សឿន សំណាង - La Reine Media

គ្រាន់តែសារមួយឃ្លាសោះ ម្ចាស់ក្រុមហ៊ុន SpaceX ធ្វើឱ្យទីក្រុងក្រីក្រប្រែទៅជា «ច្រកទ្វារទៅកាន់ពិភពអង្គារ»! ដីឡើងថ្លៃខ្ពស់ ឯអ្នកវិនិយោគក៏អូសគ្នាចូលមករកស៊ី

តម្លៃដីនៅទីក្រុងក្រីក្រដែល បានឡើងថ្លៃខ្ពស់មិនគួរឱ្យជឿ ដោយចំណាយពេលត្រឹមតែមួយយប់ ក្រោយមហាសេដ្ឋីអាម៉េរិក Elon Musk បង្ហោះសារមួយឃ្លានៅលើ Twitter។

Evan Wood បានប្រាប់ Bloomberg ថា ថ្មីៗនេះ គាត់ទទួលបានសារជាញឹកញាប់ពីមនុស្សចម្លែក ដែលសួរគាត់ថា ចង់លក់ផ្ទះនៅលើកោះ South Padre Island ក្នុងរដ្ឋ Texas ឬអត់។ ពីផ្ទះនេះ គេអាចមើលឃើញមូលដ្ឋានបាញ់បង្ហោះយានអវកាស Texas របស់ Elon Musk បានយ៉ាងច្បាស់ ដោយវាមានចម្ងាយពីគ្នាប្រហែល ១០ គីឡូម៉ែត្រ។ ប៉ុន្តែ វិស្វករបច្ចេកវិទ្យារូបនេះ បានបញ្ជាក់ថា គាត់នឹងមិនលក់ផ្ទះនេះជាដាច់ខាត។

នៅឯ Brownsville ជាទីក្រុងមួយរបស់ Cameron ក៏កំពុងជួបស្ថានភាពដូចគ្នានេះដែរ។ Bruno Zavaleta ដែលជាក្រុមហ៊ុនអចលនទ្រព្យក្នុងតំបន់មួយ ឱ្យដឹងថា មានភ្ញៀវដែលស្ម័គ្រចិត្តជិះរថយន្ត ១៦ ម៉ោង មកកាន់ទីនេះ ដើម្បីទិញផ្ទះ ២ ខ្នង ដែលកំពុងសាងសង់ក្នុងតំបន់ Alto Groves។ តំបន់នេះត្រូវបានក្រុមអ្នករកស៊ីក្នុងវិស័យអចលនទ្រព្យឃោសនាថា ដូចទៅនឹង «ផ្ទះរបស់មជ្ឈមណ្ឌលគ្រប់គ្រង SpaceX»។

ប្រការខាងលើនេះ កន្លងមកមិនដែលកើតមានឡើយ នៅក្នុងខណ្ឌ Cameron ជាទីដែលក្នុងចំណោមមនុស្ស ៤ នាក់ គឺមានម្នាក់រស់នៅក្នុងស្ថានភាពអត់ឃ្លាន។ ចំណែកក្រុមយុវវ័យដែលទៅរកស៊ីឆ្ងាយ នឹងមិនដែលវិលត្រលប់មកវិញឡើយ។ ប៉ុន្តែ ដោយសារតែសារនៅលើ Twitter របស់អ្នកមានទ្រព្យច្រើនជាងគេក្នុងពិភពលោក អចលនទ្រព្យនៅ Cameron ក៏ត្រូវបានគេរកទិញជាបន្តបន្ទាប់ក្នុងតម្លៃខ្ពស់ មិនគួរឱ្យជឿ។

តាមពិត ក្រុមហ៊ុន SpaceX របស់មហាសេដ្ឋី Elon Musk បានតាំងនៅទីនេះអស់ជាច្រើនឆ្នាំមកហើយ។ អចលនទ្រព្យនៅទីនេះឡើងថ្លៃខ្ពស់ បន្ទាប់ពីលោក Musk អំពាវនាវឱ្យគ្រប់គ្នាមកទិញផ្ទះនៅ South Padre Island កាលពីខែមីនា ២០២។ នៅលើ Twitter លោក Elon Musk សរសេរថា៖ «ចូរពិចារណាអំពីការរើមករស់នៅក្នុងតំបន់ Starbase ឬតំបន់ Brownsville នៅ South Padre Island ក្នុងរដ្ឋ Texas»។ ជាងនេះ ក្រោយមក លោក Musk ក៏បានសន្យាចំណាយប្រាក់ ១០ លានដុល្លារ ដើម្បីអភិវឌ្ឍទីក្រុង Brownsville ព្រមទាំងចំណាយ ២០ លានដុល្លារ ដើម្បីជួសជុលសាលារៀននានាក្នុងខណ្ឌ Cameron ផងដែរ។

មួយឆ្នាំក្រោយមក សេដ្ឋកិច្ចរបស់ខណ្ឌនេះ បានប្ដូរផ្លាស់គួរឱ្យចាប់អារម្មណ៍ ដោយសារតែក្រុមអ្នកគាំទ្ររបស់លោក Elon Musk។ ទីក្រុង Brownsville ក៏ត្រូវបានគេភ្ជាប់ទៅនឹងឈ្មោះថ្មី៖ «ច្រកទៅកាន់ពិភពអង្គារ»។ «ទីផ្សារបានប្រែជាមានភាពទាក់ទាញខ្លាំង ក្រោយរយៈពេល ១ យប់ ទៅតាមន័យត្រង់។ សារមួយឃ្លាបានប្ដូរផ្លាស់គ្រប់យ៉ាង» Laurie Howell ដែលជាបុគ្គលិកអចលនទ្រព្យមួយរូប អះអាងដូច្នេះ។

នៅពាសពេញតំបន់ Cameron ឥទ្ធិពលរបស់មហាសេដ្ឋី Elon Musk បានស្ដែងចេញយ៉ាងច្បាស់។ ក្រុមហ៊ុន អាជីវកម្មជាច្រើនដែលទើបត្រូវបានបង្កើតឡើងថ្មី នាំគ្នាដាក់ឈ្មោះទៅតាមទិសដៅនៃអវកាស ក្នុងនោះមានដូចជា ឈ្មោះ «ប្រព័ន្ធបាញ់បង្ហោះរុក្កែត» ឬ «ថ្មព្រះចន្ទ»។ល។ បណ្ដាក្រុមហ៊ុនដែលទាក់ទងនឹងអាកាសចរណ៍អវកាស ដូចជា ក្រុមហ៊ុនឡានហោះ Paragon VTOL, Space Channel និង Spaced Ventures ជាដើម ក៏ចាប់ផ្ដើមរើមកកាន់តំបន់នេះ៕

March 14, 2022

ទីក្រុងមូស្គូ គំរាមរឹបអូសទ្រព្យសម្បត្តិរបស់បណ្ដាក្រុមហ៊ុនដែលចាកចេញពី រុស្ស៊ី

យោងតាម WSJ រដ្ឋអាជ្ញាតុលាការរុស្ស៊ី បានព្រមានថា អាចចាប់ខ្លួនមេដឹកនាំ ឬរឹបអូសយកទ្រព្យសម្បត្តិរបស់បណ្ដាក្រុមហ៊ុនលោកខាងលិចដែលដកខ្លួនចេញពីទឹកដី រុស្ស៊ី។

ប្រភពព័ត៌មានរបស់ Wall Street Journal ឱ្យដឹងថា ក្នុងសប្ដាហ៍កន្លង រដ្ឋអាជ្ញានៃតុលាការរបស់ រុស្ស៊ី បានផ្ញើការព្រមានដល់បណ្ដាក្រុមហ៊ុន ដូចជា Coco-Cola, McDonald’s, Procter & Gamble Co., International Business Machines និងម្ចាស់ KFC – Yum Brands។ ក្រុមហ៊ុនទាំងនេះត្រូវបានគំរាមប្ដឹង ឬរឹបអូសទ្រព្យសម្បត្តិ ក្នុងនោះមានទាំងយីហោផងដែរ។

ការព្រមានរបស់ រុស្ស៊ី នេះ បានធ្វើឱ្យក្រុមហ៊ុនយ៉ាងហោចមួយ ក្នុងចំណោមក្រុមហ៊ុនជាគោលដៅ ត្រូវកាត់បន្ថយទំនាក់ទំនងជាមួយបណ្ដាសាខានៅ រុស្ស៊ី និងបណ្ដាសាខាដែលនៅសល់ ព្រោះបារម្ភថា សារ និងអ៊ីមេល ត្រូវអាជ្ញាធររុស្ស៊ី រាំងខ្ទប់។ បណ្ដាក្រុមហ៊ុនផ្សេងៗ បានបញ្ជូនថ្នាក់ដឹកនាំជាន់ខ្ពស់ ចេញពី រុស្ស៊ី រួចរាល់ហើយ។

បច្ចុប្បន្ន អ្នកនាំពាក្យរបស់ Coca-Cola, IBM, P&G និង McDonald’s, Yum (KFC និង Pizza Hut) នៅ រុស្ស៊ី បានបដិសេធការអធិប្បាយអំពីបញ្ហានេះ។

បន្ទាប់ពីបានបើកការឈ្លានពានលើ អ៊ុយក្រែន ក្រុមហ៊ុនរបស់បណ្ដាប្រទេសលោកខាងលិច បាននាំគ្នាបិទទ្វារ ឬកាត់បន្ថយសកម្មភាពជំនួញរបស់ពួកគេនៅ រុស្ស៊ី ព្រោះតែរងផលប៉ះពាល់ពីការដាក់ទណ្ឌកម្មរបស់បស្ចិមលោក មកលើ រុស្ស៊ី។

យោងតាមសាលាគ្រប់គ្រង Yale បច្ចុប្បន្ន មានក្រុមហ៊ុនបរទេសជាង ៣៥០ ស្ថាប័ន បានប្រកាសថានឹងចាកចេញ ឬផ្អាកសកម្មភាពអាជីវកម្មនៅ រុស្ស៊ី។

Jen Psaki លេខាផ្នែកសារព័ត៌មានរបស់ សេតវិមាន បានឱ្យដឹងថា៖ «រាល់ការប្រឹងប្រែងដោយខុសច្បាប់របស់ រុស្ស៊ី ក្នុងបំណងរឹបអូសទ្រព្យរបស់បណ្ដាក្រុមហ៊ុន នឹងនាំទៅរកផលវិបាកផ្នែកសេដ្ឋកិច្ចកាន់តែធ្ងន់ធ្ងរ»។

March 14, 2022

អ៊ុយក្រែន ចោទ និងស៊ើបអង្កេតលើអភិបាលថ្មីរបស់ ទីក្រុង Melitopol ពីបទក្បត់ជាតិ

តុលាការអ៊ុយក្រែន បានបើកការស៊ើបអង្កេតពីបទក្បត់ជាតិចំពោះ Galina Danilchenko ដែលត្រូវបាន កងទ័ពរុស្ស៊ី លើកបន្តុបជំនួសអភិបាលក្រុង Melitopol ដែលទើបត្រូវបានចាប់ខ្លួន។

ការស៊ើបអង្កេតត្រូវបានប្រកាសនាថ្ងៃនេះ បន្ទាប់ពីសមាជិកមួយក្រុមរបស់ក្រុមប្រឹក្សាក្រុង Melitopol ស្នើឱ្យប្រធានរដ្ឋអាជ្ញា Iryna Venediktova ចោទប្រកាន់លើ Galina Danilchenko ពីបទក្បត់ជាតិ ព្រោះ «ស្វែងរកវិធីបង្កើតរដ្ឋបាលថ្មីនៅ Melitopol»។

ក្រុមប្រឹក្សាខាងលើយល់ថា Danilchenko ដែលជាសមាជិកក្រុមប្រឹក្សាទីក្រុង មកពីក្រុមប្រឆាំង បានរំលាយអាជ្ញាធរទីក្រុង និងប្រគល់អំណាចរបស់ក្រុមនេះទៅឱ្យគណៈកម្មការប្រជាជន។

ក្នុងប្រកាសបើកការស៊ើបអង្កេត ការិយាល័យប្រធានរដ្ឋអាជ្ញាអ៊ុយក្រែន បានចោទ Danilchenko ថា «អនុវត្តតាមបញ្ជារបស់ក្រុមតំណាង រុស្ស៊ី ពេលប្រកាសថា ខ្លួនជាអភិបាលស្ដីទីក្រុង Melitopol។

មុននោះ អាជ្ញាធរអ៊ុយក្រែន បានឱ្យដឹងថា កងទ័ពរុស្ស៊ី បានចាប់ខ្លួនអភិបាលក្រុង Melitopol និង Dniprorudne នៃខេត្ត Zaporozhye។ លោកស្រី Danilchenko ត្រូវបានលើកបន្តុបជាអភិបាលក្រុង Melitopol បន្ទាប់ពីលោកអភិបាលក្រុង Ivan Fedorov ត្រូវបាន ទាហានរុស្ស៊ី ចាប់ខ្លួន។

Danilchenko កាលពីម្សិលមិញ បានប្រកាសថា «ទូរទស្សន៍នានារបស់ រុស្ស៊ី» នឹងចាប់ផ្ដើមផ្សាយនៅក្នុងតំបន់ Melitopol ដោយមូលហេតុថា «ខ្វះព័ត៌មានដែលគួរឱ្យទុកចិត្តបាន»។

March 14, 2022

តម្លៃប្រេងពិភពលោកព្រឹកថ្ងៃទី ១៤ មីនា បន្តធ្លាក់ចុះ

បន្តនិន្នាការធ្លាក់ថ្លៃក្នុងសប្ដាហ៍កន្លង តម្លៃប្រេងពិភពលោកព្រឹកថ្ងៃទី ១៤ មីនានេះ ថយចុះប្រហែល ៤ ដុល្លារ បន្ទាប់ពីមន្ត្រីអាម៉េរិក មួយរូបនិយាយថា មានសញ្ញាជាច្រើនបង្ហាញថា រុស្ស៊ី ត្រៀមខ្លួនរួចរាល់សម្រាប់បន្តការចរចាជាមួយ អ៊ុយក្រែន។

តម្លៃប្រេង Brent ថយចុះ ៤.១២ ដុល្លារអាម៉េរិក ឬ ៣.៦% ចុះមកនៅត្រឹម ១០៨.៥៥ ដុល្លារ/ធុងបារ៉ែល នៅវេលាម៉ោង ៨និង១៥នាទី (ម៉ោងនៅ កម្ពុជា)។ តម្លៃប្រេងឆៅ West Texas Intermediate (WTI) របស់ សហរដ្ឋអាម៉េរិក ធ្លាក់ថ្លៃ ៣.៩៣ ដុល្លារ ឬ ៣.៧% ចុះមកនៅត្រឹម ១០៥.៤ ដុល្លារ/ធុងបារ៉ែល។

ប្រេងទាំង ២ ប្រភេទខាងលើ សុទ្ធតែបានឡើងថ្លៃខ្ពស់ ចាប់តាំងពី រុស្ស៊ី បើកយុទ្ធនាការយោធានៅ អ៊ុយក្រែន កាលពីថ្ងៃទី ២៤ កុម្ភៈ និងកើន ៤០% រាប់ចាប់ពីដើមឆ្នាំ ២០២២។

កាលពីថ្ងៃទី ១៣ មីនា អនុរដ្ឋមន្ត្រីការបរទេសអាម៉េរិក Wendy Sherman យល់ថា មានសញ្ញាជាច្រើនបង្ហាញថា រុស្ស៊ី បានត្រៀមជាស្រេចក្នុងការបន្តចរចាជាមួយ អ៊ុយក្រែន។ យុទ្ធនាការយោធារបស់ រុស្ស៊ី នៅ អ៊ុយក្រែន បានធ្វើឱ្យទីផ្សារថាមពលសកល មានការប្រែប្រួលខ្លាំង។

តម្លៃប្រេង Brent បានថយចុះ ៤.៨% ក្នុងសប្ដាហ៍កន្លង ខណៈប្រេង WTI ធ្លាក់ថ្លៃ ៥.៧%។ ប្រេង ២ ប្រភេទនេះ សុទ្ធតែធ្លាប់មានតម្លៃខ្ពស់បំផុតកាលពីដើមសប្ដាហ៍ រាប់ចាប់ពីឆ្នាំ ២០០៨ ដោយសារតែមានការបារម្ភអំពីប្រភពផ្គត់ផ្គង់ ក្រោយពី សហរដ្ឋអាម៉េរិក និងសម្ព័ន្ធមិត្តនៅ អឺរ៉ុប បានចាប់ផ្ដើមពិចារណាអំពីការហាមឃាត់ប្រេងដែលនាំពី រុស្ស៊ី។

អាម៉េរិក ក្រោយមកក៏បានហាមឃាត់ប្រេងរបស់ រុស្ស៊ី ក្នុងគ្រាដែល អង់គ្លេស ផ្អាកការនាំចូលជាជំហានៗ ចាប់ពីពេលនេះដល់ចុងឆ្នាំ ២០២២។ សម្ពាធលើតម្លៃប្រេងបានថយចុះ បន្ទាប់ពី ឯកអគ្គរាជទូតរបស់ អេមីរ៉ាតអារ៉ាប់រួម ប្រចាំ សហរដ្ឋអាម៉េរិក ថ្លែងថា ប្រទេសនេះគាំទ្រការបង្កើនផលិតភាព ហើយថានឹងអំពាវនាវឱ្យ អង្គការនៃបណ្ដាប្រទេសនាំចេញប្រេង ពិចារណាអំពីប្រការដូចគ្នានេះ។

យោងតាមអ្នកនាំពាក្យរបស់ វិមានក្រឹមឡាំង Dmitry Peskov កិច្ចចរចារវាង រុស្ស៊ី និង អ៊ុយក្រែន នឹងបន្តធ្វើឡើងនៅក្នុងថ្ងៃទី ១៤ មីនានេះ ក្រោយពីការចរចាកាលពីថ្ងៃទី ១៣ មីនា បានចប់៕

March 14, 2022

កូវីដ-១៩! កម្ពុជា រកឃើញអ្នកឆ្លងថ្មី ១៤៥ នាក់ទៀត ក្នុងថ្ងៃទី ១៣ មីនា

ក្នុងចំណោមអ្នកវិជ្ជមានថ្មីទាំង ១៤៥ នាក់ មានករណីឆ្លងក្នុងសហគមន៍ ១១៥ នាក់ និងអ្នកដំណើរពីបរទេស ៣០ នាក់ ដែលទាំងអស់សុទ្ធតែជាករណីអូមីក្រុង។

March 14, 2022

ការស្រាវជ្រាវថ្មី៖ ថ្នាំព្យាបាលជំងឺកូវីដ-១៩ ៣ ប្រភេទ ដែលមានប្រសិទ្ធភាពចំពោះ អូមីក្រុង BA.២

លទ្ធផលនៃការស្រាវជ្រាវក្នុងបន្ទប់ពិសោធន៍របស់ក្រុមអ្នកវិទ្យាសាស្ត្រជប៉ុន បានបង្ហាញថា ឱសថប្រឆាំងវីរុស ៣ ប្រភេទ ដែលប្រើប្រាស់សម្រាប់ព្យាបាលជំងឺ កូវីដ-១៩ មានប្រសិទ្ធភាពចំពោះ វ៉ារ្យ៉ង់ អូមីក្រុង BA.២ (ឬហៅថា អូមីក្រុងបំបាំងកាយ»។

ក្រុមស្រាវជ្រាវរបស់សាស្ត្រាចារ្យ Yoshihiro Kawaoka នៃវិទ្យាស្ថានវេជ្ជសាស្ត្ររបស់ សាកលវិទ្យាល័យតូក្យូ បានប្រើប្រាស់ថ្នាំច្រើនប្រភេទ លើកោសិកាដែលកំពុងចិញ្ចឹមលើសត្វស្វាដែលឆ្លង អូមីក្រុង BA.។ ពួកគេបានរកឃើញថា ថ្នាំប្រឆាំងវីរុស ៣ ប្រភេទ រួមមាន molnupiravia, nirmatrelvir និង remdesivir មានប្រសិទ្ធភាពចំពោះ វ៉ារ្យ៉ង់ អូមីក្រុង BA.។ ប៉ុន្តែ ក្រុមអ្នកវិទ្យាសាស្ត្រត្រូវបង្កើនបរិមាណថ្នាំច្រើនជាងធម្មតា ៣ ដង ទើបមានប្រសិទ្ធភាពដូចទៅនឹងការព្យាបាល កូវីដ-១៩ ប្រភេទ អូមីក្រុង។

ក្រុមអ្នកវិទ្យាសាស្ត្រខាងលើ ក៏បានរកឃើញថ្នាំព្យាបាលជំងឺ កូវីដ-១៩ ២ ប្រភេទទៀត ដែលត្រូវបានអនុម័តឱ្យប្រើប្រាស់នៅ ជប៉ុន មានប្រសិទ្ធភាពចំពោះ អូមីក្រុង BA២ ប៉ុន្តែ ប្រសិទ្ធភាពរបស់ពួកវា ថយចុះនៅត្រឹម ២០% ធៀបនឹងនៅពេលប្រើប្រាស់សម្រាប់ព្យាបាលអ្នកជំងឺដែលឆ្លង វ៉ារ្យ៉ង់ ដទៃ។

ក្រុមខាងលើបានឱ្យដឹងថា នឹងបន្តការស្រាវជ្រាវឱ្យបានស៊ីជម្រៅបន្ថែមទៀតទៅលើឱសថទាំងនេះ តាមរយៈការពិសោធនៅលើសត្វ។ អូមីក្រុង BA.២ ត្រូវបានគេជឿថា មានសមត្ថភាពឆ្លងរាលដាលរហ័សជាង វ៉ារ្យ៉ង់ អូមីក្រុង ប្រភេទដំបូង។ អូមីក្រុង BA.២ កំពុងឆ្លងរាលដាលយ៉ាងលឿននៅ ជប៉ុន និងប្រទេសមួយចំនួនទៀត៕

March 14, 2022

ក្រុមហ៊ុនសម្លៀកបំពាក់របស់តារាចម្រៀង Rihanna កំពុងពិចារណាអំពី IPO ក្នុងតម្លៃរាប់ពាន់លានដុល្លារ

Savage X Fenty កំពុងធ្វើការជាមួយបណ្ដាធនាគារ រួមមាន Goldmine Sachs និង Morgan Stanley ដើម្បីអាចធ្វើ IPO នៅក្នុងឆ្នាំ ២០២២ នេះ ជាមួយនឹងតម្លៃ ៣ ពាន់លានដុល្លារអាម៉េរិក។

Rihanna ដែលជាតារាចម្រៀង និងជាអ្នកជំនួញក្នុងវិស័យសម្លៀកបំពាក និងសម្រស់ កំពុងធ្វើការជាមួយបណ្ដាទីប្រឹក្សា ស្ដីពីការបោះផ្សាយមូលបត្រជាសាធារណៈលើកដំបូង (IPO) ដែលអាចកំណត់តម្លៃរបស់ក្រុមហ៊ុនសម្លៀកបំពាក់ Savage X Fenty របស់នាង ឡើងដល់យ៉ាងហោច ៣ ពាន់លានដុល្លារ នេះបើតាមសារព័ត៌មាន Bloomberg។ ជាក់ស្ដែង Savage X Fenty កំពុងធ្វើការជាមួយធនាគារ Goldmon Sachs និង Morgan Stanley ដើម្បីអាចធ្វើ IPO នៅក្នុងឆ្នាំនេះ។

ក៏ប៉ុន្តែ Savage X Fenty ត្រូវបានគេជឿងថា មិនទាន់ធ្វើសេចក្ដីសម្រេចចុងក្រោយនៅឡើយ ស្ដីពីការធ្វើ IPO ក្នុងនោះ ផែនការនេះ រួមនឹងពេលវេលាជាក់លាក់ក៏អាចនឹងត្រូវបានប្ដូរផ្លាស់។

ក្រុមហ៊ុនរបស់តារាចម្រៀង Rihanna ធ្លាប់ប្រមូលទុនបាន ១២៥ លានដុល្លារ កាលពីខែមករា ក្នុងយុទ្ធនាការប្រមូលទុនមួយដែលនាំមុខដោយ Neuberger Berman ដោយមានការចូលរួមពីក្រុមអ្នកវិនិយោគដំបូងៗ ដូចជា L Catterton, Avenir Growth Capital, Sunley House Capital Management និង Jay-Z’s Marcy Venture Partners នេះបើតាមក្រុមហ៊ុនផ្គត់ផ្គង់ទិន្នន័យ PitchBook។

ក្រៅពី Savage X Fenty តារាចម្រៀងស្បែកខ្មៅ Rihanna ក៏ជាម្ចាស់យីហោ Fenty Beauty ជាក្រុមហ៊ុនមួយធ្លាប់បានបង្ក «ព្យុះភ្លៀង» ក្នុងទីផ្សារសម្អាង បន្ទាប់ពីបានបង្ហាញខ្លួនកាលពីឆ្នាំ ២០១៧ រួមនឹងក្រុមហ៊ុន Fenty Skin។ ក្រុមហ៊ុនទាំងអស់របស់ Rihanna ត្រូវបានបង្កើតឡើងដើម្បីចាប់យកទីផ្សារដែលក្រុមហ៊ុននានារំលងចោល។

Savage X Fenty បាន និងកំពុងពង្រីកបណ្ដាញហាងរបស់ខ្លួន ហើយបច្ចុប្បន្នមាន ៥ ទីតាំង ក្នុងនោះមានទាំងនៅ Culer City, នៅ California និង Las Vegas ផងដែរ នេះបើតាមព័ត៌មាននៅលើគេហទំព័ររបស់ក្រុមហ៊ុន៕

March 14, 2022

អ៊ុយក្រែន កម្ទេចស្ពានបណ្ដែតទឹក ដើម្បីពន្យឺតដំណើរសម្រុកចូលក្រុងកៀវ របស់ កងទ័ពរុស្ស៊ី

កងទ័ពអ៊ុយក្រែន បានបំផ្លាញស្ពានបណ្ដែតទឹកមួយនៅក្បែរតំបន់ Hostomel ដើម្បីទប់ស្កាត់ កងទ័ពរុស្ស៊ី ឆ្លងទន្លេ Irpin ឆ្ពោះមកកាន់ រដ្ឋធានីកៀវ។

ស្ពានបណ្ដែតទឹកនេះ ស្ថិតនៅចម្ងាយពីស្ពានសំខាន់ឆ្លងកាត់ទន្លេ Irpin ប្រហែល ៨ គីឡូម៉ែត្រ ទៅទិសខាងជើង។ រូបភាពពីផ្កាយរណបរបស់ Maxar កាលពីថ្ងៃទី ១៣ មីនា បានបង្ហាញថា ស្ពានបណ្ដែតទឹកនេះ ទំនងជាត្រូវបានកម្ទេច ខណៈរូបថតមួយសន្លឹកផ្សេងទៀត ដែលត្រូវបានបង្ហោះលើបណ្ដាញសង្គម ក៏បានបង្ហាញថា ស្ពាននេះរងការខូចខាតធ្ងន់ធ្ងរ ហើយនៅក្បែរនោះគឺជាយានយោធារបស់ កងទ័ពរុស្ស៊ី។ CNN បានបញ្ជាក់អំពីភាពច្បាស់ការណ៍របស់រូបថតដែលបង្ហោះនៅលើបណ្ដាញសង្គម។

កងកម្លាំងយោធារបស់ អ៊ុយក្រែន នៅជាយក្រុង Irpin របស់ រដ្ឋធានីកៀវ មកដល់បច្ចុប្បន្ន បានពន្យឺតដំណើរសម្រុកចូលក្រុងកៀវ របស់ កងទ័ពរុស្ស៊ី។ ដោយស្ពានសំខាន់ឆ្លងកាត់ទន្លេ Irpin ត្រូវបានបំផ្លាញដើម្បីទប់ស្កាត់ការរុលទៅមុខរបស់ កងទ័ពរុស្ស៊ី កាលពីជាង ១ សប្ដាហ៍មុន ទន្លេ Irpin នឹងក្លាយជាឧបសគ្គធំសម្រាប់ កងទ័ពរុស្ស៊ី។

នេះគឺជាទីតាំងទី ២ ដែល កងទ័ពរុស្ស៊ី ដំឡើងស្ពានបណ្ដែតទឹកដើម្បីឱ្យយានយោធាឆ្លងកាត់។ មុនពេលចាប់ផ្ដើមយុទ្ធនាការយោធានៅ អ៊ុយក្រែន រុស្ស៊ី បានដំឡើងស្ពានបណ្ដែតទឹកឆ្លងកាត់ទន្លេ Pripyat ក្នុងតំបន់ Chernobyl ហើយកងទ័ពបានផ្លាស់ទីឆ្លងកាត់ទីនោះ។

យុទ្ធនាការយោធារបស់ រុស្ស៊ី នៅ អ៊ុយក្រែន បានឈានចូលដល់ថ្ងៃទី ១។ កម្លាំងរបស់ រុស្ស៊ី រួមនឹងទាហានរបស់ ក្រុមផ្ដាច់ខ្លួន កំពុងគ្រប់គ្រងទីក្រុង Kherson និងទីក្រុងតូចៗមួយចំនួនទៀតនៅភាគខាងត្បូង ភាគអាគ្នេយ៍របស់ អ៊ុយក្រែន ឡោមព័ទ្ធ Mariupol, Kharkov និងកំពុងដាក់សម្ពាធលើគោលដៅធំៗដទៃទៀត។

ក្រសួងការបរទេសអង់គ្លេស កាលពីថ្ងៃទី ១២ មីនា បានឱ្យដឹងថា កងទ័ពរុស្ស៊ី កំពុងស្ថិតនៅក្នុងចម្ងាយប្រហែល ២៥ គីឡូម៉ែត្រ ពី រដ្ឋធានីកៀវ និងអាចឡោមព័ទ្ធរដ្ឋធានីនេះ ក្នុងរយៈពេលប៉ុន្មានថ្ងៃខាងមុខ។

March 14, 2022

អ៊ុយក្រែន៖ អភិបាលក្រុងមួយរូបទៀត ត្រូវបាន ទាហានរុស្ស៊ី ចាប់ខ្លួន

ក្រុមមន្ត្រីអ៊ុយក្រែន ប្រកាសថា អភិបាលក្រុង Dniprorudne ជាទីក្រុងភាគអាគ្នេយ៍ ត្រូវបានកងកម្លាំងរបស់ រុស្ស៊ី ចាប់ខ្លួន បន្ទាប់ពីហេតុការណ៍ដូចគ្នានេះបានកើតឡើងនៅ Melitopol។

«កងទ័ពរុស្ស៊ី បានចាប់ខ្លួនអភិបាលក្រុង Dniprorudne» នៅក្នុងខេត្ត Zaporozhye ភាគអាគ្នេយ៍របស់ អ៊ុយក្រែន កាលពីថ្ងៃទី ១៣ មីនា នេះបើតាមអភិបាលខេត្ត Oleksandr Starukh ដែលបានប្រកាសនៅលើ Facebook។

រដ្ឋមន្ត្រីការបរទេសអ៊ុយក្រែន Dmytro Kuleba ឱ្យដឹងថា អភិបាលក្រុងដែលត្រូវបានចាប់ខ្លួន មានឈ្មោះថា Yevhen Matveyev និងបានអំពាវនាវឱ្យប្រទេសទាំងអស់ក្នុងពិភពលោក និងអង្គការអន្តរជាតិនានា ទប់ស្កាត់អំពើនេះរបស់ រុស្ស៊ី។

ភាគីខាង ប្រទេសរុស្ស៊ី មិនទាន់បានបញ្ចេញប្រតិកម្មអ្វីនៅឡើយ ទាក់ទងទៅនឹងដំណឹងខាងលើនេះ។

សភាអ៊ុយក្រែន មុននោះ បានឱ្យដឹងថា Ivan Fedorov ដែលជាអភិបាលក្រុង Melitopol នៃខេត្ត Zaporozhye ក៏ត្រូវបាន រុស្ស៊ី ចាប់ខ្លួនកាលពីថ្ងៃទី ១១ មីនា ព្រោះតែមិនព្រមសហការ។ អ៊ុយក្រែន បានហៅការចាប់ខ្លួននេះថា ជាអំពើ «ចាប់ជំរិត»។ យោងតាមទីក្រុងកៀវ អនុសញ្ញាទីក្រុងហ្សឺណែវ និងពិធីសារបន្ថែមនានា បានហាមការចាប់ជំរិតដូចករណី Fedorov។

ចំណែកមេដឹកនាំគោលនយោបាយការទូតរបស់ សហភាពអឺរ៉ុប Josep Borrell បានប្រកាសនៅលើ Twitter កាលពីថ្ងៃទី ១៣ មីនាថា «EU ថ្កោលទោសយ៉ាងខ្លាំងក្លាចំពោះការដែល កងទ័ពរុស្ស៊ី ចាប់ជំរិតអភិបាលក្រុង Melitopol និង Dniprorudne»។

March 14, 2022

កូវីដ-១៩! កម្ពុជា រកឃើញអ្នកឆ្លងថ្មី ២០៥ នាក់ទៀត ក្នុងថ្ងៃទី ១១ មីនា

ក្នុងចំណោមអ្នកវិជ្ជមានថ្មីទាំង ២០៥ នាក់ មានករណីឆ្លងក្នុងសហគមន៍ ១៨៩ នាក់ និងអ្នកដំណើរពីបរទេស ១៦ នាក់ ដែលទាំងអស់សុទ្ធតែជាករណីអូមីក្រុង។

March 12, 2022

Author: សឿន សំណាង