សឿន សំណាង - La Reine Media

ចូ បៃឌិន អំពាវនាវឱ្យបោះបង់ចោលកម្មសិទ្ធិបញ្ហាវ៉ាក់សាំង ដើម្បីទប់ទល់នឹងវីរុសបំប្លែងថ្មី Omicron

លោក បៃដិន ជំរុញឱ្យបណ្ដាប្រទេសបោះបង់ការការពារកម្មសិទ្ធិបញ្ញាចំពោះវ៉ាក់សាំង ដើម្បីបង្កើនល្បឿននៃការចាក់វ៉ាក់សាំងនៅទូទាំងសកលលោក ក្នុងបំណងទប់ស្កាត់ជំងឺកូវីដ-១៩ ដែលបង្កឡើងដោយវ៉ារ្យ៉ង់ Omicron។

កាលពីថ្ងៃទី 26 វិច្ឆិកា ប្រធានាធបិតីអាម៉េរិក លោក ចូ បៃដិន យល់ថា ព័ត៌មានស្ដីពីវីរុសបំប្លែងខ្លួនថ្មី Omicron ជាថ្មីម្ដងទៀត «បានបង្ហាញអំពីសារសំខាន់នៃការបោះបង់កម្មសិទ្ធិបញ្ហាវ៉ាក់សាំងដោយឆាប់រហ័ស» ដើម្បីអនុញ្ញាតឱ្យផលិតវ៉ាក់សាំងទូទាំងពិភពលោក។

លោក បៃដិន ក៏បានជំរុញឱ្យបណ្ដាប្រទេសអ្នកមាន បង្កើនជំនួយជាវ៉ាក់សាំងដល់បណ្ដាប្រទេសក្រីក្រ នៅក្នុងសង្គ្រាមប្រឆាំងជំងឺរាតត្បាត។ លោកបញ្ជាក់ថា «សហរដ្ឋអាម៉េរិក បានផ្ដល់ជំនួយជាវ៉ាក់សាំងច្រើនជាងប្រទេសនានាបូកចូលគ្នាទៅទៀត។ ហើយដល់ពេលដែលប្រទេសផ្សេងៗ ត្រូវតាមឱ្យទាន់ល្បឿន និងភាពជាប្រទេសចិត្តទូលាយដូច សហរដ្ឋអាម៉េរិក»។

ការអំពាវនាវរបស់ប្រធានាធិបតីអាម៉េរិក នេះ ត្រូវបានធ្វើឡើងបន្ទាប់ពីបានរឹតត្បិតការធ្វើដំណើរទៅមកជាមួយនឹងប្រទេសចំនួន ៨ នៅភាពខាងត្បូងនៃ ទ្វីបអាហ្វ្រិក ដើម្បីទប់ស្កាត់វ៉ារ្យ៉ង់ Omicron ដែលទើបត្រូវបានរកឃើញ និងទើបត្រូវបានអង្គការសុខភាពពិភពលោក (WHO) វាយតម្លៃថា មានសមត្ថភាពឆ្លងរាលដាលខ្លាំងជាង Delta។

ទិន្នន័យរបស់ក្រសួងការបរទេសអាម៉េរិក បង្ហាញថា ប្រទេសនេះបានសន្យាផ្ដល់ជំនួយជាវ៉ាក់សាំងបង្ការជំងឺកូវីដ-១៩ យ៉ាងតិច ១.១ ពាន់លានដូស ក្នុងនោះ ២៣៦.១ លានដូសត្រូវបានប្រគល់រួចរាល់ និង ២៧.៨ លានដូស កំពុងត្រូវបានដឹកជញ្ជូនទៅកាន់បណ្ដាប្រទេសជាគោលដៅ។ ៥០% នៃវ៉ាក់សាំងរបស់ សហរដ្ឋអាម៉េរិក ត្រូវបានផ្ដល់ជំនួយតាមរយៈយន្តការ Covax របស់ WHO ចំណែកក្រៅពីនេះត្រូវបានផ្ដល់ជំនួយលក្ខណៈទ្វេភាគី។

វ៉ារ្យ៉ង់ B.1.1.529 ត្រូវបានរកឃើញជាលើកដំបូងនៅប្រទេស Botswana កាលពីថ្ងៃទី 11 វិច្ឆិកា ហើយក្រោយមកត្រូវបានអង្គការសុខភាពពិភពលោក (WHO) ដាក់ឈ្មោះឱ្យថា Omicron និងត្រូវបានដាក់បញ្ចូលទៅក្នុងបញ្ជីនៃវីរុសដែលគួរឱ្យព្រួយបារម្ភ កម្រិតធ្ងន់ធ្ងរបំផុត៕

November 27, 2021

BioNTech ប្រកាសថា អាចកែតម្រូវវ៉ាក់សាំងប្រឆាំងកូវីដ-១៩ ក្នុងរយៈពេល ៦ សប្ដាហ៍ ក្នុងគ្រាដែលវ៉ារ្យ៉ង់ Omicron កំពុងបង្កការព្រួយបារម្ភ

ក្រុមហ៊ុន BioNTech ដែលជាដៃគូសហការអភិវឌ្ឍវ៉ាក់សាំងបង្ការជំងឺកូវីដ-១៩ ជាមួយនឹង Pfizer ឱ្យដឹងថា ពួកគេអាចធ្វើបច្ចុប្បន្នភាពវ៉ាក់សាំងដោយប្រើពេលតែ ៦ សប្ដាហ៍ បើសិនជាវីរុសបំប្លែងខ្លួនថ្មី Omicron អាចគេផុតពីអង្គបដិប្រាណ។

«Pfizer និង BioNTech បានធ្វើសកម្មភាពតាំងពីច្រើនខែមុនដើម្បីអាចកែសម្រួលវ៉ាក់សាំងប្រភេទ mRNA ក្នុងរយៈពេល ៦ ខែ និងដឹកជញ្ជូនឡូត៍ទំនិញដំបូងក្នុងរយៈពេល ១០០ ថ្ងៃ បើសិនមានវត្តមានវ៉ារ្យ៉ង់ដែលមានសមត្ថភាពគេចផុតពីប្រព័ន្ធការពាររាងកាយ» ក្រុមហ៊ុនរបស់ អាល្លឺម៉ង់ BioNTech បានប្រកាសដូច្នេះកាលពីថ្ងៃទី 26 វិច្ឆិកា។

BioNTech បន្ថែមថា ពួកគេកំពុងពិសោធមើលថា តើវ៉ាក់សាំងបង្ការកូវីដ-១៩ ដែលក្រុមហ៊ុននេះសហការអភិវឌ្ឍជាមួយក្រុមហ៊ុន អាម៉េរិក Pfizer មានប្រសិទ្ធភាពចំពោះវីរុសបំប្លែងថ្មីប្រភេទ Omicron ឬទេ។ លទ្ធផលចុងក្រោយនៃការស្រាវជ្រាវ តាមគម្រោងនឹងត្រូវបានប្រកាសឱ្យដឹងក្នុងរង្វង់ ២ សប្ដាហ៍ទៀត។

វ៉ារ្យ៉ង់ B.1.1.529 ត្រូវបានរកឃើញជាលើកដំបូងនៅប្រទេស Botswana កាលពីថ្ងៃទី 11 វិច្ឆិកា ហើយក្រោយមកត្រូវបានអង្គការសុខភាពពិភពលោក (WHO) ដាក់ឈ្មោះឱ្យថា Omicron និងត្រូវបានដាក់បញ្ចូលទៅក្នុងបញ្ជីនៃវីរុសដែលគួរឱ្យព្រួយបារម្ភ កម្រិតធ្ងន់ធ្ងរបំផុត។

ពលរដ្ឋនៅតំបន់ពាណិជ្ជកម្ម Johannesburg ក្នុងប្រទេសអាហ្វ្រិកខាងត្បូង កាលពីថ្ងៃទី 26 វិច្ចិកា

ក្រុមហ៊ុន Moderna របស់ អាម៉េរិក ក៏បានឱ្យដឹងថា ពួកគេកំពុងពិសោធបេក្ខភាពវ៉ាក់សាំងជំរុញចំនួន ៣ ក្នុងគោលដៅអភិវឌ្ឍវ៉ាក់សាំងទុកចាក់ដូសបន្ថែមសម្រាប់តែវ៉ារ្យ៉ង់ Omicron។

ចំណែកក្រុមហ៊ុនរបស់ អាម៉េរិក មួយទៀតគឺ Johnson & Johnson ក៏បានបញ្ជាក់ថា កំពុងពិសោធវ៉ាក់សាំងដែលមានប្រសិទ្ធភាពរបស់ពួកគេ ចំពោះវ៉ារ្យ៉ង់ថ្មី ដើម្បីវាយតម្លៃថា ត្រូវការធ្វើបច្ចុប្បន្នភាពវ៉ាក់សាំងដែរ ឬយ៉ាងណា។

AstraZeneca ដែលជាក្រុមហ៊ុនរបស់ អង់គ្លេស ឯណោះវិញ ក៏កំពុងធ្វើការស្រាវជ្រាវនៅ Botswana និង Eswatini ជាប្រទេសនៅតំបន់ភាគខាងត្បូងនៃ ទ្វីបអាហ្វ្រិក ដែលបានរកឃើញ Omicron ក្នុងបំណងប្រមូលទិន្នន័យជាក់ស្ដែងស្ដីពីប្រសិទ្ធភាពរបស់វ៉ាក់សាំង AstraZeneca ចំពោះវីរុសកូវីដ-១៩ ប្រភេទថ្មី៕

November 27, 2021

មូលបត្រមួយនៅផ្សារហ៊ុនក្នុងតំបន់អាស៊ីអាគ្នេយ៍ ឡើងថ្លៃ ១០,០០០% ចាប់ពីបានឡើងផ្សារហ៊ុន ក្លាយជាករណី IPO ជោគជ័យបំផុតក្នុងលោក នាឆ្នាំ ២០២១

ក្រុមហ៊ុនឥណ្ឌូនេស៊ី មួយ ដែលមានឯកទេសខាងផ្គត់ផ្គង់ទិន្នន័យ Cloud Computing ទើបតែក្លាយជាម្ចាស់ IPO ដែលមានការវិវឌ្ឍល្អបំផុតក្នុងពិភពលោក នាឆ្នាំ ២០២។ រាប់ចាប់ពីពេលបានឡើងផ្សារហ៊ុនកាលពីខែមករា ២០២១ មូលបត្រនេះបានកើនឡើងជាង ១០០ ដង។

កាលពីថ្ងៃទី ៦ មករា ក្រុមហ៊ុន DCI Indonesia (PT DCI Indonesia Tbk) បានចូលផ្សារហ៊ុនជាផ្លូវការ បន្ទាប់ពី IPO បានសម្រេចជោគជ័យ និងប្រមូលទុនបាន ១៥០ ពាន់លាន រូពៀ (ប្រហែល ១០.៥ លានដុល្លារអាម៉េរិក)។ ចាប់ពីពេលនោះមក មូលបត្រ DCI បានកើន ១០,៨៥២% ក្លាយជាមូលបត្រដែលមានកំណើនលឿនបំផុតនៅលើផ្សារហ៊ុនឥណ្ឌូនេស៊ី ឈរលំដាប់ទីពីរ ដោយរួមចំណែកក្នុងកំណើន ១២% នៃសន្ទស្សន៍ Jakarta Composite Index ចាប់ពីដើមឆ្នាំមកទល់នឹងពេលនេះ។

ទីស្នាក់ការក្រុមហ៊ុន PT DCI Indonesia Tbk (DCI)

DCI មានភាគហ៊ុនចំនួន ១១% ដែលជាកម្មសិទ្ធិរបស់ Anthoni Salim មហាសេដ្ឋីដែលរកស៊ីក្នុងវិស័យជាច្រើន ចាប់ពីអាហារ រហូតដល់ទូរគមនាគមន៍ និងអចលនទ្រព្យ។

មិនត្រឹមតែ DCI នោះទេ ក្រុមមូលបត្របច្ចេកវិទ្យានៅលើផ្សារហ៊ុនឥណ្ឌូនេស៊ី ក៏បានឡើងថ្លៃខ្ពស់ជាងមុន ៤ ដងផងដែរ៕

November 26, 2021

ផ្សារមូលបត្រកម្ពុជានិង ផ្សារមូលបត្រសៀងហៃ ចុះហត្ថលេខាពីចម្ងាយ លើអនុស្សរណៈនៃការយោគយល់គ្នា

ផ្សារមូលបត្រកម្ពុជា នាថ្ងៃទី ២៦ វិច្ឆិកា នេះ បានឱ្យដឹងថា ផ្សារមូលបត្រកម្ពុជា (ផមក) និងផ្សារមូលបត្រសៀងហៃ បានចុះហត្ថលេខាលើអនុស្សរណៈនៃការយោគយល់គ្នា នៅក្នុងថ្ងៃដដែលនេះ។

ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ផមក និងលោក ឆៃ ជានឈុន (CAI Jianchun) ប្រធាននាយកនៃផ្សារមូលបត្រសៀងហៃ ដែលជាតំណាងរបស់ផ្សារមូលបត្រទាំងពីរ បានចុះហត្ថលេខាលើអនុស្សរណៈនៃការយោគយល់គ្នានេះពីចំងាយ តាមរយៈប្រព័ន្ធវីដេអូ។

ឯកឧត្តម ហុង សុហួរ ក្នុងសិក្ខាសាលាផ្សព្វផ្សាយពីនីតិវិធីច្បាប់សម្រាប់ការចុះបញ្ជីក្រុមហ៊ុន នៅថ្ងៃទី៣០មេសាឆ្នាំ ២០១៤

ភាគីទាំងពីរ បានព្រមព្រៀងគ្នាលើកិច្ចសហប្រតិបត្តិការសំខាន់ៗមួយចំនួនរួមមាន៖

-ការចែករំលែកព័ត៌មានទៅវិញទៅមក
-ការសិក្សាស្រាវជ្រាវរួមគ្នា
-ការផ្លាស់ប្តូរបុគ្គលិក និង
-ការអភិវឌ្ឍផលិតផលហិរញ្ញវត្ថុថ្មីៗ ជាដើម។

November 26, 2021

ដីនិម្មិតមួយដុំ នៅក្នុង Decentraland (ស្រដៀង Mateverse) ត្រូវបានលក់ក្នុងតម្លៃ ២.៤ លានដុល្លារអាម៉េរិក

ថ្នាល Decentraland ឱ្យដឹងថា ខ្លួនទើបតែបានលក់ដីនិម្មិតមួយដុំ ទំហំ ៥៦៥ ម៉ែត្រការ៉េ ក្នុងតម្លៃ ២.៤៣ លានដុល្លារអាម៉េរិក។

ម្ចាស់ថ្មីនៃដីនិម្មិតនេះនឹងជា Metaverse Group របស់ Tokens.com ជាក្រុមហ៊ុនរបស់ កាណាដា ដែលមានជំនាញខាងការវិនិយោគក្នុងវិស័យវិមជ្ឈការហិរញ្ញវត្ថុ (decentralized finance)។ Tokens.com និយាយថា នឹងប្រើប្រាស់ដីនិម្មិតមួយដុំនេះដើម្បីពង្រីកខ្លួនទៅក្នុងវិស័យម៉ូដែលសម្លៀកបំពាក់ឌីជីថល និងលក់ខោអាវនិម្មិតដល់អ្នកចូលរួមលេង metaverse។

ដីមួយដុំនេះរួមមាន ១១៦ ឡូត៍ ទំហំ ៦,០៩០ ហ្វ៊ីតក្រឡា (៥៦៥ ម៉ែត្រក្រឡា) ស្ថិតក្នុងតំបន់ «ក្រុងម៉ូដែល» នៅលើផែនទីរបស់ Decentraland។

Decentraland បានកំណត់តម្លៃដីនេះ ៦១៨,០០០ Mana ស្មើនឹង ២.៤៣ លានដុល្លារអាម៉េរិក។ សារព័ត៌មាន Reuters ក៏បានឱ្យដឹងថា ការជួញដូរនេះក៏ត្រូវបានកត់ត្រានៅក្នុងទីផ្សារ OpenSea ផងដែរ។

យោងតាម Insider នេះគឺជាដីនិម្មិតដែលមានតម្លៃថ្លៃជាងគេនាបច្ចុប្បន្ន ពោលគឺថ្លៃជាងបីដងធៀបនឹងដីឡូត៍និម្មិតតម្លៃ ៩០០,០០០ ដុល្លារដែលត្រូវបានលក់កាលពីខែមិថុនា។

ជាមធ្យម ដីទំហំ ១ ហ្វ៊ូតក្រឡា (៣០.៤៨ សង់ទីម៉ែត្រក្រឡា) នៅក្នុង Decentraland មានតម្លៃ ៤០០ ដុល្លារ ខណៈដីពិតនៅ San Francisco សហរដ្ឋអាម៉េរិក មានតម្លៃ ១,២០០ ដុល្លារ/ហ្វ៊ូតក្រឡា។

Decentraland ត្រូវបានបង្កើតឡើងដូចទៅនឹងលំហអវកាសនិម្មិត (mateverse)។ ដីធ្លី និងទំនិញនៅទីនេះត្រូវបានលក់ក្រោមរូបភាព token មិនអាចជំនួស (NFT)។ អ្នកចូលរួមនឹងប្រើប្រាស់ប្រាក់ឌីជីថល Mana ដើម្បីទិញទំនិញនិម្មិត និងដីនិម្មិតនៅទីនេះ ដែលដូចទៅនឹងការវិនិយោគ។

Decentraland មានលក្ខណៈស្រដៀងនឹងហ្គេម Minecraft។ ក្នុងនោះ ដីធ្លីនិម្មិតត្រូវបានបែងជាឡូត៍ទំហំ ១៦x១៦ ហើយត្រូវបានភ្ជាប់ជាមួយនឹង NFT មួយ។ យោងតាម Coinbase ប្រាក់ Mana ក្នុង Decentraland បានកើន ៤០០% រាប់ចាប់ពីពេល Facebook បានប្ដូរឈ្មោះទៅជា Meta។ ក្នុងថ្ងៃទី 25 វិច្ឆិកា តម្លៃរបស់ប្រាក់ឌីជីថល Mana ក៏បានឡើងដល់កម្រិតខ្ពស់ថ្មីគឺ ៥.៧៨ ដុល្លារ/Mana៕

November 26, 2021

មហាសេដ្ឋី Ray Dalio ៖ «វិធីលឿនបំផុតដើម្បីជោគជ័យគឺការដឹងចំណុចខ្សោយរបស់ខ្លួន»

មហាសេដ្ឋីដែលជាកំពូលអ្នកវិនិយោគមួយរូប ធ្លាប់បានក្ស័យធន ធ្លាប់ត្រូវបង្ខំចិត្តបញ្ឈប់បុគ្គលិកទាំងអស់ និងធ្លាប់ត្រូវខ្ចីប្រាក់ ៤,០០០ ដុល្លារពីឪពុក ក៏ព្រោះតែភាពជឿជាក់លើខ្លួនឯងខ្លាំងពេក។

រ៉េ ដាលីយូ (Ray Dalio) គឺជាស្ថាបនិករបស់មូលនិធិវិនិយោគចូលហ៊ុនឯកជន (Venture capital fund) ធំជាងគេក្នុងពិភពលោក មានឈ្មោះថា Bridgewater Associates។ មូលនិធិដែលបច្ចុប្បន្នគ្រប់គ្រងទ្រព្យប្រមាណ ១៦០ ពាន់លានដុល្លារអាម៉េរិក នេះ ត្រូវបានគាត់បង្កើតឡើងកាលពីឆ្នាំ ១៩៧៥ នៅទីក្រុង នីវយ៉ក។ បច្ចុប្បន្ន លោក រ៉េ ដាលីយូ មានទ្រព្យសរុប ១៥.៦ ពាន់លានដុល្លារ នេះបើតាម Bloomberg Billionaires Index។

ក្នុងអត្ថបទមួយដែលបានបង្ហោះលើបណ្ដាញសង្គមកាលពីខែកក្កដា លោក រ៉េ ដាលីយូ បានចែករំលែកនូវអនុសាសន៍មួយចំនួនដែលបាននិយាយក្នុងសៀវភៅឆ្នាំ 2018 របស់លោក ដែលមានចំណងជើងថា «គោលការណ៍ជីវភាព និងការងារ» និយាយអំពីវិធីដើម្បីរកបានជោគជ័យ។ ក្នុងនោះ ក៏មានបញ្ជាក់អំពីវិធីដែលគ្រប់គ្នាអាចរៀនសូត្របានពីកំហុសឆ្គងរបស់ខ្លួន។

«អ្នកណាក៏មានចំនុចខ្សោយ ហើយវាតែងតែស្ដែងឱ្យឃើញនៅពេលអ្នកមានកំហុស» មហាសេដ្ឋី រ៉េ ដាលីយូ សរសេរនៅលើបណ្ដាញសង្គមដូច្នេះ។ «វិធីឆាប់រហស័យបំផុតដើម្បីជោគជ័យគឺការចាប់ផ្ដើមដឹងអំពីចំនុចខ្សោយរបស់ខ្លួនថាជាអ្វី និងតែងតែសម្លឹងមើលវា។ ចូរសរសេរចេញនូវចំណុចខ្សោយរបស់អ្នក រួចភ្ជាប់វាជាមួយគ្នា»។

ក្រោយមក អ្នកគ្រាន់តែផ្ដោតទៅលើចំណុចខ្សោយសំខាន់ៗចំនួន ៣ ដើម្បីអាចកែតម្រូវឱ្យបានល្អបំផុតដោយមិនត្រូវប្រឹងខ្លាំងពេក។

លោក រ៉េ ដាលីយូ ក៏បានបង្ហើបអំពីកំហុសឆ្គងផ្ទាល់ខ្លួន ក្នុងនោះក៏មានកាលៈទេសៈមួយដែលលោកហៅថា «កំហុសឆ្គងធំ»។ ឆ្នាំ ១៩៨២ លោកបាន «ភ្នាល់គ្រប់យ៉ាងទៅក្នុងវិបត្តិសេដ្ឋកិច្ចដែលមិនអាចកើតឡើង» ហើយលោកក៏បានបាត់បង់ប្រាក់ទាំងអស់នៅពេលទីផ្សារមូលបត្ររីកចម្រើន។ លោកត្រូវបង្ខំចិត្តបញ្ឈប់បុគ្គលិកទាំងអស់របស់ Bridgewater នៅពេលនោះ។

«ខ្ញុំក្ស័យធន និងត្រូវខ្ចីប្រាក់ពីឪពុក ៤.០០០ ដុល្លារ ដើម្បីទូទាត់ការចំណាយក្នុងគ្រួសារ»។ ប៉ុន្តែ លោក រ៉េ ដាលីយូ និយាយថា «កំហុសនេះគឺជាប្រការមួយល្អបំផុតដែលធ្លាប់បានកើតឡើងចំពោះខ្ញុំ» ព្រោះវាបានបង្ខំឱ្យលោកត្រូវប្រឈមនឹងចំណុចខ្សោយរបស់ខ្លួន ជាប្រការដែលបានបណ្ដាលឱ្យលោកមានកំហុសឆ្គងធំដល់ថ្នាក់នោះ។

«វាធ្វើឱ្យខ្ញុំមានអារម្មណ៍ថា ត្រូវការធ្វើឱ្យមានតុល្យភាពនៃចំណេះដឹងផ្ទាល់ខ្លួន។ ជំនួសឱ្យការដែលចេះតែគិតថា «ខ្លួនឯងត្រូវ» ខ្ញុំត្រូវងាកមកសួរខ្លួនឯងថា «ធ្វើយ៉ាងណាទើបដឹងថា ខ្លួនឯងត្រូវ?»» មហាសេដ្ឋី រ៉េ ដាលីយូ បង្ហើបឱ្យដឹងដូច្នេះ។

មិនមែនលោក រ៉េ ដាលីយូ តែម្នាក់ទេដែលបានណែនាំឱ្យគ្រប់គ្នាស្វែងយល់អំពីចំណុចខ្លាំង និងចំណុចខ្សោយរបស់ខ្លួន។ មហាសេដ្ឋីបច្ចេកវិទ្យា ម៉ាក ឃ្យូបាន (Mark Cuban) ក៏ធ្លាប់បាននិយាយបែបនេះកាលពីឆ្នាំ ២០១៨ សម្រាប់អ្នកដែលចង់កែប្រែស្ថានការណ៍របស់ក្រុមហ៊ុន ឬអាជីវកម្ម។

លោក ម៉ាក ឃ្យូបាន និយាយថា៖ «ជាអ្នកជំនួញគឺត្រូវតែរកឱ្យឃើញនូវបញ្ហាដែលអាចផ្ដួលរំលំអ្នក មុនពេលអ្នកផ្សេងធ្វើរឿងនេះ»៕

November 26, 2021

ការសាងសង់ផ្លូវល្បឿនលឿន ភ្នំពេញ-ក្រុងព្រះសីហនុ សម្រេចបានជិត ៧០% ហើយ គិតត្រឹមសប្ដាហ៍នេះ

ការស្ថាបនាផ្លូវល្បឿនលឿនពី ភ្នំពេញ ទៅ ក្រុងព្រះសីហនុ សម្រេចបាន ៦៩,៩៣% ហើយ គិតត្រឹមសប្ដាហ៍ទីបីនៃខែវិច្ឆិកា ហើយវាអាចនឹងចប់រួចរាល់ នៅមុនខែកញ្ញា ឆ្នាំ ២០២២។

ដំណឹងខាងលើត្រូវបានលើកឡើងដោយលោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និង ជាអ្នកនាំពាក្យរបស់ក្រសួងសាធារណការ និងដឹកជញ្ជូនកម្ពុជា។

ក្រសួងសាធារណការ និងក្រុមហ៊ុនសាងសង់ផ្លូវមួយខ្សែនេះ អាចនឹងអនុញ្ញាតឱ្យប្រជាពលរដ្ឋសាកល្បងធ្វើចរាចរណ៍នៅចុងឆ្នាំ ២០២២ មុននឹងដាក់ឱ្យប្រើប្រាស់ជាផ្លូវការដោយមានការបង់ប្រាក់។ នេះបើតាមអ្នកនាំពាក្យរបស់ក្រសួងសាធារណការ និងដឹកជញ្ជូន។

ផ្លូវល្បឿនលឿនពីភ្នំពេញទៅក្រុងព្រះសីហនុ ដែលត្រូវបើកការដ្ឋានសាងសង់ នៅថ្ងៃទី ២២ មីនា ២០១៩ នេះ ប្រើប្រាស់ទុនវិនិយោគរបស់ ក្រុមហ៊ុនសាជីវកម្មស្ពាននិងថ្នល់ចិន តាមរយៈក្រុមហ៊ុន Cambodian PPSHV Expressway Co.,Ltd ជាមួយនឹងទឹកប្រាក់ប្រមាណ ២,០០០ លានដុល្លារអាមេរិក រួមនឹងហិរញ្ញប្បទានឥតសំណងពីរដ្ឋាភិបាលចិន ប្រមាណ ១៥០ លានដុល្លារ។

គម្រោងផ្លូវនេះ មានប្រវែងសរុបជាង ១៩០ គីឡូម៉ែត្រ ចាប់ពីសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ក្រុងព្រះសីហនុ និងមានទទឹងតួផ្លូវ ២៤.៥ ម៉ែត្រ ក្នុងនោះមានផ្លូវចំនួន ៤ គន្លង ដែលអនុញ្ញាតឱ្យយានយន្តគ្រប់ប្រភេទ អាចបើកបរក្នុងល្បឿន ១០០ គីឡូម៉ែត្រ/ម៉ោង ឬ ១២០ គីឡូម៉ែត្រ/ម៉ោង នៅកន្លែងខ្លះ។

យោងផែនការនៃការសាងសង់ ផ្លូវល្បឿនលឿនពីភ្នំពេញទៅក្រុងព្រះសីហនុ នេះ នឹងសាងសង់រួចរាល់ជាស្ថាពរនៅខែកញ្ញា ២០២២៕

November 26, 2021

Huawei ឌឺដាក់អតិថិជន៖ បញ្ចុះតម្លៃ ១០០% សម្រាប់ទូរស័ព្ទទាំងអស់ ដែលលក់នៅទីផ្សារ សហរដ្ឋអាម៉េរិក

ក្រុមហ៊ុនចិន Huawei បានប្រកាសបញ្ចុះតម្លៃ ១០០% លើទូរស័ព្ទឆ្លាតវៃ សម្រាប់ពលរដ្ឋអាម៉េរិក នៅក្នុងថ្ងៃ Black Friday ប៉ុន្តែ ជាក់ស្ដែង ពួកគេមិនបានលក់ផលិតផលណាមួយនៅទីផ្សារនេះ។

«Black Friday មួយដ៏ពិសេស។ យើងនឹងបញ្ចុះតម្លៃ ១០០% សម្រាប់រាល់ទូរស័ព្ទដែលកំពុងលក់នៅ សហរដ្ឋអាម៉េរិក» គណនី Huawei អាម៉េរិក បង្ហោះសារនៅលើ Twitter កាលពីថ្ងៃទី ២២ វិច្ឆិកា។

ប្រកាសរបស់ Huawei ទាក់ទាញបានការចុចចូលចិត្តជាង 10,000 លើក រួមនឹងមតិជាង 2,000 លើក។ មនុស្សជាច្រើនបានជឿលើព័ត៌មាននេះ និងបានសួរអំពីវិធីទិញផលិតផល។

នៅក្នុងសារបន្ទាប់ខាងក្រោម ក្រុមហ៊ុន Huawei បានសរសេរថា នេះគ្រាន់តែជាការលេងសើច ព្រោះថា ជាក់ស្ដែង ពួកគេ «មិនអាចលក់អ្វីបាននៅ សហរដ្ឋអាម៉េរិក»។

Huawei ត្រូវបាន អាម៉េរិក ដាក់ចូលក្នុងបញ្ជីក្រុមហ៊ុនរដ្ឋចិន តាំងពីខែឧសភា 2019 និងហាមប្រើប្រាស់បច្ចេកវិទ្យារបស់ អាម៉េរិក ដោយសារការព្រួយបារម្ភអំពីបញ្ហាសន្តិសុខជាតិ ធ្វើឱ្យផ្នែកឧបករណ៍ចល័តរបស់ក្រុមហ៊ុននេះ ចុះខ្សោយយ៉ាងឆាប់រហ័ស។

មុននោះ Huawei ឈរលំដាប់លេខ ៣ ក្នុងចំណោមក្រុមហ៊ុនទូរស័ព្ទធំបំផុតក្នុងពិភពលោក ប៉ុន្តែបច្ចុប្បន្ន ក្រុមហ៊ុននេះ ថែមទាំងលែងស្ថិតនៅក្នុង Top 5 ហើយកំពុងតែធ្លាក់ចុះជាបន្តបន្ទាប់ បង្ខំឱ្យមានការប្ដូរផ្លាស់ ដូចជាការងាកទៅផ្គត់ផ្គង់ការរចនារូបរាងទូរស័ព្ទ និងផលិតផលចល័តដល់ភាគីទីបី ឬលក់ទូរស័ព្ទកំណែចាស់។

ផ្នែកផលិតផលចល័តរបស់ Huawei បានខាតបង់ប្រាក់អស់យ៉ាងតិច 30 ពាន់លានដុល្លារក្នុងមួយៗ ដោយសារតែការដាក់ទណ្ឌកម្មរបស់ សហរដ្ឋអាម៉េរិក។ នេះបើតាមការឱ្យដឹងរបស់លោក អេរិក ស៊ូ (Eric Xu) ប្រធានប្ដូរវេននៃក្រុមហ៊ុន Huawei៕

November 26, 2021

ករណីឆ្លងថ្មីជំងឺ COVID-19 នៅ កម្ពុជា បន្តថយចុះមកក្រោម 30 នាក់

កម្ពុជា រកឃើញអ្នកឆ្លងថ្មី 29 (PCR) នាក់ ជាសះស្បើយ 30 នាក់ និងស្លាប់ 04 នាក់ (02 នាក់ មិនបានចាក់វ៉ាក់សាំង)។

ក្នុងចំណោមករណីឆ្លងថ្មី មាន៖

– ករណីឆ្លងសហគមន៍ 23 នាក់
– អ្នកដំណើរពីបរទេស 06 នាក់

ករណី COVID-19 សរុបនៅ កម្ពុជា គិតមកដល់ថ្ងៃទី 26 វិច្ឆិកា 2021 រួមមាន៖

– អ្នកឆ្លងសរុប= 120,038 នាក់
– អ្នកជាសះស្បើយ= 116,417 នាក់
– អ្នកស្លាប់= 2,922 នាក់

ទិន្នន័យបន្ថែម សូមអានសេចក្ដីជូនព័ត៌មានដូចខាងក្រោម៖

-ឆ្លងថ្មី ៖ 40,348 នាក់
-ឆ្លងសរុប ៖ 260,311,242 នាក់
-ស្លាប់សរុប ៖ 5,199,470 នាក់
-ជាសះស្បើយសរុប ៖ 235,255,925 នាក់
-កំពុងព្យាបាល៖ 19,855,847 នាក់

November 26, 2021

អង្គការសុខភាពពិភពលោក កោះប្រជុំបន្ទាន់ ដោយសារតែវ៉ារ្យ៉ង់ថ្មីនៃវីរុសកូវីដ-១៩

អង្គការសុខភាពពិភពលោក (WHO) លើកគម្រោងប្រជុំបន្ទាន់ និងតាមដានយ៉ាងយកចិត្តទុកដាក់លើវីរុសបំប្លែងខ្លួនថ្មី B.1.1.529 របស់ កូវីដ-១៩ បើទោះជាត្រូវបានរកឃើញតែប៉ុន្មានករណីនៅ ទ្វីបអាហ្វ្រិក។

«យើងមិនទាន់ដឹងច្រើនអំពីវ៉ារ្យ៉ង់នេះ។ អ្វីដែលយើងបានដឹង នោះគឺវាមានការប្រែប្រួលច្រើនទម្រង់។ ការព្រួយបារម្ភគឺថា នៅពេលមានការទម្រង់ច្រើន វាអាចមានឥទ្ធិពលដល់ដំណើរការរបស់វីរុស» វេជ្ជបណ្ឌិត Maria Van Kerkhove ប្រធានក្រុមបច្ចេកទេសប្រឆាំង កូវីដ-១៩ របស់ WHO ថ្លែងដូច្នេះកាលពីថ្ងៃទី 25 វិច្ឆិកា។

ស្ថាប័ននេះកំពុងតែតាមដានយ៉ាងម៉ត់ចត់ចំពោះវ៉ារ្យ៉ង់ B.1.1.529 ហើយក៏នឹងបើកកិច្ចប្រជុំបន្ទាន់ពិសេសនៅក្នុងថ្ងៃទី 26 វិច្ឆិកា នេះ ដើម្បីពិភាក្សាអំពីឥទ្ធិពលដែលបង្កប់ក្នុងវ៉ារ្យ៉ង់នេះ ដល់វ៉ាក់សាំង និងវិធីសាស្ត្រព្យាបាល។

វេជ្ជបណ្ឌិត Van Kerkhove បន្ថែមថា ក្រុមស្រាវជ្រាវនឹងពិនិត្យមើលលទ្ធភាពឱ្យដឹងថា តើ B.1.1.529 អាចក្លាយជាវ៉ារ្យ៉ង់ដែលគួរឱ្យព្រួយបារម្ភ ឬអត់ ហើយក្រោយមក WHO នឹងដាក់ឈ្មោះឱ្យវាទៅតាមអក្ខរក្រមរបស់ក្រិក។

វ៉ារ្យ៉ង់ B.1.1.529 មានការប្រែប្រួលចំនួន 50 ទម្រង់នៅក្នុងប្រូតេអ៊ីនបន្លា ជាផ្នែកដែលវ៉ាក់សាំងប្រើប្រាស់ដើម្បីបង្កើតអង្គបដិប្រាណសម្រាប់ប្រឆាំងវីរុសកូវីដ-១។ ចំនួនទម្រង់នៃការប្រែប្រួលក្នុងប្រូតេអ៊ីនបន្លា អាចប៉ះពាល់ដល់លទ្ធភាពនៃការឆ្លងរបស់វីរុស ក៏ដូចជាកោសិកាពិបាកក្នុងការវាយប្រហារមេរោគ។

ទ្វីបអាហ្វ្រិក ទើបតែបានរកឃើញវីរុសបំប្លែងថ្មី B.1.1.529 នេះ ប៉ុន្មានករណីប៉ុណ្ណោះ។ រដ្ឋាភិបាលអង់គ្លេស កាលពីថ្ងៃទី 25 វិច្ឆិកា និយាយថា វ៉ារ្យ៉ង់ថ្មីនេះគឺជា «វីរុសបំប្លែងខ្លួនថ្មីដែលអាក្រក់បំផុត» ព្រមទាំងបានដាក់ចេញនូវវិធានការទប់ស្កាត់ជាច្រើនដែលទាក់ទងនឹងការធ្វើដំណើរទៅមក រវាងប្រទេសនេះ ជាមួយបណ្ដាប្រទេសនៅ អាហ្វ្រិក៕

November 26, 2021

Author: សឿន សំណាង