សឿន សំណាង - La Reine Media

នាយករដ្ឋមន្ត្រី Modi ប្រកាសថា ឥណ្ឌា បានទទួលស្គាល់ និងទិញ ៥០០ Bitcoin?

ក្រុមចោរអ៊ីនធើណិត (Hacker) បានហែកចូល និងគ្រប់គ្រងគណនីបណ្ដាញសង្គមរបស់នាយករដ្ឋមន្ត្រីឥណ្ឌា ហើយប្រកាសថា ប្រទេសនេះបានទទួលស្គាល់ប្រាក់ឌីជីថល Bitcoin និងទិញប្រាក់នេះចំនួន ៥០០ Bitcoin។

សារព័ត៌មាន CNN បានរាយការណ៍ថា ការិយាល័យនាយករដ្ឋមន្ត្រីឥណ្ឌា ឱ្យដឹងថា គណនី Twitter របស់លោក Narendra Modi ត្រូវបានគេលួចចូលគ្រប់គ្រងយ៉ាងលឿន បន្ទាប់ពីសារមួយត្រូវបានបង្ហោះលើ Twitter និយាយថា ប្រទេសនេះបានទទួលស្គាល់រូបិយវត្ថុឌីជីថល Bitcoin ហើយថា នឹងបែងចែកជូនប្រជាជន។

«បញ្ហានេះត្រូវបានបញ្ជូនទៅកាន់ក្រុមហ៊ុន Twitter ហើយគណនីក៏ត្រូវបានយកមកវិញភ្លាម។ នេះបើតាមការិយាល័យនាយករដ្ឋមន្ត្រីឥណ្ឌា ដែលបានសរសេរនៅលើ Twitter កាលពីថ្ងៃអាទិត្យ។

រូបភាពដែលថតបានពីអេក្រង់ស្ដីពីគណនី Twitter របស់ នាយករដ្ឋមន្ត្រីឥណ្ឌា បង្ហាញខ្លឹមសារថា៖ «ឥណ្ឌា បានយល់ព្រមចាត់ទុក Bitcoin ជាមធ្យោបាយទូទាត់ស្របច្បាប់។ រដ្ឋាភិបាលបានទិញ ៥០០ BTC» ហើយថា នឹង «បែងចែកវាឱ្យទៅពលរដ្ឋរបស់ប្រទេសនេះ»។

បច្ចុប្បន្ន សារខាងលើនេះត្រូវបានលុបចោលរួចហើយ។ ទន្ទឹមនឹងសារខាងលើ តំណភ្ជាប់ (link) ឆបោកមួយក៏ទំនងជាត្រូវបានគេភ្ជាប់មកជាមួយ។

គណនី Twitter របស់លោក Modi មានអ្នកតាមដានជាង ៧០ លាននាក់ ដែលនេះ ស្ថិតក្នុងចំណោមគណនីដែលមានអ្នកតាមដានច្រើនជាងគេក្នុងពិភពលោក។

បច្ចុប្បន្ន ប្រទេសឥណ្ឌា មិនទាន់ទទួលស្គាល់ Bitcoin ជាមធ្យោបាយទូទាត់ស្រាបច្បាប់នៅឡើយ៕

December 13, 2021

ម៉ាសពិសេស បញ្ចេញពន្លឺនៅពេលមានវត្តមាន វីរុសកូវីដ-១៩

(ជប៉ុន)-ក្រុមអ្នកវិទ្យាសាស្ត្រអភិវឌ្ឍម៉ាសប្រភេទថ្មីមួយ ប្រើប្រាស់អង្គបដិប្រាណដែលបានមកពីសត្វអូទ្រីស ដែលអាចរកឃើញវីរុសកូវីដ-១៩ ដោយការបញ្ចេញពន្លឺក្រោមកាំរស្មីអ៊ុលត្រាវីយោឡេ (UV) ដែលនេះអាចជួយឱ្យការធ្វើតេស្តនៅផ្ទះដោយចំណាយថវិកាទាប។

ប្រភេទម៉ាសមិនត្បាញថ្មីនេះ មានស្រទាប់ដែលគ្របដណ្ដប់ដោយអង្គបដិប្រាណរបស់សត្វអូទ្រីស និងអាចរកឃើញវីរុសកូវីដ-១៩ ដោយយោងទៅតាមការស្រាវជ្រាវកន្លងមក ដែលបង្ហាញថា សត្វនេះមានសមត្ថភាពខ្ពស់ក្នុងការប្រឆាំងនឹងជំងឺ។

អង្គបដិប្រាណនេះត្រូវបានយកពីស៊ុតសត្វអូទ្រីសដែលបានចាក់វីរុសកូវីដ-១៩ អកម្ម។ អង្គបដិប្រាណត្រូវបានបញ្ជូនទៅកាន់កូនសត្វអូទ្រីស តាមរយៈស៊ុតក្រហម។ អង្គបដិប្រាណនេះក៏កើតនៅលើសត្វអូទ្រីស លឿនជាង (៦ សប្ដាហ៍) ធៀបនឹងនៅលើសត្វមាន់ (១២ សប្ដាហ៍)។

នៅក្នុងការពិសោធមួយរបស់សាស្ត្រាចារ្យ Yasuhiro Tsukamoto និងសហការី ប្រចាំសាកលវិទ្យាល័យក្យូតូ នៅ ជប៉ុន ក្រុមអ្នកស្ម័គ្រចិត្តបានពាក់ម៉ាសក្នុងរយៈពេល ៨ ម៉ោង មុនពេលស្រទាប់ច្រោះខាងក្រៅត្រូវបានយកចេញ និងបាញ់គីមីបញ្ចេញពន្លឺក្រោមរស្មី UV។ ម៉ាសដែលត្រូវបានពាក់ដោយអ្នកវិជ្ជមាននឹងកូវីដ-១៩ បញ្ចេញពន្លឺត្រង់ច្រមុះ និងមាត់។

ក្រុមអ្នកវិទ្យាសាស្ត្រនេះបានឱ្យដឹងថា អំពូលភ្លើង LED របស់ទូរស័ព្ទឆ្លាតវៃ ក៏អាចប្រើប្រាស់ដើម្បីស្វែងរកវីរុសនៅលើម៉ាសពិសេសនេះផងដែរ ដែលនេះអនុញ្ញាតឱ្យគ្រប់គ្នាអាចធ្វើតេស្តដោយខ្លួនឯងបានទូលំទូលាយ។

ក្រុមអ្នកវិទ្យាសាស្ត្រសង្ឃឹមថា អាចអភិវឌ្ឍម៉ាសថ្មី ដើម្បីឱ្យផលិតផលនេះអាចបញ្ចេញពន្លឺដោយឯកឯង មិនចាំបាច់ប្រើអំពូលភ្លើងពិសេស។ នេះគឺជាប្រភេទនៃការធ្វើតេស្តដំបូងប្រកបដោយភាពឆាប់រហ័ស និងផ្ទាល់ជាង បើធៀបនឹងការធ្វើតេស្ត PCR។

ម៉ាសបញ្ចេញពន្លឺក៏អាចរកឃើញអ្នកផ្ទុកវីរុសកូវីដ-១៩ ដែលមិនមានរោគសញ្ញាផងដែរ។ ការពិសោធរបស់សាស្ត្រាចារ្យ Tsukamoto និងសហការី ត្រូវបានធ្វើឡើងរយៈពេល ១០ ថ្ងៃ នៅលើអ្នកជំងឺកូវីដ-១៩ ស្ម័គ្រចិត្តចំនួន ៣២ នាក់។

នៅលើម៉ាសពិសេសនេះ ទីតាំងដែលបញ្ចេញពន្លឺ គឺមានន័យថា មានវត្តមានរបស់ វីរុសកូវីដ-១៩

ក្រុមខាងលើបានដាក់ពាក្យសុំប័ណ្ណប៉ាតង់សម្រាប់គំរូម៉ាសពិសេសនេះរួចហើយ។ ពួកគេក៏បានរៀបផែនការធ្វើពាណិជ្ជកម្ម ដោយការលក់នៅ ប្រទេសជប៉ុន និងនៅក្រៅប្រទេស ចាប់ពីឆ្នាំក្រោយ៕

December 13, 2021

ទិដ្ឋភាពដ៏គួរឱ្យភ័យខ្លាចដែលបង្កឡើងដោយខ្យល់កំបុតត្បូង នៅសហរដ្ឋអាម៉េរិក

កងកម្លាំងជួយសង្គ្រោះបន្ទាន់របស់ សហរដ្ឋអាម៉េរិក កំពុងរត់ប្រណាំងនឹងពេលវេលានៅក្នុងការជួយសង្គ្រោះជីវិតមនុស្សដែលរងគ្រោះដោយសារខ្យល់កំបុតត្បូង ដែលបានបណ្ដាលឱ្យមានអ្នកស្លាប់ជាង ៨០ នាក់ នៅក្នុងរដ្ឋចំនួន ។

រដ្ឋ Kentucky គឺជាកន្លែងដែលរងគ្រោះមហន្តរាយធ្ងន់ធ្ងរបំផុត បន្ទាប់ពីមានខ្យល់កំបុតត្បូងប្រមាណ ៣០ ករណី បានវាយប្រហារទៅលើរដ្ឋចំនួន ៦ របស់ អាម៉េរិក ដែលរួមមាន រដ្ឋ Arkansas, Illinois, Kentucky, Missouri, Tennessee និងរដ្ឋ Mississippi កាលពីចុងសប្ដាហ៍មុន។

ក្រុមមន្ត្រីអាម៉េរិក បច្ចុប្បន្ន បានឱ្យដឹងថា មនុស្សជាង ៨០ នាក់ បានស្លាប់ដោយសារខ្យល់កំបុតត្បូង ប៉ុន្តែ តួលេខនេះអាចកើនឡើងដល់ជាង ១០០ នាក់ នៅពេលបញ្ចប់យុទ្ធនាការជួយសង្គ្រោះ។

អភិបាលរដ្ឋ Kentucky លោក Andy Beshear បានហៅខ្យល់កំបុតត្បូងនេះថាជា «គ្រោះអាក្រក់បំផុត សាហាវបំផុត និងបង្កការស្លាប់ច្រើនបំផុតក្នុងប្រវត្តិសាស្ត្ររបស់រដ្ឋ» នេះ។

ប្រធានាធិបតី ចូ បៃដិន ក៏បានថ្លែងថា នេះអាចជាគ្រោះធម្មជាតិខ្យល់កំបុតត្បូងធំបំផុតក្នុងប្រវត្តិសាស្ត្ររបស់ សហរដ្ឋអាម៉េរិក។

កងកម្លាំងជួយសង្គ្រោះកំពុងតែញាប់ដៃញាប់ជើងជួយដល់ប្រជាជនបន្ទាប់ពីគ្រោះធម្មជាតិនេះបានធ្វើឱ្យផ្ទះសម្បែង ឃ្លាំងទំនិញជាដើម ត្រូវខូចខាតទាំងស្រុង៕

December 13, 2021

កម្ពុជា រកឃើញករណីឆ្លងថ្មី ១៥ នាក់ និងស្លាប់ ៤ នាក់ ក្នុងអំឡុង ២៤ ម៉ោងនៃថ្ងៃទី១២ ខែធ្នូ ឆ្នាំ ២០២១

December 13, 2021

វិមានកីឡដ្ឋាន នៃ ពហុកីឡដ្ឋានជាតិមរតកតេជោ នឹងត្រូវបានសម្ពោធដាក់ឱ្យប្រើប្រាស់ជាផ្លូវការ នៅចុងសប្ដាហ៍នេះ

ព្រឹត្តិការណ៍សម្ពោធ វិមានកីឡដ្ឋាន នៃ ពហុកីឡដ្ឋានជាតិមរតកតេជោ នឹងប្រព្រឹត្តទៅក្រោមអធិបតីភាពរបស់ សម្ដេចតេជោ ប្រមុខរដ្ឋាភិបាលកម្ពុជា នៅថ្ងៃទី ១៨ ខែធ្នូ ឆ្នាំ ២០២១ ចាប់ពីម៉ោង ០៥:០០នាទី។ នេះបើតាម សេចក្ដីជូនដំណឹងរបស់រដ្ឋបាលរាជធានីភ្នំពេញ ស្ដីពីការបញ្ចៀសចរាចរណ៍យានយន្តគ្រប់ប្រភេទជាបណ្ដោះអាសន្ន ដែលបានចុះកាលពីថ្ងៃទី ១៣ ធ្នូ ២០២១ ដោយ ឯកឧត្តម ឃួង ស្រេង។

វិមានកីឡដ្ឋាន នៃ ពហុកីឡដ្ឋានជាតិមរតកតេជោ ដែលស្ថិតនៅក្នុងភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ នេះ គឺជាសមិទ្ធផលប្រវត្តិសាស្ដ្រដ៏អស្ចារ្យ និងត្រូវបានរៀបចំពិធីប្រគល់-ទទួលលក្ខណៈបច្ចេកទេសរួចរាល់កាលពីថ្ងៃទី១២ ខែកញ្ញាកន្លងទៅរួចហើយ ក្រោមអធិបតីភាពដ៏ខ្ពង់ខ្ពស់របស់ សម្ដេចតេជោ ហ៊ុន សែន និងឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្ដ្រីការបរទេសចិន។

វិមានកីឡដ្ឋាន នៃ ពហុកីឡដ្ឋានជាតិមរតកតេជោ ត្រូវចំណាយពេលសាងសង់ ៤៨ ខែ ដោយប្រើប្រាស់ទឹកប្រាក់ប្រមាណ ១៥០ លានដុល្លារអាម៉េរិក។ វិមានកីឡដ្ឋាននេះ នឹងក្លាយទីតាំងសម្រាប់ កម្ពុជា រៀបចំពិធីបើក-បិទ និងការប្រកួតកីឡាស៊ីហ្គេម-អាស៊ានប៉ារ៉ាហ្គេម ២០២៣៕

December 13, 2021

ប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រចាំឆ្នាំ ២០២២

រាជរដ្ឋាភិបាលកម្ពុជា បានចេញអនុក្រឹត្យស្តីពី ប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រចាំឆ្នាំ ២០២២។ អនុក្រឹត្យនេះ ត្រូវបានចុះកាលពីថ្ងៃទី ១៩ ខែសីហា ឆ្នាំ ២០២១ ដោយនាយករដ្ឋមន្ត្រី។

សេចក្ដីលម្អិត សូមអានអនុក្រឹត្យខាងក្រោម៖

December 13, 2021

ចិនអំពាវនាវដល់ពលរដ្ឋ «កុំត្រលប់មកស្រុកកំណើត» ក្នុងឱកាសបុណ្យចូលឆ្នាំថ្មី

នេះគឺជាឆ្នាំទីពីរហើយដែលពលរដ្ឋចិន ត្រូវបានអំពាវនាវ សុំមិនត្រលប់មកស្រុកកំណើតនៅក្នុងឱកាសបុណ្យចូលឆ្នាំប្រពៃណីជាតិ ក្នុងបំណងទប់ស្កាត់ការឆ្លងរាលដាលនៃវីរុសកូវីដ-។

ខណ្ឌមួយនៅក្នុងទីក្រុង Zhangjiakou នៃ ខេត្ត Hebei បានអំពាវនាវដល់មន្ត្រី បុគ្គលិករដ្ឋ និងបក្ខជន «ធ្វើជាគំរូ» ដោយការទទួលអំណរឆ្នាំថ្មីនៅនឹងកន្លែង ជំនួសឱ្យការត្រលប់ទៅស្រុកកំណើត និងចៀសវាងការធ្វើដំណើរដែលមិនចាំបាច់។

អាជ្ញាធរខណ្ឌខាងលើ ក៏បានលើកទឹកចិត្តដល់ប្រជាជន ក្នុងការបញ្ចុះបញ្ចូលញាតិរបស់ខ្លួនដែលនៅបរទេស ឬនៅតំបន់ដែលមានហានិភ័យឆ្លងកម្រិតមធ្យម និងខ្ពស់ នៅក្នុងស្រុក កុំឱ្យពួកគេត្រលប់មកចូលឆ្នាំថ្មីនៅឯស្រុកកំណើត។

«បើសិនជាមានតម្រូវការត្រូវធ្វើដំណើរ នោះការធ្វើតេស្ត និងការអនុញ្ញាត ត្រូវតែធ្វើឡើងដោយការប្រុងប្រយ័ត្ន» ប្រកាសរបស់អាជ្ញាធរខណ្ឌខាងលើ ឱ្យដឹងដូច្នេះកាលពីថ្ងៃទី ៩ ធ្នូ។

នៅក្នុងខេត្តក្វាងទុង បណ្ដាក្រុមហ៊ុនក្នុងស្រុកនៅក្នុងទីរួមស្រុក Sanxiang នៃ ទីក្រុង Zhongshan ត្រូវបានលើកទឹកចិត្តឱ្យបញ្ចុះបញ្ចូលបុគ្គលិក ឱ្យនៅស្ងៀម នៅក្នុងឱកាសបុណ្យចូលឆ្នាំថ្មី។ ចំណែកនៅឯ Pingxiang នៃខេត្ត Quangxi វិញ ហាងទំនិញទាំងអស់ក៏ត្រូវបានស្នើឱ្យមានការលើកទឹកចិត្តដល់បុគ្គលិក ដើម្បីកុំឱ្យពួកគេធ្វើដំណើរ។

ទន្ទឹមនឹងនេះ អាជ្ញាធរតំបន់នានារបស់ ប្រទេសចិន ក៏កំពុងបង្កើនការពិន័យទៅលើអ្នកទាំងឡាយណាដែលលាក់បាំង ឬកុហក ទាក់ទងនឹងប្រវត្តិនៃការឆ្លង ក៏ដូចជារារាំងការខិតខំក្នុងការស្រាវជ្រាវរបស់អាជ្ញាធរ លើករណីឆ្លងនីមួយ៕

December 13, 2021

ប្រធានាធិបតីនៃ ប្រទេសអាហ្វ្រិកខាងត្បូង ឆ្លងវីរុសកូវីដ-១៩

ប្រធានាធិបតីនៃ ប្រទេសអាហ្វ្រិកខាងត្បូង លោក Cyril Ramaphosa ត្រូវបានបញ្ជាក់ថា វិជ្ជមាននឹង វីរុសកូវីដ-១៩ និងកំពុងមានអាការរោគស្រាលមួយចំនួន។

«ប្រធានាធិបតី Ramaphosa បានថ្លែងថា លោកបានឆ្លង កូវីដ-១៩ ហើយថា វាក៏ជាការព្រមានដល់ពលរដ្ឋ ឱ្យទៅទទួលការចាក់វ៉ាក់សាំង និងប្រុងប្រយ័ត្ននៅចំពោះមុខហានិភ័យនៃការឆ្លងរាលដាល។ ការចាក់វ៉ាក់សាំង នៅតែជាវិធីការពារល្អបំផុត ប្រឆាំងនឹងហានិភ័យនៃអាការធ្ងន់ធ្ងរ និងចូលពេទ្យ» ការិយាល័យប្រធានាធិបតីនៃ ប្រទេសអាហ្វ្រិកខាងត្បូង បានប្រកាសកាលពីថ្ងៃទី ១២ ធ្នូ។

ប្រធានាធិបតី Ramaphosa ចាប់ផ្ដើមមានអាការមិនស្រួលក្នុងខ្លួន បន្ទាប់ពីបានចាកចេញពីតំបន់គោរពវិញ្ញាណក្ខន្ធជាតិ Cape Twon។ គាត់មានអាការស្រាលមួយចំនួន ប៉ុន្តែ នៅមានស្មារតីល្អ និងកំពុងត្រូវបានតាមដានសុខភាពដោយក្រុមវេជ្ជបណ្ឌិតនៃមន្ទីរពេទ្យយោធារបស់ អាហ្វ្រិកខាងត្បូង។

លោក Ramaphosa បានទទួលការចាក់វ៉ាក់សាំងបង្ការកូវីដ-១៩ ពេញលេញរួចហើយ និងទើបតែត្រលប់មកពីទស្សនកិច្ចតំបន់អាហ្វ្រិកខាងលិច។ លោកធ្លាប់បានទទួលលទ្ធផលអវិជ្ជមាននៅក្នុងការធ្វើតេស្តកាលពីថ្ងៃទី ៨ ធ្នូ។ លោកកំពុងតែធ្វើចត្តាឡីស័កនៅឯ Cape Town។

អនុប្រធានាធិបតី David Mabuza នឹងជំនួសមុខឱ្យលោក Ramaphosa ក្នុងការបំពេញរាល់ភារកិច្ចនៅក្នុងសប្ដាហ៍នេះ។

យោងតាម CNN ប្រជាជននៅ អាហ្វ្រិកខាងត្បូង ប្រមាណ ៣០% បានទទួលការចាក់វ៉ាក់សាំង ក្នុងនោះមាន ២៥% បានចាក់ពេញលេញ។ បច្ចុប្បន្ន ប្រទេសនេះ បានរកឃើញអ្នកវិជ្ជមាននឹងកូវីដ-១៩ សរុបជាង ៣.១ លាននាក់ ក្នុងនោះ មានជាង ៩០,០០០ នាក់ បានបាត់បង់ជីវិត៕

December 13, 2021

អ៊ីស្រាអែល ហាមធ្វើដំណើរទៅមក រវាងប្រទេសនេះ ជាមួយនឹងប្រទេសមួយចំនួននៅ អឺរ៉ុប ព្រោះតែបារម្ភអំពី អូមីក្រុង (Omicron)

ប្រទេសអ៊ីស្រាអែល កាលពីថ្ងៃទី ១២ ធ្នូ បានប្រកាសបន្ថែមប្រទេសចំនួន ៣ នៅ អឺរ៉ុប ទៅក្នុងបញ្ជី «ក្រហម» ដែលមានប្រទេសប្រមាណ ៥០ ភាគច្រើននៅ តំបន់អាហ្វ្រិក ដែលពលរដ្ឋរបស់ប្រទេសនេះ ត្រូវបានហាមមិនឱ្យទៅមក ដោយសារតែមានការព្រួយបារម្ភអំពី វីរុសបំប្លែងខ្លួន អូមីក្រុង។

ប្រទេសចំនួន ៣ នៅ អឺរ៉ុប ដែលត្រូវបាន អ៊ីស្រាអែល ហាមការធ្វើដំណើរទៅមក រួមមាន ប្រទេសអង់គ្លេស, ដាណឺម៉ាក និង បែលហ្ស៊ិក។ បម្រាមដែលទាក់ទិននឹងប្រទេសចំនួន ៣ នេះ នឹងមានសុពលភាពចាប់ពីថ្ងៃទី ១៥ ធ្នូ ២០២១។

មុននោះ ប្រទេសអ៊ីស្រាអែល ក៏បានចេញបទបញ្ជា ហាមផ្ដល់ទិដ្ឋាការដល់ពលរដ្ឋបរទេស ដើម្បីទប់ស្កាត់ការឆ្លងរាលដាលជំងឺកូវីដ-១៩ និងតម្រូវឱ្យធ្វើចត្តាឡីស័កពី ៣ ទៅ ៧ ថ្ងៃ ចំពោះ ពលរដ្ឋអ៊ីស្រាអែល ដែលធ្វើដំណើរពីប្រទេសក្រៅ ចូលមកស្រុក។

បច្ចុប្បន្ន អ៊ីស្រាអែល បានរកឃើញករណីឆ្លង កូវីដ-១៩ ប្រភេទ អូមីក្រុង ចំនួន ៥៥ នាក់ ក្នុងគ្រាដែលប្រទេសនេះកំពុងបង្កើនល្បឿននៃការចាក់វ៉ាក់សាំង និងរឹតបន្តឹងវិធានការការពារ ក្នុងនោះមានដូចជា ការតម្រូវឱ្យពាក់ម៉ាសជាដើម៕

December 13, 2021

ចិន ជឿជាក់ថា អាចគ្រប់គ្រង វ៉ារ្យ៉ង់ អូមីក្រុង (Omicron) បាន ដោយសារការរីកចម្រើននៃវ៉ាក់សាំង

បណ្ដាក្រុមហ៊ុនផលិតវ៉ាក់សាំងនៅ ប្រទេសចិន បានប្រកាសថា កំពុងសម្រេចបាននូវវឌ្ឍនភាពដ៏ធំធេងនៅក្នុងការស្រាវជ្រាវអំពី អូមីក្រុង (Omicron) ជិតកន្លះខែបន្ទាប់ពី WHO បានចាត់ វ៉ារ្យង់ នេះ ទៅក្នុងប្រភេទវីរុសបំប្លែងខ្លួនដែលគួរឱ្យព្រួយបារម្ភ។

សារព័ត៌មាន Global Times បានរាយការណ៍ថា ក្រុមអ្នកជំនាញផ្នែករោងឆ្លងនៅ ប្រទេសចិន បានអំពាវនាវឱ្យមានការប្រឹងប្រែងរួមនៅទូទាំងសកលលោក ទាក់ទងនឹងការស្រាវជ្រាវវ៉ាក់សាំង អង្គបដិប្រាណ និងថ្នាំព្យាបាលជំងឺកូវីដ-១៩ ប្រភេទ អូមីក្រុង។

ទន្ទឹមនឹងនេះ ក្រុមអ្នកវិទ្យាសាស្ត្រខាងលើក៏បានបង្ហាញទំនុកចិត្តទៅលើសក្តានុពលរបស់ ចិន នៅក្នុងការទប់ស្កាត់ វ៉ារ្យ៉ង់ ថ្មី ក្នុងគ្រាដែលពួកគេត្រូវការពេលវេលាតែ ២ ខែប៉ុណ្ណោះ ដើម្បីអភិវឌ្ឍវ៉ាក់សាំងសម្រាប់ អូមីក្រុង បើសិនជា ប្រសិទ្ធភាពរបស់ ដូសបន្ថែម ត្រូវបានធ្វើឱ្យថយចុះ។

ស៊ីណូវ៉ាក់ (Sinovac) ដែលជាក្រុមហ៊ុនផលិតវ៉ាក់សាំងលំដាប់កំពូលមួយរបស់ ប្រទេសចិន កាលពីថ្ងៃទី ១១ ធ្នូ បានឱ្យដឹងថា បានធ្វើការស្រាវជ្រាវអំពី អូមីក្រុង បន្ទាប់ពីទទួលបានសំណាកពីក្រុមអ្នកស្រាវជ្រាវនៅ ហុងកុង។ ក្រុមអ្នកស្រាវជ្រាវដែលដឹកនាំដោយលោក Yuen Kwok-yung នៅសាកលវិទ្យាល័យហុងកុង បានបំបែកដោយជោគជ័យនូវ វ៉ារ្យ៉ង់ អូមីក្រុង កាលពីថ្ងៃទី ២៩ វិច្ឆិកា។ នេះគឺជាក្រុមអ្នកឯកទេសដំបូងនៅ អាស៊ី ដែលធ្វើបានដូច្នេះ។

លោក Wu Guizhen អ្នកជំនាញលំដាប់កំពូលប្រចាំវិទ្យាស្ថានជាតិគ្រប់គ្រងនិងទប់ស្កាត់ជំងឺដែលកើតឡើងដោយសារវីរុស បានថ្លែងថា លទ្ធផលនៃការបំបែក វ៉ារ្យង់ អូមីក្រុង របស់ ហុងកុង បានជួយឱ្យ ចិនដីគោក បង្កើនល្បឿននៃការស្រាវជ្រាវ និងអភិវឌ្ឍវ៉ាក់សាំងដែលទាក់ទង។

ក្រៅពីវ៉ាក់សាំង ថ្នាំព្យាបាលជំងឺកូវីដ-១៩ ដំបូងរបស់ ប្រទេសចិន ក៏អាចរក្សាប្រសិទ្ធភាពក្នុងការបន្សាប វ៉ារ្យ៉ង់ អូមីក្រុង ផងដែរ។

យ៉ាងណាក៏ដោយ សហគមន៍អ្នកវិទ្យាសាស្ត្រនៅ ប្រទេសចិន ក៏បានសង្កត់ធ្ងន់ទៅលើសារសំខាន់នៃការចាក់វ៉ាក់សាំងដូសជំរុញ ដើម្បីបង្កើនបរិមាណនៃអង្គបដិប្រាណ ប្រឆាំងនឹង SARS-CoV-2 ដែលជាវីរុសបង្កឱ្យមានជំងឺរលាកសួតធ្ងន់ធ្ងរ (កូវីដ-១៩)។

អ្នកស្រាវជ្រាវអំពីជំងឺឆ្លង Zhang Wenhong ជឿជាក់ថា ប្រទេសចិន មានសក្ដានុពលខ្ពស់ផ្នែកបច្ចេកទេស ដែលមានប្រសិទ្ធភាពក្នុងការទប់ទល់នឹង អូមីក្រុង។ ទន្ទឹមនឹងនេះ លោកក៏បានលើកឡើងនូវ សេណារីយ៉ោ ចំនួន ៣ ស្ដីពីការឆ្លងរាលដាលរបស់ អូមីក្រុង។ សេណារីយ៉ោ ដែលអាក្រក់បំផុត នោះគឺ វ៉ារ្យ៉ង់ អូមីក្រុង មានសមត្ថភាពឆ្លងរាលដាលខ្ពស់ និងបង្កអាការធ្ងន់ធ្ងរ ធ្វើឱ្យការចាក់វ៉ាក់សាំងដូចជំរុញ លែងមានប្រសិទ្ធភាព។

យោងតាមលោក Zhang បើសិនជាករណីខាងលើកើតឡើង បណ្ដាវ៉ាក់សាំងដែលអាចកម្ចាត់ វ៉ារ្យ៉ង់ ច្រើនប្រភេទរបស់ កូវីដ-១៩ នឹងក្លាយជាវិធីប្រយុទ្ធប្រឆាំងដែលសមស្របបំផុត ហើយ ប្រទេសចិន មានសក្ដានុពលក្នុងការអភិវឌ្ឍនូវផលិតផលដូច្នេះ ដោយប្រើពេលតែ ២ ខែគត់៕

December 13, 2021

Author: សឿន សំណាង