សឿន សំណាង - La Reine Media

សហភាពអឺរ៉ុប គូសវាសគម្រោង «ច្រកទ្វារសកល» ដើម្បីទប់ទល់នឹងគម្រោង «ខ្សែក្រវាត់និងផ្លូវ» របស់ ចិនដីគោក

សហភាពអឺរ៉ុប ប្រកាសគម្រោងប្រមូលទុន ៣៤០ ពាន់លានដុល្លារអាម៉េរិក សម្រាប់ការវិនិយោគទៅក្នុងវិស័យហេដ្ឋារចនាសម្ព័ន្ធនៅពាសពេញពិភពលោក ក្នុងបំណងធ្វើឱ្យមានតុល្យភាពជាមួយនឹងគម្រោងខ្សែក្រវាត់និងផ្លូវ (Belt and Road Initiative / One Belt One Road / OBOR) របស់ ចិនដីគោក។

«Global Gateway (ច្រកទ្វារសកល) នឹងឆ្ពោះទៅរកការប្រមូលទុនវិនិយោគនានាដែលឡើងដល់ ៣០០ ពាន់លានអឺរ៉ូ (៣៤០ ពាន់លានដុល្លារអាម៉េរិក) សម្រាប់ដំណាក់កាលឆ្នាំ ២០២១-២០២៧ ដែលជាការប្រមូលផ្ដុំប្រភពធនធានរបស់សហភាពអឺរ៉ុប បណ្ដាប្រទេសជាសមាជិក ស្ថាប័នហិរញ្ញវត្ថុអឺរ៉ុប និងបណ្ដាស្ថាប័នហិរញ្ញវត្ថុរបស់បណ្ដាប្រទេស» ឯកសាររបស់គណៈកម្មការអឺរ៉ុប បានឱ្យដឹងដូច្នេះកាលពីថ្ងៃទី ១ ធ្នូ ២០២។

ក្នុងគម្រោងនេះ សហភាពអឺរ៉ុប មិនបាននិយាយដល់ «គម្រោងខ្សែក្រវាត់និងផ្លូវ» របស់ ប្រទេសចិន នោះទេ ប៉ុន្តែ ប្រធានគណៈកម្មការអឺរ៉ុប លោកស្រី លោកស្រី អួរស៊ូឡា វ៉ុនឌែរ ឡេយែន (Ursula von der Leyen) សង្កត់ធ្ងន់ថា គម្រោង «ច្រកទ្វារសកល» គឺជា «ទិសដៅវិនិយោគធំ ទៅក្នុងការអភិវឌ្ឍហេដ្ឋារចនាសម្ព័ន្ធនៅទូទាំងពិភពលោក» ដែលនេះ លោកស្រី ទំនងជាចង់និយាយថា «ច្រកទ្វារសកល» គឺជាគម្រោងសម្រាប់ធ្វើឱ្យមានតុល្យភាពជាមួយនឹង «គំនិតផ្ដួចផ្ដើម ខ្សែក្រវាត់និងផ្លូវ» របស់ ប្រទេសចិន។

ក្រៅពីការប្រមូលទុនសម្រាប់គម្រោង «ច្រកទ្វារសកល» ខាងលើ សហភាពអឺរ៉ុប ក៏មានផែនការចែករំលែកបច្ចេកវិទ្យា និងជំនាញរបស់ អឺរ៉ុប ដល់បណ្ដាប្រទេសកំពុងអភិវឌ្ឍផងដែរ។

ប្រទេសចិន កាលពីឆ្នាំ ២០១៣ បានចាប់ផ្ដើមយុទ្ធសាស្ត្រវិនិយោគទូទាំងសកលលោកដែលប្រទេសនេះឱ្យឈ្មោះថា «ខ្សែក្រវាត់និងផ្លូវ» ជាគម្រោងលំដាប់កំពូលរបស់ ប្រធានាធិបតីចិន លោក ស៊ី ជីនពីង។ ទីក្រុងប៉េកាំង ឱ្យដឹងថា ខ្លួនបានវិនិយោគ ១៣៩.៨ ពាន់លានដុល្លារអាម៉េរិក គិតត្រឹមឆ្នាំ ២០២០ ក្នុងនោះមាន ២២.៥ ពាន់លានដុល្លារត្រូវបានវិនិយោគសម្រាប់ឆ្នាំ ២០២០៕

December 2, 2021

អាម៉េរិក រកឃើញករណីឆ្លងកូវីដ-១៩ ប្រភេទ អូមីក្រុង (Omicron) ដំបូងបង្អស់នៅក្នុងប្រទេស

អ្នកជំងឺកូវីដ-១៩ ដែលផ្ទុកវីរុសប្រភេទ អូមីក្រុង (Omicron) ដំបូង ដែលត្រូវបានរកឃើញនៅ សហរដ្ឋអាម៉េរិក គឺជាអ្នកដំណើរត្រលប់មកពី អាហ្វ្រិកខាងត្បូង កាលពីថ្ងៃទី ២២ វិច្ឆិកា និងកំពុងធ្វើចត្តាឡីស័កដោយខ្លួនឯង។

មជ្ឈមណ្ឌលគ្រប់គ្រងនិងទប់ស្កាត់រោគរាតត្បាត (CDC) របស់ អាម៉េរិក នាថ្ងៃនេះ បានឱ្យដឹងថា ករណីឆ្លងវ៉ារ្យ៉ង់ អូមីក្រុង ដំបូងនៅប្រទេសនេះគឺជាពលរដ្ឋរបស់រដ្ឋ California ដែលបានត្រលប់មកពី ប្រទេសអាហ្វ្រិកខាងត្បូង កាលពីថ្ងៃទី ២២ វិច្ឆិកា ហើយមួយសប្ដាហ៍ក្រោយមកក៏បានធ្វើតេស្តរកឃើញថា វិជ្ជមាននឹងកូវីដ-១៩ ប្រភេទ អូមីក្រុង។

CDC របស់ អាម៉េរិក បានប្រកាសថា «អ្នកជំងឺនេះកំពុងធ្វើចត្តាឡីស័កដោយខ្លួនឯង មានអាការរោគស្រាល និងបានប្រសើរឡើងវិញហើយ។ ករណីប៉ះពាល់ផ្ទាល់ត្រូវបានស្រាវជ្រាវ ធ្វើតេស្ត និងទទួលបានលទ្ធផលអវិជ្ជមាន»។

អ្នកជំនាញផ្នែករោគឆ្លងរបស់ អាម៉េរិក លោក Anthony Fauci ឱ្យដឹងថា អ្នកជំងឺនេះបានទទួលការចាក់វ៉ាក់សាំងរួចរាល់ ប៉ុន្តែមិនទាន់បានចាក់ដូសជំរុញ។ លោកថា ត្រូវការពេលជាង ២ សប្ដាហ៍ ដើម្បីដឹងអំពីលទ្ធភាពនៃការឆ្លងរាលដាលរបស់ អូមីក្រុង ក៏ដូចជាកម្រិតនៃភាពធ្ងន់ធ្ងរ និងប្រសិទ្ធភាពរបស់វ៉ាក់សាំងចំពោះវ៉ារ្យ៉ង់នេះ។

អូមីក្រុង បានបង្ហាញវត្តមានដំបូងនៅ ប្រទេសប៊ុតស្វាណា (Botswana) កាលពីថ្ងៃទី ១១ វិច្ឆិកា ហើយក្រោយមកត្រូវបាន ប្រទេសអាហ្វ្រិកខាងត្បូង រកឃើញ និងប្រកាសជាសាធារណៈ នៅពេលករណីឆ្លងនៅប្រទេសនេះកើនឡើងយ៉ាងឆាប់រហ័ស។ អង្គការសុខភាពពិភពលោក (WHO) កាលពីថ្ងៃទី ២៦ វិច្ឆិកា បានចាត់ អូមីក្រុង ចូលទៅក្នុងក្រុមវ៉ារ្យ៉ង់ដែលគួរឱ្យព្រួយបារម្ភ។

គិតមកដល់បច្ចុប្បន្ន ប្រទេសជាង ២០ ហើយ ដែលបានរកឃើញវ៉ារ្យ៉ង់ថ្មីនេះ ក្នុងនោះក៏មានទាំងបណ្ដាប្រទេសនៅ ទ្វីបអឺរ៉ុប និងអាស៊ី ផងដែរ៕

December 2, 2021

ពលរដ្ឋនៅ សហរដ្ឋអាម៉េរិក នាំគ្នាសម្រុកលាឈប់ពីការងារ ដើម្បីបើកមុខរបរផ្ទាល់ខ្លួន

កូវីដ-១៩ បានធ្វើឱ្យស្មារតីម្ចាស់ការក្នុងការរកប្រាក់ កើនឡើងខ្ពស់បំផុតមិនធ្លាប់មានពីមុនមក នៅពេលមនុស្សរាប់លាននាក់ បានបោះបង់ការងារដើម្បីបើកមុខរបរ ឬ ក្រុមហ៊ុនថ្មីផ្ទាល់ខ្លួន ឬធ្វើការដោយសេរី។

ពលរដ្ឋអាម៉េរិក កាន់តែច្រើនឡើងៗ បាន និងកំពុងស្វែងរកភាពបត់បែនក្នុងការងារ ព្រោះតែខ្លាចរអាក្នុងការប្រឈមនឹងហានិភ័យត្រូវប៉ះពាល់អ្នកជំងឺកូវីដ-១៩ ការពិបាកទ្រាំជាមួយនឹងការតម្រូវឱ្យចាក់វ៉ាក់សាំង ឬគ្រាន់តែជាការធុញនឹងការងារនៅក្នុងការិយាល័យ។ ជាលទ្ធផល ស្ថានភាពខ្វះកម្លាំងពលកម្មក្នុងវិស័យមួយចំនួនកាន់តែធ្ងន់ធ្ងរ។ ក្រុមហ៊ុននានាកំពុងប្រឈមមុខនឹងសម្ពាធ «ត្រូវកែសម្រួលគោលការណ៍» ដើម្បីអាចជ្រើសរើសបានបុគ្គលិក។

ក្រសួងការងាររបស់ សហរដ្ឋអាម៉េរិក បានឱ្យដឹងថា តួលេខនៃកម្លាំងពលកម្មសេរី បានកើន ៥ សែននាក់ ចាប់ពីកូវីដ-១៩ បានបង្ហាញវត្តមាន នាំឱ្យតួលេខសរុបកើនឡើងដល់ ៩.៤៤ លាននាក់។ នេះគឺជាតួលេខខ្ពស់បំផុតរាប់ចាប់ពីវិបត្តិហិរញ្ញវត្ថុឆ្នាំ ២០០។ តួលេខសរុបនៃអ្នកដែលធ្វើជំនួញដោយខ្លួនឯង កើន ៦% ខណៈដែលការងារសរុប និយាយរួម នៅតែទាបជាងជិត ៣% ធៀបនឹងដំណាក់កាលមុនវិបត្តិសុខភាព។

អ្នកស្រី Kimberly Friddle កំពុងធ្វើការនៅឯផ្ទះ ជាមួយកូនស្រីច្បង Samantha

យោងតាមទិន្នន័យរបស់ការិយាល័យជំរឿនរបស់ សហរដ្ឋអាមេរិក គិតចាប់ពីខែមករា ដល់ខែតុលា ឆ្នាំនេះ មានក្រុមហ៊ុនថ្មីចំនួន ៤.៥៤ លានត្រូវបានបង្កើតឡើង កើន ៥៦% ធៀបនឹងដំណាក់កាលដូចគ្នាក្នុងឆ្នាំ ២០១។ នេះក៏ជាតួលេខខ្ពស់បំផុតរាប់ចាប់ពីឆ្នាំ ២០០។ ២/៣ នៃតួលេខនេះគឺជាក្រុមហ៊ុនដែលមិនមានគម្រោងជ្រើសរើសបុគ្គលិក។

ឆ្នាំនេះ អត្រាកម្លាំងពលកម្មអាម៉េរិក ដែលធ្វើការឱ្យក្រុមហ៊ុនមួយដែលមានបុគ្គលិកយ៉ាងតិច ១,០០០ នាក់ បានថយចុះជាលើកដំបូងរាប់ពីឆ្នាំ ២០០៤ នេះបើតាមទិន្នន័យរបស់ ក្រសួងការងារ។ ចំណែកអត្រានៃអ្នកធ្វើជំនួញដោយខ្លួនឯងបានឡើងដល់ចំណុចខ្ពស់បំផុតក្នុងអំឡុង ១១ ឆ្នាំមកនេះ។ កាលពីខែតុលា ២០២១ ក្រុមនេះមានត្រឹមតែ ៥.៩% ប៉ុណ្ណោះនៅក្នុងចំណោមកម្លាំងពលកម្មសរុបនៅ អាម៉េរិក ពោលគឺខ្ពស់ជាងបើធៀបនឹង ៥.៤% កាលពីខែកុម្ភៈ ២០២។

ការកើនឡើងនៃចំនួនអ្នកធ្វើជំនួញដោយខ្លួនឯង កើតឡើងទន្ទឹមគ្នានឹងការកើនឡើងនៃតួលេខអ្នកបោះបង់ការងារនៅ សហរដ្ឋអាម៉េរិក។ ក្នុងខែកញ្ញា ទីផ្សារការងារនៅ អាម៉េរិក បានកត់ត្រានូវចំនួនអ្នកបោះបង់ការងារខ្ពស់បំផុត ពោលគឺ ៤.៤ លាននាក់៕

December 1, 2021

សូរ្យគ្រាសទាំងស្រុងតែមួយគត់ក្នុងឆ្នាំ ២០២១ ជិតកើតឡើងហើយ

ទីភ្នាក់ងារអវកាសអាម៉េរិក (NASA) បានឱ្យដឹងថា សូរ្យគ្រាសទាំងស្រុងតែមួយគត់ក្នុងឆ្នាំនេះនឹងកើតឡើងនៅក្នុងថ្ងៃទី ៤ ធ្នូ ប៉ុន្តែ គួរឱ្យស្ដាយ បាតុភូតនេះអាចត្រូវបានមើលឃើញតែនៅក្នុងតំបន់ប៉ូលខាងត្បូងប៉ុណ្ណោះ។

បាតុភូតសូរ្យគ្រាសនេះនឹងឡើងដល់ចំណុចកំពូលនៅវេលាម៉ោងប្រហែល ១៤៖៣៣ នាទី ថ្ងៃទី ៤ ធ្នូ (ម៉ោងនៅភ្នំពេញ) សម្រាប់អ្នករស់នៅក្បែរជាយផ្ទាំងទឹកកក Ronne នៅប៉ូលខាងត្បូង។ ប្រជាជនក្នុងតំបន់ខ្លះនៅប៉ូលខាងត្បូង អាចតាមដានព្រឹត្តិការណ៍សូរ្យគ្រាសមួយចំហៀង។

ព្រឹត្តិការណ៍សូរ្យគ្រាសទាំងស្រុងបន្ទាប់នឹងកើតឡើងនៅថ្ងៃទី ៨ មេសា ២០២៤ និងអាចមើលឃើញពីតំបន់ជាច្រើននៅ កាណាដា ម៉ិកស៊ិក និង សហរដ្ឋអាម៉េរិក។

អ្នករស់នៅក្បែរជាយផ្ទាំងទឹកកក Ronne នៅប៉ូលខាងត្បូង ទើបអាចមើលឃើញបាតុភូតនេះ

បាតុភូតសូរ្យគ្រាសកើតឡើងនៅពេល ព្រះចន្ទគោចរដល់ចន្លោះផែនដី និងព្រះអាទិត្យ ពេលនោះ ស្រមោលរបស់ព្រះចន្ទគ្របដណ្ដើបលើផែនដី។ ក្នុងបាតុភូតសូរ្យគ្រាសទាំងស្រុង ទាំងផែនដី ព្រះចន្ទ និងព្រះអាទិត្យ ត្រូវតែស្ថិតនៅលើបន្ទាត់ត្រង់។ ព្រះអាទិត្យត្រូវបានបាំងដោយព្រះចន្ទ នៅពេលគេមើលពីផែនដី៕

December 1, 2021

អតីតនាយករដ្ឋមន្ត្រីជប៉ុន៖ អាម៉េរិក និង ជប៉ុន នឹង «ធ្វើសកម្មភាព» បើសិន ចិន វាយប្រហារ តៃវ៉ាន់

អតីតនាយករដ្ឋមន្ត្រីជប៉ុន លោក Abe អះអាងថា សម្ព័ន្ធមិត្ត ជប៉ុន-អាម៉េរិក មិនអាចឱបដៃឈរមើលនោះឡើយ បើសិនជា ចិនដីគោក វាយប្រហារ ចិនតៃវ៉ាន់។

«ស្ថានការណ៍អាសន្ននៅ តៃវ៉ាន់ គឺជាស្ថានការណ៍អាសន្នរបស់ ជប៉ុន ដូច្នេះ វាក៏ជាស្ថានការណ៍អាសន្នចំពោះសម្ព័ន្ធភាព ជប៉ុន-អាម៉េរិក។ ប្រជាជននៅ ទីក្រុងប៉េកាំង ពិសេសគឺប្រធានាធិបតី ស៊ី ជីនពីង មិនត្រូវយល់ខុសអំពីប្រការនេះ» លោក Shinzo Abe អតីតនាយករដ្ឋមន្ត្រីជប៉ុន ថ្លែងដូច្នេះនៅក្នុងវេទិកាតាមប្រព័ន្ធវីដេអូ ដែលត្រូវបានរៀបចំឡើងដោយវិទ្យាស្ថានស្រាវជ្រាវគោលនយោបាយតៃវ៉ាន់ នាថ្ងៃនេះ។

លោក Abe ថ្លែងថា ប្រជុំកោះ Senkaku ដែល ចិន ហៅថា Diaoyu និងកោះនានាដូចជា Sakishima, Yonaguni របស់ ជប៉ុន មានចម្ងាយពី កោះតៃវ៉ាន់ ត្រឹមតែ ១០០ គីឡូម៉ែត្រប៉ុណ្ណោះ។ ការវាយប្រហារប្រដាប់អាវុធមួយសំដៅលើ កោះតៃវ៉ាន់ នឹងជាការគំរាមកំហែងដ៏ធំសម្រាប់ ជប៉ុន។

លោក Abe បានលាលែងពីតំណែងនាយករដ្ឋមន្ត្រីកាលពីឆ្នាំមុន ប៉ុន្តែ លោកនៅតែមានឥទ្ធិពលខ្លាំងនៅក្នុងបក្សប្រជាធិបតេយ្យសេរី ដែលកំពុងកាន់អំណាច។

ផែនទីបង្ហាញពីទឹកដីរបស់ កោះតៃវ៉ាន់ ប្រទេសចិន និង ជប៉ុន

លោក Abe បញ្ជាក់ថា «តៃវ៉ាន់ ដែលមានកម្លាំងខ្លាំងក្លាជាង រីកចម្រើន និងធានាសេរីភាព សិទ្ធិមនុស្ស ក៏ជាផលប្រយោជន៍របស់ ជប៉ុន។ ពិតណាស់ ប្រការនេះក៏ជាផលប្រយោជន៍របស់ពិភពលោកទាំងមូល»។

ទីក្រុងប៉េកាំង តែងតែចាត់ទុក កោះតៃវ៉ាន់ ជាខេត្តមួយរបស់ខ្លួនដែលរង់ចាំតែការបង្រួបបង្រួមប៉ុណ្ណោះ ហើយថា ចិន ត្រៀមខ្លួនជាស្រេចក្នុងការដណ្ដើមយក កោះតៃវ៉ាន់ ត្រលប់មកវិញ បើទោះជាត្រូវប្រើកម្លាំងបាយ។

ចំណែក អាម៉េរិក វិញ មិនមានទំនាក់ទំនងផ្លូវការជាមួយ កោះតៃវ៉ាន់ ប៉ុន្តែជាអ្នកផ្គត់ផ្គង់អាវុធដល់កោះនេះ។ កាលពីខែមុន រដ្ឋមន្ត្រីការបរទេសអាម៉េរិក Antony Blinken ថ្លែងថា អាម៉េរិក និងសម្ព័ន្ធមិត្ត នឹង «ធ្វើសកម្មភាព» បើសិន ចិនដីគោក ប្រើអាវុធដើម្បីប្ដូរផ្លាស់ស្ថានការណ៍នៅលើ កោះតៃវ៉ាន់៕

December 1, 2021

ប្រធានាធិបតីរុស្ស៊ី និយាយថា អាវុធល្បឿនលឿនជាងសំឡេងរបស់ សហរដ្ឋអាម៉េរិក ខ្លាំងជាង ចិន

លោក Putin យល់ថា សហរដ្ឋអាម៉េរិក កំពុងដើរមុន ចិន មួយជំហាន ទាក់ទងនឹងអាវុធល្បឿនលឿនជាងសំឡេង បើទោះជាមិនបានប្រកាសជាសាធារណៈអំពីបញ្ហានេះ។

«យើងបានមើលឃើញប្រតិកម្មរបស់ អាម៉េរិក ចំពោះការសាកល្បងអាវុធល្បឿនលឿនជាងសំឡេងរបស់ ចិន កាលពីពេលថ្មីៗនេះ» ប្រធានាធិបតីរុស្ស៊ី លោក Putin ថ្លែងដូច្នេះនៅក្នុងវេទិកាវិនិយោគ VTB Capital ដែលមានឈ្មោះថា «ប្រទេសរុស្ស៊ីហៅ ឬ Russia Calling» កាលពីថ្ងៃទី ៣០ វិច្ឆិកា។ «ប៉ុន្តែ ខ្ញុំដឹងថា អាម៉េរិក បានដើរមុនបន្តិចក្នុងការអភិវឌ្ឍអាវុធល្បឿនលឿនជាងសំឡេង។ ពួកគេគ្រាន់តែមិននិយាយអំពីកិច្ចការនោះ និងមិនមានអ្នកណាបង្កការភ្ញាក់ផ្អើលអំពីវា»។

ការថ្លែងរបស់លោក Putin ត្រូវបានធ្វើឡើង មួយខែក្រោយពី ចិន ត្រូវបានគេសង្ស័យថា បានសាកល្បងរ៉ុក្កែតល្បឿនលឿនជាងសំឡេងដែលមានសមត្ថភាពហោះហើរជុំវិញពិភពលោក។ សារព័ត៌មានរបស់ អាម៉េរិក ដកស្រង់សម្ដីរបស់មន្ត្រីមួយចំនួន ឱ្យដឹងថា ពួកគេ «ភ្ញាក់ផ្អើល» ចំពោះការរីកចម្រើននេះរបស់ ចិន។

មេបញ្ជាការរងនៃកងទ័ពអវកាសអាម៉េរិក លោក David Thompson កាលពីថ្ងៃទី ២០ វិច្ឆិកា យល់ថា សមត្ថភាពនៃអាវុធល្បឿនលឿនជាងសំឡេងរបស់ សហរដ្ឋអាម៉េរិក «មិនទាន់សម័យ» ដូចកម្មវិធីដែលអភិវឌ្ឍដោយ រុស្ស៊ី និង ចិន ព្រមទាំងបានព្រមានថា ទីក្រុងវ៉ាស៊ីងតោន កំពុងតែអន់ថយជាងគូបដិបក្ខនានាក្នុងការរត់ប្រណាំងអាវុធទំនើប។

រ៉ុក្កែងល្បឿនលឿនជាងសំឡេងរបស់ អាម៉េរិក ដែលត្រូវបានបាញ់សាកល្បងនៅ Hawaii កាលពីខែមីនា ឆ្នាំ ២០២០

ប្រទេសរុស្ស៊ី កាលពីថ្ងៃទី ១៨ វិច្ឆិកា ក៏បានសាកល្បងរ៉ុក្កែតល្បឿនលឿនជាងសំឡេង Zircon ដែលបាញ់ចេញពីនាវាអមការពារ Gorshkov ផងដែរ។ ចំណែកការសាកល្បងអាវុធល្បឿនលឿនជាងសំឡេងរបស់ សហរដ្ឋអាម៉េរិក ក្នុងខែតុលា សុទ្ធតែត្រូវបានគេយល់ថា បានបរាជ័យ។

លោក Putin សង្កត់ធ្ងន់ថា រុស្ស៊ី ផ្ដល់តម្លៃខ្ពស់ដល់កិច្ចសន្ទនាជាមួយ អាម៉េរិក និង ចិន។ «យើងគិតដល់កិច្ចការការពារសន្តិសុខជាតិ និងសហប្រតិបត្តិការជាមួយដៃគូនានាទៅតាមទិសដៅសំខាន់របស់ប្រទេសជាតិ។ ឧទាហរណ៍មួយ នោះគឺ ត្រូវការសន្ទនាស្ដីអំពីស្ថិរភាពយុទ្ធសាស្ត្រជាមួយ អាម៉េរិក និង ចិន» លោក Putin ថ្លែងដូច្នេះ។

ទាក់ទងនឹងការថ្លែងរបស់ប្រធានាធិបតីរុស្ស៊ី ភាគីប្រទសចិន និង សហរដ្ឋអាម៉េរិក មិនទាន់បញ្ចេញប្រតិកម្មអ្វីនៅឡើយ៕

December 1, 2021

កម្ពុជា រៀបចំការប្រកួតដណ្ដើមពានរង្វាន់ជើងឯកកីឡាទាញព្រ័ត្រ ថ្នាក់ជាតិ ឆ្នាំ ២០២១

ការប្រកួត ជ្រើសរើសជើងឯកថ្នាក់ជាតិ ឆ្នាំ ២០២១ ដែលនឹងប្រព្រឹត្តទៅរយៈពេលពីរថ្ងៃ ចាប់ពីថ្ងៃទី ៥ ដល់ថ្ងៃទី ៦ ខែធ្នូ ឆ្នាំ ២០២១ នឹងត្រូវបានធ្វើឡើងនៅសាលាគរុកោសល្យ និងវិក្រិតការខេត្តកណ្តាល។

សហព័ន្ធកីឡាទាញព្រ័ត្រកម្ពុជា បានឱ្យដឹងថា កីឡាករដែលចូលរួមការប្រកួតកីឡាទាញព្រ័ត្រដណ្ដើមជើងឯកថ្នាក់ជាតិប្រចាំឆ្នាំ ២០២១ នេះ នឹងត្រូវប្រកួត ២ វិញ្ញាសា រួមមាន វិញ្ញាសាប្រកួតផ្នែកបុរស ៤ នាក់ទល់នឹង ៤ នាក់ លើទម្ងន់ ៣០០ គីឡូក្រាម និងវិញ្ញាសាប្រកួតនារី ៤ នាក់ទល់នឹង ៤ នាក់ លើទម្ងន់ ២៥០ គីឡូក្រាម។

ការប្រកួតនេះក្នុងបំណងជ្រើសរើសក្រុមជើងឯក ដាក់បញ្ជូលក្នុងក្រុមជម្រើសជាតិ សម្រាប់ការប្រកួតនៅ ស៊ីហ្គេម លើកទី ៣២ ក្នុងឆ្នាំ ២០២៣ ដែល កម្ពុជា នឹងធ្វើជាម្ចាស់ផ្ទះលើកដំបូង។ នេះបើតាម កញ្ញា មាស តឿ មន្ត្រីសហព័ន្ធកីឡាទាញព្រ័ត្រ របស់ កម្ពុជា។

រាល់ការចំណាយលើការស្នាក់នៅ ហូបចុក និងថ្លៃធ្វើដំណើរ គឺជាបន្ទុករបស់ក្លិបនីមួយៗ នៅតាមក្រសួង ស្ថាប័ន ឬរាជធានី-ខេត្ត ដែលបានចុះឈ្មោះចូលរួម៕

December 1, 2021

កូវីដ-១៩! ករណីឆ្លងថ្មីនៅ កម្ពុជា កើនឡើងបន្តិច ធៀបនឹងថ្ងៃម្សិលមិញ (៣០ វិច្ឆិកា)

ក្នុងរយៈពេល ២៤ ម៉ោងនៃថ្ងៃទី ៣០ វិច្ឆិកា ២០២១ កម្ពុជា បានរកឃើញករណីឆ្លងថ្មីចំនួន ២៦ នាក់ ខណៈករណីស្លាប់ថ្មី មានចំនួន ៤ នាក់។

នៅទូទាំងពិភពលោក ករណីកូវីដ-១៩ មានដូចខាងក្រោម៖

-ឆ្លងថ្មី ៖ ៣៣,៣០១ នាក់
-ឆ្លងសរុប ៖ ២៦៣,០៥៧,០៨៥ នាក់
-ស្លាប់សរុប ៖ ៥,២៣៣,៣៣៦ នាក់
-ជាសះស្បើយសរុប ៖ ២៣៧,៥៤០,០៧៥ នាក់

December 1, 2021

ក្រសួងទេសចរណ៍ ណែនាំឱ្យអាជីវកម្មនានា អនុវត្តន៍វិធានស្ដង់ដាការពារជំងឺកូវីដ-១៩ ពេលបើកដំណើរការឡើងវិញ

ក្រសួងទេសចរណ៍បានក្រើនរំលឹកដល់អាជីវកម្មមួយចំនួន រួមមាន ខារ៉ាអូខេ ក្លឹបកម្សាន្ត រង្គសាល ឌីស្កូតែក និងម៉ាស្សា អនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) តាមគន្លងប្រក្រតីភាពថ្មី ឱ្យបានត្រឹមត្រូវតាម។

ការក្រើនរំលឹកនេះ ត្រូវបានធ្វើឡើងបន្ទាប់ពីអាជីវកម្ម ខារ៉ាអូខេ ក្លឹបកម្សាន្ត រង្គសាល ឌីស្កូតែក និងម៉ាស្សា ត្រូវបាន រាជរដ្ឋាភិបាល បានអនុញ្ញាតឱ្យបើកឡើងវិញចាប់ពីថ្ងៃទី ៣០ ខែវិច្ឆិកា។

ទន្ទឹមនឹងនេះ ក្រសួងទេសចរណ៍ក៏បានណែនាំឱ្យ រដ្ឋបាលរាជធានី-ខេត្ត ធ្វើការពិនិត្យវាយតម្លៃលក្ខណៈសម្បត្តិរបស់អាជីវទាំងនេះ មុននឹងអនុញ្ញាតឱ្យបើកឡើងវិញ។

December 1, 2021

កម្ពុជា និងឡាវ បានឯកភាពគ្នាលើចំណុចជាច្រើននៅក្នុងវិស័យនានាដែលត្រូវបានលើកយកមកពិភាក្សាក្នុងជំនួបកំពូលរវាងមេដឹកនាំប្រទេសទាំងពីរ

សម្តេចតេជោ ហ៊ុន សែន និង នាយករដ្ឋមន្ត្រី ផនខាំ វីផាវ៉ាន់ បានជួបពិភាក្សាគ្នាស៊ីជម្រៅ លើវិស័យនយោបាយ ការពារជាតិ និងសន្តិសុខ ពាណិជ្ជកម្ម និងការវិនិយោគ ការតភ្ជាប់តាមផ្លូវគោក និងអាកាស ថាមពល ទេសចរណ៍ ការអប់រំ និងការប្រយុទ្ធប្រឆាំងនឹងជំងឺកូវីដ-១។

ជំនួបនេះត្រូវបានធ្វើឡើងនៅក្នុងដំណើរទស្សនកិច្ចមកកាន់ កម្ពុជា ចាប់ពីថ្ងៃទី ២៩-៣០ វិច្ឆិកា របស់ នាយករដ្ឋមន្ត្រីឡាវ ផនខាំ វីផាវ៉ាន់ (Phankham Viphavanh) តបតាមការអញ្ជើញរបស់ សម្តេច ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា។

នាយករដ្ឋមន្ត្រីទាំងពីរ បានឯកភាពគ្នា ជំរុញកិច្ចសហប្រតិបត្តិការលើវិស័យមួយចំនួន ព្រមទាំងពង្រឹងទំនាក់ទំនងមិត្តភាពជាប្រពៃណីរវាងកម្ពុជា និងឡាវ។ ភាគីទាំងពីរ ក៏បានឯកភាពគ្នាលើចំណុចជាច្រើនផងដែរ។

សេចក្ដីលម្អិត សូមអានសេចក្ដីប្រកាសព័ត៌មានស្ដីពីលទ្ធផលនៃទស្សនកិច្ចផ្លូវការរបស់ នាយករដ្ឋមន្ត្រី នៃ សាធារណរដ្ឋប្រជាធិបតេយ្យប្រជាមានិតឡាវ នៅ កម្ពុជា ដូចខាងក្រោម៖

December 1, 2021

Author: សឿន សំណាង