Author: សឿន សំណាង

ក្រុមប្រឹក្សាជាតិសីលធម៌វៀតណាម ៖ វ៉ាក់សាំងក្នុងស្រុក Nanocovax មានប្រសិទ្ធភាពស្របតាមលក្ខខណ្ឌរបស់ WHO
ក្រុមប្រឹក្សាជាតិសីលធម៌របស់ វៀតណាម បានប្រកាសថា វ៉ាក់សាំងបង្ការជំងឺកូវីដ-១៩ ឈ្មោះ Nanocovax ដែលអភិវឌ្ឍក្នុងស្រុក មានប្រសិទ្ធភាពគ្រប់គ្រាន់ដែលអាចបំពេញតាមលក្ខខណ្ឌរបស់អង្គការសុខភាពពិភពលោក (WHO)។
ការប្រកាសនេះត្រូវបានធ្វើឡើងកាលពីថ្ងៃទី ២៩ ធ្នូ ២០២១ បន្ទាប់ពីកិច្ចប្រជុំ វាយតម្លៃលើប្រសិទ្ធភាពផ្ទាល់របស់វ៉ាក់សាំង Nanocovax ដោយប្រើប្រាស់ទិន្នន័យស្រាវជ្រាវដែលត្រូវបានគិតរហូតមកដល់ថ្ងៃ ១៣ ធ្នូ ២០២១។ កាលពីថ្ងៃទី ១៦ ធ្នូ ២០២១ វ៉ាក់សាំងរបស់ វៀតណាម Nanocovax ក៏ត្រូវបានក្រុមប្រឹក្សាជាតិសីលធម៌ របស់ប្រទេសនេះ វាយតម្លៃថា មានសុវត្ថិភាពផងដែរ។
ទោះជាយ៉ាងនេះក៏ដោយ ក្រុមប្រឹក្សាជាតិសីលធម៌របស់ វៀតណាម ដែលមានសមាជិកចំនួន ១៥ រូប ត្រូវតែបំពេញបន្ថែមរបាយការណ៍នានា និងការសន្យាទទួលខុសត្រូវចំពោះសុចរិតភាព សុក្រឹតភាព និងទំនុកចិត្តរបស់ទិន្នន័យ និងលទ្ធផលនៃការពិសោធ ស្រាវជ្រាវ លើមនុស្សដែលបានប្រើប្រាស់វ៉ាក់សាំង Nanocovax។
ក្រោយការសម្រេចចិត្តខាងលើ វ៉ាក់សាំង Nanocovax របស់ វៀតណាម អាចនឹងទទួលបានការអនុញ្ញាតឱ្យធ្វើចរាចរណ៍ និងប្រើប្រាស់បន្ទាន់ នាពេលខាងមុខ។
បច្ចុប្បន្ន វៀតណាម មានវ៉ាក់សាំងចំនួន ៦ ប្រភេទដែលជាលទ្ធផលនៃការផ្ទេរបច្ចេកវិទ្យាពីបរទេស និងអភិវឌ្ឍក្នុងស្រុក ក្នុងនោះក៏មានវ៉ាក់សាំង Nanocovax របស់ក្រុមហ៊ុន Nanogen ដែលមានទីស្នាក់ការកណ្ដាលនៅទីក្រុង ហូជីមិញ ផងដែរ។ បើសិនទទួលបានការអនុម័តឱ្យប្រើប្រាស់បន្ទាន់ Nanocovax ក៏អាចនឹងត្រូវបានប្រើប្រាស់ជាដូសទី ៣ សម្រាប់ចាក់ជូនពលរដ្ឋគោលដៅនៅ វៀតណាម៕
December 30, 2021
កម្ពស់ទឹកសមុទ្រអាចកើនឡើងថែម ៥ ម៉ែត្រទៀត និងធ្វើឱ្យតំបន់ក្បែរសមុទ្រត្រូវលិចលង់នៅឆ្នាំ ៣០០០
ការរលាយនៃផ្ទាំងទឹកកកប៉ូលខាងត្បូង អាចបណ្ដាលឱ្យកម្ពស់ទឹកសមុទ្រឡើងខ្ពស់ជាងបច្ចុប្បន្ន ៥ ម៉ែត្រ នៅឆ្នាំ ៣០០០ បើសិនជានិន្នាការកើនឡើងនៃកំដៅរបស់ផែនដីដូចបច្ចុប្បន្ន នៅតែបន្តកើតឡើង។
ព័ត៌មានមិនល្អខាងលើនេះត្រូវប្រកាសដោយសាកលវិទ្យាល័យ Hokkaido កាលពីថ្ងៃទី ២២ ធ្នូ ២០២១ នៅលើទស្សនាវដ្ដី Glaciology ដោយយោងទៅតាមការសិក្សាស្រាវជ្រាវរបស់ពួកគេ។
ក្រុមស្រាវជ្រាវបានព្យាករថា បើសិនមិនកាត់បន្ថយការបំភាយឧស្ម័នផ្ទះកញ្ចក់ បាតុភូតរលាយផ្ទាំងទឹកកក នឹងរួមចំណែកធ្វើឱ្យកម្ពស់ទឹកសមុទ្រកើនឡើងពី ៧.៨ ដល់ ៣០ សម នៅឆ្នាំ ២១០។ ការគណនាថ្មីស្ដីអំពីផ្ទាំងទឹករលាយជាបន្តបន្ទាប់បង្ហាញថា ដល់ឆ្នាំ ៣០០០ ស្ថានភាពអាកាសធាតុចេះតែក្ដៅឡើងៗ នឹងនាំឱ្យកម្ពស់ទឹកសមុទ្រកើនឡើងថែមពី ១.៥ ដល់ ៥.៤ ម៉ែត្រ។
ប្រការខាងលើនេះនឹងធ្វើឱ្យតំបន់ប្រជុំជននៅក្បែរសមុទ្រ ក្លាយជាទីតាំងដែលមិនអាចរស់នៅបាន។ កត្តាសំខាន់បំផុតដែលនៅពីក្រោយបាតុភូតអាក្រក់បំផុតស្ដីពីកម្ពស់ទឹកសមុទ្រនេះគឺ ហានិភ័យនៃការរលាយផ្ទាំងទឹកកកនៅភាគនិរតិនៃប៉ូលខាងត្បូង។ ផ្ទាំងទឹកកកនេះស្ថិតនៅក្នុងតំបន់ដែលទំនងជាទាបជាងកម្ពស់នៃទឹកសមុទ្រ មានន័យថា លំហូរទឹកសមុទ្រអាចនាំយកទឹកក្ដៅចូលមកតំបន់របស់ផ្ទាំងទឹកកកនេះ។
យោងតាមទីភ្នាក់ងារអវកាសអាម៉េរិក (NASA) នេះគឺជាជំហានដំបូងនៅក្នុងប្រតិកម្មជាបណ្ដាញ ក្នុងនោះ ទឹកក្ដៅនឹងរំលាយស្រទាប់នៃផ្ទាំងទឹកកកបន្តិចម្ដងៗ ធ្វើឱ្យវាត្រូវរួមតូច។ នៅពេលផ្ទាំងទឹកកករលាយបន្តិចម្ដងៗ ពួកវាក៏លែងមានសមត្ថភាពរក្សាទន្លេទឹកកក។ ដូច្នេះ ទន្លេទឹកកកនឹងអណ្ដែតចេញទៅសមុទ្រកាន់តែលឿន និងកាន់តែសកម្ម។
ដំណើរការខាងលើនេះអាចកើតឡើងខ្លាំងក្លាជាងបច្ចុប្បន្ន។ ពីមួយថ្ងៃ ទៅមួយថ្ងៃ ផ្ទាំងទឹកកកអណ្ដែតចេញទៅសមុទ្រក៏ចេះតែកើនឡើង ធ្វើឱ្យទឹកសមុទ្រចេះតែឡើងខ្ពស់។
អាជ្ញាធរគ្រប់គ្រងដែនអាកាសនិងបរិយាកាស (NOAA) របស់ សហរដ្ឋអាម៉េរិក បានឱ្យដឹងថា កម្ពស់ទឹកសមុទ្របានកើនឡើងពី ២១ ទៅ ២៤ សម ចាប់ពីឆ្នាំ ១៨៨០។ ល្បឿននេះបានកើនទ្វេដងចាប់ពី ១.៤ សម/ឆ្នាំ ក្នុងសតវត្សរ៍ទី ២០ រហូតដល់ ៣.៦ មម/ឆ្នាំ ចាប់ពីឆ្នាំ ២០០៦ ដល់ឆ្នាំ ២០១៥៕
December 29, 2021
ព្រឹលធ្លាក់យ៉ាងក្រាស់មិនធ្លាប់មាន គ្របដណ្ដប់ពាសពេញផ្ទៃប្រទេសនៅ សហរដ្ឋអាម៉េរិក និងជប៉ុន
ព្រឹលធ្លាក់យ៉ាងក្រាស់មិនធ្លាប់មានក្នុងរយៈពេលច្រើនទសវត្សរ៍កន្លង ធ្វើឱ្យរដ្ឋមួយចំនួនរបស់ សហរដ្ឋអាម៉េរិក និងបណ្ដាខេត្តភាគខាងលិចរបស់ ប្រទេសជប៉ុន ក្លាយជាពណ៌សក្បុស ប៉ះពាល់ដល់ការធ្វើដំណើររបស់ប្រជាជន។
ក្រោយបាតុភូតក្ដៅហួតហែងអស់រយៈពេលច្រើនខែ បង្កឱ្យមានភ្លើងឆេះព្រៃជាច្រើនករណី បច្ចុប្បន្ន ដល់វេនព្រឹលវិញម្ដង ដែលធ្លាក់យ៉ាងក្រាស់នៅលើតំបន់ជួរភ្នំ Sierra Nevada លាតសន្ធឹងពីរដ្ឋ Nevada ទៅរដ្ឋ California របស់ សហរដ្ឋអាម៉េរិក។ ក្រុមអ្នកវិទ្យាសាស្ត្រព្រមានថា សកម្មភាពធ្វើដំណើរនៅក្នុងតំបន់ Sierra Nevada អាចជួបការលំបាកខ្លាំងនៅក្នុងរយៈពេលប៉ុន្មានថ្ងៃខាងមុខ ដោយសារតែព្រឹលធ្លាក់ក្រាស់ខ្លាំងពេក។
ព្រឹលដែលបានធ្លាក់ថ្មីៗនេះនៅ Sierra Nevada មានកម្រាស់ ៤.៩ ម៉ែត្រ ក្រាស់ជាងឆ្ងាយធៀបនឹង ៤.៦ ម៉ែត្រ ក្នុងខែធ្នូ កាលពីឆ្នាំ ១៩៧០។
បាតុភូតធ្លាក់ព្រឹលដែលបោកបក់ពីឈូងសមុទ្រ Alaska ចូលមកកាន់តំបន់ពាយព្យរបស់ សហរដ្ឋអាម៉េរិក កាលពីថ្ងៃទី ២៦ ធ្នូ ២០២១ បានធ្វើឱ្យស្រទាប់ព្រឹលឡើងដល់កម្រាស់ ១៥ សម នៅតំបន់ Seattle រដ្ឋវ៉ាស៊ីងតោន បង្កឱ្យមានការកកស្ទះចរាចរណ៍។
នាយកដ្ឋានអាកាសធាតុរបស់ សហរដ្ឋអាម៉េរិក បានឱ្យដឹងថា សីតុណ្ហភាពទាបបំផុតនៅ Seattle កាលពីថ្ងៃទី ២៦ ធ្នូ គឺ -៦.៧ អង្សាសេ ខណៈដែលនៅ Bellingham គឺ -១២.៨ អង្សាសេ ត្រជាក់ជាង ១.៧ អង្សាសេ បើធៀបនឹងឆ្នាំ ១៩៧១។
នៅក្នុងរដ្ឋវ៉ាស៊ីងតោន និង Oregon តំបន់ជ្រកបណ្ដោះអាសន្នជាច្រើនត្រូវបានបើក បន្ទាប់ពីនាយកដ្ឋានអាកាសធាតុប្រកាសថា សីតុណ្ហភាពត្រជាក់ខ្លាំងអាចអូសបន្លាយពេលរហូតដល់ចុងសប្ដាហ៍។ រដ្ឋ Oregon បានប្រកាសអាសន្នដោយសារតែភាពត្រជាក់ និងព្រឹលធ្លាក់យ៉ាងក្រាស់។
នៅ ប្រទេសជប៉ុន អាកាសធាតុត្រជាក់ខ្លាំង និងព្រឹលធ្លាក់ក៏បានធ្វើឱ្យមានបញ្ហាជាច្រើន ពិសេសគឺការកកស្ទះចរាចរណ៍នៅ ទីក្រុង Hikone ខេត្ត Shiga ភាគខាងលិចប្រទេស។ អាជ្ញាធរជប៉ុន បានណែនាំឱ្យប្រជាជនមានការប្រុងប្រយ័ត្នខ្ពស់។
ផ្លូវដែកនៅភាគកណ្ដាលរបស់ ជប៉ុន ក៏ត្រូវផ្អាកដំណើរការដោយសារតែព្រឹលធ្លាក់ក្រាស់។ យោងតាម Kansai Electric Power ប្រជាជនជប៉ុន ជាង ៣,២០០ គ្រួសារ ត្រូវដាច់ភ្លើង។
មធ្យោបាយធ្វើដំណើរនៅលើដងផ្លូវនៅក្នុង ទីក្រុង Hikone ខេត្ត Shiga កាលពីថ្ងៃទី ២៧ ធ្នូ ២០២១ ត្រូវជាប់គាំងដោយសារតែព្រឹលកម្រាស់ ៦៨ សម ខ្ពស់ជាងមធ្យមភាគជិត ៣០ ដង។ នេះបើតាមទូរទស្សន៍ NHK។
ព្រឹលដែលក្រាស់បំផុតត្រូវបានកត់ត្រានៅក្នុងតំបន់ Aomori ខេត្ត Aomori ភាគឦសាន ប្រទេសជប៉ុន ដោយមានកម្រស់ ២០០ សម។ ព្រឹលក៏ធ្លាក់យ៉ាងក្រាស់នៅក្នុងបណ្ដាទីក្រុង ដូចជា Kyoto, Nagota និង Hiroshima។
ក្រុមហ៊ុនផ្លូវដែកជប៉ុន កាលពីថ្ងៃទី ២៧ ធ្នូ បានផ្អាកដំណើរការរថភ្លើងល្បឿនលឿនជាបណ្ដោះអាសន្ន ក្នុងនោះមានទាំងខ្សែរថភ្លើងទៅកាន់ទីក្រុង Kyoto, Nagota និង Kanazawa ផងដែរ៕
December 29, 2021
សាស្ត្រាចារ្យចិន ក្លាយជាមហាសេដ្ឋី ដោយសារបង្កើតក្រុមហ៊ុនបច្ចេកវិទ្យា
តាង ស៊ីវអ៊ូ (Tang Xiao’ou) សហស្ថាបនិករបស់ក្រុមហ៊ុន SenseTime បច្ចុប្បន្នកាន់កាប់ភាគហ៊ុនចំនួន ២១% ដែលប្រហាក់ប្រហែលនឹង ៣.៤ ពាន់លានដុល្លារអាម៉េរិក។
SenseTime Group ដែលជាក្រុមហ៊ុនបច្ចេកវិទ្យាបញ្ហាសិប្បនិម្មិត (AI/Artificial intelligence) ធំជាងគេនៅ ប្រទេសចិន កាលពីសប្ដាហ៍កន្លងបានកំណត់មូលបត្រនៅពេលធ្វើ IPO ក្នុងតម្លៃ ៣.៨៥ ដុល្លារហុងកុង/ហ៊ុន ហើយប្រមូលទុនបាន ៥.៥៥ ពាន់លានដុល្លារហុងកុង។ មូលបត្ររបស់ក្រុមហ៊ុននេះនឹងត្រូវដាក់ឱ្យជួញដូរនៅលើផ្សារហ៊ុនហុងកុង ចាប់ពីថ្ងៃទី ៣០ ធ្នូ ២០២១។ បច្ចុប្បន្ន ក្រុមហ៊ុននេះមានមូលធនទីផ្សារតម្លៃជាង ១៦ ពាន់លានដុល្លារអាម៉េរិក។
យោងតាម Bloomberg Billionaires Index បច្ចុប្បន្ន សហស្ថាបនិករបស់ SenseTime គឺលោក តាង ស៊ីវអ៊ូ កំពុងកាន់កាប់ភាគហ៊ុនចំនួន ២១% នៅក្នុងក្រុមហ៊ុន ដែលនៃប្រហាក់ប្រហែលនឹង ៣.៤ ពាន់លានដុល្លារអាម៉េរិក។ លោក តាង ស៊ីវអ៊ូ ឆ្នាំនេះមានអាយុ ៥៣ ឆ្នាំ ហើយក៏ជាសាស្ត្រាចារ្យផ្នែកវិស្វកម្មបច្ចេកវិទ្យាព័ត៌មាន (Information Technology Engineering/ITE) នៃសាកលវិទ្យាល័យចិនហុងកុង( Chinese University of Hong Kong)។
លោក តាង ស៊ីវអ៊ូ
លោក តាង ស៊ីវអ៊ូ បានចូលប្រលូកក្នុងវិស័យបច្ចេកវិទ្យាបញ្ញាសិប្បនិម្មិតផ្នែកស្កេនផ្ទៃមុខ តាំងតែពីយូរមកហើយ។ លោកបានបញ្ចប់ការសិក្សានៅមហាវិទ្យាល័យវិទ្យាសាស្ត្រនិងបច្ចេកវិទ្យាចិន បន្ទាប់មកក៏ទទួលបានវិញ្ញាបនបត្រពីសាកលវិទ្យាល័យ Rochester នៅទីក្រុងនីវយ៉ក សហរដ្ឋអាម៉េរិក ហើយក្រោយមកទៀតក៏ទទួលបានសញ្ញាបត្របណ្ឌិតពីវិទ្យាស្ថានបច្ចេកវិទ្យា Massachusetts កាលពីឆ្នាំ ១៩៩៦។
លោក តាង ស៊ីវអ៊ូ ធ្លាប់ធ្វើការឱ្យ Microsoft Research Asia អស់រយៈពេលច្រើនឆ្នាំ មុននឹងក្លាយជាសហស្ថាបនិករបស់ SenseTime កាលពីឆ្នាំ ២០១៤ នៅ សៀងហៃ ដោយសហការជាមួយ Xu Li (កាលណោះ Xu Li ធ្វើការឱ្យ Lenovo Group។ មិនយូរប៉ុន្មាន ក្រុមហ៊ុន SenseTime ក៏ទទួលបានទុនវិនិយោគពី IDG Capital, SoftBank, Alibaba Group រួមទាំង Silver Lake ផងដែរ។
សារព័ត៌មាន Bloomberg បានឱ្យដឹងថា បច្ចុប្បន្ន SenseTime គឺជាក្រុមហ៊ុនបច្ចេកវិទ្យាបញ្ញាសិប្បនិម្មិត ធំជាងគេប្រចាំ ទ្វីបអាស៊ី ដោយមានចំណែកទីផ្សារ ១១%។ ប្រាក់ចំណូលរបស់ក្រុមហ៊ុននេះ កាលពីឆ្នាំទៅ កើន ១៤% ដែលឡើងដល់ ៣.៤ ពាន់លានយុន (៥៣៤ លានដុល្លារអាម៉េរិក) ប៉ុន្តែ ពួកគេក៏ខាតបង់ ១.៨ ពាន់លានយុនផងដែរ ទៅលើការចំណាយនានារបស់ក្រុមហ៊ុន៕
December 29, 2021
អ៊ីឡុន ម៉ាស (Elon Musk) បានលក់ភាគហ៊ុន Tesla តម្លៃជាង ១៦ ពាន់លានដុល្លារ ក្នុងរយៈពេល ២ ខែមកនេះ
មហាសេដ្ឋីលំដាប់លេខ ១ ក្នុងពិភពលោក ជិតបានសម្រេចកិច្ចការលក់ភាគហ៊ុនចំនួន ១០% ក្នុងចំណោមភាគហ៊ុនរបស់លោក នៅក្នុងក្រុមហ៊ុន Tesla ទៅតាមការសន្យានៅក្នុងការស្ទង់មតិលើ Twitter កាលពីខែមុន។
យោងតាមឯកសារដែលបានដាក់ទៅកាន់គណៈកម្មការមូលបត្រអាម៉េរិក (SEC) នាយកប្រតិបត្តិរបស់ Tesla លោក អ៊ីឡុន ម៉ាស ទើបតែបានលក់ភាគហ៊ុន Tesla ចំនួន ៩៣៤,០០០ ហ៊ុនថែមទៀត ធ្វើឱ្យភាគហ៊ុនសរុបដែលលោកបានលក់ចាប់តាំងពីខែវិច្ឆិកា មកដល់បច្ចុប្បន្ន ឡើងដល់ ១៥.៦ លានហ៊ុន។ តួលេខភាគហ៊ុននេះប្រហាក់ប្រហែលនឹងទឹកប្រាក់ ១៦.៤ ពាន់លានដុល្លារ។ មហាសេដ្ឋីរូបនេះត្រូវការលក់ភាគហ៊ុន Tesla ប្រហែល ១៧ លានហ៊ុន ទើបត្រូវទៅតាមការសន្យាលក់ភាគហ៊ុន ១០% ដែលលោកបានធ្វើឡើងកាលពីខែវិច្ឆិកា។
នៅក្នុងការស្ទង់មតិមួយនៅលើបណ្ដាញសង្គម Twitter កាលពីខែវិច្ឆិកា ២០២១ ពាក់ព័ន្ធនឹង កម្មវិធីស្បៀងអាហារពិភពលោក (World Food Programme) មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស បានសួរអ្នកលេងបណ្ដាញសង្គមថា គួរតែលក់ភាគហ៊ុន Tesla ១០% ឬទេ។ ភាគហ៊ុន Tesla បានកើនឡើងជាង ២,៣០០% ក្នុងរយៈពេល ៥ ឆ្នាំមកនេះ។ កាលពីសប្ដាហ៍កន្លងទៅ លោក Musk បានប្រកាសថា លោកជិតសម្រេចបានគោលដៅនៃការលក់ភាគហ៊ុននេះហើយ។
កាលពីសប្ដាហ៍កន្លង CEO របស់ Tesla បានអះអាងថា លោកនឹងបង់ពន្ធជាង ១១ ពាន់លានដុល្លារសម្រាប់ឆ្នាំនេះ។
បច្ចុប្បន្ន មហាសេដ្ឋី អ៊ីឡុន ម៉ាស គឺជាអ្នកមានជាងគេបំផុតក្នុងពិភពលោក ដោយមានទ្រព្យសរុប ២៧៩ ពាន់លានដុល្លារ នេះបើតាម Bloomberg Billionaires Index។ ទ្រព្យសម្បត្តិរបស់លោក បានកើនជិត ៨០% នៅក្នុងឆ្នាំ ២០២១៕
December 29, 2021
កម្ពុជា រកឃើញអ្នកឆ្លង កូវីដ-១៩ ចំនួន ៤ នាក់ទៀត ក្នុងនោះមានម្នាក់ជាករណី អូមីក្រុង
ក្រៅពីករណីវិជ្ជមាន ក្នុងអំឡុង ២៤ ម៉ោងនៃថ្ងៃទី ២៨ ធ្នូ កម្ពុជា ក៏មានអ្នកស្លាប់ដោយសារជំងឺកូវីដ-១៩ ចំនួន ១ នាក់ផងដែរ។

December 29, 2021
ចំការផលិតអគ្គិសនីដើរដោយកម្លាំងខ្យល់លើសមុទ្រធំបំផុតនៅ ប្រទេសចិន ចាប់ផ្ដើមដំណើរការ
ប្រទេសចិន កាលពីថ្ងៃទី ២៤ ធ្នូ ២០២១ បានដាក់ឱ្យដំណើរការចំការផលិតអគ្គិសនីដើរដោយកម្លាំងខ្យល់លើផ្ទៃសមុទ្រ ដែលផ្ដល់ថាមពលអគ្គិសនីជាង ១ លានគីឡូវ៉ាត់ ដំបូងគេបង្អស់របស់ប្រទេសនេះ។
ចំការផលិតអគ្គិសនីដើរដោយថាមពលខ្យល់លើសមុទ្រធំបំផុតនៅ ប្រទេសចិន បានចាប់ផ្ដើមផលិតអគ្គិសនី និងតភ្ជាប់បណ្ដាញកាលពីថ្ងៃទី ២៤ ធ្នូ ដែលនេះគឺជាជំហានថ្មីមួយនៅក្នុងការប្ដេជ្ញាអភិវឌ្ឍថាមពលស្អាតរបស់ ប្រទេសចិន។
ស្ថិតនៅលើផ្ទៃសមុទ្ររបស់ទីក្រុង Yangjiang នៃខេត្ត ក្វាងទុង ភាគខាងត្បូង ប្រទេសចិន ចំការអគ្គិសនី Yangjiang Shapa ត្រូវបានសាងសង់ដោយក្រុមហ៊ុនចិន China Three Gorges Corporation ដោយប្រើប្រាស់ទុនសរុប ៥.៥ ពាន់លានដុល្លារអាម៉េរិក។ គម្រោងនេះរួមមាន ទួរប៊ីនខ្យល់ចំនួន ២៦៩ គ្រឿង ដែលអាចផ្ដល់អគ្គិសនី ១.៧ លានគីឡូវ៉ាត់។
ប្រធានក្រុមហ៊ុន China Three Gorges Corporation លោក Lei Mingshan បានឱ្យដឹងថា ការសាងសង់គម្រោងនេះនឹងនាំមកនូវបទពិសោធន៍ដ៏មានតម្លៃ ទាក់ទងនឹងការអភិវឌ្ឍចំការផលិតអគ្គិសនីដើរដោយថាមពលខ្យល់នៅលើផ្ទៃសមុទ្រក្នុងទ្រង់ទ្រាយធំ និងប្រមូលផ្ដុំនៅ ប្រទេសចិន ក៏ដូចជានៅក្នុងតំបន់ទឹកជ្រៅ។
ក្រោយពីបានឈានដល់ដំណាក់កាលដំណើរការទាំងស្រុង ចំការផលិតអគ្គិសនី Yangjiang Shapa នឹងផ្គត់ផ្គង់អគ្គិសនីបៃតងចំនួន ៤.៧ ពាន់លានគីឡូវ៉ាត់/ម៉ោង ជារៀងរាល់ឆ្នាំ ប្រហាក់ប្រហែលនឹងការដុតធ្យូងថ្មចំនួនប្រហែល ១.៥ លានតោន នៅក្នុងវិស័យផលិតអគ្គិសនីដោយប្រើប្រាស់ធ្យូងថ្ម។ ប្រការនេះនឹងជួយកាត់បន្ថយឧស្ម័នកាបូនឌីអុកស៊ីត ប្រមាណ ៤ លានតោន/ឆ្នាំ។
គម្រោងនេះនឹងផ្គត់ផ្គង់តម្រូវការប្រើប្រាស់អគ្គិសនីរបស់គ្រួសារដែលជាអតិថិជនចំនួន ២ លានគ្រួ ហើយរួមចំណែកក្នុងការផ្លាស់ប្ដូរហេដ្ឋារចនាសម្ព័ន្ធថាមពលនៅតំបន់ឈូងសមុទ្រ ក្វាងទុង-ហុងកុង-ម៉ាកាវ៕
December 29, 2021
មន្ត្រីរបស់ សហរដ្ឋអាម៉េរិក ថ្លែងថា ឧបករណ៍ធ្វើតេស្តរហ័សលក្ខណៈគ្រួសារ អាចបង្ហាញលទ្ធផល «អវិជ្ជមានក្លែងក្លាយ» ចំពោះ អូមីក្រុង
ដោយយោងទៅតាមទិន្នន័យដំបូង ក្រុមមន្ត្រីរបស់ សហរដ្ឋអាម៉េរិក យល់ថា ឧបករណ៍ធ្វើតេស្តរហ័សលក្ខណៈគ្រួសារ មានប្រសិទ្ធភាពទាប ហើយអាចផ្ដល់លទ្ធផលអវិជ្ជមានក្លែងក្លាយចំពោះ វីរុសកូវីដ-១៩ ប្រភេទ អូមីក្រុង។
«ទិន្នន័យដំបូងបង្ហាញថា ការធ្វើតេស្តអង់ទីហ្សែន អាចរកឃើញអ្នកផ្ទុក អូមីក្រុង ប៉ុន្តែ មានកម្រិតជាក់លាក់មិនបានដូច វ៉ារ្យ៉ង់ ផ្សេង» អាជ្ញាធរគ្រប់គ្រងអាហារនិងឱសថ (FDA) របស់ សហរដ្ឋអាម៉េរិក បានប្រកាសដូច្នេះ កាលពីថ្ងៃទី ២៨ ធ្នូ។
FDA បានលើកឡើងដូច្នេះ បន្ទាប់ពីបានសហការជាមួយវិទ្យាស្ថានជាតិសុខាភិបាល (NIH) ដើម្បីស្រាវជ្រាវលើប្រសិទ្ធភាពរបស់ឧបករណ៍ធ្វើតេស្តលក្ខណៈគ្រួសារ ឬហៅថា ឧបករណ៍ធ្វើតេស្ដអង់ទីហ្សែន នៅលើអ្នកជំងឺដែលត្រូវបានបញ្ជាក់ថា វិជ្ជមាននឹង អូមីក្រុង។
ប្រសិទ្ធភាពទាបរបស់ឧបករណ៍តេស្តរហ័សចំពោះសំណាកដែលផ្ទុក អូមីក្រុង គឺមានន័យថា វិធីសាស្ត្រពិសោធនេះ អាចរំលងចោលករណីវិជ្ជមាន និងបង្ហាញលទ្ធផល «អវិជ្ជមានក្លែងក្លាយ» នេះបើតាម FDA។
ឧបករណ៍ធ្វើតេស្តរហ័ស កំពុងត្រូវបានពលរដ្ឋអាម៉េរិក តាមរកទិញ ដើម្បីងាយស្រួលក្នុងការធ្វើតេស្តរកវីរុសកូវីដ-១៩ លក្ខណៈគ្រួសារ ក្នុងគ្រាដែលករណីវិជ្ជមាននឹង កូវីដ-១៩ នៅប្រទេសនេះកំពុងកើនឡើងខ្ពស់។ ឧបករណ៍ធ្វើតេស្តអង់ទីហ្សែនលក្ខណៈគ្រួសារ អាចរកឃើញអ្នកផ្ទុកវីរុស ដោយប្រើពេលខ្លី ខណៈដែលការពិសោធដោយម៉ាស៊ីន PCR នៅឯមន្ទីរពិសោធន៍ ស៊ីពេលយូរជាងឆ្ងាយ៕
December 29, 2021
WHO ព្រមានថា ហានិភ័យនៃការឆ្លង កូវីដ-១៩ ប្រភេទ អូមីក្រុង «នៅតែខ្ពស់ខ្លាំង»
អង្គការសុខភាពពិភពលោក (WHO) បានឱ្យដឹងថា ហានិភ័យទូទៅដែលបណ្ដាលមកពី វ៉ារ្យ៉ង់ អូមីក្រុង «នៅតែមានកម្រិតខ្ពស់ខ្លាំង» បន្ទាប់ពីករណីឆ្លង កូវីដ-១៩ នៅទូទាំងសកលលោក កើន ១១% កាលពីសប្ដាហ៍កន្លង។
«ភ័ស្ដុតាងស៊ីចង្វាក់គ្នាបានបង្ហាញ ថា វ៉ារ្យ៉ង់ អូមីក្រុង មានលទ្ធភាពកើនឡើងខ្ពស់ជាង ដេលតា ដោយការកើនឡើងទ្វេដងរបស់វា ស៊ីពេលត្រឹមតែពី ២ ទៅ ៣ ថ្ងៃប៉ុណ្ណោះ។ ការកើនឡើងយ៉ាងឆាប់រហ័សនៃករណីឆ្លង ត្រូវបានរកឃើញនៅប្រទេសជាច្រើន» WHO បានឱ្យដឹងដូច្នេះ នៅថ្ងៃនេះ។
WHO វាយតម្លៃថា ល្បឿនយ៉ាងលឿននៃការកើនឡើងរបស់ករណីឆ្លងអាចបណ្ដាលមកពី «ការរួមផ្សំរវាងសមត្ថភាពនៃការគេចពីប្រព័ន្ធការពាររាងកាយ និងភាពងាយឆ្លងរាលដាលរបស់ អូមីក្រុង»។
ប៉ុន្តែ WHO ក៏បានសង្កត់ធ្ងន់ថា អត្រានៃករណីឆ្លងដែលត្រូវបានតាមដាននៅ អាហ្វ្រិកខាងត្បូង ដែលជាប្រទេសដំបូងគេបានរាយការណ៍អំពីវត្តមានរបស់ អូមីក្រុង បានថយចុះ ២៩%។ រីឯទិន្នន័យដំបូងដែលបានមកពី ប្រទេសអង់គ្លេស អាហ្វ្រិកខាងត្បូង និង ដាណឺម៉ាក ក៏បានបង្ហាញថា ហានិភ័យនាំឱ្យចូលពេទ្យដោយសារ អូមីក្រុង ថយចុះ ឬទាបជាង បើធៀបនឹង ដេលតា។
ទោះជាយ៉ាងណាក៏ដោយ ក្រុមអ្នកវិទ្យាសាស្ត្រនៅតែត្រូវការទិន្នន័យច្រើនបន្ថែមទៀតដើម្បីអាចកំណត់បាននូវកម្រិតនៃភាពធ្ងន់ធ្ងររបស់ អូមីក្រុង ទាក់ទិននឹងការព្យាបាលក្នុងមន្ទីរពេទ្យ ដោយប្រើប្រាស់ អុកស៊ីសែន ម៉ាស៊ីនជំនួយដង្ហើម និងការស្លាប់៕
December 29, 2021
ដំណើរកម្សាន្តបោះជំរំបែបផ្សងព្រេងរបស់អតិថិជន FORD “FORD Adventure ២០២១” ឆ្ពោះទៅកាន់ទឹកធ្លាក់ថ្មដា ភ្នំ១៥០០ ស្រុកវាលវែង ខេត្តពោធិ៍សាត់

ដំណើរកម្សាន្ត FORD Adventure ២០២១ ត្រូវបានរៀបចំឡើងកាលពីថ្ងៃទី២៤ដល់ថ្ងៃទី២៦ ខែធ្នូ ឆ្នាំ២០២១ ដែលមានរយៈពេល៣ថ្ងៃ ២យប់ ក្រោមការចូលរួមពីសំណាក់អតិថិជន FORD ចំនួន៧០រថយន្ត ដោយធ្វើដំណើរពីរាជធានីភ្នំពេញ ឆ្ពោះទៅកាន់ទឹកធ្លាក់ថ្មដា ភ្នំ១៥០០ ស្ថិតនៅស្រុកវាលវែង ខេត្តពោធិ៍សាត់។ ដំណើរកម្សាន្តដ៏រីករាយនេះត្រូវបានរៀបចំឡើងដោយក្រុមហ៊ុន អ អិម អេ ខេមបូឌា (RMA Cambodia) ដែលជាក្រុមហ៊ុននាំចូលផ្តាច់មុខរថយន្តម៉ាក FORD មកកាន់ទីផ្សារប្រទេសកម្ពុជា និងសហការជាមួយធនាគារ KB Daehan (KB Daehan Specialized Bank Plc) ជាធនាគារដែលផ្តល់នូវសេវាហិរញ្ញវត្ថុដ៏ល្អនៅក្នុងប្រទេសកម្ពុជា ជាពិសេសឥណទានទិញរថយន្តថ្មី។
ដំណើរកម្សាន្ត FORD Adventure ឆ្នាំ២០២១នេះ មានភាពអធិកអធមណាស់ ទោះជាដំណើរកម្សាន្តលើកនេះមានលក្ខណៈតូចជាងឆ្នាំមុនៗក៏ដោយ តែគឺពេញដោយភាពសប្បាយរីករាយ និងភាពស្និតស្នាលគ្នារវាងអ្នកចូលរួមទាំងអស់ ក្រោមការរៀបចំកម្មវិធីកម្សាន្តជាច្រើនពីសំណាក់ក្រុមហ៊ុន ដែលមានដូចជា ការបោះតង់គេងជុំគ្នា ការជិះរថយន្ត FORD ជាក្បួនប្រមាណ៧០គ្រឿងធ្វើដំណើរឆ្លងកាត់ពីរាជធានីភ្នំពេញទៅកាន់ខេត្តកំពង់ឆ្នាំង ហើយឆ្ពោះទៅទឹកដីស្រុកវាលវែង ខេត្តពោធិ៍សាត់ ដែលជាតំបន់ទេសចរបែបធម្មជាតិថ្មីមួយនៅលើទឹកដីប្រទេសកម្ពុជា ដែលមានទេសភាពដ៏ស្រស់ត្រកាល និងមានអាកាសធាតុត្រជាក់ចិត្ត ត្រជាក់កាយ អមដោយព្រៃភ្នំពណ៌បៃតងស្រស់ មានផ្លូវបត់បែនដូចអន្ទង់ ហើយតាមរយៈការធ្វើដំណើរលើកនេះ អតិថិជន FORD ទាំងអស់ក៏បានទទួលនូវបទពិសោធន៍ថ្មីក្នុងការបើកបរលើប្រភេទផ្លូវដែលមានភាពបត់បែនច្រើន និងបានទៅទស្សនាតំបន់ទេសចរណ៍នៅលើទឹកដីកម្ពុជាយើងមិនតិចនោះទេ។ ក្រៅពីការរីករាយជាមួយការធ្វើដំណើរ និងទេសភាពនៅតាមដងផ្លូវ អ្នកចូលរួមទាំងអស់ក៏បានរីករាយកម្សាន្តជាមួយនឹងការងូតទឹកអូរលេងជុំគ្នា ការថតរូបលេងជាមួយទេសភាពដ៏ស្រស់ស្អាតនៅរមណីដ្ឋានកែច្នៃដែលមានឈ្មោះថា កាហ្វេភ្នំ ដែលស្ថិតនៅលើភ្នំ១៥០០ និងការទស្សនាព្រំដែនថ្មដា ដែលជាព្រំដែនរវាងប្រទេសកម្ពុជា និងប្រទេសថៃផងដែរ។ ចំណែកឯនៅពេលរាត្រីចូលមកដល់ អ្នកចូលរួមនៅក្នុងដំណើរកម្សាន្តលក្ខណៈគ្រួសារ FORD Adventure ឆ្នាំ២០២១ទាំងអស់ ក៏ទទួលបាននូវភាពរីករាយប្លែកអារម្មណ៍មួយបែបទៀត ជាមួយនឹងការច្រៀងរាំកម្សាន្តជួបជុំគ្នាវិញម្តង ដែលកម្មវិធីទាំងនេះបានញ៉ាំងឱ្យដំណើរកម្សាន្តលើកនេះកាន់តែមានភាពសប្បាយរីករាយ ប្រកបដោយអត្ថន័យ និងពេញដោយការចងចាំល្អៗ។
គួរបញ្ជាក់ផងដែរថា គ្រប់កម្មវិធីដំណើរកម្សាន្ត FORD Adventure ក្រុមហ៊ុន អ អិម អេ ខេមបូឌា (RMA Cambodia) មិនដែលឱ្យរំលងនោះទេ គឺក្រុមហ៊ុនតែងតែផ្សារភ្ជាប់ជាមួយនឹងកម្មវិធីសប្បុរសធម៌ជានិច្ច ដើម្បីជាការចូលរួមជួយប្រទេសជាតិ និងជួយដល់ជនទុរគត ដែលកំពុងជួបនឹងការលំបាកនៅក្នុងការរស់នៅ។ ការផ្សារភ្ជាប់ភាពរីករាយនៃដំណើរកម្សាន្ត ជាមួយនឹងការងារសប្បុរធម៌បែបនេះ គឺជាការបណ្តុះគំនិតដល់យុវជនខ្មែរជំនាន់ក្រោយឱ្យចេះជួយគ្នាទៅវិញទៅមក ឱ្យមានសេចក្តីសន្តោសប្រណីដល់ជនទីទាល់ក្រ និងឱ្យពួកគេចេះស្រឡាញ់រាប់អានគ្នាដោយមិនរើសអើងពីឋានៈផងដែរ។

ព្រឹត្តិការណ៍ដំណើរកម្សាន្ត FORD Adventure ប្រចាំឆ្នាំ២០២១នេះ គឺពិតជាពិសេស និងពេញដោយភាពសប្បាយរីករាយខ្លាំងណាស់ អតិថិជនរថយន្ត FORD ទាំងអស់បានទទួលនូវការសម្រាកជួបជុំគ្រួសារ និងស្គាល់មិត្តភក្តិថ្មីៗជាច្រើនពីគ្រប់ខេត្តក្រុងក្នុងប្រទេសកម្ពុជា ព្រមទាំងបានស្គាល់ពីទឹកដីថ្មីនៃស្រុកវាលវែង ក្នុងខេត្តពោធិ៍សាត់ផងដែរ។ លើសពីនេះទៅទៀត ទាំងអតិថិជនរថយន្ត FORD ទាំងអ្នកសារព័ត៌មានទាំងអស់ដែលបានចូលរួមនៅក្នុងដំណើរកម្សាន្តលើកនេះ មានការពេញចិត្តចំពោះការរៀនចំ និងការស្វាគមន៍ដ៏កក់ក្តៅរបស់ក្រុមការងារនៃក្រុមហ៊ុន អ អិម អេ ខេមបូឌា (RMA Cambodia) ក្រៃលែង គឺទាំងកន្លែងដែលបានទៅដើរលេងកម្សាន្ត ទាំងកន្លែងស្នាក់នៅ ទាំងអាហារហូបចុក ទាំងកម្មវិធីកម្សាន្តផ្សេងៗពេញរយៈពេល៣ថ្ងៃ ២យប់នេះ គឺល្អខ្លាំងណាស់ សប្បាយប្លែកអារម្មណ៍តែម្តង នេះជាកាដូដ៏មានអត្ថន័យរបស់ក្រុមហ៊ុន អ អិម អេ ខេមបូឌា (RMA Cambodia) ជូនដល់អតិថិជនដែលតែងតែគាំទ្រដល់រថយន្ត FORD ក្នុងឆ្នាំ២០២១នេះ៕
December 29, 2021