ក្នុងរយៈពេល ២៤ ម៉ោង នៃថ្ងៃទី ១០ កុម្ភៈ កម្ពុជា បានរកឃើញអ្នកវិជ្ជមានថ្មីនឹង កូវីដ-១៩ ចំនួន ២៧៤ នាក់ ក្នុងនោះមាន ករណីឆ្លងសហគមន៍ ២៦៦ នាក់ និងអ្នកដំណើរពីបរទេស ៨ នាក់។ អ្នកវិជ្ជមានថ្មីទាំងនេះ សុទ្ធតែជាករណី អូមីក្រុង។
Author: សឿន សំណាង
អេស្ប៉ាញ និង អ៊ីតាលី ដកបទបញ្ជាតម្រូវឱ្យពាក់ម៉ាសនៅទីសាធារណៈ
លើកដំបូងក្នុងរយៈពេលជិត ២ ខែកន្លង ប្រជាជនអេស្ប៉ាញ អាចទុកម៉ាសក្នុងថង់ជាថ្មី នៅពេលរដ្ឋាភិបាលប្រទេសនេះ បានដកបទបញ្ជាតម្រូវឱ្យពាក់ម៉ាសនៅទីសាធារណៈ កាលពីថ្ងៃទី ១០ កុម្ភៈ។
សារព័ត៌មាន AP (អាម៉េរិក) បានរាយការណ៍ថា ប្រទេសអ៊ីតាលី ក៏មានគម្រោងអនុវត្តតាមគំរូរបស់ អេស្ប៉ាញ។ ទាំង អ៊ីតាលី ទាំង អេស្ប៉ាញ សុទ្ធតែមានអត្រានៃការចាក់វ៉ាក់សាំងខ្ពស់ ខណៈតួលេខនៃករណីឆ្លងថ្មី និងចូលពេទ្យថ្មី កំពុងថយចុះ បើធៀបនឹងដំណាក់កាលមុន។
Sara de la Rubia ដែលជាគ្រូពេទ្យវ័យ ៤៥ ឆ្នាំមួយរូប នៅ ទីក្រុងម៉ាឌ្រីដ ថ្លែងថា ការបោះបង់ម៉ាសនឹងក្លាយជាវិធីពិសោធប្រសិទ្ធភាពរបស់វ៉ាក់សាំងបង្ការកូវីដ-១។ អេស្ប៉ាញ និង អ៊ីតាលី ក៏សុទ្ធតែមានប្រជនប្រមាណជា ៨២% បានចាក់វ៉ាក់សាំងដូសទី ។
យោងតាមការកំណត់ថ្មីរបស់ អេស្ប៉ាញ សិស្សានុសិស្សនឹងមិនត្រូវបានតម្រូវឱ្យពាក់ម៉ាសនៅក្នុងម៉ោងសម្រាក។ ប៉ុន្តែ ការពាក់ម៉ាស នៅតែត្រូវរក្សានៅក្នុងទីតាំងបិទជិតនៃទីសាធារណៈ ដូចជាយានយន្តសាធារណៈ និងទីតាំងដែលពិបាកក្នុងការរក្សាគម្លាត ១.៥ ម៉ែត្រ ពីមនុស្សម្នាក់ ទៅមនុស្សម្នាក់។
ប្រទេសអ៊ីតាលី មានគម្រោងដកវិធានការតម្រូវឱ្យពាក់ម៉ាសនៅខាងក្រៅផ្ទះ ចាប់ពីថ្ងៃទី ១១ កុម្ភៈ ២០២២ (១២ កុម្ភៈ នៅ កម្ពុជា)។ ក្រៅពីនេះ រដ្ឋាភិបាលក៏កំពុងពិភាក្សាអំពីការលុបចោលស្ថានភាពអាសន្ន ចាប់ពីថ្ងៃទី ៣១ មីនា ២០២២ ផងដែរ៕
ទ្វីបអាហ្វ្រិក ជិតរួចផុតពីជំងឺរាតត្បាតសកល កូវីដ-១៩! អង្គការសុខភាពពិភពលោក (WHO) អះអាងដូច្នេះ
តំណាងរបស់អង្គការសុខភាពពិភពលោក (WHO) បានឱ្យដឹងថា ទ្វីបអាហ្វ្រិក កំពុងឈានទៅរកការចាកចេញផុតពីជំងឺរាតត្បាតសកល និងឆ្ពោះទៅកាន់ដំណាក់កាលគ្រប់គ្រង កូវីដ-១៩ យូរអង្វែង។
យោងតាមសារព័ត៌មានអង់គ្លេស The Guardian វេជ្ជបណ្ឌិត Matshidiso Moeti ប្រធានអង្គការសុខភាពពិភពលោកប្រចាំ ទ្វីបអាហ្វ្រិក អះអាងថា៖ «ជំងឺរាតត្បាតសកល កំពុងងាកទៅរកដំណាក់កាលមួយផ្សេងទៀត។ យើងជឿថា ទ្វីបអាហ្វ្រិក កំពុងឆ្ពោះទៅកាន់ដំណាក់កាលរស់នៅជាមួយ កូវីដ-១៩ ដូចទៅនឹងជំងឺរាតត្បាតអសកល ពិសេសនៅពេលអត្រានៃការចាក់វ៉ាក់សាំងកំពុងកើនឡើងជាលំដាប់»។
លោកស្រី Moeti ឱ្យដឹងថា សមត្ថភាពក្នុងការប្រយុទ្ធប្រឆាំងនឹងការឆ្លងរាលដាលថ្មីរបស់ ទ្វីបអាហ្វ្រិក បានមានប្រសិទ្ធភាពជាងមុន។ ជាក់ស្ដែង ទ្វីបអាហ្វ្រិក បានចំណាយពេល ២៩ សប្ដាហ៍ដើម្បីអាចគ្រប់គ្រងរលកនៃការឆ្លងដំបូង ប៉ុន្តែ បច្ចុប្បន្ន រយៈពេលនេះបានថយចុះមកនៅត្រឹម ៦ សប្ដាហ៍ប៉ុណ្ណោះ ក្នុងរលកនៃការឆ្លងទី ។
ទោះជាយ៉ាងនេះក៏ដោយ លោកស្រី Moeti សង្កត់ធ្ងន់ថា មកដល់ពេលនេះ ប្រជាជនអាហ្វ្រិកប្រមាណ ១១% ប៉ុណ្ណោះ ដែលបានចាក់វ៉ាក់សាំង។ លោកស្រីបង្ហើបឱ្យដឹងថា តួលេខអ្នកឆ្លង កូវីដ-១៩ នៅ អាហ្វ្រិក អាចខ្ពស់ជាង ៧ ដង ធៀបនឹងទិន្នន័យផ្លូវការ ចំណែកតួលេខអ្នកស្លាប់ដោយសារជំងឺនេះ អាចខ្ពស់ជាងប្រហែលពី ២ ដល់ ៣ ដង។ មូលហេតុនៃបញ្ហានេះ ត្រូវបានលោកស្រី Moeti បកស្រាយថា គឺដោយសារប្រព័ន្ធគ្រប់គ្រងករណីឆ្លងកំពុងជួបបញ្ហា ការធ្វើតេស្តនៅមានកម្រិត ធ្វើឱ្យការវាយតម្លៃមិនមានសុក្រឹតភាព។
ទិន្នន័យពីសាកលវិទ្យាល័យ Johns Hopkins ឱ្យដឹងថា គិតត្រឹមថ្ងៃទី ១០ កុម្ភៈ ទ្វីបអាហ្វ្រិក បានរកឃើញអ្នកឆ្លងកូវីដ-១៩ សរុបចំនួនជាង ១១ លាននាក់ ក្នុងនោះមាន ២៥០,០០០ នាក់ បានស្លាប់។ បើសិនជាការគណនារបស់ WHO គឺជារឿងពិត នោះតួលេខនៃករណីឆ្លងសរុបអាចឡើងដល់ជិត ៧០ លាននាក់ និងស្លាប់ជិត ៧៥០,០០០ នាក់៕
ឥណ្ឌូណេស៊ី ទិញយន្តហោះចម្បាំងពី អាម៉េរិក រាប់សិបគ្រឿង ក្រោយពីបានបញ្ជាទិញយន្តហោះចម្បាំងពី បារាំង
អាជ្ញាធររបស់ប្រធានាធិបតីអាម៉េរិក ចូ បៃដិន កាលពីថ្ងៃទី ១០ កុម្ភៈ បានអនុម័តលើកញ្ចប់អាវុធតម្លៃជិត ១៤ ពាន់លានដុល្លារ ដែល ប្រទេសឥណ្ឌូណេស៊ី បានស្នើទិញ ក្នុងនោះមានយន្តហោះចម្បាំង F-១៥ ចំនួន ៣៦ គ្រឿងផងដែរ។
ក្រៅពីយន្តហោះចម្បាំង F-១៥ ចំនួន ៣៦ គ្រឿង កញ្ចប់អាវុធនេះក៏មានឧបករណ៍បច្ចេកវិទ្យាជាដើម ដែលទាក់ទងនឹងអាវុធ មានដូចជា គ្រាប់រំសេវ និងប្រព័ន្ធទំនាក់ទំនង។ល។ នេះបើតាមការចុះផ្សាយរបស់សារព័ត៌មាន AP។
ប្រទេសឥណ្ឌូណេស៊ី ថ្មីៗនេះបានប្រកាសថា បានចុះកិច្ចព្រមព្រៀងទិញយន្តហោះចម្បាំង Rafale របស់ បារាំង ចំនួន ៤២ គ្រឿង បន្ទាប់ពីបានលុបចោលកុងត្រាទិញយន្តហោះចម្បាំងពី ប្រទេសរុស្ស៊ី។
សហរដ្ឋអាម៉េរិក បានយល់ព្រមលក់អាវុធថ្មីឱ្យ ឥណ្ឌូណេស៊ី នៅក្នុងស្ថានភាពដែលភាពតានតឹងកំពុងកើតឡើងនៅលើសមុទ្រចិនខាងត្បូង និងតំបន់ឥណ្ឌូ-ប៉ាស៊ីហ្វិក៕
អ៊ីស្រាអែល ថា វ៉ាក់សាំងកូវីដ-១៩ របស់ Pfizer-BioNTech មិនប៉ះពាល់ដល់ស្ត្រីពពោះ
ប្រភពព័ត៌មានពី ទីក្រុងតែលអាវីវ (Tel Aviv) បានឱ្យដឹងថា លទ្ធផលនៃការស្រាវជ្រាវមួយរបស់ក្រុមអ្នកវិទ្យាសាស្ត្រអ៊ីស្រាអែល ប្រកាសកាលពីថ្ងៃទី ១០ កុម្ភៈ បង្ហាញថា វ៉ាក់សាំងបង្ការជំងឺកូវីដ-១៩ របស់ក្រុមហ៊ុន Pfizer-BioNTech មិនជាប់ទាក់ទងនឹងផលវិបាកនៅលើស្ត្រីមានផ្ទៃពោះ ដូចជា កូនកើតមុនខែ ការស្លាប់របស់ទារកទើបកើត ឬពិការភាពពីកំណើតជាដើម។
ការស្រាវជ្រាវនេះ ត្រូវបានធ្វើឡើងដោយយោងទៅតាមទិន្នន័យរបស់ក្រុមហ៊ុនធានារ៉ាប់រងសុខភាព Maccabi នៅ អ៊ីស្រាអែល។ ក្រុមស្រាវជ្រាវបានវិភាគទៅលើស្ត្រីជាង ១៧,០០០ នាក់ ដែលបានចាក់វ៉ាក់សាំង Pfizer-BioNTech ក្នុងអំឡុងពេលមានផ្ទៃពោះ ចាប់ពីខែមីនា ដល់តុលា ២០២១ និងស្ត្រីពពោះចំនួន ៧,០០០ នាក់ ដែលមិនបានចាក់វ៉ាក់សាំង។
លទ្ធផលនៃការស្រាវជ្រាវខាងលើបង្ហាញថា បណ្ដាបញ្ហាដែលបានកើតឡើងនៅលើទារកទើបកើត ដូចដែលបាននិយាយខាងដើម សុទ្ធតែមិនមានភាពខុសគ្នារវាងក្រុមទាំងពីររវាងក្រុមបានចាក់វ៉ាក់សាំង និងក្រុមមិនបានចាក់។ ក្នុងនោះ អត្រាការស្លាប់របស់ទារកទើបកើតនៃក្រុមទាំងពីរ គឺ ០.១%, អត្រាកើតមុនខែគឺ ៤.២% ចំពោះទារកដែលមានម្ដាយបានចាក់វ៉ាក់សាំង និង ៤.៨% ចំពោះទារកដែលមានម្ដាយមិនបានចាក់វ៉ាក់សាំង, អត្រាពិការស្មើនឹង ១.៥% នៅលើក្រុមបានចាក់វ៉ាក់សាំង និង ២.១% នៅលើក្រុមមិនបានចាក់ ខណៈដែលអត្រាទារកទើបកើតដែលត្រូវព្យាបាលគឺស្មើនឹង ៥.១% និង ៥.៣%។
ការស្រាវជ្រាវក៏បានបង្ហាញលទ្ធផលប្រហាក់ប្រហែលខាងលើ ចំពោះក្រុមស្ត្រីមានផ្ទៃពោះដែលបានចាក់វ៉ាក់សាំងកូវីដ-១៩ ក្នុងអំឡុង ៣ ខែដំបូងនៃវដ្ដរបស់គភ៍ ជាពេលដែលត្រូវបានគេចាត់ទុកថា ងាយបង្កផលប៉ះពាល់ដល់ទារកក្នុងផ្ទៃ។
លទ្ធផលនៃការស្រាវជ្រាវរបស់ក្រុមអ្នកជំនាញ អ៊ីស្រាអែល នេះ ត្រូវបានចុះផ្សាយនៅលើទំព័រទស្សនាវដ្ដីផ្នែកជំងឺកុមារ JAMA។
វ៉ាក់សាំង Pfizer-BioNTech ក្នុងដំណាក់កាលពិសោធន៍សាកល្បង ក្រុមហ៊ុនមិនបានពិសោធនៅលើស្ត្រីមានផ្ទៃពោះ។ ក៏ប៉ុន្តែ អ៊ីស្រាអែល បានអនុញ្ញាតឱ្យប្រើប្រាស់វ៉ាក់សាំងនេះសម្រាប់ស្ត្រីកំពុងមានគភ៍ផងដែរ។ ក្រោយមក បណ្ដាអង្គការសុខភាព និងប្រទេសផ្សេងៗ ក៏បានណែនាំឱ្យធ្វើដូចគ្នានេះដែរ។
នៅ អ៊ីស្រាអែល គិតមកដល់បច្ចុប្បន្ន មានប្រជាជនជិត ៦.៩ លាននាក់ ក្នុងចំណោមប្រជាជនសរុប ៩.៥ លាននាក់ បានចាក់វ៉ាក់សាំងបង្ការជំងឺកូវីដ-១៩ យ៉ាងតិច ១ ដុស, ៦.១១ លាននាក់ បានចាក់ដូសទី ២ និង ៤.៤៥ លាននាក់ បានចាក់ដូសទី ។ ស្ទើរតែទាំងអស់ នៃ វ៉ាក់សាំងកូវីដ-១៩ ដែល អ៊ីស្រាអែល បានប្រើប្រាស់ គឺជាវ៉ាក់សាំងរបស់ Pfizer-BioNTech៕
អ្នកវិទ្យាសាស្ត្រដែលបានរកឃើញវីរុសបង្កជំងឺអេដស៍ បានទទួលមរណភាព
សារព័ត៌មាន AFP កាលពីថ្ងៃទី ១០ កុម្ភៈ បានរាយការណ៍ថា អ្នកវីរុសសាស្ត្រជនជាតិបារាំង Luc Montagnier បានទទួលមរណភាពនៅក្នុងវ័យ ៨៩ ឆ្នាំ។
លោក Montagnier បានទទួលពានរង្វាន់ ណូបែល (Nobel) កាលពីឆ្នាំ ២០០៨ ដោយសារបានរកឃើញ វីរុសដែលធ្វើឱ្យប្រព័ន្ធការពាររាងកាយចុះខ្សោយ (HIV) និងបង្កជំងឺអេដស៍ (AIDS)។
លោក Montagnier រួមនឹងអ្នកវិទ្យាសាស្ត្រជនជាតិបារាំងមួយរូបទៀត គឺ Francoise Barre-Sinoussi បានទទួលពាក់កណ្ដាលនៃពានរង្វាន់ ណូបែលវេជ្ជសាស្ត្រ ឆ្នាំ ២០០៨ ដោយសារតួនាទីរបស់ពួកគាត់ក្នុងការរកឃើញ វីរុស HIV។ ចំណែកពានរង្វាន់ពាក់កណ្ដាលទៀត ត្រូវបានប្រគល់ជូនអ្នកស្រាវជ្រាវជំងឺមហារីក ជនជាតិអាល្លឺម៉ង់ Harald zu Hausen។
កើតឆ្នាំ ១៩៣២ លោក Montagnier បានរៀនថ្នាក់បណ្ឌិតផ្នែក វីរុសសាស្ត្រនៅសាកលវិទ្យាល័យប៉ារីស។ ក្រោយមក លោកបានក្លាយជាប្រធានមូលនិធិស្រាវជ្រាវ និងទប់ស្កាត់ជំងឺអេដស៍ នៅ បារីស។ ក្រៅពី វីរុស HIV លោក Montagnier ក៏ធ្លាប់បានរកឃើញរបកគំហើញជាច្រើន ទាក់ទងនឹង វីរុស ក្នុងនោះមានវិធីការពាររាងកាយពី វីរុសជាដើម។
ណាសា ចុះកិច្ចព្រមព្រៀងអភិវឌ្ឍរ៉ុក្កែតដំបូង បាញ់ចេញពីពិភពដទៃ
ទីភ្នាក់ងារអវកាសអាម៉េរិក ណាសា (NASA) បានសម្រេចសហការជាមួយក្រុមហ៊ុន Lockheed Martin ដើម្បីអភិវឌ្ឍរ៉ុក្កែតតម្លៃ ១៩៤ លានដុល្លារ សម្រាប់ដឹកសំណាកវត្ថុពីពិភពអង្គារ មកកាន់ផែនដី។
យានអវកាសដែលហោះចេញពីពិភពដទៃ ដែលមានឈ្មោះថា Mars Ascent Vehicle (MAV) នឹងក្លាយជាផ្នែកមួយដ៏សំខាន់នៃបេសកកម្មយកសំណាកដីរបស់ពិភពអង្គារ (ប្រមូលបានដោយរ៉ូបូត Perseverance របស់ ណាសា) ដឹកមកកាន់ផែនដី ដើម្បីធ្វើការវិភាគស៊ីជម្រៅ។
ចាប់តាំងពីបានចុះចតលើផ្ទៃពិភពអង្គារកាលពីថ្ងៃទី ១៨ កុម្ភៈ ២០២១ យានរុករក Perseverance បានប្រឹងប្រែងស្វែងរកភ័ស្ដុតាងស្ដីអំពីជីវិតអតីតកាលនៅក្នុងមាត់រណ្ដៅ Jezero ជាទីដែលធ្លាប់មានបឹងដែលពេញដោយទឹក និងវាលរាបដីសណ្ដរដែលមានទន្លេ កាលពីរាប់ពាន់លានឆ្នាំមុន។ គិតមកដល់ថ្ងៃទី ៣១ មករា ២០២២ Perseverance បានប្រមូលសំណាកស្នូលដីនៃផ្ទៃពិភពអង្គារដោយជោគជ័យចំនួន ៦ លើកមកហើយ។ ណាសា មានគម្រោងបញ្ជូនសំណាកវត្ថុធាតុទាំងនោះមកកាន់ផែនដីនៅឆ្នាំ ២០២៦។
បេសកកម្មខាងលើនឹងមានឧបសគ្គច្រើន។ រ៉ុក្កែត MAV នឹងត្រូវបានបញ្ជូនទៅកាន់ពិភពអង្គារ អមជាមួយនឹងយានចុះចតមួយគ្រឿងផ្សេងទៀតដែលមានឈ្មោះថា Sample Fetch Rover។ រ៉ូបូតថ្មីនេះនឹងផ្លាស់ទីទៅកាន់ទីតាំងដែល Perseverance កំពុងស្ថិតនៅ ដើម្បីយកសំណាកវត្ថុធាតុដែលប្រមូលបាន រួចហើយដាក់វាទៅក្នុង MAV។ ពេលនោះ Sample Fetch Rover ក៏នឹងដើរតួនាទីជាជើងទម្រដើម្បីឱ្យ MAV ហោះឡើងត្រលប់មកកាន់ផែនដី។ នេះបើតាម Angela Jackman ដែលជាជំនួយការរបស់ ណាសា ដែលបានប្រាប់ UPI កាលពីថ្ងៃទី ៨ កុម្ភៈ។
ណាសា កាលពីថ្ងៃទី ៧ កុម្ភៈ បានប្រកាសប្រគល់ការងារអភិវឌ្ឍ MAV ឱ្យទៅក្រុមហ៊ុន Lockheed Martin ដែលមានមូលដ្ឋាននៅ Bethesda រដ្ឋ Maryland សហរដ្ឋអាម៉េរិក។ រ៉ុក្កែត MAV ដែលមានតម្លៃ ១៩៤ លានដុល្លារនេះ នឹងមានកម្ពស់ប្រហែល ៣ ម៉ែត្រ, មានអង្កត់ផ្ចិត ៤៥ ស.ម និងមានទម្ងន់ស្រាលជាង ៤៥៣ គីឡូក្រាម។ រ៉ូបូត Perseverance មានទម្ងន់ប្រហែល ១,០២៥ គីឡូក្រាម (ទម្ងន់នៅលើផែនដី)៕
ឥណ្ឌូណេស៊ី លុបចោលកុងត្រាទិញយន្តហោះចម្បាំង Su-៣៥ របស់ រុស្ស៊ី ហើយងាកមកទិញយន្តហោះរបស់ប្រទេសលោកខាងលិច
ក្រសួងការពារជាតិឥណ្ឌូណេស៊ី បានចុះកិច្ចព្រមព្រៀងទិញយន្តហោះចម្បាំង Rafale ចំនួន ៤២ គ្រឿង របស់ ប្រទេសបារាំង ក្រោយពីបានលុបចោលកិច្ចសន្យាទិញយន្តហោះចម្បាំង Su-៣៥ របស់ រុស្ស៊ី។
«យើងបានយល់ព្រមទិញយន្តហោះចម្បាំង Rafale ចំនួន ៤២ គ្រឿង។ កិច្ចព្រមព្រៀងទិញនៅថ្ងៃនេះរួមមាន ៦ គ្រឿងដំបូង ហើយក្រោយមក ៣៦ គ្រឿងទៀត» រដ្ឋមន្ត្រីការពារជាតិឥណ្ឌូណេស៊ី លោក Prabowo Subianto ថ្ងៃនេះ បានឱ្យដឹងដូច្នេះ។
យន្តហោះចម្បាំង Rafale ដែលទិញពី បារាំង នឹងជួយឱ្យ ឥណ្ឌូណេស៊ី ធ្វើទំនើបកម្មទ័ពអាកាសរបស់ខ្លួន។ បច្ចុប្បន្ន ប្រទេសនេះមានយន្តហោះចម្បាំង F-១៦ របស់ អាម៉េរិក ចំនួន ៣៣ គ្រឿង និងយន្តហោះចម្បាំង ទិញពី រុស្ស៊ី ចំនួន ១៦ គ្រឿង រួមមាន Su-២៧ ចំនួន ៥ គ្រឿង និង Su-៣០ ចំនួន ១១ គ្រឿង។
Sukhoi Su-35 របស់ រុស្ស៊ី ការបញ្ជាទិញខាងលើនេះត្រូវបានចុះហត្ថលេខាជិត ២ ខែ បន្ទាប់ពី ឥណ្ឌូណេស៊ី បានប្រកាសបោះបង់កិច្ចសន្យាទិញយន្តហោះចម្បាំង Su-៣៥S របស់ រុស្ស៊ី ដែលមានតម្លៃជាង ១.១ ពាន់លានដុល្លារ ដោយមិនបានបញ្ជាក់អំពីមូលហេតុ។ ប៉ុន្តែ មុននោះ ក្រុមមន្ត្រីអាម៉េរិក បានព្រមានជាច្រើនលើកថា ឥណ្ឌូណេស៊ី នឹងប្រឈមមុខនឹងការដាក់ទណ្ឌកម្ម បើសិនទិញអាវុធពី រុស្ស៊ី៕
(វីដេអូ)-សេវាប្រគល់ទំនិញដោយយន្តហោះដ្រោន និងបន្ទប់ប្រគល់ទំនិញស្វ័យប្រវត្ត កំពុងត្រូវបានជំរុញឱ្យប្រើប្រាស់នៅសិនជិន
(ប្រទេសចិន)-មជ្ឈមណ្ឌលបច្ចេកវិទ្យាសិនជិន (Shenzhen Technology Center) កំពុងដំឡើងបណ្ដាញដ្រោន និងបន្ទប់ប្រគល់ទំនិញខ្នាតតូចស្វ័យប្រវត្ត ដើម្បីដឹកជញ្ជូនទំនិញដោយមិនបាច់មានមនុស្ស នៅក្នុងខេត្តក្វាងទុង ភាគខាងត្បូងប្រទេសចិន។
មជ្ឈមណ្ឌលបច្ចេកវិទ្យាសិនជិន កំពុងតែឈានមុខគេក្នុងការជំរុញសេវាប្រគល់ទំនិញដោយកូនយន្តហោះគ្មានមនុស្សបើក (drone) ជាផ្នែកមួយក្នុងការប្រឹងប្រែងកសាងប្រព័ន្ធយានយន្តគ្មានមនុស្សបើកនៅលើអាកាស លើផ្ទៃសមុទ្រ និងលើគោក។
នៅក្បែរអគារការិយាល័យមួយក្នុងទីក្រុងសិនជិន គឺជាបន្ទប់ទំនិញស្វ័យប្រវត្ត (kiosk) ត្រូវបានរចនាឡើងសម្រាប់ឱ្យគ្រប់គ្នាអាចទទួលទំនិញរបស់ពួកគេដែលដឹកជញ្ជូនមកដោយកូនយន្តហោះដ្រោន។
អតិថិជនម្នាក់និយាយថា៖ វាយជួយសន្សំសំច័យពេលបានយ៉ាងច្រើន។ ក្រៅពីនេះ ខ្ញុំគ្រាន់តែមកទទួលទំនិញដែលបានបញ្ជាទិញ ដោយមិនចាំបាច់ជួបអ្នកណាទាំងអស់។ សេវាប្រគល់ទំនិញដោយដ្រោន ពិតជាទាន់សម័យ។
អ្នកទទួលខុសត្រូវលើសេវាដឹកជញ្ជូនបានឱ្យដឹងថា ដ្រោនគ្មានមនុស្សបើកដឹកជញ្ជូនទំនិញបានលឿនជាងមនុស្ស។ យើងទទួលបានការបញ្ជាទិញចាប់ពី ២០០ ទៅ ៣០០ លើក ជារៀងរាល់ថ្ងៃ។
លោក Mao Yinian ប្រធានផ្នែកពាណិជ្ជកម្មរបស់ក្រុមហ៊ុនប្រគល់អាហារ Meituan និយាយថា ក្នុងអំឡុងពេលមមាញឹកនៅថ្ងៃត្រង់ យើងប្រគល់ទំនិញបានលឿនជាង ១០ នាទី ធៀបនឹងការប្រគល់ទំនិញដោយមនុស្ស។
ទីក្រុងសិនជិន ក៏កំពុងធ្វើការសាកល្បងប្រើប្រាស់យន្តហោះដ្រោន ដើម្បីដឹកជញ្ជូនកញ្ចប់ទំនិញ និងសម្ភារៈសុខាភិបាលផងដែរ។
លោក Jiang Ming ដែលជានាយកប្រតិបត្តិរបស់ក្រុមហ៊ុនផលិតដ្រោន Fengyi Technology បានឱ្យដឹងថា យន្តហោះគ្មានមនុស្សបើកទាំងនេះអាចដឹកទំនិញបាន ១០ គីឡូក្រាម និងហោះបានចម្ងាយ ២០ គីឡូម៉ែត្រ។ បើសិនដឹក ២០ គីឡូក្រាម វាអាចហោះបាន ១០ គីឡូម៉ែត្រ។ នៅស្ទើរគ្រប់ទីក្រុង ដ្រោនអាចដឹកជញ្ជូនទំនិញភាគច្រើនបានភ្លាមៗ បន្ទាប់ពីអតិថិជនបានបញ្ជាទិញពីហាងអនឡាញ៕
រឹបអូសបានប្រាក់ Bitcoin តម្លៃ ៣.៦ ពាន់លានដុល្លារ អាជ្ញាធរអាម៉េរិក ប្រកាសថា «រូបិយវត្ថុឌីជីថល មិនមែនជាជម្រកសុវត្ថិភាពសម្រាប់ឧក្រិដ្ឋជន»
ក្រសួងយុត្តិធម៌អាម៉េរិក រឹបអូសប្រាក់ឌីជីថល Bitcoin បានជាង ៩៤,០០០ កាក់ ពីករណីហែក (hack) ចូលប្រព័ន្ធ Bitfinex និងបានអះអាងថា ប្រាក់ឌីជីថលវិមជ្ឈការ ដែលមានដូចជា Bitcoin ឬ Dogecoin ជាដើម មិនមែនជាកន្លែងសុវត្ថិភាពសម្រាប់ឧក្រិដ្ឋជន។
កាលពីថ្ងៃទី ៨ កុម្ភៈ ក្រសួងយុត្តិធម៌អាម៉េរិក បានប្រកាសថា បានចាប់ខ្លួនជនសង្ស័យ ២ នាក់ ដោយចោទថា បានលាងលុយ និងបានរឹបអូសប្រាក់ឌីជីថល Bitcoin ដែលនៅសល់ មុននឹងត្រូវបានគេផ្ទេរចេញ។
ស្ថាប័ននេះមិនទាន់បង្ហើបឱ្យដឹងអំពីពេលវេលាជាក់លាក់ស្ដីពីការរកឃើញរូបិយវត្ថុនេះនៅឡើយ ប៉ុន្តែ បានឱ្យដឹងថា ពេលនោះប្រាក់ Bitcoin ទាំងនេះមានតម្លៃរហូតដល់ ៣.៦ ពាន់លានដុល្លារអាម៉េរិក។ បច្ចុប្បន្ន ប្រាក់ Bitcoin ទាំងនេះមានតម្លៃជាង ៤.៥ ពាន់លានដុល្លារ ហើយវាបានក្លាយជាករណីរឹបអូសទ្រព្យធំជាងគេបង្អស់ដែលក្រសួងយុត្តិធម៌ធ្លាប់បានអនុវត្តកន្លងមក។
ជនសង្ស័យ ២ នាក់ ដែលត្រូវបានចាប់ខ្លួនគឺឈ្មោះ Ilya Lichtenstein អាយុ ៣៤ ឆ្នាំ និងប្រពន្ធរបស់ជននេះឈ្មោះ Heather Morgan អាយុ ៣១ ឆ្នាំ រស់នៅក្នុងទីក្រុង New York។
យោងតាមឯកសាររបស់អាជ្ញាធរ ករណីវាយប្រហារតាមប្រព័ន្ធអ៊ីនធើណិតខាងលើនេះ បានកើតឡើងកាលពីឆ្នាំ ២០១៦ បណ្ដាលឱ្យប្រាក់ Bitcoin ចំនួន ១១៩,៧៥៤ កាក់ ត្រូវបានគេលួចយកចេញពីផ្សារជួញដូរ Bitfinex។ ចោរអ៊ីនធើណិត (Hacker) ក្រោយមកក៏បានធ្វើការជួញដូរខុសច្បាប់ជាង ២,០០០ លើក និងបានផ្ទេរ Bitcoin ខាងលើចូលទៅក្នុងកាបូបអេឡិចត្រូនិកមួយដែលគ្រប់គ្រងដោយ Lichtenstein។
ជំនួយការក្រសួងយុត្តិធម៌អាម៉េរិក លោក Kenneth A. Polite ក្នុងរយៈពេល ៥ ឆ្នាំ ប្រាក់ Bitcoin ប្រហែល ២៥,០០០ កាក់ ត្រូវបានផ្ទេរចេញពីកាបូបអេឡិចត្រូនិក Lichtenstein តាមរយៈការលាងលុយដ៏ស្មុគស្មាញ និងបញ្ចប់ដោយការផ្ញើប្រាក់ចូលទៅក្នុងគណនីដែលគ្រប់គ្រងដោយ Lichtentein និង Morgan។ ប្រាក់ដែលនៅសល់ក្នុងកាបូបនោះ ក៏រួមមានទាំង Bitcoin ជាង ៩៤ ពាន់កាក់» ប្រកាសរបស់សមត្ថកិច្ចបានឱ្យដឹងដូច្នេះ។
បន្ទាប់ពីមានសិទ្ធិឆែកឆេរគណនីអនឡាញរបស់ Lichtenstein ក្រុមមន្ត្រីស៊ើបអង្កេតពិសេសក៏បានរកឃើញហ្វាលដែលមានផ្ទុកលេខសម្ងាត់ដើម្បីចូលទៅកាន់កាបូបអេឡិចត្រូនិកខាងលើ ទើបពួកគេអាចរឹបអូសប្រាក់ឌីជីថល Bitcoin ដែលនៅសល់។
«ជនល្មើសតែងតែសន្សល់ដាន ហើយ FBI មានឧបករណ៍ស្រាវជ្រាវលើដានទាំងនោះ បើទោះជាវានាំទៅដល់ទីណា» អនុប្រធានរបស់ FBI លោក Paul M. Abbate បានប្រកាសដូច្នេះ។
ចំណែក ជំនួយការក្រសួងយុត្តិធម៌អាម៉េរិក លោក Kenneth A. Polite ក៏បានអះអាងថា លទ្ធផលនេះបង្ហាញថា ក្រុមស្រាវជ្រាវអាចតាមដានប្រាក់នៅលើ blockchain និងបញ្ជាក់ថា ប្រាក់ឌីជីថលវិមជ្ឈការ (ប្រាក់នៅក្នុងបណ្ដាញបច្ចេកវិទ្យាដែលមិនស្ថិតក្រោមការគ្រប់គ្រងរបស់ធនាគារ ឬប្រទេសណាមួយ) នឹងមិនមែនជាជម្រកសុវត្ថិភាពសម្រាប់សកម្មភាពលាងលុយរបស់ឧក្រិដ្ឋជន៕