សឿន សំណាង - La Reine Media

ក្រសួងទេសចរណ៍ ជូនដំណឹងដល់អ្នកដំណើរបរទេសដែលមានបំណងចូលមក កម្ពុជា

នារសៀលថ្ងៃទី 15 វិច្ឆិកា នេះ ក្រសួងទេសចរណ៍ បានចេញសេចក្ដីជូនដំណឹងមួយស្ដីពីការអនុញ្ញាតឱ្យទេសចរអន្តរជាតិ និងអ្នកដំណើរដែលបានចាក់វ៉ាក់សាំងបង្ការ COVID-19 ពេញលេញ ចូលក្នុង កម្ពុជា ដោយមិនតម្រូវឱ្យធ្វើចត្តាឡីស័ក។

ប្រកាសនេះត្រូវបានធ្វើឡើងបន្ទាប់ពីមានការអនុញ្ញាតពីប្រមុខរដ្ឋាភិបាល សម្ដេចតេជោ ហ៊ុន សែន ដែលបានថ្លែងបញ្ជាក់កាលពីពេលថ្មីៗនេះ ទាក់ទិននឹងការបើកទ្វារទទួលភ្ញៀវទេសចរណ៍ ការអនុញ្ញាតឱ្យប្រារព្ធពិធីជួបជុំធំៗ ក្រោយពីអត្រានៃការឆ្លងរាលដាល COVID-19 នៅក្នុងស្រុក មានការថយចុះទាបខ្លាំង។

ក្រសួងបានបញ្ជាក់ថា ចំពោះអ្នកដំណើរមកដល់ កម្ពុជា ប៉ុន្តែជាពលរដ្ឋដែលមិនទាន់បានចាក់វ៉ាក់សាំង នឹងត្រូវយកសំណាកសម្រាប់ធ្វើតេស្ត និងធ្វើចត្តាឡីស័កដូចមុន។

ព័ត៌មានលម្អិត សូមអានសេចក្ដីជូនដំណឹងរបស់ក្រសួងទេសចរណ៍ដូចមាននៅខាងក្រោម៖

November 15, 2021

(វីដេអូ)-ម៉ាស៊ីនដំឡើងធ្នឹមខ្នាតយក្ស 1,000 តោន សាងសង់ស្ពានឆ្លងកាត់សមុទ្រនៅប្រទេសចិន

ប្រទេសចិន កាលពីថ្ងៃទី 13 វិច្ឆិកា សម្រេចបានដំណាក់កាលតភ្ជាប់ផ្នែកចុងក្រោយនៃស្ពានផ្លូវដែកល្បឿនលឿនឆ្លងសមុទ្រនៅខេត្ត Fujian ដោយមានជំនួយពីម៉ាស៊ីនដំឡើងធ្នឹមខ្នាតយក្ស។

ផ្នែកចុងក្រោយនៃស្ពានដ៏ធំមួយនៅលើផ្លូវដែកល្បឿនលឿនឆ្លងសមុទ្រនៅភាគខាងកើតប្រទេសចិន ត្រូវបានតភ្ជាប់រួចហើយកាលពីព្រឹកថ្ងៃទី 13 វិច្ឆិកា បន្ទាប់ពីបានចំណាយពេលសាងសង់អស់ 3 ឆ្នាំ។

ស្ពានឆ្លងឈូងសមុទ្រ Meizhou នៅទីក្រុង Putian នៃខេត្ត Fujian ប្រទេសចិន នេះ មានប្រវែងសរុប 14.7 គីឡូម៉ែត្រ ក្នុងនោះមាន 10.8 គីឡូម៉ែត្រស្ថិតនៅលើសមុទ្រ។

ម៉ាស៊ីនដំឡើងធ្នឹមមានឈ្មោះថា Kunlun ដែលត្រូវបានអភិវឌ្ឍឡើងដោយវិស្វករចិន បានចូលរួមកិច្ចការសាងសង់ស្ពានមួយខ្សែនេះ។ ដោយមានទម្ងន់រហូតដល់ 1,000 តោន នេះគឺជាម៉ាស៊ីនដំឡើងធ្នឹមធំបំផុតក្នុងពិភពលោក។

Kunlun មានសមត្ថភាពដឹកជញ្ជូន និងដំឡើងធ្នឹមប្រវែង 40.6 ម៉ែត្រ និងទម្ងន់ជាង 1,000 តោន បានយ៉ាងសុក្រឹត។ វាក៏អាចផ្លាស់ទីដោយស្វ័យប្រវត្តនៅក្នុងផ្លូវរូង និងអាចសម្រួលផ្លូវរបស់វាដោយឯកឯងតាមរយៈកាំរស្មីអ៊ីនហ្វ្រារ៉េដ។

ស្ពានឆ្លងឈូងសមុទ្រ Meizhou គឺជាផ្នែកមួយនៃផ្លូវដែកល្បឿនលឿន Fuzhou-Xiamen ជាផ្លូវដែកល្បឿនលឿនឆ្លងកាត់សមុទ្រដំបូងរបស់ប្រទេសចិន ដែលគ្រោងនឹងដាក់ឱ្យប្រើប្រាស់ចាប់ពីឆ្នាំ 2023។

ជាមួយនឹងការរចនាដែលអាចឱ្យបើកបរក្នុងល្បឿន 350 គីឡូម៉ែត្រ/ម៉ោង ផ្លូវដែកនេះត្រូវបានគេរំពឹងថានឹងជួយកាត់បន្ថយពេលវេលានៃការធ្វើដំណើរពីទីក្រុងរដ្ឋបាល Fuzhou ទៅកាន់តំបន់ទេសចរណ៍នានានៅ Xiamen នៃខេត្ត Fujian ចុះមកនៅត្រឹមមួយម៉ោង៕

November 15, 2021

(វីដេអូ)-អាចម៍ផ្កាយទំហំប៉ុនតួ Eiffel របស់ទីក្រុងបារីស កំពុងហោះសំដៅមកកាន់ផែនដី

ដុំថ្មអវកាសមានទំហំប្រហាក់ប្រហែលនឹងតួ Eiffel ដែលនឹងហោះកាត់មុខផែនដីនៅខែធ្នូ ឆ្នាំ 2021 ត្រូវបានអ្នកវិទ្យាសាស្ត្រចាត់ចូលក្នុងក្រុមអាចម៍ផ្កាយគ្រោះថ្នាក់ ដោយសារតែមាឌដ៏ធំរបស់វា។

អាចម៍ផ្កាយមួយដុំដែលមានទំហំ 330 ម៉ែត្រ កំពុងហោះតម្រង់មករកផែនដី ហើយនឹងមកក្បែរភពបៃតងនេះនៅថ្ងៃទី 11 ខែធ្នូ ឆ្នាំ 2021។ អាចម៍ផ្កាយដែលមានឈ្មោះថា 4660 Nereus នេះ នឹងហោះមកក្បែរផែនដីក្នុងរយៈចម្ងាយជិត 3.9 លានគីឡូម៉ែត្រ។

ដោយសារតែវាមានអង្កត់ផ្ចិតធំជាង 140 ម៉ែត្រ ហើយនឹងមកក្បែរផែនដីជាង ½ ធៀបនឹងរយៈចម្ងាយពីផែនដី ទៅព្រះអាទិត្យ ទើបត្រូវបានដាក់បញ្ចូលទៅក្នុងបញ្ជី «អាចម៍ផ្កាយដែលអាចបង្កគ្រោះថ្នាក់»។

ដោយគ្រាន់តែមានការផ្លាស់ប្ដូរតិចតួចនៅលើគន្លងគោចរ ក៏អាចនាំឱ្យអាចម៍ផ្កាយនេះចូលទៅក្នុងគន្លងដែលអាចធ្លាក់មកលើផែនដី បង្កការខូចខាតធ្ងន់ធ្ងរកម្រិតតំបន់។ ក៏ប៉ុន្តែ នៅឆ្នាំ 2060 អាចម៍ផ្កាយ 4660 Nereus នឹងមានលទ្ធភាពប៉ះទង្គិចនឹងផែនដីខ្ពស់ជាងលើកនេះ ដោយសារវានឹងហោះមកក្បែរផែនដីក្នុងរយៈចម្ងាយត្រឹមតែ 1.2 លានគីឡូម៉ែត្រ ចាំថ្ងៃបុណ្យនៃក្ដីស្រលាញ់៕

November 15, 2021

ជំនួយជាវ៉ាក់សាំងបង្ការ COVID-19 ជាង 3 សែនដូសទៀត នឹងមកដល់ កម្ពុជា នៅរសៀលថ្ងៃនេះ

វ៉ាក់សាំង AstraZeneca ចំនួន 3.2 សែនដូសដែលជាជំនួយអន្តរជាតិតាមរយៈយន្តការ COVAX នេះ នឹងត្រូវបានដឹកមកដល់ កម្ពុជា នៅថ្ងៃទី 15 ខែវិច្ឆិកា ឆ្នាំ 2021 វេលាម៉ោងប្រហែលជា 4 រសៀល។

នេះគឺជាលើកទឹកបីហើយដែល កម្ពុជា ទទួលបានជំនួយជាវ៉ាក់សាំងពីអន្តរជាតិតាមរយៈយន្តការ COVAX របស់អង្គការសុខភាពពិភពលោក ក្នុងនោះ លើកទីមួយ កម្ពុជា ទទួលបានវ៉ាក់សាំង AstraZeneca ផលិតនៅ ឥណ្ឌា ចំនួន 324,000 ដូស កាលពីខែមីនា ឆ្នាំ 2021 និងលើកទីពីគឺវ៉ាក់សាំង Sinovac ផលិតនៅប្រទេស ចិន ចំនួន 124,800 ដូស កាលពីខែតុលា ឆ្នាំ 2021 ខណៈលើកទីបីគឺវ៉ាក់សាំង AstraZeneca ចំនួន 324,000 ដូស ដែលនឹងមកដល់នៅរសៀលថ្ងៃនេះ។ ជាសរុប កម្ពុជា ទទួលបានវ៉ាក់សាំងដែលជាជំនួយពីអន្តរជាតិតាមរយៈយន្តការ COVAX នេះ ចំនួន 772,800 ដូស។

គិតមកដល់បច្ចុប្បន្ន កម្ពុជា បានទទួលវ៉ាក់សាំងបង្ការ COVID-19 សរុបចំនួនប្រមាណ 30,000,000 ដូស ដើម្បីចាក់ជូនប្រជាពលរដ្ឋ ក្នុងនោះ ចិន គឺជាប្រទេសដែលបានផ្ដល់វ៉ាក់សាំងបង្ការជំងឺ COVID-19 មកដល់ កម្ពុជា ច្រើនជាងគេ។

កំណើននៃអត្រាចាក់វ៉ាក់សាំង COVID-19 នៅ កម្ពុជា គិតត្រឹមថ្ងៃទី 14 ខែវិច្ឆិកា ឆ្នាំ 2021 រួមមាន៖

-លើប្រជាជនអាយុពី 18 ឆ្នាំឡើង មាន 100.57% ធៀបនឹងចំនួនប្រជាជនគោលដៅ 10 លាននាក់

-លើកុមារ-យុវវ័យអាយុពី 12 ឆ្នាំ ទៅក្រោម 17 ឆ្នាំ មាន 98.47% ធៀបនឹងចំនួនប្រជាជនគោលដៅ 1,827,348 នាក់

-លើកុមារអាយុពី 6 ឆ្នាំ ដល់ក្រោម 12 ឆ្នាំ មាន 103.7% ធៀបនឹងប្រជាជនគោលដៅ 1,897,382 នាក់

-លើកុមារអាយុ 5 ឆ្នាំ មាន 76.23% ធៀបនឹងប្រជាជនគោលដៅ 304,317 នាក់

-លទ្ធផលចាក់វ៉ាក់សាំងធៀបនឹងចំនួនប្រជាជនសរុប 16 លាននាក់ មាន 87.85% ៕

November 15, 2021

ករណីឆ្លងថ្មី COVID-19 នៅ កម្ពុជា គិតមកដល់ព្រឹកថ្ងៃទី 15 ខែវិច្ឆិកា ឆ្នាំ 2021 នៅតែបន្តថយចុះ

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 14 វិច្ឆិកា 2021 រួមមាន៖

– ឆ្លងថ្មី = 52 នាក់
– ជាសះស្បើយថ្មី = 55 នាក់
– ស្លាប់ថ្មី = 5 នាក់។

ក្នុងចំណោមអ្នកឆ្លងថ្មីទាំង 52 នាក់ មាន៖

– ករណីឆ្លងសហគមន៍ 48 នាក់
– អ្នកដំណើរពីបរទេស 04 នាក់

គិតមកដល់ព្រឹកថ្ងៃទី 15 ខែវិច្ឆិកា ឆ្នាំ 2021 តួលេខ COVID-19 សរុបនៅ កម្ពុជា រួមមាន៖

– អ្នកឆ្លងសរុប= 119,481 នាក់
– អ្នកជាសះស្បើយ= 115,862 នាក់
– អ្នកស្លាប់= 2,861 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 254,039,400 នាក់
– អ្នកជាសះស្បើយសរុបជាង = 229,711,900 នាក់
– អ្នកស្លាប់សរុបជាង = 5,115,350 នាក់
– អ្នកកំពុងព្យាបាលសរុបជាង = 19,212,000 នាក់

November 15, 2021

ការស្រាវជ្រាវបង្ហាញថា «រោគសញ្ញា COVID-19 អូសបន្លាយពេលយូរ» គឺដោយសារកត្តាផ្លូវចិត្ត

ការសិក្សាស្រាវជ្រាវទ្រង់ទ្រាយធំនៅប្រទេស បារាំង បានបង្ហាញថា រោគសញ្ញាដែលត្រូវបានគេហៅថា «អាការរោគ COVID-19 អូសបន្លាយពេលយូរ» អាចបណ្ដាមកពីកត្តាផ្លូវចិត្តច្រើនជាងកត្តាឆ្លងវីរុស។

របាយការណ៍មួយដែលទើបត្រូវបានចុះផ្សាយលើទស្សនាវដ្ដីសមាគមសេវជ្ជសាស្ត្រសហរដ្ឋអាម៉េរិក ដែលបានសិក្សាស្រាវជ្រាវទៅលើមនុស្សជិត 27,000 នាក់ នៅពាសពេញប្រទេស បារាំង ជាក្រុមមនុស្សដែលបានធ្វើតេស្តអង្គបដិប្រាណក្នុងការស្វែងរកអ្នកផ្ទុក COVID-19។

បន្ទាប់ពីអ្នកទាំងនេះបានទទួលលទ្ធផលនៃការធ្វើតេស្ត ក្រុមអ្នកវិទ្យាសាស្ត្របានសួរថា តើពួកគេជឿថា ខ្លួនពិតជាបានឆ្លង COVID-19 ឬទេ ក៏ដូចជារបាយការណ៍អំពីរោគសញ្ញា ដូចជា អត់កម្លាំង ពិបាកដកដង្ហើម ឬការថយចុះនៃសមត្ថភាពផ្ដោតអារម្មណ៍។

មនុស្សភាគច្រើន (ជាង 25,000 នាក់) មានលទ្ធផលអវិជ្ជមាននឹង COVID-19 ជឿថា ពួកគេមិនធ្លាប់ឆ្លងវីរុសនេះ។ ក្នុងចំណោមមនុស្សប្រមាណ 1,000 នាក់ដែលមានលទ្ធផលវិជ្ជមាន មាន 450 នាក់ជឿថា ពួកគេបានឆ្លងវីរុស។

ចុងក្រោយ មនុស្សជិត 460 នាក់ ដែលទទួលបានលទ្ធផលអវិជ្ជមាន បានឱ្យដឹងថា ពួកគេមិនធ្លាប់បានគិតថា ខ្លួនបានឆ្លង COVID-19 នោះទេ។

ក្រុមអ្នកស្រាវជ្រាវបានរកឃើញថា ក្រុមមនុស្សដែលជឿថា ពួកគេបានឆ្លង COVID-19 បើទោះជាពួកគេមានលទ្ធផលតេស្តវិជ្ជមាន ឬអវិជ្ជមានក៏ដោយ ក៏មានរបាយការណ៍ក្នុងអត្រាខ្ពស់ស្ដីពីការកើតមានរោគសញ្ញាអូសបន្លាយពេលយូរ។ ក្នុងខណៈនោះ លទ្ធផលតេស្តវិជ្ជមាន គ្រាន់តែទាក់ទិននឹងរោគសញ្ញាមួយគត់ដែលអូសបន្លាយពេលយូរ នោះគឺការបាត់បង់ឃានវិញ្ញាណ (ក្លិន)។

ដូច្នេះ ក្រុមអ្នកជំនាញបានសន្និដ្ឋានថា រោគសញ្ញាដែលអូសបន្លាយពេលយូរ អាចជាប់ទាក់ទងនឹងភាពច្រឡំបល់ដែលថា ខ្លួនបានឆ្លង COVID-19 ជាជាងការដែលវិជ្ជមាននឹងវីរុសនេះពិត។

លោក Cedric Lemogne ប្រធានផ្នែកជំងឺផ្លូវចិត្តនៃមន្ទីរពេទ្យ Hotel-Dieu នៅទីក្រុង បារីស ប្រទេស បារាំង បានអះអាងថា ការរកឃើញនេះ ពិតជាមានសារសំខាន់ក្នុងការស្រាវជ្រាវរកមូលហេតុដទៃទៀតដែលបណ្ដាលឱ្យកើតមានរោគសញ្ញានៃជំងឺ។

យ៉ាងនេះក្ដី ក្រុមអ្នកវិទ្យាសាស្ត្រមួយចំនួនផ្សេងទៀត នៅតែមានមន្ទិលសង្ស័យចំពោះវិធីសាស្ត្រនៃការសិក្សាស្រាវជ្រាវរបស់ក្រុមអ្នកវិទ្យាសាស្ត្រខាងលើ៕

November 15, 2021

បារ៉ែន ក្លាយជាប្រទេសដំបូងគេក្នុងពិភពលោក ដែលបានអនុម័តឱ្យប្រើបន្ទាន់នូវថ្នាំព្យាបាល COVID-19 របស់ AstraZeneca

កាលពីថ្ងៃទី 14 វិច្ចិកា សារព័ត៌មានរបស់ប្រទេសបារ៉ែន ប្រកាសថា ប្រទេសនេះបានអនុម័តឱ្យប្រើប្រាស់ថ្នាំព្យាបាលជំងឺ COVID-19 ដែលមានឈ្មោះថា Evusheld របស់ក្រុមហ៊ុន AstraZeneca ដែលនេះបានជួយឱ្យបារ៉ែន ក្លាយជាប្រទេសដំបូងគេក្នុងពិភពលោកដែលបានអនុម័តឱ្យប្រើប្រាស់ថ្នាំនេះ។

យោងតាមការកំណត់ថ្មី ឱសថ Evusheld នឹងត្រូវបានប្រើប្រាស់សម្រាប់តែមនុស្សពេញវ័យដែលមិនមានលទ្ធភាពបង្កើតប្រព័ន្ធភាពស៊ាំ ឬអ្នកទាំងឡាយដែលត្រូវរងផលប៉ះពាល់ដល់ប្រព័ន្ធភាពស៊ាំ និងអ្នកដែលកំពុងធ្វើការនៅទីកន្លែងដែលមានហានិភ័យឆ្លងវីរុសខ្ពស់។

Evusheld (ឬហៅថា AZD7442) គឺជាឱសថអង្គបដិប្រាណព្យាបាលជំងឺ COVID-19 ដំបូងរបស់ AstraZeneca។ នេះគឺជាសមាសធាតុរបស់អង្គបដិប្រាណ tixagevimab និង cilgavimab ដែលត្រូវបានអភិវឌ្ឍឡើងនៅក្នុងបន្ទប់ពិសោធន៍ សម្រាប់ទប់ស្កាត់ការឆ្លង COVID-19 និងទប់ស្កាត់មិនឱ្យជំងឺវិវត្តទៅជាធ្ងន់។

លទ្ធផលនៃការពិសោធលើមនុស្សដំណាក់ទីបី បង្ហាញថា ថ្នាំ Evusheld ជួយកាត់បន្ថយបាន 77% នៃហានិភ័យជំងឺ COVID-19 វិវត្តទៅធ្ងន់ធ្ងរចំពោះក្រុមអ្នកដែលបានចាក់ថ្នាំនេះ ធៀបនឹងក្រុមមនុស្សដែលប្រើប្រាស់ឱសថបញ្ឆោត។

ទិន្នន័យថ្មីបំផុតដែល AstraZeneca បានប្រកាសកាលពីថ្ងៃទី 11 តុលា ក៏បានបង្ហាញថា ថ្នាំ Evusheld ជួយកាត់បន្ថយបាន 50% នៃហានិភ័យជំងឺប្រែជាធ្ងន់ធ្ងរ ឬស្លាប់ ចំពោះអ្នកជំងឺ COVID-19 បើសិនពួកគេបានចាក់ថ្នាំក្នុងរង្វន់មួយសប្ដាហ៍រាប់ចាប់ពីមានរោគសញ្ញា។ កាន់តែឆាប់បានប្រើថ្នាំនេះ អ្នកជំងឺនឹងកាន់តែឆាប់បានជាសះស្បើយ៕

November 15, 2021

ក្រុមហ៊ុនអង់គ្លេស ពិសោធវ៉ាក់សាំងបង្ការជំងឺ COVID-19 ជំនាក់ទីពីរ (ប្រភេទបិទលើស្បែក) ដែលអាចកម្ចាត់កោសិកាផ្ទុកវីរុស

ក្រុមហ៊ុន Emergex នៅប្រទេសអង់គ្លេស នឹងធ្វើការពិសោធនៅលើមនុស្សក្នុងពេលឆាប់ៗខាងមុខ ចំពោះវ៉ាក់សាំងបង្ការ COVID-19 ជំនាន់ទីពីរ ដែលជាប្រភេទបិទលើស្បែក ប្រើប្រាស់កោសិកា T ដើម្បីកម្ចាត់កោសិកាដែលមានផ្ទុកវីរុស COVID-19។

ក្រុមហ៊ុន Emergex ត្រូវបានបង្កើតឡើងនៅទីក្រុង Abingdon កាលពីឆ្នាំ 2016 ដើម្បីអភិវឌ្ឍប្រភេទវ៉ាក់សាំងកោសិកា T ដែលជាផលិតផលនៃបញ្ហារបស់សាស្ត្រាចារ្យ Thomas Rademacher នាយកប្រតិបត្តិរបស់ក្រុមហ៊ុន Emergex និងជាសាស្ត្រាចារ្យកិត្តិយសស្ដីពីឱសថម៉ូលេគុលប្រចាំសាកលវិទ្យាវេជ្ជសាស្ត្រទីក្រុងឡុងដ៍។

វ៉ាក់សាំងខាងលើនេះនឹងបង្កើតកោសិកា T ដើម្បីកម្ចាត់កោសិកាឆ្លងរោគចេញពីរាងកាយ ដែលនេះគឺជាយន្តការទប់ស្កាត់ការកកើតកូនចៅរបស់វីរុស និងជំងឺ។ អង្គបដិប្រាណដែលត្រូវបានបង្កើតឡើងដោយវ៉ាក់សាំងបង្ការ COVID-19 ទូទៅនាបច្ចុប្បន្ន តោងជាប់នឹងវីរុស ដើម្បីទប់ស្កាត់ការឆ្លងរាលដាលទៅកាន់កោសិកាដទៃ ខណៈដែលកោសិកា T របស់វ៉ាក់សាំង Emergex នឹងតាមរក កម្ចាត់បណ្ដាកោសិកាដែលមានផ្ទុកវីរុស។ ប្រភេទវ៉ាក់សាំងមួយចំនួនដូចជា Pfizer/BioNTech និង AstraZeneca ក៏បង្កើតបានប្រតិកម្មកោសិកា T ប៉ុន្តែ នៅមានកម្រិតទាប។

អាជ្ញាធរគ្រប់គ្រងឱសថរបស់ ស្វ៊ីស បានអនុញ្ញាតឱ្យក្រុមហ៊ុន Emergex ធ្វើការពិសោធលើមនុស្សជាលើកដំបូងនៅតំបន់ Lausanne ចាប់ពីថ្ងៃទី 3 មករា 2022។ លទ្ធផលនៃការពិសោធដំបូងគ្រោងនឹងត្រូវបានប្រកាសនៅក្នុងខែមិថុនា ឆ្នាំ 2022។ ក៏ប៉ុន្តែ វ៉ាក់សាំងនេះនឹងមិនអាចបង្ហាញខ្លួនក្នុងទីផ្សារបានមុនឆ្នាំ 2025 ទេ នេះបើយោងតាមរយៈពេលនៃការផលិតវ៉ាក់សាំងនីមួយ៕

November 15, 2021

អ៊ីស្រាអែល អនុញាតឱ្យចាក់វ៉ាក់សាំងបង្ការ COVID-19 ដល់ក្មេងអាយុចាប់ពី 5 ឆ្នាំ ដល់ 11 ឆ្នាំ

រដ្ឋាភិបាលអ៊ីស្រាអែល កាលពីថ្ងៃទី 14 វិច្ឆិកា បានប្រកាសអនុញ្ញាតឱ្យចាក់វ៉ាក់សាំងដល់កុមារអាយុចាប់ពី 5 ឆ្នាំ ដល់ 11 ឆ្នាំ ដោយប្រើប្រាស់វ៉ាក់សាំងបង្ការ COVID-19 របស់ក្រុមហ៊ុន Pfizer/BioNTech។

អ៊ីស្រាអែល គឺជាប្រទេសមួយក្នុងចំណោមប្រទេសដំបូងគេដែលបានចាប់ផ្ដើមយុទ្ធនាការចាក់វ៉ាក់សាំងបង្ការជំងឺ COVID-19 កាលពីឆ្នាំមុន ដោយផ្អែកទៅលើកិច្ចព្រមព្រៀងដោះដូរវ៉ាក់សាំង និងទិន្នន័យនៃប្រសិទ្ធភាពក្រោយការចាក់ ជាមួយ Pfizer ដែលនេះបានអនុញ្ញាតឱ្យ អ៊ីស្រាអែល ទទួលបានវ៉ាក់សាំងរាប់លានដូស។

អ៊ីស្រាអែល បានចាប់ផ្ដើមចាក់វ៉ាក់សាំងដល់ក្មេងជំទង់អាយុចាប់ពី 12 ដល់ 17 ឆ្នាំ ប៉ុន្តែ បានសម្រេចចាក់ដល់កុមារដែលមានអាយុចាប់ពី 5 ឆ្នាំ ដល់ 11 ឆ្នាំ បន្ទាប់ពី Pfizer បានធ្វើការពិសោធ និងទទួលបានអនុសាសន៍ពីក្រុមប្រឹក្សាវិទ្យាសាស្ត្រក្នុងប្រទេស។

ប្រកាសខាងលើនេះត្រូវបានធ្វើឡើងនៅពេលក្រសួងសុខាភិបាល រកឃើញអ្នកវិជ្ជមានថ្មីចំនួន 220 ករណី ដែលតួលេខនេះទាបជាងឆ្ងាយ ធៀបនឹង 10,000 នាក់/ថ្ងៃ កាលពីចុងខែសីហា និងដើមខែកញ្ញា។ យុទ្ធនាការចាក់វ៉ាក់សាំង បានជួយឱ្យប្រទេសនេះកាត់បន្ថយល្បឿននៃការឆ្លងរាលដាល។

លទ្ធផលនៃការពិសោធលើកុមារ និងក្មេងជំទង់ បង្ហាញថា វ៉ាក់សាំង Pfizer មានប្រសិទ្ធភាព 90.7% ក្នុងការទប់ស្កាត់អាការរោគនៃជំងឺ COVID-19។

អ៊ីស្រាអែល គឺជាប្រទេសមួយក្នុងចំណោមប្រទេសមួយចំនួនដែលបាន និងកំពុងធ្វើយុទ្ធនាការចាក់វ៉ាក់សាំងដល់កុមារ និងក្មេងជំទង់ ក្នុងនោះមានដូចជា សហរដ្ឋអាម៉េរិក កម្ពុជា អារ៉ាប់រួម កូឡុំប៊ី និងគុយបា។ យុទ្ធនាការចាក់វ៉ាក់សាំងដល់កុមារអាយុចាប់ពី 5 ឆ្នាំ ដល់ 11 ឆ្នាំ នៅ អ៊ីស្រាអែល នឹងត្រូវបានចាប់ផ្ដើមនៅប៉ុន្មានថ្ងៃខាងមុខ៕

November 15, 2021

ថ្នាំចាក់ព្យាបាលជំងឺ COVID-19 ដំបូងគេលើលោក ត្រូវបានចុះបញ្ជិកានៅប្រទេស រុស្ស៊ី

ប្រភេទថ្មីចាក់ព្យាបាលជំងឺ COVID-19 ដែលមានប្រសិទ្ធភាពផ្ទាល់ដំបូងគេក្នុងពិភពលោក ត្រូវបានចុះបញ្ជិកាជាមួយស្ថាប័នរដ្ឋរុស្ស៊ី និងអាចត្រូវបានដាក់ឱ្យប្រើប្រាស់នៅតាមមន្ទីរពេទ្យចាប់នាពេលឆាប់ៗខាងមុខ។

ទូរទស្សន៍ RT ដកស្រង់ប្រភពព័ត៌មានពី TASS បានឱ្យដឹងថា ក្រុមហ៊ុន Promomed Group បានចុះបញ្ជីប្រភេទថ្នាំចាក់ព្យាបាលជំងឺ COVID-19 ដំបូង នៅ រុស្ស៊ី និងជាថ្នាំចាក់ដែលមានប្រភពពីថ្នាំគ្រាប់ Favipiravir ដំបូងគេក្នុងពិភពលោក។

ថ្នាំចាក់របស់ Promomed Group ដែលមានឈ្មោះថា Areplivir នេះ គឺជាថ្នាំប្រឆាំង COVID-19 ដោយផ្ទាល់។ យោងតាមក្រុមហ៊ុន ថ្នាំចាក់ព្យាបាលជំងឺ COVID-19 របស់ពួកគេនឹងត្រៀមរួចរាល់សម្រាប់ដាក់ឱ្យប្រើប្រាស់នៅតាមមន្ទីរពេទ្យ នៅមុនដំណាច់ឆ្នាំ 2021។

បច្ចុប្បន្ន មានថ្នាំចាក់ព្យាបាលជំងឺ COVID-19 ជាច្រើនប្រភេទ កំពុងត្រូវបានក្រុមហ៊ុននានាពិសោធលើមនុស្ស ក្នុងនោះក៏មានថ្នាំ Remdesivir ផងដែរ។ ទន្ទឹមជាមួយនឹងវ៉ាក់សាំង ក្រុមអ្នកវិទ្យាសាស្ត្រមើលឃើញថា ថ្នាំព្យាបាលជំងឺកំពុងក្លាយជា «អាវុធ» មួយបន្ថែមទៀតសម្រាប់ក្រុមគ្រូពេទ្យជួរមុខនៅលើពិភពលោក៕

November 13, 2021

Author: សឿន សំណាង