សឿន សំណាង - La Reine Media

ហ្វៃហ្សឺរ (Pfizer) ជឿជាក់ថា ថ្នាំលេបប្រឆាំងកូវីដ-១៩ របស់ពួកគេ មានប្រសិទ្ធភាពចំពោះវ៉ារ្យ៉ង់ថ្មី អូមីក្រុង (Omicron) របស់ កូវីដ-១៩

នាយកប្រតិបត្តិនៃក្រុមហ៊ុនផលិតឱសថ ហ្វៃហ្សឺរ (Pfizer) លោក Albert Bourla បានឱ្យដឹងថា ក្រុមហ៊ុននេះជឿជាក់ថា ថ្នាំគ្រាប់សម្រាប់លេបរបស់ ហ្វៃហ្សឺរ នឹងមានប្រសិទ្ធភាពក្នុងការប្រឆាំងនឹងវ៉ារ្យ៉ង់ទាំងអស់របស់ ASRS-CoV-2 (វីរុសបង្កជំងឺកូវីដ-១៩) បូករួមទាំង អូមីក្រុង (Omicron) ដែលទើបត្រូវបានរកឃើញកាលពីពេលថ្មីៗនេះ។

នាយកប្រតិបត្តិ Albert Bourla បានប្រាប់ទូរទស្សន៍ CNBC កាលពីថ្ងៃទី ៣០ វិច្ឆិកា ថា ក្រុមហ៊ុនរបស់លោកក៏កំពុងស្រាវជ្រាវអភិវឌ្ឍឱសថ្មីផងដែរ ដើម្បីត្រៀមបង្ការករណីវីរុសអាចទប់ទល់នឹងថ្នាំដែលមាននៅបច្ចុប្បន្ន។

តាមការអះអាងរបស់ ហ្វៃហ្សឺរ ថ្នាំនេះមិនត្រឹមតែវាយប្រហារលើវីរុសនោះទេ ប៉ុន្តែក៏អាចទប់ស្កាត់អង់ស៊ីម (enzyme) មួយប្រភេទដែលមានតួនាទីសំខាន់ក្នុងដំណើរការកកើតកូនចៅរបស់វីរុសផងដែរ។

នាយកប្រតិបត្តិនៃក្រុមហ៊ុនផលិតឱសថ ហ្វៃហ្សឺរ (Pfizer) លោក Albert Bourla

កាលពីថ្ងៃទី ១៧ វិច្ឆិកា ក្រុមហ៊ុន ហ្វៃហ្សឺរ បានដាក់ពាក្យទៅកាន់អាជ្ញាធរគ្រប់គ្រងអាហារនិងឱសថអាម៉េរិក (FDA) ដើម្បីសុំការអនុម័តឱ្យប្រើប្រាស់បន្ទាប់ចំពោះ Paxlovid ជាថ្នាំគ្រាប់ព្យាបាលជំងឺកូវីដ-១៩ សម្រាប់អ្នកជំងឺដែលមានអាការស្រាល និងមធ្យម។

ក្នុងប៉ុន្មានសប្ដាហ៍ខាងមុខ FDA របស់ អាម៉េរិក អាចនឹងធ្វើការអនុម័តឱ្យប្រើប្រាស់ថ្នាំ Paxlovid ជាថ្នាំដែលក្រុមហ៊ុន ហ្វៃហ្សឺរ អះអាងថា មានប្រសិទ្ធភាព ៨៩% ក្នុងការកាត់បន្ថយហានិភ័យនៃការចូលពេទ្យ និងស្លាប់ដោយសារកូវីដ-១៩៕

December 1, 2021

ក្រុមប្រឹក្សាជំនាញ FDA របស់ សហរដ្ឋអាម៉េរិក ណែនាំឱ្យប្រើប្រាស់ថ្នាំ ម៉ុលនូភីរ៉ាវា (Molnupiravir) របស់ ម៉ើក ក្នុងការព្យាបាលជំងឺកូវីដ-១៩

ថ្នាំព្យាបាលជំងឺកូវីដ-១៩ របស់ក្រុមហ៊ុន ម៉ើក (Merck) (អាម៉េរិក) សម្រាប់អ្នកជំងឺវ័យចំណាស់ ឬអ្នកជំងឺដែលមានហានិភ័យប្រែទៅជាធ្ងន់ធ្ងរ ត្រូវបានក្រុមប្រឹក្សាជំនាញនៃអាជ្ញាធរគ្រប់គ្រងអាហារនិងឱសថ (FDA) របស់ សហរដ្ឋអាម៉េរិក អនុម័តរួចហើយ ដោយមានការគាំទ្រចំនួន ១៣ សំឡេង និង ប្រឆាំងចំនួន ១០ សំឡេង កាលពីថ្ងៃទី ៣០ វិច្ឆិកា។

ក្រោយការអនុម័តរបស់ក្រុមប្រឹក្សាជំនាញនៃអាជ្ញាធរគ្រប់គ្រងអាហារនិងឱសថ ថ្នាំ ម៉ុលនូភីរ៉ាវា នេះ ទំនងជានឹងត្រូវបាន អាម៉េរិក អនុម័តនាប៉ុន្មានថ្ងៃខាងមុខ និងត្រូវបានប្រើប្រាស់ជាផ្លូវការមុនដំណាច់ឆ្នាំនេះ។

ថ្នាំ ម៉ុលនូភីរ៉ាវា ដែលអភិវឌ្ឍដោយក្រុមហ៊ុន ម៉ើក គឺជាថ្នាំដំបូងក្នុងក្រុមថ្នាំប្រឆាំងវីរុសជំនាន់ថ្មីដែលមានប្រសិទ្ធភាពចំពោះវ៉ារ្យ៉ងច្រើនប្រភេទរបស់វីរុស SARS-COV-2 ដែលបង្កជាជំងឺកូវីដ-១។

យោងតាមសារព័ត៌មាន The New York Times (NYT) ក្រុមអ្នកវិទ្យាសាស្ត្របានបញ្ជាក់ថា ថ្នាំ ម៉ុលនូភីរ៉ាវា «មានប្រសិទ្ធភាពគួរឱ្យកាត់សម្គាល់» ក្នុងការកាត់បន្ថយការចូលពេទ្យ និងស្លាប់ចំពោះអ្នកជំងឺកូវីដ-១៩ ដែលឆ្លងវ៉ារ្យ៉ង់ Delta, Mu និង Gamma។

បច្ចុប្បន្ន ក្រុមហ៊ុន ម៉ើក កំពុងរៀបគម្រោងពិសោធលើប្រសិទ្ធភាពក្នុងការព្យាបាលរបស់ ម៉ុលនូភីរ៉ាវា ចំពោះអ្នកជំងឺដែលបានឆ្លង អូមីក្រុង (Omicron) ជាវីរុសបំប្លែងខ្លួនថ្មីបំផុតរបស់ កូវីដ-១។

មុននោះ កាលពីថ្ងៃទី ២៦ វិច្ឆិកា FDA ក៏បានប្រកាសរបាយការណ៍បឋមរបស់ខ្លួន ដែលអះអាងថា ថ្នាំ ម៉ុលនូភីរ៉ាវា មានប្រសិទ្ធភាពក្នុងការព្យាបាលជំងឺកូវីដ-១៩ ប៉ុន្តែ បានណែនាំថា ស្ត្រីមានផ្ទៃពោះ ពុំគួរប្រើប្រាស់ថ្នាំនេះ៕

December 1, 2021

អ្នកដំណើរមកពីប្រទេសមួយចំនួនទៀត ត្រូវបានហាមឃាត់ ចូលមក កាណាដា ដោយសារ អូមីក្រុង

យោងតាមព័ត៌មានពី Ottawa រដ្ឋាភិបាលកាណាដា កាលពីថ្ងៃទី ៣០ វិច្ឆិកា បានសម្រេចបន្ថែមចំនួនប្រទេសទៅក្នុងបញ្ជីហាមឃាត់អ្នកដំណើរចូលមកកាន់ កាណាដា មានដូចជា នីហ្សេរីយ៉ា, ម៉ាឡាវី និង អេហ្ស៊ីប។

ប្រទេសកាណាដា ចាប់ពីថ្ងៃទី ២៦ វិច្ឆិកា បានអនុវត្តបទបញ្ជាហាមឃាត់ពលរដ្ឋបរទេសចូលមកទឹកដីរបស់ កាណាដា បើសិនជាពួកគេបានទៅកាន់ប្រទេសមួយចំនួននៅតំបន់ភាគខាងត្បូងនៃ ទ្វីបអាហ្វ្រិក (បុតស្វាណា (Botswana), អេស្វាទីនី (Eswatini), ឡេសូតូ (Lesotho), ម៉ូសំប៊ិក (Mozambiqu), ណាមីប៊ី (Namibia), អាហ្វ្រិកខាងត្បូង (South Africa), ស៊ីមបាវ៉េ (Zimbabwe) ក្នុងរង្វង់ ២ សប្ដាហ៍មុននោះ។

ក្រៅពីនេះ យោងតាមបទបញ្ជាថ្មី អ្នកដំណើរពីប្រទេសទាំងអស់ក្នុងពិភពលោក (លើកលែងតែ អាម៉េរិក) ដែលមកកាន់ កាណាដា នឹងត្រូវធ្វើតេស្តរក កូវីដ-១៩ នៅពេលមកដល់។ នេះបើតាមរដ្ឋមន្ត្រីក្រសួងសុខាភិបាល Jean-Yves Duclos។

គិតមកដល់បច្ចុប្បន្ន នៅ កាណាដា មានខេត្តមួយចំនួនដូចជា Quebec, Ontario, Alberta និង British Columbia ជាដើម បានរាយការណ៍ថា មានករណីឆ្លងវីរុសកូវីដ-១៩ ប្រភេទ អូមីក្រុង (Omicron) ក្នុងសហគមន៍។

December 1, 2021

កម្ពុជា នឹងនាំយកជំនួយជាវ៉ាក់សាំង រថយន្តដឹកវ៉ាក់សាំង និងថវិកា ជូនដល់ ប្រទេសឡាវ នៅដើមខែធ្នូ ឆ្នាំ ២០២១

នៅថ្ងៃ ទី ៣ ខែធ្នូ ឆ្នាំ ២០២១ រដ្ឋមន្ត្រីក្រសួងសុខាភិបាល តំណាងឱ្យ កម្ពុជា នឹងនាំយកវ៉ាក់សាំងចំនួន ៥ សែនដូស និង រថយន្តដឹកវ៉ាក់សាំងចំនួន ៣ គ្រឿង ជូនរដ្ឋាភិបាល និងប្រជាជនឡាវ។

ការផ្ដល់ជំនួយខាងលើនេះ នឹងត្រូវបានធ្វើឡើងទៅតាមការសន្យារបស់ សម្តេចតេជោ ហ៊ុនសែន នៅក្នុងជំនួបពិភាក្សាទ្វេភាគី ជាមួយ ឯកឧត្តម នាយករដ្ឋមន្ត្រីឡាវ កាលពីថ្ងៃទី ២៩ ខែវិច្ឆិកា ឆ្នាំ ២០២។

ជាងនេះ រាជរដ្ឋាភិបាលកម្ពុជា ក៏ផ្តល់ជំនួយជាទឹកប្រាក់ចំនួន ១៣ លានដុល្លារអាមេរិក ផងដែរ ដល់រដ្ឋាភិបាលឡាវ ដើម្បីប្រើប្រាស់ក្នុងយុទ្ធនាការទប់ស្កាត់ជំងឺកូវីដ-១។ ក្នុងចំណោមខ្ទង់ប្រាក់ជំនួយ ១៣ លានដុល្លារនេះ មាន ៣ លានដុល្លារ ជាថវិការបស់ រាជរដ្ឋាភិបាលកម្ពុជា និង ១០ លានដុល្លារ ជាថវិការបស់សប្បុរសជន។

November 30, 2021

អ្នកជំនាញផ្នែកបញ្ញាសិប្បនិម្មិត វ័យ ៣៧ ឆ្នាំ ក្លាយជា CEO របស់ Twitter

Parag Agrawal គឺជាពលរដ្ឋអាម៉េរិក ដើមកំណើត ឥណ្ឌា និងជាអ្នកឯកទេសផ្នែកបច្ចេកវិទ្យាបញ្ញាសិប្បនិម្មិត នឹងចូលកាន់តំណែងនាយកប្រតិបត្តិជំនួសស្ថាបនិក Jack Dorsey។

លោក Agrawal កើតឆ្នាំ ១៩៨៤ នៅ ប្រទេសឥណ្ឌា និងបានចូលទៅរស់នៅក្នុងទឹកដីអាម៉េរិក ដូចទៅនឹងប្រធានក្រុមហ៊ុន Microsoft លោក Satya Nadella និង នាយកប្រតិបត្តិរបស់ Google លោក Sundar Pichai។ Agrawal ទទួលបានសញ្ញាបត្របរិញ្ញាពីវិទ្យាស្ថានបច្ចេកវិទ្យាឥណ្ឌា និងសញ្ញាបត្របណ្ឌិតផ្នែកវិទ្យាសាស្ត្រកុំព្យូទ័រពីសាកលវិទ្យាល័យ Stanford។

មុនពេលត្រូវបាន Dorsey ជ្រើសរើសឱ្យកាន់តំណែងនាយកប្រតិបត្តិរបស់ Twitter លោក Agrawal ពុំមែនជាមនុស្សល្បីឈ្មោះទេ សូម្បីតែចំពោះបុគ្គលិករបស់បណ្ដាញសង្គមនេះ។ លោក Agrawal បានធ្វើការនៅក្នុងក្រុមហ៊ុននេះអស់រយៈពេល ១០ ឆ្នាំមកហើយ ដោយធ្លាប់បានកាន់តំណែងខុសៗគ្នាជាច្រើន។ ស្ថាបនិក Dorsey និង Agrawal ក៏ជាមិត្តជិតស្និទ្ធនឹងគ្នា។

Agrawal ដែលមានជំនាញខាងប្រព័ន្ធ «Artificial Intelligence (AI)» ឬហៅថា «បញ្ញាសិប្បនិម្មិត» និង «Machine Learning (ML)» ឬហៅថា «ម៉ាស៊ីនសិក្សា» បានចូលបម្រើការនៅក្នុងក្រុមហ៊ុន Twitter កាលពីខែតុលា ២០១១ ហើយក្នុងរយៈពេលដ៏ខ្លី គាត់ត្រូវបានជ្រើសរើសជាវិស្វករឆ្នើមរបស់ក្រុមហ៊ុន។ ឆ្នាំ ២០១៧ លោកក្លាយជានាយកផ្នែកបច្ចេកវិទ្យារបស់ Twitter។

Agrawal គឺជាបុគ្គលទី ៤ ហើយ ដែលកាន់តំណែងនាយកប្រតិបត្តិរបស់ Twitter បន្ទាប់ពី Drsey, Evan Williams និង Dick Costolo។ លោកក៏ជាមេដឹកនាំក្រុមហ៊ុនបច្ចេកវិទ្យាធំដែលមានវ័យនៅក្មេងបំផុតនាបច្ចុប្បន្ន ពោលគឺស្មើនឹងវ័យរបស់នាយកប្រតិបត្តិនៃក្រុមហ៊ុន Meta (Facebook) លោក Mark Zuckerberg៕

November 30, 2021

ព្រោះតែមានឈ្មោះដូចកូវីដ-១៩ ប្រភេទ អូមីក្រុង ប្រាក់ឌីជីថលមួយប្រភេទ ឡើងថ្លៃខ្ពស់ជាងមុន ១០ ដង

រូបិយវត្ថុឌីជីថល អូមីក្រុង (Omicron) បានឡើងថ្លៃខ្ពស់ រហូតដល់ ៦៨៨ ដុល្លារ/រៀលអូមីក្រុង ដោយសារតែឈ្មោះរបស់វាដូចទៅនឹងឈ្មោះរបស់វីរុសកូវីដ-១៩ ប្រភេទ អូមីក្រុង (Omicron) ដែលជាវ៉ារ្យ៉ង់មួយកំពុងធ្វើឱ្យពិភពលោកមានការព្រួយបារម្ភខ្លាំង។

ប្រាក់ អូមីក្រុង ដើមឡើយមានមនុស្សតិចណាស់ដែលបានស្គាល់ និងមានអ្នកតាមដាននៅលើបណ្ដាញសង្គម Twitter ត្រឹមតែប្រហែល ១,០០០ នាក់ប៉ុណ្ណោះ ប៉ុន្តែ វាបានឡើងថ្លៃពី ៦៥ ដុល្លារ កាលពីពាក់កណ្ដាលសប្ដាហ៍មុន ឡើងដល់ ៦៨៨ ដុល្លារ/រៀលអូមីក្រុង កាលពីចុងសប្ដាហ៍កន្លង មុនពេលធ្លាក់ថ្លៃប៉ុន្មានសិបភាគរយ។

បច្ចុប្បន្ន ប្រាក់ឌីជីថល នេះ ត្រូវបានជួញដូរក្នុងរង្វង់តម្លៃ ៣៧១ ដុល្លារ/រៀលអូមីក្រុង។ វាពុំមានជាប់ទាក់ទងអ្វីទៅនឹងវីរុសកូវីដ-១៩ ប្រភេទបំប្លែងខ្លួនថ្មីដែលត្រូវបានអង្គការសុខភាពពិភពលោក (WHO) ដាក់ឈ្មោះថា អូមីក្រុង កាលពីថ្ងៃទី ២៦ វិច្ឆិកា នោះទេ ក្រៅតែពីឈ្មោះដូច្នេះ។

មកដល់ពេលនេះ គេមិនទាន់ដឹងច្បាស់ថា ប្រាក់អូមីក្រុង ត្រូវបានគេដាក់ឱ្យជួញដូរតាំងពីពេលណានៅឡើយ។ ទិន្នន័យស្ដីអំពីតម្លៃរបស់វានៅលើទំព័រ CoinGecko ក៏ទើបតែត្រូវបានគេប្រកាសចាប់ពីថ្ងៃទី ៨ វិច្ឆិកាប៉ុណ្ណោះ។ ក្រៅពីនេះ ក៏ពុំទាន់មានបុគ្គល ឬស្ថាប័នណាមួយចេញមុខតំណាងឱ្យប្រាក់ឌីជីថល អូមីក្រុង នេះនៅឡើយដែរ។

ប្រាក់ឌីជីថល (cryptocurrency) ជាច្រើន ត្រូវបានគេបង្កើតឡើង និងបានឡើងថ្លៃខ្លាំងក្នុងឆ្នាំ ២០២១ ដោយសារការភ្ជាប់ជាមួយនឹងព្រឹត្តិការណ៍លេចធ្លោក្នុងពិភពលោក ក៏ប៉ុន្តែ ក្រោយមកគឺជាការ «ផ្ទុះបែកប៉ោងប៉ោងតម្លៃ» នៅពេលកម្លាំងទាក់ទាញរបស់ពួកវាបានបាត់បង់បន្តិចម្ដង៕

November 30, 2021

Nissan វិនិយោគជិត ១៨ ពាន់លានដុល្លារ ទៅក្នុងវិស័យរថយន្តអគ្គិសនី

ក្រុមហ៊ុន Nissan Motor មានគម្រោងវិនិយោគទុន ២ លានលានយ៉េន (១៧.៦ ពាន់លានដុល្លារអាម៉េរិក) ក្នុងរយៈពេល ៥ ឆ្នាំខាងមុខ ដើម្បីជំរុញសកម្មភាពផលិតរថយន្តអគ្គិសនី។

ក្រុមហ៊ុនរថយន្តរបស់ ជប៉ុន Nissan កាលពីថ្ងៃទី ២៩ វិច្ឆិកា បានប្រកាសគម្រោង «Nissan Ambition 2030» ដែលបង្ហាញអំពីគោលដៅរយៈពេលវែង និងយុទ្ធសាស្ត្រវិនិយោគសម្រាប់ការអភិវឌ្ឍអាគុយ និងការផលិតរថយន្តអគ្គិសនី។

Nissan បានកំណត់គោលដៅលក់រថយន្តអគ្គិសនីឱ្យបានជាង ៥៥% នៅក្នុងទីផ្សារជប៉ុន និង ៤០% នៅ ប្រទេសចិន នៅឆ្នាំ ២០២។ នៅ សហរដ្ឋអាម៉េរិក រថយន្តអគ្គិសនីនឹងកាន់កាប់ទីផ្សារចំនួន ៤០% នៅឆ្នាំ ២០៣។ ដើម្បីសម្រេចបានគោលដៅនេះ ពួកគេនឹងវិនិយោគទុនចំនួន ២ លានលាន (២ ទ្រីលាន) យ៉េន (១៧.៦ ពាន់លានដុល្លារអាម៉េរិក) ក្នុង ៥ ឆ្នាំខាងមុខ ដើម្បីអាចបង្ហាញម៉ូដែលរថយន្តអគ្គិសនី និងរថយន្ត hybrid ថ្មីចំនួន ២៣ ម៉ូដែល ក្នុងនោះមានរថយន្តអគ្គិសនីចំនួន ១៥ ម៉ូដែល។

Nissan បាននាំមុខគេនៅក្នុងវិស័យរថយន្តអគ្គិសនី នៅពេលបានបង្ហាញម៉ូដែល Leaf កាលពីឆ្នាំ ២០១០ ប៉ុន្តែ មានតែ ២% ប៉ុណ្ណោះដែលជារថយន្តអគ្គិសនី ក្នុងចំណោមរថយន្តថ្មីដែលបានលក់ចេញក្នុងឆ្នាំសារពើពន្ធ គិតត្រឹមខែមីនា ២០២។ ក្រុមហ៊ុននេះ មានបំណងបង្កើនចំនួនរថយន្តអគ្គិសនីឱ្យបានដល់ពាក់កណ្ដាលនៃរថយន្តថ្មីសរុបដែលបានលក់ចេញ នៅក្នុងឆ្នាំ ២០២។

November 30, 2021

តុលាការរាំងខ្ទប់បទបញ្ជារបស់ប្រធានាធិបតីអាម៉េរិក ដែលតម្រូវឱ្យបុគ្គលិកពេទ្យ ទទួលការចាក់វ៉ាក់សាំងកូវីដ-១៩

ចៅក្រមមួយរូបបានរាំងខ្ទប់បទបញ្ជារបស់លោក ចូ បៃដិន ដែលតម្រូវឱ្យបុគ្គលិកសុខាភិបាលនៅក្នុងរដ្ឋចំនួន ១០ ទទួលការចាក់វ៉ាក់សាំងបង្ការជំងឺកូវីដ-១៩ បន្ទាប់ពីរដ្ឋទាំងនេះដាក់ពាក្យប្ដឹងអាជ្ញាធររបស់ប្រធានាធិបតី។

រដ្ឋ Missouri, Nebraska, Arkansas, Kansas, Iowa, Wyoming, Alaska, Nam Dakota, Dakota ខាងជើង និង រដ្ឋ New Hampshire កាលពីពាក់កណ្ដាលខែនេះ បានដាក់ពាក្យប្ដឹងរដ្ឋបាលលោក ចូ បៃដិន ឡើងតុលាការសហព័ន្ធ ដោយយល់ថា បទបញ្ជាដែលតម្រូវឱ្យបុគ្គលិកសុខាភិបាលទទួលការចាក់វ៉ាក់សាំងបង្ការជំងឺកូវីដ-១៩ គឺជារឿងរំលោភរដ្ឋធម្មនុញ្ញ។

ចៅក្រម Matthew Schelp នៃតុលាការសហព័ន្ធក្នុងខណ្ឌ Missouri ខាងកើត កាលពីថ្ងៃទី ២៩ វិច្ឆិកា បានប្រកាសទទួលយកសំណើតវ៉ា និងបានសម្រេចស្នើឱ្យរដ្ឋបាលរបស់លោក បៃដិន ដកបទបញ្ជារបស់ខ្លួន។

សេតវិមាន មិនទាន់មានការអធិប្បាយអ្វីទាក់ទងនឹងការរាំងខ្ទប់របស់តុលាការសហព័ន្ធចំពោះបទបញ្ជារបស់ប្រធានាធិបតី នៅឡើយ៕

November 30, 2021

កម្ពុជា រកឃើញអ្នកឆ្លងថ្មី ២២ នាក់ទៀត ខណៈករណីស្លាប់ថ្មី មានចំនួន ៥ នាក់

ក្នុងរយៈពេល ២៤ ម៉ោងនៃថ្ងៃទី ២៩ វិច្ឆិកា កម្ពុជា បានរកឃើញអ្នកឆ្លងថ្មី ចំនួន ២២ នាក់ទៀត ដែលតួលេខនេះខ្ពស់ជាងបន្តិច បើធៀបនឹង ២៥ ករណី កាលពី ២៤ ម៉ោងនៃថ្ងៃទី ២៨ វិច្ឆិកា។

គិតមកដល់ថ្ងៃទី ៣០ វិច្ឆិកា ២០២១ ស្ថិតិនៃករណីកូវីដ-១៩ សរុបនៅ កម្ពុជា រួមមាន៖

– អ្នកឆ្លងសរុប= ១២០,១៣៤ នាក់
– អ្នកជាសះស្បើយ= ១១៦,៥០៧ នាក់
– អ្នកស្លាប់= ២,៩៤០ នាក់

នៅទូទាំងពិភពលោក ករណីកូវីដ-១៩ មានដូចខាងក្រោម៖

-ឆ្លងថ្មី ៖ ២៥,៨១៨ នាក់
-ឆ្លងសរុប ៖ ២៦២,៤២៩,២៨៨ នាក់
-ស្លាប់សរុប ៖ ៥,២២៤,៨០៨ នាក់
-ជាសះស្បើយសរុប ៖ ២៣៦,៩៨៧,០៨៥ នាក់

November 30, 2021

អាជីវកម្ម ខារ៉ាអូខេ រង្គសាល និងឌីស្កូតែក នៅ ភ្នំពេញ អាចបើកដំណើរការឡើងវិញបានហើយ!

រដ្ឋបាលរាជធានីភ្នំពេញ អនុញ្ញាតឱ្យបើកដំណើរការឡើងវិញចំពោះអាជីវកម្ម ខារ៉ាអូខេ រង្គសាល និងឌីស្កូតែក នៅរាជធានីភ្នំពេញ ចាប់ពីថ្ងៃទី ៣០ ខែវិច្ឆិកា ឆ្នាំ២០២១ តទៅ តាមគន្លងប្រក្រតីភាពថ្មី។

ព័ត៌មានខាងលើនេះគឺយោងទៅតាមសេចក្ដីសម្រេចរបស់ រដ្ឋបាលរាជធានីភ្នំពេញ ដែលបានចុះថ្ងៃទី 30 វិច្ឆិកា ២០២។

ព័ត៌មានបន្ថែម សូមអានសេចក្ដីសម្រេចរបស់ រដ្ឋបាលរាជធានីភ្នំពេញ ខាងក្រោម៖

November 30, 2021

Author: សឿន សំណាង