ក្នុងរយៈពេល ២៤ ម៉ោងនៃថ្ងៃទី ២៨ វិច្ឆិកា កម្ពុជា បានរកឃើញអ្នកឆ្លងថ្មី ចំនួន ២៥ នាក់ទៀត ដែលតួលេខនេះខ្ពស់ជាងបន្តិច បើធៀបនឹង ២៣ ករណី កាលពី ២៤ ម៉ោងនៃថ្ងៃទី ២៧ វិច្ឆិកា។
គិតមកដល់ថ្ងៃទី ២៩ វិច្ឆិកា ២០២១ ស្ថិតិនៃករណីកូវីដ-១៩ នៅ កម្ពុជា រួមមាន៖
នៅទូទាំងពិភពលោក ករណីកូវីដ-១៩ មានដូចខាងក្រោម៖
-ឆ្លងថ្មី ៖ ១២,៣៩៧ នាក់
-ឆ្លងសរុប ៖ ២៦១,៧៦៣,៤៦៣ នាក់
-ស្លាប់សរុប ៖ ៥,២១៧,៣០៣ នាក់
-ជាសះស្បើយសរុប ៖ ២៣៦,៤២៣,៥៩៤ នាក់
-កំពុងព្យាបាល៖ ២០,១២២,៥៦៦ នាក់
ថ្ងៃទី ២៩ វិច្ឆិកានេះ រដ្ឋាភិបាលជប៉ុន បានប្រកាសថា សម្រេចផ្អាកការផ្ដល់ទិដ្ឋាការស្ទើរតែទាំងអស់ ចំពោះអ្នកជំនួញ និងនិស្សិតបរទេស ក្នុងបំណងទប់ស្កាត់វីរុសកូវីដ-១៩ ប្រភេទ អូមីក្រុន (Omicron)។
ទូរទស្សន៍ NTV បានរាយការណ៍ថា ការសម្រេចចិត្តខាងលើនេះ មានការលើកលែងចំពោះក្រុមមនុស្សដែលមក ជប៉ុន បំពេញបេសកកម្មផ្នែកកិច្ចការមនុស្សធម៌។ ចំណែកសារព័ត៌មាន Kyodo រាយការណ៍ថា ការផ្អាកនេះនឹងមានសុពលភាពចាប់ពីខែវិច្ឆិកានេះ រហូតដល់មានសេចក្ដីសម្រេចថ្មី។
ការសម្រេចរបស់រដ្ឋាភិបាលជប៉ុន ត្រូវបានធ្វើឡើងបន្ទាប់ពី វិទ្យាស្ថានជាតិគ្រប់គ្រងជំងឺឆ្លងរបស់ ជប៉ុន (NIID) បានបង្កើនកម្រិតប្រកាសអាសន្នខ្ពស់បំផុតចំពោះវីរុសកូវីដ-១៩ ប្រភេទ អូមីក្រុន។
កាលពីថ្ងៃទី 26 វិច្ឆិកា អង្គការសុខភាពពិភពលោក (WHO) បានកោះប្រជុំបន្ទាន់ពិសេស ដើម្បីពិភាក្សាអំពីបញ្ហាវ៉ារ្យ៉ង់ អូមីក្រុន របស់ វីរុសកូវីដ-១។ WHO បានដាក់បញ្ចូល អូមីក្រុន ទៅក្នុងប្រភេទវីរុសដែលគួរឱ្យព្រួយបារម្ភ។ WHO ប្រកាសថា អូមីក្រុន មានការប្រែប្រួលប្រូតេអ៊ីនបន្លាជាច្រើនប្រភេទ ក្នុងនោះមានមួយចំនួនគួរឱ្យបារម្ភ។ ភ័ស្ដុតាងដំបូងបានឱ្យដឹងថា វ៉ារ្យ៉ង់ថ្មីនេះ មានសមត្ថភាពឆ្លងរាលដាល់ខ្លាំងជាងវ៉ារ្យ៉ងផ្សេងៗរបស់ កូវីដ-១៩៕
ឯកអគ្គរដ្ឋទូតថ្មីរបស់ ប្រទេសឆែក បានសន្យាថា នឹងបន្តជំរុញកិច្ចសហប្រតិបត្តិការលើវិស័យពាណិជ្ជកម្ម វិនិយោគ និងទេសចរណ៍ ជាមួយ កម្ពុជា បន្ថែមទៀត ក្រោយវិបត្តជំងឺកូវីដ-១។
ឯកឧត្តម ម៉ាទីន វែវរ៉ា (Martin Vavra) ឯកអគ្គរដ្ឋទូតថ្មី នៃសាធារណរដ្ឋឆែក ប្រចាំកម្ពុជា បានថ្លែងដូចខាងលើនៅក្នុងជំនួបពិភាក្សាជាមួយ សម្ដេច ហេង សំរិន ប្រធានរដ្ឋសភា ដែលត្រូវបានធ្វើឡើងនាព្រឹកថ្ងៃទី ២៩ វិច្ឆិកា ២០២១ នៅឯវិមានរដ្ឋសភាជាតិ។
ប្រទេសឆែក បានផ្តល់ជំនួយទ្វេភាគីមក កម្ពុជា ជាច្រើន ទាក់ទងនឹងវិស័យសុខាភិបាល និងវិស័យអប់រំ។ សាធារណរដ្ឋឆែក ក៏នៅតែផ្តល់ជំនួយមនុស្សធម៌មក កម្ពុជា បន្តបន្ទាប់ទៀត ពិសេសគឺការផ្ដល់អាហារូបករណ៍ដល់សិស្ស និស្សិត និងមន្ត្រីរាជការរបស់ កម្ពុជា ឱ្យបានទៅសិក្សានៅប្រទេសនេះ។ ឆែក បានរួមចំណែកអភិវឌ្ឍន៍នៅ កម្ពុជា យ៉ាងច្រើន តាំងពីអតីតឆេកូស្លូវ៉ាគី រហូតដល់បច្ចុប្បន្ន។ នេះបើតាម សម្ដេច ប្រធានសភាជាតិ កម្ពុជា។
ក្រុមហ៊ុន Doral Renewable កំពុងសាងសង់រោងចក្រផលិតអគ្គិសនីដែលប្រើថាមពលព្រះអាទិត្យខ្នាតយក្សមួយនៅក្នុងរដ្ឋ Indiana នៅលើផ្ទៃដីទំហំ ៥,២៦១ ហិកតា។
រដ្ឋ Indiana នឹងក្លាយជាទីដែលមានរោងចក្រផលិតអគ្គិសនីដែលប្រើប្រាស់ថាមពលព្រះអាទិត្យធំជាងគេបង្អស់នៅ សហរដ្ឋអាម៉េរិក នេះបើតាមសារព័ត៌មាន AFP។
រោងចក្រដែលមានឈ្មោះថា Mammoth Solar នេះ មានទំហំ ៥,២៦១ ហិកតា ដែលប្រហាក់ប្រហែលនឹងទីលានបាល់ឱប (American Football) ចំនួន ៩,៨៥០ ឯណោះ។
ដំណើរការសាងសង់ត្រូវបានចាប់ផ្ដើមនៅក្នុងតំបន់ជនបទ ស្ថិតនៅចន្លោះខណ្ឌ Starke និង Pulaski ដែលមានចម្ងាយពីទីក្រុង South Bend ប្រហែល ៨០ គីឡូម៉ែត្រ ទៅទិសនិរតី។
តាមគម្រោង រោងចក្រ Mammoth Solar នឹងត្រូវបានសាងសង់រួចរាល់នៅក្នុងឆ្នាំ 2024 ដោយមានបំពាក់ផ្ទាំងស្រូបកម្ដៅព្រះអាទិត្យ (ផ្ទាំងសូឡារ) ចំនួន ២.៨៥ លានផ្ទាំង។ នៅក្នុងអំឡុងពេលនោះ វានឹងផលិតអគ្គិសនីសរុបបាន ១.៦៥ ជីហ្គាវ៉ាត់ (gigawatt) គ្រប់គ្រាន់សម្រាប់ផ្គត់ផ្គង់ដល់ផ្ទះចំនួន ២៥០,០០០ ខ្នង។
អគ្គិសនីស្ទើរតែទាំងអស់ដែលផលិតបាន នឹងត្រូវបានផ្គត់ផ្គង់ដល់បណ្ដាគ្រួសារ និងក្រុមហ៊ុនទាំងឡាយដែលនៅជុំវិញគម្រោងរោងចក្រនេះ។ ថាមពលអគ្គិសនីដែលនៅសល់នឹងត្រូវបានបញ្ជូនទៅកាន់តំបន់ផ្សេងៗដែលត្រូវការ៕
ដើម្បីចូលរួមរក្សាប្រពៃណីទំនៀមទម្លាប់ និងដើម្បីអបអរសាទរខួប ៣ ឆ្នាំ នៃការដាក់បញ្ចូលល្ខោនខោលវត្តស្វាយអណ្ដែត របស់ស្រុកល្វាឯម ក្នុងខេត្តកណ្ដាល ទៅក្នុងបញ្ជីបេតិកភណ្ឌវប្បធម៌អរូបិយមនុស្សជាតិ របស់អង្គការយូណេស្កូ ក៏ដូចជាដើម្បីបង្កភាពសប្បាយរីករាយជូនប្រជាពលរដ្ឋ រដ្ឋបាលស្រុកល្វាឯម បានរៀបចំពិធីប្រណាំងទូកដ៏គគ្រឹកគគ្រេងមួយ នៅរសៀលថ្ងៃទី ២៨ វិច្ឆិកា ២០២។
ពិធីប្រណាំងទូកដែលត្រូវបានធ្វើឡើងនៅឯមាត់ទន្លេមេគង្គ ទល់មុខអធិការដ្ឋាននគរបាលស្រុកល្វាឯមស្ថិតក្នុងភូមិវាលធំ ឃុំពាមឧកញ៉ាអុង ស្រុកល្វាឯម ទទួលបានការចូលរួមទស្សនាកម្សាន្តពីប្រជាពលរដ្ឋរាប់ពាន់នាក់។ នេះបើតាម លោក កន សុខកាយ អភិបាលស្រុកល្វាឯម។
លោកអភិបាលស្រុក បានឱ្យដឹងថា ការបង្កើតពិធីប្រណាំងទូកនេះគឺដើម្បីបង្កលក្ខណៈសប្បាយរីករាយជូនប្រជាពលរដ្ឋ រក្សានូវប្រពៃណីទំនៀមទម្លាប់ពីដូនតា និង ពង្រឹងស្មារតីសាមគ្គីភាពគ្នា ស្របពេលដែលរាជរដ្ឋាភិបាលបានសម្រេចបើកប្រទេសឡើងវិញ និងដើម្បីចូលរួមអបអរសាទរព្រះរាជពិធីបុណ្យអុំទូក បណ្ដែតប្រទីប និង សំពះព្រះខែ អកអំបុក ពិសេសគឺដើម្បីចូលរួមអបអរសាទរខួប ៣ឆ្នាំនៃការដាក់បញ្ចូលល្ខោនខោល វត្តស្វាយអណ្ដែត របស់ស្រុកល្វាឯម ទៅក្នុងបញ្ជីបេតិកភណ្ឌវប្បធម៌អរូបិយ នៃមនុស្សជាតិ របស់អង្គការយូណេស្កូ (២៨ វិច្ឆិកា ឆ្នាំ ២០១៨-២៨ វិច្ឆិកា ២០២១)។
ព្រឹត្តិការណ៍ប្រណាំងដែលមានទូកចូលរួមសរុបចំនួន ៥០ ទូក ក្នុងនោះ មានទូកខ្លីចំនួន ២៤ ទូក និងទូកវែងចំនួន ២៦ ទូក របស់ស្រុកល្វាអែម លើកនេះ ត្រូវបានធ្វើឡើងរយៈពេល ២ ថ្ងៃ គិតចាប់ពីថ្ងៃទី ២៧ ដល់ថ្ងៃទី ២៨ វិច្ឆិកា៕
ក្រុមមន្ត្រីរបស់ប្រទេស កាណាដា បានប្រកាសថា វ៉ារ្យ៉ង់អូមីក្រុន (Omicron) បានឆ្លងរាលដាលដល់ អាម៉េរិកខាងជើង ដោយមានពីរករណីដំបូងត្រូវបានរកឃើញនៅខេត្ត អូនតារីយ៉ូ (Ontario)។
ក្រុមមន្ត្រីសុខាភិបាលជាន់ខ្ពស់នៅខេត្ត អូនតារីយ៉ូ គឺ Christine Elliott និង Kieran Moore បានឱ្យដឹងកាលពីថ្ងៃទី 28 វិច្ឆិកា ថា អ្នកជំងឺទាំងពីរនាក់ដែលបានឆ្លងវីរុស កូវីដ-១៩ ប្រភេទ អូមីក្រុន ថ្មីៗនេះបានត្រលប់មកពីប្រទេស នីហ្សេរីយ៉ា មុនពេលរកឃើញថា វិជ្ជមាននឹង កូវីដ-១។ សមត្ថកិច្ចកំពុងស្រាវជ្រាវអ្នកដែលបានប៉ះពាល់ផ្ទាល់ និងប្រយោលដើម្បីស្វែងរកអ្នកជំងឺដែលពាក់ព័ន្ធ។
នៅ សហរដ្ឋអាម៉េរិក វេជ្ជបណ្ឌិត Anthony Fauci ប្រធានវិទ្យាស្ថានជាតិគ្រប់គ្រងជំងឺឆ្លង កាលពីថ្ងៃទី 27 វិច្ឆិកា ឱ្យដឹងថា វ៉ារ្យ៉ង់ថ្មីប្រហែលជាបានឆ្លងទៅដល់ សហរដ្ឋអាម៉េរិក ហើយថា អូមីក្រុន មានសមត្ថភាពឆ្លងរាលដាលខ្ពស់ អាចគេចពីប្រព័ន្ធការពាររាងកាយ ក៏ដូចជាផ្នែកមួយនៃប្រព័ន្ធការពាររាងកាយដែលបង្កើតឡើងដោយវ៉ាក់សាំង។
អង្គការសុខភាពពិភពលោក (WHO) បានចាត់ អូមីក្រុន ដែលត្រូវបានរកឃើញដំបូងនៅទ្វីប អាហ្វ្រិកខាងត្បូង ចូលក្នុងក្រុម វ៉ារ្យ៉ង់ ដែលគួរឱ្យព្រួយបារម្ភ។ វ៉ារ្យ៉ង់ថ្មីនេះបានបង្ហាញខ្លួននៅក្នុងបណ្ដាប្រទេសក្នុងទ្វីប អឺរ៉ុប និងប្រទេសមួយចំនួនទៀតនៅក្នុងពិភពលោក៕
សម្តេចក្រុមព្រះ នរោត្តម រណឫទ្ធិ យាងសោយព្រះទិវង្គត ក្នុងព្រះជន្ម ៧៧ព្រះវស្សា នាសាធារណរដ្ឋបារាំង វេលាម៉ោង ៣:៤០នាទី ម៉ោងនៅទីក្រុងភ្នំពេញ ថ្ងៃទី ២៨ ខែវិច្ឆិកា ឆ្នាំ ២០២១ ដោយព្រះរោគាពាធ។
សម្តេចក្រុមព្រះ នរោត្តម រណឫទ្ធិ ជាព្រះប្រធានគណបក្សហ្វ៊ុនស៊ិនប៉ិច និងព្រះប្រធានក្រុមប្រឹក្សាផ្ទាល់របស់ព្រះមហាក្សត្រ។ ព្រះអង្គធ្លាប់ធ្វើជានាយករដ្ឋមន្រ្តីទីមួយនៃរដ្ឋាភិបាលកម្ពុជា និងធ្លាប់ធ្វើជាប្រធានរដ្ឋសភាជាតិ។
ព្រះអង្គប្រសូត្រ កាលពីថ្ងៃទី២ ខែមករា ឆ្នាំ ១៩៤៤ នារាជធានីភ្នំពេញ។ ទ្រង់ជាព្រះរាជបុត្រានៃព្រះបរមរតនកោដ្ឋ ព្រះករុណាព្រះបាទសម្តេចព្រះនរោត្តម សីហនុ និងអ្នកម្នាង ផាត់ កាញ៉ុល ដែលជានាដការី នៃរបាំព្រះរាជទ្រព្យ។ ព្រះអង្គជាព្រះអាណុច (ឬប្អូនបង្កើត) របស់សម្តេចរាជបុត្រីព្រះរាម នរោត្តម បុប្ផាទេវី។ ព្រះអង្គជាព្រះជេដ្ឋា (ឬបងប្រុស) របស់ព្រះករុណាព្រះបាទសម្ដេច ព្រះបរមនាថ នរោត្ដម-សីហមុនី ប៉ុន្តែព្រះមាតាទីទៃ បិតាតែមួយ។
ព្រះអង្គមានមហេសីពីរ។ មហេសីទីមួយ គឺព្រះអង្គម្ចាស់ក្សត្រិយ៍នរោត្តម ម៉ារី រណឫទ្ធិ (ឈ្មោះដើមអ្នកស្រី អេង ម៉ារី) បានបុត្របីអង្គ គឺព្រះអង្គម្ចាស់ នរោត្ដម ចក្រាវុឌ្ឍ ព្រះអង្គម្ចាស់ នរោត្តម សីហឫទ្ធិ និងព្រះអង្គម្ចាស់ក្សត្រីយ៍ នរោត្តម រតនាទេវី។ មហេសីទីពីរ គឺអ្នកម្នាង អ៊ុក ផល្លា ដែលជាអ្នករបាំបុរាណដ៏ឆ្នើមម្នាក់។ ជាមួយអ្នកម្នាង អ៊ុក ផល្លា ទ្រង់បានបុត្រពីរអង្គ គឺអ្នកអង្គម្ចាស់ នរោត្តម សុធាឫទ្ធិ និង អ្នកអង្គម្ចាស់ នរោត្ដម រណវង្ស។ អ្នកម្នាង អ៊ុក ផល្លា បានស្លាប់ក្នុងគ្រោះថ្នាក់ចរាចរណ៍មួយ នៅស្រុកព្រៃនប់ ខេត្តព្រះសីហនុ កាលពីឆ្នាំ ២០១៨។ ក្នុងគ្រោះថ្នាក់នោះ សម្តេចក្រុមព្រះនរោត្តម រណឫទ្ធិ រងរបួសធ្ងន់ ដែលពិការ និងជិះលើរទេះរុញតាំងពីពេលនោះ រហូតដល់ថ្ងៃសោយទិវង្គត៕
ក្នុងរយៈពេល ២៤ ម៉ោងនៃថ្ងៃទី ២៦ វិច្ឆិកា កម្ពុជា រកឃើញអ្នកឆ្លងថ្មី ២៦ (PCR) នាក់ទៀត ជាសះស្បើយ ២៩ នាក់ និងស្លាប់ ៥ នាក់ (៤ នាក់ មិនបានចាក់វ៉ាក់សាំង)។ តួលេខនៃករណីឆ្លងថ្មីខាងលើ ទាបជាងឆ្ងាយធៀបនឹង ២៩ ករណី កាលពីថ្ងៃទី ២៥ វិច្ឆិកា។
ករណីកូវីដ-១៩ សរុបនៅ កម្ពុជា គិតមកដល់ថ្ងៃទី ២៧ វិច្ឆិកា ២០២១ រួមមាន៖
– អ្នកឆ្លងសរុប= ១២០,០៦៤ នាក់
– អ្នកជាសះស្បើយ= ១១៦,៤៤៦ នាក់
– អ្នកស្លាប់= ២,៩២៧ នាក់
ទិន្នន័យបន្ថែម សូមអានសេចក្ដីជូនព័ត៌មានដូចខាងក្រោម៖
នៅទូទាំងពិភពលោក ករណីកូវីដ-១៩ មានដូចខាងក្រោម៖
-ឆ្លងថ្មី ៖ ៤១,៨៤៤ នាក់
-ឆ្លងសរុប ៖ ២៦០,៩០៨,៩៣៨ នាក់
-ស្លាប់សរុប ៖ ៥,២០៦,៨០៤ នាក់
-ជាសះស្បើយសរុប ៖ ២៣៥,៦៩៩,២០២ នាក់
-កំពុងព្យាបាល៖ ២0,០០២,៩៣២ នាក់
ទីក្រុងមែលប៊ន ប្រទេសអូស្ត្រាលី ថ្ងៃទី 24 ខែវិចិ្ឆកា ឆ្នាំ2021 – ក្រុមហ៊ុន Ford បានធ្វើឲ្យពិភពលោកមានការភ្ញាក់ផ្អើលជាមួយនឹងការសម្ពោធរថយន្ត Pickup ជំនាន់ថ្មីរបស់ខ្លួននោះគឺរថយន្ត Ford Ranger ម៉ូឌែលឆ្នាំ 2023 ជំនាន់ថ្មី (The Next-Gen Ford Ranger) ដែលត្រូវបានរចនារូបរាងថ្មីទាំងស្រុងទាំងផ្នែកខាងក្នុង និងផ្នែកខាងក្រៅ ហើយរថយន្តនេះនឹងក្លាយជារថយន្តដែលមានភាពឆ្លាតវៃ មានភាពបត់បែន និងសមត្ថភាពខ្លាំងបំផុតមិនធ្លាប់មានក្នុងប្រវត្តិសាស្ត្រនៃរថយន្ត Pickup។
ដោយប្រើជំនាញ និងបទពិសោធន៍នៃការផលិតរថយន្ត Ford អស់រយៈពេលជាច្រើនឆ្នាំ និងការស្វែងយល់អំពីតម្រូវការរបស់អតិថិជនរថយន្ត Pickup ក្រុមហ៊ុន Ford បានធ្វើការសម្ភាសន៍អតិថិជនជាង 5,000 នាក់ និងរៀបចំសិក្ខាសាលាជាច្រើនដង ទម្រាំតែអាចផលិតរថយន្ត Ford Ranger ជំនាន់ថ្មីដែលអាចប្រើប្រាស់បានទាំងលក្ខណៈអាជីវកម្ម គ្រួសារ ការផ្សងព្រេង និងគ្រប់ដំណើរកម្សាន្តផ្សេង។
លោក Jim Farley អគ្គនាយក និងជានាយកប្រតិបត្តិរបស់ក្រុមហ៊ុន Ford Motor Company បានលើកឡើងថា៖ “រថយន្តត្រកូល Ford Ranger បានមានវត្តមានក្នុងទីផ្សារអស់រយៈពេលជាច្រើនទសវត្សរ៍មកហើយ រថយន្ត Pickup មួយនេះតែងតែជាដៃគូដែលគួរឲ្យទុកចិត្តសម្រាប់ម្ចាស់អាជីវកម្ម កសិករ គ្រួសារ អ្នកផ្សងព្រេង អ្នកដឹកជញ្ជូន និងអតិថិជននានា នៅជាង 180 ប្រទេសជុំវិញពិភពលោក។ សម្រាប់រថយន្ត Ford Ranger ជំនាន់ថ្មីនេះគឺមិនត្រឹមតែជាផលិតផលដែលអតិថិជនស្រឡាញ់ពេញចិត្ត និងទិញយកមកប្រើប្រាស់ក្នុងពេលបច្ចុប្បន្ននោះទេ ប៉ុន្តែវានឹងក្លាយជាបទពិសោធន៍ថ្មីស្រឡាងមួយដែលអាចជួយបង្កើតទំនាក់ទំនងរវាងក្រុមហ៊ុន Ford និងអតិថិជនឲ្យកាន់តែរឹងមាំ និងយូរអង្វែង។
ក្រុមហ៊ុន Ford បានបង្កើតពាក្យស្លោកសម្រាប់ម៉ូឌែល Ford Ranger ថា៖ “Living The Ranger Life ដែលវាមានន័យថារស់នៅជីវិតជាមួយរថយន្ត Ranger” ដែលនេះវាក៏ជាការរួមចំណែកក្នុងការចូលរួមបង្កើតរថយន្ត Ford Ranger ជំនាន់ថ្មីនេះផងដែរ។
ជាក់ស្តែងរថយន្ត Ford Ranger ជំនាន់ថ្មីមានភាពលេចធ្លោ និងពោរពេញដោយអំណាច ដោយផ្នែកទទឹងនៃរថយន្តមានទំហំធំជាងមុនរហូតដល់ទៅ 50mm ដោយនេះមិនត្រឹមតែជាការឌីហ្សាញតែប៉ុណ្ណោះទេ តែថែមទាំងជាការជួយសម្រួលដល់ប្រព័ន្ធជើងក្រោមថ្មីឲ្យដំណើរការកាន់តែប្រសើរជាងមុន។ ជាមួយនឹងការរចនាប៉ាណាថ្មីស្រឡាង បូករួមនឹងចង្កៀងមុខប្រភេទ C-Clamp ដែលត្រូវបានរចនាជារាងអក្សរ C ប្លែកខុសពីរថយន្តដ៏ទៃ ជាប្រភេទ Matrix LED ជំនាន់ចុងក្រោយ និងអាចបញ្ចេញភ្លើងមួយជុំវិញរថយន្តតែម្តង (Zone Lighting) ដែលវាជាអត្តសញ្ញាណថ្មីមួយសម្រាប់រថយន្ត Ford Ranger ជំនាន់ថ្មីនេះ។ ផ្នែកខាងក្រោយក៏ត្រូវបានរចនាថ្មីទាំងស្រុង មានភាពធំទូលាយជាងមុនដោយការរចនាបានយកគំរូតាម Ford F-150 ជាពិសេសនោះគឺបានបំពាក់មកជាមួយនឹងអក្សរផុសធំ RANGER ដែលមើលទៅកាន់តែអង់អាចក្លាហាន ដែលនេះជាអ្វីដែលអតិថិជនកំពុងតែទន្ទឹងរង់ចាំជាយូរណាស់មកហើយ។ រីឯទ្វារផ្នែកខាងក្រោយក៏អាចប្រើសម្រាប់ភ្ជាប់ជាមួយនឹងឧបករណ៍ផ្សេងៗ និងមានរន្ធសាកថ្មទំហំធំដែលងាយស្រួលក្នុងការប្រើប្រាស់ជាប្រភេទអាជីវកម្ម និងដំណើរកម្សាន្តបែបផ្សងព្រេង។ ចំណុចថ្មីមួយដែលរថយន្ត Ford Pickup ជំនាន់មុនៗមិនធ្លាប់បានបំពាក់នោះគឺ ឈ្នាន់ជាន់នៅចំហៀងកាងផ្នែកខាងក្រោយ (Rear Load Box Access Step) ដែលអនុញ្ញាតឲ្យឡើងចុះរថយន្តតាមផ្នែកចំហៀងដោយមិនចាំបាច់ឡើងជាន់លើសំបកកង់ដូចមុននោះទេ នេះជាចំណុចដែលអាចបញ្ជាក់ថា Ford កាន់តែគិតគូពីអ្នកប្រើប្រាស់រថយន្ត ហើយចំណុចនេះគេសង្កេតឃើញថាមិនទាន់មានរថយន្ត Pickup ណាមួយមានបំពាក់ឈ្នាន់បែបនេះនៅឡើយទេ ដោយនេះស្តែងឲ្យឃើញក្រុមហ៊ុន Ford កាន់តែយកចិត្តទុកដាក់ដល់អ្នកប្រើប្រាស់។
ផ្នែកខាងក្នុងត្រូវបានរចនារូបរាងថ្មីទាំងស្រុង ដែលមានលក្ខណៈធំទូលាយ ស្រឡះ ទំនើប និងប្រណិតជាងមុន ហើយសម្ភារៈតុបតែងលម្អផ្នែកខាងក្នុងត្រូវបានធ្វើឡើងពីស្បែកប្រណិតលំដាប់ខ្ពស់ដែលកាន់តែផ្តល់នូវផាសុកភាព ផ្តល់ភាពងាយស្រួលដល់អ្នកបើកបរ និងអ្នករួមដំណើរ។ អ្វីដែលកាន់តែពិសេសអស្ចារ្យបំផុតនោះគឺអេក្រង់ Touch Screen ចំកណ្តាលទំហំ 10.1អ៊ីញ ឬ 12អ៊ីញ ទៅតាមម៉ូឌែលនៃរថយន្ត និងបច្ចេកវិទ្យា SYNC 4 ជំនាន់ចុងក្រោយបំផុត ដែលអនុញ្ញាតឲ្យភ្ជាប់អ៊ីនធឺណេតនៅពេលធ្វើដំណើរ និងការភ្ជាប់ជាមួយកម្មវិធី FordPassTM ដែលវានឹងបង្កើតបទពិសោធន៍ថ្មីមួយសម្រាប់អ្នកប្រើប្រាស់មុខងារកម្សាន្ត និងអត្ថប្រយោជន៍ប្រើប្រាស់ជាច្រើនទៀតដូចជា៖ ការបញ្ឆេះពីចម្ងាយ ការត្រួតពិនិត្យស្ថានភាពរថយន្ត មុខងារចាក់សោ និងដោះសោពីចម្ងាយតាមរយៈទូរស័ព្ទដៃរបស់លោកអ្នក។ល។ មិនតែប៉ុណ្ណោះរថយន្តនេះថែមទាំងមានមុខងារសាកថ្មទូរស័ព្ទឥតខ្សែ (Wireless Charging) រន្ធសាកថ្ម USB មុខក្រោយ និងរន្ធសាកថ្ម USB Type C ផងដែរ។ កុងទ័រក៏បានរចនាថ្មីទាំងស្រុងដែលសម្រាប់ជំនាន់ថ្មីនេះ Ford បានប្រើប្រាស់កុងទ័រ Digital ទំហំ 8អ៊ីញដែលអាចបង្ហាញនូវព័ត៍មាននានាអំពីរថយន្តដែលផ្តល់នូវរូបភាពរស់រវើកច្បាស់ល្អ។
បច្ចេកវិទ្យាថ្មីដែលអតិថិជនកំពុងទន្ទឹងរង់ចាំសម្រាប់រថយន្ត Ford Ranger Pickup នោះគឺ
យោងតាមការចេញប្រកាសពីក្រុមហ៊ុន Ford នៅប្រទេសអូស្ត្រាលី បានបង្ហាញឲ្យឃើញថា Ford បានបន្ថែមជម្រើសម៉ាស៊ីនជូនអតិថិជនដែលក្នុងនោះមានរហូតដល់ 4 ជម្រើសដូចជា៖
ជាសរុបមកវិញ សម្រាប់ម៉ូឌែល Ford Ranger ជំនាន់ថ្មីនេះ Ford បានកែរូបរាងថ្មីទាំងស្រុងទាំងផ្នែកខាងក្រៅ និងផ្នែកខាងក្នុង ជាពិសេសនោះគឺប្រព័ន្ធសុវត្ថិភាព និងបច្ចេកវិទ្យាជំនាន់ថ្មីចុងក្រោយដែលចំណុចនេះគឺ Ford តែងតែឈរលើដៃគូប្រកួតប្រជែងជានិច្ច។ រថយន្ត Ford Ranger ជំនាន់ថ្មីនឹងក្លាយជារថយន្តដែលឆ្លាតវៃ ធន់រឹងមាំ និងអាចជំនះបត់បែនគ្រប់កាលៈទេសៈ ហើយនឹងក្លាយជារថយន្តដែលមានវិសាលភាពឥតដែនកំណត់។
យើងសង្ឃឹមថាឆាប់ៗខាងមុខនេះ ក្រុមហ៊ុន Ford នឹងធ្វើបញ្ចេញព័ត៍មាន និងលក្ខណៈផ្សេងៗអំពីរថយន្ត Ford Ranger ម៉ូឌែលឆ្នាំ 2023 ជំនាន់ថ្មីនេះឲ្យសាធារណៈជនជ្រាបកាន់តែច្បាស់។
ការគណនាតាមប្រព័ន្ធកុំព្យូទ័រ (Computer simulation) បានបង្ហាញថា បណ្ដាភពដែលនៅក្មេង ហើយផ្ទៃខាងលើមានសីតុណ្ហភាពខ្ពស់គឺ មានបណ្ឌលថ្ម (សម្បកខាងក្រៅ) យ៉ាងស្ដើង និងស្រួយ មិនអាចទ្រទ្រង់ជីវិត។
បណ្ដាភពក្រៅប្រព័ន្ធព្រះអាទិត្យពិតជាមានភាពខុសប្លែកខ្លាំងណាស់ ក្នុងនោះ មានមួយចំនួនក្ដៅខ្លាំង និងហួតហែង ខណៈមួយចំនួនទៀតមានភ្លៀងត្បូងពេជ្រពិតប្រាកដ។
ដោយការគណនានៅលើប្រព័ន្ធកុំព្យូទ័រ ក្រុមអ្នកវិទ្យាសាស្ត្រមកពីសាកលវិទ្យាល័យ ការ៉ូលីណាខាងជើង (North Carolina) និងសាកលវិទ្យាល័យវ៉ាស៊ីងតោន បានឱ្យដឹងថា ពួកគេបានរកឃើញប្រភេទនៃភពថ្មីមួយដែលមានផ្ទៃខាងលើស្រួយដូចសម្បកស៊ុត។
យោងតាមការស្រាវជ្រាវខាងលើ ប្រភេទភពនេះមានមណ្ឌលថ្ម (Lithosphere) យ៉ាងស្ដើង និងស្រួយ។ សណ្ដានដីរបស់ពួកវាក៏រាបស្មើដូចទៅនឹងតំបន់វាលរាបនៅលើភពសុក្រ។
ដូច្នេះតើកត្តាអ្វីខ្លះដែលបានបង្កើតពិភពមួយដែលមានផ្ទៃដូចសម្បកស៊ុត?
ក្រុមអ្នកវិទ្យាសាស្ត្រនិយាយថា សីតុណ្ហភាពនៅលើផ្ទៃភព និងអាយុកាលរបស់ភពគឺជាកត្តាចម្បងដែលនាំឱ្យមាន «ភពសម្បកស៊ុត»។
ភពដែលក្ដៅតែងតែមានសម្បកខាងក្រៅស្រួយ ហើយបើវាកាន់តែក្មេង នោះមណ្ឌលថ្មនឹងកាន់តែស្ដើង។ ភពដែលមានលក្ខណៈដូចសម្បកស៊ុត អាចមិនមានបាតុភូត ផ្លាកតិចតូនិច (plate tectonics) ដូចនៅលើផែនដី ព្រោះតែកម្រិតនៃភាពស្រួយរបស់វាមិនអនុញ្ញាតឱ្យមណ្ឌលថ្មប្រែទៅជាកោង ហើយជាងនេះទៀត វាមានមណ្ឌលថ្មតែមួយស្រទាប់ប៉ុណ្ណោះ។ ពុំមាន ផ្លាកទិចតូនិច គឺមានន័យថា ភពនោះពិបាកក្នុងការទ្រទ្រង់ជីវិត។
របកគំហើញនេះនឹងជួយឱ្យក្រុមអ្នកវិទ្យាសាស្ត្រ កាត់បន្ថយពេលវេលាបានច្រើននៅក្នុងបេសកកម្មរុករកពិភពថ្មីក្នុងអនាគត៕