Wu នឹងស្បថចូលកាន់តំណែងនៅថ្ងៃទី 16 វិច្ឆិកាខាងមុខ។

Essaibi George ក៏បានទទួលស្គាល់បរាជ័យរបស់ខ្លួន និងបានអបអរលោកស្រី Wu ដែលក្លាយជាស្ត្រី ក៏ដូចជាជនជាតិអាម៉េរិក ដើមកំណើតអាស៊ី ដំបូងគេ ដែលបានជាប់ឆ្នោតជាអភិបាលក្រុង Boston។

ការសន្យាពីរចំនុចដែលប្រកបដោយមហិច្ឆតាជាងគេរបស់លោកស្រី Wu គឺការផ្ដោតទៅលើផ្ទះសម្បែង និងចរាចរណ៍សាធារណៈ ដែលជាបញ្ហាប្រចាំថ្ងៃរបស់ប្រជាជនជាង 675,000 នាក់នៅក្នុងទីក្រុងនេះ។ ឧបសគ្គផ្សេងទៀតដែលលោកស្រីត្រូវប្រឈម រួមមាន បញ្ហាអប់រំ សង្គ្រាមប្រឆាំង COVID-19 និងបញ្ហាប្រែប្រួលអាកាសធាតុ។

លោកស្រី Wu មានឱពុក ម្ដាយជាជនអន្តោប្រវេសន៍មកពី កោះតៃវ៉ាន់។ លោកស្រីធំឡើងនៅ Chicago និងបានទៅរស់នៅក្នុងទីក្រុង Boston ដើម្បីសិក្សានៅសាកលវិទ្យាល័យ Harvard។ លោកស្រីធ្លាប់ជាស្ត្រីដើមកំណើតអាស៊ីដំបូងគេដែលបានជាប់ឆ្នោតជាសមាជិកក្រុមប្រឹក្សាក្រុង Boston កាលពីឆ្នាំ 2013 នៅក្នុងវ័យ 28 ឆ្នាំ ហើយ 3 ឆ្នាំបន្ទាប់ លោកស្រីក៏បានក្លាយជាប្រធានក្រុមប្រឹក្សាក្រុង៕

November 4, 2021

3 ជំហានត្រូវអនុវត្ត ដើម្បីអាចធ្វើអាណានិគមលើពិភពព្រះអង្គារបាន នៅឆ្នាំ 2040 (វីដេអូ)

ដើម្បីអាចរស់នៅលើភពព្រះអង្គារបាន មនុស្សលោកត្រូវរកវិធីសុវត្ថិភាពដើម្បីហោះឡើងទៅកាន់ឋានមួយនេះ រួចបង្កើតខ្យល់អុកស៊ីសែន និងទឹក ដាំដំណាំ និងសាងសង់ទីជម្រក។

បច្ចុប្បន្ន មានតែភពមួយគត់ដែលមានសក្ដានុពល អាចនាំឱ្យមនុស្សឈានដល់ការពង្រីកដែនដីអាណានិគមនៅខាងក្រៅផែនដី នោះគឺពិភពព្រះអង្គារ។ ភពក្រហមនេះ បានក្លាយជាគោលដៅសម្រាប់ដាក់អាណានិគមនៅខាងក្រៅពិភពផែនដី ដោយសារតែអំណោយផលពីទំហំ និងរយៈចម្ងាយរបស់វា។

មាន 3 ជំហានដែលជួយឱ្យមនុស្សអាចដាក់អាណានិគមលើពិភពព្រះអង្គារនៅឆ្នាំ 2040 ៖

ទីមួយ៖ ការធ្វើដំណើរ

ឧបសគ្គដំបូងដែលធំបំផុតសម្រាប់ការធ្វើអាណានិគម នោះគឺហោះទៅកាន់ពិភពនោះដោយសុវត្ថិភាព។ NASA នឹងបញ្ជូនយានអវកាសដឹកមនុស្សដំបូងហោះទៅកាន់ភពអង្គារនៅក្នុងទសវត្សរ៍ក្រោយ ដោយប្រើប្រាស់ប្រព័ន្ធបាញ់បង្ហោះយានអវកាស (SLS)។

ប៉ុន្តែ ប្រការនោះទំនងជាមិនទាន់គ្រប់គ្រាន់សម្រាប់ការធ្វើអាណានិគមលើភពក្រហមនេះនៅឡើយ។ យានអវកាសនឹងត្រូវការផ្ទាំងការពារវិទ្យុសកម្មពិសេសដើម្បីរារាំងកាំរស្មីដ៏គ្រោះថ្នាក់ដែលបាញ់ពីទីអវកាសសំដៅមកកាន់យាន នៅក្នុងដំណើរហោះហើរដែលមានរយៈពេល 9 ខែ។

ក្រុមអ្នកវិទ្យាសាស្ត្រយល់ថា ការហោះហើរទៅកាន់ភពព្រះអង្គារ នឹងបណ្ដាលឱ្យក្រុមអ្នកអវកាសត្រូវប្រឈមនឹងបរិមាណវិទ្យុសកម្មគ្រោះថ្នាក់ដ៏ច្រើន។ បរិមាណវិទ្យុសកម្មនេះមិនត្រឹមតែធ្វើឱ្យហានិភ័យកើតជំងឺមហារីកកើនឡើងនោះទេ ប៉ុន្តែ វាក៏ប៉ះពាល់ដល់អវយវៈបន្តពូជផងដែរ។ និយាយរួម ការហោះហើរឆ្លងកាត់ទីអវកាស នឹងធ្វើឱ្យមានប្រតិកម្មតានតឹងជាច្រើន ដែលបង្កផលអាក្រក់ដល់ប្រព័ន្ធហ្សែន និងប្រព័ន្ធការពាររាងកាយ។

ផលប៉ះពាល់ខាងលើអាចបញ្ចប់រាល់គម្រោងធ្វើអាណានិគមលើផ្កាយព្រះអង្គារ នៅមុនពេលមនុស្សទៅដល់ភពក្រហមនេះ។ ប៉ុន្តែ មានគំនិតពីរដែលអាចការពារក្រុមអវកាសចរពីវិទ្យុសកម្មអវកាស។ ឧទាហរណ៍៖ សមាសធាតុមួយចំនួនត្រូវបានគេជឿថា អាចទប់ទល់ ឬបន្សាបធាតុវិទ្យុសកម្មបាន ដូចជា lithium hydride។ ប៉ុន្តែ វាមិនទាន់ត្រូវបានពិសោធពេញលេញនៅលើយានអវកាសនៅឡើយ។ ពេលវេលាសម្រាប់ការអភិវឌ្ឍ សាកល្បង និងដាក់ឱ្យប្រើប្រាស់ អាចស៊ីពេលអស់ប្រហែល 20 ឆ្នាំ។

ទីពីរ៖ បង្កើតបរិស្ថានដែលអាចទ្រទ្រង់ជីវិត

ប្រការដំបូងដែលក្រុមអវកាសចរត្រូវសម្រេចបានដើម្បីចាប់ផ្ដើមធ្វើអាណានិគមគឺការកសាងប្រភពបង្កើតខ្យល់បរិយាកាស ទឹក អាហារ និងថាមពលនៅលើដីមហាឆ្ងាយនេះ។ នេះគឺជាក្ដីសង្ឃឹមតែមួយគត់សម្រាប់ជីវិតរបស់ពួកគេ ដោយសារតែប្រភពផ្គត់ផ្គង់ពីយានអវកាស មានកំណត់។

ដូច្នេះ តើយើងត្រូវធ្វើយ៉ាងណាដើម្បីបំប្លែងខ្យល់អាកាសនៅលើភពអង្គារទៅជាអុកស៊ីសែនដែលអាចដកដង្ហើមបាន?

ចម្លើយសម្រាប់សំនួរនេះអាចជាមនុស្សយន្ត ឬរ៉ូបូត។ កាលពីខែមេសា ឆ្នាំ 2021 រ៉ូបូត Perseverance បានបង្កើតអុកស៊ីសែននៅលើផ្ទៃរបស់ភពអង្គារដោយជោគជ័យ ដោយប្រើប្រាស់ឧបករណ៍ MOXIE។ នេះគឺជាឧបករណ៍តូចមួយដែលអាចបំប្លែងឧស្ម័ន Carbon Dioxide ក្នុងបរិយាកាស ទៅជាអុកស៊ីសែន តាមរយៈយន្តការមួយដែលមានឈ្មោះថា Solid Oxide Electrosis។

ឧបករណ៍ខាងលើនេះ អាចផលិតអុកស៊ីសែនគ្រប់គ្រាន់សម្រាប់មនុស្សម្នាក់ដកដង្ហើមក្នុងរយៈពេល 10 នាទី ជិតស្មើនឹងបរិមាណអុកស៊ីសែនដែលបញ្ចេញដោយដើមឈើមួយដើមនៅលើផែនដី។ ជាមួយនឹងបច្ចេកវិទ្យាដែលមានស្រាប់ អ្នកវិទ្យាសាស្ត្រគ្រាន់តែបង្កើនទំហំដើម្បីឆ្លើយតបនឹងតម្រូវការក្នុងការធ្វើអាណានិគមប៉ុណ្ណោះ។ ជាទ្រឹស្ដី មនុស្សអាចប្រើប្រាស់ MOXIE ដើម្បីជំនួសឱ្យរុក្ខជាតិនាពេលអនាគតដ៏ខ្លីខាងមុខ។

ដូចទៅនឹងស្ថានីយអវកាសអន្តរជាតិ (ISS) យានទៅកាន់ភពអង្គារនឹងត្រូវបានបំពាក់ប្រព័ន្ធកែច្នៃទឹកដ៏មានប្រសិទ្ធភាព។ ប្រព័ន្ធនេះនឹងជួយឱ្យអវកាសចរ មានសេរីភាពក្នុងការរុករកប្រភពធនធានធម្មជាតិដែលមានសក្ដានុពលនៅលើភាពក្រហម។

ភ័ស្ដុតាងបានបង្ហាញថា ផ្ទៃរបស់ភពព្រះអង្គារ ធ្លាប់ត្រូវបានគ្របដណ្ដប់ដោយមហាសមុទ្រ ទន្លេ និងបឹង ដូចទៅនឹងផែនដី។ ក្រុមអ្នកវិទ្យាសាស្ត្រធ្លាប់បានរកឃើញបឹងទឹកមួយដែលស្ថិតក្រោមផ្ទៃទឹកកក ក្នុងជម្រៅ 1.5 ម៉ែត្រ ខាងក្រោមដុំទឹកកកនៅប៉ូលខាងត្បូង។ ប៉ុន្តែ យើងនឹងត្រូវការគម្រោងអភិវឌ្ឍដ៏ធំមួយដើម្បីអាចចូលទៅគ្រប់គ្រងបឹងទឹកនោះ។ មនុស្សត្រូវការពេល 20 ឆ្នាំ ដើម្បីអភិវឌ្ឍឱ្យមានប្រសិទ្ធភាព។

ទីបី៖ តាំងទីលំនៅ

Matt Damon បានដាំដើមឈើ នៅក្នុងខ្សែភាពយន្តរឿង «The Martian»។ ក៏ប៉ុន្តែ ជាក់ស្ដែង យើងមិនទាន់ដឹងច្បាស់ថា អាចដាំដើមឈើនៅលើដីរបស់ភពព្រះអង្គារ ឬយ៉ាងណានៅឡើយ។ យ៉ាងនេះក្ដី ក្រុមអ្នកវិទ្យាសាស្ត្រនៅតែបង្ហាញអំពីក្ដីសង្ឃឹម ព្រោះតែសមាសធាតុនៃសម្បកខាងក្រៅរបស់ពិភពមួយនេះ។ ស្រទាប់ដីនេះអាចផ្ទុកសារធាតុចិញ្ចឹមច្រើនដែលរុក្ខជាតិត្រូវការដើម្បីលូតលាស់ និងរស់ មានដូចជា nitrogen, potassium និង phosphor ជាដើម។

ក៏ប៉ុន្តែ បើទោះជាមានការជឿជាក់ យើងក៏មិនទាន់ប្រាកដ 100% នោះដែរ រហូតដល់ពេលបានដាំសាកល្បង។ ស្រទាប់ដីពណ៌ក្រហមអាចផ្ទុកសារធាតុពុល ធ្វើឱ្យរុក្ខជាតិនៅទីនោះត្រូវស្រូបយកជាតិពុលនេះ។

ក្រៅពីបញ្ហាខាងលើ សូម្បីតែនៅពេលកំពុងដោះស្រាយបញ្ហាប្រភពអុកស៊ីសែន យើងនៅតែអាចដាំដុះនៅលើភពព្រះអង្គារបាន។ យ៉ាងហោចក៏យើងអាចប្រមូលវត្ថុធាតុដើម្បីសាងសង់ហេដ្ឋារចនាសម្ព័ន្ធភ្លាម។ ដោយប្រើប្រាស់ឧបករណ៍សមស្រប ថ្មនៅលើភពក្រហមនេះក៏អាចយកមកធ្វើជារបស់សម្រាប់ការពារអ្នកអវកាសនៅចំពោះមុខវិទ្យុសកម្ម នៅពេលពួកគេស្វែងរកប្រភពធនធាន ដូចជា ទឹក លោហធាតុ ឬរ៉ែដទៃទៀត។

គ្រប់ជំហានដើម្បីបង្កើតអាណានិគមលើភពអង្គារ ដូចបានរៀបរាប់ខាងលើ សុទ្ធសឹងតែមានសក្កានុពល ទោះបីជាបច្ចុប្បន្ន វាគ្រាន់តែជាការព្យាករក៏ដោយ៕

November 4, 2021

ស្ថិតិស្ដីពី COVID-19 នៅ កម្ពុជា និងទូទាំងពិភពលោក គិតមកដល់ព្រឹកថ្ងៃទី 4 ខែវិច្ឆិកា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 3 វិច្ឆិកា 2021 រួមមាន៖

– ឆ្លងថ្មី = 83 នាក់
– ជាសះស្បើយថ្មី = 96 នាក់
– ស្លាប់ថ្មី = 6 នាក់។

ក្នុងចំណោមអ្នកឆ្លងថ្មីទាំង 83 នាក់ មាន៖

– ករណីឆ្លងសហគមន៍ 74 នាក់
– អ្នកដំណើរពីបរទេស 09 នាក់

គិតមកដល់ព្រឹកថ្ងៃទី 4 ខែវិច្ឆិកា ឆ្នាំ 2021 តួលេខ COVID-19 សរុបនៅ កម្ពុជា រួមមាន៖

– អ្នកឆ្លងសរុប= 118,870 នាក់
– អ្នកជាសះស្បើយ= 115,207 នាក់
– អ្នកស្លាប់= 2,813 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 248,824,220 នាក់
– អ្នកជាសះស្បើយសរុបជាង = 225,449,990 នាក់
– អ្នកស្លាប់សរុបជាង = 5,037,020 នាក់
– អ្នកកំពុងព្យាបាលសរុបជាង = 18,337,210 នាក់

November 4, 2021

អាកាសយានដ្ឋានអន្ដរជាតិភ្នំពេញថ្មី សង់បាន 26% ហើយ ខណៈវិស័យឯកជន បោះទុន 15 លានដុល្លារថែមទៀត

វិស័យឯកជនបានបោះទុនវិនិយោគ 15 លានដុល្លារអាម៉េរិក លើមូលបត្របំណុលរបស់ក្រុមហ៊ុន CAIC ដោយធនាគារព្រីនស៍ សម្រាប់គម្រោងសាងសង់សំណង់អាកាសយានដ្ឋានអន្ដរជាតិភ្នំពេញថ្មី នៅខេត្ដកណ្ដាល បន្ទាប់ពី កម្ពុជា សម្រេចបើកប្រទេសឡើងវិញ។

ពិធីចុះហត្ថលេខាមួយ រវាងលោក Honn Sorachna នាយកធនាគារ ធនាគារ Prince Bank និងលោក Charles Vann នាយកក្រុមហ៊ុន OCIC ត្រូវបានធ្វើឡើងកាលពីរសៀលថ្ងៃទី 3 ខែវិច្ឆិកា ដោយមានវត្តមានរបស់អ្នកឧកញ៉ា ពុង ឃែវសែ នាយកប្រតិបត្ដិធនាគារកាណាឌីយ៉ា ផងដែរ។

ការចុះហត្ថលេខាខាងលើនេះគឺជាការបញ្ជាក់អំពីការវិនិយោគដោយទឹកប្រាក់ 15 លានដុល្លារ ទៅលើមូលបត្របំណុលរបស់គម្រោងសាងសង់អាកាសយានដ្ឋានអន្តរជាតិ ភ្នំពេញថ្មី (New Phnom Penh International Airport/NPPIA)។ ទឹកប្រាក់ដែលប្រមូលបានពីកិច្ចព្រមព្រៀងនេះ នឹងត្រូវប្រើប្រាស់សម្រាប់ការសាងសង់ និងការអភិវឌ្ឍន៍ NPPIA។

គម្រោង NPPIA ដែលបច្ចុប្បន្នសម្រេចបាន 26% លើទឹកប្រាក់ប្រមាណ 346 លានដុល្លារអាម៉េរិក (មិនរាប់បញ្ចូលថ្លៃដី ដែលវិនិយោគរួចដោយ CAIC) នេះ ត្រូវបានរំពឹងថា នឹងត្រូវដាក់ឱ្យដំណើរការនៅឆ្នាំ 2023។ នេះបើតាម លោក Honn Sorachna នាយកធនាគារ Prince។

សូមបញ្ជាក់ថា NPPIA គឺជាគម្រោងធំមួយដែលកំពុងត្រូវបានអភិវឌ្ឍដោយក្រុមហ៊ុន OCIC (Overseas Cambodian Investment Corporation) ខណៈក្រុមហ៊ុន CAIC ត្រូវបានរាជរដ្ឋាភិបាលកម្ពុជា ផ្តល់សិទ្ធិឱ្យកាន់កាប់រចនានៃការសាងសង់ ធ្វើហិរញ្ញប្បទាន និងគ្រប់គ្រងប្រតិបត្តិការគម្រោងនេះ។

November 4, 2021

សហគមន៍អ្នកវិទ្យាសាស្ត្រព្យាករថា ឆ្នាំ 2022 អាចគ្រប់គ្រងបានជំងឺរាតត្បាតសកល ខណៈ COVID-19 ក្លាយជារោគឆ្លងដោយតំបន់

សារព័ត៌មាន Reuters បានសម្ភាសជាមួយអ្នកជំនាញផ្នែកសុខាភិបាលលំដាប់កំពូលៗជាង 10 រូប និងបានដឹងថា នៅពេលដែលការរាតត្បាតរបស់វ៉ារ្យ៉ង់ Delta បានថយចុះនៅក្នុងតំបន់ជាច្រើនក្នុងពិភពលោក ក្រុមអ្នកវិទ្យាសាស្ត្រក៏កំពុងគ្រោងគំនូសតាងបង្ហាញអំពីពេលវេលា និងទីកន្លែងដែល COVID-19 នឹងក្លាយជាជំងឺប្រភេទ endemic (រោគឆ្លងដោយតំបន់) ក្នុងឆ្នាំ 2022 និងក្រោយមកទៀត។

ឆ្នាំ 2022 ពិភពលោកអាចគ្រប់គ្រងរោគរាតត្បាតសកល COVID-19?

ក្រុមអ្នកជំនាញសង្ឃឹមថា បណ្ដាប្រទេសដំបូងៗដែលរួចពីជំងឺរាតត្បាតនឹងជាប្រទេសដែលមានការរួមផ្សំរវាងអត្រាខ្ពស់នៃការចាក់វ៉ាក់សាំង និងសមត្ថភាពនៃប្រព័ន្ធភាពស៊ាំធម្មជាតិនៅលើអ្នកដែលបានឆ្លង COVID-19 ដូចជា សហរដ្ឋអាម៉េរិក អង់គ្លេស ព័រទុយហ្គាល់ និង ឥណ្ឌា។ ប៉ុន្តែ ក្រុមអ្នកវិទ្យាសាស្ត្រព្រមានថា COVID-19 នៅតែជាប្រភេទវីរុសដែលពិបាកឱ្យយើងស្មានត្រូវ និងកំពុងបន្តបំប្លែងខ្លួននៅពេលវាបានឆ្លងទៅក្នុងសហគមន៍ដែលមិនទាន់ចាក់វ៉ាក់សាំង។

លោកស្រី Maria Van Kerkhove អ្នកឯកទេសផ្នែករោគឆ្លង និងជាប្រធានក្រុមប្រតិកម្មនឹង COVID-19 របស់អង្គការសុខភាពពិភពលោក (WHO) យល់ថា៖ «អំឡុងពេលចាប់ពីបច្ចុប្បន្នដល់ចុងឆ្នាំ 2022 គឺជាឱកាសដែលយើងអាចគ្រប់គ្រងវីរុសនេះបាន នៅពេលយើងអាចកាត់បន្ថយបានច្រើនលើករណីជំងឺធ្ងន់ធ្ងរ និងករណីស្លាប់»។

WHO បានកំណត់គោលដៅដល់ចុងឆ្នាំ 2022 ប្រជាជនប្រមាណ 70% ក្នុងពិភពលោក បានទទួលការចាក់វ៉ាក់សាំង COVID-19។

Marc Lipsitch វេជ្ជបណ្ឌិតផ្នែករោគឆ្លងនៅសាលាវេជ្ជសាស្ត្រសាធារណៈ Harvard TH Chan នៃសាកលវិទ្យាល័យ Harvard ថ្លែងថា៖ ការប្រែប្រួលនឹងខុសគ្នាទៅតាមតំបន់ ព្រោះថា អត្រាខ្ពស់-ទាប នៃការចាក់វ៉ាក់សាំងពីតំបន់មួយ ទៅតំបន់មួយ នឹងធ្វើឱ្យករណីឆ្លង COVID-19 ក្នុងតំបន់ទាំងនោះ ត្រូវខុសគ្នា។

រោគរាតត្បាតសកលបញ្ចប់ ប៉ុន្តែ ជំងឺ COVID-19 ឆ្លងដោយតំបន់ នៅតែប្រកបដោយគ្រោះថ្នាក់

អ្នកជំនាញមួយចំនួនជឿថា រលកនៃការឆ្លងវីរុស COVID-19 ប្រភេទ Delta នៅ សហរដ្ឋអាម៉េរិក នឹងបញ្ចប់ក្នុងខែវិច្ឆិកានេះ និងជាការផ្ទុះឆ្លងធំចុងក្រោយបង្អស់។

អតីតប្រធានការិយាល័យគ្រប់គ្រងអាហារនិងឱសថ (FDA) របស់ អាម៉េរិក លោក Scott Gottlieb ឱ្យដឹងថា៖ «យើងកំពុងតែស្ថិតក្នុងដំណើរប្រែប្រួលពីដំណាក់កាលជំងឺរាតត្បាតសកល មកជាដំណាក់កាលជំងឺឆ្លងដោយតំបន់ ជាទីដែលវីរុសនេះក្លាយជាការគំរាមកំហែងយូរអង្វែងនៅ សហរដ្ឋអាម៉េរិក»។

លោក Chris Murray អ្នកឯកទេសជាន់ខ្ពស់ផ្នែករោគឆ្លងនៅសាកលវិទ្យាល័យ Washington ក៏បានព្យាករដូចខាងលើ។ លោកថា៖ «បើមិនមានវីរុសបំប្លែងខ្លួនថ្មីដែលបង្កគ្រោះថ្នាក់ធ្ងន់ធ្ងរផ្សេងកើតឡើងទៀត នោះ COVID-19 ពិតជាត្រូវបានបញ្ចប់ជាបណ្ដើរៗនៅក្នុងខែមេសា (ឆ្នាំ 2022)»។

«ជាមូលដ្ឋាន រោគរាតត្បាតសកលគឺជាស្ថានការណ៍អាសន្នដែលកំពុងស្ថិតនៅខាងក្រោយរបស់យើង» នេះបើតាម Neil Ferguson អ្នកជំនាញផ្នែករោគឆ្លងប្រចាំសាកលវិទ្យាល័យ Imperial College London នៃចក្រភពអង់គ្លេស។

អ្នកជំនាញ Van Kerkhove បញ្ជាក់ថា ប្រភេទជំងឺឆ្លងដោយតំបន់ មិនមែនមានន័យថា វាមានសភាពស្លូតនោះទេ។ ចំណែកអ្នកជំនាញមួយចំនួនផ្សេងទៀតនិយាយថា វីរុស COVID-19 ចុងក្រោយនឹងនៅតែមានវត្តមាន ហើយធ្វើសកម្មភាពដូចទៅនឹងជំងឺកញ្ជ្រឹល ជាជំងឺមួយដែលនៅតែឆ្លងរាលដាលនៅក្នុងសហគមន៍ដែលមានអត្រានៃការចាក់វ៉ាក់សាំងទាប។

មនុស្សមួយចំនួនយល់ថា COVID-19 នឹងក្លាយជាជំងឺផ្លូវដង្ហើមតាមរដូវកាលដូចជាជំងឺផ្ដាសាយ។ ឬថា COVID-19 អាចក្លាយជាវីរុសដែលបង្កការស្លាប់តិចជាងមុន និងប៉ះពាល់តែក្មេងតូច។

Travor Bedford អ្នកជំនាញខាងវីរុសសាស្ត្រនៃមជ្ឈមណ្ឌលព្យាបាលជំងឺមហារីក Fred Hutchinson ថ្លែងថា COVID-19 នឹងបន្តបំប្លែងខ្លួន ដែលនាំឱ្យយើងត្រូវការបន្តការចាក់វ៉ាក់សាំងប្រចាំឆ្នាំ។ លោកថា COVID-19 នឹងក្លាយជារោគរាតត្បាតដោយតំបន់នៅឆ្នាំ 2022-2023។

លោក Richard Hatchett នាយកប្រតិបត្តិរបស់ អង្គការសម្ព័ន្ធភាពត្រៀមខ្លួនប្រឆាំងជំងឹឆ្លង (Coalition for Epidemic Preparedness Innovations/CEPI) ឱ្យដឹងថា ប្រទេសមួយចំនួនត្រូវបានការពារយ៉ាងល្អដោយវ៉ាក់សាំង តែក៏នៅមានប្រទេសជាច្រើនហាក់មិនមានទាល់តែសោះ ដូច្នេះ ពិភពលោកនៅតែងាយរងផលប៉ះពាល់ដដែល៕

November 4, 2021

ទិដ្ឋភាពក្រុងខាងលិចនៃ រាជធានីបាងកក ក្រោយការបើកទ្វារទទួលទេសចរ

ផ្លូវ Khaosan ដែលធ្លាប់ជាតំបន់អ៊ូអរដោយសារវត្តមានរបស់ភ្ញៀវទេសចរណ៍បរទេស នៅ រាជធានីបាងកក នៅតែមានសភាពស្ងាត់ជ្រងំ បើទោះជា ប្រទេសថៃ បានប្រកាសបើកទ្វារទទួលទេសចរឡើងវិញក៏ដោយ។

យោងតាមសារព័ត៌មាន Reuters របស់ អង់គ្លេស ផ្លូវ Khaosan ក្នុងរាជធានីបាងកក លែងមានសភាពអ៊ូអរដូចមុនទៀតហើយ ចាប់តាំងពី COVID-19 ផ្ទុះឆ្លងរាលដាលកាលពីឆ្នាំទៅ។ ប៉ុន្តែ ម្ចាស់អាជីវកម្មនានា កំពុងតែសង្ឃឹមថា ការដែល ប្រទេសថៃ បើកទ្វារទទួលអ្នកទេសចរណ៍ក្នុងសប្ដាហ៍នេះ នឹងជួយស្ដារស្ថានការណ៍របស់ក្រុងនេះឡើងវិញ។

ប្រទេសថៃ ដែលជាទីតាំងទេសចរណ៍ល្បីឈ្មោះមួយនៅ ទ្វីបអាស៊ី បានអនុវត្តវិធានការទប់ស្កាត់ COVID-19 យ៉ាងតឹងរ៉ឹង ដោយផ្អាកការទទួលភ្ញៀវទេសចរណ៍បរទេសក្នុងរយៈពេល 18 ខែកន្លងទៅ។ ប៉ុន្តែ ចាប់ពីថ្ងៃទី 1 ខែវិច្ឆិកា ប្រទេសនេះបានបើកទ្វារទទួលភ្ញៀវបរទេសទាំងឡាយណាដែលបានចាក់វ៉ាក់សាំងរួចរាល់ និងជាពលរដ្ឋមកពីប្រទេស និងដែនដីជាង 60 ដែលមានហានិភ័យទាប ដោយមិនតម្រូវឱ្យធ្វើចត្តាឡីស័ក។

Thapanee Pansodsaicharoenkit ម្ចាស់ភោជនីយដ្ឋាន Rocco នៅលើបណ្ដោយផ្លូវ Khaosan ឱ្យដឹងថា៖ «ផ្លូវ Khaosan គឺជាទីតាំងល្បីឈ្មោះសម្រាប់ភ្ញៀវទេសចរណ៍បរទេសនៅពេលពួកគេមកលេង បាងកក។ ចំពោះយើង និងអ្នកទាំងឡាយដែលជាម្ចាស់អាជីវកម្ម ពួកគេគឺជាក្ដីសង្ឃឹមតែមួយគត់នៅពេលនេះ»។

នៅពេលអ្នកយកព័ត៌មានរបស់ Reuters មកកាន់ទីនេះកាលពីព្រលប់ថ្ងៃទី 2 វិច្ឆិកា បើទោះជាភោជនីយដ្ឋានចាប់ផ្ដើមមានភ្ញៀវ ប៉ុន្តែ ផ្លូវក្នុងក្រុងនៅតែស្ងប់ស្ងាត់ ក្នុងនោះមានហាងលក់ទំនិញប្រមាណ 90% បានបិទទ្វារដោយមិនមានកាលកំណត់។

Prasit Singhdamrong ប្រធានសមាគមពាណិជ្ជកម្ម Khaosan ថ្លែងថា អាជីវកម្មនៅតាមបណ្ដោយដងផ្លូវ Khaosan ត្រូវបានផ្អាករយៈពេល 18 ខែកន្លងទៅ ហើយមានអាជីវកម្ម 10% ប៉ុណ្ណោះ ដែលអាចបន្តរកស៊ី។ ទោះជាបានបើកទ្វារនាសប្ដាហ៍នេះ ប៉ុន្តែ វិធានការរឹងបន្តឹងមួយចំនួន នៅតែមាន។ ភោជនីយដ្ឋានទាំងឡាយដែលត្រូវបានស្ថាប័នគ្រប់គ្រងទេសចរណ៍ទទួលស្គាល់ អាចបម្រើស្រាដល់អតិថិជនត្រឹមម៉ោង 21 ប៉ុណ្ណោះ ខណៈហាងស្រា នៅតែត្រូវបិទទ្វារ៕

November 4, 2021

កម្ពុជា អនុញ្ញាតឱ្យប្រើប្រាស់ថ្នាំគ្រាប់ Molnupiravir សម្រាប់ព្យាបាលជំងឺ COVID-19 ក្នុងលក្ខខណ្ឌបន្ទាន់

ក្រសួងសុខាភិបាល នៅថ្ងៃទី 3 ខែវិច្ឆិកានេះ បានអនុញ្ញាតឱ្យប្រើប្រាស់ថ្នាំព្យាបាលជំងឺ COVID-19 ឈ្មោះ Molnupiravir ក្នុងលក្ខខណ្ឌបន្ទាន់។

ឱសថ Molnupiravir នេះជាប្រភេទថ្នាំគ្រាប់សម្រាប់លេប មានសុវត្ថិភាព និងប្រសិទ្ធភាពខ្ពស់ក្នុងការប្រឆាំងនឹងវីរុស COVID-19។ Molnupiravir ផលិតដោយក្រុមហ៊ុន Mylan Laboratories Limited ដែលមានមូលដ្ឋាននៅក្នុងប្រទេសឥណ្ឌា។

ក្រសួងសុខាភិបាលបញ្ជាក់ថា សម្រាប់លក្ខខណ្ឌនៃការប្រើប្រាស់ឱសថនេះ គឺប្រើតែក្នុងអំឡុងពេលគ្រោះអាសន្នសុខភាពសាធារណៈនៃជំងឺ COVID-19 ដែលកំពុងកើតមាន និងជាជម្រើសនៃការព្យាបាល ដែលស្ថិតក្រោមការស្រាវជ្រាវ និងវាយតម្លៃ និងប្រើក្រោមអាទិភាពរបស់រាជរដ្ឋាភិបាល។

November 3, 2021

អាចឆ្លើយនឹងសំនួររបស់ Jeff Bezos ដែលសួរថា «មានបង្អួចប៉ុន្មាននៅក្នុងទីក្រុង» បេក្ខនារីមួយរូប បានចូលធ្វើការនៅ Amazon ភ្លាម មិនចាំស្អែក

សំនួរក្នុងកិច្ចសម្ភាសប្រកបដោយភាពរីករាយរបស់មហាសេដ្ឋី អាម៉េរិក Jeff Bezos គឺ៖ «មានបង្អួចសរុបចំនួនប៉ុន្មាន នៅក្នុងទីក្រុង?»។

អត្ថបទនេះគឺជាការចែករំលែករបស់នាង Ann Hiatt ដែលជាអតីតអ្នកយុទ្ធសាស្ត្រមួយរូបនៅជ្រលងភ្នំ Silicon (silicon valley) នៃរដ្ឋ California សហរដ្ឋអាម៉េរិក។ នាង Ann Hiatt មានបទពិសោធន៍ 15 ឆ្នាំ ទាក់ទងនឹងការងារជាសហការិនី ឬជំនួយការរបស់មេដឹកនាំក្រុមហ៊ុនបច្ចេកវិទ្យាធំៗជាច្រើនរូប មានដូចជា មហាសេដ្ឋី Jeff Bezos, Marissa Mayer និង Eric Schmidt ជាដើម។ ថ្មីៗនេះ Hiatt បានបង្កើត និងទទួលភារកិច្ចជានាយិកាប្រតិបត្តិរបស់ក្រុមហ៊ុនប្រឹក្សាយោបល់ដែលមានអតិថិជនជា CEO របស់បណ្ដាក្រុមហ៊ុននៅទូទាំងពិភពលោក។

«ខ្ញុំបានដាក់ពាក្យសុំការងារជាជំនួយការនៅឯក្រុមហ៊ុន Amazon កាលពីឆ្នាំ 2002។ កាលណោះ ខ្ញុំមិនបានស្គាល់អ្នកណាទាំងអស់នៅក្នុងក្រុមហ៊ុន និងមិនមានសញ្ញាបត្រវិទ្យាសាស្ត្រកុំព្យូទ័រ ថែមទាំងមិនមានបទពិសោធន៍ក្នុងកិច្ចការជាលេខារបស់ CEO ណាមួយនោះដែរ។

ហើយនេះគឺជាបទពិសោធន៍នៃកិច្ចសម្ភាសសុំការងាររបស់ខ្ញុំ នៅ Amazon ៖

កិច្ចសម្ភាសដំបូងរបស់ខ្ញុំនៅឯក្រុមហ៊ុន Amazon ច្រើនដល់ថ្នាក់វិលមុខ។ ខ្ញុំបានសម្ភាសផ្ទាល់ជាមួយជំនួយការជាន់ខ្ពស់ទាំងអស់របស់ក្រុមហ៊ុននេះ ក្នុងចំណោមនោះ មានខ្លះស៊ីពេលពេញមួយថ្ងៃ។

ជាងនេះ ក៏មានកិច្ចសម្ភាសមួយដែលធ្វើឡើងនៅក្នុងបន្ទប់ងងឹត មានតែពន្លឺអេក្រង់កុំព្យូទ័រដែលពេញដោយកូដ និងអំពូលភ្លើងរាត្រីច្រើនពណ៌នៅឯជ្រុងបន្ទប់។ ប៉ុន្តែ វាមិនចម្លែកប៉ុន្មានទេ ព្រោះធ្លាប់ជួបរឿងនេះ (ឪពុក ម្ដាយរបស់ខ្ញុំគឺជាអ្នកធ្វើការក្នុងវិស័យនេះ)។

នាង Ann Hiatt បច្ចុប្បន្នគឺជា CEO របស់ក្រុមហ៊ុនប្រឹក្សាយល់ ដែលអតិថិជនគោលដៅសុទ្ធតែជា CEO នៃបណ្ដាក្រុមហ៊ុនអន្តរជាតិ

ប៉ុន្មានខែក្រោយមក ខ្ញុំគិតថា ប្រហែលជាធ្លាក់បាត់ហើយ ព្រោះមិនមានការឆ្លើយតបសោះ។ ប៉ុន្តែ បុគ្គលិកធនធានមនុស្សម្នាក់របស់ Amazon បានហៅទូរស័ព្ទ និងអញ្ជើញខ្ញុំទៅសម្ភាសលើកចុងក្រោយ។ ប៉ុន្តែ ម្នាក់នេះមិនបានប្រាប់ថា ខ្ញុំនឹងត្រូវសម្ភាសជាមួយមហាសេដ្ឋី Jeff Bezos នោះឡើយ។

សំនួរដំបូងនៅក្នុងកិច្ចសម្ភាសជាមួយម្ចាស់ Amazon

ខ្ញុំមានអារម្មណ៍ធូរស្រាលក្នុងចិត្តនៅពេលត្រូវសម្ភាស។ Bezos ឈានជើងចូលដល់ អង្គុយទល់មុខនឹងខ្ញុំ រួចក៏ណែនាំខ្លួន។ គាត់ប្រាប់ថា នឹងសួរតែពីរសំនួរគត់ ហើយសំនួរដំបូងនឹងជាសំនួរ «សប្បាយរីករាយ»។

«ខ្ញុំចង់ឱ្យអ្នកគណនា។ មានបង្អួចចំនួនប៉ុន្មាននៅក្នុងទីក្រុង?» លោក Bezos និយាយបណ្ដើរ គូររូបបង្អួចនៅលើក្ដារខៀនបណ្ដើរ។

ភ្លាមនោះ ខ្ញុំពិតជាភ្ញាក់ផ្អើលខ្លាំងណាស់។ ក្រោយមក ខ្ញុំក៏ដកដង្ហើមមួយយ៉ាងវែងដើម្បីសម្រួលអារម្មណ៍ និងរំលឹកខ្លួនឯងអំពី «គោលបំណង» របស់ Bezos នៅពេលសួរសំនួរនោះ។ ខ្ញុំគិតថា ប្រការនេះគឺដើម្បីសង្កេតមើលថា តើខ្ញុំរហ័សរហួនដល់កម្រិតណា ហើយគាត់ចង់ឃើញវិធីដែលខ្ញុំបំបែកបញ្ហាស្មុគស្មាញជាចំណែកតូចៗ ដើម្បីគ្រប់គ្រង។

ខ្ញុំចាប់ផ្ដើមដោយលើកឡើងអំពីចំនួនប្រជាជននៅទីក្រុង Seattle (ប្រហែល 1 លាននាក់)។ បន្ទាប់មក ខ្ញុំលើកឧទាហរណ៍ថា ក្នុងមនុស្សម្នាក់មានផ្ទះមួយខ្នង រថយន្តមួយគ្រឿង និងការិយាល័យមួយ ឬសាលារៀនមួយកន្លែង ដែលទាំងអស់នេះសុទ្ធតែមានបង្អួច។ ហើយយើងក៏ចាប់ផ្ដើមគណនាជាមួយគ្នា ដោយពិនិត្យមើលរាល់ករណីដែលអាចកើតឡើង ប្រក្រតីភាព រួមនឹងករណីលើកលែង។ ខ្ញុំនិយាយ ចំណែក Bezos បង់លេខទៅលើក្ដារខៀន។ កិច្ចការនេះស៊ីពេលអស់ជាង 10 នាទី មុននឹងគាត់សរសេរអំពីការប៉ាន់ស្មានចុងក្រោយ រួចបញ្ចេញយោបល់៖ «ស្ដាប់ទៅ ទំនងត្រូវ»។

ដូច្នេះ សំនួរ «សប្បាយរីករាយ» ក៏បានបញ្ចប់។

នាង Ann Hiatt មានបទពិសោធន៍ 15 ឆ្នាំ ទាក់ទងនឹងការងារជាសហការិនី ឬជំនួយការរបស់មេដឹកនាំក្រុមហ៊ុនបច្ចេកវិទ្យាធំៗជាច្រើន

សំនួរទីពីររបស់លោក Jeff Bezos ៖ «តើគោលដៅនៃមុខរបររបស់អ្នកគឺជាអ្វី?»

ខ្ញុំនិយាយថា Amazon ត្រូវបានគេបញ្ជាក់ថា ជាក្រុមហ៊ុនមួយដែលពោរពេញដោយមនុស្សដែលមានមហិច្ឆតា និងការជាប់ចិត្ត។ ខ្ញុំចង់ដូចពួកគាត់ និងរៀនសូត្រពីពួកគាត់។ ចំនុចខ្លាំងរបស់ពួកគាត់គឺជាអ្វីដែលខ្ញុំចង់រីកចម្រើន។ ទោះបីកន្លងមក ខ្ញុំមានបំណងក្លាយជាសាស្ត្រាចារ្យ ប៉ុន្តែ ខ្ញុំបានផ្លាស់ប្ដូរការគិត ហើយចង់ទទួលបានបទពិសោធន៍ពីក្រុមហ៊ុន Amazon។

ខ្ញុំក៏បានបន្ថែមថា ខ្ញុំមិនមានបទពិសោធន៍ធ្វើការជាជំនួយការ ប៉ុន្តែ តែងតែយល់ច្បាស់អំពីសារសំខាន់ដែលគួរនៅក្រៅរង្វង់សុវត្ថិភាពដើម្បីអភិវឌ្ឍខ្លួន និងដើម្បីជោគជ័យ។

បន្ទាប់មក Bezos មិនបានទុកឱ្យខ្ញុំត្រូវរង់ចាំទៀតនោះទេ គាត់ប្រកាសនៅនឹងកន្លែងថា ខ្ញុំត្រូវបានជ្រើសរើស។ គាត់ក៏បង្ហាញតុធ្វើការរបស់ខ្ញុំដែលមានចម្ងាយប្រហែល 3 ជំហាន ពីកន្លែងអង្គុយរបស់គាត់។ នោះគឺជាតុដែលនៅជិតកន្លែងធ្វើការរបស់ Bezos ជាងគេ នៅក្នុងក្រុមហ៊ុននេះ។

ពេលវេលាបានកន្លងទៅអស់ជាច្រើនឆ្នាំ ទើបខ្ញុំយល់អំពីមូលហេតុដែល Bezos បែរជាផ្ដល់ឱកាសការងារដល់បេក្ខភាពដែលមិនមានបទពិសោធន៍ដូចខ្ញុំ។ គាត់មានបំណងបង្កើតក្រុមបុគ្គលិកដែលពេញដោយមហិច្ឆតា ច្នៃប្រឌិតក្នុងការងារ ដោយមិនគិតដល់ការដែលពួកគេខ្វះជំនាញមួយចំនួន៕

November 3, 2021

អ្នកនៅខេត្តបាត់ដំបង កំពង់ចាម និងខេត្តព្រះសីហនុ អាចទិញទំនិញតាមវីងម៉លបានហើយ

អ្នកនៅខេត្តទាំងបីនេះ អាចទិញទំនិញតាម Wing App ហើយទទួលប្រាក់ត្រឡប់ ១០០%

ពិតជាលឿនមែន វីងម៉ល (WingMall) ពេលនេះ បានពង្រីកខ្លួនទៅដល់ខេត្តបាត់ដំបង កំពង់ចាម និងខេត្តព្រះសីហនុ ហើយអតិថិជននៅទីនោះអាច ធ្វើការកុម្ម៉ង់ទិញ អាហារ ផ្លែឈើ គ្រឿងទេស និងសម្ភាជាច្រើនតាមតាម កម្មវិធីស្មាតហ្វូនវីង(Wing app) ជាមួយការផ្តល់ជូនប្រូម៉ូកូដដ៏ច្រើនសន្ធឹកសន្ធាប់។

ដើម្បីអបអរសាទរពីការគាំទ្រដ៏ខ្លាំងខ្លាពីសំណាក់អតិថិជន វីងម៉លនឹងផ្តល់ជូន ប្រូម៉ូកូដ ២.៥ ដុល្លារអាមេរិច សម្រាប់ការកុម្ម៉ង់ទិញ ៣ ដង ដោយប្រើប្រាស់ ប្រូម៉ូកូដ ‘HELLOBTB’ សម្រាប់ខេត្តបាត់ដំបង ‘HELLOKPC’ សម្រាប់ខេត្តកំពង់ចាម, និង ‘HELLOSHV’ សម្រាប់ខេត្តព្រះសីហនុ។

លើសពីនេះទៅទៀតនោះ អតិថិជនទាំងអស់ អាចរីករាយជាមួយទំនិញនិងអាហារដ៏សំបូរបែបប្រចាំខេត្តនីមួយៗរួមទាំងទទួលបានការបញ្ចុះតម្លៃក្នុងហាងរហូតដល់ ៥០% រួមទាំងការដឹកជញ្ជូនដល់គេហដ្ឋានដោយឥតគិតថ្លៃថែមទៀត។

ការផ្តល់ជូនប្រូម៉ូកូដនេះ មានសុពលភាពចាប់ពីថ្ងៃទី៣ រហូតដល់ថ្ងៃទី៣០ ខែវិច្ឆិកា ឆ្នាំ២០២។

អតិថិជនវីងទាំងអស់អាចស្វែងរកវីងម៉លបានយ៉ាងងាយៗ ដោយគ្រាន់តែ ទាញយកកម្មវិធីស្មាតហ្វូនវីង(Wing Money App)ពី Play Store ឬ App Store បន្ទាប់មកទៀត ធ្វើការតំឡើងក្នុងទូរស័ព្ទដៃលោកអ្នកជាការស្រេច។

ដើម្បីទទួលបានពត៌មានពីការផ្តល់ជូនប្រូម៉ូកូដជាច្រើនរាល់ថ្ងៃ លោក លោកស្រីអាចចូលរួម គ្រុបតេ ឡេក្រាមរបស់វីងម៉ល តាមបណ្តាខេត្តនីមួយៗ រួមមាន WingMall Club BTB សម្រាប់ខេត្តបាត់ដំបង, WingMall Club KPC សម្រាប់ខេត្តកំពង់ចាម, និង WingMall Club SHV សម្រាប់ខេត្តព្រះសីហនុ៕

November 3, 2021

Author: សឿន សំណាង