សឿន សំណាង - La Reine Media

សហស្ថាបនិករបស់ Grab ក្លាយជាមហាសេដ្ឋីបានតែប៉ុន្មានម៉ោងគត់ កោយមកក៏ធ្លាក់មកជាសេដ្ឋីវិញ

Anthony Tan មានពេលមួយនោះ កាន់កាប់ទ្រព្យជាង ១,០០០ លានដុល្លារអាម៉េរិក ក៏ប៉ុន្តែ ក្រោយការជួញដូរភាគហ៊ុនចុងក្រោយនៃថ្ងៃដដែល ទ្រព្យរបស់គាត់នៅសល់តែ ៧២៥ លានដុល្លារប៉ុណ្ណោះ ដោយសារតែភាគហ៊ុន Grab ធ្លាក់ថ្លៃ។

«ភាគហ៊ុននឹងតែងតែឡើងថ្លៃ និងធ្លាក់ថ្លៃ» Anthony Tan សហស្ថាបនិករបស់ក្រុមហ៊ុន Grab Holdings ថ្លែងដូច្នេះនៅ សិង្ហបុរី កាលពីថ្ងៃទី ២ ធ្នូ ២០២។ ភាគហ៊ុន Grab កាលពីម្សិលមិញ ត្រូវបានដាក់ឱ្យជួញដូរដំបូងនៅលើផ្សារមូលបត្រ Nasdaq (សហរដ្ឋអាម៉េរិក) បន្ទាប់ពីបានច្របាច់បញ្ចូលគ្នាជាមួយ SPAC (ក្រុមហ៊ុនដែលត្រូវបានបង្កើតឡើងក្នុងគោលដៅពិសេស) មួយ ដែលគាំទ្រដោយ Altimeter Capital កាលពីខែសីហា។

ភាគហ៊ុន Grab កើនឡើងខ្ពស់នៅមុនការជួញដូរ ប៉ុន្តែនៅពេលផ្សារហ៊ុនបើកទ្វារ វាបែរជាធ្លាក់ចុះ ហើយពេលបញ្ចប់ការជួញដូរ វាបាត់បង់ជាង ២១%។ បញ្ហានេះធ្វើឱ្យមូលធនទីផ្សាររបស់ក្រុមហ៊ុន ត្រូវបាត់បង់ ១៧,០០០ លានដុល្លារ។ ចំណែកទ្រព្យរបស់លោក Anthony Tan វិញ មានពេលខ្លះកើនឡើងដល់ជាង ១,០០០ លានដុល្លារ ប៉ុន្តែពេលចប់ការជួញដូរក្នុងថ្ងៃដដែល នៅសល់តែ ៧២៥ លានដុល្លារប៉ុណ្ណោះ នេះបើតាមសារព័ត៌មាន Bloomberg Billionaires Index។

លោក Anthony Tan បច្ចុប្បន្នកាន់កាប់ភាគហ៊ុនត្រឹមតែ ២.២% ប៉ុន្តែ មានសិទ្ធិបោះឆ្នោតប្រហាក់ប្រហែលនឹង ៦០.៤%។

បើទោះជាតម្លៃភាគហ៊ុនធ្លាក់ចុះ ក្រុមមេដឹកនាំសំខាន់ៗផ្សេងទៀតរបស់ Grab នៅតែកាន់កាប់ទ្រព្យច្រើនគួរឱ្យកត់សម្គាល់។ សហស្ថាបនិក Hooi Ling Tan និងប្រធាន Ming Maa បច្ចុប្បន្នមានទ្រព្យ ២២៤ លានដុល្លារ និង ១២៦ លានដុល្លារ។ ក្រុមហ៊ុនជប៉ុន SoftBank បានវិនិយោគ ៣,០០០ លានដុល្លារទៅលើ Grab កាលពីឆ្នាំ ២០១។ ភាគហ៊ុនរបស់ SoftBank នៅក្នុង Grab បច្ចុប្បន្នមានតម្លៃ ៦.១ ពាន់លានដុល្លារអាម៉េរិក។

Grab មិនទាន់មានប្រាក់ចំណេញ ប៉ុន្តែ អ្នកវិនិយោគនៅតែទទួលយកកិច្ចព្រមព្រៀងច្របាច់បញ្ចូលគ្នាជាមួយក្រុមហ៊ុនដទៃ។ យោងតាមកិច្ចព្រមព្រៀង Grab ទទួលបាន ៤.៥ ពាន់លានដុល្លារពីការទិញដូរក្រុមហ៊ុននេះ។

ឆ្នាំនេះ Grab មានការប្រែប្រួលច្រើន។ ការច្របាច់បញ្ចូលគ្នាជាមួយនឹងក្រុមហ៊ុន Altimeter ក៏ត្រូវបានពន្យារពេលយូរ។

December 3, 2021

គម្រោង «ច្រកទ្វារសកល» តម្លៃ ៣៤០ ពាន់លានដុល្លារ របស់ EU ដែលប្រជែងនឹងគម្រោង «ខ្សែក្រវាត់និងផ្លូវ» របស់ ចិន នឹងផ្ដោតទៅលើវិស័យណាខ្លះ?

«ច្រកទ្វារសកល (Global Gateway)» ដែលជាគម្រោងខ្នាតយក្សរបស់ សហភាពអឺរ៉ុប (EU) ត្រូវបានបង្កើតឡើងដើម្បីប្រកួតប្រជែងនឹងគម្រោង «ខ្សែក្រវាត់និងផ្លូវ (BRI)» របស់ ចិន មានគោលដៅអភិវឌ្ឍវិស័យជាច្រើននៅទូទាំងសកលលោក ក្នុងនោះក៏មានបច្ចេកវិទ្យាឌីជីថល ផងដែរ។

គម្រោងហេដ្ឋារចនាសម្ព័ន្ធ «ច្រកទ្វារសកល» របស់ សហភាពអឺរ៉ុប ដែលមានគោលដៅប្រមូលទុន ៣០០ ពាន់លានអឺរ៉ូ (៣៤០ ពាន់លានដុល្លារអាម៉េរិក) ពីថវិកាសាធារណៈ និងឯកជន ក្នុងដំណាក់កាលពីឆ្នាំ ២០២១ ដល់ ២០២៧ គឺផែនការសាងសង់ហេដ្ឋារចនាសម្ព័ន្ធទំនើបនៅខាងក្រៅទឹកដីរបស់ EU ក្នុងទិសដៅអភិវឌ្ឍវិស័យជាច្រើនដូចជា បច្ចេកវិទ្យាឌីជីថល ចរាចរណ៍ ថាមពលស្អាត ប្រព័ន្ធសុខាភិបាល អប់រំ និងស្រាវជ្រាវ។

អំពីបច្ចេកវិទ្យាឌីជីថល សហភាពអឺរ៉ុប នឹងវិនិយោគទៅលើប្រព័ន្ធខ្សែកាបអុបទិករវាងបណ្ដាប្រទេស ប្រព័ន្ធផ្កាយរណប ហេដ្ឋារចនាសម្ព័ន្ធពពក (Cloud infrastructure) ដើម្បីបង្កលក្ខណៈងាយស្រួលដល់កិច្ចសហប្រតិបត្តិការជាសកល ការចែករំលែកទិន្នន័យ និងការអភិវឌ្ឍបញ្ញាសិប្បនិម្មិត។ គម្រោងនេះនឹងផ្ដោតសំខាន់ទៅលើ តំបន់អាម៉េរិកឡាទីន។

ចំណែកវិស័យថាមពលស្អាត EU នឹងបំពាក់ប្រព័ន្ធថាមពលនានា ដែលប្ដូរទៅរកថាមពលកកើតឡើងវិញ និងសហការជាមួយបណ្ដាប្រទេសដើម្បីជំរុញការផលិតអ៊ីដ្រូសែនកកើតឡើងវិញ។ គម្រោងនេះផ្ដោតសំខាន់ជាងគេទៅលើ តំបន់អាហ្វ្រិក។

ចំពោះវិស័យចរាចរណ៍ ដែលត្រូវបានគេយល់ឃើញថា ប្រឈមមុខផ្ទាល់ជាមួយនឹង BRI សហភាពអឺរ៉ុបក៏នឹងវិនិយោគទៅលើផ្លូវដែក ផ្លូវគោក កំពង់ផែ ព្រលានយន្តហោះ និងច្រកព្រំដែន។ វិស័យផ្លូវគមនាគមន៍នេះនឹងផ្ដល់អាទិភាពដល់តំបន់មជ្ឈិមបូព៌ា និង តំបន់អាហ្វ្រិកខាងជើង។

ប្រធានគណៈកម្មការអឺរ៉ុប លោកស្រី លោកស្រី អួរស៊ូឡា វ៉ុនឌែរ ឡេយែន (Ursula von der Leyen)

សម្រាប់វិស័យសុខាភិបាលវិញ EU នឹងជួយដល់បណ្ដាប្រទេសក្នុងការផលិតវ៉ាក់សាំងដោយខ្លួនឯង ពិសេសគឺបណ្ដាប្រទេសនៅក្នុង តំបន់អាហ្វ្រិក។

រីឯវិស័យអប់រំ សហភាពអឺរ៉ុប នឹងវិនិយោគបន្ថែមទៀតទៅក្នុងតំបន់នានារបស់ពិភពលោក ក្នុងនោះក៏នឹងមានការពង្រីកសកម្មភាពអប់រំតាមប្រព័ន្ធអ៊ីនធើណិត រួមនឹងការដោះដូរនិស្សិតឱ្យមកសិក្សាក្នុង តំបន់អឺរ៉ុប។ល។

បើទោះជាឯកសារស្ដីពី «ច្រកទ្វារសកល» មិនបាននិយាយដល់ ប្រទេសចិន ប៉ុន្តែ ក្រុមអ្នកវិភាគវាយតម្លៃថា គម្រោងនេះបានបង្ហាញថា សហភាពអឺរ៉ុប កំពុងតែ «ភ្ញាក់ខ្លួន» នៅចំពោះមុខសំណើប្រកួតប្រជែងជាមួយ ទីក្រុងប៉េកាំង។

ប្រទេសចិន កាលពីឆ្នាំ ២០១៣ បានចាប់ផ្ដើមយុទ្ធសាស្ត្រវិនិយោគទូទាំងសកលលោកដែលប្រទេសនេះបានដាក់ឈ្មោះថា «ខ្សែក្រវាត់និងផ្លូវ (BRI)» ជាគម្រោងលំដាប់កំពូលរបស់ ប្រធានាធិបតីចិន លោក ស៊ី ជីនពីង។ ទីក្រុងប៉េកាំង ឱ្យដឹងថា ខ្លួនបានវិនិយោគទឹកប្រាក់ចំនួន ១៣៩.៨ ពាន់លានដុល្លារអាម៉េរិក គិតត្រឹមឆ្នាំ ២០២០ ក្នុងនោះមាន ២២.៥ ពាន់លានដុល្លារត្រូវបានវិនិយោគសម្រាប់ឆ្នាំ ២០២០ ក្នុងក្របខណ្ឌនៃគម្រោង BRI របស់ខ្លួន៕

December 3, 2021

ក្រសួងសុខាភិបាល ត្រូវបានស្នើឱ្យពិចារណាដកការហាមឃាត់លើអ្នកដំណើរមកពីប្រទេសចំនួន ១០ ក្នុងតំបន់អាហ្វ្រិក

ប្រមុខរាជរដ្ឋាភិបាលកម្ពុជា បានស្នើឱ្យ ក្រសួងសុខាភិបាល ពិចារណាឡើងវិញលើការហាមឃាត់អ្នកដំណើរមកពីប្រទេសចំនួន ១០ ក្នុងតំបន់អាហ្វ្រិក ដែលបានធ្វើឡើងក្នុងបំណងទប់ស្កាត់ការឆ្លងរាលដាលវីរុសកូវីដ-១៩ ប្រភេទ អូមីក្រុង (Omicron) នាពេលកន្លង។

សម្ដេចតេជោ ហ៊ុន សែន បានថ្លែងថា សម្ដេច ហាក់ដូចជាបានយល់ស្របជាមួយនឹងការសោកស្ដាយរបស់អគ្គលេខាធិការអង្គការសហប្រជាជាតិ ទាក់ទិននឹងបណ្ដាប្រទេសដែលបានហាមឃាត់អ្នកដំណើរមកពីតំបន់អាហ្វ្រិកខាងត្បូង ដោយសារតែវ៉ារ្យ៉ង់ អូមីក្រុង។ ការថ្លែងនេះត្រូវបានធ្វើឡើងនៅក្នុងពិធីសម្ពោធដាក់ឱ្យប្រើប្រាស់ផ្លូវ និងអាងប្រព្រឹត្តិកម្មទឹកកខ្វក់ នៅខេត្តព្រះសីហនុ កាលពីព្រឹកមិញ។

ប្រមុខរដ្ឋាភិបាល ថ្លែងថា វាមិនគប្បីទាល់តែសោះ នៅពេលទុកឱ្យ តំបន់អាហ្វ្រិក នៅឯកោ ហើយ កម្ពុជា ក៏ជាប្រទេសមួយដែលកំពុងចូលរួមការហាមឃាត់នេះ។

សម្ដេច ហ៊ុន សែន ក្នុងពិធីសម្ពោធដាក់ឱ្យប្រើប្រាស់ផ្លូវ និងអាងប្រព្រឹត្តិកម្មទឹកកខ្វក់ នៅខេត្តព្រះសីហនុ កាលពីព្រឹកមិញ

ក្រសួងសុខាភិបាលកម្ពុជា កាលពីចុងខែវិច្ឆិកា បានប្រកាសហាមអ្នកដំណើរពី តំបន់អាហ្វ្រិកខាងត្បូង ចូលមក កម្ពុជា ដើម្បីទប់ស្កាត់ការឆ្លងរាលដាលវ៉ារ្យ៉ង់ អូមីក្រុង (Omicron) ដែល វ៉ារ្យ៉ង់ នេះ ត្រូវបានអង្គការសុខភាពពិភពលោក (WHO) ចាត់ចូលក្នុងបញ្ជីឈ្មោះនៃវីរុសបំប្លែងខ្លួនថ្មីដែលគួរឱ្យព្រួយបារម្ភ។

ប្រទេសទាំង ១០ ដែល កម្ពុជា បានហាម រួមមាន បុតស្វាណា អេស្វាទីនី ឡេសូតូ ម៉ូសំប៊ិក ណាមីប៊ី អាហ្វ្រិកខាងត្បូង ស៊ីមបាវ៉េ ម៉ាឡាវី អង់ហ្គោឡា និងសំប៊ី៕

December 2, 2021

(វីដេអូ)-រ៉ូបូតមានជីវិត «xenobot» ដែលបង្កើតឡើងអំពីកោសិកាកង្កែប បានចាប់ផ្ដើមរស់ និងបង្កើតកូនចៅដោយខ្លួនឯង

ក្រុមអ្នកវិទ្យាសាស្ត្រមកពីបណ្ដាប្រទេសបានរកឃើញសមត្ថភាពនៃការរស់រានរបស់ រ៉ូបូតមានជីវិត ដែលត្រូវបានគេបង្កើតឡើងពីកោសិកាដើមរបស់សត្វកង្កែប។

ក្រុមអ្នកវិទ្យាសាស្ត្រអាម៉េរិក ទើបតែបានបង្កើតប្រព័ន្ធរ៉ូបូតមានជីវិតដំបូង និងបានដាក់ឈ្មោះឱ្យវាថា xenobot។ ពួកគេនិយាយថា ទម្រង់នៃជីវិតថ្មីអាចរស់រានមានជីវិតទៅតាមវិធីដែលមិនមាននៅក្នុងធម្មជាតិ ទាំងនៅលើសត្វលោក ទាំងនៅលើរុក្ខជាតិ។

ដោយត្រូវបានបង្កើតឡើងពីកោសិកាដើមរបស់កង្កែបអាហ្វ្រិក (Xenopus laevis) ប្រវែងទទឹងនៃដងខ្លួនរបស់ រ៉ូបូត xenobot នេះ មិនដល់ ១ មិល្លីម៉ែត្រនោះទេ។ ព័ត៌មានអំពីរ៉ូបូតមានជីវិតទាំងនេះត្រូវបានប្រកាសលើកដំបូងកាលពីឆ្នាំ ២០២០ បន្ទាប់ពីមានការពិសោធមួយអំពីសមត្ថភាពនៃការផ្លាស់ទីដោយខ្លួនឯង ការសហការគ្នាជាមួយនឹងរ៉ូបូតមានជីវិតដទៃ និងការជាសះស្បើយដោយឯកឯង។

ក្នុងរបាយការណ៍នៃការស្រាវជ្រាវថ្មី ក្រុមអ្នកវិទ្យាសាស្ត្រនៅសាកលវិទ្យាល័យ Vermont, សាកលវិទ្យាល័យ Tufts និង វិទ្យាស្ថានស្រាវជ្រាវនៃសាកលវិទ្យាល័យ Harvard ឱ្យដឹងថា ពួកគេបានរកឃើញរបៀបនៃការបង្កើតកូនចៅបែបជីវសាស្ត្រដែលមិនទាន់កើតមាននៅលើទម្រង់ជីវិតណាមួយដែលក្រុមអ្នកវិទ្យាសាស្ត្រធ្លាប់បានដឹង។ អ្នកវិទ្យាសាស្ត្រមានការភ្ញាក់ផ្អើលជាខ្លាំងចំពោះទម្រង់ជីវិតបែបនេះ។

«កង្កែបមានរបៀបបន្តពូជដោយឡែក ប៉ុន្តែនៅពេលអ្នក…បំបែកកោសិកាចេញពី អំប្រ៊ីយ៉ុង (Embryo) និងបង្កើតឱកាសឱ្យពួកវាស្វែងរកវិធីរស់ក្នុងបរិស្ថានថ្មី។ ពួកវាមិនត្រឹមតែរកឃើញវិធីផ្លាស់ទីនោះទេ តែក៏ទំនងជាបានរកឃើញវិធីថ្មីក្នុងការបន្តពូជទៀតផង»។

ជារ៉ូបូត ឬជាទម្រង់នៃជីវិត?

កោសិកាដើម (stem cell) គឺជាកោសិកាដែលមិនមានមុខងារជាក់លាក់ មានសមត្ថភាពរីកចម្រើនទៅជាទម្រង់កោសិកាផ្សេង។ ដើម្បីបង្កើតរ៉ូបូតមានជីវិត xenobot ក្រុមអ្នកវិទ្យាសាស្ត្របានកោសកោសិការស់ពី អំព្រីយ៉ុង របស់សត្វកង្កែប ហើយទុកឱ្យពួកវារីកចម្រើនដោយខ្លួនឯង។

Josh Bongard សាស្ត្រាចារ្យផ្នែកវិទ្យាសាស្ត្រកុំព្យូទ័រ និងជាអ្នកឯកទេសខាងរ៉ូបូតប្រចាំសាកលវិទ្យាល័យ Vermont អះអាងថា៖ «មនុស្សភាគច្រើនយល់ថា រ៉ូបូត ត្រូវបានបង្កើតឡើងពីលោហធាតុ និងសេរ៉ាមិច ប៉ុន្តែ និយមន័យនៃ រ៉ូបូត ដែលយោងទៅតាមសកម្មភាពរបស់វា នោះគឺ ការធ្វើការជំនួសមនុស្ស»។

លោកបន្តថា៖ «យល់ទៅតាមរបៀបនេះ រ៉ូបូតមានជីវិត (xenobot) គឺជា រ៉ូបូត ផង និងជាទម្រង់នៃជីវិតមួយផងដែរ ដែលបង្កើតឡើងពីកោសិកាកង្កែបដែលមិនមានការកែប្រែហ្សែន។

យោងតាមលោក Bongard ក្រុមអ្នកវិទ្យាសាស្ត្របានរកឃើញសមត្ថភាពនៃការបង្កើតកូនចៅរបស់ រ៉ូបូត xenobot ដែលជាសត្វមានជីវិតត្រូវបានបង្កើតឡើងពីកោសិកាចំនួន ៣,០០០ របស់សត្វកង្កែប។ ក៏ប៉ុន្តែ ដំណាក់កាលនៃការកកើតកូនចៅរបស់ពួកវា កើតឡើងតែក្នុងរយៈពេលមួយមានកំណត់។

បច្ចេកវិទ្យារ៉ូបូត xenobot នេះ កំពុងស្ថិតនៅក្នុងដំណាក់កាលក្មេងខ្ចីនៅឡើយ ដែលវាអាចប្រៀបបានទៅនឹងកុំព្យូទ័រមួយគ្រឿងកាលពីជំនាន់ឆ្នាំ ១៩៤០៕

December 2, 2021

(វីដេអូ)-ម៉ូដែលតាក់ស៊ីហោះថ្មីបំផុត របស់ ក្រុមហ៊ុនចិន អាចហោះក្នុងល្បឿន ៣០០ គីឡូម៉ែត្រ/ម៉ោង

តាក់ស៊ីហោះ PantalaConcept H ដំណើរការដោយអគ្គិសនីទាំងស្រុង បំពាក់ស្លាបកង្ហារចំនួន ២២ គ្រឿង និងអាចហោះហើរក្នុងរយៈចម្ងាយ ២៥០ គីឡូម៉ែត្រ។

ក្រុមហ៊ុនចិន Pantuo Aviation បានបង្ហើបឱ្យដឹងអំពីគំរូតាក់ស៊ីហោះថ្មីដែលមានឈ្មោះថា PantalaConcept H ។ យន្តហោះនេះដែលមានរូបរាងស្រដៀងទៅនឹងយន្តហោះអគ្គិសនីដែលអាចហោះឡើង និងចុះចតត្រង់ Lilium Jet របស់ក្រុមហ៊ុនអាល្លឺម៉ង់ Lilium GmbH។ នេះបើតាម Interesting Engineering ដែលបានចុះផ្សាយកាលពីថ្ងៃទី ៣០ វិច្ឆិកា។

PantalaConcept H ដំណើរការដោយអគ្គិសនីទាំងស្រុង និងប្រើប្រាស់អាគុយប្រភេទ lithium-ion។ វាអាចហោះហើរក្នុងរយៈចម្ងាយ ២៥០ គីឡូម៉ែត្រ និងល្បឿនប្រមាណ ៣០០ គីឡូម៉ែត្រ/ម៉ោង ក្រោយពេលបានបញ្ចូលថាមពលពេញ។ PantalaConcept H មានស្លាបកង្ហារចំនួន ២២ ហើយស្លាបកង្ហារទាំងនេះអាចបញ្ជាឱ្យផ្ដេចបានដើម្បីប្ដូរពីទម្រង់ហោះឡើងត្រង់ទៅជាទម្រង់ហោះឆ្ពោះទៅមុខ។

តាមគម្រោង តាក់ស៊ីហោះដែលអាចដឹកមនុស្សបាន ៧ នាក់នេះ នឹងត្រូវបានដាក់លក់ជាផ្លូវការនៅក្នុងឆ្នាំ ២០២។ បច្ចុប្បន្ន ក្រុមហ៊ុន Pantuo Aviation កំពុងធ្វើការអភិវឌ្ឍគំរូដំបូងសម្រាប់ការសាកល្បងនៅឡើយ៕

December 2, 2021

ទម្លាប់ល្អៗនៅពេលព្រលប់របស់មហាសេដ្ឋី ប៊ីល ហ្គេត (Bill Gates) ដែលគ្រប់គ្នាគួរតែយកជាគំរូ

ការលាងចានក្រោយពេលបរិភោគអាហារ និងការអានសៀវភៅមុនពេលចូលទទួលទានដំណេក បានជួយឱ្យមហាសេដ្ឋីអាម៉េរិក លោក ប៊ីល ហ្គេត កាត់បន្ថយភាពតានតឹងក្រោយពីបានបំពេញការងារពេញមួយថ្ងៃ ព្រមទាំងជួយបង្កើនចំណេះដឹងផងដែរ។

គ្រប់គ្នាទំនងជាចាប់អារម្មណ៍ទៅលើតែទម្លាប់ពេលព្រឹក ដោយសារតែវាជាកិច្ចការដែលជួយឱ្យយើងមានថាមពលគ្រប់គ្រាន់សម្រាប់ធ្វើការពេញមួយថ្ងៃ។

ក៏ប៉ុន្តែ ទម្លាប់ពេលព្រលប់ក៏សំខាន់ណាស់ដែរ។ បើសិនជាមានទម្លាប់ល្អ អ្នកនឹងអាចកាត់បន្ថយបញ្ហាថប់អារម្មណ៍ និងបានគេងលក់ស្រួល។ ប្រការនេះពិតជាសំខាន់ខ្លាំងណាស់ចំពោះសុខភាពផ្លូវកាយ និងផ្លូវចិត្ត។

ជាអ្នកជំនួញ និងជាសប្បុរសជនដែលទទួលបានជោគជ័យ លោក ប៊ីល ហ្គេត ក៏មានទម្លាប់ល្អមួយចំនួននៅពេលព្រលប់ដែលគួរឱ្យយើងយកជាគំរូ។ កាលពីឆ្នាំ ២០១៤ នៅលើបណ្ដាញសង្គម Reddit នៅពេលត្រូវបានសួរថា «សូមរៀបរាប់អំពីការងារដែលលោកចូលចិត្តធ្វើបំផុត និងពុំមានអ្នកណានឹកស្មានដល់» មហាសេដ្ឋី ប៊ីល ហ្គេត ឆ្លើយថា «ខ្ញុំលាងចានរាល់ពេលព្រលប់។ អ្នកដទៃស្ម័គ្រចិត្តធ្វើកិច្ចការនេះ។ ប៉ុន្តែខ្ញុំចូលចិត្តធ្វើទៅតាមរបៀបរបស់ខ្ញុំ»។

ការលាងចាននឹងជួយឱ្យអ្នកជំនួញទាំងឡាយបានសម្រាកខួរក្បាលបន្ទាប់ពីបានបំពេញការងារពេញមួយថ្ងៃ។ ខួរក្បាលនឹងបានសម្រាក ដោយចាកផុតពីការងារដែលប្រើខួរក្បាល។ ជំនួសមកវិញ ការងារលាងចានគ្រាន់តែផ្ដោតទៅលើការធ្វើដដែលៗ ដូចជា លាងឱ្យស្អាត ជូតឱ្យស្ងួត និងដាក់ចូលក្នុងរាវ។

ទម្លាប់ទីពីររបស់លោក ប៊ីល ហ្គេត គឺការអានសៀវភៅ។ រៀងរាល់ព្រលប់មុនពេលចូលសម្រាន្ត គាត់តែចំណាយពេលមួយម៉ោងដើម្បីអានសៀវភៅ។ គាត់ចូលចិត្តអានស្ទើបគ្រប់ប្រធានបទ តាំងពីនយោបាយ រហូតដល់ព្រឹត្តិការណ៍សង្គម។

មានមូលហេតុជាច្រើនដែលនាំឱ្យគេចាត់ទុកការអានសៀវភៅថាជាទម្លាប់ល្អ។ ការអានសៀវភៅជួយឱ្យយើងបង្កើនចំណេះដឹង មើលឃើញហេតុការណ៍ពីគ្រប់ជ្រុងជ្រោយ និងបង្កើនភាពច្នៃប្រឌិត។ល។

December 2, 2021

ភ័ស្ដុតាងបង្ហាញថា កូវីដ-១៩ ប្រភេទ អូមីក្រុង អាចមានវត្តមាននៅ អឺរ៉ុប មុនពេលត្រូវគេរកឃើញនៅ អាហ្វ្រិកខាងត្បូង

ក្រុមមន្ត្រីសុខាភិបាលមួយចំនួន បានលើកឡើងនូវភ័ស្ដុតាងថ្មីបង្ហាញថា វ៉ារ្យ៉ង់ អូមីក្រុង (Omicron) ប្រហែលជាបានឆ្លងរាលដាលខាងក្រៅ ទ្វីបអាហ្វ្រិក មុនពេលទ្វីបនេះរកឃើញករណីឆ្លង អូមីក្រុង ទីមួយ។

យោងតាមសារព័ត៌មាន NBCNews ក្រុមមន្ត្រីសុខាភិបាលនៃ ប្រទេសហូឡង់ បានឱ្យដឹងថា ពួកគេបានរកឃើញ វ៉ារ្យ៉ង់អូមីក្រុង នៅក្នុងសំណាកដែលត្រូវបានយកចាប់ថ្ងៃទី ១៩ វិច្ឆិកា និង ២៣ វិច្ឆិកា។ ប្រការនេះបង្ហាញថា វីរុសកូវីដ-១៩ ប្រភេទ អូមីក្រុង ប្រហែលជាបានកកើតឡើងនៅ ទ្វីបអឺរ៉ុប មុនពេលត្រូវបានរកឃើញនៅ ប្រទេសអាហ្វ្រិកខាងត្បូង។ ក៏ប៉ុន្តែ វិទ្យាស្ថានជាតិសុខាភិបាលសាធារណៈរបស់ ហូឡង់ បានឱ្យដឹងថា៖ «បច្ចុប្បន្ន មិនទាន់ដឹងច្បាស់ថា អ្នកជំងឺទាំងនេះធ្លាប់បានទៅកាន់បណ្ដាប្រទេសនៅភាគខាងត្បូងនៃ ទ្វីបអាហ្វ្រិក ឬយ៉ាងណានៅឡើយ»។

ដើមសប្ដាហ៍នេះ ហូឡង់ បានរកឃើញយ៉ាង ១៤ ករណីដែលបានឆ្លង វ៉ារ្យ៉ង់អូមីក្រុង នៅក្នុងចំណោមអ្នកដំណើរដែលបានត្រលប់មកពី អាហ្វ្រិកខាងត្បូង កាលពីថ្ងៃទី ២៦ វិច្ចិកា។

ចំណែក នីហ្សេរីយ៉ា វិញ ក៏បានរកឃើញករណីឆ្លង អូមីក្រុង ដំបូង នៅក្នុងសំណាកដែលយកកាលពីខែតុលា នេះបើតាមសារព័ត៌មាន AP ដកស្រង់ប្រភពព័ត៌មានពីវិទ្យាស្ថានជាតិសុខភាពសាធារណៈ និងបានចុះផ្សាយកាលពីម្សិលមិញ។

កាលពីដើមខែវិច្ឆិកា អាហ្វ្រិកខាងត្បូង បានរកឃើញប្រការចម្លែកៗនៅក្នុងការពិសោធសំណាកកូវីដ-១៩ ហើយក្រោយមកក៏ចាប់ផ្ដើមមានការវិភាគនានា។ ថ្ងៃទី ២៤ វិច្ឆិកា អាជ្ញាធររបស់ អាហ្វ្រិកខាងត្បូង បានព្រមាន និងរាយការណ៍អំពី វ៉ារ្យ៉ង់ ថ្មី របស់ កូវីដ-១៩ ដែលហៅថា B.1.1.529។ ពីរថ្ងៃក្រោយមក អង្គការសុខភាពពិភពលោក បានដាក់ឈ្មោះឱ្យ B.1.1.529 នេះថា អូមីក្រុង (Omicron) និងចាត់ចូលក្នុងក្រុមវ៉ារ្យ៉ង់ ដែលគួរឱ្យព្រួយបារម្ភ៕

December 2, 2021

កម្ពុជា រកឃើញអ្នកឆ្លងថ្មី ២៣ នាក់ទៀត ខណៈអ្នកស្លាប់មាន ៥ ករណី

កម្ពុជា រកឃើញអ្នកឆ្លងថ្មី ២៣ នាក់ទៀត ខណៈអ្នកជំងឺជាសះស្បើយចំនួន ១៩ នាក់ និងស្លាប់ ៥ នាក់ ក្នុងនោះមាន ៤ នាក់ មិនបានចាក់វ៉ាក់សាំង។

ករណីឆ្លងថ្មីទាំង ២៣ នាក់នេះ មាន ២០ នាក់ជាករណីឆ្លងក្នុងសហគមន៍ និង ៣ នាក់ជាករណីនាំចូល។

គិតត្រឹមព្រឹក ថ្ងៃទី ២ ខែធ្នូ ឆ្នាំ ២០២១ នេះ ករណីឆ្លង ស្លាប់ និងជាសះស្បើយពីជំងឺកូវីដ-១៩ សរុប នៅ កម្ពុជា រួមមាន៖

– អ្នកឆ្លងសរុប= ១២០,១៨៣ នាក់
– អ្នកជាសះស្បើយ= ១១៦,៥៤៨ នាក់
– អ្នកស្លាប់= ២,៩៤៩ នាក់

នៅទូទាំងសកលលោក ករណីឆ្លង ស្លាប់ និងជាសះស្បើយពីជំងឺកូវីដ-១៩ រួមមាន៖
– ឆ្លងថ្មី = ៣៧,៦៤៩
– ឆ្លងសរុប = ២៦៣,៧៥៦,៥៧០ នាក់
– ស្លាប់សរុប = ៥,២៤២,១២៦ នាក់
– ជាសះស្បើយសរុប = ២៣៨,០៩៤,៨៧៣ នាក់
– កំពុងព្យាបាលសរុប = ២០,៤១៩,៥៧១ នាក់

December 2, 2021

សម្តេចតេជោ ហ៊ុន សែន ប្រកាសគាំទ្រ ឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្ត្រី នាពេលអនាគត

ប្រមុខរដ្ឋាភិបាលកម្ពុជា សម្តេចតេជោ ហ៊ុន សែន បានប្រកាសថា បន្ទាប់ពីសម្តេច គឺ ឯកឧត្តម ហ៊ុន ម៉ាណែត នឹងក្លាយជាបេក្ខភាពនាយករដ្ឋមន្ត្រី នាពេលខាងមុខ។

សម្តេចតេជោ ហ៊ុន សែន នាព្រឹកថ្ងៃទី ២ ធ្នូ ២០២១ បានប្រកាសថា សម្ដេចគឺជាអ្នកគាំទ្រផ្ទាល់ដល់បេក្ខភាពនាយករដ្ឋមន្ត្រី របស ឯកឧត្តម ហ៊ុន ម៉ាណែត តាមរយៈការបោះឆ្នោត។

ការប្រកាសរបស់ប្រមុខរដ្ឋាភិបាលនេះ ត្រូវបានធ្វើឡើងនៅក្នុងឱកាសសម្ពោធផ្លូវ រួមនឹងប្រព័ន្ធប្រព្រឹត្តកម្មទឹកកខ្វក់តម្លៃសរុបប្រមាណ ៣០០ លានដុល្លារ នៅខេត្តព្រះសីហនុ។

ឯកឧត្តម ហ៊ុន ម៉ាណែត ឧត្តមសេនីយ៍ឯក អគ្គមេបញ្ជាការរងនៃកងយោធពលខេមរភូមិន្ទ និងជា មេបញ្ជាការកងទ័ពជើងគោក

ក្នុងពិធីសម្ពោធខាងលើនេះ សម្តេចតេជោ ហ៊ុន ក៏បានបញ្ជាក់ថា ការបណ្តុះបណ្តាលកូន មិនមែនយកមកឱ្យធ្វើ «មេចោរ» នោះទេ៕

December 2, 2021

ក្រុមអ្នកវិទ្យាសាស្ត្រចិន រកឃើញអង្គបដិប្រាណដែលអាចកម្ចាត់រាល់ វ៉ារ្យ៉ង់ របស់ កូវីដ-១៩

ក្រុមអ្នកវិទ្យាសាស្ត្រចិន ប្រកាសថា រកឃើញ និងបំបែកចេញបាននូវអង្គបដិប្រាណមួយប្រភេទដែលអាចជា «ឱសថទិព្វ» សម្រាប់ទប់ទល់នឹងរាល់ វីរុសបំប្លែងខ្លួនរបស់ កូវីដ-១៩ ដែលធ្លាប់បានរកឃើញកន្លងមក។

ក្នុងលទ្ធផលនៃការស្រាវជ្រាវដែលត្រូវបានប្រកាសកាលពីថ្ងៃទី ៣០ វិច្ឆិកា ក្រុមអ្នកជំនាញនៅវិទ្យាស្ថានស្រាវជ្រាវរបស់ ប្រទេសចិន (ក្នុងនោះមាន សាកលវិទ្យាល័យ ស៊ុន យ៉ាតសេន (Sun Yat-sen) នៅ ខេត្តក្វាងចូវ និង សាកលវិទ្យាល័យ ចេជាំង (Zhejiang) នៅ ខេត្ត ហាងចូវ (Hangzhou) បានឱ្យដឹងថា ពួកគេទំនងជាបានរកឃើញ «ឱសថទិព្វ» សម្រាប់ដោះស្រាយបញ្ហាវិបត្តិកូវីដ-១។

ទូរទស្សន៍ RT (រុស្ស៊ី) ផ្សាយថា ក្រុមអ្នកវិទ្យាសាស្ត្រនេះបានអះអាងថា អង្គបដិប្រាណ 35B5 ដែលពួកគេរកឃើញ បានបង្ហាញប្រសិទ្ធភាពទាំងនៅក្នុងបន្ទប់ពិសោធន៍ ទាំងនៅក្នុងការពិសោធលើរាងកាយមានជីវិត។

35B5 អាចបន្សាប វីរុសកូវីដ-១៩ ប្រភេទដំបូង ក៏ដូចជាបណ្ដា វ៉ារ្យ៉ង់ ដែលបាន និងកំពុងបង្កការព្រួយបារម្ភ (VOC) ដល់ពិភពលោក។ ក្រុមអ្នកវិទ្យាសាស្ត្រចិន បានពិសោធថ្នាំនេះនៅលើសត្វកណ្ដុរដែលមានផ្ទុក វ៉ារ្យ៉ង់ ដូចនៅលើមនុស្ស។ 35B5 អាចភ្ជាប់ខ្លួនទៅនឹងតំបន់ស្ថិរភាពបំផុតរបស់ ប្រូតេអ៊ី S (Spike protein/S-protein) នៅលើ វីរុស រួចបន្សាបរាល់ វ៉ារ្យ៉ង់ របស់វា រួមទាំង អូមីក្រុង (Omicron) ផងដែរ។

ក្រុមអ្នកវិទ្យាសាស្ត្រយល់ថា របកគំហើញនេះអាចជួយដល់ការអភិវឌ្ឍវ៉ាក់សាំងរួមមួយ ដែលមានប្រសិទ្ធភាពប្រឆាំងនឹង វីរុសកូវីដ-១៩ គ្រប់ប្រភេទ៕

December 2, 2021

Author: សឿន សំណាង