សឿន សំណាង - La Reine Media

មហាសេដ្ឋី Elon Musk សម្រេចលក់ភាគហ៊ុន Tesla តម្លៃ 930 លានដុល្លារបន្ថែមទៀត ក្រោយការជជែកតវ៉ាជាមួយតំណាងរាស្ត្រអាម៉េរិក

លោក Musk បានលក់ភាគហ៊ុនចំនួន 934,091 ហ៊ុន បន្ទាប់ពីអនុវត្តសិទ្ធិទិញមូលបត្រចំនួន 2.1 លានហ៊ុនក្នុងតម្លៃ 6.24 ដុល្លារ/ហ៊ុន កាលពីថ្ងៃចន្ទ ទី 15 វិច្ឆិកា។ មូលបត្រ Tesla មានតម្លៃ 1,013.39 ដុល្លារ/ហ៊ុន នៅពេលបិទទ្វារ។

នេះគឺជាលើកទីពីរហើយក្នុងសប្ដាហ៍នេះដែលមហាសេដ្ឋី Elon Musk បានអនុវត្តសិទ្ធិទិញមូលបត្ររបស់ខ្លួន។ កាលពីថ្ងៃចន្ទសប្ដាហ៍មុន លោកក៏បានលក់ភាគហ៊ុនចំនួន 934,000 ហ៊ុនក្នុងតម្លៃ 1.1 ពាន់លានដុល្លារផងដែរ បន្ទាប់ពីអនុវត្តសិទ្ធិទិញមូលបត្រជិត 2.2 លានហ៊ុន។

កាលពីសប្ដាហ៍មុន តំណាងរាស្ត្រនៃសភាជាន់ខ្ពស់ Bernie Sanders ក៏បានបង្ហោះសារនៅលើ Twitter និងនិយាយថា ត្រូវការតម្រូវឱ្យក្រុមអ្នកមានបំផុតបង់ពន្ធឱ្យបានស្មើភាពគ្នា។ ជាការឆ្លើយតប លោក Musk សួរថា៖ «ចង់ឱ្យខ្ញុំលក់ភាគហ៊ុនបន្ថែមទៀតដែរទេលោក Bernie? គ្រាន់តែនិយាយមួយម៉ាត់បានហើយ»។

តាមការពិត ការលក់ភាគហ៊ុន Tesla មួយចំនួនរបស់មហាសេដ្ឋីដើមកំណើតអាហ្វ្រិកខាងត្បូងរូបនេះគឺជាការគ្រោងទុកតាំងពីខែកញ្ញាមកម្លេះ ដែលកាលណោះលោក Musk ធ្លាប់បាននិយាយថា ខ្លួនអាចនឹងលក់ភាគហ៊ុនក្នុងចំនួនច្រើននៅចុងឆ្នាំ 2021 នេះ។

ដើម្បីឱ្យបាន 10% ដែលលោកបានលើកឡើងនៅក្នុងការស្ទង់មតិពាក់ព័ន្ធនឹង កម្មវិធីស្បៀងអាហារពិភពលោក (World Food Programme) លោក Musk ត្រូវការលក់ភាគហ៊ុន Tesla ប្រហែល 17 លានហ៊ុនឯណោះ។

សំអាងលើទ្រព្យ 279.3 ពាន់លានដុល្លារ លោក Elon Musk គឺជាអ្នកមានជាងអ្នកណាៗទាំងអស់ក្នុងពិភពលោក។ ទ្រព្យរបស់មហាសេដ្ឋីរូបនេះបានកើនបន្ថែម 109.6 ពាន់លានដុល្លារ រាប់ចាប់ពីដើមឆ្នាំដល់បច្ចុប្បន្ន៕

November 16, 2021

ថ្លៃលក់រាយប្រេងសាំងធម្មតា និងប្រេងម៉ាស៊ូត ចាប់ពីថ្ងៃទី 16 ដល់ 30 វិច្ឆិកា

រសៀលថ្ងៃទី 16 វិច្ឆិកានេះ ក្រសួងពាណិជ្ជកម្ម បានសេចក្ដីជូនដំណឹងស្ដីពីថ្លៃលក់រាយប្រេងឥន្ធនៈនៅតាមស្ថានីយលក់ប្រេងនានានៅ កម្ពុជា ដែលរាប់ចាប់ពីថ្ងៃនេះរហូតដល់ថ្ងៃទី 30 វិច្ឆិកា ឆ្នាំ 2021។

ថ្លៃលក់រាយប្រេងឥន្ធនៈនៅក្នុងអំឡុងពេលខាងលើ រួមមាន៖

– ប្រេងសាំងធម្មតា = 4,450 រៀល/លីត្រ
– ប្រេងម៉ាស៊ូត = 4,050 រៀល/លីត្រ

ព័ត៌មានលម្អិត សូមអានសេចក្ដីជូនដំណឹងខាងក្រោម៖

November 16, 2021

ចំនួនអ្នកមាននៅ កូរ៉េខាងត្បូង កើនឡើងច្រើនដោយសារវិនិយោគលើភាគហ៊ុន

ចំនួនអ្នកវិនិយោគលើភាគហ៊ុននៅ កូរ៉េខាងត្បូង បានកើនឡើងច្រើន បើធៀបនឹងដំណាក់កាលដូចគ្នាកាលពីឆ្នាំកន្លងទៅ។

យោងតាមរបាយការណ៍មួយដែលត្រូវបានប្រកាសកាលពីថ្ងៃទី 14 វិច្ឆិកា ចំនួនអ្នកមានទ្រព្យចាប់ពី 1 ពាន់លានវ៉ុន (ប្រហែល 847,000 ដុល្លារអាម៉េរិក) ឡើងទៅ នៅ កូរ៉េខាងត្បូង បានកើនជិត 11% កាលពីឆ្នាំ 2020 ធៀបនឹងឆ្នាំ 2019 ដែលនេះ ភាគច្រើនគឺដោយសារភាគហ៊ុនឡើងថ្លៃ។

ជាក់ស្ដែង បើយោងតាម Korea Wealth Report 2021 របស់វិទ្យាស្ថានស្រាវជ្រាវឯករាជ្យនៃក្រុមហ៊ុនហិរញ្ញវត្ថុ KB តួលេខនេះបានកើន 10.9% ឡើងដល់ 39,300 នាក់ក្នុងឆ្នាំ 2020 ប្រហាក់ប្រហែលនឹង 0.76% ធៀបនឹងចំនួនប្រជាជនសរុប 52 លាននាក់របស់ កូរ៉េខាងត្បូង។ ក្រៅពីនេះ អត្រាកំណើននៃអចលនទ្រព្យក្នុងបញ្ជីវិនិយោគរបស់ពួកគេក៏បានកើនឡើង មួយផ្នែកគឺដោយសារត្រូវបានជំរុញដោយលំនៅឋានឡើងថ្លៃខ្ពស់។

របាយការណ៍បានឱ្យដឹងថា ទ្រព្យសម្បត្តិក្នុងវិស័យហិរញ្ញវត្ថុរបស់ក្រុមអ្នកមាននៅ កូរ៉េខាងត្បូង បានកើន 21.6% ធៀបនឹងឆ្នាំមុន ដោយឡើងដល់ 2,618 ពាន់លានវ៉ុន ក៏ដោយសារមូលបត្រឡើងថ្លៃខ្លាំង។ ក្នុងចំណោមនេះ 59% នៃបញ្ជីទ្រព្យសម្បត្តិរបស់ក្រុមអ្នកមាន បានមកពីអចលនទ្រព្យ ខណៈ 36.6% ត្រូវបានវិនិយោគទៅលើទ្រព្យក្នុងវិស័យហិរញ្ញវត្ថុ។

អ្នកមាននៅ កូរ៉េខាងត្បូង វិនិយោគទៅក្នុងវិស័យអចលនទ្រព្យនៅពេលទីផ្សារអចលនទ្រព្យនៅជនបទឡើងថ្លៃ។ ចំណែកជនជាតិកូរ៉េខាងត្បូង ដែលមានទ្រព្យក្រោម 1 ពាន់លានវ៉ុន វិនិយោគ 78.2% ទៅលើអចលនទ្រព្យ និងត្រឹមតែ 17.1% ប៉ុណ្ណោះដែលត្រូវបានវិនិយោគទៅលើទ្រព្យក្នុងវិស័យហិរញ្ញវត្ថុ។

នៅក្នុងការស្ទង់មតិមួយរបស់ KB ដែលបានធ្វើឡើងចំពោះមនុស្សជាង 400 នាក់នៅ កូរ៉េខាងត្បូង បានបង្ហាញថា អត្រានៃចំនួនមនុស្សដែលវិនិយោគទៅលើភាគហ៊ុន បានកើន 5.2% ធៀបនឹងដំណាក់កាលដូចគ្នាកាលពីឆ្នាំ 2019៕

November 16, 2021

កម្ពុជា រកឃើញអ្នកឆ្លងថ្មី COVID-19 ចំនួន 48 នាក់ទៀត កាលពី 24 ម៉ោង នៃថ្ងៃទី 15 វិច្ឆិកា

ក្នុងចំណោមករណីឆ្លងថ្មីទាំង 48 នាក់ រួមមាន៖
– ករណីឆ្លងសហគមន៍ 37 នាក់
– អ្នកដំណើរពីបរទេស 11 នាក់

នៅ កម្ពុជា គិតត្រឹមព្រឹក ថ្ងៃទី 16 ខែវិច្ឆិកា ឆ្នាំ 2021 ករណី COVID-19 សរុប រួមមាន៖
– អ្នកឆ្លងសរុប= 119,636 នាក់
– អ្នកជាសះស្បើយ= 116,024 នាក់
– អ្នកស្លាប់= 2,876 នាក់

នៅទូទាំងពិភពលោក ករណី COVID-19 សរុប រួមមាន៖
– អ្នកឆ្លងសរុប= 254,589,524 នាក់
– អ្នកជាសះស្បើយ= 230,189,150 នាក់
– អ្នកស្លាប់= 5,121,992 នាក់

November 16, 2021

វ៉ាក់សាំងបង្ការ COVID-19 ចំនួន 2 លានដូសទៀត នឹងមកដល់ កម្ពុជា នៅថ្ងៃស្អែក

វ៉ាក់សាំងបង្ការជំងឺ COVID-19 ចំនួន 2 លានដូស ជាជំនួយរបស់រដ្ឋាភិបាល និងប្រជាជនចិន ផ្តល់ជូន រាជរដ្ឋាភិបាល និងប្រជាជនកម្ពុជា ដែលនឹងត្រូវបានដឹកមកដល់នៅព្រឹកថ្ងៃទី 27 វិច្ចិកា 2021 នឹងមានការអញ្ជើញទៅទទួលដោយផ្ទាល់ពីប្រមុខរដ្ឋាភិបាល សម្ដេច ហ៊ុន សែន។

កន្លងមក ចិន គឺជាប្រទេសដែលបានផ្ដល់ជំនួយជាវ៉ាក់សាំងបង្ការជំងឺ COVID-19 ច្រើនជាងគេមក កម្ពុជា ហើយ កម្ពុជា ក៏បាន និងកំពុងបញ្ជាទិញវ៉ាក់សាំងប្រភេទនេះពី ចិន ក្នុងបរិមាណច្រើនផងដែរ។

រដ្ឋាភិបាលចិន បានសម្រេចបន្តផ្ដល់ជំនួយជាវ៉ាក់សាំងបង្ការ COVID-19 រួមនឹងជំនួយពាក់ព័ន្ធវិស័យសុខាភិបាល ដល់ កម្ពុជា នាពេលខាងមុខ ដែលនេះគឺជាលទ្ធផលមួយនៅក្នុងជំនួបរវាង សម្តេចតេជោ ហ៊ុន សែន ជាមួយ ឯកឧត្តម លី ខឺឈាង នាយករដ្ឋមន្ត្រីចិន ដែលបានធ្វើឡើងកាលពីថ្ងៃទី 15 ខែវិច្ឆិកា ឆ្នាំ 2021៕

November 16, 2021

ក្រោយបានយកឈ្នះ អាម៉េរិក ចិន បានក្លាយជាប្រទេសអ្នកមានលំដាប់ទីមួយរបស់ពិភពលោក

បរិមាណទ្រព្យសម្បត្តិទូទាំងពិភពលោក បានកើនឡើងបីដងក្នុងពីរទសវត្សរ៍កន្លង ដោយសារការដែលប្រទេសចិន បានយកឈ្នះ សហរដ្ឋអាម៉េរិក ក្នុងការដណ្ដើមតំណែងកំពូលលើសគេលើលោកទាក់ទងនឹងទំហំទ្រព្យសម្បត្តិ។

របាយការណ៍ដែលទើបត្រូវបានក្រុមហ៊ុនប្រឹក្សាយោបល់ផ្នែកហិរញ្ញវត្ថុ McKinsey & Co ចុះផ្សាយ បានបង្ហាញថា ប្រទេសចិន បាននាំមុខ សហរដ្ឋអាម៉េរិក និងក្លាយជាប្រទេសដែលកាន់កាប់ទ្រព្យសម្បត្តិសរុបច្រើនជាងគេបង្អស់ក្នុងពិភពលោក។

យោងតាមសារព័ត៌មាន Bloomberg ទ្រព្យសម្បត្តិសរុបរបស់ ប្រទេសចិន បានកើនឡើងយ៉ាងឆាប់រហ័សក្នុងរយៈពេល 20 ឆ្នាំកន្លង នាំឱ្យទ្រព្យសរុបកើនឡើងច្រើនជាងមុន 17 ដង ពោលគឺពី 7 លានលាន (7 ទ្រីលាន/7,000,000,000,000) ដុល្លារកាលពីឆ្នាំ 2000 ឡើងដល់ 120 លានលាន (120 ទ្រីលាន) ដុល្លារ នៅឆ្នាំ 2020។

ប្រទេសចិន បច្ចុប្បន្នកាន់កាប់ជិត 1/3 នៃតម្លៃទ្រព្យសរុបរបស់ពិភពលោកដែលបានកើនឡើងក្នុងរយៈពេល 20 ឆ្នាំកន្លងមកនេះ។ ឆ្នាំ 2000 ចិន បានចូលអង្គការពាណិជ្ជកម្មពិភពលោក (WTO) ជួយឱ្យសេដ្ឋកិច្ចប្រទេសនេះ មានកំណើនគួរឱ្យចាប់អារម្មណ៍។

ក្នុងដំណាក់កាលដូចគ្នានេះ ទ្រព្យសប្បត្តិសរុបរបស់ សហរដ្ឋអាម៉េរិក ក៏បានកើនឡើងទ្វេដង។ ប៉ុន្តែ បើយោងតាមក្រុមហ៊ុន McKinsey ទីក្រុងវ៉ាស៊ីងតោន បានត្រូវ «ប្រគល់» តំណែងលេខមួយទៅឱ្យទីក្រុងប៉េកាំង នៅក្នុងបញ្ជីចំណាត់ថ្នាក់ប្រទេសអ្នកមានជាងគេទាំង 10 ក្នុងពិភពលោក ដោយសារតែទ្រព្យសម្បត្តិសរុបរបស់ អាម៉េរិក កើនដល់ត្រឹមតែ 90 លានលាន (90 ទ្រីលាន) ដុល្លារ នៅក្នុងឆ្នាំ 2020។

ជាសរុប ទ្រព្យសម្បត្តិទូទាំងពិភពលោក បានកើនដល់ 514 លានលាន (511 ទ្រីលាន) ដុល្លារ នៅក្នុងឆ្នាំ 2020 ដោយកើនពី 156 លានលានដុល្លារ កាលពីឆ្នាំ 2000៕

November 16, 2021

ជំនួបកំពូល អាម៉េរិក-ចិន! ប្រធានាធិបតី Biden អំនាវឱ្យមានការទប់ស្កាត់ជម្លោះប្រដាប់អាវុធ

ប្រធានាធិបតីអាម៉េរិក យល់ថា ត្រូវការ «របងការពារ» ដើម្បីបញ្ចៀសការប៉ះទង្គិចប្រដាប់អាវុធ ខណៈដែលប្រធានាធិបតីចិន សង្កត់ធ្ងន់ថា ត្រូវតែកែសម្រួលទំនាក់ទំនង នៅក្នុងជំនួបកំពូលនាព្រឹកនេះ។

ប្រធានាធិបតីសហរដ្ឋអាម៉េរិក Joe Biden និងប្រធានាធិបតី ចិន Xi Jinping បានចាប់ផ្ដើមកិច្ចប្រជុំកំពូលតាមរយៈវីដេអូផ្សាយផ្ទាល់នាព្រឹកថ្ងៃទី 16 វិច្ឆិកា (ព្រលប់ថ្ងៃទី 15 វិច្ឆិកា នៅភាគខាងកើតសហរដ្ឋអាម៉េរិក)។ វីដេអូដែលផ្ដល់ដោយសេតវិមានបង្ហាញថា លោក Biden អង្គុយក្បែររដ្ឋមន្ត្រីការបរទេសអាម៉េរិក Antony Blinken និងអ្នកបកប្រែម្នាក់ ហើយនៅក្បែរនោះគឺអេក្រង់ទូរទស្សន៍ដែលភ្ជាប់ប្រព័ន្ធអ៊ីនធើណិតជាមួយនឹងលោក Xi Jinping នៅទីក្រុងប៉េកាំង។

នៅក្នុងជំនួបនេះ លោក Biden ថ្លែងថា ត្រូវការ «របងការពារ» ដើម្បីធានាថា ការប្រកួតប្រជែងរវាងប្រទេសទាំងពីរ មិននាំទៅរកជម្លោះប្រដាប់អាវុធ បើទោះជាមាន ឬមិនមានចេតនា។ លោកបន្តថា ប្រទេសទាំងពីរនឹងមាន «ជំនួបពិភាក្សាត្រង់ទៅ ត្រង់មក»។

កន្លងមក លោក Biden បានប្រកាសថា នឹងសង្កត់ធ្ងន់លើបញ្ហាសិទ្ធិមនុស្ស សេដ្ឋកិច្ច និងធានាឱ្យបាននូវសេរីភាព យុត្តិធម៌សម្រាប់តំបន់មហាសមុទ្រឥណ្ឌា-ប៉ាស៊ីហ្វិក។

ចំណែកលោក Xi Jinping វិញ បានថ្លែងថា៖ «ក្នុងនាមជាមហាអំណាចសេដ្ឋកិច្ចធំបំផុតក្នុងពិភពលោក និងជាសមាជិកអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ ប្រទេសចិន និង សហរដ្ឋអាម៉េរិក ត្រូវការបង្កើនទំនាក់ទំនង និងសហការគ្នា»។

លោក Xi Jinping បន្តថា៖ «ចិន និង អាម៉េរិក គួរតែគោរពគ្នា រួមរស់នៅក្នុងសន្តិភាពជាមួយគ្នា និងសហការគ្នាដើម្បីស្វែងរកផលប្រយោជន៍រួម»។

ក្រោយការថ្លែងដំបូង មេដឹកនាំទាំងពីរបន្តពិភាក្សាសម្ងាត់ ហើយក្រុមអ្នកយកព័ត៌មានត្រូវបានស្នើឱ្យចាកចេញពីបន្ទប់ប្រជុំ។

នេះគឺជាជំនួបកំពូលអនឡាញដំបូងរវាងមេដឹកនាំទាំងពីរ រាប់ចាប់ពីពេលលោក Biden បានឡើងកាន់អំណាច។

មុនជំនួបកំពូលនេះ ជំនួយការផ្នែកសារព័ត៌មាននៅសេតវិមាន Jen Psaki បានឱ្យដឹងថា «ជំនួបនឹងត្រូវបានធ្វើឡើងច្រើនម៉ោង ហើយមេដឹកនាំទាំងពីររូបនឹងពិភាក្សាអំពីវិធីសាស្ត្រគ្រប់គ្រងការប្រកួតប្រជែងរវាងប្រទេសទាំងពីរប្រកបដោយការទទួលខុសត្រូវ ក៏ដូចជាកិច្ចសហការក្នុងវិស័យដែលប្រទេសទាំងពីរយកចិត្តទុកដាក់រួម។ រីឯអ្នកនាំពាក្យរបស់ក្រសួងការបរទេសចិន Hua Chunying ឱ្យដឹងថា មេដឹកនាំទាំងពីរនឹងពិភាក្សាអំពីការយល់ឃើញ និងទំនាក់ទំនងទ្វេភាគី រួមនឹងបញ្ហាដែលទាក់ទងនឹងផលប្រយោជន៍របស់ចិន និង សហរដ្ឋអាម៉េរិក។

ក្រុមអ្នកតាមដានស្ថានការណ៍អន្តរជាតិ មិនរំពឹងច្រើនទៅលើជំនួបកំពូលរវាង អាម៉េរិក-ចិន លើកនេះទេ ប៉ុន្តែ បានវាយតម្លៃថា ព្រឹត្តិការណ៍នេះពិតជាមានសារសំខាន់នៅពេលមេដឹកនាំទាំងពីរូបសុទ្ធតែមានបំណងផ្សះផ្សាទំនាក់ទំនងដែលបានប្រេះស្រាំអស់រយៈពេលច្រើនឆ្នាំកន្លងមកនេះ៕

November 16, 2021

រុស្ស៊ី បង្ហោះរ៉ុក្កែត បាញ់កម្ទេចផ្កាយរណបជា 1,500 បំណែក ធ្វើឱ្យក្រុមអ្នកអវកាសភ័យស្លន់ស្លោ ខណៈ អាម៉េរិក ប្រតិកម្មខ្លាំងក្លា

ក្រសួងការបរទេសអាម៉េរិក បានចោទប្រកាន់ រុស្ស៊ី ថា មាន «ទង្វើប្រកបដោយគ្រោះថ្នាក់ និងគ្មានការទទួលខុសត្រូវ» នៅពេលសាកល្បងប្រើអាវុធបាញ់កម្ទេចផ្កាយរណបជា 1,500 បំណែក នៅលើគន្លងគោចរ ធ្វើឱ្យក្រុមអ្នកអវកាសនៅលើស្ថានីយអវកាសអន្តរជាតិ (ISS) ត្រូវរកកន្លែងសុវត្ថិភាព។

យោងតាមសារព័ត៌មាន Guardian សហរដ្ឋអាម៉េរិក បានចោទប្រកាន់ រុស្ស៊ី ថា «ធ្វើទង្វើប្រកបដោយគ្រោះថ្នាក់ និងមិនមានការទទួលខុសត្រូវ» បន្ទាប់ពីទីក្រុងមូស្គូ បានធ្វើការសាកល្បងអាវុធប្រឆាំងផ្កាយរណបនៅទីអវកាស។

រុស្ស៊ី បានបាញ់បង្ហោះរ៉ុក្កែតសំដៅផ្កាយរណបមួយគ្រឿងរបស់ខ្លួន កាលពីចុងសប្ដាហ៍កន្លង ធ្វើឱ្យផ្កាយរណបត្រូវបែកខ្ចាយជា 1,500 បំណែក នៅលើកន្លងគោចរដែលគេអាចមើលឃើញ និងបំណែកតូចៗរាប់រយផ្សេងទៀតដែលមិនអាចមើលឃើញ។

ក្រុមអ្នកវិទ្យាសាស្ត្រដែលកំពុងធ្វើការនៅលើ ISS ភ្លាមនោះត្រូវបានណែនាំឱ្យចូលជ្រកក្នុង «សម្បកសង្គ្រោះជីវិត» ពិសេស បន្ទាប់ពីបំណែកនានារបស់ផ្កាយរណបបានហោះខ្ទាតចេញទៅក្នុងទីអវកាស។ «សម្បកសង្គ្រោះជីវិត» ពិសេសនេះ អាចផ្ដាច់ខ្លួនចេញពី ISS និងនាំអ្នកអវកាសត្រលប់មកកាន់ផែនដី។

Ned Price អ្នកនាំពាក្យរបស់ក្រសួងការបរទេសអាម៉េរិក កាលពីថ្ងៃទី 15 វិច្ឆិកា បានប្រកាសថា៖ «ការសាកល្បងនេះនឹងធ្វើឱ្យក្រុមអវកាសចរនៅលើ ISS ក៏ដូចជាសកម្មភាពហោះហើរក្នុងអវកាសផ្សេងទៀតរបស់មនុស្ស ប្រឈមនឹងហានិភ័យកាន់តែខ្ពស់»។

«សហរដ្ឋអាម៉េរិក នឹងធ្វើការជាមួយសម្ព័ន្ធមិត្ត និងដៃគូរបស់យើង ដើម្បីឆ្លើយតបនឹងសកម្មភាពដែលគ្មានការទទួលខុសត្រូវរបស់ រុស្ស៊ី» លោក Ned Price អះអាងដូច្នេះ។

បំណែករបស់ផ្កាយរណបអាចបង្កគ្រោះថ្នាក់ដល់ការហោះហើរនៅក្នុងទីអវកាស

ក្រៅពីក្រសួងការបរទេស ក្រសួងការពារជាតិរបស់ សហរដ្ឋអាម៉េរិក និង អង់គ្លេស ក៏បានសម្ដែងការព្រួយបារម្ភអំពីបំណែកផ្កាយរណបដែល រុស្ស៊ី បានកម្ទេចនេះដែរ។

ការសាកល្បងអាវុធប្រឆាំងផ្កាយរណប កម្រនឹងត្រូវបានគេធ្វើឡើង ហើយវាតែងត្រូវបានសហគមន៍អ្នកអវកាសរិះគន់ ដោយសារតែវាបង្កហានិភ័យដល់ការហោះហើរលើគន្លងគោចរកម្រិតទាបរបស់ផែនដី។ កាលពីឆ្នាំ 2020 សហរដ្ឋអាម៉េរិក ក៏ធ្លាប់បានរិះគន់ រុស្ស៊ី ម្ដងរួចហើយ បន្ទាប់ពីប្រទេសនេះបង្ហោះរ៉ុក្កែតសំដៅកម្ទេចផ្កាយរណបមួយគ្រឿង នៅក្នុងក្របខណ្ឌនៃការសាកល្បងអាវុធ។

កងទ័ព និងក្រសួងការពារជាតិរបស់ រុស្ស៊ី មិនទាន់មានប្រតិកម្មអ្វីអំពីការចោទប្រកាន់ពីសំណាក់ សហរដ្ឋអាម៉េរិក ចំពោះបញ្ហាខាងលើនៅឡើយ។

យោងតាមរបាយការណ៍របស់ Spaceflight Now ក្រុមអវកាសចររបស់ NASA រួមមាន Raja Chari, Tom Marshburn, Kayla Barron និង អវកាសចរ Matthias Maurer របស់ទីភ្នាក់ងារអវកាសអឺរ៉ុប បាននាំគ្នាឈ្លៀសខ្លួនទៅកាន់យានអវកាស SpaceX Crew Dragon ដើម្បីធានាសុវត្ថិភាព។ ចំណែកអ្នកអវកាស Shkaplerov និង Pyotr Dubrov របស់ រុស្ស៊ី និងអ្នកអវកាស Mark Vande Hei របស់ NASA ក៏បានឡើងយានអវកាស Soyuz របស់ រុស្ស៊ី ផងដែរ។

គិតមកដល់បច្ចុប្បន្ន មានប្រទេសចំនួន 3 បានធ្វើការសាកល្បងអាវុធប្រឆាំងផ្កាយរណប រួមមាន សហរដ្ឋអាម៉េរិក (មួយលើក កាលពីឆ្នាំ 1959), រុស្ស៊ី (4 លើក ក្នុងនោះ 3 លើកក្នុងឆ្នាំ 2020 និង 1 លើកក្នុងឆ្នាំ 2021) និង ប្រទេសចិន (1 លើកក្នុងឆ្នាំ 2007)៕

November 16, 2021

ប្រធានាធិបតីអាម៉េរិក អនុម័តច្បាប់ហេដ្ឋារចនាសម្ព័ន្ធ តម្លៃខ្ទង់លានលានដុល្លារ

ប្រធានាធិបតី Joe Biden បានចុះហត្ថលេខាលើសេចក្ដីព្រាងច្បាប់ហេដ្ឋារចនាសម្ព័ន្ធរបស់ សហរដ្ឋអាម៉េរិក ដែលមានតម្លៃ 1.2 លានលាន (1,200 ពាន់លាន/1.2 ទ្រីលាន) ដុល្លារ ដែលជាកញ្ចប់ថវិកាធំបំផុតក្នុងអំឡុងជាងពាក់កណ្ដាលសតវត្សរ៍មកនេះ។

សេចក្ដីព្រាងច្បាប់ដែលត្រូវបានលោក Biden ចុះហត្ថលេខានៅសេតវិមាន កាលពីថ្ងៃទី 15 វិច្ឆិកាកន្លងទៅនឹងផ្ដល់ថវិកាចំនួន 1.2 លានលានដុល្លារ ដើម្បីជួសជុលស្ពាន ផ្លូវ ប្ដូរប្រព័ន្ធបំពង់បង្ហូរទឹក កសាងប្រព័ន្ធបញ្ចូលថាមពលសម្រាប់រថយន្តអគ្គិសនី និងពង្រីកបណ្ដាញអ៊ីនធើណិត។ នេះគឺជាខ្ទង់ថវិកាវិនិយោគធំបំផុតរបស់ សហរដ្ឋអាម៉េរិក រាប់ចាប់ពីពេលបង្កើតប្រព័ន្ធផ្លូវថ្នល់ល្បឿនលឿនកាលពីអំឡុងទសវត្សរ៍ឆ្នាំ 1950។

«ថ្ងៃនេះ យើងទាំងអស់គ្នា ចុងក្រោយក៏សម្រេចបានប្រការនេះ។ សារដែលខ្ញុំចង់ផ្ដាំផ្ញើដល់ពលរដ្ឋអាម៉េរិក នោះគឺថា ប្រទេសជាតិកំពុងដំណើរការឡើងវិញ ហើយជីវភាពរបស់អ្នកទាំងអស់គ្នានឹងបានប្ដូរផ្លាស់ទៅតាមទិសដៅល្អប្រសើរជាងនេះ» លោក Joe Biden ថ្លែងនៅចំពោះមុខមនុស្សរាប់រយនាក់ នៅឯវាលស្មៅរបស់សេតវិមាន។

លោក Biden បានចំណាយពេលអស់ជាច្រើនខែដើម្បីបញ្ចុះបញ្ចូលសមាជិកបក្សប្រជាធិបតេយ្យ ដែលមានបញ្ហាមិនចុះសម្រុងគ្នា ឱ្យបោះឆ្នោតគាំទ្រសេចក្ដីព្រាងច្បាប់នេះ។

អ្នកនាំពាក្យរបស់សេតវិមាន Jen Psaki បានឱ្យដឹងថា ប្រធានាធិបតី Biden «ខកចិត្តព្រោះតែភាពអវិជ្ជមាន និងបញ្ហាផ្ទៃក្នុង» របស់បក្សប្រជាធិបតេយ្យ ក្រោយលោកឡើងកាន់អំណាចបាន 10 ខែ ប៉ុន្តែ ខ្ទង់ថវិកាជួសជុលហេដ្ឋារចនាសម្ព័ន្ធនេះត្រូវបានវាយតម្លៃថានឹងអាចកែលម្អស្ថានការណ៍។

លោក Biden គ្រោងនឹងធ្វើដំណើរទៅកាន់រដ្ឋ New Hampshire នៅថ្ងៃទី 16 វិច្ឆិកា ដើម្បីពិនិត្យស្ពានមួយខ្សែដែលស្ថិតក្នុងបញ្ជីដែលត្រូវជួសជុល ក្រោយមក លោកនឹងទៅកាន់ Detroit ដើម្បីជួបសុខទុក្ខតំណាងសហជីព៕

November 16, 2021

ក្រសួងអប់រំ ប្រកាសជ្រើសរើសបុគ្គលិកអប់រំ ទៅចូលរៀនថ្នាក់បរិញ្ញាបត្រជាន់ខ្ពស់ នៅ កូរ៉េខាងត្បូង

ក្រសួងអប់រំ យុវជន និងកីឡា បានប្រកាសជ្រើសរើសបុគ្គលិកអប់រំ គ្រូឧទ្ទេស និងគ្រូបង្រៀន ចូលរៀនថ្នាក់បរិញ្ញាបត្រ ជាន់ខ្ពស់ផ្នែកអប់រំបច្ចេកវិទ្យាព័ត៌មាននៅ ប្រទេសកូរ៉េខាងត្បូង ដើម្បីលើកកម្ពស់គុណភាពធនធានមនុស្សផ្នែកព័ត៌មានវិទ្យា សម្រាប់បម្រើការនៅ កម្ពុជា។

អាហារូបករណ៍ថ្នាក់បរិញ្ញបត្រជាន់ខ្ពស់ផ្នែកការអប់រំបច្ចេកវិទ្យាព័ត៌មាន ( ITC education ) នឹងត្រូវបានផ្ដល់ជូនបេក្ខភាពប្រលងជាប់ចំនួន 15 កន្លែងឱ្យទៅបន្តការសិក្សារយៈពេល 17 ខែ ដែលចាប់ពីខែកុម្ភៈ ឆ្នាំ 2022 ដល់ខែមិថុនា ឆ្នាំ 2023 នៅសាកលវិទ្យាល័យអប់រំកូរ៉េ (Korea National University of Education: KNUNE) នៃប្រទេសកូរ៉េខាងត្បូង ដោយមានកិច្ចសហការរវាង ក្រសួងអប់រំ យុវជន និងកីឡា សហការជាមួយទីភ្នាក់ងារសហការប្រតិបត្តិអន្តរជាតិកូរ៉េ (KOICA) ប្រចាំនៅប្រទេសកម្ពុជា។

ការទទួលពាក្យនឹងត្រូវផុតកំណត់នៅថ្ងៃទី 26 ខែវិច្ឆិកា ឆ្នាំ 2021។ ព័ត៌មានបន្ថែមសូមទំនាក់ទំនងតាមរយៈទូរស័ព្ទ លេខ 012 697 117 ឬ អ៊ីមេល៖ [email protected] ។

November 15, 2021

Author: សឿន សំណាង