សឿន សំណាង - La Reine Media

អាម៉េរិក ផ្ដល់ជំនួយជាអាវុធតម្លៃ ៨០០ លានដុល្លារ ដល់ អ៊ុយក្រែន

ប្រធានាធិបតី ចូ បៃដិន ប្រកាសអំពីកញ្ចប់ជំនួយសន្តិសុខបន្ថែម ៨០០ លានដុល្លារ ដល់ អ៊ុយក្រែន ក្នុងនោះមានយន្តហោះគ្មានមនុស្សបើក និងប្រព័ន្ធការពារដែនអាកាស។

«កញ្ចប់ជំនួយសន្តិសុខថ្មី រួមមានទាំងប្រព័ន្ធការពារដែនអាកាសចំនួន ៨០០ ឈុត ដើម្បីធានាថា កងទ័ពអ៊ុយក្រែន អាចបន្តទប់ស្កាត់យន្តហោះ និងឧទ្ធម្ភាគចក្រដែលកំពុងវាយប្រហារទៅលើប្រជាជនរបស់ពួកគេ» ប្រធានាធិបតីអាម៉េរិក ប្រកាសកាលពីថ្ងៃទី ១៦ មីនា ដូច្នេះ។

ក្រៅពីមីស៊ីលការពារដែនអាកាស Stinger ចំនួន ៨០០ ដើម កញ្ចប់ជំនួយខាងលើក៏មានទាំងយន្តហោះប្រដាប់អាវុធគ្មានមនុស្សបើក Switchblade ចំនួន ១០០ គ្រឿង, អាវុធប្រឆាំងរថក្រោះ ៩,០០០ ដើម, អាវុធសម្រាប់ទាហានថ្មើរជើង ៧,០០០ ដើម, គ្រាប់កាំភ្លើង ២០ លានគ្រាប់ រួមនឹងអាវក្រោះ និងមួកដែកចំនួន ២៥,០០០ ផងដែរ។

ជាងនេះ សហរដ្ឋអាម៉េរិក ក៏កំពុងពិភាក្សាជាមួយសមាជិករបស់ ណាតូ ដើម្បីផ្ដល់ជំនួយជា មីស៊ីលការដែនអាកាស S-៣០០ ដល់ អ៊ុយក្រែន។

March 17, 2022

ស្រុកស្ទឹងហាវ និងស្រុកព្រៃនប់ នៃ ខេត្តព្រះសីហនុ នឹងទាក់ទាញអ្នកវិនិយោគគ្រប់វិស័យនាពេលខាងមុខ

តំបន់កសិឧស្សាហកម្មដំណាំដូងប្រេង និងដំណាំកៅស៊ូ នៅក្នុងភូមិសាស្ត្រស្រុកស្ទឹងហាវ និងស្រុកព្រៃនប់ ខេត្តព្រះសីហនុ នឹងមានអ្នកវិនិយោគចូលមកបណ្ដាក់ទុនរកស៊ីលើគ្រប់វិស័យ នេះបើតាមការអះអាងរបស់ ឯកឧត្តម គួច ចំរើន អភិបាលខេត្តព្រះសីហនុ។

នៅក្នុងពេលចុះពិនិត្យការអភិវឌ្ឍ ក្នុងតំបន់កសិឧស្សាហកម្មដំណាំដូងប្រេង និងដំណាំកៅស៊ូ នៅក្នុងភូមិសាស្ត្រស្រុកស្ទឹងហាវ និងស្រុកព្រៃនប់ ខេត្តព្រះសីហនុ នាព្រឹកថ្ងៃទី ១៦ ខែមីនា ឆ្នាំ ២០២២ អភិបាល នៃគណៈអភិបាលខេត្តព្រះសីហនុ បានថ្លែងកោតសរសើរ ចំពោះអ្នកឧកញ៉ា ម៉ុង ឫទ្ធី ដែលបានធ្វើការអភិវឌ្ឍលើវិស័យកសិឧស្សាមហកម្ម ហើយបាន និងកំពុងជួយដល់ប្រជាពលរដ្ឋនៅក្នុងតំបន់នេះ។

ឯកឧត្តមអភិបាលខេត្ត ព្រះសីហនុ សង្ឃឹម និងជឿជាក់ថា អនាគត ភូមិសាស្ត្រស្រុកស្ទឹងហាវ និងស្រុកព្រៃនប់ នៃ ខេត្តព្រះសីហនុ នឹងក្លាយជាតំបន់ដែលមានសក្តានុពលសម្រាប់ការវិនិយោគលើគ្រប់វិស័យ៕

March 16, 2022

គំរូនាវាទេសចរណ៍ប្រណិតខ្នាតយក្ស បំពាក់ផ្ទាំងសូឡាពេញខ្លួន

ក្រុមអ្នករចនាបានបង្ហើបឱ្យដឹងអំពីគំនិតស្ដីពី នាវាទេចរណ៍មួយគ្រឿងមានឈ្មោះថា Solar Express ដែលត្រូវបានបំពាក់ផ្ទាំងសូឡាពេញខ្លួន។

យោងតាមការប្រកាសរបស់អ្នករចនា Anthony Glasson នៅឯ studio M៥១ ក្នុង ទីក្រុងហុងកុង គំនិតស្ដីពី Solar Express ត្រូវបានលើកបង្ហាញទៅតាមអារម្មណ៍ដែលកើតចេញពីបណ្ដានាវាដំណើរការដោយចំហាយទឹក បង្ហាញខ្លួននៅក្នុងខ្សែភាពយន្ត The Polar Express ឆ្នាំ ២០០៤។ បន្ថែមពីលើនោះ ផ្នែកខាងមុខនាវាត្រូវបានបន្ថែមច្រមុះយ៉ាងស្រួចដែលដូចទៅនឹងប្រភេទសត្វស្នែងមួយ។

នាវាអនាគតនេះនឹងមានប្រវែង ១៣០ ម៉ែត្រ មានអាងហែលទឹកបណ្ដោយ ១០ ម៉ែត្រ, ទីតាំងហូបចុកលើដំបូល និងបន្ទប់នានាដែលមើលឃើញមហាសមុទ្រ។

ប្រការដែលធ្វើឱ្យ Solar Express មានលក្ខណៈពិសេសជាងគេ នោះគឺដងខ្លួនរបស់វាត្រូវបានគ្របដណ្ដប់ដោយផ្ទាំងសូឡាជាច្រើនដែលមានផ្ទៃក្រឡាជាង ១៦,០០០ ម៉ែត្រ។

Solar Express គឺជាការខិតខំប្រឹងប្រែងឆ្ពោះទៅកាន់អនាគតបៃតងជាងបច្ចុប្បន្ន សម្រាប់នាវាទេសចរណ៍ខ្នាតយក្ស នេះបើតាម Glasson។ Solar Express មិនមែនដំណើរការទាំងស្រុងដោយអគ្គិសនីដែលបានមកពីផ្ទាំងសូឡានោះទេ ប៉ុន្តែ វាក៏នឹងត្រូវបានបំពាក់ម៉ាស៊ីន hybrid, ម៉ាស៊ីនភ្លើង។ល។

នាវាទេសចរណ៍នេះនឹងមានទម្ងន់យ៉ាងស្រាល ដោយសារធ្វើអំពីអាលុយមីញូមប្រភេទស្រាល អនុញ្ញាតឱ្យវាសំច័យថាមពលបានច្រើន បើទោះ M៥១ មិនទាន់ប្រកាសឱ្យដឹងអំពីតួលេខដែលទាក់ទងនឹងល្បឿន ឬរង្វង់ប្រតិបត្តិការ៕

March 16, 2022

សហរដ្ឋអាម៉េរិក ព្រមាន ឥណ្ឌា ថា គួរ «ពិចារណាឱ្យបានច្បាស់» រឿងទិញប្រេងរបស់ រុស្ស៊ី

សហរដ្ឋអាម៉េរិក ដាស់តឿន ឥណ្ឌា មិនឱ្យទិញប្រេងឆៅបញ្ចុះតម្លៃរបស់ រុស្ស៊ី ហើយបានហៅទង្វើរបស់ ឥណ្ដា ថា ជួយដល់ ទីក្រុងមូស្គូ ក្នុងគ្រាប្រទេសមួយនេះកំពុងឈ្លានពានលើ ប្រទេសអ៊ុយក្រែន។

ទាក់ទិននឹងព័ត៌មានដែលថា ឥណ្ឌា អាចយល់ព្រមទិញប្រេងបញ្ចុះតម្លៃពី រុស្ស៊ី លេខាផ្នែកសារព័ត៌មានរបស់ សេតវិមាន Jen Psaki នាថ្ងៃទី ១៦ មីនានេះ បានឱ្យដឹងថា៖ «ប្រទេសនានាគួរតែពិនិត្យមើលនូវតួនាទីរបស់ខ្លួនក្នុងប្រវត្តិសាស្ត្រ នៅពេលជួញដូរជាមួយ រុស្ស៊ី ក្នុងពេលដែលពួកគេកំពុងធ្វើយុទ្ធនាការយោធានៅ អ៊ុយក្រែន»។

លោកស្រី Psaki បន្ថែមថា ការគាំទ្រ រុស្ស៊ី នៅពេលនេះគឺស្មើនឹងការគាំទ្រយុទ្ធនាការយោធារបស់ប្រទេសនេះនៅ អ៊ុយក្រែន។ ប៉ុន្តែ ជំនួយការផ្នែកសារព័ត៌មានរូបនេះ អះអាងថា រឿង ឥណ្ឌា ទិញប្រេងពី រុស្ស៊ី នឹងមិនរំលោភលើទណ្ឌកម្មរបស់ បស្ចិមលោក នោះទេ។

ឥណ្ឌា ត្រូវនាំចូលប្រេង ៨០% ក្នុងចំណោមប្រេងដែលត្រូវប្រើប្រាស់ក្នុងស្រុកសរុប ហើយក្នុងចំណោមនោះ មាន ៣% ទិញពី រុស្ស៊ី។ កាលពីចុងសប្ដាហ៍មុន ឧបនាយករដ្ឋមន្ត្រីរុស្ស៊ី Alexandrer Novak បានឱ្យដឹងថា ការនាំចូលប្រេងពី រុស្ស៊ី របស់ ឥណ្ឌា មានតម្លៃប្រហែល ១ ពាន់លានដុល្លារអាម៉េរិក ខណៈលំហូរពាណិជ្ជកម្មរវាងប្រទេសទាំងពីរ មានត្រឹមតែ ៩ ពាន់លានដុល្លារ មិនដល់ ១/១០ នៃពាណិជ្ជកម្មរវាង រុស្ស៊ី និង ចិន។

ឥណ្ឌា ជាប្រទេសមួយដែលជិតស្និទ្ធនឹង រុស្ស៊ី។ ឥណ្ឌា រក្សាទំនាក់ទំនងជាមួយ អ៊ុយក្រែន និងលោកខាងលិច ប៉ុន្តែ ក៏បង្ហាញការមិនយល់ស្របចំពោះការដាក់ទណ្ឌកម្មលើ រុស្ស៊ី នៅក្នុងវេទិកាអន្តរជាតិ។

March 16, 2022

ឥណ្ឌា ចង់ទិញបន្ថែមប្រេងពី រុស្ស៊ី

រដ្ឋមន្ត្រីក្រសួងរ៉ែ និងថាមពល របស់ ឥណ្ឌា លោក Hardeep Singh Puri បានឱ្យដឹងថា កំពុងចរចាជាមួយ ភាគីរុស្ស៊ី អំពីការបង្កើនការនាំចូលប្រេង ដើម្បីរួមចំណែកទប់ស្កាត់ការឡើងថ្លៃសាំងក្នុងប្រទេស។

«ខ្ញុំបាននិយាយគ្នាជាមួយក្រុមមន្ត្រីរបស់ សហព័ន្ធរុស្ស៊ី» អំពីការនាំចូលប្រេង លោក Hardeep Singh Puri បានប្រាប់ សភាឥណ្ឌា កាលពីថ្ងៃទី ១៤ មីនា។ លោក Puri និយាយថា បញ្ហាកំពុងជជែកគ្នារួមមាន ការធានារ៉ាប់រង វិធីដឹកជញ្ជូន និងការទូទាត់។

ឥណ្ឌា ត្រូវនាំចូលប្រេង ៨០% ក្នុងចំណោមប្រេងដែលត្រូវប្រើប្រាស់ក្នុងស្រុកសរុប ហើយក្នុងចំណោមនោះ មាន ៣% ទិញពី រុស្ស៊ី។ កាលពីចុងសប្ដាហ៍មុន ឧបនាយករដ្ឋមន្ត្រីរុស្ស៊ី Alexandrer Novak បានឱ្យដឹងថា ការនាំចូលប្រេងពី រុស្ស៊ី របស់ ឥណ្ឌា មានតម្លៃប្រហែល ១ ពាន់លានដុល្លារអាម៉េរិក ខណៈលំហូរពាណិជ្ជកម្មរវាងប្រទេសទាំងពីរ មានត្រឹមតែ ៩ ពាន់លានដុល្លារ មិនដល់ ១/១០ នៃពាណិជ្ជកម្មរវាង រុស្ស៊ី និង ចិន។

ឥណ្ឌា ជាប្រទេសមួយដែលជិតស្និទ្ធនឹង រុស្ស៊ី។ ឥណ្ឌា រក្សាទំនាក់ទំនងជាមួយ អ៊ុយក្រែន និងលោកខាងលិច ប៉ុន្តែ ក៏បង្ហាញការមិនយល់ស្របចំពោះការដាក់ទណ្ឌកម្មលើ រុស្ស៊ី នៅក្នុងវេទិកាអន្តរជាតិ។

សហរដ្ឋអាម៉េរិក បានហាមការនាំចូលប្រេងពី រុស្ស៊ី។ ប៉ុន្តែ អឺរ៉ុប នៅតែមានការស្ទាក់ស្ទើរចំពោះបញ្ហានេះ ព្រោះកំពុងពឹងផ្អែកលើប្រេង និងធនធានថាមពលរបស់ រុស្ស៊ី ច្រើនជាងឆ្ងាយ ធៀបនឹង សហរដ្ឋអាម៉េរិក៕

March 16, 2022

វៀតណាម បើកទ្វារទទួលភ្ញៀវបរទេស៖ លើកលែងទិដ្ឋាការសម្រាប់ពលរដ្ឋ ១៣ ប្រទេស

កាលពីថ្ងៃទី ១៥ មីនា រដ្ឋាភិបាលវៀតណាម បានសម្រេចចិត្តលើកលែងទិដ្ឋាការចំពោះពលរដ្ឋនៃប្រទេសចំនួន ១៣ ជាឯកតោភាគី។

ការលើកលែងទិដ្ឋាការជាឯកតោភាគីនេះត្រូវបានអនុវត្តចាប់ពីថ្ងៃទី ១៥ មីនា ២០២២ ដល់ថ្ងៃទី ១៤ មីនា ២០២៥ ហើយនឹងត្រូវពិនិត្យលើការពន្យារពេលនាបន្តទៀតនៅពេលវាអស់សុពលភាព។

បណ្ដាប្រទេសដែលត្រូវបាន វៀតណាម លើកលែងទិដ្ឋាការជាឯកតោភាគី រួមមាន អាល្លឺម៉ង់, អ៊ីតាលី, បារាំង, អេស្ប៉ាញ, អង់គ្លេស, រុស្ស៊ី, ជប៉ុន, កូរ៉េខាងត្បូង, ដាណឺម៉ាក, ស៊ុយអែត, ន័រវែស, ហ្វាំងឡង់ និង បេឡារូស។ ការស្នាក់នៅដែលអនុវត្តតាមការលើកលែងទិដ្ឋាការនេះ គឺមានរយៈពេល ១៥ ថ្ងៃ។

March 16, 2022

ប្រេងធ្លាក់ថ្លៃ ៣០% ក្នុងរយៈពេល ១ សប្ដាហ៍ចុងក្រោយ

កាលពីដើមសប្ដាហ៍កន្លង តម្លៃប្រេង Brent ក្នុង ១ ធុង ឡើងជិតដល់ ១៤០ ដុល្លារអាម៉េរិក ប៉ុន្តែ បច្ចុប្បន្ននៅសល់ ៩៩ ដុល្លារ។

បន្ទាប់ពី រុស្ស៊ី បានប្រកាសបើកយុទ្ធនាការយោធានៅ អ៊ុយក្រែន តម្លៃប្រេងឆៅនៅទូទាំងសកលលោក បានកើនឡើងយ៉ាងឆាប់រហ័ស។ គ្រាន់តែ ១ សប្ដាហ៍សោះ តម្លៃប្រេង Brent ឡើងដល់ ១៣៩ ដុល្លារ/ធុង ខ្ពស់បំផុតរាប់ចាប់ពីឆ្នាំ ២០០។ ក្រុមអ្នកជំនាញបានព្រមានថា តម្លៃអាចឡើងដល់ ១៨៥ ដុល្លារ រួចហើយ ២០០ ដុល្លារ នៅពេលពិភពលោកបែរខ្នងដាក់ប្រេងរបស់ រុស្ស៊ី។

ក៏ប៉ុន្តែ ក្រោយមក ស្ថានការណ៍បានប្រែប្រួលយ៉ាងលឿន។ តម្លៃប្រេង Brent បច្ចុប្បន្ន ថយចុះជិត ៣០% ធៀបនឹងតម្លៃខ្ពស់បំផុត។ ក្នុងថ្ងៃទី ១៥ មីនា តម្លៃប្រេងធ្លាក់ចុះក្រោម ១០០ ដុល្លារ/ធុង ជាលើកដំបូងក្នុងខែនេះ។ ១ ថ្ងៃមុននោះ តម្លៃប្រេង Brent បានធ្លាក់ថ្លៃ ៦.៥%។

ការធ្លាក់ថ្លៃនេះ ត្រូវបានបកស្រាយថា ដោយសារក្ដីសង្ឃឹមទៅលើ ប្រទេសអារ៉ាប៊ីសាអូឌីត និង អេមីរ៉ាតអារ៉ាមរួម ដែលសន្យាថា នឹងបង្កើនការផលិតប្រេង។ ទន្ទឹមនឹងនោះ តម្រូវការប្រេងថយចុះនៅ ប្រទេសចិន ដោយសារបម្រាមគោចរ ព្រោះតែ កូវីដ-១៩ ក៏ជារឿងដែលជួយឱ្យតម្លៃប្រេងធ្លាក់ថ្លៃ។

ទោះយ៉ាងនេះក្ដី ក្រុមអ្នកវិភាគព្រមានថា ពិភពលោកនៅតែមិនទាន់រួចផុតពីហានិភ័យ។ ប្រេងនៅតែត្រូវបានជួញដូរក្នុងតម្លៃខ្ពស់ជាងឆ្ងាយ ធៀបនឹងការចំណាយលើការផលិត។

March 16, 2022

ប្រធានាធិបតីអាម៉េរិក អនុម័តថវិកាជំនួយជាង ១ ម៉ឺនលានដុល្លារ ដល់ អ៊ុយក្រែន

ប្រធានាធិបតី ចូ បៃដិន ចុះហត្ថលេខាលើសេចក្ដីព្រាងច្បាប់គ្រប់គ្រងការចំណាយប្រចាំឆ្នាំរបស់ អាម៉េរិក ក្នុងនោះមានខ្ទង់ជំនួយ ១៣,៦ ពាន់លានដុល្លារ សម្រាប់ អ៊ុយក្រែន។

«ខ្ញុំទើបតែចុះហត្ថលេខាលើសេចក្ដីព្រាងច្បាប់ផ្ដល់ជំនួយរបស់ រដ្ឋាភិបាល ដើម្បីរក្សាដំណើរការរបស់រដ្ឋាភិបាល និងផ្ដល់ជំនួយ ១៣.៦ ពាន់លានដុល្លារ ដល់ អ៊ុយក្រែន» ប្រធានាធិបតីអាម៉េរិក បង្ហោះសារនៅលើ Twitter កាលពីថ្ងៃទី ១៥ មីនា។

មុននោះ ក្រុមតំណាងរាស្ត្រអាម៉េរិក បានធ្វើរួចរាល់នូវសេចក្ដីព្រាងច្បាប់ចំណាយ ១៣.៦ ពាន់លានដុល្លារ សម្រាប់ផ្ដល់ជំនួយផ្នែកមនុស្សធម៌ និងយោធា ដល់ អ៊ុយក្រែន ដែលតួលេខនេះកើនឡើងជិតទ្វេដង ធៀបនឹង ៦.៤ ពាន់លានដុល្លារ ដែលស្នើដោយរដ្ឋាភិបាល។

March 16, 2022

នាយករដ្ឋមន្ត្រី ៣ ប្រទេស ធ្វើទស្សនកិច្ច រដ្ឋធានីកៀវ របស់ អ៊ុយក្រែន

នាយករដ្ឋមន្ត្រីនៃ ប្រទេសប៉ូឡូញ ឆែក និង ស្លូវេនី បានជួបពិភាក្សាជាមួយ ប្រធានាធិបតី និងនាយករដ្ឋមន្ត្រីរបស់ អ៊ុយក្រែន នៅ រដ្ឋធានីកៀវ ក្នុងគ្រាដែល កងទ័ពរុស្ស៊ី កំពុងឡោមព័ទ្ធទីក្រុងនេះ។

នាយករដ្ឋមន្ត្រី Mateusz Morawiecki រួមនឹងឧបនាយករដ្ឋមន្ត្រី Jaroslaw Kaczynski របស់ ប្រទេសប៉ូឡូញ, នាយករដ្ឋមន្ត្រី Petr Fiala របស់ ប្រទេសឆែក និងនាយករដ្ឋមន្ត្រី Janez Jansa របស់ ប្រទេសស្លូវេនី នាថ្ងៃទី ១៦ មីនា បានធ្វើដំណើរទៅកាន់ រដ្ឋធានីកៀវ ដោយរថភ្លើង ដើម្បីជួបពិភាក្សាជាមួយ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី និងនាយករដ្ឋមន្ត្រី Denys Shmyhal។

«ពួកគេកំពុងបាញ់ប្លោងគ្រាប់គ្រប់កន្លែង មិនត្រឹមតែនៅ រដ្ឋធានីកៀវ នោះទេ តែថែមទាំងនៅតំបន់ភាគខាងលិចផងដែរ» ប្រធានាធិបតី ហ្សេឡែនស្គី និយាយអំពីសកម្មភាពរបស់ កងទ័ពរុស្ស៊ី នៅ អ៊ុយក្រែន ក្នុងពេលពិភាក្សាជាមួយនាយករដ្ឋមន្ត្រី ៣ ប្រទេសខាងលើ ដែលជាសមាជិករបស់ សហភាពអឺរ៉ុប (EU)។

ក្នុងប្រកាសស្ដីពីដំណើរទស្សនកិច្ច រដ្ឋធានីកៀវ នៅលើ Facebook នាយករដ្ឋមន្ត្រីរបស់ ប៉ូឡូញ បានអំពាវនាវឱ្យ «ទប់ស្កាត់សោកនាដកម្មកំពុងកើតឡើងនៅភាគខាងកើត កាន់តែឆាប់ កាន់តែល្អ» និងអះអាងថា អ៊ុយក្រែន «ទទួលបានការគាំទ្រយ៉ាងច្បាស់លាស់» ពី EU។

នាយករដ្ឋមន្ត្រីរបស់ អ៊ុយក្រែន បានកោតសរសើរចំពោះដំណើរទស្សនកិច្ចរបស់សមភាគី ប៉ូឡូញ ឆែក និង ស្លូវេនី ដែលបានបង្ហាញនូវ «ភាពក្លាហានរបស់ក្រុមមិត្តពិតប្រាកដរបស់ អ៊ុយក្រែន»។ លោកបញ្ជាក់ថា ពួកគេនឹងពិភាក្សាអំពីការផ្ដល់ជំនួយដល់ អ៊ុយក្រែន និងបង្កើនការដាក់ទណ្ឌកម្មលើ រុស្ស៊ី។

ដំណើរទស្សនកិច្ចខាងលើត្រូវបានធ្វើឡើងក្នុងគ្រាដែល កងទ័ពរុស្ស៊ី កំពុងវាយប្រហារសង្គ្រុបលើពាសពេញទឹកដីអ៊ុយក្រែន រួមទាំង រដ្ឋធានីកៀវ ផងដែរ ខណៈដែលកិច្ចចរចារវាង អ៊ុយក្រែន និង រុស្ស៊ី ត្រូវបានគេបញ្ជាក់ថា នឹងធ្វើឡើងបន្តទៀតនាពេលឆាប់ៗនេះ។

March 16, 2022

Apple សំច័យប្រាក់បានរាប់ពាន់លានដុល្លារ ដោយសារបោះបង់ឆ្នាំងសាកថ្ម និងកាសរបស់ iPhone

ក្រុមហ៊ុន Apple ត្រូវបានគេជឿថា សំច័យប្រាក់បានជាង ៦ ពាន់លានដុល្លារអាម៉េរិក ពីការបោះបង់ឆ្នាំងសាកថ្ម និងកាស របស់ទូរស័ព្ទ iPhone ចាប់ពីឆ្នាំ ២០២០។

យោងតាម Daily Mail ក្រុមហ៊ុន Apple កាត់បន្ថយការចំណាយបានប្រហែល ៣៥ ដុល្លារ សម្រាប់ទូរស័ព្ទឆ្លាតវៃ iPhone ១ គ្រឿង ដែលក្រុមហ៊ុនបានលក់ចេញ ដោយសារបំបាត់ចោលឧបករណ៍អមរបស់ផលិតផលនេះ។ រាប់ចាប់តាំងពីចុងឆ្នាំ ២០២០ ដល់ដើមឆ្នាំ ២០២២ Apple បានលក់ iPhone ប្រហែល ១៩០ លានគ្រឿង ដូច្នេះ ទឹកប្រាក់ដែលក្រុមហ៊ុននេះសំច័យបាន គឺប្រហែល ៦.៥ ពាន់លានដុល្លារ។

កន្លងមក ក្រុមអ្នកជំនាញបានគណនាឃើញថា ការកាត់បន្ថយទំហំរបស់ប្រអប់ដាក់ទូរស័ព្ទ អនុញ្ញាតឱ្យ Apple បន្ថយការចំណាយទៅលើវត្ថុធាតុដើមសម្រាប់ផលិតជាប្រអប់ទូរស័ព្ទ ក៏ដូចជាបង្កើនចំនួន iPhone បាន ៧០% នៅក្នុងប្រអប់ប៉ាឡែត (pallet) នីមួយៗ ដូច្នេះ ក៏អាចបន្ថយការចំណាយទៅលើសេវាដឹកជញ្ជូនបាន ៤០% ធៀបនឹងដំណាក់កាលមុននោះ។

Ben Wood ដែលជាអ្នកវិភាគរបស់ CCS Insight បានវាយតម្លៃថា ទិន្នន័យខាងលើគឺមានមូលដ្ឋាន។ ប៉ុន្តែ Apple បានបដិសេធការអធិប្បាយទាក់ទងនឹងតួលេខខាងលើ។ ក្រុមហ៊ុននេះសង្កត់ធ្ងន់ថា ការកាត់ចោលឆ្នាំងសាកថ្ម និងកាស ជួយកាត់បន្ថយឧស្ម័នកាបូនពុលបានជាង ២ លានតោន ស្មើនឹងរថយន្ត ៥ សែនគ្រឿង ដែលមិនធ្វើចរាចរណ៍ ជារៀងរាល់ឆ្នាំ៕

March 15, 2022

Author: សឿន សំណាង