សឿន សំណាង - La Reine Media

ប្រទេសចិន ជិតបានក្លាយជាមហាអំណាចសេដ្ឋកិច្ចលេខ១ ជំនួស សហរដ្ឋអាម៉េរិក

ការនាំចេញរបស់ ប្រទេសចិន ខ្ពស់ជាងពេលណាៗទាំងអស់ ចំណែក GDP ក៏ខ្ពស់បំផុតក្នុងអំឡុងពេលជិត ១ ទសវត្សរ៍ បើទោះជាមានវិបត្តិកូវីដ-១៩ ដូច្នេះ ថ្ងៃដែល ប្រទេសចិន ចូលមកកាន់កាប់តំណែង «មហាអំណាចសេដ្ឋកិច្ចលេខ ១ របស់ពិភពលោក» នឹងមិននៅយូរទៀតទេ។

យោងតាមសារព័ត៌មាន Bloomberg ទិន្នន័យរបស់អគ្គនាយកដ្ឋានស្ថិតិជាតិចិន (NBS) ដែលបានប្រកាសកាលពីថ្ងៃទី ១៧ មករា ២០២២ បង្ហាញថា ផលិតផលក្នុងស្រុកសរុប (GDP) របស់ ប្រទេសចិន បានឡើងដល់ ១១៤.៣៧ ទ្រីលាន (១១៤,៣៧០,០០០,០០០,០០០) យុន ប្រហែល ១៨ ទ្រីលានដុល្លារអាម៉េរិក ខ្ពស់បំផុតក្នុងរយៈពេលជិត ១០ ឆ្នាំកន្លង។

អ្វីដែលពិសេសជាងនេះទៀត នោះគឺ ការនាំចេញសរុបរបស់ ប្រទេសចិន នៅក្នុងឆ្នាំ ២០២១ បានកើនដល់ ៣.៣៦ ទ្រីលាន (៣,៣៦០,០០០,០០០,០០០) ដុល្លារអាម៉េរិក ខ្ពស់ជាងពេលណាៗទាំងអស់។ ឆ្នាំ ២០២១ តួលេខនៃការនាំចេញ-នាំចូលរបស់ ប្រទេសចិន ក៏បានឡើងដល់ ៦៧៦ ពាន់លានដុល្លារអាម៉េរិក។ សេដ្ឋកិច្ចប្រទេសនេះ មានអតិរេកពាណិជ្ជកម្មនៃការនាំចេញ-នាំចូល ឡើងដល់ ៦៧៦ ពាន់លានដុល្លារអាម៉េរិក ក្នុងឆ្នាំ ២០២១។

របាយការណ៍របស់ធនាគារពិភពលោក បង្ហាញថា GDP របស់ សហរដ្ឋអាម៉េរិក នឹងកើនតែ ៥.៦% នៅក្នុងឆ្នាំ ២០២១ ហើយល្បឿននៃកំណើនជាមធ្យម ត្រូវបានគណនាឃើញថា កើនតែ ១.០៥% ក្នុងដំណាក់កាល ២០២០-២០២។ មូលនិធិអន្តរជាតិ (IMF) ព្យាករថា កំណើនសេដ្ឋកិច្ចរបស់ សហរដ្ឋអាម៉េរិក ក្នុងឆ្នាំ ២០២១ កើនតែ ៦% ប៉ុណ្ណោះ។

បច្ចុប្បន្ន អ្នកជំនាញជាច្រើនព្រមានថា ចិន អាចដណ្ដើមបានតំណែងមហាអំណាចសេដ្ឋកិច្ចទី ១ របស់ពិភពលោក ពីដៃ សហរដ្ឋអាម៉េរិក នៅក្នុងអនាគតដ៏ខ្លីខាងមុខ ដែលអាចនៅឆ្នាំ ២០៣០ ឬឆ្នាំ ២០២៨៕

January 18, 2022

ក្លាយជាមហាសេដ្ឋី ក្រោយពីបោះបង់ការសិក្សា និងបើកក្រុមហ៊ុនផ្ដល់សេវាទូទាត់វិក្កយបត្រ

ប្រធាននាយកប្រតិបត្តិរបស់ Checkout.com លោក Guillaume Pousaz បានបោះបង់ការសិក្សានៅពេលដែលឱពុករបស់គាត់មានជំងឺមហារីក ហើយក្រោយមក លោកក៏បានរៀនជិះស្គីលើរលកទឹក មុនពេលបានចូលរួមប្រលូកក្នុងវិស័យធនាគារ។

លោក Guillaume Pousaz សិក្សាមុខវិជ្ជាសេដ្ឋកិច្ចនៅសាកលវិទ្យាល័យមួយនៅឯស្រុកកំណើតក្នុង ប្រទេសស្វ៊ីស ដោយសង្ឃឹមថា បានធ្វើការក្នុងវិស័យធនាគារវិនិយោគ។ ក្រោយមក ឪពុករបស់គាត់មានជំងឺមហារីក ដូច្នេះ គាត់ក៏បានបោះបង់ការសិក្សានៅមហាវិទ្យាល័យ ក្នុងឆ្នាំសិក្សាចុងក្រោយ (២០០៥)។

ពេលឪពុកគាត់លាចាកលោក Guillaume Pousaz ក៏ទៅរស់នៅក្នុងរដ្ឋ California សហរដ្ឋអាម៉េរិក ហើយរៀនជិះស្គីលើរលកសមុទ្រ ប៉ុន្តែ ចុងក្រោយគាត់ក៏ត្រូវចូលធ្វើការឱ្យក្រុមហ៊ុនផ្ដល់សេវាទូទាត់ប្រាក់មួយនៅ សហរដ្ឋអាម៉េរិក ដោយសារតែអស់លុយចាយ។

ឆ្នាំ ២០១២ លោក Guillaume Pousaz បានបង្កើតក្រុមហ៊ុនទូទាត់តាមអនឡាញ Checkout.com។ «ខ្ញុំយល់ថា ប្រឹងប្រែងធ្វើអ្វីមួយដោយខ្លួនឯង វានឹងល្អជាងការធ្វើការឱ្យអ្នកដទៃ» លោក Guillaume Pousaz ប្រាប់ Telegraph ដូច្នេះ។

កាលពីសប្ដាហ៍កន្លង ក្រុមហ៊ុននេះប្រមូលទុនបាន ១ ពាន់លានដុល្លារពីក្រុមអ្នកវិនិយោគ ក្នុងនោះក៏មាន Tiger Global Management របស់ Chase Coleman និង Qatar Investment Authority ដែលជាមូលនិធិវិនិយោគជាតិរបស់ ប្រទេសកាតា។ Checkout.com ត្រូវបានកំណត់តម្លៃ ៤០ ពាន់លានដុល្លារអាម៉េរិក ជួយឱ្យទ្រព្យរបស់លោក Pousaz កើនដល់ប្រហែល ១៩.៤ ពាន់លានដុល្លារ។ នេះបើតាម Bloomberg Billionaires Index។

Checkout.com ប្រមូលទុនបាន ១ ពាន់លានដុល្លារពីក្រុមអ្នកវិនិយោគ កាលពីសប្ដាហ៍កន្លង

តាំងពីឆ្នាំ ២០០៩ បុរសនេះបានចំណាយប្រាក់ ៣៥០,០០០ ដុល្លារ ទិញក្រុមហ៊ុនតូចមួយនៅ Mauritius ដែលមានលិខិតអនុញ្ញាតក្នុងការប្រតិបត្តិលើការទូទាត់តាមរយៈបណ្ដាញរបស់ Mastercard និង Visa។ កាលណោះ ប្រព័ន្ធអនឡាញនានា មាន Gmail ជាដើម កំពុងស្ថិតនៅក្នុងដំណាក់កាលដំបូងៗនៅឡើយ។

ជំហានដ៏ធំមួយបានកើតឡើងចំពោះក្រុមហ៊ុននេះ កាលពី ៥ ឆ្នាំមុន។ Checkout ត្រូវបានក្រុមហ៊ុន Netflix ជ្រើសរើសជាដៃគូផ្គត់ផ្គង់សេវាទូទាត់វិក្កយបត្ររបស់ខ្លួន។ ប្រការនេះបានជួយឱ្យ Pousaz ប្រមូលទុនបានជាលើកដំបូង។ កាលណោះ តម្លៃមូលធនទីផ្សាររបស់ Checkout ត្រូវបានកំណត់ត្រឹមតែ ២ ពាន់លានដុល្លារប៉ុណ្ណោះ។

Checkout រីកចម្រើនបានយ៉ាងលឿនចាប់តាំងពីត្រូវបានបង្កើតឡើង។ ក្នុងឆ្នាំ ២០២១ ក្រុមហ៊ុននេះបានបើកការិយាល័យថ្មីនៅក្នុងប្រទេសចំនួន ៦ ហើយបច្ចុប្បន្ន ក្រុមហ៊ុននេះធ្វើសកម្មភាពនៅក្នុងប្រទេសជាង ២។ អតិថិជនរបស់ Checkout មានដូចជា ក្រុមហ៊ុន Pizza និង Coinbase ជាដើម។

ក្រុមហ៊ុនដែលមានការិយាល័យកណ្ដាលនៅ ទីក្រុងឡុងដ៍ ចក្រភពអង់គ្លេស នេះ បានឱ្យដឹងថា ទុនដែលប្រមូលបាននឹងត្រូវបានប្រើប្រាស់ដើម្បីពង្រីកអាជីវកម្មនៅ សហរដ្ឋអាម៉េរិក និងវិនិយោគទៅលើវិស័យបច្ចេកវិទ្យា។

ទ្រព្យដែលបានកើនឡើងខ្ពស់ បានជួយឱ្យ Pousaz បើកបានក្រុមហ៊ុនវិនិយោគផ្ទាល់ខ្លួន Zinal Growth។ ក្រុមហ៊ុននេះវិនិយោគទៅលើបណ្ដាក្រុមហ៊ុនធុរកិច្ចថ្មី (startup) មានដូចជា Ziina និង Wayflyer ក៏ដូចជាក្រុមហ៊ុន blockchain Snickerdoodle Labs ជាដើម។

បើទោះជាមានទ្រព្យច្រើន ប៉ុន្តែ Pousaz នៅតែរក្សាទម្លាប់រស់នៅតាមបែបសាមញ្ញ។ បច្ចុប្បន្ន គាត់ និងគ្រួសារ រស់នៅក្នុង ទីក្រុងឌូបៃ របស់ ប្រទេសអារ៉ាប់រួម (United Arab Emirates) ដើម្បីគ្រប់គ្រងមុខជំនួញនៅ មជ្ឈិមបូព៌ា៕

January 18, 2022

ក្រសួងអប់រំ ជ្រើសរើសបេក្ខជនជាប់បាក់ឌុបជិត ១០,០០០ នាក់ ឱ្យចូលរៀនថ្នាក់បរិញ្ញាបត្រដោយមិនបង់ថ្លៃ

ក្រសួងអប់រំ យុវជន និងកីឡា នឹងជ្រើសរើសបេក្ខជនជាប់បាក់ឌុប ចំនួន ៩,៨១៨ នាក់ ឱ្យទទួលអាហារូបករណ៍ ចូលរៀនថ្នាក់បរិញ្ញាបត្រដោយមិនបង់ថ្លៃ នេះបើតាម ឯកឧត្តមបណ្ឌិត រស់ សុវាចា អ្នកនាំពាក្យរបស់ក្រសួងអប់រំ យុវជន និងកីឡា។

បេក្ខជនជាប់បាក់ឌុប ចំនួន ៩,៨១៨ នាក់ ដែលត្រូវបានជ្រើសរើស នឹងត្រូវទទួលបានអាហារូបករណ៍ ១០០% សម្រាប់ឆ្នាំសិក្សា ២០២១-២០២២។

ឯកឧត្តមបណ្ឌិត រស់ សុវាចា អគ្គលេខាធិការ ក្រសួងអប់រំ យុវជន និងកីឡា ក៏បានបញ្ជាក់ថា បេក្ខជនដែលចុះឈ្មោះសុំអាហារូបករណ៍ នឹងត្រូវទទួលយកលក្ខខណ្ឌចំនួន ២ គឺ៖ ទី ១ ជ្រើសរើសតាមប្រព័ន្ធកុំព្យូទ័រ ដោយផ្អែកលើនិទ្ទេសរួមនៃលទ្ធផលប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២០-២០២១។ ចំណែក លក្ខខណ្ឌទី ២ គឺតាមរយៈការប្រឡងរបស់បេក្ខជននៅតាមគ្រឹះស្ថានសិក្សានានា និងមិនទាន់បានជាប់អាហារូបករណ៍នៅឡើយ។

គួររំលឹកផងដែរថា យោងតាមលទ្ធផលដែលបង្ហាញដោយក្រសួងអប់រំ យុវជន និងកីឡា នៅក្នុងសម័យប្រឡងសញ្ញាបត្រមធ្យមសិក្សាទុតិយភូមិ ដែលប្រព្រឹត្តទៅកាលពីថ្ងៃទី ២៧ ធ្នូ ២០២១ មានបេក្ខជនប្រឡងជាប់សរុបចំនួនជាង ៧០,០០០ នាក់ ស្មើនឹង ៦៥,៦៥% ក្នុងនោះ បេក្ខជនជាប់និទ្ទេស A មានរហូតដល់ ១,៧៥៣ នាក់ ដែលតួលេខនេះខ្ពស់ជាងឆ្ងាយ បើធៀបនឹងបេក្ខជនជាប់និទ្ទេស A ៤៤៣ នាក់ កាលពីឆ្នាំ ២០១៩៕

January 18, 2022

ក្រុមហ៊ុនអ៊ីស្រាអែល កំពុងផលិតសាច់ត្រីសាល់ម៉ុងសិប្បនិម្មិត ដើម្បីដណ្ដើមចំណែកទីផ្សារតម្លៃ ៥៨៦ ពាន់លានដុល្លារ

ក្រុមហ៊ុនធុរកិច្ចថ្មី ដែលមានជំនាញផ្នែកបច្ចេកវិទ្យាអាហារ Plantish របស់ អ៊ីស្រាអែល កំពុងបំពេញបេសកកម្មសង្គ្រោះមហាសមុទ្រ តាមរយៈការអភិវឌ្ឍសាច់ត្រីសិប្បនិម្មិត។

Plantish កាលពីថ្ងៃទី ១៣ មករា បានប្រកាសថា មុខម្ហូប «សាច់ត្រីសាល់ម៉ុងសម្រាប់អ្នកចូលចិត្តបន្លែ» របស់ពួកគេ ត្រូវបានធ្វើត្រាប់តាមរូបមន្ត រចនាសម្ព័ន្ធ និងក្លិនរបស់ត្រីពិត។ វាត្រូវបានធ្វើឡើងអំពីម្សៅសណ្ដែក ផ្សំជាមួយប្រេងសារ៉ាយ និងវត្ថុធាតុស្អិតមួយចំនួនផ្សេងទៀត។

ផលិតផលនេះក៏ផ្ដល់ប្រូតេអ៊ីន, អូមេហ្គា-៣, អូមេហ្គា-៦ និងវីតាមីន-B ប៉ុន្តែ ពុំមានផ្ទុកសារធាតុបារត និងមីក្រូប្លាស្ទិក ជាដើម ដែលអាចមាននៅក្នុងត្រីសមុទ្រ។

ក្រុមហ៊ុន Plantish កំពុងសហការជាមួយមេចុងភៅល្បីឈ្មោះ Jone Andres ដើម្បីផ្គត់ផ្គង់មុខម្ហូបធ្វើអំពីសាច់ត្រីសាល់ម៉ុងសិប្បនិម្មិតរបស់ពួកគេ នៅភោជនីយដ្ឋានមួយចំនួនដែលបានជ្រើសរើសនៅក្នុងឆ្នាំនេះ និងឆ្ពោះទៅរកការដាក់លក់ក្នុងទីផ្សារនៅក្នុងឆ្នាំ ២០២។

Plantish ផលិតសាច់ត្រីសាល់ម៉ុងធ្វើអំពីរុក្ខជាតិនេះដោយប្រើប្រាស់បច្ចេកវិទ្យាបោះពុម្ភ ៣D ជាវិធីមួយដែលត្រូវបានគេប្រើយ៉ាងទូលំទូលាយសម្រាប់ផលិតអាហារសិប្បនិម្មិតដែលមានប្រភពពីរុក្ខជាតិ។

IMARC Group ដែលជាក្រុមហ៊ុនស្រាវជ្រាវទីផ្សារលំដាប់កំពូលរបស់ពិភពលោក បានឱ្យដឹងថា ទីផ្សារអាហារសមុទ្របច្ចុប្បន្នមានតម្លៃប្រហែល ៥៨៦ ពាន់លានដុល្លារ ក្នុងនោះត្រីសាល់ម៉ុង មានចំណែកទីផ្សារ ៥០ ពាន់លានដុល្លារ។

ការនេសាទហូសកម្រិតកំពុងតែគំរាមកំហែងដល់ប្រព័ន្ធជីវចម្រុះនៅក្រោមទឹកសមុទ្រ នាំឱ្យប្រភេទត្រីសមុទ្រមួយចំនួនប្រឈមនឹងការផុតពូជ។ ដូច្នេះ ក្រុមហ៊ុន Plantish សង្កត់ធ្ងន់ថា ពួកគេកំពុងបំពេញបេសកកម្មជួយសង្គ្រោះត្រីសមុទ្រ៕

January 18, 2022

កូវីដ-១៩ នៅ កម្ពុជា! រកឃើញអ្នកឆ្លងថ្មី ២២ នាក់ទៀត និងជាសះស្បើយ ១១ នាក់ ខណៈអ្នកស្លាប់ «គ្មាន»

ក្នុងអំឡុង ២៤ ម៉ោងនៃថ្ងៃទី ១៧ មករា កម្ពុជា បានរកឃើញអ្នកឆ្លងថ្មីនូវជំងឺកូវីដ-១៩ ២២ នាក់ ក្នុងនោះមាន ករណីឆ្លងក្នុងសហគមន៍ ៥ នាក់ និង ករណីធ្វើដំណើរពីបរទេស ១៧ នាក់។ ទាំងនេះ សុទ្ធតែជាករណី អូមីក្រុង។

January 18, 2022

ក្រុមនាវាផ្ទុកយន្តហោះចម្បាំង និងក្រុមនាវាវាយឡើងច្រាំងរបស់ សហរដ្ឋអាម៉េរិក ធ្វើសមយុទ្ធនៅ សមុទ្រចិនខាងត្បូង

ក្រុមនាវាផ្ទុកយន្តហោះចម្បាំង Carl Vinson និងក្រុមនាវាវាយឡើងច្រាំង Essex កំពុងធ្វើសមយុទ្ធរួមគ្នានៅលើ សមុទ្រចិនខាងត្បូង ដើម្បីលើកកម្ពស់សក្ដានុពលរបស់ កងទ័ពជើងទឹកសហរដ្ឋអាម៉េរិក នៅក្នុងតំបន់នេះ។

កងទ័ពជើងទឹកសហរដ្ឋអាម៉េរិក ទើបតែបានប្រកាសថា ក្រុមប្រយុទ្ធនៃនាវាផ្ទុកយន្តហោះចម្បាំង Carl Vinson និងក្រុមប្រយុទ្ធនៃនាវាវាយឡើងច្រាំង Essex ទើបតែបានធ្វើសមយុទ្ធវាយលុកនៅលើ សមុទ្រចិនខាងត្បូង។ សមយុទ្ធនេះត្រូវបានធ្វើឡើងបន្ទាប់ពីនាវាផ្ទុកយន្តហោះចម្បាំង ២ គ្រឿង បានចូលមកកាន់តំបន់ សមុទ្រចិនខាតត្បូង កាលពីថ្ងៃទី ១១ មករា និងបញ្ចប់កាលពីថ្ងៃទី ១៦ មករា។

វិញ្ញាសានៃសមយុទ្ធនេះរួមមាន ការវាយប្រហារដែនសមុទ្រដោយមានការសម្របសម្រួល ការជ្រៀតចូលតំបន់សមុទ្ររបស់សត្រូវ ការប្រមាញ់នាវាមុជទឹក ការផ្គត់ផ្គង់ប្រេងលើសមុទ្រ និងការចល័តជាទម្រង់។

ប្រកាសរបស់ កងទ័ពជើងទឹកអាម៉េរិក ឱ្យដឹងថា នេះគឺជាសកម្មភាពថ្មីបំផុតដើម្បីលើកកម្ពស់លទ្ធភាពនៃការប្រុងប្រៀប និងការសហការនៃកងទ័ពជើងទឹក នៅក្នុងតំបន់ ឥណ្ឌូ-ប៉ាស៊ីហ្វិក។

នាវាផ្ទុកយន្តហោះចម្បាំង Carl Vinson និងនាវាវាយឡើងច្រាំង Essex គឺជានាវាធំបំផុតក្នុងចំណោមនាវាចម្បាំងធំៗជាងគេរបស់ កងទ័ពជើងទឹកសហរដ្ឋអាម៉េរិក។

ក្រុមនាវា Carl Vinson រួមមាន នាវាផ្ទុកយន្តហោះ USS Carl Vinson, នាវាល្បាតមានកាំជ្រួចនាំផ្លូវដោយប្រព័ន្ធកំណត់ទិស USS Lake Champlain, នាវាពិឃាត ៣ គ្រឿងដែលរួមមាន USS Michael Murphy, USS O’Kane និង USS Chafee។ ក្រុមសហការជាមួយនាវា Carl Vinson គឺក្រុមហោះហើរនៅលើនាវាលេខ២ រួមមាន ៩ ក្រុម ដែលមានយន្តហោះចម្បាំងរាប់សិបគ្រឿង ក្នុងនោះមានទាំងអង្គភាពយន្តហោះបំបាំងកាយ F-35C ផងដែរ។

នាវាផ្ទុកយន្តហោះ វាយប្រហារឡើងច្រាំង USS Essex

ក្រុមប្រយុទ្ធ Essex រួមមាន នាវាវាយប្រហារឡើងច្រាំង USS Essex ដែលមានផ្ទុកយន្តហោះ F0-35C និងឧទ្ធម្ភាគចក្រ, នាវាផែវាយឡើងច្រាំង USS Pearl Harbor និងអង្គភាពវាយឡើងច្រាំងក្រៅប្រទេសលេខ ១។

សហរដ្ឋអាម៉េរិក និងបណ្ដាប្រទេសលោកខាងលិច មានដូចជា អង់គ្លេស បារាំង និង អាល្លឺម៉ង់ ជាដើម ថ្មីៗនេះបានបង្កើនវត្តមានកងទ័ពរបស់ខ្លួននៅ សមុទ្រចិនខាងត្បូង ក្នុងគ្រាដែលភាពតានតឹងរវាង ចិនដីគោក និងបណ្ដាប្រទេសនៅជាប់ សមុទ្រចិនខាងត្បូង កំពុងកើនឡើងខ្ពស់ ទាក់ទិននឹងជម្លោះដណ្ដើមដែនទឹក និងកោះទាំងឡាយនៅតំបន់នេះ៕

January 18, 2022

អ៊ីស្រាអែល៖ ដូសទី ៤ នៃវ៉ាក់សាំងបង្ការជំងឺកូវីដ-១៩ មិនអាចទប់ស្កាត់ វ៉ារ្យ៉ង់ អូមីក្រុង!

ប្រភពព័ត៌មានពីទីក្រុង Tel Aviv កាលពីថ្ងៃទី ១៧ មករា បានដកស្រង់លទ្ធផលបឋមនៃការសិក្សាស្រាវជ្រាវមួយដែលបានធ្វើឡើងដោយមជ្ឈមណ្ឌលសុខាភិបាល Shedba របស់ អ៊ីស្រាអែល បង្ហាញថា ដូសទី ៤ នៃវ៉ាក់សាំងបង្ការកូវីដ-១៩ មិនមានសមត្ថភាពគ្រប់គ្រាន់ក្នុងការទប់ស្កាត់ការឆ្លងរបស់ អូមីក្រុង។

សាស្ត្រាចារ្យ Gili Regev-Yochay ដែលជាអ្នកជំនាញរបស់ Shedba បានឱ្យដឹងថា បរិមាណនៃអង្គបដិប្រាណបានកើនឡើងបន្ទាប់ពីបានចាក់វ៉ាក់សាំងដូសទី ។ ប៉ុន្តែ ជាក់ស្ដែងនៅតែមានអ្នកឆ្លងកូវីដ-១៩ ប្រភេទ អូមីក្រុង បើទោះបានចាក់វ៉ាក់សាំងដូសទី ៤ រួចហើយ។ ប្រការនេះបង្ហាញថា វ៉ាក់សាំងមានប្រសិទ្ធភាពខ្ពស់ក្នុងការទប់ស្កាត់បណ្ដា វ៉ារ្យ៉ង់ ដូចជា ដេលតា និង អាលហ្វា ប៉ុន្តែ មិនមានប្រសិទ្ធភាពគ្រប់គ្រាន់នៅចំពោះមុខ អូមីក្រុង។

បញ្ហានេះត្រូវបានក្រុមអ្នកវិភាគយល់ថា អាចនាំឱ្យមានការមន្ទិលទាក់ទិននឹងយុទ្ធសាស្ត្របច្ចុប្បន្នរបស់ អ៊ីស្រាអែល នៅក្នុងការចាក់វ៉ាក់សាំងបង្ការកូវីដ-១៩ ដូសទី ៤ ដល់ពលរដ្ឋដែលមានវ័យលើសពី ៦០ ឆ្នាំ។ ក៏ប៉ុន្តែ លោកស្រី Regev-Yochay យល់ថា ដូសទី ៤ នៅតែអាចនាំមកនូវប្រសិទ្ធភាពសម្រាប់ក្រុមដែលងាយរងគ្រោះ។

January 18, 2022

ជាង ៤០ នាក់ បានស្លាប់ ក្នុងហេតុការណ៍លិចទូកនៅសមុទ្ររបស់ ម៉ារ៉ុក

ជនចំណាកស្រុកចំនួន ៤៣ នាក់ ក្នុងនោះមានទារក ៣ នាក់ និងស្ត្រី ១៤ នាក់ បានបាត់បង់ជីវិត នៅពេលដែលទូកដឹកពួកគេបានលិចនៅឯសមុទ្រ Tarfaya ភាគខាងត្បូងប្រទេសម៉ារ៉ុក។

ប្រភពព័ត៌មានពី អាហ្វ្រិកខាងជើង បានឱ្យដឹងថា នៅក្នុងប្រកាសកាលពីថ្ងៃទី ១៧ មករា អង្គការក្រៅរដ្ឋាភិបាល Caminando Fronteras របស់ អេស្ប៉ាញ ឱ្យដឹងថា ហេតុការណ៍ដ៏សន្ធត់នេះកើតឡើងមួយថ្ងៃមុននោះ ក្នុងនោះជនរងគ្រោះភាគច្រើនមកពីបណ្ដាប្រទេសនៅភាគខាងត្បូងនៃសមុទ្រខ្សាច់ សាហារ៉ា របស់ អាហ្វ្រិក។ ក្នុងហេតុការណ៍នេះ មានមនុស្សចំនួន ១០ នាក់ ត្រូវបានជួយសង្គ្រោះ។

ក្រុមជនចំណាកស្រុកខាងលើ ត្រូវបានគេជឿថា កំពុងស្វែងរកវិធីទៅកាន់ប្រជុំកោះ Canary របស់ អេស្ប៉ាញ ដែលមានចម្ងាយពី Tarfaya ប្រហែល ១០០ គីឡូម៉ែត្រ។

ស្ថិតនៅភាគពាយព្យបង្អស់របស់ ទ្វីបអាហ្វ្រិក ម៉ារ៉ុក គឺជាប្រទេសសម្រាប់ដំណើរឆ្លងដែនរបស់ពលរដ្ឋចំណាកស្រុកមកពីបណ្ដាប្រទេសនៅលើឆ្នេរមហាសមុទ្រអាត្លង់ទិក ឬតំបន់មជ្ឈិមបូពា៍ ដែលស្វែងរកផ្លូវទៅកាន់ ទ្វីបអឺរ៉ុប។

យោងតាមរបាយការណ៍មួយដែលបានប្រកាសកាលពីដើមខែនេះ Caminando Fronteras បានឱ្យដឹងថា ជនចំណាកស្រុកជាង ៤,០០០ នាក់ បានស្លាប់ ឬបាត់ខ្លួន ក្នុងឆ្នាំ ២០២១ នៅពេលព្យាយាមឆ្លងសមុទ្រទៅកាន់ ប្រទេសអេស្ប៉ាញ ។ តួលេខនេះគឺច្រើនជាងទ្វេដង ធៀបនឹងឆ្នាំ ២០២០។ ចំណែកទិន្នន័យថ្មីបំផុតរបស់ក្រសួងមហាផ្ទៃអេស្ប៉ាញ បានឱ្យដឹងថា ក្នុងឆ្នាំ ២០២១ មានជនចំណាកស្រុកខុសច្បាប់ជាង ៣៧៣,០០០ នាក់ ដែលភាគច្រើនមកពី ម៉ារ៉ុក បានមកដល់ អេស្ប៉ាញ ដោយឆ្លងកាត់ប្រជុំកោះ Balearic និង Canary៕

January 18, 2022

ស្មៅបន្លាព្រះខ្លប ត្រូវបានជនជាតិចិន ចាត់ទុកជាថ្នាំសម្រាប់ព្យាបាលជំងឺច្រើនមុខ

កាលពីក្មេង ខ្ញុំចូលចិត្តលេងស្មៅបន្លាព្រះខ្លបនេះ ដោយសារតែនៅពេលយកដៃទៅប៉ះភ្លាម វាក៏ខ្លបក្ដោបស្លឹកចូលក្នុង ហាក់ផ្ដល់ការគោរពដល់ខ្ញុំ ប៉ុន្តែ មិនដឹងថា នៅស្រុកយើង មានបងប្អូនណាយកស្មៅនេះមកធ្វើជាថ្នាំ ឬអត់។

ស្មៅបន្លាព្រះខ្លប មានបន្លាខ្លីៗ ស្លឹកល្អិតៗ កាលណាប៉ះពាល់នឹងអ្វីមួយ ឬកម្រើកដោយខ្យល់ក៏ខ្លបក្ដោបស្លឹកចូលក្នុង ចំណែកផ្ការរបស់វាវិញមានសម្បុរក្រហមស្ទើរស្វាយ។ ស្មៅបន្លាព្រះខ្លប ក៏ត្រូវបានអ្នកស្រុកខ្លះហៅថា ស្មៅបន្លាបង្ក្រាប។ ស្មៅនេះភាគច្រើនដុះនៅតាមចំការដំណាំ ក្បែរផ្ទះនៅស្រុកស្រែ នៅមាត់បឹង ឬនៅតាមវាលដែលមានរុក្ខជាតិច្រើន។

ស្មៅបន្លាព្រះខ្លបមានឈ្មោះវិទ្យាសាស្ត្រថា Mimosa pudica L។ នៅ ប្រទេសចិន ស្មៅប្រភេទនេះ ត្រូវបានគេប្រើប្រាស់សម្រាប់ព្យាបាលជំងឺច្រើនមុខ។

១-កាត់បន្ថយការឈឺចាប់

ស្លឹក និងដើមរបស់ស្មៅនេះផ្ទុក alkaloid ដែលតែងត្រូវបានប្រើប្រាស់សម្រាប់ការកាត់បន្ថយការឈឺចាប់ ឬប្រើជាថ្នាំស្ពឹក។ ដូច្នេះ អ្នកស្រុកចិន ចូលចិត្តយកស្មៅបន្លាព្រះខ្លបធ្វើជាតែសម្រាប់ឆុងផឹកនៅពេលឈឺធ្មេញ ឈឺចង្កេះ ឬឈឺសន្លាក់។

២-ព្យាបាលជំងឺផ្លូវដង្ហើម

ឫសរបស់ស្មៅនេះត្រូវបានយកទៅចិញ្ច្រាំ និងយកទៅព្យាបាលជំងឺរលាកទងសួតរ៉ាំរ៉ៃ។ យកឫសរបស់វាដែលបានចិញ្ច្រាំប្រហែល ១០០ ក្រាម ដាក់ចូលទឹក ៦០០ មិល្លីលីត្រ រួចដាំឱ្យពុះរហូតនៅសល់ប្រហែល ១០០ មីល្លិលីត្រ ហើយចែកជា ២ សម្រាប់ផឹកក្នុង ១ ថ្ងៃ និងត្រូវផឹកឱ្យបាន ១០ ថ្ងៃ សម្រាប់ការព្យាបាលម្ដង។

៣-កាត់បន្ថយការចុះខ្សោយនៃប្រព័ន្ធប្រសាទ ពិបាកគេង

លាងស្លឹករបស់ស្មៅបន្លាព្រះខ្លបឱ្យស្អាត រួចហាល់ស្ងួត ទុកឆុងផឹកម្ដង/ថ្ងៃ ក្នុងរយៈពេល ១០ ថ្ងៃ។

៤-ព្យាបាលរបួសស្បែក

ក្នុងរុក្ខជាតិនេះផ្ទុក tannin ជំរុញឱ្យឈាមកកបានលឿន មានប្រសិទ្ធភាពក្នុងការឃាត់ឈាម។ ពេលត្រូវរបួសស្បែក ជនជាតិចិន តែងយកស្លឹករបស់ស្មៅបន្លាព្រះខ្លបស្រស់ ចិញ្ច្រាំឱ្យល្អិត ចេញជាតិទឹក រួចបិទលើកន្លែងរបួស។

ក្រៅពីនេះ ស្មៅបន្លាព្រះខ្លបក៏មានប្រសិទ្ធភាពមួយចំនួនទៀតដូចជា៖

-ព្យាបាលបញ្ហារលាកក្រពះ
-ជួយបណ្ដេញជាតិពុលក្នុងថ្លើម
-ព្យាបាលបញ្ហាសម្ពាធឈាមខ្ពស់
-ព្យាបាលអាការទល់ពោះ ពិបាករំលាយអាហារ

ទោះជាយ៉ាងណាក៏ដោយ មុននឹងប្រើប្រាស់ឱសថបុរាណនេះ គ្រប់គ្នាគួរតែសួរយោបល់ពីគ្រូពេទ្យជាមុន ពិសេសគឺមិនត្រូវប្រើសម្រាប់ស្ត្រីមានផ្ទៃពោះ អ្នកដែលមានបញ្ហាកម្លាំងចុះខ្សោយ ស្គម និងស្លេកស្លាំង៕

January 17, 2022

ការស្រាវជ្រាវ៖ យុវវ័យដែលចំណាយជាង ៥ ម៉ោង/ថ្ងៃ លើបណ្ដាញសង្គម ងាយមានវិបត្តិផ្លូវចិត្ត

ក្រុមអ្នកស្រាវជ្រាវនៃសាកលវិទ្យាល័យ Arkansas បានរកឃើញថា មនុស្សវ័យក្មេងដែលចំណាយពេលកាន់តែច្រើននៅលើបណ្ដាញសង្គម ពួកគេកាន់តែមានហានិភ័យកើតជំងឺផ្លូវចិត្ត។

បច្ចុប្បន្ន មិនថាចាស់ ឬក្មេង មាន ឬក្រ មនុស្សភាគច្រើនបានចាត់ទុកថា ទូរស័ព្ទឆ្លាតវៃគឺជាផ្នែកមួយនៃរាងកាយរបស់ពួកគេ។ ក្រុមអ្នកវិទ្យាសាស្ត្រនៅសាកលវិទ្យាល័យ Arkansas បានឱ្យដឹងថា យុវវ័យដែលចំណាយពេលកាន់តែច្រើននៅលើបណ្ដាញសង្គម ពួកគេកាន់តែមានហានិភ័យខ្ពស់ កើតរោគចិត្ត។

លទ្ធផលនៃការស្រាវជ្រាវរបស់ក្រុមខាងលើបង្ហាញថា ក្រុមមនុស្សវ័យក្មេងដែលចំណាយពេលជាង ៣០០ នាទី (៥ ម៉ោង) ក្នុង ១ ថ្ងៃ សម្រាប់ការលេងបណ្ដាញសង្គម មានហានិភ័យកើតជំងឺផ្លូវចិត្តខ្ពស់ជាងជិត ៣ ដង ធៀបនឹងមនុស្សដែលលេងបណ្ដាញសង្គមតិចជាង ១២០ នាទី (២ ម៉ោង) រៀងរាល់ថ្ងៃ។ អ្នកវិទ្យាសាស្ត្រជឿថា ការគិតមមៃទៅដល់ថ្នាលបច្ចេកវិទ្យា ដូចជា Instagram, Twitter ឬ Facebook ជាដើម កំពុងតែចូលមកប្ដូរផ្លាស់ការកើតឡើងនៃមនោសញ្ចេតនាមិត្តភក្ដិ និងការឈានដល់គោលដៅក្នុងពិភពពិតរបស់ពួកគេ។

ក្រុមអ្នកស្រាវជ្រាវក៏យល់ថា ក្រុមយុវវ័យកំពុងប្រៀបធៀបខ្លួនឯងជាមួយនឹងការរស់នៅដ៏ល្អឥតខ្ចោះដែល «បានឆ្លងកាត់ការកាត់ត» ដែលពួកគេបានឃើញលើបណ្ដាញសង្គម ដែលទាំងនេះសុទ្ធតែជាប្រការមិនអាចកើតមាននៅក្នុងពិភពពិត។ បញ្ហានេះធ្វើឱ្យពួកគេមានការបន្ទោស បង្អាប់ ឬវាយតម្លៃទាបលើខ្លួនឯង នៅពេលប្រៀបធៀបជាមួយនឹងរូបភាពដែលពួកគេបានឃើញ។

នៅក្នុងការសិក្សាស្រាវជ្រាវទ្រង់ទ្រាយធំដំបូង លើទំនាក់ទំនងរវាងការប្រើប្រាស់បណ្ដាញសង្គម និងរោគផ្លូវចិត្ត ក្រុមអ្នកវិទ្យាសាស្ត្របារម្ភថា កូវីដ-១៩ នឹងធ្វើឱ្យការប្រើប្រាស់អ៊ីនធើណិតកើតឡើង ហើយបណ្ដាលឱ្យបញ្ហាសុខភាពផ្លូវចិត្តកាន់តែធ្ងន់ធ្ងរជាងមុន។ ក្រុមអ្នកស្រាវជ្រាវបានស្ទង់មតិលើ ជនជាតិអាម៉េរិក ជាង ១,០០០ នាក់ ដែលមានអាយុចាប់ពី ១៨ ដល់ ៣០ ឆ្នាំ ដើម្បីវាស់ស្ទង់កម្រិតនៃភាពធ្ងន់ធ្ងររបស់បញ្ហាផ្លូវចិត្តរបស់ពួកគេ ជាមួយនឹងការដែលពួកគេលេងបណ្ដាញសង្គម។

លទ្ធផលបង្ហាញថា ក្រុមមនុស្សដែលប្រើប្រាស់បណ្ដាញសង្គមលើសពី ៥ ម៉ោង/ថ្ងៃ មានហានិភ័យកើតជំងឺផ្លូវចិត្តខ្ពស់ជាង ២.៨ ដង នៅក្នុងរង្វង់ ៦ ខែ ធៀបជាមួយនឹងអ្នកដែលលេងត្រឹមតែ ២ ម៉ោង/ថ្ងៃ។

វេជ្ជបណ្ឌិត Cesar Escobar-Viera ជំនួយការសាស្ត្រាចារ្យឯកទេសផ្នែកវិកលចរិត នៃសាកលវិទ្យាល័យ Pittsburgh បានឱ្យដឹងថា៖ «ពេលវេលាដែលសល់លើបណ្ដាញសង្គម អាចចូលមកជំនួសសកម្មភាពសំខាន់ៗជាង ដូចជា ការបង្កើតទំនាក់ទំនងល្អ ការសម្រេចបានគោលដៅលក្ខណៈឯកជន ឬអាជីវកម្ម ការងារ ក៏ដូចជាពេលវេលាសម្រាប់ពិចារណាដែលមានតម្លៃ»៕

January 17, 2022

Author: សឿន សំណាង