សឿន សំណាង - La Reine Media

កំណាត់ផ្លូវជាង ៨៤ គីឡូម៉ែត្រ នៃគម្រោងស្ដារផ្លូវជាតិលេខ៥ បាត់ដំបង-សិរីសោភ័ណ ត្រូវបានសម្ពោធដាក់ឱ្យប្រើប្រាស់ជាផ្លូវការ

នាព្រឹកថ្ងៃទី ១០ មករានេះ សម្ដេចនាយករដ្ឋមន្ត្រី ហ៊ុន សែន និង ឯកអគ្គរាជទូតជប៉ុន អញ្ជើញសម្ពោធដាក់ឱ្យធ្វើចរាចរណ៍ជាផ្លូវការនូវកំណាត់ផ្លូវប្រវែងជាង ៨៤ គីឡូម៉ែត្រ នៃគម្រោងស្ដារផ្លូវជាតិលេខ៥ បាត់ដំបង-សិរីសោភ័ណ។

សម្ដេចតេជោ ហ៊ុន សែន និង ឯកឧត្តម មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុន ប្រចាំកម្ពុជា អញ្ជើញជាអធិបតី និងកាត់ខ្សែបូក្នុងពិធីសម្ពោធនេះ ដែលប្រារព្ធឡើងនៅស្រុកថ្មគោល ខេត្តបាត់ដំបង នាព្រឹកថ្ងៃទី ១០ ខែមករា ឆ្នាំ ២០២២។

កំណាត់ផ្លូវជាតិលេខ៥ ប្រវែងជាង ៨៤ គីឡូម៉ែត្រ ដែលតភ្ជាប់ខេត្តបាត់ដំបង ទៅកាន់ ក្រុងសិរីសោភ័ណ នៃខេត្តបន្ទាយមានជ័យ នេះ ត្រូវបានប្រកាសបើកការដ្ឋានស្ថាបនាកាលពីថ្ងៃទី ២៦ ខែមីនា ឆ្នាំ ២០១។ គម្រោងនេះ ត្រូវបានចំណាយថវិកាសរុបប្រមាណ ១៦៥.៧៨ លានដុល្លារអាមេរិក ក្រោមហិរញ្ញប្បទានអភិវឌ្ឍពី រាជរដ្ឋាភិបាលជប៉ុន រួមជាមួយនឹងថវិកាបដិភាគរបស់ រាជរដ្ឋាភិបាលកម្ពុជា។ កំណាត់ផ្លូវជាង ៨៤ គីឡូម៉ែត្រ នៃគម្រោងស្ដារផ្លូវជាតិលេខ៥ បាត់ដំបង-សិរីសោភ័ណ ដែលបានស៊ីពេលអស់ ៥៥ ខែក្នុងការសាងសង់នេះ ត្រូវបានបញ្ចប់រួចរាល់កាលពីខែ កញ្ញា ២០២១៕

January 10, 2022

បច្ចេកវិទ្យា ៦G លឿនជាងរាប់សិបដងធៀបនឹងប្រព័ន្ធ ៥G

(ប្រទេសចិន)-បន្ទប់ពិសោធន៍បច្ចេកវិទ្យាជាន់ខ្ពស់នៅក្នុងខេត្ត Jiangsu បង្កើតបានឯតទគ្គកម្មថ្មីក្នុងការអភិវឌ្ឍបច្ចេកវិទ្យាទំនាក់ទំនងជំនាន់ថ្មី។

បន្ទប់ពិសោធន៍ Purple Mountain នៅក្នុងទីក្រុង Nanning នៃខេត្ត Jiangsu កាលពីថ្ងៃទី ៥ មករា បានឱ្យដឹងថា ក្រុមអ្នកជំនាញដែលដឹកនាំដោយសាស្ត្រាចារ្យ You Xiaohu បានអភិវឌ្ឍបច្ចេកវិទ្យាបញ្ជូនទិន្នន័យគ្មានខ្សែជំនាន់ទី ៦ (៦G) ជាមួយនឹងល្បឿន ២០៦.២៥ gigabit/វិនាទី ជាលើកដំបូង។ គម្រោងនេះត្រូវបានអនុវត្តដោយក្រុមហ៊ុនទូរគមនាគមន៍ China Mobile សហការជាមួយសាកលវិទ្យាល័យ Fudan ដោយមានការឧបត្ថម្ភថវិកាពី រដ្ឋាភិបាលចិន។

ល្បឿនខាងលើគឺជាឯតទគ្គកម្មពិភពលោកចំពោះការបញ្ជូនទិន្នន័យគ្មានខ្សែនៅលើ ហ្វ្រេកង់ terahertz (300GHz-3THz) ដែលត្រូវបានចាត់ទុកថាជាថ្នាលសម្រាប់ការតភ្ជាប់ប្រព័ន្ធទូរស័ព្ទចល័ត ៦G នាពេលអនាគត នេះបើតាម Purple Mountain។ បច្ចេកវិទ្យាទំនាន់ទំនង ៦G នឹងក្លាយជាកំណែបន្ទាប់របស់ ៥G ដោយមានល្បឿនលឿនជាង ៥G រហូតដល់ចាប់ពី ១០ ទៅ ២០ ដងឯណោះ។

ក្រុមអ្នកស្រាវជ្រាវបានពិសោធបញ្ជូនទិន្នន័យល្បឿន ២០៦.២៥ gigabit/វិនាទី ដោយជោគជ័យ

យោងតាម You Xiaohu បច្ចេកវិទ្យាថ្មីនេះអាចនឹងត្រូវបានប្រើប្រាស់នៅក្នុងការទាក់ទងគ្នារវាងផ្កាយរណប យានអវកាស និងផែនដី។

ក្រុមហ៊ុន Huawei Technologies របស់ ចិន បានព្យាករថា ប្រព័ន្ធ ៦G អាចត្រូវបានដាក់ឱ្យប្រើប្រាស់ចាប់ពីឆ្នាំ ២០៣០។ ចំណែក Ericsson ដែលជាក្រុមហ៊ុនផលិតឧបករណ៍ ៥G លំដាប់កំពូលមួយ រំពឹងថា បទដ្ឋានដំបូងសម្រាប់ប្រព័ន្ធ ៦G នឹងត្រូវបានដាក់ចេញនៅឆ្នាំ ២០២៧។

ប្រទេសចិន គឺជាប្រទេសដែលមានស្ថានីយនៃប្រព័ន្ធ ៥G ច្រើនជាងគេក្នុងពិភពលោក។ គិតត្រឹមខែវិច្ឆិកា ២០២១ ចិន បានសាងសង់ និងដាក់ឱ្យដំណើរការស្ថានីយនេះប្រមាណ ១.៤ លានកន្លែងនៅទូទាំងប្រទេស។ ប៉ុន្តែ ការដាក់ពង្រាយប្រព័ន្ធ ៥G នាបច្ចុប្បន្ន នៅមានល្បឿនយឺតនៅឡើយ ដោយសារតែវាមានតម្លៃខ្ពស់៕

January 10, 2022

ក្រសួងសាធារណការ ណែនាំឱ្យប្រើប្រាស់ ក្រុមតេឡេក្រាម “សុវត្ថិភាពចរាចរណ៍យើង OUR ROAD SAFETY» ដើម្បីផ្តល់ព័ត៌មានទាន់ហេតុការណ៍ ពាក់ព័ន្ធស្ថានភាពចរាចរណ៍ផ្លូវគោក

គណៈកម្មាធិការជាតិសុវត្ថិភាពចរាចរណ៍ផ្លូវគោក បានបង្កើតក្រុមតេឡេក្រាម (Telegram Group) មួយ ដែលមានឈ្មោះថា “សុវត្ថិភាពចរាចរណ៍យើង OUR ROAD SAFETY» ជូនសាធារណជនសម្រាប់ប្រើប្រាស់ដោយសេរី ដើម្បីផ្តល់ព័ត៌មានទាន់ហេតុការណ៍ អំពីស្ថានភាពចរាចរណ៍ផ្លូវគោក បន្ទាប់ពីមានអនុសាសន៍របស់ សម្តេចតេជោ ហ៊ុន សែន។

ការបង្កើតក្រុមតេឡេក្រាមនេះ ត្រូវបានគណៈកម្មាធិការជាតិសុវត្ថិភាពចរាចរណ៍ផ្លូវគោក អះអាងថា គឺដើម្បីបង្ការ ទប់ស្កាត់ កាត់បន្ថយគ្រោះថ្នាក់ និងបង្ការ ទប់ស្កាត់អំពើល្មើសច្បាប់ស្តីពីចរាចរណ៍ផ្លូវគោក ជាកម្មវិធីមួយដែលបន្ថែមពីលើបណ្តាញសង្គម និងកម្មវិធីផ្តល់ព័ត៌មាននានាដែលគណៈកម្មាធិការនេះកំពុងដាក់ឱ្យប្រើប្រាស់។

គណៈកម្មាធិការជាតិសុវត្ថិភាពចរាចរណ៍ផ្លូវគោក បានណែនាំដូចខាងក្រោម ទាក់ទងនឹងការផ្ដល់ព័ត៌មានពីសំណាក់សាធារណជន៖

១. ព័ត៌មាន ទីតាំង និងពេលវេលា នៃហេតុការណ៍ ត្រូវតែពិតប្រាកដ និងច្បាស់លាស់។
២. រូបភាព ឬវីដេអូខ្លីៗ នៃហេតុការណ៍ ត្រូវតែពិតៗ និងជាក់ស្តែង។
៣. ខ្លឹមសារព័ត៌មាន ត្រូវប្រកាន់ខ្ជាប់តាមក្រមសីលធម៌។
៤. មិនត្រូវផ្ដល់ព័ត៌មានក្លែងក្លាយ ឬព័ត៌មានដែលមានចរិតញុះញង់ មួលបង្កាច់ ឬប្រើពាក្យពេចន៍អសុរោះ ឬរូបភាពអាសអាភាស។

ក្រៅពីនេះ សាធារណជនក៏អាចរាយការណ៍តាមរយៈកម្មវិធីលើទូរស័ព្ទដៃ «ថែទាំផ្លូវថ្នល់ ROAD CARE» ដែលអាចទាញយកពី App Store ផងដែរ។

January 8, 2022

ស្ថិតិថ្មីស្ដីពីស្ថានការណ៍ជំងឺកីវីដ-១៩ នៅ កម្ពុជា សម្រាប់ថ្ងៃនេះ

ក្នុងអំឡុង ២៤ ម៉ោង នៃថ្ងៃទី ៧ មករា ២០២២ កម្ពុជា កឃើញអ្នកឆ្លងថ្មី ២៧ នាក់ទៀត (សុទ្ធតែករណី អូមីក្រុង) និងជាសះស្បើយ ១២ នាក់ ខណៈអ្នកស្លាប់ «គ្មាន»។

January 8, 2022

ត្រូវឆ្នោតតម្លៃ ១លានដុល្លារអាម៉េរិក ដោយសារអំណោយក្នុងថ្ងៃបុណ្យណូអែល

(សហរដ្ឋអាម៉េរិក)-និស្សិតម្នាក់នៅសាកលវិទ្យាល័យ Virginia បានត្រូវឆ្នោតតម្លៃ ១ លានដុល្លារអាម៉េរិក ពីអំណោយដែលម្ដាយបានឱ្យក្នុងថ្ងៃបុណ្យណែអែល ឆ្នាំ ២០២១។

Brian Donohue ដែលជានិស្សិតម្នាក់នៅសាកលវិទ្យាល័យ Virginia ក្រោកពីគេងក្នុងថ្ងៃបុណ្យណែអែល ក៏ស្រាប់តែបានប្រទះឃើញសន្លឹកឆ្នោត Bank a Million ១ សន្លឹក នៅក្នុងចំណោមកាដូដែលខ្លួនបានទទួលពីម្ដាយ។ ម្ដាយរបស់ Brian បានទិញសន្លឹកឆ្នោតនេះកាលពីថ្ងៃទី ២២ ធ្នូ ២០២១ ពីហាងទំនិញមួយនៅ Okaton។

Brian បានផ្ទៀងលេខឆ្នោត ហើយក៏ឃើញថា លេខ ៤-៨-២១-២៥-៣២-៣៥ គឺជាលេខត្រូវរង្វាន់តម្លៃ ១ លានដុល្លារក្រោយការបង់ពន្ធ។ កំលោះនេះបានទៅទទួលប្រាក់រង្វាន់កាលពីថ្ងៃទី ២៧ ធ្នូ ២០២១ ប៉ុន្តែ រហូតដល់យប់ថ្ងៃទី ៦ មករា ២០២២ ទើបព័ត៌មាននេះត្រូវបានផ្សព្វផ្សាយ។ Brian ឱ្យដឹងថា នឹងប្រើប្រាស់លុយនេះដើម្បីបង់ថ្លៃសាលារៀន។

ឆ្នោត Bank a Billion ត្រូវបានបោះផ្សាយផ្ដាច់មុខនៅ Virginia និងចាប់រង្វាន់នៅថ្ងៃពុធ និងថ្ងៃសៅរ៍រៀងរាល់សប្ដាហ៍ នៅវេលាម៉ោង ២។ រង្វាន់ធំជាងគេរួមមាន ១ លានដុល្លារ, កន្លះលានដុល្លារ និង ២៥០,០០០ ដុល្លារ ក្រោយការបង់ពន្ធរួច។ អត្រានៃការត្រូវរង្វាន់ធំជាងគេគឺ ១/៣.៨ លាន មានន័យថា ក្នុងចំណោមសន្លឹកឆ្នោតចំនួន ៣,៨០០,០០០ សន្លឹក គឺមាន ១ សន្លឹកជារង្វាន់ធំជាងគេ៕

January 8, 2022

ក្រោយពីបានទទួលការចាក់វ៉ាក់សាំងកូវីដ-១៩ រហូតដល់ ១២ ដូស លោកតាម្នាក់អះអាងថា ជំងឺនានារបស់គាត់បានជាសះស្បើយ

(ឥណ្ឌា)-លោកតា Brahmdeo Mandal វ័យ ៨៥ ឆ្នាំ នៅក្នុងរដ្ឋ Bihar យល់ថា វ៉ាក់សាំងបង្ការកូវីដ-១៩ បានជួយឱ្យគាត់មានសុខភាពល្អជាងមុន ទើបបានគាត់សម្រេចចិត្តទៅទទួលការចាក់វ៉ាក់សាំងរហូតដល់ ១២ ដូស និងនៅតែមានបំណងទទួលការចាក់ថែមទៀត។

លោកតា Mandal ដែលជាអតីតបុគ្គលិកប្រៃសណីយ៍ម្នាក់ បានឱ្យដឹងថា លោកតាបានទទួលការចាក់ដូសដំបូងនៅថ្ងៃទី ១៣ កុម្ភៈ ២០២១ នៅមន្ទីរពេទ្យក្នុងតំបន់ ហើយទទួលការចាក់បន្តទៀតចាប់ពីពេលនោះ។ លោកតារូបនេះបានកត់ត្រាពេលវេលា និងទីតាំងនីមួយៗបន្ទាប់ពីបានទទួលការចាក់។ លោកតា Mandal អះអាងថា ដូសទី ៩ ត្រូវបានចាក់កាលពីថ្ងៃទី ២៤ កញ្ញា ២០២១ នៅឯមន្ទីរពេទ្យមួយក្នុងតំបន់ Kalashan ស្រុក Madhepura។

«ខ្ញុំយល់ថា វ៉ាក់សាំងកំពុងជួយដល់សុខភាពទូទៅរបស់ខ្ញុំ» លោកតានិយាយដូច្នេះកាលពីថ្ងៃទី ៧ មករា នៅក្នុងកិច្ចសម្ភាសតាមទូរស័ព្ទ។ លោកតាបន្តថា «អាការឈឺចង្កេះ ភាពអស់កម្លាំងបានធូរស្រាល ហើយខ្ញុំក៏ហូបបានឆ្ងាញ់មាត់ជាងមុន។ ខ្ញុំតែងតែស្វែងរក និងទៅកាន់ទីតាំងចាក់វ៉ាក់សាំងថ្មី។ គ្មាននរណាស្គាល់ខ្ញុំឡើយ»។

វេជ្ជបណ្ឌិត Amarendra Narayan Shahi ប្រធានមន្ទីរពេទ្យនៅ Madhepura ថ្លែងថា បាននិយាយគ្នាជាមួយលោកតា Mandal ហើយត្រូវលោកតាប្រាប់ថា ចង់ចាក់វ៉ាក់សាំងថែមទៀត ព្រោះជឿថា វាអាចព្យាបាលជាសះស្បើយនូវជំងឺទូទៅរបស់មនុស្សចាស់។ «គាត់អះអាងថា បានចាក់វ៉ាក់សាំង ១២ ដូស រួចហើយ។ ខ្ញុំបានបង្កើតក្រុមស្រាវជ្រាវមួយដែលមានសមាជិក ៣ រូប ដើម្បីស្វែងរកការពិត» វេជ្ជបណ្ឌិត Shahi បន្ថែមដូច្នេះ។

ប្រភពព័ត៌មានឱ្យដឹងថា ៩ ដូស ក្នុងចំណោម ១២ ត្រូវបានលោកតាប្រើប្រាស់អត្តសញ្ញាណប័ណ្ណ និងលេខទូរស័ព្ទដើម្បីចុះឈ្មោះ។ ចំណែក ៣ ដូស ទៀត លោកតាចុះឈ្មោះដោយប្រើប្រាស់ប័ណ្ណបោះឆ្នោត លេខទូរស័ព្ទរបស់ភរិយា និងលេខទូរស័ព្ទមិត្តភក្ដិ។

ពុំទាន់ដឹងច្បាស់ថា ព័ត៌មានស្ដីពីការចាក់វ៉ាក់សាំង ១២ ដូស របស់លោកតា Mandal បានបែកធ្លាយដោយសារមូលហេតុណានោះទេ ប៉ុន្តែ ដំណឹងនេះទំនងជាត្រូវបានលោកតា Mandal និយាយប្រាប់អ្នកណាម្នាក់ ហើយម្នាក់នោះក៏បានប្រាប់អ្នកយកព័ត៌មាន។ បច្ចុប្បន្ន ក្រុមមន្ត្រីស្រុក Madlepura កំពុងធ្វើការស្រាវជ្រាវលើករណីនេះ។

មិនទាន់មានការសិក្សាស្រាវជ្រាវណាមួយដែលបញ្ជាក់ថា ការចាក់វ៉ាក់សាំង ១២ ដូស នឹងនាំមកនូវផលប្រយោជន៍ជាក់លាក់ដល់សុខភាព ឬវ៉ាក់សាំងមានប្រសិទ្ធភាពផ្សេងទៀតក្រៅពីការប្រឆាំងកូវីដ-១៩ នៅឡើយ។ ក៏ប៉ុន្តែ ជាក់ស្ដែង ការជជែកវែកញែកអំពីហានិភ័យនៃការចាក់វ៉ាក់សាំងជាបន្តបន្ទាប់ កំពុងត្រូវបានធ្វើឡើង ដោយក្រុមអ្នកវិទ្យាសាស្ត្រមួយចំនួនយល់ថា វាអាចនាំឱ្យប្រព័ន្ធការពាររាងកាយត្រូវអស់កម្លាំង ឬទប់មិនឱ្យវាប្រតិកម្មជាមួយនឹងកំណែវ៉ាក់សាំងនាពេលអនាគត។

លទ្ធផលនៃការស្រាវជ្រាវនឹងកំណត់ច្បាស់ថា លោកតា Mandal បានទទួលការចាក់វ៉ាក់សាំងប៉ុន្មានដូសរួចហើយ។ រដ្ឋ Bihar គឺជាតំបន់ដែលកើតមានករណីខុសប្រក្រតីច្រើនជាងគេនៅក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ នៅ ឥណ្ឌា ដែលជាប្រទេសបានចាក់វ៉ាក់សាំង ១.៥ ពាន់លានដូសរួចហើយ៕

January 8, 2022

(វីដេអូ)-SpaceX បើកទំព័រឆ្នាំ ២០២២ របស់ខ្លួន ដោយការបាញ់បង្ហោះផ្កាយរណប ៤៩ គ្រឿង

ក្រុមហ៊ុន SpaceX កាលពីព្រឹកម្សិលមិញ បានបំពេញបេសកកម្មអវកាសដំបូងក្នុងឆ្នាំ ២០២២ ដែលនាំយកផ្កាយរណបអ៊ីនធើណិតថ្មីទៅកាន់ទីអវកាស។

ផ្កាយរណប Starlink សរុប ៤៩ គ្រឿង ត្រូវបានដាក់នៅលើក្បាលរ៉ុក្កែត Falcon 9 ហើយហោះឡើងពីប្រព័ន្ធទម្រ ៣៩A នៅឯមជ្ឈមណ្ឌលអវកាស Kennedy ក្នុងរដ្ឋ Florida សហរដ្ឋអាម៉េរិក នៅវេលាម៉ោង ១៦:៤៩ នាទី ថ្ងៃទី ៦ មករា ម៉ោងក្នុងស្រុក ត្រូវនឹងម៉ោង ៤:៤៦ នាទី ថ្ងៃទី ៧ មករា នៅ ភ្នំពេញ។

ប្រហែល ៩ នាទី ក្រោយការបាញ់បង្ហោះ កំណាត់រុញច្រានដំបូងរបស់ រ៉ុក្កែត (B១០៦២) បានផ្ដាច់ខ្លួន និងចុះចតលើស្រឡាងគ្មានមនុស្សបើកថ្មីដែលមានឈ្មោះថា «A Shortfall of Gravitas» នៅលើមហាសមុទ្រ អាត្លង់ទិក ជាបេសកកម្មជោគជ័យដំបូងរបស់ SpaceX ក្នុងឆ្នាំថ្មី។

ក្រុមហ៊ុនរបស់មហាសេដ្ឋី Elon Musk បានបញ្ជាក់ថា ផ្កាយរណប ៤៩ គ្រឿង ត្រូវបានដាក់ពង្រាយដោយជោគជ័យ បន្ទាប់ពីបាញ់បង្ហោះបានប្រហែល ១ ម៉ោង និង ២០ នាទី ដូច្នេះចំនួនផ្កាយរណប Starlink សរុបដែលកំពុងស្ថិតនៅក្នុងគន្លងគោចរ ឡើងដល់ជិត ២,០០០ គ្រឿង។

គោលដៅរបស់ SpaceX គឺការផ្គត់ផ្គង់សេវាអ៊ីនធើណិតនៅទូទាំងសកលលោក ពិសេសគឺនៅតំបន់ដាច់ស្រយាល ជាទីដែលពិបាកប្រើប្រាស់អ៊ីនធើណិតបំផុត។ បច្ចុប្បន្ន សេវាកម្មនេះរបស់ SpaceX កំពុងត្រូវបានប្រើប្រាស់ពេញលេញ និងមានស្រាប់នៅក្នុងប្រទេសចំនួន ២០ ដោយមានអ្នកប្រើប្រាស់ជាង ១០០,០០០ នាក់បានចុះឈ្មោះ៕

January 8, 2022

(វីដេអូ)-ក្រុមហ៊ុនអាម៉េរិក បង្ហាញយានថ្មី ចូលរួមប្រកួតប្រជែងក្នុងវិស័យទេសចរណ៍អវកាស

នៅក្នុងព្រឹត្តិការណ៍តាំងពិព័រណ៍ CES ២០២២ ក្រុមហ៊ុន Sierra Space បានតាំងបង្ហាញគំរូយានអវកាសឈ្មោះ Dream Chaser ដែលអាចដឹកមនុស្សបាន ៦ នាក់ ឡើងទៅកាន់ទីអវកាស។

ក្រុមហ៊ុន Sierra Space មានមូលដ្ឋាននៅ Colorado សហរដ្ឋអាម៉េរិក បានចុះកិច្ចព្រមព្រៀងជាមួយទីភ្នាក់ងារអវកាសអាម៉េរិក (NASA) ស្ដីពីការហោះហើរទៅកាន់ស្ថានីយអវកាសអន្តរជាតិ (ISS) សម្រាប់ឆ្នាំនេះ។ ដើមឡើង Dream Chaser ត្រូវបានអភិវឌ្ឍឡើងដើម្បីដឹកទំនិញទៅកាន់ ISS ប៉ុន្តែ នៅក្នុងប្រកាសថ្មីមួយនៅ CES ២០២២ ក្រុមហ៊ុន Sierra Space បានបង្ហើបឱ្យដឹងថា កំពុងបន្ទាន់សម័យយានអវកាសនេះ ដើម្បីអាចដឹកមនុស្សទៅកាន់ទីអវកាស ដែលនេះគឺជាការចូលរួមប្រកួតប្រជែងក្នុងវិស័យទេសចរណ៍អវកាស។

ដោយមានបណ្ដោយប្រមាណ ៩ ម៉ែត្រ យាន Dream Chaser អាចដឹកក្រុមហោះហើរមួយក្រុមដែលមានគ្នា ៦ នាក់ ពីផែនដី ទៅកាន់មូលដ្ឋានពាណិជ្ជកម្មនានានៅលើគន្លងគោចរកម្រិតទាបនៃផែនដី ដែល Sierra Space គ្រោងនឹងសាងសង់នៅក្នុងទសវត្សរ៍ខាងមុខ។

Sierra Space បានចុះកិច្ចព្រមព្រៀងជាមួយ Blue Origin ដើម្បីអភិវឌ្ឍស្ថានីយអវកាសឯកជនមួយដែលមានឈ្មោះថា Orbital Reef។ ក្រុមហ៊ុន Blue Origin មានបំណងប្រែក្លាយ Orbital Reef ទៅជាមជ្ឈមណ្ឌលពាណិជ្ជកម្មមួយនៅទីអវកាស ដោយមានសេវាកម្មផលិត អាជីវកម្ម កម្សាន្ត កីឡា និងទេសចរណ៍ផ្សងព្រេង។

កាលពីខែមុន NASA បានប្រគល់ថវិកាជាង ៤១៥ លានដុល្លារ ទៅឱ្យក្រុមហ៊ុនម៉ៅការចំនួន ៣ គឺ Blue Origin, Northrop Grumman និង Nanoracks ដើម្បីអភិវឌ្ឍស្ថានីយអវកាសពាណិជ្ជកម្មមួយចំនួនដែលវិស័យឯកជនធ្វើជាម្ចាស់កម្មសិទ្ធិ និងជាអ្នកគ្រប់គ្រង ក្នុងបំណងជំរុញកំណើនសេដ្ឋកិច្ចដែលដឹកនាំដោយ សហរដ្ឋអាម៉េរិក នៅលើគន្លងគោចរកម្រិតទាបរបស់ផែនដី នៅពេល ISS «ចូលនិវត្តន៍» នៅចុងទសវត្សរ៍នេះ។

ក្រុមវិស្វករសង្ឃឹមថា Dream Chaser នឹងបើកទំព័រសករាជថ្មីក្នុងវិស័យទេសចរណ៍អវកាស និងការស្រាវជ្រាវអវកាស។ ជើងហោះហើរដំបូងទៅកាន់ទីអវកាសរបស់ Dream Chaser អាចកើតឡើងនៅចុងឆ្នាំ ២០២២៕

January 8, 2022

«កុំសន្សំប្រាក់សម្រាប់កូនៗ មុនពេលសន្សំទ្រព្យសម្រាប់ខ្លួនឯង» នេះជាអនុសាសន៍របស់អតីតមេដឹកនាំមួយរូប នៃក្រុមហ៊ុនអាម៉េរិក JPMorgan

Anne Lester អតីតប្រធានផ្នែកដំណោះស្រាយសម្រាប់ការចូលនិវត្តន៍របស់ក្រុមហ៊ុន JPMorgan Asset Management បានលើកឡើងនូវអនុសាសន៍ចំនួន ៦ ប្រការដែលទាក់ទងនឹងការត្រៀមសម្រាប់អនាគត។

ក្នុងចំណោមអនុសាសន៍ទាំងនេះ យើងឃើញថា អនុសាសន៍ទី ៦ ដែលនិយាយអំពី «ការសន្សំប្រាក់សម្រាប់កូនៗ មុនការសន្សំទ្រព្យសម្រាប់ខ្លួនឯង» គឺជាប្រការគួរឱ្យចាប់អារម្មណ៍។

អ្នកស្រី Anne Lester លើកឡើងថា នៅពេលអ្នកបានក្លាយជាឪពុក ឬម្ដាយគេ អ្នកប្រាកដជាមានបំណងលើកយកតម្រូវការរបស់កូនៗ ដាក់ទៅក្នុងបញ្ជីអាទិភាព ជាជាងតម្រូវការរបស់ខ្លួន។ ប៉ុន្តែ ការសន្សំប្រាក់សម្រាប់បង់ថ្លៃសាលាមហាវិទ្យាល័យឱ្យកូនៗ នៅមុនការសន្សំប្រាក់សម្រាប់ដំណាក់កាលចូលនិវត្តន៍របស់ខ្លួន គឺជាកំហុសឆ្គងមួយដ៏ធំ។

អ្នកស្រី Anne Lester កាលនៅធ្វើការឱ្យ J.P.Morgan

«មានវិធីសាស្ត្រជាច្រើនសម្រាប់ការបង់ថ្លៃសាលានាពេលអនាគតរបស់កូនៗ ដូចជា ការចូលរួមប្រកួតប្រជែងយកអាហារូបករណ៍ និងការជ្រើសរើសសាលាដែលមានថ្លៃសិក្សាទាប ឬកម្ចីឥណទានជាដើម» អ្នកស្រី Anne Lester និយាយដូច្នេះ និងបន្តថា៖ «កូនម្នាក់របស់ខ្ញុំបានចូលសាកលវិទ្យាល័យសាធារណៈ ហើយមួយចំនួនទៀតបានទទួលអាហារូបករណ៍រៀននៅសាលាមួយចំនួន»។

ការសិក្សានាពេលអនាគតរបស់កូនៗ គឺមានវិធីជាច្រើនដើម្បីរកប្រាក់មកបង់ថ្លៃសាលា ប៉ុន្តែ ការចំណាយនៅក្នុងដំណាក់កាលចូលនិវត្តន៍របស់អ្នក ទំនងជាមិនមានវិធីសាស្ត្រច្រើននោះទេ ក្រៅតែពីការសន្សំទ្រព្យពេលខ្លួននៅមានសមត្ថភាពរកប្រាក់។

ក្រៅពីការណែនាំខាងលើ អតីតមេដឹកនាំមួយរូបរបស់ JPMorgan ក៏បានផ្ដល់អនុសាសន៍មួយចំនួនទៀត រួមមាន៖

១-គួរមានខ្ទង់សន្សំសម្រាប់បញ្ហាបន្ទាន់
២-គួរមានសេវាធានារ៉ាប់រងសុខភាព
៣-គួរទូទាត់បំណុលដែលមានការប្រាក់ខ្ពស់ឱ្យបានឆាប់
៤-គួរកុំទិញផ្ទះលើសពីតម្រូវការ
៥-គួរសកម្មក្នុងការសន្សំទ្រព្យសម្រាប់ដំណាក់កាលចូលនិវត្តន៍

January 6, 2022

អំណោយជាលើកទី ៣ របស់ កម្ពុជា សម្រាប់ផ្ដល់ជូន សាធារណរដ្ឋសហភាពមីយ៉ាន់ម៉ា បានរៀបចំរួចរាល់ហើយ

នាព្រឹកថ្ងៃទី ៦ មករានេះ កម្ពុជា បានរៀបចំរួចរាល់ហើយនូវសម្ភារ បរិក្ខាវេជ្ជសាស្ត្រ ដែលត្រូវយកទៅប្រគល់ជូនសាធារណរដ្ឋសហភាពមីយ៉ាន់ម៉ា ដើម្បីចូលរួមជួយទប់ស្កាត់ការឆ្លងរាលដាលនៃជំងឺកូវីដ-១៩ នៅប្រទេសអាស៊ីអាគ្នេយ៍មួយនេះ។

លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល បានមានប្រសាសនាថា អំណោយដែល កម្ពុជា នឹងយកទៅជូនដល់ សាធារណរដ្ឋសហភាពមីយ៉ាន់ម៉ា នៅព្រឹកស្អែកនេះ រួមមាន ម៉ាសធម្មតា ៣ លានបន្ទះ, ម៉ាស N95 ចំនួន ២ សែនបន្ទះ, វ៉ែនតាការពារចំនួន ១ សែន, សម្លៀកបំពាក់ការពារសុវត្ថិភាព (PPE) ចំនួន ៣ ម៉ឺនឈុត, របាំងការពារមុខចំនួន ៣ ម៉ឺន, ស្បែកជើងកវែង ៣ ពាន់គូ, ម៉ាស៊ីនជំនួយដង្ហើម ៥០ គ្រឿង, ម៉ាស៊ីនតាមដានសញ្ញាជីវិត ៥០ គ្រឿង និងម៉ាស៊ីនផលិតអុកស៊ីសែនស្វ័យប្រវត្តចំនួន ៥០ គ្រឿង។

យោងតាមលោកស្រី យក់ សម្បត្តិ កម្ពុជា បានផ្ដល់ជំនួយជាបរិក្ខាវេជ្ជសាស្ត្រសម្រាប់ទប់ស្កាត់កូវីដ-១៩ ដល់ប្រទេសចំនួន ៦ រួចហើយ។ សម្រាប់ មីយ៉ានម៉ា វិញ កម្ពុជា ផ្ដល់ជំនួយចំនួន ៣ លើកផងដែរ រាប់ទាំងលើកនេះ។

ការប្រគល់ជូននូវអំណោយដល់ ប្រទេសមីយ៉ានម៉ា នេះ នឹងត្រូវធ្វើឡើងនៅក្នុងឱកាសដែល ប្រមុខរដ្ឋាភិបាលកម្ពុជា សម្ដេចតេជោ ហ៊ុន សែន អញ្ជើញទៅបំពេញទស្សនកិច្ចផ្លូវរដ្ឋចាប់ពីថ្ងៃទី ៧ ដល់ថ្ងៃទី ៨ មករា ក្នុងនាមជាប្រធានបន្តវេនរបស់សមាគមប្រជាជាតិអាស៊ីអាគ្នេយ៍៕

January 6, 2022

Author: សឿន សំណាង