សឿន សំណាង - La Reine Media

ថ្ងៃនេះ ព្រឹត្តិការណ៍ពិព័រណ៍វប្បធម៌ ទេសចរណ៍ និងកីឡា នៅ ពហុកីឡដ្ឋានជាតិមរតកតេជោ បានចាប់ផ្ដើមបើកទទួលភ្ញៀវហើយ

ព្រឹត្តិការណ៍ពិព័រណ៍វប្បធម៌ ទេសចរណ៍ និងកីឡា នៅ ពហុកីឡដ្ឋានជាតិមរតកតេជោ បើកទ្វារទទួលភ្ញៀវមកទស្សនាកម្សាន្តក្នុងរយៈពេល ៥ ថ្ងៃ ចាប់ពីថ្ងៃនេះរហូតដល់ថ្ងៃទី ១០ ខែមេសា ២០២២។

នៅក្នុងពិព័រណ៍វប្បធម៌ ទេសចរណ៍ និងកីឡានេះ មានការតាំងពិព័រណ៍ផលិតផលផ្សេងៗយ៉ាងសម្បូរបែប ក្នុងនោះមានទាំងផលិតផលដែលជាស្នាដៃរបស់កូនខ្មែរផងដែរ។ ជាងនេះ ពិព័រណ៍នេះក៏មានកម្មវិធីសិល្បៈជាច្រើនទម្រង់ ព្រមទាំងមានការប្រឡងបវរកញ្ញាមជ្ឈិមសម័យ។ល។ ព្រឹត្តិការណ៍នេះ គឺជាងការរៀបចំដើម្បីអបអរបុណ្យចូលឆ្នាំខ្មែរនាពេលខាងមុខ។

ព្រឹត្តិការណ៍ពិព័រណ៍វប្បធម៌ ទេសចរណ៍ និងកីឡា នៅ ពហុកីឡដ្ឋានជាតិមរតកតេជោ ត្រូវបានរៀបចំដោយក្រុមហ៊ុនដៃគូ KHBN សហការជាមួយពហុកីឡដ្ឋានជាតិមរតកតេជោ រដ្ឋបាលរាជធានីភ្នំពេញ ក្រសួងទេសចរណ៍ និងក្រសួង-ស្ថាប័នពាក់ព័ន្ធនានា។

April 6, 2022

មហាសេដ្ឋី Elon Musk ចូលរួមក្នុងក្រុមប្រឹក្សាភិបាលរបស់បណ្ដាញសង្គម Twitter

មហាសេដ្ឋីអាម៉េរិក ដើមកំណើតអាហ្វ្រិកខាងត្បូង លោក Elon Musk ត្រូវបានតែងតាំងទៅក្នុងក្រុមប្រឹក្សាភិបាលរបស់បណ្ដាញសង្គម Twitter ប៉ុន្តែ លោកនៅតែត្រូវបានប្រព្រឹត្តស្មើភាពគ្នាដូចទៅនឹងគណនី Twitter ដទៃទៀត។

ការតែងតាំងលោក Elon Musk ទើបត្រូវបាន Twitter បញ្ជូនឯកសារឡើងទៅកាន់គណៈកម្មការមូលបត្រ និងជួញដូរអាម៉េរិក (SEC)។ ឯកសារបានបង្ហាញថា មហាសេដ្ឋីរូបនេះនឹងកាន់តំណែងជាប្រធានទីពីរ ដែលចប់អាណត្តិនៅឆ្នាំ ២០២៤។ មុននោះមួយថ្ងៃ CEO របស់ Tesla ក៏បានប្រកាសថា បានទិញភាគហ៊ុន Twitter ចំនួន ៩.២% និងក្លាយជាម្ចាស់ភាគហ៊ុនធំជាងគេបង្អស់របស់ក្រុមហ៊ុននេះ។

ការដែលលោក Musk ចូលរួមក្នុងគណៈគ្រប់គ្រង ត្រូវបានគេយល់ថា នឹងនាំមកនូវការប្ដូរផ្លាស់សម្រាប់បណ្ដាញសង្គម Twitter។ នៅក្នុងសេចក្ដីប្រកាសលើទំព័រផ្ទាល់ខ្លួន CEO របស់ Twitter លោក Parag Agrawal បានហៅលោក Musk ថាជា «អ្នកគាំទ្រដ៏ស្វិតស្វាញ និងជាអ្នករិះគន់ខ្លាំងក្លាបំផុតអំពីសេវាកម្ម» របស់ Twitter។ លោក Parag Agrawal វាយតម្លៃថា ការចូលរួមរបស់មហាសេដ្ឋីរូបនេះ «នឹងនាំមកនូវគុណតម្លៃធំធេងសម្រាប់ក្រុមប្រឹក្សាភិបាល» និងជួយឱ្យពួកគេមានឥទ្ធិពលជាងមុននៅក្នុងគម្រោងយូរអង្វែង។

លោក Musk ក៏បានឆ្លើយតបនឹងសារខាងលើរបស់ លោក Parag Agrawal ដោយសន្យាថា «នឹងនាំមកនូវការកែលម្អច្រើនសម្រាប់ Twitter នាប៉ុន្មានខែខាងមុខ»។

ប៉ុន្តែ យោងតាមតំណាងរបស់ Twitter លោក Elon Musk នឹងនៅតែត្រូវបានកំណត់សិទ្ធិសម្រេចនៅក្នុងក្រុមហ៊ុន។ «ការសម្រេចចិត្តនានាលើគោលការណ៍របស់យើង មិនត្រូវបានកំណត់ដោយក្រុមប្រឹក្សាភិបាល ឬភាគហ៊ុនិកឡើយ» Adrian Zamora អ្នកនាំពាក្យរបស់ Twitter បានឱ្យដឹងដូច្នេះ។

Adrian Zamora បន្ថែមថា ក្រុមប្រឹក្សាភិបាលមានតួនាទីក្នុងការផ្ដល់យោបល់ និងលើកឡើងនូវការឆ្លើយតបសំខាន់ៗទាក់ទងនឹងសេវាកម្មរបស់បណ្ដាញសង្គម ខណៈដែលដំណើរការ និងការសម្រេចប្រចាំថ្ងៃនឹងត្រូវបានអនុវត្តដោយអ្នកគ្រប់គ្រង និងបុគ្គលិកនៅ Twitter។ ក្រៅពីនេះ លោក Musk ក៏នឹងត្រូវបានកំណត់មិនឱ្យកាន់កាប់ភាគហ៊ុនលើសពី ១៤.៩%។

April 6, 2022

អតីតប្រធានាធិបតីអាម៉េរិក ដូណាល់ ត្រាំ រកបានប្រាក់រាប់រយលានដុល្លារ ក្រោយចាកចេញពី សេតវិមាន

អតីតប្រធានាធិបតីរបស់ សហរដ្ឋអាម៉េរិក លោក ដូណាល់ ត្រាំ បច្ចុប្បន្នមានមុខជំនួញថ្មីមួយទៀត នោះគឺជំនួញផ្នែកបច្ចេកវិទ្យា ហើយនេះប្រហែលជារឿងចម្លែកសម្រាប់មហាសេដ្ឋីវ័យ ៧៥ ឆ្នាំ ជាមនុស្សដែលធ្លាប់មិនប្រើប្រាស់សូម្បីតែអ៊ីម៉េល ព្រោះចូលចិត្តសរសេរដោយប្រើប៊ិក និងក្រដាស។

លោក ត្រាំ ជាមនុស្សដែលមិនខ្លាចនឹងចូលរួមក្នុងគម្រោងដែលគាត់មានបទពិសោធន៍តិចតួចនាពេលកន្លង ហើយប្រការនេះទំនងជាបាននាំឱ្យលោករកប្រាក់បានច្រើនជាងកាលពីពេលនៅឯ សេតវិមាន។

យោងតាមបញ្ជីចំណាត់ថ្នាក់មហាសេដ្ឋីពិភពលោក ឆ្នាំ ២០២២ ដែលទើបត្រូវបានទស្សនាវដ្ដី Forbes ប្រកាសនាពេលថ្មីៗនេះ លោក ដូណាល់ ត្រាំ មានទ្រព្យចំនួន ៣ ពាន់លានដុល្លារ កើនឡើងបន្តិច ធៀបនឹង ២.៤ ពាន់លានដុល្លារកាលពីឆ្នាំ ២០២១។ បច្ចុប្បន្ន លោក ត្រាំ ជាមហាសេដ្ឋីលំដាប់ទី ១,០១២ ក្នុងពិភពលោក លោតឡើងបាន ២៨៧ ថ្នាក់ ធៀបនឹងឆ្នាំកន្លង។

បន្ទាប់ពីត្រូវបាន Twitter ហាមប្រើប្រាស់បណ្ដាញសង្គមនេះ អតីតប្រធានាធិបតីអាម៉េរិក លោក ដូណាល់ ត្រាំ ប្រកាសបង្កើតបណ្ដាញសង្គមផ្ទាល់ខ្លួនដែលមានឈ្មោះថា Truth Social តាមរយៈក្រុមហ៊ុន Trump Media and Technology Group។ កាលពីខែកុម្ភៈ បណ្ដាញសង្គមនេះត្រូវបានដាក់ឱ្យដំណើរការ និងមានអ្នកទាញយកមកប្រើប្រាស់ចំនួនជាង ១ លានលើក។ បច្ចុប្បន្ន លោក ត្រាំ មានអ្នកតាមដានជាង ៨៣៥,០០០ នាក់ នៅលើ Truth Social ដែលតួលេខនេះមិនទាន់ស្មើនឹង ១% នៃចំនួនអ្នកតាមដានលោកនៅលើ Twitter កាលពីពេលកន្លង។

លោក ត្រាំ ក៏ទើបតែបានបង្ហោះសារមួយនៅលើ Truth Social ៖ «ចូរត្រៀមខ្លួនឱ្យរួចរាល់។ ប្រធានាធិបតីដែលអ្នកចូលចិត្តនឹងជួបអ្នកគ្រប់គ្នាឡើងវិញមិនខាន»។ ក៏ប៉ុន្តែ Forbes ឱ្យដឹងថា គ្រាន់តែ Truth Social ប៉ុណ្ណោះ ក៏បានជួយឱ្យលោក ត្រាំ រកបានប្រាក់ ៤៣០ លានដុល្លារថែមទៀតក្នុងឆ្នាំ ២០២១។

ទន្ទឹមនឹងនេះ គម្រោងច្របាច់បញ្ចូលគ្នារវាង Trump Media និង SPAC (ក្រុមហ៊ុនដែលត្រូវបានទិញក្នុងបំណងពិសេស» មួយទៀត បានជួយឱ្យភាគហ៊ុនរបស់ SPAC នេះ កើនពី ១០ ដុល្លារ ឡើងដល់ជាង ៥០ ដុល្លារ/ហ៊ុន។ យោងតាមឯកសារសាធារណៈ Forbes យល់ថា បច្ចុប្បន្ន លោក ត្រាំ កាន់កាប់ភាគហ៊ុនយ៉ាងតិច ៥០% នៅក្នុងក្រុមហ៊ុនខាងលើ។

គណៈកម្មការមូលបត្រ និងជួញដូរអាម៉េរិក រួមនឹងអាជ្ញាធរគ្រប់គ្រងវិស័យហិរញ្ញវត្ថុ (FINRA) សុទ្ធតែកំពុងពិនិត្យមើលសំណើរនៃការច្របាច់បញ្ចូលគ្នានេះ៕

April 6, 2022

ក្រុមមហាសេដ្ឋិនី ដែលមានទ្រព្យច្រើនជាងគេបំផុតក្នុងពិភពលោក នាឆ្នាំ ២០២២

ភាគច្រើននៃក្រុមមហាសេដ្ឋិនីក្នុងបញ្ជីចំណាត់ថ្នាក់របស់ទស្សនាវដ្ដី Forbes នាឆ្នាំ ២០២២ នេះ គឺជាអ្នកស្នងមរតក ក្នុងនោះ Bettencourt Meyers របស់ក្រុមហ៊ុន L’Oreal នាំមុខគេ។

 ១-Francoise Bettencourt Meyers

-ទ្រព្យសម្បត្តិ៖ ៧៤.៨ ពាន់លានដុល្លារអាម៉េរិក
-ប្រភពចំណូល៖ L’Oreal
-សញ្ជាតិ៖ បារាំង

២ -Alice Walton

-ទ្រព្យសម្បត្តិ៖ ៦៥.៣ ពាន់លានដុល្លារអាម៉េរិក
-ប្រភពចំណូល៖ Walmart
-សញ្ជាតិ៖ អាម៉េរិក

៣ – Julia Koch

-ទ្រព្យសម្បត្តិ៖ ៧៤.៨ ពាន់លានដុល្លារអាម៉េរិក
-ប្រភពចំណូល៖ Koch Industries
-សញ្ជាតិ៖ អាម៉េរិក

៤ – MacKenzie Scott

-ទ្រព្យសម្បត្តិ៖ ៤៣.៦ ពាន់លានដុល្លារអាម៉េរិក
-ប្រភពចំណូល៖ Amazon
-សញ្ជាតិ៖ អាម៉េរិក

៥ – Jacqueline Mars

-ទ្រព្យសម្បត្តិ៖ ៣១.៧ ពាន់លានដុល្លារអាម៉េរិក
-ប្រភពចំណូល៖ ស្ករគ្រាប់ និងអាហារសម្រាប់សត្វចិញ្ចឹម
-សញ្ជាតិ៖ អាម៉េរិក

៦ -Gina Rinehart

-ទ្រព្យសម្បត្តិ៖ ៣០.២ ពាន់លានដុល្លារអាម៉េរិក
-ប្រភពចំណូល៖ រុករករ៉ែ
-សញ្ជាតិ៖ អូស្ត្រាលី

៧ -Miriam Adelson

-ទ្រព្យសម្បត្តិ៖ ២៧.៥ ពាន់លានដុល្លារអាម៉េរិក
-ប្រភពចំណូល៖ បនល្បែង
-សញ្ជាតិ៖ អាម៉េរិក

៨ -Susanne Klatten

-ទ្រព្យសម្បត្តិ៖ ២៤.៣ ពាន់លានដុល្លារអាម៉េរិក
-ប្រភពចំណូល៖ BMW និងឱសថ
-សញ្ជាតិ៖ អាល្លឺម៉ង់

៩ -Iris Fontbona

-ទ្រព្យសម្បត្តិ៖ ២២.៨ ពាន់លានដុល្លារអាម៉េរិក
-ប្រភពចំណូល៖ រុករករ៉ែ
-សញ្ជតិ៖ ស៊ីលី

១០ -Abigail Johnson

-ទ្រព្យសម្បត្តិ៖ ២១.២ ពាន់លានដុល្លារអាម៉េរិក
-ប្រភពចំណូល៖ គ្រប់គ្រងហិរញ្ញវត្ថុវិនិយោគ
-សញ្ជតិ៖ អាម៉េរិក

April 6, 2022

កូវីដ-១៩ នៅ កម្ពុជា! រកឃើញអ្នកឆ្លងថ្មី ២២ នាក់ទៀត ក្នុងថ្ងៃទី ០៥ មេសា ២០២២

អ្នកវិជ្ជមាននឹង កូវីដ-១៩ ចំនួន ២២ នាក់ ដែលទើបតែបានរកឃើញក្នុងអំឡុង ២៤ ម៉ោងនៃថ្ងៃទី ០៥ មេសា គឺសុទ្ធតែជាករណីវិជ្ជមាននឹង អូមីក្រុង និងសុទ្ធតែជាករណីឆ្លងក្នុងសហគមន៍។

April 6, 2022

មហាសេដ្ឋី ១២ រូប ដែលមានវ័យនៅក្មេងបំផុតក្នុងពិភពលោក សម្រាប់ឆ្នាំ ២០២២

ក្រុមមហាសេដ្ឋីដែលមានវ័យនៅក្មេងបំផុតក្នុងសកលលោកនាឆ្នាំនេះ សុទ្ធតែមានអាយុក្រោម ៣០ ឆ្នាំ ក្នុងនោះមានពាក់កណ្ដាលគឺជាអ្នករកស៊ីមានបានពីបាតដៃទទេ។ នេះបើយោថាតាមទស្សនាវដ្ដី Forbes របស់ សហរដ្ឋអាម៉េរិក។

១-Kevin David Lehmann

-អាយុ៖ ១៩ ឆ្នាំ
-ទ្រព្យ៖ ២.៤ ពាន់លានដុល្លារអាម៉េរិក
-ប្រភពចំណូល៖ លក់ឱសថ
-សញ្ជាតិ៖ អាល្លឺម៉ង់

២-Alxandra Andresen

-អាយុ៖ ២៥ ឆ្នាំ
-ទ្រព្យ៖ ១.៣ ពាន់លានដុល្លារអាម៉េរិក
-ប្រភពចំណូល៖ ក្រុមហ៊ុនវិនិយោគ
-សញ្ជាតិ៖ ន័រវែស

៣-Pedro Franceschi

Pedro Franceschi (ឆ្វេង) និង Henrique Dubugras

-អាយុ៖ ២៥ ឆ្នាំ
-ទ្រព្យ៖ ១.៥ ពាន់លានដុល្លារអាម៉េរិក
-ប្រភពចំណូល៖ Fintech
-សញ្ជាតិ៖ ប្រេស៊ីល

៤-Wang Zelong

-អាយុ៖ ២៥ ឆ្នាំ
-ទ្រព្យ៖ ១.៥ ពាន់លានដុល្លារអាម៉េរិក
-ប្រភពចំណូល៖ ក្រុមហ៊ុនផលិតធាតុគីមី
-សញ្ជាតិ៖ ចិន

៥-Henrique Dubugras

-អាយុ៖ ២៦ ឆ្នាំ
-ទ្រព្យ៖ ១.៥ ពាន់លានដុល្លារអាម៉េរិក
-ប្រភពចំណូល៖ Fintech
-សញ្ជាតិ៖ ប្រេស៊ីល

៦-Katharina Andresen

-អាយុ៖ ២៦ ឆ្នាំ
-ទ្រព្យ៖ ១.៣ ពាន់លានដុល្លារអាម៉េរិក
-ប្រភពចំណូល៖ ក្រុមហ៊ុនវិនិយោគ
-សញ្ជាតិ៖ ន័រវែស

៧-Austin Russell

-អាយុ៖ ២៧ ឆ្នាំ
-ទ្រព្យ៖ ១.៦ ពាន់លានដុល្លារអាម៉េរិក
-ប្រភពចំណូល៖ បច្ចេកវិទ្យារថយន្ត
-សញ្ជាតិ៖ អាម៉េរិក

៨-Ryan Breslow

-អាយុ៖ ២៧ ឆ្នាំ
-ទ្រព្យ៖ ២ ពាន់លានដុល្លារអាម៉េរិក
-ប្រភពចំណូល៖ ពាណិជ្ជកម្មអេឡិចត្រូនិក
-សញ្ជាតិ៖ អាម៉េរិក

៩-Gary Wang

-អាយុ៖ ២៨ ឆ្នាំ
-ទ្រព្យ៖ ៥.៩ ពាន់លានដុល្លារអាម៉េរិក
-ប្រភពចំណូល៖ រូបិយវត្ថុឌីជីថល
-សញ្ជាតិ៖ អាម៉េរិក

១០-Gustav Magnar Witzoe

-អាយុ៖ ២៨ ឆ្នាំ
-ទ្រព្យ៖ ៤.៥ ពាន់លានដុល្លារអាម៉េរិក
-ប្រភពចំណូល៖ ជលផល
-សញ្ជាតិ៖ ន័រវែស

១១-Stanley Tang

-អាយុ៖ ២៨ ឆ្នាំ
-ទ្រព្យ៖ ១.២ ពាន់លានដុល្លារអាម៉េរិក
-ប្រភពចំណូល៖ សេវាប្រគល់អាហារ
-សញ្ជាតិ៖ អាម៉េរិក

១២-Andy Fang

-អាយុ៖ ២៩ ឆ្នាំ
-ទ្រព្យ៖ ១.១ ពាន់លានដុល្លារអាម៉េរិក
-ប្រភពចំណូល៖ សេវាប្រគល់អាហារ
-សញ្ជាតិ៖ អាម៉េរិក

April 6, 2022

ទ្រព្យសម្បត្តិរបស់ក្រុមមហាសេដ្ឋីនៅ ប្រទេសរុស្ស៊ី ថយចុះមកនៅទាបជាងឆ្នាំមុនយ៉ាងឆ្ងាយ

សង្គ្រាមនៅ អ៊ុយក្រែន ការដាក់ទណ្ឌកម្ម រួមនឹងបញ្ហាប្រាក់រូប្លរុស្ស៊ី ធ្លាក់ថ្លៃ បានធ្វើឱ្យទ្រព្យរបស់ក្រុមអ្នកមានជាងគេនៅ ប្រទេសរុស្ស៊ី «រលាយអស់» ២៦៣ ពាន់លានដុល្លារអាម៉េរិក។

អ្នកមាននៅ រុស្ស៊ី ចំនួន ៨៣ នាក់ មានឈ្មោះនៅក្នុងបញ្ជីចំណាត់ថ្នាក់មហាសេដ្ឋីពិភពលោកឆ្នាំ ២០២២ របស់ទស្សនាវដ្ដី Forbes ដែលតួលេខនេះ ថយចុះច្រើន បើធៀបនឹង ១១៧ នាក់ កាលពីឆ្នាំ ២០២១។ ក្រុមមហាសេដ្ឋីនៅ រុស្ស៊ី បច្ចុប្បន្នមានទ្រព្យសរុប ៣២០ ពាន់លានដុល្លារអាម៉េរិក តិចជាងឆ្នាំកន្លង ២៦៣ ពាន់លានដុល្លារ។

គិតជាមធ្យម មហាសេដ្ឋីម្នាក់នៅ រុស្ស៊ី បាត់បង់ទ្រព្យអស់ ២៧% ស្មើនឹង ២ ពាន់លានដុល្លារអាម៉េរិក/ម្នាក់។ មហាសេដ្ឋីដែលបាត់បង់ទ្រព្យច្រើនជាងគេរួមមាន Leonid Mikhelson (បាត់បង់ ១០.៩ ពាន់លានដុល្លារ), Alexey Mordashov (បាត់បង់ ១៥.៩ ពាន់លានដុល្លារ), Gennady Timchenko (បាត់បង់ ១០.៧ ពាន់លានដុល្លារ), Vagit Alekperov (បាត់បង់ ១៤.៤ ពាន់លានដុល្លារ), Suleiman Kerimov (បាត់បង់ ១១.៤ ពាន់លានដុល្លារ) និង Tatyana Bakalchuk (បាត់បង់ ១០.៩ ពាន់លានដុល្លារ)។

លោក Alexey Mordashov (ស្ដាំ) បាត់បង់ ១៥.៩ ពាន់លានដុល្លារ

ឆ្នាំនេះ កំពូលអ្នកមានចំនួន ៣៥ នាក់ របស់ រុស្ស៊ី បានធ្លាក់ចេញពីបញ្ជីចំណាត់ថ្នាក់មហាសេដ្ឋី ក្នុងនោះមានទាំង Ogleg Tinkov ស្ថាបនិករបស់ Tinkoff Bank និង Arkady Volzh ដែលជា CEO របស់ Yandex។

រុស្ស៊ី មានមហាសេដ្ឋីថ្មីតែ ២ រូបប៉ុណ្ណោះ នៅក្នុងបញ្ជីចំណាត់ថ្នាក់របស់ Forbes នាឆ្នាំ ២០២២ នេះ។ នោះគឺ Denis Sverdlov ដែលជា CEO របស់ក្រុមហ៊ុនផលិតរថយន្តអគ្គិសនី Arrival មានការិយាល័យកណ្ដាលនៅ អង់គ្លេស និង Egor Kulkov សហស្ថាបនិករបស់ក្រុមហ៊ុនផលិតឱសថ Pharmstandard នៅ មូស្គូ។

April 6, 2022

អាម៉េរិក ត្រៀមចេញបទបញ្ជា «ហាមការវិនិយោគថ្មី ទៅក្នុង ប្រទេសរុស្ស៊ី»

ប្រភពព័ត៌មានមួយបានឱ្យដឹងថា សហរដ្ឋអាម៉េរិក រួមនឹងក្រុមប្រទេស G៧ និង សហភាពអឺរ៉ុប (EU) នឹងហាមការវិនិយោគថ្មីទៅក្នុង ប្រទេសរុស្ស៊ី ដើម្បីជាការដាក់ទណ្ឌកម្មបន្ថែម បន្ទាប់ពី ទីក្រុងមូស្គូ បានចូលឈ្លានពានទឹកដីរបស់ អ៊ុយក្រែន។

បទបញ្ជាសហការថ្មីទាំងឡាយ រវាង អាម៉េរិក, G៧ (The Group of Seven គឺជាវេទិកានយោបាយអន្តររដ្ឋាភិបាល ដែលមានប្រទេសចំនួន ៧ ជាសមាជិក រួមមាន កាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និង សហរដ្ឋអាមេរិក) និង EU ដែលគ្រោងនឹងប្រកាសនៅថ្ងៃនេះ នឹងរួមមានទាំងបទបញ្ជា ហាមឃាត់រាល់ការវិនិយោគថ្មីទៅក្នុង ប្រទេសរុស្ស៊ី, ការបង្កើនការដាក់ទណ្ឌកម្មប្រឆាំងស្ថាប័នហិរញ្ញវត្ថុ និងក្រុមហ៊ុនរបស់ រុស្ស៊ី និងការដាក់ទណ្ឌកម្មលើ មន្ត្រីរដ្ឋាភិបាលរុស្ស៊ី និងសមាជិកគ្រួសាររបស់ពួកគេ។ នេះបើតាមការឱ្យដឹងពីប្រភពព័ត៌មានច្បាស់ការណ៍មួយដែលបានចែករំលែកកាលពីថ្ងៃទី ៥ មេសា។

សាកសពពលរដ្ឋស៊ីវិលអ៊ុយក្រែន ច្រើននាក់ ត្រូវបានរកឃើញនៅតំបន់ Bucha បន្ទាប់ពី ទាហានរុស្ស៊ី បានចាកចេញ

ប្រភពព័ត៌មានដែលសុំមិនបញ្ចេញឈ្មោះខាងលើបន្ថែមថា ការដាក់ទណ្ឌកម្មថ្មីបំផុត ប្រឆាំងនឹងសេដ្ឋកិច្ចរបស់ រុស្ស៊ី នេះ ត្រូវបានធ្វើឡើងបន្ទាប់ពី ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី បានចោទប្រកាន់លើ កងទ័ពរុស្ស៊ី ថា បានសម្លាប់ជនស៊ីវិលនៅទីរួមស្រុក Bucha ក្នុង ប្រទេសអ៊ុយក្រែន។

April 6, 2022

អាម៉េរិក-អង់គ្លេស-អូស្ត្រាលី អភិវឌ្ឍអាវុធល្បឿនលឿនជាងសំឡេង ៥ ដង (Hypersonic)

សម្ព័ន្ធមិត្ត AUKUS យល់ព្រមសហការគ្នាអភិវឌ្ឍអាវុធល្បឿនលឿនជាងសំឡេង ៥ ដង និងសក្ដានុពលនៃការប្រើប្រាស់អាវុធអេឡិចត្រូនិក ទន្ទឹមនឹងកិច្ចព្រមព្រៀងផលិតនាវាមុជទឹកនុយក្លេអែរ សម្រាប់ អូស្ត្រាលី។

ប្រធានាធិបតីអាម៉េរិក លោក ចូ បៃដិន, នាយករដ្ឋមន្ត្រីអង់គ្លេស លោក បូរីស ចនសុន និងនាយករដ្ឋមន្ត្រីអូស្ត្រាលី លោក ស្កុត ម៉ូរីសុន កាលពីម្សិលមិញបានបង្ហាញការពេញចិត្តចំពោះវឌ្ឍនភាពនៃកម្មវិធីអភិវឌ្ឍនាវាមុជទឹកនុយក្លេអែរ សម្រាប់ ទីក្រុងកង់បេរ៉ា។ ទន្ទឹមនឹងនេះ មេដឹកនាំទាំង ៣ ខាងលើ ក៏បានឯកភាពគ្នាក្នុងការពង្រីកទៅក្នុងវិស័យផ្សេងៗនៅក្នុងសម្ព័ន្ធមិត្ត AUKUS ផងដែរ។

«យើងបានសម្រេចដំណើរការកិច្ចសហប្រតិបត្តិការត្រីភាគី ក្នុងវិស័យអាវុធល្បឿនលឿនជាងសំឡេង ៥ ដង និងយុទ្ធសាស្ត្រទប់ទល់នឹងអាវុធប្រភេទនេះ ក៏ដូចជាកសាងសក្ដានុពលនៃការប្រយុទ្ធដោយអេឡិចត្រូវនិក» សេចក្ដីប្រកាសរួមបន្ទាប់ពីកិច្ចពិភាក្សាតាមទូរស័ព្ទរវាងរវាងមេដឹកនាំប្រទេសទាំង ៣ មានឃ្លាសរសេរដូច្នេះ។

សហរដ្ឋអាម៉េរិក និង អូស្ត្រាលី កំពុងអភិវឌ្ឍកម្មវិធីអាវុធល្បឿនលឿនជាងសំឡេង ៥ ដង (Hypersonic) ដែលមានឈ្មោះថា SCIFiRE។ អង់គ្លេសនឹងមិនចូលរួមក្នុងគម្រោងនេះនាពេលបច្ចុប្បន្ន ប៉ុន្តែ សម្ព័ន្ធមិត្ត AUKUS នឹងសហការគ្នាដើម្បីស្រាវជ្រាវ និងអភិវឌ្ឍ បង្កើនជម្រើសសម្រាប់កម្មវិធីអាវុធល្បឿនលឿនជាងសំឡេងទាំងឡាយ។

អាវុធ Hypersonic ហោះក្នុងល្បឿនលឿនជាងសំឡេងយ៉ាងតិច ៥ ដង ប្រហែលជាង ៦,២០០ គីឡូម៉ែត្រ/ម៉ោង។ ចំណែកអាវុធដែលហោះលឿនជាងសំឡេង ប៉ុន្តែ មិនលើសពី ៥ ដង ត្រូវបានគេហៅថា Supersonic៕

April 6, 2022

ប្រហែល «ស្អប់» Facebook ខ្លាំងពេក ទើបមហាសេដ្ឋី Elon Musk ក្លាយជាម្ចាស់ភាគហ៊ុនធំជាងគេរបស់ Twitter

យោងតាមឯកសាររបស់គណៈកម្មការមូលបត្រអាម៉េរិក (SEC) លោក Elon Musk បច្ចុប្បន្នគឺជាអ្នកកាន់កាប់ភាគហ៊ុន Twitter ចំនួន ៩.២% ធ្វើឱ្យលោកក្លាយជាម្ចាស់ភាគហ៊ុនធំជាងគេបង្អស់នៅក្នុងបណ្ដាញសង្គមនេះ។

ចំនួនភាគហ៊ុនរបស់មហាសេដ្ឋី Musk គឺច្រើនជាងសហស្ថាបនិករបស់ Twitter លោក Jack Dorsey ដែលមានតែ ២.២៥%។

ភាគហ៊ុនរបស់ Twitter បានកើនឡើង ២៥% បន្ទាប់ពីព័ត៌មានខាងលើត្រូវបានបង្ហើប។ ភាគហ៊ុនរបស់លោក Musk មានតម្លៃប្រហែល ២.៨៩ ពាន់លានដុល្លារ នេះបើយោងតាមតម្លៃទីផ្សារដែលបានបិទទ្វារកាលពីថ្ងៃសុក្រសប្ដាហ៍មុន។

ការដែលនាំឱ្យលោក Musk ក្លាយជាម្ចាស់ភាគហ៊ុនធំជាងគេនៅ Twitter ទំនងជាមកពីលោកមិនចូលចិត្ត Facebook។ កាលពីពេលកន្លងទៅ លោក Musk ធ្លាប់បានធ្វើការស្ទង់មតិនៅលើ Twitter ស្ដីពីការគោរពសេរីភាពក្នុងការបញ្ចេញមតិរបស់បណ្ដាញសង្គមនេះ។ លទ្ធផលបង្ហាញថា មានអ្នកលេង Twitter ជាង ៧០% ឆ្លើយថា Twitter មិនគោរពសេរីភាពបញ្ចេញមតិ ចំណែកជាង ២៩% ឆ្លើយថា គោរព។

មហាសេដ្ឋី Elon Musk និង មហាសេដ្ឋី Zuckerberg

ដូច្នេះ ក្រុមអ្នកវិភាគយល់ថា ការដែលលោក Musk ទិញភាគហ៊ុនយ៉ាងច្រើនរបស់ Twitter អាចថា មកពីលោកចង់បង្វែរទិសដៅរបស់ Twitter ទៅរកភាពវិជ្ជមាន គឺការគោរពសិទ្ធិបញ្ចេញមតិឱ្យបានច្រើនជាងមុន។

ជាងនេះ លោក Elon Musk គឺជា «សត្រូវធំ» របស់ Mark Zuckerberg ដែលជាម្ចាស់ Facebook និងជាគូប្រជែងរបស់ Twitter។

កន្លងមក លោក Musk ក៏ធ្លាប់បានឱ្យក្រុមការងាររបស់លោក លុបចោលទំព័រ Facebook របស់ ក្រុមហ៊ុន SpaceX និង Tesla ផងដែរ។ មហាសេដ្ឋីរូបនេះ ធ្លាប់បង្ហោះសារស្នើឱ្យគ្រប់គ្នាលុបបណ្ដាញសង្គមនេះចេញពីទូរស័ព្ទ និងងាកទៅប្រើកម្មវិធីផ្ញើសារដែលបំប្លែងជាកូដ Sinnal ទៀតផង។

April 5, 2022

Author: សឿន សំណាង