សឿន សំណាង - La Reine Media

ស្ថិតិស្ដីពី COVID-19 នៅ កម្ពុជា និងទូទាំងពិភពលោក គិតមកដល់ព្រឹកថ្ងៃទី 10 ខែវិច្ឆិកា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 9 វិច្ឆិកា 2021 រួមមាន៖

– ឆ្លងថ្មី = 65 នាក់
– ជាសះស្បើយថ្មី = 68 នាក់
– ស្លាប់ថ្មី = 4 នាក់។

ក្នុងចំណោមអ្នកឆ្លងថ្មីទាំង 65 នាក់ មាន៖

– ករណីឆ្លងសហគមន៍ 58 នាក់
– អ្នកដំណើរពីបរទេស 07 នាក់

គិតមកដល់ព្រឹកថ្ងៃទី 10 ខែវិច្ឆិកា ឆ្នាំ 2021 តួលេខ COVID-19 សរុបនៅ កម្ពុជា រួមមាន៖

– អ្នកឆ្លងសរុប= 119,292 នាក់
– អ្នកជាសះស្បើយ= 115,659 នាក់
– អ្នកស្លាប់= 2,845 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 251,562,900 នាក់
– អ្នកជាសះស្បើយសរុបជាង = 227,779,600 នាក់
– អ្នកស្លាប់សរុបជាង = 5,079,915 នាក់
– អ្នកកំពុងព្យាបាលសរុបជាង = 18,703,300 នាក់

November 10, 2021

ជាប់ពន្ធនាគារ 10 ឆ្នាំ ដោយសារបទល្មើសវាយធ្វើបាបសត្វចិញ្ចឹម

(សហរដ្ឋអាម៉េរិក)-បុរសម្នាក់នៅរដ្ឋ Florida ត្រូវបានកាត់ទោសឱ្យជាប់ពន្ធនាគាររយៈពេល 10 ឆ្នាំ ព្រោះតែបានវាយធ្វើបាបសត្វសុនកប្រភេទ pit bull ដោយចាក់ 50 កាំបិត និងញាត់ចូលក្នុងវ៉ាលិស បណ្ដាលឱ្យស្លាប់ពីរថ្ងៃក្រោយមក។

Brendan Evans អាយុ 35 ឆ្នាំ នៅទីក្រុង Hollywood រដ្ឋ Florida ត្រូវទទួលទោសនៅក្នុងរឿងក្ដីវាយធ្វើបាបសត្វសុនកឈ្មោះ Ollie កាលពី 4 ឆ្នាំមុន។ នេះបើតាម Michael Gottlieb ដែលជាមេធាវីរបស់ជនល្មើស ឱ្យដឹងកាលពីថ្ងៃទី 9 វិច្ឆិកា។

យោងតាមឯកសាររឿងក្ដី កាលពីឆ្នាំ 2017 Evans បានវាយធ្វើបាប Ollie ដោយចាក់ 50 កំបិទ និងញាប់វាចូលក្នុងវ៉ាលិស នៅពេលសត្វចិញ្ចឹមនេះកំពុងត្រដរខ្យល់។ ប្ដី ប្រពន្ធមួយគូ ដែលកំពុងដើរលេងពីយប់ បានឮសំឡេងស្រែកថ្ងូររបស់សុនករងគ្រោះចេញពីវ៉ាលិសពណ៌ខៀសដែលមានចម្ងាយមិនឆ្ងាយប៉ុន្មានពីផ្ទះរបស់ Evans ហើយក៏បានទូរស័ព្ទប្រាប់ប៉ូលិស។

Ollie ត្រូវបាននាំទៅកាន់បន្ទប់ព្យាបាលសត្វដែលនៅក្បែរនោះ។ ក្រុមគ្រូពេទ្យយល់ថា សុនកនេះនឹងជាសះស្បើយ ប៉ុន្តែ ពីរថ្ងៃក្រោយមក Ollie ក៏បានស្លាប់។

ដំបូងឡើយ មនុស្សរាប់រយនាក់បានស្នើសុំទទួលយក Ollie មកចិញ្ចឹម។ ក្រោយពីវាបានស្លាប់ដោយសាររបួស មនុស្សទាំងនេះក៏ប្រមូលប្រាក់បរិច្ចាគបានជិត 60,000 ដុល្លារ ដើម្បីវែកមុខជនដៃដល់។

ប៉ូលិសកំណត់បានអត្តសញ្ញាណរបស់ Evans ដោយសារតែ DNA របស់ជននេះដែលជាប់នៅលើ វ៉ាលិស។ Evans ដំបូងឡើយបានបដិសេធ ប៉ុន្តែ ក្រុមមន្ត្រីស៊ើបអង្កេតបានរកឃើញជើងរបស់សត្វឆ្មា និងកណ្ដុរដែលត្រូវគេកាត់ក្បាល នៅក្នុងទូក្លាសេរបស់ជននេះ រួមនឹងកូនកាំបិទបាក់ដងមួយនៅក្នុងចានចំណីរបស់សុនក។ ស្នាមឈាមក៏ត្រូវបានរកឃើញនៅក្នុងបន្ទប់ទឹក ចំណែកឈាមកកស្ងួត និងរោមសត្វក៏ត្រូវបានរកឃើញនៅក្នុងចង្ក្រានអាំងសាច់។

អំពើឃោរឃៅចំពោះ Ollie បានបណ្ដាលឱ្យមានប្រតិកម្មនៅទូទាំងសកលលោក ពិសេសពីអ្នកដែលស្រលាញ់សុនក។ Evans ត្រូវបានឃុំខ្លួនចាប់តាំងពីពេលត្រូវបានចាប់ខ្លួនកាលពី 4 ឆ្នាំមុន។

មេធាវី Gottlieb ឱ្យដឹងថា ដំបូង ជននេះត្រូវបានចោទប្រកាន់លើបទល្មើសធ្វើបាបសត្វចំនួន 17 ករណី ប៉ុន្តែ តុលាការបានសម្រេចលុបចោល 15 ករណី។ បើសិនត្រូវបានកាត់ទោសទាំង 17 ករណី Evans អាចត្រូវដេកគុក 85 ឆ្នាំឯណោះ៕

November 10, 2021

យន្តហោះចម្បាំង 6 គ្រឿងរបស់ ចិន ចូលទៅជិតកោះ តៃវ៉ាន់ ក្នុងគ្រាដែលតំណាងរាស្ត្រ សហរដ្ឋអាមេរិក 6 រូប ធ្វើទស្សនកិច្ចកោះនេះ

កងទ័ពចិនដីគោក បានប្រកាសថា បានបញ្ជូនកងកម្លាំងល្បាត និងប្រយុទ្ធទៅក្បែរកោះ តៃវ៉ាន់ ក្រោយពីតំណាងរាស្ត្រ អាមេរិក 6 រូប ធ្វើទស្សនកិច្ចកោះនេះ កាលពីវេលាម៉ោងប្រហែល 18 ថ្ងៃទី 9 វិច្ឆិកា។

«ការល្បាតដែលត្រៀមជាស្រេចសម្រាប់ប្រយុទ្ធនៅច្រកសមុទ្រ តៃវ៉ាន់ នេះ ត្រូវបានធ្វើឡើងដើម្បីឆ្លើយតបទៅនឹងសម្ដី និងសកម្មភាពខុសឆ្គងធ្ងន់ធ្ងររបស់ប្រទេសមួយចំនួនដែលទាក់ទិននឹងបញ្ហា តៃវ៉ាន់ ក៏ដូចជាសកម្មភាពរបស់កងកម្លាំងប្រឆាំងនៅកោះនេះ» ក្រសួងការពារជាតិចិន បានចេញប្រកាសនាថ្ងៃនេះ។

ភាគីតៃវ៉ាន់ បានឱ្យដឹងថា យន្តហោះយោធាចិន រួមមាន យន្តហោះចម្បាំង J-16 ចំនួន 4 គ្រឿង និងយន្តហោះឈ្លបការណ៍ 2 គ្រឿង បានហោះហើរចូលមកកាន់តំបន់កំណត់អត្តសញ្ញាណការពារដែនអាកាសភាគនិរតីរបស់ តៃវ៉ាន់។

សារព័ត៌មានរបស់ តៃវ៉ាន់ បានរាយការណ៍ថា តំណាងរាស្ត្រ 4 រូប នៃសភាជាន់ខ្ពស់ និង 4 រូប នៃសភាជាន់ទាបរបស់ សហរដ្ឋអាម៉េរិក រួមនឹងជំនួយការ 7 រូប បានឡើងយន្តហោះ C-40A របស់កងទ័ព សហរដ្ឋអាម៉េរិក នៅទីក្រុង ម៉ានីល នៃប្រទេស ហ្វ៊ីលីពីន ហើយបានចុះចតនៅព្រលានយន្តហោះ Taipei Songshan នៃកោះ តៃវ៉ាន់ កាលពីវេលាម៉ោងប្រហែល 18 ម្សិលមិញ។

ស្ថាប័នការទូតរបស់ តៃវ៉ាន់ បានឱ្យដឹងថា ដំណើរទស្សនកិច្ចនេះគឺជាលទ្ធផលនៃការពិភាក្សារវាងក្រុមមន្ត្រីរបស់ តៃវ៉ាន់ និង សហរដ្ឋអាម៉េរិក។ ក្នុងគ្រានេះដែរ ក្រសួងការពារជាតិចិន បានចោទថា ទស្សនកិច្ចនេះគឺជា «ទង្វើជ្រៀតជ្រែកកិច្ចការផ្ទៃក្នុងរបស់ ចិន»។

កាលពីខែមិថុនា ដំណើរទស្សនកិច្ចរយៈពេល 3 ម៉ោង នៃតំណាងរាស្ត្រ 3 រូប របស់ សហរដ្ឋអាម៉េរិក បានធ្វើឱ្យ ចិនដីគោក ខឹងយ៉ាងខ្លាំងម្ដងរួចមកហើយ។

យន្តហោះរបស់កងទ័ព ចិនដីគោក (PLA) បានចូលទៅក្បែរតំបន់កំណត់អត្តសញ្ញាណការពារដែនអាកាសភាគអាគ្នេយរបស់ តៃវ៉ាន់ ចំនួន 554 លើក រាប់ចាប់ពីពាក់កណ្ដាលខែកញ្ញា ឆ្នាំ 2020 ដល់ចុងខែសីហា ឆ្នាំ 2021។ នេះបើតាមប្រកាសកាលពីថ្ងៃទី 9 វិច្ឆិកា របស់កងទ័ព តៃវ៉ាន់៕

November 10, 2021

ក្រុមតំណាងរាស្ត្រសហរដ្ឋអាម៉េរិក ជាច្រើនរូប មកធ្វើទស្សនកិច្ចកោះតៃវ៉ាន់ ទៀតហើយ!

តំណាងរាស្ត្រចំនួន 6 រូប របស់ សហរដ្ឋអាម៉េរិក បានធ្វើឱ្យមានការភ្ញាក់ផ្អើលខ្លាំង នៅពេលមកធ្វើទស្សនកិច្ចកោះ តៃវ៉ាន់ ដែលជាឥរិយាបថមួយធ្វើឱ្យទីក្រុង ប៉េកាំង ប្រតិកម្មខ្លាំងក្លា និងចោទថា ទីក្រុង វ៉ាស៊ីងតោន «ជ្រៀតជ្រែកកិច្ចការផ្ទៃក្នុង»។

សារព័ត៌មានរបស់ តៃវ៉ាន់ បានរាយការណ៍ថា តំណាងរាស្ត្រ 4 រូប នៃសភាជាន់ខ្ពស់ និង 4 រូប នៃសភាជាន់ទាបរបស់ សហរដ្ឋអាម៉េរិក រួមនឹងជំនួយការ 7 រូប បានឡើងយន្តហោះ C-40A របស់កងទ័ព សហរដ្ឋអាម៉េរិក នៅទីក្រុង ម៉ានីល នៃប្រទេស ហ្វ៊ីលីពីន ហើយបានចុះចតនៅព្រលានយន្តហោះ Taipei Songshan នៃកោះ តៃវ៉ាន់ កាលពីវេលាម៉ោងប្រហែល 18 ម្សិលមិញ។

ស្ថាប័នការទូតរបស់ តៃវ៉ាន់ បានឱ្យដឹងថា ដំណើរទស្សនកិច្ចនេះគឺជាលទ្ធផលនៃការពិភាក្សារវាងក្រុមមន្ត្រីរបស់ តៃវ៉ាន់ និង សហរដ្ឋអាម៉េរិក។ ពួកគេនឹងប្រកាសព័ត៌មានដែលទាក់ទងនៅក្នុងពេលវេលាសមស្រប ដើម្បីគោរពដល់ការសម្រេចចិត្តរបស់ក្រុមមន្ត្រីដែលមកធ្វើទស្សនកិច្ច។ ការិយាល័យមេដឹកនាំកោះ តៃវ៉ាន់ ក៏មិនបានផ្ដល់ព័ត៌មានអ្វីបន្ថែមនោះដែរ ទាក់ទិននឹងដំណើរទស្សនកិច្ចនេះ។

ក្នុងគ្រានេះដែរ ក្រសួងការពារជាតិចិន បានចោទថា ទស្សនកិច្ចនេះគឺជា «ទង្វើជ្រៀតជ្រែកកិច្ចការផ្ទៃក្នុងរបស់ ចិន»។ «យើងចង់ព្រមានដោយភាពម៉ឺងម៉ាត់ ឱ្យ សហរដ្ឋអាម៉េរិក បញ្ឈប់ជាបន្ទាន់រាល់ឥរិយាបថបង្កហេតុ បញ្ឈប់រាល់សកម្មភាពដែលនាំឱ្យភាពតានតឹងកើនឡើងនៅច្រកសមុទ្រ តៃវ៉ាន់» អ្នកនាំពាក្យក្រសួងការពារជាតិចិន Tan Ke Fei បានថ្លែងដូច្នេះ។

ប្រទេស ចិន ធ្លាប់បានព្រមានជាច្រើនដងមកហើយថា មិនឱ្យ សហរដ្ឋអាម៉េរិក បញ្ជូនមន្ត្រីមកកាន់កោះ តៃវ៉ាន់ ឬទាក់ទងជាផ្លូវការជាមួយកោះនេះ។ ទីក្រុង ប៉េកាំង ចាត់ទុកថា កោះ តៃវ៉ាន់ គឺជាផ្នែកមួយនៃទឹកដីរបស់ខ្លួន និងរង់ចាំតែការបង្រួបបង្រួមប៉ុណ្ណោះ។ កាលពីខែមិថុនា ដំណើរទស្សនកិច្ចរយៈពេល 3 ម៉ោង នៃតំណាងរាស្ត្រ 3 រូប របស់ សហរដ្ឋអាម៉េរិក បានធ្វើឱ្យ ចិនដីគោក ខឹងយ៉ាងខ្លាំងម្ដងរួចមកហើយ។

នៅក្នុងប្រកាសកាលពីថ្ងៃទី 9 វិច្ឆិកា កងទ័ពរបស់ តៃវ៉ាន់ បានឱ្យដឹងថា យន្តហោះរបស់កងទ័ព ចិនដីគោក (PLA) បានចូលទៅក្បែរតំបន់កំណត់អត្តសញ្ញាណការពារដែនអាកាសភាគនិរតីរបស់ តៃវ៉ាន់ ចំនួន 554 លើក រាប់ចាប់ពីពាក់កណ្ដាលខែកញ្ញា ឆ្នាំ 2020 ដល់ចុងខែសីហា ឆ្នាំនេះ៕

November 10, 2021

អាជ្ញាធររាជធានីភ្នំពេញ បានបើកឱ្យប្រើប្រាស់បណ្ដោះអាសន្ន ផ្លូវក្រោមដីចោមចៅមួយខ្សែទៀត ដើម្បីសម្រួលចរាចរណ៍

ការសម្រេចបើកឱ្យដំណើរការផ្លូវក្រោមដីមួយខ្សែទៀត ជាបណ្តោះអាសន្ននេះ នៅចំណុចការដ្ឋានសាងសង់ស្ពានអាកាស និងផ្លូវក្រោមដីចោមចៅ ដើម្បីជួយសម្រួលចរាចរណ៍ ខណៈក្រុមការងារកំពុងសាងសង់ផ្លូវតភ្ជាប់ដទៃ។

មន្ត្រីជំនាញរបស់សាលារាជធានីភ្នំពេញ នាថ្ងៃនេះ បានប្រាប់សារព័ត៌មានក្នុងស្រុកថា មូលហេតុដែលអាជ្ញាធររាជធានីភ្នំពេញសម្រេចបើកផ្លូវក្រោមដីបណ្ដោះអាសន្ននេះគឺដើម្បីជួយសម្រួលការកកស្ទះចរាចរណ៍ ក្នុងពេលអ៊ុតកៅស៊ូលើកំណាត់ផ្លូវដែលតភ្ជាប់ពីមហាវិថីសហព័ន្ធរុស្ស៊ីទៅផ្លូវជាតិ លេខ 4 និងផ្លូវតភ្ជាប់ពីមហាវិថីចោមចៅទៅមហាវិថីសហព័ន្ធរុស្ស៊ី។

ស្ពានអាកាស និងផ្លូវក្រោមដីចោមចៅ ជាគម្រោងរបស់រាជរដ្ឋាភិបាលកម្ពុជា តាមរយៈសាលារាជធានីភ្នំពេញ ដោយទទួលម៉ៅការសាងសង់ដោយក្រុមហ៊ុនវិនិយោគទុនអាណិកជន កម្ពុជា (OCIC) ដោយប្រើប្រាស់ការសាងសង់ក្នុងរយៈពេល 30 ខែ និងចំណាយថវិកាសាងសង់ប្រមាណ 22 លានដុល្លារអាម៉េរិក។

November 8, 2021

ព្រឹលធ្លាក់ខ្លាំងនៅដើមរដូវ ពលរដ្ឋនៅទីក្រុងប៉េកាំង នាំគ្នាចេញគយគន់នៅតាមទីតាំងទេសចរណ៍

មនុស្សរាប់សែននាក់នៅ រដ្ឋធានីប៉េកាំង ប្រទេសចិន នាំគ្នាចេញទៅគយគន់សម្រស់ដ៏ស្រស់ត្រកាលនៃតំបន់ទេសចរណ៍ដែលគ្របដណ្ដប់ដោយព្រឹលពណ៌សក្បុស នៅពេលរដ្ឋធានីនេះមានព្រឹកធ្លាក់នៅដើមរដូវ។

រដ្ឋធានីប៉េកាំង មានព្រឹលធ្លាក់ដំបូងកាលពីថ្ងៃទី 6 វិច្ឆិកា ឆាប់ជាង 23 ថ្ងៃ ធៀបនឹងឆ្នាំមុន។ សីតុណ្ហភាពកាលពីយប់ថ្ងៃទី 7 វិច្ឆិកា ចុះទាបបំផុតក្នុងរយៈពេលមួយទសវត្សរ៍កន្លង។ សីតុណ្ហភាពជាមធ្យម ចាប់ពី 1 ដល់ 2 អង្សាសេ នៅពេលថ្ងៃ និងពី -5 ដល់ -4 អង្សាសេនៅពេលយប់។

នាយកដ្ឋានឧតុនិយមរបស់ ប្រទេសចិន កាលពីថ្ងៃទី 7 វិច្ចិកា បានព្រមានថា ព្យុះព្រឹលកើតមាននៅភាគឦសានប្រទេស ក្នុងនោះមានតំបន់ខ្លះព្រឹកធ្លាក់កម្រាស់ 45 ម.ម ក្នុងរយៈពេល 24 ម៉ោង ខណៈនៅពាសពេញភាគខាងជើង មានព្រឹលធ្លាក់ខ្លាំង។

November 8, 2021

លោក Elon Musk កំពុងត្រៀមខ្លួនលក់ភាគហ៊ុនតម្លៃរាប់សិបពាន់លានដុល្លារ នៅ Tesla ក្រោយការស្ទង់មតិលើ Twitter

លទ្ធផលនៃការស្ទង់មតិបានបង្ហាញថា 58% ក្នុងចំណោមអ្នកបានចូលរួមបញ្ចេញយោបល់ បានគាំទ្រឱ្យមហាសេដ្ឋី Elon Musk លក់ភាគហ៊ុន Tesla។

កាលពីថ្ងៃសៅរ៍សប្ដាហ៍កន្លងទៅ មហាសេដ្ឋីលំដាប់ទីមួយក្នុងពិភពលោក Elon Musk បានធ្វើការស្ទង់មតិមួយនៅលើបណ្ដាញសង្គម Twitter ស្ដីពីការដែលថា លោកគួរតែលក់ភាគហ៊ុន 10% របស់ខ្លួន នៅក្នុងក្រុមហ៊ុន Tesla ឬអត់។ យោងតាមលទ្ធផលនៃការស្ទង់មតិដែលបានបញ្ចប់កាលពីរល្ងាចថ្ងៃអាទិត្យ (ម៉ោងនៅទីក្រុងនីវយ៉ក) 58% ក្នុងចំណោម 3.5 លាននាក់ដែលបានចូលរួមបញ្ចេញយោបល់ បានគាំទ្រឱ្យលោក Elon Musk លក់ភាគហ៊ុននេះ។

យោងតាមសារព័ត៌មាន Bloomberg មហាសេដ្ឋីអាម៉េរិក ដើមកំណើតអាហ្វ្រិកខាងត្បូងរូបនេះ បច្ចុប្បន្នកាន់កាប់ភាគហ៊ុន Tesla ចំនួន 170.5 លានហ៊ុន។ បើសិនជាលក់ 10% ក្នុងចំណោមនេះ លោក Musk នឹងរកបាន 21 ពាន់លានដុល្លារបន្ថែមទៀត។

«ខ្ញុំបានត្រៀមខ្លួនរួចរាល់ហើយដើម្បីទទួលយកលទ្ធផល» លោក Musk បង្ហោះសារនៅលើ Twitter ដូច្នេះ ក្រោយពីការស្ទង់មតិបានបញ្ចប់។

ឥរិយាបថនេះរបស់ Elon Musk ត្រូវបានធ្វើឡើងនៅក្នុងគ្រាដែល សហរដ្ឋអាម៉េរិក កំពុងមានការជជែកអំពីការយកពន្ធលើខ្ទង់ចំណេញមិនទាន់ទទួលបាន ដូចជាមូលបត្រជាដើម។ CEO របស់ Tesla ក៏ធ្លាប់បានអះអាងថា លោកមិនបានទទួលប្រាក់បៀវត្ស ឬប្រាក់រង្វាន់ពីក្រុមហ៊ុនណាមួយឡើយ។

«ខ្ញុំមានតែមូលបត្រ។ ដូច្នេះហើយ មានវិធីតែមួយគត់ដែលអនុញ្ញាតឱ្យខ្ញុំបង់ពន្ធលើប្រាក់ចំណូលរូបវ័ន្តបុគ្គល (Personal Income) នោះគឺការលក់មូលបត្រ» លោក Elon Musk និយាយដូច្នេះ។

Dan Ives អ្នកវិភាគប្រចាំក្រុមហ៊ុន Wedbush Securities អះអាងថា ការដែលភាគហ៊ុនិកលក់ភាគហ៊ុនដ៏ច្រើន តែងត្រូវបានគេចាត់ទុកជាសញ្ញាអវិជ្ជមាន។ ប៉ុន្តែ ក្នុងករណីរបស់មហាសេដ្ឋី Elon Musk នេះវិញ នឹងមិនប៉ះពាល់ខ្លាំងដល់ Tesla ទេ ព្រោះថា ទាំងក្រុមអ្នកវិនិយោគដែលមានអង្គការចាត់តាំង ទាំងអ្នកវិនិយោគលក្ខណៈបុគ្គល នៅតែយកចិត្តទុកដាក់ខ្លាំងទៅលើមូលបត្ររបស់ក្រុមហ៊ុនផលិតរថយន្តអគ្គិសនីនេះ៕

November 8, 2021

(វីដេអូ)-NASA បង្ហើបឱ្យឃើញរ៉ុក្កែតកម្ពស់ជិត 100 ម៉ែត្រ សម្រាប់បេសកកម្មឡើងទៅឋានព្រះចន្ទ ក្នុងពេលឆាប់ៗនេះ

ទីភ្នាក់ងារអវកាសអាម៉េរិក (NASA) កំពុងបង្ហើយការងារចុងក្រោយមួយចំនួនដើម្បីត្រៀមសម្រាប់បេសកកម្ម Artemis ដំបូងនៅឆ្នាំក្រោយ។

NASA កំពុងតែមានគោលដៅនាំមនុស្សឡើងទៅកាន់ឋានព្រះចន្ទជាថ្មី ក្រោយរយៈពេល 5 ទសវត្សរ៍ រាប់ចាប់ពីព្រឹត្តិការណ៍ឡើងជាន់ដីព្រះចន្ទតាមរយៈកម្មវិធី Apollo 17 កាលពីឆ្នាំ 1972។ គម្រោងថ្មី (Artemis) នេះ រួមមាន បេសកកម្ម Artemis 1, 2, 3 ដែលគ្រោងអនុវត្តជាបន្តបន្ទាប់នៅឆ្នាំ 2022, 2023 និង 2024។

កាលពីថ្ងៃទី 5 វិច្ឆិកា NASA បានឱ្យដឹងថា ពួកគេសម្រេចបានការងារសំខាន់ៗមួយចំនួន នៅពេលដំឡើងយានអវកាស Orion ទៅលើក្បាលរ៉ុក្កែត SLS Block 1 ដែលមានកម្ពស់ 98 ម៉ែត្រ ខាងក្នុងរោងចក្រដំឡើងនៅឯមជ្ឈមណ្ឌលអវកាស Kennedy របស់ NASA ដែលមានទីតាំងនៅរដ្ឋ Florida សហរដ្ឋអាម៉េរិក។

បេសកកម្មដំបូង (Artemis 1) គឺជាការហោះហើរគ្មានមនុស្សបើកបរ ដើម្បីពិនិត្យស្ថានភាពហោះហើរក្នុងទីអវកាសជ្រៅរបស់យាន Orion ហើយនឹងចុះចតលើផែនដីវិញ ដោយប្រើឆត្រយោង។

បើសិនជាអ្វីៗដំណើរការដោយរលូន នោះ Artemis 1 នឹងត្រូវបានបាញ់បង្ហោះនៅថ្ងៃទី 12 ខែកុម្ភៈ ឆ្នាំ 2022។ ចំណែកបេសកកម្ម Artemis 2 និង Artemis 3 វិញគឺ សុទ្ធតែមានអវកាសយានិកទៅជាមួយ។ តាមផែនការ Artemis 2 នៅតែប្រើប្រាស់រ៉ុក្កែត SLS Block 1 របស់ NASA ដើម្បីនាំយាន Orion ទៅហោះហើរជុំវិញឋានព្រះចន្ទ ខណៈ Artemis 3 នឹងប្រើប្រាស់ប្រព័ន្ធ Starship របស់ក្រុមហ៊ុន SpaceX ដើម្បីនាំយាន Orion ចុះចតលើដីឋានព្រះចន្ទ។

ក្រុមអវកាសយានិកនៃបេសកកម្មនេះ នឹងរួមមានទាំងស្ត្រីដំបូងគេ និងជនជាតិស្បែកខ្មៅដំបូងគេផងដែរ ដែលនឹងបានជាន់ដីនៅលើឋានព្រះចន្ទ៕

November 8, 2021

ក្រុមមហាសេដ្ឋី និងអ្នកមានកំពូលៗរាប់រយនាក់ នៅ សហរដ្ឋអាម៉េរិក ទទួលបានប្រាក់ជំនួយ COVID-19!

យោងតាម ProPublica មហាសេដ្ឋីសរុបចំនួន 18 នាក់ និងអ្នកមានលំដាប់កំពូលៗជាង 200 នាក់ ទទួលបានខ្ទង់ប្រាក់ជំនួយក្នុងវិបត្តិហិរញ្ញវត្ថុដែលបង្កឡើងដោយជំងឺរាតត្បាត COVID-19 ពីរដ្ឋាភិបាលអាម៉េរិក។

ProPublica ដែលជាអង្គការសារព័ត៌មានឯករាជ្យ និងមិនស្វែងរកកម្រៃ មានជំនាញខាងស៊ើបអង្កេត បានឱ្យដឹងថា ក្រុមមហាសេដ្ឋី បានទទួលខ្ទង់ប្រាក់ជំនួយដំបូង ដែលនេះគឺយោងទៅតាមឯកសារបែកធ្លាយពីការិយាល័យសេវាចំណូលផ្ទៃក្នុង (Internal Revenue Service/ IRS)។

ក្នុងចំណោមមហាសេដ្ឋីដែលត្រូវបានចោទថា បានទទួលប្រាក់ជំនួយខាងលើ ក៏មានមហាសេដ្ឋី George Soros ដែលបច្ចុប្បន្នមានទ្រព្យចំនួន 8.6 ពាន់លានដុល្លារ។ បន្ទាប់មកទៀតគឺ ស្ថាបនិករបស់ Renco Group លោក Ira Rennert ដែលមានទ្រព្យប្រមាណ 3.7 ពាន់លានដុល្លារ។ ចំណែក មហាសេដ្ឋី Terrence Pegula ដែលមានទ្រព្យ 5.7 ពាន់លានដុល្លារ ក៏មានឈ្មោះនៅក្នុងបញ្ជីនេះ។

ស្ថាបនិករបស់ Renco Group លោក Ira Rennert

គ្រួសាររបស់មហាសេដ្ឋី George Soros ក្រោយមក បានប្រកាសថា បានសងប្រាក់ទាំងនេះត្រលប់ទៅវិញ ខណៈដែលមហាសេដ្ឋី Rennert បានបដិសេធការអធិប្បាយចំពោះបញ្ហានេះ។

Timothy Headington ជាអ្នកវិនិយោគលើអណ្ដូងប្រេង អ្នកអភិវឌ្ឍអចលនទ្រព្យ និងជាផលិតករភាពយន្តល្បីៗដូចជា «Argo» និង «World War Z» ជាដើម ដែលមានទ្រព្យប្រមាណ 1.4 ពាន់លានដុល្លារ ក៏ត្រូវបានគេរកឃើញក្នុងបញ្ជីនេះផងដែរ។

Robert Dart អ្នកស្នងមរតករបស់គ្រួសារត្រកូល Dart ដែលជាម្ចាស់កម្មសិទ្ធិរបស់ Dart Container ក៏ទទួលបានកញ្ចប់ថវិកាជំនួយ បើទោះលោកលែងជាពលរដ្ឋអាម៉េរិក និងប្រកាសពន្ធពីអាសយដ្ឋានមួយនៅប្រជុំកោះ Cayman។ Dart ក្រោយមកក៏បានប្រគល់ប្រាក់នេះត្រលប់មករដ្ឋាភិបាលវិញ។

នៅមានបុគ្គលអ្នកមានជាច្រើនផ្សេងទៀតដែលមានឈ្មោះនៅក្នុងបញ្ជីខាងលើ ក្នុងនោះមានទាំងអតីតនាយកប្រតិបត្តិរបស់ Lehman Brothers លោក Richard Fuld ឬ លោក Erik Prince ស្ថាបនិករបស់ក្រុមហ៊ុន Blackwater ដែលជាក្រុមហ៊ុនយោធាឯកជន និងជាអ្នកម៉ៅការរបស់រដ្ឋាភិបាល។

យោងតាមច្បាប់ផ្ដល់ជំនួយ សង្គ្រោះ និងសន្តិសុខសេដ្ឋកិច្ចសម្រាប់វិបត្តិ Coronavirus (CARES) ក្រុមគោលដៅដែលត្រូវទទួលបានប្រាក់ជំនួយដោយសារ COVID-19 គឺជាគូស្វាមី ភរិយា ដែលប្រកាសពន្ធរួម ហើយមានចំណូលសរុបក្រោម 150,000 ដុល្លារ/ឆ្នាំ និងពលរដ្ឋនៅលីវដែលមានចំណូលក្រោម 75,000 ដុល្លារ/ឆ្នាំ នៅចុងឆ្នាំ 2019។

ProPublica ឱ្យដឹងថា ក្រុមមហាសេដ្ឋី និងកំពូលអ្នកមានរាប់រយនាក់ បានទទួលប្រាក់ជំនួយ ព្រោះតែពួកគេមានលក្ខខណ្ឌគ្រប់គ្រាន់ ដោយសារតែរដ្ឋាភិបាលកំណត់ទៅលើតែប្រាក់ចំណូលដែលត្រូវបង់ពន្ធ។ សរុប មនុស្សប្រមាណ 270 នាក់ដែលបានបង់ពន្ធក្នុងនាមជាអ្នកមាន មានប្រាក់ចំណូលសរុប 5.7 ពាន់លានដុល្លារ នេះបើតាមតារាងប្រកាសពន្ធមុននោះរបស់ពួកគេ។ ប៉ុន្តែ ខ្ទង់ពន្ធនានាដែលត្រូវបានកាត់បន្ថយរបស់ពួកគេធំរហូតដល់ថ្នាក់ក្លាយជាចំណូលអវិជ្ជមាន (Negative Income) ក្នុងឆ្នាំ 2019។

លោក Erik Prince ស្ថាបនិករបស់ក្រុមហ៊ុន Blackwater

ការដែលក្រុមមហាសេដ្ឋី ទទួលបានប្រាក់ជំនួយ បានបង្ហាញអំពីកំហុសឆ្គងនៅក្នុងគោលនយោបាយពន្ធដារចំពោះក្រុមកំពូលអ្នកមាន។ បញ្ហានេះបាននាំឱ្យពួកគេត្រូវបានការពារច្រើនជាងក្រុមពលរដ្ឋដែលរស់ដោយសារប្រាក់ខែ៕

November 8, 2021

កម្ពុជា រកឃើញអ្នកឆ្លងថ្មី COVID-19 ចំនួនជាង 60 នាក់ទៀត កាលពីម្សិលមិញ

កម្ពុជា បានរកឃើញអ្នកឆ្លងថ្មី 68 (PCR) នាក់ទៀត ខណៈអ្នកជាសះស្បើយមានចំនួន 72 នាក់ និងស្លាប់ 6 នាក់ ក្នុងរយៈពេល 24 ម៉ោង នៃថ្ងៃទី 7 វិច្ឆិកា ឆ្នាំ 2021។

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 250,613,440 នាក់
– អ្នកជាសះស្បើយសរុបជាង = 226,869,270 នាក់
– អ្នកស្លាប់សរុបជាង = 5,064,640 នាក់
– អ្នកកំពុងព្យាបាលសរុបជាង = 18,679,530 នាក់

November 8, 2021

Author: សឿន សំណាង